Samoan Devotional

OPEN HEAVENS

MATALA LE LAGI MO LE ASO GAFUA 15 APERILA 2024

(tusia e Pastor EA Adeboye)

Manatu Autu: Aua e te talia mea e lē aoga (Stop taking nonsense).

Tauloto -Tusi Paia– Mataio 21:12 “Ua ulufale atu Iesu i le malumalu o le Atua, ‘ona ia tulia uma lea i fafo o ē na fefa‘ataua‘i i le malumalu, ma na fuli i lalo laulau a ē na sui tupe, ma nofoa o ē na fa‘atau lupe..”.

Faitauga - Tusi Paia: Galuega 13:5-12

E toatele kerisiano e faapea mai e latou te le taliaina ni mea lē aoga mai tagata. Peitai, o nei tagata latou te talia mea e lē aoga mai le tiapolo. E lē taua tele pe e te taliaina pe leai mea e lē aoga mai I tagata, o le tulaga taua ia aua nei e taliaina ni mea e lē aoga mai le tiapolo. Fai mai le Tusi Paia, ‘8‘Ia ‘outou fa‘autauta, ‘ia ‘outou mataala, ‘ona o lē ‘ua fai ‘outou mōna fili, o le tiapolo lea, o lo‘o fealualua‘i o ia e pei o se leona tagi, ‘ua sā‘ili se tasi e ‘aina e ia’ (1 Peter 5:8). E na o lou nofonofo ea ma faataga le tiapolo e sau e aina oe? E tatau ona e tumau e tetee ia te ia, ma sunusunu lona siusiu ina ia sola mamao ese mai ia te oe.  

E iai se tasi o ou afafine na faia sana tautinoga. Na ma’i si ana tama ona alu lea e ave I le falemai. Na fai ane le fomai na tau atu iai, ua leai se togafiti e mafai ona toe faia e faasaoina lana tama. Na fai iai pe mafai ona fesootai I seisi falemai e ave iai lana tama. Na faia ma ua agai atu iai I le taavale. Sa umi se poloka o taavale ma ua o’o ina oti le tamaitiiti I totonu o le taavale. Na faapea mai lenei tina, ‘ou te lē taliaina lenei mea’ ma ina ua maea le 5 itula I luga o le auala ua oo mai se manatu ia te ia, ‘e mafai e lo’u Tama faaleagaga ona valaau I lona Atua ma e tali mai o ia. O le a ou valaau I le Atua o lo’u Tama, ma o le a ou faaaogaina se tasi o solosolo na tatalo ai I luga’. Ua ia fofola le solosolo I luga o le tamaitiiti, valaau le igoa o le tamaititi ma faatonuina e toe ola mai’. Na mapuea le tamaitiiti ma ua toe ala mai. Ua lē toe iai se mafuaaga e o ai I le falemai. 

Afai e mausali lou manatu e aua lava nei faatagaina se mea leaga e tupu, e malosi ma faatauanau au tatalo e faia e sili atu I le tulaga masani. E leiloa pe iai ni mea I lou olaga o lo’o faaaoga e le tiapolo e faatauga ai oe. E mafai ona taofia pe afai e te filiga e te lē taliaina ni mea leaga mai ia te ia. Afai o lo’o e tatalo lemu pea I nei mea, ua oo I le taimi e te faaaogaina ai lou tulaga pule ia Keriso ma amata ona e faatonuina e taofia I au tatalo. 

E tatau ona gauai muamua I le Atua ona faatoa mafai lea ona e manumalo e faasagatau I le tiapolo ma e tulai pea. Fai mai le Iakopo 4:7O le mea lea ‘ia ‘outou gaua‘i ai i le Atua; ‘ia ‘outou tete‘e atu i le tiapolo, ‘ona sola ‘ese ai lea o ia ‘iā te ‘outou.

Afai e te mautinoa o lo’o e tumau I le Atua, a e tetee I le tiapolo, e sola ese o ia mai ia te oe. Aua e te talia mea o lo’o ia faia e faasagatau mai ia te oe. Faatonu le tiapolo e aveese ona lima mai ia te oe ma so’o se mea I lou olaga, I le suafa o Iesu, Amene. 

OPEN HEAVENS

MATALA LE LAGI MO LE ASO SA 14 APERILA 2024

(tusia e Pastor EA Adeboye)

Manatu Autu: I le Loto e Tasi (In One Accord).

Tauloto -Tusi Paia– Salamo 133:1 “Fa‘auta, o le mea e matuā lelei ma le matagofie lava, pe a nonofo fa‘atasi lava o uso.”.

Faitauga - Tusi Paia: Salamo 133:1-3

E matagofie i fofoga o le Atua le loto gatasitasi; so’osemea na te silafia o faatasi ai le au uso i lona suafa, e afio ai. E te maua lea fa’ata’ita’iga lelei i le 2 Nofoaiga Tupu 5:13 e faapea; 

13O ē ili pū ma ē o pepese ‘ua peiseaī o se to‘atasi, ‘ua tasi le leo i le vi‘iga ma le fa‘amanū i le ALI‘I; ‘ua latou pepese fa‘atasi ma pū ma sumepalo, ma la‘aupese, e vivi‘i atu ai i le ALI‘I, o lo‘o fa‘apea atu: “Auā e lelei o ia, auā e fa‘avavau lava lona alofa,” ‘Ona tumu ai lea o le fale i le ao, o le fale lava o le ALI‘I 

I le faitauga o loo i luga, a’o pepese I le loto gatasi ē ilia pu ma i latou e pepese ma ē fai pesega, na afio ifo le mamalu o le Atua pei se ao ma fa’atumulia ai le malumalu. O se mea matagofie i le Atua pe a tapua’i ma vivi’i atu ia te ia lana fanau i le loto e tasi. O le ala lea na fetalai ai Iesu Keriso i le Mataio 18:20; O le mea ua fa’apotopoto ai se toalua poo se toatolu i lo’u igoa, ou te i ai faatasi ma i latou.”

I le afeafe aupito a luga o loo faamatala mai i le Galuega 2, fai mai le Tusi Paia ina ua loto gatasitasi tagata na fa’atumulia le potu e Agaga Paia ma se leo pei o le agi malosi a se matagi. Soosemea e potopoto ai le au kerisiano ma le loto gatasi, e afio mai i ai le Atua i lona mamalu.

O loo ta’u mai e la tatou Tusi Paia faitau o le asō, a nonofo faatasi ma le loto gatasi le ‘au uso, e tusa ma le suāu’u o le fa’au’uga sa liligi ifo i le ulu o Arona ma tafe atu ai i ona vae. E te silafia le uiga o lea upu? O lona uiga seiloga ua loto gatasi le fanau a le Atua ona tafe ifo lea o le fa’au’uga ia i latou. A aunoa ma le loto faatasi, e lē tafe ifo le fa’au’uga. O le pogai e lē lagona ai i le tele o lotu le mana o le Atua ia latou sauniga o le lē loto gatasi. O le mea e i ai le upu tau faaleaga, misa ma fevaevaea’iga, aua lava ne’i manatu e maua ai le mana o le Atua. O nei uiga e lē mai le Atua o lona uiga e lē mafai ona afio le Atua i le mea e i ai.

Fai mai 1 Korinito 12:12; o i tatou o itu tino eseese o le tino e tasi. Afai e matau’a le lima i le mata ma inoino le vae i le ulu, e faafefea ona galue lelei le tino? A o tatou galulue ma mafuta i le loto e tasi i a tatou lava faapotopotoga ma le mafutaga a le tino o Keriso, tatou te vaaia vavega tetele e ofo ai le lalolagi atoa. Afai o oe o se faifeau o loo e faitau i lenei faamalosi’au i le taimi nei, ua tatau ona e faamautinoa e fōia ma faaleleia fevaevaeaiga uma i le va o le ‘au galulue uma faapea ma le ‘au uso i totonu o lau ekalesia i le asō. Valaau I se tasi o lua tapua’i faatasi ma fai i ai, “Ou te alofa iā te oe i le alofa o Keriso.” I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 13 APERILA 2024

(tusia e Pastor EA Adeboye)

Manatu Autu: O ai o e auauna iai? (Whom are you serving?).

Tauloto -Tusi Paia– Mataio 6:24 “E leai sē na te mafaia ‘ona ‘au‘auna i ali‘i e to‘alua; auā e ‘ino‘ino o ia i le tasi, ‘ae alofa atu i le tasi; a lē o lea, e fa‘apipi‘i atu o ia i le tasi, ‘ae fa‘alēaogā i le tasi. Tou te lē mafaia ‘ona ‘au‘auna i le Atua ‘atoa ma le ‘oa”.

Faitauga - Tusi Paia: Kolose 3:23-24

‘E tatau ona ou faia galuega a le ua auina mai a’u, manū o a’o; e o’o I le po, e lē mafaia e se tasi ona galue ai’ Ioane 9:4

Fai mai le fuaiupu, “O galuega a lē na auina mai a’u,” e lē o galuega a lou faifeau. O le ala lea na o’u ata ai ina ua fai mai se tasi ia te a’u i ni tausaga ua te’a, “Sa o’u auauna iā te oe i nei uma tausaga.” Sa o’u ofo ma o’u tali atu, “auauna iā te a’u?!” Sa o’u manatu o loo ma auauna faatasi i le Atua i le tovine e tasi. E manaomia lou silafia lelei poo ai o lo’o e auauna i ai. O e galue mo le Atua, lou faifeau, poo le ta’ita’i o lau matagaluega i le Ekalesia? Afai o le Atua lenā e te auauna i ai, e lē gata i le lelei o lau amio pe a outou faatasi ma le faifeau ma lou ta’ita’i, ae tutusa i taimi uma auā o lē o lo’o e auauna i ai, e silasila ia te oe i taimi uma.

Mo nisi tagata, o lo’o auauna i o latou tuāoi. E manana’o e vaai o latou tuāoi ia i latou o ni kerisiano faamaoni peita’i a na o ia loa, pe a lē iloa atu e se tasi, latou te faia pea le agasala. Afai o e silafia e moni, o le Atua o lo’o e auauna i ai, e sili atu lou naunau e ola fa’apaiaina i le silafaga a lou matai na i loo le vaaiga a tagata. I le Faaaliga 4:11 ua faapea mai; “Lo matou Alii e, ma lo matou Atua, e tatau lava oe ina ia tuuina atu ia te oe le viiga, ma le fa’ane’ene’ega, ma le mana; auā na e faia mea uma lava, ona o lou finagalo fo’i e i ai i latou ma ua faia.” E tatau ona e faafiafia i le Atua ae lē o tagata o loo tilotilo atu ia te oe.

Manatu mulimuli, o nisi tagata e fai mai o loo auauna i le Atua peita’i o loo galue mo o latou lava manaoga, e omai i le Atua ona o lo’o manana’o i se mea mai iā te ia. O a latou galuega uma e faatino I le Atua e faavae ma fua i o latou manaoga. Fa’ata’ita’iga, e I ai tagata e maua loa se galuega na nofo tatalo ai, le toe toaga loa e faataunuu ona tiute masani i le ekalesia, poo le matua’i le toe alu lava I se lotu.

O nisi, e ala ona o i le lotu, o loo saili se tama poo se teine amio Atua la te faaipoipo. I le Ioane 6:24-26 na tutuli e Iesu tagata na ala ona o atu iā te ia o falaoa ma i’a. O ituaiga tagata faapea, e lē talia e le Atua a latou auaunaga. E silafia e le Atua le mafuaaga moni o a latou galuega, na te lē faitaulia i latou faatasi ma lana fanau.

O e auauna mo le Atua, tagata poo ou manaoga? Le au pele e, e manaomia le manino lelei po’o ai o e auauna i ai. Auauna i le Atua ona o ia o lou Atua e te alofa ma fa’aaloalo i ai ae lē ona o se isi lava mafuaaga. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 12 APERILA 2024

(tusia e Pastor EA Adeboye)

Manatu Autu: O le aogā o le lafoai ma le atoatoa (The gains of total surrender)

Tauloto -Tusi Paia– Eperu 12:2 “Ma ‘ia va‘ava‘ai atu ‘iā Iesu o lē na te ta‘ita‘iina ma lē na te fa‘a‘ato‘atoaina le fa‘atuatua; o lē na ‘onosa‘i i le satauro, na fa‘atauva‘a ‘iā te ia le mā, ‘ona o le ‘oli‘oli sa tu‘u i ona luma, ‘ua nofo fo‘i o ia i le itū taumatau o le nofoāli‘i o le Atua.”.

Faitauga - Tusi Paia: Filipi 2:5-11

I a’u suesuega o lenei mataupu, ua ou matauina le aposetolo o Paulo ua faapea mai I le Filipi 4:7 ‘Ae peita‘i o mea uma sa aogā ‘iā te a‘u, ‘ua ‘ou manatu na lē aogā ia mea ‘ona o Keriso, na faaeaina maualuga o ia, ae na ia faapea mai I le 2 Korinito 12:11, ‘ e leai se mea ‘ou te itiiti ai i ‘aposetolo silisili.' A tatou talanoa I le faaeaina, e toatele e manatu I tulaga mautofi. E lelei ma matagofie tulaga mautofi, a’o a’u, e sili atu le avea ma tiakono e mafai ona faatuina tagata mai le oti I lo le avea ma faifeau e taitai aoao ae le mafai ona toe faaola mai se lago. Na ou lauga I le mataupu lenei o le ‘ola e lafoai ma le atoatoa I le Atua’ I se tasi aso. I vaitaimi ia, e toalaiti lava tagata e fai taavale. Ina ua maea le sauniga, na sau se tama talavou ma faapea mai, ‘Tama, e amata atu nei ona ou lafoai mea uma ia Iesu’. Ua ou faapea atu, ‘e moni?’ Ua ia faapea mai, ‘Ioe’. Ona ou fai atu lea, ‘lelei, o lona uiga e mafai ona matou faaaogaina lau taavale taeao mo galue e fia faia a le Ekalesia?’. Ua tali mai, ‘e tatau ona ou alu e faigaluega taeao’. Ua ou ata ma fai atu iai, ‘sa ou taumafai e faailoa atu ia te oe, e te lei lafoai mea uma I le Atua’. Ua na o le faanoi atu I le faaaogaina o lana taavale mo se galuega a le Ekalesia. E faapefea pe ana ou fai atu I se mea e sili atu?

O le a se mea e faia ina ia mafai e se tagata ona lafoai mea uma I le Alii, tusa foi po’o le galue e leai se totogi? Ua ou maua le mafuaaga lelei I le Filipi 2:5-11, le faitauga o le Tusi Paia mo le asō, e amata I le faapea mai, ‘‘Ia ‘iā te ‘outou fo‘i lea lava manatu sa ‘iā Keriso Iesu. O lo’o auiliili mai ai le faamaualalo o Iesu ma anaana ua o’o ina maliu, o le maliu lava lea I le satauro. Fai mai le fuaiupu e 9, 'O le mea lava lea ‘ua matuā fa‘aeaina ai o ia e le Atua, ma foa‘iina atu ai ‘iā te ia o le suafa e silisili i suafa uma lava. O le tulaga tonu lea, ou te iloa ai, e sili atu le manuia I lo le tigaina. Fai mai le Eperu 12:2 “Ma ‘ia va‘ava‘ai atu ‘iā Iesu o lē na te ta‘ita‘iina ma lē na te fa‘a‘ato‘atoaina le fa‘atuatua; o lē na ‘onosa‘i i le satauro, na fa‘atauva‘a ‘iā te ia le mā, ‘ona o le ‘oli‘oli sa tu‘u i ona luma, ‘ua nofo fo‘i o ia i le itū taumatau o le nofoāli‘i o le Atua.”.

A e uluai saili le malo o le Atua, o isi mea uma e naunau iai lou loto e faia lava mo oe e tusa ma le finagalo o le Atua. A e tuuina lou ola mo le Atua, e na te taui ia te oe I le mamalu ma le faaeaina. O lo’o faatali mai le olioli sili I so’o se tagata e lafoai mea uma I le Atua. Afai e te lafoai mea uma o lo’o ia te oe I le Atua, e na te faamanuia atu Ia te oe e sili atu I ou manatunatuga uma. 

Tatalo, 

Le Alii e, faamolemole fesoasoani mai ia te a’u ia lafoai mea uma ia te oe I le aso, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 11 APERILA 2024

(tusia e Pastor EA Adeboye)

Manatu Autu: Luitau o le faau’uina 2 (Challenges of Being Anointed 2).

Tauloto -Tusi Paia– Luka 12:48 “A o lē ‘ua lē iloa, ‘ua faia fo‘i e ia mea e tatau ‘ina sasaina ai, e māmā ‘ona sasaina o ia. Auā o lē ‘ua foa‘iina atu i ai o mea e tele, e su‘eina atu fo‘i ‘iā te ia o mea e tele; o lē fo‘i ‘ua tu‘uina atu i ai o mea e tele latou te fai atu ‘iā te ia, e ‘aumai mea e sili ‘ona tele...” 

Faitauga - Tusi Paia: Mareko 6:31-34

I le faʻaauauina o le talanoaga ananafi, o se tasi o luʻitau mo tagata faʻauʻuina, ua manatu nisi, e matua malolosi latou. Talu ai, a tatalo I le Atua e vave maua tali o tatalo, ua manatu nisi tagata, latou te lē manaʻomia ni talosaga. E lē gata i lea, a faae’e atu o latou lima i luga o ē mamaʻi, e maloloina I latou, ua manatu ai nisi tagata, o i latou e ofoofogia e lē taitai vaivai pe lē lavā. Talu ai latou te talaʻi le talalelei ma faaolaina agaga, e manatu le toatele, e lē faaosoosoina i latou, peitai e sili atu faaosoosoga e fetaiai ma I latou.

E tasi lava le faaiuga sese na faia e Mose i le 40 tausaga na ia taʻitaʻia ai le fanauga a Isaraelu, ae fetalai i ai le Atua, e lē o’o i le nuu o le folafolaga. Na ia tatalo ma tu I le va mo Isaraelu i taimi uma latou te faia ai le amioleaga, ma sa faamagalo e le Atua. Ae ina ua puapuaga Mose, na leai se tasi e tatalo i le Alii ma tu I le va mo ia.

E te finaglo e tele le fa'au'uga ia te oe? Sauni e galue punoua’i. Ina ua ou iloa i le Tusi Paia, a tatou naunau i meaalofa o le agaga, e ese lo’u fiafia. Sa ou talosaga mo le faaluaina mo a’u o le faauuga ia Elisaia, Peteru, Paulo ma Iesu Keriso a o i ai i latou i le lalolagi, ona tuufaatasia uma lea ma toe faaluaina. Na lapataʻia aʻu e le Atua i lenā taimi, o la’u talosaga e mataʻutia ma e lē mafai na tuua aʻu e tagata e fai sa’u mālōlōga pe’a ou maua faamanuiaga faapenei. A iloa e tagata ua faauuina oe, e latou te aumaia uma o latou faafitauli iā te oe. E tusa lava pe ua uma ona tatalo atu iā i latou mai le pulelaa, e mananaʻo lava e vaai ia te oe taitoatasi. E le mafai ona e tuliesea aua o le faamoemoega o le faauuga o le auauna atu.

Ina ua ou faafaigaluegaina se tasi tamalii e fesoasoani ia a’u, sa ia fesili mai po’o a matou itula faigaluega? O la’u tali, e amata i le 5 i le vaveao, ae na o le Atua e silafia le taimi e uma ai. O le mafuaaga lea e manaʻomia ai le faafaileleina lelei o tagata o le a latou tauaveina faauuina. E 190 atunuu i le lalolagi o lo’o iai le Ekalesia Redeemed Christian Church of God . E faapefea ona ou taulimaina tagata uma e o mai ia te au ma o latou faafitauli? O le mafuaaga lea e iai lava faifeau faauuina I faapotopotoga taitasi ae na o mataupu latou te le mafaia, e aumai ia te au. Ua faafaigofieina foi e le Atua ona ou tatalo mai le pulelaa, ma faauuina solosolo e faaaogaina e fai ai vavega I tagata, semanu ou te faia uma tatalo mo I latou taitoatasi e pei ona faia I taimi ua tuanai. E tele tiute ma luitau e maua I le faʻauʻuga, afai e te naunau e maua le faʻauʻuga, sauni e talia ma opogi nei faamanuiaga. I le suafa o Iesu, Amene. 

OPEN HEAVENS

MATALA LE LAGI MO LE ASO LULU 10 APERILA 2024

(tusia e Pastor EA Adeboye)

Manatu Autu: Luitau o le faau’uina (Challenges of Being Anointed).

Tauloto -Tusi Paia– 2 Tupu 2:24 “Ona fāliu lea o ia i tua, ‘ua va‘ai atu ‘iā te i latou, ‘ua fetu‘u atu fo‘i ‘iā te i latou i le suafa o le ALI‘I. ‘Ona ō mai ai lea o urosa fafine e lua mai le vao, ‘ua saei i tama e to‘afagafulu ma le to‘alua o i latou.,..” 

Faitauga - Tusi Paia: Numera 20:1-13

E te manao e matua maualuga lou faauuina? O Lē na te foai mai le faauuga e lava ma totoe mo tagata uma. Fai mai le Salamo 23:5 ‘ua e fa‘au‘uina lo‘u ulu i le suāu‘u; ‘ua taumasuasua la‘u ipu’. E lava ma totoe le faauuga o loo ia te ia mo tagata uma, peitai e te lavatia totogi lona tau? E te loto malie e ui I luitau uma e aumai faatasi ma le faauuga? Fai mai le Eperu 1:9 ‘Afai e te fiafia i le amiotonu, ma e ‘ino‘ino i le amio leaga, e fa‘au‘uina ai oe e le Atua, o lou lava Atua i le suāu‘u o le ‘oli‘oli e sili, i ē tou te fa‘atasi.” 

O le aso ananafi na ou talanoa atu I faamanuiaga o le faau’uga, peitai e tatau ona mataitu lelei, e iai foi luitau o le faauuga. O le luitau tele I le faauuga, o le maua o le mana e mafai ona sese ai foi le tagata, ae o le mana e leai sona pa puipui e faaleaga ai le tagata. O le tele o le faauuga o le alagatatau foi lea ona matua faaeteete ina ia aua nei faaaoga seseina. I le Numera 20:1-13, aemaise le fuaiupu 10, na faapea atu Mose I tagata ‘Inā fa‘alogologo mai ia o ‘outou ē ‘ua fouvale; ma te fa‘atāfeina mai ‘ea le vai a‘i lenei papa mo ‘outou?' ao ni nai minute muamua atu, sa ia tootuli I luma o fofoga o le Atua ma augani atu mo se fofo o le faafitauli. O le taimi lava na faatonu ai o ia e le Atua I le mea e faia, na Ia liliu atu I tagata ua tofotofo ia te ia ma lau o tagata fouvale, na tautala atu e peiseai o le mana e aumai ai le vai mai le papa e mai ia te ia ae lē mai le Atua. I le fuaiupu 12, o loo faapea mai le “Na ‘oulua lē fa‘atuatua ‘iā te a‘u, ‘ia fa‘apa‘iaina ai a‘u i luma o le fānauga a Isaraelu, o le mea lava lea lua te lē fa‘a‘o‘otia ai lenei fa‘apotopotoga i le nu‘u ‘ua ‘ou foa‘iina ‘iā te i latou.” 

Ou te fai lava I faifeau I le Redeemed Christian Church of God, e le tatau ona manatu se tagata ua ia faamaloloina ni tagata mama’i. E le mafai ona e faamaloloina se isumu (tulou). Ua na o le Atua e faamaloloina ma’i, ae o oe o le ipu e faaaoga e auala atu ai le faamalologa. E tatau lava ona e iloa o se avanoa faapitoa lea tulaga. Ona o le mana e faia ai vavega e le sou mana, e mafai e le Atua ona faaaoga seisi tagata. Na fai mai se tasi tagata o le Atua, afai e aveese le Atua mai ia te ia, e leai se mea tele o totoe. Ua faateia a’u aua o au ia, a aveese le Atua, ua matua leai se mea o totoe. O so’o se tagata e manatu o ia e faapitoa e aunoa ma le Atua, ua agai atu o ia I le ala e faaumatia ai. Tusa po’o le a le faauuga o lo’o ia te oe, aua nei e manatu ua tele se mamalu ma le mana ia te oe. Ia e mautinoa e te faamaualalo pea. Aua nei galo ia te oe ua na o le Atua e faia vavega, e le o oe, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 9 APERILA 2024

(tusia e Pastor EA Adeboye)

Manatu Autu: Faamanuiaga o le faauuga (Benefits of the Anointing).

Tauloto -Tusi Paia– Luka 4:18 “Ua i o‘u luga le Agaga o le Ali‘i, auā ‘ua nā fa‘au‘u mai ‘iā te a‘u e folafola le tala lelei i ē matitiva. ‘Ua ‘auina mai a‘u e ia e fa‘amālōlō i ē loto momomo, e tala‘i le sa‘olotoga i le tāfeaga, ma ‘ia pupula mata o ē tauaso, e tu‘u sa‘oloto i ē ‘ua fa‘asauāina,..” 

Faitauga - Tusi Paia: 2 Tupu 2:15-22

O le fa’au’uga e avea ai oe ma se fa’amanuiaga i so’o se tagata. I le 2 Tupu 4:1-7, sa avea Elisaia ma faamanuiaga i se fafine ua oti lana tane. E mafai ona e fa’amutaina le mativa o se tagata, ona o le fa’au’uga. Ae le gata i lea, e mafai ona avea oe ma fa’amanuiaga i se tagata mauoa ma le tauoloa. E mafai ona e nofo i lou potu ma faatonu le tagata mauoa ‘Alu ia inā taele’ e pei ona fai Elisaia ia Na’amanu, ma a usita’i le tagata lea i lau faatonuga, ona mālolōina  lea.  Peita’i  e tatau ona mataituina lelei, afai e fa’amanuia e se tagata fa’au’uina se tagata mo le taui ia maua tupe, o le a ‘avea fa’afitauli o tagata mauoloa ma ona fa’afitauli, e pei o le ma’i lepela a Naamanu, sa toe pipii ane ia Kiasi. (2 Tupu 5:20-27).

O le fa’au’uga, e avatu ia te oe le mana e maua ai e tagata le foliga fiafia semanu e latou te maua le fa’anoanoaga.  Ina ua ausia lo’u 80 tausaga, sa mautu lo’u manatu, e leai se fiafia e faia e faailoga ai. Peitai, sa mafuta nisi o taitai o le Ekalesia I lo’u ofisa ina ua maea  le sauniga o le Agaga Pa’ia i le aso lea. Ina ua tuu atu avanoa iai latou e faia ni tautinoga, o se tasi o I latou o se alii fomai, o se taitai o le Ekalesia, ua faapea mai, e to’alua lana fanau teine ua fa’afuase’i ona mama’i tigaina. O le tasi o lana fanau teine ua tau puni le manava, ua vave ona oo mai se manatu ia te ia, ‘Ua uma ona ou tatalo a e leai se suiga, ‘ae ou te iloa se tagata e sili atu lona fa’au’uga nai lo a’u’. Ona telefoni mai lea ia te a’u. Sa ia fa’amatala mai le mea ua tupu. Sa fa’atonu mai e le Atua ia ou faatonuina e faia nisi o mea. Ona amata lea ona ia faia, a ua le mautonu nisi o foma’i po’o le uiga o mea o loo ia faia. Na ia faapea atu , e le o ni togafitiga faafomai, a’o le fa’atonuga mai le Redemption Camp. O se vavega na faaalia ma ua ola uma lana  fanau, ma o le asō, ua Inisinia le isi a o le isi ua avea ma fomai. Afai e te naunau e mafai ona e liliu ese le fa’anoanoa mai totonu o aiga, ia e tulituliloa le fa’au’uga.

O le fa’uuga e te mauaina ai le saogalemu ma le puipuiga mai le lagi O lo tatou Atua e pei o se tupe e lua ona itu. O ia o le Alofa (1 Ioane 4:8) a’o ia foi o le afi e maamaai (Eperu 12:29). A faapea mai ‘Aua le tago I e ua ‘ou fa’au’uina’, o lo’o ia faapea, ‘aua le tago i le afi. I totonu o Aferika e iai se muagagana, ‘E o’o i le ta’ifau ua valea, na te iloa lelei le afi’. E tusa po’o le a le faaletonu o le mafufau o se tagata, e le mafai ona savali i totonu o se afi. Afai e te maua le fa’au’uga, e matua fefe ma ono lamatia le tiapolo pe a tago ia te oe. Sa’ili le fau’uga a le Atua, I le suafa o Iesu, Amene.

OPEN HEAVENS

MATALA LE LAGI MO LE ASO GAFUA 8 APERILA 2024

(tusia e Pastor EA Adeboye)

Manatu Autu: Faamasino i le tagata fa’au’uina? (Judging the Anointed?).

Tauloto -Tusi Paia– Roma 14:4 “O ai ‘ea oe lē fa‘amasino atu i le ‘au‘auna a le tasi? E tumau ia pe pa‘ū i lona lava ali‘i; ‘ae fa‘atumauina lava ia, auā e mafaia e le Atua ‘ona fa‘atumau ‘iā te ia..” 

Faitauga - Tusi Paia: Numera 12:1-16

O ananafi na o’u talanoa manino atu ai e le tatau ona aveesea le mamalu mai auauna faauuina a le Atua. O le fesili e mafai ona fesili ai nisi, ‘o le a le mea e fai pe afai ua foliga mai ua sese le faifeau a le Atua?’ O se matautu e maaleale e tatau ona faia ma le faaeteete, ma e manaomia le atamai ma le taitaiga a le Atua. Mo se faataitaiga, I le faitauga o le Tusi Paia o le aso, na faaseā ma tetee Miriama ma Arona ia Mose ona o le la manatu, e sese se mea a Mose o loo faia. E uma ane, ua maua Miriama I le lepela ona tatalo lea o Mose I le Atua ia faamaloloina o ia. 

E le o sou tulaga le faamasino o auauna a le Atua, tu’u lo latou faamasinoga I lo latou Matai Sili. I le Roma 12:13, o lo’o manino le Tusi Paia o le Atua e taui ma sui, e na te taui atu, na o le ripoti lava o le mataupu I le Atua, faitalia le Atua ma a’oai lana auauna. E le mafai e auauna faauuina a le Atua ona lalafi mai le Atua pe a so’ona faia le lafu mamoe I lana pule faitalia. Fai mai le Eperu 10:31, o le mea e mata‘u tele ai ‘ona maua e ‘a‘ao o le Atua soifua, talitonu mai e sili atu pe afai latou te le maua le aao o le Atua soifua. O le mafuaaga e matou te aoa’i ai le aufaigaluega ua faia ni mea sese, e puipui ai I latou mai le aao matautia o le Atua. Afai e sese se faifeau ae aoai ma faamalolo mo se vaitaimi e le Taitai aoao, e sili lea I lo le faia o le aoaiga e le Atua, o le afi ma’ama’ai. O lona uiga, afai e leai se mea a le faifeau e faia I se tagata galue I le ekalesia o loo faia le mea sese, mo se faataitaiga I le vaaiga o tupe, e sili atu le leaga o le aafiaga pe a leai se mea a le faifeau e faia. O lona uiga o le a afio mai le Atua e faia ma e leai seisi e fia paū I lalo o le aao matautia o le Atua. 

I le 2 Samuelu 11, na faaaoga e Tavita lona tulaga faau’uina e faoa ai se toalua o se tagata ma fasiotia o ia. E leai seisi e mafai ona faasala ia te ia aua e leai seisi e sili atu I le tupu. Na afio mai le Atua ma faasala ia te ia. Na amata mai I le aso lea, na lē toe maua se filemu I totonu o le aiga o Tavita. E lei umi, ae faamalosi e lona atalii o Amoni lona tuafafine, ona oo mai lea o le isi ona atalii o Apisaloma ma fasioti ia te ia. Mulimuli ane, na tulai mai Apisaloma ma fouvale I le malo o lona tama o Tavita. E o’o mai lava I le asō, e lei alu ese lava le pelu mai I le aiga o Tavita, o Isaraelu ona o le faamasinoga a le Atua I luga o Tavita (2 Samuelu 12:9-10). 

A faauuina e le Atua se tagata ae ia faaaogaina le faauuga e faoa ai se mea mai se tagata, a faasala e le Atua lea tagata, e ono faasolo I augatupulaga e tupuga mai ia te ia. Ta’atia le faamasinoga o auauna faauuina a le Atua ua latou faoa ni mea mai ia te oe, ta’atia I le Atua, i le suafa o Iesu, Amene. 

OPEN HEAVENS

MATALA LE LAGI MO LE ASO SA 7 APERILA 2024

(tusia e Pastor EA Adeboye)

Manatu Autu: O le tagata fa’au’uina ma le tagata fa’au’uina  (The Anointed vs The Anointed).

Tauloto -Tusi Paia– 1 Samuelu 24:6 “'‘Ua fai atu fo‘i o ia i ona tagata, “‘Ia fa‘amamao e le ALI‘I ‘iā te a‘u ‘ona ‘ou faia lenā mea i lo‘u ali‘i, lē ‘ua fa‘au‘uina e le ALI‘I, e fa‘ao‘o ai lo‘u lima ‘iā te ia, auā o ia ‘ua fa‘au‘uina e le ALI‘I.” '

Faitauga - Tusi Paia: 1 Samuelu 24:1-6

O ananafi na o’u talanoa ai i le mata’utia e mafai ona i ai le fa’au’uga pe a lē tauavea fa’alelei. Peita’i e toatele tagata fa’au’uina e manatu o le lapataiga ia faaeteete i le fa’au’uga e lē aofia ai latou. E sesē lea manatu. E lē avea le fa’au’uga o iā te oe, e mafai ai ona e faaleaga i le isi auauna fa’au’uina a le Atua. O le isi lenei mafuaaga e fano ai nisi o auauna a le Atua; e tautatala faaleaga i o latou uso i le galuega, ae a o’o mai le taui o a latou amio ua fa’aseā i le Atua ma mafaufau solo pe aisea ua faaletonu ai le galuega.

I le 1 Samuelu 24:1-6, Na maua e Tavita se avanoa lelei e fa’ao’o ai le oti i le tupu o Saulo, o lē sa lamalama e fasioti iā te ia. Na fiafia tagata o Tavita ua maua lenei avanoa peita’i Tavita na musu e faa o’o le oti iā Saulo le tupu. Peita’i ina ia iloa e Saulo na latalata atu Tavita ia te ia, na ia sesele ese ai le pito ofu o Saulo. Fai mai le Tusi Paia na tuia le loto o Tavita, o lona uiga na misi alofa ona o lana mea ua fai. E ui lava ua alu ese le Atua ma Saulo, na tautino pea Tavita na te lē fa’ao’o lona lima iā Saulo le tagata ua fa’au’uina e le Alii.

Ou te manatua ina ua tofia ma fa’au’u a’u o se faifeau, e tolu aso talu ona uma ona liligi le suāu’u i luga o lo’u ulu ou te le’i taele ona o lo’u faapelepele i le fa’au’uga. E umi se taimi fa’ato’ā o’u iloa po’o le a le tele o fasimoli e lē mafai ona fufulu esea le fa’au’uga. E fa’au’uina loa se tagata e tumau ai lava le fa’au’uga i luga o le uso tusa pe fo’i i tua le olaga. Tusa pe ua fulitua le tagata ia e faaeteete pea i au mea e fai i lea uso ona o le fa’au’uga. E lē mafai ona ou faia se faamatalaga lē lelei e uiga i faifeau ua o ese leaga ma le RCCG. O le mafuaaga ona o loo i ai pea le suāu’u i luga o latou ulu, ma ou te lē mana’o e afaina le ma va ma le Atua.

Pau le eseesega pe a faataga e le Atua. Fa’ata’ita’iga, e ono toe fa’aaogā e le Atua le tagata na ia fa’aaogā e fa’au’u le uso ua fulitua e auala mai ai lana a’oa’iga. I le tulaga lea, o le tagata sa faia le fa’au’uga lea ua fai ma sui o le Atua e toe faia le a’oa’iga. I le 1 Samuelu 15:27-29 na musu Samuelu e tapua’i faatasi ma Saulo, ma, ona e le’i mana’o Saulo e maasiasi i luma o toeaiina o le nuu, na ia tago atu ai i le pito ofu o Samuelu ma masae ai. Na liliu mai Samuelu ma faapea atu, “Ua saeia e le Alii le mālō o Isaraelu nai iā te oe.” Na fa’amanino e Samuelu o le mafuaaga o lea poloaiga auā o le Atua na auina mai Samuelu e fa’au’u Saulo ua ia toe fa’aaogā Samuelu e folafola le faamasinoga mo ia. Po’o le a le tele o le fa’au’uga ia te oe aua ne’i e faaleaga le isi ou uso fa’au’uina. I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 6 APERILA 2024

(tusia e Pastor EA Adeboye)

Manatu Autu: E ono lamatia oe i le faauuga (The anointing can be dangerous)

Tauloto -Tusi Paia– Salamo 105:15 “Ua fa‘apea atu i ai, “‘Aua le tago i ē ‘ua ‘ou fa‘au‘uina, ‘aua fo‘i le agaleaga atu i a‘u perofeta.”

Faitauga - Tusi Paia: 2 Tupu 1:9-12

Afai e faafoe lelei le fa’au’uga, e tutusa lona aogā ma le eletise pe a sa’o ona fa’aaogā. A fa’aaogā ma le faaeteete le eletise, e maua mai ai le malamalama ma le vevela pei uma lava o le masini faavevela meaai poo le microwave, peita’i a lē faaeteete e mafai ona faaleagaina ai se soifua. A sa’o ona fa’afoe ma tauave, e mafai e le fa’au’uga ona gausia amo, e pei ona tusia i le Isaia 10:27. Peita’i a sesē ona fai e mafai ona maliu ai se isi. Afai e taalo se uso i le eletise, e sipaka.

I le 2 Tupu 1:9-12, na auina atu e se tupu ni fitafita e saisai Elia, e alu a’e le ta’ita’i ‘au o nofo le tagata o le Atua i le tumutumu o le mauga. Na fai atu le ta’ita’i ‘au, “Le tagata o le Atua e, sau i lalo.” Na tali Elia, “O lona uiga e te iloa o a’u o le tagata o le Atua ae e tautala mai iā te a’u faapea? Mu nei loa i le afi.” Na alu ifo le afi mai le lagi i le taimi lava lea ma mu ai le ta’ita’i’au ma ana fitafita. Ina ua fiu le tupu e tatali ana fitafita nei e to’a limasefulu tasi ua lē toe fo’i mai, na ia toe auina atu isi fitafita e to’a limasefulu ma lo latou ta’ita’i. Na taunuu le ta’ita’i ma ia vaaia lefulefu i le nofoaga sa i ai le tagata o le Atua. Na sili atu fo’i lona lē fa’aaloalo ia Elia ina ua faapea atu, “Le tagata o le Atua e, sau vave nei i lalo.” Na faapea fo’i ona valaau e Elia le afi e mu ai le ta’ita’i ma lana ‘au. A lē fa’aaloalo tagata i le fa’au’uga, e ono ma’uma’u ai o latou ola.

I ni tausaga ua mavae a’o pulea e le malosi fa’a fitafita le atunuu o Nigeria, ona mana’o lea o le fitafita sa avea ma ao o le mālō i lenā taimi e avea ia ma ta’ita’i fa’a Temokalasi. Na fai i ai ana faufautua fa’aleagaga, o le fuafuaga o loo mana’o e fai e lē mafai ona taunuu, ona o se tagata e igoa ia Adeboye o lo’o tatalo mo lona atunuu, i le Redemption Camp (ua igoa nei o le Redemption City). Sa ou i le nofoaga tatalo ae alu atu se tasi o la’u fanau sa maua le faamatalaga fai mai, “Tamā ua tatau ona e alu ese vave nei, la ua omai iā te oe.” E ui o a’u o le tagata fa’au’uina, ae na o’u atuatuvale. O le tulaga lelei e le’i i ai lo’u toalua ina ua maua atu le tala. Mulimuliane i lea po na o’u fai i ai ou te fia alu e tatalo. A o o’u tatalo na faaali le Atua i lo’u loto e faapea; “Aua e te popole i le fitafita, ua iā te a’u le faafitauli.” E ui o le masina lea, o Iuni, na fetalai le Atua ou te fai i tagata e taufai faamanuia le tausaga fou i le sauniga o le Agaga Paia. Na fai le sauniga o le Agaga Paia i le Aso Faraile, ae o’o atu i le Aso Sa, ua aveese tumau le ta’ita’i fitafita sauā.

Aua e te talasua i le fa’au’uga. O le tasi o measesē matuiā e fai e i tatou o kerisiano, ua tatou manatu māmā i le fa’au’uga. A mafuta tagata ma se auauna fa’au’uina a le Atua, e loto maulalo, e i ai a le avanoa e faamaualuga ai i ai, ma e mata’utia le leaga o lea tulaga. Aua ne’i e taalo i le fa’au’uga. I le suafa o Iesu. Amene.