Samoan Devotional

 OPEN HEAVENS

MATALA LE LAGI MO LE ASO LUA 26 MATI 2024

(tusia e Pastor EA Adeboye)

Manatu Autu: Ia aoaoina mai tagata matutua (Learn from Elders)

Tauloto –Esoto 18:19 “'O lenei, ‘ia e fa‘alogo mai ‘iā te a‘u, ‘ou te fa‘atonu atu ‘iā te oe, ‘ona ‘iā te oe lea o le Atua; ‘ia fai oe ma tautu‘u ‘upu mo le nu‘u i luma o le Atua, ‘ina ‘ia e taulogologoina mea i le Atua. '

Faitauga - Tusi Paia: Esoto 18:1-24

 Upu Folafola

E to’atele tupulaga talavou i nei aso, latou te vaavaai i tagata matutua ma faapea ‘o mea na o aso anamua’ ma latou manatu e mafai ona latou ola lelei e aunoa ma i latou, o se manatu sesē tele. Ou te iloa ua maoa’e le silafia i tulaga tau saienisi ma tekonolosi I nei aso, ma ua sili ona tele le avanoa o talavou e iloa ai faamaumauga ma le poto salalau nai lo aso ua tuana’i, ae tusa lava po o lea le tele o puna’oa ua latou maua, e tasi lava le mea o lo’o maua e matua e le o maua e tupulaga, o le poto masani.

O tagata matutua, ua uma ona latou savalia le auala o lo’o e savali ai i le taimi nei, ma latou te silafia le taunuuga o so’o se mea o e faia, ae e te le’i amata ona faatino. E sili atu lo latou poto masani nai lo  sailiiliga ma faalauiloa o lo’o e faitau ai I upega tafailagi. O nisi sa faia ni faaiuga sese I taimi ua tuanai I mea na ui ai, ma e te lē ono ui ai pe ana faapea e te amanaia ma talia a latou fautuaga. O le fa’afitauli, e tele talavou ua manatu ua maoa’e lo latou atamai ma o nei ituaiga manatu e ta’ita’i seseina ai I latou ma I’u leaga ai.

E iai se tasi o muagaga fa’a Aferika e faapea: ‘O se mea e silafia e se tagata matua a’o nofonofo I se nofoa, e le iloa e se tamaititi e tusa pe a’e i se laau umi’. E tele tulaga sa a’oa’oina ai a’u mai se tasi o faifeau e ui e iai nisi o ana fautuaga sa ou manatu e sese i le taimi na ia faia ai. A o le asō, ua ou iloa e matuā sa’o lelei le faifeau. Fa’afetai i le Atua sa ou faalogo ia te ia. E iai tulaga e te le o silafia e uiga ia te oe lava ma e te le o iloa atu, peita’i e mafai ona silafia e se tagata matua ma tuuina atu ni fautuaga talafeagai ia te oe.

Fai mai le Faataoto 30:12 ‘O i ai le tupulaga, e manatu i latou ‘ua latou mamā; ‘ae le‘i fufulu‘esea o latou ‘ele‘ele.

E te ono manatu ua lava au taleni ma lou poto e mautinoa ai le ausia o le tulaga manuia, peitai e mafai e se tagata matua ona ta’u atu ia te oe se tulaga faaletonu I lau amio e tatau ona tafi’esea pe afai e te naunau I le manuia.

Afai o e faigaluega i se faalapotopoga po’o se kamupani, ia e faaaloalo ia i latou ua tele tausaga na muamua atu ia te oe. I totonu o le lotu, ia ua’i ou taliga i mea o talanoa mai ai toeaina o le Ekalesia. I lou aiga, ‘aua nei e faatalale i fautuaga a nai ou matua, o matua o matua, o uso, tuafafine ma tuagane o ou matua. Afai e te faia ia tulaga, o le a latou fa’asoa mai ia te oe  lo latou poto masani, faatasi ma le fesoasoani a Agaga Pa’ia, o le Agaga ia o le atamai (Isaia 11:2), o le a avatu le atamai e mafai ai ona e faamaopoopo ma vaevaeina nei fautuaga mo lou manuia. O le auala lea e sili ai tulaga e te iloa I lo’o lau tupulaga i le savaliga o le soifuaga nei.

O tagata matutua i lou olaga e aoga e apoapoa’i ma taitai oe e tusa ma le poto masani ma tulaga uma sa ui ai I lenei olaga. Fa’alogo lelei ma ia e ava I ai latou, I le suafa o Iesu, Amene.

OPEN HEAVENS

MATALA LE LAGI MO LE ASO GAFUA 25 MATI 2024

(tusia e Pastor EA Adeboye)

Manatu Autu: E lē faia sou faitalia (Vaega 2) - You Have No Choice (2)

Tauloto –Ioane 15:2 “O la uma lava o ‘iā te a‘u e lē fua, e ‘ave‘eseina e ia; a o la uma e fua, e teuteu e ia, ‘ina ‘ia fua mai ai atili”'

Faitauga - Tusi Paia: Ioane 15:1-16

 Upu Folafola

E toatele tagata ua faaolaina ae le mananao e talai Le talalelei ia Iesu Keriso. E manatu ua lelei pe afai o tumau I le Atua ae le toe solomuli I tua. O se talitonuga sese lea tulaga. Ua e pipii atu I le vine moni ae o loo tusia I Le Ioane 15:2, o so’o se lala e pipii I le vine, e tatau ona fua mai ni fua. E tatau ona fua mai ni fua pe afai e te fia pipii pea I Le vine. E te manao e avea pea oe ma vaega o Le vine? E tatau ona e faia Le galuega talai. O Le ola solomuli ese mai Le Alii e Le faapea e amata e tau o Le agasala. O le musu e fai le galuega talai o le isi lea auala e solomuli ai le tagata mai le Atua. Fai mai le Ioane 15:6 ‘Āfai e lē tumau se tasi ‘iā te a‘u, ‘ona lafoa‘iina lea i tua pei o le la la‘au, ma fa‘amagoina ‘ona fa‘apotopotoina ai lea e tagata, ma lafo i le afi, ‘ua susunu ai.'

O nisi o tagata e talai atu le alofa mutimutivale o le Atua e leai sona gataaga ma faapea mai afai e te faaolaina loa e leai se mea e te ono toe alu ai I seoli. Ou te le auai I lea aoaoga. Afai e faaolaina tagata, ua avea ma vaega o le vine, ae afai latou te le fua mai ni fua, e aveeseina e ia. A aveeseina le tagata mai le vine, o le a faamagoina o ia, ona faapotopotoina lea e tagata ma lafoina i le afi, ua susunu ai, o loo manino lea vaega I Le Upu a le Atua. O lea, mo Lou lava lelei, ia e faamautinoaina o loo fua mai ni fua mo le Atua maualuga I lou olaga. 

O le isi vaega e tatau ai ona fua ai ni fua mai lou olaga, ina ia maua ai tali o au tatalo. Fai mai le Ioane 15:16, 

Tou te le‘i filifilia a‘u, ‘ae na ‘ou filifilia ‘outou ma ‘ou tu‘uina atu ‘outou, ‘ia ‘outou ō ma ‘ia ‘outou fua mai ni fua, ma ‘ia tumau o ‘outou fua; ‘ina ‘ia foa‘iina atu ‘iā te ‘outou e le Tamā mea uma lava tou te ole atu ai ‘iā te ia i lo‘u igoa.

Ou te leiloa pe e te maitauina, e foliga mai e vave ona tali e le Atua tatalo a kerisiano e fou ma o loo pepe olaga. E leiloa pe sa masani ona e maua vave, tali o au tatalo ina ua e faatoa faaolaina, ao le taimi lenei ua e faatonuina mauga ia aveesea peitai e foliga mai ua le taunuu? Ua suia ea le Atua? Ua le faataunuuina ea folafolaga a le Atua? O le a ea le tulaga ua faatuai ai ona maua tali o au tatalo? E leiloa pe ona ua e le toe talai atu le talalelei ma manumaloina agaga mo le malo o le Atua. Tago I lau telefoni ma faasoa atu le talalelei I se tagata se toatasi e tauala I se feau tusitusia, vili i ai po’o se isi auala. I le suafa o Iesu, Amene.

OPEN HEAVENS

MATALA LE LAGI MO LE ASO SA 24 MATI 2024

(tusia e Pastor EA Adeboye)

Manatu Autu: E lē faia sou faitalia (Vaega 1) - You Have No Choice (1)

Tauloto –Ioane 9:4 “'E tatau ‘ona ‘ou faia galuega a lē ‘ua ‘auina mai a‘u, manū o ao; a o‘o i le po, e lē mafaia e se tasi ‘ona galue ai. '

Faitauga - Tusi Paia: Ioane 15:15-16

 Upu Folafola

I la tatou upu tauloto o le asō, fai mai le Tusi Paia, “E tatau ona o’u faia le galuega,” e lē o faapea mai “A o’u mana’o ai e mafai ona ou faia le galuega.” E lē o se isi filifiliga po’o se fautuaga. O le faia o le galuega a le Atua e fa’amalosia mo lana fanau uma, o lona uiga e leai sou loto e faia i lenei mataupu. Fai mai le Aposetolo o Paulo i le 1 Korinito 9:16, “Auā afai ou te folafola le tala lelei, e lē se mea lea ou te mitamita ai, auā ua leai sa’u faitalia i lea mea. Oi talofa fo’i iā te a’u, pe a ou lē folafolaina le tala lelei!”

E o’o loa i le fa’atinoga o le galuega a le Atua, e lē tatau ona e vaai iā te oe o se auauna fesoasoani. Fai mai le Aposetolo o Paulo o le faia o le galuega a le Atua o se mea e tatau ona fai, ma ia faapea fo’i ona ia fetu’uina ia lava pe a ia lē folafolaina le tala lelei a Iesu.

Na manino le silasila a le Aposetolo o Paulo e lē o ia o se tagata galue fesoasoani. E lē fa’aaogaina e le Atua tagata e manatu o i latou ua na o ni fesoasoani. E filifilia loa e le Atua se tagata lē toe faia loa sona faitalia ae usita’i ma fai le galuega. I le Ioane 15:16, na fetalai le Atua, ua lē filifilia e outou ia, a ua filifilia e ia outou. O le taimi e filifilia ai e le Atua oe, o le taimi fo’i lea e avea ai oe ma auauna a le Atua, e tatau ona faia lona finagalo. Fai mai Paulo i le Filipi 1:20

“E tusa ma lo’u fa’anaunau atu, ma lo’u fa’amoemoe, ina ia o’u lē mā i se mea e tasi, a ia o’u matuā fa’amalosi faapei ona o’u faia e lē aunoa, e faapea fo’i i nei ona po, ina ia Viia ai Keriso i lo’u tino, i le ola poo le oti.”

O le ‘au galulue e lē ni fesoasoani a’o fitafita e faia le galuega a le ua valaauina i latou. Fai mai 2 Timoteo 2:4,

“E leai sē tau i le taua na te faalavelavea o ia e ia i mea o le olaga sa masani ai, ina ia fa’afiafia o ia i lē na filifili iā te ia e fai ma tagata tau.”

Pe tatou te manana’o ai pe leai, o le lalolagi lenei o taua. O lo’o tatou i ai i se taua ma e lē tatau ona o tatou faavaivaia i tatou i mea o le lalolagi. Ia o tatou mataala ma usiusita’i i faatonuga a lo tatou ta’ita’i’au e aunoa ma le fa’atuai. Ia o tatou galulue e tusa ma lona finagalo ina ia o tatou manumalō.

I le Mataio 28:19, ua tuuina mai e lo tatou ta’ita’i’au se poloaiga e ta’ita’iina ai i tatou ua tā’ua o ana auauna ma mea faigaluega ia o atu ma fai nu’u uma lava ma so’o ma papatiso atu iā te i latou i le suafa o le Tamā, ma le Atali’i, ma le Agaga Paia. E manino lelei le galuega, ma o se poloaiga tu’u sa’o. E leai se avanoa ma se taimi o ni faigā tonu, gaioi nei loa. I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 23 MATI 2024

(tusia e Pastor EA Adeboye)

Manatu Autu: Faalēaogaina o fetu’u (Cancelling curses).

Tauloto – Kalatia 3:13 “Ona tali atu ai lea o Iesu, ‘ua fa‘apea atu, “Lua te lē iloa le mea lua te ole mai ai. Lua te mafaia ‘ea ‘ona inu i le ipu o le a ‘ou inu i ai?” ‘Ua la fai mai ‘iā te ia, “Ma te mafaia.”

Faitauga - Tusi Paia: Kenese 49:5-7, Numera 3:44-45

 Upu Folafola

E toatele tagata o loo feoa’i ma fetu’u e lē tatau ona o latou tauavea. E i ai aiga o loo mafatia i fetu’u ua lē tatau ona mafatia ai. Le au pele e, afai o e i ai i lenei tulaga, o le tala lelei lenei mo oe. O fetu’u e fai e tagata e mafai ona fa’alēaogaina, ma ou te tatalo mo oe i le asō, ia fa’alēaogaina uma ni fetu’u i ou luga i le suafa o Iesu.

I le Iosua 6:26, na tu’u e Iosua se fetu’u i luga o Ieriko ma amata ai ona mafatia tagata o Ieriko i lenei fetu’u. Toatele perofeta na omai i le nuu ma toe o ae fa’aauau pea ona pagatia lē lēoa tagata o Ieriko i lenei fetu’u. Mulimuli ane ina ua aveesea Elia, na latou iloa ai a o latou lē faia se faiga i le fetu’u e tumau ai pea le lafulafuā o lo latou laueleele ma sosolo ai pea le oti ia i latou e faavavau. Na latou valaau ai loa iā Elisaia e fesoasoani ia i latou. I le 2 Tupu 2:19-22 na fai atu Elisaia “Aumai ia iā te a’u se tanoa fou ma tu’u i ai se masima.” Ona o latou aumaia ai lea iā te ia. Ona alu atu lea o ia i le puna o le vai, ua lafo i ai le masima ma fai atu, “ O loo faapea ona fetalai mai o le Alii, ua o’u fa’amagaloina lenei vai; e lē toe tupu mai ai le oti poo le fanua lafuā.” Mai lea aso na fa’alēaogaina ai le fetu’u.

So’ose fetu’u i luga o lou olaga po’o lou aiga e mafai fo’i ona fa’alēaogaina i le asō pe a ua e mana’o e te saoloto mai ona aafiaga. Pau le faiga e te mana’omia o se tagata e sili atu lona malosi fa’aleagaga ma le fa’au’uga e fa’alēaogaina le fetu’u. Afai o le fetu’u na fai e lou tamā, e mafai ona e alu i lou tamā fa’aleagaga e talepea le fetu’u, auā o le fa’aleagaga e pulea le fa’aletino. E faapenā fo’i pe afai o se fetu’u na fai e se alii po’o se tamaita’i faaolaina, alu i se faifeau po’o le auauna a le Atua, e sili atu le fa’au’uina na i lo o le uso, e mafai ona ia fa’alēaogā le fetu’u. Afai o le fetu’u na fai e se fa’ataulāitu poo se aitu vavalo, o se auauna fa’au’uina a le Atua e mafai ona gausia le fetu’u auā o le fa’au’uga e gausia le amo. (Isaia 10:27).

Le au pele e, e tatau fo’i ona e silafia e sili atu i lou alu i se auauna alii po’o se auauna tamaita’i a le Atua e aveese se fetu’u ma oe, e tatau fo’i ona e saili le fa’au’uga a le Atua. Ia e tatalo, anapogi, su’esu’e lau Tusi Paia ma toaga e mafuta ma le Atua seia amata ona e tauaveina lona mamalu ma lona mana. A e faia faapea e leai se fetu’u e pa’i ia te oe. A ‘au le Atua ma oe faapei ona ‘au ma le fanauga a Isaraelu i le Tusi o Numera 24, e te manuia ma e leai se fetu’u e mafai ona o’o iā te oe. I le suafa o Iesu. Amene

OPEN HEAVENS

MATALA LE LAGI MO LE ASO FARAILE 22 MATI 2024

(tusia e Pastor EA Adeboye)

Manatu Autu: Saili Muamua le Atua (Seek God First).

Tauloto – Salamo 63:1 “Le Atua e, o lo‘u Atua lava oe; ‘ou te ala sā‘ili ‘iā te oe; ‘ua fia inu lo‘u agaga ‘iā te oe, ‘ua ‘ou matuā naunau atu ‘iā te oe i le nu‘u naumati, e lailoa ai, e leai ni vai...”

Faitauga - Tusi Paia: Salamo 63:1-8

 Upu Folafola

O le tala na ou faasoa atu ananafi e faamanatu mai ai ia te au ni tama se toatolu mai Uganda na ou fetaui ai I se polokalame faakerisiano I Kenya. E sili atu le fia inu o nei tama mo le Atua I lo matou sa iai faatasi I lea polokalame. A o’o i taimi e fai ai malologa, e matou te o e faatau mai ni matou sanuisi a’o nei tama, e o pesepese viiga I le Atua. Na ou fesili iai pe aisea e le aai ai I taimi e aai ai tagata uma, ae faapea mai, e le o manatu tele latou ini meaai. Muamua, e leai se tupe e faatau ai meaai. Lona lua, o lo’o latou tatalo ia toe foi atu ma le saogalemu I lo latou atunuu e aunoa ma le fasiotia e le taitai o le malo I Uganda sa iai I lea taimi. Mo le tolu aso, sa le aai ae sa fiafia lava I latou I le auai ai I lea polokalame. Mo aso mulimuli ane o le polokalame, na ou faasoa atu iai sina meaai itiiti na maua. Ua ou fai iai e fesootai mai pe a taunuu manuia I lo latou atunuu, ma I le viiga o le Atua, na latou fesootai mai. 

O lou fia ai mo le Atua e tatau ona o’o I le tulaga ua e le manatua e ai I le taimi e te saili ai I le Atua. E tatau ona e matua fiaai mo le Atua tusa pe lamatia ai lou ola ae ia e iloa atili ai o ia. Ou te ofo I nisi o taimi pe a ou faasilasila atu se anapogi ae tomumu nisi. E le fiaai tele I latou mo le Atua e ono anapogi ai mo ni nai aso I le Tausaga ina ia latalata atili ia te ia. 

I le 1970, sa masani ona ou faapotopotoina nisi o le au talavou a le Redeemed Christian Church of God I se nofoaga e taua o le ‘Togalauapiga a le Au Talavou’. O nei togalauapiga e aofia ai le tau o potu e momoe ai ma meaai, peitai e masani ona vaaia, ua tau le fia aai tagata pe a uma sauniga. E masani ona ou tauanaua tagata e aai ina ia aua nei maimau meaai. Ua le toe naunau I meaai ae ua na o le Upu a le Atua. Fai mai le Ieremia 15:16 Na maua au afioga, ‘ona ‘ou ‘ai ai lea; sa ‘iā te a‘u lau afioga e fai ma mea e ‘oli‘oli ai ma fiafia ai lo‘u loto; auā ‘ua ta‘ua a‘u i lou suafa, le ALI‘I e, le Atua o ‘au.

O a mea tonu o loo e fiaai ma naunau iai? Meaai? Ta’uta’ua? Tupe? Taatia ese uma ia mea a’e ia e fia ai ma fia inu i aso uma mo le Atua. Fai mai le Mataio 6:33 A ‘ia ‘outou mua‘i sā‘ili le mālō o le Atua ma lana amiotonu; ‘ona fa‘aopoopoina atu lea o ia mea uma ‘iā te ‘outou.

Le au pele e, faamolemole ia sa’o le mea e ave iai le faamuamua. Fai mai Tavita I le faitauga o le Tusi Paia o le aso, e fia inu lona agaga I le Atua. E mafai ona e faia lea tala e faatatau ia te oe?

Tatalo

Tama, ia faatumauina le fiaai ma le fiainu ia te oe o lo’u agaga atoa, I le suafa o Iesu, Amene.  

 OPEN HEAVENS

MATALA LE LAGI MO LE ASO TOFI 21 MATI 2024

(tusia e Pastor EA Adeboye)

Manatu Autu: Mafanafana I totonu o sauniga (Comfort in service).

Tauloto – Salamo 26:8 “Le ALI‘I e, ‘ou te fiafia i le mea e tu ai lou maota, o le mea fo‘i e afio ai lou mamalu..”

Faitauga - Tusi Paia: Ieremia 29:12-13

 Upu Folafola

O aso nei ua tele falesa ua fausia ma matagofie mea uma ina ia lelei ma mafanafana mo le aulotu. Peitaʻi, e lē tatau ona tatou ave le faamuamua I lea tulaga, ma taitaiese I tatou mai le sini autu o nei sauniga, ia feiloai ma maua se faaaliga mai le Atua. Tusa pe lelei ma maua le mafanafana I nei sauniga pe leai foi, afai e te iloa o lo’o iai le Atua I lea sauniga, faataatia ou tulaga tauoloa lautele ae faanatinati iai. Aua e te alu i polokalame a le au kerisiano e saili ina ia e mafanafana; e le faaaogaina e le Alii tagata maualuluga (Iakopo 2:1-9). Afai e te alu i le lotu e faalialia ai ou mamalu ma tulaga tauoloa, o lo’o telē se vaega o lo’o e misia i lou olaga kerisiano.

O le taimi muamua na ou alu ai i se polokalame a le au kerisiano i fafo atu o Nigeria, o Kenya i le tausaga e 1975. Na le mafai ona totogi se faletalimalo matou te nonofo ai po’o ni pasese. Na matou tatalo i le Atua, mo matou pasese ma na Ia tali mai ia matou talosaga. O le mea e lelei ai, sa i ai se aoga nofotumau e latalata ane, na i ai potu moe na fa'aavanoaina mo so'o se tasi e nofo fua ai, a’o auai i le polokalame lenei. O a’u o se faiaoga i le iunivesite ma e toatele i matou na nonofo i nei potu moe, ae ou te lei popole i ai, ona matou te le’i omai e faalialiavale ni o matou tulaga, ae na matou o mai e saili le Alii. Faafetai i le Atua, i lona auina mai o lo’u tagata e nofo i le nofoaga lenei. O iina, na ou vaaia ai le potu o loo i ai le nofoalii o le Atua. Ou te moe fiafia i le fola o le fale, ina ia ou iloa le nofoalii o le Atua.

O le tasi tulaga ou te iloa lelei I le Atua, e tatau ona e saili ma su’esuʻe pe afai e te fiailoa moni o Ia. O le mea lea ua faapea mai ai le Isaia 55:6 e tatau ona outou saʻili iā te ia a o maua o ia. E tatau ona e saili ma le filiga ia te Ia pe afai e te fia iloa moni o ia. Afai e te saili I ona fofoga mo se mea, o lou tulaga ia mafanafana e le tatau ona avea ma faalavelave.  

Ou te manatua se tasi taimi na ou tatalo ai e uiga i se mataupu pe a ma le 2 tausaga. Na valaaulia aʻu e lauga i se sauniga, ma o iinā na tali mai ai le Atua iā te aʻu. Ana ou misia lena sauniga, semanu ou te le faalogo lava i le Atua e uiga i la’u mataupu. E faaali mai le Atua e tusa ma se mataupu, pe a faapotopoto faatasi ni tagata se toalua pe toatolu i Lona suafa, afai ua outou saili ia te ia i se mataupu, ae e lei tali mai, alu atu i se mafutaga e faapotopoto ai tagata i Lona suafa ma faamanatu I le Atua lana folafolaga i le Mataio 18:20. A maea le mafutaga, po’o a lava ni faigata na e uia I le saili atu I le Atua, e vave ona mou ese, ae tumau ia te oe e faavavau lona pai ma faaaliga ia te oe. O nisi taimi, e te ono filifili pe sili le maua o le vavega po’o le maua o le mafanafana - ou te tatalo, ia e filifili ma le atamai. Aua nei e misia lau vavega ona o lo’u saili I le mafanafana, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 20 MATI 2024

(tusia e Pastor EA Adeboye)

Manatu Autu: Mafuta ma ona tigā (The fellowship of His suffering).

Tauloto – Mataio 20:22 “Ona tali atu ai lea o Iesu, ‘ua fa‘apea atu, “Lua te lē iloa le mea lua te ole mai ai. Lua te mafaia ‘ea ‘ona inu i le ipu o le a ‘ou inu i ai?” ‘Ua la fai mai ‘iā te ia, “Ma te mafaia.”

Faitauga - Tusi Paia: Mataio 20:21-23

 Upu Folafola

I aso e lua ua tuanai, sa ou talanoa atu I nisi o lesona mai le Filipi 3:10, a’o le asō, o le a tatou faasolo atu I le loloto. Na faaali manino e le Aposetolo o Paulo na ia fia iloa lelei le mafutaga I tigā o Iesu, I nisi faaupuga, na ia fia tauaveina tigā o Iesu Keriso. E lē mafai ona tatalo faapea le tele o kerisiano, o le toatele e tatalo faapenei, “Le Atua e, faamalolo ia te a’u, faasaoloto ia te au, aumai sa’u taavale, aumaia le tamaoaiga ia te au, ia e siitia ma faaeaina a’u ma ia ou fua tele mai’. E te le faalogo I ni kerisiano o tatalo faapea, ‘Iesu, ou te fia tigaina mo oe’. Ou te tatalo mo oe ina ia e alu ese mai faapotopotoga o kerisiano e faia na’o mea masani ae alu atu I le vaega e faia mea tetele e sili atu I mea e masani ai, I le suafa o Iesu. O Paulo o se faataitaiga o se kerisiano e faia mea tetele e sili atu I mea masani. Na ia naunau e fia iloa atili le Atua ma ia tigaina ona o le talalelei ia Iesu Keriso. Fai mai le Roma 8:16-17:

16O lo‘o molimau mai lea lava Agaga i o tatou agaga, o fānau i tatou a le Atua. 17‘Āfai fo‘i o fānau i tatou, o suli fo‘i, o suli lava o le Atua, o suli fa‘atasi ma Keriso; pe ‘āfai tatou te tigā fa‘atasi ma ia, ‘ina ‘ia fa‘amanuiaina fo‘i i tatou fa‘atasi ma ia.    

Afai tatou te tigā ma Iesu, e tatou te manuia faatasi ma ia. Fai mai Paulo, ‘auā o a‘u ‘ou te tau‘ave fa‘ailoga o le Ali‘i o Iesu i lo‘u nei tino. (Kalatia 6:17). I nisi faaupuga, o lo’o faapea mai Paulo, e iai faailoga ma maila I lona tino e iloa ai na ia tigā ma Keriso. E faamanuia le Atua I ai latou e tauave faatasi I tigā o Keriso. E pei lava o se tane o loo tigā faatasi ma lava ava I taimi faigata. Ae a o’o I taimi o le lelei, e leai se mea e taofia ai lona faia o mea pito sili ona lelei mo ia. 

O se tasi o vaega ou te faatauaina ai la’u avā I nei aso ona I le aso na ou faamavae ai ma la’u galuega I le Iunivesite ma o atu e nonofo I se nofoaga e leiloa e seisi, sa ia tuua mea uma ae faatasi ma a’u. Sa matua faigata ae sa ia lagolago I la’asaga uma ma tauave faatasi o’u tigā uma. O lenei ua sologa lelei, ua ia tauave faatasi le manuia. 

O e saili ea ni avanoa e tauave faatasi ai tigā ma Iesu? Ua e tigaina ea I se mea ona o ia? Avatu le faamalo pe afai o e fai mai ‘Ioe’ aua foi a o’o I le taimi o le faamanuiaga, e faamanuia faatasi oe ma Iesu. Peitai afai o oe o se tasi o I latou o lo’o faafiti pea ia te ia, ia e manatua na fetalai Iesu, e na te faafitia foi tagata faapena I luma o lona Tamā I le lagi (Mataio 10:33). 

Tatalo

Le Alii e, ou te fia iloa le mafutaga ma ou tigā. Faamolemole faataga a’u ou te tauave I ou tigā, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 19 MATI 2024

(tusia e Pastor EA Adeboye)

Manatu Autu: O le mana o le Toetu (The power of His Resurrection).

Tauloto – Efeso 1:19 “Ma le uiga o le silisili ‘ese lava o lona mana ‘ua ‘iā i tatou o ē fa‘atuatua, e tusa ma le galuega a lona mana tele lava.”

Faitauga - Tusi Paia: Roma 8:10-14

 Upu Folafola

Ina ua fa’apea le aposetolo o Paulo, ua ia fia iloa le mana o lona toetu i le Filipi 3:10, o loo fa’apea mai ua ia fia iloa le mana na faatuina Iesu mai le oti. E iai le mana na faatūina Iesu mai le oti. O le mana lea e tusa ma le Roma 8:11, o le mana o le Agaga Pa’ia, o le mana e toe faaola ai o tatou tino auga vale. O lenei mana o lo’o avanoa pea mo le fanau a le Atua, ina ua maea ai ona maliu o Iesu, toetu ma afio i le lagi.

O se tulaga lelei le papatisoina i le Agaga Paia. Peitai, e iai se tulaga e sili atu I lo papatisoina i le Agaga Paia. A papatisoina oe e le Agaga Paia, e te tautala i gagana ‘ese, peita’i e le gata i lena tulaga, e mana’omia foi ona e papatisoina i le afi o Agaga Pa’ia. E matagofie lou tautala i gagana ‘ese, ma ou te faamalosia lea tulaga, ae e le mafai ona e malaga atu i ni isi atunuu, alu i le maketi ma tautala i gagana ‘ese, ma e manatu o le a e manumaloina ni agaga mo Keriso; e ono ave’esea ai lou ulu (tulou) pe lafoai oe i le falepuipui mo tausaga o totoe o lou ola! E te manaomia le afi o le Agaga Paia. 

Pe e te talitonu iai pe leai, o malosiaga uma i le lagi, le lalolagi ma lalo ifo o le lalolagi, e pule uma e le mana na faatūina  Iesu mai le oti. O le mafua’aga lea e fefefe ai le lalolagi i le fa’apenetekoso. E pau a le tagata e lei mana’o Satani e toetu, o Iesu, aua ua ia iloa lelei, afai e toetū Iesu, ua uma o ia. Peitai, o le mana na faatuina Iesu mai le oti, e matua mata’utia le malosi ma e ui e tele vaega na taumafai Satani i le Mataio 27: 62-66 e faatoilalo, ae sa toetū lava Iesu mai le oti. E silisili atu lona maualuga nai lo alii sili, faipule ma malosiga uma o le pogisa, ma o le toetu mai o Iesu, na tatalaina ai le faitoto’a mo oe ma a’u, e tatou pule ai iai latou ia. Fai mai le Efeso 2:6 ‘Ua na toe fa‘atutū fa‘atasi mai fo‘i, ma fa‘anonofo fa‘atasi i tatou ma Keriso Iesu i mea o i le lagi.

O loo fa’aalia manino mai i le fuaitau o lo’o taua I luga, o e talitonu ia Iesu Keriso ma faatuatua ia te ia e nofo tupu faatasi ma ia i I le lagi. O le taimi lava e te silafia ai le mana na faatūina Iesu mai le oti, e leai se taulāitu, se temoni po o ni alii sili ma faipule o le pogisā e mafai ona fa’ato’ilaloina oe. E amata loa ona e faatonuina temoni, ma o le a latou usita’i ia te oe. Afai e te fia malamalama i lea mana, ia e tatalo ma lou loto atoa, le tatalo lenei. 

Tatalo 

Le Alii e, papatiso ia te a’u i le Agaga Pa’ia ma le afi. Fa’amolemole, faailoa mai ia te au le mana na fa’atuina oe mai le oti, I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 18 MATI 2024

Manatu Autu: Ina ia ou iloa o Ia (That I may know him).

Tauloto – Filipi 3:10 “Ina ‘ia ‘ou iloa o ia ma le mana o lona toetū mai ma ‘ia fa‘atasi a‘u i ‘ona tigā, ‘ona ‘ua fa‘atusaina a‘u ‘iā te ia i lona maliu,.”

Faitauga - Tusi Paia: Efeso 1:15-17

 Upu Folafola

O le mataupu o le aso, o se tatalo a tagata e manatu e latou le o silafia lelei le Atua ma e fia iloa atili o ia. Fai mai le Tanielu 11:32, o I latou e silafia lelei lo latou Atua e malolosi ma ausia mea telele. O le silafia ma le iloa o le Atua I le maualuga e tatau ona iloa ai o ia e aoga tele. Afai e te iloa o ia I le ala e tatau ai ona iloa o ia, e te lafoai lou ola ia te ia ma le atoatoa. E te lafoai lou lumanai ia te ia aua e faafuasei ona e faapea: O ai ea a’u le tagata, ou te le’i amata ea mai le Atua? O ai ea a’u le tagata, e lei faia ea a’u e le Atua? E iai ea se mea I lo’u lumanai e lei silafia e ia? O le lafoai ma le atoatoa o lou soifua I le Atua e faatoa mafai ona e faia pe afai e te silafia o Ia. E faatoa mafai ona e alu I le nofoaga o lo’o finagalo o ia e alu iai pe afai e te silafia o ia. 

E iai se ulugalii fou toe talavou na o mai I Aferika I galuega faamisionare ina ua faatoa uma le faaipoipoga. Ao savalivali solo na tau ane I se pa tele ma ona faitotoa. Na la fesili I le leoleo faitotoa, ‘o ai tagata o loo nonofo I tua atu o lenei pa?’. Na tali mai le leoleo faitotoa, o tagata lepela. Na toe fesili lenei ulugalii, ‘ua talai iai e se tagata le talalelei ia Iesu Keriso?’ Na tali le leoleo faitotoa, ‘o so’o se tagata e alu I totonu e le toe foi mai I fafo. E matou te tauai atu meaai I luga o le pa’. Na finau pea lenei ulugalii e fia o e talai le talalelei iai latou. Na toe faamaoti mai e le leoleo faitotoa o so’o se tagata e alu I totonu e le toe foi mai I fafo. Na tilotilo atu le alii i lona toalua ma faapea atu, ‘o loo faapea mai le Alii e ‘alu’, e leai se faaaliga e toe foi mai’. O se ulugalii moni lenei la te silafia lelei le Atua. 

E le mafai ona e silafia le Atua e ala I le lauga atu. E faatoa e silafia o ia pe afai e faaali mai o ia ia te oe. Ou te lei alu I se aoga Tusi paia. E ui e tele a’oa’oga na a’oa’oina ai mai I lo’u tama faaleagaga ma isi, ae na faaali mai le Atua ia te au. E na o le Atua lava e mafai ona faaali atu o ia ia te oe ma o le mafuaaga lea na tali ai Iesu ia Peteru, ‘auā e lē se tagata na ia fa‘aali atu ai ‘iā te oe, a o lo‘u Tamā o i le lagi’ (Mataio 16:17). O le taimi na ou faalogo muamua ai o tatalo tagata faapenei, ‘Le Atua e, o Adeboye, afio mai e faia lenei mea mo au’, na matua faateia a’u ma ou fesili ia te a’u, ‘O ai Adeboye?’. Peitai e iai se tagata ua manatu, ‘ou te le o iloa lelei le Atua, ae ou te iloa se tagata o lo’o ia silafia lelei le Atua’. Ou te tatalo ia e iloa ma silafia o ia I le tulaga e tatau ona iloa ai o ia, I le suafa o Iesu. 

Tatalo, 

Le Alii e, faailoa mai lau afio ia te au, ou te naunau e fiailoa atili lau afio, I le suafa o Iesu, Amene.

OPEN HEAVENS

MATALA LE LAGI MO LE ASO SA 17 MATI 2024

Manatu Autu: E manatua I le a? (Remembered for what?).

Tauloto – Faataoto 10:7 “O le fa‘amanatuina o le amiotonu, e vi‘ia lava lea; a o igoa o ē amio leaga, e pala ia..”

Faitauga - Tusi Paia: Galuega 9:36-42

 Upu Folafola

O lo’o e silafia lelei e i ai le taimi e fanau mai ai ma le taimi e oti ai, e tatau ai ona o tatou faafetai i le Atua mo aso ta’itasi na te aumaia tatou te ola ai. Peitai, o a’u e i ai la’u fesili ou te mana’o e te tali sa’o mai i ai - o le a se mea o le a manatua ai oe e tagata pe a uma atu oe ma lenei lalolagi? O le isi fesili ou te iloa e sili atu le tāua nai loo le fesili muamua, a e maliu, o le a sau faamatalaga o le a e avatu i le Atua pe na faafefea ona fa’aaogā lou taimi i le lalolagi? Fai mai Eperu 9:27; Pei ona tofia fo’i mo tagata ia tasi lo latou oti, ae mulimuli ane o le fa’amasinoga.

I se isi fa’aupuga, e lē o le oti lo tatou iuga, peita’i o le auala i le isi laasaga. O le isi ala e faaauau ai pea lo tatou ola pe ā maliliu, e ala i ni amioga e manatua ai pea i tatou. E i ai isi e manatua i ni uiga lelei fa’afiafia loto, a o nisi e manatua i amio e aumai ai le loto tigā ma le faanoanoa.

O se tinā na manatua i le lelei ina ua maliu o Toreka. O ia o se tasi o le au uso i lo tatou Alii i le amataga o le Ekalesia, sa soifua galue lelei ma amiotonu. O le molimau lenei o lona soifua e pei ona tusia i le Galuega 9:36; Sa i Iopa le tasi so‘o fafine o Tapita le igoa, e ta‘ua pe a fa‘amatalaina, o Toreka; na tele ana galuega lelei ma mea alofa na ia faia. 

O se lesona mo i tatou, o a tatou galuega lelei e telē le sao e fa’ailoa ai lo tatou faatuatua ma le faamaoni i le Atua. Fai mai Iakopo 2:15-17; Afai ua lē ofu se uso po’o se tuafafine, ua leai fo’i sana mea e ‘ai i lea aso ma lea aso, a fai atu so outou iā te i latou, “Ina o ia outou ma le manuia, ia mafanafana, ma ia maoona,” a ua lē foa’i atu ia te i latou ni mea e tatau i le tino, se a le aogā? E faapea fo’i le faatuatua, pe afai e lē i ai galuega, e mate lava ia ina ua na o ia.

O le talalelei a Iesu e tatau ona i ai se faatinoga i lou olaga e ala i au galuega lelei; o le molimau a le au uso iā Toreka e faamaonia ai lenei upu. Sa ia faia galuega lelei e tele na faigata ai i le ekalesia ona faagalo ia, ma pei ai ua toe ola mai. Fai mai Salamo 112:5-6; E manuia le tagata ua alofa fua, ma tuuina atu ana mea i e nonō mai; na te tausia ana mea ma le faautauta tonu. E moni, e lē fa’agae’etia o ia e faavavau; e manatua pe tagata amiotonu e faavavau.

Le au pele e, o a ni au galuega lelei o le a manatua ai oe e tagata? Mafaufau i ai i lenei mataupu ma manatua upu tauloto o le asō. Ia e faaaogaina soo se avanoa e tuuina atu e le Atua ia e fai mea lelei I tagata uma, I le suafa o Iesu, Amene.

Tatalo

Tamā ia amata i le asō faamolemole fesoasoani mai ia o’u ola mo isi ae lē mo na o a’u lava. I le suafa o Iesu. Amene.