Samoan Devotional

OPEN HEAVENS

MATALA LE LAGI MO LE ASO LUA 19 SETEMA 2023

Manatu Autu: O le Silisili Ese 4 (The Most High 4) 

Tauloto – Tusi Paia: 1 Samuelu 2:30 ‘O le mea lea ‘ua fetalai mai ai le ALI‘I le Atua o Isaraelu: ‘Na ‘ou fai atu lava i lou ‘āiga ma le ‘āiga o lou tamā latou te feoa‘i i o‘u luma e fa‘avavau;’ a o lenei, ‘ua fetalai mai le ALI‘I, ‘‘Ia mamao lea mea ‘iā te a‘u, a o ē fa‘asili ‘iā te a‘u, ‘ou te fa‘asili ‘iā te i latou; a o ē ‘ino‘ino mai ‘iā te a‘u, e ta‘u fa‘atauva‘aina i latou.’

Faitauga - Tusi Paia: Isaia 38:1-8

Upu Folafola

O le asō, ou te fia faailoa ia te oe, le isi itu o le Silisili ‘Ese. Ua e silafia mai o tatou talanoaga ua tuana’i e mafai ona ia faaleaogaina se faaiuga a so’o se tasi, ae po’o e silafia e mafai fo’i ona ia faaleaogaina sana ia lava faaiuga? I le Isaia 38: 1-8 sa auina atu e le Silisili Ese lana perofeta ia Esekia e faailoa atu te ia o le a o’o mai le oti i se taimi lata mai. Ona tatalo lea o Esekia i le Atua ina ia maua sona taimi faaopoopo i luga o le lau’eleele, ma sa faapea ona taliaina e le Silisili ‘Ese ma toe foa’i  ia te ia le 15 tausaga. Atonu sa manatu ane le perofeta: “Le Alii e, ua mausali lau afioga i le lagi e faavavau.” (Salamo  119: 89) ma atonu sa tali Iai le Atua: “O a’u na fetalai i le mea lea, o a’u fo’i e toe liliuina.” O se faataitaiga lena o le faaleaogaina e le Atua o sana  lava faai’uga ina ia tali atu i ni tatalo a se tagata. Ae mafai foi ona ia faaleaogaina sana faaiuga ina ia faasalaina se tagata. A e faitau i le 1 Samuelu 2: 30, e te silafia ai lona faaleaogaina o lana faaiuga ina ia faasala ai Elia. O iina e manaomia ai ona tatou matua faaeteete.

I le 1 Samuelu 9:15-17, sa ia filifilia Saulo e avea ma Tupu, o sē sa pito maualalo lona tulaga mai se ituaiga e matuā faatauvaa o Isaraelu. Peita’i ua faamaualuga tele Saulo, ma ua finagalo le Atua e te’ena Saulo. I le faaiuga o lea mea, sa auina e le Atua se agaga leaga ia te ia ma ona atalii, ma latou maliliu uma i le aso e tasi. Ou te mautinoa, ana silafia e Saulo o lona i’uga lea, se manu na te usitai i le Atua. 

O le Silisili ‘Ese o se uo mamae pe a ia te oe. Afai o ‘au le Atua ma oe, e mafai ona ia faaleaogina so’o se tasi ma so’o se mea o faasaga tau mai ia te oe,  ae peita’i o ia fo’i o se fili pito leaga pe a fai e le ‘au ma oe. Afai sa ‘avea o ia ma au uo, a ua  faasolo ina avea ma ou fili, o le a e fetaui ma faafitauli ma puapuaga.

O le mafua’aga lea ou te toe ai’oi atu ai ia te ‘oe e tuuina atu lou ola ia te ia. O le Silisili ‘Ese e te le ula iai. E le o se isi e te agaleaga pe taufa’avaleaina, na te silafia mea uma lava. Na te silafia uma ē o fa’afoliga e ‘au ma ia ae o loo faia pea mana’oga o le ti’apolo. Ou te ‘ai’oi atu ia lafoai lou ola ia te ia, semanu e le’i suia lona finagalo, ma ia faia o ia ma au uo mo lou olaga atoa. Afai e te faapea mai o ia o lou Ali’I,  auauna ia te ia ma lou loto atoa ma le faamaoni. Tapua’i ia te ia i le Agaga ma le Upu Moni, ona e taunuu lea i se i’uga matagofie. Peita’i a e manatu e te soona taalo i le Atua, o le a ia faaali atu - o ia o le afi e ma’ama’ai. 

Afai e te atamai, e te le fia iai i le itu lē lelei o le Atua Silisili ‘Ese, ae ia ola fa’apa’iaina! I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 18 SETEMA 2023

Manatu Autu: O le Silisili Ese 3 (The Most High 3) 

Tauloto – Tusi Paia: Auega 3:37 ‘‘Po o ai o ia e fai atu, ‘ona o‘o ai lea, ‘ae le‘i fetalai mai ai le Ali‘i?’

Faitauga - Tusi Paia: Salamo 9:2-9

Upu Folafola

E mafai e le Atua Silisili ese ona faaleaogaina ni fetuu. I le 2 Tupu 2:19-22, fai mai le Tusi Paia sa iai se fetuu I luga o Ieriko mai le taimi o Iosua, ae na toe faaleaogaina e le Alii I le taimi o Elisaia. 

E mafai e le Atua ona toe suia ma faaleaogaina ni feagaiga. Fai mai le Isaia 28:13, tusa pe na e faia ni feagaiga e le tusa ma lona finagalo, afai e na te faaleaogaina, e le mafai ona tumau. Afai o lo’o iai se feagaiga I le va o oe ma le tiapolo, ou te faaleaogaina nei I le suafa o Iesu. I le tele o Tausaga talu ai, sa iai se fafine na sau ma ua fanau I se tasi o falemai a le Ekalesia Redeemed Christian Church of God. Ona sa pa o ia mo le tele o Tausaga, sa ia faia ai se faaupuga, ‘e le afaina ia te ia le oti ae pau lava lenei ia fanau muamua’. Ona to lea ma ua maitaga ma ua le manao e oti I le fanauina o le pepe, o le mea lea na sau ai e fanau I le falemai a le Ekalesia. Ao faatiga o ia mo ni aso, na logo mai a’u e tausi ma’i ona ou valaau lea I le Atua Silisili Ese e faaleaogaina le feagaiga leaga ua ia faia. Na faaleagaoina e le Atua Silisili ese ma e lei leva ae fanau loa ma le saogalemu. 

E faaleaogaina foi e le Atua Silisili Ese ni feagaiga e faia I le toto (Isaia 49:24-26), ma e tusa pe ua e ulufale atu I ni feagaiga ma le tiapolo (cult) e ala I le toto, e mafai e le Alii ona faaleaogaina I le taimi nei, I le suafa o Iesu. 

E mafai e le Atua ona faaleaogaina le pule a seoli. E mafai ona ia faapea atu I seoli, ‘e le mafai ona ia avea le tagata lea’. Fai mai Paulo I le 1Timoteo 1:15 o ia e sili musa I le ‘au agasala, ae na ia feiloai loa ma Iesu Keriso ma ua suia I lē e sili musa I le au aposetolo (2 Korinito 11:15). Ou te faia lava lenei faaupuga, ‘a mafai ona faaaogaina a’u e le Atua Silisili Ese, e mafai ona ia faaaogaina so’o se tasi’. Afai e mafai ona ia aumaia a’u mai le ala I seoli ma tuuina I le ala I le lagi, o lenei, o so’o se feagaiga po’o se malosi a seoli ia te oe, ia faaleaogaina I le suafa o Iesu. E tatau ona e silafia foi, e iai lau matafaioi e faia ina ia faamautinoaina e le toe iai se malosi o seoli i ate oe ma ia faia ma le atoatoa. Afai e finagalo le Atua Silisili Ese e faasaoina oe mai le ala I seoli ae e toe filifili lava e toe foi I le agasala, o lona uiga ua e toe foi I le ala e faaumatia ai. O lau matafaioi le ola faapaiaina pe afai ua e taliaina le valaau a le Atua e ala I lona alofa tunoa ina ia aua lava nei e iu I seoli. 

Tatalo 

Tama, afai ua ou faia se feagaiga pe na faia foi e o’u tamā ni feagaiga o lo’o aafia ai lo’u olaga I le aso, faamolemole ia e faaleaogaina nei, I le suafa o Iesu, Amene. 

OPEN HEAVENS

MATALA LE LAGI MO LE ASO SA 17 SETEMA 2023

Manatu Autu: O le Silisili Ese 2 (The Most High 2) 

Tauloto – Tusi Paia: Salamo 115:3 ‘A o lo matou Atua, o i le lagi lava ia; ‘ua faia e ia o mea uma ‘ua ia finagalo i ai..’

Faitauga - Tusi Paia: Salamo 135:3-13

Upu Folafola

Fai mai le Tusi Paia I le Salamo 33:10-11, e fa’alēaogaina e le Atua taupulepulega a nuu ese, a’o lana pule e tu e o’o i le fa’avavau. O lona uiga poo a taupulepulega a ou fili o fai e fa’aleaga ai oe, e fa’alēaogaina e le Atua a latou mailei ae suia i lona manuia i le suafa o Iesu.

O le Silisili ese na te mafai ona suia fa’aaliga a foma’i. I le Mareko 2:1-12, sa i ai se tagata ma’i na ave ifo iā Iesu mai le taualuga o le fale, ua siliga togafiti a foma’i, peita’i na fo’i i lona aiga ua malolo ina ua o’o i le mamalu o lē Silisili ese. O i tatou o ni tagata fa’amanuiaina ina ua avea ma auauna a le Atua o lē e mafaia ona fa’alēaogaina faaiuga fa’a foma’i.

O le Silisili ese na te mafaia fo’i ona aveesea le oti. I le Ioane 11:39-44, Ua faamatala e le Tusi Paia e o’o atu Iesu i le tuugamau o Lasalo, e lē gata ua po fā talu ona maliu, ae masalo fo’i ua manogi o ia (tulou). Na talitonu le aiga o Lasalo ua tuai peita’i na fetalai lē Silisili ese ma liliu atoa le oti ma valaau Lasalo e fo’i mai i le ola. I le taimi atoa o le galuega tāla’i a Iesu i le lalolagi, na te le’i tāua le upu “oti.” Ina ua ia faatula’i le afafine o Iairo mai le oti, na te le’i tāu’a faatasi le upu oti; ae na ia faapea, “Funa e, tula’i a.” Ona tula’i ai lea o ia.

O le Silisili ese e mafaia ona faaumatia temoni. Isaia 49:24-26 ua faapea mai; a finagalo le Atua Silisili ese e fa’asa’oloto. Na te fagaina e ua saua ia te oe i o latou lava tino; e onā fo’i i latou i o latou toto.

Sa ou lauga I se faaipoipoga sa fai I totonu o lo’u nu’u, ma ina ua o’u vaaia ni faataulaitu o auai, sa o’u fa’aaogaina lelei le avanoa e vivi’i ai i le Atua Silisili ese ma fet’uu i galuega uma a le mālō o le pouliuli a’o vaai mai. Ina ua uma le faaipoipoga sa fai faataulaitu I le tinā o le tamaita’i faaipoipo, “ Ua faamatagā i matou e lenei tama i le faaipoipoga a lau tama, se’i tatou vaai pe ola sana fanau.” Na tamoe mai le tinā o lē tamaita’i faaipoipo ma ta’u mai iā te a’u ae o’u fai atu aua lava ne’i popole. Na ma’itaga le tamaita’i ma fanau lana tama ma le saogalemu e aunoa ma se afaina i faiga faa tiapolo a faataulaitu auā ua fa’ato’ilalo e lē Silisili ese. O loo faapea mai le Silisili ese iā te oe i le taimi nei o galuega uma a le fili i lou olaga ua fa’aumatia uma i le suafa o Iesu.

Tatalo

Le Alii e, lē e Silisili ese, faamolemole faaumatia galuega uma a le fili faatatau iā te a’u ma lo’u aiga uma i le suafa o Iesu Keriso. Amene.

OPEN HEAVENS

MATALA LE LAGI MO LE ASO TOONAI 15 SETEMA 2023

Manatu Autu: O le silisili Ese 1 (The Most High 1) 

Tauloto – Tusi Paia: Salamo 91:1 ‘O le nofo i le mea lilo o i ai lē Silisili‘ese, e mau o ia i le paolo o Lē e ona le malosi uma lava.’

Faitauga - Tusi Paia: Salamo 47:1-9

Upu Folafola

O lo tatou Atua e Silisiliese. (Failauga 5:8) o le suafa o Iesu e silisili i suafa uma lava. (Filipi 2:9) o lona uiga o faafitauli uma o loo lua fetaia’i i le taimi nei e I lalo ifo o lona suafa. Mai lea taimi ma lea taimi e manaomia lou valaau I le suafa o Iesu ia faalogo I ai lou faafitauli ma sola ese. O lona nofoalii e maualuga atu na i loo se isi lava auā o loo afio ia i le Lagi, e mamao ma silisili atu i alii sili ma faipule. O le ‘autau a le Atua e sili atu ma malosi i lō se isi lava ‘au auā e pule aoao ia i ‘au i le lagi, o I le lalolagi ma lalo ifo o le lalolagi. E pei ona tāua I le Filipi 2;9-11, e lē gata o lona suafa e silisili i suafa uma lava, o lana pule e o’o atu i tulimanu uma e tootuli tulivae uma lava i le suafa o Iesu, o e o i le lagi, ma e o i le lalolagi, ma e o i lalo o le lalolagi. O le mea moni o ia “O le Atua Silisiliese” ma e tele ona faamaoniga. O le a o tatou su’esu’e i ai i le asō ma nai aso o lumanai.

Muamua, auā o ia o le Silisiliese, o lana saunoaga e faia le faaiuga o mataupu uma. Afai e ave sau mataupu I le fa’amasinoga maualuga ma faapea mai le faamasino ua faamaonia lau solitulafono, e mafai ona e apilia le faaiuga a le faamasinoga, po o le talosaga e toe iloilo lau mataupu i le faamasinoga e sili ona maualuga. Afai e uma ane fai mai le faamasinoga sili ua faamaonia e te solitulafono, e mafai e le Peresetene ona filifili e faamagalo oe. Peita’i e i ai lē e sili atu i le Peresetene ma o ia o le Atua mata’utia. E lē o ia o se Peresetene, Palemia, po’o se Tupu. O ia o le Tupu o Tupu ma le Alii o Alii. O ia o le Tupu a tulei mai lana afioga, ona tu mai lava lea. (Salamo 33:9)

O loo faapea mai le Tusi o Mataio 10:28,

“Aua fo’i tou te matata’u i e fasioti le tino, ae latou te lē mafaia ona fasioti le agaga; ae lelei ona outou matata’u i le ua mafai ona fano iā te ia le agaga atoa ma le tino i Kēna.”

I le Tusi o Esoto 5:1-2, o le ta’ita’i ta’uta’ua o le lalolagi i lenā vaitaimi o Farao. Na auala atu iā Mose le feau a le Atua iā te ia e faapea, “ Tu’u lo’u nu’u e ō ia latou fai se tausamiga iā te a’u i le vao.” Peita’i na musu Farao ma fai mai. “O ai ea le Alii ou te faalogo ai I lana upu, ma ou tuuina atu ai o Isaraelu e o?” E o’o ifo I le taimi ua faataunuu le finagalo o le Atua i lona nu’u, ua uma le taofiofi e Farao a ua tauanau le nuu e o ia. Afai e te lē usitai i le Atua o lona uiga e te mana’o i le oti. (Faataoto 8:36). Afai e iā te oe le poto e tatau ona e mata’u, lē e Silisiliese ma ‘aloese mai le faia o amio e tigā ai lona finagalo.

OPEN HEAVENS

MATALA LE LAGI MO LE ASO FARAILE 15 SETEMA 2023

Manatu Autu: O le totogi o le agasala (The wages of sin) 

Tauloto – Tusi Paia: Roma 6:23 ‘Auā o le oti, o le totogi lea o le agasala; a o le ola e fa‘avavau, o le mea foa‘ifuaina mai lea e le Atua, i lo tatou Ali‘i o Keriso Iesu..’

Faitauga - Tusi Paia: Roma 6:18-23

Upu Folafola

E toatele tagata o lo’o I le mea matua palapala I le olaga nei. O le mea matua palapala, e matuia le leaga, e le mafai ona alu ese mai ai I lou malosi e aunoa ma se fesoasoani mai fafo, e te manaomia le fesoasoani mai fafo e aumaia oe I fafo. Afai e fai atu se fomai I se tagata ua maea le maualuga o togafitiga ua faia ma ua leai seisi mea e mafai ona faia, ua ia iloa, a aunoa ma le fesoasoani a le Atua, ua uma o ia. Ae ou te faafetai, e iai lou Atua o lana matafaioi o le siitia o tagata mai le mea matuā palapalā; ma fa‘atūina fo‘i ona vae i luga o le papa, ‘ua fa‘amautūina ai ona savali (Salamo 40:2).

O le a lau mea e faia mo le Atua Silisili Ese e faatuina mai ai oe mai le mea matua palapala? O le mea muamua e tatau ona iloa, o le agasala na mafua ai ona iai I le mea matua palapala. Ina ua aumai le tamaloa pipili ia Iesu I le Mareko 2:1-12, o le mea muamua na faapea atu ai le Alii ia te ia, ‘ua faamagaloina au agasala’. E matua manino le Upu a le Atua; o le totogi o le agasala o le oti (Roma 6:23). O le ma’I o le ‘autau a le oti. E tatau ona e salamo ma lafoai agasala ona faatoa mafai lea ona e sau I fafo ma le mea matua palapala. Na fetalai atu le Alii I le tamaloa I Petesa: ‘“Fa‘auta, ‘ua e mālōlō oe; ‘aua ‘e te toe agasala, ne‘i o‘o atu ‘iā te oe se leaga e sili i lenā.”(Ioane 5:14). Afai e te lē lafoai le agasala I lou olaga, e ono le mafai ona e toe alu ese mai le mea matua palapala. Fai mai Tavita I le Salamo 66:18 ‘Ana ‘ou manatu i se amio leaga i lo‘u loto, po ‘ua lē fa‘afofoga mai le Ali‘i ‘iā te a‘u. E faapefea ona e manatu e tali mai le Atua ia te oe pe afai e le mafai ona ia faafofoga mai I au tatalo?

Na valaaulia a’u ou te alu atu I le atunuu o Tunisia pe tusa ma le 11 tausaga talu ai e lauga I se fonotaga tatalo ma na ou faapea atu: ‘Le au uso, ua ou sau e ta’u atu ia te outou e tali le Atua tatalo uma’.  E iai nisi o faiaoga matutua o le talalelei ua o mai ma fai mai ia te au e le moni lea tulaga. Aua nei faaseseina oe e se tagata. E tali e le Atua tatalo. Na ia faapea mai:  ‘Ia e vala‘au mai ‘iā te a‘u, ‘ona ‘ou tali atu ai lea ‘iā te oe (Ieremia 33:3)’. E lei faapea mai ‘ou te ono tali atu ia te oe’. E pau le tapulaa o lo’o iai, e mafai ona ia tali na o tatalo o lo’o ia faafofoga iai. Afai e le mafai ona ia lagonaina ma faafofoga I au tatalo, e faapefea ona maua le tali? Fai mai le Isaia 59:1-2, o a tatou agasala ua punitia ma ua lē mafai ai ona faafofoga le Atua iai tatou. 

Afai o loo faalotolotolua pea lou usitai I le Atua, ia suia loa ou ala mo lou lelei, I le suafa o Iesu, Amene.    

OPEN HEAVENS

MATALA LE LAGI MO LE ASO TOFI 14 SETEMA 2023

Manatu Autu: Tagi atu I le Alii (Cry to the Lord) 

Tauloto – Tusi Paia: Salamo 102:1 ‘Le ALI‘I e, fa‘afofoga mai ia i la‘u tatalo, ma ‘ia o‘o atu la‘u ‘alaga ‘iā te oe.’

Faitauga - Tusi Paia: Salamo 40:1-2

Upu Folafola

I le Salamo 40:1, O loo faapea mai  Tavita ua silasila mai le Atua ia te ia ma faafofoga i lana alaga—e le o se musumusu, a o le tagi. O le tagi I lenei fuaitau, o se tatalo e faia faamalosi ma le finau. Ua faapea mai le Mataio 11:12Na āfua mai i ona po o Ioane le papatiso, ‘ua o‘o i nei ona po, ‘ua taufaoa ai le mālō o le lagi, o lo‘o ‘ua ‘avea fa‘amalosi fo‘i e i latou o taufao. 

O le mea lea, e tatau ai ona outou faia faamalosi ma le finau galuega i vaega uma i le malo o le lagi. I le Mareko 10:46-52 , o le ituaiga tatalo na tatalo ai Patimaio,  ua taʻua o le tatalo e tagi. Sa i ai le motu o tagata I lea vaega o le atunuu, e pei lava ona i ai le motu o tagata o lo o valaau atu i le Atua i taimi uma, ae i totonu o lena motu o tagata, na tagi le tagata e toatasi, ma na uai ma liliu mai I ai fofoga o le Atua ia te ia.

Afai e te tagi atu i le Atua, ona uaʻi mai lea o ona fofoga iā te oe, Na te siitiaina oe mai i le palapala eleelea. O le eleele matua palapala, o lona uiga o se tulaga leaga lava, ma se'i vagana ua maua mai se fesoasoani mai fafo, ua  le toe aoga. Afai e tauivi ma soona gaioioi le tagata ao iai I le tulaga lea, o le loloto foi lena o lona I ai I le tulaga faaletonu. O se tulaga ua leai se mea e mafai ona faia e mafai ai ona saoloto. A i ai le tagata i lea ituaiga tulaga, e te le musumusu, ae ete tagi atu. E iai se faaaʻoaʻoga aogā i le Mareko 2:1-12 , lea na aumai ai iā Iesu se tamāloa pipili e amata mai I lona ua seia o’o i ona vae(sei tulou). O vaega uma o lona tino ua le toe ola, sei vagana ai le ua ma le ulu. Ua le toe I ai se togafitiga e mafai ona faia e se fomai mo ia. Ae faafetai i le Atua ona o Iesu Keriso. Ua silasila atu Iesu ia te ia, ona fetalai atu lea o ia, “Tulai ia” ona aveesea lea o ia mai le tulaga matuā palapalā. I le suafa e silisili i suafa uma lava, e fa’asaoina oe mai le tulaga matuā palapalā.

O le isi faataitaiga o loo i le 2 Tupu 4:1-7, e faapea na nofo aitalafu se fafine ua oti lana tane, o se atalii o se perofeta, o e na aitalafu ai lenei tina, ua faapea mai, o le a latou faatauina lana fanau i totonu o le 24 itula pe afai e le totogiina le aitalafu. E le’I musumusu le tina lenei, sa ia tagi atu I le tagata o le Atua. A o lei maea le 24 itula, na ia mauaina le seleni e totogi ai le aitalafu ma maua le faasiliga. Ou te tatalo o le a silasila mai fofoga o le Alii ia te oe i le asō a o e tagi atu ia te Ia, i le suafa o Iesu.

So’o se taimi lava e tagi atu ai so’o se tagata i le Alii ae faifaipea, e I’u lava ina liliu mai ona fofoga ma tali a latou tatalo. Ia avea lena ma aoaoga iai tatou uma,  pe a o atu i le Atua i le tatalo. Aua e te tatalo e pei o se tamaitai poo se alii taualoa e teuteu a latou upu . ‘Ia e tagi atu I le Atua ma lo ‘outou malosi ‘atoa, ‘ona liliu mai ai lea o lona fofoga ‘iā te ‘outou. Alu I le Atua ma lena faafitauli ua leva ona e tauaveina ma tagi atu seia liliu mai ona fofoga ia te oe, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 13 SETEMA 2023

Manatu Autu: Faatalitali ma le onosa’i  (Wait patiently) 

Tauloto – Tusi Paia: Salamo 40:1 ‘1Na ‘ou matuā fa‘atalitali lava i le ALI‘I; ‘ona fa‘asaga mai ai lea o ia ‘iā te a‘u,

‘ua fa‘afofoga mai fo‘i o ia i la‘u ‘alaga.....’

Faitauga - Tusi Paia: Salamo 40:1-4

Upu Folafola

I le tatou faitauga mai le Tusi Paia o le aso, fai mai Tavita sa ia matua faatalitali lava ma le onosai I le Alii. O lenei faamatalaga e mafai ona faauigaina e faapea ‘Na ou faatali ma le onosai I le taimi a le Atua’. O le mafuaaga ona e iai  taimi a le Atua mo ana fuafuaga e pei ona tatou iloa I le Salamo 102:13. 

E le faapea la e tamau ma mafai e se taimi ona pule I le Atua. Mo se faataitaiga, ina ua manao le tupu I se faailoga ua faafofoga le Atua I lana tatalo, na faapea mai le perofeta ma le mautinoa, o le a toe faafoi le lā I tua pe a ma le 10 tikeri, sa taunuu lava. I le Iosua 10:12-14, na fesoasoani le Atua ia Iosua ma ua ia taofia le la mai le goto ina ia mafai ai e Isaraelu ona faaumatia ona fili. I le Ioane 11:21, na fai Maria ia Iesu ua ia tuai mai a ua oti lona tuagane, peitai na toe suia e le Atua ma faafoi le ola o se mea e le mafai ona toe faafoi ma ua toe ola mai Lasalo. E mafai e le Atua ona toe suia ma toe faafoi I tua le taimi mo lou lelei, ae tau a o lea, ia faamautinoaina e te faatali ma le onosai mo ia I le faatuatua. 

‘Na ou faatali ma le onosai’ e mafai ona faauigaina lenei faamatalaga ‘Le Atua e, o oe lava o lou faamoemoega mulimuli, ou te le alu I seisi mea seiloga e te tali mai’. I le Kenese 32:24-29, na matua taofia e Iakopo le agelu mai le alu ese seiloga e faamanuia ia te ia. E lelei foi lou silafia o le mea lenei, e fiafia le Atua pe a e taofi mau ia te ia seiloga ua ia faamanuia mai ia te oe. I le Luka 18:1-8, na aoaoina mai e Iesu le faia o tatalo faatauanau ma ua faaaogaina le faataitaiga o le fafine ua oti lana tane sa ia lē malolo I le alu pea I le faamasino amioleaga mo sona faamasinoga tonu. Na ia faamalamalama mai, afai e te tumau pea I le Atua, e te maua mea o lo’o e saili atu ai ia te ia. O le tama a le fafine I le Mataio 15:22-29 na faasaolotoina mai ma’i temoni aua na matua le mafai e lona tina ona tuua Iesu, e ui na ia tulia ese o ia ona e le o ia o se Iutaia. 

Fai mai Tavita ina ua maea ona ia faatalitali ma le onosai mo le Alii, ona faasaga mai le Alii ia te ia (Salamo 40:1). A faasaga mai fofoga o le Atua ia te oe, e mautinoa e te maua se vavega, aua foi o so’o se taimi e faasaga atu ai fofoga o le Atua I se tagata, e mautinoa e mulimuli mai ai le vavega.  Faatalitali ma le onosai I le Atua, e le faatuai ona oo mai o ia. Aua nei e soona topetope I le Atua, I le suafa o Iesu, Amene.   

OPEN HEAVENS

MATALA LE LAGI MO LE ASO LUA 12 SETEMA 2023

Manatu Autu: Galuega o le Alofa Tunoa 7 (The Works of Grace 7) 

Tauloto – Tusi Paia: 1 Korinito 10:23 ‘Ua tataga mea uma ‘iā te a‘u,” a ‘ua lē aogā mea uma; “‘ua tataga mea uma ‘iā te a‘u,” a ‘ua lē fa‘amafanafana mea uma....’

Faitauga - Tusi Paia: 1 Korinito 6:11-12

Upu Folafola

I aso e ono ua tuana’i, sa tatou a’oa’oina ai, e tosina mai oe e le Atua ia te ia, ma afai e te gauai Ia te ia, ona ia fa’aolaina lea o oe e ala i le toto pa’ia o Iesu. Ona mulimuli mai lea o le faamāmaina ma le papatisoga i le Agaga Pa’ia, ona soso’o ai lea ma lou maua o fua o le Agaga Pa’ia. O le a fa’amae’a la tatou suesuega lenei i le vaavaai i auala e aumaia ai e le Alii lana fanau i le tulaga o le lelei atoatoa.

I le tusi o Mataio 5:48 o lo o faapea mai ai le tatou Alii o Iesu Keriso,

“O lenei ia atoatoa ona lelei o la outou amio, e pei o lo outou Tama o i le lagi e atoatoa ona lelei o ia.”

I le tulaga lea, o le lelei atoatoa e faigofie ona malamalama iai, o le tulaga o le faia na o mea e viia ai le Atua. E iai nisi mea, e foliga mai e le o ni agasala, ae peitai, e le maua ai se a’oa’oga aogā. O le tulaga o le lelei atoatoa, o lou alofia lea o ia ituaiga tulaga. E amata ai loa ona e va’ai i nisi o mea e ui e faatagaina e le tulafono, e le talafeagai ona e faia (Korinito 10:23). 

O se fa’ata’ita’iga, o le faitala e mafai ona tatou manatu e lē se agasala, ae e maua ai ea sou a’oaoga aogā? E to’aitiiti tagata e ‘ausia le tulaga lenei i le latou savaliga ma Keriso, ua mafai ona latou iloa mamao atu le agasala ma le mea e lē o se agasala, ona latou faia lea na o mea e maua ai le a’oa’oga lelei ae ‘alofia mea e le maua ai se a’oa’oga aogā.

O se tasi o fa’ailoga e iloa ai le tagata ua na mauaina lea galuega o le alofa tunoa, o lona amana’iaina o a’oa’oga o le Tusi Pa’ia. Fai mai le 2 Timoteo 3:16-17 16O Tusi Pa‘ia uma lava e mai le Agaga o le Atua ia, e aogā fo‘i ‘ia e a‘oa‘o ai, e a‘oa‘i ai, e fa‘atonu ai, e fa‘apoto ai fo‘i i le amiotonu 17‘ina ‘ia ‘ato‘atoa ‘ona lelei ai o le tagata o le Atua. 

Tusa po’o e faia ni vavega, faia ni faailoga ma ni mea ofoofogia, e ao pea ona e mata’ituina lelei le taiala aua: “Le Alii e, ua mausali lau afioga i le lagi e fa’avavau lava.” Salamo 119:89.

O lona uiga o lo o faapea mai le Atua ia te oe: po o lea lava le tulaga ua e iai nei, ‘Ia siitia ma agai pea I luga’. Aua e te tumau i le tulaga o le tau lava o le faamagaloina o agasala, la’a atu i le tulaga o le fa’amamaina. Aua e te manatu o le taimi lava e te tautala ai i gagana ‘ese ua e ‘taunuu’, aga’i atu I le maua o meaalofa a le Agaga Pa’ia ma ia fa’amautinoaina e fua mai fua o le Agaga ina ia aua ne’i fa’aumatia oe e meaalofa. Ma le mulimuli, ia e lotolotoi ma tagata ua maua le atoatoa ona lelei, e seāseā ona maua I latou. (Mataio 5:48). E manaomia lou laalaa ia ausia le tulaga maualuga atu seia avea oe ma tagata ua atoatoa ona lelei, ma a va’ai tagata ia te oe ua latou faapea mai, o oe o le alo moni o le Atua.    

Tatalo

Tama, ou te fia lelei atoatoa e pei o lau Afio, faamolemole siitia atu lo’u tagata i lea tulaga, i le suafa o Iesu, Amene.   

OPEN HEAVENS

MATALA LE LAGI MO LE ASO GAFUA 11 SETEMA 2023

Manatu Autu: Galuega o le Alofa Tunoa 6 (The Works of Grace 6) 

Tauloto – Tusi Paia: Mataio 7:18 ‘E lē mafai i le la‘au lelei ona fua mai i fua leaga, e lē mafai fo‘i i le la‘au leaga ona fua mai i fua lelei...’

Faitauga - Tusi Paia: Kalatia 5:22-25

Upu Folafola

Ao faagasolo pea la tatou suesuega I aoaoga o galuega o le alofa tunoa, o le a tatou suesue I le aso I le tino mai o Agaga Paia I olaga o le au kerisiano faatuatua e taua ‘o fua o le Agaga Paia’. Afai e maua e se kerisiano meaalofa o le Agaga Paia ae lē maua fua o le Agaga Paia e pei ona auiliili atu I le faitauga o le Tusi Paia o le aso, o lena tagata o loo agai atu ina faaumatia. O le faataitaiga, afai e faamaualuga se kerisiano faatuatua ona o loo faaaogaina o ia e le Atua e faia ai vavega. Fai mai le Mataio 7:22-23 ‘22E to‘atele latou te fai mai ‘iā te a‘u i lea aso, ‘Le Ali‘i e, le Ali‘i e, matou te le‘i perofeta ane ‘ea i lou igoa, o lou igoa fo‘i na matou tulia ai temoni, o lou igoa fo‘i na matou fai ai vāvega e tele?’ 23‘Ona ‘ou ta‘utino atu ai lea ‘iā te i latou, ‘‘Ou te le‘i iloa lava ‘outou; ‘inā ō ‘ese ia ‘outou ‘iā te a‘u, o ‘outou o ē fai amio leaga.’ 

Sa ia I latou meaalofa o le perofetaga ma le faia o vavega, peitai e lē iloa ma lē silafia I latou e le Atua. O lona uiga o lo’o latou maua meaalofa a Agaga Paia I o latou olaga, ae leai se fua. O le mafuaaga lea e le tatau ai ona e malie I le na o le maua o meaalofa o le Agaga Paia. O le fua e sili atu I lo le meaalofa, o le tulaga e ao ona e faamautinoaina, e te maua lenei galuega taua o le alofa tunoa. 

E tusa ma le Kalatia 5:22-23, o fua o le Agaga o le alofa, o le ‘oli‘oli, o le filemū, o le ‘onosa‘i, o le mataalofa, o le agalelei, o le fa‘amaoni, 23o le agamalū, ma le amio mamā;. Tusa po’o e maua meaalofa o le faia o vavega, o lo’o finagalo le Atua ia e siitia I luga I leisi tulaga. E ui o lo’o e faia vavega, ae leiloa pe faigata ona nonofo faatasi isi tagata ma oe, e te ono maua meaalofa ae iu lava I seoli. E iai ea se aoga ia te oe pe afai o oe o se faifeau po’o se faievagalia ae tuua oe I le lalolagi pe a oo mai le siitiaga? O le a le aoga o le faauuga ia te oe ae uma ane e te iu I le nofoaga e tasi ma le tiapolo? E lelei le faauuga ma ou te fiafia iai, peitai ou te le manao ou te faauuina ae iu ane I seoli, ia toafia e le Atua lenei tulaga. Na fetalai Iesu Keriso afai e te fia iloa poo ai tagata e o atu I le lagi, e te iloa i fua o Agaga Paia iai latou, ae le o meaalofa. 

O lea fo‘i tou te iloa ai i latou i o latou fua. “E lē sao atu i le mālō o le lagi i latou uma o ē fai mai ‘iā te a‘u, ‘Le Ali‘i e, le Ali‘i e;’ na o lē na te faia le finagalo o lo‘u Tamā o i le lagi. Mataio 7:20-21

Aua nei faaseseina oe I le faauuga a le Atua ua iai ma o lo’o galue I lou olaga. Afai e le vaaia ma fua mai fua o le Agaga Paia ia te oe, e te lē maua ma ulufale atu I le malo o le lagi. 

Tatalo, 

Tama, faamolemole ia amata atu I le aso ona fua mai fua o le Agaga Paia I lou olaga, I le suafa o Iesu, Amene. 

OPEN HEAVENS

MATALA LE LAGI MO LE ASO SA 10 SETEMA 2023

Manatu Autu: Galuega o le Alofa Tunoa 5 (The Works of Grace 5) 

Tauloto – Tusi Paia: 1 Peteru 1:8 ‘Auā ‘ua ‘outou iloa e le‘i togiolaina ‘outou i mea e pala, o le ario po o le auro, nai la ‘outou amio lē aogā na tu‘uina mai e o ‘outou tamā..’

Faitauga - Tusi Paia: 1 Korinito 12:7-11

Upu Folafola

O lou maua o Agaga Paia e le faapea ua e taunuu, e leai. Na foai e le Alii ia te oe Agaga Paia ia e molimau atu e tusa ma le Galuega 1:8. O le tagata molimau o le tagata e faasoa atu I isi tagata mea ua ia vaai pe faalogo iai. A fai atu le Atua ia te oe ia e molimau atu, o lo’o faapea mai ia e molimau atu I tagata I mea uma ua e faalogo ma vaai iai e faatatau I le Atua. Ina ia iai ni faamaoniaga I le moni o vaega uma o lau molimau, e foai atu e le Alii meaalofa o le Agaga ia te oe. O galuega ia o le alofa tunoa e te maua I le maea ai o le papatisoga a Agaga Paia. 

E iva meaalofa a le Agaga Paia e pei ona tusia I le 1 Korinito 12:7-11 ae e vaevaeina I ni vaega se tolu. O le vaega muamua e taua o meaalofa o faaaliga. O mealofa o le faaaliga e aofia ai  ‘upu o le poto; ‘upu o le malamalama, ma le suega o agaga. Afai e te faalogo I se tagata o faailoa mai se vaega o lou olaga e matua leiloa e seisi seiloga na faailoa iai e le Atua, o le vaega tonu lena e taua o le ‘upu o le malamalama’. Mo se faataitaiga, a ou lauga I le tele o taimi, e faailoa mai e le Atua nisi o vaega e faatatau I se tagata, le aulotu ona ou faasilasila atu lea ma faapea: ‘ e iai se tagata iinei o loo faapea…’. E ui ou te leiloa nei tagata, o le vaega o lo’o ou faasilisila atu e fetaui lelei ma tulaga o loo ui ai I latou, o lona uiga o loo galue mai le ‘upu o le malamalama’. E silafia e le Atua mea uma ma e iai taimi e na te faaali mai ai, iai latou e iai meaalofa o le Agaga Paia mai lea taimi I lea taimi. O se meaalofa o le Agaga Paia e ese ma le matautia. 

E iai foi leisi vaega o meaalofa e ta’ua o ‘meaalofa e iai le mana’ e aofia ai le meaalofa o le faatuatua, meaalofa e faia ai faamalologa ma le meaalofa o le faia o vavega.  Ma o le vaega mulimuli o meaalofa o faamatalaga e aofia ai le faia  perofetaga; gagana ‘ese‘ese; ma le fa‘amatalaga o gagana. E mafai e le Atua ona foai atu ia te oe so’o seisi o meaalofa nei e iva pe a e maua le papatisoga a Agaga Paia ma ua amata ona e galue mo ia. O le mafuaaga lea o lo’o faapea mai le 1 Korinito 12:31 31‘Ia ‘outou naunau i mea alofa e sili; ‘ae peita‘i ‘ou te fa‘asino atu ‘iā te ‘outou le ala e silisili lava.

E pau le vaega I le Tusi Paia e faataga ai oe ona e manao I se mea, o meaalofa o le Agaga Paia. Ina ua maea ona papatisoina a’u I le Agaga Paia, na ou ole atu I le Atua mo meaalofa uma nei e iva, ona tali mai lea o le Atua. Ou te faafoi le viiga ma le faaneetaga I le Atua pe a o’o ina e ole atu ia te ia, e finagalo o ia ma naunau e foai atu ia te oe. 

Tatalo

Tama, faamolemole foai mai ia te a’u meaalofa e iva o le Agaga Paia, I le suafa o Iesu, Amene.