Samoan Devotional

OPEN HEAVENS

MATALA LE LAGI MO LE ASO TOONAI 6 IANUARI 2024

Manatu Autu: Folafolaga ma Fuafuaga mo le Tausaga Fou 5 (New Year Resolutions 5)

Tauloto – Salamo 118:8 “O lē fa‘atuatua i le ALI‘I, sili lea i le fa‘alagolago i tagata.”

Faitauga - Tusi Paia: Ieremia 17:5-8

Upu Folafola

O la’u folafolaga ma le fuafuaga lona lima o le tausaga lenei, o le a o’u faamautinoa e tu’u atoa lo’u faamoemoega i le Atua ae lē o le tagata. O le a o’u faia faapea auā na fetalai le Atua “e lē aogā lava le olataga mai tagata.” (Salamo 60:11). Atonu ua e maitaua o le toatele o tagata sa e manatu o le a maua ai lou fesoasoani, ua na o le mafatia ua maua mai ai, peita’i o loo i ai lo tatou Atua na te lē tu’ulafoa’iina oe, mai le amataga e fa’aauau pea i le tausaga lenei e o’o i le iuga.

Sa o’u alu I lo’u nu’u I le 1980 ina ua fa’ato’ā avea au ma ta’ita’i aoao o le Ekalesia RCCG, ma na fai mai se uso iā te a’u, “O lenā ua avea oe ma ta’ita’i aoao o le Ekalesia, e te mana’omia se fale lelei e tali ai tagata taualoa e ono omai e asi mai oe iinei, aemaise pe a fai ni sauniga.” Sa o’u Ioe i le manatu o le uso, ona ia ofo mai lea e fesoasoani i le faiga o le fale. Na faailoa mai e le uso lava lea o ia e fai ana piliki ma o le a ia aumaia uma piliki e manaomia i le galuega, se’i totogi atu pe a maua sa’u tupe. Sa o’u talitonu o se tonu mai le Atua ma o’u talia fiafia ai.

Le au pele e, a ofo atu e se isi se fesoasoani iā te oe, fesili muamua i le Atua pe se mea mai iā te ia. Sa fau loa le fale, ma o le aso na ato ai, na o’o mai ai le fai piliki fai mai e totogi uma atu le tau o ana piliki, na fa’ate’ia a’u auā sa fai mai le uso i le amataga se’i maua sa’u tupe ma ua o’u sauni ona fa’ato’ā totogi lea o piliki. A’o lenei fa’atoā ato le fale, e le’i faia faitotoa ma fa’amalama. Sa matuā lagona lo’u fa’anoanoa. Sa o’u fai i le Atua, “Le Alii e, e te silafia o’u te le’i faia muamua se mea o’u te lē gafatia; o le uso lea na ia tatā’ia a’u e fai le galuega lenei. Faamolemole alofa mai ia te a’u, ‘aua ne’i fa’amāina a’u.” Na o’u tatalo i le po atoa ma o’u moe nofo ai i la’u laulau. Ou te ala a’e, o tūtū se tamaloa i le faitoto’a. Fai mai e mamao le itū o le atunuu e sau ai e momoli mai se teutusi mai le Atua mo a’u. Sa o’u talia le teutusi, tatalo mo le auauna a le Atua ona alu ai lea. Na o’u tatala le teutusi; o le aofa’i tonu lava o la’u aitalafu piliki sa i ai i totonu.

O loo soifua lo tatou Atua na te lē tu’ulafoa’iina tatou i taimi o puapuagā. I le tausaga lenei, ua sauni o ia e fesoasoani iā te oe, peita’i e tatau ona tu’u atoa lou fa’atuatuaga iā te ia. I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 5 IANUARI 2024

Manatu Autu: Folafolaga ma Fuafuaga mo le Tausaga Fou 4 (New Year Resolutions 4)

Tauloto – Luka 6:38 “Ia ‘outou foa‘i atu, e foa‘iina mai ai ‘iā te ‘outou; e foa‘i mai e i latou i lo ‘outou lava ‘ie pulupulu le fua lelei, e lolomi ma lūlūina, e tumu ma solo i tua. Auā o le fua tou te fuaina atu ai, e fuaina mai ai ‘iā te ‘outou.”

Faitauga - Tusi Paia: 2 Korinito 9:6-15

Upu Folafola

Ao ou laitiiti o se atalii o se faifaatoaga, na ou maitauina lo’u tama e na te tu’ueseina fua o le faatoaga e pito sili ona lelei e faaaoga e toe totoina aua e faalagolago iai le lelei o le seleselega I le lumanai. O lo’o manino le Upu a le Atua I le tulaga lea. Afai e itiiti au saito e lūlū, e itiiti fo‘i au e selesele mai; a o lē ‘ua tele ana e lūlū, e tele fo‘i ana e selesele mai (2 Korinito 9:6).

I lenei Tausaga, e sili atu I tausaga ua tuanai, ou te filifili e foai atu aua ou te iloa afai ou te foai atu, e maua le seleselega. Ou te foai atu foi ma le loto malie aua e alofa ma fiafia le Atua I le tagata e foai ma le loto malie (2 Korinito 9:7), ma ou te manaomia lenei alofa tunoa. Afai o lo’o e faamoemoe e maua se seleselega tele I lenei Tausaga, fai sau filifiliga e foai tele. 

Ou te manatua le taimi ao matou sauni atu I le matou fonotaga tele ma sa ou manaomia le $17,000 mo apa e atoina ai le fale tele e faia ai le fonotele. Ua na o le $1000 sa ia te a’u ma sa ou tatalo I le Atua mo le $16,000. Na sau se faifeau I lo’u ofisa ma faapea mai e na te manaomia se $1000. Na ia manaomia le tupe lea e ato ai se fale itiiti e tali malo ai I tagata e o mai I le fonotele. Na ou fai iai o lea foi ou te manaomia le tupe ona toe alu lea o le faifeau. Ao agai ese, na faapea mai le Atua ia te au, ‘toe valaau e sau ona e tago lea e ave iai le $1000 lena’. Na ou le fiafia aua e faigata peitai na ou usitai. Ina ua alu ese le faifeau ma le fiafia tele ma la’u $1000 I lana taga, na faapea mai le Atua, ‘Atalii, aisea e te lē fiafia ai? E lua faafitauli, na ou faaaogaina oe e fofoina le faafitauli muamua, ae o le faafitauli lena e le mafai ona e fofoina, taatia mai ia te a’u’. I ni nai itula mulimuli ane, na sau se tagata mai se taulaga mamao lava ma faapea mai, ‘Lau afioga, faatoa maea ona aoina totogi o fale mai tagata nofo mautotogi ia te au, ae o lo’o faapea mai le Atua Matautia ou te foai atu ia te oe’. Na ia aumai se teutusi ona ou faamanuia lea iai. Ina ua ou tatalaina le teutusi, sa iai le $17,000. 

I lenei Tausaga, o le a faateleina la’u foai I le galuega a le Atua ma manumaloina agaga mo lona malo e sili atu I taimi ua tuanai. O lo’o tusia, o aso uma o le lalolagi e lē toe utuvā ai, o tausaga e lūlū ai ma tausaga e selesele ai (Kenese 8:22). Fai lau filifiliga e pei o a’u ma lūlū I le galuega a le Atua e sili atu I taimi ua tuanai I lenei Tausaga?

E le taitai ona lē faia e le Atua ana folafolaga. O lē ‘ua tele ana e lūlū, e tele fo‘i ana e selesele mai (2 Korinito 9:6). Faataitai loa iai. Saili po’o le a se mea o manaomia e le Ekalesia ona e lulu lea iai, I le suafa o Iesu, Amene. 

 OPEN HEAVENS

MATALA LE LAGI MO LE ASO TOFI 4 IANUARI 2024

Manatu Autu: Folafolaga ma Fuafuaga mo le Tausaga Fou 3 (New Year Resolutions 3)

Tauloto – Iakopo 4:10 “inā fa‘amaulalo ia i luma o le Ali‘i, ‘ona fa‘amaualugaina lea o ‘outou e ia.”

Faitauga - Tusi Paia: 2 Tupu 5:1-14

Upu Folafola

O le tausaga lenei, ua ou filifili ai o le a faamaualaloina lo’u nei tagata e sili atu I taimi muamua. O le a ou fesili mo se fesoasoani mo aʻu mai so’o se tagata, tusa lava po’o le a lona tulaga. O le toʻatele o tagata e leai se faʻafitauli I le saili fesoasoani I se tagata e maualuga ona tofiga nai lo latou, ae o le toʻatele e faigata ona saili fesoasoani mai tagata e faatauvaa o latou tulaga nai lo latou. O uiga nei e faoa ai faamanuiaga o le toatele o tagata.

A o o’u aoga I le Kolisi tulaga Lua, sa maoae lo’u iloa i le mataupu o le Matematika faapea ma isi mata'upu, ae na mana'omia lava ni a’u a’oa'oga fa'apitoa e pasi ai le mataupu o le Gagana Peretania. I na aso e le afaina pe e te atamai, ae afai e pasi uma isi mataupu ae le manuia le gagana Peretania, ua pei lava ua faato’ilaloina oe. Na ou fesili i se tasi o la’u vasega na ola i Egelani ma e lelei tele lona tomai i le gagana Peretania, e na te aʻoaʻo aʻu, ma o le faaiuga, na pasi le Gagana Peretania ma ou maua ai le togi maualuga o le ‘A’. E mafai ona mimita lea alii ma ta’uta’u atu o ia na aoaoina a’u ae e le afaina lena itu, aua ua uma ona taulimaina loʻu tusi pasi e  faamaonia ai ua ou pasi I lea faailoga. Mo le tausaga lenei, ‘aua e te faataga le faamaualuga e taofia oe I tua mai le maua o le fesoasoani e ausia ai le taunuuga lelei o lou olaga.

Ae paga lea, o le toatele o tagata faamaualuluga, latou te le iloa o lo’o latou faamaualuluga. O nisi oi latou e femitai ma talatala o latou uiga fa'amaualuga, ma faaigoaina ini upu matagofie e pei o le ‘lava o le iloa o lou tagata’, ‘malualii’ ma isi. Le au pele, o so’o se vaega o le tulaga o lou tagata e ono fefefe ai isi tagata e fa'alatalata atu ia te oe, o le fa'amaualuga lena. Atonu e iloa e se tasi tagata, vaifofō o ou faafitauli, ae ona o lou faamaualuga e peiseai  e te pule I le lalolagi atoa, e ono taofia ai tagata e talanoa atu ia te oe I le fofo. E tatau ona faamaualaloina lou tagata, ataata I taimi uma, tautala ma le faaaloalo faatasi ma le alofa i tagata e faafaigofie ai ona latou talanoa atu ia te oe.

O le faitauga mai le Tusi Paia o le aso, e aʻoaʻoina ai tatou mai iā Naamanu ma lana avā. Muamua, sa faigofie ona talanoa atu tagata I lana avā ma sa mafai e le auauna teine ona talanoa atu iā te ia e uiga i le faafitauli e mamā ai tagata o lo’o maua ai lana tane. E lē gata i lea, ina ua o’o atu Naamanu i le nofoaga a Elisaia na toatama’I  o ia ona o le lē alu atu o Elisaia e tatalo mo ia. O se tasi o ana auauna na fautua iā te ia ma sa ia utagia fautuaga nei. O le vaifofō o le lepela o Naamanu na fesootaʻi ma tagata e faatauvaa atu o latou tulaga I lo ia. Faafetai i le Atua ona o lona loto maulalo na faalogo ai iai latou. 

O lenei tausaga, fai ma au fuafuaga, ia e loto maualalo. Ia e manatua, e tetee atu le Atua i ē faamaualuluga ma foaʻi le alofa tunoa i ē loto maulalo (Iakopo 4:6). I le suafa o Iesu, Amene. 

OPEN HEAVENS

MATALA LE LAGI MO LE ASO LULU 3 IANUARI 2024

Manatu Autu: Folafolaga ma Fuafuaga mo le Tausaga Fou 2 (New Year Resolutions 2)

Tauloto – Mataio 7:7 ‘‘Ia ‘outou ole atu, ‘ona foa‘iina mai ai lea ‘iā te ‘outou; ‘ia ‘outou sā‘ili, ‘ona ‘outou maua ai lea; ‘ia ‘outou tu‘itu‘i atu, ‘ona tōina ai lea ‘iā te ‘outou.”

Faitauga - Tusi Paia: 2 Tupu 2:19-22

Upu Folafola

Na amata ona ou faasoa atu I mataupu ou te faaigoaina o ‘folafolaga ma fuafuaga o le tausaga fou’ ma o le a ou faasoa atu I le vaega lona lua I le asō. I lenei Tausaga, o le a ou talanoa sa’o I le Atua ma fa’ailoa atu ia te ia le tulaga moni o lo’o ou iai. Ua ou iloa lelei e tusa ma tulaga ua ou vaai iai, o le toatele o tagata e matua lelei le ola faafoliga ma e foliga mai o lo’o lelei mea uma ae o loo faaletonu, ua oo lava I luma o le Atua e faafoliga, peitai e silafia e le Atua mea uma. 

I le tatou faitauga mai le Tusi Paia o le asō, na faailoa manino e alii o Ieriko le tulaga o le faafitauli I lo latou taulaga ia Elisaia ma sa fa’aaogaina e le Atua le perofeta e tafiesea le faafitauli mai lo latou taulaga. A manatu lelei iai, sa feoai faatasi Elia, le tama faaleagaga o Elisaia ma tagata Ieriko, ae leai se faamaumauga a le Tusi Paia I se taimi na faailoa ai e tagata Ieriko faafitauli nei ia Elia. Na matua puapuaga I latou mo se taimi umi ona o le latou filemu ma lē tautatala. O lenei Tausaga, ua fai la’u faaiuga, ou te lē toe puapuaga ma le filemu e leai se upu. Ou te ta’u atu I le Atua Matautia o’u faafitauli uma, o le a ou faailoa atu ia te ia mea uma aua ou te iloa, e mafai ona ia fofo mea uma. Ou te le faatali seia o’o I le tulaga ua toe ā ina leiloa mea uma e pele ia te au ona faatoa ou tagi atu lea e pei o le fafine ua oti lana tane I le 2 Tupu 4:1-7. 

Na ou asiasi I se tasi o uso o lo’u tama I le tele o Tausaga talu ai ma sa aumai la’u meaai e lona toalua o se ufi e pei o le moto a le pepe le tele. Ana faapea e na o le tasi le aso ou te nofo ai I le latou fale, semanu ou te filemu e leai se tala e faia. Ona la sa ou fuafua ou te nofo ai mo le vaiaso atoa, o lea na ou fesili ai I le tina lea: ‘e te lua fiafia tatou te nonofo?’. Na tali mai o ia, ‘Ioe, matou te fiafia tatou te nonofo iinei’. Ona ou faapea atu lea, ‘ou te le maona I le fasi ufi lea, e mafai ona toe faatele sa’u ufi?’. Na alu I le potu ma ou te leiloa po’o le a lana tala na fai I lona toalua ae na ou faalogo atu o taliē. Ou te lē amanaia po’o le a mea o taliē ai, pau le mea na ou naunau iai, ia telē le ufi ou te ‘ai ai. 

I lenei Tausaga, faamautinoa e te le o faafoliga I luma o le Atua. Ta’u atu ia te ia le mea tonu o lo’o e tigā ai. Fai lelei lau faaiuga e pei o a’u ma ole atu ia te ia mo lana fesoasoani e sili atu I taimi ua tuanai ma e mautinoa e tali mai o ia (Mataio 21:22). I le suafa o Iesu, Amene. 

OPEN HEAVENS

MATALA LE LAGI MO LE ASO LUA 2 IANUARI 2024

Manatu Autu: Folafolaga ma Fuafuaga mo le Tausaga Fou 1(New Year Resolutions 1)

Tauloto – Salamo 146:2 ‘‘Ou te vivi‘i atu i le ALI‘I a o ‘ou ola; ‘ou te fai pesega i lo‘u Atua a o ‘ou tumau i le ola nei”..

Faitauga - Tusi Paia: Salamo 67:4-5

Upu Folafola

A’o lauga se tasi o ou atalii, na faapea mai e 14 tausaga na galue ai Iakopo ia maua le tamaitai na naunau e faaipoipo iai (Kenese 29:18-30) a’o Isaako, sa na ole savalivali lava ae maua loa lana ava (Kenese 24:63-67). Sa maua e le tasi le alofa tunoa a’o leisi sa galue malosi. O le taimi na ia laugaina ai lenei lauga, na tonu ai I lou manatu, ou te filifili ou te ola I le alofa tunoa o le Atua I so’o se vaega o lou olaga. O le mafuaaga lea na ou fai ai loa se folafolaga ma se fuafuaga faataatia. O nei fuafuaga o ni laasaga maumaututu ina ia ou maua ma ola I le alofa tunoa o le Atua mo lo’u olaga atoa. O le a ou faasoa atu ia te oe nei laasaga I totonu o le ono aso ma ou te faamalosiau ia te oe ia e maitau lelei ma faia. Faamolemole aua e te manatu iai e pei o le tele o folafolaga mo le Tausaga fou e vave ona galo ae lei taitai le Tausaga.

I lenei Tausaga, ou te faia se fuafuaga mautu e vivii ma faamanu I le Atua ma lo’u loto atoa ma le malosi atoa e sili atu I Tausaga ua tuanai. So’o se taimi e te faatoga atu ai I se tagata mai le taele o lou loto, e mafai lava ona e faaosofia lena tagata e fesoasoani ia te oe. Ou te fuafua e tapuai ma vivii I le Atua ia matua tele seia oo ina ia fesoasoani mai ia te a’u e pei ona ia faia ia Paulo ma Sila I le Galuega 16:25-26. 

O lo’u tama e ese ma le mativa ma a o’o nei I le taimi ua tatau ona totogi lo’u pili aoga, e amata ona ia faatupu le misa I le va o ona toalua ina ia taofia ai I latou mai le ole atu mo pili o aoga a latou fanau. Peitai, sa iloa lelei e lo’u tina le auala e fai ina ia maua ai lo’u pili aoga. E alu sa’o lava I le potu o lo’u tama ma faatoga atu ma le faamaualalo seia faapea mai lou tama, ‘o le a se mea ou te faia mo oe I le aso?’. E vave ona ole atu lou tina mo lou pili aoga ma e vave foi ona faapea mai o le a ia totogiina le pili. 

I lenei Tausaga, o le a ou vivii ma tapuai I le Atua e sili atu I lo Tausaga ua tuanai. E pei o Tavita sa ia maua le alofa tunoa I lona olaga atoa, ou te fa‘afetai i le ALI‘I i aso uma lava; e lē aunoa ona vi‘iga i lo‘u gutu (Salamo 34:1). E le gata ona ou vivii atu I lona suafa paia. Ou te vivii pea ia te ia I taimi uma. Ou te fa‘amanū atu i le ALI‘I, o mea uma fo‘i o i totonu ‘iā te a‘u, ‘ia fa‘amanū i lona suafa pa‘ia (Salamo 103:1). Ou te ta’uta’u I lona matautia I taimi uma ma e na te puipui ia te a’u I lona alofa tunoa I lenei Tausaga atoa ma sili atu, ou te vivii I lou Atua e faavavau (Salamo 145:1-2). Ae faapefea oe? I le suafa I Iesu, Amene.    

OPEN HEAVENS

MATALA LE LAGI MO LE ASO GAFUA 1 IANUARI 2024

Manatu Autu: Tatalo mo le Tausaga Fou (Prayers for the New Year)

Tauloto – Luka 3:5 ‘E fa‘atumuina o vanu uma, e fa‘amaulaloina fo‘i mauga ma mea maupu‘epu‘e uma; e fa‘asa‘oina fo‘i o mea pi‘opi‘o, ma mea gaoā e fai ma ala laulelei ia’.

Faitauga - Tusi Paia: Isaia 45:1-3

Tatalo

1.      Tamā, ou te vivii ma faafetai ia te oe mo le faamanuiaga o le Tausaga fou. Faafetai tele lava I lau taitaiga I le Tausaga 2023, ua matua ou loto faafetai le Alii e. 

2.      Tamā fesoasoani mai ia te au ina ia ou ola faapaiaina I lenei Tausaga atoa. Fesoasoani mai ia te a’u ia ou faafiafia ia te oe I taimi uma I le suafa o Iesu. 

3.      Le Alii e, I lenei Tausaga, fesoasoani mai ia te a’u ina ia sili atu lo’u alofa ia te oe I lo taimi ua tuanai. Fesoasoani mai ina ia ou ola ma le atoatoa mo oe, ia faia lou finagalo I taimi uma, I le suafa o Iesu. 

4.      Tamā, I le Tausaga fou, faamolemole liai’eseina so’o se mea e le tusa ma oe mai lo’u olaga ma lo’u aiga, I le suafa o Iesu. 

5.      Le Alii e, faamolemole liligi mai se afi fou mai ia te oe I lenei Tausaga. Faataga a’u ou te faalatalata atu ia te oe ma manumaloina agaga e sili atu I lo taimi ua tuanai I le suafa o Iesu. Faamolemole ia faau’uina ai a’u ia sili atu le faamaufaailogaina mo oe le Alii e.  

6.      Tamā, faamolemole ia sili atu ona e faaaogaina a’u I lenei Tausaga e sili atu I taimi ua tuanai. Fesoasoani mai faatasi ma sui uma o lou aiga e auauna ia te oe e sili atu I taimi ua tuanai I le suafa o Iesu. 

7.      Tamā, faamolemole ia faatumu lo’u olaga I le mau tautinoga I lou agalelei I lenei Tausaga atoa ma sili atu, I le suafa o Iesu. 

8.      Le Alii e, faamolemole foai mai ia te a’u le vave mai ia te oe faatasi ai ma le manuia I so’o se vaega o lo’u olaga I lenei Tausaga. Faamolemole fesoasoani mai ina ia manuia mea uma e tago iai o’u lima, I lenei Tausaga, I le suafa o Iesu. 

9.      Tamā, I lenei Tausaga atoa, foai mai ia tele ni vaitau ou te fiafia ma siva ai. Tama, ia ou ala mai I le olioli ma le fiafia ma ou moe I le olioli ma le fiafia I le suafa o Iesu. 

10.  Le Alii e, faamolemole ia e puipui ia te a’u ma e pele ia te au mai so’o se amioleaga tugā I lenei Tausaga I le suafa o Iesu. Ia iai pea lou mamalu e faatasi ma I matou I taimi uma I le suafa o Iesu. 

11.  Tamā, faamolemole ia e liligi mai le faateleina o lou Agaga Paia I luga o lau Ekalesia I lenei Tausaga. Ia iai se faatalaleleiga fou, ia faateleina lau Ekalesia, ma faanoanoa ai so’o se mailei a le fili, I le suafa o Iesu.

12.  Tamā ia e faamanuia I si o’u atunuu, Ia e faamanuia I o matou taitai, foai le poto ma le atamai iai latou. Ia e faatupulaia le tamaoaiga o si ou atunuu I le suafa pele o Iesu Keriso e tatalo atu ai, Amene.

OPEN HEAVENS

MATALA LE LAGI MO LE ASO SA 31 TESEMA 2023

Manatu Autu: Tatalo mo le Tausaga 2024 (Prayers for Year 2024)

Tauloto – Isaia 45:2 ‘O a‘u lava, ‘ou te savali atu i ou luma, ma ‘ou fa‘alauleleiina mea maupu‘epu‘e. ‘Ou te nutinini‘i i puipui ‘apamemea; ‘ou te gauia fo‘i fa‘amau u‘amea.

Faitauga - Tusi Paia: Isaia 45:1-2

Tatalo

1.      Faafetai le Alii e, mo lau tausiga ua o’u aulia saogalemū mai ai le faaiuga o le tausaga 2023. Faafetai le Alii e.

2.      Tamā faamolemole ia i ai lou mamalu e ta’ita’iina a’u I le tausaga 2024 ma faalēaogā taupulepulega uma a le fili e fa’atatau ia te a’u I le suafa o Iesu.

3.      Tamā, faamolemole fesoasoani mai ia o’u tu’u ese uma mea e lē viia ai lou suafa. Ia o’u fa’afiafia iā te oe i le tausaga 2024 ma aso uma i le suafa o Iesu.

4.      Tamā, faamolemole aua ne’i faatagaina a’u ou te alu ese mai ia te oe ma misia mea tetele o le a e faia i le 2024, i le suafa o Iesu.

5.      Tamā, faamolemole fesoasoani mai ia mafai ona sili atu mea ou te faia mo oe i le 2024 na i loo tausaga ua tuana’i, i le suafa o Iesu.

6.      Tamā, ta’ita’i mai i latou uma ua e saunia e fesoasoani iā te a’u i le 2024, ma ia aua ne’i filemu i latou se’i vagana ua fesoasoani mai ia te a’u.

7.      Tamā, faamolemole fesoasoani mai ia o’u usiusita’i ia te oe i le tausaga fou o le a aulia ma aso uma i le suafa o Iesu.

8.      Tamā, faataga na o mea lelei e uia le ala ou te savali ai i le tausaga fou ma ia o’u fuaina ni fua e sili atu mo oe, I le suafa o Iesu.

9.      Tamā, faamolemole fesoasoani mai ia te a’u e faataunuu tau lava o lou finagalo i le tausaga fou I le suafa o Iesu.

10.  Tamā, faamolemole talaia ni faitotoa fou o le fa’asa’olotoga ma manuia mo a’u ma le Ekalesia atoa I le 2024.

11.  Tamā, faamolemole aua ne’i tuua a’u ma e pele iā te a’u e maua i se mailei a le tiapolo o faatali mai i le ala i le 2024, i le suafa o Iesu.

12.  Tamā faamolemole ia si’itia lo’u loto naunau e usitai ma faia lou finagalo ae tafiesea leaga uma ua fai ma masani i lo’u olaga. I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 30 TESEMA 2023

Manatu Autu: Aua e te manao tele (Don’t be greedy)

Tauloto – Faataoto 15:27 ‘O lē ‘ua matape‘ape‘a i le ‘oloa, e fa‘atigāina e ia lona lava ‘āiga; a o lē ‘ino‘ino i mea alofa, e ola o ia.’

Faitauga - Tusi Paia: Faataoto 1:17-19

Upu Folafola

Fai mai le tusi o Faataoto 1:17-19, O lē ua matape’ape’a i le oloa, ua lamalama ia i lona lava toto. Ua mailei e ia lona lava ola. O le fetalaiga a le Atua ua e sauni lava oe e fa’aumatia lou ola pe a e mana’o tele i mea o le lalolagi. Fai mai Faataoto 15:27 O lē ua matape’ape’a i le oloa, e fa’atigāina e ia lona lava āiga; a o lē inoino i mea alofa, e ola o ia. Ua e faatupu faafitauli mo lou aiga pe a e matape’ape’a. E mafai ona aafia fanau ona o le matape’ape’a o matua.

I nai tausaga ua mavae ina ua fa’ato’ā amata se aulotu o le Redeemed Christian Church of God i Zambia, o se tagatānu’u o le aai na avea ma o matou sui e faamaopopo tupe ma le faamoemoe e atiina a’e ai le Ekalesia, peita’i ua ia fa’aaogā sesē tupe mo ia lava. O se tasi aso a’o ta’alo lona afafine i se faitoto’a la’ititi na fai e taofi ai ‘oti mai le o i totonu o le fale, na faafuasei ona mamulu ese le faitotoa mai ona taofi, ma fiti mai ai se fao tū i le mata o le teineitiiti ma se’i ese ai. Na ou tatalo mo le afafine, ma fa’amanatu i le Atua le auaunaga a lona tamā i le lotu. E i ai ni mea na fai mai le Atua ou te fesili ai i le tamā lenei. Na o’u fesili ma o’u ta’u fo’i i ai le mea e faia e le Atua iā te ia pe a pepelo. Na punou lona ulu, tete lona tino ma fai mai “Ou te le’i faamaoni. Sa o’u fa’aaogaina sesē tupe na aumai ia te a’u e atia’e ai le lotu”.

O i latou e matape’ape’a, atonu e fa’alialia i lo latou tamāoaiga mai auala pi’opi’o ma faailoa solo latou e popoto, a’o le Upu a le Atua e tumau, o lo o aga’i mai lo latou tigā. O nisi la ua leva ona feagai ma faafitauli ma tiga a’o lo’o nanā mai le lalolagi atoa. Aua ne’i fa’aosofia oe e te faapei o i latou o e matape’ape’a auā e te lē o iloa atu puapuagā la e fa’alafi I tua atu.

O le matape’ape’a o le faitoto’a e tatā’ia ‘oe i le gaoi. O le mea mālie, o le mea lenā e te fa’ananau ma matape’ape’a i ai e mafai ona e maua pe a e onosa’i e saili i le ala sa’o. O i latou uma e fa’ataga le mana’o tele e pulea le loto fa’amalieina i o latou olaga, e i’u ina aveesea mea ua o latou maua. O le tiapolo, o ia sa fai ma agelu sili peita’i na tulia ese mai ona o lona matape’ape’a i mea e lē mafai ona o’o i ai. O se uso e matape’ape’a e leai se loto faafetai ma se faamalieina i faamanuiaga a le Atua i lona olaga, ma e naunau lava e fao meatotino a isi.

Mafaufau i mea uma ua faia e le Atua mo oe i le tausaga lenei, ma faailoa lou loto faafetai ia te ia ina ia faia pea e le Atua nisi mea sili atu mo oe i le tausaga 2024.

Tatalo

Le Alii e, fesoasoani mai ia te a’u ia o’u fiafia ma malie i mea uma ua e foai mo a’u. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 29 TESEMA 2023

Manatu Autu: Uluai saunia mai le amataga (Settled beforehand)

Tauloto – Isaia 45:2 ‘O a‘u lava, ‘ou te savali atu i ou luma, ma ‘ou fa‘alauleleiina mea maupu‘epu‘e. ‘Ou te nutinini‘i i puipui ‘apamemea; ‘ou te gauia fo‘i fa‘amau u‘amea.,;’

Faitauga - Tusi Paia: Esoto 15:22-25

Upu Folafola

I le faitauga mai le Tusi Paia o le aso, ae lei taitai ona taunuu atu le fanauga a Isaraelu I Mara, sa iai lava se laau sa ola ane I tafatafa o le vai. O loo faaalia mai ai, ae lei amata ou faafitauli, ua uluai saunia e le Atua le fofo. Po’o le a lava le ituaiga faafitauli, ua uluai saunia ma faatalitali atu le fofo. E pau le tulaga e te manaomia, o le taitaiga a le Atua e faasino atu po’o le a le fofo ae pe faapefea foi ona faaaogaina. Fai mai le Salamo 90:2, 

A o le‘i fānaua mai mauga, e le‘i faia fo‘i e oe le lalolagi ma le atu laulau, o le Atua oe mai le vavau e o‘o i le fa‘avavau.

Sa iai le Atua mai le amataga ae lei tulai mai lena mauga o loo taofia oe mai le agai I luma, ma e faigofie ia te ia ona lia’ieseina le mauga ma faalaulelei mea mapu’epu’e. 

O le tulaga lelei, o le Atua e le gata o ia o le Alefa, o ia foi o le Omeka (Faaaliga 1:8), o lona uiga e na te silafia le lumanai e o’o I le taimi ua tuana’i. E na te silafia mea uma o lo’o taupulepule ai le tiapolo mo lou olaga I le 2024, ma e na te saunia ala e te manumalo ai I le tiapolo I le 2024, e amata atu lava I le aso, I le suafa o Iesu. 

Ua maea ona ia saunia ma tuu I totonu o lou tagata mea uma e te manaomia e manumalo ai I le 2024. Aua e te fefe. Ae lei amata ona taufaafefe ma taufaifai Koliata ia Isaraelu, o le ma’a na fasiotia ai o ia, ua maea ona saunia ma faatalitali I le taimi e tago ai iai Tavita ma tuu I lana fana ma liai atu I le sauai lenei. Ae lei o mai le au Filisitia e saisai Samasoni, o le auvae o le asini ua leva ona iai ma faatalitali. Ae lei oo mai le 2024, o mea uma e te manaomia e manumalo ai I le Tausaga fou, ua maea saunia mo oe. O le laau e liua le vai oona I le vai lelei e feinu ai tagata, ua leva ona saunia ma faatalitali mai ae lei o atu le fanauga a Isaraelu I Mara. E pau le mea na tupu ina ua tagi atu Mose I le Atua, na susulu atu le malamalama I le laau ona faatonuina lea e le Atua Mose I le mea e faia. 

Fai mai le Isaia 30:21 ‘E fa‘alogo fo‘i o ‘outou taliga i le ‘upu i o ‘outou tua, pe a ‘outou afe ane i le itū taumatau pe afe ane i le itū tauagavale, e fa‘apea mai, “O le ala lava lenei,” ‘ia ‘outou sāvavali ai’. Ou te tatalo ia faaalia atu ia te oe le ala e te savali ai ma le manumalo I le 2024, I le suafa o Iesu. E faaalia atu e le Atua ia te oe le mea e tatau ona faia e te manumalo ma manuia ai I le Tausaga fou, I le suafa manumalo o Iesu, Amene. 

Tatalo, 

Tama, fesoasoani mai ina ia ou faalogologo i lou alofa ma le agalelei I taeao uma, aua o lo’u faamoemoega ma le faatuatua o lo’o ia te oe. Faamolemole le Alii e, ia e fa‘asino mai le ala ‘ou te savali ai; auā o lo‘o naunau atu lo‘u loto ‘iā te oe (Salamo 143:8), I le suafa o Iesu, Amene.  

OPEN HEAVENS

MATALA LE LAGI MO LE ASO TOFI 28 TESEMA 2023

Manatu Autu: Talanoa e le faavaea (Talk is cheap)

Tauloto – Galuega 1:1 ‘Teofilo e: Na ‘ou tusia le ulua‘i tala i mea uma lava na amata ‘ona faia e Iesu ma a‘oa‘o atu,;’

Faitauga - Tusi Paia: Mataio 23:1-7

Upu Folafola

E faigofie le talanoa ae le faavaeina faamatalaga. Na ou vaai i le toatele o tagata e talanoa i mea lelei, ae o le faatinoina, e lape le itu lea. E toʻatele faifeʻau e lauga ini lauga matautia le faauuina mai le pulela’a, ae a o’o i le fale, e le savavali ma faia mea na latou lauga ai. E faigofie le talanoa I mataupu, ma o le mafuaaga lena e tumau ai tagata I le tulaga e tasi pe afai e na o le talanoa ai lava. 

Afai ou te fai atu I se tagata, a soona ave saoasaoa lana taavale, e le saogalemu, ae uma ane ou te ave saosaoa, e laveaaina ai la a’u pe a tupu se faalavelave I le ave taavale saoasaoa ona sa ou talanoa atu ai I se tagata? Afai e te talanoa atu I le taua o le tatalo ae ete le tatalo, o faafitauli uma e mulimuli I tagata e le tatalo o le a mulimuli ia te oe. O le tulaga lena e toatele tagata e te vaai iai e lelei ma popoto I le Upu a le Atua, peitai e foliga mai e leai ni fua o afioga a le Atua I o latou olaga. O le tele o taimi e mafua mai, ona latou te iloa afioga uma a le Atua, ae le ola ma savavali ai.

‘Teofilo e: Na ‘ou tusia le ulua‘i tala i mea uma lava na amata ‘ona faia e Iesu ma a‘oa‘o atu’ Galuega 1:1

O le mau o lo’o taua i luga, o loo faaalia ai auala na soifua ai Iesu Keriso. Sa ia faatino ma soifua ai, ae le’i a’oa’o atu. Afai e te leʻi ola ma faatino le mataupu lena, e leai sau pisinisi e te aʻoaʻoina ai. Afai e taua tele nei aoaoaga, e pei ona e talaiina, e tatau ona e savali muamua ai. O i tatou uma o ē o lo’o aoao atu le talalelei, e tatau ona tatou matauina lelei le Iakopo 3:1 o loo faapea mai, ‘e sili atu le faamasinoga ma le faasalaina o e a’oa’o le Upu’. E mafua ona afai e te aoaoina le Upu, o le faamoemoega o le Atua ua maea ona e faia ma savali ai. A e aoao atu se mataupu e te le o savali ma faia, o le pepelo lena. E toatele tagata ua o ese ma le faaolataga pe a latou vaai atu i se faiaoga o le Upu, e le o faatinoina ma savali I mea o lo’o aoaoina atu. Tau ina ia ‘aua neʻi ō tagata i seoli ona ua e faaali atu iā i latou faataitaiga sesē i le suafa o Iesu. O loo faapea mai le Mataio 18:6:

‘Ai sē na te fa‘atausuai se tasi o i latou nei e fa‘atauva‘a o ē fa‘atuatua ‘iā te a‘u, e lelei i lea tagata pe a nonoa se ma‘aolo tele i lona ua, ma fa‘agotoina o ia i le moana loloto’

Afai e te talitonu moni i mea o lo’o e aoao atu, savali ma faia loa. Afai e le mafai ona e savali ma faia, ‘aua e te toe a’oa’oina atu. O le tau o le talanoa I le Upu a le Atua e le mafai ona tino mai ai ana faamanuiaga mo oe. O le savali ai ma faia le itu pito sili ona taua ma aoga, ona faatoa fua mai lea o faamanuiaga a le Atua, I le suafa o Iesu, Amene.