OPEN HEAVENS

MATALA LE LAGI MO LE ASO LULU 6 TESEMA 2023

Manatu Autu: Maitau ma faamau (Take notes)

Tauloto – Isaia 30: 8‘O lenei, alu ia ma tusi lenei mea i se papa i o latou luma, ia tusi ai foi i se tusi, ina ia tumau i aso amuli e faavavau faavavau lava;.”

Faitauga - Tusi Paia: Ieremia 30:1-2

Upu Folafola

O se tasi o vaega e faatalalē iai le toatele o le malosiaga e maua mai I le maitau ma faia faamaumauga. Ou te vaai I le toatele o tagata e leai ni faamaumauga e tusia I taimi o lauga ma e masani ona ou mafaufau po’o latou iloa mea o lo’o latou misia. 

E iai se muagagana o se peni e vaivai le ola e poto atu I se mafaufau e pito I maai. E tele mea e te lē o maua pe afai e leai ni au faamaumauga e faia I taimi o lauga. O la’u polofesa o le matematika na maua lona faailoga maualuga o le PHD I le 1928, na taua mai iai matou, e faasefulu ona e faitauina se mea ona e faatoa manatua lea. Afai e te lei faia ni faamaumauga, e faapefea ona e faitaua ina ia e manatua? 

E iai nisi o lauga e tau le mafai ona  e talia I le taimi e te faalogo ai iai, peitai e iai le aso e faaalia atu ai ia te oe e Agaga Paia Ie uiga loloto o lena faamaumauga. E sili atu foi ona ou popole pe afai e leai ni faamaumauga a faifeau e faia pe afai o lo’o faalogo] I lauga a isi faifeau. Afai e leai sau api e tusitusi ma faamaumau ai, e lelei foi pe afai e faaaoga lau telefoni ma isi masini. A’o faagasolo le lauga, e ono musumusu atu Agaga Paia ni upu I ou taliga, o ni perofetaga po’o ni faatonuga. E tatau ona e tusitusia lelei I lalo ina ia aua nei galo. E le gata I lea, a’o lauga le failauga, e mafai ona e tusia I lalo ni mea e tatau ona e faia e faigofie ai ona e savali I ala ma faiga e pei ona taua I le lauga. E te ono tusia foi I lalo mau o le Tusi Paia o lo’o taua mai ai ina ia mafai ona e suesue lelei iai I se taimi mulimuli ane. 

E tatau ona e malamalama lelei o nei faamaumauga o ni mea taua mai ia te oe e aoga mo nisi tagata e mulimuli mai ia te oe. I le ofisa tutotonu o le ‘Matala le lagi’, o loo iai nisi o a’u faamaumauga na faia I le 30 tausaga talu ai, o ni faamaumauga aoga ma taua tele, e toatele tagata e asiasi atu I lea ofisa tutotonu ma aoaoaina mai ai. 

I le Faaaliga 1:19, na faatonu e le Atua Ioane ia tusia uma I lalo mea o lo’o ia vaaia, o ni faamaumauga sili ona taua mo I tatou I aso nei ina ia iloa mea o le a tutupu I aso mulimuli. O lo’o tatou vaaia ai foi nisi o faataitaiga mai le tauloto faapea le faitauga mai le Tusi Paia o le asō. Le au pele e, e tatau ona e maitau ma faia faamaumauga pe afai o lo’o e faalogo ma suesueina le Upu a le Atua. Ia faia ma au masani le maitau ma faia faamaumauga o lauga, I le suafa o Iesu, Amene. 

 OPEN HEAVENS

MATALA LE LAGI MO LE ASO LUA 5 TESEMA 2023

Manatu Autu: Puipuiga mautu faale Atua o se faapotopotoga (Divine group insurance)

Tauloto – Galuega 16:31‘Ua fai atu i lā‘ua, “‘Inā fa‘atuatua ia i le Ali‘i o Iesu Keriso e ola ai oe ‘atoa ma lou ‘āiga.”

Faitauga - Tusi Paia: Galuega 27:21-25

Upu Folafola

I le tatou faitauga mai le Tusi Paia o le aso, a’o iai o Paulo i totonu o se afā; ma asia e se agelu, na ia faapea atu iai latou sa latou iai: “O lenei fo‘i, ‘ou te apoapoa‘i atu ‘iā te ‘outou ia ‘outou fa‘amalosi; auā e leai so ‘outou ola o māumau, nā o le va‘a” (Galuega 27:22).

Ou fai lava i tagata e toatolu ituaiga fanau o lo’o ia te a’u: O I latou e a’o’oga maualuluga, o e a’o’oga Kolisi ma e a’o’oga i a’oga tulagalua. E tele ina valaau a’u aemaise i totonu o Nigeria, o ‘Tama’. Ou te faavasegaina tagata ia, o la’u fanau a’oga maualuga. O se tasi o taita’i ta’uta’ua o seisi fo’i  Ekalesia, sa tusi mai ia te a’u ma na amataina lana tusi i upu nei ‘Lo’u Tama e,’. Afai o se faifeau e fai ma ‘Tama’ I se taitai aoao o seisi Ekalesia, o lo’o manino o ia tagata o a’u fanau I a’oga maualuluga. E iai foi a’u fanau e a’oga I Kolisi. O tagata ia o Taitai Aoao I isi Ekalesia e alolofa ia te a’u. Mulimuli ane, e iai la’u fanau i a’oga tulagalua, o sui nei o le Redeemed Christian Church of God, ma ou te mitamita e faailoa, o le puipuiga mautu faale Atua o lo’o ou maua, e puipuia ai foi ma latou. O le ituaiga puipuiga mai agelu o lo’o ou mauaina, e maua foi e’i latou, e pei lava o Paulo a’o iai i le afā, o lo’o iai I le faitauga mai le Tusi Paia o le asō.

I ni nai tausaga e le’i leva atu, a’o ou iai I le atunuu o Zambia, ma ou aga’i atu i se tasi o polokalame, sa iai se leoleo faafeao I se pasika na muamua i o matou luma e fa’aavanoa le auala, peitai ua lavea I se taavale ma ua matua faaleagaina le pasika, a’o le leoleo ua lelea i leisi itu o le auala. Na aumai o ia, ua uma le ola. Sa matuā ou mafatia i le mea na tupu. Na ou augani atu i le Atua, “Lo’u Tama e, o lenei talavou o lo’o faatasi ma a’u; o se sui o le matou vaega sa galue e fa’aavanoa le auala mo a’u. Faamolemole faaola ia te ia”

Ana faapea o se polokalame a le matou Ekalesia, semanū ou te toe fo’i iai, peitai sa ou manumanu nei lē fa’ataunuuina le polokalame, na a’ami mamao mai ai a’u mai Nigeria. Ona ou aga’i pea e fa’ataunu’u le polokalame. A’o le taimi atoa o lo’o alu lo’u mafaufau I le leoleo lenei. Ina ua mae’a le polokalame, sa ou fesili mo se tala i le tulaga ua o’o iai le leoleo, ae ta’u mai ua toe ola, e leai se ivi na gau, leai foi sina ma’osia e tasi i lona tino! O lenā aso, sa ou va’ai manino i le faatinoina o le puipuiga mautu a le Atua mo se faapotopotoga o tagata. 

A taumafai Satani e pa’i atu i sē e pele ia te oe, vala’au i le Atua e puipui I latou I le puipuiga mautu o lo’o ia puipui ai oe, ma e tali mai o ia ia te oe. 

Tatalo: 

Tamā, o le auala lava e tasi e te puipuia ai a’u, fa’amolemole ia faalautele atu lea puipuiga I a’u uo uma ma o’u aiga uma, i le suafa o Iesu, Amene.

OPEN HEAVENS

MATALA LE LAGI MO LE ASO GAFUA 4 TESEMA 2023

Manatu Autu: Atia’e le mafutaga vavalalata ma le Atua (Build Intimacy with God)

Tauloto – Luka 10:20‘A e peitai aua tou te olioli i lenei mea, ina ua usiusitai agaga ia te outou; na o lenei tou te olioli ai, ina ua tusia o outou igoa i le lagi’

Faitauga - Tusi Paia: Luka 10:38-42

Upu Folafola

E tatau ona avea le mafuta vavalalata ma le Atua ma naunautaiga o lou loto. O le naunautaiga  I le mana o le Atua, e tatau ona lona lua pe a faatusa I le naunautaiga ia latalata I le Atua. Talitonu mai ma le faamaoni, afai e taulai lau vaai ia latalata I le Atua, e faigofie le mulimuli mai o faailoga ma vavega. 

I le Luka 10:19-20, ina ua maea ona faamatuu atu e Iesu I lona ausoo le mana e pule ai I le malosiaga o le tiapolo, na faamalosi atu Iesu iai latou ia ‘aua le olioli ona ua usiusitai agaga ia tei latou, ae ia olioli ona o loo tusia o latou igoa I le lagi. E naunau atu le Atua ia e latalata atu ia te ia I lo le maua o le mana e faia ai lana galuega. 

I le faitauga o le Tusi Paia o le aso, ina ua asiasi Iesu I le au uso o Maria ma Mareta, sa filigā Mareta e auauna ma faia ana feau, ao Maria sa nofo o ia i lalo i tafatafa o vae o Iesu, ma faalogo i lana fetalaiga. Na manatu Mareta o loo sa’o lana mea o loo faia ma fai atu ia Iesu e faatonu lona uso e fesoasoani atu ia te ia, ae na ia fai atu ia Mareta, o lo’o faia e Maria le tulaga lelei, o le faaalu o lona taimi I lalo I ona vae. Na faapea atu Iesu, ‘a o le mea lava e tasi e ao ina ia maua; ua filifilia foi e Maria lea mea lelei, e le aveeseina ia te ia’ (Luka 10:42). E mafai ona ave e seisi tulaga tofi I le lotu e tatau ona e maua pe faasa foi oe ona e auauna I le Atua I se vaega o loo e naunau iai, peitai e leai seisi e mafai ona aveesea mai ia te oe le avanoa e mafuta vavalalata ai ma le Atua. O le tulaga lea e tatau ona e naunau e puipuia I lo seisi lava mea. O le tulaga moni lea e tasi o lo’o finagalo iai Iesu Keriso. 

Ao iai Iesu I luga o le satauro, ma tigaina i ona manu’a ao faifai ma tauemu tagata ia te ia, ma inoino ia te ia, sa ia onosai pea ma ola. Ina ua ia le toe faalogoina le latalata ma le mamalu o le Atua, e ui ina oona le tigā, na ia valaau ma le leo tele ‘Eli, Eli, lama sapatani? o lona uiga lenei, Lo‘u Atua e, lo‘u Atua e, se a le mea ua e tuulafoai mai ai a‘u?’ (Mataio 27:46-50). Na ia tauaveina tiga uma ma le maasiasi, ae lē mafai ona ina talia le tu’u’eseeseina ma le Atua. 

Le au pele e, e tatau ona avea le mafuta vavalalata ma le Atua ma faamuamua I lou olaga i lo seisi lava mea. E naunau le Atua e atia’e ma faalautele le mafutaga vavalalata ma lana fanau. O lo’o saili o ia ia’i latou e tapuai ia te ia I le Agaga ma le faamaoni (Ioane 4:24) ae lē o I latou o lo’o saili na o mea e mananao ai mai ia te ia. O le mafuta vavalalata ma le Atua e tatau ona tutusa ma lou manaomia o le ea e manava ai, I le suafa o Iesu, Amene.  

OPEN HEAVENS

MATALA LE LAGI MO LE SA 3 TESEMA 2023

Manatu Autu: O le ala i le Uluola ma le Fa’atupula’ia fa’ale Atua (The key to Divine Multiplication)

Tauloto – Ioane 12:24‘E moni, e moni, ou te fai atu ia te outou, Afai a e le paū le fua o le saito i le eleele ma pala ai, e tumau pea o le mea e tasi; a e afai e pala, ona fua mai ai lea o fua e tele.’.

Faitauga - Tusi Paia: Faataoto 11:24-25

Upu Folafola

Auā o e na silafia e ia anamua, na ia tofia anamua fo’i, ia foliga i latou i lona Alo, ia foliga iā te ia, ina ia avea o ia ma ulumatua o le au uso e toatele: Roma 8:29

Ua ta’u mai i le Afioga Paia a le Atua o loo taua I luga, na auina mai e le Atua lona Alo pele e to’atasi ia maliu ma fa’alāva’au ina ia avea ia ma ulumatua o le au uso e toatele. Auā na auina mai e le Atua lona Alo e to’atasi ia fa’asatauroina ina ia fa’aolaina le lalolagi lea ua I ai nei le au uso i so’ose vaega o le lalolagi. E lē gata i lea, na faailoa e Iesu le ala lenei i le uluola ma le fa’atupula’ia e pei ona manino I le tauloto mai le Tusi Paia o le asō lana fetalaiga se’i vagana ua paū le fua o le saito I le eleele ma pala, fa’atoā fua tele mai.

A e mana’o i lou olaga ia fua tele mai, fai taulaga I mea e sili ua ia te oe. Fai mai le Faataoto 11:24 a e taofi mau i mea e sili na i le mea ua tatau ai, e mativa ai oe, peita’i a e faasalalau au mea, e atili ai ona tele. E lelei le tele peita’i e sili ona lelei le fa’ateleina po’o le Uluola. A e foai, e te tupu a’e, a e fai taulaga e te tupu ma tupu pea, poo le faatupulaia ma le Uluola.

I le Kenese 22:1-18, ina ua fetalai le Atua iā Aperaamo e ofo atu lona atalii e to’atasi, na usitai Aperaamo. Na fetalai le Atua “Ou te matuā faamanuia ia te oe.” Sa iloga le mea na faia e Aperaamo, a’o Isaako sa tu matila lona sao i le taulaga, e ala i lona lē fa’afinau i lona tamā a ua usitai e ofo atu lona ola mo le Atua. Ou te talitonu e leai se faigata pe ana mana’o Isaako e sola ese, peita’i na malie e saisai ia ma tu’u i luga o le fata pei se manu, (tulou). O lea na fetalai le Atua ma faamanuia iā Aperaamo na foai, ae fa’afualoa ma faatupulaia Isaako na fai taulaga.

Sa o’u totō la’u taavale o se Fatu mo le galuega a le Atua ae fealua’i i pasi ma taxi i mea ou te fia alu i ai. Na tali mai le Atua i nei taulaga ma faamanuia ia te a’u i le tele o taavale na aumai fa’a meaalofa e tagata mo a’u. Na o’o i le tulaga ua o’u faasalalau i tagata e taofi le foai mai o taavale ua tele naunau. Peitai ua lē gata i taavale a ua foai mai e le Atua ma le vaalele. O le taimi nei ua o’u faimalaga i la’u lava vaalele na aumai i le Atua. Le au pele e, o le foa’i faa taulaga le faitotoa I le faafualoa, faatupulaia fa’a le lagi.

A’o le’i faatuputeleina oe e le Atua. E fia silasila le Atua i lou loto pe faamaoni lou alofa iā te ia, e sili atu na i loo tagata ma se isi lava mea. I le suafa o Iesu, Amene.

OPEN HEAVENS

MATALA LE LAGI MO LE TOONAI 2 TESEMA 2023

Manatu Autu: O le Tupu o Tupu (The King of Kings.)

Tauloto – Faaaliga 19:16‘Ua ia te ia foi le suafa ua tusia i lona ofu ma lona vae. O Le Tupu o tupu, ma le Alii o alii’.

Faitauga - Tusi Paia: Faaaliga 1:5-6

Upu Folafola

I le Tusi o Filipi 2:10-11, fai mai le Afioga Paia a le Atua: Ina ia tootuli o tulivae uma lava i le suafa o Iesu, e o i le lagi, ma e o i le lalolagi, ma e o i lalo o le lalolagi; ma ia ta’uta’u atu e laulaufaiva uma lava o Iesu Keriso o le Alii lava ia, ia i’u ai i le viiga o le Atua le Tamā.

E pule aoao Iesu i le lagi, lalolagi ma lalo ifo o le lalolagi. E ifo tulivae uma pe a o afio se tupu i lona mamalu i lona lava mālō, a’o le taimi e ulufale ai i se i si mālō, e ao ona fa’aaloalo ma usita’i i tulafono o lea mālō. A’o Iesu o ia te ia le mamalu ma le pule I le lagi ma le lalolagi ma lalo ifo o le lalolagi. O le pule lea ma le mamalu, e tumau i soose mea e afio ai. O Iesu o le tupu aua e ifo tupu ma mālō uma te ia, aua o ia o le Tupu o tupu.

Fai mai le tatou tusi faitau o le asō, ua faia e Iesu i tatou ma tupu ma ositaulaga i le Atua. O lona uiga, o atali’i ma afafine uma o le Atua, ua tuuina atu i ai le malosi e pule ai. Afai o e I le itu o tupe e tatau ona e pulea le vaega o tupe; afai o faafiafiaga, ia pule i faafiafiaga. Poo le a lava le matagaluega o e i ai, e ao ona e pule pei se tupu iinā.

Toatele tagata e manatu na o le galuega a le Atua e te galue ai mo le Atua. E lē sa’o lea manatu. O oe o le sui vaaia o le Atua i lau galuega na e te galue ai. E tatau ona avea oe ma tupu e faia le finagalo o le Atua i soose mea e te i ai. E lē mafai ona o tatou tuua i isi tagata e pulea ofisa ma matātā o loo tatou galulue ai, ona faitio lea pe a o latou lē pule e tusa ma ala o le Atua. Ia o tatou tutū i luga ma fai lo tatou tofi mo le Atua. Ina ia avea oe ma pule i lau matagaluega o e galue ai, ia avea oe ma tagata aupito galue malosi faamaoni I le matagaluega atoa. Ia matua’i iloga lou lelei, e tulaga ese ai oe i le matagaluega. A e galue faapea, e si’isi’i pea lou tulaga seia o’o i le pito i luga ma avea ma tupu i le galuega. O inā faatoa mafai ai ona faatino lau pulega mo le Atua.

Ua lava le fa’aleogalua ma le galue pepelo I le au Kerisiano; ua lava ia le ‘alo ma le palaai e tauave tofiga pule ona o le manatu o tagata e tauva i tofiga pule e lē amio Atua. Manatua, e manaomia le masima e tofolelei ai meaai, ma le malamalama ia fa’asusulu i le pogisa. O oe o le masima ma le malamalama o le lalolagi (Mataio 5:13-14). O atu ia outou i le lalolagi ma avea ma pule, poo fea lava tou te galulue ma nonofo ai. O le a avea ea oe o se tasi o le fanau a le Atua e Viia ai lona suafa e ala i lou galue faamaoni ia avea ma ta’ita’i ma pule i lau galuega? I le suafa o Iesu. Amene.

OPEN HEAVENS

MATALA LE LAGI MO LE FARAILE 1 TESEMA 2023

Manatu Autu: Faasolo le Faauuga 3 (Transfer of anointing 3)

Tauloto – Galuega 5:15‘ua oo ina au mai e i latou i e mama’i i malae, ma faataooto ai i moega ma fata, tau lava ina ia faapaoloina ai nisi o i latou i le ata o Peteru pe a ui ane’.

Faitauga - Tusi Paia: Galuega 5:12-16

Upu Folafola

Na tatou talanoa I aso e lua ua tuanai auala e faasolo ai le faauuga e ala I le pa’I po’o le faaaogaina o solosolo. O le aso, o le a tatou talanoa I le ala e faasolo ai le faauuga I le ea e aunoa ma le pai o le tagata faauuina I se tasi. O le ala pito I maualuga lea e faasolo ai le faauuga. Ua tatou vaai I lea tulaga I le Galuega 5:12-16 ia Peteru, e lei pa’i I se tagata ma’I ae na malolo le tagata ma’i I le paolo o lona ataata. E mafai ona faasolo mai le faau’uga mai le faifeau I luga o le pulelaa I se tagata o le Ekalesia o lo’o nofo atu I le faapotopotoga e o’o I se tagata o lo’o matamata atu I le televise po’o faalogologo I le leitio, telefoni ma isi. 

E faitau miliona tagata e auai I matou polokalame I le nofoaga o le togalauapiga, e le mafai ona faaee lima I tagata uma, o lea na faatupulaia e le Atua lana faauuga ia te a’u ua mafai ai ona na o le talotalo o lo’u lima mai le pulelaa ae faasolo le faauuga, e o’o I tagata o lo’o I le pito I tua o le fale e faamaloloina. A’o faatupulaia pea le toatele o tagata e auai, ua faatupulaia foi e le Atua le faauuga e mafai ai ona faasolo atu I tagata e ala I le pai faapea ma le ea. O le taimi la lenei e na o le talotalo lava o o’u lima ma tatalo I luga o solosolo o tagata, ua faau’uina nei solosolo ma e faaaogaina e le Atua e faia ai vavega. 

E iai se alii na sau I se tasi o matou polokalame, ma a’o faagasolo le polokalame, I lalo o le taitaiga a le Alii, na ou faapea atu, ‘so’o se ofu o lo’o e laeina I le aso ua faauuina’. I le vaiaso na sosoo ai, a’o agai atu lenei alii I le galuega, na tau atu I se nofoaga o tumu ai tagata ua poloka ai lana taavale. Na faatu le taavale ma agai atu e vaai poo le a le mea ua tupu. Ua iloa atu se tagata ua lavea I le taavale ma o loo taatia mai ua maliu. Na ia manatua le peleue o loo ia ofuina o le ofu lea na ia ofuina I la matou polokalame o Agaga Paia I le vaiaso e muamua atu. Na faaofiofi atu I le motu o tagata ma ia ufiufi le tagata oti I lona peleue, na toe nofo mai luga le tagata ua ola. O le faauuga na faasolo atu I le ofu e ala I le ea, ona faasolo atu lea I le tagata oti e ala I le pai atu o le ofu I le tagata oti. 

Tatalo

Tama, faamolemole ia e faauu ia te a’u ia matua malosi ina ia tau lava o le talotalo o ou lima ae malolo tagata mama’I, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 30 NOVEMA 2023

Manatu Autu: Faasolo le Faauuga 2 (Transfer of anointing 2)

Tauloto – Galuega 19:12‘o lea ua avea ai solosolo ma ie tali otaota nai lona tino i e mama’i, ona mavae ai lea o latou ma‘i, ua ō i fafo foi ia te i latou agaga leaga..

Faitauga - Tusi Paia: Galuega 19:11-12

Upu Folafola

O le isi auala e mafai ai ona faasolo atu ai le faauuga mai se tagata faauuina i se tagata o loo manaʻomia le faauuga, e ala lea I le faaaogaina o mea e pei o solosolo, suauu ma isi. E te manatu I le auala e fafaga ai ma'a o ta'avale, ma faaola ai se taavale. O maa taavale e fafaga, e mafai ona faaolaola le malosi o le eletise, e faaola ai lau taavale. I le tulaga lava e tasi, e mafai e se tamaitai po o se tane ua faauuina ona tatalo  i luga o se solosolo po’o se suauu, ona auina atu lea, i le nofoaga e manaʻomia ai,  ma amata ai loa ona tutupu vavega e ala I nei solosolo poo le suauu ua faauuina. E mafua ona ua I ai le faauuga paia a le Alii. I le faitauga o le Tusi Paia o le aso, ua tatou vaaia ai se faaaʻoaʻoga sili ona lelei o le faauuina e ala lea I le faasolo o le faauuga I solosolo. O solosolo po o tali otaota sa pa’I i le tino o Paulo, na faaaogā e faamalolō ai le tele o tagata mamaʻi ma tutuli ese ai agaga leaga.

Ou te manatua le taimi muamua na ou faaaogaina ai faʻauʻuga faapenei. Faatoa ou fo’i mai lava i se malaga i atunuu I fafo, ma na ou lagona le vaivai. Na sau se tasi o la’u fanau teine ma fai mai pe mafai ona ou alu atu e tatalo mo lona tina matua, faatoa maea lona taotoga, ae ona o le matua o ona tausaga, ua le mafai ai ona pe le manu’a, na lagona lava lou  vaivai ou te alu atu i le falemai,  o lea na ou tatalo ai loa i se solosolo ma avatu e tuu I luga o lenei tina matua. Na ia faia e pei ona ou faatonuina, ma e o’o atu i le aso na sosoo ai, e le gata ua faamaloloina le tina matua, ae e lei maua e fomai, ma’ila ma faailoga o le taotoga o lenei tina. O le solosolo na faaaoga e auala atu ai le mana o le faamalologa. Ia maitau mai, e sili atu le tulaga maualuga o le faʻauʻuga lenei nai lo le pa’i o le tagata faauuina I le isi tagata.

Afai faatoʻā maea ona faau’uina oe, e te ono manaʻomia le taimi lelei ia lava e tatalo ai I luga o mea e pei o solosolo o le a e faaaogaina e faasolo ai le faauuga. A’o e tuputupu pea I le faʻauʻuga, e te oʻo atu i le tulaga e na o lou tatalo lava i se tatalo faigofie i luga o se solosolo ae faʻauʻuina loa. E mafai foi ona e o'o i le tulaga sili atu e na o lou pa’i lava I se solosolo ae faau’uina loa. I le tusi o Galuega 19:11-12, e leʻo taʻua i le Tusi Paia na tatalo le Aposetolo o Paulo i se solosolo ma talieleele, ae o lo’o faapea mai, na ona paʻi atu lava o Paulo iai ao ia faaaogaina, ae faauuina loa, ae o le taimi foi lea ua o’o atu Paulo I le tulaga ua faia ai e le Atua vavega faapitoa i ona aao.

Tatalo

Tama, faamolemole faauu ia te au ia iai le mana seia oo ina na o lo’u pai atu lava I se tagata po’o so’o se mea ae faauuina loa, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 29 NOVEMA 2023

Manatu Autu: Faasolo le Faauuga 1(Transfer of anointing 1)

Tauloto – Teuteronome 34:9‘Ua tumu foi Iosua le atalii o Nuno i le agaga e poto ai; auā na faaee atu e Mose ona lima i luga ia te ia; na faalogo foi le fanauga a Isaraelu ia te ia, ma ua latou faia e pei ona poloai mai ai o Ieova ia Mose’.

Faitauga - Tusi Paia: Numera 27:18-23

Upu Folafola

O le faauuga, e pei lava o le eletise, e usitaia nisi o Tulafono o natura o mea, e mafai ona faasolo atu I seisi mea pe a pa’I I ai. O le faasolo atu o le faauuga, e tupu pe afai e pa’i atu le tagata o lo’o iai le faauuga I le tagata o lo’o manaomia le faau’uga. E mafai ona faia I le lulu a’ao ma le faae’e o lima. Mo se faataitaiga, I le Galuega 3:1-8, o le tagata pipili I le Faitotoa Matagofie e lei savali seia o’o ina pa’i atu Peteru ma faatu I luga. Na faasolo atu le faauuga I lima o Peteru I le tagata pipili. Fai mai Mareko 16:18 e fetagofi i latou i gata; afai foi latou te inu i se mea e oti ai, latou te le afaina ai lava; e faaee atu foi o latou lima i luga o e mamai, ma faamaloloina i latou.

O lo’o faapea mai Iesu, a faae’e o tatou lima I luga o tagata mama’i, o le faauuga o lo’o I a’i tatou o le a faasolo atu iai latou ona aveese ai lea o le ma’i. E iai nisi o taimi e tupu ai ae e te lei mafaufauina. Mo se faataitaiga, o le taimi e te tu ai I luga o se uaea eletise ola, pe ete iloa pe leai, o le eletise o lo’o ola ai I totonu o le a faasolo atu ia te oe. E faapena foi la ona faasolo le faauuga I le va o ni tagata e aunoa ma le taumafai e tau amata ona faasolo le faau’uga. Mo se faataitaiga, I le 2 Tupu 13:20-21, ina ua paū faafuasei le tino maliu o se tagata I lalo I le tuugamau o Elisaia, na toetu mai ua toe ola. 

I ni tausaga talu ai, sa ou malaga I fafo ma sa ou alu atu e faatau I se faletusi. Na sau se tamaloa I totonu o le faleoloa ma ula I le tele o au tusi o lo’o tau faatau. Na tuu mai lona lima ona ma lulu lima e aunoa ma lou taumafai e faasolo le faauuga. Ua ou te’i I le alaga ma faapea mai, ‘O ai oe?’ aua o le tigā o lona tua sa pologa ai mo le tele o tausaga ua faafuasei ona mou ese a’o ou luluina lona lima. O le faasolo lena o le faauuga e ala I le pa’i. Le au pele e, o so’o se taimi e maua ai sou avanoa e lulu aao ai ma se tagata faauuina, pe faaee foi o latou lima I luga ia te oe, aua e te faatalale iai. E mafai ona suia lou olaga I le pa’i e tasi. Ou te le o faapea atu e te taumafai e pai faamalosi atu I so’o se auauna faauuina a le Atua, ia e faia ma le ava ma le faaaloalo aua o le faauuga lava lea e tasi, e mafai ona faamaloloina se tagata pe faaumatia foi se tagata pe a ulagia. Aua e te faatalale I le lulu aao po’o le faae’eina o aao o se tagata faauuina a le Atua ia te oe, I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 27 NOVEMA 2023

Manatu Autu: Ala I le mana faale Atua(Key to divine power)

Tauloto – Kalatia 5:25‘Afai ua tatou ola i le Agaga, ia tatou savavali foi i le Agaga.

Faitauga - Tusi Paia: Galuega 2:1-4

Upu Folafola

O le mana a le Atua e le o se mea e taugofie. Ou te manatua na ou ole atu i le Atua e foai mai ia te a’u le mana e fai ai vavega ma sa ia tali mai, “Amata i le tulaga na amata ai Iesu”  Sa ou lagona le fiafia ma ou manatu o le a ‘ou fa’aluaina le vavega muamua a Iesu, seia o’o ina fa’ailoa mai e le Alii ia te a’u le tusi o Mataio 4:2, na amata Iesu i le tatalo ma le anapogi mo aso e 40. Afai e te naunau i le mana mai le Atua, ia e saunia e faatoilalo le tino. Afai e pulea oe e le Agaga ae lē o le tino, e fa’atuatuaina oe e le Atua e avatu iai le mana. Afai e te naunau ma ua e masani i le anapogi, tatalo, sa’iliili i le Tusi Pa’ia ma le ola faapa’iaina, e ono avea oe ma tagata e filifilia e maua le mana faaleAtua. A ou talanoa i le ola fa’apaiaina ma le ola e aunoa ma se agasala, o nisi e manatu ou te mapo tulafono, peitai a e faitau i le Eperu 1:9, e te silafia ai, e tatau ona e fiafia i le amiotonu ae inoino i le amioleaga, ona fa’auuina ai lea o oe, e le Atua.

Sa fetalai le aposetolo o Paulo i le 1 Korinito 9:27 e faapea, sa ia fa’atoilaloina lona tino. Sa ia faapea mai foi i le tusi o le 2 Korinito 11:27, sa fai ma ana masani le anapogi. O le ā le fua o ia faiga? Fai mai le Galuega 19:11-12, ina ua vaai mai temoni i solosolo, na taufetuli ese; o le mana tonu lena! Afai ou te anapogi ma fa’amamafaina le ola fa’apaiaina i aso uma, ou te iloa lelei la’u mea lea e fai. Ou te molimauina fo’i le manuia ai o lo’u olaga ma ou te lē toe tu’ua. I tausaga ua tuanai atu, sa valaauina a’u e le Full Gospel Businessmen’s Fellowship International ou te lauga i le mataupu: ‘O le Fa’au’uga Fou’. Ina ua maea le lauga, na ou faanatinati ese I le taavale ona o le toatele o tagata e fia pa’i mai ia te a’u! E iai se tamā sa tamo’e mai ia te a’u ma u’u mai lona solosolo. Faafetai sa ia maua mai na o la’u taavale ma sa ia oloina le solosolo i le tino o le taavale ae lei alu ese le taavale. I lona fale, sa iai se teineititi ua ulufia e temoni, ma e to’a 6 tamaloloa e tau taofiofia o ia I lalo. Ua taunuu atu le tama lea ma faapa’i atu le solosolo i le teineititi, ona toe foi lea o le teineititi i le lelei.

A fai e te manao e maua lea ituaiga mana, e tatau ona e gauai e totogi lona tau. E tatau ona e iloa faatoilalo le tino, ona foa’i atu lea e le Atua o lona mana e faia ai mea mata’utia ma tetele mo ia. E tatau ona amata ona e manatu I mea fa’aleagaga e sili atu i mea fa’aletino pe afai e te manao I le mana o le Atua i lou olaga, I le suafa o Iesu, Amene.

OPEN HEAVENS

MATALA LE LAGI MO LE ASO GAFUA 27 NOVEMA 2023

Manatu Autu: Ala I le tauoloa ma le tautaua (Key to influence)

Tauloto – Mataio 5:5‘Amuia ē agamalu; auā e fai mo latou tofi le nuu’.

Faitauga - Tusi Paia: Filipi 2:5-11

Upu Folafola

Ina ua maliu ma toetu mai Iesu, na faalauteleina e le Atua lona tulaga ta’uta’ua ma le tauoloa, e o’o I le ta’u o lona suafa, e toatuli tulivae uma ma ta’uta’u o ia o le Alii (Filipi 2:10-11). Afai e te faitau I le Filipi 2:5-8, ma e vaai iai I le maualalo na oo iai le faamaulalo o Iesu, e oo I le maliu mataga I le satauro, e tasi le tulaga o loo manino, o loo iai le agamalu, aua sa ia te ia le mana ma le pule, ae na faamaualaloina ma foliga e vaivai ina ia manuia tagata ma faataunuuina le finagalo o le Atua. O le mafuaaga lea na siitia ma faaeaina maualuga e le Atua ma faalautele lona tulaga tauoloa ma le pule. Fai mai le Mataio 5:5 Amuia ē agamalu; auā e fai mo latou tofi le nuu’. O tagata agamalu e fai mo latou tofi I le nuu ma le lalolagi nei, o I latou ia e faaeaina I tofi maualuluga ma faalauteleina lo latou tulaga tauoloa ma le pule. 

Afai e te silasila lelei I le tala ia Elia, e te iloa ai o ia o faifaatoaga manuia ma maumea ae na filifili e fai ma auauna a se perofeta (1 Tupu 19:19-21). Aua na mafai ona ui I se tulaga maualalo ina ia faataunuuina le finagalo o le Atua, na faaeaina e le Atua ma faalauteleina vaega e oo iai lona tauoloa ma le tautaua e o’o I le tupu o le atunuu e valaau ia te ia ‘Tama’ (2 Tupu 13:14). 

Na ou fai I lau fanau I ni Tausaga talu ai, afai e faatalanoa ma fesiligia a’u I tulaga tiga ma faamanuiaga o le galuega a le Atua, o se tasi o faamanuiaga matagofie, o le faalautele o le tauoloa ma le tautaua. Ina ua ou auai mai I le Ekalesia Redeemed Christian Church of God, na fai mai le Atua ia ou auauna I le Taitai aoao e le’i alu I se aoga, ma na ou faia ma le olioli. Ina ua maliu lou tama faaleagaga ma ua ou galue o se faifeau, e le o se galuega e ula iai seisi. Ua ou o’o ma iloa le maualalo o le mativa ao ou taumafai e faauma le faailoga pito maualuga I le Iunivesite. E ui e le o a’u o se tagata maualoa, ae na lava a le tupe e tausi ai lo’u aiga ma totogi pili. Ona valaau lea o le Atua e tuua la’u galuega ae avea ma faifeau tumau ma taitaia se Ekalesia e tau leai ni tupe. Na ou ui I le tiga, ae o le aso, i lo’u atunuu o Nigeria lava ia, e mafai ona ou faafeiloai atu oe I le tele o tagata pito maualuluga ma tulaga tauoloa ma pule o lo’o iai, ae sili atu I lena, e mafai ona ou faafeiloai atu oe I le Tupu o Tupu. 

O le pule ma le tautaua e afua mai I le agamalu. Afai e mafai ona e faamaulalo ma usiusitai I e pule ia te oe ae faataatia ese ou faailoga ma mea uma ua e ausia, e avatu e le Atua ia te oe tulaga pule, tauoloa ma le tautaua, I le suafa o Iesu, Amene.