Samoan Devotional

OPEN HEAVENS

MATALA LE LAGI MO LE ASO LULU 6 MATI 2024

Manatu Autu: O lo’o Talanoa atu le Atua ia te oe - (God is talking to you) 

Tauloto – Iakopo 1:22 “A ‘ia fai ‘outou ma ē ‘ana‘ana i le ‘upu, ‘ae ‘aua le na ‘ona fa‘alogologo i ai, o fa‘asesēina ai ‘outou e ‘outou....”

Faitauga - Tusi Paia: 2 Samuelu 12:1-7

Upu Folafola

O le tele o taimi pe a tatou o atu I faapotopotoga a kerisiano, ae tatou faalogo atu e pei e faigata ona folo I totonu le mataupu o le lauga, e iai lava le manatu, o lo’o talanoa mai le Atua I lou tuaoi ae lē o tatou. Ou te talitonu na e manatu faapea muamua. E iai lava taimi e lauga ai le failauga I mataupu e tatau ona faasaina ma e lē logo malie I lau faafofoga, ona tatou faamafanafana lea iai tatou ma faapea, ‘Ailoga o talanoa mai ia te a’u, e mautinoa o lo’o talanoa mai I lo’u tuaoi’. Aua nei faaseseina oe pe a tau tonu le upu ia te oe, o lo’o talanoa atu le Atua ia te oe ae lē o seisi tagata. O so’o se taimi e te faalogo ai I le upu a le Atua, aua e te tusitusi lima. Saili I totonu ia te oe, ma a e vaai atu e te lē o ola ma soifua e tusa ma tapulaa a le Atua, ia e faia loa se suiga e amata I le asō. 

I le faitauga o le Tusi Paia o le asō, na sau se perofeta I le tupu o Tavita ma ta’u atu ia te ia le tala I se tamaloa mau’oa na ia gaoi mai se tamaloa mativa lana tamai mamoe e tasi. Na fasia e le tamaloa mauoa le mamoe e tasi a le tamaloa mativa e faafiafia ai i ana malo asiasi mai, ae ua lē fasia se mamoe mai lana pa mamoe tele. Na matua ita ma toatama’i Tavita ma faapea mai, ‘e tatau ona oti lena tamaloa’. Ona faliu atu lea o le perofeta ia te ia ma faapea atu, ‘o oe le tamaloa lena’. E tele taimi e talanoa mai ai le Atua I ai tatou ma ni feau faapea, ma e pei o Tavita, e vave ona tatou faamasino I isi tagata, peitai a faaavanoa se taimi e te manatunatu ai I le feau mai le lauga, e leiloa po’o tatou o lo’o atagia mai ai. 

O le auala e tuputupu a’e ai se kerisiano, e le faapea e manatu o so’o se lauga o lo’o faasino I isi tagata ae le o tatou. Ia e faalogo ma faitau e peiseai o oe o lo’o talanoa sa’o mai iai le Atua. Ia e talia le mea moni, e te ono lē o faatinoina nisi o mea I le sa’o e tatau ona iai, ma e alagatatau ona faatino mea uma e tatau ona faia e faasa’o ai. O le mafuaaga e tele ai kerisiano e lē amio e pei o Keriso, e le faapea e lē o a’oaia ma faatonu e le Atua, ae a faatonu atu, e manatu I latou o loo faatonu isi tagata. Le au pele e, o lo’o talanoa atu le Atua ia te oe I le aso. O lo’o finagalo o ia e te lafoai atu mea uma ia te ia e aunoa ma le taofiofi o seisi mea. Aua nei e faapei o I latou e faamaa’a o latou ua, aua o le iuga o ia tagata o le nutimomoia (Faataoto 29:1). O so’o se taimi e te faalogo ai I se lauga pe faitau foi lau Tusi Paia, ia e manatu ua na o oe lava o lo’o talanoa mai iai le Atua, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 5 MATI 2024

Manatu Autu: Fuafuaga autu a le Atua - (God’s Master Plans) 

Tauloto – Ieremia 29:11 “Auā o a‘u nei, ‘ua ‘ou iloa manatu ‘ua ‘ou manatu ai ‘iā te ‘outou, o manatu i le manuia, ‘ae lē o le malaia, o lo‘o fetalai mai ai le ALI‘I, e foa‘iina atu ‘iā te ‘outou le i‘uga e i ai le fa‘amoemoe...”

Faitauga - Tusi Paia: Kenese 37:23-50:19-20

Upu Folafola

O le Atua o le Tufuga o Fuafuaga ‘autu. E mamao lava i luma ana fuafuaga fa’ata’atia. I le faitauga mai le Tusi Paia o le asō, sa taupulepule uso a Iosefa e fa’aoo I le oti ia te ia, peita’i latou te le’i iloa, e o’o ina fa’aaogaina e le Atua a latou taupulepulega leaga ina ia faataunu’uina le faamoemoega o le olaga o Iosefa. E mata’utia fuafuaga ‘autu a le Atua. Tatou te iloa foi le isi fa’ata’ita’iga i le tusi o Eseta, sa fuafuaina e le Atua e fai Eseta ma Masiofo, ae e le’i amataina le faufauga a Haamanu na te fa’aumatia le fanauga a Isaraelu. E tele taimi, tatou te manatu e le o iai ni mafua’aga o mea o tutupu ia i tatou, ae o lo’o fa’ata’atia ma faagasolo e le Atua ana ia fuafuaga.

I le 1 Samuelu 17, o lo’o faamatala e le Tusi Pa’ia se sauai na ia tau faamatau I se autau a se atunuu I le 40 aso. Ae I lena taimi, i se tasi o nu’u mamao i tua, latou te le o silafia lea sauai, sa iai se tamā matua na ia auina atu lona atalii talavou e momoli mea’ai i ona uso o lo’o i le taua. O lena atalii talavou, o Tavita o le talavou ua maea fa’au’uina e le Atua e avea ma Tupu o Isaraelu. Ae lei tupu lea tulaga, sa aoaoina e le Atua Tavita I le fasiotia o ni sauai I le tuu ane ia te ia le liona ma le urosa na te fa’aumatia. A e faitauina le tala lenei, e te iloa ai le fa’amatalaina e Tavita i le Tupu le a’oa’oga sa ia maua mai i le vaomatua, ua agavaa ai o ia e mafai ona faasagatau ma fasiotia se sauai.

O lo’o fa’amatala mai I le Galuega 16:9-40 se isi fuafuaga maoa’e a le Atua. Sa finagalo le Atua e fa’asao agaga o se tagata ma lona aiga, peitai ona o le galuega a lea tagata, e le mafai ona auai ini faapotopotoga e talai ai le talalelei. I le galue ai I le falepuipui, e le mafai ona ia alu ese mai le falepuipui ‘aua o ia na te va’ava’aia pagota o taofia ai. O lona uiga sa manaomia e le Atua se tagata e alu i le falepuipui e lauga ia te ia. I lea tala, e te silafia manino ai le fuafuaga a le Atua, i se faaaliga, sa fai se tagata ia Paulo ‘Sau I Maketonia ma fesoasoani ia I matou’. Na malaga lea o Paulo I Maketonia e tusa ma le faaaliga, tuli ese le temoni mai se teineitiiti, ma i’u ane i le falepuipui, ona o se aiga sa moomia ona fa’aolaina. Fa’atuatua i le Atua ma usita’i i so’o se fa’atonuga na te tuuina atu ia te oe. Afai atu loa e te alu I lea itu, usita’i loa ia te ia ina ia avea oe o se ipu e na te fa’aaogaina e faataunuuina ai ana fuafuaga.          

Tatalo

Tama e, faamolemole faaali mai ia te a’u au fuafuaga, ma fesoasoani mai ina ia ou savali ai ma le manuia, I le suafa o Iesu, Amene.

OPEN HEAVENS

MATALA LE LAGI MO LE ASO GAFUA 4 MATI 2024

Manatu Autu: O le tagata o lou lima taumatau 3 - (Your Right Hand Man 3) 

Tauloto – 1 Samuelu 22:2 “Ua fa‘apotopoto atu fo‘i ‘iā te ia tagata uma o ē na tigāina, ma tagata uma ē na ‘aitalafu, ma tagata uma o ē ‘ua tigā le loto, sa fai o ia ma ali‘i ‘iā te i latou; sa ‘iā te ia pe ‘atoa se to‘afa galau o tagata..”

Faitauga - Tusi Paia: 2 Samuelu 23:8-23

Upu Folafola

O mea na faia e tagata lima taumatau ua taua o ‘tagata matautia aTavita’. I le 2 Samuelu 23:16, na latou aumaia se vai e ui na lamatia ai o latou ola, e tali ai le fia inu o Tavita. E ui o ni tagata nofo maumausolo I latou I le faatoa feiloai ai ma Tavita, ae na tulai mai oni tagata totoa I lalo ole taitaiga a Tavita, ma na siitia I latou I tulaga mautofi I le autau. O Aitofele, o le lima taumatau a Tavita ma e fai mai le Salamo 41:9, sa ia nofo I le laulau a le tupu o Tavita. A avatu e le Atua ia te oe ni tagata e fai ma ou lima taumatau, e tatau ona ave iai le faaaloalo ae le faapea e tu’u I lalo. O Iosefa o le lima taumatau a Farao. Ina ua o mai le aiga o Iosefa I Aikupito, na foai iai e Farao le laueleele o Kosena, o le vaega e pito lauusiusi I le atunuu e nonofo ai. E iloa lelei e tagata tauoloa ma lelei, e latou te manuia I mea e fai pe afai e latou te avatu le faaaloalo e onomea I o latou lima taumatau ma tausi I a’i latou. 

E tatau ona e faaalia I lou lima taumatau e te faamaoni ma fai mea lelei I a’i latou e pei foi ona latou faamaoni ma fai mea lelei mai ia te outou. E lei leva atu nei, o se tasi o a’u uo ua vili mai I le leva o le po ma faapea mai, ‘Tama, e iai so’u faafitauli’. Ua ia ta’u mai le faafitauli ona ma faatofā lea. Na vave ona ou valaau I la’u ave taavale ona ma o lea. Pe a ma le itula, ua ou toe vili o ia ma na faapea o ia o le a ou fai atu, ‘o lo’o ou tatalo pea mo oe’ ae tei I le faalogo mai ua ou faapea atu ‘tatala mai le pa’. Ua faateia o ia ina ua vaai mai ia te au, peitai na ou fai iai, ‘o le a ea le aoga o uo?’ So’o se taimi o le aso ou te manaomia ai o ia, e tamo’e mai ia te au. O lea la ua ia manaomia au, ua ou tamo’e ia te ia. 

A faaali mai le faamaoni o tagata ia te oe, e tatau foi ona faaali atu lou faamaoni I a’i latou. E toatele tagata ua leai ni o latou lima taumatau aua foi latou te le iloa siitia ma fai mea lelei I a’i latou. Ou te taumafai lava e sui la’u polokalame pe a mafai ai, ou te auai ai I aso fanau a nisi o tagata ua tu’u e le Atua e fai ma o’u lima taumatau. E te ono leiloa ni taimi na e ulagia ai I latou o lo’o faamaoni ia te oe. E leiloa foi pe iai ni taimi na e faia ai ni mea e tiga ai o latou loto, peitai, sa ui ai pea I latou ona o lo latou faamaoni e fesoasoani ia te oe ina ia mafai ona ausia ou faamoemoega autu. O le mea e tatau ona e faia e taui ai le faamaoni mai, afai lava e maua sina avanoa, faaali iai lou faamaoni ma le fai mea lelei i ou lima taumatau. O se mea lelei tele e latou te fiafia ai ma faamalosiau ai. Tago I lau telefoni ma valaaau I lou lima taumatau ma faamalosi iai. E mafai foi ona ave iai sina meaalofa e faaalia ai lou loto faafetai, I le suafa o Iesu, Amene.    

OPEN HEAVENS

MATALA LE LAGI MO LE ASO SA 3 MATI 2024

Manatu Autu: O le tagata o lou lima taumatau 2 - (Your Right Hand Man 2) 

Tauloto – 2 Tupu 3:11 “A ‘ua fai mai Iosefatu, “E lē o ‘i‘inei ‘ea se perofeta a le ALI‘I, tatou te fesili ai i le ALI‘I?”

‘Ona tali atu ai lea o le tasi o ‘au‘auna a le tupu o Isaraelu, ‘ua fa‘apea atu, “O lo‘o ‘i‘inei Elisaia le atali‘i o Safata, na na liligi le vai i lima o Elia.”

Faitauga - Tusi Paia: 2 Tupu 2:4-12

Upu Folafola

E mafai ona avatu e le Atua ia te oe se tagata e te fa’amoemoe i ai, ma e mafai fo’i ona ia tofia oe e fai ma tagata faamoemoeina a se isi uso. E tutusa lelei tofiga nei e lua e lē sili a’e pe itiiti ifo le tasi i le isi. Pe avatu e le Atua se tagata e fesoasoani iā te oe pe fai oe ma lima taumatau o se isi, a e faia lau galuega na totofi ai oe e le Atua, e te maua lou taui e tele.

Sa ia te a’u se tagata faapea, sa lauiloa i le suafa Papa, o le Sui ta’ita’i aoao. Ina ua avea a’u ma ta’ita’i aoao a’o talavou le olaga, faatoa fitu lea o tausaga talu ona o’u auai i le lotu, ae sa matou faatasi ma tagata na lolotu mai lava i le amataga. O nisi o i latou na talotalo ia o’u pa’ū ma sa o latou faitio i so’o sa’u faamatalaga e fai. Peita’i Papa DGO, sa tū mo a’u i so’o se taimi. E matua si toeaina pei o so’u tamā ae sa lagolago iā te a’u i taimi uma. Sa o ma finau faatasi i taimi o o’u faafitauli ma fa’amautinoa e faataunuu uma a’u faatonuga e ui i le faitio o i latou sa tete’e iā te a’u. I nā aso i le amataga o le galuega, sa i ai se tasi aai sa masani ona tau’aimisa le au uso. Ina ua logo mai a’u ua toe misa fo’i, ma o’u faailoa iā Papa, e le’i uma atu la’u tala ae fai mai, “O le a o’u alu e talanoa ma i latou.” O lo’o ua i le lagi nei le tamā ma lona pale e tumu i ma’a tāua auā sa fai o ia ma tagata lima taumatau lelei.

I le Esoto 24:12-15 ina ua poloa’iina e le Atua Mose e alu atu i le mauga na o Iosua na la o. Ina ua maliu Mose, o Iosua na valaauina e le Atua e ta’ita’i lona nuu. E le’i tofia e le Atua se isi o toeaiina po’o se ta’ita’i o se ituaiga o Isaraelu, peita’i o lē sa ta’u o le tama faifeau a Mose, o ia lea na filifilia e le Atua e fa’aauau le galuega ma ta’ita’i le fanauga a Isaraelu i le nu’u o le folafolaga.

I le 1 Samuelu 3:1-9, na valaau le Atua ia Samuelu i se tasi po, ae faapea ia o Eli sa valaau. I le valuāpō ua tatau ona moe Samuelu, a’o lo’o fetāmo’ea’i pea e tali le valaau a Eli auā sa manatu o mana’omia ia e Eli - o se tagata lima taumatau lelei lea. O le taui, na ave i ai e le Atua le tofiga na te tofia ma fa’auuina tupu ma ave ese tupu mai le nofoalii.

Le au pele e, afai ua tofia oe e le Atua e fai ma lima taumatau i se isi, manatu i ai o se faamanuiaga. Faamautinoa e te auauna i le aupito lelei e gata ai lou mafai, ona e mautinoa lea e faamanuia sautualasi fa’aaliali le Atua iā te oe. I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 2 MATI 2024

Manatu Autu: O le tagata o lou lima taumatau 1 - (Your Right Hand Man 1) 

Tauloto – Esoto 17:12 “Sa mamafa lima o Mose, ‘ona la ‘ave lea o le ma‘a, ma tu‘u ai i ona lalo, ‘ona ti‘eti‘e ai lea o ia; a o Arona ma Huro na la tāofi i luga ona lima, o le tasi i lea itū ma le tasi i lea itū; ‘ua mau ai ona lima ‘ina se‘ia goto le lā...”

Faitauga - Tusi Paia: Esoto 4:10-16

Upu Folafola

Mo i latou uma e avea ma tagata taualoa ma manuia, e masani lava ona i ai le tagata e tu’u i ai e le Atua e fai ma ana tagata faamoemoeina, o lona lima taumatau e tua i ai. Fa’ata’ita’iga, i le Esoto 4:10-16 ina ua fai atu Mose i le Atua e lē mafai ona alu i Aikupito ona e faaletonu lana tautala, ona tofia lea e le Atua o Arona e fesoasoani iā te ia. I le Esoto 17:8-13, ina ua o ifo Amaleka e osofa’i Isaraelu, na alu Mose i luga o le mauga faatasi ma Arona ma Huro ae fai iā Iosua e ta’ita’i le ‘au tau i le vanu i lalo ifo. A sisi’i lima o Mose ona manumalo lea o Isaraelu ma ina ua vaivai ona lima, na faanofo e Arona ma Huro i luga o se ma’a ma fesoasoani e sisii ma taofi ona lima i luga. A’o le taimi lea, o lo’o tau Iosua I le vanu. O i latou uma nei na fesoasoani iā Mose, o lona lima taumatau.

Tatou te maua le isi fa’ata’ita’iga i le Kenese 24. Na aami e Aperaamo lana auauna sili ma fai i ai e saili mai se toalua mo lona atali’i o Isaako mai lona nu’u. O le auauna sili lea, o le lima taumatau o Aperaamo i le fa’ata’ita’iga lenei. E tatau fo’i ona o’u faapea atu, so’o se isi lava e mafai ona avea ma tagata faamoemoeina e mafai fo’i ona avea se tamaita’i ma lima taumatau o se isi tinā. O le tagata e avea ma lima taumatau, o se auauna po’o se uso e latalata ma lava le la mafutaga ma lona ta’ita’i na te iloa ai ona manaoga i so’o se taimi, e vave fo’i e fesoasoani ma faataunuu.

E tatau fo’i ona e faailoa le tagata e avea ma ou fesoasoani ma lua galulue fesoota’i pe afai e te le’i faia i le taimi nei. O lou fesoasoani lea, e mafai ona tautala mo oe e faailoa se feau. E mafai ona ia sisi’i i luga ou lima pe a e vaivai. O le uso fo’i lea e avatua se nofoa e te nofo ma mapu ai pe a e lelavā ; o se tasi e faamuamua lou nofo lelei, tusa pe aafia ai ia. E faapei o Iosua, e tau i le taua mo oe.

O lou lima taumatau moni, po’o le a le mafanafana o le lua mafutaga, e lē avea lea e lē iloa ai tausi le lua va nonofo. O lou lima taumatau, e ufiufi i ou sesē ma faaletonu, na te lē faailoa i nisi, e te malu ai faapei ona fai e Arona ma Huro ia Mose. O le alii po’o le tamaita’i faamoemoeina e mafai ona e tu’u lafoa’i i ai mea e te mana’o i ai e fai. Ia e maitau mai, e finagalo le Atua e avea oe ma lima taumatau o se tasi o manaomia lau fesoasoani. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 1 MATI 2024

Manatu Autu: Tatalo mo oe lava (Prayers for yourself)

Tauloto – Isaia 54:17 “O ‘au‘upega uma e faia e tau ma oe e le manuia ia; o laulaufaiva uma e finau atu ‘iā te oe i le fa‘amasinoga ‘e te fa‘asalaina ia. O le tofi lenā o ‘au‘auna a le ALI‘I, o a latou amiotonu fo‘i mai ‘iā te a‘u lea, ‘ua fetalai mai ai le ALI‘I.

Faitauga - Tusi Paia: Isaia 54: 12-17

Tatalo

1.       Lo matou Tama I le lagi, ou te faafetai mo le faaolataga o lou agaga. Ou te faafetai mo lo’u ola, lo’u aiga, a’u uo ma e masani. Le Alii e, ou te faafetai ia te oe I le mamao ua e aumaia ai au. Le Alii e, ou te iloa e le mafai ona ou o’o I le mamao ua iai nei la’u savaliga e aunoa ma lau fesoasoani. 

2.       Le Alii e, ou te faafetai ia te oe mo lou alofa, lou alofa tunoa, le filemu, le poto, le alofa faaalia ma isi mau faamanuiaga ua e foai mo a’u. Ou te faafetai ia te oe mo lou alofa tatala ia te a’u. Ou te faafetai I lou agalelei ma lau foai i mea uma ou te manaomia. Faafetai le Alii e. 

3.       Tama, faafetai mo le soifua maloloina lelei. Faafetai mo ou lima, o vae, mata, taliga ma so’o se totoga o lo’u tino le Alii e, faafetai. 

4.       Le Alii e, faamolemole fesoasoani mai ia te au ina ia fua tele mai ni fua I lou olaga I lenei Tausaga. Faamolemole faaaogaina au e manumaloina ai agaga e sili atu I lo le muamua I le suafa o Iesu. 

5.       Le Alii e, fesoasoani mai ina ia ou latalata ia te oe e sili atu muamua. Faamolemole tatala lou loto ina ia siitia mea ou te maua mai ia te oe I tausaga uma,  I le suafa o Iesu. 

6.       Le Alii e, e tusa ma lau upu I le Salamo 1:3, ia e faamanuia mai ia te au ia faulai I so’o se mea e pa’i iai ou lima I le suafa o Iesu. I lenei Tausaga, o le a ou maua le siitia pea I so’o se vaega lava I le suafa o Iesu. I le itu I le Agaga, tamaoaiga, I lagona, I le mafaufau, I le ulugalii ma so’o se vaega o lou olaga, ia ou maua le manuia faulai I le suafa o Iesu. 

7.       Ou te sausau ia te au ma lo’u aiga uma I le toto o Iesu. Ou te folafola atu e leai se mea leaga e o’o ia te a’u pe latalata mai  ia te au I le suafa o Iesu. Ou te le afaina pe pai mai le au amioleaga ia te a’u I le suafa o Iesu. 

8.       Le Alii e, faamolemole ia e faasaoloto a’u mai so’o se fili o lo’o taupulepule e faao’olima ia te au. Tama, ia e foai mai ia te au le manumalo I vaega uma I le suafa o Iesu. 

9.       Le Alii e, faamolemole ia e taitai I ou ala uma I taimi uma. Ou te le fia alu I le mea e te le o alu iai, tusa po’o le a le matagofie o lona taatia mai. Faamolemole Le Alii e, ou te fia faalogo I lou siufofoga I le mea e tatau ona faia I soo se taimi, I le suafa o Iesu, Amene. 

10.   Le Alii e, ia e siitia a’u I mea e sili atu ia te oe. Ua ou lelavā tumau I le vanu. Faataga a’u ou te nonofo faatasi ma perenise. Ia siitia a’u ma lo’u aiga ina ia ou faia mea e sili atu ona matagofie mo oe i le suafa o Iesu, Amene.

11.   Le Alii e, ou te talia mai ia te oe le alofa tunoa e faataunuuina ai galuega uma e manaomia I lenei Tausaga, I le suafa o Iesu. E le toe iai ni galuega e faia ae le uma I lo’u olaga I le suafa o Iesu. 

12.   Tama, Ia faatumu a’u ia taumasuasua I lau faauuga ma lou Agaga Paia, I le suafa o Iesu e tatalo atu ai nei, Amene.  

OPEN HEAVENS

MATALA LE LAGI MO LE ASO TOFI 29 FEPUARI 2024

Manatu Autu: Valaauina e fai paaga (Called To partnership)

Tauloto – Esoto 14:21 “Ona fa‘aloaloa lea e Mose o lona lima i luga o le sami, ‘ona fa‘atafe‘eseina lea e le ALI‘I o le sami i le matagi tele mai sasa‘e i lea po ‘atoa; ‘ua ia faia fo‘i le sami ma ‘ele‘ele matūtū, ‘ua vaeluaina lava le sami..”

Faitauga - Tusi Paia: Luka 1:26-35

Upu Folafola

E mafai faapefea e le Atua, o le Atua e Silisiliese, o lē na faia le lagi ma le lalolagi, o lē na fetalai o ario ma auro o ia e ana, o Lē na valaauina le malamalama mai le p32ogisa, e faapefea ona ia mana’omia se tagata la te fai paaga? E faapefea ona galulue faatasi le Alii ma se tagata ina ia ausia Lona finagalo? E pei ona tatou iloa i le Tusi Paia, o nisi o taimi e finagalo le Atua i ni paaga.

I le Kenese 2:19, ina ua maea ona foafoaina mea uma, sa aumaia mea uma e le Atua ia Atamu ma fetalai atu, “Faamolemole faaigoa I latou mo aʻu” I le Esoto 14:15-28, ina ua oo atu le fanauga a Isaraelu i le sami ulaula ma fetagisi ona o le fefefe, na ole atu Mose i le Atua mo se fesoasoani, ona fetalai mai lea ole Atua, “Ou te faia se ala i le sami ulaula, ae peitai, ou te manaomia ta te galulue faatasi. Fa'aloaloa ou lima i luga o le sami”. Ana musu Mose e faaloaloa ona aao i lea aso, semanu e gata ai iina le tusi o Esoto, ma soloiesea le nuu o Isaraelu, ma semanu e saili e le Atua se isi auala e fanau mai ai Iesu. O la’u tatalo, afai e manaomia e le Atua se tagata e mafai ona Ia faalagolago i ai i taimi o faigata, o lo’o e avanoa.

I tausaga ua mavae a o matou amataina le lotu i Zambia, sa ou asiasi ai i le atunuu mo le taimi muamua. A o matou talanoa ma tamalii na talimalo ia te au, ua amata ona matou talanoa i se tamaloa e igoa ia Cobra. O ia o se tagata e matua mata’utia ma saua. A o matou talanoa, sa ou faalogo o fetalai mai le Atua e tatau ona faaolaina o ia. Na ou fai atu i lea tamalii, ou te fia alu e talaʻi le talalelei iā Cobra ma ou fai atu iā te ia, e ave aʻu i le fale o Cobra. Na ia fai mai ia te aʻu, ou te ono le toe sau i fafo mai le fale o Cobra o se tagata ola. Sa ou finau ma mulimuli ane na malie o ia e ave aʻu i le fale o Cobra. Na ou fai I le tamalii lea, faatali mo le 15 minute, afai ou te le toe foi mai I le taimi lea, ona e alu loa lea.” Na finagalo le Atua ma te faipaaga ma ia e manumalo ai i lena agaga, ma sa ia silafia e tatau ona ou alu. Sa ou alu i totonu e feiloai ma Cobra ma i totonu o le 15 minute, na tootuli o ia i ona tulivae, ma tuuina atu lona ola ia Keriso.

E manaʻomia e le Atua ni paaga e faia lona finagalo i le lalolagi, ae o i latou o le a faifaimea faatasi ma Ia, e tatau ona lotomalilie e ō atu ma galulue mo ia. A e faalogo o fetalai mai le Atua, “Ua ou maua se tagata na te faia mea uma lava o loʻu loto,” o lona uiga sa ia saʻilia se tasi e faia lona finagalo. Pe mafai ea e le Atua ona faalagolago ia te oe e fai paaga ma Ia ma faia Lona finagalo I taimi uma? I taimi o le faigata, e ono faalagolago le Atua ia te oe o se paaga e agavaa e faia lona finagalo I le lalolagi? I le suafa o Iesu, Amene. 

OPEN HEAVENS

MATALA LE LAGI MO LE ASO LUA 27 FEPUARI 2024

Manatu Autu: Valaauina e Fai Faatatau (Called To be Temperate)

Tauloto – 1 Korinito 9:25 “O i latou uma o ē faigofie e fai fa‘atatau i mea uma lava; o i latou fo‘i ‘ua latou fa‘apea ‘ina ‘ia maua le pale palagofie, a o i tatou, ‘ina ‘ia maua le pale e lē pala lava..”

Faitauga - Tusi Paia: 1 Korinito 9:24-27

Upu Folafola

O le auala e ausia ai le taunuuga o lou valaauina, o le pulea lelei o lou tino ma aua nei faataga se agasala I lou soifua. Fai mai le Kalatia 5:17 o le tino ma le agaga o lo’o faia le taua i taimi uma. E tatau ai ona e pulea lelei lou tino ina ia  aua nei faataga e o’o mai ai faafitauli. A vala’auina oe e le Atua i se galuega tele, e na te lagolagoina oe ina ia tini I le taunu’uga ma manumalo, e ui ina tele malosi’aga o le a taumafai e mailei ma taofia oe. Peitai, fai mai le Roma 8:31: “Āfai ‘ua ‘au ma i tatou le Atua, o ai sē fa‘asaga tau mai ‘iā i tatou? O le tali: ‘O oe lava!’ Afai o le Atua e ‘au ma oe, ae e le mafai ona e pulea lou tino mai le faasagatau atu ia te oe, o lona uiga e ono mafai ona lē ‘ausia lou valaauina.

E le gata e tatau ona e ‘alofia le agasala, e tatau ona e fai faatatau I mea uma lava. E le mafai ona e moe i so’o se taimi e te manao ai, tausami I taimi e te mana’o ai, pe mafuta loloto ma lou to’alua I taimi uma e te momo’o ai iai. Fai mai le Aposetolo o Paulo I le 1 Korinito 6:12 “12“‘Ua tataga mea uma ‘iā te a‘u,” a ‘ua lē aogā mea uma. “‘Ua tataga mea uma ‘iā te a‘u,” a o a‘u, e lē fa‘ato‘ilaloina a‘u i se tasi mea.”

E tatau ona e pulea lou tagata ina ia aua nei pulea oe e se malosiaga o so’o se mea e oo I mea e matua mana’omia I o tatou ola. I le 1 Korinito 9:24-27, fai mai le aposetolo o Paulo: “Ou te fa’atao’ilaloina lo’u nei tino.” O le aposetolo lava lea e tasi o le alofa tunoa, o lo’o talitonu nisi, e faataga ai pea le agasala, aua e le afaina. Peitai sa fa’apea mai Paulo, na ia fa’ato’ilaloina lona tino, i se isi fa’aupuga, ‘ou te faatonu lo’u manava i le taimi e ‘ai ai ma o’u mata I le taimi e moe ai’. E fesiligia a’u e isi tagata pe fa’apefea ona ou anapogi mo aso ma po e 40 ae ou te tali iai: ‘E faigofie. O le pō ae e le’i amata ai, ou te va’ai i le kalena, faitau aso e 40 ona fa’amau lea o le aso e gata ai la’u anapogi. Ona ou faapea atu lea i lo’u manava: “O le aso lena e faato’a e toe maua ai se mea ‘ai.” E gogolo le manava auā e le fiafia i lea tulaga. Ao e alu atu I le taavale i le ‘auala e peise’ai o loo tauvala’au mai uma fale’aiga ia te oe, e oo mai le sasala o le manogi o mea ‘ai mai isi fale e fai sina mamao ma oe. Ou te le popole iai; ou te te le amanaia so’o se faiga a le ti’apolo e fai. E maea ni aso se 3 pe 4, ua iloa e lo’u manava ua ou le toilalo, ona filemu loa lea. O e tausiniō mo le manumalo o i mea uma, e fai ma le faatatau I mea uma lava. Afai e te naunau e ‘ausia le vaalau a le Atua i lou olaga e pei o Paulo, e tatau ona avea oe o se tamaitai po o se ali’i e malosi e pulea lelei lona tagata, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 28 FEPUARI 2024

Manatu Autu: Valaauina e tatalo (Called To be prayerful)

Tauloto – 1 Tesalonia 5:17 “Ia tatalo e lē aunoa.”

Faitauga - Tusi Paia: Luka 18:1-8

Upu Folafola

E tele faifeau e talanoa I le tatalo, ma masani e taitai fono tatalo, ae seasea tatalo. A oo I taimi o tatalo, e folafola le mataupu e tatalo ai, fai mai I tagata e tatalo, pau le latou mea e fai o le faamalosiau I tagata e tatalo ae e le tatalo I taimi o fono tatalo pe a na o I latou fo’i. O se tasi lea o mafuaaga e le ausia ai le valaau a le Atua I o latou olaga. 

O le aposetolo o Paulo o se tagata tatalo. I le 1 Tesalonia 5:17, na ia faapea mai, ‘Ia tatalo e le aunoa’. A ou alu ese ma le fale e malaga, ou te tatalo. A o’o I totonu o le taavale, ou te tatalo. A o’o I le vaalele ou te tatalo. Fai ma le Tusi Paia ia tatalo e le aunoa, toaga e tatalo. Fai mai se tasi fatu pese, ‘le kerisiano, aua le saili e te malolo, faalogo o lo’o faapea mai le Alii Faaola, o le alofa tunoa, o lo’o e i le ogatotonu o ou fili, mataala ma tatalo’.  

I le 1985, ina ua maea ona ‘ou faia mea uma e gata ai lo’u iloa, ae leai se tupu o le Ekalesia. Ona ou faalogo lea I se faifeau mai Korea I Saute o le vave ia o le tupu o lana Ekalesia ma e masani ona faia a latou fonotaga faaletausaga mo faifeau. E lei iai sau tupe ou te alu ai ae na ou tatalo I le Atua, ma na ia auina mai se fesoasoani. Ona ou malaga lea iai, ma na ou vaai I se mea ou te le’i vaai muamua iai. Na faasilasila mai e le faifeau o tagata uma na lolotu I le vaiaso nei e aua nei o mai I le vaiaso fou ae sei ave le avanoa I isi tagata ona o le le lava o le avanoa o le fale tele. Peitai o le fale tele e ofi ai le 50,000 tagata I le sauniga ae fitu sauniga e faia I le Aso Sa ae le taitai ona lava ma ofi ai tagata. I le taimi o le fonotaga, na latou ave matou I le mauga e fai ai tatalo ma na tufa matou I ni tamai potu e tatalo ai. Na matua galo ia te au le taimi ae ou te fo’i mai I le pasi, ua feita uma tagata ona ua ova ma le itula o latou faatali ia te au. Ua fai mai, ‘Aisea ua e tuai mai ai?’ Ua ou tali atu, ‘faapea a’u na tatou o mai e tatalo’. Na tali mai, ‘e te tatalo uma ni ou manaoga I se aso se tasi?’ Ua leai ma seisi e toe tautala mai ia te au. Sa le afaina ia te a’u aua ua ou faalogoina le afi o puna I totonu ia te au e tatalo pea. I le tele o Tausaga mulimuli ane, ua ou toe alu I Korea I Saute. O le taimi muamua na ou alu ai, e le taitai ona ou oo I le tagata o le Atua, ae o le taimi lona lua lea, ua ma feiloai mai ia, le susuga ia Dr Yonggi Cho ma ua ia faapea mai ia te au, ‘Ua ou faalogo ia te oe, e mafai ona e tatalo mo a’u faamolemole?’

Le au pele e, ou te faamalosiau ia te oe ia e tatalo e le aunoa, tatalo I taimi uma (Efeso 6:18). Ou te leiloa po’o fea o ta’ita’i oe iai e le Atua, ae afai e te naunau e te ausia ma o’o iai, e tatau ona e ola I le tatalo e faifaipea, I le suafa o Iesu, Amene.    

OPEN HEAVENS

MATALA LE LAGI MO LE ASO GAFUA 26 FEPUARI 2024

Manatu Autu: O le Valaau ia Loto Faafetai (A Call To be grateful)

Tauloto – 2 Samuelu 7:18 “Ona alu atu lea o le tupu o Tavita ma nofo atu i luma o le ALI‘I; ‘ona fai atu ai lea o ia, “Lo‘u Ali‘i e, le ATUA, o ai ‘ea a‘u nei? O ai fo‘i lo‘u ‘āiga ‘ina ‘ua e fa‘ao‘o mai ‘iā te a‘u i lenei aso?..”

Faitauga - Tusi Paia: Luka 1:46-55

Upu Folafola

O se tasi o amioga lē lelei ou te maitauina I le tele o faifeau a le Atua, o le faamaualuga. E valaauina loa e le Atua ma faaaupegaina I latou I meaalofa o lo latou valaauina, ua amata manatu e faapitoa ma taua tele I latou. Peitai e tu’ufaafeagai lea vaega aua fai mai le 1 Korinito 1:17 e filifilia e le Atua mea maulalo ma le fa‘atauva‘a i le lalolagi e o‘o i mea e leai. A valaau le Atua ia te oe mo se galuega faapitoa, ia tatau ona e matua faafetai I le Atua mo le avanoa taua ua valaauina ai oe ma so’o se mea e ausia I le galuega a’o e savali I lou valaauina aua e leai se mea e mafai ona e faia e aunoa ma ia (Ioane 15:5).

E pei ona ou ta’ua muamua ao faagasolo nei mataupu, na ou suesue I tagata na valaauina muamua atu ia te au ma sa manumalo I lo latou valaauina. O se tasi o I latou o le Aposetolo o Paulo, o se faiaoga e maualuga le a’oa’oina e pei o a’u na valaauina e le Atua. Ua ou maitauina o Paulo o se tagata e loto faafetai I le Atua. Na ia tusia I le 1Tesalonia 5:18 ‘Ia ‘outou fa‘afetai i mea uma lava, auā o le finagalo lea o le Atua ‘iā te ‘outou, ‘iā Keriso Iesu.

I le faitauga o le Tusi Paia o le aso, ua tatou iloa ai le loto faafetai o Maria ina ua filifilia o ia e fanau mai ai le Faaola o Iesu Keriso ma na faamanuiaina I lona valaauina. Afai e te naunau e manuia ma ausia le faamoemoega o lou valaauina, e tatau ona e loto faafetai I le Atua I mea uma lava. Ou te leiloa ia te oe peitai e le mafai ona galo ia te au le agalelei o le Atua ia te au. 

Faatoa uma sa matou sauniga I se tasi atunuu ma na ou vaaia le galue o le Atua I lea sauniga, e toatele agaga na faaolaina ma e tele vavega eseese. Ao matou foi atu I le faletalimalo, sa matou talanoa ma tagata na matou iai I mea matautia na tutupu I le taimi o le sauniga. Ina ua taunuu, na oso I fafo le tagata sa I le nofo pito I luma ma a’o ia tapunia le faitotoa, na mau ai lou tamaimailima I le faitotoa o le taavale. E o’o mai I le aso, e matua ou leiloa faavasega pe na faapefea ona mau lou lima I le faitotoa o le taavale. Na ou oi i le tiga o lou lima ma na faamalie mai a’u e tagata uma. A'o ou savali I lou potu, na ou fesili I le Atua pe aisea na ia faataga ai le mea lea e tupu ia te a’u. Ua ia faapea mai, ‘na e talanoa I mea matautia na tupu I le sauniga ae leai ma sou faliu mai ma faapea, faafetai le Alii e’. Ua ou iloa lo’u sese ma faia loa le faafetai I le Atua. Ou te o’o atu I lou potu, ua mou ese atu le tigā. O lo’o silasila mai le Atua pe e te loto faafetai pe leai. E na te lapatai oe e faatasi pe faalua, pe a e lē loto faafetai. Afai e te lē usitai I ana lapataiga, e liliu ese o Ia ma lana faamalumaluga ma e matuia pe a e o’o iai. Amata ona faafetai I le Atua I mea uma ua ia faia mo oe aemaise le faataunuuina o lou valaauina, I le suafa o Iesu, Amene.