Samoan Devotional

OPEN HEAVENS

MATALA LE LAGI MO LE ASO TOFI 25 APERILA 2024

(tusia e Pastor EA Adeboye)

Manatu Autu: Pe a e Tatalo (vaega 1) - When You Pray (Part 1)

Tauloto -Tusi Paia– Kolose 4:2 “Ia ‘outou finafinau i le tatalo, ‘ia mataala i lea mea ma le fa‘afetai..,”

Faitauga - Tusi Paia: Mareko 1:30-36

O le tatalo o se auupega na foai mai e le Atua iai tatou e tatou te fesootai ai ma ia. E ui ina matautia lenei auupega, e faanoanoa ona o le toatele o tagata latou te lē faaaogaina ao nisi foi latou te faaaogaina peitai e latou te lē maua le atoatoa o lona aogā. 

O le tulaga muamua e tatau ona iai ina ia lelei ma aoga au tatalo, o le  mafaufau manino, e tatau ona aveesea uma mea faalavelave. E iloa lelei e le tiapolo, e tatau ona e maua le mafaufau manino ina ia aoga lelei taimi o au tatalo. O le tulaga lea e te’i ai lava ua oso ane ni mafaufauga o mea e lē taua e faalavelave i taimi o tatalo . O le mafuaaga e tele ai ona e vaai i tagata o le Atua e tatalo i le taimi o la e momoe tagata, ina ia aveesea so’o se mea e fai ma faalavelave. I le Mareko 1:35, na alafai mai Iesu i le taeao segisegi, a’o lo’o momoe uma isi tagata. Na alu atu i se nofoaga paganoa e tatalo ai. Saili loa se nofoaga paganoa e te alu e tatalo ai. E mafai ona faaaoga le nofoaga e teu ai ou lavalvava e tatalo ai. O le nofoaga paganoa e leai ni faaalavelave. 

O so’o se tagata e lē fai ma ana masani ona alu i le nofoaga e tatalo, e i’u lava ina avea ma se kerisiano maalili. O lo’o ou faasoa atu ona sa ou ui ai foi. I le tele o Tausaga talu ai, na tusi lima mai Le Atua ia te au ua amata ona ou malili. Ua faapea mai, ’o anafea na gata ai ona faaalu lelei lou taimi i luma o lo’u nofoalii. O e manatua e masani ona e tapuai mai ia te a’u i totonu o lau taavale? E masani foi ona faatu le taavale i tafatatafa o le auala ona ua le mafai ona ave le taavale i ou loimata?’ Ua ou tali atu, ’Le Alii e, ou te manatua lelei, peitai o le taimi lena ae lei faia sa’u avetaalave. A ou tapuai malosi faapena ia te oe, e ono manatu le avetaale pe ua faaletonu lou mafaufau’. Ua tali mai, ’o lona uiga ua e tuaia a’u ona o le foai atu o le avetaavale ia te oe?’. Na vave ona ou faatoese. I lea po, na ou tuua le fale ina ua momoe uma tagata, ua ou alu tatalo i le nofoaga e faia ai sauniga. O le taimi na amata ai ona ou tapuai i le Atua, na tafe faavai o’u loimata. Sa ou tatalo lava, ae o le eseesega tele, ua ou le toe alu I se nofoaga paganoa e tatalo ai, ma o le tulaga lea ua ou malili ai. O le taimi la lenei, ua fai ma au masani le tatalo i le nofoaga paganoa ma ua toe mumu tele le afi ia te au. Ia mautinoa o lo’o fai ma au masani le tatalo I se nofoaga paganoa, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 24 APERILA 2024

(tusia e Pastor EA Adeboye)

Manatu Autu: Toeaina, avea oe ma faaa’oa’o lelei (Elder, be a good example).

Tauloto -Tusi Paia– Tito 2:7 “Ia ‘avea oe ma fa‘aa‘oa‘o o galuega lelei i mea uma lava; ‘ia e a‘oa‘o i le matā‘upu ma le fa‘amaoni, ma le fa‘atoeaina,”

Faitauga - Tusi Paia: Tito 2:1-8

Fai mai le faitauga o le Tusi Paia o le aso, e  tatau I toeaiina ona amio lelei e mafai ai ona taitaiina talavou e mulimuli ai ma maua le amio lelei.  E sili atu i upu, e faigofie atu i talavou ona faaa’oa’o i mea latou te vaai iai.  O lo’o latou faalogo i mea o lo’o e fai atu ai, peitai o lo’o latou vaavaai atu foi i mea o lo’o e faia. Afai e te naunau ia latou amio lelei, ia e faia muamua i taimi uma, mea o lo’o e faatonu i latou e faia. 

Afai e te faia se pepelo ina ia maua se mea ma lau tama i le aoga, ona e faliu atu lea ma faatonu lau tama e aua le pepelo, ua e pepelo ia te oe lava. Afai e seāseā ona latou vaai o lo’o e tatalo ma faitau lau Tusi Paia, e le mafai ona e faliu atu ma faatonu e faitau latou Tusi Paia. E tatau ona e to’a lelei ma faatonu talavou e pei ona fai mai ai le aposetolo o Paulo;

O mea fo‘i ‘ua a‘oa‘oina ai ‘outou, ma ‘outou talia, ma ‘outou fa‘alogo i ai, ma ‘outou va‘ai mai ‘iā te a‘u, ‘ia ‘outou faia ia lava mea; ‘ona ‘iā te ‘outou lea o le Atua e ona le manuia.(Filipi 4:9). 

Fai mai le tatou tauloto mai le Tusi Paia o le aso, e tatau ona avea oe ma fa‘aa‘oa‘o o galuega lelei i mea uma lava. E toatele tagata matutua e faapea mai, e tosina mai talavou pe afai e faaaoga a latou gagana ma oofu i ofu e pei oni talavou. Ae latou te le o iloa, o le taimi lava e amata ai ona tautatala ma laei i ofu e pei o talavou, ua latou faatagaina ituaiga olaga ma amioga o lo latou ola ai e o’o i amioga sese. E le mafai ona suia talavou i le auala lea, ua na o le faamautūina ai o latou amioga leaga. O le tulaga e tatau ona iai, ia avea i latou, o toeaiina, ma ala fua lelei e faaa’oa’o iai talavou. E iloa lelei e talavou le mea moni e tatau ona faia, ma a latou faia ni mea sese, o lo’o latou va’ava’ai mai I tagata matutua e faasa’osa’oina i latou. E te manatu la i le matua nunumi i mafaufau o talavou pe a vaai mai i tagata matutua o faia mea sese latou te manatu e tatau ona faasa’o ai i latou. 

O lo’o faatuatuaina e le Atua tagata matutua e ta’ita’i ma faaa’oa’o i talavou ia amio lelei ina ia ausia ni lumanai manuia. O lo’o faatuatuaina foi e le Atua talavou e faaaloalo ma faalogo i tagata matutua ma faamaualalo i ai latou. O le tulaga mulimuli, fai mai le Tito 2:2'Fai atu i toeaina ‘ia mataala i latou, ‘ia fa‘atoeaina, ‘ia fa‘autauta, ‘ia fa‘amaoni i le fa‘atuatua, ma le alofa ma le ‘onosa‘i. Ia faamautinoa, o lo’o e amiolelei pe afai e te naunau i lau fanau ma talavou o lo’o faatasi ma oe e faaa’oa’o iai, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 23 APERILA 2024

(tusia e Pastor EA Adeboye)

Manatu Autu: Pe a laasia e le Atua (When God steps in).

Tauloto -Tusi Paia– Salamo 40:2 “Na ia ‘aveina a‘e a‘u a‘i le lua e malaia ai, ma le mea matuā palapalā; na fa‘atūina fo‘i o‘u vae i luga o le papa, ‘ua fa‘amautūina ai ‘ou savali....”

Faitauga - Tusi Paia: Salamo 119:103-105

E iai taimi e sese ai le ala tatou te aga’i iai ona o natura fa’aletagata. Mo se fa’ataitaiga, sa maua se tau paū na fa’atauina ai le 4 ‘eka muamua na muai faavae ai le laumua o le Ekalesia le “Redemption City”.Ua fa’asolo tausaga sa matou fa’ataua ma isi fanua tuaoi e ui lava ua siitia pea I luga le tau. Ina ua oo atu I le 1000 eka pe a ua matou fa’atauina, na faapea mai nisi o tagata ia te a’u, ‘Aisea ua outou fa’atauina ai ia fanua i le vaomatua, e tele isi mea e mafai ona fa’aaoga iai a outou tupe’ ma ua ou faalogo iai latou. Peita’i I se tasi o po, sa ou fa’alogoina le musumusuga a le Atua, ‘atalii, o ai ‘ea na valaauina oe? O tagata na po’o a’u? O ai na folafolaina  atu ia te oe e te maua se taulaga ae le o se tamai fale o tama?’. Na ou ala a’e loa ma ou faapea ifo, o le a faaauau le fa’atauina o fanua, a o le taimi lena, ua atili ai ona siitia le tau o fanua mai le afe tala i le 50,000 tala I le ‘eka. Ua o’o mai i le asō, ua matou umia nei fanua e sili atu ma le 40 afe ‘eka ma o loo faaauauina pea le fa’atauina o fanua. Afai o e agai ese mai le finagalo a le Atua mo lou olaga, o le a laasia oe e le Atua ma toe aumai oe i le ala sa’o, i le suafa o Iesu.

E mafai e se tagata ona faia se mea leaga i aso ua tuanai, ua lē mafai ai ona ‘ausia nisi o faamoemoega. E mafai foi e se tagata ona faia se solitulafono ma falepuipui faasolo’atoa ai. E ui ina foliga mai ua leai se faamoemoe  o lea tagata, e mafai ona laasia o ia e le Atua ma toe feliuaina mea uma mo le lelei.

I le Kenese 49 1-7, ina ua lata ona maliu Iakopo, na ia fetu’u I lona atalii o Levi ona o ni ana agasala na ia faia 

i taimi ua tuanai, peitai na afio mai le Atua ma tu’uina atu le avanoa ia Levi e toe maua ai ona faamanuiaga. I le Esoto 32:25-26 ina ua fo’i mai Mose mai le mauga ma ia maitauina le fanau o Isaraelu ua latou sisiva lē lavalavā i luma o se tupua na ta. Ua ia valaau atu: ’O ai e ‘au ma le Atua? Ia faataga o ia ona sau ia te a’u’. O i latou uma o le aiga o Levi sa latou o atu ia Mose ma ‘avea ma lana ‘au tau. Ona silasila mai lea o le Atua mai le lagi ma ua faapea: “Ua soloia ma fa’aleaogaina le fetu’u ia te oe!”. Na misia muamua e Levi le fa’amanuiaga, ae ina ua alu atu i le itu a le Atua, ona toe fa’afoisia uma lea o manuia ia te ia.

E mafai e le Atua ona la’asia lou olaga ma toe faaola lou fa’amoemoe. Peita’i e iai a’u fesili mo oe: Po o e ‘au i le itu a le Alii? Po’o e faia lona finagalo? Po ua e ta’utino e te auauna ia te ia, ma ia na o ia? Afai o lau tali o le  “Ioe” i a’u fesili ia, e la’asia oe e le Atua ma toe faafoi mai oe i le ala e fa’ataunuiina ai lou vala’auina ma le faamoemoega o lou olaga, i le suafa o Iesu.

Tatalo

Tama, ou te ‘au ia te oe. Fa’amolemole afio mai I lou olaga, ma fa’ataunuuina au fuafuaga uma mo lo’u olaga, I le suafa o Iesu, Amene.   

OPEN HEAVENS

MATALA LE LAGI MO LE ASO GAFUA 22 APERILA 2024

(tusia e Pastor EA Adeboye)

Manatu Autu: Pe afai ua misia lou taimi o le faulai (If you missed your flood).

Tauloto -Tusi Paia– Salamo 92:14 “A o‘o ‘ina ulusinā, latou te fua mai pea lava; e malolosi ma lauolaola i latou;...”

Faitauga - Tusi Paia: Ioelu 2:25-27

I le lua aso talu ai, sa ou talanoa ai i le taimi e pito maualuga ai mea e ausia e se tagata, o taimi o le matua malamalama ma na ou taua foi le ono misia e le tagata lona taimi o le faulai. O le a se mea e faia e le tagata ua misia lona vaitau o le faulai? Afai ua le faaaogaina lelei e le tagata lona vaitau o le faulai, e iai ea se mea e mafai ona faia e toe faalelei ai ae lei oo mai le po? Afai e manatu ma sisila fofoga o le Atua i lea tagata, e na te fesoasoani ia te ia ina ia faaatino ni galuega se tasi pe lua foi, ina ia toe feliuaina le tulaga mo le lelei. 

Na misia e Esau lona tulaga faulai i le uluai taimi ina ua ia faatauina lona tofi o le ulumatua. Ina ua oo i le taimi e tatau ona maua ai faamanuiaga o lana augatupuaga, na ia misia foi. Fai mai le Kenese 27:34, na ia tagi lotulotu. Na salamō Esau ma tagi i lona tama ma faapea atu, ’e le mafai ea ona ou maua ni toega o faamanuiaga?’ Na silasila le Atua i lona salamō moni ma o lana talosaga mo sina toega o faamanuiaga ose augani moni. Ona o le Atua e faulai lona alofa mutimutivale, na ia foai atu ia te ia le alofa tunoa e toe maua ai sina vaega o mea na ia lē maua. Ina ua tuua e Esau lona tama, na ia filifili e matua faaaoga lelei sina faamanuiaga na ia maua mai i lona tama ina ia ta’u atu le sese i tagata ua manatu ua leai sona faamoemoe. E o’o atu i le Kenese 32:3-7, na auina atu e Iakopo ni manu e faameaalofa ai ia Esau ae la te lei toe feiloai. Na toe foi mai nei tagata ma logoina Iakopo o lo’o sau Esau ma ana leoleo faapitoa e 400 mo le feiloaiga ma ia. Fai mai le Tusi Paia na matua tetemu Iakopo i le fefe. E o’o atu i le Kenese 33:1-9 ina ua la feiloai, na fesili Esau ia Iakopo pe aisea na auina atu ai nei mau manu ae o lo’o lava ma totoe mea ua ia maua. Na matua faamanuiaina Esau ma o lea na ia fai ai ia Iakopo e tuu uma ana mea. O lo’o ia faailoa mai, ’na ou misia lo’u vaitau o le faulai, ae afai o lo’o ou maua pea le manava, e mafai lava ona ou galue seia o’o i le tumutumu’. E leiloa pe ua e misia lou vaitau o le faulai, peitai, afai o lo’o e soifua ma maua le manava, e lē o tuai. E mafai lava ona e galue seia ausia le tumutumuga pe afai e te naunau e faia i le fesoasoani atu o le Atua. 

Aua e te manatu ua e le mafaia se mea. E iai tagata na manuia ina ua matutua lava. E ui e toalaiti ua ausia lea tulaga, ae e mafai ona e lavea i le vaega toaiititi lea. O le tulaga o lo’o e manaomia o le naunautaiga ma le filiga faatasi ma le alofa tunoa o le Atua, i le suafa o Iesu, Amene.     

OPEN HEAVENS

MATALA LE LAGI MO LE ASO SA 21 APERILA 2024

(tusia e Pastor EA Adeboye)

Manatu Autu: O Lou afiafi (Your evening).

Tauloto -Tusi Paia– Salamo 104:23 “E alu atu ai le tagata i lana galuega, ma ana mea e fai se‘ia o‘o i le afiafi...”

Faitauga - Tusi Paia: 2 Samuelu 21:15-17

Afai ua silia i le 50 ou tausaga, o lenā ua e iai i le afa lona lua o lou aso, ma e mana’omia ona e faia mea uma i le poto e sili atu na i loo taimi ua mavae. E o’o loa i le afiafi ua tatau ona sili atu lou faalagolago i le atamai ae lē o le malosi aua ua fai ifo le malosi. E mafai ona e silasila i le fa’amalosi ananafi e te malamalama ai i le uiga o la’u faamatalaga o le faula’i. Fai mai le Tusi o Iopu 12:12 O loo i ai le poto i e ua toeaina; o le fa’alevaleva fo’i o aso e i ai le fa’autauta.

A ua faapea mai le Iopu 32:7 ia tautala mai aso, ia faailoa mai le poto i le tele o tausaga. O le mafuaaga lea o le faaupuga o le vale I le fa sefulu Tausaga, o se vale e faavavau. E tatau ona o’o atu i lou fa sefulu tausaga, ua e poto ma atamai, aua a’o faaopoopo tausaga o le tagata e faasolo fo’i ina vaivai lona tino.

E silafia e i latou matou te vavalalata, sa masani ona o’u fusu. E leai se isi e talitonu sa i ai taimi na o’u mafaia ona si’i taga simā, e tofu o’u lima ma le taga ma fai la’u tala o loo faapaleni le mamafa. O aso nei tusa pe fa’aaogā uma o’u lima e lua, ou te mafaufau muamua fa’atoā si’i ai se taga simā se tasi. I le 2 Samuelu 21:15-17, fai mai le Tusi Paia na vaivai Tavita. O Tavita lea na ia fasia le leona ma le urosa (1 Samuelu 17:34-35) O Tavita fo’i lava lea na faatonu e le tupu e fasiotia tagata e selau ae alu fasioti le to’a luaselau (1 Samuelu 18:25-27). O Tavita lē na fasia le tagata tino ese, ma aveesea lima tasi le ulu o Koliata, na vaivai ma lelavā ma semanū e fasiotia i le taua pe ana lē fesoasoani Apisai iā te ia. O le a le lesona tatou te a’oa’oina mai i le tulaga na o’o iā Tavita? I le taugā osoosoga o le malosi o Tavita, na ia tapena I le taimi e o’o mai ai lona vaivai. I le 1 Samuelu 22:1-2, a’o nofo Tavita i le ana i Atulama, na ia faapotopoto ni tagata māumausolo ma a’oa’o i latou e avea ma tagata malolosi ma totoa, o se tasi o i latou nei na fesoasoani iā te ia ina ua o’o i lona tauafiafi.

I le 2 Samuelu 23:1-39, ua tatou faitau ai i tagata na ia a’oa’oa ma saunia, ua ta’ua i latou o “tagata totoa a Tavita.” O toa nei na lafoa’i o latou ola ma osofa’i le togalauapi a Filisitia ma o atu e utuvai mo se vai taumafa mo Tavita lo latou matai. Afai ua e i ai i ou aso o le lelei, e ao ona e tapena se ‘auso’o i taimi o le taugalemū. O e sauniuni mo aso e uma ai le faula’i? O a ni au tapenaga o fai i le taimi nei o lo’o ao aua o loo aga’i mai le po?

Amata nei loa ona atiinaa’e le au talavou, e fesoasoani iā te oe pe a o’o ina o’o mai lou vaivai. I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 20 APERILA 2024

(tusia e Pastor EA Adeboye)

Manatu Autu: O Lou aoauli (Your afternoon).

Tauloto -Tusi Paia– 2 Samuelu 5:4 “Sa tolu sefulu o tausaga o Tavita ‘ina ‘ua fai o ia ma tupu; e fa sefulu o tausaga sa fai ai o ia ma tupu..”

Faitauga - Tusi Paia: Failauga 11:9

O tagata i lo latou aoauli o i latou ia ua taua o tagata matutua. E te maitauina na amata le galuega a Iesu i le lalolagi i le 30 o ona tausaga. O Ioane le papatiso, o le perofeta o le feagaiga tuai e pito maoae (Luka 7:28) na amata foi I tausaga faapea. O Samasoni i le taimi na ia fasia ai le faitau afe o tagata e 30 tausaga. E faapena foi Tavita i le taimi na fai ai o ia ma tupu. O Filipo i le taimi na ia taitaia ma liua tagata Samaria i le Atua e faapea foi lona tausaga, o le vaitau o le aoauli. O loo iai se muagagana: ’e iai vaitau i olaga o tagata, e amata i le faulai, taitaia i le manuia, a lafotuina, o malaga uma i olaga o tagata e afifi mai i mea eseese ma mealilo’ 

O le taimi o le aoauli e oo mai ai le faulai. Afai o oe o se faifeau i lea taimi, e seasea iai ni au lauga e le faafetaia. E laitiiti lava le galuega e faia ae tupu lava le Ekalesia ae le faapea e faulai pea e o’o i le faavavau. Afai e te misia lea faulai, e te oo i le tulaga tusa poo le a le tele ma fou o au lauga, e tele ina faapea mai tagata, ’na ou faalogo muamua foi i lea lauga’. 

O le aoauli, e leiloa po’o le taimi lea o loo faamatala e le Atua i le Isaia 60:1-5 Tula‘i ia, ‘inā malamalama ia, auā ‘ua o‘o mai lou malamalama; ‘ua alu a‘e fo‘i le pupula o le ALI‘I i ou luga. O lo’o ataata fofoga o le Atua i au taumafaiga. E iai lava tagata o loo faaaoga lelei taimi o latou faulai ma o le taui, e alualu pea i luma e o’o atu i le taimi o le afiafi.

E iai se alii talavou na faaaogaina e le Atua e faia ni vavega, faailoga ma mea ofoofogia. Ua matua maumea ua iai lona potu faapitoa ua faaavanoa i le faletalimalo o le Sheraton. I na aso, e fealuai ma faafeao e ni taavale o le Mercedes Benz e lima. E faailoga uma laisene o taavale e atagia ai le Ekalesia. E lei leva, ae ua taofia le faulai. Ua taofia le sau i totonu o le tele o tupe, ua le toe iai ni taavale, ma ua oo ina su’e e leoleo ona o le tele o aitalfu i le faletalimalo. Aua e te soona faaaoga fa’aletatau le taimi o le faulai pe a tafe mai. Atamai e faaaoga lelei taimi o loo susulu atu ai ina ia tumau pea le susulu atu tusa pe oo mai le po. Aua le faamaimauina lou tamaoaiga. Aua e te lafoai le tausia lelei o lou soifua maloloina faapea mafutaga ma tagata e tuu e le Atua I ou ala. O nisi ia o vaega e faatumauina ai le susulu atu pea o lou malamalama e oo I le taimi o le afiafi. Faaaoga lelei lou aoauli ma ia faia ma le poto, ‘aua e te faamaimauina, I le suafa o Iesu, Amene. 

OPEN HEAVENS

MATALA LE LAGI MO LE ASO FARAILE 19 APERILA 2024

(tusia e Pastor EA Adeboye)

Manatu Autu: O Lou taeao (Your morning).

Tauloto -Tusi Paia– Failauga 12:1 “O lenei, ‘ia e manatua lē na faia oe i ona po o lou taule‘ale‘a, a o le‘i o‘o mai aso leaga, a o le‘i o‘o mai fo‘i tausaga ‘e te fa‘apea ai, “E leai so‘u fiafia i ai.”

Faitauga - Tusi Paia: Auega 3:27

O le tulaga manino, o le taeao e faatusa iai se tagata i lona tulaga talavou. O loo faapea mai le 1 Ioane 2:14,  Taulele‘a e, ‘ua ‘ou tusi atu ‘iā te ‘outou, auā e malolosi ‘outou,’ o le tulaga pito sili ona lelei o se talavou o lona malosi. Ou te iloa lelei le toatele o talavou e vaavaai atu i aso o le talavou o se taimi o fiafiaga. E moni lea tulaga e tusa ma le Failauga 11:9-10 Le taule‘ale‘a e, ‘inā ‘oli‘oli ia i lou tamaitiiti, ‘ia fiafia fo‘i lou loto i aso o lou taule‘ale‘a ma ‘ia e savali i ala ‘ua e loto i ai, ma mea e va‘ai i ai ou mata; a ‘ia e iloa e fa‘amasinoina oe e le Atua ‘ona o na mea uma.

Ia maitau mai i le fuaitau o loo taua I luga, o loo faapea mai e faaamasinoina talavou i fatu e luluina i taimi mulimuli o latou olaga. O i latou na faaaluina le tele o taimi o latou talavou I le faia o amiolega eseese, e latou te selesele le tele o faafitauli i taimi ua faiifo le olaga (Kalatia 6:7). I le Kenese 49:1-4, ina ua lata ona maliu Isaraelu, na valaau uma lana fanau e o mai ma ua amata ona ia folafola perofetaga mo latou lumanai. Na ia faapea mai ia Reupena, ’o oe o lē ‘ua silisili ‘ona mamalu, ‘ua silisili ‘ona malosi...e lē fa‘asili lava oe’,  Aisea na ia faia ai lenei faaupuga?i le Kenese 35:22, na faia e Reupena se mea sa lē tatau ona ia faia, ma na faalogo iai lona tama. Ina o le a maliu lona tama, na ia fai ia Reupena e le manuia ma faasili o ia, e ui o ia o lana ulumatua. Afai e te faitau i le Faaaliga 7:1-5, e te maofa e o’o atu i le vaega lea ao lisiina le fanau o Isaraelu na faamaufaailogaina, ua lē o toe iloa Reupena o le ulumatua. 

Le au pele e,afai o e talavou, e 30 tausaga pe itiiti ane, faaaoga lelei lou talavou. Faaeteete i au fatu e luluina i le taimi nei auā e te toe selesele lava i ona fua mulimuli ane ma e sili atu le seleselega i lo mea na lulu. ’14‘Outou tamā e, ‘ua ‘ou tusi atu ‘iā te ‘outou, auā ‘ua ‘outou iloa o ia o lo‘o i ai talu le amataga. Taulele‘a e, ‘ua ‘ou tusi atu ‘iā te ‘outou, auā e malolosi ‘outou, o lo‘o tumau fo‘i ‘iā te ‘outou le afioga a le Atua, ‘ua ‘outou manumālō fo‘i i lē o lo‘o leaga 1 Ioane 2:14.

O le fuaitau o loo taua i luga e le o faapea mai e na o le malosi e te maua i lou talavou, ae ia tumau le Upu a le Atua ia te oe ma e tatau ona e manumalo i le tiapolo. O lou talavou o le taimi lea e saili loloto ai i le Tusi Paia. O le taimi lenei e a’oina ai mau eseese mai le Tusi Paia. O le taimi lenei e aoaoina ma atinae lou malosi faaleagaga e faasagatau atu i le tiapolo ma ia manumalo ai. Faaaoga lou malosi e auauna ai i le Atua aua e oo mai le taimi e te iloa ai, e lē tumau se talavou o se tagata. Ia ofoina atu lou talavou ia e iloa, malamalama ma auauna i le Atua e le faatuaoia, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 18 APERILA 2024

(tusia e Pastor EA Adeboye)

Manatu Autu: O Lou Aso (Your Day).

Tauloto -Tusi Paia– Salamo 90:6 “O le taeao e fuga mai ai ma olaola mai ai; a o‘o i le afiafi, ‘ona sele‘eseina ai lea,

‘ua magumagu ai.”

Faitauga - Tusi Paia: Kenese 1:1-5

I le Kenese 1:1:5, ua taʻua e le Atua le malamalama o le ‘ao’ ma le pōuliuli o le ‘po’. O le tuʻufaʻatasiga o le ao ma le po, na maua ai le aso muamua. I se vaaiga loloto i lenei mataupu, e te iloa ai, le vaevaeina o le aso i vaega e 3 - taeao, aoauli ma le afiafi. I le Salamo 55:17 na fai mai ai Tavita “17 O le afiafi ma le taeao ma le tutonu o le la, ‘ou te tagi ai ma ‘ou uiō; ‘ona fa‘afofoga mai ai lea o ia i lo‘u leo.” O le aso o le iunite lea e faaaoga e le Atua e fuaina ai le taimi o le tagata i le lalolagi. Fai mai le Salamo 90:12, ‘Ia fa‘apea ‘ona e a‘oa‘o mai ‘iā i matou e faitauina o matou aso, ‘ina ‘ia maua ai le poto i o matou loto’. O lo’o ta’ua i le Faataoto 10:27 e ui lava e mafai e le Atua ona faaumiumi aso o se tagata, e mafai foi ona ia faapuupuuina.

E tusa ai ma le tauloto mai le Tusi Paia o lenei aso, o le taeao, o le taimi lea e tuputupu aʻe ai, ma o le taimi foi lea o le olioli (Salamo 30:5). A o e tuputupu aʻe o se tamaitiiti, e leai ni ou tiute tauave. A feala tamaiti i le taeao, latou te mananaʻo ia i ai taumafa o le taeao i luga o le laulau, e le manatu poo ai na tapenaina. A e faalogo i se tamaitiiti e ata, e te ata fua atu ai lava, aua o lana ata e moni, e sau mai totonu o lona loto. O le aoauli o le taimi lea e pito maualuga ai lau galue, o le taimi foi lena o le susulu malosi o le la. Fai mai Iopu 11:17 E o‘o mai fo‘i ou aso e sili ‘ona malamalama i le aoauli. O le aoauli o le faatumutumuga o le olaga o le tagata. O le afiafi o le taimi lea e amata ai ona pogisa ma faasolo e goto le la. Ua taʻua i le 1 Samuelu 4:15, ua 98 tausaga o Eli ma ua puaoa ona mata. Fai mai le Salamo 104:23 e alu le tagata i lana galuega ma amata ona toe foʻi i le fale i le afiafi. O lou afiafi ua faatusa, o le taimi lea e amata ai ona faaiʻuina lou olaga.

E taua le iloa po’o fea tonu le vaega o le aso o lo’o e i ai, ina ia mafai ona e galue ma le poto ma faia mea silisili. Ae peitai, afai e te lē iloa, e mafai ona e taumafai e ausia taunuuga lelei i le auala sese. O le mafuaga lea ua taʻua ai i latou o ē matataʻu i le Atua e popoto, auā e ui ina matutua, ae ua iā i latou le atamai, ma e mafai lava ona latou faia mea e lē mafaia e tagata malolosi. E i ai le taimi e faʻaaoga muamua ai le malosi ma e iai foi le taimi e faʻaitiitia ai le malosi, ae faaaoga lou atamai. E I ai le taimi e tamoe ai ma le taimi e te tuuina atu ai le avanoa i leisi tagata e faaauauina le savaliga. E tatau ona e iloa taimi ma vaitau o lou olaga ina ia e faia mea silisili i lou olaga. O le a le vaega o le aso o lo’o e iai I le lalolagi nei? I le suafa o Iesu, Amene. 

OPEN HEAVENS

MATALA LE LAGI MO LE ASO LULU 17 APERILA 2024

(tusia e Pastor EA Adeboye)

Manatu Autu: Alofaina mai le Atua (Divine Favour).

Tauloto -Tusi Paia– Teuteronome 33:23 “Na ia fa‘apea mai fo‘i ‘iā Nafatali: Nafatali e, ‘ua e malie i le alofa, ma ‘ua tumu i le manuia mai i le ALI‘I; ‘ia e fai mou le vai ma le itū i saute.”

Faitauga - Tusi Paia: Eseta 2:12-28

Afai e te faalogo I le faamatalaga, ‘o loo ataata mai fofoga o le Atua ia te oe’, o lona uiga o lo’o e maua ma fiafia I le alofaina ma le alofa tunoa o le Atua. I le Numera 6:24-26, na fetalai le Atua ia folafola e alo o Arona faamanuiaga I luga o tagata ma e faapenei faamanuiaga: ‘Ia fa‘amanuia oe e le ALI‘I, ma ‘ia na tausi ‘iā te oe; ‘ia fa‘amalamalamaina e le ALI‘I ona fofoga i luga ‘iā te oe, ma alofa atu ‘iā te oe; ‘ia fa‘asaga mai le ALI‘I ona fofoga ‘iā te oe ma tu‘uina atu ‘iā te oe le manuia’.

A fa‘amalamalamaina e le ALI‘I ona fofoga i luga ‘iā te oe, o lona uiga o loo ataata mai ona fofoga ia te oe ma o le a e maua le alofaina I so’o se mea e te alu iai. O le pogisa foi o lo’o siomia ai oe o le a mou atu ma o le a e fiafia I le malamalama o le Atua. 

A finagalo le Atua e faaali atu ia te oe le alofaina, e sili atu mea e te ausia I lo le tagata o loo galue malosi e aunoa ma le alofaina. A faaali atu e le Atua ia te oe le alofaina, e tutupu vavega. Mo se faataitaiga, fai mai le Kenese 24:63, sa alu Isaako e savalivali ae I le fuaiupu e 67 o le mataupu e tasi, fai mai le Tusi Paia, 

67‘Ona ta‘ita‘i atu lea e Isaako ‘iā te ia i le fale ‘ie o lona tinā o Sara, ‘ua ‘ave e ia o Repeka, ‘ua fai fo‘i o ia ma ana avā ‘ua fiafia fo‘i Isaako ‘iā te ia; ‘ona fa‘ato‘ā fa‘amafanafanaina ai lea o Isaako talu ‘ona oti o lona tinā.

O galuega uma sa faia ina ia maua se ava a Isaako na faia e isi tagata. A e faatusa le ala na maua ai le ava a Isaako ma Iakopo, o lē na galue malosi mo le 14 tausaga ina ia maua le ava na naunau iai, e te iloa manino ai le eseesega o le alofaina ma le galue malosi ia maua le mea e te manao iai. Ou te folafola atu, e amata atu nei, o le a faaali atu e le Atua le alofaina ia te oe. 

E lei leva atu lava, na faatulaga uma Iunivesite I totonu o Nigeria ma o le Iunivesite o le Redeemer a le Ekalesia na tulaga lua. O le Iunivesite o Ibadan na tulaga muamua na faavae I le 1948. Ao le Iunivesite o le Redeemer e na o le 17 tausaga le matua, ua sili atu I Iunivesite ua sili atu ma le 60 tausaga le matutua. E faapefea ona tupu lea tulaga? E pau le mafuaaga o le alofaina e le Atua. 

O le fesili, o le a le mea e tatau ona faia ina maua ai pea le alofaina mai le Atua? E te maua se tali lelei I lenei fesili mai le Faataoto 3:3-4 o loo faapea mai: 3‘Aua ne‘i te‘a ma oe le alofa ma le fa‘amaoni, ‘ia asoa ai i lou ua; ‘ia e tusi ai i le papa o lou loto; 4‘ona e maua ai lea o le alofa ma le manuia lelei i luma o le Atua, ‘atoa ma tagata.  O lou maua o le alofaina ma le manuia lelei I luma o le Atua, e tatau ona e tumau I le alofa ma le faamaoni, I le suafa o Iesu, Amene.  

OPEN HEAVENS

MATALA LE LAGI MO LE ASO LUA 16 APERILA 2024

(tusia e Pastor EA Adeboye)

Manatu Autu: E pa’ō le Mana (Power makes noise).

Tauloto -Tusi Paia– Iosua 6:5 “A fa‘alevaleva ona ili o le pū o le iupelī, pe a ‘outou fa‘alogo i le leo o le pū, ‘ona ‘alalaga lea o le nu‘u uma ma le leo tele; ‘ona solo ai lea i lalo o le pā o le ‘a‘ai; ‘ona ō a‘e ai lea o le nu‘u uma ta‘itasi i o latou luma.”..”.

Faitauga - Tusi Paia: Iosua 6:15-21

E to’atele tagata Kerisiano e le o toe tatalo leo tele, ma o se mafuaaga lena ua tatou lē toe molimauina ai ni faailoga o le mana I a tatou potopotoga. I le taimi o le mua’i sauniga na ou auai ai i le RCCG, sa talosagaina e alalaga “Aleluia!” sa matuā leo tele se tasi na ma soso’o, ua ou tau momo’e i fafo. O le mea e iai le mana, e tatau ona lagona le pa’ō tele. O le va’alele o le ‘Concorde’ o se vaalele e mafai ona e malaga ai mai Lonetona i Niu Ioka i le na o le 3 itula, peitai ua taofia le toe lele ona o le pa’ō tele. Ona o le afi o le vaalele e malosi tele, e tatau foi ona  pa’ō tele. O nei aso, ua tauanau tagata tapuai e alalaga ‘Aleluia’. Ou te manatua I tausaga e tele ua tuanai atu, sa valaaulia a’u ou te lauga i pesepesega o le Kerisimasi I le ‘Aso Rock’ ma sa to’atele tagata ta’uta’ua ma tau’oloa sa auai. Ina ua fai atu I le faapotopotoga e ‘alalaga ‘Aleluia’, sa alalaga lemu ma le faaaloalo, ae ina ua ou fai atu, ‘o le tagata e alaga leotele Aleluia o ia lena e aulia le Tausaga fou’. O le taimi la lea, ua matua alalaga leo tele uma I latou. O kerisiano moni e te lē tau fa’amata’uina e vivii atu i lo latou Tama.

I ni tausaga e tele ua tuanai atu, sa ou savalivali ma tatalo i totonu o le Redemption City i le leva o le po, sa ou gālala i le fia ‘ai ma le fia inu i le mana o le Atua. Sa ou tagi atu: ‘Le Ali’i e na ou fai atu ia te oe mai le ‘amataga ou te le fia avea o se tagata masani. Sa ou auauna fa’amaoni ia te oe mai le taimi sa ou faia’oga ai I le Iuniveste, sa maua sina tupe e fa’atino ai au galuega, ae na e aveesea mai a’u mai lena tulaga.O le taimi nei, ua e tofia a’u ou te avea ma Taitai Aoao, peitai e le o ia te a’u se mana ou te faatino ai galuega e tatau ona faatino. Tama, ia e tuuina mai ia te a’u le mana, a leai, avatu loa a’u’. A’o ou tatalo atu, ua ou fa’alogoina le luluina o le eleele o lo’o ou tu ai. O le mafui’e lea sa fa’alogoina I le isi nuu tuaoi o Ijebu- Ode, ma sa lipotia mai i le nusipea. E lē leo laititi se mafui’e. O le leo tele e alagatatau mo le mana, ‘aua ne’i tatou taofiofia le leo tele. ‘Aua foi nei taotaomia le gaioi mai o le Atua ona o le manatu I le tulaga mamalu.

Ua ou o’o i le tulaga o lo’u olaga ua ou mana’omia nisi tagata e tauaveina le afi, e sili atu ia te a’u, ina ia o’o i le taimi ou te tu’umuli ai, a ua ou mautinoa, o le a tulai mai ni taitai totoa e latou te tau’aveaina le galuega a le Atua ina ia ‘ausia se tulaga maualuga atu nai lo a’u. Ia taofi le tausi I ou mamalu pe a e iai I le mamalu o le Atua. Ia e sa’oloto e te leo tele ina ia taofia le ti’apolo ae sa’oloto le galue ma le tafe mai o le mana o le Atua. Ia alalaga leotele mai se ‘Aleluia’, I le suafa o Iesu, Amene.