Samoan Devotional

OPEN HEAVENS

MATALA LE LAGI MO LE ASO FARAILE 17 NOVEMA 2023

Manatu Autu: Atoatoa le mamā (All round purity).

Tauloto – Mataio 5:8 ‘Amu‘ia ē loto mamā; auā latou te iloa atu le Atua...’

Faitauga - Tusi Paia: Mataio 23:25-33

Upu Folafola

O lo’o faailoa mai e le tauloto o le asō mai le Tusi Paia le fa’aamuia iai latou e loto mamā, aua latou te iloa atu le Atua. O le uiga o lenei fuaitai o le Tusi Paia, e faapea, afai e le mama totonu ae ua na o fafo, e le mafai ona e maua le lagi. E toatele nisi e vave ona faapea mai, ‘e taua totonu ae le taua fafo’. E le moni lea tulaga aua po’o le a lava le mea o loo I totonu, e faaalia mai lava I fafo. Afai e ita se tagata, o loo tupu le ita I totonu ae e te iloa atu lava I foliga vaaia I fafo. 

I le tele o Tausaga talu ai, a’o faatoa amata la matou aoga Tusi Paia, na ou aumaia ni faiaoga mai Amerika e aoaoina tamaiti, ona amata lea ona latou fai i tamaiti aoga ua tele lo’u saua ma le mapo tulafono. Fai mai e taua na o totonu ae lē taua fafo. Ina ua ou faalogo iai, ua ou manatu ua tupu le faalavelave ma o lea na vave ona ou saili I le Atua mo le poto e fofo ai le faafitauli. Faafetai I le Atua na ia aumaia se lagona ia te a’u e faatau ni moli se lua, o le moli lanumeamata ma le samasama. Na ou fai I tamaiti aoga e filifili le moli e mananao ai. Na latou filifili uma le samasama. Na ou fesili pe aisea a’o lea e le’i fofo’eina le moli. Fai mai e iloa atu lava I fafo le mea o lo’o I totonu. Ua maea momoli iai le feau. 

Fai mai le Tusi Paia I le 2 Timoteo 3:1-5, o aso mulimuli o le a vaaia ai le tele o tagata e foliga mai e paia. E mafai ona e tautala ma laei e pei o se kerisiano, a’o na mea, e le mafai ona avea ai oe o se kerisiano. O le kerisiano o le iai lea o Keriso I totonu o le loto ona suia ai lea seia iloa atu I fafo. E tatau ona naunau lou loto ia faapei o Iesu ma ia faifaipea. E tatau ona e alofia le agasala ina ia fiafia ai le Atua ia te oe. Seiloga e pipii lou loto ia Keriso ona amata lea ona iloa tino I fafo. E tatau ona e faitau ma suesue I lana Upu I aso uma ma le naunautaiga ia tele loa iloa o ia. Ia tele lou taimi e faaalu e tapuai ai ma mafuta ia te ia. Faailoa I lou Tama e te naunau e mafuta vavalalata ia te ia e suia ai oe mai totonu seia faaalia I fafo, ona e vaai lea o le a ia faaali atu o ia ia te oe I se tulaga e te lei vaai muamua iai.  

Tatalo

Tama, faamolemole fesoasoani mai ia te au ina ia ou mamā atoatoa I totonu seia faaalia I fafo, I le suafa o Iesu, Amene. 

 OPEN HEAVENS

MATALA LE LAGI MO LE ASO TOFI 16 NOVEMA 2023

Manatu Autu: Ia atoatoa ona lelei o la outou amio (Be thou perfect).

Tauloto – Mataio 5:48 ‘O lenei, ‘ia ‘ato‘atoa ‘ona lelei o la ‘outou amio, e pei o lo ‘outou Tamā o i le lagi e ‘ato‘atoa ‘ona lelei o ia..’

Faitauga - Tusi Paia: 1 Peteru 1:13-16

Upu Folafola

O loo faamatala manino e Iesu Keriso ia i tatou i le tauloto mai le Tusi Paia o le aso, e tatau ona atoatoa ona lelei o a tatou amio e pei o lo tatou Tama i le Lagi aua e atoatoa ona lelei o ia. Ae paga lea, o nisi tagata ua talitonu i tala pepelo a le tiapolo , e faapea e leai se tagata e mafai ona atoatoa. E pepelo lena faamatalaga, auā e le mafai ona poloaiina oe e Iesu Keriso e fai se mea e na te silafia e le mafai ona e ausia.

E ui ina tiga pe’a faapea atu, peitai, e lē o uma I le lagi le au Epikopo, taitai aoao o Ekalesia ma le au faievagelia, o le tulaga lea o le tapulaa o le amio e lelei atoatoa, e fua ia Keriso ae le o le tagata (Mataio 7:22-23). O mea uma e te faia, e tatau ona ō gatusa tau lava o le Upu a le Atua. Afai e talanoa mai se tasi I se mea e le ō gatusa ma le afioga a le Alii, e tusa lava po o ai i latou, teena. O le mea lea e tatau ai ona e silafia lelei le Atua ae le o faamatalaga mai isi tagata. Fai mai le Aposetolo o Paulo; ‘Ia ‘outou fa‘aa‘oa‘o mai ‘iā te a‘u, pei o a‘u ‘iā Keriso’.(1Korinito 11;1) 

I se isi faaupuga, o loo faapea mai Paulo o le taimi lava e te matauina ai ou te lē o mulimuli ai ia Keriso, aua loa ona e toe mulimuli mai ia te a’u. Pau lava le auala e te iloa ai pe o mulimuli ou taʻitaʻi faaleagaga ia Keriso, o lou iloa lea o Keriso, ma o lo’o ia te oe foi le Tusi Paia e aʻoaʻo ai oe i mea uma e tatau ona e iloa e uiga I le Silisili Ese.

O le filifiliga ina ia atoatoa ona lelei o lau amio, e patino lava I le tagata lava ia. E le o se tulaga e te faia ma isi tagata; o lau lava faaiuga. E mafai ona avea oe o se sui o se mafutaga o uo e lagolago leisi I leisi, ae o ai na te iloa mea o loo faia faalilolilo e le isi i le tulua o po.? O ai e ono suesueina pe o e mafaufauina ni manatu sese? Fai mai Iosua, 

“A o aʻu ma loʻu aiga.” E muamua tau le upu 'au' faatoa sosoo lea ‘o loʻu fale'. E le’o faapea mai ‘A o i matou’. Na fai mai ‘A’o a‘u’, ‘ou te faia le finagalo o le Atua, e lēi faapea mai ‘o i matou’. Ua tusia i le tusi a Luka 17:34, e i le moega e tasi tagata e to‘alua; e ‘avea le tasi, ‘ae tu‘ua le tasi. I se isi faaupuga, e mafai ona alu le tane ae tuua le avā, pe alu foi le avā a e tuua le tane. O se mataupu e patino lava ia te oe. Fai sau filifiliga i lenei aso, ia avea Iesu Keriso ma ou faataitaiga ae aua le amanaiaina mea o loo faia e isi.

Afai o lo tatou Tama I le lagi e atoatoa ona lelei o ia a’o I tatou o lana fanau moni, e tatau foi ona atoatoa ona lelei o a tatou amio, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 15 NOVEMA 2023

Manatu Autu: Faamanuiaga o le Faapaiaina 2 (Benefits of holiness 2).

Tauloto – Salamo 75:10 ‘O nifo uma fo‘i o ē amio leaga, ‘ou te vavae‘eseina ia; ‘ae fa‘amaualugaina nifo o lē amiotonu.’

Faitauga - Tusi Paia: 2 Timoteo 4:6-8

Upu Folafola

O le a faaauau pea la tatou suesuega I aogā ma faamanuiaga o le ola faapaiaina, ao tatou Iloilo I faamanuiaga o le ola faapaiaina e ausia ai faamoemoega o lou olaga. E leai ma se mea e taofia ai oe mai le ausia o faamoemoega o lou olaga pe afai e ola faapaiaina. Sei o tatou vaavaai ia Iosefa. Na faaali e le Atua ia Iosefa I le Kenese 37:5-10 e maualuga le faamoemoega o lona olaga. Na le fiafia iai ona uso ma ua latou faatau atu ia te ia o se pologa ma oo atu ai I le fale o se tamaloa mauoa o Potifara, o lona toalua sa naunau e momoe ma Iosefa. Na musu Iosefa ona e lei manao e faia se agasala ma le fiafia ai le Atua ia te ia (Kenese 39:9). Na faamautuina lona ola faapaiaina ma I le iuga, e ui ina matua maualuga ma faigata ona ausia le faamoemoega o lona olaga, na faataunuuina lava. 

O se tasi o vaega e faatumauina ai lou ola faapaiaina, o lou mautinoa lea ua na o le Atua e maua ai lou fesoasoani e ausia ai faamoemoega uma o lou olaga. Afai e te naunau e faataunuuina faamoemoega o lou olaga, e tatau ona e ola faapaiaina. Afai na avatu e le Atua ia te oe se faamoemoega e tatau ona taunuu, e mautinoa e tu o ia I lau itu ma naunau e fesoasoani ia te oe ina ia ausia. Fai mai le Roma 8:31, afai e au le Atua ma oe, o ai se e mafai ona faasagatau mai? E oo I le tiapolo e le mafai! E pau le tagata e mafai ona faasagatau ia te oe, o oe lava. Afai e amata ona e faia le agasala, e liliu ese le Atua ma oe ona sau lea o le tiapolo ma faia mea uma ina ia aua lava nei ausia faamoemoega o lou olaga. O le tupu o Saulo sa faamoemoeina e avea ma se tupu tautaua ma sa faatasi le Atua ma ia seia oo ina amata ona ia faia le agasala. Na aveesea e le Atua lona Agaga ma ia te ia ae suia i se agaga e faatigaina ia te ia. I le iuga, na toilalo ma le ausia le faamoemoega o lona olaga. E te manao e ausia faamoemoega uma o lou olaga? Ola faapaiaina. 

Fai mai le Eperu 1:9

‘Ua e fiafia i le amiotonu, a ‘ua e ‘ino‘ino i le amio leaga. O le mea lea, ‘ua fa‘au‘uina ai oe e le Atua, o lou lava Atua i le suāu‘u o le ‘oli‘oli e sili, i ē tou te fa‘atasi.”  

Afai e fia avea oe ma tagata iloga, afai e te fia maua le faauuga e siitia oe I luga I e toe te faatasi, afai e te naunau e maua le pale o le amiotonu I le iuga o lau savaliga I le lalolagi nei (2 Timoteo 4:8), e tatau ona e fiafia I le amiotonu ma inoino I le amioleaga. Ua ou feiloa I tagata ma faamoemoega maualuluga o latou olaga, na amata I le manuia ae lei leva ae amata ona faia le agasala ma o’o ina le oo I le maualuga o faamoemoega sa fuafuaina e le Atua mo latou olaga. 

Le au pele e, afai e te alofa ia te oe lava, e te taofia loa le agasala ae amata ona ola faapaiaina. E pau lea o le auala e mafai ai ona e ausia faamoemoega maualuga a le Atua mo lou olaga. Ia e fiafia I le amiotonu ae inoino I le amioleaga, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 14 NOVEMA 2023

Manatu Autu: Faamanuiaga o le Faapaiaina 1 (Benefits of holiness 1).

Tauloto – Iopu 1:10 ‘Ua e lē si‘osi‘omia ‘ea i le ‘aupā o ia ma lona fale, ‘atoa ma ana mea uma i itū uma? ‘ua e fa‘amanuia le galuega a ona lima, ‘ua e fa‘ateleina fo‘i ana manu i le fanua.’

Faitauga - Tusi Paia: Iopu 1:8-10

Upu Folafola

O a’u o se failauga o le mataupu o le “ola fa’apa’iaina.” O le mea moni, afai e te vaevaeina lo’u tino i ni vaega se miliona, e tagi mai vaega taitasi “Ia faapaiaina!” Ae mafua ona ou fa’atāuaina le tulaga fa’apa’iaina, ona ua ou molimauina le anoanoa’i o fa’amanuiaga e afua mai i lou ola faapaiaina. O le a ou fa’asoa atu i le asō, nisi o ia fa’amanuiaga.

Muamua, afai ua e fa’apa’iaina, o le a le mafai ona pa’i atu Satani Ia te oe. I le tusi o Iopu 1:10, fai mai Satani ua fausia e le Atua se aupā e siomia ai Iopu ma ua le mafai ona osofaia e seisi. E iai le aupā o le afi e si’omia ai so’o se atalii poo se afafine o le Atua e ola faapa’iaina. E le mafai e Satani ona fasia oe tusa poo le a le malosi o ana taumafaiga. Sa taumafai Satani e fasiotia Tanielu i le lafoina o ia i le lua o Leona. Sa faia’ina auā sa maua e leai se tulaga na tuuaia ai Tanielu (Tanielu 6:22).I le soifuaga atoa o Iesu sa le mapu le taumafai o Satani e fa’aumatia lona ola, ae sa faia’ina pea auā sa ola fa’apaiana Iesu e pei ona ta’ua i le tusi o Ioane 14:30, “Ou te lē toe tautala atu ‘iā te ‘outou i ni ‘upu e tele; auā o le a sau le ali‘i o lenei lalolagi, ‘ae lē maua e ia se mea ‘iā te a‘u.” . Peita’i sa tu’uina atu e Iesu lona ola ina ia fa’ataunuuina le fuafuaga a le Atua (Ioane 10:17-18.)

I le taimi o avea a’u ma faia’oga i le Iunivesite I Lagos, sa o’o mai se tama’ita’i a’oga ma faamatala sana miti e faapea e to’a fa ni alii sa latou ta’I atu ni fana ia te ia. Ina ua ala mai, sa tamo’e i se tasi o taulaitu mo se fofo, ae tali le taulaitu, o le aso 23 o Mati i lena tausaga o le a uma ai lona ola. Sa manatu e saili atu I seisi foi taulaiti e ta’ua o le perofeta, ma sa ia faamaonia mai le folafolaga a le taulaitu muamua. Ina ua fa’amatala mai ia te a’u, na ou fai iai: “A fai e tu’uina atu lou ola ia Iesu Keriso, e te le oti!” I le aso 24 o Mati sa ou maitauina o lo’o soifua pea lea tamaita’i ona ou faamanatu lea iai le upu na avatu e le oti. Ae sa ia faamatala mai ni mea uiga ‘ese ma le matautia sa tutupu I le latou fale nofo tumau, i lea po, ua leai seisi na mafai ona moe. Sa o’o atu lava le agaga o le oti ae ua le mafai ona pa’i ia te ia aua ua si’omia i le aupa o le afi! 

A fai o iai se agasala i lou olaga, e mafai e Satani ona faao’o le malaia ia te oe, ae afai o e ola fa’apaiaina, e le mafai ona fasia pe pa’i atu Satani ia te oe! Ola fa’apa’iaina! I le suafa o Iesu, Amene.  

OPEN HEAVENS

MATALA LE LAGI MO LE ASO GAFUA 13 NOVEMA 2023

Manatu Autu: Avea ma Paaga e vavalalata i le Atua 2 (Becoming Intimate with God 2).

Tauloto – 1 Korinito 10:23 ‘“‘Ua tataga mea uma ‘iā te a‘u,” a ‘ua lē aogā mea uma; “‘ua tataga mea uma ‘iā te a‘u,” a ‘ua lē fa‘amafanafana mea uma...’

Faitauga - Tusi Paia: Salamo 26:1-8

Upu Folafola

O I latou e fia fai ma paaga e vavalalata ma le Atua, e tatau ona fiafia I mea e fiafia iai le Atua ma inoino I mea e inoino iai le Atua. Afai e te fia mafuta vavalalata ma le Atua, e tatau ona e iloa mea e inoino iai o ia ma soso ese mamao mai ai (1 Tesalonia 5:22). So’o se mea e te vaaia ai e foliga o se agasala, sola ese ai. So’o se taimi ou te faalogo ai I tagata o taumafai e faamalamalama le tulaga lelei o se agasala, ou te amata lē fiafia ma iloa, o se mea lea e tatau ona ou alu ese ai. Fai mai le Aposetolo o Paulo I le 1 Korinito 6:12

12“‘Ua tataga mea uma ‘iā te a‘u,” a ‘ua lē aogā mea uma. “‘Ua tataga mea uma ‘iā te a‘u,” a o a‘u, e lē fa‘ato‘ilaloina a‘u i se tasi mea.

Afai e te naunau e mafuta vavalalata ma le Atua, e te alu ese mamao ma mea e ui e faatulafonoina, ae ono aafia ai le lua mafutaga ma le Atua. I le Tanielu 1:3-8, na manatu Tanielu e le tatau ona ai I meaai a le tupu. E faatulafonoina e taga ae ua ia iloa e faaleagaina ai o ia, o lea na ia teena. E faatagaina ona ua lua mafuta vavalalata ma lou toalua faaipoipo pe ‘ai foi faatolu I le aso. E leai ma se agasala I lea tulaga, peitai o I latou e fia mafuta vavalalata ma le Atua e iloa lelei e tatau ona fai ma masani le anapogi. Latou te iloa e iai le taimi e fusifusi ai ae e iai foi le taimi e taofia ai ina ia mafai ona ofoina atu ma le atoatoa I tatou I le Atua (Failauga 3:5, 1 Korinito 7:4-5). O le Aposetolo o Paulo, o se tagata na naunau e mafuta vavalalata ma le Atua e lei faaipoipo ina ia aua nei iai se mea e faalavelave I lana savaliga vavalalata ma le Atua. 

O le fesili mo oe, e te naunau ea e mafuta vavalalata ma le Atua? Afai e te naunau iai, e iai lava mea e tatau ona e alu ese mamao mai ai ona e faalavelave I le galue mai o Agaga Paia I lou olaga. E te iloa lelei lava auā e faaleagaina ai oe ma taitai ese ai oe ma le Alii. Alu ese mamao mai ai. Ae tatau ona e faavanoa le taimi e mafuta ai ma ia I lona mamalu faapea mafutaga e tapuai ai I le Atua ma le auuso. Ao e faia lea tulaga, e amata ai loa ona e latalata I le Atua, ma iloa ai ua e faapei o ia, e o’o I le tauaveina o le mana e faia ai vavega. E iai foi mea e ui e faatagaina faale Tulafono, ae tatau ona e alo ese mamao mai ai ina ia e vavalalata atu I le Atua, I le suafa o Iesu, Amene. 

OPEN HEAVENS

MATALA LE LAGI MO LE ASO SA 12 NOVEMA 2023

Manatu Autu: Avea ma Paaga e vavalalata i le Atua (Becoming Intimate with God).

Tauloto – Salamo 26:8 ‘Le ALI‘I e, ‘ou te fiafia i le mea e tu ai lou maota, o le mea fo‘i e afio ai lou mamalu..’

Faitauga - Tusi Paia: Salamo 119:97-112

Upu Folafola

Ina ia maua le mafutaga vavalalata ma le Atua, o le mea e sili ona mana’omia o lou taimi. O le tele o le taimi e te lua mafuta ai ma se tasi, o lou so’o lenā i lea tagata. O se taulaga mālie I le Atua pe a lava lo tatou taimi e ofo atu mo ia, e sili atu i le Atua le mafutaga ma i tatou lana fanau na i lo’o ni galuega ma ni auaunaga tatou te faia mo ia. O le eseesega o le fa’aalu o lou taimi e fai ai mea lelei mo le Atua ma le taimi e mafuta ai ma ia o loo faamatala i le Luka 10:38-42. O Mareta na fa’aaogā lona taimi e auauna ai e tapena taumafataga mo Iesu, ma o se mea lelei, peita’i na fetalai Iesu ua filifilia e Maria le mea e tasi e ao ona maua o le nofo i lalo i tafatafa o ona aao ma faalogo i ana fetalaiga. O lou taimi o alu e fai ai galuega a le Atua, e lelei, peita’i e sili ona mana’omia le taimi e te nofo ai i lalo o ona aao ma faalogo i lana Upu.

E toatele i latou e galulue I le lotu faapea nisi o faifeau, fa’atoā faitau ma su’esu’e a latou Tusi Paia, tatalo pe faalogo i le Upu a le Atua pe a omai i le lotu. E lē mafai ona mafanafana ma vavalalata se mafutaga ma le Atua pe a faapea. E mana’omia e le Atua tagata e naunau e mafuta ma ia, poo totonu o le lotu, pe nā o ia ma le Atua ona e alofa i le Atua. E ui i le tele o tiute o Tavita, ae sa fai ma ona fiafiaga le mafuta i le mamalu o le Atua (Salamo 26:8). O le ala lea na fetalai ai le Atua i le 1 Samuelu 13:14 o Tavita o se tagata e tusa ma lona loto, na te faia mea uma e finagalo ia i ai.

Ina ia avea ma paaga e vavalalata  ma le Atua, e lē tatau ona faamalieina oe i le vavalalata ua i ai le lua mafutaga i le taimi nei. Ia tumau lou galala I lana upu ma lona mamalu. O i latou e mafuta mafanafana ma le Atua e galala pea ma fia inu i Afioga Paia a le Atua, ma latou te su’esu’e pea, tatalo ma anapogi ina ia o latou tutupu pea fa’aleagaga ma iloa atili le mamalu ma le Paia o le Atua. Fai mai le Aposetolo o Paulo I le Filipi 3:10, “ ina ia o’u iloa o ia, ma le mana o lona toe tu mai, ma ia faatasi a’u i ona tigā, ona ua fa’atusaina a’u ia te ia i lona maliu.” E te maofa i le tele o fa’aaliga ma mea na feagai ma vaai i ai le Aposetolo o Paulo ae le’i uma lona naunau e saga iloa atili le Atua. Talitonu mai ma le faamaoni, o le aso e te manatu ai ua lava lou iloa o le Atua, ua faamalieina oe, o le aso lenā e amata ai ona e alu ese mai lona mamalu. E te lē toe iloa mea sa e iloa muamua. Afai e taofia lou ola tuputupu a’e, ua amata ona e oti. A e filifili e fa’amamao ese ma le Atua, o le a amata ona e latalata i le tiapolo. O le malae tutu’u o loo e i ai, e lē o se auala e i ai ni nofoaga faatali pasi. O le taimi e te tūtū ai, ua e lē toe gaioi ai aga’i i luma, e aveese ai oe mai le malae tutu’u.

Tatalo

Tamā faamolemole fesoasoani mai ia tupu pea lo’u naunau ia te oe. Ia avea o se mea suamalie le mafuta i lou mamalu i aso uma. I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 11 NOVEMA 2023

Manatu Autu: Avea ma pele a le Atua (Becoming God’s favourite)

Tauloto – Salamo 42:1 ‘Le Atua e, e fa‘apei ‘ona naunau o le ‘aila i vaitafe, o lo‘o fa‘apea ‘ona naunau o lo‘u agaga ‘iā te oe..’

Faitauga - Tusi Paia: Salamo 42:1-2

Upu Folafola

O au o matua a latou fanau, peita’i e masani ona i ai nisi o le fanau e sili atu I matua na i lo’o i si tamaiti o le fanau. Atonu latou te taumafai ia aua ne’i maitauina gofie, peita’i e iloa a le tagata e sili ona alofaina e ona matua. E faapenā fo’i i totonu o le aiga o le Atua, e I ai fo’i i latou e sili atu o na alofaina na i lo’o le toatele. O i latou ia e faia le finagalo o le Atua ma faafiafia ia te ia i soose avanoa latou te maua. O le isi naunautaiga tutasi o le loto o lē ua alofaina, ia mafuta vavalalata na o ia ma le Atua i taimi uma ma aso uma o lona olaga.

O le avea o oe ma pele a le Atua, e fua lava ia te oe; i lau filifiliga i amioga e te fiafia i ai pe inoino fo’i. Fai mai Paulo I le 1 Korinito 9:24-27, i so’ose tuuga, e toatele tagata e tamomo’e ai, peita’i e to’atasi e manumalō. E finagalo le Atua e te manumalō. Ou te lē iloa iā te oe, a’o a’u, ou te mana’o ia o’u pito i luma I le tuuga lenei. Sa masani ona o’u tamo’e i tuuga a’o o’u laititi, ae sa masani ona fai mai lo matou faiaoga iā i matou ia fa’amautinoa matou te mua. A e fia mua, e tatau ona e naunau e totogi le tau (Filipi 3:7-14). O le faailoga e te maua pe a tini le tuuga e fuafua i lau tapenaga o loo fai i le taimi nei.

A ta’u loa le mafutaga na o oe ma le Atua, e sili atu le tāua o au mea e fai pe a na o oe ma le Atua na i loo mea e te faia i luma o tagata. I le Kenese 39:1-9, ina ua fa’aosoosoina Iosefa e le avā a Potifara lona matai la te momoe, na sola ese o ia. Na filifili Iosefa I lona loto e mata’u ma ava i le Atua i taimi ma aso uma o lona ola, tusa pe leai ni tagata e vaai mai. E o’o atu I le Kenese 50:15-21, ua omai ona uso ma ifo iā te ia. O i latou e manana’o I le mafutaga mafanafana vavalalata ma le Atua, latou te lē faatali seiloga e tumu tagata, pe fua fo’i i manatu o tagata mea latou te fai, peita’i o mea uma e mālie ai le finagalo o le Atua latou te faia, tusa pe lē auai manatu o le toatele o tagata.

I le Tanielu 1:3-8, na filifili Tanielu ma a na uo e lē aai i latou i meaai a le tupu, ne’i fa’aleagaina ai i latou, tusa pe aai uma ai le nuu. Atonu o le vaai a tagata i nā aso iā Tanielu ma a na uo e leaga ulu, ae le’i afaina ia i latou. Poo a manatu o tagata, o la latou faamuamua, ia aua ne’i fa’aleagaina o latou tino, ma fiafia mai le Atua ia I latou, ua lava lea ma totoe, ua ausia lo latou mana’o. O le taui, na faia e le Atua i latou ma pule o tagata uma I le taimi na tatau ai. Afai e te lē lafoa’i mea uma e tatau ona e maua ona e faalavelave i le lua mafutaga ma Keriso, e te lē o naunau i se mafutaga vavalalata ma le Atua.

E fua i mea o loo e faamuamua, e mafai ona e faapea mai, o le silasila a le Atua ia te oe, o oe o se tasi o ana pele?

I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 10 NOVEMA 2023

Manatu Autu: O le faaolataga e faia taitoatasi (Salvation is personal)

Tauloto – 2 Korinito 5:10 ‘Auā tatou te tutū atu uma lava i luma o le nofoa fa‘amasino o Keriso, ‘ina ‘ia ta‘itasi ma talia le mea e tatau ai e tusa ma lana amio na faia i le tino, pe lelei pe leaga..’

Faitauga - Tusi Paia: Esekielu 18:4-20

Upu Folafola

O le tatou mafutaga vavalalata ma le Atua e fua I le tagata taitoatasi ae le faapea o se vaega o tagata. O le lua mafutaga ma le Atua ua na o le va o oe lava ma le Atua. O lona uiga o le upu, o a’u e talafeagai lelei ma le lua mafutaga ma le Atua ae le faapea ‘o matou’. Fai mai Tavita I le Salamo 34:1 ‘Ou te fa‘afetai i le ALI‘I i aso uma lava; e lē aunoa ona vi‘iga i lo‘u gutu’.

Ou te fia faamanino atu, e leai ni fanau a fanau a le Atua. A le o oe o se atalii poo se afafine o le Atua o lona uiga e le o oe o sana fanau. O le tatou faituga o le Tusi Paia o le asō o lo’o faapea mai afai e amiotonu lou tama ae e te amiolētonu, e ola lou tama ae oti oe. E leai ni fanau a fanau a le Atua na o ana fanau. Afai e lei foai atu lou ola ia Iesu, ae ua e manatu e te maua le lagi ona e faaolaina ou matua, o loo e oleole ia te oe lava (Esekielu 18:20). 

E le gata I lea, afai e maea ona e fanaufouina ma e maua le lagi, o le galuega o lo’o e faia I le malo o le Atua o le a tofotofoina taitoatasi I le afi. I le Roma 14:12, fai mai le Tusi Paia  O lenei, e ta‘itasi i tatou ma tala i lana amio i le Atua. E tuuina atu e tagata uma talaaga o latou olaga I le Atua. A oo ina suesueina oe e le Atua e tusa ma lau amio, e fua lava I lau amio na o oe. Fai mai le Tusi Paia I le 1 Korinito 3:13 o le a fa‘aalia galuega a tagata ta‘ito‘atasi; o le a fa‘ailoa fo‘i e le Aso, auā o le a fa‘aalia i le afi; o le a tofotofoina fo‘i galuega a tagata ta‘ito‘atasi i le afi po ‘ua fa‘apefea.

Ia manatua o le nofoaga tatou te o atu iai, e le toe iai se po, o lona uiga e matua tele le taimi. O le faifeau, taitai aoao o le Ekalesia ma so’o se tagata e tu lava ia taitoatasi I luma o le Atua, ma e leai se mea e mafai ona lafi ai. O lona uiga, afai e iai se tagata o lo’o taumafai e taofia oe mai le faia o galuega a le Atua I le taimi nei, ia manatua e le iai le tagata lena I le taimi e te tu ai I luma o le Atua a’o suesueina au galuega ma le amio. Afai e te faatagaina seisi tagata e suia lou naunautaiga ma le galue punouai I le galuega a le Atua, aua nei galo e le mafai ona e tuuaia lena tagata i le aso mulimuli auā e te tu lava na o oe taitoatasi I luma o le Atua e te tali mo au galuega uma na faia faapea galuega e lei faia. Ia saili lelei lou faaolataga i le fefe ma le gatete, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 9 NOVEMA 2023

Manatu Autu: Pe a tautau ma fiafia le Atua ia te oe (When God commends you)

Tauloto – Salamo 145:8 ‘E alofa fua mai ma alofa mutimutivale mai le ALI‘I; e telegese lona to‘asā, e tele fo‘i lona alofa.’

Faitauga - Tusi Paia: Salamo 8:1-6

Upu Folafola

E iai lava avanoa mai lea taimi I lea taimi e tautau ai ma faaalia le fiafia o le Atua I lana fanau, e na te logoina I latou ua fiafia o ia iai latou. Afai e tupu lea tulaga ia te oe, aua e te mimita, aua o loo faaalia mai lona alofa tunoa. Fai mai le Tusi Paia o le Atua e atoatoa ma e na te mo’omia le tulaga atoatoa (Mataio 5:48). O lo’o faamanino mai e le Efeso 5:25-27 e toe afio mai Iesu Keriso mo lana faatoanofotane e leai se ila po’o se manuminumi. Ua e atoatoa ea? A faapea mai le Atua ia te oe, ‘Malo lava si ou atalii, matua lelei tele oe’, o loo faaalia mai lona alofa tunoa. I le Iopu 1:8 fai mai le Atua o Iopu e sa’o lana amio ma e amiotonu peitai I le Iopu 30:1, na lafo e Iopu ni upu e le tatau ona faia e se tagata amiotonu. Ina ua faailogaina e le Atua o ia o se tagata amiotonu, sa ia faaalia mai ai lona alofa tunoa. I le Numera 12:3, o lo’o tusia ai o Mose o se tagata pito I loto maualalo I le lalolagi atoa, peitai sa iloga foi o ia I le vave ma le matautia o lona ita. Afai e ta’uta’u e le Atua oe o se tagata lelei, o le lautele lena o lona alofa tunoa faaalia. E le tatau ona e mimita ai, afai e te faia, e le umi ae e iloa ua e le toe lavea I le vaega e numera muamua. 

O loo manino mai I le Roma 9:15-16

15Auā na ia fetalai atu ia Mose, “‘Ou te alofa atu i lē ‘ou te fia alofa atu i ai, ‘ou te alofa mutimutivale fo‘i i lē ‘ou te fia alofa mutimutivale i ai.” 16O lenei, e lē mai lē ‘ua mana‘o, e lē mai lē ‘ua tausiniō, ‘ae mai le Atua o lē alofa mai.

E le ta’uamiotonuina le tagata ona o ni galuega na faia. E moni e tatau ona e faia ni galuega, a leai e te ono le maua avanoa e mafai ona tautau ma fiafia ai o ia ia te oe, peitai e le ta’uamiotonuina ai. Ua na o le alofa mutimutivale o le Atua e ta’uamiotonuina ai oe. Aua lava nei galo ia te oe. Afai e ta’uta’u ma fiafia le Atua I se tagata, o le a maua e lea tagata le taui e sili atu nai lo taui e tatau ona maua mai lea galuega. Afai e amata ona e vaaia lea tulaga, ia e manatua pea ua na o le Atua ua finagalo e faaalia lona alofa mutimutivale ia te oe. Aua lava nei e manatu ua e atoatoa, auā e te le atoatoa. Pau lava lenei, ia e faafetai I le Atua mo lona alofa mutimutivale. Ia faailoa ou vaivaiga I ona luma faapea luma o tagata. Ave uma le viiga I le Atua ae le o au galuega auā foi a aunoa ma ia, e leai se mea e mafai ona e faia (Ioane 15:5). Afai e tautau oe ma fiafia le Atua ia te oe, o le valaau lea ia e loto maualalo atili ma galue malosi, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 8 NOVEMA 2023

Manatu Autu: Mataala I le faamaualuga 2 (Beware of pride 2)

Tauloto – 2 Korinito 10:12 ‘Auā matou te lē fa‘amalosi ‘ina fa‘atasia, pe fa‘atusatusaina ai matou ma nisi, o ē vivi‘i i latou ‘iā te i latou; a o i latou, o lo‘o fefuafuaa‘i i latou ‘iā te i latou, ma fēfa‘atusatusa‘i i latou ‘iā te i latou, e lē popoto i latou’

Faitauga - Tusi Paia: 1 Peteru 5:6

Upu Folafola

O leisi auala e faaalia ai le faamaualuga o le tagata pe afai latou te faatusaina mea ua latou ausia I isi tagata. O le faitauga o le Tusi Paia (1 Tupu 19:13-18)  o lo’o faaalia ai na faatonu e le Atua Elia ia faauuina I latou e sui ia te ia. E tele lesona e fia a’oa’oina ai mai ai. E le tatau ona e manatu e sili atu ona e ola faapaiaina I lo isi pe e te manatu foi e sili atu mea ua e ausia I lo isi. E ono sili atu taleni o loo ia te oe pe sili atu foi lou galue punouai, peitai e tatau ona e faamaualalo I taimi uma. O le taimi e amata ai ona e manatu faamaualuga o iina e amata ai ona taofia lou alualu I luga. O se faataitaiga o le Tupu o Saulo (1 Samuelu 15:25-30). 

O le faitauga o le Tusi Paia o le aso o loo faaalia mai ai iai tatou e manaomia e le Atua lo tatou faamaualalo ina ia mafai ona ia siitia I tatou. I nisi faaupuga, e te faamaualuga loa, ua e mamafa tele ua le mafai ona siitia oe e le Atua. E le mafai ona e alu pea I luga e aunoa ma le alofa tunoa o le Atua, tumau I le faamaualalo, tusa po’o le a le tele o mea ua e manatu ua maea ausia (Iakopo 4:6). 

O loo faapea mai le Upu a le Atua o I latou e faatusatusa I latou I isi tagata e le popoto I latou (2 Korinito 10:12). E na o le toatasi le faamasino moni ua na o le Atua. E na o le faiaoga e mafai ona ia iloa mea sese a se tamaititi o lana vasega. Mo se faataitaiga, afai tatou te fesiligia Iosua ‘o le a le lelei o mea na e faia?’, e ono faapea mai o ia, ‘e lelei tele’ pe a fua e tele atu mea na ia ausia pe a faatusa ia Mose. Peitai na faapea mai le Atua:

‘Ua e toeaina lava, ‘ua tele ou tausaga; e matuā tele fo‘i le lau‘ele‘ele o totoe e fai mo ‘outou.  (Iosua 13:1). 

O loo faapea mai le Atua ua e toilalo ona ua le mafai ona e faamaeaina le galuega. Aua lava nei e manatu ua e atoatoa, aua afai tatou te faitauina agasala, e le mafai ona tulai pea se tagata (Salamo 103:3). Pau a lenei, ia e faafetai I le Atua I le mamao ua auina mai ai oe e le Atua ma tatalo mo isi I ou tafatafa ane. E leai ma seisi e sili atu I leisi, e tatau pea ona e ava ma ave le faamuamua I isi (Roma 12:10). E amata loa ona e faatusaina mea ua e ausia I isi tagata, e amata loa ona gata lou tuputupu ae, I le suafa o Iesu, Amene.