Samoan Devotional

 OPEN HEAVENS

MATALA LE LAGI MO LE ASO SA 17 TESEMA 2023

Manatu Autu: Taofi mau (Hold fast)

Tauloto – Iopu 27:6 “Ou te taofimauina la‘u amiotonu, ou te le tuua lava; e le faaleagaina a‘u i lo‘u loto i o‘u aso uma”.

Faitauga - Tusi Paia: Faaaliga 3:10-13

Upu Folafola

E tele mea e nonofo ai i le maota o lo’u Tamā; ana leai, po ua o’u fai atu iā te outou, ou te alu e sauni se mea e nonofo ai outou. Ioane 14:2

O loo saunia e le Atua se nofoaga mo oe. Peita’i afai o e faia pea le agasala ma manatu e leai se afaina, faamalie atu e leai sou nofoaga i le lagi. O le nofoaga o loo saunia e le Atua i le lagi e mō i latou o loo ola faapaiaina ma e aunoa ma se ila, pona poo se ma’anuminumi. Na o i latou fo’i ia e toe afio mai Iesu e aveina a’e, auā e tuuina atu i latou ia te ia lava, o le ekalesia matagofie lava e leai sona ila po o se ma’anuminumi (Efeso 5:27).

E mālie pe a tatou mafaufau, atonu o loo tāpena e Iesu se fale matagofie ma tusi ai le igoa o se tasi i luga, peita’i e ono i’u ane ua lē nofo ai lea uso a ua ese le tagata e nofo ai i lea fale. O le ala lenā o le fai mai o Faaaliga 3:11, “ Faauta ou te vave alu atu; ia e taofi mau i le mea ua iā te oe, ne’i avea e se tasi lou pale.”

I aso a’o avea o se solitulafono i nisi o atunuu lou talitonu iā Iesu Keriso, na saisaitia e ni fitafita ni Kerisiano talavou se to’alima. I le taugā ma’ati’ati o le tau malulū, ae aveese e fitafita lavalava o nei taulelea (tulou) ma tutuli i latou i totonu o se vaitūloto ‘aisā. Na fai le afi a fitafita e fa’amafanafana ai ae fai i nei taulelea, “Pau le ala tou te faia e toe fai ai tou lavalava ma omai i le afi e fa’amāfanafana ai, o lo outou faafitia o Iesu Keriso.” E le’i umi ae amata malō tino o taulelea I le vai. Ina ua toetoe a feoti i latou, na si’i i luga le lima o le tasi o i latou ma fai atu i fitafita, ua ia faafitia Iesu. Na fai atu fitafita i le uso lea e alu ese mai le vai, ma sau i le afi. A’o aga’i atu le uso I le afi, na faapupulaina e le Atua mata o se tasi o fitafita ma ia iloa ai ni agelu se to’alima e tofu ma le pale i o latou lima, o loo faatali I le taimi e to ai manava a taulelea nei, e faapale ia i latou ma fa’aulufale atu i le lagi. A’o alu ese mai le vai le uso ua faafiti iā Iesu, na toe liliu ese lana agelu ma lona pale. Na tagi le fitafita ma valaau atu, “Agelu faatali mai mo a’u, ou te mana’o i le pale.” Na to ese e le fitafita ona ofu, oso i totonu o le vai ma maliliu faatasi ma taulelea e to’afā ma ia maua ai le pale o le uso na fulitua.

E lē o le amataga o se tū’uga e tāua, a’o le mea taulia pe e te taunuu i le tini. 

Tatalo

Tama, poo le a lava le tau e manaomina ou te totogiina ae aua nei ou le maua lo’u pale o le ola, aua nei ou misia le lagi, I le suafa o Iesu. Amene

OPEN HEAVENS

MATALA LE LAGI MO LE ASO TOONAI 16 TESEMA 2023

Manatu Autu: Ioane le pele (John the beloved)

Tauloto – Ioane 13:23 “Ua taoto ane foi i le fatafata o Iesu le tasi o ona soo, o le ua alofaina e Iesu...”

Faitauga - Tusi Paia: Ioane 13:21-28

Upu Folafola

I le fa’alautelega o la’u suesuega pe faafefea ona avea ma tagata e pele i le Atua, ua o’u maua ai sa i ai le isi so’o na mulimuli tu’i iā Iesu i le aso na fa’asatauroina ai o ia. O le so’o lenei na fesoasoani fo’i e ave Peteru i totonu o le fale e pei ona tatou iloa i le Ioane 18:15-16. O le isi so’o lenei, o Ioane lē ua alofaina e pei ona ia faaigoa ia te ia lava “o le isi so’o” I totonu o lana molimau o le talalelei. (Evagelia na tusia e Ioane).

E masani ona o’u faapea, a e fa’amatalaina se tagata o se kerisiano malosi, iloga, o lona uiga e sili atu lona alofa i le Atua na i lo’o oe. I le Ioane 20:2-8 fai mai le Tusi Paia ina ua fa’alogo le ‘au so’o ua toetū Iesu, o Ioane le so’o na muamua I le tuugamau. I le Ioane 13:21-26 ina ua fia iloa e le ‘auso’o po’o ai ua fetalai le Alii o le a fa’alataina ia, ona genogeno lea o Peteru iā Ioane e fesili ia Iesu poo ai ua fetalai i ai, auā ua iloa e Peteru o Ioane le so’o ua sili ona latalata iā Iesu. E to’a sefulu tolu tagata sa faafesaga’i i luga o le laulau, ae talanoa le toalua i se gagana na o i laua e malamalama ai. Sa taoto le ulu o Ioane i le fatafata o Iesu, auā sa mafana ma vavalalata le la mafutaga. (Ioane 13:23).

I la tatou Tusi Paia faitau o le asō, ua tatou iloa ai, na o Ioane sa mafai ona faailoa i ai e Iesu lē o le a fa’alataina ia. Na faatuatuaina e Iesu Ioane e ta’u i ai mealilo i lona finagalo. A mafai ona talitonuina oe e Iesu e faailoa i ai mealilo i lona finagalo na te lē faailoā i nisi, o lona uiga ua avea oe o se tasi e sili ona latalata iā te ia. Na avea e Iesu Ioane ma ana auauna faamoemoeina e faailoa i ai mealilo. O le ala lea, ua tatou iloa ai i le Fa’aaliga 1:1-20, o Ioane le ua alofaina na tofia e Iesu e fai ma ana ave feau, e faailoa lona finagalo ma mea o le a tutupu i aso o le i’uga, i le afe ma afe o tausaga muamua a’i. I le Fa’aaliga 10:4 e i ai mea na faailoa e Iesu ia Ioane e mo ia lava, na o ia.

A e alofa moni i le Atua e te gaua’i ma ‘au gofie e saili ma fa’ataunuu le fa’atumutumuga o lona finagalo, o le manumalōina o agaga mo lona mālō. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 15 TESEMA 2023

Manatu Autu: Peteru o le papa (Peter the Rock)

Tauloto – Mataio 16:18 “Ou te fai atu nei a‘u ia te oe, O Peteru oe, ou te ati ae foi la‘u ekalesia i luga o lenei papa, e le mafaia foi e faitotoa o seoli ona manumalo i ai.”.

Faitauga - Tusi Paia: Ioane 21:15-17

Upu Folafola

I la’u suesuega po’o le a le auala e mafai ona avea ma tagata e pele ma alofaina e le Atua, na ou vaaia I le Luka 5:1-11, ina ua maea ona faia e Iesu le vavega I se ‘aui’a tele na maua e Peteru a’o fagota, na lafoai e Peteru mea uma ae mulimuli ia Iesu. E lei alu e tau faatau i’a mai le fagota I lena aso. Peitai sa latou lafoai uma foi e le au soo mea uma ae mulimuli ia Iesu (Mataio 19:27), o lona uiga e iai seisi mea e sili atu e faatatau ia Peteru. Na ou vaai I se vaega o le tusitusiga I le Mareko 14:54 ina ua saisaitia Iesu, fai mai, na sosola ese uma le au soo. Fai mai le Tusi Paia ae na mulimuli pea Peteru I le Alii. Ou te iloa na mulimuli mamao ane, peitai o le la na mulimuli. Ao fea uma le isi o le vaega o le au soo? 

Na mulimuli Peteru ia Iesu I taimi uma aua foi sa iai se maea na fesootai atu ai o ia I le Alii, o le maea o le alofa. O le alofa o Peteru ia Iesu e pei o se maneta e taitaia o ia e latalata I le Alii I aso uma. Ina ua iloa atu e Peteru le Alii ina ua mae’a ona toetu mai, na ia oso I le sami ma alu atu e feiloai ma ia. Na ia lafoai le ‘aui’a tele na maua mai I le fagota. O loo manino mai e matua naunau Peteu e na te iloa le Alii, ae le faapea ona o ni mea e maua mai ai. O I latou e avea ma pele a le Atua e aofia ai tagata e latou te le o mulimuli ona ia maua mai ai ni mea, ae o I latou e naunau e fia iloa ma masani ia te ia. E latou te alolofa I le Atua tusa pe maua mai ai se mea pe leai. O le ituaiga alofa lena na filifilia ai e le Atua Peteru e avea ma ana so’oupu.

I le Galuega 2:14-40, I le aso Pentekoso, o ai na lauga? O Peteru. I le Galuega 3:1-6 I le faitotoa o le sunako, o ai na talanoa I le tagata pipili? Ina ua finagalo le Atua e aveesea faamalosi o Anania ma Safira, o I latou e faafoliga I totonu o le lotu. Na faaaoga e le Alii Peteru. E le avea oe o se pele a le Atua pe afai e vaai atu o lou manava e avea ma atua ia te oe ae le o ia (Filipi 3:19). O nisi tagata e naunau e faatonu le tiapolo, ae e ata ma aamu iai le tiapolo aua ua ia iloa lelei e fiafia I mea o le lalolagi, ma o loo ia pule ai. E te alofa ea I le Atua e aunoa ma le tilotilo I mea e na te foai mai? I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 14 TESEMA 2023

Manatu Autu: E iai tagata e alofaina e le Atua (God has favourites)

Tauloto – Roma 9:13 “Ua ou alofa ia Iakopo, a ua ou ‘ino‘ino ia Esau”.

Faitauga - Tusi Paia: Roma 9:10-16

Upu Folafola

A tatou vaavaai i Aposetolo a le Alii, e toa sefululua (12), ae e toatolu (3) na i totonu o le li'o o aposetolo na faapitoa I ai le alofa o le Alii, ae sa i ai foi se tasi o I latou nei e toatolu, sa ta'ua e le Alii o ‘Le pele’. O le toatolu (3) ia na faasilisili ona alofa i ai Iesu Keriso ma sa ia aveina i latou i so’o se mea lana na afio i ai o Ia. Ina ua afio atu o ia i le fale o Iairo, sa faapea, sa i ai uma so’o e toa sefululua (12), ae na o le toatolu (3) na ia aveina i totonu o le potu (Mareko 5:35-42). Na vaai Peteru, Iakopo ma Ioane faaaliga uma o le mana o le Alii, ma latou vaai foi I lona faatuina o le teineitiiti mai le oti, ae o isi o ona soo, na o le faalogo lava i ai. Na faaali foi e Iesu le so’o o le a faalataina o ia, ona faapea na fesili I ai Ioane, o le so’o na faapito lona alofa i ai. (Ioane 13:23-26). O le fesili, aisea na faia ai e le Alii se li'o faapitoa o ona so’o na faapito I ai lona alofa, ma aisea foi, na ia alofa faapitoa ai i se tasi o i latou nei? O le tali faigofie lava e faapea, e i ai e e faapito le alofa o le Alii ia tei latou.

E to'atele tagata ua faapea mai, e lē o iai ni tagata e faapito I ai le alofa o le Atua. E le moni lena faamatalaga. O le fesili e tatau ona e fesili atu ai, "E faapefea ona avea a’u ma se tasi o tagata e sili ona alofa I ai le Alii?” O le tusi a Roma 9:11-16, o loo faitauina e faapea, sa maitaga se fafine i se masaga. Ae e e le’i fananau mai lenei masaga, na fetalai atu le Alii, e auauna le ulumatua i le laitiiti; na faaalia lona  alofa i le tasi ae faatuatuanai I le isi. Sa fetalai foi le ALII, i lona alofa mutimutivale I e, e matata’u ia te ia, e silisili foi lona alofa I e e alolofa ia te ia. 

Na fetalai foi o ia, ma faapea mai, e le mai ia te Ia sē finagalo e faatu’utu’u ai pe alo ese foi I so’o se  filiga, ae e mai le Atua o lē e alofa mutimutivale ia I tatou.

I le Tusi a Galuega 10:34-35, o loo faapea le faitauina;

34Ona oo atu lea o le lauga a Peteru, ua faapea atu, E moni, ua ou iloa e le faailogaina tagata e le Atua; 35a e peitai o le mata‘u ia te ia i nuu uma lava, ma fai le amiotonu ua talia i latou e ia.

O lo’o manino mai le tusi faitau lenei, o lo’o silasila le Atua I lagona ma amioga a tagata, ma filifili ai i latou e avea ma e e silisili lona alofa i ai. Na ou su’esu’e foi I so’o o le Alii, o Peteru, Iakopo ma Ioane, o e na i totonu o le li'o o so’o na faapito I ai le alofa I lo tatou Alii, aemaise lava so’o o Peteru ma Ioane, ona e le’i leva ona aveina a’e le Alii I le Lagi, ae maliu loa Iakopo. O le a ou faasoa atu ia te outou mea na ou maua ina i le isi lua aso o lumanai.

Tatalo

Tama, afai e te filifilia tau o se toatasi e te alofaina, faamolemole filifili ia te au, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 13 TESEMA 2023

Manatu Autu: Tulaga lamatia o le tautaua (Dangers of fame)

Tauloto – 1 Samuelu 15:30 “Ona fai mai lea o ia, Ua ou agasala, a ou te aioi ia te oe, ia e faamamalu mai ia te au i luma o toeaina o lo‘u nuu, ma luma o Isaraelu, ma ia ta foi ma a‘u, ou te ifo ia Ieova lou Atua.

Faitauga - Tusi Paia: 1 Samuelu 15:24-30

Upu Folafola

O le tautaua o se tasi o tulaga e saili e le toatele e aunoa ma le manatu I le tulaga lamatia e ono o’o iai. O le taimi e te tautaua ai, e tatau ona e matua faaeteete. E tatau ona e mataituina lelei au gaoioiga uma aua o lo’o tilotilo mai le toatele o tagata ia te oe. E iai taimi a ou alu I le sauniga ae faapea ou te nofo I le laulau faapitoa, e masani ona faapea mai la’u ave taavale, ‘nofo oe I le laulau faapitoa ae o le a matou o I seisi laulau e mafai ona matou aai ai’. O I latou o loo nofoia le laulau faapitoa, e ui ina fia taumamafa, e aai lemu ma foliga e le fia aai. Tusa pe latou te fia aai, e na o sina meaai e ai ma le faaeteete aua o loo tilotilo uma atu le motu o tagata. 

Afai e avea oe o se tagata tautaua, ma nofo I le laulau autu I aso uma o lou olaga, talitonu mai ma le faamaoni, e leai se mea e sili atu I le maua o le saolotoga e faia ai so’o se mea e aunoa ma le manatu I se tagata o tilotilo atu. Afai e te tautaua, e le mafai ona e savalivali I fafo pe taalo foi I se nofoaga faitele e pei o tagata uma. 

O se tasi o tulaga lamatia o le tautaua, e ono galo I tagata lautele, o tagata tautaua o ni tagata ola foi. Ou te faafetai I le Atua ou te le saili I le tautaua ma o lea ou te taumafai lava e ola e pei o le toatele o tagata. O loo ou faia pea le masani o le faatau o meaai o loo maua ma faatau I autafa o le auala. Ua tau faigata I nei aso ona o le tele o taavale faafeao, ae ou te faia pea lea masani e aunoa ma so’u manatu po’o ai o tilotilo mai ia te au. Ou te le o saili I le tautaua, ma o manatu o tagata, o le latou lea faitalia. 

Afai e te tautaua, e sili mamao atu mea e manatu tagata e tatau pe mafai ona e faia, pe a faatusa I tagata lautele, ma a le faautagia lelei, e ono iai se faaletonu. Aua e te saili I le tautaua, e ui e matagofie, e aumai ai foi ma le tele o faafitauli. E ono e maua le tautaua a’o faataunuuina lou tofiga ma le vaalauina I le lalolagi nei, ae e le tatau ona avea ma sini autu o lou olaga. 

O I latou e mulimuli I tagata, iloa ma fiafia iai latou I taimi uma, e ono oo atu I faafitauli. I le faitauga o le Tusi Paia o le aso, na o’o le tupu o Saulo I faafitauli ma le Atua ona na ia saili Ie faamamalu I luma o toeaina o le nuu ma le vaaiga a tagata. O le saili o le tautaua e ono e o’o ai ini faafitauli. E pau lava le tagata e tatau ona e saili ia faafiafia, o le Atua, I le suafa o Iesu, Amene.     

OPEN HEAVENS

MATALA LE LAGI MO LE ASO LUA 12 TESEMA 2023

Manatu Autu: E lua ituaiga faaolataga (Two types of salvation)

Tauloto – Roma 9:27 “Ua ‘alaga fo‘i Isaia ‘iā Isaraelu, “E ui lava ‘ina fa‘apei o le oneone i le sami le to‘atele o le fānauga a Isaraelu, e fa‘aolaina ē ‘ua totoe;.”

Faitauga - Tusi Paia: Mataio 22:8-14

Upu Folafola

E manino le fetalaiga a Iesu i le Mataio 7:21, “E lē sao atu i le mālō o le lagi i latou uma o ē fai mai ‘iā te a‘u, ‘Le Ali‘i e, le Ali‘i e;’ na o lē na te faia le finagalo o lo‘u Tamā o i le lagi.” E atagia ai foi, e le o tagata uma e sisiva ma vivii i le Atua i totonu o le falesa e sao i le Lagi. So’o se afafine poo se atalii o le Atua, e taua o se tagata Isaraelu, ae fai mai le tatou tauloto mai le Tusi Paia o le aso, e ui ina to’atele i latou e fanaufouina, ae na o se vaega e totoe o le a fa’aolaina I le aso mulimuli.

E le o perofeta uma, po o faife’au uma, po’o le au fai fa’aevagelia uma e sao i le Lagi. Aua ne’i e manatu o so’o se tagata e fai o ia o le tagata o le Atua, e maua le lagi. Afai e te faalogo I ni tagata o le Atua o lo’o latou faia le amioleaga, aua nei faateia ai oe, o nisi o i latou o lo’o mamao ese ma lē o uia le auala vā apiapi i le Lagi. 

E lua ituaiga fa’aolataga. Muamua, o le fa’aolataga e maua nei lava, o le ituaiga fa’aolataga e maua pe afai e talia e tagata le vala’au mai le pulela’a (Roma 10:13), lona lua, o le fa’aolataga e maualuga atu, o le tagata faaolaina e tumau e o’o lava i le gataaga, e pei ona ta’ua i le tusi o Mataio 10:22. “E ‘inosia fo‘i ‘outou e tagata uma ‘ona o lo‘u igoa; a o lē tumau se‘ia o‘o atu i le gata‘aga, e fa‘aolaina o ia..”

O le tulaga moni i lou tula’i mausali i le taimi nei, o se tulaga maoa’e ona lelei, ae sili atu pe a fai e te tula’i ma tumau e o’o i le gata’aga o faaolaina. E iai nisi tagata e latou te a’oa’o e fa’apea, afai e te fa’aolaina loa, ua e faaolaina e faavavau, o lona uiga e mafai ona e faaolaina ae ola pea e pei o se atalii o le tiapolo, ae e te maua lava le lagi. O se pepelo lena a Satani. E tatau ona e puipuia lou fa’aolataga e pei ona ta’ua i le tusi a Filipi 2:12:

“O lenei, ‘au pele e, fa‘apei ‘ona ‘outou ‘ana‘ana mai e lē aunoa, ‘ia ‘outou galueaina pea lo ‘outou fa‘aolataga i le mata‘u ma le gatete, e lē gata ‘ina o tatou nonofo ma ‘outou ‘ae atili ai pe a ‘ou lē i ai”.

E faia e le ti’apolo mea uma i lona malosi atoa, e na te toe faoa atu ai oe I lana itu! Aua ne’i e manatu, ua tele mea tetele ua e faia mo le Atua, ona mautinoa lea ona e maua lou avanoa i le Lagi. E tatau ona e tulai ma le mausali mo le Atua seia o’o i le iuga, pe a fai e te fia sao i le Lagi, I le suafa o Iesu, Amene.    

OPEN HEAVENS

MATALA LE LAGI MO LE ASO GAFUA 11 TESEMA 2023

Manatu Autu: Fusia lana Upu ma le Atoatoa (Embrace His word completely)

Tauloto – Mataio 15:9 “E tapua‘i fua mai i latou ‘iā te a‘u i lo latou fai ma matā‘upu o poloa‘iga a tagata.’”

Faitauga - Tusi Paia: Mataio 15:7-9

Upu Folafola

E iai taimi pe afai matou te faatasi ma tagata popoto ma tauoloa I Iunivesite e oo I aoaoga o le Tusi Paia, e fiafia e fai mai ia te a’u e tatau ona ‘ou talitonu I so’o se mea o lo’o tusia I le Feagaiga Fou ae e le tatau ona talitonuina le Feagaiga Tuai. Aua foi a latou iloa se vaega o le Feagaiga Tuai e le talafegai ma a latou talitonuga, e naunau e tuu ese. Mo se faataitaiga, o lo’o talanoa le Malaki 3:10 I le totogiina o le sefuluai ae tele ina teena e nei tagata. E latou te teena foi le Faataoto 3:9-10. Ae ou te fesili iai pe a la le Isaia 54:17 o lo’o faapea mai ‘o auupega uma e faia e tau ma oe e le manuia ia’. Ae a le Salamo 23:1 ‘O le Alii o lou leoleo mamoe o ia e leai se mea ou te mativa ai’. Ae faapefea le Teuteronome 28:13 o lo’o faapea mai ‘e avea oe o le ulu ae le o le I’u, e te aupitoaluga lava, a e te le laulalo?’. 

Ou te faamalosi ia te oe o afioga uma a le Atua na tusia e Agaga Paia ma e tatau ona fusia ma faamaopoopo vaega uma. E le gata I afioga paia a le Atua, e iai tagata e faapea mai, ‘e malamalama lava le Atua’. E leai ma se vaega o le Tusi Paia o loo faapea mai e malamalama le Atua pe a fai le agasala, leai, e inoino o ia I le agasala.

Fai mai le Salamo 5:4 Auā o oe, ‘e te lē se Atua e fiafia i le amio leaga; e lē mau fa‘atasi ma oe lē ‘ua fai mea leaga’.

Afai e te ta’ua lou tagata o se kerisiano, ‘alo ese ma le agasala. Fai mai le 2 Timoteo 2:19 ‘Ae ui lava i lea o le fa‘avae mau o le Atua e tu lava lea, o lo‘o i ai lenei fa‘ailoga, “‘Ua silafia e le Ali‘i ona lava tagata;” ‘atoa ma lea, “‘Ia ō ‘ese i le amio leaga i latou uma o ē ta‘uta‘u le suafa o le Ali‘i.” 

Afai e te faaleogalua, e te le maalili, e te le vevela foi, e faamalosia le tulei ese o oe e le Atua, ma afai e tuuesea oe mai le Atua, o lona uiga o lo’o e iai ma le tiapolo. Na fetalai o ia I le Faaaliga 3:16 O lenei, ‘ua e fa‘aleogalua, ‘e te lē ma‘alili, ‘e te lē vevela fo‘i, o le mea lea ‘ou te luai atu ai ‘iā te oe i lo‘u gutu. 

Aua e te faaleogalua. Afai e te  teena le ola faapaiaina I taimi faigata, e le o oe moni o se atalii poo se afafine o le Atua. O lo tatou tulai o ni kerisiano, e le moni pe afai tatou te ola faapaiaina na o ni taimi e talafegai ai ma o tatou olaga, I le suafa o Iesu, Amene.   

OPEN HEAVENS

MATALA LE LAGI MO LE ASO SA 10 TESEMA 2023

Manatu Autu: Talitonu I lana upu (Believe His word)

Tauloto – Numera 23:19 “E le se tagata le Atua e talapepelo ai o ia, po o se atalii o se tagata e salamo ai o ia; ua fetalai mai o ia, na te le faia ea? Ua fetalai mai foi o ia, na te le faataunuuina ea?.

Faitauga - Tusi Paia: 2 Korinito 1:18-20

Upu Folafola

Ua ta’u mai e Isaia 6:1-3 ia i tatou, o le Atua Silisili ese, e ui o ia o le Atua malosi, alofa ma mamalu, peita’i e finagalo e sili atu ona tatou iloa o ia o le Atua e paia. O ia o le Atua Paia ma o le ala lea e lē mafai ai ona pepelo. Fai mai Numera 23:19 e le se tagata le Atua e tala pepelo ai o ia, po o se atali’i o se tagata e salamō ai o ia. Ua ta’u mai e le Salamo 119:89 o le Afioga Paia a le Atua ua mausalī i le lagi e faavavau lava - i se isi fa’aupuga, e mafai ona e faalagolago i le Upu a le Atua. Fai mai Salamo 33:8-9 a fetalai loa le Atua ona i ai lava lea.

Aisea e tatau ai ona tatou talitonu iā Iesu Keriso? Fai mai Ioane 14:6 o Iesu o le ala, Upu moni ma le Ola. Afai e te talitonu i le Atua le Tamā ma le Atua le Alo, ua faigofie fo’i ona e faapea mai e te talitonu i le Atua le Agaga Paia. O le mafuaaga auā fai mai Ioane 15:26 o le Agaga Paia e maliu mai le Atua le Tamā. Fai mai 2 Peteru 1:20-21 o le Tusi Paia na tusia e lima o tagata, o i latou o e na faaosofia e lē Agaga Paia. I se isi faaupuga, o lau Tusi Paia na tusia e lē Agaga Paia, ae fa’aaogā lima o tagata. Talu ai fai mai 1 Ioane 4:6 o le Agaga Paia o le agaga moni, ua faapea mai fo’i o mea uma ua tusia i le Afioga Paia a le Atua o le Upu moni lea.

Vagana ua e talitonu i upu uma ua tusia i le Afioga Paia a le Atua faatoa tāua oe o le tagata ua faaolaina. Fai mai Ioane 1:11-12; “Ua maliu mai o ia i lona lava nu’u, a e le’i talia o ia e ona lava tagata. A o i latou uma e na talia o ia, ma faatuatua i lona suafa, na ia avatu i ai o lea manuia, ia avea i latou ma fanau a le Atua.”

Afai e moni ua e faaolaina ma e talitonu i Afioga Paia uma a le Atua, ua mafai ona e ta’utino ua e malolō auā ua tusia 1 Peteru 2:24 o ona fa’alavalava ua malolo ai tatou. Maitau mai le taimi tuana’i o loo fa’aaogā I le fuaiupu. O lona uiga o lou faamalologa ua mae’a saunia. O loo faatali le Atua iā te oe e te fa’ailoa le ola maloloina fa’ale Atua e ala i lou gaua’i e usiusita’i i lana Upu. E mafai fo’i ona e ta’utino ua fa’a sa’olotoina oe, e ala i lou talitonu. Fai mai Ioane 8:32&36 e ao ona iloa e outou le mea moni, e tu’u saoloto fo’i outou e le Upu moni. O lenei pe a tu’u saoloto outou e le Atali’i ona saoloto fa’amaoni ai lea o outou. E tele naunau faamanuiaga ua saunia mo le au uso o e talitonu. Pau lau vaega e fai o le talitonu i le Atua, faatuatua I lana Upu, o faamanuiaga uma ua ia folafolaina i lana Afioga Paia, e fai ia mā oe. I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 9 TESEMA 2023

Manatu Autu: Aua le popole 2 (Don’t worry 2)

Tauloto – 1 Peteru 5:7 “Ia tuuina atu ia te ia mea uma tou te popole ai, auā o loo manatu mai o ia ia te outou”.

Faitauga - Tusi Paia: Salamo 91:1-9

Upu Folafola

E i ai tagata e lē masino se mea e popole ai. E popole i mea faigofie o le olaga ma o’o atu ai lava i le fefe i mea e lē o iloa. E popole i latou i mea uma ua leai aua fai mai le Faataoto 23:5 o le tamāoaiga e mafai ona fai lava e ia ona apa’au ma lele ese ai. Ua fetalai mai le Atua Silisili ese, “ Aua ne’i popole.” auā o ia o le Atua e ou le malosi uma lava (Kenese 17:1). O lē na foaiina atu mea ua iā te oe i le taimi nei, ma o lo’o ia te ia mea e sili atu ua teuina mo oe. Fai mai Filipi 4:19 e lē tatau ona e popole auā o lou Atua e fa’aatoa e ia iā te outou mea uma e matitiva ai outou, e tusa ma le faula’i olona viiga iā Keriso Iesu. E te iloa le tele o lona mamalu? Fai mai Isaia 6:3 ua tumu le lalolagi uma i lona mamalu. 

E uiga ese le tamāoaiga o le Atua i le mamalu, ma e talu ai ua ia folafola na te foaiina mai o outou manaoga uma e tusa ma le faula’i o lona viiga, o lona uiga e ao ona e iloa e puna pea lana foa’i e lē gata. Fai mai le Faataoto 10:22, “o le fa’amanuia a le Alii, o lea e fa’atamāoaiga a’i; na te le faaopoopo I ai se tiga.” Afai o lou tamāoaiga e aumai i le Atua, e matua’i leai la se mafuaaga tatau e te popole ai; ae a leai, ia e malamalama la, o tupe uma e te maua mai ala palapalā e sau ma ona tigā.

E mafai ona tele au tupe ma toatele au auauna, peita’i a o’o ina e matua ma e vaivai, e te valaau ae leai se isi o i latou e tali mai. O le mea moni, e ta’u e le Tusi Paia le matua o tausaga o aso leaga (Failauga 12:1-3). O nisi tagata e ui o loo si’osi’omia e uo, fanau a fanau, auauna ma mea uma latou te manaomia, ae popole pea. E popole i le mea o le a tupu pe a maliliu, poo fea e o i ai pe o i le lagi poo seoli. Fai mai Tavita i le Salamo 37:25 “Ua o’u toeaina a’u nei, sa a’u taule’ale’a; a ou te le’i iloa se tagata amiotonu ua lafoa’i ina, po o ana fanau ua ‘aiisi i latou.” O Tavita lava lea ua na fa’ailoa mai ia i tatou i le Salamo 34:10, “ Eoge mea leona taanoa ma latou fia aai: ae e leai se mea lelei e matitiva ai i latou o e saili i le Alii.” Na fa’ai’u le Salamo 23 i le faapea mai o Tavita i le fuaiupu e 5 ma le 6, e tasi le mea e te tulimata’i i ai, po o e i le itu a le Alii ma mulimuli iā te oe lona agalelei ma lona alofa i aso uma o lou ola. Afai o ‘au oe ma le Atua, fa’a filemu lou mafaufau, e tausia oe e le Atua, na te lē tu’ulafoa’iina oe. I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 8 TESEMA 2023

Manatu Autu: Aua le popole 1 (Don’t worry 1)

Tauloto – Ioane 14:1 “Aua le atuatuvale o outou loto; ia outou faatuatua i le Atua, ia faatuatua mai foi ia te au”.

Faitauga - Tusi Paia: Mataio 6:25-34

Upu Folafola

I le tauloto mai le Tusi Paia o le aso, o upu nei ‘Aua le atuatuvale o outou loto’ o lona uiga faigofie, ‘aua le popole’. So’o se taimi e faapea mai ai le Tusi Paia ‘aua le popole’, o lona uiga o lo’o iai se mea e ono faatupuina le atuatuvale I loto o tagata. O so’o se taimi e faapea mai ai le Atua ‘aua le fefe’, o lona uiga o lo’o iai se mea taufa’afefe. O lo’o tusia I le Tusi Paia I le Mataio 6:31, e lē tatau ona e popole aua o le tulaga lena e faia e tagata le faatuatua I le Atua. Afai e te faatuatua I le Atua, pe afai e talitonu ma lou loto atoa e alofa le Atua Ia te oe, e lē tatau lava ona e popole I se mea. O le Atua e mafai ona ia fafagaina manu felelei I le vanimonimo, e mafai foi ona ia fafagaina oe. O le Atua na te fa’aofuina lili o le vao, e mafai foi ona ia faaofu ia te oe. Afai e te talitonu ma le faamaoni o ia o lou Tama, e le tatau ona e popole. O le atalii o se milionea, e le taitai popole poo le ā lana meaai o le ai po’o le ofu foi o le a ofu. E le gata o lou Tama o se milionea, o le auro ma le ario uma I le lalolagi atoa, o ia e ana (Hakai 2:8). Ua ia folafola I le Ioane 14:14 o so’o se mea e te ole atu ai I lona suafa, e nate foai ia te oe, o so’o se mea, o lona uiga o so’o se mea. 

E ui o lo’o ia folafola e na te foai mai so’o se mea tatou te ole atu ai, e le faapea o le a tatou paie ai e galulue. Ua ou iloa nisi o le au kerisiano e ese ma le paie. E iai galuega e masani ona ou avea I kerisiano e latou te faatinoina, peitai e ese ma le taugata o latou tau, e sili atu I tau masani, e fai o le tuai o le faatinoina, ae matua leaga le faia o le auaunaga. O se galuega faapea e te avatu I se tagata lē faatuatua, e le gata e taugofie atu, ae sili mamao atu ona lelei le faatinoina ma e maea ona faia I le taimi e tatau ai. I le 2 Tesalonia 3:10, o lo’o faapea mai e lē lagolagoina e le Atua se tagata paie, ma o so’o se tagata paie e le tatau ona ai. O soo se tagata e fai mai o ia o se kerisiano ae paie, e le o ia o se afafine po’o se atalii o le Atua, ma e le o iai se ala e alagatatau ai ona foai fua iai le Atua.

 E iai tagata e na o le nofonofo I le aso atoa ma faapea mai e lei maua lava se galuega, o le mafuaaga lea ua le faigaluega ai. Oka se paie! Tu I luga ma alu e sue sau galuega e fai e faaalu ai lou taimi. Saili lou tagata, e tatau lava ona iai se taleni o loo ia te oe o loo manaomia e faatino ai se galuega mo seisi tagata. Afai e te filiga e atinae lou tagata I lou iloa ma le agavaa, e mautinoa e amata loa ona e maua se tupe. O le tele o Tausaga talu ai, sa iai se tamaloa sa le mafai ona maua sana galuega, o lea na amata ai ona ia aumai ni pi ma falai ona faatau lea I tafatafa ane o le auala. E lei leva ni nai masina, ua faatau ni uila afi se lua ma ua maua faalausoso’o ana tupe. Ua folafola e le Atua e na te faamanuia I galuega a ou lima (Teuterenome 28:12), peitai e tatau ona e faaalia muamua I le Atua au galuega. 

Aua le popole, talitonu I le Atua, ona ia foai lea o mea uma e te manaomia pe afai e te lē paie, I le suafa o Iesu, Amene.