Samoan Devotional

 OPEN HEAVENS

MATALA LE LAGI MO LE ASO GAFUA 9 OKETOPA 2023

Manatu Autu: O le Ala I Luma (The Way Forward)

Tauloto – Faataoto 4:18 ‘A o le ala o ē amiotonu, e tusa ia ma le malamalama o le ao, o lo‘o tupu pea lona malamalama e o‘o i le totonu o le la.’

Faitauga - Tusi Paia: Luka 5:1-7

Upu Folafola

O Iesu o le ala e agai ai I luma. I le Luka 5:1-7, sa fagota Peteru I le po atoa ae leai se i’a na maua. E le faapea e paie, ae ua avea o se tagata ua le ausia lona faamoemoega. Peitai ina ua oo atu Iesu I lona vaa, ua faafuase’I ona maua le ala I luma. E toatele tagata e pei o Peteru o lo’o tamilomilo solo lava I le mea e tasi. Afai e o’o atu Iesu I lou vaa, o le a faavavevave lou agai atu I luma. 

Na sau se tasi o o’u atalii ma faapea mai, ‘Tama o lo’o tumau pea lo’u tulaga mo le 12 tausaga. O lenei ua ou tusi talosaga mo se avanoa I se tasi o fale faigaluega ma o lea ua maua se avanoa e faatalatalanoa ai, ma ou te manaomia ni tatalo ia manuia’. O le a amata ona ou tatalo mo ia ae faapea mai, ‘Leai, ou te le manao I se tatalo, tau lava o sau upu mo a’u’, ona ou faapea atu lea, ‘Alu, e I’u I le manuia lau faatalatalanoaga’. Na faapea mai, ‘Amene’. O le aso na soso’o ai na foi mai ma le fiafia ma faapea mai, ‘Tama, na matuā ou sauni mo le faatalatalanoaga, ae ou o’o atu, e na o le tolu lava fesili, o ai lou igoa? o le a le avanoa na e tusi talosaga ai? O afea e te fia amata ai?’. Ua ou faamalo atu ia te ia ae faapea mai, ‘toe aumai se isi upu mo a’u’ ma ua faapea ona fai. O le aso na sosoo ai na sau ma le gatete, ‘Tama, na ou usu atu I le galuega fou ae fai mai ua faamavae le pule sili ma ua fai mai o le a avea a’u ma pule sili.’ Na toe fai mai e toe avatu seisi au upu ma ua faapea ona faia. Na toe foi mai I le aso na sosoo au ma ua lē maugagana. ‘Tama ua latou iloa o le mafuaaga na faamavae ai le pule sili ona o le totogi o lea na latou faaluaina lou totogi ina ia taofia lo’u alu ese’.  Ua avatu iai la’u faamalo ae faapea mai e toe avatu seisi upu mo ia. Ua ou ata ma faapea atu, ‘ua e manao ea e ave ma oe le pisinisi mai ē e ona?’. 

A'o avea au ma faiaoga I le Iuvesite, sa iai sa’u avetaavale ma e masani e o’o atu I le afa o le masina ua matua leai ma sa’u tupe e oo I le penisini o le taavale ou te alu aitalafu mai se tupe mai la’u avetaavale sei utu ai. Sa lelei lo’u totogi na iai ae peitai sa foliga mai e leai se alu I luma. Ae ina ua ou fetaiai ma Keriso, na liua mea uma I le lelei ma le manuia, e le faapea o so’u poto, ae ona ua lafoai lou ola ia Keriso ma ua ou ola faapaiaina. E mafai foi ona avea lenei tulaga mo oe pe afai e te faia le mea na ou faia. Afai e iai Iesu I lou vaa, e mautinoa le maua o le manuia, I le suafa o Iesu, Amene. 

OPEN HEAVENS

MATALA LE LAGI MO LE ASO SA 8 OKETOPA 2023

Manatu Autu: O le Ala I fafo (The Way out)

Tauloto – Esoto 6:6 ‘O lenei, fai atu i le fānauga a Isaraelu, ‘O a‘u o le ALI‘I, ‘ou te ‘aumaia ‘outou i lalo o avega mamafa a Aikupito; ‘ou te lavea‘i mai fo‘i ‘iā te ‘outou a‘i a latou galuega, ‘ou te fa‘aolaina mai fo‘i ‘outou i le lima fa‘aloaloa ma sala tetele’

Faitauga - Tusi Paia: Luka 7:11-15

Upu Folafola

Auā o Iesu le Ala, e faapena fo’i ona ta’u mai ai o ia fo’i le Ala e alu ese ai mai faafitauli. E i ai faafitauli i le lalolagi e lē mafai ona e fō’ia tusa po’o le a lou poto. Peita’I o Iesu e leai se faafitauli na te lē mafaia. O Iesu Keriso le ala e ulufafo ai mai mafatiaga.

I la tatou Tusi Paia faitau o le asō o lo’o ta’u mai ai se fafine ua maliu lana tane, na oti lana tama. E lē tau ta’ua maia e se isi ia i tatou o lenei tinā sa tumu i le loto mafatia. O se fiafiaga I le tinā le aso na ia fanauina ai lana tama, mautinoa sa iā te ia le olioli peita’i na taumafai malosi le tiapolo e suia lona olioli i le faanoanoa ma manumalō ai ina ua fasiotia e le tiapolo lona toalua, ma fa’asolo atu ai i si ana tama e toatasi. Ou te mautinoa a’o fa’agāsolo toe sauniga o le atali’i ma aga’i atu i lona tuugamau, sa faapenā ona atili faateteleina le loto fa’avauvau o le tinā, auā sa iloa e lenei tinā o nisi o i latou o loo mulimuli atu ia te ia o loo faafoliga o tagi tu’i faatasi ma ia a’o loo faapea ifo i o latou loto, “Aisea ua tupu ai nei mea leaga ia te oe? Na o oe o e nofo I le taulaga? Atonu ua e faia se sesē I le Atua ua fa’asala ai oe,” peita’i na fetaia’i ma Iesu Keriso ma suia ai lona loto faavauvau I le fiafia. A’o e faitauina ma faalogologo I lenei faamalosi’au I le asō, ua tafiesea le faanoanoa mai lou olaga e faavavau I le suafa o Iesu.

Sa valaaulia a’u ou te lauga I se faatasiga i Ikoyi o se nuui Nigeria i ni tausaga ua mavae. Sa tu’u ou te lauga fa’atatau i le ulutala, “E te manaomia se vavega,” peita’i a’o o’u fa’atalitali i le potu malolō o le fale sa o’u nofo ai ma vaavaai i le matagofie o le fale, sa o’u manatu e sui le autū o la’u lauga e faapea, “E tatau i le tagata ona vivi’i i le Atua.” Sa o’u manatu o lē e ona le fale ma ana mālō e foliga mai ua latou maua uma mea latou te manaomia, peita’i na fetalai le Atua Silisiliese ia o’u talanoa ia i latou i le autū, “E te mana’omia se vavega.” Na o’u iloa mulimuli ane o le tama tama e toatasi a le fafine e malosi tele i fualaau fa’asāina. Ina ua musu lona tinā e ave I ai se tupe e faatau ai aisa, mariuana ma isi, na tago tu’u ni fualaau fa’asāina I totonu o le ato a lona tinā, ma a malaga i Lonetona ia maua ai lona tinā e leoleo i le malae vaalele. E foliga aulelei ma matagofie mea uma i fafo, a’o totonu, e fa’anoanoa.

O le aso lea a’o o’u lauga, na ofoina atu e le taulealea lona ola iā Iesu Keriso, mai le aso fo’i lea, na maua ai e le tinā o le taulealea lenei le olioli. Afai e te mana’o e iā te oe le olioli mo aso o totoe o lou soifua, ua na o Iesu Keriso le ala. Tu’u iā Iesu na te amoina lau avega (Mataio11:28). Ua na o Iesu e aumai ai le malologa mo le loto mafatia, peita’i ia ofoina atu muamua lou ola iā te ia. I le suafa o Iesu Keriso. Amene.

OPEN HEAVENS

MATALA LE LAGI MO LE ASO TOONAI 7 OKETOPA 2023

Manatu Autu: O le Ala (The Way)

Tauloto – Ioane 14:6 ‘Ua fetalai atu Iesu ‘iā te ia, “O a‘u nei le ala, ma le ‘upu moni, ma le ola; e lē alu atu lava se tasi i le Tamā, pe a lē ui mai ‘iā te a‘u.

Faitauga - Tusi Paia: Ioane 8:32-36

Upu Folafola

Atonu e fia fesili se isi i le Alii o Iesu Keriso faapea, “E tele igoa e valaau ai oe e tagata, o nisi fai mai o le A’oa’o, o isi o le Perofeta. Se ā e te finagalo e valaau ai oe?” I le tatou Upu tauloto o le asō, na tali Iesu, “O a’u o le Ala, Upu Moni ma le Ola.” O suafa mata’utia nei e tolu, peita’i se’i o tatou vaavaai muamua iā Iesu o le “Ala”.

O le asō, o le a tatou mafaufau o Iesu o le ala i le saolotoga. Fai mai Ioane 8:32 “E iloa fo’i e outou le mea moni, e tu’u saoloto fo’i outou e le upu moni.”

I le Tusi o Ioane 8:36, fai mai le Tusi Paia, “O lenei, pe a tu’u sa’oloto outou e le Atali’i, ona saoloto faamaoni ai lea o outou.” Afai tatou te talanoa i le sa’olotoga, e I ai tagata faapea a latou ua saoloto ae leai. E toatele tagata maualuga ma faia tonu, e i ai o latou faafitauli e lē mafaia e tupe ona fōia - faafitauli e matuā lē malamalama ai se isi. Peita’i e leai se faafitauli e sili atu I le mana o Iesu Keriso. O ia o le ala i le saolotoga. Sa i ai se tamā i le Mareko 5:1-15 sa pulea e agaga leaga. Na o le tasi lava le Upu mai le Ala ae o ese temoni mai lenei tamā ma sa’oloto ai o ia.

Sa i ai se tinā sa uiga ese se tulaga na maua ai, ma uilā ai lona tino I so’o se taimi e ola ai se meatotino alu I le eletise. A fa’aola le auli, e vevela le tino o le tinā lenei ae o loo ma’alili pea le auli. Ae e ki loa le ili eletise, amata loa ona ta’avili ta’amilomilo le fafine. Ina ua mana’o e alu I le falema’i i se taavale, na ona ki lava e le ave taavale o le taavale, oso mai le uila/eletise mai le afi o le taavale si’i le tinā ma togi I fafo ma le taavale. Ona o lenei tulaga na motusia ai le eletise mai lona fale.

Sa o’u asia lenei tinā ma o’u fai i ai, ou te iloa le tagata e mafai ona fa’asa’oloto iā te ia. E le’i toe faatali le tinā a ua ofo atu lona ola iā Iesu Keriso. Na fai la matou tatalo ma ina ua toe ki le ili, na ola lelei le ili e aunoa ma le toe aafia o si tinā. Ua fa’asa’olotoina e Iesu le Ala.

Pau lava le auala e maua ai le fa’asa’olotoga o le tu’u atoa o lou soifua I le Alii o Iesu le Ala. O Iesu Keriso ua na o le pau lea o le Ala, Upu Moni ma le Ola. I le suafa o Iesu Keriso. Amene.

OPEN HEAVENS

MATALA LE LAGI MO LE ASO FARAILE 6 OKETOPA 2023

Manatu Autu: Valaau I ona suafa (Call Him by His Names)

Tauloto – Isaia 25:1 ‘Le ALI‘I e, o lo‘u Atua lava oe; ‘ou te fa‘ane‘ene‘e ‘iā te oe; ‘ou te vivi‘i atu i lou suafa; auā ‘ua e faia mea e ofo ai; o mea na e pule ai talu anamua e fa‘amaoni ia, e moni lava’.

Faitauga - Tusi Paia: Filipi 2:9-10

Upu Folafola

O loo manino e fiafia Iesu I suafa e pei ona faaalia I le tatou faitauga o le Tusi Paia o le aso. O lona suafa e sili I suafa uma. E tele suafa e faaaogaina e Iesu ma e aofia ai ma le ‘atalii o le tagata’ (Mataio 18:11), ‘o le faitotoa’ (Ioane 10:7), o le ‘Areto o le ola’ (Ioane 6:35) ma o nisi taimi e na te tuufaatasia nisi o ona suafa. Mo se faataitaiga, na ia tuufaatasia suafa e lua I le Ioane 11:25, tolu suafa I le Ioane 14:6, lima suafa I le Isaia 9:6 ma le valu suafa I le Faaaliga 1:8. 

E silafia uma e tagata le Atua o le Atua, ae a latalata loa tagata ia te ia, ona amata lea ona latou faaigoaina I isi suafa e tupu ma fanau mai ona o mea na tutupu I o atou olaga. Mo se faataitaiga, I le Kenese 22:14, na faaigoaina e Aperaamo le Atua o ‘Ieova Irae’ aua na saunia o se vavega le mamoe na manaomia e osi ai le taulaga. I le Esoto 17:15, na sau ai Mose ma le ‘Ioeva Nisi’ aua na fesoasoani le Atua e manumaloina le taua ma Amaleka ma folafola o le a tafiesea I latou ma le toe manatua I le lalolagi. 

E fiafia le Atua e valaau atu I suafa eseese ia te ia e fua I le tulaga na faaalia mai ai o ia I lea tagata. Afai e te naunau e faia e le Atua se mea mo oe, valaau ia te ia I se suafa e feso’otai ma le mea o lo’o e manao ai ona e vaai lea ua ia gaoioi mai e tusa ma le suafa ua e valaau ai ia te ia. O ia lava na faatulai ia te ia lava. I le Esoto 15:26, ina  ua folafola atu e le Atua I le fanauga a Isaraelu e latou te le maua I ni faamai na maua ai le au Aikupito, na faaiu lana fetalaiga I le uluai faailoa mai o se tasi o ona suafa , na ia faapea mai: ‘O a’u o le Alii e faamalolo ia te oe’. I le Esoto 3:14, ina ua fesili atu Mose I le Atua mo lona suafa, na ia faailoa mai, ‘O au o Le ola’. O le suafa lenei na iloa ai e le fanauga a Isaraelu le Atua ona o le latou savaliga, e manaomia itu eseese o le Atua. I nei vaega eseese, na latou manaomia le Atua e saunia mea na latou manaomia, puipui ma faamalolo iai latou e oo I le saunia o le ala. O lona uiga, a e manao I le Atua e galue atu I se vaega, valaau ia te ia I se suafa e fetaui lelei ma le tulaga lena o loo e manao e na te faia mo o e. O le a le suafa o le Atua e te iloa lelei e fua I mea na ia faia mo oe? I le suafa o Iesu, Amene.   

OPEN HEAVENS

MATALA LE LAGI MO LE ASO TOFI 5 OKETOPA 2023

Manatu Autu: O fea oe? (Where are you?)

Tauloto – 2 Korinito 13:5 ‘Inā tofotofo ia ‘outou ‘iā te ‘outou, po ‘ua ‘outou i le fa‘atuatua; ‘inā su‘esu‘e ifo ia ‘iā te ‘outou; pe tou te lē iloa ‘ea o ‘outou loto, ‘ua i totonu ‘iā te ‘outou o Iesu Keriso, pe ‘āfai ‘ua lē pepelo ‘outou?..

Faitauga - Tusi Paia: Kenese 3:8-9

Upu Folafola

Ou te talitonu o le fesili a le Atua iā Atamu e pei ona I ai I le faitauga o le Tusi Paia o le aso, e aogā tele, ma e o’o lava I le aso, o loo talafeagai lona faaaogaina. Le pele e, afai e fesili atu le Atua ia te oe I le asō, o le a sau tali I lena fesili ma lou loto faamaoni?

O le tali o le Fesili e pei ona taua I luga, e tatau lava ona e fesili muamua ai ia te oe lava,  "O fea sa ou i ai ananafi"? po o le vaiaso talu ai, po o le tausaga talu ai poʻo le taimi na e faatoa fanau mai ai. A uma ona e taliina lenei fesili ma le faamaoni, ona mafai lea ona e tali I le fesili, “O fea o e iai I le aso”?

Mai le aso na fanau mai ai so’o se tagata lava, e amata ai loa lana malaga e toe foi atu i le mea na sau ai (Failauga 12:1-7 ). O le mea lea, e tusa lava po’o le a lou talavou, e te tuputupu aʻe lava i lea aso ma lea aso. E tatau ai ona e fesili ifo ia te oe lava I taimi uma, "o le a le mamao ua ou faataunuuina ai le faamoemoega o lo'u foafoaga ma lo'u faaolataga?"

Seʻi o tatou iloiloina le talaaga o Samasoni. Sa avea o ia o se tagata mata'utia ma e fefefe ai le fili, ae na i'u ina olo saito i I totonu o le falepuipui. E tatau ona e fesili ifo ia te oe lava, “Po o ‘ou ausia ea le tulaga maualuga, ma fua mai lo’u olaga ni fua e tumau? Pe o tupu ea lou nei tagata I le itu faaleagaga po’o faaitiitia? Pe o faatuputupulaia ea lou taimi ou te mafuta ai i le mamalu o le Atua nai lo le mea sa ou masani ai pe o alu solomuli? Po’o tupu pea le aofai o agaga o manumaloina mo le Malo o le Atua pe o faaitiitia?

E tatau foi ona e fesili ifo ia te oe lava, "O faateleina lo’u tamaoaiga tau seleni, pe o faaitiitia?" ‘āfai ‘ua fa‘aitiitia, pe ‘ua e aia ea le fatu sa tatau ona totoina? Pe atonu ea o loo e lūlū ma le itiiti (2 Korinito 9:6 )? Atonu, ona ua le atoatoa ona totogi lau sefuluai ma lau taulaga, ma ua e galue ai ma le fetuu(Malaki 3:8-9)?

Le pele e, afai o oe o se atalii poo se afafine o le Atua, e taua le fesili ifo ia te oe lava o fesili nei, mai lea taimi i lea taimi. Afai e te silafia e te le o tuputupu aʻe i soo se vaega o lou olaga, faamolemole ia mafaufau lelei i ou ala ( Hakai: 1: 5-7 ). Ia talosaga atu i le Agaga Paia e suʻesuʻe oe ma faailoa atu iā te oe le vaega tonu na e te faaletonu ai. Ole atu ia te Ia, e faasino atu le ala e faia ai suiga lelei i lou olaga.

Ou te tatalo ia e faataunuuina le finagalo o le Atua mo lou olaga, i le suafa o Iesu Keriso. O e iai ea I le tulaga e tatau ona e iai? Amene.

OPEN HEAVENS

MATALA LE LAGI MO LE ASO LULU 4 OKETOPA 2023

Manatu Autu: O faamanuiaga ma aoga o le amiotonu 2 (Benefits of Righteousness 2)

Tauloto – Salamo 34:15 ‘O fofoga o le ALI‘I o lo‘o fa‘asaga i ē amiotonu, e liliu mai fo‘i ona taliga ‘iā latou ‘alaga’..

Faitauga - Tusi Paia: Salamo 34:7-22

Upu Folafola

O leisi faamanuiaga o le amiotonu o lenei, afai e agai mai le amioleaga e osofaia oe, e laveaina oe e le Atua mai lena tulaga ae suia I se tagata lē faatuatua. O lo’o faamauina lelei I le Faataoto 11:8 ‘E lavea‘iina lē amiotonu a‘i le puapuagā; ‘ae sau lē amio leaga e sui a‘i o ia’.

E ta’ua lea o le Tulafono o le faafesuiai. A o’o mai puapuaga ua tau lutia ai le amiotonu, e taofia e le Atua ae suia I seisi tagata. E tele ni vaega faapenei I le Tusi Paia. O tagata na lafoaia Sataraka, Mesako ma Apetiniko I le afi, o I latou ia na maliliu ae faasaoina nei tama Iutaia na laveaaina e le Alii, aua e tatau ona fafagaina pea le afi (Tanielu 3). O tagata na lafoaia Tanielu I le lua o leona o I latou foi ia na sui a’I ma ua ai uma e leona (Tanielu 6).

I le tele o tausaga talu ai, na sau ai se fafine ia te a’u mo tatalo. Fai mai na fai sana miti ma vaaia lana tane sa agai atu I se malaga I fafo ua toe foi mai I se pusa maliu. Na ou fesili iai pe ua faaolaina lona toalua ae fai mai ioe. Ua ma tatalo ona o lenei miti ona alu lea. Ina ua maea se taimi, na ou vaaia se faasalalauga o le maliu o se alii I le nusipepa e tutusa lelei o la faaiu ma le fafine lea. I le sauniga lotu o le Aso Sa, na ou fesili I le fafine lea I le faasalalauga o le maliu pe le o lona toalua. Na tali mai e leai, e lē o lona toalua ae o se tasi o lona aiga. O le oti sa fuafua mai I se tagata faatuatua, ae na faaalia mai e le Atua iai matou ina ia matou tatalo ai, ma ina ua matou tatalo, na ia faasaolotoina le tagata faatuatua mai le oti ma ua suia I le tagata lē faatuatua. E leai seisi inisiua pito sili ona taua mo lou puipuiga e sili atu I lou ola faapaiaina. 

Afai e te soifua I se olaga amiotonu, e te soifua I le olaga nei ma le lē matau, aua ua e silafia lelei e saogalemu a taeao. Fai mai le Tusi Paia I le Faataoto 28:1E sōsōla o ē amio leaga, a o leai sē tuliloa; a o ē amiotonu, e pei o le leona ta‘anoa i latou ‘ona lē mata‘u.  

Afai ete talitonu e puipuia oe e ni leoleo ma ni a latou fana, faatali la sei e feiloai ma tagata o lo’o aumaia ni fana taavili, e vave ae e iloa, ua na o oe ua leai se puipuiga. O tagata amiotonu e le matau e pei o leona taanoa aua foi latou te silafia lelei o loo ‘au le Atua ma I latou. Ou te avatu se lu’i ia te oe ina ia e faia se ofo I le Atua I le aso. Ou te manao ia e ofo atu I le Atua Silisili ese ma folafola atu o le a e ola ma soifua I se olaga o le amiotonu, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 3 OKETOPA 2023

Manatu Autu: O faamanuiaga ma aoga o le amiotonu 1 (Benefits of Righteousness 1)

Tauloto – Salamo 37:25 ‘Ua ‘ou toeaina a‘u nei, sa au taule‘ale‘a; a ‘ou te le‘i iloa se tagata amiotonu na lafoa‘iina,

po o ana fānau ‘ua ‘aisi i latou’.

Faitauga - Tusi Paia: Teuteronome 28:1-14

Upu Folafola

Fai mai le Isaia 3:10 “Fai atu i lē ua amiotonu, e manuia o ia; aua o le fua o a latou galuega latou te a’ai ai ma e iai fa’amanuiaga mautinoa mo tagata e amiotonu. O se tasi o na fa’amanuiaga o lo o ta’ua i le Salamo 34:17 “Ua alalaga e ua amiotonu, ona fa’afofoga  mai ai lea o le Alii; ua ia laveai mai foi ia te i latou ai o latou puapuaga uma.”

Afai e te ola ma soifua i se olaga fa’apa’iaina, o so’o se taimi e te tagi atu ai i le Atua, e vave ona tali mai. E tu’u faafeagai ma le tusi a Isaia 59:1-2 o lo o ta’ua ai, o agasala a tagata e punitia ai le lagonaina e le Atua o latou tatalo. Na tusia manino e Tavita I le Salamo 66:18 “Ana ou manatu i se amio leaga i lo’u loto, po ua le fa’afofoga mai le Atua ia te a’u.”

Afai e te naunau e faafofoga le Atua I au tatalo, e tatau ona amata loa ona e ola faapaiaina. 

O fa’amanuiaga e maua ma fua mai i le ola faapa’iaina e anoanoai, e pei ona iloa i le tatou faitauga o le Tusi Paia ma le tauloto o le asō. O fanau a ē amiotonu, o le matāfaioi tonu lea a le Atua, e na te tausia I latou ma fa’ataunuu o latou mana’oga. Na faasoa mai le tupu o Tavita I le tauloto o le asō I lona silafia I le soifua ai I ia faamanuiaga. 

O fanau a e amiotonu, e le fa’alagolago i se isi tagata e ola ai – auā fo’i, o le Atua e faamautinoaina e leai se mea e mativa ai I latou. O lona uiga o se fa’amanuiaga po o se meaalofa tu’ua sili e mafai ona e tuuina atu mo lau fanau, o lou olaga fa’apa’iaina. Aua foi o le a faamautinoa e le Atua e leai se mea e mativa ai lau fanau. O se faata’ita’iga manino e maua i le 1 Tupu 11:11-12. Ia manatua, o Tavita o se tagata e tutusa lona loto ma le Atua, ma sa faasaoina e le Atua lona atalii o Solomona, ona o Tavita.

E sili atu le a’oa’oina o lau fanau ia ola faapa’iaina, tusa pe e te tuua le lalolagi nei ae faatasi ma le Alii, ina ia mauaina foi e latou fanau le faamanuiaga o le faasaoina e le Alii. Fai mai le Eperu 1:9 ‘Ua e fiafia i le amiotonu, a ‘ua e ‘ino‘ino i le amio leaga. O le mea lea, ‘ua fa‘au‘uina ai oe e le Atua, o lou lava Atua i le suāu‘u o le ‘oli‘oli e sili, i ē tou te fa‘atasi.”

Ia e tuliloaina le amiotonu, ma ‘inoino i le amio leaga, ona e silasila lea i fua o le mamalu a le Atua i luga o lou soifua, ma so’o se mea e tau ia te oe. Ia ‘avea le ola fa’apa’iaina ma masani I lou olaga, I le suafa o Iesu, Amene.   

OPEN HEAVENS

MATALA LE LAGI MO LE ASO GAFUA 2 OKETOPA 2023

Manatu Autu: Faalautele lou silafia o mea e lē vaaia 1 (Increase your spiritual capacity 1)

Tauloto – 2 Korinito 4:18 ‘O lo‘o matou lē mānatunatu i mea ‘ua va‘aia, a o mea e lē va‘aia; auā o mea ‘ua va‘aia e gata mai ia, a o mea e lē va‘aia e fa‘avavau ia....”

Faitauga - Tusi Paia: Iakopo 4:7-8

Upu Folafola

E toatele tagata e manatu o mea e le vaaia I le itu I le agaga e pulea mea e vaaia I le itu I le tino, ma e moni, peitai e toatele e latou te le faaaogaina. Ua o’o I le taimi e tatau ai ona faalautele lou silafia ma le malamalama I mea e le vaaia I le itu I le agaga ina ia mafai ona e pulea mea e vaaia I le itu I le tino. 

O lou malosi I le itu I le agaga I mea e le vaaia, o lou malosi foi lea I le itu I le tino I mea e vaaia. Afai e te le talitonu, faitau I le 2 Tupu 1:9 ona faatusa lea I le 2 Tupu 6:14-15. Ina ua finagalo le tupu e saisai mai Elia, na ia auina atu ni fitafita e 50 ma le taitai’au, ae ina ua finagalo e saisai mai Elisaia, na auina atu e le tupu le ‘autau atoa a fitafita. Na maua e Elisaia le faalua o le faauuga na ia Elia, ma I le tino I mea e vaaia, e malosi atu o ia I lo Elia. 

O le loloto o lou agai atu I le agaga I mea e le vaaia, o le maualuga lena o lou lele I le itu I le tino I mea e vaaia. E tele ina silafia lea tulaga e tagata o le lalolagi I lo kerisiano. A avatu se tulaga I tagata e ifo I tupua, e latou te faia muamua tu ma aga masani I latou talitonuga. E toatele kerisiano e papa’u lo latou iloa e o atu ma fia tauva I nei tulaga ma avanoa. E silafia uma e tagata o le maualuga o se fale tele, o le loloto foi lena o le faavae e tatau ona iai. E tatau ona amata ona suesue lelei lau Tusi Paia, tatalo ma anapogi ia fai so’o pe afai e te manao e siitia lou tulaga ma manuia I le olaga nei. O le loloto e te agai atu iai, o le maualuga foi lena o le tulaga e te lele ai. 

E toatele ua latou faitauina le Tusi Paia mai le Kenese I le Faaaliga, ae toa itiiti ua a’oa’oina lelei I latou ma silafia aoaoga loloto mai le Upu a le Atua I le itu I le agaga I mea e le vaaia. E toatele ua faitau I le Faataoto 6:26 ae a o’o ina faatosina atu iai se tamaitai, e le mafai ona latou iloa o lo’o iai se fuafuaga I le itu I le agaga I mea e le vaaia ina ia faaumatia I latou. O le tulaga lea e toatele ai kerisiano e pauū I mailei a le fili I le asō ona latou te le malamalama I ala a le tiapolo ma silafia ala a le Atua e faatoilalo ai le tiapolo. 

Afai e fia avea oe ma milionea, o le a lua tau ma temoni e tau ma milionea. E le avea oe e le Atua I se tulaga e le mafai e lou malamalama I le itu I le agaga ona tau ai, aua afai na te faia, o lo’o ia tuuina atu oe e faatoilaloina. Faalautele ma faatupu lou silafia ma le malamalama I le itu I le agaga I mea e le vaaia, ona e vaaia lea ua ia siitia oe seia o’o ma fetaui lelei lou malosi I le tino I mea e vaaia ma lou tulaga I le itu I le agaga I mea e le vaaia. 

Afai e te pulea le itu I le agaga I mea e le vaaia, e mautinoa e te pule I le itu I le tino I mea e vaaia, I le suafa o Iesu, Amene. 

OPEN HEAVENS

MATALA LE LAGI MO LE ASO SA 1 OKETOPA 2023

Manatu Autu: Tatalo mo lou atunuu  (Prayers for your nation)

Tauloto – Salamo 122:6 ‘Ai‘oi atu ‘outou ‘ina ‘ia manuia Ierusalema: “‘Ia manuia i latou o ē alolofa ‘iā te oe....”

Faitauga - Tusi Paia: Salamo 122:1-9

Tatalo

1.       Tamā Faafetai mo lo’u atunuu. Faafetai mo mea uma ua e faia mo i matou I le tuana’i, o le taimi nei ma le lumanai. Faafetai tele le Alii e.

2.       Tamā, faamolemole afio mai e te āsia faapitoa lo’u atunuu ma ia faia se vavega e iloa uma ai e le lalolagi ua na o oe e mafaia ona fai.

3.       Tamā faamolemole fa’asa’oloto lo’u nu’u mai ta’ita’i, tagata faatupu faalavelave ma i latou uma o loo taumafai e faaleaga lo’u laueleele.

4.       Tamā e, e ala i lou alofa mutimutivale, ia tafiesea uma fetu’u ma galuega a le tiapolo I totonu o lo’u nuu I le suafa o Iesu.

5.       Tamā faamolemole puipui lo’u atunuu mai osofaiga uma a le fili a ia foa’i mai ia I matou le manumalō i itulagi uma i le suafa o Iesu.

6.       Tamā faamolemole ia faia se auala e siitia ai le tulaga o lo’u atunuu I le suafa o Iesu.

7.       Tamā faamolemole liligi mai ou manuia i luga o si o’u atunuu. Le Alii e, ia fa’auluolaina uma vaega mativa o lo’u atunuu i le suafa o Iesu.

8.       Tamā faamolemole faatula’i ni ta’ita’i lelei ma amiotonu, o lo’u atunuu. Ia latou faia lou finagalo I le suafa o Iesu.

9.       Tamā faamolemole faamuta so’ose ituaiga amioleaga I totonu o lo’u atunuu. Le Alii e, ia pulea e lou amiotonu lou atunuu i le suafa o Iesu.

10.   Tamā faamolemole ia faia i lo’u atunuu se amataga fou o lou mamalu I le suafa o Iesu.

11.   Tamā faamolemole ia saunia se Fa’aolaolaga tele i lo’u nu’u. Le Alii e, faatula’i ni fai evagelia ma ni misionare latou te manumalō ina ma liliuina agaga o lo’u atunuu mo oe i le suafa o Iesu. Ia ifo tulivae uma ia te oe ma ta’uta’u e laulau faiva uma lou Paia ma lou Silisiliese.

12.   Le Alii e, lo matou Tamā ia ufiufitia lo’u nu’u ma ona tagatā nu’u uma i le toto o le tama’i mamoe i aso uma i le suafa o Iesu.

13.   Le Alii e, ia iloa e ta’ita’i ma tagata uma o lo’u nu’u ona tatalo ma faamanuia mo Isaraelu lou nu’u Paia ina ia o latou maua ai manuia e pei o au afioga i le Kenese 12:3 “ Ou te faamanuia atu ia te’i latou o e faamanuia ia te oe,” i le suafa o Iesu Keriso. Amene

OPEN HEAVENS

MATALA LE LAGI MO LE ASO TOONAI 30 SETEMA 2023

Manatu Autu: Lagonaina o le Atua (Hearing God)

Tauloto – Isaia 55:3 ‘Ua‘i mai ia o ‘outou taliga, ma ‘outou ō mai ‘iā te a‘u; fa‘alogologo mai ia, e ola ai o ‘outou agaga. ‘Ou te osia fo‘i le feagaiga e fa‘avavau ma ‘outou, o mea alofa ia na folafolaina ‘iā Tavita e fa‘amaoni lava...”

Faitauga - Tusi Paia: Salamo 29:3-9

Upu Folafola

Sa na o a’u o se faiaoga Matematika a’o le’i fa’au’uina e le Atua e fai ma faifeau. O le a se Upu e mafai e se tagata e a’oa’oina le Matematika ona fai e faamanuia ai lou loto pe ana lē seanoa ma le Atua iā te ia? O lo’u olaga ma le galuega a le Atua e faavae i le ta’ita’iga a le Atua. E ua’i atu pea o’u taliga iā te ia e lē aunoa auā a fetalai le Atua e faapenā fo’i ona galue mai lona mana. Fai mai Failauga 8:4 O le mea ua i ai le poloaiga a le tupu, o le mea lea ua i ai le pule. I le Ekalesia Redeemed Christian Church of God, e tele ni vavega ua matou vaai i ai - ua toetu tagata na oti, pupula tauaso, fananau fafine sa leai ni fanau ma le tele o isi ta’utinoga ola ona a fetalai le Atua ona galue mai lea o lona mana.

Talitonu mai ia te a’u, pau le auala e mafai ai ona e ola i se olaga manuia o lou lagonaina o le siufofoga o le Atua. Ou te misi alofa i tagata e lē mafai ona lagonaina pe lē iloa fo’i le Atua. O se tagata fa’aolaina ae lē lagonaina le Atua, ma lē mafai ona ia faia ni vavega, e lē mafai fo’i ona alo ese mai mailei a le tiapolo.

Ua faamanino mai i le Ioane 6:68:‘Ona tali mai lea o Simona Peteru ‘iā te ia, “Le Ali‘i e, a matou ō ‘ea ‘iā te ai? O ‘iā te oe ‘upu o le ola e fa‘avavau.

E lē mafai ona e ola e aunoa ma le upu folafola a le Atua. O le mea moni, na faia le tagata ia soifua i afioga uma e tulei mai i le fofoga o le Atua (Mataio 4:4). O le mafuaaga lea e tatau ai ona avea le Tusi Paia ma au uo i aso uma. O le Tusi Paia la’u tusi faitau e sili ona o’u fiafia i ai auā ua mafai ai ona o’u fesootai vavalalata i la’u augātupulaga. E fa’aauau pea ona ou faitau le Upu ina ia saga faaaogaina pea a’u e le Atua.

E tatau fo’i ona e fa’a mautinoa e te filifili ma le fa’aeteete i latou e te faalogo i ai. Afai e te lagona le fetalai mai o le Atua ae fiafia fo’i e faalogologo ma talatalanoa i tagata e leai se mafutaga ma le Atua, ia e faaeteete auā e mafai ona o latou ta’ita’iina sesē oe. O ai tagata o loo e fesili i ai mo se fautuaga? O ai o e faalagolago i ai mo se tonu sa’o? Fai mai le Faataoto 13:20 a’o le uō a e valelea e leaga ai lava ia.

Afai e mamā lou loto a e te lē o lagonaina le siufofoga o le Atua, e manaomia lou tatalo se’ia o’o ina tatala e le Atua lau faalogo ma e lagonaina lona siufofoga. Vavae ese lou tagata e saili le fetalai mai o lou Atua ia te oe (Habakuka 2:1). E ola lou agaga e tusa ma le meaai fa’aleagaga o e faalogo i ai. O lou lumanai ma le faataunuuina o le polokalame a le Atua i lou soifua e faalagolago i lou usita’i i faatonuga e te maua mai le Atua. Faalogo I le Upu o le ola e te ola ai. I le suafa o Iesu. Amene.