Samoan Devotional

OPEN HEAVENS

MATALA LE LAGI MO LE ASO TOONAI 15 IUNI 2024

(tusia e Pastor EA Adeboye)

Manatu Autu: O Le Fa’au’uga e fai vaega (The Anointing Is In Degrees).

Tauloto -Tusi Paia– Salamo 89:20  ‘‘Ua ‘ou maua Tavita la‘u ‘au‘auna; ‘ua ‘ou fa‘au‘uina o ia i la‘u u‘u pa‘ia”.

Faitauga – Tusi Paia – Mataio 17:14-21

E pei ona eseese malosiaga fa’a’eletise, e eseese fo’i vaega o le fa’au’uga. E i ai uaea o le eletise a e pa’i i ai e na o sina manu’a mitimiti. Peita’i a e pa’i pe latalata i uaea malolosi e mata’utia ma ogaoga lou sipakā. E tatau ona e sauni e totogi le tau pe a e mana’o e te galue i le vaega maualuga o le fa’au’uga.

I le tele o tausaga ua mavae, sa matou iai i se sauniga fa’aolaola ma sa fai ai se galuega fa’asa’olotoga o se uso mo se taimi umi. Ina ua matou fiu e lē alu ese le temoni, na matou valaau i lo’u tamā i le Alii, Pa Josiah Akindayomi, a o i lona potu tatalo. Na sau tamā, tuli le temoni i le suafa o Iesu ma alu ese ai le temoni. Sa fa’ate’ia a’u sa ou manatu ou te fa’au’uina peita’i o lea ua o’u vaai i le isi laasaga i luma atu o le fa’au’uga. Sa fa’aosofia a’u ia siitia le fa’au’uga i lo’u olaga. I ni tausaga na soso’o atu ai, sa faia se matou sauniga fa’aolaola ma a o faia le aoga Tusi Paia, sa o’u ta’amilo e fa’amautinoa o loo sologa lelei mea uma. Sa o’u vaaia ni uso o taumafai e tuli se temoni mai se taulealea. Na o latou iloa mai a’u ma faapea mai, “O lea e iinei uso matua, tatou fai atu i ai e fesoasoani mai.” Sa o’u tali atu i ai o le a o’u tatalo faatasi ma latou pe a malilie mai ou te tatalo muamua. Ina ua malilie mai sa moeiini loa o’u mata ma o’u tatalo, faatonu le temoni e alu ese i le suafa o Iesu. Ina ua uma le tatalo na alu ese ai lava i le taimi lea le temoni ma na fa’ate’ia uma i latou. I ni vaiaso mulimuliane, sa o’u pasia le taulaga sa fai ai la matou sauniga fa’aolaola ma ou manatu ai e āsia se tasi o a’u uō. Ou te alu atu i le fale o la’u uō, ae ma fetaui ai ma le tama sa ulutinoina e temoni. A o le’i faia le fa’amalolōga sa lē mafai na latalata lenei alii i se afi auā e tulei e temoni i le afi. Peita’i lea aso, ina ia faamaonia mai ia te a’u ua saoloto na ia kukaina se meaai mo a’u.

Poo le a lava le maualuga o le fa’au’uga o loo e galue ai, e I ai pea lava le laasaga e sili atu e tatau ona e maua. E lelei le mafai ona e tatalo e faatū lē ua oti, peita’i e sili atu ona lelei pe afai e mafai ona talotalo ou lima i se solosolo ona fa’aaogā lea o le solosolo e toe fa’atula’i ai le ua oti. Ina ia maua laasaga tetele o le fa’au’uga, fai e pei ona fetalai Iesu i la tatou Tusi Paia faitau o le asō; anapogi ma tatalo e lē aunoa. O le tele o lou anapogi ma tatalo o le maualuga lea o lou tulaga i le fa’aleagaga ma o le tele fo’i lea o le fa’au’uga o le a e maua. I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 14 IUNI 2024

(tusia e Pastor EA Adeboye)

Manatu Autu: Eleele Sā (Holy grounds)

Tauloto -Tusi Paia– Iosua 5:15  ‘Ona fetalai mai ai lea o lē ‘ave ‘au a le ALI‘I ‘iā Iosua, “‘Ia e tō ‘ese lou se‘evae i lou vae; auā ‘ua sa lava le mea ‘e te tu ai na.” ‘Ona fa‘apea lea e Iosua ‘ona fai.

Faitauga – Tusi Paia – Esoto 3:1-5

O so’o se eleele e iai le mamalu ma le mana o le Atua, e taua o eleele sa, ma o ia eleele e na te tauaveina le mana. O le tu i luga o nei eleele, e maua ai e tagata vavega. E sili atu i lena, e te maua ma tauave le mana mai nei eleele sa pe a e pai iai. Fai mai le Esoto 4:2-4 ‘Ona fetalai mai lea o le ALI‘I ‘iā te ia, “Pe se a lenā mea i lou lima?”‘Ua fai atu ia, “O le to‘oto‘o.” 3‘Ua ia fetalai mai, “‘Inā lafo ia i le ‘ele‘ele;” ‘ona lafo lea e ia i le ‘ele‘ele, ‘ua liu gata; ‘ona sola ‘ese ai lea o Mose. '‘Ona fetalai mai lea o le ALI‘I ‘iā Mose, “‘Inā ‘a‘apa atu ia o lou lima ma tago i lona i‘u.” ‘Ona ‘a‘apa atu ai lea o lona lima, ‘ua pu‘e atu ai, ‘ona liu to‘oto‘o lea i lona lima. '

Na fetalai le Atua ia Mose e lafo lona tootoo I le eleele sā sa ia tu ai luga, ona liu gata lea o le to’oto’o. A’o aapa atu Mose e uu le iu o le gata, na pai ona lima i le eleele sā, na amata mai i lea aso ona faau’uina. A pai le aao o le Atua I so’o se eleele, ona pa’i lea iai o ou lima, e le toe tumau ou lima I lona tulaga masani.

I le 2 Tupu 2:9-15 ina ua auina mai e le Atua nofoa afi faataavalevale ma solofanua afi, na latou pai i le eleele ma siitia Elia. Na pau ifo le ofu o Elia, ina ua punou Elisaia e ave le ofu, na pai ona lima I le eleele lea na pai iai le au mai le lagi, ma ua ia maua le faauuga. A e suesue i le galuega a Elisaia, ete iloa ai e faatasi lava ona faaaoga e Elisaia le ofu o Elia, e alu atu ai i le isi itu o le Ioritana. E na te lei faaaogaina le ofu o Elia ina ua ia faamaloloina le vai oona i le 2 Tupu 2:20-22, e na te lei faaaogaina foi e sueina le uluto’i na pau i le vai i le 2 Tupu 6:1-7. O le mana sa ia mauaina i ona lima ina ua pa’i i le eleele lea na pa’i iai le au mai le lagi, le nofoa afi faatavalevale a le Atua. I le Galuega 26:13, ina ua susulu atu le malamalama o le Atua i le auala i Tamaseko, fai mai le Tusi Paia e sili atu lona malamalama i lo le la i le aoauli. O le susulu lena o le Malamalama ma le Fetu o le Taeao. Ina ua afio mai o ia i le lalolagi ma pai i le eleele, e lei faapea e na o le pai o Paulo mai Tasesa i le eleele, na ia pau ai i luga. O le mafuaaga lena o so’o se solosolo na pai i lima o Paulo ma ofu na ia ofuina, na tutupu ai vavega. 

Aua e te ula i eleele sa. Afai o lo’o e tu i luga o se eleele e te iloa e masani ona feafioa’i ai le Atua, ia e faaaogaina tatau ma tago e ave mea uma e te maua mai le Atua ae e te lei alu ese, i le suafa o Iesu, Amene.  

OPEN HEAVENS

MATALA LE LAGI MO LE ASO TOFI 13 IUNI 2024

(tusia e Pastor EA Adeboye)

Manatu Autu: O le pelu o le Agaga (The Sword of the Spirit)

Tauloto -Tusi Paia– Eperu 4:12  'Auā o lo‘o ola le afioga a le Atua, o lo‘o matuā galue fo‘i, o lo‘o sili fo‘i lona ma‘ai i pelu uma e fa‘atau ma‘ai itū, o lo‘o vaevae fo‘i e o‘o lava i le vavae‘eseina o le loto ma le agaga, o gaugātino fo‘i ma ‘a‘ano o ivi, o lo‘o fa‘amasino fo‘i i manatu ma filifiliga o le loto'.

Faitauga – Tusi Paia – Mataio 4:1-11

O le asō, o le a faaiʻuina aʻu aʻoaʻoga I le ofutau a le Atua i le vaai totoa lea i le vaega mulimuli o le ofutau. O le pelu o le agaga, e na o le pau lea o le auupega e faaaoga I osofaiga e pei ona tusia I le Efeso 6:10-17. E manino lava, o se auupega e taua tele, ma e tatau ona maua e fitafita uma a Keriso. O le pelu o le agaga, o Afioga lea a le Atua. I le itu faaleagaga, e lē tauina taua i auupega faaletino ae e faaaoga upu. O le auupega sili ona malosi i auupega uma e faaaoga i taua faaleagaga,  o le Upu a le Atua. O afioga a le Atua o se pelu malosi i fofoga o tagata faatuatua i le Alii. A e faaaogaina, e te faatoilaloina soʻo se malosiaga i le itu faaleagaga. O loo faamatalaina i le Eperu 4:12, o lenei pelu o lo‘o matuā galue fo‘i, o lo‘o sili fo‘i lona ma‘ai i pelu uma e fa‘atau ma‘ai itū. 

O lenei auupega,  e avanoa mo oe i taimi uma, e faaaogaina i taua faaleagaga. A e iloa le faʻaaogaina o lenei auupega, e leai se malosi e mafai ona manumalo ia te oe. O le mea lea e tatau ai ona e silafia Afioga a le Atua ma e taulotoina. O so’o se kerisiano lava e lē suʻesuʻeina le Tusi Paia, e leai sona malosiaga i taua faaleagaga. A taumafai le tiapolo e lepeti lou soifua maloloina, e te tau atu e faaaoga le 1 Peteru 2: 24 ma tautau atu, ua e malolo i faalavalava o Iesu. A ia taumafai e osofai au tupe, taʻu iai e fa‘a‘atoa e lou Atua mea uma e matitiva ai e tusa ma le faula‘i o lona vi‘iga, ‘iā Keriso Iesu (Filipi 4:19). A ia taumafai e osofai i lau fanau, taʻu iai o lau fanau o le tofi mai le Alii ma faatonu e aveese ona lima mai fanau a le Atua (Salamo 127:3). 

O afioga a le Atua e silisili atu i lo seisi lava upu, ma a e faaaogaina i so’o sau mataupu, e leai se mea a le tiapolo e mafai ona fai ua na o le talia. A e faaaogaina au lava upu e tau ai ma le tiapolo i taua faaleagaga, e le anoano iai le tiapolo. Peitaʻi, e lē mafai ona ia tuulafoaʻi i afioga a le Atua. Fai mai le Salamo 138:2 e faasilisili e le Atua ana afioga i lō Lona suafa. Ia e iloa le afioga a le Atua ma tauloto, aua a e feagai ma tulaga faigata, o le a e maua auupega e faaaoga e faatoilalo ai le tiapolo.

Aua e te mafatia i lima o le tiapolo, o lena ua ia te oe le pelu o le Agaga - o se auupega e mautinoa e faatoilaloina ai le tiapolo i taimi uma. E tele le mana o loo i le Tusi Paia e sili atu i ou manatunatuga uma. Suesue ma faaaoga e faatoilalo ai le tiapolo, i le suafa o Iesu, Amene.

OPEN HEAVENS

MATALA LE LAGI MO LE ASO LULU 12 IUNI 2024

(tusia e Pastor EA Adeboye)

Manatu Autu: Puloutau o le faaolataga (Helmet of salvation)

Tauloto -Tusi Paia– Efeso 6:17  ‘'Ma ‘ia ‘outou ‘ave le puloutau o le fa‘aolataga, ma le pelu a le Agaga, o le afioga lea a le Atua. '

Faitauga – Tusi Paia – 1 Tesalonia 5:1-10

O le a faaauau pea la’u aoaoga i le ofutau atoatoa a le Atua. O le puloutau o le vaega o le ofutau e puipuia le ulu. O lou ao po’o le ulu, o le vaega o lou tino e faailoa ai lou tagata, e pei ona faaaogaina I ata o pepa faamaonia. O le faia o le puloutau e faailoa ai o oe o le afafine po’o se atalii o le Atua ma ta’u atu ai I le tiapolo, ia mamao ona lima ma oe. 

O le faanoanoaga ona o le tele o kerisiano faatuatua, e latou te aveese le puloutau pe o atu I nisi o faapotopotoga ona latou te lē mananao e iloa e tagata ua faaolaina. E taumafai e amio faatasi ma le lalolagi ae le manao e faaesea mai. Fai mai le Roma 12:2'‘Aua fo‘i tou te amio fa‘atasi ma lenei lalolagi, ‘ae peita‘i ‘ia liliuina i le toe fuata‘iina o ‘outou loto ‘ina ‘ia ‘outou su‘esu‘e pe se a le finagalo o le Atua, o mea ‘ua lelei, ma le mālie, ma le ‘ato‘atoa. '

A o’o ina musu se kerisiano e faailoa o ia o le atalii po’o se afafine o le Atua, ua ia aveesea le puipuiga o lona ulu, ma o se vaega taua tele o le tino, a o’o ina osofaia ma ta e seisi le ulu, e oti faafusei. E toatele tagata ua latou faama’amulu I le faaolataga ona o le taumafai e amio faatasi ma le lalolagi. Ia faamausali lou faaolataga I lou ta’uta’u lea o oe o le afafine po’o le atalii o le Atua I so’o se mea e te alu iai. 

O le toto o Iesu na faamaligi i le satauro, o le mafuaaga lea ua tatou maua ai le meaalofa fua o le faaolataga. O I latou ua faaolaina o tagata o le malamalama ae lē o le pogisa, e pei ona faaalia I le faitauga o le Tusi Paia o le aso. O lea, e tatau ona e amio e pei o tagata o le malamalama i taimi uma. Fai mai le Mataio 7:16, e te iloa i latou ua faaolaina i o latou fua. Afai e amata ona e faailoa atu fua e lē mai le Atua, ua aveesea lou pulotau o le faaolataga, ma o se tulaga matuia lena pe a o’o mai aso mulimuli, pe a afio mai Iesu e siitia lana fanau, e na te ave na o I latou o lo’o faia pea o latou puloutau o le faaolataga. O le mafuaaga lea e tatau ai ona ‘outou galueaina pea lo ‘outou fa‘aolataga i le mata‘u ma le gatete (Filipi 2:12). Aua lava e te manatu o lo’o faia pea lou puloutau o le faaolataga ona o lena e te toaga I le lotu pe ona o oe o se faifeau. Suesue lelei po’o mausali lou faaolataga I taimi uma ma ia faamautinoaina o lo’o e tulai pea. Fai mai le 1 Korinito 10:12 o lē  o manatu o lo’o tu o ia, ina faaeteete ia, ina nei pau’. O lou puloutau o le faaolataga e faailoa ai o oe o le afafine poo le atalii o le Atua. Ia mautinoa o lo’o faia I taimi uma, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 11 IUNI 2024

(tusia e Pastor EA Adeboye)

Manatu Autu: Talipupuni o le faatuatua (Shield of faith)

Tauloto -Tusi Paia– Efeso 6:16  ‘Ia fa‘aopoopo i na mea uma ‘ona tago atu i le talipupuni o le fa‘atuatua, tou te mafai ai ‘ona tinei o ū fanafana mū uma lava a lē o lo‘o leaga'

Faitauga – Tusi Paia – Mataio 21:18-22

I nai aso ua tuanai atu, sa ou a’oa’o atu i ofutau atoatoa a le Atua. O le talipupuni o le faatuatua e mautinoa ai o le a lē mafai e u fanafana mū ona pa’i ia te oe. O lo’o atagia ai, e iai taimi e taumafai ai le ti’apolo na te osofaia lou soifua maloloina, o au tupe, o lau fa’aipoipoga ma isi vaega. E tatau ona e fa’aaogaina le talipupuni o le faatuatua e tineia ma tafiesea nei osofa’iga. O se Kerisiano e leai se fa’atuatua, e tele le lamatia I osofa’iga a le ti’apolo. E le gata i lea, o se Kerisiano e leai se faatuatua, e lē tatau ona manatu e na te maua se mea mai le Atua e pei ona tatou iloa i le Iakopo 1: 6-7.

O le a iai mea e tutupu e taumafai e luluina lou fa’atuatua, o u fanafana mū na a le fili. E foliga e taufa’afefe mai ma peiseai e mafai ona faatoilalo ia te oe, peitai, a e u’u mau i le fa’atuatua ia Keriso, e te tineia ma tafiesea. O nisi taimi e tutu mai pei o ni mauga ua punitia lou ala. E tatau ona e faatonuina nei mauga e soloi esea i le faatuatua, ma e soloi esea lava.

O se tulaga mata’ina i le talipupuni o le faatuatua, e mafai ona telē pe laititi. I le Mataio 8:26, o lo’o talanoa mai le Tusi Pa’ia i le fa’atuatua itiiti ma le faatuatua telē e pei ona iai i le Mataio 8:10. O le telē o lou fa’atuatua e fuaina ai le telē o u fanafana mū e mafai ona e tineia. O le mafua’aga lea e fai mai ai le Faata’oto 24:10: “Afai e te fa’avaivai i le aso vale, ua itiiti lava lou malosi.”

Ina ia faaitiitia le avanoa e te vaivai ai I taimi o puapuaga, e tatau ona faamalosia lou faatuatua ae lei oo mai puapuaga. Fai mai le Iuta 1:20 ia outou  atiae ia te outou I lo outou faatuatua e silisili ona pa’ia ma tatalo atu I le Agaga Paia. Ia mautinoa e te tatalo I le Agaga Pa’ia I aso uma. Ma le isi itu, tatalo I le Agaga Pa’ia I minute ta’itasi, aua foi, e pau lena o le auala e mafai ai ona e tatalo e le aunoa e pei ona faatonuina mai i le 1 Tesalonia 5:17.

E tupu foi le fa’atuatua i le fa’alogo i le upu o le Atua e pei ona ta’ua i le  Roma 10:17. Afai e te naunau e faatupula’ia  lou faatuatua, e tatau ona mautinoa e te su’esu’e i le Tusi Pa’ia i aso uma. E le gata i lea, ia e faalogologo i lauga mai auauna moni a le Atua i le tele o taimi, o se isi foi fesoasoani lena e fa’atupula’ia ai lou fa’atuatua.

Ma le ala mulimuli e faatupu ai pea lou faatuatua, o le ui lea i tofotofoga, e pei ona ta’ua i le Tusi Pa’ia I le 1 Peteru 1:7. E ui ina tele kerisiano e le fiafia e feagai ma lu’itau, ae fai mai le Tusi Pa’ia, ia ‘outou manatu, o le mea e fiafia tele ai pe a maua ‘outou i tofotofoga ‘ese‘ese auā e fesoasoani ia lelei atoatoa lou tagata ia Keriso. (Iakopo 1:2-4). Ia faatupuina lou faatuatua ina ia mafai ona e tafiesea ma tineia u fanafana aasa a le fili, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 10 IUNI 2024

(tusia e Pastor EA Adeboye)

Manatu Autu: Seevae o le talalelei (Shoes of the gospel)

Tauloto -Tusi Paia– Efeso 6:15  ‘‘ma ‘ia fa‘ase‘evaeina o ‘outou vae i le sauniga o le tala lelei o le filemū.”

Faitauga – Tusi Paia – Isaia 52:6-7

I le faaauau pea o le tatou aoaoga i le ofutau atoatoa o le Atua, o le a ou talanoa atu I le vaega lona tolu o le ofutau o loo faamauina I le Efeso 6:10-17. O lenei vaega o le ofutau e taua, o ‘seevae I le sauniga o le talalelei o le filemu’. O le tulaga muamua e maitau mai, o le vaega lenei o le ofutau e fealualuai mai lea nofoaga I lea nofoaga ma tauave le talalelei. O lou puipuiga o lo’o I le talaiga o le talalelei. O le toatele o tagata lē talitonu ia Keriso e te aumaia I le faaolataga ia Iesu Keriso, o le faaitiitia foi lena o osofaiga a le fili e te ono aafia ai. Fai mai le Failauga 4:12, o le maea fo‘i e sautuatolu e lē vave motusia. Afai e na o oe le kerisiano I lou tuaoi po’o lou aiga, e tele avanoa e ono osofaia ai oe aua o loo siomio oe e tagata o le autau a le isi itu. Peitai afai e te manumaloina agaga o lou aiga ma ou tuaoi ia Keriso, e mautu lou puipuiga. A o’o ina sau osofaiga a le fili,o le a iai le autau e tutu ma oe e o mai faatasi e tatalo ma tuli ese le tiapolo. A e o’o I le tulaga ua vaivai I le faaleagaga, o le a iai le au uso e faamalosia ou lima ua gagase ma faamalosi ou tulivae ua vaivai (Isaia 35:3-4). 

O le vaega o le filemu o lo’o I nei seevae e avatu ai le filemu ia te oe a’o e fealuai e talai le talalelei. O le a sau le tiapolo ia te oe ma so’o se mailei e faafefe ia te oe ina ia aua lava nei e talai atu le talalelei, peitai afai e te maua le filemu, e le mafai ona malo mailei a le fili ia te oe. Ua faapei le tiapolo o se leona tagi (1 Peteru 5:8) e faafefe I tagata ae le mafai ona ia aia se tagata. O le filemu e manaomia a’o e alu atu e talai le talalelei aua o le a e fetaiai ma sauaga. A’o e talai atu le talalelei, o le a e avatu le filemu i vaega o lo’o matua vevesi. O le mafuaaga lea i le Luka 10:5, a’o auina atu e Iesu ona au soo e talai le talalelei, na ia faatonuina i latou o le upu muamua lava latou te fai atu,  ’ia iai le filemu i lenei fale’. O lo’o e faasoa atu le filemu, ae lē o le vevesi, ma o so’o se tagata e talia le talalelei, o le mea muamua latou te maua o le filemu i o latou loto. 

Le au pele e, o iai ea ou seevae o le filemu? E te manumaloina ea ni agaga? E te manatu i le filemu e maua e lou atunuu pe afai o se tasi o agaga e te manumaloina mo Keriso o le a avea ma peresitene poo le palemia o le atunuu a taeao. Afai e te talaia le talalelei, o lo’o e faia mo lou lava puipuiga mautu. Tago i ou seevae o le talalelei o le filemu, ona e talai atu lea o le talalelei i se tagata se toatasi i le asō, i le suafa o Iesu, Amene. 

OPEN HEAVENS

MATALA LE LAGI MO LE ASO SA 9 IUNI 2024

(tusia e Pastor EA Adeboye)

Manatu Autu: O le Ufi Fatafata O Le Amiotonu (The Breastplate Of Righteousness)

Tauloto -Tusi Paia– Faataoto 21:21  ‘‘O lē ‘ua tausisi i le amiotonu ma le alofa, e maua e ia le ola, ma le amiotonu, ma le vi‘iga”.

Faitauga – Tusi Paia – Kenese 39:6-12, Kenese 41:37-44

O ananafi na ou amata talanoaga ai i le Ofu tau atoatoa a le Atua. O le asō, o le a ou faamatala ai le ufifatafata o le amiotonu, o le vaega o le ofu tau e puipuia lou loto. O le amiotonu o le fai lea o le mea sa’o e tusa ma ala o le Atua i taimi uma. A e amiotonu, e leoleoina lou loto mai togafiti a le tiapolo. O le taimi e te lē amiotonu ai, ua e aveesea ai lea puipuiga, ae tu’u saunoa lou loto i amioga agasala uma o le lalolagi ma o le amataga lea o le olaga fulitua. O le tiapolo e lamalama lava i lou loto; o le ala lea o le fai mai o le Faataoto 4:23;Ia sili ona leoleoina o lou loto i le leoleoina o mea uma; auā e tupu mai ai le amio.

E mana’o le tiapolo e liliu ese lou loto mai le Atua, o le ala lea e faaosooso atu ai pea le agasala ia te oe i aso uma. Peita’i a mautū ma malu lou ufifatafata, e te lē faiaina. O le a fa’aaogā e le tiapolo ni faiga e lē foliga matuiā i lau vaai. E masani ona o’u fai atu, afai e lē leaga tele, o lenā ua leaga, fa’amamao ese mai ai. Afai e te faia aga e lē foliga leaga tele, ua e tatala lou loto e fai ai le agasala. E te toe malamalama ifo ua amata ona e faia tu ma aga na e fai mai e le taitai e toe faia; o le amataga lea ma le faasologa o le fulitua o le ‘au uso.

Ua uma ona fa’ata’atia atu e le tiapolo ni mea e lē foliga leaga tele ia te oe, ma ua uma ona fau sou lafitaga e faatino ai? Taofi nei loa; o le mana’o o le tiapolo o le aveese o lou ufifatafata o le amiotonu ia avanoa ai lou loto mo ana osofaiga. Afai e leiloa le ufifatafata o se kerisiano ma osofai e le tiapolo lona loto, e fano ai lava i le taimi lea. Pau le ala e mausalī ai lou ufifatafata o le amiotonu o le faaumatia o ituaiga amioleaga uma mai lou olaga.

O ou manatu e tatau ona taula’i i mea fa’aleagaga (Filipi 4:8). A e manatunatu i mea a le tino e sili atu i mea o le lagi, ua e i se tulaga lamatia. Peita’i a tumau lou mafaufau i mea fa’aleagaga, e faigata ona e toilalo pe a faaosoosoina oe e fai le amioleaga. O le ala lea o le fai mai o le tusi o Roma 8:6; Aua o le loto i la le tino o le oti lea, a o lē loto i la le Agaga o le ola lea ma le manuia.

Le au pele e, aua ne’i avea mea faatauvaa o lenei lalolagi e tatā’ia oe i le oti fa’aleagaga. So’o se mea e foliga leaga ‘alo mamao ese ai auā na o le oti lona i’uga. Ia sili ona leoleoina lou loto. I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 8 IUNI 2024

(tusia e Pastor EA Adeboye)

Manatu Autu: O le fusi o le Upu Moni (The Belt of Truth)

Tauloto -Tusi Paia– Efeso 6:14  ‘‘O lenei, ‘inā tūtūmau ia ‘outou o fusia o ‘outou sulugātiti i le fa‘amaoni, ‘ia ‘o‘ofu fo‘i ‘outou i le ufifatafata o le amiotonu'

Faitauga – Tusi Paia – Efeso 6:10-17

I nai aso o soso’o atu nei, ou te mana’o e faamatala le tāua o le ofu tau atoatoa a le Atua o loo tusia i le Efeso 6:10-17. O le vaega muamua o le ofu tau o loo tusia, o le fusi o le Upu moni auā e aupito sili ona tāua. Fai mai le Tusi a Ioane 17:17; o Afioga Paia a le Atua o le upu moni lea. O Iesu Keriso le upu moni (Ioane 14:6). Ia e fusi le upu moni i lou sulugatiti, ia fusi faatasi ai ma isi uma o lou laei ma mea uma ua ia te oe.

O i latou e soifua I le Upu moni e manumalō ì faafitauli o le olaga auā o le Upu moni e tu’u sa’olotoina i latou mai soosemea mai lenei lalolagi (Ioane 8:32).

O le Upu moni e te maua ai manatu e sili mamao na i lo o le lalolagi (Salamo 119:100). O le mafuaaga lenei e tatau ai ona e ola e tusa ma le Upu a le Atua. A e faia faapea, e iloa uma e tagata e te poto auā e tulaga ese mea uma e te faia, ma e sili atu i au uo e lē iloa le Upu moni.

O le tiapolo o le tamā o le pepelo (Ioane 8:44); o le a taumafai e pepelo iā te oe ma mimilo le Upu moni i lea taimi ma lea taimi. O le ala lea e tatau ai ona e iloa le Upu moni e te lē tosina ai i ana togafiti. I le Kenese 3:5, na fai le tiapolo ia Eva e le’i foliga faatasi ia ma le Atua e ui fai mai Kenese 1:27 na faia o ia i le faatusa o le Atua ia foliga ia te ia. Na ai e Eva le fua na fa’asāina auā na te le’i iloa lelei le Upu moni. I le Mataio 4:3, na fai le tiapolo iā Iesu e liliu ma’a e avea ma falaoa pe afai e moni o ia o le Alo o le Atua. E le’i fa’asesēina Iesu auā sa ia mautinoa o ia o le Alo o le Atua. A e lē mautinoa le Upu moni, e fa’asesē oe e le tiapolo, ma e sao loa iina le tiapolo, leiloa loa lou fusi o le Upu moni, o lo o taofia uma isi ou laei o le taua, ma leai ai sou ‘alofaga i osofaiga a le fili.

Aua e te manatu e sau fa’aaliali le tiapolo ia te oe ma se ie uliuli ma ni seu i luga o lona ulu; o isi taimi e foliga mai pei se agelu o le malamalama (2 Korinito 11:14). E mafai na fai atu ia te oe, o le alofa tunoa o le Atua e ufiufi ai agasala uma ma e mafai ona e faia pea le agasala ae sao i le lagi. E mafai e le tiapolo ona la’u mai mafuaaga e ta’u atu ai ia te oe e leai se Atua, o le Atua e leaga, e lē alofa ia te oe. O pepelo uma nei na fa’aaogā e lē tiapolo mai le amataga e o’o mai i aso nei e fao ese ai fusi o le Upu moni mai tagata. Aua e te sesē i ana togafiti.

O le Afioga Paia a le Atua o le Upu moni lea, so’o se mea e ese mai ai, e pepelo, aua ne’i fa’asesēina ai oe. I le suafa o Iesu Amene

OPEN HEAVENS

MATALA LE LAGI MO LE ASO FARAILE 7 IUNI 2024

(tusia e Pastor EA Adeboye)

Manatu Autu: Tatalo mo Talavou (Prayers for youths)

Tauloto -Tusi Paia– 1 Timoteo 4:12  ‘‘Aua ne‘i ‘ino‘ino se tasi i lou taule‘ale‘a, a ‘ia fai oe ma fa‘aa‘oa‘o i ē ‘ua fa‘atuatua, i le ‘upu, ma le amio, ma le alofa, ma le loto, ma le fa‘atuatua, ma le amio mamā.

Faitauga – Tusi Paia – Failauga 12:1-5

Tatalo

1.       Tama, faafetai mo talavou uma. Ou te matua faafetai I lou alofa le faatuaoia I talavou, o faamanuiaga ma le agalelei I talavou uma. 

2.       Tama, faamolemole ia faatupuina le alofa i loto o talavou. Ia latou alolofa atu ia te oe e sili atu i lo seisi lava tagata po seisi lava mea i lenei lalolagi, i le suafa o Iesu. 

3.       Tama, faamolemole taitai ma puipui i talavou uma mai ala e ono faaumatia ai i latou. Aua nei faatagaina le tiapolo e taufaasese iai latou ia savalali atu i le ala o le amiolētonu. Faaali atu le ala o le ola i talavou ma foai atu le alofa tunoa ina ia latou savavali ai. 

4.       Tama, faamolemole ia e taofia so’o se fuafuaga a le tiapolo ia faaleagaina talavou ma faaumatia ai le lumanai o le Ekalesia, i le suafa o Iesu. 

5.       Tama, ia faasaoloto i talavou uma mai so’o se fetuu ma taua uma i le agaga na latou maua e ala i matua, i le suafa o Iesu, Amene. 

6.       Tama, faamolemole ia faauuina talavou i le mana faapitoa ia faia mea tetele. Ia faataga i latou ia siitia ma faalautele o latou tulaga ia matilatila mai i so’o se mea o galulue ai, i le suafa o Iesu. 

7.       Tama, faamolemole, ia faaaogaina lelei tupulaga i le atinae o nuu ma atunuu. Ia galulue i latou i galuega lelei ma pisinisi lelei ma ia avea ma tagata aoga i o latou aiga ma nuu, i le suafa o Iesu. 

8.       Tama, faamolemole foai le alofa tunoa i talavou e ola faapaiaina ai i lenei lalolagi agasala. Aua ne’i pauu i latou i mailei ma faaosoosoga a le fili e faia le agasala, i le suafa o Iesu. 

9.       Tama, faamolemole foai i talavou uma i le Ekalesia le alofa tunoa e fai ai lau galuega ao avea ma talavou. Ia avea i latou ma faifeau e talai le talalelei, faifeau tausi Ekalesia faapea isi galuega i le Ekalesia. Ia tutulai mai e faia galuega matautia mo lau afio e sili atu i o latou tuaa, i le suafa o Iesu. 

10.   Tama, faamolemole ia e talia mai tatalo a talavou e tusa ma lou finagalo. Ia faamalosiau iai latou ia faalatalata atu ia te oe, i le suafa o Iesu. 

11.   Tama, faamolemole aua nei faataga nei talavou e latou te faia foi mea sese na faia e o latou matua. Avatu le alofa tunoa e faaumatia ai mea leaga o lo’o tuufaasolo mai i augatupulaga ma matua o talavou , i le suafa o Iesu. 

12.   Tama, ia faatupulaia avanoa e aoaoina ai talavou uma i le iloa ma le malamala o le Tusi Paia, e faaaupegaina ia manumalo ma faamalosiau i isi tagata, ia avea ma fa‘aa‘oa‘o i ē ‘ua fa‘atuatua, i le ‘upu, ma le amio, ma le alofa, ma le loto, ma le fa‘atuatua, ma le amio mamā, i le suafa o Iesu e tatalo atu ai, Amene. 

OPEN HEAVENS

MATALA LE LAGI MO LE ASO TOFI 6 IUNI 2024

(tusia e Pastor EA Adeboye)

Manatu Autu: Fa‘atigāina ona o Keriso (Sufferings for Christ)

Tauloto -Tusi Paia– Filipi 1:29  ‘‘'Auā ‘ua foa‘ifuaina ‘iā te ‘outou ‘ona o Keriso, e lē na ‘ona ‘ia fa‘atuatua ‘iā te ia, a ‘ia fa‘atigāina fo‘i ‘outou ‘ona o ia. '

Faitauga – Tusi Paia – 1 Peteru 4:12-19

Na fetalai Iesu I le Luka 9:23... “A fia mulimuli mai se tasi ‘iā te a‘u, ‘ia fa‘afiti o ia ‘iā te ia, a ‘ia ‘ave e ia lona satauro i aso fai so‘o, i le mulimuli mai ai ‘iā te a‘u.    

Afai e moni ma faamaoni lou mulimuli ia Keriso, e tatau ona e sauni e faatigaina oe ona o ia. E leai se tasi e mulimuli ia Keriso e aunoa ma lona tauaveina o lona satauro. Atonu na saunoa atu se faievagalia ia te oe e lafoai lou ola ia Keriso, ona sologa lelei ma matagofie lea o mea uma. E moni o le a sili atu ona matagofie mea uma I lou olaga aua ua e tuuina atu lou ola ia Keriso.  Peitaʻi, e iai pea le amo e tauaveina. Na fetalai Iesu Keriso, a tatou o mai ia te ia, e na te amoina a tatou mafatiaga ma avega mamafa, ae na te le’i fetalai mai, o le a Ia tuua i tatou e aunoa ma se amo. Na fetalai Iesu i le Mataio 11:29–30, 29‘Ia ‘outou amoina la‘u amo ma ‘ia ‘outou fa‘aa‘oa‘o ‘iā te a‘u, auā o a‘u lē agamalū ma le loto maulalo; ‘ona maua lea e ‘outou o le mālōlōga mo ‘outou agaga. 30 Auā e ‘avegofie la‘u amo, o la‘u avega fo‘i e māmā ia.”

Na fetalai Iesu o le a ia tuuina mai ia i tatou lana amo e tauave. E māmā ma avegofie lana amo i lo le amo na tatou amoina ae tatou te leʻi toe fanauina, peitai e iai lava le amo e tauave.

O le mafuaaga e pauu ai le toatele o tagata pe a o’o mai tofotofoga, ona latou te le’i sauni e faatigaina ona o Keriso. E tatau ona matuā naunau e mulimuli iā Keriso ma faapea atu, e moni lava “Afai ou te fano, ou te fano ai pea” (Eseta 4:16) A e faia lenei mea, o le a tele lou malosi, ma e te lē faavaivai i aso o puapuaga ( Faataoto 24:10). O i latou uma e le faavaivai i aso o luitau ma puapuaga, e latou te fiafia i taui ma faamanuiaga e tele pe a mavae atu nei puapuaga.

I le Kenese 39 ina ua mavae mea uma na fetaiai ma Iosefa i lima o ona uso, ona o’o mai ai lea o le tofotofoga sili i lona olaga; o le avā a lona matai ua manao la te momoe. Na faapea mai Iosefa; ’E faapefea ona ou faia lenei tulaga ma ou agasala ai i luma o le silafaga a le Atua? ( Kenese 39:9 ). Sa naunau o ia e feagai ma so’o se taunuuga e o’o mai, ae ia mulimuli ma usiusitai pea i le Atua. Sa alu Iosefa i le falepuipui, ae ina ua silasila atu le Atua ua ia amoina lana amo ma le loto atoa, ua saunia e le Atua le ala e feiloai ai ma Farao, ma e oo atu i le faaiuga o le Kenese 41, ua avea Iosefa ma Palemia o se malo pito sili ona tautaua ma tele le tamaoaiga i le lalolagi i lena taimi. O le faamoemoega o lou olaga e faalagolago i lau tali i lenei fesili: ua e sauni ea e te faatigaina ona o Keriso?     

Tatalo

Tama, faamolemole, tuuina mai le alofa tunoa e aua ai nei ou faavaivai i aso o puapuaga ma luitau. Aumai lau amo ou te amoina seia oo i le iuga, I le suafa o Iesu, Amene.