Samoan Devotional

OPEN HEAVENS

MATALA LE LAGI MO LE ASO TOFI 15 AOKUSO 2024

(tusia e Pastor EA Adeboye)

Manatu Autu: Tapeina tatalo 2 ( Prayer Extinguisher 2)

Tauloto -Tusi Paia– Iakopo 4:3 “Ua ‘outou ole atu, ‘ae le‘i maua, auā ‘ua ole atu ma le fa‘alētatau, ‘ina ‘ia fa‘auma ai ia mea i o ‘outou mana‘o leaga.”

Faitauga – Tusi Paia – Iakopo 4:1-6

O le aso ananafi, na ou talanoa atu ai I le auala e tapeina ai e Le agasala tatou tatalo. O le isi auala e tapeina tatalo o le le tatalo e tusa ma le finagalo o le Atua. E tatau ona e malamalama, e iai le fuafuaga a le Atua mo lou olaga ma foaiina atu le iuga e iai le faamoemoe (Ieremia 29:11). O lona uiga o loo iai le faamoemoega a le Atua mo lou olaga ae e te lei fanau mai. O lea, o mea uma na te faia, e oo I tatalo e na te taliina mai, ia taunuu I le iuga e iai le faamoemoe. E le mafai ona e tatalo I se mea e tetee i lona finagalo ma e manatu e na te faia. 

E iai tagata e faapea mai ‘ua leva ona ou tatalo I Le Atua mo le mea lea, peitai e lei tali mai lava o ia’. O le mea o ono sese o le latou le suesue lelei, po’o le mea o lo’o ole atu ai, pe o gatasi ma le finagalo o Le Atua, poo loo taumafai e faamalieina o latou manaoga leaga (Iakopo 4:3). O le tatalo I mea I fafo atu o le finagalo o le Atua e faaletatau, e tapeina nei tatalo ma e le tali iai le Atua. O le mafuaaga lea e tatau ona e mafuta vavalalata ma Agaga Paia. Fai mai le Roma 8:26, e iai taimi tatou te le iloa ai mea e ole atu ai ma le finagalo o le Tama. Peitai, e mafai e Agaga Paia ona fesoasoani atu e tatalo e tusa ma le finagalo ole Atua, ona mafai lea ona tali mai o tatalo. 

A e tatalo i gagana eseese, o loo e tatalo ini tatalo maoti, aua o loo tatalo Agaga Paia e tusa ma le finagalo o le Tama ia te oe. E te manatu o loo lua uo ma le atalii o le pule o le kamupani, ae e Tusi talosaga atu mo se avanoa faigaluega, na tusia e se pule lua o le kamupani, ae o loo faamaonia e lau uo le isi pule lua o le kamupani. A oo atu lau Tusi talosaga I le pule sili, o loo atagia ai mea uma o loo manaomia e le kamupani ma o loo saini atu ai lona atalii. E mautinoa e te maua le galuega aua o loo manino lou iloa o galuega aemaise o loo faamaonia e lelei le lua mafutaga ma lona atalii. 

Afai e te le manao e tapeina au tatalo, faataga Agaga Paia e tatalo mai ia te oe ao tumau le lua mafutaga vavalalata ma Iesu Keriso o loo e tatalo atu ai. O tatalo pito sili ona lelei o tatalo e taitaia e Agaga Paia. 

Talalo, 

Agaga Paia, faamolemole aoao a’u e tatalo e tusa ma le finagalo o le Tama i taimi uma, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 14 AOKUSO 2024

(tusia e Pastor EA Adeboye)

Manatu Autu: Tapeina tatalo 1( Prayer Extinguisher 1)

Tauloto -Tusi Paia– Mika 3:4“Ona latou ‘alalaga atu ai lea i le ALI‘I, ‘ae lē fa‘afofoga mai ai o ia ‘iā te i latou; ‘ae ‘alo ‘ese ona fofoga ‘iā te i latou i ia lava ona po, auā ‘ua leaga lava a latou mea e fai.”

Faitauga – Tusi Paia – Isaia 59:1-2

A e faaaogaina le fagu tape afi e tape ai le afi, e pe le afi. E faapena foi le tatalo, e iai mea e mafai ona tapeina tatalo. Afai o loo iai nei mea  io tatou olaga, e tatou te le maua tali o tatou tatalo, aua e  tapeina a tatou tatalo ae lei oo I le Atua. 

O le agasala, e mafai ona tapeina a tatou tatalo i le taimi e tuua ai o tatou laugutu. Fai mai Tavita i le Salamo 66:18 “‘Ana ‘ou manatu i se amio leaga i lo‘u loto, po ‘ua lē fa‘afofoga mai le Ali‘i ‘iā te a‘u.”

A iai se agasala i lou loto, e mafai ona tapeina au tatalo ona le faafofoga lea iai o le Atua tusa poo le a lou leo tele. I le Isaia 59: 1-2, fai mai le Tusi Paia e mafai e le agasala ona faia se avanoa tele e va ai le tagata ma le Atua ua le mafai ai ona faafofoga o ia ia tei tatou, e le mafai foi e ona aao ona oo mai iai tatou. 

Tusa pe tatalo se tagata o le Atua mo lea tagata, e tapeina e le agasala a Lena tagata le tatalo seiloga e salamo mai ana agasala. I le tele o tausaga talu ai ae lei tele tele le Ekalesia, sa masani ona ou tatalo ma faaloaloa o’u lima I luga o tagata, na sau ai se Tina I se matou sauniga o le Agaga Paia. E tele tausaga talu ina faaipoipo, ae le maua sana tama ma o lea na sau ona na faalogo o loo ia te au le faauuga e fananau ai tagata. Na ou tatalo mo ia ma ua pau I Le faauuga. Peitai, sa lei maua lava sana tama. Ua foi mai ma le faasea, ‘Na tou fai mai a faaloaloa ou Lima ia te au ma ou pau i le faauuga, ona maua lea o sa’u pepe a’o lenei lava e lei maua’. Ua ou manatu e na te manaomia seisi faauuga I luga atu ma a’o ou sauni e tatalo, fai mai le Atua, ou te fesili iai pe fia ana uo tama. E ui e faigata le fesili, na ou memumemu atu pea le fesili. Ae tali mai, e ono ana uo tama. Ua ou faapea atu, ‘o lena la, e te manatu ea e tali lo’u Atua ia te oe? Ioe, na ou tatalo mo ia, ae o lana agasala na tapeina le tatalo. 

Suesue lelei lou tagata ae e te le’i tatalo ina ia mautinoa e leai se agasala i lou loto, aua afai o loo iai le agasala, e maimau au tatalo. Salamo muamua mai au agasala, ona e mautinoa lea e tali le Atua I au tatalo. E pau le tatalo e mafai e Le Atua ona faafofoga iai mai le tagata agasala, o le tatalo o le salamo mai le agasala aua afai o loo iai le agasala I Le olaga o le tagata, e le mafai ona faafofoga mai iai le Atua (Isaia 59:1-2). I Le suafa o Iesu, Amene

OPEN HEAVENS

MATALA LE LAGI MO LE ASO LUA 13 AOKUSO 2024

(tusia e Pastor EA Adeboye)

Manatu Autu: Ole atu i Lona suafa( Ask in His name)

Tauloto -Tusi Paia– Salamo 145:18 “E latalata mai le ALI‘I ‘iā i latou uma o ē vala‘au ‘iā te ia, o i latou uma o ē vala‘au ‘iā te ia ma le fa‘amaoni.”

Faitauga – Tusi Paia – Salamo 66:17-20

I le lalolagi atoa, o loo valaau atu tagata i le Atua mo lea mana’oga ma lea mana’oga, ae ui ina tele galuega o loo ia faia, sa ia fetalai: “Ia e vala‘au mai ‘iā te a‘u, ‘ona ‘ou tali atu ai lea ‘iā te oe, ma ‘ou fa‘aali atu ‘iā te oe o mea tetele ma le faigatā, o mea ‘ua e lē iloa.”Ieremia‬ ‭33‬:‭3

Ua ou asiasia ofisa o nisi Peresetene. Afai e te asiasi atu iai, e mana’omia ona fa’atonu muamua sou taimi. Afai e fa’apea mai le Perestene e te susū mai i le 2pm, ae a vave ona e taunuu, e mafai ona tā le 5pm o loo e fa’atalitali pea auā e tele galuega a le Peresetene. E iai taimi, e mana’omia oe e le Peresetene, ae e tatau pea ona e fa’atalitali se’i avanoa mai. Ae leai se Peresetene e tutusa le tele o ana galuega  e pei o le Atua, peitai afai e te vala’au i le Atua, e avanoa lava o ia e tali mai ia te oe I soo se taimi e te valaau ai ia te ia, e leai se taimi e faapea mai ai ua fa’alavelavea tele o ia.

Sa fetalai Iesu, so’o se taimi tatou te vala’au atu ai i le Atua i tatalo, ia tatou vala’au atu i lona suafa. E mafai ona ou auina atu oe i se tagata ma tu’uina atu se tusi ua sainia, e talosaga ai mo soo se mea e te moomia .Peita’i a ou fa’apea atu e te alu e fai ma o’u sui, o lona uiga, a e taunuu i le faitoto’a ona e ta’ua lea o lo’u igoa, o Adeboye, ua taunuu. A va’ai tagata ia te oe, latou te taliaina oe ma fa’aaloalo ia te oe, e peisea’I o a’u lea ua latou faafeiloa’ia.

O le fetalai mai o Iesu e te tatalo i lona Tama, i lona suafa, o le uiga o lea tulaga, e ui lava o oe lea e tatalo, o le a fa’afofoga le Tama i lau tatalo, e pei o lana lava tatalo. Aua foi, o Iesu ma lona Tamā e tasi, (Ioane 10:30) ma e atagia ai fo’i o mea uma e ana e le Atua o loo ia Iesu fo’i, ma e le te’ena e le Atua so o se mea e ole atu ai Iesu, e le teena e le Atua so’o se mea e te ole atu ai e tusa ma lona finagalo.

A fa’aali atu Iesu ia te oe ma ia fetalai atu, o soo se mea e te fa’atoga atu ai, o le a foa’ina atu, e te gūgū ea, pe amata loa ona e faatoga atu i mea o loo e manaomia? Ua uma ona ia faailoa mai i le Ioane 16:23, o so’o se mea e te ole atu ai, o le a ia foa’ina mo oe. O le mafua’aga lena e tatau ai ona e tatalo mo ou mana’oga uma. E tele tagata e faitio i mea e mafai ona latou suia pe a latou faatoga ma tatalo i le Atua. O lo o fa’atali Iesu e foa’i mai so’o se mea e te ole atu ai.

Aua le popole i se mea e tasi, tatalo i le suafa o Iesu, ona ia fō’ia lea o le faafitauli (Ioane 14:13-14). O loo fa’atali Iesu e faafofoga I ou manaoga, ‘aua le taofia lou talanoa atu ia te ia, I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 12 AOKUSO 2024

(tusia e Pastor EA Adeboye)

Manatu Autu: Faamanuiaina e maualuga atu I fetuu ( Blessed beyond curses)

Tauloto -Tusi Paia– Efeso 1:3 “Ia fa‘afetaia le Atua, o le Tamā o lo tatou Ali‘i o Iesu Keriso, o lē ‘ua fa‘amanuia mai ‘iā i tatou i mea uma lava e manuia ai i la le Agaga, i mea o i le lagi, ‘ona o Keriso;”

Faitauga – Tusi Paia – Numera 23:5-8

Fai mai le Numera 23:8 “Pe fa‘apefea ‘ona ‘ou fetu‘u i lē ‘ua lē fetu‘uina e le Atua? pe fa‘apefea fo‘i ‘ona ‘ou fa‘afano i lē ‘ua lē fa‘afanoa e le ALI‘I?”

Fai mai le fuaitau I luga, e matua faigata ona fetuuina tagata ua faamanuia iai le Atua. O nei tagata e matua faigata ona aafia I fetuu o loo folafola iai latou. Tusa poo a taumafaiga a satani e fetuu, e leai se mea e mafai e le tiapolo ona fai e fetuu ai le tagata ua faamanuia iai le Atua. Fai mai le Roma 8:31

“O lenei, se a sa tatou ‘upu i nei mea? ‘Āfai ‘ua ‘au ma i tatou le Atua, o ai sē fa‘asaga tau mai ‘iā i tatou?” 

O loo i lau itu le Atua matautia, e leai se malosiaga i le laueleele, lalo o le laueleele poo seisi lava nofoaga e mafai ona galue e faasagatau ia te oe. Fai mai le Tusi Paia, ua faatauina oe I se tau (1 Korinito 6:20), o le tau o le toto o Iesu. O lona uiga e leai se tagata e mafai ona pai ia te oe, aua o le Atua e ona oe. Ona o le Toto o Iesu o loo fegasoloai i totonu ia te oe, e le mafai ona suia lou faamanuiaina. Ua faamanuia le Atua ia te oe I faamanuiaga mai le Atua, ina ia le mafai e se tagata on fetuu oe. Fai mai le Numera 23:23 

‘Ua ‘aumaia i latou e le Atua a‘i Aikupito; ‘ua ‘iā te ia e peiseaī o le tele vave o le rema. Auā e leai se mātemāte ‘iā Iakopo, po o se togafiti fa‘ataulāitu ‘iā Isaraelu; o ona po nei e fa‘apea mai ai ‘iā Iakopo ‘atoa ma Isaraelu. ‘Fa‘auta i mea ‘ua faia e le Atua!’

I le Faataoto 26:2, ua faamautu mai 

“E pei o le manulele ‘ua fealua‘i ma le pe‘ape‘a ‘ua felelea‘i e fa‘apea le fetu‘u fai fua e lē taunu‘u auā e leai sona mafua‘aga.”

Afai e fetuu oe e se tagata e leai ma se mafuaaga, aua e te manatu fua iai pe fefe ai. Na fetuu e Koliata Tavita, ae i ni mai minute, ua uu e Tavita lona ulu i lona lima. O le mea moni, o soo se tagata e taumafai e fetuu oe, e na te manaomia au tatalo aua fai mai le Upu a le Atua i le Kenese 12:3

“Ou te fa‘amanuia atu ‘iā te i latou o ē fa‘amanuia ‘iā te oe, ‘ou te fa‘amalaia atu fo‘i ‘iā te i latou o ē fetu‘u ‘iā te oe; e manuia fo‘i ‘iā te oe o ‘āiga uma o le lalolagi.”

O le a se mafuaaga e mafai ai ona taunuu se fetuu ma oo I se tagata faatuatua? O le agasala. Sa le mafai e Palaamo ona fetuu le fanauga a Isaraelu ona o lo latou faamanuiaina, ae ina ua faaseseina I latou e taooto ma fafine ese, e lei leva ae latou maua i faama’i eseese. Afai e te manao e tumau i le faamanuiaina ina ua maea ona tuuina atu lou ola ia Iesu, e tatau ona e faamautinoaina o loo e ola faapaiaina. I se olaga e aunoa ma Keriso, e leai se puipuiga mai fetuu. Afai e te tumau pea o se afafine poo se atalii o le Atua, e le mafai e se fetuu ona pa’i ia te oe. 

Lafoai lou ola ia Iesu ona ola lea faapaiaina e mautinoa ai e te faamanuiaina e maualuga atu I fetuu, i le suafa o Iesu, Amene. 

OPEN HEAVENS

MATALA LE LAGI MO LE ASO SA 11AOKUSO 2024

(tusia e Pastor EA Adeboye)

Manatu Autu: O Le Faamoemoe O Lona Soifua, Maliu Ma Le Toetu (The Purpose Of His Life, Death And Resurrection)

Tauloto -Tusi Paia– Ioane 10:10 “O le gaoi, e leai se tasi mea e sau ai na ‘ona ia gaoi, ma fasi, ma fa‘aumatia; ‘ua ‘ou sau ‘ina ‘ia latou maua le ola, ‘ia maua atili ai lava.”

Faitauga – Tusi Paia – Ioane 1:19-29

O’u te mautinoa ua e silafia, i le silia ma le lua afe tausaga talu ai, sa feafio’ai ai Iesu i luga o le fogaeleele o se tagata soifua e pei o oe ma a’u. Peita’i, o e silafia le mafuaaga tonu na afio mai ai o ia i le lalolagi i le itu tagata soifua?

Fai mai le Tusi o Ioane 1:14; “Ua liu tino tagata le ‘Upu, sa mau fo‘i o ia ma i tatou, na matou matamata i lona mamalu; o le mamalu lava lea o le Alo e to‘atasi o le Tamā, ‘ua tumu o ia i le alofa tunoa ma le fa‘amaoni.”

O le a le faamoemoe o Iesu na afio mai ai i le lalolagi faapei o se tagata soifua?

Se’i o tatou su’esu’e i nisi o tali o loo faailoa mai le Tusi Paia e uiga i lenei mataupu:

1. Na afio mai Iesu e valaau i e agasala ina ia salamō. Fai mai le Mataio 9:13 “Inā ō ia, ‘inā a‘oa‘o po o le a le uiga o lea ‘upu, ‘‘Ou te loto i le alofa, ‘ae lē o le taulaga.’ Auā ‘ou te le‘i sau e vala‘au i ē ‘ua amiotonu, a o ē ‘ua agasala ‘ina ‘ia latou salamō.”

1. Na afio mai e aumai le ola e faavavau. Fai mai Ioane 10:10 “O le gaoi, e leai se tasi mea e sau ai na ‘ona ia gaoi, ma fasi, ma fa‘aumatia; ‘ua ‘ou sau ‘ina ‘ia latou maua le ola, ‘ia maua atili ai lava.”

1. Na afio mai e faamalolō, fa’asa’oloto ma tu’u saoloto i e ua faasauaina. Ua tusia i le tusi o Luka 4:18 e faapea, “Ua i o‘u luga le Agaga o le Ali‘i, auā ‘ua nā fa‘au‘u mai ‘iā te a‘u e folafola le tala lelei i ē matitiva. ‘Ua ‘auina mai a‘u e ia e fa‘amālōlō i ē loto momomo, e tala‘i le sa‘olotoga i le tāfeaga, ma ‘ia pupula mata o ē tauaso, e tu‘u sa‘oloto i ē ‘ua fa‘asauāina,”

1. Ia fa’aumatia galuega a le tiapolo. Fai mai le 1 Ioane 3:8, . “O lē fai le agasala, mai le tiapolo lava ia; auā ‘ua agasala le tiapolo talu le amataga, o le mea lava lea na fa‘aalia mai ai le Alo o le Atua, ‘ina ‘ia fa‘aumatia e ia galuega a le tiapolo.”

E tusa ai ma nei molimau mai le Afioga Paia a le Atua e faatatau i le faamoemoe na afio mai ai Iesu i lenei lalolagi, ua i ai se aogā o lona afio mai i lou olaga? Afai e lē mafai ona e tali manino i lenei fesili, ua tatau ona e valaaulia Iesu i lou olaga, tusa po ua uma ona e faia muamua. Tu’u atoa lou ola iā Iesu i le asō, ma fai sau faatatau e amata nei loa i le asō ona e ola fa’apaiaina. O le auala lea e faataunuuina ai le faamoemoe na afio mai ai Iesu i le lalolagi, i lou olaga, ma e soifua manumalō ai i le agaga o le ma’i, pologa ma galuega a le fili. O le a e soifua fiafia I le ola tulu’i ma le ola e faavavau ia Keriso Iesu. Na afio mai Iesu I lenei lalolagi ina ia e maua le ola e faavavau, i le suafa o Iesu, Amene.

OPEN HEAVENS

MATALA LE LAGI MO LE ASO TOONAI 10 AOKUSO 2024

(tusia e Pastor EA Adeboye)

Manatu Autu: Fai fa’atoāga (Husband-ry)

Tauloto -Tusi Paia– 1 Peteru 3:7 ‘Ia fa‘apea ‘outou tane, ‘ia fai le ‘āiga ma le poto, ‘ia fa‘autauta i le tino vaivai o le fafine ma āva ‘iā te ia ‘ona ‘ua tofia fa‘atasi i le ola e foa‘ifuaina mai, ‘ina ne‘i fa‘alavelaveina a ‘outou tatalo;'

Faitauga – Tusi Paia – Malaki 2:13-15

A e manatu I le upu “tane” e te iloa ai lona uiga tutusa ma le upu “fai fa’atoaga”. O le fai faatoaga o le tagata e tausia ma totō faatoaga ma lafu manu. O lea fuaitau ua fa’amanino mai ai ia i tatou tiute fai o tane poo tamā; o i latou e tausia a latou avā pei o togalaau ina ia mafai ona fuga mai. E tatau ona o latou tapu’e a latou taleni ma agava’a ia faatupu tele ai lo latou lalelei ma tamāoaiga ia sili atu I le taimi na faatoa fetaui ai. E mataina e tagata avā a nisi o tane auā sa lelei ona o latou faa failele a latou togalaau. O le auala e tausi ai ma atia’e le togalaau poo le avā a se tane o foliga vaaia lea o lona ituaiga tagata.

O togalaau e faamatagofieina fale ma fanua o āiga; a fua tau fuifui se togalaau, o le a tausasami le aiga i meaai paleni maloloina, ma manava le ea mamā. Peita’i afai o se togalaau e tumu i laau tuitui, o le a tele mea tiga, ma siama e nonofo I lea āiga. E toatele tamaloloa e femēmēa’i ma faanoanoa o latou olaga, e masani ona fa’aseā, fai mai e leaga o latou ta’ito’alua. E lē mafai e a latou avā ona faafiafia i latou pe a fai o latou lava e faanoanoa ma lē mau tonu; o foliga a ma uiga latou te maua, ua o le pau fo’i lea latou te toe avatu. Afai o oe o se tane, e tatau ona e avatu i lau avā amioga e te mana’o na te toe fai atu ia te oe. Tausi ma fa’afiafia lau ava, ona ia tausia lelei foi lea o oe. A’o le’i fa’ataua sou ofutino faatau muamua se ofu o lou toalua. Afai e te faaigoa ia te ia o se fa’ataulaitu ma agaleaga i ai, ia e iloa lelei o oe ua leaga ai le fafine, auā a o lua uo sa e valaaua o le agelu. O le alu atu o lau avā i lou aiga ua liu faataulaitu ai.

O le isi faamatalaina o le fai faatoaga I le tusi faamatala upu a le Iunivesite o Oxford, o le tausia ma puipuia o punaoa. Toatele tamaloloa e leai ma se uiga lelei latou te vaaia ma maitaua i o latou ta’i toalua; o tamaloloa leaga e faapenā. O se tane lelei na te iloa mea e mafaia e lana avā e ala i ana taleni ma meaalofa, ma fesoasoani i ai e atia’e ma faatupu ia fua mai i fua e sili ona lelei. Faapei o se tane e tapena lelei agava’a a lau avā, e tatau fo’i ona e onosaia ona vaivaiga ma faaletonu; o le itu aogā lena o le vele ese o vao i le galuega fai faatoaga. O ne’i vaivaiga o le a taumafai e taofia le fua lelei mai o ana taleni, peita’i o lou tiute le faailoa o nei vaivaiga ina ia faaitiitia ma i’u ina le toe vaaia.

O se tane lelei e lē faaseā e uiga i itu e vaivai ai lana avā; na te faafoe faaletonu nei o lona toalua ia aua ne’i o latou taofia le fa’aaogaina o ana taleni i le tulaga e gata ai. O se tane lelei e onosa’i e galulue faatasi ma lana avā ia manumalō i ona faaletonu ma fa’aleleia ana taleni. O fafine ua tula’i mai nei i tulaga manuia, e I ai fo’i o latou vaivaiga peita’i faafetai i le Atua e lelei o latou ta’itoalua. Ua faaeaina i latou e ui i ni o latou faaletonu, ma ua avea ma mitamitaga o a latou tane i le taimi nei, I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 9 AOKUSO 2024

(tusia e Pastor EA Adeboye)

Manatu Autu: Ola e tusa ma ana poloaiga 2(Live by His principles 2)

Tauloto -Tusi Paia–Iakopo 2:18 “Ae fai mai se tasi, “O ‘iā te oe le fa‘atuatua, o ‘iā te au fo‘i galuega;” ‘ia ‘inā fa‘aali mai ia ‘iā te a‘u lou fa‘atuatua e aunoa ma galuega, ‘ou te fa‘aali fo‘i ‘iā te oe lo‘u fa‘atuatua i a‘u galuega.”

Faitauga - Tusi Paia: Iakopo 2:14-18

Na amata ananafi ona ou talanoa atu I le taua o le ola e tusa ma poloaiga a le Atua. O le a faauma atu lenei aoaoga I le aso.

Ou te faafetai I le Atua i lona alofa tunoa, ma ou te faafetai foi ia te ia I le taitaia o au e suesue le mataupu o le matematika ae ou te lei faaolaina. O le tulaga taua e aoaoina mai I le matematika, o soo se fuaiupu faafuainumera, e faatoa sao ma maua le tali pe afai e ausia uma tapulaa. Mo se faataitaiga, I se tafatolu, o le aofaiga o faatafafa e lua I ona pito pupuu e tutusa lelei ma le aofaiga o le itu o le tafatolu pito umi. Ma o le tapulaa lea e maua ai le tali o soo se tafatolu pe o luga o le laueleele poo le masina. E valea le taumafai e maua seisi tali ese pe a le ausia le tapulaa lea. E oo ia Iesu Keriso sa tatau ona papatisoina e Ioane le papatiso ina ia ausia le tapulaa o lana galuega I le lalolagi ( Mataio 3:15). 

E te silafia e toatele tagata ua maea ona tuuina mai e le Atua a latou avanoa e ausia ai mea tetele peitai latou te lei maua lava ? O le faitotoa sa latou tatalo e tatala mai ua leva na matala mai; ae o loo faatali pea le Atua ia latou faia le galuega e mafai ona savavali atu ai I totonu. Paga lea, o le toatele o tagata ua maimau le tali o latou tatalo ua le faaaogaina ona o le mumusu e mulimuli tai I poloaiga faigofie. Ou te fai lava i lau fanau, e ui na folafola e le Atua Silisiliese o le a fanauina e Sara se atalii ia Aperaamo, ma toe faaola o la tino ua oti e tusa ma le Roma4:19, ana le taooto o se ulugalii Aperaamo ma Sara, e le taitai fanau Isaako. E tele vavega ua foai mai e le Atua i lana fanau, peitai ua latou le faia galuega e tatau ona faia e maua ai le vavega ae o loo fai sese le faaleagaga.  O lona uiga ua fai le faaleagaga i le itu sese. E te manatu i se ulugalii o loo nofo tatalo mo se tamaitiiti, ae e le o taooto o se ulugalii ae na o le tatalo? Poo se tamaitiiti aoga foi e leai se meaaoga o faia ae tatalo I le po atoa ina ia pasi suega e faia i le 7.30 i le taeao?

O le faaleagaga moni e le faapea ua tuuesea ai le galuega e tatau ona faia, o le faaleagaga moni e fanau mai ai le poto, aua o le poto o se meaalofa o le Agaga Paia ( 1 Korinito 12:8).

Ou te tatalo mo oe I le aso, o le faaleagaga I le itu sese e le Sou tofi I le suafa o Iesu. E le faapogisaina e le tiapolo ou mata e iloa ai poloaiga e fanau mai ai mea tele mo oe. E faamalosia oe i le aso e te faia galuega uma e manaomia ina ia maua mea uma ua saunia e le Alii mo oe i lenei vaitau, i le suafa o Iesu. 

Tatalo 

Tama, faamolemole faaali mai ia te au mea uma e tatau ona ou faia ou te maua ai vavega ua e tatalaina mo au ma aumai le alofa tunoa e faia ai, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 8 AOKUSO 2024

(tusia e Pastor EA Adeboye)

Manatu Autu: Ola e tusa ma ana poloaiga (Live by His principles)

Tauloto -Tusi Paia–Ioane 5:17  “Ona tali atu lea o Iesu ‘iā te i latou, “O lo‘o galue lo‘u tamā, e o‘o mai lava i le aso nei; o lo‘o galue fo‘i a‘u.”

Faitauga - Tusi Paia: Teuteronome 28:1-6

Ua faitio le toatele o Kerisiano, ua faapea mai, e oge manuia, e ui ua fai si leva ona o latou talia Iesu Keriso e fai ma Alii ma Faaola. O le fesili e masani ona ou fesiligia ai Kerisiano faapenei, “Talu ona e talia Iesu Keriso i lou olaga, pe ua e ola ea e tusa ma ana poloaiga?” O se mea lelei lou talia o Iesu i lou olaga, peitai e tatau ona e mautinoa o lo’o e ola e tusa ma ana poloaiga pe afai e te manaʻo e te maua ni suiga lelei I lou olaga.

E tusa lava pe o oe o se tagata e ola faaleagaga, e iai lava poloaiga e lima taitaia vaega eseese o lou olaga. Mo se faataitaiga, ua faapea mai le Tusi Paia, o lē e lē galue e lē tatau ona ʻai (2Tesalonia 3:10). E tusa lava po o le ā lou toaga e tatalo, ae afai e te paiē, e lē mafai ona e sao mai le mativa.(Faataoto 6:10-11 )

E leʻi umi talu ona ou fanaufouina, ae ou faalogologo i lipine a le tele o faifeʻau o loʻo aʻoaʻoina le mana o le tautino atu, ma ua salalau solo i le au kerisiano. E latou te faapea mai. “E mafai ona avea oe ma so’o se tagata e te tautino ma folafola mo oe. Tautino ma  folafola atu mea e te manao e te vaai atu iai i lou olaga”.  E ui lava e saʻo lenei feʻau, ae o le toʻatele ua latou ave seseina. O kerisiano sa paie, ua faaauau pea le paie, o tagata le aooga, latou te lei o e aooga ia siitia le iloa ma le poto. Ua na o le latou taʻutino, ‘Ou te mauʻoa, ou te lē mativa, “O aʻu o se tagata e ona fale, ou te lē ʻaisi lava,” ma isi tautinoga, peitai e leai ma ni suiga i o latou olaga.

Afai e te manaʻo i ni suiga lelei i lou olaga, e tatau ona e talia ma usitaia poloaiga a le Alii. O se tasi o ana mataupu faavae o loo i le Luka 6:38, afai e te le luluina fatu, e le tatau ona e faamoemoe e maua se seleselega. O le e aiu, ua na o le tatalo i le Atua ia faamanuia o ia, e pei lava o se faifaatoʻaga e leʻi totōina se fatu i le eleele, ae alu i lana faatoʻaga i taeao uma e tatalo ina ia ola mai ni ufi. A oo I le vaitau o le seleselega, e eli atu le palapala ia maua ni ufi, ae paga lea, na te le maua se fua, aua na te leʻi totoina se mea.

O nisi o poloaiga a le Atua ou te fia taʻua e faapea: Ia e faia i isi tagata mea e te loto e faia e I latou ia te oe (Mataio 7:12), Ia pulea lou fofoga (Salamo 141:3) ma ou manao (Faataoto 23:1-3), Ia viia oe e isi tagata ae aua e te viia e oe lava oe(Faataoto 27:2) Ia faia mea uma I laasaga, e amata i sina mea itiiti e tuputupu ae pea (Sakaria 4:10), so’o se mea e te amataina, ia mautinoa e fuafuaina ia manuia ma ausia uma faamoemoega(Luka 14:28). O nei poloaiga ma le tele o isi mataupu faavae o le olaga, e le faapea e te alu ai i seoli pe a le faia, peitai e fesoasoani tele ia te oe, e maua ai se olaga lelei ma le manuia I lenei lalolagi . Ia mautinoa o loo e ola ma usitai I poloaiga a le malo o le Atua, I le suafa o Iesu, Amene. 

Tauloto -Tusi Paia– 2 Tupu 6:5 “‘Ona fai mai lea o le tasi, “Se‘i tatou ō ma i matou o au ‘au‘auna.” ‘Ona fai atu lea o ia, “Tatou te ō lava.” ‘Ua ta e le tasi le la‘au, ‘ona pa‘ū ‘ese lea o le uluto‘i i le vai; ‘ona ‘alaga lea o ia, ‘ua fa‘apea mai, “Auē! le ali‘i e; auā o le mea nonō.”

OPEN HEAVENS

MATALA LE LAGI MO LE ASO LUA 6 AOKUSO 2024

(tusia e Pastor EA Adeboye)

Manatu Autu: Avea oe o se faamanuiaga (Be a blessing )

Tauloto -Tusi Paia– Faataoto 11:25 “E fa‘atamao‘āigaina le tagata matamau; o ia fo‘i lē fa‘asūsū i nisi, e fa‘asūsūina lava o ia.”

Faitauga - Tusi Paia: Teutoronome 15:7-11

O le ola i se olaga fa’amanuiaina ma le faamalieina, e tatau ona avea oe ma faamanuiaga i isi tagata. O le vaitafe e mama aua o loo tāfe pea le vai, ao le vaipē e manogi leaga aua e puipui ma taofi pea le vai i le tulaga e tasi. 

Afai e te sa’ilia au mea’ai e ai, atonu e te maua meaai e te ola ai, e ui ina iai nisi taumafataga o le a misi. Peita’i, afai e fa’aauau pea lou sa’ilia o mea taumafa mo tagata e tele, o le a le fa’aletonu ona iai ni au lava mea’ai auā fo’i, e le mafai ona e fafagaina isi tagata a’o e fia ‘ai. Afai e te saili e fa’atau ni ta’avale mo isi, o le a iai foi sau taavale e te faafoeina. O le tele o tagata e te faamoemoe e te faamanuia iai, o le tele foi lena o puna’oa ma mea e te maua, ma fa’aopoopoina ai fa’amanuiaga i lou tagata.

E foliga o se aga masani a le lalolagi le faamuamua pea o oe, ae o lo’o faapea mai le upu a le Atua, o le tele o mea e te faasalalauina, o le tele foi lea o mea e te maua(Faataoto 11: 24-26). O tamaiti a’oga e aoaoina isi tamaiti aoga, e foliga mai e matamau, ma e moni, peitai e te iloa e siitia lo latou malamalama i le mataupu ona o le a’oa’oina atu? E foliga mai o ia tamaiti a’oga, o lo o fesoasoani atu i isi tamaiti a’oga, a o le mea moni, ua sili atu le  fesoasoani mo latou lava. 

A e talai atu i au uo ma aiga le talalelei ia Iesu Keriso, ma e saili ia faaolaina o latou agaga, e te faia ona o lou alofa ia latou aua e te le mana’o e susunuina i Seoli. Peita’i o le tele o lou tala’i atu o le tala lelei, o le atili ai ona e maua’a ia Keriso. Muamua, o le a e molimauina ni vavega (Mareko 16:15-18) ma o le a atili ai ona mausili le moni o lou fa’atuatua. Lona lua, o le a musumusina oe e Agaga Pa’ia i mea o le a e lauga ai. Talitonu mai, e iai ni si mea ou te laugaina i le pulela’a e fou ia te a’u. Ma o ia faaaliga, ona  e tauala atu ia te a’u, e matuā sili atu le maua’a i totonu ia te a’u I lo seisi lava tagata. Lona tolu, o se tagata na te laugaina le upu a le Atua ma fai isi tagata ma so’o, ua iai le mafuaaga e le toe foi ai i tua tusa poo le a le faigata, aua e le manao e iloa atu e ona so’o o toe solomuli i tua.

O le avea o a’u ma taitai aoao o le Ekalesia RCGG o se tulaga sa tuuina mai e le Atua ou te ositaulaga ai ia te ia, peitai ua avea ma fesoasoani ou te tulai ma le mausali i le faatuatua. Mai le amataga, ua ou avea lava ma o’u leoleo ina ia aua lava nei toe solomuli I tua. A fai e tele ni tagata e feso’otai atu e te tatalo mo latou, e le mafai ona e tu’ua le tatalo aua e tatau ona e tatalo mo latou.   Le au pelē, e sili atu ona fa’manuiaina oe pe a fai e te filifili e avea ma fa’amanuiaga  i isi tagata. Filifili ma le tonu ia avea oe ma fa’amanuiaga i tagata uma i lou siomaga, i le suafa o Iesu, Amene.