Samoan Devotional

OPEN HEAVENS

MATALA LE LAGI MO LE ASO FARAILE 26 IANUARI 2024

Manatu Autu: O le a le Malumalu o le Atua? 3 (What is God’s temple? 3)

Tauloto – Teuterenome 12:6 “‘Ia ‘outou ‘ave i ai a ‘outou taulaga mū, ma a ‘outou taulaga, ma le mea e sefulua‘i a ‘outou mea, ma taulaga si‘i a o ‘outou lima, ma mea ‘Ua ‘outou tautō ai, ma a ‘outou taulaga tou te loto ‘ina fai, ‘atoa ma ulua‘i tama a ‘outou povi ma a ‘outou mamoe..”

Faitauga - Tusi Paia: Teuteronome 12:5-6

Upu Folafola

O le isi igoa o le malumalu e ese mai le fale tatalo ma le fale o faamalologa, o le fale o faiga taulaga. I le taulaga I Aferika ou te sau ai, a ave le taulaga I le tiapolo, e osi I le fesootaiga o auala, a osi taulaga I se faataulaitu e osi I tua o se laau. Mo I tatou o lo’o osi taulaga I le Atua Silisiliese, na ia faatonu mai I le 2 Nofoaiga Tupu 7:12, ua ia filifilia lona malumalu o le nofoaga e na te talia ai faiga taulaga.  E le gata I lea fai mai I le Teuteronome 16:16 e le tatau ona e sau e aunoa ma se taulaga I totonu o lona malumalu aua o lo’o ia  naunau e talia a tatou faigataulaga. 

Fai mai se tasi o a’u uo I soo se taimi e fai taulaga ai, ‘a leai sau tupe e lafo, aitalafu mai I lou tuaoi ina ia pasi mai le ipu e ao ai le taulaga, ae silasila mai le Atua o loo e tuuina se tupe I totonu’. E na te toe faaopoopo mai, ‘e le umi se taimi ae amata foi ona e nono atu tupe I tagata’. E matua taua I le Atua le Faiga taulaga ma o le tulaga lea e silasila mai ona fofoga I mea o loo lafo e tagata. I le Mareko 12:41-44. Na silasila atu Iesu ma maitau lafoga a tagata na lafoina ma ia fuaina po’o a lafoga o ni faigataulaga ma lafoga e le o ni taulaga. E faaalia manino mai ai, e naunau le Atua e talia Faiga taulaga I le malumalu. 

E iai nisi o tagata e le faatuatuaina le faifeau ma o lea e sili atu ona latou foai tupe I tagata matitiva I lo le lafo I le lotu. O le tulaga muamua, ou te le malamalama pe aisea ua latou masalomia ai o lo’o gaoi le faifeau. Lona lua, e lelei le foai I tagata matitiva, fai mai le Faataoto 19:17, afai e te foai I tagata matitiva, o lo’o e foai I le Atua. Peitai, e le tatau ona e faatalale I le faitaulaga I le malumalu o le Atua. A faapea mai se tagata e fiafia ia te au ma fiafia e foai tupe I la’u fanau pe a fetaui I le taulaga, ae musu e foai I se mea o lo’o ia iloa o lo’o manaomia I lo’u fale ae o loo ia gafatia lelei, o loo atagia ai, o lo’o foai I la’u fanau e le faapea ona o le fiafia ia te au. O loo iai se mafuaaga I tua atu, e pei o le foai ona o le vaaiga a tagata pe iai foi se mea e manao e maua mai I la’u fanau. E faapena foi le faauigaina pe afai e te fiafia e foai I tagata matitiva ae le foai I le malumalu o le Atua. 

Ia e maitau lelei, aua e te alu I le malumalu o le Atua e aunoa ma se foai aua o le fale e fai taulaga ai, I le suafa o Iesu, Amene.   

OPEN HEAVENS

MATALA LE LAGI MO LE ASO TOFI 25 IANUARI 2024

Manatu Autu: O le a le Malumalu o le Atua? 2 (What is God’s temple? 2)

Tauloto – Mataio 21:14 “Ona ō mai ai lea ‘iā te ia i le malumalu o ē tauaso ma ē pipili, ‘ua na fa‘amālōlō ‘iā te i latou.”

Faitauga - Tusi Paia: Mataio 12:9-13

Upu Folafola

O le malumalu e le faapea e na o le fale tatalo, o le fale o faamalologa. I le Mataio 21:14 ina ua maea ona tutuli ese e Iesu le au faatau oa mai le malumalu ma fetalai mai, ‘O lou fale e taua o le fale tatalo’, fai mai le Tusi Paia ona o mai lea o tagata  mama’i ia te ia I le malumalu ma ua faamaloloina. 

I le faitauga mai le Tusi Paia o le aso, na afio atu Iesu I le malumalu ma ia feiloai ai ma le tagata ua gase lona lima. Na iai I lea nofoaga ni faiaoga o le Tusi Paia ua manatu e le tatau ona faamaloloina I latou I le aso Sapati. Ina ua latou fesili ia Iesu pe na te faamaloloina le tagata ua gase lona lima, na fetalai atu Iesu I le tamaloa ina ia faasa’o lona lima ma ua faamaloloina. Ia maitau mai, e lei ole atu le tamaloa ia Iesu e tatalo mo ia, o le silasila atu o Iesu I lenei tagata e le atoatoa lona tino na faaosofia ai o ia e faamalolo ia te ia. E iai nisi o tagata ua latou lu’i ia te au ma faapea mai, ‘o outou tagata ia ua outou faapea mai e ia te outou le mana e faamalolo ai ma’i, aisea tou te le ō ai I le falemai e faamalolo uma ma’i o lo’o iai?’. E moni e mafai e le Atua ona faamalolo I so’o se nofoaga, peitai e mautinoa e na te faamalolo I tagata i le malumalu. E toatele tagata ua maua lo latou faamalologa ina ua tu o latou vae I le fanua o le matou malumalu. E lei tatalo nisi mo ia tagata, o lo latou ulufale atu I le malumalu o le Atua ua latou maua ai le faamalologa. 

O lou alu atu I le malumalu o le Atua e faifaipea e pei lava o lo’o e alu e vaai lau fomai. Tusa pe o e lagonaina le malosi, ae a e alu e vaai o ia, e na te suesue ia te oe ma o so’o se faletonu e na te vaaia I lou tino, e na te faamaloloina. E iai tagata o lo’o latou tauaveina ni ma’i I o latou tino e aunoa ma lo latou iloa. A e alu I le sauniga lotu, ma o’o ina paū le mana o le Atua ia te oe, e tafiesea uma ni ma’i aua ua e sau I le fale o faamalologa. O le mea lea ou te leiloa pe silafia e tagata le mea o lo’o latou misia pe afai e na o le matamata mai lava I le tv I sauniga lotu. Afai o lo’o e taumamao mai le malumalu ma e silafia e le Atua e moni o lo’o e naunau e auai peitai ua le mafai, e ese la le tulaga lea. Peitai afai e fai lau faaiuga e nofo I le fale ma fesootai atu I se sauniga lotu, ae o lo’o mafai ona e auai atu iai, e le mafai ona e maua le siosiomaga e tasi o lo’o maua e I latou o lo’o auai I le sauniga.

Aua e te misia so’o se taimi e fai ai sauniga lotu I le malumalu, e ono faaaoga e le Atua le sauniga lotu o lumanai nei e aumai ai ia te oe se mea taua o lo’o e manaomia ma faatalitali iai, I le suafa o Iesu, Amene.  

OPEN HEAVENS

MATALA LE LAGI MO LE ASO LULU 24 IANUARI 2024

Manatu Autu: O le a le Malumalu o le Atua? 1 (What is God’s temple? 1)

Tauloto – Isaia 56:7 “Ou te ‘aumaia i latou lava i lo‘u mauga pa‘ia, ma a‘u fa‘afiafia ‘iā te i latou i lo‘u fale tatalo; o a latou taulaga mū ma a latou taulaga e talia ia i lo‘u fatafaitaulaga; auā e ta‘ua lo‘u fale o le fale tatalo mo nu‘u uma...”

Faitauga - Tusi Paia: Kenese 28:10-17

Upu Folafola

E toatele tagata latou te le malamalama I le mafuaaga e o ai I le lotu po’o soo se nofoaga e fai ai tapuaiga. E latou te faapea ane, ‘Aisea tatou te le nonofo ai I le fale? Aua o loo iai le Atua i mea uma’. O le a ou taumafai e saili ma faasoa atu I le tulaga tonu e ta’ua o le malumalu o le Atua. 

O le malumalu o le Atua o le fale tatalo (Isaia 56:7) ae lei faapea mai seisi e gata lea faaaliga I le Feagaiga Tuai, o Iesu lava, o lē na te ta‘ita‘iina ma lē na te fa‘a‘ato‘atoaina le fa‘atuatua (Eperu 12:2) na faamaonia lea tulaga I le Mataio 21:12-13. E tatou te o atu I Lē e faafofoga ia  tatou tatalo (Salamo 65:2), I le fale ua atofaina o le fale tatalo. Ou te iloa e mafai ona e tatalo I so’o se mea, ma e faafofoga le Atua ia te oe, ae e iai lava le eseesega pe afai e te tatalo I le fale ua faia faapitoa mo tatalo. I lea nofoaga, ua faauuina le siosiomaga ma ua maea ona faataunuuina vaega manaomia e le Atua ina ia mautinoa e maua tali o tatalo. A maea ona faaulufaleina ma faapaia se fale o le fale tatalo, e maualuga le mana e iai. 

I le tele o Tausaga a’o ou nofo I le fale ua iloga o le ‘Fale o le matala le lagi’, sa iai se tamai potu ou te taua o le potu tatalo. O se potu ua atofaina ou te tatalo ai ma mafuta I le Atua. Ona o le tele o taimi ma itula e faia ai tatalo I lea potu, ua osia se fata faitaulaga e fesootai ai le lagi ma le laueleele, e pei lava o le tulaga I le faitauga mai le Tusi Paia o le aso. E toatele tagata ua tatalo mo soo se mataupu e aunoa ma ni tali, peitai a ulufale loa I lena potu e tatalo ai, e mulimuli ai lava tautinoga. Mo se faataitaiga, o lo’o faamauina le tele o tagata e ulufale I lea potu e iai faaletonu I o latou tino e matilatila mai I le vaai, ae e oo I le taimi e o ese ai ma lea potu, ua atoatoa o latou tino e aunoa ma faaletonu sa iai muamua. O le eseesega e le faapea o upu na faaaogaina I tatalo ae o le tatalo I se nofoaga e fesootai ai le lagi ma le laueleele. 

O so’o se fale ua faapaiaina ma faavanoaina mo se fale tatalo, ma faagasolo ai le tele o tatalo mo le tele o Tausaga, ia e talitonu o lenei fale ua faatumulia I le mana. E mafai ona e tatalo na o oe I aso uma, ae faaopoopo I lena, o soo se taimi e maua ai sou avanoa e te alu ai I le malumalu o le Atua e tatalo, aua e te misia. O le malumalu o le Atua o se nofoaga e faatumulia I le mana, ia faamautinoa le avea ma masani lou alu I lea fale e tatalo ai, I le suafa o Iesu, Amene.  

OPEN HEAVENS

MATALA LE LAGI MO LE ASO LUA 23 IANUARI 2024

Manatu Autu: O uō e sili ona pipii atu I lo uso (Friends stronger than brothers)

Tauloto – Faataoto 18:24 “O le tagata ‘ua fai ana uō, e i‘u ‘ina tigāina ai o ia, a o i ai le tagata alofa e sili ona pipi‘i mai i lo le uso...”

Faitauga - Tusi Paia: I Samuelu 18:1-4

Upu Folafola

O se faiga uō o se mata’upu ma’ale’ale pe a talanoaina, ae maise i lenei vaitau o aso e gata ai auā e to’atele tagata ua na o le manatu ma alolofa iai latou lava (2Timoteo 2:1-2). Ae ui i lea tulaga, e mana’omia e tagata uma ni uō mamae. O nisi o uo e māfana ma latalata atu ia te oe nai lo uso moni – o ituaiga uo ia e te mana’omia se to’atasi po o se to’alua foi, e felāta’I ma latalata ia te oe. O ituaiga uo ia latou te lu’iina oe e te faia ni mea sili mo le Atua ma latou ta’u atu ia te oe le mea moni i taimi ua le mafai e isi au uo ona latou faia. O I latou ia e mautinoa e tuu atu le tau’au e te mapu iai i taimi o ou puapuaga.

Fai mai le Galuega 3:1, na o atu Peteru ma Ioane i le malumalu. Atonu e te fesili oe ia te oe, afai sa afio mai le Agaga Pa’ia I luga o le 120 tagata i le Galuega 2, aisea ua na o le toalua lea ua ta’ua e le Tusi Pa’ia? O le mafua’aga i lo’u talitonuga; o i la’ua nei sa avea ma uo mamae a Iesu, i totonu o le li’o o tagata e pito latalata ia Iesu. E aofia ai I le lio lea, tagata e toatolu, o Peteru, Ioane ma Iakopo. Mai iai latou nei, e pito vāvālalata le mafutaga a Peteru ma Ioane ae lei maliu Iesu. A e faitau i le Ioane 13:21-26, i le paseka mulimuli, ina ua faailoa e Iesu I lona ‘au so’o e iai le tagata o latou e faalataina o ia, e aunoa ma le fa’ailoaina o le igoa o le tagata, sa genogeno atu Peteru ia Ioane e fesili ia Iesu po’o ai. O se fa’ata’ita’iga lena o se uo mamae e mafai ona e fai iai e tatalo mo oe i se mataupu e te le o manino lelei ai, ma o le a ia fa’alogo mo se tali mo oe, mai le Atua.  

Ina ua tuanai le maliu a Iesu ma ua toetu mai le oti, sa manino lelei le vavalalata le la so’otaga ma le mafutaga. I le Ioane 20:1-8, ina iloa e Maria le Makatala, o Iesu ua toetu, ma tau atu e Maria I lona au so’o, e to’alua le ‘au so’o na femo’ei i le tuugamau, o Peteru ma Ioane. E malie le tulaga lenei, o Ioane na tusia le fa’amatalaga o le mea na tupu ma sa ia matua fa’amatala ‘auiliili, o ia na muamua i luma o Ioane, ma o ia sa muamua taunuu i le tuugamau – o le mea moni, sa ia ta’ua fa’alua lea tulaga! Ia te a’u ia, ou te fesili fa’alemafaufau, ‘Aisea na e ta’utino ma fa’amamafa mai ia i matou lea tulaga?’ E foliga mai pei sa iai se la’ua tauvaga i le la va fa’a le uō, poo ai o laua e pito sili ona alofa ia Iesu.

E te mana’omia ni uo mamae e tou te tauvā i le tulaga fa’aleuō, po o ai e sili atu ona umi na tatalo, o ai e sili ona to’aga e faitau le Tusi Paia, po o ai e sili atu agaga na manumaloina mo le Alii ma isi vaega faapena. O le so’otaga i le va a Ioane ma Peteru sa vavalalata ma mausali, ma sa faavae mai, i lo la mafutaga vavalalata ma Iesu. E te mana’omia uō e iai sootaga ma oe ma e fa’avaeina lo lo oulua so’otaga ma le mafutaga ia Iesu Keriso. E iai sau uō na te lui’ ma faamalosiau ia te  oe ia latalata i le Atua? I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 22 IANUARI 2024

Manatu Autu: Uō mamae a le Atua 4 (God’s best friends 4)

Tauloto – Ioane 15:2 “O la uma lava o ‘iā te a‘u e lē fua, e ‘ave‘eseina e ia; a o la uma e fua, e teuteu e ia, ‘ina ‘ia fua mai ai atili....”

Faitauga - Tusi Paia: Ioane 15:1-5

Upu Folafola

O se tasi o vaega e aofia ai I le avea ma uo mamae a le Atua, e tatau ona saunia lou tagata e teuteu e ia. O uo mamae a le Atua e maua fua I o latou olaga, o le tulaga lea na ia fetalai ai I le Ioane 15:16, afai e fua mai ni fua lelei ia te oe, ma tumau, e na te foai atu so’o se mea e te ole atu ai. 

E teuteu oe e le Atua pe afai e moni lou loto maualalo. E na te teuteu ia te oe seia o’o ina matua e oti lava I le tino. E na te faailogaina loa oe e faalatalata atu ia te ia, e amata loa ona ia teuteu ia te oe. O le taimi tonu lava lea e amata ai ona pauu ese nisi mai le lisi o uo mamae a le Atua aua e le mafai ona latou ui I le ala e aoai ma teuteu e le Atua. 

I le tele o Tausaga talu ai, ao ou iai I se malae vaalele, sa tatau ona faailoa uma tupe o lo’o ou fealuai ma au. Sa ou tauina atu I le tagata ofisa le aofai o tupe pepa sa ia te au ae le taua tupe siliva. Na fesili mai e faaali atu lau ato tupe, ma ua ou maasiasi aua ua maua ai la’u pepelo. Na faagalo e le tamaitai ofisa ae na ou faalogoina le siufofoga o le Atua I le taimi lava lena o faapea mai, ‘e taua tele oe ia te a’u, ma e le mafai ona ou taliaina au tamai pepelo na’. Afai e te manao e avea oe ma uo mamae a le Atua, e tatau ona saunia lou tagata e ausia ana tapulaa. 

E leai seisi e mafai ona latalata I le Atua e aunoa ma le teuteuina ia lelei. E tatau ona e gauai I lana a’oa’o mai pe afai e te fia avea ma ana uo mamae. Afai e aoai e le Atua le tagata ona o se mea sese na ia faia ae tetee pea le tagata e le tuua le agasala, e alu ese le Atua ma lea tagata, aua foi e le mafai ona faauo o ia I tagata e leiloa salamo. E fai lava ma aoai e le Atua ana uo mamae. E na te taitai I latou ise vaitau o tofotofoga e aoai ma teuteu ai, ina ia latou avea ma tagata ua atoatoa ona lelei o a latou amio, e aunoa ma se mea e mananao iai (Iakopo 1:3-4). E toaitiiti tagata e ui I tofotofoga faapenei ae iu ane ua atoatoa ona lelei o amio. E toaitiiti foi tagata e ui ma gauai I nei tofotofoga e aunoa ma le o ese ma le faatuatua. O e lavea I tagata faapea?

Le au pele e, e moni o le aoaiga ma le teuteuina e le Atua e ono tiga, ma e manaomia le lava o lou taimi I le mamalu o le Atua e faatupuina lou malosi faaleagaga. Afai e te tumau pea e aunoa ma le fiu gofie, e le gata o le fua mai o fua lelei ia te oe, e avea foi oe ma uo sili a le Atua, I le suafa o Iesu, Amene.  

OPEN HEAVENS

MATALA LE LAGI MO LE ASO SA 21 IANUARI 2024

Manatu Autu: Uō mamae a le Atua 3 (God’s best friends 3)

Tauloto – Mataio 6:10 “Ia o‘o mai lou mālō. ‘Ia faia lou finagalo i le lalolagi, e pei ‘ona faia i le lagi...”

Faitauga - Tusi Paia: 1 Korinito 3:5-9

Upu Folafola

E toatele tagata e manana’o e avea i latou o ni uo mamae a le Atua ina ia faia e le Atua so’o se mea e ole atu ai. O se tasi lenei o faamanuiaga mautinoa o le avea o oe ma uo mamae a le Atua peita’i, o uo mamae moni e fa’amuamua le Atua i mea uma ae lē o i latou.

O le faamuamua a le tagata e iloa i ona manaoga i ana tatalo. Afai o au tatalo e faapito mo oe lava i tami uma, e lē fia avea oe e le Atua o se tasi o ana uo mafana. O le mea moni e lē tali le Atua i au tatalo pe a ole atu ma le fa’alētatau ma le mana’o leaga (Iakopo 4:3).

O i latou o le a avea ma nisi o uo fa’apelepele a le Atua o tagata e tatalo I le tatalo a le Alii ma manana’o e avea ma mea faigaluega a le Atua e faia lona finagalo I le lalolagi. O tagata ia e faapea atu i le Atua e lē aunoa, “ ia faia lou finagalo i le lalolagi faapei ona faia i le lagi.” A tatalo i latou nei, e lē o atu ma ni manaoga faapito mo latou lava i taimi uma. A’o la latou amio e o atu I le mamalu o le Atua ma le naunau e fia faalogo i lona siufofoga po’o le a sona finagalo, ma tatalo ia faataunuuina lona finagalo I le lalolagi.

O taimi uma, e mana’omia e le Atua se tasi e tu i le va mo ona tagata, e manaomia se isi e tatalo mo se manaoga faapitoa e taofia ai agaga faalavelave, ae fai le finagalo ma le pule tutoatasi a le Atua i lea manaoga. Afai o oe o se tagata tatalo tu i le va, e te naunau i taimi uma e tatalo ia o’o mai ma ia faia le mea e finagalo ai le Atua, na te fa’alatalata atu oe iā te ia. E faailoa atu e ia mealilo na te lē faailoa i isi ma fa’aali atu ona fofoga e lē o iloa e isi. E faailoa atu fo’i mea o mamafa i lona finagalo ia te oe! Na o i latou e gaua’i e faia le finagalo o le Atua e avea ma ana uo faapelepele.

I le Mataio 26:36-38 na iloa e uō mamae a Iesu lona faanoanoa; na o latou vaai i le taimi o lona tigā I le fanua o Ketesemane ina ua fa’apa’ū faō o ia ma tatalo, “Lo’u Tama e, afai e mafai, ia aveese lenei ipu ia te a’u; ae aua le faia lo’u loto, a o lou finagalo.” O Iesu lava na valaaulia ana uo latou te mataala faatasi ma ia; o ana uo mamae o ana ‘au tatalo fo’i ia.

E mafai ona valaaulia oe e le Atua e nofo tatalo faatasi ma ia mo se mālō, lana ekalesia poo so’o se manaoga? E mafai ona e faagalo manaoga o au tatalo ae tatalo ia faia tau lava o manaoga mai le finagalo o le Atua faapei ona tatalo Iesu i le fanua o Ketesemane? E te naunau ea e faamuamua tau o mea e finagalo ai le Atua ae tu’u oe? I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 20 IANUARI 2024

Manatu Autu: Uō mamae a le Atua 2 (God’s best friends 2)

Tauloto – Isaia 41:8 “A o oe Isaraelu e la‘u ‘au‘auna, o oe Iakopo e, lē na ‘ou filifilia, o le fānau a Aperaamo la‘u uō..”

Faitauga - Tusi Paia: Eperu 11:5-6

Upu Folafola

Mai la tatou mataupu o ananafi ou te talitonu ua tatau ona e naunau e avea oe ma se tasi o uō mamae a le Atua. Afai e moni, ua tatau ona e su’esu’e ia i latou o uō mafana ma le Atua. O se tasi o amio o le a e maitauina i nei tagata, o le tele o le faatuatua.

O le faatuatua o se uiga taua e tatau ona maua e so’ose tasi e mana’o e fa’auō ma le Atua. E lē na o le fai mai e faatuatua a’o le faatuatua e fai ai faaiuga e lē faigofie ona malamalama ai le toatele. Ua tusia i le Roma 4:18 na faatuatua ma le fa’amoemoe Aperaamo a ua leai se mea e faamoemoe i ai - e tulaga ese lea ituaiga faatuatua. E lē gata ina faamoemoe lona loto, ae na fa’aalia i lona mautinoa ina ua ia fai i tagata e amata valaau ia ma lona toalua o “tamā o le nu’u” ma “tinā o le nu’u” e ui ua matutua ma leai se la tama. Fai mai Roma 4:19 e le’i manatu fo’i i lona tino ua oti, na talitonu lona loto i le Atua e aunoa ma se mea e faalagolago i ai lona loto mautinoa, o le vaai a tagata e pei e faaletonu lona mafaufau.

E mafai ona maualuga faapea lou faatuatua I le Atua, ma amata ai ona e tautala ma faatino, ae ofo ai tagata e lē malamalama i ala o le Atua ma iite ai i latou pe o oe ea o se tagata soifua. E te silasila ea i le Upu a le Atua e sili atu le moni ma le mafai na i loo se isi lava mea e aofia ai ma tulafono masani?A silasila mai le Atua i se tasi o faapea lona faatuatua, na te fa’alatalata atu lea uso iā te ia.

I po po fou o lo’u olaga kerisiano, na o’u a’oa’oina mai i le taimi o se vasega aoga Aso Sa e faatusalia le faatuatua i se tamaititi pe a oso mai se mea maualuga i le faatonuga a lona tamā e aunoa ma le fefe i pa’ū aua na te mautinoa e lē mafai ona misi, e sapo lelei ia e lona tamā. Ina ua o’u faalogo i lenei tala faatusa na amata ona o’u osooso e aunoa ma so’u fefe i o’u pa’ū aua ua o’u iloa mai lana upu, e lē mafai ona o’u pa’ū e sapo a’u e lo’u tamā. Ua o’u maitaua soose taimi o’u te tautala ai ma galue i le faatuatua e faavae i le Upu a le Atua, e aapa mai ona aao ma fa’alatalata atu a’u ia te ia.

E mafai ona maua se lua mafutaga vavalalata ma le Atua pe a e ta’utino mautinoa e ala i lou faatuatua. Afai e mafai ona faamoemoe i le leai o se mea e faamoemoe i ai ma avea o se vale i le vaaiga a tagata ona ua mausalī lou talitonu i le Upu a le Atua, e lē gata o le a e vaaia le moni o le Upu a le Atua i lou soifua, ae o le a e maitauina le ofoofota’i a le Atua ia te oe ma ia avea oe o se tasi o uō pele ia te ia. A aunoa ma le faatuatua e lē mafai ona o tatou faafiafia i le Atua. I le suafa o Iesu Keriso. Amene.

OPEN HEAVENS

MATALA LE LAGI MO LE ASO FARAILE 19 IANUARI 2024

Manatu Autu: Uō mamae a le Atua 1 (God’s best friends 1)

Tauloto – Iakopo 2:23 “Sa taunu‘u ai fo‘i le Tusi, ‘ua fa‘apea mai, “Na fa‘atuatua Aperaamo i le Atua, ‘ona ta‘ua ai lea ‘iā te ia e fai ma amiotonu;” sa ta‘ua fo‘i o ia o le uō a le Atua.”

Faitauga - Tusi Paia: Kenese 18:17-33

Upu Folafola

E ono faateia oe pe afai e te iloa e iai uō a le Atua. O uō a le Atua e latalata ia te ia e latou te iloa ma malamalama I uiga o le Atua e leiloa e le toatele. O tagata ia e malamalama I le Atua ona o mea na ui ai ma le Atua e le iloa e isi tagata. O tagata ia e le fia talanoa I le loloto o mea ua latou iloa ma maua mai le Atua aua foi e tele o tagata e le latalata I le Atua, e ono le malamalama ai ma soona faamasino.

O Aperaamo se tasi o uo mamae a le Atua. Na matua latalata o ia I le Atua na mafua ai ona faapea le Atua e le mafai ona ia natia mai ia Aperaamo se mea tetele na te fia faia I le lalolagi (Kenese 18:17). O Mose o se tasi o uo mamae a le Atua. Na matua latalata o ia I le Atua ma o le Atua lava na molimau ‘ma te fa‘afesaga‘i ‘ona mā tautala ma ia, e fa‘aali lava, ‘ae lē o ‘upu lilo; o le fa‘atusa fo‘i o le ALI‘I na te va‘ava‘ai i ai’ (Numera 12:8). O Ioane o lē na alofaina, o se tasi o tagata o loo manino o se uo mamae a le Atua. I tagata uma I le lalolagi, na finagalo le Atua o le a faaailoa ia te ia mea uma o le a tutupu I aso mulimuli (Faaaliga 1:1). 

O nei tagata e vavalalata la latou mafutaga ma le Atua ma na latou vaaia itu o le Atua e tele ina leiloa e le toatele. Na latou faalogo I mea mai le Atua latou te lei taua I nisi tagata, e oo I mea na suia ai lona finagalo (Kenese 18:24-32, Esoto 32:9-14). Masalo o se faataitaiga lelei o lo’o atagia I le mafutaga vavalalata I le va o Iesu ma Peteru, Iakopo ma Ioane. Aua na faatasi I latou ma le Alii o Iesu Keriso I luga o le mauga na liua ai Iesu, na latou vaaia lona mamalu (Mataio 17:1-2). Ina ua alu atu o ia e faatu mai le oti le afafine o Iairo, na o le toatolu lea na faataga e le Alii e mulimuli ia te ia ma na latou vaaia lona mana e faatuina ai le tagata mai le oti (Mareko 5:35-37). Na matua latalata I latou ia te ia na latou vaaia o ia I lona loto tiga I le fanua I ketesemane ao ia tagi atu I le Atua ina ia aveese le ipu mai ia te ia (Mataio 26:36-39). Na valaaulia foi I latou e Iesu e leoleo ma tatalo I le po ma ia. O le toatolu lenei, na latou mauaina avanoa matagofie ma Iesu e lei maua e isi. 

O se avanoa maualuga le avea ma uo mamae a le Atua. Ou te talitonu o so’o se tagata faatuatua, e tatau ona naunau ia aofia o ia I le vaega toaitiiti o uo mamae a le Atua, ma o le a ou talanoa I aso o soso’o atu nei I ala e mafai ona avea ai le tagata ma uo mamae a le Atua. O le a lou latalata I le Atua? I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 18 IANUARI 2024

Manatu Autu: O le tusi e manatua ai 3 (The book of remembrance 3)

Tauloto – Salamo 103:2 “Lo‘u agaga e, ‘ia e fa‘amanū atu i le ALI‘I, ‘aua fo‘i ne‘i galo se mea e tasi o ana mea alofa..”

Faitauga - Tusi Paia: Salamo 103:1-5

Upu Folafola

O le asō, ou te fia talanoa I le taua o le faaaogaina e tagata o se tusi e faamanatu ai le Agalelei o le Atua, e fai ma viiga e pei o le fai Salamo I le faitauga o le Tusi Paia o le aso.

I le faasolo mai o tausaga, ua ou iloa ai, e toatele tagata e faigofie ona vave galo le agalelei o le Atua ia i latou. Mo se faʻataʻitaʻiga, a sologa lelei le olaga, e faigofie i le tagata ona tumu i le agaga faʻafetai mo lē Atua na faia ia. Ae peitai, afai e le o sologa lelei mea uma, ua galo i lea lava tagata galuega uma na faia e le Alii mo ia, ma ua amata loa ona faasea ma tomumu. Na iloa lelei e Tavita lenei natura o le tagata e galo gofie le mea na faia e le Atua mo latou, o lea na ia tusia ai se faamanatu ia te ia lava I le tauloto o le aso.

Ina ua maea ona ia tusi le faamanatu I le Salamo 103:2 mo ia lava, na faaauau ona tatala e Tavita le Tusi e manatua ai faamanuiaga a le Atua i lona olaga ma amata ona vivii atu ia te Ia (Salamo 103:3-5 ). Na ia vivii atu mo le faamagaloina o ana agasala, mo lona faamalologa, ma le laveaiina o ia mai le tele o mala na semanu e faaumatia ai. Sa ia vivii atu i le Atua mo le faapaleina o ia i lona Agalelei, o lona Alofa ma lona Alofa mutimutivale. Na vivii atu foʻi Tavita i le Atua mo ona faamanuiaga ma le toe faafouina o lona malosi e pei o aeto.

Le au pele e, e taua tele lou manatua o le agalelei o le Alii i lou olaga. Na faia oe i lona faatusa, ma ua lava lena e fai ma māfuaaga e te faafetai ai iā te ia i taimi uma lava. O le taulaga a Iesu Keriso i luga o le satauro i Kalevaria mo au agasala, o agasala a le lalolagi atoa, o le isi lea mafuaaga e te faafetai ai i le Atua i taimi uma. E tatau ona e faafetai atu pea ia te ia mo le laveaiina o oe mai taunuuga o agasala ma ituaiga agasala leaga uma i le lalolagi. E pei o Tavita, e tatau ona e avatu le faafetai i le Atua mo lona alofa faamaoni ma lona alofa mutimutivale ia te oe. O lo’o faapea mai le Tusi Paia, semanu e faaumatia oe pe ana lē seanoa lona alofa mutimutivale (Auega 3:22) o le mea lea, o lena e te nofo aitalafu ai iā te ia, ma o loo faaauau ona e ola I lona agalelei.

Ou te mautinoa, e mafai ona faʻaauau pea a’u faamatalaga, ae e le mafai ona lava le faamatalaina o le tele o mafuaaga e tatau ai ona tatou vivii atu i le Atua i taimi uma. Le au pele e, tatala se tusi e manatua ai pea le Agalelei o le Alii i lou olaga i le asō ma amata loa ona e vivii atu ia te Ia. Vivii I le Atua I lenei aso atoa ma ia faia lea ma masani a’o e agai atu I luma, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 17 IANUARI 2024

Manatu Autu: O le tusi e manatua ai 2 (The book of remembrance 2)

Tauloto – 1 Samuelu 15:2 “O lo‘o fa‘apea ‘ona fetalai mai le ALI‘I o ‘au, ‘‘Ou te taui atu i le mea na faia e Amaleka ‘iā Isaraelu, ‘ina ‘ua tu mai o ia ‘iā te ia i le ala i lona alu a‘e nai Aikupito...”

Faitauga - Tusi Paia: Esoto 17:8-13, 1 Samuelu 15:1-2. 

Upu Folafola

I le aso ananafi, na ou taua nisi o mea matagofie e o’o I fanau a le Atua pe afai e tatala e le Atua le tusi e manatua ai a latou mea lelei na faia. O le aso, o le a ou talanoa I le tulaga e o’o iai ou fili po’o e ita mai ia te oe, pe a o’o ina tatala e le Atua le tusi e manatua ai mea lelei na e faia. 

I le faitauga o le Tusi Paia o le aso, na osofaia e le au Amaleka le fanauga a Isaraelu e aunoa ma se mafuaaga, ma na faamauina e le Atua lenei mea leaga e tetee ai iai latou. Na ia folafola foi e na te tafiesea lenei nuu mai le laueleele. I le tele o Tausaga mulimuli ane, na manatua e le Atua a latou amio leaga na faia I le fanauga a Isaraelu ma o lea na poloaia ai e le Atua Saulo ia fasiotia ma tafiesea tagata Amaleka mai le laueleele. Ou te tatalo ina ia aua nei tatalaina se tusi e manatua ai mea leaga uma na e faia, I le suafa o Iesu. 

Le au pele e, na tatala se tusi e matuia ma leaga I tagata uma e manatua ai le agasala a le uluai tamaloa ma le uluai fafine I le Kenese 3:19

‘E te ‘ai fo‘i au mea e ‘ai ma le afu o ou mata, se‘ia e toe fo‘i atu i le ‘ele‘ele. Auā na faiina ai lava oe; auā o le efuefu oe, ‘e te toe fo‘i atu lava i le efuefu.”

O lenei tusi e manatua ai le leaga, o lo’o taua foi I le Roma 3:23 ma le Roma 6:23. Le au pele e, e pau le auala e faasaoina ai mai le taui o lenei tusi e manatua ai leaga le lē usitai a ō tatou uluai matua, o lo’o maua lea I le vaega mulimuli o le ‘Roma 6:23 a o le ola e fa‘avavau, o le mea foa‘ifuaina mai lea e le Atua, i lo tatou Ali‘i o Keriso Iesu’.

Ua saunia e le Atua lenei auala e faasaoina ai ma lenei tusi e manatua ai leaga, ma o le ala lea o Iesu Keriso (Ioane 14:6). O le toto o Iesu na maligi I le satauro I le Kalevaria e tafiesea le taui o le tusi e manatua ai leaga pe afai e talia uma e tagata Iesu e avea ma o latou Alii ma Faaola. Le au pele e, afai e lei tuuina atu lou ola ia Iesu, e leai se isi ala e mafai ona faasaoina ai oe mai le taui o lenei tusi e manatua ai leaga, aua o le taui o le agasala o le oti ae o le meaalofa foaifuaina mai mo le ola e faavavau, e ala ia Iesu Keriso (Roma 6:23). Lafoai lou ola ia Iesu I le aso ona e faamaoni lea e ola faapaiaina pe afai e te lei faia lava. E pau lena o le auala e mafai ai ona e maua le alofa mutimutivale o le Atua ma tatala ai le Tusi o le ola mo oe. 

Ou te folafola atu, o so’o se tusi e manatua ai leaga na e faia ia tapunia e faavavau e amata atu I le aso, I le suafa o Iesu. Ua saunia e le Atua le ala e tasi e faasaoina ai le tagata mai le tusi e manatua ai leaga, o Iesu Keriso lea, I le suafa mamana o Iesu, Amene.