Samoan Devotional

OPEN HEAVENS

MATALA LE LAGI MO LE ASO SA 25 AOKUSO 2024

(tusia e Pastor EA Adeboye)

Manatu Autu: Ta’aiga a isi tagata - Peer Pressure

Tauloto -Tusi Paia– 2 Korinito 10:12“Auā matou te lē fa‘amalosi ‘ina fa‘atasia, pe fa‘atusatusaina ai matou ma nisi, o ē vivi‘i i latou ‘iā te i latou; a o i latou, o lo‘o fefuafuaa‘i i latou ‘iā te i latou, ma fēfa‘atusatusa‘i i latou ‘iā te i latou, e lē popoto i latou.”

Faitauga – Tusi Paia – Roma 12:1-3

O ta’aiga a isi tagata o le tasi lea fili malosi o se kerisiano. O le tulaga aupito sili ona mata’utia ona e lē o lisiina faapitoa mai i galuega a le tino i le tusi o Kalatia 5;19-21, ma e toatele nauā kerisiano e lē faaeteete ai. E le gata i lea o le toatele o tagata e manatu o ta’aiga a tupulaga na o talavou e aafia ai, peita’i e maua fo’i i tagata matutua. Mo se fa’ata’ita’iga, a e alu i se faaipoipoga ma tou sisiva faatasi ma au uo i pese fa’ale lalolagi, ona e te lē mana’o e vaai mai au uo ua ese oe, ua sui lou olaga, o ta’aiga na a tupulaga ua e faia ai aga e lē tusa ma le finagalo o le Atua. E lē mafai ona e faafiafia i le Atua ma tagata i le taimi e tasi. O le tupu o Saulo, na ia taumafai e faafiafia tagata, ma i’u ai ina ia fa’atigā i le Atua. Na faoa ai lona nofoalii ma uma ai lona soifua i se oti mataga (1 Samuelu 31:1-6).

Aua e te taumafai e oofu faatasi ma le lalolagi ona e te lē fia foliga ese ma latou. Aua e te taumafai e te tautala i muāgagana palapalā e fa’ailoa ai o loo e masani i aga ma tu o le vaitau. I le tele o tausaga ua mavae, sa ou lauga ai i se tasi o aulotu, ma ina ua tula’i le auauna a le Atua i le fata faitaulaga e fa’ailoa a’u, sa fai lana saunoaga, e fiafia i mea uma lava faatatau ia te a’u, vagana le faiga o o’u lavalava pei se tagata tuli manu ma lo’u suti lima pupu’u. Sa ou tali, e lē o a’u o se tuli manu, o a’u o le fitafita. E le’i avea ana faamatalaga e suia ai le faiga o o’u ofu, e ui o a’u uo sa o matou galulue sa oofu uma i ofu tatapuvae (agbada) i le taimi lea. O le asō ua si’itia maualuga a’u e le Atua mai a’u uo. O fanau a le Atua e lē faaosofia e ta’aiga a isi tagata; e ta’ita’iina i latou e lē Agaga o le Atua (Roma 8:14). E amata fai loa e se Kerisiano mea ona o tala ma manatu o tagata, ua lē toe ta’ita’ia e le Agaga o le Atua lea uso, ma ua leiloa lona tulaga o le atali’i poo le afafine o le Atua.

Fai mai le Upu a le Atua i le 2 Korinito 6:17 o outou e tatau ona vavaeeseina. Afai o ni tagata e tatau ona vaaia o ni a outou tupulaga, ia avea i latou o nisi ua vavaeeseina i latou lava mo Keriso. I totonu o le tu’u faatasiga o nei tagata, e te maua ai le ta’aiga a isi tagata poo ai e sili ona umi le taimi e tatalo ai, o ai e sili ona tele fuaiupu o le Tusi Paia e tauloto, o ai e aupito toatele agaga e manumaloina i le aso, ma isi. Pau lea o le ituaiga ta’aiga e lelei ma tatau mo se Kerisiano; ta’aiga e saga faafiafia i le Atua ma atili latalata ai ia te ia, ae lē o le faatosina I mea faaletino. I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 24 AOKUSO 2024

(tusia e Pastor EA Adeboye)

Manatu Autu: Iloa lou tagata (Know Yourself)

Tauloto -Tusi Paia– 1 Peteru 2:9 “A o ‘outou o le tupulaga ‘ua filifilia ‘outou, o tupu ma ositaulaga, o le nu‘u pa‘ia, ma le nu‘u na fa‘atauina mai e le Atua, ‘ina ‘ia ‘outou ta‘uta‘u atu ana galuega lelei, o lē na vala‘au ‘iā te ‘outou nai le pouliuli e o‘o i lona lava malamalama o matuā ofo ai.”

Faitauga – Tusi Paia – Salamo 139:13-14

O le tele o taimi, e musumusu mai e le tiapolo manatu i o tatou taliga e fa’asesē tatou ina ia aua ne’i o tatou savavali i lo tatou fa’asinomaga ma le pule na tuuina mai e le Atua ia i tatou. O le mafuaaga lea e tatau ai ona iloa poo ai tonu lava oe iā Keriso. O se atali’i o se tupu na te lē iloa lona tulaga o ia o se aloali’i e aisi mo se meaai, e o’o a i totonu o le maota o lona tamā. E tatau ona e iloa poo ai oe, ma e fa’ato’ā mafai ona e iloa lou tulaga pe a e malamalama i le silasila a le Atua ia te oe. O le a se silasila a le Atua ia te oe?

Afai e te fetaia’i ma se faafitauli e foliga faigata ma ua taumafai le tiapolo e ta’u atu ia te oe e te lē manumalō, manatua le Upu o le Tusi Paia i le tusi o Roma 8:37: “A ‘ua tatou manumālō a‘ia‘i i nei mea uma lava, ‘ona o ia ‘ua alofa mai ‘iā te i tatou.”

‭ E ui na manumalō lea faafitauli i nisi, i aso ua te’a, e lē mafai ona manumalō ia te oe auā ua e manumalō a’ia’i ona o Keriso o loo alofa ia te oe nei e o’o i le faavavau. O nisi taimi e taumafai le tiapolo e faasesē oe, e te lē agava’a ma e lē mafaia le tulaga muamua poo le ausia o lau miti. Ata i le tiapolo ma tauloto i ai le Teuterenome 28:13: “E fai fo‘i oe e le ALI‘I ma ulu, ‘ae lē fai ma i‘u; ‘e te aupitoaluga lava, ‘ae te lē laulalo;”

‭‭

Fai mai le Tusi Paia na o le aupitoaluga e te i ai, lona uiga e leai sou nofoaga i le pito I lalo; pau lava le tulaga e avanoa mo oe le atalii/afafine o le Atua o luga, ma o le a e tauave lou tulaga i le suafa o Iesu.

Tu’u le tiapolo e fai ana faamatalaga e mana’o ai, peita’i a e iloa le mea moni, e te lē faalogo i ai pe talia a na pepelo. A e iloa lou tagata moni ia Keriso, e te lē amanaia tala a le tiapolo aua e te iloaina o ia lava o le tala pepelo (Ioane 8:44). Faapei ona e lē amanaiā le tiapolo, o le a faapenā fo’i ou manatu ma au amio. E te lē faatagaina ana pepelo e faatonu au mea e fai ma mea e tu’u. E lē tatau ona fefulisai’a e upu a le fili lou manatu ma lou talitonuga i lou tagata ma mea uma e te maua ma mafaia ona fai.

E la’ititi tele tiapolo na te pulea mafaufauga ma mea fai a se atalii / afafine o le Atua. O lou soifua, gaioiga ma lou i ai e tatau ona faavae i le Atua ae lē o se isi lava e pei ona fai mai le Galuega 17:28 “Auā ‘O ia o lo‘o ola ai i tatou, ma gāoioi ai, o lo‘o i ai fo‘i i tatou ‘ona o ia;’ pei ‘ona fai mai fo‘i e isi o ‘outou fatu pese, ‘Auā o lana fānau i tatou.’”

I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 23 AOKUSO 2024

(tusia e Pastor EA Adeboye)

Manatu Autu: Faasao mamoe(Preserve the sheep )

Tauloto -Tusi Paia– Mataio 7:15 “Ia ‘outou ma perofeta pepelo, o ē ō mai ‘iā te ‘outou i ‘ofu fa‘amamoe, a o totonu o luko fe‘ai lava i latou.”

Faitauga – Tusi Paia – Galuega 20:28-31

E mafai ona tuulafoai e le leoleo mamoe ana mamoe ini auala se lua. Muamua, o le le fafagaina lelei ma oo ai ina mamate i le fiaaai. Lona lua, o le leai o se puipuiga mai manufeai. Afai o oe o se taitai I le tino o Keriso ua tuuina atu e le Atua le matafaioi ia te oe e tausi i ana mamoe, e tatau ona e faasao iai latou i le fafagaina lelei i le Upu moni a le Atua ma puipui I latou mai faiaoga pepelo o le Upu, o luko feai i ofu faamamoe. 

I le Galuega 20:28, o loo faatonuina leoleo mamoe e fafaga lafu mamoe o loo latou tausia. Afai e te le o fafagaina lelei tagata ua tuuina e le Atua i lalo o Lau vaavaaiga, I le Upu moni ma le atoatoa a le Atua, o loo e fasiotia I latou I le itu faaleagaga ma e faamasinoina oe e le Atua I lea tofi. E leai se tagata soifua e umi na ola pe afai e matelaina i le fia ai, e faapena foi agaga o tagata o loo i lalo o lau vaaiga, e fano I le matelaina I le fiaaai pe a le fafagaina I le Upu. Ao e aoao atu le tamaoaiga o le Atua, aoao atu foi le ola faapaiaina. Ao e aoao atu le alofa o le Atua, aua le nanaina le mea moni, o le Atua o le afi e maamaai. Aua e te popole i le tupu o le Ekalesia, fai le mea ua valaauina ai oe e le Atua, ona ia faatupuina lea o Lana Ekalesia. 

O loo lapatai e le au aposetolo mamoe I perofeta ma faiaoga pepelo o le Tusi Paia ma a latou aoaoga  (2 Korinito 11: 13, 2 Peteru 2:1). Sa latou puipui I latou mai luko feai, e tatau foi ona tatou faia. E tele aoaoga o loo salalau I lenei taimi e tuu faafeagai ma le Upu a le Atua. Aua e te faatuatuanai I mea na,  ta’u I tagata o Lau aulotu e aua le faalogo i aoaoga sese na. Afai e te le ta’u ma a’oa’o latou e o ese mai aoaoga sese na, ona e te musu I feitai ia te oe, ua e tuulafoai I latou e saeina e luko feai. 

Ua faaaogaina tekonolosi ma faasalalauga i peau o le ea e faalauiloa ai nei aoaoga sese ma ua tele ina nunumi ma faaseseina ai mamoe. E mafai ona vaai atu mamoe i se tagata ua faia vavega ma talitonu o ia o se perofeta moni a le Atua. E amata ai foi ona faalogologo i ana aoaoga, ma e tatau ona e suesue lelei pe o nei aoaoga e le o se mailei a luko. Aoao tagata o lau aulotu ia faapei o kerisiano Perea e latou te suesue muamua nei aoaoga pe moni ma tutusa ma le Upu a le Atua (Galuega 17: 10-11). 

Pe o oe o se faifeau, ulu I se vaega o le aulotu, taitai o mafutaga I fale o aiga, poo se matua, afai ua tofia oe e taitai faaleagaga ini tagata, o lau matafaioi o le faamautinoaina e le aina ma faaumatia e le tiapolo tagata. Taitai, a’oa’o le Upu moni a le Atua. Tagata lotu, suesue ma faamautinoa pe o o gatasi nei aoaoga ma le Tusi Paia e pei o kerisiano Perea, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 22 AOKUSO 2024

(tusia e Pastor EA Adeboye)

Manatu Autu: Faafoeina o e faasagatau mai ( Handling oppositions )

Tauloto -Tusi Paia– 1 Peteru 4:12 ““Le ‘au pele e, ‘aua tou te ofo i le tofotofoga pei o le afi, ‘ua o‘o ‘iā te ‘outou e fai ma tofotofoga ‘iā te ‘outou, peiseaī o se mea fou ‘ua o‘o ‘iā te ‘outou.”

Faitauga – Tusi Paia – Neemia 6:1-16

O le faasagatau mai e ese mai sauaga. O le sauaga e tupu pe a osofaia oe  ese tagata ona o oe o le kerisiano, ae o le faasagatau mai e tupu pe a osofaia oe ina ia taofia le faataunuuina o se mea ua fuafuaina e te faia mo le Atua. E toatele tagata e fuafua e faia mea mo le Atua peitai e solomuli pe a tele le faasagatau mai. O nisi o I latou e tumau o ni kerisiano filiga peitai e faavaivai I latou e faataunuuina mea ua totoina e le Atua i o latou loto ona o le tele o le faasagatau mai. Afai tatou te faatagaina tagata e faasagatau mai e taofia le faataunuuina o le galuega ua tuuina mai e le Atua iai tatou, e tele ni agaga e fano i seoli , ma atili sauaina ai e le tiapolo tagata ona o loo gugu ma filemu le au kerisiano. E le tatau Ona e faatagaina le faasagatau mai e taofia oe, e tatau Ona faaauau pea. 

E tasi le tagata na feagai ma le faasagatau mai ae na faaauau pe i lana galuega o Neemia. Ua ia fuafua e toe fausia le pa o Ierusalema, e ui e faigata, ona sa tulai mai lea o tagata e tetee mai. A e suesueina le Tusi o Neemia, e tolu vaega e faaaoga e le tiapolo e faasagatau mai ai I le au kerisiano, muamua o le ulagia (Neemia 4:3), lua, taufaafefe (Neemia 4:7-8) ma le tolu, faavaivai (Neemia 4:10). E faaoso e le tiapolo tagata e ula i mea o loo e faia, ae e le tatau ona e amanaiaina. O nisi tagata e tau faamatau ia te oe e oo I le faafefe e fasiotia pe afai e faaauau pea mea o loo e faia mo le Atua. Peitai, e le tatau ona e fefe ai aua e faitalia lou tama ma ia tagata. Mulimuli, e faavaivai atu oe ele tiapolo I le matua faafaigata lea o le galuega. E na te faia I le aveesea lea o tagata poo mea e te manaomia poo le mumusu foi o tagata e galulue ma oe. Afai o loo taumafai le tiapolo I nei auala uma e faasagatau ia te oe, e le tatau ona e solomuli ai. Fai mai le Neemia 4:9 “A ‘ua matou tatalo atu i lo matou Atua, ma matou tofia nisi e leoleo ‘iā te i latou i le ao ‘atoa ma le po, ‘ona o i latou.”

O le tali a Neemia I tagata uma na faasagatau ia te ia o le tatalo. O le tatalo e le o se laasaga mulimuli ae o le laasaga mautu e tetee atu ai I le faasagatau mai. E te faia mea uma e te tetee atu ai i e o faasagatau mai, ae muamua ona e faatuatua I Le Atua. Tuu lou taliga i Lona fatafata ma faalogo mo le faatonuga o le laasaga e sosoo, aua foi o loo e faia Lana galuega. O tagata o loo tetee ia te oe, o lona tulaga moni, o loo tetee I le Atua, taatia laia I Le Atua e tau mo oe, ae galue pea oe. O le tali i e faasagatau mai ia te oe o le tuuina atu lea I le Atua, ona tau lea e le Atua le taua mo oe ao e galue, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 21 AOKUSO 2024

(tusia e Pastor EA Adeboye)

Manatu Autu: Pulea o sauaga ( Handling persecution )

Tauloto -Tusi Paia– Mataio 5:44 “Ae ‘ou te fai atu ‘iā te ‘outou, ‘ia ‘outou alolofa atu i ē ‘ua ita mai ‘iā te ‘outou, ‘ia ‘outou fa‘amanuia atu i ē ‘ua fetu‘u mai ‘iā te ‘outou, ‘ia ‘outou agalelei atu i ē ‘ua ‘ino‘ino mai ‘iā te ‘outou, ‘ia ‘outou tatalo fo‘i mo ē ‘ua tu‘ua‘i fua mai ma fa‘asauā mai ‘iā te ‘outou;”

Faitauga – Tusi Paia – Ioane 15:18-21

Ao tumau pea lenei lalolagi, o soo se fanau moni a le Atua, e ui pea I sauaga aua foi o le tiapolo o le perenise o lenei lalolagi (Ioane 14:30). O le mea lea e tatau ai ona saunia lou tagata e pulea lelei sauaga ina ia aua nei taitaiseseina oe mai lau savaliga I le lagi. 

E sauaina oe e ele tiapolo ona o oe o se atalii poo se afafine o le Atua aua e manao e te faafiti ia Iesu Keriso, ma e pau le auala e te manumalo ai o le mauaa ia Iesu. Ma ae lei oo mai sauaga ma faasagatau mai le tiapolo, e tatau ona e mausali ia Keriso e ala I le suesueina o le Upu a le Atua, tauloto le Upu, ma tatalo e le aunoa. O le loloto e oo iai aa o se laau, e fua iai pe tu pea le laau  i le taimi o afa. Afai e te le manao e te toilalo ini sauaga, e tatau ona e mauaa ma mausali i le Upu a le Atua. O I latou e toilalo i taimi o sauaga, o I latou ia e leai se mafutaga vavalalata ma Keriso aua o le tulaga lea sa tatau ona iai ae lei oo mai sauaga. 

I aso ua leva, sa iai se misionare i se atunuu i fafo o loo sauaina ai le au kerisiano. I le aso o lana faaipoipoga, na osofaia e leoleo le nofoaga o loo faamautu ai ma ua saisai mai lenei tamaitai i Lona ofu faaipoipo. Na ia sogi atu i filifili na saisai ai Ona lima ma faapea, “ Le Alii e, ou te leiloa o loo e fua ia te au, ua e le faataga au e faaipoipo atu I seisi tagata. Oka se matagofie o Lau mama faaipoipo ia te au!” Sa matua alofa moni ia Keriso ua matua leai se afaina ia te ia o le osofaiaga a leoleo, ua ia vaai atu I filifili o saisai ai ona lima o ni mama faaipoipo. O le ituaiga latalata lena o lau mafutaga ma Keriso e tatau ona iai ina ia aua ai ona e faafiti ia te ia i taimi o sauaga. 

Afai ua amata le faamaoni tagata pe a feagai ma se sauaga itiiti, e pei o le leai o se siitia o le tulaga I le galuega ona o le talitonuga faakerisiano, e lulu lou ulu, aua ua leai se mauaa ia Keriso. O kerisiano e mauaa ma mausali, e fiafia pe a sauaina aua latou te iloa o lo’o latou faamanuiaina (Mataio 5:10-12). E latou te vaavaai atu I sauaga o se faailoga o loo matua fefe le tiapolo iai latou, ma e faafiafiaina, ma naunau e faatupulaia le fefe o le tiapolo iai latou. E avea sauaga e tulei ai i latou e faaaopoopo mea latou te faia mo le Atua e faasagatau I le malo o le pogisa. I Le Galuega 5:41, na olioli le au soo ua faitauina I latou e sauaina ma maasiasi ona o le suafa o Iesu. I le 1 Peteru 4:13, fai mai ia tatou tofusia fa‘atasi i tigā o Keriso’. Aua nei e faatagaina le sauaina e te toilalo ai, ia e faaaogaina o se auala e te faia ai ni mea faaopoopo mo le Atua. I le suafa o Iesu, Amene.

OPEN HEAVENS

MATALA LE LAGI MO LE ASO LUA 20 AOKUSO 2024

(tusia e Pastor EA Adeboye)

Manatu Autu: Faafoeina o tulaga ua ausia ma le manuia ( Handling success )

Tauloto -Tusi Paia– 1 Peteru 5:8 “Ia ‘outou fa‘autauta, ‘ia ‘outou mataala, ‘ona o lē ‘ua fai ‘outou mōna fili, o le tiapolo lea, o lo‘o fealualua‘i o ia e pei o se leona tagi, ‘ua sā‘ili se tasi e ‘aina e ia.”

Faitauga – Tusi Paia – Faamasino 20:18-35

Sa ou talanoaina le fuafuaina o tulaga ua le ausia ananafi o se vaega taua aua e aafia ai le taunuu manuia o se faamoemoe, peitai e manaomia foi le faafoeina lelei pe a oo ina ausia faamoemoega ma le manuia. E tele ni tagata ua i’u i le toilalo o latou olaga ona ua latou le iloa ona faafoeina lelei taimi e manumalo ma manuia ai. 

I le tausaga 1957 sa mālō se tamaloa i Lonetona i le 75,000 pauni mai se taaloga tupe. I na taimi, na o sina vaega la’ititi o lea tupe e mafaia ona fa’atauina ai se fale i Lonetona. I se tasi aso, i le amataga o le 1980, i se nofoaga I Nigeria, sa ou va’aia ai se toeaina, e masaesae ona lavalava, o nofonofo i ‘autafa o se fale ua malepe ma ua vaeluaina. Na ou fesili i la’u ave  ta’avale: “O ai si la tagata?” Ae tali mai: “O le tagata le la sa malo i le 75,000.00 pauni i le 1957. Sa mauaina e lea tamaloa se tamaoaiga tele a ua ia le iloa fa’afoe lea manuia, ma ua i’u ina fa’amativaina. O se tasi o alaga’upu lauiloa sa ulufatu mai i le Fa’ata’oto 21:20 o lo o fa’apea mai, o le tagata valea ma lona tamaoaiga e i’u ina tu’ueseeseina aua o le tagata valea, na te fa‘amaumauina ia mea. Afai e leai se poto i le tagata e fa’afoe lelei ai lona manuia, e i’u ina liliuina o se amataga o lona to’ilalo.

‘Aua la e te fiafia tele pe a e ausia se mea ma le manuia. E tele tagata latou te amata i le faia o fiafia ma pāti pe a manumalo, ae galo ia latou e le malōlō le ti’apolo. Aua o le mea e tupu, e matua fa’asagasaga mai le ti’apolo e toe toso mai i lalo itua’iga tagata ia. Aua ne’i misi au fono tatalo ma taimi e te mafuta vavalalata ai ma le Atua, ona o loo e faa’muamua fiafia ona o le manumalo. Ioe, ua e mālo i le taua, peita’i e lei fa’aumatia le fili, o lo’o ia fealualua’i taamilomilo e saili se na te ‘aina. (1 Peteru 5:8). E tatau ona siitia in luga au galuega e auauna ai i le Atua, pe a maea le taimi o le manumalo ai, ae le o le fa’ama’amulu ese mai.

E iloa lelei e le ti’apolo a uma se manumalo, o le tele o tagata o le a malolo, ma o taimi tonu ia e osofa’ia ai i latou. Ina ua uma ona fasiotia e Tavita ia Koliata, sa fa’aosoina le Tupu o Saulo, e faasagatau ia Tavita. Ina ua uma ona valaau e Elia le afi mai le lagi, o le taimi tonu lena sa tautō ai Iesepela na  te fasiotia o ia. (1 Tupu 19 : 1-3). O le taimi lava e te manumalo ai i se mea faapitoa, e le tatau ona e malolo ai loa. E mana’omia ona e mataala pea ma nofo sauni mo le taua. ‘Aua nei avea le manumalo ma auala e tōsina ‘ese ai oe mai le taunu’uga ua valaauina ai oe e le Atua e te ‘ausia.

O le isi fa’amanuiaga tele a le RCGG o se tasi o polokalame sa faaigoa o le “Lekki ’98” sa potopoto fa’atasi ai tagata e 6 miliona i le nofoaga e tasi latou te tapuai ai i le Atua. A o le taimi lava na mae’a ai lea polokalame ua fa’aluaina ma faaopoopoina ai matou galuega fa’amisionare e auina atu ai misionare i ni nuu fou ma taulaga fou. Sa amata loa le fuafuaina o le isi vaega fou o polokalame, ma o le asō, ua matua sili atu le tetelē o isi polokalame ua fa’atinoina aua ua fa’aluaina le tele o matou taumafaiga, ua matou le malolo ina ua ausia ma le manuia faamoemoega. A o’o mai le manumalo, o le taimi lena e siitia ai galuega e faatino, ae le o se taimi e malolo ai, I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 19 AOKUSO 2024

(tusia e Pastor EA Adeboye)

Manatu Autu: Fuafuaina o tulaga ua le ausia( Handling failure)

Tauloto -Tusi Paia– 2 Korinito 4:8 “Ua puapuagātia i matou i mea uma, ‘ae lē fa‘aatuatuvaleina; ‘ua femēmēa‘i, a e lē matuā femēmēa‘i;”

Faitauga – Tusi Paia – Faamasino 20:18-35

O le auala ma mea e faia e tagata pe a le ausia ni tulaga na fuafuaina e fua iai pe mata e taunuu I Le manuia I le iuga pe leai. O le le ausia o se mea e le leaga tele e pei ona manatu iai le toatele, e le faapea o le iuga lea, ae o se faailoga e tatau ona suia le auala e faataunuu ai. O le tele o mea tetele e ausia i le saienisi, e afua mai mea e lei  ausia muamua. Ana faapea e taofi uma suesuega a saienitisi ina ua maea isi faiga muamua e lei ausia, e le taitai ausia ni mea tetele. O soo se tagata manuia o loo e vaai atu iai, o se taunuuga o mea e lei ausia muamua. Afai e te taumafai e fai se mea i le aso, ae le tino mai, tulai a taeao ma toe taumafai I seisi auala. Ae ia mautinoa o mea o loo e taumafai e faia, o le finagalo lea o le Atua, aua e te faavaivai, taumafai pea seia e taunuu ma ausia le faamoemoe. 

I le faitauga o le Tusi Paia o le aso, na fesili Ie fanauga a Isaraelu I le Atua pe tatau ona o atu e tau le taua e faasagatau I le au Peniamina ae pe latou te manumalo. Na fai iai le Atua e o e tau le taua ma e latou te manumalo. Peitai ina ua o e tau le taua, na faiaina. E leiloa poo se fesili I o latou mafaufau o le ‘na taufaasese ea le Atua iai tatou?’ Na lei fia toilalo, na toe o mai faatasi ma fesili I le Atua pe toe foi e tau le taua ma le au Peniamina. Na fai iai le Atua e o , peitai na toe faatoilaloina foi I latou e le au Peniamina. I le taimi lea, o le sisii o lima le mea talafeagai e tatau ona fai, ua fasiotia le sili atu ma le 40,000 o le au tau, ma ua foliga mai o Lo latou Atua, o Le latou te faatuatua iai, ua pelogia latou. Na toe foi I le Atua, ma o le taimi la lea, na latou anapogi, ma fai taulaga I le Atua. Na latou toe fesili I le Atua ma faapea mai e o e tau le taua. Na latou o ma ua sui la latou fuafuaga ma auala na faatino ai, ma na manumalo I le faatoilaloina o le au Peniamina. Aua e te faavaivai, e leiloa poo lou ausia o mea tetele ua toe o se aga. Toe taumafai tasi. 

A e toe fetaiai ma se tulaga ua le ausia fuafuaga, fesili ia te oe lava, ‘aisea ua faataga ai e le Atua ou te ui I lenei mea? O le a se mea o loo taumafai le Atua e aoao ai a’u, mai lenei tulaga? E iai nisi fuafuaga ma auala e tatau ona faaaogaina e ausia ai faamoemoega?’ A mafai ona e taliina lelei nei fesili, e te maua ni aoaoga lelei e fesoasoani ia te oe e ausia ma le manuia nisi fuafuaga i le lumanai. I le suafa o Iesu, Amene. 

OPEN HEAVENS

MATALA LE LAGI MO LE ASO SA 18 AOKUSO 2024

(tusia e Pastor EA Adeboye)

Manatu Autu: Lalo O Ou Vae (Under Your Feet)

Tauloto -Tusi Paia– Efeso 2:6 “Ua na toe fa‘atutū fa‘atasi mai fo‘i, ma fa‘anonofo fa‘atasi i tatou ma Keriso Iesu i mea o i le lagi.”

Faitauga – Tusi Paia – Mareko 16:16-18, Efeso 1:18-23

Sa i ai se tamaloa o lo’u nu’u e igoa iā Kaka, o le ta’ita’i o le ‘au fa’ataulaitu. E talitonu tagata o Kaka e toatasi o loo puipuia le aai mai mea leaga uma lava, ma e fefefe uma tagata ia te ia. Ina ua matou manana’o e tatala le aulotu RCCG i totonu o lo’u nuu, o le nofoaga sa o matou maua e lelei mo se matou sauniga fa’aolaola, sa latalata i le fale o Kaka. O le tulaga e ofo ai, ina ua fai le valaau i lea po, na sau Kaka mai lona fale ma talia Keriso i lona olaga - sa faalogologo mai i viiga ma le lauga. Mulimuliane i lea po, na sau Kaka ma fai i lo’u tamā fa’aleagaga o Pa Josiah Akindayomi, “O lou fa’amatalaina o lou Atua, o ia o se Atua malosi tele.” Sa faapea atu le faifeau, e “mata’utia le malosi.”

Sa fai mai Kaka, “O lona uiga la. O lea ua avea Iesu ma Fa’aola o lo’u olaga, ou te manaomia le fesoasoani e aveese ai le temoni o loo i lo’u fale e igoa o shigidi. O se tupua ua augātupulagā o i totonu o lo’u āiga ma e matou te tulia i le po e fasioti se isi pe a matou manana’o ai. E mata’utia, e lē tatau ona o matou momoe a’o lei fo’i mai, ma e tatau ona fasia se mamoe e faafeiloai ai. A fo’i mai, e savali i luga o le toto o le mamoe ma inu ai. A uma, ona toe fo’i lea i lona nofoaga ma toe liu tupua pei se faatagata masani. Ou te fefe i se puapuaga e tupu pe a o’u tiā’ia shigidi.”

Na filifili a’u e lo’u tamā fa’aleagaga e aveesea le tupua. Na matou o I le fale o Kaka faatasi ma le faifeau o le matou aulotu ma se tasi sa ou manatu o se tagata malosi o le au tatalo. Ina ua vaai mai Kaka ia te a’u, na misi alofa ia te a’u ma fai mai, “Ahhh, atali’i o Adeboye, ua latou auina mai oe?” Ina ua iloa atu e le matou vaega le faatagata o shigidi, na alu le tuli i fafo ma le fale, ae tu’u ai na o a’u. Sa sausauina lona tino o le faatagata i le toto ma teuteu i mea iila aulelei. Sa fai la’u tatalo, o’u tago atu loa nutilili’i le tupua, aveese le faatusa sa i luma o le fale, ma tia’i mea uma i totonu o se vaitafe. Ina ua uma vaiaso e tolu, sa o’u toe fo’i i lo’u nu’u ma asiasi atu iā Kaka i lona āiga. Ina ua vaai mai iā te a’u na alaga mai, “o lena e te ola lava?” O le tausaga  e 1975 lea. O loo o’u ola pea I le taimi nei, i le toeitiiti atoa le limasefulu tausaga talu ona uma ona talepe ma faaumatia le temoni o shigidi.

Le au pele e, o le tiapolo ma ana temoni o loo i lalo o vae o le fanau a le Atua e o’o i lē e aupito sili ona itiiti. O oe o se vaega o le tino o Keriso, ma fai mai Efeso 1:21, o Keriso e silisili lava i alii sili uma lava, ma faipule, ma e ua malolosi. Aua ne’i e fefe i temoni, o agaga e mafai ona e solia i lalo o ou vae, i le suafa o Iesu. Amene.

OPEN HEAVENS

MATALA LE LAGI MO LE ASO TOONAI 17 AOKUSO 2024

(tusia e Pastor EA Adeboye)

Manatu Autu: Fa’aleagaina tatalo ( Prayer Contaminants)

Tauloto -Tusi Paia– Faataoto 18:21““O le oti ma le ola, o lo‘o i le pule a le laulaufaiva ia; o ē manana‘o i ai latou te ‘a‘ai i lona fua.”

Faitauga – Tusi Paia – Faataoto 18:20-21

E i ai mea e mafai ona faaleagaina a tatou tatalo, e pei o le faavaivai o le ola tatalo, ma lē maua ai le tali. O le tasi o nei tulaga o le tautala i upu e faasagatau i manaoga o loo tatalo ai. Mo se fa’ata’ita’iga afai e te tatalo mo lou atunuu, ae mulimuliane tou talanoa ma nisi tagata ma e faapea e leai se mea lelei e tupu mai i le atunuu a lea e tasi o loo e tatalo ai, ua e toe faaleaga lava e oe lau tatalo.

Aua e te tatalo i le Atua e avatu le ola i se tasi ma e toe liliu tautala i upu o le oti I le tagata lava lea e tasi; e te lē maua le tali o ia ituaiga tatalo faapea. Fai mai le tusi o Ioelu 3:10 “Ia faapea mai le ua vaivai, ‘Ua malosi a’u!’” I se isi fa’aupuga, afai o loo e tatalo mo le malosi, peita’i o loo atagia pea uiga vaivai ia te oe, o le taimi lea, ia e fai mai, “Ou te malosi”. A tutusa au upu e fai, ma au tatalo, o le a momoli mai e le malosi lea le tali o loo e sailia. A e tatalo mo sou manaoga, e taua le tutusa o au upu ma ou manatu faatasi ma au tatalo. O le auala lea e faigofie ai ona e maua le tali o au tatalo.

O le isi mafuaaga e fa’aleagaina tatalo o le lē loto tasi a’o fai lau tatalo. E tupu lea tulaga pe a tatalo tagata a’o latou loto o loo mafaufau i isi mea o le olaga. E iloa e le tiapolo afai e faalavelave i lou mafaufau a o e tatalo o le a lē atoatoa le malosi e tatau ona i ai lau tatalo. O lea la, so’ose taimi e te filifili ai e tatalo, o le a amata ai fo’i I le taimi lea ona faamanatu atu e le fili ia te oe mea sa tatau ona e faia ma nofoaga na tatau ona e alu i ai. O le polokalame a le tiapolo o le tu’u atu o isi mafaufauga e fa’asē ese ai lau mafaufau mai lau tatalo. So’ose taimi e te lagonaina ai ua tafao mamao lou mafaufau a’o e tatalo, tusi i lalo mea sa tatau ona e faia, fa’ata’atia ese, ae fa’aauau ona e tatalo. A’oa’o lou mafaufau e tu’u ese mea uma fa’asalāvei, ma aua ne’i tuua i ai se avanoa latou te motusia ai le lua mafutaga ma le Atua e ala i le tatalo. A fa’aauau pea ona e faamasani lou mafaufau e i’u lavā ina lelei ma masani e tulimata’i tau lava o le Atua pe a tatalo. A e mana’o e tumau le uigā, malosi ma le mana o au tatalo e talia e le Atua, fa’a mautinoa e lē fa’aleagaina. I le suafa o Iesu Amene.

OPEN HEAVENS

MATALA LE LAGI MO LE ASO FARAILE 16 AOKUSO 2024

(tusia e Pastor EA Adeboye)

Manatu Autu: Tapeina tatalo 3 ( Prayer Extinguishers 3)

Tauloto -Tusi Paia– Iakopo 1:6 “A ‘ia ole atu ma le fa‘atuatua, ‘aua lava ne‘i māsalosalo; auā o lē māsalosalo e tusa ia ma le peau o le sami ‘ua sousou i le matagi ma felafolafoa‘iina.”

Faitauga – Tusi Paia – Iakopo 1:5-8

O le a faamaea atu I le aso la tatou talanoaga I nisi a vaega e tapeina tatalo. O nisi tagata e sagatonu mea uma e faia I tatalo ae tasi lava le mea e misi, faatuatua. Fai mai le tauloto o le aso mai le Tusi Paia, e tatau I tagata faatuatua uma ona ole atu ma le faatuatua e aunoa ma le masalosalo I o latou loto. O le fuaiupu e sosoo ai e faaalia ai le tulaga o le tagata e ole atu I Le Atua e aunoa ma le faatuatua, 

“Aua lava ne‘i manatu lea tagata na te maua se mea e tasi mai le Ali‘i.”Iakopo‬ ‭1‬:‭7‬ ‭

A e tatalo e aunoa ma le faatuatua, e tapeina lena tatalo i le taimi e taunuu ai. Fai mai le Eperu 11:6, a leai foi se faatuatua, e le mafai ona fiafia mai le Atua. E moomia e le Atua le faatuatua ia te ia pe a e ole atu I se mea. Fai mai le Luka 17:6, tusa pe laitiiti lou faatuatua e pei o le fua o le sinapi, e faaaoga e le Atua e aveesea mauga mo oe. Afai e ole atu sau tama mo se meaai ona tilotilo atu lea ia te oe e foliga o loo faapea mai, ‘ou te iloa e te le aumaia aua ailoga o iai se mea’, e te ono inoino ai. O le mea lena e tupu pe afai e te ole atu I le Atua I se mea ma tatou le manatu e na te mafai ona foai mai iai tatou. 

A e sau I le Atua ma le faatuatua, e te sau e aunoa ma le masalosalo ua ia faataunuuina le mea ua e ole atu ai. E te aumaia ou manaoga ma le faafetai (Filipi 4:6) aua e te mautinoa ua maea maua tali o au tatalo. O le taimi e te tatalo ai, tuu atu ou Lima i le Atua ma le mautinoa ua e maua. E tatau ona faapena ona e tatalo, o ituaiga tatalo na e le mafai ona faatalale iai le Atua. Fai mai le Eperu 11:1, o le faatuatua o le faalagolago i mea e le vaaia. O lona uiga, a iai lou faatuatua, tusa pe e te lei vaai atu i le mea o loo e ole atu ai, e te gaioi e peiseai ua e maua. 

Na umi se taimi o ou taumafai e faatupu lou faatuatua i Lou malosi, peitai e faigata. Ona ou faitau lea I Le Mareko 9:24 I se tamaloa na tagi atu ia Iesu e fesoasoani mai i lona le talitonu. Ini nai minute, na faatonu e Iesu, e talitonu ma faatuatua ua faia mo ia. Ona amata lea ona ou tatalo I le Atua  e fesoasoani mai i Lou faatuatua, ma ua ou vaaia le tupu o Lou faatuatua talu mai lena taimi. A e tatalo le tatalo lea e tasi, e faamalosi atu Iesu i Lou faatuatua ona mafai lea ona e manumalo i le leai o se faatuatua ma le masalosalo. 

Tatalo, 

Le Alii e, ou te faatuatua ma talitonu ia te oe, faamolemole fesoasoani mai i lou faatuatua, i le suafa o Iesu, Amene.