Samoan Devotional

OPEN HEAVENS

MATALA LE LAGI MO LE ASO LUA 7 NOVEMA 2023

Manatu Autu: A’o momoe tagata (vaega 3) - While Men Slept (3)

Tauloto – 1 Tesalonia 5:6 ‘O lea, ‘aua ne‘i tatou momoe ai fa‘apei o isi, a ‘ia tatou mataala, ma ‘ia fa‘autauta..

Faitauga - Tusi Paia: 1 Tesalonia 5:5-9

Upu Folafola

O le oti e faatusa I le moe I le 1 Korinito 15:51. I nisi faaupuga, o se kerisiano faatuatua o lo’o moe I le agaga o loo oti o ia faaleagaga. O lo’o faailoa mai I le 1 Tesalonia 5:5-9 e tatau ona tatou feala faaleagaga, ia mataala ma ia faautauta. Fai mai le Mataio 24:42, e tatau ona mataala aua e leiloa le itupo e toe afio mai ai le Alii. O lo’o faamalosi mai le Roma 13:11, ua lata ona toe afio mai le Alii, e lata atu I lo tatou manatu. 

 O nisi o le au kerisiano ua masani I le ala ma toe moe faaleagaga. Ua masani I le lē vevela pe malulu foi. Ou te alofa I nei tagata aua e le lelei lo latou iuga. O se faataitaiga lelei o Samasoni, o lē na moe ae ala ane I le tele o taimi seia oo I le aso na toe ala ane ai, ae ua I lima o ona fili. E leiloa pe ua tele ni taimi sa e moe ai ma toe ala mai, peitai ua tatau ona taofia loa aua e iai lava le taimi mulimuli e moe ai ae ala ane ua faatigainaina e le tiapolo. Afai sa masani ona e alofa I le Atua ma lou loto atoa, peitai ane ua amata ona iai isi tulaga ua faoa lou taimi ma le Atua I lou loto, o lona uiga o lo’o e moe. O lo’o faapea mai le Atua ia te oe e pei ona ia faia I le Ekalesia I Efeso I le Faaaliga 2:4-5, ‘ia e toe foi I lou uluai alofa’. Fai mai le Efeso 5:14, afai e te mataala, e susulu ma malamamala pea Keriso ia te oe. 

“O le mea lea ‘ua fai mai ai, “Ala ia oe e moe na, ma e tula‘i mai i ē ‘ua oti, ‘ona fa‘amalamalama mai lea o Keriso ‘iā te oe.” Efeso 5:14

Le au pele e, toe foi I lou uluai alofa. Tuu ese tamai agasala na o loo taofiaofia oe. Alu I se nofoaga e te lua mafuta ai le Atua, saili mafutaga ma le au kerisiano, ia fai ma masani le faaalu o lou taimi I le tatalo, saili ma suesue I le Tusi Paia. Ua sauni Iesu e toe susulu ma malamalama atu ia te oe pe afai e te naunau e te ala mai I luga ma toe foi ia te ia. E alofa tele o ia ia te oe ma o lo’o valaau mai ia e toe foi mai I Le na uluai alofa ia te oe, ua tuuina mai lona ola e sui ai au agasala. Afai e pupula mai lona malamalama ia te oe, o mea uma na faoa e le tiapolo mai ia te oe a’o e moe, e toe faafoisia uma ia te oe ma o le a sili atu le tulaga o le a iai lou tagata. O le moe faalegaga e faatusaina I le oti faaleagaga. Toe foi I lou uluai alofa ae lei tuai, I le suafa o Iesu, Amene.  

OPEN HEAVENS

MATALA LE LAGI MO LE ASO GAFUA 06 NOVEMA 2023

Manatu Autu: Mataala I le faamaualuga 1 (Beware of pride 1)

Tauloto – Faataoto 16:18 ‘E muamua le fa‘amaualuga i le malaia; e muamua fo‘i le loto fa‘asiasia i le pa‘ū..

Faitauga - Tusi Paia: 1 Tupu 19:13-18

Upu Folafola

I le faitauga mai le Tusi Paia o le aso, e te iloa ai na faatonu e le Atua Elia ia faauuina ni tagata se toatolu e sui ia te ia. Ua faia lea tulaga aua e mafai ona e iloa atu le faamaualuga o Elia I lana tali e faapea, ‘e oo ia te a’u, ua na o a’u o totoe’. E na o le toatasi Lē e faaigoaina ‘O A’U’, ua na’o I le Atua e toatasi (Esoto 3:14). O le mafuaaga lea ina ua faaaogaina e Iesu Keriso ma faapea o ia ‘O A’U’ I le Ioane 8:58-59, na matua lē fiafia le au Iutaia aua ua ia faatusa o ia I le Atua. E ui na latou lē iloa I lea taimi le Ioane 1:1 ma le 14, o lo’o faapea mai ai o Iesu o le Atua na liu tino tagata ma mau foi ia ma I tatou. O le suafa ‘O A’U’ e tatau pea ona faaavanoa mo le Atua ma na o ia lava. 

Afai e te saili I afioga a le Atua, e te iloa ai o upu, ‘a’u, ou, o’u’ o se gagana e faaaogaina I le faamaualuga. O le Gagana lea a Satani I le Isaia 14:12-15. Afai e te feiloai ma se tagata e  masani I le faapea mai ‘o a’u, e te iloa ai o lo’o lua feagai ma se tagata faamaualuga. Ia e mataala I le tulaga lea aua o le maualuga lava e te ausia o le maualuga foi lea o le avanoa e te faaaogaina ai le upu ‘o a’u’ I le tele o taimi.

Ua tatou vaai I se faataitaiga I le tagata malosi ma le faauuina o Samasoni. I le Faamasino 15:14-16, ina ua paū le faauuga ma le mana o le Atua I luga Ia te ia, na ia fasiotia le faitau afe o fitafita I le auvae o se asini. Na ia faapea mai, ‘o le ivi ‘auvae o le asini na ‘ou fasi a‘i tagata e afe’. E leai se faapea mai, ‘faafetai le Alii’ o Lē na auina mai le mana, ua na o le faataua o ia lava. E o’o foi ina ua toe faafoisia e le Atua lona malosi tele I le Faamasino 16:25-28 ina ua maea ai ona saisaitia o ia e le fili ma aveesea ona mata, e pau lana tatalo na faia ae lei oti e faapea: 

‘Ona vala‘au lea o Samasoni i le ALI‘I ‘ua fai atu, “Le ALI‘I e, le Atua ‘ia e manatu mai ma ē fa‘amalosi mai tau lava i lenei toe mea, le Atua e, ‘ina ‘ia ‘ou taui ma sui fa‘atasi ‘iā Filisitia i o‘u mata e lua.”(Faamasino 16:28). 

Sa ave lana faamuamua ia te ia lava. O le mafuaaga lea e ui I lona malosi tele ma le faauuga sa ia te ia, na paū maualalo ma na iu ina tauaso ma auauna I ona fili I le oloina o latou saito seia oo ina oti faatasi ma ona fili. Ia e mataala I le faamaualuga aua e te ono paū atu I se tulaga maualalo tele e avea ma auala e matua fiafia tele ai ou fili ona o lou toilalo, I le suafa o Iesu, Amene.  

OPEN HEAVENS

MATALA LE LAGI MO LE ASO SA 5 NOVEMA 2023

Manatu Autu: A’o momoe tagata (vaega 2) - While Men Slept (2)

Tauloto – Faamasino 16:19 ‘Ua na fa‘amoe ‘iā te ia i ona vae; ‘ona vala‘au lea i le tagata e tafi i fuafuati e fitu o lona lauulu, ‘ona āfua ai lea e ia ‘ona fa‘atigā ‘iā te ia; ‘ua mavae lona malosi ai ‘iā te ia’.

Faitauga - Tusi Paia: Faamasino 16:19-22

Upu Folafola

O le taimi o faigāmalologa poo le taimi e moe ai le tagata, na te lē toe iloa ai pe malamalama i lona si’osi’omaga, ma lē mafai ai fo’i ona ia suia ni mea e ona tutupu a’o moe. O le taimi lea e masani ona fai ai osofaiga a le fili. A moe fa’aleagaga se tagata, e ono fa’aaogā e le tiapolo le avanoa lea e gaoi ai ma faaleaga mea tāua taugatā o lona olaga.

A’o faia se tasi o a matou sauniga i ni tausaga ua mavae, sa mamafa timuga ma na fai mai se tasi o la’u fanau iā te a’u, “Tamā o le a le mea ua tupu? Sa tatau ona e alu i luga o le mauga e te tatalo,” Sa o’u tali atu, “sa o’u moe; o le timu na o’u ala ai”. I le taimi muamua ina ua o’u ala ma vaai atu i timuga, na o’u fesili i le Atua, “Tamā e faafefea ona tupu lenei tulaga?” Na tali Tamā, “Na o’u faatagaina timuga auā o le a toatele tagata e omai, ma e manaomia ona fa’amālū le fale e tapena ai mo i latou”. A o o’u moe na manatu le tiapolo a timuga o le a faavaivai tagata e omai I le polokalame peita’i, e lē iloa e le tiapolo o le a liliu e le Atua mo lo matou lelei.

Talitonu mai pe leai, afai o oe o se kerisiano, e faasagatau atu pea le tiapolo ia te oe, ae a maua atu o e moe fa’aleagaga e saili e ia e faaleaga ia te oe. Peita’i a e ala, e mafai ona e tete’e atu i le tiapolo ona sola ese ai lea o ia iā te outou. O le mafuaaga lea ua lapataia ai tatou i le 1 Peteru 5:8 ia mataala. Aua le matamoe, mataala, ina ia mafai ona e tuli le fili. I le Faamasino 16:19, o le taimi a o moe Samasoni i vae o le fafine talitane na avea ai lona malosi mai ia te ia. E taua lou iloa a mana’o le tiapolo e faamoe se isi, na te avatu i ai mea faatosina ia tuinanau ai lona tino ma tauaso ai ona mata fa’aleagaga. O nisi taimi e faaaoga e le tiapolo tupe poo avanoa faigaluega e aveese ai le tagata mai lona ulua’i alofa. O le ala lea, poo le a le lelei e o’o i ai, ia tumau pea lou mataala fa’aleagaga.

O le mafuaaga ou te alu ai pea i tatalo i le po, e ui fo’i ua matua ou tausaga, ia aua lava ne’i o’u moe. O nisi taimi e manaomia lou tu i luga ma e alu i se nofoaga e te lē masani ai ia mafai ai ona e tatalo. Aua ne’i faatagaina mea faafiafia o lenei lalolagi e aveesea oe mai le mamalu o lou Tamā I le lagi. O le moe fa’aleagaga e maua ai le avanoa o le tiapolo e osofa’i ai ma fa’a toilalo le tagata. Ia mataala fa’aleagaga i taimi uma e lē aunoa. I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 4 NOVEMA 2023

Manatu Autu: A’o momoe tagata (vaega 1) - While Men Slept (1)

Tauloto – 1 Peteru 5:8 ‘‘‘Ia ‘outou fa‘autauta, ‘ia ‘outou mataala, ‘ona o lē ‘ua fai ‘outou mōna fili, o le tiapolo lea, o lo‘o fealualua‘i o ia e pei o se leona tagi, ‘ua sā‘ili se tasi e ‘aina e ia.

Faitauga - Tusi Paia: Isaia 29:10-14

Upu Folafola

Mataio 15:8 ‘‘Ua āva mai ‘iā te a‘u lenei nu‘u i o latou laugutu, a o latou loto ‘ua taumamao ‘iā te a‘u.

O loo maua oe i le moe fa’aleagaga pe a e fai mai e te alofa I le Atua na o upu a’o lou loto e mamao ese ma ia. O loo e moe fa’aleagaga pe a fai ua e lē toe sagisagi fiafia e mafuta ma lē ua e ta’ua o lou Tamā. Na tatalo Tavita i le Atua e toe faafoisia iā te ia le olioli o le olataga. O lona uiga sa leiloa le olioli sa ia te ia, o se atalii o le Atua (Salamo 51:2). A o’o ina sili ona fa’ataua mea a le lalolagi i lo’o le Agaga, pe a sili atu ona e talitonu i tulafono masani i lo’o le Upu a le Atua, o loo e moe fa’aleagaga. Ou te talitonu i le Atua o le a e ala ma tula’i mai i so’ose paie ma se faapalapala fa’aleagaga i le asō, I le suafa o Iesu.

10Auā ‘ua liligi atu e le ALI‘I le agaga e moe gase ai i luga ‘iā te ‘outou, ‘ua fusifusia fo‘i e ia o ‘outou mata; ‘ua ia ufitia fo‘i mata o perofeta ‘atoa ma ‘outou ali‘i, o tagata va‘ai ia.. . . . . . . . Isaiah 29:10

A e vaai i se tagata e taumafai lava e fōia se faafitauli ae lē tatalo e tu’u i le Atua, o lona uiga ua leva ona moe fa’aleagaga le uso, aua ua ia lē iloa togafiti o loo faia e lē tiapolo. Afai e fai sau faaiuga a’o e moe fa’aleagaga e tele le avanoa e sesē ai lau faaiuga auā o loo e tauaso fa’aleagaga. A’o e le’i filifili I le tagata e te faaipoipo i ai pe fai faatasi se lua pisinisi, fa’amautinoa o loo e mataala fa’aleagaga. A e moe fa’aleagaga, e lē mafai ona e iloa tonu agaga. E te talitonu i so’ose perofeta pepelo e tautala I mea e lelei I lau faalogo; e te talia luko i ofu fa’a mamoe ma e lafo au penina i luma o puaa.

O se ta’ita’i I le Ekalesia e lē tatau ona moe fa’aleagaga aua e mafai ona osofai e le tiapolo tagata o loo ia ta’ita’ia, aua na fetalai le Atua o lo latou toto e i luga o le ulu o le ta’ita’i (Esekielu 33:6-7). O lea afai o oe o se ta’ita’i i le fale o le Atua, e tatau lava ona sili atu lou mataala fa’aleagaga na i loo se isi lava tagata. E lē faatagaina e le Atua se isi e oti ma alu atu i le malaia I seoli ona o lou faatamala fa’aleagaga. I le suafa o Iesu Amene

Tatalo

Tama, faamolemole ia e fafaguina a’u mai le moe faaleagaga I le aso, I le suafa o Iesu, Amene. 

OPEN HEAVENS

MATALA LE LAGI MO LE ASO FARAILE 3 NOVEMA 2023

Manatu Autu: Tatalo mo talavou (Prayer for the youths). 

Tauloto – 1 Timoteo 4:12 ‘‘Aua ne‘i ‘ino‘ino se tasi i lou taule‘ale‘a, a ‘ia fai oe ma fa‘aa‘oa‘o i ē ‘ua fa‘atuatua, i le ‘upu, ma le amio, ma le alofa, ma le loto, ma le fa‘atuatua, ma le amio mamā.”

Faitauga - Tusi Paia: Ieremia 1:4-10

Tatalo

1.       Tama, faafetai mo olaga uma o talavou ma lou alofa e le uma mo I latou uma. 

2.       Tama, faamolemole ia taitai mai talavou uma ia te oe. Ia latou alolofa ma auauna ia te oe ma le faamaoni I le suafa o Iesu. 

3.       Tama, faamolemole ia faaaogaina matou talavou e manumaloina agaga mo oe I le suafa o Iesu. 

4.       Tama, faamolemole fesoasoani I talavou uma ia ola faapaiaina ma ia aua nei faatagaina le tiapolo e faoa o latou faamanuiaga mai ia te oe. 

5.       Tama, faamolemole ia e foai le manuia tele i o matou talavou uma ma ia sasa’a faamanuiaga iai latou uma, I le suafa o Iesu, Amene. 

6.       Tama, faamolemole ia e faaumatia fuafuaga uma a le fili ia liua agaga o kerisiano talavou mai ia te oe, I le suafa o Iesu. 

7.       Tama, faamolemole ia e foai I talavou uma le alofa tunoa e mafai ai ona latou ava I tagata matutua ina ia faalevalevaina o latou aso I le lalolagi nei. 

8.       Tama, faamolemole ia e foai I matou talavou  le poto, atamai, le iloa ma le malamalama ina ia solosolo pea I luma ma ia aua lava nei o latou faatamaia tofi e foai atu e o latou matua iai latou, I le suafa o Iesu. 

9.       Tama, faamolemole ia liligi lou Agaga I luga o matou talavou uma ma ia faaaogaina I latou e tauala mai ai se faaolaolaga tele I lau Ekalesia. 

10.   Tama, faamolemole ia tafiesea agaga leaga uma o lo’o avea ma mafuaaga o le loto momomo, o le fiafia I fualaau faasaina ma isi, ia tafiesea mamao mai o matou talavou. 

11.   Tama, faamolemole ia e fesoasoani I matou talavou ina ia mafai ona ausia le faamoemoega ua e fuafuaina mo latou olaga, I le suafa o Iesu. 

12.   Ia e faamanuia, puipui ma faatoateleina talavou e aoga ma galulue malosi I totonu o si o matou atunuu, I le suafa o Iesu Keriso e tatalo atu ai, Amene.  

OPEN HEAVENS

MATALA LE LAGI MO LE ASO TOFI 2 NOVEMA 2023

Manatu Autu: Le Alii e, ia e manatua ma ia te a’u (Remember me Lord!). 

Tauloto – Salamo 106:4 ‘‘Le ALI‘I e, ‘ia e manatu mai ‘iā te a‘u e tusa ma lou finagalo alofa i ou tagata. ‘ia e asiasi mai ‘iā te a‘u ma lau fa‘aolataga...”

Faitauga - Tusi Paia: Salamo 106:4-5

Upu Folafola

O le tele o taimi e tatou te tatalo ai, e peiseai e le o faafofoga mai iai le Atua, pe le talanoa mai foi. E te ono vaai atu foi o lo’o faigofie ona maua tali o tatalo a isi ma ua e manatu po’o le a lau agasala ua le tali ai le Atua ia te oe. I le Kenese 30, o loo tusia e le Tusi Paia sa lē maua se tama a Rasela e ui o lo’o fanafanau pea Lea tusa pe ua matua.  E foliga mai e matua lē tali lava le Atua I tatalo a Rasela, peitai I le fuaiupu 22, fai mai le Tusi Paia, ‘Ua manatua fo‘i Rasela e le Atua, ‘ua fa‘afofoga le Atua ‘iā te ia ‘ua fa‘afānauina ia.  

O se tasi o tatalo e tatau ona e tatalo ai pe afai e foliga mai e le o faafofoga le Atua I au tatalo o lenei, ‘Le Alii e, ia e manatua mai a’u’. O le tulaga muamua lava e faia e le Atua o le tali o le tatalo a lea tagata. Afai o lo’o e tatalo pea mo se vavega ae lei tali mai lava le Atua, e manatua oe e le Atua I le masina lenei, I le suafa o Iesu. Fai mai le Salamo 65:2 Le fa‘afofoga tatalo e, e ō atu ‘iā te oe tagata uma lava.

E faafofoga le Atua I tatalo peitai e fai mai le Tusi Paia afai e tali mai le Atua, e iai tapulaa e tatau ona faamalieina. Mo se faataitaiga, I le Isaia 55:6, fai mai le Tusi Paia ia ‘outou sā‘ili i le ALI‘I manū o mafai ‘ona maua o ia; ‘ia ‘outou vala‘au ‘iā te ia manū o latalata mai o ia. E leiloa po’o ua umi se taimi o e tatalo, e te le o mautinoa po’o latalata mai pe leai aua foi e te le vaai atu ia te ia, peitai a finagalo o ia e manatua, e faalatalata mai lava o ia. 

O le vaega lona lua e tupu, afai e manatua e le Atua se tagata, e amata ona ia tatala faitotoa o lo’o tapunipuni mo se taimi umi, peitai o Lē na manatua Rasela, o ia lea o lo’o iai le ki a Tavita, afai e na te tatala, e le mafai e se tasi ona tapunia, afai foi na te tapunia, e le mafai ona tatala e seisi (Faaaliga 3:7). Afai ua tapuni e le tiapolo se faitotoa ia te oe, I le suafa e sili I suafa uma, o le aso lenei, e tatala ai. E pau le tulaga e te manaomia, ia manatua oe e le Atua. E manatua oe e le Alii I le aso ao e tatalo, I le suafa o Iesu. 

Tatalo

Tama, faamolemole ia e manatua mai a’u ma tali a’u tatalo I le aso, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 1 NOVEMA 2023

Manatu Autu: E le toe iai se pā (No more barrenness). 

Tauloto – Esoto 23:26 ‘‘E leai sē papā sana tama, e lē pā fo‘i se tasi i lou nu‘u; ‘ou te fa‘a‘atoaina lava ou aso..”

Faitauga - Tusi Paia: Salamo 128:1-6

Upu Folafola

O le pā e mafai ona faamatalaina o le leai o se fua o galuega. E eseese vaega e ono tino mai ai, e mafai ona tauala mai I le tino, tulaga tau tupe, aoaoga po’o le lotu foi. Ou te tatalo ia taofia e le Atua Silisili Ese so’o se vaega o pā o lou olaga I le suafa o Iesu. 

O le pā I le tino e faatatau I se ulugalii e leai se fanau. E iai se tasi o ou afafine ua logoina o ia e le mafai ona ia tauaveina se pepe ona o loo poloka lona toala fanau (tulou). I se tasi o matou polokalame na faailoa mai e le Atua ma ou faaleoina o loo iai se tagata ua fai iai fomai e le mafai ona maua sana tama, peitai o le ia maua se masaga. Na ia talitonu I le perofetaga ma ua u’umau i le upu a le Atua. Mo le viiga o le Atua, ua maua I le maitaga ma ua alu atu I atunuu I fafo e taoto e fanau ai. Na tetei fomai faapitoa ona e leai se toala fanau. Ua silia ma le 20 tausaga talu ona tupu lea mea. Talu ai nei lava, na vili mai lou afafine lea ma fai mai e fia sau e aumai le masaga e matou te feiloai. Ua faateia a’u ona e taunuu mai, o loo sii mai ni pepe masaga. O le masaga muamua o lo’o aooga nei I le Iunivesite ae I le alofa tunoa o le Atua, na ia foai atu ia te ia seisi masaga. Na faia e le Atua se mea e na o ia e mafai ona faia. Afai e mafai e le Atua ona faia I lou afafine, ae o le na lo’o e ole atu pea I le Atua mo se pepe, e mafai foi ona ia foai atu Ia te oe se masaga I le suafa o Iesu. 

O le pā I le tulaga tupe e faatatau I se tagata e galue malosi ae leai se tino mai i le tamaoaiga, e pei o Peteru na fagota I le po atoa ae leai se I’a na maua (Luka 5:5). E faafetai na faataga e Peteru Iesu I lona vaa, usitai I faatonuga a le Alii ona ia maua lea o se faiva tele ua saeia ai le upega. 

O le faataitaiga o le pa I le aoaoga, pe afai o se faiaoga e galue malosi ae le mafai ona ia tusia ni pepa o suesuega ma ua le mafai ai lava ona siitia lona tulaga. E pa I latou I le itu tau aoaoga ma suesuega. O le pa I le galuega a le Atua e iloa pe afai e toaga le faifeau e tatalo, anapogi ma talai le talalelei ae leai se tupu o le Ekalesia. 

Po’o le a lava le ituaiga tulaga pa o lo’o iai lou olaga faapea ma ē e pele ia te oe, ou te folafola atu e faagataina I le aso, I le suafa o Iesu, Amene.   

OPEN HEAVENS

MATALA LE LAGI MO LE ASO LUA 31 OKETOPA 2023

Manatu Autu: Iesu o le Alii – Leai se faafinauga 2 (Jesus is Lord: no Controversy 2). 

Tauloto – Ioane 9:25 ‘‘Ona tali mai ai lea o ia, ‘ua fa‘apea mai, “‘Ou te lē iloa pe se tagata agasala o ia; o le mea e tasi ‘ua ‘ou iloa o a‘u le tauaso, ‘ua ‘ou va‘ai nei.”

Faitauga - Tusi Paia: Ioane 9:1-11

Upu Folafola

O ananafi sa tatou talanoaina ai le toetu o Iesu ma le fa’amaonia ai o lona avea ma Alii. A tuu mai i le ‘atoaga, ua fa’amaonia ai, ua na o ia to’atasi e iai le malosi’aga i luga atu o le maliu, ma e na o ia ua mafai ona ‘avea ma Alii. O le aso, o le a tatou sa’ili’ili i se isi itu o le avea o Iesu ma Alii, ma o le itu lea o lona puleaina o mala ma ma’i, e pei ona ta’ua i le tusi o Isaia 61:1, ma faamaonia e le tusi o Luka 4: 18 e faapea:  “Ua i o‘u luga le Agaga o le Ali‘i, auā ‘ua nā fa‘au‘u mai ‘iā te a‘u e folafola le tala lelei i ē matitiva. ‘Ua ‘auina mai a‘u e ia e fa‘amālōlō i ē loto momomo, e tala‘i le sa‘olotoga i le tāfeaga, ma ‘ia pupula mata o ē tauaso, e tu‘u sa‘oloto i ē ‘ua fa‘asauāina,”

Ina ua fetaia’i Iesu ma se tagata i Katara sa ia te ia temoni, na ia faaali iai lona agalelei, o ia o le lavea’i mata’utia ma o ia le fai vavega ina ua ia tuli ‘esea temoni sa pulea lea tagata i tausaga e tele (Luka 8 :26-39).O Iesu na afio mai e talai le Tala Lelei i e matitiva ina ia maua e tagata uma le fa’aolataga, ma sa ia vavao ma le pule atoatoa I latou uma sa tete’e ia te ia. Mo se fa’ataitaiga, sa ia lauga atu: “‘Oi talofa ‘iā te ‘outou tusi‘upu ma faresaio, tagata fa‘afiaamiotonu. Auā ‘ua so‘o le sami ma le lau‘ele‘ele ‘iā te ‘outou ‘ina ‘ia lotu mai o se tasi; pe a maua fo‘i o ia, ‘ona ‘outou faia lea o ia ma tagata o Kēna ‘ua sili ‘ona leaga ‘iā te ‘outou. (Mataio 23:15)

Ma e faapea le faamatalaga a tagata I nei upu faatasi ma ana aoaoga: 28‘Ua fa‘ai‘u e Iesu o nei ‘upu, ‘ona matuā taufaiofo ai lea o le motu o tagata i lana a‘oa‘oga; 29auā ‘ua ia a‘oa‘o ‘iā te i latou e pei o sē ‘ua i ai le pule, ‘ae lē pei o le ‘au tusi‘upu.(Mataio 7:28-29)

Sa fesiliga lo tatou Alii o Iesu Keriso mo se faamaoniga o lona avea ma Alii i le tusi o Ioane 10: 24-25. Ae pau lana gaoioiga na faia, o lona fa’asino lea o ē na su’esu’eina o ia, i galuega a lona Tama sa faia e ala ia te ia. Ua tali atu Iesu ia te i latou, “O galuega ‘ou te faia i le suafa o lo‘u Tamā, e molimau mai ia ‘iā te a‘u.”(Ioane 10:25).            

O tatou o le fanau a le Atua, e tatau ona avea I tatou ma suivaaia e lelei o Iesu Keriso. E pau le mea e manaomia, o le ave o tatou ola ia Iesu ma tatou ola i ana tulafono.

Ou te faia se faaperofetaga ia te oe i le aso; e fa’au’uina oe, mai se tagata e taliaina vavega i se tasi e fa’atinoina vavega, i le suafa o Iesu.

Tatalo

Tamā ia e fa’au’uina a’u e avea ma ou sui i le lalolagi atoa, I le suafa o Iesu, Amene.

OPEN HEAVENS

MATALA LE LAGI MO LE ASO GAFUA 30 OKETOPA 2023

Manatu Autu: Iesu o le Alii – Leai se faafinauga 1 (Jesus is Lord: no Controversy 1). 

Tauloto – Mataio 28:6 ‘‘E lē o ‘i‘inei o ia; auā ‘ua toetū mai o ia, pei ‘ona fetalai atu ai o ia. Ō mai, ‘inā matamata i le mea na tu‘u ai o ia...”

Faitauga - Tusi Paia: Mataio 28:1-6

Upu Folafola

O le avea o Iesu ma Alii na faamautuina ma faamaonia I le aso na toetu mai ai o ia mai le oti aua e leai ma se tasi ua mafai ona ausia lea tulaga na o ia. O loo tusia I le Tusi Paia, ‘Fa‘auta fo‘i, o le si‘ufofoga mai le lagi, ‘ua fa‘apea mai, “O lo‘u Atali‘i pele lenā, ‘ua ‘ou fiafia lava ‘iā te ia.”’(Mataio 3:17). Na toe faamautuina faalua I le faamaumauga a Luka I luga o le mauga na liua ai ma faailoa mai le Atua le Tama e ala I lana fetalaiga I le au soo e talai le talalelei I le lalolagi. Fai mai le faamaumauga:

34O lo‘o fai mai ia mea, ‘ae o‘o mai le ao, ma fa‘amalumalu ifo ‘iā i latou; ‘ua latou matata‘u ‘ina ‘ua ufitia latou i le ao. 35‘Ona o‘o mai lea o le si‘ufofoga mai le ao, ‘ua fa‘apea mai, “O lo‘u Atali‘i lenā; o lē ‘ua Filifilia ‘ia ‘outou fa‘alogo ‘iā te ia.” (Luka 9:34-35)

E ui lava I nei faamaumauga, e le’i talia lava e le lalolagi Iesu o le Alii. 

Peitai I le Ioane 8:46, na ia fesiligia ‘O ai ‘ea o ‘outou na te fa‘ailoa mai sa‘u agasala? ‘Āfai fo‘i ‘ou te tautala i le mea moni, pe se a le mea tou te lē talitonu mai ai ‘iā te a‘u?’ e oo I lona maliu I le Mataio 27:54 ina ua talatalanoa ta‘ita‘i fo‘i o le to‘aselau ma ē na leoleo ‘iā Iesu fa‘atasi ma ia ma faapea mai: ‘“E moni, o le Alo lava lenei o le Atua.”, o iina na faamaonia ma faamautuina ai foi Iesu Keriso I lona tulaga o le Alii. O le faitauga mai le Tusi Paia o le aso ua tusia:

5‘Ona fai atu ai lea o le agelu i fafine, ‘ua fa‘apea atu, “‘Aua lua te matata‘u; auā ‘ua ‘ou iloa ‘ua ‘oulua sā‘ilia mai Iesu na fa‘asatauroina. 6E lē o ‘i‘inei o ia; auā ‘ua toetū mai o ia, pei ‘ona fetalai atu ai o ia. Ō mai, ‘inā matamata i le mea na tu‘u ai o ia (Mataio 28:5-6). 

Na tusia e le Aposetolo o Paulo 13‘Ae ‘āfai e leai se toetū mai o ē ‘ua oti, po ‘ua lē toe fa‘atūina mai Keriso; 14‘āfai fo‘i ‘ua lē toe fa‘atūina mai Keriso, po ‘ua fa‘alēaogā la matou tala‘i, ‘ua fa‘alēaogā fo‘i lo ‘outou fa‘atuatua. (1 Korinito 15:13-14) Ia faamanuia le Atua ia te oe a’o e faatuatua I le Alii o Iesu Keriso.

Fai mai le Tusi Paia o so’o se tasi ua talitonu ia Iesu Keriso e lē faasalaina, peitai o I latou e lē talitonu, e faasalaina aua ua latou lē talitonu I le atalii e toatasi o le Atua – Iesu Keriso (Ioane 3:18). 

O fea le vaega o lo’o e iai?

Tatalo

Tama, ou te talitonu o Iesu Keriso o lo’u Alii. Ia avea lona tulaga Alii ma le Tupu e faaalia I lo’u olaga, I le suafa o Iesu Keriso, Amene.

OPEN HEAVENS

MATALA LE LAGI MO LE ASO SA 29 OKETOPA 2023

Manatu Autu: Anapogi o se auupega o taua (Fasting is a weapon of war). 

Tauloto – 2 Nofoaiga Tupu 20:3 ‘‘3‘Ona mata‘u ai lea o Iosefatu, ‘ua ia fa‘amalosi ai e sā‘ili‘ili i le ALI‘I ma ‘ua tala‘iina e ia le anapogi ‘iā Iuta uma..”

Faitauga - Tusi Paia: Eseta 4:16-5:3

Upu Folafola

Sa i ai se tamā e igoa iā Moretekai - o le uso o le tamā o Eseta. Sa i ai fo’i se tasi tagata e igoa iā Hamanu - o se alii ofisa a le tupu, ae sa fai Moretekai ma ona fili. Sa manatu Hamanu e tatau ona ifo tagata uma iā te ia, peita’i o Moretekai e le’i mafai ona ifo i se tagata vagana le Atua. O lea na filifili ai Hamanu e fa’ao’o le oti ia Moretekai ma faaumatia uma ona tagata, ‘aua ne’i i ai se isi e totoe. Na fa’a saini e Hamanu le tupu o Asueru i le poloaiga e fasiotia uma ai sa Iutā.

Ina ua faalogo Moretekai I le poloaiga a le tupu, na alu atu iā Eseta le masiofo a le tupu mo se fesoasoani. O le tali a Eseta iā Moretekai o loo maua I le tusi o Eseta 4:1-17, e tatau ona anapopogi uma le fanauga a Isaraelu, ona ia alu atu ai lea I le tupu. E o’o ifo i le lona tolu o aso talu ona anapopogi sa Iutā ua amata tutupu suiga. E o’o atu i le Tusi o Eseta 5:1-6, ua tu Eseta i luma o le tupu, ae le’i amia o ia, ma o le tali muamua lea o le anapogi, e le’i to’atama’i le tupu ma faapea mai ia fasiotia Eseta ae na alofaina o ia ma fa’asaoina lona ola. O le anapogi e suia le oti i le ola.

O le isi suiga na soso’o ai, ua alofaina Eseta e lē tupu i se tulaga e lē masani a’i. Na fai le tupu ia Eseta, po’o le a lava lona mana’o, se a fo’i se mea e fa’atoga atu ai, e o’o lava i le vaeluaina o le mālō e faia lava. A e anapogi e sili atu mea e faia mo oe na i lo’o mea e te ole atu ai. E o’o atu I le mataupu e ono (6) o le tusi o Eseta, ua lē maua se moe a le tupu se ‘ia fa’amamaluina Moretekai. O se mea lelei na fai e Moretekai i le tele o tausaga ua te’a, e le’i manatua na galo, ua lē maua ai se filemu o le tupu i le mana’o e avatu se taui lelei. A e faamaoni e anapogi, o au faamanuiaga uma sa tatau ona maua ae taofia, e toe manatua uma ma fa’ao’o atu i ou lima.

Ua tau mai i le Eseta e Fitu (7) o lē sa fai ma fili ma fa’asauā i le nu’u atoa o sa Iutā ua lia’ina ma fasiotia, ae o’o mai i le mataupu e (8) ua foaiina atu le fale o Hamanu mo le masiofo o Eseta. O le Upu a le Tusi, “o le oloa a le tagata agasala e teua lea mo lē amiotonu.” (Fa’ataoto 13:22). E te manatu e faigofie i le tagata amioleaga ona fa’amatu’u a na oa? E te maua I le anapogi ma le tatalo. E sui lima e alu i ai le tamāoaiga pe a e anapogi. Na siitia le tulaga o Moretekai auā o le faaeaina e aumai i le Atua (Salamo 75:6-7), talu ai o le anapogi e te latalata ai i le Atua, e taunuu ai fo’i i le fa’aeaina. O le anapogi o se auupega malosi o le taua ma se taavale afi i le faaeaina.

I le Eseta 8:3-17, na laveaiina sa Iutā mai le fa’afanoga, fai mai le Tusi Paia o tagata uma na nonofo latalata ane ua avea ma sa Iutā auā ua latou matata’u ia i latou. O le anapogi o se auupega mata’utia mo le taua. Avea nei loa ma au auupega, amata i le asō. I le suafa o Iesu. Amene.