Samoan Devotional

OPEN HEAVENS

MATALA LE LAGI MO LE ASO TOONAI 28 OKETOPA 2023

Manatu Autu: O le olaga anapogi e siitia oe i luga (Fasting takes you higher). 

Tauloto – Mataio 17:21 ‘‘A ‘ua nā o le tatalo ma le anapogi e ō ‘ese ai mea fa‘apenā.”

Faitauga - Tusi Paia: Galuega 13:1-12

Upu Folafola

E amata loa ona e anapogi, e iloa loa suiga e ta’u mai ai ua lē toe pulea oe e lou tino. Muamua, o le anapogi e pulea ai lou laulaufaiva. I le taimi o se anapogi, e te manino ai o le tele o taimi e leai ma se mea e te maua I le tautala. Fai mai Iakopo 1:26 A e faapea mai e te toaga I le lotu ae lē taofi i lau upu, ua e faasesēina lou lava loto. O lea a’o e anapogi ma faaitiitia au tala e fai, e laititi fo’i le avanoa e te faia ai le agasala.

O le anapogi fo’i e fesoasoani iā te oe e pulea lou ita, aemaise i anapogi fa’aauau mo se taimi umi, auā o le a leai sou malosi e fusu ai ma se isi. A e ita gofie, e māfua ona o loo e maua le malosi; ae se’i o tatou vaai la pe faafefea ona oso lou ita pe afai na e anapogi mo le 21 aso ma po! A fa’aita oe e se tasi o le a faigofie ona e faapea atu i lea uso, “Faamanuia le Atua iā te oe, aua e te faia fua a’u.” O loo manino le Upu I le Failauga 7:9 e faapea “Aua le faata’alise ona ita o lou loto; auā e tumau le ita I loto o e valelea.”

E ao ona e fesili oe ia te oe pe aisea e lē fiafia ai lou tino e anapogi. Ua faapea mai Kalatia 5:17 O le tino ua tu’inanau lea e tete’e atu i le Agaga. I se isi fa’aupuga, o lou tino e mana’o e tau ma le Agaga. A ō tatou lē ta’ua o tatou e anapogi taeao, e mafai a ona e ala mai i le taeao faataunuu lau anapogi seia o’o ina tatala i le itula e 2.00 i le aoauli. Peita’i tatou te faailoa loa o le a fai se tatou anapogi, e i ai tagata o le a aai seia o’o i le tulua o po ma a’o ae feala mai lava i le taeao e fia aai. O le mafuaaga ona e lē mana’o le tiapolo e te anapogi; o ī e te iloaina ai e lelei mo oe le anapogi. E te masani loa e anapogi, o le a e ofo i le tele o galuega a le pouliuli i lou olaga ua leva ona e ui ai, peita’i o le a faigofie ona aveesea pe a e anapogi. Ua faapea mai le Mataio 17:14-21 sa i ai se temoni sa taumafai le au so’o e tuli ese peita’i latou te le’i mafaia e aunoa ma le anapogi ma le tatalo. E i ai ā mauga e le mafai ona soloia vagana ua o faatasi le tatalo ma le anapogi.

I le Tusi o Esoto 17:8-13, ina ua tau Isaraelu ma Amaleka, na alu Mose i le tumutumu o le mauga ma sisii ona lima a’o tau e Iosua ma le fanauga a Isaraelu le taua. A si’i I luga e Mose ona lima ona manumalō lea o Isaraelu I le taua, a tu’u fo’i i lalo ona lima ona mālō mai ai lea o Amaleka. E pulea e le fa’aleagaga le fa’aletino. O le tali o le faafitauli fa’aumiumi o loo lua feagai, o ni aso e te anapogi ai faaopopo i lau tatalo. O le anapogi e tupu ai lou olaga, ma amata ai ona e ola ma galue i se siosiomaga e maualuga atu i le olaga masani. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 27 OKETOPA 2023

Manatu Autu: Faatonu le tino (Tame the Flesh)

Tauloto – Kalatia 5:16 ‘‘Ou te fai atu, ‘ia ‘outou sāvavali i la le Agaga, ‘ona lē faia lea e ‘outou o le tu‘inanau o le tino.”

Faitauga - Tusi Paia: Kalatia 5:16-25

Upu Folafola

O le tino o se auupega malosi I le lima o le tiapolo. Fai mai le Kalatia 5:17 o le tino ‘ua tu‘inanau lea e tete‘e atu i le Agaga, ‘ua tu‘inanau fo‘i le Agaga e tete‘e atu i le tino; ‘ua fete‘ena‘i fo‘i ia mea. E manao le tino ia e faia le agasala ao lou agaga o loo naunau e faamalie le Atua. Afai e manumalo le tino I le taua, e I’u ai lava I le manumalo o le tiapolo I lou agaga. O le mafuaaga lea e tatau ai ona e pulea ma faatonu lou tino I taimi uma ma o se tasi o vaega e tatau ona e faia e manumalo ai, o le anapogi. 

E toalaiti lava tagata e mafai ona latou anapogi mo le 40 aso ma 40 po. E pau le toatolu o lo’o faaamauina I le Tusi Paia na latou faia lea anapogi, o Mose, Elia ma Iesu Keriso. E te ono fia iloa, o le toatolu foi lea na liua I luga o le mauga ma susulu e pei o le la. O le mataupu o le aso e le mo I latou e loto vaivai, ae mo I latou e fia tupu pea o latou olaga faaleagaga. 

Aua nei e faatagaina se tagata e fai atu ia te oe na maea le taimi e anapogi ai ina ua fetalai Iesu ‘ua maea’ I luga o le satauro, o le taimi lenei o le anapogi. I le Mataio 9:14-15, e iai tagata na o mai ma faasea ia Iesu ona e le anapogi lona au soo. Na faamaonia mai e Iesu, a maea lona maliu ma le toetu ma afio ae I le lagi, ona faatoa anapogi lea o tagata. O le taimi lenei o le anapogi, ma e tatou te anapogi seiloga e toe afio mai le faatoafaiava. A toe afio mai, e le toe manaomia loa lea ona toe anapogi seisi aua fai ma le 1 Ioane 3:2, a toe afio mai o ia, o le a pei I tatou o ia. A o’o mai le siitiaga, o I latou o lo’o soifua I lea taimi, e suia o latou tino e pei o le tino o Iesu Keriso. I le taimi lena, e tatou te le toe manaomia ni meaai, o mea uma e ai ai o ia I le tino fou, o mea foi na o le a tatou aai ai, ae I le taimi nei ao tatou faatalitali, o loo tau pea le taua e o tatou tino ma le Agaga. E tatau ona tatou anapogi I le malamalama o Keriso. 

E iai I latou e fai atu ia te oe o le anapogi, e le mo l latou e maua le alofa tunoa, e pepelo tele I latou. O Paulo, o le aposetolo o le alofa tunoa na ia faapea mai I le 2 Korinito 11:27, e masani o ia I le anapogi. Na anapogi soo ina ia faatoilalo le tino, ina ia aua nei avea o ia o sē e lē faamaoni(1 Korinito 9:24-27). Fai mai le Aposetolo o Paulo e toatele I latou e tamomoe I le tuuga, ae toatasi e manumalo. Afai e te fia ulufale I le malo o le Atua, e tatau ona avea le anapogi ma masani I lou olaga. Faaavanoa taimi o le tausaga e te anapogi ai, I le suafa o Iesu, Amene.    

OPEN HEAVENS

MATALA LE LAGI MO LE ASO TOFI 26 OKETOPA 2023

Manatu Autu: Leai se avanoa mo le paie 2 (No room for laziness 2)

Tauloto – Ioane 5:17 ‘‘Ona tali atu lea o Iesu ‘iā te i latou, “O lo‘o galue lo‘u tamā, e o‘o mai lava i le aso nei; o lo‘o galue fo‘i a‘u.”

Faitauga - Tusi Paia: Eperu 4:8-11

Upu Folafola

O nisi tagata e faaaogaina le galuega a le Atua ma alofaga e paie ai. E latou te manatu ona o le tele o folafolaga a le Atua, e mafai ona latou nofonofo e aunoa ma le faigaluega. O se pepelo tele. E o’o ia Paulo le aposetolo o le alofa tunoa na faigaluega (1 Korinito 4:12). 

E ui e maualuga le faauuga ia te ia, na ia galue malosi I ona lava lima. O tamaiti aoga e musua e suesue ma fai meaaoga ae faapea mai, ‘o loo tusia, e faamanatu mai e Agaga Paia’, ia maitau mai, e pau mea e faamanatu e Agaga Paia o mea na e suesueina. Afai e leai se meaaoga ma suesuega, o a mea e mafai ona faamanatu atu e Agaga Paia? E tatau I talavou I totonu o Ekalesia ma le atunuu ona  taofia le vaavaai I auala e vave ai ona maua le tupe ae ia galulue ma le filiga. O loo iai upega tafailagi ma ua faafaigofie ai ona faia galuega. O I latou e galulue ma le filiga e le taitai ona aisi. E maua e I latou le malosi, le tamaoaiga ma e avea ma tagata tauoloa. Aua le faaaluina lou taimi atoa e matamata ai I luga o upega tafailagi po’o le televise. O tagata o loo e matamata ai o loo galulue malosi ina ia latou ausia ni tulaga lelei. 

I le tele o Tausaga talu ai, ao ou iai I le fale o so’u tausoga sa ou asiasi atu iai I le tuua o le aoga. I se tasi aso, sa fai se koneseti I fafo o le fale ma sa matamata ma fiafia iai tagata a’o faia pea au meaaoga I totonu o le fale. Na sau lou tausoga ma fai mai, ‘e te le fia matamata?’ Na ou tali atu e faaaoga ai se muagaga a le matou atunuu, ‘o le tagata e matamata ma maitau e  isi tagata, e le taitai alu e matamata I isi tagata’. Na faamanatu mai e lou tausoga lea talanoaga talu ai nei, aua ua toatele tagata o loo matamata ma maitau mai lo’u olaga. Afai e fia avea oe ma tagata tauoloa, e le tatau ona faaalu le tele o lou taimi e matamata ai ata I luga o upega tafailagi. Alu e galue ma faigaluega. E iai isi tagata e na o le tatalo ma anapogi ona faasea lea pe a leai se solosolo lelei o le olaga. O le tatalo ma le anapogi e lē o ki tatala ia o le manuia, ae faamalosia ai tagata ma latou taumafaiga. Afai e leai se galuega e faia, o le a le mea o le a faamalosia? A faatele le miliona ma le 0, e tutusa ma le 0. 

Fai mai se tasi o o’u atalii e tatau ona e tatalo e pei e te lē faigaluega ma e faigaluega e pei e te le tatalo. Tusa pe o le a lo’u toaga e tatalo I le matua o lo’u Tausaga ua iai nei, ou te ala I taeao uma ae lei oso le la e faigaluega. Ou te le faapea atu ona a ono itula na ou tatalo ai anapo, e tatau ona ou moe I le taeao atoa, e le faapena mea ou te faia ua ou oo ai I lou tulaga I le  taimi nei. Talitonu mai ma le faamaoni, afai e te paie, e le faaaogaina oe e le Atua. E na te manaomia tagata galulue ma le filiga, o le tulaga lena na faapea mai ai le Eperu 11:6, na te tauia na o ē matuā sā‘ili ‘iā te ia. Galue malosi I le aso ina ia aua nei avea oe ma auauna po’o se pologa I le lumanai, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 25 OKETOPA 2023

Manatu Autu: Leai se avanoa mo le paie 1 (No room for laziness 1)

Tauloto – Faataoto 26:15 ‘‘Ua fa‘alilo e le paiē lona lima i le tanoa; e musu o ia e fa‘afo‘i mai ai i lona lava gutu.”

Faitauga - Tusi Paia: Faataoto 6:4-11

Upu Folafola

Fai mai le Faataoto 23:21 auā o lē inu tele ma ‘ai tele e fa‘amativaina o ia; ma lē fia moe pea e ‘ofu o ia i ‘ofu māsaesae.

Afai e te paie, e te iu I ofu masaesae. E iai nisi tagata e le fia galulue malosi ae fia mauoa vave. E le taitai ona o’o. Fai mai le Faataoto 19:15 ma le manino, ‘O le paiē e tupu ai le moe gase; ma le tagata fa‘avaivai, e fia ‘ai lava ia. Ua mautu afioga a le Atua, afai e te paie, e te puapuaga I le fia ai. 

Ma le loto maualalo, ou te iloa e toatele tagata na matou amata faatasi I le galuega a le Atua. A matou toe fetaui I le taimi lenei I le mavae ai o le tele o Tausaga, a vaai mai ia te au e faapea mai, ‘e moni le faamaoni o le Atua ia te oe’. Ou te faapea atu, ‘E leai ma se sese o lena faamatalaga, e faamaoni tele le Atua’. E masani lava ona ou faaopoopo atu iai ma le faaaloalo, ‘ae leai seisi e mafai ona tuuaia a’u I le paie’. A fai mai se tagata ia te au ou te paie, ou te tilotilo lelei iai ma fai iai, e pei lava e te sau mai le tiapolo. E iai se tagata na faapea mai ia te a’u, ‘o lea faatoa uma le sauniga tele o Agaga Paia, ma le vaiaso atoa o fai sauniga. Ae lei faia le sauniga tele o Agaga Paia, na tele vaiaso o e anapogi ma tatalo. Ao faia sauniuniga, sa e siaki lelei mea uma e aofia ai ma fale le taua. O lea ua uma le sauniga tele ao lena ua toe sauni isi polokalame. Aisea e te le malolo ai I le fale ae faatonu lau fanau e o e fai le galuega?’ E masani ona ou tali atu, ‘faafetai lava, afai lava e aumai e le Atua lou malosi, ou te galue pea mo ia’. E manino le Upu a le Atua, afai e te paie, ‘aua e te manatu e te maua faamanuiaga mai ia te ia. 

E tatau ona aoaoina oe e galue ma le filiga Fai mai le Faataoto 12:24 E manumālō lima o ē filigā i galuega; a o lē paiē, e fai taulaga o ia. 

E te silafia le uiga o le fuaitau lea? O lona uiga afai e te paie, e pule isi tagata ia te oe I so’o se vaega o lou olaga. Afai e le o le mea lena e te manao iai, e le tatau ona e tuua se avanoa I le paie I lou olaga. E na o I latou e galulue filiga e siitia e pule I isi tagata, o I latou e musua e galue ma le filiga, o I latou oni tagata vaivai e pulea lava I latou e tagata galulue malosi. Fai mai le Faataoto 22:29 ‘Ua e iloa le tagata ‘ua fa‘ata‘alise i ana galuega? E tu o ia i luma o tupu, ‘ae lē tu i luma o tagatanu‘u. Afai e fia avea oe ma se tagata e tauoloa, e le tatau ona e paie, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 24 OKETOPA 2023

Manatu Autu: Sini autu o le manuia o le mau’oa (The Purpose of Prosperity)

Tauloto – 1 Timoteo 6:17 ‘‘Ia e matuā fai atu i ē mau‘oa i lenei olaga, ‘aua ne‘i fa‘amaualuluga i latou, ‘aua fo‘i le fa‘amoemoe i le ‘oloa e fa‘alētumau, a o le Atua soifua, o lo‘o foa‘i tele mai ‘iā te i tatou mea uma lava e fa‘afiafia ai...”

Faitauga - Tusi Paia: 1 Timoteo 6:17-19

Upu Folafola

O se tasi o fa’amanuiaga o le ‘avea o se atalii po’o se afafine o le Atua, o le manuia I le mau’oa. Fai mai le Teuteronome 8:18 o le Atua na te aumaia le malosi e te maua ai le tamaoaiga ma oloa e tele. I le 3 Ioane 2, e manino lana fetalaiga faapea: “Le pele e, ia e manuia i mea uma, ma ia e mālolo, fa’apei ona manuia o lou agaga.”

O le tulaga manino, e finagalo le Atua ia tatou maua le manuia o le tamaoaiga. E o’o i le 2 Korinito 8:9 “Auā ua outou iloa le alofa tunoa o lo tatou Alii o Iesu Keriso, sa tamaoaiga ia, a ua fa’amativaina ona o outou, ina ia fa’atamaoaigina outou i lona mativa.” O le fesili ua tuuina mai: “Pe aisea e finagalo ai le Atua ina ia maua e lana fanau le tamaoaiga?”

Muamua, e leai se Tama e mana’o e pologa lana fanau. A pologa lana fanau e foliga mai sa faatamala le Tama. E finagalo le Atua e te manuia ma mauoa, aua o oe o lona alo! Fai mai le Salamo 128 1-2 1‘Amu‘ia i latou uma o ē matata‘u i le ALI‘I, o ē sāvavali i ona ala. 2Auā ‘e te ‘ai i mea e galue ai ou lima; e ‘iā te oe le manuia, e ‘iā te oe fo‘i le lelei..”

A e maua le manuia I le tamaoaiga, e finagalo le Atua e te fa’aaogaina lea tamaoaiga e faalautele ai lona malo.  Fai mai le Sakaria 1:17: “Ia e toe ‘alaga, ‘ia fa‘apea atu, o lo‘o fa‘apea ‘ona fetalai mai o le ALI‘I o ‘au: E toe oso i tua ‘ou ‘a‘ai ‘ona o le manuia; e toe fa‘amafanafana le ALI‘I i Siona, na te toe filifili fo‘i ‘iā Ierusalema.” 

A maea ona fa’atamaoagaina oe e le Atua, e finagalo o ia e te fa’aaogaina lou tamaoaiga e talai ai le talalelei a lona Malo i atunu’u I fafo atu. E finagalo le Atua e te faia galuega e fa’alautele ai lona Malo i le lalolagi ma manumaloina agaga mo ia. O lona uiga, afai ua e maua le tamaoaiga ae e te le o fa’atupeina galuega o le malo o le Atua, e mana’omia le suia o lou mafaufau. E tatau ona e fa’atauaina le fa’aaogaina o au tupe mo le Atua, nai lo se isi lava mea.

Sa manatunatu Tavita pe fa’apefea ona ia nofo i totonu o se maota tele ae o loo tapuai tagata I lona Atua i le fale ie. (2 Samuelu 7:2). O le mafuaaga lea na ia sauni ai e fausia le malumalu o le Atua.  Sa naunau lona loto e fa’aalu ana tupe mo le Atua, e ui ina fa’atonuina ia e le Atua e ‘aua ne’i fausia se malumalu, ae sa le taofia e Tavita ana tupe, sa ia saunia mea uma na mana’omia e lona atalii o Solomona e fausia ai le malumalu. Afai e te maua se loto fa’apea, e te vaai I mea e faia e le Atua e siitia, faaeaina ma fa’amanuia ia te oe, e sili atu I ou manatu.

E fa’atamaoaiga e le Atua lana fanau ina ia latou fa’aaogaina lo latou tamaoaiga e talai ai le talalelei a Iesu Keriso i atunuu uma, I le suafa o Iesu, Amene.

OPEN HEAVENS

MATALA LE LAGI MO LE ASO GAFUA 23 OKETOPA 2023

Manatu Autu: O le a le Iuga? (How will it end?)

Tauloto – Failauga 7:8 ‘‘E sili ‘ona lelei o le i‘uga o se mea i lona amataga. E sili ‘ona lelei o lē ‘ua ‘onosa‘i i lē ‘ua loto fa‘amaualuga..”

Faitauga - Tusi Paia: Kalatia 6:7-10

Upu Folafola

Afai o le a faia se mea, e tasi lava le vaega e te mafaufau iai, e lē faapea po’o le a lona aoga ae po’o le a le iuga e o’o iai e tusa ma le upu a le Atua. Mo se faataitaiga, e te ono maua se avanoa e maua ai se tupe faaopoopo I le taufa’asese lea o se tagata, ia taofi nei ma e mafaufau lelei pe fai mai e ā le Tusi Paia I le iuga o I latou e pepelo ma taufaasese, e pei ona tusia I le Teuteronome 25:15. 

E iai se tagata na ia faatau maia se fanua iai matou I tafatafa ane o le matou nofoaga o togalauapiga. Ua maea ona matou totogiina le fanua ae tei ua toe sau ma faapea mai o le a ia toe faoa. Na ou fautua iai e aua le faia, ae amata ona pesepese ma faapea mai ‘manu felelei feai e latou te aai ma le saoloto I soo se mea’. Ua ou ata ma faapea atu, ‘mai le tele o manu felelei I le lalolagi e te manao e faatusa oe I se manu felelei feai? E te manao ea I se olaga e pei o manu felelei feai nei, foliga mataga ma taufaafefe?

Ao faia pea sa matou fetusiaiga, ua amata ona ia tuuaia a’u i le taumafai e tuu se fetuu ia te ia, ona ia faapea mai lea ia te a’u, ‘ou te fia ta’u atu ia te oe, o a’u o se aeto tusa pe ou te ai I meaai ua fetuu, ou te tino lelei pea’. Ua ou fai iai e alu e fesili I le aumatutua pe faapefea ona pe le aeto. E masani e le mafai e ni au tuli manu ona tape ni aeto ona e maualuluga le tulaga e felelei ai ma e le mafai ona faia ao laiti ma malolosi aeto. E mafai ona lele mai le aeto pue le moa, tusa poo a ni fetuu, e le afaina ai. Peitai, a o’o ina matua le aeto ma ua le maua le malosi na iai, e amata loa ona faifai iai isi tamai manu felelei. E masani lava ona pe le aeto I le fiaai pe a oo ina matua, o le iuga le tulaga e pito sili ona taua. 

Ina ua maea le fa tausaga, ma ua faoa lava e lenei tamaloa le fanua, ua ia faatau atu I isi tagata ma e tele ana tupe na maua ai. Ae tei ua maua I se ma’I ua fula lona manava, a tu I luga, e tau lona manava I le eleele. Ia e faaeteete I au mea e faia I le asō aua e le ulagia le Atua, o le mea ete luluina, e te selesele foi (Kalatia 6:7). E mafai ona e faapea mai, ‘ae faapefea tagata matou te iloa o lo’o faia pea le pepelo ma le taufaasese ae atili ai lava ona mauoloa?’ Na o’o foi iai le manatu o Tavita I le mea lava lea e tasi ona avatu lea iai e le Atua le tali I le Salamo 73:3-20. 

Aua nei e faapei o I latou e maua le iuga e matua faamāina. E sili atu le faaeaina e siitia lemu ae faamaoni I lo le faia o tulaga I faiga faaalatua ae maua ai le iuga e faaumatia, I le suafa o Iesu, Amene.    

OPEN HEAVENS

MATALA LE LAGI MO LE ASO SA 22 OKETOPA 2023

Manatu Autu: Avatu mea na e tauto ai (Pay Your Vows)

Tauloto – Failauga 5:4 ‘‘Pe a e tautō i se tautoga i le Atua, ‘aua ‘e te fa‘atuai ‘ona avatua; auā e lē fiafia lava o ia i ē ‘ua vālelea; ‘inā e faia le mea ‘ua e tautō ai....”

Faitauga - Tusi Paia: Failauga 5:4-7

Upu Folafola

Fai mai le Salamo 50:14-15 a e avatu mea na e tauto ai, e mafai ona e valaau I le Atua i le aso e i ai le puapuagā, ona tali mai lea o ia. I se isi faaupuga, a e faia se tautoga ae e lē faia, aua ne’i fa’ateia oe pe a e valaau atu I le Atua i le aso o lou puapuaga ae lē tali mai o ia. O aso nei, ua toatele le au kerisiano e fai tautoga e aunoa ma le manatu mamafa i ai. O le tele o taimi tusa fo’i pe latou te faia se tautoga, e leai ma se manatu e faataunuu. Aua e te faatuai ona totogi le tautoga na e faia, pe afai e mafai ona totogi I le taimi nei. O le silasila a le Atua i e faia faapea, o vale.

O le tautoga e pei o se tu’utu’uga. A fai se lua tu’utu’uga ma se isi ae e lē fa’ataunu’uina lau tautoga, e tutusa a ma lou gaoia o se meatotino a lea tagata na lua fai feagaiga. O le valea lou taumafai e gaoi se meatotino a le Atua auā o le vaega lenā e te musu e totogi o meatotino a le Atua. A fai sau folafolaga i le Atua, vave ona fa’ataunu’u. O le tulaga e sili ona leaga, o isi tagata e fai tautoga ona o le mana’o ia tatalo le faifeau mo i latou I le taimi lea, ae leai ma se manatu e faataunuu. E faafefea ona e pepelo i le Atua ia e maua ai se manuia mai ia te ia? E le o le ova ea lea o le faavalevalea?

A e faia se tautoga i le Atua, ma iloa e le tiapolo o lo’o e mana’o e faataunuu lau tautoga, amata fai atu loa le tiapolo ia te oe e aua le vave faia se’i uma, o lenā e le’i lavā lau faasoa se’i toeitiiti, pe faapea atu fo’i e malamalama lava le Atua pe a le faia. Aua ne’i e faalogo i pepelo a le tiapolo ne’i silasila le Atua ia te oe o se vale.

O le tasi tulaga mata’ina e uiga i le faataunuuina o se tautoga na fai i le Atua, o le Atua o lē ua fai i ai lau tautōga, e sili atu lana foa’i mo oe na i loo lau tautoga ua totogi ia te ia. A e totogi lau tautoga, e sasa’a mai e le Atua fa’amanuiaga mo oe, ae a e musuā, e taofia fo’i manuia sa fuafuaina e le Atua mo oe. Na tauto Hana I le Atua na te toe ofoina atu mo ia se atalii na te foaiina mai. O le mavae ai lea o le tele o tausaga o lona tigā ma le faatalitali, ma sa ia le iloa pe toe maua se isi a na tama. Mafaufau iā Hana a’o ia sapaia lana tama i ona lima, ina ua tali le Atua i lana tatalo mo se tamaititi, ona toe ofo atu lea o lana tama mo le Atua. O se taulaga tele le toe fo’i o Hana i lona aiga e aunoa ma si ana tama, ae na fai e Hana aua o lana tautoga, ma na toe foai i ai e le Atua isi tamaiti e to’alima e tusa ma lana taulaga (1 Samuelu 2:21). Fai mai Iopu 22:27-29 O i latou e faataunuuina mea na tauto ai, latou te filifili e fai, ona faatumauina lea mo i latou. O le valea le lē totogia o le mea na e tauto ai. Totogi ne’i loa lau tautoga ma ole atu i le Atua i lona alofa mutimutivale mo i latou na fai tautoga ae lē totogia. I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 21 OKETOPA 2023

Manatu Autu: E tatau ona e tupu Fa’aleagaga 3 (You must grow spiritually 3)

Tauloto – Mataio 10:8 ‘‘Ia ‘outou fa‘amālōlō i ē mama‘i, fa‘amamā lepela, fa‘atutū i ē ‘ua oti, tutuli i temoni. ‘Ua maua fua ‘outou, ‘ia ‘outou foa‘ifuaina atu...”

Faitauga - Tusi Paia: Mareko 16:15-18

Upu Folafola

A o’o ina matua se tamaititi, e o’o atu ia i le tulaga e tu’u atu i ai e ona mātua nisi o o la tiute na te faia. E faapenā pe a o tatou matutua ia Keriso, e tatau ona tatou amata faatino le galuega a Keriso. O le mafuaaga lea na saunoa ai Iesu i le Tusi o Ioane 14:12 e faia lava e ia o galuega ou te faia; e fai fo’i e ia mea e sili i ia mea.

O Iesu o le faiaoga o le upu. Ua faapea mai le Aposetolo o Paulo I le Eperu 5:12 “Auā fo’i ana fai outou ma a’oa’o po ua tatau ai ina ua leva, a e ao ina toe a’oa’oina outou e se tasi i mataupu muamua o le afioga a le Atua; ua avea fo’i outou ma e o tusa i ai le suāsusu, a e lē o mea aano.”

E o’o mai le taimi i le olaga o le kerisiano e tatau ai lava ona ia amata a’oa’oina tagata I le talalelei a Keriso. E toatele le au uso e lē o’o i lea tulaga auā na o le faitau o le Tusi Paia ae lē su’esu’e loloto i le upu. A e faitau, e te faitau ia a’oa’oina oe peita’i a e su’esu’e e feliuaina oe. O le feliuaina lenā o oe e le upu, e amata ai ona e naunau e te fia vaai o feliuaina faapea ni tagata se toatele ma o le naunau lea e tuleia oe e amata ona e a’oa’o atu le upu. E i ai nisi ua o latou taulotoina tusi aupito uumi o le Tusi Paia ae lē mafai ona o latou a’oa’oina atu a’oa’oga aupito faigofie o le faatuatua aua e le’i feliuaina i latou e le upu. Aua e te nā o le faitau o le Tusi Paia, su’esu’e i ai. E o’o loa ia te oe le mana feliuaina o le upu, e naunau loa e a’oa’o atu.

O le tasi galuega na fai e Iesu e tatau fo’i ona o tatou faia, o le fai vavega. O vavega e lē na o faifeau e faia; e fai fo’i e le au kerisiano uma. Na fetalai Iesu I le Mareko 16:17, “E mulimuli atu fo’i nei fa’ailoga i e faatuatua; e tutuli e i latou temoni i lo’u igoa; e tautalatala i latou i gagana fou.” Afai o oe o se atalii/afafine o le Atua, a ma’i se isi i ou talane e tatau ona fa’ae’e ai ou lima i luga ia malolo. O le toatele o kerisiano latou te lē faia ni vavega auā e ui ua leva ona faaolaina, e lē o manatu mamafa ia tutupu fa’aleagaga. O tagata faapea, e leai so latou taimi e nonofo ai i le mamalu o le Atua, tatalo, su’esu’e le Upu a le Atua ma saili lana fa’au’uga.

E tatau ona e naunau ia e tupu fa’aleagaga auā e finagalo lo tatou Alii o Iesu Keriso ia e tupu iā te ia ma faia vavega e sili atu I mea na ia faia a’o i le lalolagi. I le suafa o Iesu Keriso. Amene.

OPEN HEAVENS

MATALA LE LAGI MO LE ASO FARAILE 20 OKETOPA 2023

Manatu Autu: E tatau ona e tupu I le Agaga 2 (You must grow spiritually 2)

Tauloto – Eperu 5:12 ‘‘Auā fo‘i ‘ana fai ‘outou ma a‘oa‘o po ‘ua tatau ai ‘ina ‘ua leva, ‘ae ao ‘ina toe a‘oa‘oina ‘outou e se tasi i matā‘upu muamua o le afioga a le Atua; ‘ua ‘avea fo‘i ‘outou ma ē o tusa i ai i le suāsusu, ‘ae lē o mea ‘a‘ano..”

Faitauga - Tusi Paia: Eperu 5:11-14

Upu Folafola

A faatoa fanau mai se pepe, e gaoioi tagata uma e tali I le pepe I so’o se taimi e tagi ai. E leai se feau e tatau ona faia e te tamaitiiti laititi I totonu o le fale. Peitai, a faasolo ae ina matua lea tamaitiiti, e vave ona amata ona valaau e sau e fai le mau feau. E faapena foi I le savaliga faakerisiano. Afai e faatoa faaolaina lava se tagata, e fafagaina o ia e kerisiano matutua. A faapea e sau I le lotu, o tagata galulue I totonu o le Ekalesia e faia le auaunaga ma faasinoina o ia I mea e tatau ona faia pe tali foi I so’o se mea e na te manaomia. A faaauau pea ona sau I le lotu ma avea o se keriano ua matua, e le tatau ona toe fiafia e na o le talia o le auaunaga ae tatau loa ona avea ma le au galulue e faia le auaunaga I totonu o le fale o le Atua. 

O se kerisiano o loo tuputupu pea I le agaga e faatuputupuina pea le avea ma tagata e faatuatuaina. O lea kerisiano e osi taulaga I lona taimi, aua foi o lea ua ola o ia mo le Atua. E iai lava tagata ua Tausagā o ō I le lotu, peitai e leai se mea e mafai ona latou faia ae na o le auai lava I sauniga lotu. E faapefea ona e sau pea I le lotu e faifaipea e aunoa ma lou fia faia o se galuega I totonu o le fale o lou Tama? E ui o nisi e na o le mafaufau lava po’o a mea e mafai ona faia e le Atua mo I latou, o se kerisiano o loo tuputupu pea lona olaga I le agaga, e taulai pea lana vaai I mea e mafai ona ia faia mo le Atua. 

E sili atu I le nā o le galue mo le Atua, o se kerisiano o lo’o tuputupu pea I le agaga, e naunau e foai mea mo le malo o le Atua. E pei lava o Paulo, e le afaina ia te ia le ave uma pe lagona foi ua leai se mea o totoe ia te ia ae ia tupu ma lautele pea le malo o le Atua. Ao finau pea nisi pe totogi le sefuluai pe leai, o se kerisiano o loo tuputupu pea I le agaga e naunau e avea uma le 100% o ana tupe maua I le Atua. O se kerisiano o lo’o tuputupu pea e le tomumu pe faaseā pe a faapea atu le faifeau o loo iai se manaoga o le Ekalesia, o le mea moni, o ia le tagata muamua e ofo mai na te faia. 

I ni nai Tausaga talu ai, sa iai se tamā mauoa e masani ona foai I galuega tetele a le ekalesia ma e fesoasoani foi e vaavaai galuega a I latou ua leai se taulaga tupe, ae ofoina mai o latou taimi e faia le galuega. E iai se aso, ua faafuasei ona aveese ona ofu lelei ae faatasi atu e galulue ma le au faigaluega. Ua matou tetei ma fai atu iai pe aisea, ae faapea mai, ua fai atu le Atua ia te ia, ‘Tamā maualuga, malo lava, o tagata o lo’o faia le galuega e latou te maua le taui a’o oe e leai’. O le foai o au tupe, o lou taimi, lou malosi, e faia ma le loto malie e auauna ai I le Atua, o se faailoga lena o oe o se kerisiano o lo’o e tuputupu pea I le agaga, I le suafa o Iesu, Amene.  

OPEN HEAVENS

MATALA LE LAGI MO LE ASO TOFI 19 OKETOPA 2023

Manatu Autu: E tatau ona e tupu I le Agaga 1 (You must grow spiritually 1)

Tauloto – Luka 9:62 ‘‘Ua fetalai atu Iesu ‘iā te ia, “O lē tago lona lima i le suōtosina, ma tepa i tua, e lē aogā ia i le mālō o le Atua.”

Faitauga - Tusi Paia: Roma 8:35-39

Upu Folafola

A maea ma ua umi sina taimi talu ona e fanaufouina, e taumafai lava le tiapolo e tofotofoina lou faatuatua. Afai e te manumaloina nei tofotofoga ma o lo’o e tulai pea, o iina e amata ai ona e matua I mea a le Atua. I le tulaga lea, e te le toe malie I le suasusu o le Upu a le Atua, ae ua e naunau I meaai aano o le Upu. O se kerisano ua matua I le faatuatua e naunau e o’o atu I loloto o le Upu a le Atua ma e le tumau I le vaega papau o le Upu ma ala o le Atua. 

O tagata kerisiano e fou I le faaolataga, e masani ona taua o kerisiano e pepe, e tatau ona tuputupu a’e seia oo I le tulaga e ui ai I tofotofoga ae e tulai ma tumau pea ia Keriso. O so’o se kerisiano lava, e iai lava taimi o le faigata, e peiseai ua manumalo le tino I lo le agaga ma o’o atu ai ina pau I le agasala pe a le faaeteete. I taimi ia o le olaga, o se tagata ua umi sina taimi o ia Keriso ae le fafagaina I le Upu a le Atua, e telē le avanoa e pau ai. Fai mai le Faataoto 24:10 ‘Āfai ‘e te fa‘avaivai i le aso vale, ‘ua itiiti lava lou malosi. E mautinoa le o’o mai o aso vale, ae o lou tulai pea e fua I lou malosi ua maua ae lei o’o mai nei aso. 

O le a le telē o le Upu a le Atua ua e maua? O le a le tele o le tatalo o lo’o e faia? O le a le loloto o lou iai I mea a le Atua? O mea uma na e matua aoga ma e fua iai lou tulai pea pe leai foi I aso vale. Ia maitau mai, o le matua lava o lou kerisiano, o le tele foi lea o faigata e faasagatau mai ai le tiapolo ia te oe, peitai e maua le faamalosiau I le 1 Korinito 10:13 ‘Ua lē maua ‘outou e se tofotofoga e ‘ese i lo tagata; a ‘ua fa‘amaoni le Atua, o lē na te lē tu‘uina atu ‘outou i le tofotofoga e sili i se mea ‘ua ‘outou lavātia, ‘ae sauni fo‘i fa‘atasi ma le tofotofoga se mea e sao ai, ‘ina ‘ia ‘outou lavā ‘o‘ono.

O lona uiga, afai e avea se tofotofoga ma tulaga e te fulitua ai I le Atua, e le faapea o le tofotofoga na e pau ai, ae ona o le vaivai I mea faaleagaga. Na fetalai Iesu Keriso I la tatou tauloto mai le Tusi Paia o le aso, o lē tago lona lima i le suōtosina, ma tepa i tua, e lē aogā ia i le mālō o le Atua. O lena ua e tago I le suotosina, faatupu lou faatuatua I lou faia o galuega I le agaga e pei o le tatalo, suesue I le Tusi Paia, auai I mafutaga ma le au kerisiano ma isi mea faapena. E manaomia uma nei galuega e faamalosia oe ia e tulai pea pe a o’o mai aso vale. 

Le au pele e, afai e te savali o se kerisiano I le tulaga papau, e vave ae e toe tepa I tua ma e le maua ai le malo o le Atua I le iuga. Afai e lē tupu lou olaga faaleagaga, e le mafai ona e tulai pea pe a o’o mai aso vale, I le suafa o Iesu, Amene.