Samoan Devotional

OPEN HEAVENS

MATALA LE LAGI MO LE ASO TOONAI 9 SETEMA 2023

Manatu Autu: Galuega o le Alofa Tunoa 4 (The Works of Grace 4) 

Tauloto – Tusi Paia: Galuega 1:8 ‘Ae peita‘i o le a maua e ‘outou le mana, pe ā afio ifo le Agaga Pa‘ia i luga ‘iā te ‘outou; e fai fo‘i ‘outou ma molimau ‘iā te a‘u i Ierusalema ma Iutaia uma lava, ma Samaria, e o‘o lava i le tulu‘iga o le lalolagi.”..’

Faitauga - Tusi Paia: Esekielu 36:27-28

Upu Folafola

A’o fa’aauau pea la tatou mataupu o galuega o le alofa tunoa, o le a se’i o tatou va’ava’ai I le papatisoga a le Agaga Paia I le asō. Ina ua uma ona fesoasoani le Atua iā te oe e te filifili e fai lona finagalo I lou lava loto e aunoa ma le fa’amalosia, ona ia papatisoina lea o oe i lona Agaga. A’o fa’atoā avea i tatou ma kerisiano na tatou faalogo fai mai, “E tatau ona fa’amamāina oe faatoa amata ai ona e ole atu mo le papatisoga I le Agaga Paia.” O le Papatisoga a le Agaga Paia e mata’utia tele, ma e mafai ona afaina ai se tagata.

I aso la, sa fai taulaga tagata i o latou lava loto fuatia ifo - e le’i mana’omia se isi e sau e lauga atu ia te oe. Sa tatou loto fiafia e foa’i mo lē na faaolaina i tatou. Ua ia aumaia mo i tatou se loto fou - o se loto aano. O aso fo’i ia e lē mafai ona avea oe o se tagata galue I totonu o le ekalesia vagana ua faamamāina oe auā o le au faigaluega sa ofoina atu ma le lotomalie o latou taimi ma lo latou tamāoaiga I le Atua. Se’iloga e uma ona faamamāina oe, ona fa’atoā mafai lea ona faatuatuaina oe e le Atua e foai atu i ai lona Agaga Paia ma lona mana. E lē mafai ona afio Agaga Paia i se loto o loo i ai pea le finauvale ma le lē gaua’i, faamaualuga ma le lē usita’i.

E o’o mai le papatisoga a le Agaga Paia faatasi ma le mana. (Galuega 1:8) ma o lea e ao ai ona faamamaina oe muamua fa’atoā oo mai ai. Le au Pele e, o Agaga Paia e pei o se pomu. E leai se isi na te avea se pomu i se tasi e le’i lava tapena. A e alu I le ami ma avea oe ma fitafita, e te ui muamua I le tele o a’oa’oga ma toleniga ma e uma ifo ua toeititi pei oe o se tagata na oti (tulou). O le a e faia uma faatonuga e fai atu e ou ta’ita’i e aunoa ma ni fesili. A avea oe ma Kerisiano, ua e i ai i le autau a le Atua ma seiloga ua oti lou tagata tuai, faatoa avatu e le Atua iā te oe lona mana. E ese mai iā i latou o faa foliga o loo galulue I le mana o le Atua a’o amio e lē atagia ai Keriso; fa’ata’ita’iga o Simona le faataulaitu sa mafai na ia faia ni faiga faa maneta (magic). Afai e te mana’o i le mana moni o le Atua e ao ona fa’amamāina muamua oe. O galuega a le tino, e lē tatau ona toe i ai i lou olaga ina ia faapea ona sasa’a atu e le Atua lona mana ia te oe.

A galue mai le papatisoga a Agaga Paia, o le tasi o faailoga mautinoa o le tautala I gagana ese. E leai se isi e ta’ua atu ia te oe sau tala e fai. O le aso na papatisoina ai a’u e Agaga Paia, sa ese lea tulaga na o’u o’o i ai, o le Atua lava na ia aveina la’u taavale i lo’u fale auā pau le mea na o’u iloa, ua lē mafai ona o’u taofia lo’u laulaufaiva i le tautala I se gagana ou te lē malamalama ai. O le ituaiga fa’au’uga lenei o loo avanoa fo’i mo oe, pe afai ua fa’amamāina oe. A e maua le malosi ma le mana lea, o le a avea oe ma molimau a le Atua e pei ona taua i le Galuega 1:8 faapea, “ A e peita’i o le a maua e outou le mana, pe a afio ifo le Agaga Paia i luga ia te outou; e fai fo’i outou ma molimau iā te a’u i Ierusalema, ma Iutaia uma lava, ma Samaria e o’o lava i le tuluiga o le lalolagi.”

OPEN HEAVENS

MATALA LE LAGI MO LE ASO FARAILE 8 SETEMA 2023

Manatu Autu: Galuega o le Alofa Tunoa 3 (The Works of Grace 3) 

Tauloto – Tusi Paia: 1 Korinito 6:11 ‘Sa fa‘apea fo‘i nisi o ‘outou; a ‘ua tā‘e‘ele ‘outou, a ‘ua fa‘apa‘iaina ‘outou, a ‘ua ta‘uamiotonuina ‘outou i le suafa o le Ali‘i o Iesu Keriso, i le Agaga fo‘i o lo tatou Atua..’

Faitauga - Tusi Paia: 1 Tesalonia 4:2-7

Upu Folafola

Sa tatou suesue I vaega e lua muamua o galuega a le alofa tunoa I aso e lua ua tuanai. O le a tatou talanoa I le asō I le vaega lona tolu. O le vaega lona tolu o galuega o le alofa tunoa o le mea e tupu ina ua maea ona avea ma fanau a le Atua ina ua faamamaina a tatou agasala I le toto o Iesu. O le Alii I le vaega lea, e na te taitaiina mai se vaega o tagata ia latalata ia te ia. Fai mai le Mataio 22:14  Auā e to‘atele e ‘ua tala‘iina ‘ae to‘aitiiti ē ‘ua filifilia.” E na o se vaega itiiti e taua o ē pele I le Atua Silisili Ese. 

I aso ia ua leva, e mafai e le tupu ona toatele ana ava e fai, ae e iai lava le ava e pele ia te ia. A maea le faaolataga, e iai lava se vaega filifilia e latalata atu I le Atua I lo isi. E le pei I latou o le toatele, e alolofa atu I le Atua, e sili atu ona faamaoni e auauna I le Atua. O I latou ia e lē o mai ina ia maua ni a latou mea ae latou te auauna I le Atua tusa po’o le a le tau. E faaigoaina ia tagata o le au faamamaina, o I latou ua vavae eseina mo le Atua. 

O nei tagata ua taua o le au faamamaina, ua latou maua ni loto fou. Fai mai le Esekielu 36:26 ‘Ou te avatu fo‘i ‘iā te ‘outou le loto fou ma ‘ou tu‘u i totonu ‘iā te ‘outou le agaga fou; ‘ou te ‘ave‘esea le loto ma‘a‘a a‘i o ‘outou tino ma ‘ou avatu ‘iā te ‘outou le loto ‘a‘ano. E toatele kerisiano e lē o’o I le tulaga lea ae lei maliliu ma o se faanoanoaga. O le tulaga lea e ese ma le toatele o kerisiano, peitai e toaitiiti lava o lo’o ola faapaiaina. 

O le tagata e vavaeeseina e le Atua mo ia, e tatau ona matua ia tetee atu I le lalolagi. Ma e leai se mea I le lalolagi e mafai ona tosina ese o ia mai le Atua. O I latou ia e mafai ona faapea mai e tutusa lelei ma Paulo I le Kalatia 2:20 ‘Ua fa‘asatauroina fa‘atasi i mā‘ua ma Keriso; ‘ou te lē toe ola a‘u, a o Keriso o lo‘o ola i totonu ‘iā te a‘u; o le ola fo‘i ‘ou te ola ai nei i le tino, ‘ou te ola ai lava i le fa‘atuatua i le Alo o le Atua, o lē na alofa mai ‘iā te a‘u, ma foa‘iina mai e ia o ia mo a‘u.

I aso ua tuanai, o se tasi o auala e mafai ai ona iloa gofie tagata ia ua faamamaina, o le faigata ia ona faaita, e le ita gofie. E matua taulai la latou vaai I le faatoanofotane, le Alii o Iesu Keriso, e faigata ona e faaitaina. O tagata faamamaina, o I latou ia e amoina so’o se sese ma le filemu, ae ia ‘aua lava nei faapea seisi e lei faaolaina ‘e fai mai foi o fanau a le Atua’. Tatalo ma ole atu I le Atua ia faamamaina oe, lou aiga faapea tagata uma o lau aulotu, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 7 SETEMA 2023

Manatu Autu: Galuega o le Alofa Tunoa 2 (The Works of Grace 2) 

Tauloto – Tusi Paia: Esekielu 36:25 ‘Ona ‘ou sausauina lea o ‘outou i le vai manino, ‘ona mamā ai lea o ‘outou; ‘ou te fa‘amamāina fo‘i ‘outou i lo ‘outou leaga uma ma a ‘outou tupua uma.’.

Faitauga - Tusi Paia: Isaia 1:18

Upu Folafola

Ua tatou iloa o galuega muamua o le alofa tunoa o le Atua, o le valaau lea a le Atua i le tagata mo le faaolataga. O le taimi lava e talia ai e se tagata lenei valaau, ma ia lafoai mea uma i le Atua,  e siitia I le isi tulaga o le alofa tunoa –o le faaolataga. Fai mai le 1 Ioane 1: 7

‘Ae ‘āfai tatou te sāvavali i le malamalama, fa‘apei ‘ona i ai o ia i le malamalama, ‘ona tatou mafuta fa‘atasi ai lea o le tasi ma le tasi, o le toto fo‘i o Iesu Keriso lona Alo e fa‘amamāina ai i tatou i agasala uma lava.

O le fa'aolataga, o le vaega lea e faamama ma aveese uma ai e le Atua au agasala uma mai aso ua tuana'i ma avatu ia te oe le avanoa e toe amata lelei ai lou olaga. E toʻatele tagata e faigatā ona talitonu, e mafai e le Atua ona faamamāina atoatoa a latou agasala, ae o le mea moni lenā. E le afaina po’o le a le leaga o au agasala; E mafai e Iesu ona toe tapue lou olaga ma avea oe o se tagata fou. O le mafuaaga lea e ta’ua ai le talia o le faaolataga o le 'toe fanaufouina'. E leai se mafuaaga e toe tuuaia ai oe e le tiapolo, ona o se agasala ua mavae.

A e maua le faaolataga, o le vaega muamua lava e te matauina, o lou mauaina lea o le filemu, ua faatusaina o se vaitafe e tafe lemu. E mafua ona o agasala o se avega e mamafa tele I totonu o lou loto. Fai mai le Mataio 11:28-30 a maea ona tosina mai oe e Iesu ia te ia, e mafai ona e filifili e te amoina le amo a Iesu, ona ia amoina lea o lau amo ma e maua le malologa a lou agaga. O le avega na te aveesea mai ia te oe o agasala ia. O le taimi lava e aveesea ai avega nei, e filemu lou agaga. O lenei filemu e faigata ona faamatalaina ae a e oo i ai, e te iloa lava. Afai e te leʻi oʻo i ai muamua, o lona uiga e te manaʻomia Iesu e laveaʻiina oe ma faʻamamāina oe mai au agasala uma. Afai e te le o mauaina lena filemu, e tatau ona e toe tatalo I le Faaola ma toe tuuina atu lou ola atoa ia te ia.

O le vaega lona lua e faamaufaailoga ai le faaolataga, o le olioli – o le olioli i le Alii. E le mafai ona natia nei ituaiga o fiafiaga I lou loto. O le Aso Gafua ina ua maea ona tuuina atu loʻu ola ia Keriso, a’o ou iai I le faigaluega, na iloa e loʻu pule le olioli o lou agaga ma lou fiafia tele. Na ia fesili mai pe na ou auai i se pati, ae o le mea moni, na ou maua se tusi valaaulia i se faaipoipoga, o aʻu o le faatoanofotane a o Iesu o le alii faaipoipo. O le taimi lava e faamamaina ai au agasala, e amata loa ona olioli o lou agaga. So'o se tasi lava ua solomuli I tua lona olaga, na te iloa lava le mou malie atu o le olioli sa masani ai. O le mafuaaga lena na fai mai ai Tavita i le tusi a Salamo 51:12 Ia e fa‘afoisia mai ‘iā te a‘u le ‘oli‘oli o le olataga mai ‘iā te oe; ‘ia e tāofimauina fo‘i o a‘u ma le loto fiafia.

Tatalo

Tama, faamolemole ia e faamama ia te a’u e ala I le toto o Iesu, Amene. 

OPEN HEAVENS

MATALA LE LAGI MO LE ASO LULU 6 SETEMA 2023

Manatu Autu: Galuega o le Alofa Tunoa 1 (The Works of Grace 1) 

Tauloto – Tusi Paia: Isaia 1:18 ‘O lo‘o o fa‘apea mai le ALI‘I: Ō mai ia, ‘inā tatou filifili ia, e ui lava ‘ina pei o ‘ofu mūmū a ‘outou agasala, e sisina ia e pei o le kiona; e ui lava ‘ina mūmū ia e pei o le ‘ie ulaula, e ‘avea e pei o fulufulu mamoe’.

Faitauga - Tusi Paia: Esekielu 36:24-27

Upu Folafola

O le tamoega a le au kerisiano o se tamoega e umi ma mamao, e le o se tuuga puupuu. O nisi o tatou e manatu e toe afio mai Iesu I totonu o ni nai tausaga talu ona tatou faaolaina. E ui e lei afio mai lava, ae talitonu mai ua latalata mai e sili atu I tausaga ua tuanai. E vave ona taunuu lona toe afio mai. Ona o lenei tamoega e umi ma mamao, e le gata e te manaomia le malosi, e te manaomia le onosai e tausinio ai pe afai e te naunau e taunuu ma le manuia. O le onosai e tausinio ai e maua I le alofa tunoa faapitoa a le Atua e na te foai atu ia te oe ina ia tumau pea ona e tulai seia o’o I le iuga. O galuega nei o le alofa tunoa. 

Ina ua ou faatoa faaolaina, na aoaoina I matou e tolu galuega o le alofa tunoa e tuuina mai e le Atua I le au kerisiano, o le faaolataga, faamamaina ma le papatisoga o le Agaga Paia. Na ou suesue atili ma iloa ai e fitu ni laasaga e manaomia. Mai le tatou faitauga o le Tusi Paia o le aso, o lo’o faaalia ai o le tulaga muamua e faia e le Atua ae lei o’o I le tulaga o le faaolaina, o le faia lea e le Tama ia e tosina mai ia te ia (Ioane 6:44). E le mafai ona e faaolaina sei vagana ua tosina mai oe e le Atua ia te ia. 

Ina ua ou sau lava I le Redeemed Christian Church of God, na ou sau ona o so’u faafitauli ua le mafai e le poto o le  aoaoina ona fofo ma ua faaaogaina e le Atua lea faafitauli e tosina mai ai a’u ia te ia. A ou faalogo I se tagata o talanoa I se tautinoga ma faapea mai ua ia maua le Alii, o lo’o talanoa mai e aunoa ma le malamalama. E le’i faapea na misia e le Atua, o ia na ia maua ia te oe (Ioane 15:16). O le mafuaaga lea a faapea ua e faaolaina moni, e tatau ona e faafetai pea I le Atua mo le faaolaina o lou agaga. 

E mafai foi e le Atua ona tosina mai se tagata ae tetee lea tagata e sau ia te ia. O le I’uga o ia ituaiga tagata e matuia. E iai se matai e tauoloa e masani ona auina a’u e le Atua e lauga iai  le faaolataga, ma o taimi uma ou te alu atu ai e faapea mai lava ‘sei toetiiti’. E iai se aso na oso ai lona ma’I ma ua leiloa seisi, na valaau mai lona aiga sei ou tatalo mo ia, ma I totonu o le itula, ua toe faafoisia lona malosi atoatoa e pei lava e leai se mea na tupu. Na ou fai loa iai, e pei lava o lo’o tuuina atu e le Atua le taimi mulimuli ia te oe, e te fia tuuina atu lou ola ia Keriso I le taimi lenei? Na ia faapea mai ‘toeititi lava’. O leisi taimi na ou faalogo ai ia te ia, ua maliu. Afai o lo’o galue pea le Atua e tosina mai oe ia te ia ae o lo’o e musu pea, o lo’o ta’u atu ia te ia e sili atu ia te oe Seoli nai lo le lagi. E sili ona lafoai lou ola ia te ia I le aso mo lou lelei. Suesue lelei lou tagata, o e teena pea le valaau a le Atua ia e ola faapaiaina? I le suafa o Iesu, Amene.  

OPEN HEAVENS

MATALA LE LAGI MO LE ASO LUA 5 SETEMA 2023

Manatu Autu: Faalautele (Enlarge) 

Tauloto – Tusi Paia: Isaia 54:2 ‘Ia fa‘alautele le mea e tu ai lou fale ‘ie; ‘ia fāloina ‘ie puipui o mea ‘e te nofo ai. ‘Aua ‘e te fa‘aitiitia; ‘ia fa‘aumiumiina au maea ma ‘ia malolosi au fao’.

Faitauga - Tusi Paia: Isaia 54:2-5

Upu Folafola

O le faalautelē o lona uiga o le fa’aopoopo o le tele o le tulaga o iai, e atagia ai e lua vaega e aofia ai, o le tagata o le a fa’alauteleina ma Lē o le a fa’atinoina le fa’alautele. O oe le tagata o le a fa’alautele, a o Lē e faatinoina le faalautele o loo ta’ua i le tusi o Kenese 1: 28 “Ua fa‘amanuia fo‘i e le Atua ‘iā te i lā‘ua ma ‘ua fetalai atu le Atua ‘iā te i lā‘ua, “‘Ia fanafānau ia ma ‘ia uluola, ma ‘ia tumu ai le lalolagi, ‘ia fa‘ato‘ilalo i ai, ‘ina ‘ia pule i i‘a i le sami ma manu felelei, ‘atoa ma mea ola uma e fetolofi i le ‘ele‘ele.”.

E lei faapea mai “Ia fanafanau ma faia se siitaga” ae sa faapea mai, “ia fanafanau ma uluola”. O lona uiga afai e te fuatele mai ma fanafanau, o le a e uluola, o le uiga tonu lea o le fua tele mai ma le fanafanau. E le finagalo le Atua i le fa’aopoopooina a o le faateleina. E ao ona e sa’iliili ia faatele ma toe faateleina.

Pe aisea ua malie ai tagata e aofia ai ma kerisiano ia tumau ai pea i le tulaga e tasi? O nisi ua faamalieina pe a maua sina siitaga i lona totogi i le ta’i lua tausaga, o nisi foi faife’au ua fa’amalieinena i le nofonofo ai I le Ekalesia e tasi ae o loo tumau pea le numera o tagata lotu mo le tele o tauasaga. E tutusa lelei ma se tapu, pe a e manatu i le fetalaiga a Lē na faapea mai: “Ia fanafanau ma uluola” E iai se upu fai so’o e faapea mai: ‘O lapisi i totonu, o lapisi i fafo’. O le fua mai o lo’o e silasila atu iai, o fua na o au galuega ua faatinoina. Afai lava e te naunau i le fa’atuputeleina ma fanafanau, e ao foi ona faatele ni au galuega faatino, faatele mea uma o loo e faia ina ia maua tulaga ausia ua e tausinio iai. Afai e te faia lea tulaga o le a faatuputeleina ai taunuuga manuia. 

O le faatele e iai ona vaega, o nisi o tagata e fua mai tai tolusefulu, o isi e tai ono sefulu, a’o nisi e tai selau. Ia faatele le gaioiga e te tuua i totonu e fua i le tele o se faasiliga  e te naunau e ‘ausia. Ia fa’atele lau tatalo, suesuega, galuega, foa’i ma isi tulaga uma. A o lei faia le matou polokalame tele I le 1998 lea sa ausia ai  se matāti’a maoa’e i le numera o tagata auai i se sauniga lotu i lena vaitau, sa ou ta’utino i a’u pa’aga i lena taimi, o ni a’u anapogi maoa’e sa ou faia muamua, e le taitai ona faatusa I le tulaga o le anapogi e manaomia mo le faamoemoe lenei, ona o le maualuga o le taunuuga o lenei faamoemoe o loo matou faatuatua ai I le Atua. Fai mai le Luka 6: 38 “Aua o le fua tou te fuaina atu ai, e fuaina mai ia te outou.” O e fa’amalieina le fa’atonuga a le Atua “Ia fanafanau, ia uluola ma faatele i tulaga uma o lou soifua? I le suafa o Iesu, Amene.   

OPEN HEAVENS

MATALA LE LAGI MO LE ASO GAFUA 4 SETEMA 2023

Manatu Autu: O le tofi e sili atu (A greater portion) 

Tauloto – Tusi Paia: 2 Tupu 2:9 “‘‘Ua uma ‘ona la sopo‘ia atu, ‘ona fai atu lea o Elia ‘iā Elisaia, “Fai mai ia pe se a se mea ‘ou te faia mo oe manū e le‘i ‘ave‘eseina a‘u ‘iā te oe.”‘Ona fai mai ai lea o Elisaia, “‘Ia fa‘alua mai lou agaga ‘iā te a‘u.”.’”

Faitauga - Tusi Paia: Eperu 4:12

Upu Folafola

E finagalo le Atua I le tino o Keriso ia siitia pea mai le mamalu I le mamalu. E finagalo le Atua I lana fanau ma ē mulimuli iai latou ia galulue I le maualuga o le faauuga. O le mafuaaga lea na ia fetalai atu, ia tatou faia nuu uma ma so’o (Mataio 28:19-20). E ui ina malosi le mana I lana galuega ao iai I le lalolagi, ae na na ia fetalai ae lei tuua le lalolagi: 12E moni, e moni, ‘ou te fai atu ‘iā te ‘outou, o lē talitonu mai ‘iā te a‘u, e faia lava e ia o galuega ‘ou te faia; e fai fo‘i e ia mea e sili i ia mea, auā ‘ou te alu i lo‘u Tamā.(Ioane 14:12). Tusa po’o le a le maualuga o le faauuga I ou taitai faaleagaga, e mafai e le Atua ona faasili atu le faauuga ia te oe. E te ono fesili, e mafai ea e le Atua ona faasili lo’u faauuuga I lo oe? Ioe, e mafai e le Atua. 

Sa iai se fafine sa auai I le matou polokalame I le togalauapiga. Na ia maua le valaau mai ua maliu lana tama teine a’o fanauina lana masaga, e oo I le masaga ua maliliu foi. Ina ua maea le polokalame, sa alu atu lenei fafine I le falemai ma ave se fagu o le faguu o le faauuga faatoa uma ona matou tatalo ai. Sa ia tuu sina uu I gutu o pepe e toalua ma faapea atu ‘aua nei faamaumauina lo’u taimi, ia lua toe ola mai’ ma toe ola uma pepe e toalua. E oo atu foi, o le a ave le tino o lana tama teine I le falemaliu. Na ia taofia le aufaigaluega a le falemai, sa’asa’a sina uu I luga o lana tama, tuu se solosolo ua maea ona faauuina I lona ulu, ona toe ola lea o lana tama. Na ia faatuina ni tagata se toatolu mai le oti I le aso e tasi. E o’o ia te a’u ou te le’i faatuina ni tagata se toalua mai le oti I se aso e tasi. O lenei, e mafai ona e faia mea e sili atu I lo lou tama faaleagaga. Mo la’u fanau uma, e sili atu le faauuga I luga ia te oe I lo le faauuga o lo’o ia te a’u I le suafa o Iesu. 

O le mafuaaga e toatele ai tagata maualuluga o le Atua I le taimi ua tuanai ma ua le mafai ona maua le malosi lea o le faauuga I aso nei, ona ua lē toatele tagata e fia auauna ma o latou loto atoatoa I auauna faauuina nei. E le toatele tagata e fia tauaveina le mamafa o le avega o lo’o naunau o latou tama faaleagaga e tauaveina. Afai o loo tumu lou agaga I mea a le lalolagi, e le mafai ona e maua le faauuga a lou tama faaleagaga, o lona faamoemoega o le faia o le finagalo o le Atua. Na maua e Elisaia le faalua o le agaga o Elia ona sa ia auauna ma le faamaoni ia Elia. E mafai ona faasili le faauuga ia te oe pe afai e te auauna ma le faamaoni I ou matua faaleagaga. I le suafa o Iesu, Amene.

OPEN HEAVENS

MATALA LE LAGI MO LE ASO SA 3 SETEMA 2023

Manatu Autu: Tau lava o se Upu (Just a word) 

Tauloto – Tusi Paia: Mataio 4:4“‘Ona tali atu ai lea o Iesu, ‘ua fa‘apea atu, “‘Ua tusia, ‘E lē na o mea e ‘ai e ola ai le tagata, a o afioga uma e tulei mai i le fofoga o le Atua.’”

Faitauga - Tusi Paia: Eperu 4:12

Upu Folafola

O loo faapea mai le Salamo 119:130; “O le fa’aalia mai o au afioga e fa’amalamalamaina ai; e fa’alotomatalaina ai e ua faigofie.” O lona uiga, a aumai e le Atua se Upu iā te oe, o le malamalama lea ua ia aumaia. E mafai ona pa’i atu i lou agaga se upu mai le Atua. O le upu na e faalogo muamua ai, pe masani fo’i ona e faitau fa’afia ai, a’o lea taimi ua faafuasei ona pai mai I lou loto le Upu a le Atua ma e lagonaina ai o le tali lea o lou faafitauli.

Sa i ai se tamaloa mauoa sa matua’i faaletonu lona tamāoaiga ma mea uma o lona olaga ma i’u ai ina filifili e sili le pule i lona ola. Na alu I le lotu i lea aso ma le manatu o le a fuli e siva e faailoga ai lona oti, pe a uma le aso lea. E taunuu atu i le lotu o lauga le faifeau I le tala iā Sataraka, Mesako ma Apeteniko. Na faamatala e le failauga faapea, na talitonu taulelea Isaraelu nei e laveaiina i latou e le Atua, latou te lē iloa pe faafefea ae pau le mea latou te mautinoa e laveaiina i latou e le Atua, latou te lē aafia i le afi. Na faapea lava ona fai e le Atua ma ua taunuu. O le upu tonu lava lea na manaomia e le tagata mauoa lenei ma ia faapea ifo ai i lona loto, “e matua’i leaga lava ma faaletonu  le tulaga ua o’u i ai, ou te lē iloa pe faafefea ona toe faalelei, peitai ou te iloa o le ā suia i le lelei.” Na tonu i lona loto e le faia le faaiuga na manatu i ai a’o le a ola pea ma talitonu i le upu ua faalogo I ai. O le aso na ia faasoa ai lana ta’utinoga lenei, faatoa uma ona ia faatau ni taavale se 14 mo lana aufaigaluega. Na o se Upu na ia faalogo I ai. A o’o mai le Upu a le Atua ia te oe, e faafuasei ona o’o mai le malamalama ma tafiesea ai galuega uma a le pouliuli I lou olaga.

Ua na o le Upu a le Atua e te manaomia e te malolō ai ma maua ai le soifua maloloina (Salamo 107:20). A auina mai e le Atua se feau mo oe e ala i lana upu, e o’o faatasi mai ma le mana ma le faatuatua e te manaomia e faataunuu ai ma e savali ai ma le mautinoa. O le taimi e te taliaina ai le Upu a le Atua ma le faatuatua e faataunuuina ai ma avea ma vaega e taunuu i lou soifua.

O a ni vaega o lou olaga o loo e toilalo ai pea, ma lē mafai ona e pulea e pei ona tatau i le fanau a le Atua? E manaomia lou ole atu i le Atua e auina mai lana upu e te manumalō ai. Po’o le a lava le vaega o lou olaga sa e vaivai ai, o le Upu a le Atua e liliuina oe faapei o le malosi o se leona. O le a avea oe ma tagata malosi e lē maluelueina. O le mafuaaga lea e lē tatau ai ona misi lou taimi paganoa e mafuta ai ma le Atua i taeao uma faapea foi le mafutaga ma le auuso. E te lē iloa le taimi e auina mai ai e le Atua lana upu e fa’asa’olotoina oe e faavavau.

Tatalo

Tamā faamolemole auina mai se upu e suia lou olaga e faavavau I le asō I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 2 SETEMA 2023

Manatu Autu: Puipui muamua I latou  (Protect Them First) 

Tauloto – Tusi Paia: Mataio 7:12 “O mea uma fo‘i tou te loto i ai, ‘ia faia e tagata ‘iā te ‘outou, ‘ia fa‘apea lava ‘ona ‘outou faia ‘iā te i latou; auā o le tulafono lea ma le ‘au perofeta.”

Faitauga - Tusi Paia: Luka 15:11-32

Upu Folafola

O tagata matutua e I ai le latou upu faapea, tuli ese muamua le luko faatoā e fai ai I le matuā moa, “Aisea na e ta’asē ai?” I le tusi o Mareko 4:35-41, ina ua fati mai peau I totonu o le vaa, ona fafagu lea e le ‘au so’o Iesu, ona tula’i lea o ia ma faafilemu le matagi faatoa fetalai ai i lona auso’o faapea “ Aisea tou te matata’u ai? Faafefea ona leai so outou faatuatua?” E faapea le finagalo o Iesu ia i tatou lana fanau. E fofō muamua le faafitauli otegia mulimuli ai oe. Aisea la e tu’ufau ai e le tele o matua ma aiga a latou fanau e faatama’ia e le fili pe a vaai atu ua ta’asē?

Afai ae sesē le fanau na foai atu e le Atua ia te oe, puipui i latou mai le sesē ua latou fai ia mautinoa e lē faaleagaina ai le fānau, faatoā e fa’asaga ai e a’oa’i i latou. Mo se fa’ata’ita’iga, afai e tuliese e le tamā lona afafine mai le āiga ona ua ma’itaga e le’i faaipoipo, o lea faiga e ono atili maua ai le avanoa o le fili e faaleaga le afafine, ma i’u ai le fanau i le leaga sili atu aemaise pe a sesē tagata e maua ai sona fesoasoani.

E le tatau ona tuliesea mai le aiga le fanau ona ua sesē. Poo le ā le tele o au measesē e fai e lē te’a ese le alofa o le Atua ia te oe ma ia tau’a pea oe o lona atalii/afafine. E tatau ea ona i ai se a’oa’iga? Ioe. E tatau ona a’oa’i le fanau pe a lē usita’i, peita’i ia muamua lava foia le faafitauli ma puipui i latou ia saogalemu.

A’o e faia a’oa’iga i le fanau, e tatau ona lagona ma iloa e le tamaititi e te alofa iā te ia. E i ai le mea e ta’u o le alofa nanā. E iloa lelei e le tamaititi le eseesega o a’oa’iga e fai ona o lou taumafai ia puipui le ta’uleleia o oe i le va ma tagata ma le a’oa’i ona o lou alofa moni iā i latou. E leai se mea e sili ona mafatia ai le loto o le tamaititi nai loo le lagona ua leai se alofa na te maua mai ona matua.

Ou te iloa e mā matua pe a le ausia e le fanau o latou faamoemoega. O a’u fo’i o se tamā ma o nisi taimi ou te maua tala e ese mamao amio sa o’u a’oa’o la’u fanau e fai ma mea latou te fai pe a o ese ma le fale. Peita’i ia tatou manatua e faapea fo’i i tatou i le va ma le Atua ae na te lē tulia tatou pe aveeseina lona alofa. Na te a’oa’i tatou auā e alofa ia i tatou. O lau galuega o loo fai i fanau uma ua avatu e le Atua ia te oe e lē o se mea fa’alēaogā.

Tatalo

Tamā faamolemole foai mai le loto onosai ma le poto e puipui ai ma a’oa’i le fanau ua e foai mai ia te a’u i le alofaI. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 1 SETEMA 2023

Manatu Autu: Tatalo mo le fanau (Prayers for children)

Tauloto – Tusi Paia: Isaia 54:13 ‘‘‘E a‘oa‘oina lau fānau uma lava e le ALI‘I; e tele fo‘i le manuia o lau fānau.”

Faitauga - Tusi Paia: Mataio 19:13-15

Tatalo mo le fanau

1.       Tama, faafetai mo tamaiti ma fanau uma I lo matou aiga, Ekalesia, nuu ma le lalolagi atoa. 

2.       Tama, ia e fesoasoani I matua o fanau uma. Faamolemole ia e saunia auala e o uma ai tamaiti e tatau ona o I le aoga, e o I le aoga. 

3.       Tama, faamolemole ia e faamanuia I la’u fanau ma fanau uma I lo’u siomaga. 

4.       Tama, faamolemole ia e faaaogaina la’u fanau ma fanau uma I lo’u siomaga mo lou viiga. 

5.       Tama, faamolemole ia e puipuia tamaiti uma I lo’u siomaga mai so’o se aafiaga o le amioleaga ma ia taitaiina mai I latou ia latalata ia te oe, I le suafa o Iesu. 

6.       Tama, faamolemole ia e foai I tamaiti uma I lou siomaga le loto mamā. Ia faatumauina le loto mamā ia te oe, I le suafa o Iesu. 

7.       Tama, faamolemole ia e saunia au agelu e puipui I fanau uma I lou siomaga. 

8.       Tama, faamolemole ia avea le toto o Iesu e faamaufaailogaina la’u fanau ma fanau uma I lo’u siomaga, I le suafa o Iesu. 

9.       Lo matou Tama, faamolemole ia e faaali I fanau uma I lo’u siomaga, e pei ona e faaali ia Samuelu ao laitiiti lava o ia, I le suafa o Iesu. 

10.   Tama, faamolemole fesoasoani mai ia te a’u ma so’o se tagata o lo’o au le latou pule I tamaiti, ia taitai e tusa ma lou finagalo, I le suafa o Iesu. 

11.   Tama, faamolemole ia e saunia tamaiti uma I lo’u aiga, la’u Ekalesia, ma lo’u nuu ia avea ma malamalama ma masima o le lalolagi, I le suafa o Iesu, Amene. 

12.   Tama, foai mai le atamai, loto onosai ma le faapalepale ia te a’u ma matua uma ina ia aoaoina lelei matou fanau I ala o le Tusi Paia ina ia latou maua manuia e le gata I le lagi ae faapena foi I le lalolagi nei, I le suafa o Iesu Kesiso e matou te tatalo atu ai nei, Amene                            

OPEN HEAVENS

MATALA LE LAGI MO LE ASO TOFI 31 AOKUSO 2023

Manatu Autu: O le Atua o le toefuataina (The God of restoration)

Tauloto – Tusi Paia: Kenese 40:21 ‘‘‘Ona ia toe tu‘u atu ai lea i lē ‘ua sili i ē tautū uaina o lona faiva, na na tu‘uina atu ai le ipu i le ‘a‘ao o Farao..”

Faitauga - Tusi Paia: Luka 6:6-10

Upu Folafola

O le toefuataina, e mafai ona faamatalaina faigofie o le faagasologa o le toe faafoi pe faafoisia se vaega i lona tulaga na iai mai le amataga. O le toefuataina faalelagi o se galuega a le Atua, aua e na o Lē na faia le Lagi ma le Lalolagi e iai le poto ma le malosi e toe faafoisia ai le tagata i lona tulaga mai le amataga o lona olaga. O le sese a Atamu ma Eva i le Faatoaga o Etena, na faoa ai le pule a le tagata i le foafoaga. Na iʻu ai i le vavae ese mai tatou mai le Atua, ma ua oo ai I le oti ma isi malaia mataʻutia. Mulimuli ane, o lenei olaga, ua tumu i ituaiga agasala eseese – ua ifo i tupua, ua faitaaga, ua amioleaga, seia oo ina matua faigata tele le olaga. Na filifili lo tatou Atua alofa ma agalelei, e faamuta le pagatia e ala i le toe faafoisia o le pule a le tagata e ala i le galuega togiola a lo tatou Alii o Iesu Keriso.

O le Toefuataina, ua atoatoa, e aofia ai le faamagaloga o agasala, saolotoga mai le ta’usalaina ma le alofa mutimutivale, nai lo le faamasinoga. E oo mai o se faatinoga o le alofa mutimutivale, agaalofa ma le alofa, faatasi ai ma le sini e tasi o nei vaega uma, o le faaleleiga o tagata ma lo tatou Atua. O le Toefuataina e masani ona aofia ai le faamagaloga o agasala, faaleaogaina o aitalafu, ma le faamamaluina o mea e le mafai ona toe suia. O lo tatou Atua o le Atua o le toefuataina. Na toe faafoʻisia e Iesu le ola i Lasalo i le Ioane 11:43-44, ma le tama a le fafine Naina ua oti lana tane i le Luka 7:11-15 . Na ia toe faapupulaina se tagata na fanau mai o tauaso i le Ioane 9:1-7 . E mafai e lo tatou Atua ona toe faamalolo o tatou gasegase, faaleleia pisinisi sa faaletonu, faaleleia Mafutaga na faaleagaina, faaleleia faaipoipoga sa malepelepe faapea ma faamautuina o avanoa e seasea maua. Pau lava le mea e tatau ona e faia o le ole atu ia te Ia i le tatalo. Tatalo is toe faʻafoʻisia atoatoa oe i vaega mautinoa uma o lou olaga, i le suafa o Iesu.

O lo’o a’oa’o mai le Tusi Paia, o lo’o finagalo le Atua tatou te mafuta pea ma ia I lenei lalolagi. E tatau ona tatou faamagalo atu i tagata uma ua faatiga mai ia i tatou, ma tatou sailia foi le faamagaloga a i latou o loo faatiga mai. E lē gata i le faamagalo atu, e pei ona taʻua i le Luka 17:3-4 ma le Mataio 18 21-22. O le faamagalo atu e taitai atu ai i le filemu, faaleleiga, faamalologa, olioli, manuia ma le tali mai o le Atua ia tatou tatalo. Ia faia sau faaiuga e te soifua I le filemu ma tagata uma, (Eperu 12:14), faamagalo i latou uma ua faatiga ia te oe, ma faʻamagalo ou tuaoi. Ia susulu pea le alofa o le Atua e ala atu ia te oe i isi, ina ia avea oe o se tasi e faamanuiaina i le tele o faamanuiaga a le Alii. Ia fa'afo'i le faafetai muamua i le Atua, ona e maua lea o faamanuiaga uma mai le Atua e lima taitaiina ai lou soifua.     

Tatalo

Tama, faamolemole ia toe faafoisia mea uma ua ou le maua ma ua leiloa i taimi ua tuanai, I le suafa o Iesu, Amene.