Samoan Devotional

OPEN HEAVENS

MATALA LE LAGI MO LE ASO LULU 5 IUNI 2024

(tusia e Pastor EA Adeboye)

Manatu Autu: Pe a finagalo le Atua e faamanuia i a te oe (When God wants to bless you)

Tauloto -Tusi Paia– Kenese 22:2  ‘‘Ona fetalai mai lea o ia, “‘ia e ‘ave lou atali‘i, o lou atali‘i e to‘atasi, o lē ‘ua pele ‘iā te oe, o Isaako lava ma e alu i le nu‘u o Moria; ma avatu ‘iā te ia e fai ma taulaga mū i lea mea i le tasi mauga ‘ou te ta‘uina atu ai ‘iā te oe.”

Faitauga – Tusi Paia – 1 Tupu 17:8-16

I le faitauga o le Tusi Paia o le aso, na alu atu Elia i le fafine ua oti lana tane i Sarefata, ua toe o lana meaai mulimuli o totoe. Fai mai le Tusi Paia I le Luka 4:25-26, sa toatele fafine ua oti a latou tane na iai, ae pau lea o le fafine na auina iai Elia. Ua faia aua ua finagalo le Atua e faamanuia ia te ia I se faamanuiaga e la le agaga. E ui na filifili e le Atua e faamanuia ia te ia, sa iai se mea sa tatau ona ia faia ina ia tino mai ai i le tino nei. Ina ua fai atu Elia e aumai lana meaai mulimuli, e mafai lava ona ia fai mai, ‘e te manao e ave le meaai mulimuli a se fafine ua oti lana tane ma lana tama? O oe ea o se tagata o le Atua’. Peitai, na usitai le fafine ua oti lana tane ma auina mai le meaai mulimuli ia Elia, ma na amata mai I le taimi lea, ua le toe iai se tulaga mativa ma le leai o se mea I lona aiga. 

O le Atua e ona le lagi ma le lalolagi, e mafai ona ia maua so’o se mea e aunoa ma le manaomia o le fesoasoani a se tagata. Na ia faapea mai I le Salamo 50:10-12, a fia tausami I se meaai, e mafai ona ia faaaogaina povi e maua I mauga  e afe aua o ia e ana. Peitai e ui ina matautia ma ofoofogia le Atua, e iai taimi e fai mai ai I se tagata e foai atu se mea ia te ia. A ia faia lea tulaga, o loo ia finagalo e faamanuia I lea tagata. E mafai e le Atua ona tausia Elia e faaaogaina ai soo se auala, sa ia fafaga ia te ia e faaaogaina ai manulele mo le tele o masina. I le 1 Tupu 19:4-8, ina ua fiaai Elia ae ua pe le vai, na auina mai e le Atua agelu e fafaga ia Elia. E mafai e le Atua ona auina atu agelu e fafaga Elia. E le faapea o Elia na manaomia le fesoasoani, o le fafine ua oti lana tane i Sarefata na matua manaomia le fesoasoani. A finagalo le Atua e foai mai e tusa ma sou manaoga, ou te tatalo ia aua lava nei e tetee I lona finagalo. 

I le 2 Tupu 4:8-17, e te vaai ai i le tala i le fafine i Sunema. Na ia vaai atu i le tagata o le Atua o ui ane, na faaosofia o ia e le Atua e valaaulia le tagata o le Atua e malolo atu mo se taumafataga. Na musu Elia peitai fai mai le Tusi Paia na ia taofiofi ia te ia. Sa iai se mea i totonu o lenei fafine o lo’o faapea, ’Aua nei alu ese le tagata o le Atua ae e te lei faamanuia ia te ia’. Na tausami Elia i le meaai ma na toe asia faafia lona fale mo se meaai. Na toaga lenei fafine e fafaga i le tagata o le Atua ma ua oo ina fausia se fale mo ia. Na iai lea o le aso na faamuta ai e le Atua le tulaga pa o lenei fafine ina ua tatalo Elia mo ia. Na faaosofia o ia e le Atua ma e ui na alu ai ana tupe, na ia maua se mea e le mafai e tupe ona faatauina. Ia e galue ma faalogo i le Atua i le taimi e finagalo ai e faamanuia ia te oe. 

Tatalo

Tama, faamolemole, faataga a’u e faia le mea e tatau ona faia e maua ai lo’u faamanuiaga, i le suafa o Iesu, Amene.    

OPEN HEAVENS

MATALA LE LAGI MO LE ASO LUA 4 IUNI 2024

(tusia e Pastor EA Adeboye)

Manatu Autu: Tagata matutua, tausia ma aoaoina talavou (Elders, raise the youths)

Tauloto -Tusi Paia– 1 Samuelu 22:2  ‘‘Ua fa‘apotopoto atu fo‘i ‘iā te ia tagata uma o ē na tigāina, ma tagata uma ē na ‘aitalafu, ma tagata uma o ē ‘ua tigā le loto, sa fai o ia ma ali‘i ‘iā te i latou; sa ‘iā te ia pe ‘atoa se to‘afa galau o tagata.'

Faitauga – Tusi Paia – 2 Samuelu 23:14-17

A o talavou tagata, e latou te lagona, e mafai ona latou amoina le lalolagi i o latou tau’au. E gaioi e faaaogaina o latou malosi e a’ea mauga tetele. Ae e o’o mai le taimi ua latou le toe mafaia ona fai mea sa masani ona latou faia. I lena taimi pe a avea ma tagata matutua, ona latou mana’omia ai lea o ni talavou e fesoasoani ia i latou. A lava ona latou tapenaina lelei talavou, e leai se fa’afitauli, ae afai na latou taofiofi mea lilo ma puna’oa e aunoa ma le faasoa I talavou, o le a leai se fesoasoani mo i latou.

Ina ua lata ona ou ‘ausia le 60 tausaga o lo’u matua, e toatele tagata ua olioli, ma sauniuni mo se fiafia tele. I lena taimi, ua latou lagona ua maualuga vaega ua ausia e le Ekalesia o le Redeemed Christian Church of God (RCCG) ma ua iai ona lala I atunuu e 50 o le lalolagi. A’o lea taimi ia te a’u, ua matua ou māfatia auā ua ou iloa o le 60 tausaga, ua toeititi maea lou aoauli ma ua aga’i mai lo’u tauafiafi. Sa ou tagi atu i le Atua i se tasi o po a’o ou savaliavli solo ma fa’apea atu I le Atua: ’Le Alii e, o lea ‘ea la’u mea o le a fai? Na e fetalai i lo’u tama fa’aleagaga o le a sopolia le lalolagi i le RCCG ma sa ou moemiti o le a tupu mai i lo’u vaitau. A o lenei o le a goto le la i lo’u ola, sei e silasila mai i le tulaga ua ou iai ma fesoasoani mai’. Ona fetalai mai lea o le Atua, “Atalii e, o a’u e pule i le goto ifo o lou la.”Faafetai le Atua, ua tuana’i atu le 20 tausaga, e le’i goto atu lava lo’u la.

Ua tatou o’o mai i le asō aua sa a’oa’oina a’u e le Atua i le ala e tapenapena ai mo le tauafiafi. I le taimi na ou tusia ai lenei lesona, ua 197 atunuu o le lalolagi ua iai le Ekalesia RCCG. Ma e aofia ai ma ni atunuu ou te le i o’o iai. Peitai o lo o iai la’u fanau, o tagata, sa latou nonofo, a’oa’oina ma fa’a’auupegaina e le Atua e faaaogaina ai a’u. Ou te le o malolo i ni a’u foe, o lo o ou faia pea ni tapenaga ma galue malosi e sili atu i lo le muamua! O le mafua’aga lena e faatolu i le tausaga, pe a, o faia a matou sauniga o le Agaga Pa’ia, ou te filifilia talavou e aofia ai i latou e sili atu ma le lua sefulu tausaga, e laugaina le upu i le pulela’a, e fa’ailoa mai ai taleni fou, ia uuna’ia ma tapena i latou mo a taeao.

Afai ua avea ‘oe ma se tagata matua, ia e faia se mea lelei mo oe lava, ia uuna’ia mai i luma talavou, ia tapena ma faa’au’upega i latou, ave iai latou avanoa e ta’ita’ia sauniga, ia auina atu i latou ma ia fa’amausaliina, aua a oo i le taimi ua avea ai oe ma tagata sinasina, o le a iai tagata i ou tua o le a faapea atu: “Malo lava, ua matou tutu atu i ou tua.”A’o e aga’i atu i le ‘ausia o faamoemoega o lou olaga, ia e mautinoa o lo’o e tausia ma a’oa’oina le tupulaga fai a’e, i le suafa o Iesu, Amene.

OPEN HEAVENS

MATALA LE LAGI MO LE ASO GAFUA 3 IUNI 2024

(tusia e Pastor EA Adeboye)

Manatu Autu: E tele atu I le alofa tunoa (More than grace)

Tauloto -Tusi Paia– Roma 6:1  ‘'O lenei, se a ‘ea sa tatou ‘upu? Tatou te nonofo pea ‘ea i le agasala, ‘ina ‘ia fa‘atele ai le alofa tunoa? '

Faitauga – Tusi Paia – Ioane 5:8-14

O le Atua o le alofa (1 Ioane 4:8), peitai o ia foi o le afi e maamaai (Eperu 12:29). E toatele tagata o lo’o I lona itu o le afi e maamaai, peitai o lo’o manatu I latou, o lo’o iai I le itu o lona alofa. Aua nei faaseseina oe e tagata o lo’o fautua atu o le taimi lava e avea ai oe ose afafine po’o se atalii o le Atua, e pule lava oe I lau amio. E masani ona fai faapea a latou faamatalaga, o loo tusia i le Tusi Paia, na tatou maua le alofa tunoa e ala ia Iesu (Ioane 1:17). Peitai, e le’i faapea mai le Tusi Paia, o Keriso o le alofa tunoa, aua foi o Keriso e sili ma tele atu I le alofa tunoa. Na ia auina mai le alofa tunoa, peitai e te le maua i le Tusi Paia se vaega o faapea o Iesu o le alofa tunoa. 

Afai o Iesu ua na o le tumu I le alofa tunoa, semanu e faapea mai le Ioane 1:14 ‘ua tumu o ia i le alofa tunoa’, ona gata ai lea iina, peitai na faaopoopo iai ma le ‘fa‘amaoni’. I le Ioane 14:6, na fetalai Iesu, ‘O a’u nei o le ala, upu moni ma le ola’, peitai e lei faapea mai o ia o le alofa tunoa. 

E iai taimi e fia malie ai la’u fanau, ona latou tusia lea o so’u ata komi o loo faia se fusiua ma le meafaaili lulu o loo u’u I lo’u lima. Tusa po’o le a le malie o le ata ua tusia, a silasila atu tagata I le fusiua ma le meafaili lulu I lo’u lima, e latou te iloa lelei o a’u o lo’o faatatau iai. E masani ona vaaia a’u o uu le mea faaili, ae le o a’u o se mea faili. 

I le Tito 2:11-12, fai mai le Tusi Paia o le alofa tunoa na aumaia le faaolataga iai tatou, ma a’oa’oina I tatou ia tetee I le amioleaga ma tuinanau o le lalolagi. A amioleaga se tagata ma fusifusia tuinanau o le lalolagi ae faaaoga le alofa tunoa, o lena tagata ua ia teena le faaolataga na tuuina mai I le alofa tunoa, ma ua se’e atu I le itu o le afi maamaai o le Atua. 

Le au pele e, ou te fautua ia te oe ia e maua le poto, olioli I le alofa tunoa o le Atua, ae aua e te faaaogaina ma le fa’alētatau. E ui o Iesu Keriso e tumu I le alofa tunoa, a faaaoga e le tagata e fa’alētatau, e faaalia e le Atua I lea tagata lona itu o le afi e maamaai. Fai lelei sau faaiuga mautu e te lē faaaogaina fa’alētatau le alofa tunoa o le Atua I lou olaga (Kalatia 2:21). O le alofa tunoa o le Atua e aoga e fesoasoani ia te oe e manumalo I le agasala, e le o se laisene e faaauau ai pea I le agasala. 

Ia e faia mea tetele mo le malo o le Atua e faaaogaina ai le alofa tunoa ua foai mai ia te oe e ala ia Iesu Keriso. Faataitai I le aposetolo o Paulo, ua faapea mai o le alofa tunoa o le Atua na taitaiina o ia e faia mea uma na ia faia mo le Atua (1 Korinito 15:10). O le alofa tunoa o le Atua, e le o se alofaga e faia ai le agasala, I le suafa. 

OPEN HEAVENS

MATALA LE LAGI MO LE ASO SA 2 IUNI 2024

(tusia e Pastor EA Adeboye)

Manatu Autu: E tauia ma faamanuia e le Atua (God rewards)

Tauloto -Tusi Paia– Efeso 6:8  ‘o iloa e ‘outou o lē na te faia se amio lelei, e toe maua lea lava e ia mai le Ali‘i pe se nofo pologa o ia, po o se sa‘oloto.’

Faitauga – Tusi Paia – Mataio 6:1-18

I le silia ma le 50 tausaga ua ou auauna ai i le Atua, ua ou maitauina ai e tauia ma faamanuia pea e le Atua e lē aunoa i latou e foai atu ia te ia ma galulue mo ia. A fai e te ola fa’apaiaina, o oe o lona atali’i, e faafetai atu ia ia te oe mo so’o se mea e te faia mo ia.

I ni tausaga ua mavae, sa o’u alu ai i Port Harcourt, o se taulaga I Nigeria I Saute mo se sauniga faa talalelei. Na fai mai le Atua ia te a’u e tatau ona o’u nofo i le fale o se uso sa ma fetaui i se fonotaga fa’avāomalō a tamā Full Gospel. E na o le pau lea o le taimi na ma feiloai ai ma lea tamā. Sa o’u valaau i le uso ma faailoa i ai le fetalaiga a le Atua ma sa ia alaga ma tagi i le olioli. Sa o’u nofo i le fale o le tamā lea ma sa sili lo’u fiafia i lana ulumatua, o se tama tino laititi. I se tasi aso a o o’u sauni o’u te alu i le sauniga, na taunuu mai le fanau a le uso mai le aoga ae lē i sau ai la’u uō. Sa o’u fesili i lona tamā poo fea o i ai le atali’i ae tali mai o loo tigaina i le falema’i, ua ia inu ina se mea oona a’o i le aoga. Na ou faalogoina i le taimi lea le fetalai mai o le Atua, “O le mafuaaga lenā na ou fai atu ai e te nofo iinā.”

Na silafia e le Atua le puapuaga o lo’o agai mai i le fale o lenei tamā, o le ala lea na fai mai ai ou te nofo ai i lo latou fale. Na o’u iloa mulimuli ane, o le tamā lenei, ua uma ona fai i le latou mafutaga a tamā I le Full Gospel na te totogiina a latou galuega tāla’i uma o le tausaga atoa. Ona o lana taulaga, na finagalo ai le Atua e puipui ma lavea’i lona āiga mai le puapuaga. Sa ou alu o’u tatalo i le atali’i I le falema’i i lea afiafi ae o’u te le’i alu i le sauniga. Ina ua ou taunuu atu, na faailoa mai e le foma’i ua leai se faamoemoe e toe manuia le atalii, peita’i na ou tatalo pea mo ia, ma ou te toe fo’i atu i le fale ina ua uma le mafutaga, ua tu’u mai ai le atali’i ua tea mai i le falema’i ua manuia. Na fai taulaga le tamā i le Atua, ae taui faamanuia i ai le Atua ma lavea’i lona atalii mai le oti.

E faamanuia ma tauia sautualasi e le Atua i so’o se taimi tatou te foa’i ai ia te ia mai le taele o tatou loto. I la tatou Tusi faitau o le asō, o le a e malamalama ai e ati le silafaga a le Atua i mea uma tatou te faia faalilolilo mo ia ma ia tauia oe fa’aaliali. E lē galo so’o se mea e te faia mo le Atua.

Ua e faia ni mea mo le Atua e fa’atupu ai lona finagalo fia taui faamanuia ia fau ma soloi mo oe? I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 1 IUNI 2024

(tusia e Pastor EA Adeboye)

Manatu Autu: Tagi atu (Cry out)

Tauloto -Tusi Paia– Salamo 34:6  ‘Na vala‘au atu lenei tagata ‘ua tigāina, ‘ona fa‘afofoga mai ai lea o le ALI‘I, ma na fa‘aola ‘iā te ia i ona puapuagā uma lava.’”

Faitauga – Tusi Paia – 2 Tupu 6:1-7

I la tatou tusi faitau o le asō, semanū e lē iloa e Elisaia le pa’ū o le to’i i le vai pe a na le tagi atu le auauna na fa’aaogaina mo se fesoasoani. O le tele o taimi e tatau ona o tatou tagi atu i le Atua se’ia tali mai o ia iā i tatou. E i ai tagata o le a fai mai e le mana’omia le tele o ni upu pe a e tatalo. E moni e silafia e le Atua mea uma, tusa pe ete le’i tagi atu, ae a e su’esu’e i le Tusi Paia, e te iloa ai le tele o taimi e tagi atu ai tagata i le Atua. I le Salamo 120:1fai mai Tavita; “Na o’u valaau atu I le Alii i lo’u puapuaga, na ia tali mai fo’i iā te a’u.” Fai mai fo’i le fai Salamo i le mataupu 77:1; “Na ou alaga atu i le Atua i lo’u leo,” e lē o fai mai, “o lo’u loto” e pei ona fai mai le toatele e mafai ona tapuni lou fofoga ae tagi atu lou loto.

Fai mai Tavita, “Na o’u valaau i le Alii i lo’u leo; ua fa’afofoga mai fo’i o ia iā te a’u mai lona mauga paia” (Salamo 3:4). O’u te tatalo mo oe; so’o se taimi e te tagi atu ai i le Atua, e faafofoga mai o ia iā te oe, i le suafa o Iesu. Peita’i e tasi le mafuaaga e mafai ona taofia le tali mai o le Atua iā te oe, o le agasala. Fai mai le Tusi Paia i le Salamo 66:18; a o tatou manatu i se agasala i o tatou loto, e lē fa’afofoga mai le Atua iā i tatou. Peita’i, a salamō le tagata agasala ma tagi atu i le Atua mo lona alofa mutimutivale, e faafofoga mai o ia. I le Salamo 34:17, fai mai Tavita; “Ua alalaga e ua amiotonu, ona faafofoga mai ai lea o le Alii; ua ia lavea’i mai fo’i iā te i latou ai o latou puapuaga uma.” Afai ua e sauni e tagi atu i le Atua i le asō, na te lavea’iina oe mai ou puapuaga uma lava.

Ou te manatua a o o’u faiaoga i le Iunivesite o Lagos i le tausaga 1969, na sau se tagata ma fai mai iā te a’u, “E faapenei ona fai e tagata Lagos, latou te ave tupe i se perofeta ina ia anapogi ma tatalo mo i latou. E tatau fo’i ona e faia faapea.” Sa o’u mafaufau ifo ia te a’u, “Tagata lē malamalama, na o le ave e le perofeta o tou tupe ma nofonofo e leai sana mea e faia.” Faafetai i le Atua e mafai ona o tatou valaau sa’o iā te ia ona tali mai lea iā i tatou. Fai mai Isaia 59:1-2;

Fa’auta, e lei fa’apu’upu’uina le aao o le Alii, ia le mafa’aola; e lē tutuli fo’i ona taliga, ia lē ma fa’afofoga. A e peitai o a outou amio leaga ua fai ia ma pupuni i le va o outou ma lo outou Atua, o a outou agasala fo’i ua ‘alo ai ona fofoga ia te outou, ua ia lē fa’afofoga mai ai.”

E te lē tau totogia se isi e tatalo mo oe. Pau tulaga e te mana’omia, o le faatuatua i le Atua ma le ola fa’apaiaina; so’o se taimi e te tagi atu ai i le Atua, e tali mai o ia iā te oe. Ave lou faafitauli o loo e mafatia ai i le Atua i le tatalo I le asō. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 31 ME 2024

(tusia e Pastor EA Adeboye)

Manatu Autu: O le poto o le mea sili lea (Wisdom is principal)

Tauloto -Tusi Paia– Iopu 28:28  ‘Na fetalai mai fo‘i o ia i le tagata, ‘Fa‘auta, o lē mata‘u i le Ali‘i, o le poto lava lea;

o lē ‘alo ‘ese i le amio leaga, o le mafaufau lea.’”

Faitauga – Tusi Paia – Iopu 28:28

O le poto o le faaaogaina lea o le iloa I le tonu ma le sa’o e tatau ona iai. O le maua o le iloa ma le faatinoina, e eseese mea ia e lua. Mo se faataitaiga, o se tamaloa o loo ave atu lana taavale ma vaai atu i le faailoga o le auala e faapea mai, ‘auala laupapa vaiti o loo I luma atu’, o le taimi na vaai ai i le faailoga, ua maua lona iloa. Peitai o le mea e faia e le tamaloa e faaaogaina ai le iloa ua maua, e te iloa ai pe poto pe valea. Afai o se tamaloa poto, e alualu lemu loa ma faaeteete I se taavale e ono sau mai leisi itu. Ae a faapea e valea, o le a faaauau pea ona alu saosaoa lana taavale. Fai mai le Atua I le Faataoto 4:7,O le poto o le mea sili lea, o le mea sili e faatatau i le mea e pito sili ona taua. O lona uiga, o le mea e pito sili ona taua i le Atua, o le maua o le poto. Fai mai le Tusi Paia, e lua ituaiga poto. O le poto muamua e maua i le matau i le Atua.

O le mata‘u i le ALI‘I, o le amataga lea o le poto; (Salamo 111:10). E amata le poto pe afai ua faatino ma mautu le matau I le Atua I lou ola. Afai e te matau i le Atua, e te le faia se mea e inoino ai le Atua aua e te iloa o lo’o ia faatonutonuina lou amataga ma le iuga. E taua e le Tusi Paia o Ia, o le afi e maamaai (Eperu 12:29), o lona uiga o ia o le tagata mulimuli e te ono manatu e faaita. E le gata i lea, a iai le afi e maamaai i lau itu, e leai ma se mea e te fefe ai, aua fai mai le Upu a le Atua, ‘Āfai ‘ua ‘au ma i tatou le Atua, o ai sē fa‘asaga tau mai ‘iā i tatou? (Roma 8:31). O le poto e aoaoina oe e matau i le Atua, o lea, mata’u i le Atua i soo se mea e te alu iai ma taimi uma. 

O le poto lona lua o le poto o le lalolagi, le poto salalau (1 Korinito 1:20). O le poto lea e lē mai le Atua ma e taua o le valea(1 Korinito 1:18-25). E le faaaloalo le lalolagi I le Atua, ma o le poto o le lalolagi, e fua I le manatu o le tagata i mea e talafeagai ma mafai e le mafaufau ona faavasegaina. I le poto o le lalolagi, e iai ni mea e manatu e matua faigata ona maua (Mataio 19:26). Aua e te faamoemoe i le poto o le lalolagi aua o le valea lea i le Atua. Filifili e mata’u i le Atua, usitai i lana upu ona ia foai atu lea o le poto, o le mea sili lea ona taua e manuia ai i le olaga nei. A e fusifusia le poto mai le Atua, e faaeaina ma faapaleina oe I le mamalu o le Atua i mea uma e te faia. 

Tatalo, 

Le Alii e, fesoasoani mai ia te a’u e matau ia te oe I aso uma, ma usitai I lau upu, tusa pe foliga mai e valea i lo’u manatu faaletagata, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 29 ME 2024

(tusia e Pastor EA Adeboye)

Manatu Autu: O le iloa o Faamoemoega a le Atua mo lou olaga (Discovering God’s Purpose for your life)

Tauloto -Tusi Paia– 1 Peteru 2:9  ‘A o ‘outou o le tupulaga ‘ua filifilia ‘outou, o tupu ma ositaulaga, o le nu‘u pa‘ia, ma le nu‘u na fa‘atauina mai e le Atua, ‘ina ‘ia ‘outou ta‘uta‘u atu ana galuega lelei, o lē na vala‘au ‘iā te ‘outou nai le pouliuli e o‘o i lona lava malamalama o matuā ofo ai..”'

Faitauga – Tusi Paia – Efeso 2:8-10

E iai le faamoemoega a le Atua I mea uma na ia faia. I le Kenese 8:1, na ia fetalai ia Mose, ’ ‘Inā alu ia ‘iā Farao ma fai atu ‘iā te ia, ‘O lo‘o fa‘apea ‘ona fetalai mai o le ALI‘I; ‘ia e tu‘u mai lo‘u nu‘u e ō, ‘ina ‘ia latou ‘au‘auna mai ‘iā te a‘u’.

O le faamoemoega na faasaoloto ai e le Atua le fanauga a Isaraelu mai le pologa i Aikupito ina ia latou auauna ma tapuai ia te ia. E faapena foi oe, na faaolaina oe mo se faamoemoega, e pei ona taua i le faitauga o le Tusi Paia o le aso. I le Mareko 1:40-45, na sau se lepela ia Iesu ma faapea mai ”Āfai ‘ua e finagalo i ai, ‘e te mafaia ‘ona fa‘amamā ‘iā te a‘u.” Na tali atu Iesu, ‘Ou te loto i ai, ‘inā mamā ia oe’. I le pa’i e tasi, ua faamamaina le lepela ma ua ia alu atu i so’o se vaega o le nuu ma molimau atu. Na faamaloloina e le Atua o ia ina ia iai ni tautinoga. E le gata i lea, o so’o se taimi e na te faasaoloto ai se tagata mai saisaitiaga, e iai lona faamoemoega. I le Mareko 5:2-20, o le tagata ua faaletonu le mafaufau i Katara ua faasa’olotoina, sa ia naunau e mulimuli ia Iesu i so’o se mea, ae na faapea atu Iesu e leai. Ua faasaoloto mo se faamoemoega, ia avea ma molimau. E faasaoloto i tatou e le Atua ina ia viia lona suafa. 

I le Mareko 3:1-5, o le tamaloa e lima gase na ia maua le faamalologa aua fai mai le Salamo 47:1 ‘Inā patipati ia o ‘outou lima, o ‘outou nu‘u uma lava; ‘inā ‘alalaga atu ia i le Atua ma le leo fiafia. O se lima gase e le mafai ona patipati mo le Atua, ma o lea na toe faafoisia le malosi o lona lima. O le a le faamoemoega o le vavega? Fai mai le Tusi Paia I le Galuega 3:1-11, ina ua maua le vavega a le tagata pipili i le faitotoa o le malumalu, na amata ona ia savali, osooso ma vivii I le Atua. A e mauaina se vavega, e faia ina ia amata ona e vivii i le Atua. O vavega e taitaia tagata i le Atua. I le Galuega 4:4, ua tatou vaaia ai le lauga a Peteru ina ua maea ona faamalolo le tagata pipili, na taitaia ai le 5000 o tagata e faaolaina. E faia e le Atua vavega e taitaia tagata ia te ia. I le Luka 5:1-11, ina ua afio atu Iesu i le vaa o Peteru i le maea ai ona galue i le po atoa ae leai se ia na maua, ua ia maua se vavega tele ua matua fefe tele ai. Na fetalai mai le Alii, ’e amata atu nei, e te le toe faifaiva ae o le a e faifaiva i tagata. Ua maua e Peteru le tulaga siitia ua taitaiina ai o ia e auauna i le Atua aua fai mai le Tusi Paia na ia lafoai mea uma ma mulimuli ia te ia. E Tatau ona e fesili ia te oe lava, aisea na faasaoloto ai a’u e le Atua mai le pogisa ae faatumau lo’u ola maloloina? Aisea na ia faaolaina ai lou agaga? Na ia faia mea uma mo se faamoemoega. Ua e iloa ea lou faamoemoega? ’Aua le na o le faafetai i le Atua mo lou faamalologa,faaolataga, faasaolotoga,ma le tamaoaiga, ia manatua ma ia faia mea uma mo se faamoemoega. E tatau pea ona e saili ia faifaipea ina ia maua le faamoemoega mo lou olaga ma ia faataunuuina. 

Tatalo

Le Alii e, fesoasoani mai ia te au ina ia ou iloa ma malamalama I lou olaga ma aumai le alofa tunoa ia te a’u ina ia ou maua. I le suafa o Iesu, Amene. 

OPEN HEAVENS

MATALA LE LAGI MO LE ASO LUA 28 ME 2024

(tusia e Pastor EA Adeboye)

Manatu Autu: O loo iai o ia I le vaa (He is in the boat)

Tauloto -Tusi Paia– Mataio 28:20  ‘'‘ia ‘outou a‘oa‘o atu ‘iā te i latou ‘ia tausi i mea uma ‘ua ‘ou fai atu ai ‘iā te ‘outou; fa‘auta fo‘i, ‘ou te ‘iā te ‘outou i aso uma lava, e o‘o lava i le gata‘aga o le lalolagi.”'

Faitauga – Tusi Paia – Mareko 4:35-41

O le malosi o uiga moni o le tagata e fa’aalia i taimi o lu’itau ma faigata. (Faata’oto 24:10).E ono faate’ia i tatou i foliga le talitonu i le Atua, e faaalia e le fanau a le Atua pe a feagai ma fa’afitauli o le olaga nei. I taimi faapenei, e avea lava le fefe ma ala e vave fa’ama’amulu ai e le toatele le faatuatua ma le taofi i le upu moni a le Atua. O le tulaga tonu lea na tupu i le ausoo i le faitauga o le Tusi Paia o le aso. Sa faatumulia i le fefe ona o le afā telē ua lamatia ai o latou ola, e ui o loo iai Iesu i le totonu o le va’a. I lena taimi ua galo ia i latou va’aiga mata’utia sa latou molimauina na faia e Iesu, faapea ma a’oa’oga maoa’e sa latou fa’alogoina o a’oa’oina e ia. E te manatu ia te oe lava, e faape’ī ni ou foliga va’aia pe a e o’o i ni faigata pei o le ‘au so’o? Pe e te tu’ua’ia le Atua? Pe o ou uiga fa’aalia e iloa ai e te talitonu e le o faatasi o ia ma oe? ‘Aua nei galo ia te oe, o loo iai Iesu Keriso ma oe i le va’a o lou olaga. E le gata ina iai ma oe, ae na te lagona le fesoua’ina o le va’a ma e vave mai e fesoasoani ia te oe pe a e valaau atu ia te ia. Fai mai le Eperu 2:18 ’Auā na tigāina o ia ‘ina o fa‘aosoosoina, o le mea, lea ‘ua mafai ai e ia ‘ona fesoasoani i ē ‘ua fa‘aosoosoina’.

Sa ia folafolaina o le a iai faatasi ma oe e tumau, e o’o lava I le gata’aga o le lalolagi (Mataio 28:19-20) E maoa’e lea

fa’amafanafanaga! Ae e le gata i lea, sa ia faapea mai ia te oe i le tusi o Isaia 43:1-2:

1A o lenei, o lo‘o fa‘apea ‘ona fetalai mai o le ALI‘I: O lē na faia oe, Iakopo e, ma na faia oe, Isaraelu e; ‘aua le fefe,

auā ‘ua ‘ou fa‘atauina oe, ‘ua ‘ou vala‘auina oe i lou lava igoa; e faia oe mo‘u. 2A ē sopo‘ia atu le vai, ‘ou te ‘iā te oe; a ē sopo‘ia atu vaitafe, e lē lofia ai oe. A ē savali i totonu o le afi, e lē mū ai oe; e lē susunuina fo‘i oe i le mumū o le afi.. 

E tatau ona maitau mai le tulaga lenei, ua na o i latou ua faaolaina e le Alii e mafai ona latou tutu i lenei folafolaga. Po ua liua oe i le galuega fa’aola a Iesu Keriso i luga o le satauro i Kalavaria? Ua ua e mautinoa ua e maua le fa’aolataga i lou loto? Afai e moni lou fa’aolaina, ou te faamalo atu ia te oe. Peitai, e naunau le Atua e te fa’aalia atu lou fa’atuatua ia te ia i lou fa’amoemoe pea ia te ia ao iai i le lotolotoi o puapuagā. E le mafai ona e fa’afiafia i le Atua pe a fai e te le fa’atuatua ia te ia (Eperu 11:6). O lea ou te fa’amalosi’au ia te oe i upu a Mareko 11:22 o loo faapea mai: “Ia outou fa’atuatua i le Atua”

Tatalo 

Tama e, fesoasoani mai i lo’u fa’atuatua ia ou tulai ma tumau i le ogatotonu o le puapuaga, i le suafa o Iesu, Amene.

OPEN HEAVENS

MATALA LE LAGI MO LE ASO GAFUA 27 ME 2024

(tusia e Pastor EA Adeboye)

Manatu Autu: Tatalo mo tamaiti (prayers for children)

Tauloto -Tusi Paia– Isaia 54:13  ‘E a‘oa‘oina lau fānau uma lava e le ALI‘I; e tele fo‘i le manuia o lau fānau. '

Faitauga – Tusi Paia – Isaia 44:2-6

1.       Tama, faafetai mo le meaalofa o tamaiti. Faafetai Le Alii mo tamaiti I lou siomaga, faafetai mo latou ola, soifua maloloina lelei ma le mafaufau ua lelei atoatoa. 

2.       Tama, ou te ole atu ia maua e tamaiti uma ou te fesootai iai ni tautinoga ola. Ia e saunia avanoa ma mafuaaga talafeagai e latou te fiafia ma faafetai ai I Le Atua. 

3.       Tama, faamolemole ia saunia se puipui afi e siomia ai tamaiti uma I lo’u aiga, ekalesia ma lo’u nuu. Ia aua nei mafai ona pa’i iai Le tiapolo ma ana au, I Le suafa o Iesu. 

4.       Tama, faamolemole ia siomia tamaiti uma o lo’u aiga I tagata lelei ma talafeagai. Aua nei faatagaina ni tagata e taitai seseina i latou I Le suafa o Iesu. 

5.       Tama, ia liligi ifo lou Agaga Paia I tamaiti uma i lou olaga. Ia siitia o latou tulaga e ala I lou agaglelei ma Le alofa tunoa, I Le suafa o Iesu. 

6.       Tama, faamolemole ia e saunia mea uma e manaomia e matua e faafaileleina, aoaoina ma tausia fanau. Mo fanau ua leai ni matua, le Alii e, o oe o le Tama o tamaiti matuaoti. Faamolemole ia avatu se fesoasoani mo I latou. 

7.       Tama, ao matou faamanatuina le aso o tamaiti I Le lalolagi atoa, faamolemole ia e manatua I latou o loo faalagolago atu ia te oe mo ni a latou fanau, ia e talia mai a latou talosaga, I le suafa o Iesu. 

8.       Tama, ia e foai I lau fanau, tamaiti I lou aiga, ekalesia, nuu ma lou atunuu agaga ma loto e naunau ia te oe. Ia latou tuputupu ae e faia mea lelei mo oe, ma faia lou finagalo i taimi uma, I Le suafa o Iesu. 

9.       Tama, faamolemole ia e foai atu I taimi uma e fesootai ia te au le manuia I le itu tau aoaoga. Foai le poto, Ie iloa ma le malamalama e siitia ma manuia I le suafa o Iesu. 

10.   Tama, faamolemole ia tumau Lau taitaiga mana I nei tamaiti I lou aiga, ekalesia ma le nuu. Taitai I latou I soo se vaega o latou olaga Ina ia aua nei o latou faia ni faaiuga sese e ono aafia ai o latou olaga, I le suafa o Iesu. 

11.   Tama, faamolemole ia talepeina soo se fetuu tuufaasolo I lo’u aiga o loo aafia ai Lau fanau ma tamaiti o lou aiga. Ia talepe ma faaumatia nei fetuu I Le suafa o Iesu. Faamolemole tulai ma tetee atu I fuafuaga Leaga uma a le tiapolo mo tamaiti nei, I le suafa o Iesu. Faafetai mo le faasaolotoga I le suafa o Iesu. 

12.   Ia e faamanuia i fanau uma a si o matou atunuu, ia iai le matau iai latou ia te oe,

 OPEN HEAVENS

MATALA LE LAGI MO LE ASO SA 26 ME 2024

(tusia e Pastor EA Adeboye)

Manatu Autu: O ia na te tauia (He is the rewarder)

 Tauloto -Tusi Paia– Eperu 11:6  ‘' A leai fo‘i se fa‘atuatua e lē mafai ‘ona fiafia mai o ia; auā e tatau i lē alu atu i le Atua ‘ona talitonu o lo‘o soifua o ia, o ia fo‘i na te tauia mai o ē matuā sā‘ili ‘iā te ia.. '

O le fetaia’iga a Peteru ma Iesu i le vai o Kenesareta ua faailoa mai ai e moni o lo tatou Alii o ia lava o lē taui atu ma le alofa (Luka 5:1-7). Na malie Peteru e fa’aaogā e le Alii lona vaa e fai ma pulela’a e lauga ai, ma na ia maua le taui o se ‘au ‘ia tele na toetoe a goto ai lona vaa i le tele nauā, ma ia mana’omia ai nisi e fesoasoani ma faatofusia i lona manuia.

E tele vaega o le tautua e tulimata’i e le fa’amanuia a le Atua. O le tasi o ia auaunaga o le avea ma mea faigaluega a le Atua e faalautele mataupu o le lagi; e faapea le tulaga na tupu ia Peteru.

O le isi galuega e maua ai taui fa’ale lagi o le usitai i fa’atonuga a le Alii. Fa’apei ona va’aia I le tala iā Aperaamo, o lē na usita’i i le fa’atonuga a le Atua e alu ese ma le aiga o lona tamā ae alu i le nuu o le a faasino atu e le Atua ia te ia (Kenese 12:1-4). Na usita’i e ui na te le’i iloa poo fea e alu i ai. E le’i gata i i, ina ua faamanuiaina ia i lona atali’i o Isaako, le tama o le folafolaga, na fai i ai le Atua e ofo atu Isaako e osi ai le taulaga mu, na toe usita’i fo’i. Ona o lona usita’i, na faamanuia e le Atua i se feagaiga o manuia ma le uluola e faavavau (Kenese 22:15-17).

O le isi tautua e silasila toto’a i ai le Atua e faamanuia, o le talimalō. O se fa’ata’ita’iga o le tala i le fafine Sunema na agalelei i le Perofeta o Elisaia, na taui faamanuia e le Atua ma foai i ai se atali’i, o se meaalofa e lē mafai e tupe o na faatau (2 Tupu 4:8-17). O le tala i le fafine Sarefata ua oti lana tane le isi fa’ata’ita’iga o le faamanuia e tu’u e le Atua i le talimalō (1 Tupu 17:9-16). Na ia foai mo le tagata o le Atua lu’utaga na totoe i lona fale, ma faamanuia ai le Atua foa’i meaai na ola ai lona aiga i le taimi atoa o le oge. Fai mai le Tusi Paia i le Eperu 13:2:2‘Aua le galo le alofa i tagata ‘ese; auā o lea ‘ua talia ai e isi o agelu ma le lē iloa.

E tauia fo’i e le Atua tagata latou te tausi lona mamalu i totonu o o latou aiga. O loo tusia i le 2 Samuelu 6:11-14, na faamanuia tele e le Atua Opetetoma ma lona aiga uma mo le teuina o le atolaau a le Atua i lona fale, ma avea ma mafuaaga na lē fiafia ai i ai le tupu. O se lesona tele lenei mo i latou o mumusu e tu’u o latou fale e fai ai mafutaga a le auuso. E le o iloa e uso nei manuia ma le taui o loo latou misia i le lē manana’o e fa’aaogā e le Atua o latou fale.

Le au pele e, e pei ona taua i le upu tauloto o le asō, o lo tatou Atua e tauia mai o e matuā saili, auauna, usita’i ma fa’aaloalo iā te ia. Fa’aaogā nei loa lenei avanoa mo lou manuia. E lē galo I le Atua so’osemea e te faia mo ia, na te faamanuia ma to mai le taui lelei mo oe I le suafa o Iesu. Amene.