Samoan Devotional

OPEN HEAVENS

MATALA LE LAGI MO LE ASO TOFI 15 FEPUARI 2024

Manatu Autu: Mafuaaga na filifilia ai oe e le Atua (Why God chose you)

Tauloto – Mataio 23:12 “O sē fa‘amaualuga o ia ‘iā te ia, e fa‘amaulaloina lea; a o sē fa‘amaulalo o ia ‘iā te ia, e fa‘amaualugaina lea;.”

Faitauga - Tusi Paia: 1 Korinito 1:26-29

Tatalo

Afai na valaau le Atua ia te oe mo se galuega, e te ono manatu, “aisea ua ia filifilia ai a’u mai tagata uma e mafai ona faia lenei galuega”. Fai mai le Salamo 115:3, e faia e le Atua mea uma e finagalo ai. Talitonu mai, na ia faia lena faaiuga e faaaoga ai oe mo lena galuega a’o lei faavaeina le lalolagi. Na ia filifilia oe ae lei fetalai, ‘Ia malamalama’ I le Kenese 1:3. Fai mai le Efeso 1:4, 

fa‘apei ‘ona ia filifili mai ‘iā i tatou ‘ona o ia, a o le‘i fa‘avaeina le lalolagi, ‘ina ‘ia pa‘ia i tatou ma ia lē mata‘uleagaina i ona luma, i le alofa;

A ou vaai nei I tagata e naunau e fia iloa lo latou lumanai, ou te fai iai, ‘aua le popole ae malolo lelei, e te manatu ea ua le silafia e le Atua le mea e faia? E te manatu ea o nofonofo o ia I le lagi, valuvalu lona ao ma fesili mo ni fautuaga aua leisi laasaga e tatau ona faia?’ Na maea ona faatulaga e le Atua lou lumanai a’o lei faavaeina le lalolagi. O le tulaga lena ou te le popole ai, aua ua maea ona iai lo’u lumanai ae ou te le’i fanau mai. O le tulaga lea e tatau ai ona e faamaualalo aua e te lei filifilia oe (Ioane 15:16). E lei filifilia oe ona o ni ou so’otaga po’o le a’oa’oina, e matua tu’ufaafegai lava. Fai mai le 1 Korinito 1:27, ‘ua filifilia e le Atua mea vālea ma mea vaivai a le lalolagi. Afai ua ia filifili oe, o lona uiga e te valea pe a fua I tapulaa a tagata, e te vaivai ma lē tulagā I fua faatatau a tagata. Tusa pe foliga mai e te atamai I le vaai ma tapulaa a tagata, o le taimi e te lafoai ai mea uma I le Atua ma amata ona e ola ma soifua I tapulaa a le Atua, o le vaai a le lalolagi ia te oe o se tagata valea. O lea, aua le siitia lou ao ona o mea ua e ausia. Na faia e Nepukanesa ma ua o’o atu ai I le vao. Mo lou olaga atoa, e tatau ona e loto faafetai I le Atua. Fai mai Tavita I le Salamo 34:1 Ou te fa‘afetai i le ALI‘I i aso uma lava; e lē aunoa ona vi‘iga i lo‘u gutu.

Na malamalama lelei Tavita I le mea na tautala ai. Na filifilia o ia e le Atua e fai ma tupu o Isaraelu e ui e ono le palota iai lona aiga pe ana alu I se palota. Ou te talitonu I le tulaga lenei, o lo’o talanoa atu le Atua ia te oe e tusa ma lenei mea ona o le maualuga na te fia siitia ai oe. Afai e te faalogo ma faamaualalo, ona ia siitia lea o oe, ae afai e te musua e faamaualalo, ona ia faamaualaloina lea o oe (Mataio 23:12). Ia tafiesea mai lou olaga le faamaualuga, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 14 FEPUARI 2024

Manatu Autu: Tatalo mo faaipoipoga (Prayers for Marriages)

Tauloto – Roma 15:5 “Ia foa‘i atu fo‘i ‘iā te ‘outou e le Atua o ia e tupu mai ai le ‘onosa‘i ma le fa‘amafanafana, ‘ina ‘ia gatasitasi o ‘outou loto e tusa ma le finagalo o Keriso Iesu;.”

Faitauga - Tusi Paia: Failauga 4:9-12

Tatalo

1.       Tama, faafetai mo le meaalofa o le faaipoipoga. Faafetai I le meaalofa o le fai paaga. 

2.       Tama, ou te faafetai faapitoa mo faaipoipoga a le fanau I totonu o le Ekalesia, le nuu ma le lalolagi atoa.

3.       Tama, faamolemole ia avea lou olioli e faatumuina la’u faaipoipoga faapea faaipoipoga uma o lo’o faatasi ma a’u I le suafa o Iesu. 

4.       Le Alii e, i lou alofa mutimutivale, faamolemole toe faatumu so’o se mea ua gaogao I la’u faaipoipoga I le suafa o Iesu. E pei ona toe faatumu e Iesu le uaina I le faaipoipoga I Kana, ia faatumu so’o se mea ua mamago I la’u faaipoipoga, I le suafa o Iesu. 

5.       Tama, faamolemole ia avea lou poto e faatumuina ai au, lo’u toalua faapea totonu o aiga o lo’o faatasi ma a’u I le suafa o Iesu. 

6.       Tama, faamolemole faamanuia I faaipoipoga uma ia maua ni fanau e matutua ane ma auauna ia te oe, I le suafa o Iesu. 

7.       Tama, faamolemole ia avea lou filemu e silisili I mea uma e nofo tupu I so’o se faaipoipoga o lo’o fesoua’ina e matagi I le taimi nei, I le suafa o Iesu. 

8.       Tama, ia avea au fanau uma ua ausia le tulaga e faaipoipo ai e maua ni a latou faaipoipoga, I le suafa o Iesu. Faamolemole fesoasoani iai latou e faia ni faaiuga tonu e tusa ma lou finagalo mo latou olaga I le suafa o Iesu. 

9.       Tama, faamolemole ia e lia’ieseina so’o se laau e te le’i totoina I lo’u aiga ma aiga uma o lo’o faatasi ma a’u, I le suafa o Iesu.

10.   Tama, aua nei faataga le tiapolo e manumalo I la’u faaipoipoga. Ia ‘aua nei manuia so’o se fuafuaga a le tiapolo I la’u faaipoipoga,I le suafa o Iesu. 

11.   Le Alii e, faamolemole ia aua nei o’u faia se mea ma lo’u toalua e faatiga ia te oe. Faamolemole le Alii e, taitai I matou I mea uma matou te faia I le suafa o Iesu

12.    Tama, ia viia pea lau afio ona o la’u faaipoipoga, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 13 FEPUARI 2024

Manatu Autu: Pe a valaau le Atua ia te oe (When God beckons you)

Tauloto – 1 Samuelu 3:4 “ona vala‘au lea o le ALI‘I ‘iā Samuelu; ‘ua tali atu o ia, “O a‘u lenei.”

Faitauga - Tusi Paia: Mataio 11:28-30

Upu Folafola

Mai le faitauga o le Tusi Paia i le asō, ua tatou iloa ai a valaau le Atua ia te oe, o lo’o vala’auina oe, e te mālolo. E iai le ese’esega o galuega mamafa ma isi ituaiga galuega. E naunau le Atua ia e galue. Fai mai le 2 Tesalonia 3:10 “A fai e te lē galue e le tatau foi ona e ‘ai.” Peitai, o e galulue I galuega e faaaoga ai le malosi o le tino, aemaise galuega e faigofie, e galulue mai lava I le oso a’e o le la, i le goto ifo o le la. A mae’a ane le aso, e na o sina tupe itiiti na te mauaina e tausi ai lona tino faapea ma le agaga. Ou te folafolaina atu, E te le toe tigaina fa’apea e maua se mea’ai, i le suafa o Iesu.’

O se tasi o mafua’aga o lo’o e faitaua ai lenei tusi i le asō ona o lo’o vala’au le Atua ia te oe. A valaau mai, o lo’o ia fetalai  mai, ‘O lo’o valaa’u mai lou faamoemoega ma le taunu’uga’. I le Esoto 3:1-10 sa iai Mose i se vaega maotua o le toafa ma ua faafuase’ia ona ia vaaia se la’au talatala o lo’o mu i le afi ae lē fa’aumatia. Na ia fa’apea: ‘O le a ou faatafa ma tilotilo iai’. O le mea lena e ta’u o le vala’au, ma e o’o i le taimi na tali atu ai Mose, sa ta’u iai e le Atua, ua maea ona aso e nofo ai i le vao, ua o’o mai le taimi e fa’ataunu’uina ai lona valaauina. I le Mareko 3:13-15, na maliu Iesu i le tumutumu o le mauga ma ia vala’auina e sa ia finagalo e o atu ia te ia. O ia tagata (ae ese ai lava Iuta le Sakara) sa avea ma le ‘au Aposetolo ua tatou iloa i nei aso.

O le mea e te mua’i faia pe a vala’auina oe, o le amoina lea o lana ‘avega, i seisi fa’aupuga, o le avea o mea e naunau iai le Atua ma mea e te faatauaina, ma tuliloa mea ua ia tuliloaina. A e mafaufau loloto i le mea e pito sili ona tulituliloaina e le Atua, o agaga. Afai e te matua naunau i le ‘ausia o le taunuuga o lou olaga, e te amoina le ‘avega o le manumaloina o agaga, ona e vaai lea ua ia fa’atulagaina mea uma mo oe ia e maua le faamoemoega o lou olaga. 

O le sini ‘autu sa ia te a’u o le ‘avea ma Pule Sili o se Iunivesite I Aferika e pito sili ona talavou, ae ua valaau le Atua ia te au, ona ou amoina lea o le ‘avega e manumaloina o agaga.  O le auala lea na ou maua ai le faamoemoega autu o lou olaga ma o le taimi nei, ua valaau Tamā ia te a’u le tele o Pule Sili o Iunivesite. E te matua lē silafia lou vala’auina ma le faamoemoega autu o lou olaga se’ia vagana ua amata ona e manumaloina agaga, ma faia le galuega a le Atua.

Ne’i mea ane ua e manatu o le manumaloina o agaga o se matāfaioi e patino na o le ‘au faaevagelia ma faife’au, faamolemole su’esu’e mae’ae’a le Mataio 28: 19 – 20. O e uma e mulimuli ia Iesu Keriso ua tofia e fai tagata o nuu uma ma so’o, ma e aofia ai ma oe.

Tatalo

Tama, e pei o Tavita, ia e fa’atumulia a’u i le faamaufaailoga mai lou maota, ina ia ‘ausia lo’u taunu’uga ma le faamoemoega autu, i le suafa o Iesu, Amene.

OPEN HEAVENS

MATALA LE LAGI MO LE ASO GAFUA 12 FEPUARI 2024

Manatu Autu: Pe a tauave oe e le Atua (When God carries you)

Tauloto – Isaia 63:9 “O latou puapuagā uma na lē fai ai o ia mo latou fili; na fa‘aolaina i latou e le agelu mai ona luma. Na ia fa‘atauina i latou i lona alofa ma lona agalelei; na ia si‘itia i latou ma ‘ave ‘iā i latou i aso uma anamua..”

Faitauga - Tusi Paia: Mareko 10:13-16

Upu Folafola

I Le faitauga o le Tusi Paia o Le asō, na latou aumaia tamaiti ia Iesu ona ia tauave lea o i latou. Na ia faamanuia foi iai latou. A tauave e le Atua le tagata, e na te faamanuia foi iai e pei ona tusia i le Mareko 10:16. A e faitau i le tala tusia a’o ō ese le fanauga a Isarselu mai Aikupito, e te iloa ai na galulue faatasi malosiaga uma i le lagi, lalolagi ma lalo o le lalolagi ina ia manuia i latou. O le tulaga lea e tupu pe a tauave le tagata e le Atua, e faamanuia foi iai le Atua. 

Fai mai le Esoto 19:4 “Na ‘outou va‘ai atu i mea na ‘ou faia i Aikupito, na ‘ou ‘ava‘e ‘iā te ‘outou i luga o ‘apa‘au o aeto, na ‘ou ‘aumai fo‘i ‘iā te ‘outou ‘iā te a‘u nei”.

O nisi tagata e le malamalama i le faaupuga ‘ia faamanuia le Atua’, auā e fai mai lava, ‘tatalo mai mo a’u’. A faamanuia e le Atua, o lona uiga e galulue malosiaga uma i le lagi, lalolagi ma lalo o le lalolagi ina ia e manuia, o le uiga lena o le faaupuga ‘ia faamanuia le Atua’. Talitonu mai, e o’o i temoni e faatonuina e fesoasoani ia te oe pe a o’o ina tauaveina oe e le Atua. 

I ni nai tausaga talu ai, sa ou i Aferika mo se polokalame. A’o matou agai atu i le nofoaga e faia ai le polokalame, na matou fetaui ma le matuā poloka o le auala. E ui na faafeao la matou taavale e se leoleo ia faigofie ona faaavanoaina le auala, e lei fesoasoani i le poloka ona e lē usitai iai seisi. Ua faateia i matou i le sau o se tagata e pei se vale i luma o le matou taavale ma amata ona ia faaavanoaina le auala. E matautia foliga o lenei tagata, e te vaai atu lava i mata o le tiapolo ia te ia. Sa ia fatonutonuina malosi taavale e sōsō i tua ae faaavanoa le auala mo le matou taavale. Ina ua oo I le i’uga o le laina ua avanoa le alatele, na sau lenei tagata i le pito o le taavale sa ou iai ma ifoifo mai. A tauave oe e le Atua, e galulue mea uma mo lou manuia. 

Afai e te manao e tauave oe e le Atua, e tatau ona avea oe e pei o se tamaitiiti. I Le faitauga o le Tusi Paia o le asō, sa toatele tagata matutua sa iai, ae na o tamaiti na tauave e Iesu. Afai e le avea oe e pei o se tamaititi, e te ono mamafa tele e le mafai e le Atua ona tauave oe. O Lona uiga e tatau ona e loto maualalo, usitai I Lana upu, ‘aua le maitau i sese o isi tagata ma faatuatua I le Atua e pei o se tamaititit, e talitonu i so’o se mea e fai atu ai lona Tama. 

Na o fanau a le Atua na te tauaveina. E tatau ona e pei o se tamaitiiti i ona aao ona ia tauave lea o oe ma faamanuia ia te oe, I le suafa o Iesu, Amene.

OPEN HEAVENS

MATALA LE LAGI MO LE ASO SA 11 FEPUARI 2024

Manatu Autu: Fa’ata’ita’i ma faamau (Copy and paste)

Tauloto – 1 Korinito 11:1 “‘Ia ‘outou fa‘aa‘oa‘o mai ‘iā te a‘u, pei o a‘u ‘iā Keriso.”

Faitauga - Tusi Paia: 2 Tupu 2:8-15

Upu Folafola

Afai e i ai se tagata e te mana’o i le taunuuga o lona olaga, fa’ata’ita’i i ana mea sa fai. Ina ua tuua e Elia le lalolagi ma pa’ū ifo lona ofu tele, na ave e Elisaia le ofu, ta’ata’ai e pei ona sa faia e lona tamā, na alu atu i le vaitafe o Ioritana, taia a’i le vai e pei ona faia e lona tamā ma valaau i le Atua o lona tamā e tali mai iā te ia e pei ona ia talitonu i le valaau a lona tamā - ona tali mai lea o le Atua. Fai mai le aposetolo o Paulo, “Ia outou fa’aa’oa’o mai iā te a’u, pei o a’u iā Keriso.” (1Korinito 11:1). O le mafuaaga o le manuia o tagata ne’i, o loo i totonu o ā latou amioga ma galuega fai i aso ta’itasi. A mafai ona e maua ia mea ma fa’ata’ita’i i ai e te maua fo’i le taunu’uga lea e tasi.

Fai mai Roma 2:11; “Auā e lē fa‘ailogaina e le Atua ni tagata..”

E lē faapito lo tatou Atua; o le manuia na ia faamanuia ai le uso o lo’o e tulimata’ia ma fa’a amui’a i ai, e mafai fo’i ona ia avatu ia te oe pe a e faia e pei ona tatau ai. Fai mai Kenese 4:6-7; “Ona fetalai atu lea o le ALI‘I ‘iā Kaino, “Se a le mea ‘ua e ita ai? Se a fo‘i ‘ua fa‘a‘ū‘ū ai ou mata? 7Pe ‘āfai ‘e te amio lelei ‘e te lē maua ‘ea le fiafia? ‘Ae ‘āfai ‘e te lē amio lelei o lo‘o ta‘oto i le faitoto‘a le agasala. E ua‘i atu lona mana‘o ‘iā te oe, ‘e te pule fo‘i oe ‘iā te ia.” Na ta’u atu e le Atua iā Kaino a na ia faia faapei ona fai e Apelu semanū e manuia tutusa a la taulaga.

E fia ni tusi fa’atatau i tagata ola manuia ua e faitau ai? Mai i nā tagata fa’amanuiaina, e fia ni ata pu’e ma ni faatalanoaga ua e matamata ai? Ae fia ni tusitusiga fa’a ta’utinoga ua e su’esu’e i ai? O auala ia e iloa ai pe na faafefea o na maua e nei tagata le manuia ma o’o i le tulaga fa’aeaina ua i ai. E mafai ona e a’oa’oina mai i se tusi, i totonu o se itula ni lesona e fitusefulu tausaga na a’oa’oina ai e se tagata. A e maua loa nei lesona, fa’aaogā loa ma fa’ata’ita’i, e te maua ai le faaiuga manuia e pei ona i ai i latou e ona fautuaga; e lē mana’omia se fa’ata’ita’i pe sa’o pe sesē. O le tasi lea matagofie o le Upu a le Atua ma ou te talitonu o le ala lea o le tusitusi ma faamaumau o tala o le ‘au perofeta i aso ua mavae, ina ia o tatou faitau ai.

Fai mai Iakopo 5:10; O‘u uso e, ‘ia ‘outou fa‘aa‘oa‘o i le fa‘ato‘ato‘a i le leaga, ‘atoa ma le ‘onosa‘i o le ‘au perofeta, ē na tautala mai i le suafa o le Ali‘i..

Ia e avea auauna a le Atua ua muamua atu e fai ma fa’ata’ita’iga e te mulimuli ai, e pei ona fai mai ai Paulo i la tatou upu tauloto o le asō. Peitai ia e maitauina ma manatua o Iesu Keriso le fa’aa’oa’o sili tatou te fa’ata’ita’i ma mulimuli ai. Ioe e faamalosi’au I le fanau a le Atua e a’oa’o mai ia i latou ua saofagā atu i le ola e faavavau, peita’i o lou mulimuli, fa’ata’ita’i ma sili atu fo’i, e tatau ona o faatasi ma le finagalo ma ala o le Atua. I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 10 FEPUARI 2024

Manatu Autu: O le asiasi ma tuliloa e tāua i le Atua  (Follow Up Is Key To God)

Tauloto – Ieremia 23:2 “O le mea lea ‘ua fa‘apea ‘ona fetalai mai ai o le ALI‘I le Atua o Isaraelu i le ‘au leoleo mamoe o ē leoleo i lo‘u nu‘u: ‘Ua ‘outou fa‘ata‘ape‘apeina la‘u lafu mamoe ma tulia i latou ma ‘ua lē asiasi ‘iā te i latou; fa‘auta, ‘ou te taui atu ‘iā te ‘outou ‘ona o le leaga o a ‘outou amioga, o lo‘o fetalai mai ai le ALI‘I”

Faitauga - Tusi Paia: Ieremia 23:1-8

Upu Folafola

I le tatou Tusi Paia faitau o le asō, o le a e vaai ai e lē māmā i le finagalo o le Atua le galuega asiasi ma tuliloa i le au uso. Na ia fetalai o faifeau, e aofia ai so’o se tasi ua tofia e fai ma ta’ita’i e tatau ona latou fafaga i mamoe. A o latou lē faia ua o latou fa’ataapeapeina le lafu mamoe ma e i ai mala o loo faatali mai mo i latou. Na fetalai le Atua i le fuaiupu e 7 & 8 e lē gata ina finagalo e iloa e le fanauga a Isaraelu o ia o le Atua na aveina a’e i latou mai le pologa i Aikupito, a ia faapea, O loo soifua le Alii, o lē na aveina a’e, ma lē na aumaia le fanau a le aiga o Isaraelu mai le nu’u i le itu i matu, ma nu’u uma na a’u tulia ai i latou; e nonofo fo’i i latou i lo latou laueleele, o Siona poo le Lagi.

E lē lava i le Atua lou lauga i e agasala. I tua atu o lou faamalosi ia i latou e ta’uta’u a latou agasala, salamō ma ofo o latou ola iā Keriso, e sili atu le tāua I le Atua lou tuliloa ma asiasi pea iā i latou seia matutua fa’aleagaga. A’oa’o mai le au aposetolo; ma fa’ata’ita’i i ai; pe a uma ona faaolaina tagata e ala i le galuega tāla’i a Paulo, e nofo ai pea le aposetolo ma i latou mo se vaitaimi seia mautinoa ua mausalī lo latou faatuatua. (Galuega 18:11, Galuega 19:10, Galuega 28:29-32). Tusa fo’i pe alu e lē tuua ai le tusitusi e faamalosi atili i latou. O tusi lea ua tatou faitau ai i le Tusi Paia i aso nei ma fa’amalosia ai fo’i tatou. E lē gata i lea e fa’a avanoa fo’i le taimi e asiasi ai iā i latou ina ia fa’amautūina atili i latou (Roma 1:11). 

Fai mai le Tusi o Galuega 15:36; Ua mavae isi aso, ona fai atu lea o Paulo iā Panapa, “Ina ta fo’i atu ia, ta asiasi atu i le au uso i aai uma lava sa ta tāla’i i ai le Afioga a le Alii, poo faapefea i latou.”

A tu’u mai i le taimi nei, a uma ona e manumalōina se agaga mo le mālō o le Atua, faamau lana telefoni ma auala uma o fesootaiga e mafai ai ona e asiasi ma faamalosi ai i le uso. E tatau fo’i ona e alu e asi , e te iloa ai po’o faapefea mai i latou. Asiasi le ekalesia o lolotu ai po’o auai i galuega tāla’i ae po’o faamaoni i le galuega a le Atua. Tu’u i ai le avanoa e fesili atu ai i mataupu e fia malamalama ai e uiga i le savaliga ma le Atua. O i latou e fou I le olaga faaolaina e masani ona tele mea e fia fesili ai; toaga e tali a latou fesili ma fa’amalamalama i ai le Upu. Aua le tuua i latou ne’i osofa’i e le tiapolo a’o le’i lava tapena ma malolosi e fa’asagatau i le fili; asiasi ma tulituliloa i latou seia malolosi atoatoa ia Keriso. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 9 FEPUARI 2024

Manatu Autu: E manaomia I le seleselega le au faigaluega (Harvest requires labour)

Tauloto – Mataio 9:37 “Ona fetalai atu lea o ia i ona so‘o, “E tele le saito e seleseleina, a o le ‘au faigaluega e to‘aitiiti ia;,”.

Faitauga - Tusi Paia: Mataio 9:36-38

Upu Folafola

A fia faaaoga oe e le Atua mo le seleselega o agaga mo lona malo, e tatau ona e toaga e galue. Aua foi e tele atu le aufaigaluega e manaomia mo le seleselega I lo le taimi o le lulu. E mafai ona fai atu le au faifaatoaga ia te oe e mamafa galuega i le taimi e toto ma lulu ai, ma afai e te totoina I se faatoaga tele, e manaomia le matuā toaga e galue. Peitai, e sili atu ona manaomia le galue malosi I le taimi o le seleselega. Auā foi e faatapulaa le taimi e faia ai le seleselega. Afai e te lē seleseleina fua o le faatoaga I totonu o le taimi faatapulaa, e pala fua. O le seleselega o agaga ua saunia e le Atua mo lenei taimi o aso mulimuli e matua matautia le telē, ae e faatapulaa le taimi. Ou te tatalo ia foai atu e le Atua le alofa tunoa e aumai ai I totonu le seleselega I le suafa o Iesu. 

Ina ua lafo le upega o Peteru I le sami I le Luka 5:1-10, na ia faia na o ia e aunoa ma se fesoasoani, ae ina ua aoina mai le seleselega, ua ia silafia e manaomia nisi tagata e aoina mai. Fai mai le Faataoto 12:27, e lē tunua e le paiē lana manu sa tuli; a o le ‘oloa tāua a tagata, e i ai lea i lē ‘ua filigā i galuega. E te silafia le uiga o lea fuaitau? O lona uiga, e manaomia le galue malosi e tulimanu ae sili atu le malosi e manaomia e galue ai e saunia ai le manu na maua mai ina ia aua nei leaga. E le maimauina le faauuga a le Atua I se tagata e manumaloina agaga ae leai se tuliloaina ina alualu I luma lea tagata I le agaga. 

O le manumaloina o agaga e faigofie atu I lo le tuliloaina ma a’oa’oina se tagata faatoa faaolaina seia oo ina matutua ia Keriso. O le tulaga lea e tele tagata e sili atu ona fiafia I le galuega faaevagalia I lo le faifeau tausi Ekalesia. O le fai evagalia e alu atu I le pulelaa, lauga le talalelei o le faaolataga, faia le valaau mo le faaolataga, ona malaga ese lea, ae tu’u I le faifeau le galuega mamafa ma le fita e a’oa’o tagata faaolaina fou ma tuu I polokalame e fesoasoani ina ia tuputupu ae I le agaga, mafai ona tali a latou fesili, a’oa’o I latou seia o’o ina mafai lava e latou ona tutu. A o’o I le taimi o le faaolaolaga, e tatau ona saunia lou tagata e le gata e fai le galuega o le faaevagalia ae faapena foi i le faifeau. Fai mai le Ioane 15:16, e tatau ona e manumaloina agaga ma ia faamautinoa e tutumau ai ma aua nei toe foi I le tiapolo. 

E ui I le tiga o le taimi e fanau ai le pepe, e faigofie atu lava I lo le tausia o le pepe seia oo ina matua. E mafai ona tau atu e nisi o le galuega a le tina mo lana fanau e le taitai ona uma. Ua saunia oe e a’oa’oina ma taitaia tagata faatoa faaolaina seia o’o ina latou maua le lagi? Afai o lau tali e ioe, o lona uiga e fiafia le Atua e faaaoga lou tagata mo lana galuega. Fai galuega uma e manaomia e tuliloa ma a’oa’oina agaga fou seia o’o ina matutua ma o atu I ala tonu e maua ai le lagi, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 8 FEPUARI 2024

Manatu Autu: O le a le ituaiga ipu?  (What kind of vessel?)

Tauloto – Mataio 13:49 “E fa‘apea fo‘i i le gata‘aga o le lalolagi; e ō atu le ‘au agelu o ē vavae ‘ese i ē amio leaga ma ē amiotonu,”.

Faitauga - Tusi Paia: 2 Timoteo 2:15-21

Upu Folafola

I le faitauga o le Tusi Paia mo le aso, o lo’o faamatala ai ituaiga ipu e maua i le fale o se tagata taualoa. O lo’o faapea mai, e maua ai ipu e tauleleia e iai foi ipu e tauleagaina. E te ono manatu pe aisea e taofia ai e le Alii ipu e tauleagaina I totonu o lona maota, aisea ua lē lafoai ai I fafo? O le fesili lava lea e tasi e fesiligia e le toatele pe a manatu i le tino o Keriso ua iai I aso nei. Ua faapea mai, ‘aisea ua le faaumatia ai e le Atua faifeau pepelo uma? Aisea ua ia lē faailoa ai le toatele o lo’o faaaogaina lona suafa e faaputu ai lo latou tamaoaiga, ma lauiloa ai?’ O le tali e maua i le Mataio 13:24-30. O le fuaiupu e 29 ma le 30 o lo’o faapea mai:

29A ‘ua fai atu o ia, ‘‘Aua, ‘ina ne‘i ‘outou lia‘i ma le saito pe a ‘outou vele ‘ese le titania. 30Tu‘u ia, ‘ia tupu lua pea se‘ia o‘o i le seleselega; a o‘o atu i ona po e selesele ai, ‘ou te fai atu ai i ē selesele, ‘Ia ‘outou mua‘i fa‘apotopoto mai le titania ma ‘outou fusia i fusi e susunu ai; a o le saito, tou te fa‘aputuina lea i lo‘u fale saito.’”

E le vavevave ona faia e le Atua se mea; e iai le mafuaaga o mea uma na te faia. E iai faife'au pepelo ua talitonuina e nisi Kerisiano. Afai e faaumatia e le Atua na faife'au, e ono aafia ai le faatuatua o i latou o loo mulimuli ia i latou. A faapea e faapotopotoina le titania e aveese e susunu, e ono liaina faatasi mai ai ma saito. Aua e te popole i tagata eseese o se ekalesia, e afio mai le Atua e tuueseese le saito mai le titania, ma a o’o ina faataunuuina, o le a i ai le au taufaitagiaue ma le lilivau o nifo.

Afai e te faapea mai o oe o se Kerisiano, ae ua e tauleagaina le Alii, e sili lou sui loa i le taimi lenei. Afai e musua le tagata e sui, e lē o se faafitauli lenā vaega. O le afi e susunuina ai, o lo’o faasolo ina vevela ma aasa i aso uma. O lenā tagata e mafai ona faaauau pea ona olioli I faamanuiaga o le ta’ua o se Kerisiano i le taimi nei, ae peitai o le a afio mai le Alii ma le taui o tagata taufa’asese, ma i lena aso, e na te lē taliaina se faatoesega.

Le au pele e, afai o oe o se tasi o tagata taufaasese, e sili ona e salamo moni i le taimi nei, lafoai ou ala agasala ma tuuina atu moni lou ola ia Iesu Keriso.  Ua na o le pau lea o le ala e faasaoina mai ai oe, mai le faamasinoga o le a o’o mai, mo i latou uma e avea ma ipu ua tauleagaina. O le a le ituaiga ipu o lo’o e iai I le fale o le matai sili? I le suafa o Iesu, Amene. 

OPEN HEAVENS

MATALA LE LAGI MO LE ASO LULU 7 FEPUARI 2024

Manatu Autu: O se tama oe a ai?  (Whose child are you?)

Tauloto – Mataio 7:20 “O lea fo‘i tou te iloa ai i latou i o latou fua”.

Faitauga - Tusi Paia: Mataio 7:16-20

Upu Folafola

O loo tusia I le Ioane 1:12 

“A o i latou uma o ē na talia o ia ma fa‘atuatua i lona suafa, na ia avatu i ai o lea manuia, ‘ia ‘avea i latou ma fānau a le Atua”.

Afai ua e talia Keriso I lou loto ma e faatuatua I lona suafa, e lē na o upu, ae o galuega, ua  o’o I tagata o loo tou faatasi, e latou te iloa atu I lou olaga o oe o se tagata faatuatua I le Atua, o le tulaga lena e agavaa ai e taua o se atalii po’o se afafine o le Atua.

I le isi itu, fai mai le Tusi Paia e iai foi fanau a le tiapolo. Sa tali atu Iesu I le au Faresaio ma ia faapea atu: 

O ‘outou nai lo ‘outou tamā, le tiapolo, tou te fia faia fo‘i mea e tu‘inanau i ai lo ‘outou tamā. O le fasioti tagata ia talu le amataga, e lē tu lava ia i le ‘upu moni, auā e lē o i totonu lava ‘iā te ia le ‘upu moni. A tautala ia i le tala pepelo, o lana lava lea e tautala ai, auā o le pepelo ia ma le tamā o le pepelo. Ioane 8:44.

O le fesili, e faapefea ona e iloa le eseesega o le fanau a le Atua ma le fanau a le tiapolo? E talafeagai le tali a le Tusi Paia I lenei fesili. Mo le faataitaiga, fai mai le Tusi Paia, o tagata e manana‘o i le lalolagi, po’o mea o i ai i le lalolagi, e lē o iai le alofa i le Tamā iai latou (1 Ioane 2:15-16). O lo’o manino e le mafai ona taua ia tagata o fanau a le Atua. Afai e te vaai I se tagata e sili atu le manao I mea o le lalolagi I lo le alofa I le Atua, e le o iai I lea tagata le alofa I le Atua ia te ia ma e le o ia o se alo o le Atua pe a tumau ai pea I lea tulaga. 

O se atalii poo le afafine o le Atua o se tagata ua fanaufouina I le Agaga ma e taulai le vaai I mea o le agaga I lo mea o le lalolagi. Fai mai le Ioane 3:3-7, o so’o se tagata e fia ulufale i le malo o le Atua e tatau ona fanaufouina I le agaga, e mautinoa na o fanau a le Atua e ulufale I lona malo. O le mafuaaga lea e tatau ai ona e toe fanaufouina. 

Le au pele e, afai e te fanaufouina, ua e fanau I le Agaga, ma e avea moni oe o le fanau a le Atua. Afai e te fanaufouina i le Agaga, e amata loa ona e ola ma soifua I le Agaga ma taitaiina e ia. E amata ona iloa ma fua mai fua o le Agaga e pei ona tusia I le Kalatia 5:22-23. Ia manatua, e iloa I le fua I lou olaga po’o ai moni lou tamā. Su’esu’e lou ituaiga tagata ma amioga po’o ai o lo’o atagia ai, po’o Agaga Paia po’o le tiapolo, I le suafa o Iesu, Amene.    

OPEN HEAVENS

MATALA LE LAGI MO LE ASO LUA 6 FEPUARI 2024

Manatu Autu: Ua iinei le toe faaolaolaga  (Revival is here)

Tauloto – Salamo 85:6 “‘E te lē toe fa‘aolaola mai ‘ea ‘iā te i matou; ‘ina ‘ia fiafia lava lou nu‘u ‘iā te oe?”

Faitauga - Tusi Paia: Ioelu 2:28-32

Upu Folafola

Ua taunuu mai le toe fa’aolaolaga ma na o I latou ua nofo sauni e latou te maua. Ua faia e le Atua se mea fou, ma e finagalo e fa’aaoga i latou ua lotomalie e faaaogaina, ma e le na o faife’au  ma tagata o le Atua, ae aofia ai ma tagata lautele ua fa’atumulia i le Agaga Pa’ia. Afai e le’i papatisoina oe i le Agaga Pa’ia, e sili ona e ai’oi loa ia te ia mo lou papatisoina. Ua iinei le toe faaolaolaga ma e le finagalo le Atua e fa’aaogaina na o faife’au, ae finagalo e fa’aaoga uma lana fanau e naunau ma avanoa. O le fesili taua, e te agavaa e faaaogaina oe e lou matai?

E lua vaega e sili ona tāua e mana’omia ina ia e agava’a ai mo le galuega a lo tatou matai, mo lenei faaolaolaga. O lo’o ta’ua i le 2 Timoteo 2:21 “O lenei, ‘ai se tasi e fa‘amamā ‘iā te ia a‘i nei mea, ‘ua ta‘uleagaina, e fai o ia ma ipu e ta‘uleleia, e fa‘asāina, e aogā fo‘i mo le ali‘i, ‘ua saunia mo galuega lelei uma.”

O le mea muamua e tatau ona e faia o le faamāmaina o lou tagata mai so’o se agasala, e tatau ona e faapaiaina. O le faapaiaina e afua mai i lou su’esu’e atili ma le faalagolago tasi I le upu o le Atua (Ioane 17:17).

Lona lua, e tatau ona saunia lou tagata e galue. E le mafai ona fa’aaogaina oe e le Atua pe a fai e te paiē. E na o tagata ua sauni e galue malosi, na te fa’aaogaina. Fai mai le Faata’oto 18:9: 

“O le ua paiē foi i lana galuega, la te uso ma le na te faamāumau mea” 

Ua fa’atusa e le Atua le tagata paiē i le tagata e fa’amāumau mea. E le fa’amāumau e le Atua lana fa’au’uga ia te oe pe afai e te paiē. Afai ua ia fa’au’uina oe, e le o se taimi lea e te fifilemu ai, a o le taimi loa lena e te matua galue malosi ai.

Le ‘au pelē, e mana’omia lou galue malosi e ‘avea ai ma se tasi e manumalō, ae e sili atu le mana’omia o lou galue malosi ina ia e tumau I le manumalo. Afai o faigatā ona e manumalo ma ‘avea ma siamupini, e mana’omia le matua uuna’i o lou malosi ma atili ai ona e koleni. Auā o le taimi e te manumalo ai, o le taimi fo’i lena e te silafia ai, o lo’o taumafai isi tagata e tulituliloa oe ina ia se’i ese mai lou pale. O lo’o manino mai ai, e sili atu le le avea ma siamupini I lo le avea ma siamupini ona le toe tumau lea o se siamupini a’o lo’o iai I le taimi malosi o le talavou.

O le tulaga tigā I le lē toe avea ma siamupini, e le o le manu’a I le tino, a o le lagona māasiasi i le savalivali atu i le auala, ae maitauina tagata sa vaai maualuga I lona tulaga siamupini, ua fa’afuase’ia ona fuli ‘ese o latou fofoga mai ia te ia.

Tatalo

Tama e, afai e te sa’ilia tagata e faaaogaina mo lou viiga, fa’amolemole, ‘aua e te tu’ulafoai ia te a’u, I le suafa o Iesu, Amene.