Samoan Devotional

OPEN HEAVENS

MATALA LE LAGI MO LE ASO TOONAI 6 IULAI 2024

(tusia e Pastor EA Adeboye)

Manatu Autu: Fuafuaga faalelagi (Divine Set Up)

Tauloto -Tusi Paia– Kenese 22:18 ‘O lau fānau fo‘i e manuia ai atu nu‘u uma lava o le lalolagi auā ‘ua e usiusita‘i i la‘u ‘upu. '

Faitauga – Tusi Paia – 1 Tupu 3:4-15

O le taimi muamua na o’u faitau ai i le 1 Tupu 3:4-15 ina ua uma ona o’u talia Iesu e avea ma Alii ma Fa’aola o lo’u olaga, sa o’u faapea ifo i lo’u loto, “na faafefea ona manatu Solomona e ofo atu i le Atua taulaga mu e afe?” O i, na faaosofia ai a’u e su’esu’e atili tupuaga o Solomona ma o’u iloa ai se mea lilo. I le 2 Samuelu 12:24-25, o loo faamatala mai ai e le Tusi Paia ia i tatou, na alofa le Atua iā Solomona ina ua fanau mai o ia. Na faaigoa e lona tamā iā Solomona, peita’i na faaigoa e le Atua iā Ietitaia, o lona uiga ua alofaina e le Alii. Auā ua alofa le Atua iā Solomona, na finagalo ai le Atua e maua se avanoa e faamanuia ai iā Solomona i se ala e le mafai e se tasi ona fesiligia, o lea na fuafua ai e le Atua ma tu’u i le loto o Solomona e fai mea sili e le’i faia muamua e se isi. O le ala lea e mafai ai fo’i ona ia faia mo Solomona mea na te le’i faia muamua mo se tasi.

Ina ua o’u auai I le RCCG i le 1973, a i ai se manaoga i le ekalesia, ona fai lea na o i latou ua taua o fanau a le Atua e faatali atu pe a uma le sauniga. O aso na, a ta’u fanau a le Atua o i latou ua latou iloa ua moni lo latou faaolaina. O se tasi aso na ma faatali ai ma lo’u toalua ma na faapea mai le ta’ita’i o le elalesia, “e i ai lo tatou manaoga e mana’omia ona faataunuu vave i le vaiaso lenei. O outou uma ua faamuli mai, ua tatau ona tapuni a outou teuga tupe i le faletupe ae aumai uma tupe o i ai i le ekalesia.” Ina ua aulia le Aso Gafua na tapuni uma ma teuga tupe ma lo’u toalua ma avatu le tupe I le ekalesia. O le Aso Sa na soso’o ai na toe fai mai ai fo’i le ta’ita’i e faamuli atu le ‘au uso. Na matou faatalitali. Na fa’asilasila mai ua uma ona totogi le manaoga o le ekalesia, ma sa o matou fiafia uma. Ona fesili mai lea o le ta’ita’i, “e toafia outou na tapunia a outou teuga tupe e pei ona o’u faatonu atu?” Na si’i i luga o ma lima ma lo’u toalua, ma le ma tilotilo atu, e leai ma se isi na si’ia i luga lona lima na o ma’ua a. Na tupu a’e o’u manatu faapea i lea taimi, “Talosia e lē o se faavalevalea lea ua o’u faia ona o la’u fa’a kerisiano.” Ae fetalai mai loa le Atua iā te a’u, “Atali’i, e te lē o valea. Ua o’u fa’atagaina oe e fai mea e le’i mafai e isi ona fai, a o’o fo’i ina o’u avea oe i le tulaga ua o’u finagalo e ave i ai oe, e leai ma se isi e mafai ona fesiligia a’u.” O le isi vaega o le tala o se mea e le’i tupu muamua; o mea na fuafua mai i le lagi.

A tu’u e le Atua i lou loto e fai sau foai mo ia, O loo ia tāpenaina oe mo mea sili atu. A e usitai, e te olioli mulimuliane i le lumana’i, ae a e lē usita’i, o le a e misia se vavega. Pe e te foa’ia pe leai, e tele auala a le Atua e fa’ataunuu ai lona finagalo. O le tagata o loo manaomia moni le fesoasoani o oe.

Tatalo.

Tamā faamolemole fesoasoani mai ia te a’u aua ne’i o’u misia au fuafuaga Paia mo lo’u lelei. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 5 IULAI 2024

(tusia e Pastor EA Adeboye)

Manatu Autu: Tatalo mo toeaina o le Ekalesia (Prayers for Elders)

Tauloto -Tusi Paia– 1 Timoteo 5:17 ‘'O toeaina o ē pule lelei, ‘ia ta‘uaogāina i latou ‘ona fa‘aluaina atu i ai o le taui, ‘ae fa‘asili i ē galulue i le ‘upu ‘atoa ma le a‘oa‘o atu. '

Faitauga – Tusi Paia – 1 Peteru 5:1-4

Tatalo

1.       Le Alii e, faafetai mo toeaina uma i totonu o la matou Ekalesia, aiga, nuu ma le atunuu. Faafetai le Alii e mo le tausia o i latou ua aulia mai ai nei mau Tausaga. 

2.       Tama, e pei ona e foai le malosi i le tino ia Mose e oo i lona matua, faamolemole ia faapena ona e foai le malosi i toeaina uma o loo faia lou finagalo ina ia mafai ona faaauau pea ona faia lau galuega seia oo ina e valaau i latou i lou mamalu. 

3.       Ou te faamutaina le tino ma’i e pei ona masani ona maua a’o faasolo ina matutua toeaina i lau Ekalesia. Ou te folafola atu i le suafa o Iesu, e latou te fiafia i le soifua maloloina lelei seia oo ina valaau le Atua iai latou. 

4.       Tama, foai le poto i toeaina e fautua ma taitai le autalavou. Ia latou faufautua i fanau i le poto mai le Atua, i le suafa o Iesu. 

5.       Tama, faamolemole ia e foai i toeaiina uma o le tino o Keriso, ni tagata e sui tulaga iai latou pe a mavae atu. Ia aua lava nei gata iai latou galuega sa latou faia, i le suafa o Iesu

6.       Tama, faamolemole ia e faataga toeaina uma o loo matou mafuta ia ola ma soifua i le olioli. Aua nei o latou maua le loto faanoanoa seia oo ina e valaau mai iai latou I le lagi, i le suafa o Iesu, Amene. 

7.       Tama, ou te tatalo mo le faauuga e faamalolo ai tagata mama’i ia pau ifo i luga o toeina i le tino o Keriso. Fai mai lau Upu i le Iakopo 5:14 e o atu tagata mama’i i toeaina mo le faamalologa, ma afai e faaloaloa o latou aao i luga o tagata mamai, e latou te malolo i le suafa o Iesu. 

8.       Tama, faamolemole ia e foai i toeaina o le Ekalesia se talaaga lelei. O soo se fuafuaga a le tiapolo e faaleaga ai o latou igoa ae lei o atu I lou mamalu, ia faaleaogaina i le suafa o Iesu. 

9.       Tama, faamolemole faamagalo i matou toeaina uma i mea sa latou faia i taimi ua tuanai e te lei fiafia iai. Faamolemole ia soloia ma faamamaina a latou agasala. Avatu le loto toa e tautino ai a latou agasala ma toe faalaulelei mea sa leaga I le suafa o Iesu. 

10.   Tama, faamolemole auina mai le fesoasoani i toeaina ua leai nisi e tausia i latou. Ia saunia ni tagata loto alolofa e tausia I latou e pei lava o latou matua, I le suafa o Iesu. 

11.   Tama, faamolemole, aumai ia te au mea uma e manaomia e tausia lelei ai toeaina o lo’o I totonu o lo’u aiga, Ekalesia ma le nuu. Ia avea a’u ma faamanuiaga iai latou, I le suafa o Iesu. 

12.   Ia e faamanuia I toeaina uma o le Ekalesia ma faaaupegaina i latou i le mana e folafola ma aoao ai lau Upu, i le suafa o Iesu Keriso, Amene. 

OPEN HEAVENS

MATALA LE LAGI MO LE ASO LULU 3 IULAI 2024

(tusia e Pastor EA Adeboye)

Manatu Autu: Taui o fatu na lūlūina 3 (Return on Seeds 3).

Tauloto -Tusi Paia– 2 Korinito 9:10 ‘Pei ‘ona tusia,‘Ua ia fa‘asalalauina ana mea; ‘ua ia avatu i ē matitiva, e tumau lana amiotonu e fa‘avavau.”

Faitauga – Tusi Paia – Malaki 3:10-12

I aso e lua talu ai, sa ou talanoa atu i auala e maua ai seleselega mai fatu na e totoina. O le asō, o le a ou talanoa atu i fatu e toto ona o faatonuga a le Atua. O nei ituaiga fatu e sili atu I le taiselau lona fua mai, e leai se mea e gata ai lona taui. I le 1 Tupu 17:8-16, ina ua faatonu e Elia le fafine ua oti lana tane e avatu ia te ia lana meaai mulimuli, ma ia usitai, o le taui na ia maua, o le faulai o meaai mo ia ma lona aiga i le taimi o le oge. A faatonu oe e le Atua  e foai ma e usitai, e na te foai faamanuiaga e faulai ma silisili ese ia te oe. 

Ina ua avea a’u ma Taitai Aoao o le Ekalesia RCCG, o le tupe maua a le Ekalesia e maua i le masina e maualalo atu i lo lo’u totogi o se faiaogga i le Iunivesite ae ou te lei faamavae. A maea ona totogi uma le aufaigaluega i na taimi, ua leai se tupe e totoe e totogi ai a’u. O taimi faigata ia aso, ma sa ou naunau ia oo maia le aso e totogi mai ai a’u faamanuiagga mai le malo ona sa ou faigaluegga i le malo mo le tele o tausaga. O lau fuafuaga sa iai, e tuu se vaega o lea tupe e ave e faafaigaluega ae teu seisi vaega ma le faamoemoega e maea ane nei teuga tupe ae ua tulai mai le Ekalesia i se tulagga e mafai ona totogi ai au. Na maua loa lau tupe mai le malo, ona o le Atua o lou Matai, na ou fesili iai pe faapefea ona faaaoga lea tupe. Ua faateia a’u ina ua fai mai e vaetolu, ona avatu lea ini vaega se tolu o le Ekalesia ae leai ma se tupe e aumaia i le vaega o le Ekalesia lea ou te vaaia, e ui e tele foi o matou manaoga. Ua ou tetemu i lenei faatonuga ae mulimuli ane ua faapea mai, ’ o au ou te foai mea uma ia te oe’. Ua ou usitai, ma e amata mai i lea aso, o ia moni na foai mai mea uma ua ou maua. 

I le Malaki 3:10, o loo faatonu mai e le Atua e ‘aumaia mea e sefulua‘i a ‘outou mea uma lava i le fale e tu‘u ai mea; ona ia tōina lea o pupuni o le lagi ma sasa‘a atu le manuia mo ‘outou, ‘ina se‘ia silisili ‘ona tele. O se faamanuiaga silisili lea ona tele e maua i le usitai i se faatonuga e tasi. Na faamanuia e le Atua Aperaamo ma fai atu ia te ia o le Atua lona faamanuiaga, o se faamanuiaga e silisili ona tele. A e suesue poo le a le mea na tupu i luma atu, e te iloa o le faamanuiaga na maua e Aperaamo ina ua maea ona ia totogiina le uluai sefuluai ia Mekisateko i le Kenese 14:18-20. O lau sefuluai o se faitotoa tele i faamanuiaga e silisili ona tele a le Atua. A faatonu oe e le Atua e foai, o se avanoa mo oe e tofo ai i faamanauiaga e silisili ona tele mai le Atua. Aua e te faatagaina avanoa e pasia oe, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 2 IULAI 2024

(tusia e Pastor EA Adeboye)

Manatu Autu: Taui o fatu na lūlūina 2 (Return on Seeds 2).

Tauloto -Tusi Paia– Mataio 13:8 ‘A ‘ua pa‘ū isi i le ‘ele‘ele lelei, ‘ona fua mai ai lea e ta‘iselau i nisi ma ta‘ionogafulu i nisi ma ta‘itolugafulu i nisi..’

Faitauga – Tusi Paia – 1 Tupu 17:8-16

O ananafi sa ou fa’asoa i le taua o le mautinoa o lo’o e lūlū fatu i se eleele lelei. O le asō, o le a ou su’esu’e le taui e tatau ona maua mai fatu e luluina i eleele lelei. Muamua, e tatou te va’ai muamua i fatu e lūlūina i le olaga o se auauna a le Atua. Fai mai le Mataio 10:41'O lē talia fo‘i o se perofeta i le igoa o le perofeta, e maua e ia le taui o le perofeta; o lē talia fo‘i se tagata amiotonu i le igoa o le tagata amiotonu, e maua e ia le taui o le tagata amiotonu. '

O le maualuga o le tulaga fa’ale agaga o le tagata o le Atua o loo e lūlūina fatu i lona olaga, e fua iai le taui o le a e selesele mai ai. O nisi fatu e fua mai ta’itolugafulu, o nisi e ta’ionogafulu, a o isi e ta’iselaugafulu.  E leiloa po’o au fatu o lo’o lūlū i se ‘ele’ele lelei, peitai a tele atu minerale ma siitia le tulaga lelei o le ‘ele’ele, o le telē foi lena o le fua mai. I se isi fa’aupuga, o le maualuga i le itu fa’aleagaga ua ‘ausia e le tagata lea, o le telē foi lena o le taui e te selesele pe a e lulu fatu i lona olaga. Ou te le o fa’apea atu ia na o tagata maualuluga i le talalelei e te lulu iai fatu io latou olaga. Aua o le mea moni ua iai nisi ‘tagata laiti’ ua ausia le loloto i le itu faaleagagga e sili atu iai latou o lo’o tautaua i tagata, aua foi o le tautaua e lē o se faailoga lea o le maualuga o le ola faaleagaga.

Ioe, e lelei le luluina o fatu i soifua o Epikopo, ma Taitai Aoao o Ekalesia faapea ma Faife’au toeaina, ae e le tatau ona e tuulafoai i faife’au o lo’o latalata ia te oe i le asō, aemaise pe afai ua fa’atonuina oe e le Atua e te faia. E tatau ona ou faamanatu atu, o fatu o lo’o e luluina, o fatu e maualuga ai le viiga o le Atua, ae le o le tagata. E pau le ala e te luluina ai fatu, o le foai lea i auauna a le Atua, peitai o Lē o lo’o avatu iai lau foai, o le Atua lava, o lo’o fai le auauna a le Atua lena ma ona sui. O lona uiga, afai ua na o tagata maualuluga i le talalelei e te luluina iai ni fatu, o loo manino o loo e taumafai e faatonutonu le Atua ma e le mafai e se tasi ona faia lea tulaga i le Atua. E iai manaoga o fanau uma a le Atua, ma afai ua na o le Atua o lo’o e alofa iai pe a luluina au fatu, e te lulu ni fatu i so’o se mea e faasino atu e le Atua ina ia tali ai se manaoga o seisi. 

I le Kalatia 6:10, fai mai le Tusi Pa’ia, ia tatou agalelei i tagata uma lava, aemaise i le aiga o le faatuatua. ‘Aua e te inoino i se uso o loo fai atu seevae masaesae i le lotu ae o lena o lo’o mua ona e faatumuina le pusa lavalava a le faife’au. Afai e fa’aali atu e le Atua se uso, se tuagane po’o se tuafafine o loo iai sona manaoga, e tatau ona e taumafai e foai e tali i nei manaoga ina ia maualuga ai le viiga o le Atua o lo’o auauna iai nei tagata. Lulu se fatu i le soifua o se afafine po’o se atalii moni a le Atua i le asō. I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 1 IULAI 2024

(tusia e Pastor EA Adeboye)

Manatu Autu: Taui o fatu na lūlūina 1 (Return on Seeds 1).

Tauloto -Tusi Paia– Mareko 4:20 ‘A o i latou na lūlūina i le ‘ele‘ele lelei: o i latou ia o ē ‘ua fa‘alogo i le ‘upu, ma latou talia, ma fua mai e ta‘itolugafulu i nisi, e ta‘iono sefulu i nisi, e ta‘iselau fo‘i i nisi.’

Faitauga – Tusi Paia – Mataio 13:1-8

I tulaga tau tupe, e iai le tulaga e taua o ‘taui mo tupe faafaigaluega (return on investment)’. E faapena foi I le malo o le Atua, e iai foi le tulaga e mafai ona ou faaigoaina o le, ‘Taui o fatu na luluina’. O le tupe faasili lea e te maua pe afai e te lūlūina fatu I le malo o le Atua. E tusa ma le faitauga mai le Tusi Paia o le aso, e iai le avanoa e maua ai le leai o se taui, poo le ta’I 30, tai 60, po’o le tai100 le taui poo le fua mai o nei fatu na luluina. E te iloa foi a’o faagasolo suesuega o lenei mataupu I lenei vaiaso, e iai foi le avanoa e te maua ai fua e faulai e leai sona gataaga. 

E lua vaega e fua iai le taui o au fatu na luluina, o le tulaga muamua o le vaega e totoe pe a uma ona faia lau foai. I nisi faaupuga, o le a maualuga o le tau na e totogiina I lau foai? Lona lua o le eleele na e foai ai. O le aso, o le a ou talanoa atu I le ituaiga eleele e maua ai le 0, e leai se fua e maua mai ai. 

I le tele o tausaga talu ai, sa ou lulu i ni galuega a le Atua i atunuu i fafo. Sa ou iloa le tulafono o seleselega, ma sa faia pea lau foai. Peitai e leai se taui o maua. Ua ou popole, o lea na ou fesili ai le Atua po’o le a le mea o lo’o tupu. Ae tei ua ou miti. I la’u miti, na ou vaaia o loo ou tu I se faatoaga tele o loo tele ai ni faaputuga e iloa ai o lo’o iai fatu na luluina i le eleele. Ua ou tago sii i luga se tasi o faaputuga, ma o lalo ifo o se sima. O lona uiga e leai se mea e mafai ona ola i lea eleele. Ina ua ou ala ane, ua ou iloa le uiga o le miti, o le galuega a le Atua lea na ou lulu ai ua pei o se laueleele e faasima, e leai se taui oni fatu e toto ma lulu ai. 

Afai o lo’o e lulu i se nofoaga e lē o finagalo iai le Atua, e leai se taui i lau lulu. E alofa le Atua i tagata matitiva, o lona uiga afai e te lulu i olaga o nei tagata, fai mai le Salamo 41:1, e na te fa‘asaoina o ia e le ALI‘I i le aso vale. E alofa le Atua i ana perofeta ma faifeau, afai e te lulu i o latou olaga, e te maua le taui (Mataio 10:41-42). E alofa le Atua i lana Ekalesia, afai e te lulu i lana Ekalesia, e te maua le taui (Malaki 3:10-12). Afai o le galuega a le Atua o loo e lulu ai e foliga o se Ekalesia a le Atua I le vaai atu I fafo ae le maua ai le mamalu o le Atua i totonu, o lona uiga e leai se taui o mea e te lulu. E mafai ona e filifili i soo se tagata e ave iai au tupe, peitai afai o se fatu e lulu, ia e faamautinoaina o loo e lulu i se nofoaga poo se tagata o loo finagalo iai le Atua. Aua e te lulu au fatu i luga o eleele e faasima ma e manatu e maua le taui, e leai se taui e maua mai ai. Ia e malamalama ma iloa lelei le eleele o lo’o e galue ai ae e te lei luluina iai ni fatu, i le suafa o Iesu, Amene.   

OPEN HEAVENS

MATALA LE LAGI MO LE ASO SA 30 IUNI 2024

(tusia e Pastor EA Adeboye)

Manatu Autu: Amata lagona le fetalai mai o le Atua (Start Hearing From God).

Tauloto -Tusi Paia– Ioane 8:47 ‘O lē mai le Atua, e fa‘alogo o ia i afioga a le Atua; o le mea lea tou te lē fa‘alogo ai, auā e lē mai le Atua ‘outou.”

Faitauga – Tusi Paia – Ioane 10:2-5

O Iesu Keriso na fetalai:O a‘u mamoe e fa‘alogo mai i latou i lo‘u leo, ‘ua ‘ou iloa fo‘i i latou, ‘ua latou mulimuli mai fo‘i ‘iā te a‘u (Ioane 10:27)

O lona uiga, e lē seiloga e avea oe ma perofeta faatoa e lagona le siufofoga o le Atua; pau lava ia avea oe o se tasi o lana fanau. O loo o’u tatalo mo oe i le asō, ia tatala e le Atua mata’utia lau fa’alogo ia manino ai lau faafofoga i lona fetalai mai. A o amata fetalai atu le Atua ia te oe fa’atatau i mea e finagalo e fai, e faailoa mai ai ua avea oe ma ana uo. I le Ioane 15:15; na fetalai Iesu i ona so’o: 15‘Ou te lē toe ta‘ua ‘outou o ‘au‘auna, auā e lē iloa e le ‘au‘auna le mea e faia e lona ali‘i; a ‘ua ‘ou ta‘ua ‘outou o uō, auā ‘ua ‘ou fa‘ailoa atu ‘iā te ‘outou mea uma na ‘ou fa‘alogo ai i lo‘u Tamā.

Na fetalai le Atua e lē mafai ona ia nanā ia Aperaamo, so’o se mea e finagalo e fai. E pule Silisili ese le Atua. Na te le manaomia se fa’atagaga mai se isi e fai ai so’o se mea e finagalo ai, peita’i e i ai lava tagata e fia talanoa i ai a’o le’i faia lona finagalo. Ua tatau ona e nofo i lalo ma iloilo lelei le lua mafutaga ma le Atua, ma fa’alatalata ia te ia, ia e lagona ai lona siufofoga. E te manaomia lou o’o i le mafanafana o le mafutaga ma le Atua na te lē natia ai se mea e tasi mai iā te oe. A e faitau I le Kenese 18, e te iloa ai o Aperaamo o se uo a le Atua. O le mafuaaga lenā na lē natia ai e le Atua se mea mai ia te ia. O Aperaamo o se uo mafana a le Atua, o lo’o faamatala e le tusi o Roma 4:16 o le tamā o le ‘au fa’atuatua. Talu ai a leai se faatuatua e lē mafai ona fiafia mai le Atua ia i tatou (Eperu 11:6), afai o Aperaamo o le tamā o le ‘au faatuatua o lona uiga sa ia fa’afiafia I le finagalo o le Atua.

E mafai ona matua’i e pipi’i i le Atua, e ta’u uma atu ai iā te oe mealilo e lē mafai ona ia fa’ailoa i se isi tagata. I le Ioane 13:21-26, na fesili uma i latou sa i le laulau ia Iesu po’o ai o le a fa’alataina ia. E le’i tali Iesu ia i latou, peita’i na o le so’o na faalagolago i lona fatafata na tali i ai - Ioane le ua alofaina e ia.

O se tulaga matagofie lou mafai ona faapea atu i se tasi, “E le’i fetalai mai ai le Atua.” E fa’ailoa mai ai, e faapitoa oe i le Atua, ma a i ai lava se isi e talanoa i ai le Atua o oe. Fa’ata’ita’iga, I le 1 Tupu 22:6-28 e toatele perofeta na folafola pepelo, peita’i o Mika, na fetalai tu’u sa’o i ai le Atua, na ese mai ia i latou uma, na ia faailoa le finagalo o le Atua, ma taunuu. A e latalata i le Atua, e lē mafai ona fa’asesēina oe e se tasi. Ou te tatalo mo oe ia vave mai le aso e faailoa ai e le Atua ia te oe mea lilo I lona finagalo. I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 29 IUNI 2024

(tusia e Pastor EA Adeboye)

Manatu Autu: O le a se faamatalaga a tagata o ai oe? (Who Do People Say You Are?)

Tauloto -Tusi Paia– Mataio 16:13 ‘Ua maliu atu Iesu i le lau‘ele‘ele o Kaisareia Filipo, ‘ona fesili atu ai lea o ia i ona so‘o, “Pe se a le ‘upu a tagata i le Atali‘i o le tagata, po o ai?”

Faitauga – Tusi Paia – Mataio 16:13-16

O le tatou mataupu o le asō o se fesili e tatau ona e manatu mamafa i ai. I le Tusi faitau o le asō, na fesili Iesu i ona so’o pe fai mai e a tagata, po o ai ia. E le’i fa’alua fesasi Iesu i lona faasinomaga; na mautinoa lelei e le Alii Fa’aola o ia o le alo o le Atua, peita’i na fia fa’afofoga poo le a se vaai a tagata ia te ia. E tatau fo’i ona mamafa ia te oe poo le a se faitau a tagata ia te oe. O le faitau a tagata po’o ai oe e fua i o latou lava manatu ma le vaai, ae lē fua i lou iloa o oe lava.

A o soifua mai si o’u tamā faaleagaga, sa masani ona omai i ai fa’auluuluga o kamupanī i sona manatu i so’o se taimi e manaomia ai ni a latou tagata faigaluega fou. E masani ona faapea mai, “Afioga e, o le uso o ai ma ai i lau ekalesia ua talosaga e fia faigaluega i la matou kamupanī, o le a sou finagalo ia te ia?” O isi taimi e poto a le tali a tamā faapea, “O le uso lenā? Oi na fai atu o ia o se kerisiano.” Peita’i, a fesili le kamupani faatatau i se tagata e moni lona faaolaina, e faapea lana tali, “O le uso lenā o se kerisiano.” 

E i ai le eseesega i le tagata e te fai mai o oe lea, ma lou tagata moni. E lua ituaiga tagata e tatau ona e amanaia o latou manatu iā te oe. Muamua o tagata latou te iloa oe ae tou te lē vavalalata. Atonu e lē mafana se tou mafutaga peita’i o ni tagata maitau. E mafai ona o latou fau ni manatu e faamatala ai oe, e ala i au faamatalaga ma au mea e fai. Atonu e lē sa’o la latou vaai peita’i i o latou lava manatu o oe moni lava lea. O lea la, ia e taumafai aua ne’i faia se mea sesē e avatu ai ia i latou se ata sesē o lou tagata.

O ituaiga tagata lona lua, o e tou te vavalalata ma faifaimea faatasi. I le Tusi faitau o le asō, o le uso na iloa lelei le faasinomaga tonu o Iesu, o se tasi o ona so’o- Simona Peteru. O i e faamaonia ai o tagata e malamalama lelei ia i tatou o e sili ona mafana la tatou mafutaga. O ai oe i le faamatala a lou toalua? Ae a lau fanau? O tagata nei e sili ona latou iloa oe na i loo se isi lava tagata, ma o o latou manatu e tatau ona sili ona tāua ia te oe. E masani ona o’u fai atu, o le mafuaaga e faalogogatā ai fanau a nisi o faifeau ona latou te iloa ituaiga faifeau e i ai o latou matua. E ese le upu e faalogo o lauga I le fata faitaulaga ese amio e fai i le fale. O le mafuaaga lea e fenumia’i ai manatu o le fanau ma o ese ai mai le Atua o loo auauna i ai o latou matua. E mafai ona e fa’afoliga i tagata tou te vāvāmamao, ae le mafai ona e faafoliga i tagata o lou aiga. I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 28 IUNI 2024

(tusia e Pastor EA Adeboye)

Manatu Autu: Ave nofoalii mo le Atua (Taking thrones for God)

Tauloto -Tusi Paia– Faataoto 29:2 A pule ē amiotonu, ‘ua ‘oli‘oli ai le nu‘u; ‘ae a pule ē amio leaga, ‘ua mapuitigā le nu‘u..” 

Faitauga – Tusi Paia – Eseta 8:7-17

I le lalolagi nei, i totonu o le malo, faalapotopotoga po’o se vaega o le atunuu, e iai lava taitai e faatusa i se tupu o lo’o nofo i lona nofoalii. O le tauloto o le aso mai le Tusi Paia o loo faapea mai, a iai le pule ma tulaga taitai I le au amiotonu, e olioli le nuu. I nisi faaupuga, afai o lo’o sese ala o mea, e mautinoa e le o se tagata amiotonu o loo iai le pule. O le mafuaga e faia ai faiga faavae e feteenai ma le Upu a le Atua ona o i latou o loo iai le pule ma faia nei faiga faavae e lē amiotonu. E iai vaega o le atunuu, o vaega faaupufai ma mea faapena o loo iai faiga e faaalatua ma piopio ona o nofoalii i nei vaega, o loo nofoia e tagata amioletonu, o le a faamutaina lea tulaga. E tatau i tagata faatuatua ona faia mea uma e latou te maua ma nofoia nei nofoalii mo le Atua. 

Sa ou latalata lava i se tasi o tupu i Nigeria i Sasae ae lei maliu. Sa matuā ma vavalalata, ma e iai le aso na ou moe ai i lona maota tele. Ona o le ma vavalalata tele, na ia maua se vaega o le faauuga na tuuina mai e le Atua ia te a’u, ma ae lei maliu, na ia faia se folafolaga. Sa le manao e toe foi tagata o lona malo i le ifo i tupua pe a maliu, o lea na ia faia se folafolagga o soo se tagata e lē faaolaina, e lē nofo i luga o le nofoalii.

Ua sili atu ma le 20 tausaga, ma sa iai lava nisi sa naunau iai peitai e o’o mai i le aso, e leai seisi o nofo ai. Na ia aveina atoatoa le nofoalii mo le Atua ina ia mautinoa e auauna lona atunuu ua tau lava o le Atua soifua. E mafai foi ona e faia, e mafai ona e aveina nofoalii o nofoaga o lo’o e galue ai mo le Atua. 

Ioe, e mafai ona aveina nofoalii mo le Atua e ala i le faia o folafolaga. Peitai e sili atu ona taua le ofoina atu o nei nofoalii i le Atua e faavavau pe afai o oe o loo nofo ai luga. O lona uiga e tatau ona e galue malosi ma naunau e oo i le tumutumuga e nofo ai i le nofoalii. A e nofo loa i luga o se nofoalii, e mafai ona e faamamaina le nofoaga atoa i le itu i le agaga ma ave mo le Atua e faavavau. Ou te tatalo mo le alofa tunoa e tuuina atu ia te oe e te oo ai i le tumutumuga o le vaega o lo’o e galue ai, i le suafa o Iesu. E faaaoga oe e le Atua e faoa ai nofoalii mai lima o le tiapolo, i le suafa o Iesu. Ona o oe, o faiga faavae amioleaga, faiga faaalatua ma le piopio o le a faamutaina i le suafa o Iesu. Galue malosi, nofo i le nofoalii ma e manumaloina mo le Atua, i le suafa o Iesu, Amene.  

OPEN HEAVENS

MATALA LE LAGI MO LE ASO TOFI 27 IUNI 2024

(tusia e Pastor EA Adeboye)

Manatu Autu: E pei ona auina mai a’u e le Tama (As the Father hath sent me)

Tauloto -Tusi Paia– Ioane 20:21 ‘'‘Ona toe fetalai atu lea o Iesu ‘iā te i latou, “‘Ia ‘outou Manuia.“‘Ia ‘outou manuia.” Fa‘apei ‘ona ‘auina mai o a‘u e le Tamā, e fa‘apea fo‘i ‘ona ‘ou ‘a‘auina atu ‘outou.” 

Faitauga – Tusi Paia – Ioane 14:10-12

A tatou vaavaai I le manatu autu o lenei aso, ou te manatu e te ono fesili, ‘e faapefea ona auina a’u e le Tama?’ Fai mai le Galuega 10:38, na auina mai Iesu e faia mea lelei ma faamalolo ē ua faatigaina e le tiapolo, ma sa faau’uina o ia e le Agaga Paia ma le mana mo lena galuega. O le mafuaaga lea na faatonuia ai e Iesu ana faifeau ma auauna e faapea I le Luka 24:49  ‘ia ‘outou nonofo i le ‘a‘ai o Ierusalema, se‘ia maua e ‘outou le mana mai lugā.” '

O le tapulaa o le avea ma auauna a le Atua e tusa ma le Galuega 6:1-3, e tatau ona faatumuina oe I le Agaga Paia. O le papatisoina I le Agaga Paia ma le foliga vaaia o le tautala i gagana eseese o se tulaga lelei. Peitai e tatau foi ona iai isi foliga vaaia. Fai mai le Galuega 6:8, e Setefano o se tagata e tumu i le Agaga Paia na ia faia vavega. O fea vavega na faia e le Atua e faaaogaina ai lou tagata talu ona faatumuina oe i le Agaga Paia? I le Galuega 8:5-8, o se tasi o tiakono, o Filipo lona suafa, na alu atu i Samaria ma ua liua se taulaga atoa. I le Galuega 13:6-12 a’o lauga atu Paulo i se kovana, ao iai se faatalaitu o loo taumafai e taofia o ia, o Paulo a’o tumu i le Agaga Paia na aveesea le mauga na i le ala ma ua maua le manumalo e ala i le Agaga Paia. O tatou Kerisiano faatuatua o lo’o feagai nei ma se lalolagi e taua o le ’augatupulaga fou (new age)’. O lo’o matua galulue malosi e manumaloina a tatou talavou i le faaaogaina o togafiti faalilolilo (magic) ma e tatau ona tatou faaalia mana e sili atu ona tapunia ai ina ia aua lava nei tosina iai talavou ia latou mailei. O lenei mana i le Atua o lo’o avanoa mo so’o se tasi peitai e tatau ona filifili e totogi le tau, ae o lo’o tulei lemu e le tiapolo le lotu ina ia maalili. 

 E tatau ona e iloa o so’o se nofoaga e a’oa’o ai Iesu i le talalelei, fai mai le Tusi Paia na iai lava le mana o le Atua mo vavega. Ua ou iloa, a tatou lauga i le faamalologa, e faamalolo e le Atua. A tatou faaigoaina se polokamane ’po o le faasaolotoga’, e toatele tagata i totonu o le lotu o lo’o tauavea temomi e faasaoloto ai. E tatou te filifilia mataupu autu e faailoa atu ai i le Atua o loo tatou naunau i lana galuega. Na ia fetalai e na te papatiso ia te oe i le Agaga Paia ma le afi (Luka 3:16). E iai le eseesega o le tautala i gagana eseese ma le iai o le afi i tua o le laulaufaiva. Afai e papatisoina oe e Aggaga Paia ma le afi, o le a tino mai, e tutupu vavega, e manumaloina agaga ma o le a to’otuli tulivae uma i lo tatou Alii. Saili le afi o Agaga Paia i le aso. 

Tatalo

Tama, papatiso ia te au i lou mana, i le suafa o Iesu, Amene.

OPEN HEAVENS

MATALA LE LAGI MO LE ASO LULU 26 IUNI 2024

(tusia e Pastor EA Adeboye)

Manatu Autu: E foai mai e le Atua ia te oe le mana (God will empower you)

Tauloto -Tusi Paia– 2 Peteru 1:3 ‘Ua foa‘iina mai ‘iā te i tatou e lona mana Atua o mea uma, e o‘o ai i le ola ma le amio Atua, i lo tatou iloa lelei o lē na vala‘au mai ‘iā i tatou i lona mamalu ma lona lelei silisili’...

Faitauga – Tusi Paia – Isaia 41:10-13

I le Ioane 20:21, na fetalai Iesu ‘Fa‘apei ‘ona ‘auina mai o a‘u e le Tamā, e fa‘apea fo‘i ‘ona ‘ou ‘a‘auina atu ‘outou'

I le Mataio 10:40, na ia fetalai, ’'“O lē talia ‘outou, ‘ua talia e ia o a‘u; o lē talia fo‘i a‘u, ‘ua talia e ia o lē na ‘auina mai a‘u,’. O le galuega a le Atua o se galuega mai le Tama I le lagi, o lona uiga afai ua valaauina oe e faia se mea, e te mautinoa o le Atua o loo lagolagoina. I le Ioane 5:30, na fetalai Iesu ‘Ou te lē mafaia ‘ona fai o se mea e tasi, na o a‘u’; E lelei lenei tulaga aua foi o so’o se mea e te faia mo le Atua, e le mafai ona e faia na o oe, peitai o le Tama na auina mai oe e fesoasoani ia te oe. O le talalelei lenei aua e pau le mea e te faia o le ta’u atu ia te ia, ’Le Alii e, e le mafai ona ou faia, peitai ou te iloa e mafai ona e faia e ala ia te a’u’. E iai se mea e taua o le ’faailoga Atua’. E faataga e le Atua na te faia, peitai e na te faia pe afai e te gauai e faia faatasi ma ia. Afai e te faatuatua e na te faia, e na te faia lava. Afai e te faatuatua e mafai ona ia faaaoga oe e faamalolo ai tagata, e tatau ona e totogia le tau, ona ia faatinoina lea ia taunuu. O so’o se galuega e tu’u atu e le Atua ia te oe e foliga mai e matua faigata ona taunuu, talanoa i le Atua, faatino le vaega e tatau ona e faia, ona ia faataunuuina lea e ala ia te oe. 

Afai e tuuina atu e le Atua ia te oe se galuega faapitoa, e tumau o ia ia te oe, ma avatu le mana ma le malosi ia te oe ina ia mautinoa e oo ma faia lena galuega ina ia maua se taunuuga lelei. E toatele tagata e le ausia fuafuaga ma galuega  na fuafuaina mo i latou ona e seaseā ō i le Atua mo se faatonuga. E amata lelei le galuega, peitai ua seāseā tatalo mo le faasinomaga i laasaga uma e tatau ona uia. Ua latou te lē iloa o le nofoaga tatalo lea e faailoa atu ai e le Atua laasaga uma o mea e faia. E latou te faia mea uma ina ia manuia ma maea le galuega, peitai a oo I taimi o faaiuga, e le fesili atu i le Atua mo faaiuga pito sili ona lelei e mafai ona faia. A maea sina taimi ma ua latou iloa ua le faataunuuina foi le galuega, ona latou faaseā lea i le Atua ona ua ia fesoasoani i isi tagata ae le o latou. 

Le au pele e, e le mafai ona e faia se galuga na o oe (Ioane 15:15). O le galuega ua tuuina atu e le Atua ia te oe, e le mafai ona faia i le mana ma le malosi ae o le Agaga Paia o le Atua (Sakaria 4:6). Afai e te naunau e taunuu le faamoemoega o lou olaga, aua e te faamoemoe i lou iloa ma le poto, faamoemoe i le Atua, i le suafa o Iesu, Amene.