Samoan Devotional

OPEN HEAVENS

MATALA LE LAGI MO LE ASO FARAILE 26 IULAI 2024

(tusia e Pastor EA Adeboye)

Manatu Autu: Tagata mulimuli lelei 2 (Good Followership 2)

Tauloto -Tusi Paia– Esoto 17:12 'Sa mamafa lima o Mose, ‘ona la ‘ave lea o le ma‘a, ma tu‘u ai i ona lalo, ‘ona ti‘eti‘e ai lea o ia; a o Arona ma Huro na la tāofi i luga ona lima, o le tasi i lea itū ma le tasi i lea itū; ‘ua mau ai ona lima ‘ina se‘ia goto le lā. '

Faitauga – Tusi Paia – Esoto 17:8-13

O ananafi, na ou talanoa atu, o le gauai ma usitai i se taitai ma saili i le manuia o tagata lautele i lo le manuia o se tagata e toatasi, o se uiga lelei o se tagata e mulimuli. O le asō o le a ou talanoa atu i isi uiga faaalia o se tagata mulimuli lelei. 

O taitai, e le faapea e matautia sona mana, e latou te manaomia foi le fesoasoani. O tagata mulimuli lelei e latou te iloa ma matau lelei ni mea o loo manaomia e o latou taitai, ona latou foai atu lea ae lei talosaga mai. E latou te mataala ma vaai lelei poo a vaega o loo manaomia ai e taitai le fesoasoani, ona latou saunia lea o le fesoasoani o lo’o manaomia. 

I le faitauga mai le Tusi Paia o le aso, e lei talosaga mai Mose mo le fesoasoani a Arona ma Huro. E lei faamalamalamaina e Mose le mafuaaga na sisii ma faaloaloa atu ai ona lima i le vaega o loo tau ai le taua. Na la vaai atu o faaloaloa lima o Mose ma la maitaua, o loo latou manumalo ao faia lea tulaga. Ua la vaai atu ua vaivai ma mamafa lima o Mose, ona la o atu lea, faanofo i lalo Mose i se maa ae ua la taofia i luga ona lima. O ni tagata mulimuli lelei, o le ituaiga e mafai ai e taitai ona aea so’o se mauga e ono tu i o latou ala. 

E iai taimi e te fesoasoani ai i lou taitai i taimi e le talafeagai ma oe. Ina ua fesoasoani atu Huro ma Arona ia Mose, e le faapea sa nonofo I lalo, ma e lei iai nisi na fesoasoani e taofia I luga o la lima. E leiloa pe sa matua lelavava, peitai sa la tulai pea ma taofi I luga lima o Mose seia uma le taua. E iai taimi e te tulai mai e fesoasoani pe a vaivai lou taitai, e ono talie nisi ma ula ia te oe, pe lau foi oe ini upu. Peitai e le tatau ona e  tuua i lalo lou taitai, e tatau ona e faia mea uma ina ia mafai ona avatu le fesoasoani. 

O se mea leaga tele pe afai e faaaoga e tagata mulimuli vaivaiga o le taitai e faaleaga ai ia te ia. O nisi tagata mulimuli e amata ona gaoia tupe a le faapotopotoga ona latou te iloa lelei le vaivaigga o le taitai e le iloa fuafua ma vaai tupe. O nisi e o talai vaivaiga o lo latou taitai ina ia faaleaga lo latou tulaga tauleleia. A iai se tagata i le Tusi Paia e tatau ona e suesue lelei e tagata mulimuli, o Tavita. E ui na maea ona faauuina o ia e avea ma tupu o Isaraelu (1 Samuelu 16:13 ma sa ia faia ni galuega tetele (1 Samuelu 17:48, 1 Samuelu 18:5-7), e ui sa ia vaai i vaivaiga o Saulo (1 Samuelu 16:23), sa faamaoni pea o ia i le tupu o Saulo ma e leai se mea na ia faia e faaleaga ai le tupu. Ao sola ese o ia ina ia faasaoina lona ola ao sueina o ia e Saulo ina ia fasiotia, na ia maua le avanoa e fasioti ai Saulo, peitai na te lei faia (1 Samuelu 24:4-13). O se tagata mulimuli lelei lenei. O le iuga, e le gata na ia ausia le faamoemoega autu o lona olaga, ae o le Tupu o Tupu, o le ua taua foi o le alo o Tavita, na tupuga mai lona aiga (Faaaliga 22:16). Aua nei e taumafai e faaaoga le vaivaiga o lou taitai e faaleaga ai o ia. Fesoasoani iai latou, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 25 IULAI 2024

(tusia e Pastor EA Adeboye)

Manatu Autu: Tagata mulimuli lelei (Good Followership)

Tauloto -Tusi Paia– 1 Korinito 11:1 ‘‘'‘Ia ‘outou fa‘aa‘oa‘o mai ‘iā te a‘u, pei o a‘u ‘iā Keriso. '

Faitauga – Tusi Paia – 1 Tupu 19:19-21

E tele Tagata e talanoa o i latou o ni taʻitaʻi, ae e seasea ona e faʻalogo i ai latou o talanoa, e uiga i le taimi na mulimuli ma Tautua ai i se taitai. O le mea moni, e leai se taʻitaʻi e mafai ona manuia pe a aunoa ma ni tagata e mulimuli ia te ia. O taʻitaʻi e filifilia mai i e na mulimuli lelei ia te ia , o le lelei o le tagata mulimuli, o le lelei foi lea o le ituaiga taʻitaʻi.

O le gauai atu, o se tasi lea o uiga o se tagata galue ma mulimuli punouai i se taitai. E ese mai le galulue faatasi. E te galue faatasi pe afai ua e lotomalie i le faatonuga a le taʻitaʻi, peitai e te gauai pe a e usitai tusa pe e te loto malie iai pe leai. O le le gauai, e faailoa atu ai o le tagata mulimuli, o lo’o  galue mo lona lava tauleleia, a ua le galue  mo le lelei o le faapotopotoga atoa. O nisi tagata mulimuli ua gaoi, ona ua galue lava i le faamalieina o latou lava manaoga, ae faatuutuu i manaoaga o le faapotopotoga atoa.  Afai e faaauau pea lena amio e aunoa ma le faasa’oina ma ua avea loa le tagata na mulimuli ma taitai, o le a ave lava lana faamuamua ia te ia i taimi uma.

Na faaalia e Keasi lea tulaga i le 2 Tupu 5:20:27. E lei talia e Elisaia se mea mai ia Naamanu mo le faamaloloina o lona lepela, ae sa mulimuli Kiasi i lona lava manao e tete’e atu i le finagalo o le Alii, lea na fai ma sui o lona matai. Na ia aoina mai meaalofa mai iā Naamanu ma o’o ai loa i le maʻi lepela. Sa faamauina foi o Iuta le Sekara na gaoi mai tupe a le galuega(Ioane 12:6) o le mafuaaga lea na le mafai ai ona avea o ia o se tasi o aposetolo e talaia le tala lelei i le lalolagi atoa ina ua tuua e Iesu i latou. O se tagata faapena o le a le mafai lava ona avea ma se taitai lelei aua o le a sili atu lona fiafia e faamalieina ona lava manaoga, nai lo le fesoasoani i tagata lautele.

Atonu e faapea mai nisi, “Ou te le gaoi, ae na o lo’u le usitai i lo’u taitai ona ou te le fiafia ia te ia”. Peitai, e tutusa lava le le usitai ma le gaoi. I le Mataio 25:24-30, o le auauna na tuuina atu i ai le taleni e tasi e galueaina, na te lei gaoia le taleni, na ia nanaina ma lē fefaatauai e pei ona faatonuina ai, ona e le’i fiafia i le taitaiga a lona matai. E le'i ita le matai i lona le faafaigaluegaina e pei ona fa'atonuina ai, peitai, sa tatau ona ia tu'uina i se faletupe e maua mai ai tului. O le tuʻuina i le faletupe, e faailoa ai, e tusa lava pe le fiafia i lona matai, ae o lo’o lagolago i le manuia lautele o le faapotopotoga. O lea na taʻua ai o ia e lona matai o se auauna lē faamaoni. Na faasilisili e ia ona lava manuia, o ni uiga leaga nei o se tagata mulimuli po’o se taitai.

Le au pele e, afai e te manaʻo e avea oe ma taʻitaʻi lelei, e tatau ona avea muamua oe o se tagata mulimuli lelei e usitai i lona taitai ma faʻamuamua galuega mo le lelei o le toatele nai lo lona lelei, i le suafa o Iesu, Amene.

OPEN HEAVENS

MATALA LE LAGI MO LE ASO LULU 24 IULAI 2024

(tusia e Pastor EA Adeboye)

Manatu Autu: Tuputupu a’e I le faatuatua (Growing in faith)

Tauloto -Tusi Paia– Eperu 11:6 ‘‘A leai fo‘i se fa‘atuatua e lē mafai ‘ona fiafia mai o ia; auā e tatau i lē alu atu i le Atua ‘ona talitonu o lo‘o soifua o ia, o ia fo‘i na te tauia mai o ē matuā sā‘ili ‘iā te ia”

Faitauga – Tusi Paia – Mareko 11:12-24

O le faatuatua e tuputupu a’e e ala I le Upu a le Atua (Roma 10:17). O le tele ona e suesue I le Upu a le Atua, o le maualuga lena o lou faatuatua. E le gata I lea, a talanoa tuusa’o atu le Atua ia te oe, e faatupuina lou faatuatua. Mo se faataitaiga, ina ua faalogo Aperaamo o fetalai tuusa’o atu le Atua ia te ia o le a maua sana fanau toatele, na faatupuina lona faatuatua (Kenese 15:5-6). E tele le mana I le suesue o le Upu a le Atua ma faafofoga I lona siufofoga. 

Ina ua ou ole atu I le Atua mo se nofoaga mautotogi laititi i se vaega o le taulaga o Lagos, na ia faapea mai ia te a’u o le a ia aumaia se taulaga tele. E foliga o se mea e le talitonu iai seisi, peitai o lo’u faalogo tuusa’o I lona siufofoga, na faatupuina ai le faatuatua tele ia te a’u ma ua amata ona ou ta’u I tagata faaaliga na ou maua mai I le Atua. A fia faatupuina lou faatuatua, aua le na o le suesue I lana Upu ma tatalo, saili ia e faalogo I le siufofoga o le Atua e faatatau I lou soifua. O le taimi e te faalogo ai I lona siufofoga o faia se folafolaga mo oe, o le a avea lona siufofoga e matua faatupuina ai lou faatuatua. 

E le gata I lea, e pei ona malolosi musele ma maso o lou tina i le faia o faamalositino, faatupu lou faatuatua I le faatino ma savali ai. Afai e te talitonu ma faatuatua e faia e le Atua se mea mo oe, ae le taitai ona e gaoioi e faatino I le faatuatua, e le taitai tupu lou faatuatua. Ina ua ou iloa ma faatuatua o le totogiina o sefuluai e o’o mai ai faamanuiaga ia te a’u, na ou faatino loa le totogiina o le sefuluai. Mulimuli ane ua ou vaaia le siitia o le tulaga tau tupe ia te au. Na vave ona tupu lo’u faatuatua. O iina na ou iloa lelei ai e aunoa ma se masalosaloga, o le totogiina o le sefuluai, e tosina mai ai faamanuiaga ia te a’u, peitai ou te lei oo I lea tulaga o le faatuatua pe ana ou le faatino muamua le faatuatua I mea e itiiti atu I le amataga. Ao e faatuatua I le Atua mo mea laiti ma e vaaia le taunuu, e tupu lou faatuatua mo mea e tetele atu. Faatino lou faatuatua, faataitai ona e faia mea e sili atu I lou poto ma lou iloa, ma le talitonu e te auauna I le Atua e leai se mea e mativa ai. Osooso ae faataga o ia e sapaia ia te oe. O le tele ona e faatino ma manumalo, o le malosi foi lena o lou faatuatua. 

O le tulaga mulimuli, e faatupu foi lou faatuatua i tautinoga. O lou faalogo i tautinoga a isi tagata e faatupuina ai lou faatuatua ma e iloa ai e mafai ona galue le Atua mo oe. E toatele tagata e faia tautinoga i matou sauniga o le Agaga Paia, na latou maua vavega ona na latou faalogo i tautinoga a isi tagata. Na amata ona ou talitonu i le soifua maloloina lelei i le Atua ina ua ou faalogo i se tautinoga a se tagata tua pio (tulou) na faamalolo e le Atua. Mai lena tautinoga, na ou mautinoa ai e faamalolo e le Atua gasegase uma. Taumafai e faalogo i ni tautinoga se tele, saili i tautinoga a ni tagata se toatele na ui i mea o lo’o e ui ai. A’o e faalogo i nei tautinoga, o le a tupu lou faatuatua.   

Tatalo

Tama, faamolemole fesoasoani mai ia te au ina ia tuputupu pea lo’u faatuatua ia te oe, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 23 IULAI 2024

(tusia e Pastor EA Adeboye)

Manatu Autu: Lamatia ma saogalemu (Dangerous and benign)

Tauloto -Tusi Paia– Galuega 13:11 ‘‘Fa‘auta nei, o le a o‘o ‘iā te oe le ‘a‘ao o le Ali‘i, e tauaso oe, ‘e te lē va‘ai i le lā mo sina taimi.” ‘Ona pa‘ū loa lea ‘iā te ia o le popogi ma le pouliuli; ‘ona fealua‘i lea o ia ma sā‘ili ni tagata e ta‘ita‘i ‘iā te ia. '

Faitauga – Tusi Paia – Galuega 13:1-11

O le taimi e papatisoina ai oe i le Agaga Pa’ia, e ono foliga mai e leai se tulaga o suia i lou tagata, a o le mea moni, ua matua lamatia le  fili ma ana ‘au ona o oe. I le 2 Tupu 1:9-12 e lei foliga mai o Elia o se tagata e ono lamatia ai se tagata aua foi e leai se auupega i ona lima ma e na te lē o ofuina ni ‘ofu tau o se tagata tau. Peita’i o le taitai au ma ana fitafita sa agai e pu’e mai Elia, e lei iai seisi na ola ma sao e faamatala le mea na tupu. E ono foliga mai e lei iai se suiga ia te oe i le vaaiga a ou fili, peitai o le taimi e papatisoina ai oe i le Agaga Pa’ia ma le Afi, afai latou te taumafai e pa’i ia te oe, e fa’aumatia.

O le ‘avea o oe ma se tagata e lamatia ai ou fili, ia mautinoa e maoa’e le mumu o le afi a le Atua o lo’o e tau’aveina i totonu ia te oe. E silia ma le 13 tausaga se vaitaimi ou te le’i toe oo’ ai i lo matou nuu ona o aitu ma taulasea sa taufa’amata’u e fasioti ia te a’u.  Ona ou fa’aolaina lea, ma e lei leva talu ona papatisiona a’u i le Agaga Pa’ia ma le afi, ae maua loa sou valaaulia ia ou ‘auai i se polokalame i lo matou nuu. Ae ina ua ou ta’uina i lo’u tina, sa ia ‘ai’oi ma vavao ia te a’u. Sa ou fai i lo’u tina, “Ua ou tau’aveina le afi i totonu ia te a’u ma o so’o se tasi e pa’i mai ia te a’u o le a faaumatia”. Ae fai mai si ou tina,  ’E le o suia ou foliga, o oe o le ’Adejare’ lava e tasi lea ou te iloa’. Sa ou tali atu i si o’u tina, ’A e vaai i se uaea eletise ola, e te le iloa se eseesega po’o ola po’o pe. Ae  a tago iai le tagata a’o ola, o se taumafaiga e vave ona oti ai’. Na oo ona ou alu i lo matou nu’u, ma e leai ma se aitu na tofotofo e pa’i ia te a’u. O aso nei, ou te fa’alauiloa Ie taimi ou te alu ai i lo’u nu’u ina ia vave ona sosola e lalafi ae ou te lei taunuu atu.

I Nigeria a uma ona inu le fagu Coke, e iai taimi e fa’aaogaina ai le fagu e utu ai le karasini. E fa’aaoagina loa le fagu mo le karasini, e matua faaeteete ona toe tu’u lea fagu i le gutu o se tagata. E iloa lelei e Satani e amata loa ona e tau’aveina le afi, e tatau ona ia fa’aeteete ona toe sōsō latalata ia oe. Afai o lo’o ia faataugā pea ia te oe, o le auala e te ave’esea ai ma ou tau’au, o le tau’aveina o le afi a le Atua. Ia tatalo e le aunoa ina ia puna pea ma ola le afi a le Atua i totonu ia te oe. ‘Aua ne’i mapu lou tatalo faatauanau i le Agaga Pa’ia. A e faia, e mumū pea le afi o le Atua i totonu ia te oe, ma o le a sili ona lamatia Satani pe a taumafai mai se osofaiga. So’o se avega ua ia fai ma ’amo ia te oe, e gausia lilii, ma o le a faasaolotoina oe. Afai e mumu pea le afi a le Atua i ou ivi, o le a matua lamatia le ti’apolo ma ana temoni ona o oe. Ua e sauni e tau’aveina le afi o le Atua?  Tautala i gagana ‘ese mo se itula i le asō, ma ia ‘avea ma au masani i lou aga’i i luma, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 22 IULAI 2024

(tusia e Pastor EA Adeboye)

Manatu Autu: Totonu vs fafo (Content vs container)

Tauloto -Tusi Paia– 2 Timoteo 3:5 ‘‘'o ē ‘ua peiseaī ‘ua to‘aga i lotu, a o le mana ‘ua i lea mea ‘ua latou te‘ena; ‘ia e ‘alo ‘ese lava i tagata fa‘apenā. '

Faitauga – Tusi Paia – Tito 1:15-16

O lo’o tatou nonofo i se lalolagi ua tumu i tagata e latou te faia mea uma e afifi lelei ma faafoliga matagofie le vaai atu i fafo, peitai e matua ese lava ma lo latou tulaga moni. I le tele o tausaga talu ai ao le’I telē tele le Ekalesia Redeemed Christian Church of God e pei ona iai nei, fai mai le tina o lo’u toalua, e faigata ona e iloa le eseesega o faifeau o inisinia ma faifeau e faiaoga i le Iunivesite aua e foliga tutusa uma i le aso Sa pe a fai o latou peleue. Peitai e iloa i le aso Gafua pe a o atu I o latou fale faigaluega. E toatele tagata e oofu e pei oni kerisiano, e tautatala ma tatalo e pei o ni kerisiano moni, peitai a e silasila I le loloto, e le o ni tagata faatuatua ia Iesu. O lo latou lalolagi e pei o le aso Sa, e leiloa e se tagata le eseesega i le taimi nei. Peitai o lo’o agai mai le aso Gafua I le siitiaga, ona matua iloa manino lea o le eseesega. Talitonu mai, e le afaina pe o le manatu o le lalolagi o lea tagata e matua latalata ia Iesu Keriso. Afai e lei faaolaina moni, e afio mai Iesu ma teena lea tagata i le aso mulimuli. 

Na fetalai Iesu Keriso I le Luka 5:37-38, 'E leai fo‘i se tasi na te utufia le uaina fou i fagu pa‘u tuai; a fa‘apea, ‘ona pā ai lea o fagu pa‘u i le uaina fou, ‘ona masa‘a ai lea, e māumau fo‘i fagu pa‘u. '

A utuina le uaina fou i le fagupa’u tuai, ona pa lea o le fagu pa’u ma masaa I fafo le uaina, o le uaina ma le fagupau ua le toe aoga e faavavau. E le mafai ona e valaau ia Iesu, ‘Le Alii e’ ae usitai pea I le tiapolo. Afai e te faia, o lo’o e taumafai e utuina le uaina fou (Agaga Paia) I le fagu pa’u tuai (lou loto agasala) ma o lona iuga o le faaumatia. 

E mafai e tagata ona pelogia le lalolagi i foliga vaaia o le tagata, peitai ua atili ai ona leaga aua o le a atili faigata ai ona toe foi I le ala sa’o ma le Atua. E toatele faifeau o loo I seoli, aua ina ua latou iloa e tatau ona salamo moni ma tuuina atu o latou ola ia Keriso, peitai ua mumusu e o mai pe a fai valaau ma toe faia se faaleleiga e mea faaletonu na latou faia ona o le vaaiga a tagata. Aua e te ola faafoliga o se kerisiano, salamo moni ma tuuina atu lou ola ia Keriso pe afai e te lei faia ona e ola lea ma soifua I se olaga faapaiaina e amata atu I le asō. Faamamā muamua totonu ona mamā foi lea o fafo ae le faapea e faamamā fafo ae o lo’o faaletonu totonu, I le suafa o Iesu, Amene. 

 OPEN HEAVENS

MATALA LE LAGI MO LE ASO SA 21IULAI 2024

(tusia e Pastor EA Adeboye)

Manatu Autu: O Tagata Matutua, E Atamamai (Elders are wise)

Tauloto -Tusi Paia– Iopu 12:12‘O lo‘o i ai le poto i ē ‘ua toeaina; o le fa‘alevaleva fo‘i o aso e i ai le fa‘autauta’.

Faitauga – Tusi Paia – Esoto 18:13-24

‭

Afai o e mafuta i ni tagata matutua, o loo si’osi’omia oe e le atamai e lē ‘au maua, ma e tatau ona a’oa’oina mai ai oe i le tamāoaiga o lo latou silafia. E i ai mea e silafia e toeaiina ma loomatutua e lē o’o i ai le iloa o Google. E i ai isi togafiti a mātua mo ma’i ma fa’ama’i e le’i maua e le poto o aso nei. E i ai ni silafia ia i latou pe a feagai ma fesootai ma isi tagata, e lē mafai ona e a’oa’oina mai i se tusi po’o se Iunivesite. Afai e te tausia lelei ou mātua ma faalogo ia i latou, e tele ni a’oa’oga tāua o le a e maua ma sili atu I mea e iloa e lau tupulaga. I totonu o le nuu o Yorubaland, a vaaia se tamaititi amio lelei, matou te faaigoa ia te ia Omo Agba, o lona uiga o se atalii poo se afafine o se tagata lauao sinasina, aua e iloa gofie o lea tamaititi na a’oa’oina e se tagata matua.

Mai le tele o le olaga a’oa’oina o Mose I totonu o Aikupito, le atunuu tele i na aso, a o lona tamā fa’ale tulafono o Ietero lona faiaoga na ia faasino ia te ia le lesona tāua o le fa’ataga o le faamatuu o se vaega o galuega i isi tagata ae le o le fai toatasi. O Mose na aupito lelei lona a’oa’oina fa’a ta’ita’i I le lalolagi atoa ma manatu ai o ia o se ta’ita’i lelei, a’o le’i mafuta i se toeaina ma ia iloa ai le atamai o le tagata matua. O fautuaga a Ietero na ia iloa ai e lē tele sona atamai. E mafai ona e manatu e te poto auā na e a’oga ma ua maua gofie le initaneti, peita’i a e faalogo i e matutua, o le a e iloa ai le tele o meamoni o le a fesoasoani i lou olaga.

A fautuaina oe ese toeaina, talia le fautuaga lenā auā o lou talia po o le teena o le fautuaga e maua ai le manuia poo le faiaina. I le 1 Tupu 12:6, na talanoa le tupu o Reopoamo ma toeaiina pe faafefea ona ta’ita’i le nuu. Na ave i ai e toeaiina fautuaga e tumu i le atamai. Peita’i e lei faalogo Reopoamo i toeaiina a ua toe alu fesili i ana uo talavou mo se fautuaga, ma e talu ai sa sili atu le manaia i lana faalogo fautuaga a taulelea o e na tutupu faatasi ma ia, na ia filifili faatasi ai ma i latou ae tu’u upu a toeaiina. O le faaiuga lenei a Reopoamo na fetaua’i ai le nuu ma fāoa ai le nuu o Isaraelu e pei ona tusia i le tusi, 

1 Tupu 12:18 & 19 “‘Ona ‘auina atu lea e le tupu o Reopoamo o Aturamo o le pule i taulaga, a ‘ua fetogi Isaraelu uma ‘iā te ia i ma‘a, ‘ua oti ai o ia. ‘Ona fa‘ata‘alise lea o le tupu o Reopoamo e alu a‘e i lona kariota, e sola atu i Ierusalema.” ‘Ua fōua fo‘i e Isaraelu le ‘āiga o Tavita, ‘ua o‘o lava i ona po nei’

Aua ne’i inoino i fautuaga a toeaiina amio Atua. I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 19 IULAI 2024

(tusia e Pastor EA Adeboye)

Manatu Autu: Ava i e matutua (Honour elders)

Tauloto -Tusi Paia– Levitiko 19:32 ‘‘Ia e tula‘i atu i luma o lē ‘ua ulu sinā, ‘ia e āva fo‘i i luma o le toeaina, ma ‘ia e mata‘u i lou Atua: O a‘u o le ALI‘I.. '

Faitauga – Tusi Paia – 1 Timoteo 5:1-3

O aso nei, ua toatele talavou ua manatu e sili atu latou i tagata matutua aua ua talitonu e sili atu lo latou atamamai. O le tagata matua lava o le tagata matua, tusa po’o le a le ituaiga soifuaga a’oa’oina, tamāoaiga tau tupe, poo lona tulaga i le soifuaga. E tatau i tagata ona ava i e matutua e lē aunoa, pe afai e lē manana’o e i ai ni malaia i luga o latou ulu (Teuterenome 27:16).

Fai mai le upu tauloto o le asō, a e vaai atu o agai mai se tagata matua, ia e tula’i e faaaloalo i luma o le toeaina. Aua ne’i alu loa se tagata matua e te le’i fa’afeiloa’i iā te ia. Afai o alu atu le toeaina po’o le loomatua ma sana avega, tamo’e e fesoasoani i ai. A saunoa atu se tagata matua ia te oe, aua e te vave tali, faatali se’i uma lelei lana tala. Fa’ata’ita’i ia Eliu I le tusi a Iopu 32:4: Ua fa’atalitali Eliu iā Iopu, seia uma atu upu, auā ua toeaina i latou ae itiiti o ia.

E lē gata i lea, i le Iopu 32:6, na tautala Eliu e faaali ona manatu ma le ava i toeaiina, ma faapea atu ia i latou, sa fefe ma mata’u e faaali atu lona taofi auā e itiiti lavā o ia ae toeaiina i latou. I le fuaiupu e 8, e te iloa ai o Eliu e ona upu ia e masani ona tatou faia, “O i ai lava le agaga i totonu o le tagata, o le mānava fo’i a Le e ona le malosi uma lava e fa’apopotoina ai i latou.” E manino, sa iā te ia le atamai ma le malamalama mai le Atua. E lē mafai ona e fai mai e fa’atumulia oe i le Agaga Paia ae lē ava i e matutua ia te oe; o se pepelo a lea tulaga.

Atonu e te fai mai, ae faafefea pe a fai o se tagata matua na faia se mea leaga e lē tatau ona faia e tagata matutua? Fai mai le Tusi Paia i le 1 Timoteo 5:1-3 E lē tatau ona e a’oa’i se toeaina. Atonu e fa’ate’ia oe i lou iloa o le taimi na fai ai e Eliu mea na o’u tāua i le palakalafa o i luga, o lo’o matua’i ita i toeaiina. Sa ita ia Iopu i le fia amiotonu, ma le manatu o Iopu ua na o ia e sa’o manatu i taimi uma. Peita’i na faatali lava se’i uma upu a Iopu fa’ato’ā fa’aali lona lagona ma le faaaloalo. Aua ne’i e faapea o le ita paia, ma e tautala lē mafaufau ai i se toeaina. Aua e te fai mai o lo’o e tau mo le Atua ua e lē ava ai i se tagata matua. Poo le a le sesē o se tagata matua, ia tautala pea i ai ma le ava ma le migao. O fanau moni a le Atua e fa’aaloalo i e matutua poo le a lava se maualuga o sona tulaga e i ai. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 19 IULAI 2024

(tusia e Pastor EA Adeboye)

Manatu Autu: O au ū fanafana (Your arrows)

Tauloto -Tusi Paia– Salamo 127:4 ‘E pei o ū fanafana i le lima o le toa, e fa‘apea lava atali‘i o taulele‘a. '

Faitauga – Tusi Paia – Salamo 127:3-5

O loo faapea mai le tauloto mai le Tusi Paia o le asō, o le fanau e pei o ū fanafana I le lima o le toa a’o taulealea. E mafai e taulelea ona fana ni u fanafana agai I le lumanai ina ia tutuli ese ai ni fili po’o ni manufeai e ono osofaia latou fanau I le ala. E faapena foi lau fanau, e tuuina atu I latou I le lumanai ina ia e fiafia ma manuia ai. Afai e te a’oa’o lelei lau fanau, a o’o ina matutua, e latou te tausi lelei ia te oe pe a o’o ina e matua.

E le’i lelei ni aoga a o’u matua. Na taua lo’u aiga o se aiga mativa e oo lava i tagata matitiva o le matou nuu e latou te taua lou aiga e mativa. O le aso na faatau ai e lo’u tama sa matou faamalu, na matua matou fiafia lava, o le tulaga mativa lena sa iai lou aigga. Peitai, e ui i lo matou matitiva, na mafai lava e o’u matua ona ave a’u I le aoga. Na la faatauina atu mea uma na i o la lima e o’o i fanua e fa’aaoga ai au seia oo ina ua leai lava se mea o totoe. O se faaiuga pito sili lea ona lelei na la faia aua o le ave o a’u i le aoga na taofia ma aveese ai le mativa mai lo’u aiga. O le aso, o le igoa Adeboye ua lauiloa i le lalolagi aua na fa’aaogā lelei e o’u matua tupe na maua mai le faatauina o fanua, e totogi ai lo’u pili aoga. 

Faaalu ma le aoga au tupe, faaaoga au tupe e faaao’oga ai lau fanau aua o i latou o au ū fanafana e te fana atu i le lumanai. E latou te iai ma oe pe a o’o ina e matua, afai e te mavae atu ma le olaga nei, o le a fua pea au galuega na faia i lau fanau. E iai se muagagana i le matou nuu e faapea, ’afai e te filifili e fausia se fale ae le a’oa’o lau tama, o lau tama na e musu e a’oa’o lelei, o le a faatauina ese lou fale na fausia’. Ia e filifili e avatu lau fanau i aoga e pito sili ona lelei e te gafatia ona totogi le tau. Faaalu lelei lou taimi e a’oa’o ai i latou i mataupu taua o le ola nei faapea le Upu a le Atua. O tupe ma lou taimi e faaalu e a’oa’o ai lau fanau, e lē faapea e lē aoga. Fai mai le Failauga 7:8 'E sili ‘ona lelei o le i‘uga o se mea i lona amataga’. E sili atu lou ofu i ofu masaesae ae a’oa’o ma fa’aa’oga lelei lau fanau i lo le ofu i ofu taugata ae tiai lau fanau e lē a’oa’oina ma le fa’aa’ogaina lelei. E le afaina po’o a ofu o lo’o e ofu ai i le asō, a lelei le a’oa’oina o lau fanau, e latou te faatauina ofu taugata ma taavale taugata mo oe e o’o i le fausia o fale e te nofo ai pe a e matua. 

Le au pele e, a’oa’o lelei lau fanau aua e sili ona aoga mo oe pe afai e te manao e fiafia i le manuia mo se taimi umi faapea ma le nofo filemu lelei o lou mafaufau. O e faia mea sili i le a’oa’oina lelei o lau fanau? I le suafa o Iesu, Amene.  

OPEN HEAVENS

MATALA LE LAGI MO LE ASO TOFI 18 IULAI 2024

(tusia e Pastor EA Adeboye)

Manatu Autu: Sola ese ma le Faitaaga (Flee Fornication)

Tauloto -Tusi Paia– 1 Korinito 6:18 ‘'‘Inā sōsōla ‘ese ia ‘outou i le faita‘aga. ‘Ua auliuligia le tino i nisi agasala uma e faia e tagata; a o lē faita‘aga, e agasala ia i lona lava tino. '

Faitauga – Tusi Paia – Efeso 5:3-8

16Tou te lē o iloa ‘ea o le malumalu ‘outou o le Atua, o lo‘o nofo fo‘i le Agaga o le Atua i totonu ‘iā te ‘outou? 17‘Āfai e fa‘aleaga e se tasi le malumalu o le Atua, e fa‘aleagaina lenā tagata e le Atua; auā e pa‘ia le malumalu o le Atua, o ‘outou lava ia’ 1 Korinito 3:16-17.

Fai mai le mau o lo’o i taua i luga, e fa‘aleagaina e le Atua i latou e faitaaga; na te faaleagaina e iai lava. Afai e le manao se tagata e faatuatua i le Atua e faaleagaina o ia, e tatau ona ia aloese mai le faitaaga i so’o se auala. A o’o mai le faitaaga ma tuitui mai i le faitotoa o lou loto, e tatau ona e sola ese.

E faapefea ona e sola ese mai le faitaaga? Muamua, aloese mai soʻo se mea e taʻitaʻia oe e fai le faitaaga. Aua e te iai i se nofoaga ua na o oulua ma se tasi o le isi itupa. Aua neʻi e faia ni talanoaga i mataupu leaga ma lē mamā ma tagata e te taua o au uo aua o le amioleaga e faaleagaina ai amio lelei (1 Korinito 15:33). Afai e taumafai atu se tagata ma naunau e faatino le faitaaga ma oe, tamoe ese vave. Aua le tuʻuina iai se avanoa i lena tagata e taumafai e faasufi ma tauanau oe. Ina ua taumafai le avā a Potifara e tauanau Iosefa e la te momoe, fai mai na tamoe ma sola ese Iosefa. (Kenese 39:7-12). 

Le au pele e, e leai se aoga e taumafai ai ni Kerisiano e faia ni faigauo pe afai e lē o le faʻaipoipoga le faamoemoega autu, o se mafutaga faapena e faatusaina i se pomu, o loo faatalitali le taimi e pa ma faaleagaina ai ia tagata. Afai e le mafai ona e talanoa i lau faifeʻau, lou taumafai atu i se faigauo ma se tagata, e le tatau ona e faia lena faigauo. O le afafine poo se atalii o le Atua e le tatau ona taumafai e faia ni faigauo faasamasamanoa e na o le tafafao ai, e tatau ona faia ni faigauo ma le faamoemoega e faaipoipo i le lumanai. 

Afai ua matua lou soifua ua tatau ona faaipoipo, ma ‘āfai ua e lē lavā ‘o‘ono, ‘ia fa‘aipoipo loa, auā e sili le fa‘aipoipo i lo le mū i le mana‘o. O le momoe o le tane ma le ava e faataga e le Atua i totonu o le faaipoipoga. Ina ia e aloese mai le faaleagaina i le faitaaga, e sili atu lou faaipoipo. Fai mai le Tusi Paia i le 1 Korinito 7:9 'Peita‘i ‘āfai latou te lē lavā ‘o‘ono, ‘ia fa‘aipoipo i latou, auā e sili le fa‘aipoipo i lo le mū i le mana‘o. '

E matua leai lava se mea aoga e maua pe olioli ai mai le faitaaga; o le taunuuga o le faaleagaina i taimi uma. Afai e te le talitonu mai ia te au, fesili ia Samasoni po’o Reupena. O le la tala ia te oe, a faapea e mafai ona suia ma toe foi i tua le taimi, e pau lava le mea la te suia i o la olaga, o le aloese mai le faitaaga. E leai se meaaoga e te maua pe fiafia ai i le faitaaga, o le iuga o le faaleagaina, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 17 IULAI 2024

(tusia e Pastor EA Adeboye)

Manatu Autu: Faamoemoega o le faaipoipoga (The purpose of marriage)

Tauloto -Tusi Paia– Kenese 2:18 ‘Ua fetalai mai fo‘i le ALI‘I le Atua, “E lē lelei ‘ina to‘atasi o le tagata; ‘ou te faia sona fesoasoani e tatau ma ia.’

Faitauga – Tusi Paia – Failauga 4:9-12

O le tauloto mai le Tusi Paia o le aso o lo’o faamanino mai ai na faia le faaipoipoga ia maua se mafutaga vavalalata. Na saunia e le Atua se fesoasoani mo Atamu, ae le o se tagata e tauva ma ia. O so’o se faaipoipoga e tauva ai se tane ma le fafine, e le taitai ona tumau pea, aua fai mai le Mareko 3:25 '‘Āfai fo‘i e fevaevaea‘i se ‘āiga, e lē mafai ‘ona tumau o lenā ‘āiga. Tane, o lau ava na foai atu e le Atua e fesoasoani ia te oe e ausia le faamoemoega o lou olaga. E tatau ona e fausia se siosiomaga e fesoasoani ai o ia ia te oe, ae le o le tauva ma oe. Ana le seanoa le fesoasoani a la’u ava ma le alofa tunoa o le Atua, e le taitai ona mafai ona ausia tulaga ua ou ausia i le galuega a le Atua i le aso. Ole atu i le Atua e foai atu le poto e te iloa ai le mea e fai ina ia fesoasoani lau ava ia te oe. 

Ou te tuuina lava le avanoa I la’u ava e fesoasoani ai ia te au. Ou te le nanaina mea mai ia te ia, ae ou te tuuina atu isi mea ia te ia na te faia. A maea ni sauniga tetele lava e faia, ou te faatauina ni meaalofa mo ia ma faapea atu, ‘faafetai lava mo lau lagolago’. E faamalosia ai lava o ia e fesoasoani I polokalame uma e mulimuli mai. 

Avā, tuu le taumafai e tauva i tou tane. Aua e te mulimuli i manatu taatele i le lalolagi i nei vaitau ua fesuiai ai le matafaioi a tane ma ava i totonu o faaipoipoga. Aua e te liliuina lau faaiopipoga i se tauvaga e iai le tagata e manumalo ma le tagata e faiaina. A manumalo i se mea se tasi o le lua ulugalii, e tatau ona avea o se manumalo a oulua faatasi. O le tele o mea lelei e faia e lou toalua, o le fiafiaga lena ia te oulua faatasi. I le Faataoto 31:23, fai mai le Tusi Paia o se ava amio lelei e ‘iloga lana tane i faitoto‘a, pe a saofa‘i o ia fa‘atasi ma toeaina o le nu‘u. Tane, afai e ausia e lou toalua ni mea lelei i ni tulaga mautofi, tuu i luga lou ao, e lē faapea e tuua ai oe i lalo o le tane, e siitia ai oe. O lo’o iloa ai e te lelei i le galueaina o le taleni a lou toalua ma e manuia so’o se mea i ou lima. 

Ia galulue mea uma ina ia manuia so’o se aiga. Afai o so’o se tama taalo soka e taumafai e avea ma tulaga e faia sikoa ina ia iloa ai le tele o sikoa e maua, ao ai la e faia le puipuiaga ina ia aua nei sikoa le isi au? Afai o oe e te puipui, e le faapea e le taua lou tulaga na i lo le tagata e faia sikoa. Fai ia lelei lau matafaioi ona lua maua faatasi lea o fua o le  manuia. Aua e te tuua lau matafaioi, ona o lou naunau e tauva ma lou toalua ma i’u ai i le toilalo i le olaga nei. Fai ia lelei lau matafaioi, fesoasoani i lou toalua ma e i’u lava lo lua aiga i le manuia, i le suafa o Iesu, Amene.