Samoan Devotional

OPEN HEAVENS

MATALA LE LAGI MO LE ASO LUA 16 IULAI 2024

(tusia e Pastor EA Adeboye)

Manatu Autu: Aua le fasiotia se fitafita ua manu’a (Don’t kill a wounded soldier)

Tauloto -Tusi Paia– Kalatia 6:1 ‘Le ‘au uso e, ‘āfai e maua se tagata i se tasi agasala, o ‘outou o i la le Agaga, ‘ia ‘outou fa‘afo‘i mai lē ‘ua fa‘apeaina ma le loto o le agamalū. ‘Ia fa‘aeteete oe ‘ina ne‘i fa‘aosoosoina fo‘i oe.'

Faitauga – Tusi Paia – Ioane 8:1-11

E ese le matuia, ona o nisi tagata latou te fa’amasinoina tagata ua sesē ni a latou mea ua fai, ina ia fa’amalieina ma ta’uleleia i latou. O le latou fa’amoemoe atoa, ia vi’ia I latou, ae leai se taumafai e lapata’i lea tagata ua faia le mea sese, ma toe tata’i mai ia Keriso. O  tagata sa auai e tauai ma’a le fafine mulilua i le Ioane 8:1-11 e faapea uma lava o latou uiga. Sa latou lē manatu o le a fa’asusulu atu le malamalama o le amiotonu e Iesu iai latou, ua fa’amāina I latou e Iesu a’o latou taumafai e faamāina le fafine mulilua.

A tatou a’oa’ia ma faasa’oina se tagata ma le fa’amoemoe e faailoa atu ai lo tatou amiotonu, ua tatou osofa’ia o latou lagona faaletagata, ua faaopoopo atu iai le mamafa o le ‘avega ua amoina o lagona, i le sese o le mea ua faia, ma atili ai ona faigata ona latou toe o mai ia Iesu Keriso. E fa’asagatau le Atua i ē faasalaina isi tagata ina ia latou ta’uamiotonuina. A silasila atu Kerisio i se fitafita o lana ‘autau ua paū, e naunau e fesoasoani e toe fa’atū mai i luga. Ae afai na te maua atu ua tau’ai ma’a iai isi fitafita, ina ia fa’aumatia o ia, e tetee Iesu iai latou ina ia puipuia le fitafita ua manu’a.

O le faanoanoaga, ona o le toatele o kerisiano e fa’aaogaina o latou tulaga tofi maualuluga e tuulafoa’I atu ai o latou

uso ma tuafafine i le ti’apolo. Mo se faataitaiga, o ai e sulu iai se tamaitai talavou pe a maua i le maitaga ae le’i fa’aipoipo? Uso fa’aolaina po’o i latou e le’i fa’aolaina? I le tele o taimi, e lau e tagata o lana ‘aulotu o le talitane ma fulitua iai, ua lagona e ia ua tuulafoaiina, peitai ane, ua alolofa ma tausia e tagata lē faatuatua. Afai ua faamanu’alia ni fitafita, latou te mana’omia nisi e fesoasoani e fusifusi i o latou manu’a ina ia mafai ai ona toe tutula’i mai i luga. Afai o le fesoasoani latou te maua e mai tagata o le togalauapiga a le fili, e ono le mafai ona latou toe foi mai i la latou togalauapiga. O le mafua’aga lea e tele ai tagata e toe foi i tua ua faasolosolo atu lava i le loloto o le agasala. 

Latou te manatu latou te le toe maua se faamagaloga ma toe talia e latou aulotu, ma faamausali ai lo latou foi i tua i le agasala. O lo’o taumafai le Agaga Pa’ia e fa’atauanau mai i le lotu, a ua musuā nei tagata ona ua fefefe i le fa’asalaina e tagata sa tatau ona mua’i alolofa iai latou. 

Le ‘au pele, afai e paū se tagata faaolaina, ‘aua ete fa’asalaina lena tagata. ‘Aua foi nei e fa’asalalauina ni fa’amatalaga fea’vea’i e faatatau ia te ia, ae taumafai e fa’amaopoopo mai isi Kerisiano e tatalo mo ia ma asiasi atu iai ina ia toe fa’afoi mai i le Atua. O le molimau lena a Iopu i le Iopu 4:3-4. 

Fa‘auta mai, na e apoapoa‘i atu i tagata e to‘atele, na e fa‘amalosia lima vaivai. O au ‘upu sa fa‘amautūina ai lē sa tautevateva, sa e fa‘amalosia fo‘i tulivae sa vaivai.

Fa’aali atu le alofa i so’o se tagata fa’aolaina e te iloa o manaomia se faamalosi’au, vili iai pe momoli iai se feau tusitusia e faailoa iai lou naunau e fesoasoani ia te ia i so’o se taimi, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 15 IULAI 2024

(tusia e Pastor EA Adeboye)

Manatu Autu: O leTulafono o le amiotonu(The Law of righteouness)

Tauloto -Tusi Paia– Faataoto 21:21 ‘O lē ‘ua tausisi i le amiotonu ma le alofa, e maua e ia le ola, ma le amiotonu, ma le vi‘iga..”  '

Faitauga – Tusi Paia – Teuteronome 28:1-15

O le tulafono o le amiotonu o se Tulafono e iloa e le toatele o tagata ae seasea ona usitai iai. E faigofie, usitai I le Atua ona faasilisiliina lea o oe (Teuteronome 28:1). Na fetalai mai ai Iesu e faapea I le Mataio 6:33

'A ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou. '

Afai e te saili le amiotonu a le Atua ma saili e faia mea ma le tonu i lana silafaga, e  mautinoa, o le oa ma le tamaoaiga o loo saili e le toatele o le a mulimuli ia te oe e te matua maofa ai. O le tulafono lenei e le mafai ona faatoilaloina. 

o’o soifua lou tama faaleagaga o Pa Josiah Akindayomi, e masani ona faapea mai o mea e maua e lou tama e tausia ai oe. Fai mai le Roma 6:16 o lē tou te tu‘uina atu i ai ‘outou e fai ma ‘au‘auna e ‘ana‘ana i ai, o ana ‘au‘auna ‘outou tou te ‘ana‘ana i ai.O lona uiga afai e usitai se tagata i le tiapolo ma faia le agasala, o lona uiga e tausia e le tiapolo lea tagata i mea na te maua. E faapena foi se tagata e usitai i le Alii, e tausia o ia e le Atua i mea na te maua. E leai seisi mea o loo maua i le tiapolo e ese mai le fasioti, gaoi ma le faaumatia (Ioane 10:10), afai e usitai iai se tagata, o le mea lena na te maua. Afai e te usitai ia Keriso ma ola i le amiotonu, i le Ioane 10;10 lava, o loo faapea mai e na te ofoina atu le ola, ia maua ai atili. 

Le au pele e, e leai ma se mea e maua i le agasala. O mea e foliga mai o mea e maua i le faia o le agasala, o mailei a le tiapolo. A taimafai se tuli manu e fasia se manu I le vaomatua, e na te tuua ni meaai e fiafia iai lea manu i ni mailei. Ao taumafai le manu e ai ia meaai, e maua ai I le mailei. Mataala poo meaai a ai o lo’o e aia. Afai o loo e solia le upu a le Atua ina ia e maua ia meaai, ua na o se mailei a le tiapolo e maua ai lou agaga. O so’o se mea e faaaogaina e tuli manu e maua ai le manu, e le faatusalia I le manu latou te maua mai. 

E le mafai e le tiapolo ona avatu se mea ia te oe e aunoa ma le faoa o se mea mai ia te oe. Usitai I le Tulafono o le amiotonu ona e olioli lea I faamanuiaga a le Atua. E siitia oe ma faasilisiliina oe e le amiotonu ao le amioletonu e te pau ai I lalo. Filifili ma le tonu, I le suafa o Iesu, Amene. 

OPEN HEAVENS

MATALA LE LAGI MO LE ASO SA 14 IULAI 2024

(tusia e Pastor EA Adeboye)

Manatu Autu: O leTulafono o mafutaga (The Law of association)

Tauloto -Tusi Paia– 1 Korinito15:33 ‘Aua ne‘i fa‘asesēina ‘outou, “O lē feoa‘i ma ē amio leaga e leaga ai amio lelei.”  '

Faitauga – Tusi Paia – 2 Korinito 6:14-18

O le tulafono o mafutaga o se tulafono malosi tele e tatau i tagata soifua uma i le lalolagi ona malamalama ai ma fa’aaogā sa’o. O lenei tulafono e lē faigofie ona iloa o lo’o galue mai, ma o le toatele o tagata latou te lē iloa o lo’o aafia ai i latou. Latou te lē iloa e tele se aafiaga o latou mafaufau ma amioga mai tagata e masani ona talatalanoa i ai. Fai mai le tulafono o mafutaga e suia le tagata faapei o lē la te mafuta. I se isi fa’aupuga afai e mafuta se uso ma tagata popoto, e poto ai. E faapenā fo’i pe a mafuta ma tagata vālea, e i’u fo’i ina valea atu ai ma ia. O loo manino i le Faataoto 13:20:O lē latou te feoa‘i ma tagata popoto, e poto lava ia; a o le uō a ē vālelea, e leaga ai lava ia.

E masani ona faapea tagata matutua o Yoruland, “A umi ona tu’u faatasi se laulaau ma se fasimoli, e liu fasimoli fo’i.” E tatau ona filifili lelei ma le faaeteete tagata e te mafuta i ai. Afai o lau uo e lē o se tagata e te fia fa’ata’ita’i i ai, ua tatau ona faamuta i le taimi nei lua faigauō. Fa’auō i tagata popoto, e mafai ona fai ma lu’itau ia te oe, ma lua fefa’asoaa’i i manatu lelei. Aua e te uō i tagata e taumuimui ma e na o faafiafiaga e fia talanoa i ai pe a lua fa’atasi.

O le isi ituaiga mafutaga o ala o fesootaiga. O isi tagata o le tele o le taimi e alu i le matamata TV ma fa’asolosolo ai le Facebook ma isi uma faafiafiaga i luga o ala a fesootaiga. So’osemea e te faitau pe matamata ai, e tele lona aafiaga ia te oe. Afai e te faitau ma vaavaai i mea e maua ai a’oa’oga lelei, e una’ia ai oe e fai mea sili atu. So’ose tasi e faitau ma matamata I mea leaga e i’u ina fa’aleagaina e pei ona tatou vaai ai i le tatou upu tauloto o le asō.

O a ituaiga a’oa’oga o e matamata ai? O mafaufauga o ai o fafaga ai oe i luga o ala o fesootaiga? O pese a ai na e te faalogologo i ai? O mea nei e fausia le ituaiga tagata e i ai oe. A e mana’o e fa’aleleia lou tagata, sui au uō. A e mana’o e sili atu le lelei o lou olaga a’oa’oina I le poto salalau, mafuta i tagata atamamai ma fa’aa’oa’o ia i latou ua tulaga ese lo latou a’oa’oina, ona e vaai lea I le suiga lelei o au mataupu. A e mana’o e tupu lou olaga kerisiano, su’e ni au uo e faitau a latou Tusi Paia ma tatalo i aso uma e lē aunoa. E lē pine ae e faapenā.

Filifili tatau au uō ma fa’aeteete i ituaiga a’oa’oga e te talia. O i latou o ni ata e te fia fa’ata’ita’i i ai? Afai e leai, sui nei loa. E tele le sao o au uo e faaleleia pe fa’aleaga lou olaga. I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 13 IULAI 2024

(tusia e Pastor EA Adeboye)

Manatu Autu: O leTulafono o le Loto Gatasi (The Law of unity)

Tauloto -Tusi Paia– 1 Korinito 1:10 ‘Le au uso e, ‘ou te ‘ai‘oi atu ‘iā te ‘outou i le suafa o lo tatou Ali‘i o Iesu Keriso, ‘ina ‘ia tasi la ‘outou ‘upu uma lava, ‘ina ne‘i i ai ni māseiga ‘iā te ‘outou; a ‘ia maopoopo lava i le loto e tasi ma le manatu e tasi '

Faitauga – Tusi Paia – Kenese 11:1-8

O le tulafono o le loto gatasi o le tasi o tulafono aupito sili ona ofoofogia na fa’atuina e le Atua i luga o le fogaeleele. Fai mai le Tusi Paia o le a tulia e le toatasi le to’a afe ae tutuli e le toalua le sefulu o afe (Teuterenome 32:30). O lenei fua e lē faamaonia fa’a matematika peita’i ua o’u malamalama ai e sa’o.

Fai mai Iesu i le Mataio 18:19 afai e loto gatasi se toalua i se mea la te ole atu ai, e faia lava e lona Tamā o I le lagi. I se isi fa’aupuga afai na e tatalo ae le’i maua se tali, su’e se isi e loto faatasi ma oe e te lua tatalo ona e maua ai lea o le tali. I le Salamo 133:1-2, o le loto gatasi i le va o uso e faatusa i le fa’au’uga. O le loto gatasi o se auupega malosi tele; e o’o i le Agaga Paia, na fa’atoā afio ifo ina ua loto gatasi le ‘au so’o i le afeafe aupitoaluga (Galuega 2:1-4). E i ai mea e lē mafai ona e maua se’i vaganā ua e faatino le tulafono o le loto gatasi. O se tane ma sana avā e misa so’o, o loo o la polokaina i laua lava mai le tele o mea matagofie. Afai e mafai ona faamaulalo o la loto, fa’auma o la fe’ese’esea’iga, ma malilie faatasi, o le a avea i laua ma malosiaga tele, e fa’ato’ilalo o la faafitauli uma, ma o le a leai se mea la te lē maua. O tagata o le ekalesia o e fai ma masani le talanoa faa leaga i isi poo le tauaimisa i lo latou lava va, latou te lē o iloa faamanuiaga ua o latou misia.

I la tatou Tusi Paia faitau o le asō, sa potopoto faatasi ni tagata e fau se ‘olo ia tau i le lagi. Na silasila mai le Atua ia i latou ma faapea, e taunuu lo latou mana’o ma a latou fuafuaga auā sa loto gatasi. O le mea lenei na tupu i le afe tausaga ua mavae a’o le’i i ai ni fesootaiga vave fa’aneionapō. I se isi fa’aupuga, na fetalai le Atua, tusa pe lē lava puna’oa mana’omia mo le galuega, e mafai lava e le loto gatasi o nei tagata ona fausia se ‘olo o loo manana’o ai.

I po po fou o le RCCG, sa leai ni matou tupe. Leai fo’i se tupe e totogi uma ai le ‘au faigaluega, peita’i sa o matou loto gatasi. Ona o lea, sa mafai ai ona o matou faia mea tetele, e aofia ai le fausiaina o le fale aupito sili ona telē o lea vaitaimi. E matuā leai lipi se mea e maua pe a fevaevaea’i. Fai mai le tusi o Mataio 12:25 O aiga uma e fevaevaea’i e lē tumau ia. So’ose taimi e mana’o ai le tiapolo e fa’aumatia se polokalame a le Atua pe taofia kerisiano mai le maua o faamanuiaga, na te faatupu fe’ese’esea’iga i lo latou va.

O se tasi o le tele o mafuaaga ou te faafetaia ai le Atua mo le toalua na ia foaiina mo a’u, ona o ia o se tinā na te faatupuina le fealofani ma le loto gatasi i soosemea e i ai. Na te aumaia faatasi tagata; na te lē faatagaina se fevaevaea’i i soo se faalapotopotoga e auai. E o’o i lo’u aiga potopoto, o ia le malosiaga e tu’u faatasia tagata uma. E matuā lē faatagā e tinā se tagata fa’a’ū’ū i le mea e i ai, poo le a le faafitauli, e tatau lava ona fo’ia a’o le’i moe lea uso i lea aso. O nei uiga o se meaalofa fa’ale lagi ua fai ma faamanuiaga ia te a’u ma le galuega a le Atua.

Aua ne’i tuua se avanoa i le fevaevaea’i. Aua ne’i e fa’ataga le tiapolo e manumalō; aua ne’i e taliaina le fevaevaea’i.

Tatalo

Tamā faamolemole ia tumau ma faateleina au faamanuiaga i le tinā o le ekalesia RCCG ma i matou uma a’o faamanatuina lona aso soifua i le asō. I le suafa o Iesu, Amene.

<

OPEN HEAVENS

MATALA LE LAGI MO LE ASO FARAILE 12 IULAI 2024

(tusia e Pastor EA Adeboye)

Manatu Autu: Tulafono o le Galue (The Law of work)

Tauloto -Tusi Paia– Faataoto 14:23 ‘O i ai le mau i galuega uma; a o le ‘upu a laugutu, na o le mativa e i‘u i ai. '

Faitauga – Tusi Paia – Mataio 25:14-30

O le Tulafono o le galue e tutusa lava ma le Tulafono muamua a Newton I le faagaoioi o mea, e faapea mai e leai se mea e mafai ona gaioioi seia iai seisi malosiaga ese e tuleia. I nisi faaupuga, e leai se mea e mafai ona gaioioi, seiloga e iai se tagata e tago e faagaioioi. 

O se olaga faigaluega o se tagata e le mafai ona agai I luma seiloga e iai se galuega e faia ina ia mafai ona alualu i luma, e faapena foi I se ulugalii faaipoipo, e le mafai ona matagofie sei vagana ua iai se galuega e faia faatasi e le tane ma le fafine. E le mafai ona tuputupu le ola faaleagaga o le tagata sei vagana e iai se galuega e faia. E leai se mea e maua fua. Fai mai le 2 Korinito 3:10, o i latou e leai se galulue, e le tatau ona aai. E iai tagata e manatu, ona e iai meaalofa ma taleni iai latou, o le a lelei lava mea uma i taimi uma – e matua pepelo lea tulaga. E iai nisi o la’u fanau e faapea mai, e mafai e le galue malosi ona sili atu i lo le taleni pe afai e lē galueaina malosi le taleni. 

I le Mataio 25:14-30, na avatu e le matai i ana auauna ni taleni ma se faatonuga faigofie, ’ia faafaigaluega ma galueaina’. E le mafai ona e tuua au taleni e lē faaaogaina pe afai e te naunau e fua mai ni fua se tele. E tatau ona e galueaina au taleni pe afai e te fia maua ni taui lelei. O le auauna e leai sana galuega na faia i le taleni, na matua faasalaina. Afai e le galueaina e se tagata faatuatua so’o se mea na foai atu iai e le Atua, e matua faasalaina lea tagata i le iuga.

E iai se aso na ma fetaui ai ma se faifeau faatoa tau amata i le galuega a le Atua i le taimi na ou amata ai foi. Na ia faapea mai ia te a’u, ’e agalelei le Atua ia te a’u’. Ou te talitonu foi iai aua e faapena foi ona lelei le Atua ia te a’u. Ua na o le alofa tunoa lava o le Atua ua mafai ai ona ou oo mai i le tulaga i le taimi nei. E leai ma seisi e mafai ona faapea mai o a’u o se tagata paie. Ina ua ou faatoa amata, na aumai e le Atua ni faaperofataga, o meaalofa o le Agaga Paia ma taleni, peitai o nei mea uma semanu e le faaleaogaina pe ana ou le galue malosi. O le mea moni, o le tele o le punaoa na tuuina mai e le Atua ia te oe, o le malosi atu lena o lau galue aua fai mai le Luka 12:48 ’Auā o lē ‘ua foa‘iina atu i ai o mea e tele, e su‘eina atu fo‘i ‘iā te ia o mea e tele. 

Le au uso e,afai e lei saunia lou tagata e galue, o lona uiga e lei saunia o ia e manumalo ma manuia i le olaga nei. E leai ma se alofaga o se tagata mai aafiaga o lenei tulafono. Po’o le a lava le alofaga o lo’o e manatu iai ua le mafai ai ona galue, e le tatau ona amanaia aua e toatele tagata na ui i mea e sili atu ona faigata. O tagata e ausia mea tetele e leai ni alofaga e latou te faia, ua na o le galulue lava, ma taumafai e ausia mea e aupito maualuga ma lelei i soo se siosiomaga o loo soifua ai. E le mafai ona e taofia le tulafono e galue, ma e manatu e te ausia manuia, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 11 IULAI 2024

(tusia e Pastor EA Adeboye)

Manatu Autu: Tulafono o malologa (The Law of rest)

Tauloto -Tusi Paia– Eperu 4:10 ‘'Auā o lē ‘ua sao atu i lona mālōlōga, ‘ua mālōlō fo‘i o ia i ana lava galuega, fa‘apei o le Atua i ana lava. '

Faitauga – Tusi Paia – Esoto 20:8-11

Ina ua maea le foafoaga o le lalolagi, ona malolo ai lea o le Atua i le aso fitu ( Kenese 2:2 ) E faapefea ona manaʻomia e le Atua matautia e ona le malosi uma lava se mālōlōga? E le manaomia e le Atua ona malolo. E le vaivai o ia, ana faapea e vaivai o ia, semanu e le itiiti ifo ma le faatasi i le afe o tausaga e malolo ai, talu ona ia faia le lalolagi. O lo’o faapea mai le tusi a Salamo 121:4, e le tulemoe o ia, e le moe lava. O le mea lea, o le malolo i le aso fitu e le mo Ia ae mo i tatou. Sa ia faia se tulafono e tatau ona tatou mulimuli ai mo lo tatou lava manuia - o le tulafono o le malologa.

O tulafono o malologa e tatau ona faaaoga i o tatou fanua, o tatou manu faapea tatou tagata faigaluega. ‘Aua ne‘i e tu‘uina lau ‘au‘auna e galue i aso e fitu o le vaiaso; e tatau ona iai se aso e tasi e mālōlō ai ma faafouina ai lona malosi ( Esoto 23:12 ) E tāua tele lenei malologa mo i latou uma, ina ia faafoisia  ai o latou malosi e galulue ai i le vaiaso fou. E lē gata i lea, o le a e maua ni fua e sili ona lelei mai lau faatoʻaga pe afai e te tuua e mālōlō mo le tausaga e tasi i tausaga taʻi fitu (Levitiko 25:4). O se tulafono o le a matua faateleina ai au seleselega.

Afai e te manatu o le galue mo aso e fitu, e sili atu lou tamaoaiga e maua ai, nai lo le galue mo le 6 o aso i vaiaso uma, e le sa’o lena manatu. E i ai se fale'aiga i Amerika e tatala mo na'o le 6 aso, ae e tapunia i le Aso Sa. O lena faleaiga o se tasi lea o faleaiga e maoae lona tamaoaiga i le lalolagi. O le malolo mo le aso e tasi i le vaiaso na matua faateleina ai tupe maua a lenei pisinisi nai lo le tatala mo le 7 aso o le vaiaso.

O le galue faifai pea e aunoa ma se malologa, e faaleagaina ai lou soifua maloloina. E toatele tagata ua maliliu ona ua le malolo e pei ona tatau ai. O le tetee atu i lenei tulafono, e lamatia ai lou soifua maloloina ma lou ola. Sa ou ta’u atu i se tasi o o’u atalii le uiga o lenei tulafono o le malologa, na ia tilotilo mai ia te a’u i se auala malie e peiseai o loo faapea mai, ’O oe ? E te malolo?’ Sa ou fai atu ia te ia, ioe, ou te malolo, e ui atonu na te le iloaina. O le mea moni, e i ai vaitau o le tausaga ou te le alu ai i se mea; na o lo’u nofo lava i se nofoaga filemu, ou te malolo ai. E lē toe aogā loʻu tino i le Atua pe a ou faaleagaina, ona o loʻu maelega ma naunau i le galuega a le Atua, e le faapea ou te lē amanaʻia ai le tulafono o le mālōlōga. Galue malosi, peitai e tatau ona e faaavanoaina le taimi e malolo ai ina ia aua nei faaitiitia lou malosi, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 10 IULAI 2024

(tusia e Pastor EA Adeboye)

Manatu Autu: Tulafono o lē Faamuamua (The Law of priority)

Tauloto -Tusi Paia– Esoto 20:3 ‘Aua ne‘i e fai mo oe ni atua ‘ese i o‘u luma’.

Faitauga – Tusi Paia – Mataio 6:25-33

O lo’o faapea mai le Tulafono o le mea e ave iai lau faamuamua, afai e te faamuamua se mea, o le a o gatasi uma isi mea. O lo’o faamanino mai e Iesu le Tulafono o mea e ave iai le faamuamua I le Mataio 6:25-33. Afai e saili e se tagata nisi mea e sili atu I le Atua, o le a faigata i lea tagata, peitai afai e saili e lea tagata ia faamuamua le Atua, e faaopoopo uma isi mea ia te ia. 

O le mea e ave iai lau faamuamua e fua iai le ituaiga olaga e te soifua ai. Afai e te maua le uluai fua mai so’o se galuega, e tatau ona e alu e ave I le Atua. O le faailoga lea e te ava ma faamuamua le Atua, ona o lea, o isi uma seleselega o le a mautu (Faataoto 3:9-10). 

E toatele tagata e faamuamua le tupe I lo le Atua, ma o le mafuaaga lea latou te ui ai I faanoanoaga e le mafai e tupe ona faatauina. O nisi tagata mauoa e le mafai ona momoe I le po, ma e mautinoa latou te naunau e fefaatauai lo latou tamaoaiga ae ia maua le filemu ma le olioli. O le faafitauli, o mea po’o tagata o lo’o ave iai la latou faamuamua. O le tagata mauoa I le Mataio 19:16-22, na ia iloa o lo’o iai se mea o misi I lona olaga. Sa ia usitai i tulafono ma e tele naua ana tupe, peitai o lo’o ia lagona le lē atoatoa. Na fetaiai ma Iesu i le tau sailia o se tali i lona faafitauli, ma na ta’u atu iai e Iesu, o le faafitauli e mafua mai mea o lo’o ave iai lana faamuamua, na ia faamuamua le tupe i lo le mulimuli ia Iesu. 

A faatonu oe e le Atua e faatau mea uma o lo’o ia te oe, faagalo au miti, ae alu e galue tumau i le galuega a le Atua, e te faia? o lau tali e iloa ai pe e te faamuamua le Atua pe leai. A e suesue i le Tusi Paia, e te iloa ai o i latou na faamuamua i le Atua na matua tele lo latou taui o faamanuiaga. Mo se faataitaiga, o faamanuiaga a Aperaamo o lo’o iai e o’o mai i le aso, na maua ona na ia ave le faamuamua i le Atua i mea uma, e o’o i lona atalii e toatasi (Kenese 21:10). O a’u o se molimau ola o faamanuiaga e maua e se tagata e faamuamua le Atua. Na ou tuua la’u galuega o se faiaoga i le Iunivesite ma a’u miti ia avea ma pule aoao pito laitiiti i se Iunivesite i Aferika atoa, e avea ma taitai aoao o se Ekalesia o lana tupe maua i le masina e maualalo mamao atu i lo’u totogi sa iai. O le aso, o le igoa o Adeboye ua lauiloa i le lalolagi atoa aua foi sa ave la’u faamuamua I le Atua i lo a’u miti. 

O le Atua, o le Atua e fuā (Esoto 34:14); e le mafai ona lona lua o ia i lou loto. O so’o se mea po’o so’o se taggata o lo’o ave iai lau faamuamua e sili atu i le Atua, ua avea ma atua ia te oe. O lo’o fetalai le Atua, ia aua nei fai mo oe ni atua ese i ona luma (Esoto 20:3). E tatau ona e alofa ia te ia ma lou loto atoa, agaga atoa ma lou manatu atoa, o le poloaiga sili lenei (Mataio 22:37-38). Afai e te faia lenei mea, o le a ō gatasi mea uma mo oe i lou olaga. Ia faamuamua le Atua. 

Tatalo

Tama, ou te faamuamua ia te oe i so’o se vaega o lo’u olaga. Faamolemole ia aua lava nei iai seisi mea e sili atu ia te oe i lo’u olaga, i le suafa o Iesu, Amene.    

OPEN HEAVENS

MATALA LE LAGI MO LE ASO LUA 9 IULAI 2024

(tusia e Pastor EA Adeboye)

Manatu Autu: Tulafono o seleselega 2 (The Law of Harvest 2)

Tauloto -Tusi Paia– Mataio 13:8 ‘'A ‘ua pa‘ū isi i le ‘ele‘ele lelei, ‘ona fua mai ai lea e ta‘iselau i nisi ma ta‘ionogafulu i nisi ma ta‘itolugafulu i nisi. '

Faitauga – Tusi Paia – Mataio 13:3-9

O le asō, o le a fa’ai’uina la’u a’oa’oga i le tulafono o le seleselega. Ona o a’u o le tagata o le matematika, sa mua’i a’oa’oina a’u, a ausia tapulaa mo’omia, ona tumau lea o se tulafono. O se fa’ataitaiga, o le tulafono o le fegasoloai o mea I le eleele (gravity), e faigofie lava,  a togi i luga se mea, e pa’u mai I lalo i le eleele. Ae afai e ‘ausia tapulaa o le tulafono o le fegasoloa’iga o mea i le ‘ea (aerodynamics), e ui i le malosi maumaututu o le tulafono o le gravity, e soloia lava. 

Ina ia mautu le faatinoina o se tulafono, e tatau ona ausia ni tapulaa. O ananafi sa ou talanoa ai i le maoa’e o le malosi o le tulafono o le seleselega, ae ui ina mata’utia le malosi, faatoa mautu lona tino mai pe afai e te lulu i vaega ma taimi talafeagai. Muamua, e tatau ona lulu i se ‘eleele lelei. Sa ou ta’ua I isi lesona i masina ua tuanai atu, sa ulutala: ’O le taui o Fatu Luluina’, na ou fa’amatalaina lo’u luluina o fatu i se galuega a le Atua i atunuu i fafo, ae uma ane, e leai se fua mai. Sa fa’aalia mai e le Atua i sa’u miti, o le eleele sa ou lulu ai, o le papa ma’a. E iai nisi o galuega a le Atua ma nisi o faife’au e leai ni mafutaga vavalalata ma le Atua. Afai e te lulu iai ma sou manatu ua e faia se taulaga i le Atua, peita’i e le o’o i le Atua, auā fo’i e papa ma’a le ‘eleele.

O le mafua’aga lena e tatau ai ona e iloa lelei eleele o lo’o luluina iai au fatu totō. Fai mai le Mataio 10: 41 afai e te avatu i se perofeta, e te mauaina le taui a le perofeta. E iai tagata e fa’apea mai o latou o ni perofeta, peitai e le iloa i latou e le Atua. Ia iai lau tofāla’iga manino mai le Atua ae e te lei lūlūina atu i se ‘eleele. Ae le gata i lea, aua nei e luluina ma le loto tigā. Afai e te lulu ona ua fa’amalosia oe e foai, e le talia e le Atua lau taulaga. Fai mai le 2 Korinito 9:7 e fiafia le Atua i le tagata e foa’I ma le lotomalie. E mafai lava ona e lulū ma faitaulaga e maualuga le tau ia te oe, ua faigata ona faamatuu atu ma e oo ina maligi ai ou loimata ao faia, peitai, e le tatau ona e lūlūina ma le loto tiga, e tatau ona e lūlū ma le lotomalie.

O tausaga ua tuana’i sa ou auai i se sauniga lotu, sa ou maitauina tagata o loo taitaia le sauniga, ua faia ni valaau mo foai ma lafoga eseese. Sa lagona lo’u ita ma a’o ou tago e lafo la’u taulaga, sa musumusuina a’u e le Atua ma faapea mai: “Ou te le mana’omia au tupe.” Na vave ona ou salamo ma ua suia lou manatu. E le o se Atua ‘aisi! Afai e te aumai sau taulaga I le Atua ma le loto tiga, e ono lafoina i le ‘ato ao lafoga, peitai e le taliaina e le Atua, ma e leai foi se fua e te mauaina mai. 

Le ‘au pelē, afai e te naunau ia tino mai le tulafono o le seleselega I lou olaga, fesili i le Atua na te fa’aali atu se eleele e te lūlū iai, a maua, ia faamautinoa e te lulu iai ma lou loto malie. Lūlū i tapulaa talafeagai ona e maua lea o se seleselega lelei, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 8 IULAI 2024

(tusia e Pastor EA Adeboye)

Manatu Autu: Tulafono o seleselega 1 (The Law of Harvest 1)

Tauloto -Tusi Paia– Kenese 8:22 ‘O aso uma o le lalolagi e lē toe utuvā ai, o tausaga e lūlū ai ma tausaga e selesele ai, o le ma‘alili fo‘i ma le vevela, o le vaito‘elau ma le vaipalolo, o le ao fo‘i ma le pō.’

Faitauga – Tusi Paia – Luka 6:37-38

O tulafono o seleselega o se tasi o tulafono malosi ua tuuina e le Atua i le lalolagi nei. E matua malosi e o’o i le Atua e le mafai ona ia solia. I le Mareko 14:36, na tatalo Iesu ma le finafinau, na afutoto ma tatalo ia suia fuafuaga a le Atua mo le faaolataga e aua nei alu i le satauro e maliu mo tagata o le lalolagi atoa. Na tali le Atua, ’leai!’. Na tali le Atua leai ona o le tulafono o seleselega, na ia lulu i lona atalii e toatasi ina ia maua le seleselega o le toatele o fanau i lona malo (Roma 8:29, Eperu 2:10, 1 Korinito 15:20). O le tulafono o seleselega o loo faapea mai o soo se mea e lulu e le tagata, e na te selesele foi. O loo faamauina lelei lea tulaga I le Kalatia 6:7:

7‘Aua ne‘i fa‘asesēina ‘outou, e lē ulagia le Atua auā o le mea e lūlūina e le tagata, o le mea lava lea e seleseleina mai ai e ia. 

O leisi tulaga matagofie I le tulafono o le seleselega o lenei, e te selesele e sili atu I mea na e lulu (Hosea 8:7). O lea la, afai e te faia se foai I le Ekalesia po’o e matitiva, o loo e luluina ni fatu, ma o soo se mea e te luluina, e te seleseleina  e eseese tulaga e fua mai ai. O le Tulafono lenei e le mafai e seisi ona taofia pe soloia. 

O le tulafono o seleselega e sili atu ona malosi pe a faatino ini vaega se lua. Muamua o le Tulafono o uluai fua, a’o lona lua o le tulafono o le sefuluai. O nei tulafono e lua, e tatalaina avanoa mo faamanuiaga e sautualasi. E na o le lua lava vaega o le Tusi Paia o lo’o faatonu mai e le Atua, a e faia se mea, e na te faamanuia I lea tagata e matua tele faulai ua le lava fale e teu ai, o le Faataoto 3:9-10 ma le Malaki 3:10. O nei fuaitau e lua, o lo’o faaalia manino mai ai mealilo e maua ai faamanuiaga e sautualasi ma faulai. O le tele o taimi a tatalo tagata mo faamanuiaga e tafe pea, o le finagalo o le Atua ia latou usitai I Tulafono o uluai fua ma le sefuluai ina ia maua faamanuiaga o lo’o saili iai. E mafai ona taofia le tulaga tau lelava le faasoa I le au kerisiano faatuatua pe afai latou te usitaia lenei Tulafono I latou galuega, pisinisi ma le foai. 

O le Atua Silisili Ese na ia faia le tulafono o seleselega ma o lona finagalo ia tatou usitaia. Mo se faataitaiga, ina ua ou faalogo I le Tulafono o sefuluai, e matua le fetaui ma lou mafaufau ae na ou usitai pea. Sa ou manatu, e le taitai lava le selau pasene o lou totogi e tausi ai au, e faapefea la ona lava ma totoe le iva sefulu pasene e tausi ai au pe afai e maea ona aveese le sefuluai e sefulu pasene? Faafetai I le Atua na ou filifili e tofotofo I le Tulafono o le sefuluai aua ua faateia au ina ua ou iloa, e moni lava. E sili atu mea e te selesele I lo mea na e lulu, I le suafa o Iesu, Amene.

OPEN HEAVENS

MATALA LE LAGI MO LE ASO SA 7 IULAI 2024

(tusia e Pastor EA Adeboye)

Manatu Autu: O le Afi a le Atua e Fa’amamāina ai (God’s Refining Fire)

Tauloto -Tusi Paia– 1 Peteru 1:7 ‘O le tofotofo fo‘i o lo ‘outou fa‘atuatua, e silisili ‘ona aogā i le auro e fa‘aumatia, e ui lava ‘ina tofotofoina i le afi, e ‘avea ma mea e i‘u i le vi‘iga, ma le mamalu, ma le manuia pe a fa‘aalia mai Iesu Keriso.'

Faitauga – Tusi Paia – Iopu 23:6-12

O tupu, e masani ona o latou maua mea aupito sili ona lelei. O lo tatou Atua o le tupu o tupu, ma e finagalo ia silisili ona lelei i latou o ē ua lafoai o latou ola iā te ia. Ina ia ausia lea tulaga, e fa’aui i latou e le Atua i le ala e fa’amamāina ma tuueseina vaivaiga ia taunuu ai i le lelei silisili e le’i o’o muamua i ai. Faapei ona tu’u e se fai u’amea le auro i le afi e fa’amamā atili ai. O le a ta’ita’ia oe e le Atua i se afi e fa’amamāina ma fa’aleleia atili ai oe. E te loto e te ui i le Afi e fa’amamāina e le Atua? Na fetalai le Atua i le Ioane 15:2: 

O la uma lava o ‘iā te a‘u e lē fua, e ‘ave‘eseina e ia; a o la uma e fua, e teuteu e ia, ‘ina ‘ia fua mai ai atili.

A e mana’o e avea oe ma lalā e pipi’i i le vine ma fua mo le Atua, e tatau ona e sauni e ofo lou tagata e toe teuteu ma fa’aleleia atili. E faigata peita’i o le a atili ai ona fua taufuifui lou olaga. I le galuega teuteu ma tapu’e, o le a aveesea e le Atua mea o loo finau atu ia te ia, mai lou loto. E ono faapea atu ia te oe aua ne’i e toe faia ni mea teuteu ‘ila’ila, e lē faapea o se agasala lou faia peita’i e mafai ona fai ma faalavelave i le fua tulu’i o lou soifua. E ono faataga e le Atua sauaga e o’o atu ia te oe ia e latalata atili atu ai ia te ia. A e fa’alatalata i le Atua o le a atili ona e foliga iā te ia ma atili fua lou olaga. E mafai ona ia taofia nisi o mea mai ia te oe, mo se taimi e tofotofo ai lou faatuatua, ina ia sao ona lelei ai outou, ia leai se mea e tasi e mativa ai (Iakopo 1:2-4).

I le taunuuga o le galuega e fa’amamāina, o le a avea oe ma tagata aoga ma tāua, o le a fetuleni mai tagata e faamanuia ia te oe. E pei ona manana’o tagata uma i le auro māo’i, o le a avea oe ma mataaga i lau augātupulaga. Aua o tagata uma e manana’o i fua aupito sili ona lelei, o le a omai tagata mai itu uma o le lalolagi e ao ma taetae fua lelei taugata e maua mai ia te oe. O i latou e fa’ai’uina manuia le galuega fa’amamāina a le Atua i o latou soifua e avea ma tagata lauiloa i la latou augātupulaga aua e latou te tauave ni vaega taua tele e mananao ma naunau iai le lalolagi atoa. O i latou e saunia fofo o so’o se faafitauli ma o le vaaiga a tagata, o i latou o se faamanuiaga. E le matitiva i latou aua o lo latou tāua e faigofie ai ona latou maua tupe mai so’o se itu o le lalolagi. Latou te lē tau faanoi ma augani ia tatala atu ni faitoto’a mo i latou, o latou igoa e talaia faitotoa. Ua e sauni e fa’amamāina oe e le Atua? I le suafa o Iesu, Amene.