Samoan Devotional

OPEN HEAVENS

MATALA LE LAGI MO LE ASO GAFUA 27 NOVEMA 2023

Manatu Autu: Ala I le tauoloa ma le tautaua (Key to influence)

Tauloto – Mataio 5:5‘Amuia ē agamalu; auā e fai mo latou tofi le nuu’.

Faitauga - Tusi Paia: Filipi 2:5-11

Upu Folafola

Ina ua maliu ma toetu mai Iesu, na faalauteleina e le Atua lona tulaga ta’uta’ua ma le tauoloa, e o’o I le ta’u o lona suafa, e toatuli tulivae uma ma ta’uta’u o ia o le Alii (Filipi 2:10-11). Afai e te faitau I le Filipi 2:5-8, ma e vaai iai I le maualalo na oo iai le faamaulalo o Iesu, e oo I le maliu mataga I le satauro, e tasi le tulaga o loo manino, o loo iai le agamalu, aua sa ia te ia le mana ma le pule, ae na faamaualaloina ma foliga e vaivai ina ia manuia tagata ma faataunuuina le finagalo o le Atua. O le mafuaaga lea na siitia ma faaeaina maualuga e le Atua ma faalautele lona tulaga tauoloa ma le pule. Fai mai le Mataio 5:5 Amuia ē agamalu; auā e fai mo latou tofi le nuu’. O tagata agamalu e fai mo latou tofi I le nuu ma le lalolagi nei, o I latou ia e faaeaina I tofi maualuluga ma faalauteleina lo latou tulaga tauoloa ma le pule. 

Afai e te silasila lelei I le tala ia Elia, e te iloa ai o ia o faifaatoaga manuia ma maumea ae na filifili e fai ma auauna a se perofeta (1 Tupu 19:19-21). Aua na mafai ona ui I se tulaga maualalo ina ia faataunuuina le finagalo o le Atua, na faaeaina e le Atua ma faalauteleina vaega e oo iai lona tauoloa ma le tautaua e o’o I le tupu o le atunuu e valaau ia te ia ‘Tama’ (2 Tupu 13:14). 

Na ou fai I lau fanau I ni Tausaga talu ai, afai e faatalanoa ma fesiligia a’u I tulaga tiga ma faamanuiaga o le galuega a le Atua, o se tasi o faamanuiaga matagofie, o le faalautele o le tauoloa ma le tautaua. Ina ua ou auai mai I le Ekalesia Redeemed Christian Church of God, na fai mai le Atua ia ou auauna I le Taitai aoao e le’i alu I se aoga, ma na ou faia ma le olioli. Ina ua maliu lou tama faaleagaga ma ua ou galue o se faifeau, e le o se galuega e ula iai seisi. Ua ou o’o ma iloa le maualalo o le mativa ao ou taumafai e faauma le faailoga pito maualuga I le Iunivesite. E ui e le o a’u o se tagata maualoa, ae na lava a le tupe e tausi ai lo’u aiga ma totogi pili. Ona valaau lea o le Atua e tuua la’u galuega ae avea ma faifeau tumau ma taitaia se Ekalesia e tau leai ni tupe. Na ou ui I le tiga, ae o le aso, i lo’u atunuu o Nigeria lava ia, e mafai ona ou faafeiloai atu oe I le tele o tagata pito maualuluga ma tulaga tauoloa ma pule o lo’o iai, ae sili atu I lena, e mafai ona ou faafeiloai atu oe I le Tupu o Tupu. 

O le pule ma le tautaua e afua mai I le agamalu. Afai e mafai ona e faamaulalo ma usiusitai I e pule ia te oe ae faataatia ese ou faailoga ma mea uma ua e ausia, e avatu e le Atua ia te oe tulaga pule, tauoloa ma le tautaua, I le suafa o Iesu, Amene. 

OPEN HEAVENS

MATALA LE LAGI MO LE ASO SA 26 NOVEMA 2023

Manatu Autu: Faaeaina moni (Real promotion)

Tauloto – Salamo 75:6 ‘Auā e le o sasae, po o sisifo, po o le vao e i ai mauga, a o le Atua na te faamasinoina’.

Faitauga - Tusi Paia: 1 Samuelu 13:8-14

Upu Folafola

E eseese ituaiga fa’aeaina. A fa’aea ina oe e se tagata, aua e te soona fiafia tele auā e lē umi. Peita’i a si’itia oe e le Atua, o le fa’aeaina moni lenā. Tusa pe si’itia lou tulaga e avea ma peresetene o se atunuu e pei o Amerika, o le tele o tausaga e mafai ona e umia ai le tofi, e valu, e lē mafai ona sili atu. A si’itia e le tagata, e na o sina taimi, e gata; na o le Atua e aumaia le fa’aeaina moni e leai se isi e faalavelave i ai.

Talu ai o lea ua tatou iloa, fa’atoa tutupu suiga lelei o le olaga pe a faaeaina e le Atua le tagata, e manaomia la ona tatou iloa ana aiaiga mo le fa’aeaina. Na faaeaina e le Atua Tavita mai le leoleo mamoe i le avea ma tupu o Isaraelu ona o le mafuaaga faigofie e tasi,- na te faia mea uma e finagalo ai le Atua(Galuega 13;22). O Tavita e lē o se tagata e fa’afinau i le Atua. I le olaga o Tavita, soosemea e finagalo ai le Atua e usita’i ma fai. O le mafuaaga na fa’aigoa ai e le Atua Iesu i se suafa e sili i suafa uma lava, o lana fetalaiga i le Ioane 4:34: “O la’u mea e ‘ai, ia o’u faia le finagalo o lē na auina mai a’u, ma fa’ai’u lana galuega.”

I le fanua o Ketesemane, Na momo’o Iesu ia aveese mai iā te ia, le ipu o puapuaga mo agasala a le lalolagi, peita’i na ia fetalai, “Aua ne’i faia lo’u loto, a’o lou finagalo” (Luka 22:42). Ina ua a’oa’o atu Iesu i ona so’o e tatalo, o le tasi o manaoga na ia tā’ua, “Ia o’o mai loa mālō, ia faia lou finagalo i le lalolagi faapei ona faia i le lagi” (Mataio 6:10).

E finagalo le Atua ia faia lona finagalo I le lalolagi faapei ona faia i le lagi. O lona uiga a silasila mai le Atua i se tasi e naunau e usitai i lona finagalo, na te siitia lea uso i se tofiga pule. A faaeaina e le Atua se tasi ona na amata lea uso I le loto maulalo ma le usiusita’i iā te ia, ae mulimuli ane lafoa’i faatonuga a le Atua ae fai lona loto, e toe aveesea e le Atua le tofi mai lea uso. O le tulaga faapea na tupu iā Saulo i le 1 Samuelu 15:24-28. Na amata lelei Saulo peita’i na faasolo ina ia faamuamua ma faafiafia i tagata ae tu’u lē finagalo o le Atua. O nisi tagata ua leva na fai i le Atua e faaeaina i latou peita’i e lē usitai i le finagalo o le Atua. Fa’atoā e maua le fa’aeaina ina ua e gaua’i atoatoa i le finagalo o le Atua. Afai e te naunau e faaeaina oe e le Atua, e tatau ona taulai lau vaai I le usitai e faia lona finagalo, I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 25 NOVEMA 2023

Manatu Autu: Pe a Faamamāina e le Atua 2 (When God Purifies 2)

Tauloto – Tanielu 4:37 ‘O lenei, o a‘u o Nepukanesa ou te faamanū atu, ma vivii atu, ma faaneenee atu i le Tupu o le lagi, e faamaoni ana galuega uma, ma ona ala ua tonu; na te mafaia foi ona faamaulaloina e o savavali ma le faamaualuga'.

Faitauga - Tusi Paia: Tanielu 4:23-37

Upu Folafola

E fa’aauau mai le tatou mataupu ananafi, o le lona lua o ituaiga afi e fa’aaogā e le Atua e fa’amamā ai lana fanau, o le afi o mafatiaga. Se’i o tatou avea Iopu e fai ma fa’ata’ita’iga. A e silasila i le Tusi o Iopu 30:1, e fa’atei’a oe i lou iloa sa i ai se ila poo se faaletonu itiiti iā Iopu e tā’ua o le faamaualuga. Ina ua aveesea mea uma sa iā te ia, na ia iloa ai, o le Atua, na te fa’amaulaloina le loto o le tagata e ala i le afi. Na fa’aaogā e le Atua le afi o mafatiaga i ma’i e aveese ai le faamaualuga mai le olaga o Iopu.

Sa fesili mai nisi tagata iā te a’u pe aisea ou te tali ai i so’ose tagata “Ioe lau Afioga” “Ioe lau Susuga”. Ou te le’i faapenā muamua. O a’u o se tasi o tagata sa sili ona maualuga le loto e ui e mativa, peita’i na a’oa’oina a’u e le Atua ma uma ai le fa’amaualuga i lou olaga. Ina ua o’u fanaufouina, o se tasi o faamanuiaga tele na vave ona o’u maua mai le Atua, o le mafai ona ou lagonaina lona siufofoga. O a’u fo’i sa faaliliu mo le ta’ita’i aoao o le Ekalesia RCCG i lea taimi. I se tasi aso, ou te lē iloa po’o le a se mafuaaga, na sau se tasi o faifeau ma fai mai iā te a’u o’u te faaliliu mo ia i le taimi o lana lauga. Sa lagona lo’u lē fiafia ma faapea ifo i lo’u loto, “O le a le manatu o le tamaloa lenei o ai ia? Na te lē iloa o a’u o le fa’aliliu a le ta’ita’i a’oa’o o le Ekalesia?” Sa o’u fa’aliliu pea mo le faifeau, ma sologa lelei le sauniga, peita’i sa tigā lo’u loto. Ina ua uma le sauniga ma o’u agai atu i la’u taavale, na o’u lagona manino le fetalai mai o le Atua iā te a’u faapea, “O lona uiga ua e maualuga tele e faaliliu mo la’u auauna.” Na gata iina ona o’u toe faalogo i le siufofoga o le Atua, ma ua saō mea uma i lo ma va. O le taimi a na iloa ai e le tiapolo ua lē toe talanoa mai le Atua ia te a’u, na ia fa’ataugāina ai ma fa’apologa a’u. Sa o’u tatalo, tagi auē ma anapogi peita’i e le’i toe gagana mai fofoga o le Atua. Talitonu mai ia te a’u, ma le faamaoni, e sili atu pe ana faapea e te le’i faalogo muamua o fetalai mai le Atua ia te oe, na i loo lou fiu e toe tau saili ma tau faalogo lona siufofoga ua ‘alo ese ma oe. E lē tuulafoaiina oe e le Atua, I le suafa o Iesu.

O le vaitaimi na lē toe fetalai mai ai le Atua, o se taimi tugā ma faigata lea mo a’u. I lo’u faanoanoa ma le lē mautonu, na o’u fai ai I le Atua, “Le Alii e, ou te faia se feagaiga ma oe: afai e avea a’u ma fa’atigā iā te oe taeao, aveese nei a’u i le asō.” Ona toe amata ai lea ona fetalai mai le Alii ia te a’u. O lea la, a e vaai mai o o’u tautala faapea “Ioe lau Afioga” i le ave taavale po’o le tagata teufale, ua māfua, auā ua uma ona susunu ese ina e le afi le faamaualuga mai iā te a’u.

Afai e finagalo le Atua e fa’aaogā oe i soose auala, po’o fea lavā, na te fa’amamāina muamua oe auā na o i latou e loto mamā e vāai i le Atua i aso mulimuli.

Tatalo

Tamā, afai o i ai se agasala iā te a’u o loo fa’a faigata ona o’u aveese, faamolemole aveese faamalosi e lou mana i le suafa o Iesu. Amene.

OPEN HEAVENS

MATALA LE LAGI MO LE ASO FARAILE 24 NOVEMA 2023

Manatu Autu: Pe a Faamamāina e le Atua 1 (When God Purifies 1)

Tauloto – Malaki 3:3 ‘e nofo o ia, o lē tunu ma faamamā i le ario; na te faamamāina le fanauga a Levi, na te faate‘a ese foi le eleele ia te i latou e pei o le auro ma le ario; latou te avatu ai ia Ieova le taulaga e fai i le amiotonu.’

Faitauga - Tusi Paia: Esekielu 36:24-26

Upu Folafola

A maua se auro, o loo I lona tulaga eleelea. E leai se matagofie o iai aua e palapala ma filogia I isi ma’ataua. O le auro e manaomia le faamamaina I le afi ona faatoa aoga lea pe a maua lona iila ma le matagofie o le auro maoi. Fai mai le faitauga o le Tusi Paia o le aso na aumaia oe e le Atua mai le palapalā ma e tatau ona ui I le tulaga e faamamaina ai. O lou tulaga na iai I le taimi na faatoa lua feiloai ai ma Keriso e eleelea. E le mafai e le Atua ona tuua oe I lena tulaga aua faatoa mafai ona e aoga I le galuega pe afai e faamamāina oe. Afai e fia faamamaina oe, e tatau ona e feiloai ma le afi. E lua ituaiga afi e faaaogaina e le Atua e faamamaina ai le tagata. O le afi muamua o Agaga Paia. 

O Peteru o se tasi o tagata muamua na valaauina e lo tatou Alii o Iesu Keriso I le Mareko 3:13-19, ae iai si ona faafitauli laitiiti, e tumu I le fefe ma ua iloa e le tiapolo lenei vaivaiga. O le mafuaaga lea I le aso na ave ai Iesu e fitafita, na aumai e le tiapolo ni tagata se toatolu e lu’I ai Peteru aua ua ia iloa lelei e fefe e faailoa lona so’otaga ia Iesu. E moni e faatolu ona faafiti Peteru ia Iesu. Na fiafia le tiapolo aua ua ia manumalo ia Peteru, ae faafetai na tatalo Iesu mo ia, ua ia salamo ma toe maua lona ala e toe foi ai I le Atua. Ae lei faaaogaina Peteru ma aoga mo le Atua, na manaomia e Iesu ona faia se galuega I le fefe o lo’o faaleagaina lona loto, o lea na ia faamamāina ai I le afi. I le aso Penetekoso, ina ua paū le afi I luga o le au soo, sa faamamāina I latou e Iesu ina ia aoga I le galuega. Na paū malosi le afi I luga o Peteru, ua faamūina le fefe sa ia te ia (Galuega 2:1-47). O le tamaloa sa tumu I le fefe ua faafuaseia ona maua le loto toa. O le vaivaiga ua aveesea e le afi o Agaga Paia. 

O le papatisoga o Agaga Paia o le afi e faamamāina ai ma aveesea so’o se mea eleelea mai le olaga o se tagata faatuatua. Afai e papatiso moni oe pe a maea ona vavaeeseina mo le Atua, e mafai e le afi ona faamūina so’o se mea o lo’o faaleagaina oe. Maitau mai, afai e tautala se tagata I gagana eseese, ae lei lafoai ma le atoatoa lona ola ia Keriso, ma o lo’o naunau pea lona loto I mea o le lalolagi, e lē mafai ona faamamāina. E manaomia le vavaeeseina muamua ona faatoa moni lea o le faamamāina I le afi o Agaga Paia. 

Tatalo, 

Tama, faamolemole faamamā mai ia te a’u I le afi o oe Agaga Paia, I le suafa o Iesu, Amene.  

OPEN HEAVENS

MATALA LE LAGI MO LE ASO TOFI 23 NOVEMA 2023

Manatu Autu: Faatamaia le vaivaiga lena 2 (Kill that weakness 2)

Tauloto – Eperu 12:1 ‘O lenei, o i tatou foi, o loo ua vagavagaia e le faapotopotoga o e matamata mai e faapea ona toatele, ina tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu o i o tatou luma,.’

Faitauga - Tusi Paia: Numera 20:7-12

Upu Folafola

Ou te fia talanoa ma faamatala manino le mataupu na talanoaina ananafi I le tala ia Mose. O lo’o faamatala I le Numera 12:3 o Mose o se tagata e sili ona agamalu i le lalolagi, peitai e iai lona vaivaiga o le loto ita. Na iloa e le tiapolo vaivaiga lenei i le Esoto 2:11-12. Na vaai Mose o faaoolina se tagata Aikupito I se tagata Isaraelu, ona ua lē mafai ona pulea lona ita, na ia fasiotia le Aikupito. I le tele o tausaga na mulimuli ane, a’o taitaia e Mose le fanauga a Isaraelu i le Nuu o le Folafolaga, na faaosoosoina Mose e le tiapolo ona o ona vaivaiga nei. 

I le tusi a Esoto 14:15, o lo’o faailoa ai, le faitio ma le tomumu o le fanauga a Isaraelu I le mau mea, o le tiapolo lea o lo’o ia faaosooso ia Mose ina ia oso lona ita, peitai na ia alofia ma manumalo. I le Esoto 17:1-7 ina ua leai se vaiinu, na latou liliu atu ia Mose, ma faitio, ona fai mai lea o Mose iai latou: ‘Aisea ua outou taufaifai mai ai ia te au?’ O le tali a le tiapolo “Ua taunu’u le ta muamua, ua amata ona ano mai i le ta”. I le Esoto 32:15-20, ua alu ae Mose e aumai Tulafono e 10 mai le Atua, e fo’i mai I lalo Mose, ua tapuai le fanauga a Isaraelu i se tupua. Ina ua sau Mose ma ia iloa atu le latou tapuaiga ma ifo i tupua, na tupu ai lona ita tele, ua ia tago I papa ma’a e 2 o loo tusia ai tulafono mai le Atua ma togi I lalo ma ua nutililii. O le taimi lena, na iloa ai e le tiapolo ua tau tonu ana tu’I ia Mose.

I le Numera 11:10-15 , ina ua toe faitio le fanauga a Isaraelu ona ua fia aai I aano o manu fasi, sa liliu atu Mose i le Atua ma faapea atu, “Le Atua e, aisea ua e faia ai lenei mea ia te au? O a’u ea o le tamā o nei tagata?” Fai mai le tiapolo “Lelei, o lena ua ia faasaga tau atu I Lē o lo’o lagolagoina ia”. E o’o atu i le Numera 20:2-13, ua toe muimui  foi le nuu ua galala I le fiafeinu. Na poloai le Atua ia Mose, e tautala atu i le papa ona puna mai ai lea o le vai. Peitai, talu ai le toatama’I tele o Mose, na ia ta faalua ai le papa. Na fetalai atu le Atua ia te ia e tautala i le papa, ae na ia filifili e ta. O le lē usiusitaia lea tulaga. I le taimi lava lea, na fetalai ai le Atua Silisiliese, "Mose, e te le o’o atu i le Nuu o le Folafolaga." O Mose o se tagata agamalu a’o le vaivaiga e tasi na faaleaga ai, o le loto ita na toilalo ai I le maea o le fasefulu tausaga o lana galuega. Le au pele e, aveese lena vaivaiga i lou olaga, ae e te le’I fano ai, I le suafa o Iesu, Amene.

OPEN HEAVENS

MATALA LE LAGI MO LE ASO LULU 22 NOVEMA 2023

Manatu Autu: Fasioti le vaivaiga lena 1 (Kill that weakness 1)

Tauloto – Efeso 4:27 ‘Aua foi ne‘i tuuina atu e outou se mea e mautu ai le tiapolo.’

Faitauga - Tusi Paia: Eperu 2:1-8

Upu Folafola

Afai e te fia fusu I se siamupini, o le mea muamua e te fia iloa pe na manu’a muamua. Afai sa manu’a muamua, e te tu’ia lava le itu lena ina ia e manumalo ai. Afai e taumafai le tiapolo e faatoilalo se siamupini, e tilotilo muamua I lona vaivaiga tele o lo’o iai ma e taulai lava iai ana osofaiga seia o’o ina toilalo. O le mafuaaga lea e le tatau ai ona e faatagaina se vaivaiga I lou olaga, aua o le a faaaoga malosi e le tiapolo. E tatau ona e faaumatia le vaivaiga ae lei faaumatia ai oe. 

Sa iai se tulimanu na ia tapeina se manu o le leopati (leopard). Na ia vaai atu lea I le pepe leopati ma ia ave I le fale aua e foliga mai e le afaina. Na amata ona tupu lenei manu ma ua taaalo ma tamaiti o le nuu e oo I le atalii o le tulimanu ua mafana le la mafutaga. I Tausaga mulimuli ane, a’o tietie le atalii I le tua o le manu ma agai atu I le vai. Na pau I lalo le tamaitiiti ma ua lavea ma afaina lona vae, ua tafe mai le toto. Ua avea le manogi o le toto ua liua ai le manu ma ua ia aia le tamaitiiti. 

Le au pele e, afai e te le faisotia le tamai leopati lena I lou olaga, e te ono afaina ai ma fasiotia oe.  O le tamai vaega lena e ono faaleagaina oe, o le loto ita, o le tuinanau o le tino e mafai ona fasiotia oe pe afai e te le fasiotia loa. 

15 Ina outou pupue ia mā tatou o alope, o alope iti, o e faamāumau i vine; auā ua fua o tatou vine. Pese a Solomona 2:15

E le afaina po’o le a le lelei o ou uiga, po’o le a foi lou malosi I le itu faaleagaga, afai e iai se vaivaiga e tasi, e mafai ona faaumatia oe. O sina otaota e faaleaga atoa ai se mea mama. Fai mai le Eperu 12:1 ia tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu o i o tatou luma. O le taufetuliga o se marafoni e umi. I ni marafoni, o lou tauaveina o se avega tusa pe itiiti e te ono pau ai. O le taimi lava e vaai atu ai le tiapolo o loo e feaveai solo lena vaivaiga, ua ia iloa le vaega e faatoilalo ai oe I se taimi. Aua e te tuua iai se avanoa, faaumatia le vaivaiga ia faavavevave. O sina vaivaiga lava o loo i lou olaga e ono taofia oe mai le maua o le lagi. Faaumatia loa lena vaivaiga, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 21 NOVEMA 2023

Manatu Autu: O le loto mamā  (A pure heart)

Tauloto – Isaia 1:18 ‘O lo‘o o fa‘apea mai le ALI‘I: Ō mai ia, ‘inā tatou filifili ia, e ui lava ‘ina pei o ‘ofu mūmū a ‘outou agasala, e sisina ia e pei o le kiona; e ui lava ‘ina mūmū ia e pei o le ‘ie ulaula, e ‘avea e pei o fulufulu mamoe..’

Faitauga - Tusi Paia: Efeso 5:26-27

Upu Folafola

O le fa’amamāina, o lona uiga e leai se faaleagaina. E afua mai foi I le uiga o le fa’amamāina e pei ona talanoaina ananafi. E fefiloi loa ni mea se lua, ua le o toe maua le tulaga mao’i. O fanau uma a le Atua e tatau ona alolofa ia te ia ma loto atoatoa. Afai e ave’esea se vaega o lou loto ae foai atu i se isi mea e ‘ese mai i le Atua, o lena mea ua faaleagaina ma e tatau ona ave’esea loa I le taimi lava lena.

O sina mea ua fa’aleagaina ai, e lamatia ai. Sa ou faia se fa’ataitaiga i le tele o Tausaga talu ai I sa’u tusi e ta’ua: “Pei o le Moli Malamalama”, afai e iai se pakete lapo’a o loo tumu i le vai mama e feinu ai ni tagata se toatele, ae tei ua paū iai se otaota mai se napekini o se pepe, tusa pe itiiti, faamata e feinu ai pea i latou? O lenei pakete vai lapo’a ua fa’aleagaina i le taimi lava na pau iai le otaota mai le pepe, tusa lava po o le a le itiiti. Ua le toe mama le vai ma e le mafai e seisi ona toe inu mai ai. 

I le Ioane 14:30 sa o’o mai le ti’apolo, su’esu’e Iesu Keriso mai lona tumua’i i lona i’u, ma iloa ai le mamā atoatoa; e aunoa ma le fa’aleagaina. O le tautinoga foi lea ou te naunau iai; afai e o’o mai le ti’apolo ma suesueina a’u, e mafai ona ou faapea iai: “E le i maua e le ti’apolo se tulaga ua fa’aleagaina ai a’u.” Ae a oe? 

I le 1 Timoteo 5: 22 na fautuaina e Paulo ia Timoteo: 

Aua ‘e te vave fa‘ae‘e atu lima i se tasi; ‘aua fo‘i le ‘au fa‘atasi i agasala a isi tagata. ‘Ia tāofi oe ‘iā te oe ‘ina ‘ia sao lau amio.

‘Aua nei fa’aleagaina oe i agasala a isi tagata; ia tumau I le fa’amamaina. E mafai ona fa’aleagaina oe i agasala a isi tagata pe afai e te ‘auai ai. O se fa’ataitaiga, so’o se tagata e fiafia i ata leaga, ua auai atu I agasala a isi tagata. Afai e te faia se mea sese fa’atasi ma isi tagata, ona pepelo lea o se tasi o I latou e ufiufi ai, ae e te faapea mai e le o oe na faia le pepelo, o loo e auai i le agasala faatasi ma isi ma ua faaleagaina ai oe. O lo’o fautua mai le Fa’ata’oto 1:10 Lo‘u atali‘i e, ‘āfai e fa‘a‘ole‘ole ‘iā te oe tagata agasala, ‘aua ne‘i e usiusita‘i i ai;” Afai e tauanau oe e tagata agasala e te ‘auai atu I latou agasala, sola ese! E iai le fa’apotopotoga e ta’ua o le “Faapotopotoga o e ua oti” (Faataoto 21:16.) A fai e maua ai oe i le fa’apotopotoga lea, o lona uiga ua tutusa lava oe ma i latou. Tumau i le fa’amamāina, ‘alo ‘ese ma mea e fa’aleagaina ai oe, I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 20 NOVEMA 2023

Manatu Autu: Aua le faalotolotolua  (Don’t be double minded)

Tauloto – Iakopo 1:8 ‘O le tagata fa‘alotolotolua e fa‘alētumau ia i ona ala uma.’

Faitauga - Tusi Paia: Isaia 29:13-16

Upu Folafola

O le tagata faalotolotolua o se tagata e fesuisuia’I ona manatu mai lea tulaga I le isi. E mafai ona e faia se faamatalaga nei ae suia a taeao. O se tagata faalotolotolua o le faailoga lea o se loto lē mama e tusa ma le Iakopo 4:8‘Ia ‘outou fa‘alatalata atu i le Atua, ‘ona fa‘alatalata mai lea o ia ‘iā te ‘outou. Tagata agasala e, ‘inā fafano ia o ‘outou lima, o ‘outou e fa‘alotolotolua e, ‘inā fa‘amamā ia o ‘outou loto

Fai mai le Mataio 5:8 na o I latou e loto mamā e mafai ona iloa atu le Atua, o lona uiga o tagata faalotolotolua e le maua le lagi. O le mamā, o lona uiga e tatau ona e tu I le itu e tasi. A talanoa tagata I se ituaiga ie maoi, o lona uiga e tasi lava le ituaiga ie o loo gaosia ai. O lona uiga, o le mamā e atagia ai le tasi o le mafaufau ma le faamoemoega. O se tasi o mafuaaga ou te fiafia ai I taifau e faigofie ona e iloa atu po’o ita po’o fiafia. E le mafai ona faafoliga. Peitai o le tagata, e mafai ona ataata mai ia te oe ae o lo’o latou tau pulepule le fasiotia o oe. 

O le mamā o lona uiga e leai se faafoliga (Iakopo 5:12). O le tulaga lea o lou ioe, o lona uiga o le ioe ma faapena foi I le leai. Afai e te tulai mo se mataupu, ia e tulai ai I le mataupu e tasi seia maea. I le Luka 9:59-62, na faamanino lelei e Iesu Keriso le mataupu lenei, o le taimi lava e tuu ai lou lima I le suo tosina, e le tatau ona e toe tepa I tua. I le Luka 16:13 na ia faaalia mai I seisi auala le feau e tasi: E lē mafai se ‘au‘auna ‘ona ‘au‘auna i ali‘i e to‘alua; auā e ‘ino‘ino o ia i le tasi, ‘ae alofa atu i le tasi; a lē o lea, e fa‘apipi‘i atu o ia i le tasi, ‘ae fa‘alēaogā i le tasi. Tou te lē mafaia ‘ona ‘au‘auna i le Atua ‘atoa ma le ‘oa.”  Afai o lo’o e auauna I se matai I le asō ae ese le matai e te auauna iai a taeao, o le faalotolotolua lena. Filifili nei le matai e te auauna iai ma e tu ai seia o’o I le I’uga. Afai e te fia auauna I le Atua, o lona uiga aua e te auauna I le tupe, pe asiasi nanā i se taulaitu fai vai, auauna I le Atua ma ia na o ia lava. 

A'o a’u, ou te auauna I lo’u Alii o Iesu Keriso ma ou savali tau lava o ia seia o’o I le iuga. Ou te toe ta’u atu ia te outou le ‘auuso, o so’o se mea e lē mafai ona faia e le Atua mo oe, e lē mafai ona faia e seisi lava tagata. O le toatele o tatou, ua tatou lē maua le atoatoa o faamanuiaga mai le Atua ona o le faalotolotolua. Fai mai le Iakopo 1:6-8, o le tagata faalotolotolua e lē tatau ona manatu e na te maua se mea mai le Atua. Aua e te faalotolotolua. Saili I lou loto pe o iai le faalotolotolua, afai o lo’o iai, vave ona salamo ma valaau I le alofa tunoa o le Atua, I le suafa o Iesu, Amene.  

OPEN HEAVENS

MATALA LE LAGI MO LE ASO SA 19 NOVEMA 2023

Manatu Autu: Laei Mamalu  (Dress Decently)

Tauloto – 1 Timoteo 2:9 ‘Ia fa‘apea fo‘i fafine, ‘ia latou teuteu ‘iā i latou i ‘ofu e onomea, ma ‘ia lē teu anoa‘i, a ‘ia fa‘amatuāfafine ‘aua ne‘i teteu ma le lauulu fili, po o auro, po o penina, po o ‘ofu tau tele..’

Faitauga - Tusi Paia: 1 Peteru 3:1-5

Upu Folafola

E i ai se fuaitau masani faapea; “fai ou laei fa’atatau i le tulaga mamalu e te mana’o e amanaia ai oe.” O lona uiga o ou laei ma ou foliga e ta’u maia oe. I aso la, e iloa le tagata e leaga le ulu, I le paū, ma le lē tausia lelei o ona foliga vaaia. Peita’i aso nei , ua ta’u o tu ma aga fou. E taufa’asesē lea upu. E faigofie ona faapea mai, o le mea o loo i totonu, ua faaalia mai i fafo.

O a ituaiga tagata e te vaai o oofu i ofu masaesae i aso nei? O nisi tagata ua fetagofi lava latou ta ‘oti fa’a masaesae o latou ofu ma faaigoa o ofuvae leaga. Ua manino mai la lau silasila I tagata ua faaosofia ai i latou? Aisea ua e fa’ata’ita’i ai i tagata e lē atoatoa le malosi o le mafaufau? O loo i ai le popole ma le atuatuvale? Mo oe le mātua, aisea e faataga ai lau fanau e oofu i lavalava e ta’u atu ai o i latou o tagata o le lalolagi, e lē o ni tagata o le Atua? Ua manino o nisi matua e lē maualuga la latou silasila ma le faamuamua I le Atua. E lē afaina pe tiga le finagalo o Iesu, na i lo  le a’oa’i o a latou fanau I le mea e tatau ona fai. E i ai se teine sa sau i se tasi aso ma ni lavalava lē talafeagai; sa o’u fesili i ai poo fea na i ai ona matua ina ua ia tuua lona aiga. Na tali le teine o lo’o i le fale, ma o lona tinā na fa’ataua lona ofu. Sa ou toe fai atu ‘E faafefea ona e fealua’i i le taulaga ma na ofu faapenā? E te lē iloa ea fai mai ou lavalava o lena e te avanoa i se tau taugofie?’ Na fa’ateia a’u ile fa’afetai mai o le afafine ma fai mai, e masalo pea lona loto i aso uma e lē faapelepele ona mātua iā te ia. Matua, a’oa’o lau fanau e oofu i ofu e viia ai le Atua.

O nisi tamaloloa, latou te faataga a latou avā e oofu pei ni fafine talitane. E faigata tele ona o’u malamalama i lea tulaga. E lē mafai ona e ulufale fua i se meatotino a se isi tagata seiloga e valaaulia oe, auā a e alu e leai se fa’atagaga ua e solitulafono. O le avā e lē fa’ataua; o se oloa tāua a lana tane, peitai e i ai pea isi avā, e laei fa’a fafine taugofie, e peiseai o lo’o tau su’e sona toalua. Aisea e fai ai faapea lavalava o fafine, e iloa ai fua e le lalolagi lona tino? O le a faapea mai nisi fafine, o latou e manana’o e aulelei’. O oe o se meatotino faitele? Na o lou toalua e tatau ona e fa’a’aulelei i ai, pau lea. O le faafitauli, o le faatamala o nisi o tamaloloa; faapea latou o le fa’aaliali o tino o o latou ta’ito’alua i nofoaga faitele, toetoe a lē oofu (tulou), o tu ma aga o aso nei. Ia laveaiina e le Atua lenei augātupulaga mai manatu e fano ai i le suafa o Iesu. Afai o oe o se atali’i poo se afafine o le Tupu o Tupu, faailoa I le faiga o ou lavalava. I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 18 NOVEMA 2023

Manatu Autu: Iloa I o latou fua (By their fruits).

Tauloto – Mataio 7:16 ‘Tou te iloa i latou i o latou fua. Pe tau mai ‘ea e tagata se fuifui vine mai le la‘au tuitui, po o mati mai le la‘au talatala?..’

Faitauga - Tusi Paia: Mataio 7:16-23

Upu Folafola

O ananafi, na tatou talanoa ai i le mea moni e faapea a e loto mamā e fa’aalia mai i fafo. O le tulaga e i ai lou loto, mamā pe palapalā, e lē mafai ona nātia e fa’aalia mai lava. Fa’ata’ita’iga afai e vaai tagata e te ofu faapei o se fafine talitane po’o se tagata amioleaga, latou te iloa ai fo’i lou loto. E toatele tagata e fai mai o i latou o fanau a le Atua peita’i e oofu, laei ma tautatala faapei o tagata o le lalolagi (1 Ioane 2:15). A e ta’ua oe lava o le malamalama ae amioleaga ma gaioi pei o le pouliuli, e iloa ai iina e sesē, e lē o oe o se malamalama (2Korinito 6:14 ).

Fai mai 2 Korinito 5:17 “O lenei, afai o iā Keriso se tasi, o le tagata fou ia, ua mavae le ola tuai, fa’auta, ua o’o mai le ola fou.”

E amata mai totonu, e o’o mai i fafo, e fa’afouina mea uma pe a maua e le tagata Keriso. E fou mea uma e aofia ai ma le faiga o ou la’ei ma lau tautala. A tupu mai totonu suiga, e fou so’o se vaega uma o lou soifuaga, i au amio, manatu ma lagona auā ua faafouina lou tagata I totonu. A e vaai i se Saina ma se tagata Aferika, e te iloa lelei lo la eseesega i o la foliga, gagana ma meaai. E lē tau ta’ua mai e se isi ia te oe; e te iloa i fua vaaia. A vaai tagata iā te oe, e mafai ona o latou vaaia uiga o Keriso ia te oe? Pe a o latou fia iloaina poo oe o se Kerisiano pe leai? Siaki lelei nei loa poo oe moni o se kerisiano.

O le manatu o nisi o faifeau, e tatau ona amio faatasi, ma faatutusa a latou teuga ma le tupulaga ina ia liliu ai o latou olaga ia Keriso, e lē sa’o lea manatu. E mana’omia e tupulaga talavou se isi e pulea lelei lona olaga e lu’iina ma fa’amalosia i latou. E manana’o e fa’aali mai le taugā osoosoga o lo latou malosi fa’a talavou, ma le manatu e fa’asa’o latou e lo latou faifeau ma faasino i latou i le mea e tatau ona fai. Pagā lea o tagata o loo o latou tilotilo i ai mo se a’oa’iga lea ua omai i lalo i le tulaga o loo i ai latou, ua tutusa uma a latou amioga, lavalava ma faiga. A e maitaua uiga o tupulaga lē taupulea e fa’aali I talavou amio lelei ma a’oa’oina, e te iloa ai iina latou te amanaia le a’oa’iga ma le amio pūlea. Aisea e te mana’o ai e fa’ata’ita’i i le ‘au amio lē mafaufau ma lē taupulea? Ua tatau ona sui. Ia iloa uma e au uō ma ou aiga, o lo’o iai Keriso ia te oe, o le so’o moni o Keriso. I le suafa o Iesu. Amene.