Samoan Devotional

OPEN HEAVENS

MATALA LE LAGI MO LE ASO LULU 15 ME 2024

(tusia e Pastor EA Adeboye)

Manatu Autu: E inoino le Atua I le tete’a (God hates divorce)

Tauloto -Tusi Paia– Malaki 2:16  “'Auā ‘ou te ‘ino‘ino i le alei, ‘ua fetalai mai ai le ALI‘I le Atua o Isaraelu; Auā ‘ua ufiufi e ia lona ‘ofu i le fa‘asauā, ‘ua fetalai mai ai le ALI‘I o ‘au. O le mea lea ‘ia ‘outou fa‘aeteete ai i o ‘outou loto, ‘ae ‘aua tou te fa‘a‘ole‘ole. '

Faitauga - Tusi Paia: Mareko 10:2-12

O nei aso, ua taumafai tagata e tuu i lalo tapulaa a le Atua ona o suiga fou o le olaga. Peitai o lo’o manino le Tusi Paia i le 2 Timoteo 2:19 e tumau faavae a le Atua. O loo manino I le Malaki 2:6, e inoino le Atua I le tete’a. Fai mai le Mareko 10:9,  “o lenei, o ē ‘ua fa‘atasia e le Atua, ‘aua le fa‘ate‘a‘ese‘eseina e le tagata.”

 O le taimi e faatasia ai se tane ma lana ava i le faaipoipoga paia, e le o toe avea ma ni tagata se toalua, ae ua tasi. E le mafai ona e toe vaeluaina se tagata e tasi ae ola pea, o se ulugaluu faaipoipo, e le tatau ona tete’a. E faatasia i laua seia oo ina tatala le feagaiga i le oti. O le mafuaaga lea e masani ai ona fai mai la’u faifeau ua faiilagi le folauga, i tama talavou uma o loo sauni e faaipoipo i totonu o le Ekalesia, ’E te faaipoipo loa i le tamaitai lena, ua e tauave o ia mo lou olaga atoa’. Fai mai le Luka 16:18, afai e tete’a le tagata ma le toalua ae faaipoipo atu i seisi tagata, ua faia le mulilua. E mafai e le faamasinoga ona avatu pepa e faamaonia ai ua tete’a ma le pepa faaipoipo fou, peitai i le lagi, o lo’o iloa pea oe o le tagata o loo faia le mulilua. Afai ua e faaipoipo, ia maitau lelei mai le mea lenei, e le finagalo le Atua e te tete’a ma lou toalua, o le faaipoipoga o se tautoga mo lou olaga atoa.

Ia e iloa lelei o le taimi e te faaipoipo ai, ua e faatasi ma lou toalua mo lou olaga atoa, o lona uiga e tatau ona e mataala ma mataitu po’o sa’o le tagata e te faaipoipo iai, pe afai e te le’i faaipoipo. Afai e te le’i lagonaina se faamaoniga mai le Atua, ’aua e te faaipoipo. E sili atu le nofo toatasi ae maua le lagi i lo le faaipoipo ae avea le faaipoipoga e alu ai le tagata i seoli. Talitonu mai e sili atu ona lelei ma aoga mo oe pe afai e te faatalitali i le Atua e ta’ita’i ia te oe ae e te lei faaipoipo. 

Afai o loo faaletonu lau faaipoipoga, o le tete’a e le o se fofo lea. Ua maea ona faia lau tautoga i luma o le Atua e te faatasi ma lou toalua seia tatala le feagaiga i le oti, e tatau ona e tausi i lea tautoga (Failuaga 5:5). ’Aua e te mafaufau vave i le tete’a, ae alu i luma o le Atua, o Lē na ia faavae ma faatuina le faaipoipoga, ma e tagi atu ia te ia mo se fesoasoani. E iai ea se mea e faigata i le Atua?(Ieremia 32:27) o le tali e leai, aua e leai se mea e le mafaia e ia (Luka 1:37) ma e aofia ai le saunia o le fofo mo se faafitauli i so’o se faaipoipoga. E inoino le Atua i le tete’a, ma afai o oe moni o se atalii poo se afafine o le Atua, e te le faia se mea e inoino ai le Atua. O le faaipoipoga o le tautoga e faia mo le olaga atoa. E le tatau ona iai se avanoa e tete’a ai. 

OPEN HEAVENS

MATALA LE LAGI MO LE ASO LUA 14 ME 2024

(tusia e Pastor EA Adeboye)

Manatu Autu: Aua e te faaumatia lou tagata (Dont destroy yourself)

Tauloto -Tusi Paia– Mataio 6:13  “Aua fo‘i ‘e te ta‘ita‘iina i matou i le fa‘aosoosoga; a ‘ia e lavea‘i ‘iā i matou ai le leaga...”

Faitauga - Tusi Paia: Mataio 6:9-13

I le tusi o Mataio 6:9-13, sa a’oa’oina e le Alii lona ‘au so’o ia tatalo. Sa ia fetalai i le fuaiupu 13 e tatau ona tagi atu i le Tama: ”Aua e te taitaiina i matou i le faaosoosoga ae a fai ua matou pa’u atu i ni fa’afitauli, ia e laveai mai matou ai le leaga.” O lea vaega o le tatalo a le Alii sa lē mautonu ai lo’u mafaufau mo se taimi umi. E mafai ea e le Atua ona taitaiina se tagata i le faaosoosoga? Ona ou faitau lea i le Faata’oto 22:14 o lo o faapea mai: 

‘O le gutu o le fafine ‘ese, o le lua maulalō lea; o lē ‘ua matuā itagia e le ALI‘I e pa‘ū o ia i ai’.

O lona uiga afai e itagia se tagata e le Atua, o le a uuna’ia o ia i le gutu o le fafine ‘ese ma matua fa’aumatia ai. E sili atu lou malamalama pe a e faitauina le 1 Korinito 3:17: 

‘Āfai e fa‘aleaga e se tasi le malumalu o le Atua, e fa‘aleagaina lenā tagata e le Atua; auā e pa‘ia le malumalu o le Atua, o ‘outou lava ia’.

O lona uiga afai ua e maitauina ua atili faigata ona e manumalo i le fa’aosoosoga, e tatau ona e tu’umuli ese mo nai aso ma e augani atu i le Atua mo lona alofa mutimutivale. Aua ua uma ona ia folafola mai  o le a ia faia se auala e te lavātia ma sao ai (1 Korinito 10:13). 

Ia e mataala i ou laasaga uma. ’Aua nei e o’o i le tulaga e fa’apea mai ai le Atua: “Ua ou fiu ia oe, alu ia e fai le mea e te loto iai, ona e vaai lea i le taunuuga o mea o loo e faia!” O e fa’ata’alo ea i le agasala ma e faapea ane ia te oe lava, ’E lei iai so’u afaina i mea na ou faia i taimi ua tuanai, o lona uiga o lo’o lelei lava mea uma’. ’Aua nei fa’aseseina oe, o so’o se mea e te faia i le lalolagi, o loo fa’amauina i le lagi; e o’o i upu fa’atauvaa. (Mataio 12:36). A le taofia, e iai le aso e tatala ai le Atua tusi ma faapea mai: “E manatu ‘ea lenei tagata o a’u o le vale? O le a ou fa’aalia atu iai, e lē o a’u o se vale, tuu loa ia e fa’aumatia lava e ia o ia lava.” Ia ’aua nei avea lea tulaga ma ou tofi, i le suafa o Iesu. 

O lenei, ou te iloa e ono iai se tagata o lo’o faitauina lenei lesona, e le o iai sona manatu e taofia le faia pea o le agasala.  O le ituaiga tagata lenei o loo ta’ua i le 1 Timoteo 4:2. O le mea moni, o lou ola faapa’iaina e leai sona aoga ia te a’u, ae e aoga ia te oe. Ou te le o fai atu ia e ola faapa’iaina ina ia ou sao ai i le lagi, o loo ou fai atu ia e ola fa’apa’iana, ia ‘alofia ai lou nofo i Seoili e faavavau. Ua maea lo’u tiute ma le matafaioi o le talai atu o lenei fe’au ia te oe. Ua lava se upu mo le tagata poto. 

Tatalo: 

Tama, faamolemole aua nei faatagaina a’u ou te faaumatia lou lava tagata, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 13 ME 2024

(tusia e Pastor EA Adeboye)

Manatu Autu: Fitafita tuai (Old Solider)

Tauloto -Tusi Paia– Filipi 3:13  “Le ‘au uso e, ‘ou te lē manatu ‘ua ‘ou maua, a o le mea e tasi ‘ou te faia, ‘ou te fa‘agalogalo i mea ‘ua tuana‘i, ‘ou te momo‘e punou a‘i fo‘i i mea o lumana‘i..”

Faitauga - Tusi Paia: Filipi 3:12-15

E toatele tagata latou te talanoa lava I faamanuiaga o le malo o le Atua i tausaga e tele ua tuanai. E latou te talanoa i aso ua te’a a’o mumu le afi mo le Atua, I taimi o masani ona umi ma faitai itula o tatalo, aemaise le manumaloina o agaga mo le Atua. Ao le taimi nei, ua e lē toe vaai atu i le faamaufaailogaina o Keriso i o latou olaga e pei ona talanoa mai ai. O ituaiga tagata ia matou te ta’ua o ’fitafita tuai’ i lo matou atunuu o Nigeria.

O se fitafita tuai o se tagata sa masani ona galue malosi i totonu o le autau a fitafita, peitai ane ina ua maea se vaitau, ua tama tuai, ua le toe ausia le malosi e tau ai, ma ua le toe talafeagai i le galuega faa fitafita. O fitafita tuai i le tulaga lea, o i latou o kerisiano sa masani ona galulue punouai i le galuega a le Atua, sa filiga e manumaloina agaga, faamalolo i ē mama’i ma faia le tele o mea ofoofogia i le suafa o Iesu. Peitai, ua tei lava ua mou ese atu lo latou faamaufaailogaina mo Keriso, ua lē ausia le malosi e faia ai le galuega, ma o le taimi nei pe a talanoa tagata i kerisiano malolosi, ua seasea ona toe iloa pe ta’ua e seisi i latou. O ia kerisiano ua suia mai le tulaga vevela i le maalili i mea a le Atua. Afai e faapena lou kerisiano, e tatau ona e toe uia ou tulaga vae sa iai muamua ma toe fo’i i lou uluai alofa i le Atua. 

E tatau ona e toe fo’i I le taimi a’o e ave le faamuamua I le Atua e sili atu i lou lava olaga ma lona mafanafana, i aso e te lē manatu tele i mea o le lalolagi, ae pau le mea e te faamuamua ma naunau iai o le faia o le finagalo o le Atua. E tatau ona e toe foi i aso sa e iai muamua aua foi o le avea ma fitafita tuai i le tino o Keriso, o se tulaga lamatia. Na fetalai Iesu Keriso i le Luka 9:62 “O lē tago lona lima i le suōtosina, ma tepa i tua, e lē aogā ia i le mālō o le Atua.” I le Atua, o mea matagofie i taimi ua tuanai, ua le toe iloa atu, o le tulaga e pito sili ona taua ia te ia, o lou ola faaleagaga i le taimi nei. I le Esekielu 18:24'‘Ae ‘āfai o liliu ‘ese lē ‘ua amiotonu i lana amiotonu ma ‘ua fai amio leaga ma ‘ua fai e tusa ma mea uma e ‘inosia e faia e lē ‘ua amio leaga, e ola ‘ea ia? O lana amiotonu uma na ia faia, e lē manatua; o lana agasala ‘ua ia agasala ai ma ona sesē ‘ua ia sesē ai, ‘ona o ia mea e oti ai o ia. '

I le finagalo o le Atua, o le ala o le amiotonu, e susulu pea i aso uma seia oo i le aso atofaina, o le aso ua atoatoa ai mea uma, le aso tatou se vaai ai ia Iesu i lona mamalu. 

E pei foi ona molimau ai le Aposetolo o Paulo i le Filipi 3:13, 'Le ‘au uso e, ‘ou te lē manatu ‘ua ‘ou maua, a o le mea e tasi ‘ou te faia, ‘ou te fa‘agalogalo i mea ‘ua tuana‘i, ‘ou te momo‘e punou a‘i fo‘i i mea o lumana‘i.’ Ia avea lau Tusi Paia o lau uo sili. Faaavanoa lou taimi i le aso e tatalo ai. Saili se faapotopotoga o kerisiano faatuatua e te mafuta ai ina ia faatupuina pea lou faamaufaailoga mo mea o le malo o le Atua. O fitafita tuai I le tino o Keriso, o fitafita ua pauū. Aua ne’I e lavea ai, I le suafa o Iesu, Amene.  

OPEN HEAVENS

MATALA LE LAGI MO LE ASO SA 12 ME 2024

(tusia e Pastor EA Adeboye)

Manatu Autu: Ia maua le faamoemoe moni (Accessing True Hope)

Tauloto -Tusi Paia– Roma 5:5  “o le fa‘amoemoe fo‘i e lē mā ai, auā ‘ua fa‘amaligi mai le alofa o le Atua i o tatou loto e le Agaga Pa‘ia ‘ua foa‘iina mai ‘iā te i tatou.”

Faitauga - Tusi Paia: Roma 5:1-9

O le tasi auala a le tiapolo e osofa’i ma faalavelave ai i polokalame a le Atua mo olaga o tagata o le faatupu i o latou loto o le lagona ua leai se faamoemoe. O se tulaga fa’anoanoa, o nisi o tagata i le Ekalesia i aso nei, ua pa’uū atu i nei mailei a le tiapolo ma o loo ola i ni soifuaga ua tumu i le fa’avaivai.

I le Failauga 1:1-14, ua tatou vaai ai i le tupu aupito mauoa ma poto i le lalolagi ae tautala i lagona faavaivai ma le femēmēa’i. O lea tulaga ua ta’u mai ai ia i tatou, o tupe, malosi ma oa o lenei lalolagi e lē mafaia ona avatua i se tasi lē olioli ma le fa’amoemoe. O i latou e fa’atagaina fiafiaga taufa’asesē o le agasala e aveesea le naunau i le Atua mai o latou loto, e i ai le aso e vaai ifo ai ia i latou lava ma le lagona gaogao i i.

O le tulaga faapea na tupu i le soifuaga o le tupu o Solomona e pei ona tatou faitau ai i le ‘1 Tupu 11:3; Sa iā te ia ana avā o alo o alii e to’afitu galau, ma ana palake e tolu galau; na fa’aliliueseina lava lona loto e ana avā’.

O lo o lapataia tatou i le Eperu 3:12 e tatau ona o tatou mataala, “ne‘i i ai i so ‘outou le loto leaga ma le lē fa‘atuatua, tou te ō ‘ese ai i le Atua soifua.” Na alu ese Solomona mai le Atua, ma o’o ai ina oge ai lona olaga, e ui o ia o se tupu mauoa.E leai se olioli po’o se faamalieina pe a maua le tamāoaiga ae leiloa ma motusia le lua so’otaga ma le Atua. Fai mai le tusi o Mareko 8:36, Auā se a le aogā i le tagata, pe afai na te maua le lalolagi uma, ae māumau lona ola?

O tupe ma le lauiloa e lē mafai ona avatua iā te oe se faamoemoe. Vaganā ua I ai Keriso i totonu o lou loto ona e maua lea o lou faamoemoe mo se lumanai sili atu. Iā Keriso e lē gatā I le maualuga o lou faamoemoe manuia I le olaga nei i luga o le fogaeleele, ae mautinoa fo’i le lumana’i I le ola e faavavau. A iā te oe Keriso, tumau ia te ia auā o se filifiliga aupito silisili lea ona lelei ua e faia, fai mai 2 Peteru 1:3,  Ua foaiina mai iā te ì tatou e lona mana Atua o mea uma e o’o ai i le ola ma le amio Atua, i lo tatou iloa lelei o lē na valaau mai ia i tatou i lona mamalu ma lona lelei silisili.

Afai na e fulitua i se taimi, su’esu’e ifo oe lava ia te oe, saili poo gafea o le ala na pogai ai le sesē ma fo’i I le Atua i le loto salamō moni. E tatau fo’i ona e fa’amautinoa e te saili fesoasoani mai isi kerisiano o tou faatasi. Aua ne’i faamaualuga lou loto e talanoa i se tasi e mafai ona fesoasoani iā te oe e toe sosoo le lua mafutaga ma le Atua. Afai ua alu ese lou loto mai le Atua, ou te tatalo ia toe faafou e le Atua le lua mafutaga ma ia aveese ni lagona fa’avaivai o lo’o e ui ai i le suafa o Iesu. Toe su’esu’e ifo i lou olaga, o e faamuamua le Atua i mea uma? I le suafa o Iesu. Amene

OPEN HEAVENS

MATALA LE LAGI MO LE ASO TOONAI 11 ME 2024

(tusia e Pastor EA Adeboye)

Manatu Autu: E iai le fuafuaga a le Atua mo oe – (He has a plan for you)

Tauloto -Tusi Paia– Ieremia 29:11  “Auā o a‘u nei, ‘ua ‘ou iloa manatu ‘ua ‘ou manatu ai ‘iā te ‘outou, o manatu i le manuia, ‘ae lē o le malaia, o lo‘o fetalai mai ai le ALI‘I, e foa‘iina atu ‘iā te ‘outou le i‘uga e i ai le fa‘amoemoe”.

Faitauga - Tusi Paia: Jeremiah 29:1-14

Pe e te talitonu i ai pe leai, e i ai le fuafuaga a le Atua mo lou olaga. Tusa pe le’i fuafuaina e ou matua lou fanau mai, na faia oe e le Atua i lona fa’atusa i le manava o lou tinā ma fanau mai ai oe i le lalolagi. E i ai le faamoemoe o le Atua mo oe. O loo faamanino lelei mai i le tusi o Ieremia 1:5: Na a’u iloa oe a o le’i faia oe e a’u i le manava; na a’u fa’apaiaina oe a o le’i fanau mai oe, na a’u tofia oe e fai ma perofeta i nuu.

Talitonu mai iā te a’u, o le faamoemoe o le Atua mo oe o se fuafuaga lelei. O loo ia faailoa mai lea I le Ieremia 29:11. O le fesili, o e savali e tusa ma lana polokalame mo oe? E lē lava le fai o fuafuaga a le Atua mo lou soifua; pe afai e te musu e ola e tusa ma ona ala, e foliga mai ai e leai se fuafuaga na faia e le Atua mo oe.

Fai mai Isaia 30:21; E faalogo fo’i o outou taliga i le upu i o outou tua, pe a outou afe ane i le itu taumatau pe afe ane i le itu tauagavale, e faapea mai. O le ala lava lenei, ia outou savavali ai.

E finagalo le Atua e ta’ita’i oe i le ala tonu e tatau ona e ui ai i so’o se laasaga o lou olaga. E finagalo e avea ia ma ou tapasā i lou soifuaga atoa. O le isi fesili e ao ona e tali i ai, o e naunau e fa’alatalata iā te ia seia e lagona lona siufofoga? Pe a e lagona lona siufofoga, e te gaua’i e usita’i iā te ia tusa po o se faatonuga e te manatu e valea? Na o i latou e fa’latalata i le Atua, faalogo ma le usita’i atoatoa ia te ia e faataunuuina i le manuia polokalame a le Atua i o latou olaga.

Sa o’u manatu o loo sa’o le ala na ou ui ai a o o’u taumafai ia avea ma Sui pule aupito laititi o le Iunivesite i totonu o Aferika. I lou lava manatu o se fuafuaga lelei lea, se’ia o’o ina o’u iloa le Atua ma fa’alatalata iā te ia. O iina na amata ai ona musumusu mai i o’u taliga i le ala ou te ui ai. Ina ua fetalai e tu’u la’u galuega ae avea ma ta’ita’i aoao o se ekalesia o lana tupe maua i le masina e lē taitai sōsō i lo’u totogi, sa faigata lea tulaga. Faafetai I le Atua na o’u usita’i. E lei taunuu ona avea a’u ma Sui pule aupito laititi i Aferika, peita’i o le taimi nei, o le toatele o Sui pule latou te valaaua a’u Tamā. O le Ekalesia RCCG fo’i e i ai la latou Iunivesite ua faatulagaina e lona lua i Iunivesite aupito lelei i le atunuu. O fuafuaga a le Atua e sili atu ona lelei na i lo o so’ose mea e te mana’o ma manatunatu i ai, e pei ona fai mai le Efeso 3:20. O lava lou latalata i le Atua e te lagonaina ai lona siufofoga e ta’ita’iina ai oe i ana polokalame mo lou soifua? I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 10 ME 2024

(tusia e Pastor EA Adeboye)

Manatu Autu: Matāsele a ē fai manu 5 – (Snare of the fowler 5)

Tauloto -Tusi Paia– 2 Korinito 10:18  “Auā e lē talia o lē ‘ua vivi‘i o ia ‘iā te ia lava, a o lē ‘ua vi‘ia e le Ali‘I”.

Faitauga - Tusi Paia: Faamasino 16:4-21

O le a faauma atu I le aso le talanoaga i vaega e matua malosi ai le aafiaga o mailei a le tiapolo, e na te faamautinoaina o ana mailei e tosina ai tagata e faatupuina ai le faamaualuga ma le faalialia vale. I le Kenese 3:6, na ai e Eva le fua o le laau na faasaina ona sa manatu e faatupuina ai lona poto ma le atamai. A faatosina mai se mea ia te oe e faalialia vale ai, ia mataala! E masani lava ona maua e le tiapolo tagata e manatu e le mafai ona maua I latou (1 Korinito 10:12). A fai mai se tagata, ’ou te talitonu i le faapaiaina, ma ou te savali ai ina ia aua lava nei maua a’u e le tiapolo’, e tatau ona mataitu lelei. Mo se faataitaiga i le Luka 22:31-34, fai mai le Alii ia Peteru ‘ua mana‘o tele Satani ‘iā te ‘outou, ‘ia lūlū ‘iā te ‘outou pei o le saito, '. Ae tali Peteru, ’Le Ali‘i e, ‘ua ‘ou sauni tā te fa‘atasi ma oe i le fale puipui ‘atoa ma le oti.” Na tali atu Iesu,  ’e lē vivini moa i le po nei, a ‘ua e fa‘afiti fa‘atolu mai, ‘e te lē iloa a‘u.”

I le faitauga mai le Tusi Paia o le aso, ua tatou iloa ai na paū Samasoni ona ua manatu faamaualuga i lona malosi. E lei nanaina e Talila lona fia iloa o le mealilo e maua ai lona mana ma le malosi ina ia faatoilalo ai ia te ia. Na manatu Samasoni a fua i lona malosi ma tagata na ia fasiotia, e le mafai e seisi ona saisai ia te ia, o lea na manatu ai, se’i taalo i le tiapolo. Aua e te fia taaalo i le tiapolo, ua leva na iai i lenei olaga. O lo’o iloa i lona talaaga le toatele o tagata maualuluga ma malolosi i le faatuatua na ia faatoilaloina. Fai mai le 1 Tesalonia 5:22, ‘Ia mamao ‘outou ma mea leaga ‘ese‘ese uma lava. A vaai atu o le mea leaga, aua e te manatu e mafai ona e tataliina, tamo’e ese. 

Ou te iloa se tagata na faapea mai na ala ona ia auai i se faapotopotoga faalilolilo a’o iai i le Iunivesite ona sa fia iloa. Fai mai na ia faia ona o le fia malie, ma lona talitonuga, e le taitai ona auai i mea leaga e faia ai. Aua e te fia malie i le tiapolo. Fai mai le Tusi Paia i le Faataoto 16:18E muamua le fa‘amaualuga i le malaia; ae fai mai le Faataoto 29:23'O le fa‘amaualuga o le tagata e fa‘amaulaloina ai o ia. 

I ni tausaga ua leva atu, sa tofia ai se tamaitai e fai ma a’u failautusi faapitoa, na ou faapea atu,  ’e leai se mea faapena e faia’. Ou te malamalama lelei i la’u galuega, ou te faigaluega I le ao ma le po. O le a sa’u tala e faia pe afai o lo’o ma faigaluega ma le toalua o le isi tamaloa I le leva o le po? E iai nisi tagata na o mai ma faapea mai ia te a’u, ‘lau afioga, faapea lava matou e te faauuina’. Na ou faapea atu, ‘ou te iloa lelei, peitai e mafai e le faauuga ona liua le tino I se ma’a?’

Afai e te manatu e le taitai ona e pau, o lena ua e agai atu I lalo aua o lou faamaualuga lena e te latalata atu ai I le matasele a le tiapolo, ma e le umi ae maua ai oe. E muamua le faamaualuga I le malaia. 'O lenei, o lē manatu o lo‘o o tu ia, ‘inā fa‘aeteete ia ne‘i pa‘ū.' (1 Korinito 10:12). I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 9 ME 2024

(tusia e Pastor EA Adeboye)

Manatu Autu: Matāsele a ē fai manu 4 – (Snare of the fowler 4)

Tauloto -Tusi Paia– 1 Korinito 6:12  “Ua tataga mea uma ‘iā te a‘u,” a ‘ua lē aogā mea uma. “‘Ua tataga mea uma ‘iā te a‘u,” a o a‘u, e lē fa‘ato‘ilaloina a‘u i se tasi mea.

Faitauga - Tusi Paia: Roma 6:1-23

O le a ou talanoa I le asō I le vaega lona lua e matua malosi ma sao ai mailei a le tiapolo. E faaaoga e le tiapolo mailei e matagofie I le vaai toe tofo lelei e faatosina atu ai tagata ia ana matasele. Mo se faataitaiga, na manatu Eva o le fua o le laau ua lelei lava pe a ‘ai ma ‘ua matagofie mai ao faaaosoosoina e le tiapolo (Kenese 3:6). O le tuuina mai o le agasala e foliga mai o se mea lelei, o se togafiti lea ua leva na faaaoga e le tiapolo e saisaitia ai le tagata ma e tatau ona mataitu lelei e oe, le tagata faatuatua. 

Afai e lima taitaiina se tagata e fua i lana vaai, e ono lamatia o ia i togafiti a le tiapolo. O le mafuaaga lea e tatau ai ona e oti i le tino. A naunau le tagata e faamalie o ia i mea o le tino, e le mafai ona ia pulea lagona o le tino, le mafai ona pulea meaai e ai ma isi. O le tulaga e pito i matautia le ogaoga i mailei a le tiapolo e lelei i le tofo, aua afai e tofo muamua, e matua faigata ona toe taofia e pei ona ou faamatala atu ananafi. O le auala lelei e taofia ai ni mailei, o le aua lava nei tofo iai. Ioe, e matagofie i le vaai, peitai e le tatau ona e latalata iai. E iai se muagagana faa Aferika e faapea, ’o meaai e lē tatau ona e ai ai, e lē tatau ona e sogisogi iai’. 

Fesili i so’o se tagata ua masani i le faia o mea leaga, e latou te ta’u atu ia te oe, na amata lava i le tofo. O i latou e faia amioleaga o le tino, na amata i le tofo iai, a vaai atu e leai se mea e tupu, e toe faia foi seia oo ina iloa ua lē mafai ona tuu. O i latou ua masani i le inu ava malosi, na amata lava i le ipu e tasi seia oo ina matua malosi le inu. A oo ina mau le matasele,  le mailei, a toe tilotilo nei tagata I o latou olaga, e latou te faaapea mai e matua salamo I le aso muamua na amata ai. Afai e saunia e le tiapolo le matasele ma le mailei peitai e te lē o’o I tafatafa o le mailei, e le taitai ona e lavea pe mau ai. Faamolemole le au pele e, ia e soso mamao ese mai matasele a le tiapolo. Afai ua e masani I se agasala, e te manaomia le mana o le Atua maualuga  e faia le faasaolotoga mo oe. Saili fesoasoani i se tagata faauuina a le Atua pe faatalanoa le mataupu ma se tagata kerisiano e iai le tomai faapitoa, ina ia faasaoloto oe mai lena saisaitiaga. E ala i le alofa tunoa o le Atua, e lē avea oe ma se tagata e mau ma saeia i matasele a le fili, i le suafa o Iesu. ’Aua e te tofo i mailei a le fili, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 8 ME 2024

(tusia e Pastor EA Adeboye)

Manatu Autu: Matāsele a ē fai manu 3 – (Snare of the fowler 3)

Tauloto -Tusi Paia– Mataio 5:29  “Āfai fo‘i ‘e te tausuai i lou mata taumatau, ‘inā sali ‘ese ia ma e lafoa‘i; auā e lelei ‘ina fano se tasi ou fāsi tino, ‘ae leaga pe a lafoina lou tino uma i Kēna...”

Faitauga - Tusi Paia: Mataio 6:22-23

Na ou folafola atu ananafi o le a ou talanoa atu i vaega e tolu e matua malosi ona sao ai mailei a le tiapolo. O le mailei muamua na faaaoga e le tiapolo o le fua o le laau na faasaina. A e faitau i le Kenese 3:6, e te iloa ai vaega taua uma na iai i le fua o le laau. Na vaai atu Eva i le fua o le laau ua lelei lava pe a ‘ai ma ‘ua matagofie mai. O le matāsele a le tiapolo e masani lava ona faaaoga, ia matagofie i le vaai ma e faigata ona e tilotilo ese ai. 

E suesue ma maitau lelei e le tiapolo le tagata po’o a mea e fiafia iai. E seasea ona e vaai I se tamaloa e faia le mulilua ma se fafine auleaga. O le matasele e masani ona faaaoga e le tiapolo e aulelei ma matagofie I le vaai. Aua nei faaseseina oe I le aulelei, o lo’o iai le oti. I le Faamasino 16:4, fai mai ua tosina ma manao tele Samasoni ia Talila, ua o’o ina tiai ma lelea i le matagi lona mataala. Na faaaoga e le tiapolo lona manao ma le tosina ia Talila e mailei atu ai o ia i le matasele ma iu ina faaumatia ai. E leiloa pe iai ni mea o lo’o i lou siomaga e tumu i le agasala pe taitaiina ai foi oe e faia le agasala. O se matāsele e tatau ona e mataala iai ina ia aua lava nei maileia ma saeia ai oe e le tiapolo.

Afai e tosina gofie se tamaloa i fafine papae, o le a tuu e le tiapolo le toatele o i latou i lona siomaga e faaosoosoina e faia le mulilua po’o le faitaaga. Afai e tosina gofie i taavale taugata, e aumai e le tiapolo le tele o taavale I ona ala. Afai e na te faatagaina le tosina I taavale e faia le gaoi, ua maua o ia i le matasele a le tiapolo. O le mafuaaga lea e tatau ai i kerisiano ona peritomeina o latou loto ina ia suia mea e tosina ma naunau iai. Ia ‘outou loto lava i mea i lugā, ‘ae lē o mea i le lalolagi (Kolose 3:2). Aua le alu tele lou loto i mea o le lalolagi. E tatau ona e matua saili ma manatunatu i le Upu a le Atua. Ia tumau lana Upu ia te oe e oo i le tulaga ua na o le pau mea e te loto iai o mea e faamalie ma faafiafia i le Atua. ‘Ia sili ‘ona leoleoina o lou loto i le leoleoina o mea uma; auā e tupu mai ai le amio (Faataoto 4:23). Ia mataala i le tu‘inanau o le tino, ma le tu‘inanau o mata, ma le fa‘alialia o lenei olaga (1 Ioane 2:16). Afai e te oo i le tulaga ua sili ona e loto i mea o le lalolagi i lo mea a le Atua, o lona uiga ua amata ona lamatia oe i matasele a le tiapolo. Fai sau anapogi, pe fai sou taimi na o oe ma le Atua, e te mafuta ai i lona mamalu ma lona nofoalii seia lepetia lena tuinanau.  E iloa lelei e le tiapolo le mea lena o loo e fiafia ma naunau iai, ma e na te faaaogaina e mailei ai oe. Ia mataala! I le suafa o Iesu, Amene.  

OPEN HEAVENS

MATALA LE LAGI MO LE ASO LUA 7 ME 2024

(tusia e Pastor EA Adeboye)

Manatu Autu: Matāsele a ē fai manu 2– (Snare of the fowler 2)

Tauloto -Tusi Paia– 1 Ioane 2:16  “Auā o mea uma lava o i le lalolagi, o le tu‘inanau o le tino, ma le tu‘inanau o mata, ma le fa‘alialia o lenei olaga, e lē mai le Tamā ia, ‘ae mai le lalolagi.....”

Faitauga - Tusi Paia: Iakopo 1:12-16

 “E faoa ea le vete ai le ua malosi? pe laveaina e le tafeaga a le ua amiotonu?(Isaia 49:24). 

E pei ona ta’ua i le upu a le Atua, o so’o se tasi e maua se manu i sana mailei, e pei ona ou fa’amatalaina ananafi, e mafai ona ia umia o ana mea. Ua avea ia manu ma ana mea totino. Sa matou taumafai e tutuli ‘ese temoni mai se tagata a ua fai mai temoni, “Ua e sosopo vale mai iinei. O le tagata lenei o matou meatotino. Na savavali mai lava I matou mailei’.  Mo se fa’ataitaiga, sa iai sa’u tamaititi a’oga sa aga’i atu e galue I le National Youth Service Corps, a ua faafuasei ona oso le ma’i. Ua fai mai le foma’i, e ma’i pe a ai i le araisa. Ina ua aumaia le talavou ia te a’u, ma ua ou sauni ou te tatalo mo ia, ae musumusuina a’u e le Alii e tatau i lenei tama ona alu e totogi le tau o se agasala. Sa maua le fa’amatalaga, o le tamā o le talavou lea, sa ia gaoia se uila vilivae a lona tua’oi, ma ia fa’atauina e totogi ai le pili a’oga a lona atalii. Sa tu’u e le tuaoi le fetu’u I luga o le tagata gaoi. Na maliu lona tamā ina ua mai i le taumafaina o le araisa  a o lenei ua lavea ai foi lona atalii talavou. Ana le fa’ailoa mai le tulaga lea ia te a’u, o lona uiga matou te fiu e tatalo, ae o lo’o aafia le talavou i le fetu’u. Na ou fai iai e alu e fa’atau se uila mo le atalii a le tua’oi aua ua maliu le toeaina. Ina ua taliu mai i lona fa’ataunuuina o la’u faatonuga, ua ou sauni e ai lau araisa. Sa ‘ai e lenei talavou la’u araisa e aunoa ma se ma’i na aafia ai.

E iai foi le isi talavou na aumai ia te a’u e faia ni talosaga laveai mo ia ona ua ou e pei se ta’ifau. Sa ta’ua na ia faia le amioleaga ma lana taifau i totonu o le fale (tulou). Sa ou tatalo mo ia a e lei taofia ai le ou. Na ou fautuaina ona matua e to’a’aga e aumai le tama i sauniga o le Agaga Pa’ia i masina taitasi ma ia faamoemoe i le alofa tunoa o le Atua o le a talaia noanoataga ua maua ai. A fai e savali atu se tagata i le mailei o le Fili, ona o le tosina o le tuinanau o le tino, e mafai e Satani ona pu’eina lena tagata e avea mona.

I le faitauga mai le Tusi Paia o le aso, o loo manino le upu a le aposetolo o Iakopo, e le fa’aosoosoina e le Atua se tagata, peitai e faaosoosina tagata i o latou tuinanau o le tino, ma i’u ai i le agasala po o le oti. O le mailei e fa’aaoga e Satani e le foliga mai e oti ai seisi. E tolu lava ni vaega e faaaoga e le tiapolo I ana mailei ina ia mautinoa e maua lelei ai le tagata, muamua, e matagofie I le vaai, lona lua, e suamalie ma tofo lelei ma lona tolu, e faatupuina ai le mimita. O le a ou talanoa e auiliili ia vaega i aso o loma nei, ona ou te talitonu i le Atua, ma e ma’e’a ane a tatou suesuega i lenei mata’upu, e le mafai ona e toe pa’u atu i mailei a le tiapolo. Ia e mataala ma matuā faaeteete i tu’inanau o le tino, o mailei na a le ti’apolo, e taitaiina ai le tagata i le oti, I le suafa o Iesu, Amene.

OPEN HEAVENS

MATALA LE LAGI MO LE ASO GAFUA 6 ME 2024

(tusia e Pastor EA Adeboye)

Manatu Autu: Matāsele a ē fai manu 1– (Snare of the fowler 1)

Tauloto -Tusi Paia– 1 Peteru 5:8  “Ia ‘outou fa‘autauta, ‘ia ‘outou mataala, ‘ona o lē ‘ua fai ‘outou mōna fili, o le tiapolo lea, o lo‘o fealualua‘i o ia e pei o se leona tagi, ‘ua sā‘ili se tasi e ‘aina e ia....”

Faitauga - Tusi Paia: Salamo 124:6-8

O lo’o a’oa’oina I tatou e le Tusi Paia e faapea, o lo’o iai tagata e taua o fai manu e saili mo agaga. O se faataitaiga lelei o se tagata fai manu o le fafine talitane (Faataoto 6:26). Fai mai le Tusi Paia e na te taumailei le ola aoga. O le taitai o e fai manu o le tiapolo lea (1 Peteru 5:8). E faaaoga e le fai manu le matāsele po’o mailei e tapu’e ai le manu. Na ou tupu ane I se fa’atoaga ma sa matou faaaogaina matāsele po’o mailei e maua ai a’ano o manu fasi. A o’o i le afiafi, e tatao a matou mailei, e eli ni pu i le palapala, tuu mailei I totonu o pu, ona ufiufi lea I ni laulaau ma lulu ai palapala i luga e fa’afoliga o lo’o solofa lelei le palapala i lona tulaga masani. A maea ona tatao mailei, ona tu’u lea o ni meaai pei o sana e tata’i mai ai manu, ona matou momoe lea. A o’o i le po, a vaai atu manu i le meaai, e amata ona ai na o sina meaai, e umiumi ona ai ae vaai atu e leai se mea o tupu, ona soso atu pea lea ma ai  seia o’o ina tu i le mailei, ona faafuaseia lea ona tapuni ma mau ai. E o’o atu i le taeao, ua saka i totonu o le ulo supo.  E toatele tagata o lo’o i seoli i le aso ona sa latou tofo i le agasala, ma peiseai e leai se mea na tupu, ona faia pea lea o le agasala seia oo ina maua i le mailei a le fili.

E toatele tamaitai talavou mai aiga lelei na a’oa’oina ia tausi lo latou mamalu o teine muli, peitai na o’o ina fai le agasala ma le tuinanau o le tino e amata i le faatasi, ona e leai se mea na tupu, na faaauau pea seia o’o ina maua i le ma’itaga, o nisi ua maua i faama’i ma ua faaauau ai lava i lenei ituaiga o olaga. O se tasi o mea e feagai ma se manu e mau i se mailei, o le fefe. E faapena foi se tagata ua amata ona o’o atu i faigata, e maua i le fefe. 

O lē ua maua i le mailei a le fai manu e taua o lē saeia pe faatama’ia. Afai e le tatalo le kerisiano, e o’o ina avea o ia ma lē saeia pe faatamaia. Fai mai le Salamo 91.3, o lē nofo I le mealilo o iai Lē Silisili’ese, e na te laveaaina o ia mai le mailei a le fai manu. Afai e te lē manao e te paū ma maua I le mailei a le fai manu, o lou nofo I le mea lilo o iai le Silisiliese, o lo tatou Tama o I le lagi, e tatau ona mumu pea le afi. Afai e maalili lau fata faitaulagi, e le taumate e te te’i ane, ua e iai I le ulo fai supo a le tiapolo. Ia e tatalo ia faifaipea e le I lalo ifo ma le itula I le aso, e te iloa ai, e matua faigata ona avea oe ma lē e saeia ma faatamaia e le tiapolo. A e lē tatalo, e avea oe ma se saeia ma faatamaia i mailei a le tiapolo, I le suafa o Iesu, Amene.