Samoan Devotional

OPEN HEAVENS

MATALA LE LAGI MO LE ASO TOONAI 14 SETEMA  2024

(tusia e Pastor EA Adeboye)

Manatu Autu: Ipu ua Ta’uleagaina (Vessels Unto Dishonour)

Tauloto -Tusi Paia–Salamo 51: 17 “O taulaga i le Atua, o le loto momomo lea; le Atua e, ‘e te lē ‘inosia le loto momomo ma le nutimomoia.”

‭‭

Faitauga – Tusi Paia –1 Samuelu 15:1-28

E aofia faatasi i tagata tou te mafuta i le lotu, i latou e mamalu, ma isi o e ua faalumaina e pei ona o tatou faitau ai i le 2 Timoteo 2:20: “Ua lē na o ipu auro ma le ario ‘ua i le fale tele, a o ipu la‘au ma ‘omea; o isi ‘ua ta‘uleleia, a o isi ‘ua ta‘uleagaina.”

Peita’i, e lē faapea o le Atua e faia isi ipu ia ta’uleleia ma isi ia ta’uleagaina. A o tagata lava latou e tusa ma a latou amio i le Atua ma ana faatonuga, e filifili ai mo i latou lava pe i’u ai i le ta’uleleia poo le ta’uleagaina.

E toatele tagata e fai mai, talu ai o le Atua e alofa mutimutivale, ma o lona alofa e fou i taeao uma (Auega 3:22-23), e mafai lava ona fai fa’afia le agasala ma ole atu i le Atua i lona alofa mutimutivale i taimi uma e agasala ai. O lona uiga, latou te fai le agasala ma le mautinoa, ma le faamoemoe a o latou fai atu i le Atua mo lona alofa mutimutivale, e tali mai o ia. O nisi e fai mai faapea, “Le Atua, faamagalo mai a’u i la’u tala lea o le a fai,” Latou te iloa o le agasala, peita’i e ole muamua mo le fa’amagaloga ona fai ai lea. O ituaiga tagata nei, o loo taumafai e fia popoto i le Atua Silisiliese ma o le a avea i latou ma ipu o le faalumaina pe afai e lē salamō. O le totogi o le agasala o le oti Roma 6:23). Tusa pe fai e se kerisiano se taulaga tele, pe ifo toele i le Atua, afai e tumau pea lona loto i le agasala, e tumau pea le totogi o le agasala, o le oti.

I le tatou Tusi Faitau o le asō, na fetalai le Atua iā Saulo e faaumatia uma Amaleka, peita’i na ia filifili e fia poto i le Atua ma fai mai o tagata na o latou aumaia le tupu o Amaleka faatasi ma povi ma mamoe e sili ona lelei i Isaraelu. Ua tatou faitau i le iuga o le lē usita’i i le tusi 1 Samuelu 15:28; e faapea. “Ona fai atu lea o Samuelu ‘iā te ia, “‘Ua saeia e le ALI‘I le mālō o Isaraelu nai ‘iā te oe i lenei aso ma ‘ua foa‘i atu ai i le tasi e sili lona lelei ‘iā te oe.”

‭‭

Na aioi Saulo ia Samuelu ia fo’i ma ia e ifo i le Atua, peita’i e le’i mai se loto salamō moni. Pau le pogai, aua sa le mana’o e faalumaina ia i luma o e na mulimuli ia te ia. I le mataupu o loo soso’o o le a e faitau ai, e ui ina aioi Samuelu i le Atua mo Saulo, na tumau lava le fa’atonuga a le Atua ia Samuelu ina ia fa’auu se tupu fou e sui ia Saulo. Na auina atu mulimuliane e lē Atua se agaga leaga e faaumatia Saulo auā ua avea o ia ma ipu ua ta’uleagaina.

Le au Pele e, ia faaeteete. Aua e te taalo i le agasala ma aua e te tofotofo i le Atua ina ne’i e i’u pei o le iuga o Saulo. E tumau pea ea lou faia o mea o loo lapataia ai oe e le Atua e tu’u aua le faia? Faaeteete ma mataala ina ia aua ne’i avea oe ma ipu ua ta’uleagaina. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 13 SETEMA 2024

(tusia e Pastor EA Adeboye)

Manatu Autu: Poloaiga a le Atua (God’s Commandments)

Tauloto -Tusi Paia– 1 Ioane 5:3 “Auā o lenei lava le alofa i le Atua, ‘ia tatou tausi i ana poloa‘iga; e lē mamafa fo‘i ana poloa‘iga.”

Faitauga – Tusi Paia – Luka 11:27-28

A aumai e le Atua se poloaiga, e manatu le toatele o tagata e mo le lelei o le Atua peitai, e mo lo tatou lelei. Afai e le usitai i le Atua, o lo’o e faatigaina lava ia te oe, aua e tumau lava le Atua o le Atua pe tatou te usitai ia te ia pe leai. O I latou e filifili e le usitai I le Atua, ua latou le maua se mea lelei, ae le faapea o le Atua. 

Ina ua fai le Atua ia Aperaamo e ave lona atalii e osi ai le taulaga, e le faapea ua fia tausami i se tamaititi mo le ti o le taeao, ae o loo finagalo ia usitai Aperaamo e tatala ai faamanuiaga e le mafai ona suia mo ia ma ona suli. Ana le usitai Aperaamo, semanu e na te misia lona faamanuiaga tele. Ina ua fai atu Elisaia ia Naamanu e alu e taele I le vai i Ioritana, e le faapea ina ia faalumaina o ia, ae na naunau ia faamaloloina o ia. Semanu e misia e Naamanu lona faamalologa ona o le faamaualuga. Ana le alu e taele, e leai se mea e tupu ia Elisaia ae semanu e oo mai lona oti, o loo lepela lava. A avatu e le Atua se faatonuga ia te oe, tusa poo le a le faigata, e te tulai aua e sili atu mea e te manuia ai pe a usitai. 

Na aumai e le Atua I le tagata se meaalofa faapitoa, o le loto faitalia. O le loto faitalia e tulaga ese ai le tagata mai isi mea uma na faia e le Atua. E mafai ona e filifili saoloto e usitai pe leai foi, e pule lava oe. Peitai, a fia faamalieina soo se faamanuiaga e na te fia foai atu ia te oe, e finagalo e te usitai ia te ia i lou lava loto malie. A e le usitai i lana faatonuga, o lo’o e faaaogaina lou loto malie faitalia e tetee ai ia te ia, ma o le tulaga tonu lena e te le agavaa ai I faamanuiaga o lo’o faapipii mai i ana poloaiga. Ina ua auina atu e le Atua Elia I le fafine ua oti lana tane i Sarefata mo se meaai, na ia fai i le fafine e foai atu ia te ia lana meaai mulimuli. E le faapea o Elia na manaomia se vavega, sa fafagaina o ia e le Atua e oo atu I lea taimi . Na finagalo le Atua e tofotofo I le fafine pe na te faaaogaina lona loto faitalia mo ia lava , pe mo le Atua. Na pasi lana suega, ma na ia maua le taui ua lava ma totoe meaai mo ia ma lona aiga i le taimi atoa o le oge seia maea. E le gata I lea, ina ua oti lana tama I le 1 Tupu 17:17-22, ona sa ia usitai I le Atua, na iai Elia e toe fatu mai o ia mai le oti. Le au pele e, o le usitai I le Atua e matua lelei mo oe. Aua nei e misia se avanoa e faailoa atu ai i le Atua o lou loto faitalia o loo tuuina atu mo ia, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 12 SETEMA  2024

(tusia e Pastor EA Adeboye)

Manatu Autu: Mana o le auaunaga (The power of service )

Tauloto -Tusi Paia–Mataio 10:41 “O lē talia fo‘i o se perofeta i le igoa o le perofeta, e maua e ia le taui o le perofeta; o lē talia fo‘i se tagata amiotonu i le igoa o le tagata amiotonu, e maua e ia le taui o le tagata amiotonu.”

Faitauga – Tusi Paia –2 Tupu 4:8-17

O le aoaoga o le aso e ono faia ai se finauga ma tagata, peitai ou te fia faasoa pea le mea moni. A maua se avanoa e auauna ai i le Atua e ala I se perofeta e te manutinoa na auina mai e le Atua, tusa poo le a le laitiiti o le auaunaga, aua e te misia le avanoa. Afai e te auauna pe foai foi i se perofeta ona o le faauuga a le Atua I lona olaga, e te maua se faamanuiaga mai le Atua. 

Na ou alu i se atunuu I fafo mo se polokalame, ma sa avetaavale ma feaveai au e se tagata mauoa. Ina ua momoli au I le malaevaalele, na ou fia fai meaalofa iai peitai ona e mauoa atu ia te au, na ou tuua le tupe I se teutusi ma fai atu, ‘ave la’u meaalofa lea mo si au fanau’. Na ia avea le teutusi ma fai mai Amene, ua fafa leisi amene i luga o leisi amene. Ua ou ma, ma faliu atu I le faifeau na ma o. Fai mai le faifeau lea ‘o loo faatali pea si tama lea mo sana fanau’. Ina ua ou faalogo iai, ua ou fiafia aua e ui e le tele ni au tupe, ae ou te fesootai I le Atua maualuga. O le tausaga na sosoo ai, Ina ua ou taunuu i le atunuu lava lea mo le polokalame e tasi, na toe sau foi le tamaloa lea e feaveai a’u. Na sau ma lana meaalofa ma faapea mai, na aumai mai lona atalii. E leiloa pe ua umi se taimi o e tatalo mo ni manaoga, ae lei maua lava, e te ono maua vave pe afai e te auauna I le Atua e ala I sana perofeta. 

A e suesue I le Tusi Paia,e te iloa ai, o I latou uma na auauna I perofeta moni na maua o latou taui tele mai le auaunaga. Na avea Samuelu ma tagata e fauuina ma aveesea tupu mo lana auaunaga ia Eli. Na maua e Elisaia le faalua o le agaga ona na filiga i le auaunaga ia Elia. Na maua se tama a le fafine Sunema e ui na uma lona faamoemoe aua sa ia auauna ia Elisaia. Soo se avanoa e te auauna ai I le Atua e ala I ana perofeta, ia faaaogaina. 

Peitai e le tatau ona faaaogaina faaletatau e faifeau a le Atua le filiga o le auaunaga a se tagata. E loto faafetai le Atua I tagata e auauna ia te ia ma e tatau foi ona faapena faifeau a le Atua. Afai o loo e auauna I le Atua e ala I sana faifeau peitai e leai se loto faafetai, pau le mea ia e iloa o se auauna moni a le Atua, ma e mautinoa e te maua le taui mo lena auaunaga I le Atua. E le mafai ona tuuesea e le Atua se agaga moni e auauna ia te ia e ala I sona sui I le lalolagi nei, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 10 SETEMA  2024

(tusia e Pastor EA Adeboye)

Manatu Autu: Maua o Perofetaga (Receiving Prophecies )

Tauloto -Tusi Paia–1 Tesalonia 5:20 “Aua le ta‘ufa‘atauva‘a i perofetaga.”

Faitauga – Tusi Paia –2 Tupu 7:1-17

E iai taimi e tuuina mai ai e le Atua perofetaga e faigata ona ausia I le manatu faale tagata ma e masalosalo ai nisi ma latou misia. Afai o se perofetaga e te maofa ai pe faigata ona e talitonu e tupu, filemu aua le tautala. Aua e te faia se upu e ono tetee ai I le perofetaga, aua a e faia, e te le ono vaai e tino mai. I le faituaga mai le Tusi Paia o le aso, na faaleo e se tasi alii lona le talitonu I Le perofetaga a Elisaia. Na taunuu le perofetaga ae peitai ona o upu na ia tautala ai, e lei ola e ai ai. 

O upu tatou te tautatala ai ma mea e faia ina ua maea ona tuuina mai le perofetaga e taua. Na fai le Atua ia Aperaamo I le Kenese 17:4 ma le Kenese 26:3-4, o le a avea o ia ma Tama o ni atunuu e tele ma o le a to’atele lana fanau e pei o fetu o le lagi. I lena taimi, ua matutua I laua ma lona toalua ae lei maua lava in tamaiti. E ui na talitonu Aperaamo i le Atua, ma na faitauina ia te ia e tauamiotonuina (Kenese 15:6), e lei vave ona taunuu le perofetaga. Ina ua fiu e faatali e le oo le perofetaga, na faia e Sara se auala e maua ai se atalii o Aperaamo i lana auauna teine o  Akara. E ui I lea, na faatonu e le Atua Aperaamo I le Kenese 17 e savali I ona luma ma le atoatoa ma toe faaleo le perofetaga. Na masalosalo le loto o Aperaamo (Kenese 17:17), ae lei tautala ai, e lei taumafai foi i seisi auala I fafo o le finagalo o le Atua. Na faatonu e le Atua Aperaaamo e peritomeina uma tane o lona auaiga o se faailoga lea o le la feagaiga, ma na usitai. E ui sa ia masalosalo I Le Atua I lona loto, peitai e lei atagia I ana upu ma taga na faia. I le Kenese 18, na faaali le Atua ia te ia, ma I le iva masina mulimuli ane, ua fanau Isaako. Afai e le teena e lou gutu ma au taga e faia, folafolaga a le Atua mo oe, tusa poo le a le faigata ona tupu o na folafolaga, e te vaai iai ua tupu. 

A fai mai le Atua ia te au o le a ia faia se mea matautia, e amata loa ona ou ta’u atu I tagata e na te faatagaina. Ou te le tuu avanoa i Lo’u mafaufau e faavasegaina pe masalosalo iai. Ou te tautau pea le perofetaga seia oo ina taunuu ia te a’u. Ina ua fai mai le Atua o le a ia fausia se taulaga tele mo au, i le taimi lea, e le mafai ona ou faatauina se fale, peitai na ou tautau atu I soo se tagata e fia faalogo mai iai. O le aso, ua ia faataunuuina lea folafolaga. Ina ua ia faaali mai taavale tetele o loo aumai ai povi atoatoa e fafagaina ai le motu o tagata e auai mai i matou polokalame, na ou faasalalau atu I tagata e ui e leai se matou tupe e faatau ai se afa taseni povi. O le aso, ua faataunuuina lena folafolaga. A folafola e le Atua ia te oe se mea matautia e matua faigata ona tupu, ta’uta’u e lou fofoga ona e vaai lea ua taunuu. I le suafa on Iesu, Amene. 

OPEN HEAVENS

MATALA LE LAGI MO LE ASO LUA 10 SETEMA  2024

(tusia e Pastor EA Adeboye)

Manatu Autu: Teena o perofetaga e le manuia 2 (Rejecting Negative Prophecies 2)

Tauloto -Tusi Paia–2 Tupu 20:5 “Fo‘i atu ia ma ia ē fai atu ‘iā Esekia le ta‘ita‘i o lo‘u nu‘u, O lo‘o fa‘apea ‘ona fai mai o le ALI‘I le Atua o Tavita lou tamā, ‘Ua ‘ou fa‘alogo i lau tatalo, ‘ua ‘ou iloa ou loimata; fa‘auta fo‘i, ‘ou te fa‘amālōlō ‘iā te oe, ‘e te alu a‘e i e luā i le fale o le ALI‘I.”

Faitauga – Tusi Paia –Iosua 6:26, 2 Tupu 2:20-21

O ananafi, sa ou talanoa atu e te’ena perofetaga mai perofeta pepelo. Peita’i e iai taimi, e tuuina mai e se perofeta moni se perofetaga e le logo lelei i lau faalogo. E iai taimi e ta’u mai e le Atua  ni mea e tatau ona e silafia; a’o ni isi taimi e na te aumaia e te fai iai se gaioiga talafeagai. E fa’apefea ona e feliuaina se perofetaga le manuia pe a e taulimaina.?

E pei o Esekia I le 2 Tupu 20:1-11, o le mea muamua lava e mafai ona e faia o le ‘ole atu i le Atua e toe feliuaina le perofetaga. Afai e faafofoga iai le Atua, e na te toe auina mai le perofeta lava lea e tasi ia te oe ma se perofetaga fou. Lona lua, e mafai ona e sailia se perofeta e sili atu lona fa’auuga, e na te fa’aleaogaina le perofetaga le manuia. O le tulaga lena sa faia e tagata Ieriko i le tusi faitau o le asō, sa fetu’u e Iosua i le fanua, ae sa mafai e Elisaia ona toe fa’aleaogaina le fetuu na faia e Iosua, aua sa ia te ia le fa’alua o le agaga o le Atua.

I ni tausaga ua tuanai atu, e iai se tamaloa na faapea mai ia te a’u, sa ia feiloai ma se perofeta i le 44 o ona tausaga, ma fa’ailoa atu ia te ia mea uma o le a tutupu i le 40 tausaga o lumanai, ma e i’u lona soifua I le 84 tausaga. Fai mai le tamaloa, o mea uma sa valo’ia e le perofeta, ua taunuu, ma e toe lua vaiaso aulia le 84 o ona tausaga. Sa ou fesili iai poo fia auauna pea mo le Atua, ae tali mai, ‘Ioe’, ona ou fai lea iai, ‘e te ola pea’. Sa ia fa’amaoti mai pea ua taunuu mea uma sa valo’ia e le perofeta lea, ae peita’i ona e maualuga atu le faauuga ia te au, sa ou tali atu iai, afai lava e naunau e auauana pea mo le Atua, o le a ola pea se’ia oo atu i le taimi ua sauni lelei ai e i’u lona ola. Toe o ni nai vaiaso atoa lona 100 tausaga, sa valaau mai mo a’u ma faapea mai, ua sauni e alu , na maliu toe o ni nai aso aulia lona 100 tausaga.

E iai taimi, e tuusao mai ia te oe e le Atua ni  perofetaga le manuia, e ala mai i se miti, po’o se faaaliga pe fa’alogoina foi se leo. I ia taimi, e mafai ona e feiloai atu i se perofeta e sili atu ona vāvā lalata ma le Atua nai lo oe, ma talosaga mo se fesoasoani e ole atu i le Atua ina ia suia. I tausaga e tele ua tuanai atu, sa iai se tagata mau’oa e le’i leva ona fa’aolaina ma sa telē lona fesoasoani ia te a’u ile fa’ataunuuina o le galuega a le Atua, sa fai lana miti e faapea ua fa’atonuina ia e le Atua e tapena lona aiga aua e le o toe umi se taimi e ola ai. Sa o’o mai lea tagata ia te a’u a ua ou fai atu iai: ‘Leai!’ Sa ou faapea atu: ‘Aua e te popole o le a ou talanoa i lo’u Tama’.  Sa ou fai atu i le Atua, ‘Le Alii e, ou te mana’omia lenei tagata, fa’amolemole, ‘aua e te ave’esea o ia i lenei taimi’. Sa tali mai le Atua i lo’u ‘ai’oi atu, ma ua ola lenei tamaloa.  O perofetaga le manuia, e tusa lava pe moni, e mafai ona feliuaina ma fa’aleaogaina, I le suafa o Iesu, Amene

OPEN HEAVENS

MATALA LE LAGI MO LE ASO GAFUA 9 SETEMA  2024

(tusia e Pastor EA Adeboye)

Manatu Autu: Teena o perofetaga e le manuia1 (Rejecting Negative Prophecies 1)

Tauloto -Tusi Paia–1 Ioane 4:1 “Le ‘au pele e, ‘aua tou te fa‘alogo i agaga uma lava, a ‘ia ‘outou tofotofo i agaga pe mai le Atua i latou; auā e to‘atele perofeta pepelo ‘ua ō atu i le lalolagi.”

Faitauga – Tusi Paia –Esekielu 13:1-9

E tele ituaiga o perofeta ua iai i nei aso. E moni o loo iai perofeta moni, peitai o loo toatele foi perofeta pepelo o loo auina mai e le tiapolo ma ni faaperofetaga pepelo. A auina mai se perofetaga e le manuia mai se perofeta moni na faalogo I le Atua, e mafai I lea tagata ona tagi atu I le Atua e pei o Esekia I le 2 Tupu 20:1-11 ma e mafai ona suia le finagalo o le Atua. O le a ou talanoa atu taeao I le mea e mafai ona e faia I se perofetaga e le manuia ae o le aso, o le a ou talanoa atu I perofetaga pepelo. 

E leai ni faamaumauga i le Tusi Paia o perofeta pepelo aua na fetalai le Atua I le Esekielu 13:9, e le faatagaina I latou I le faapotopotoga a Isaraelu pe tusia foi i latou tusi a Isaraelu. O nei aso, ua faatupuina e perofeta pepelo le fefe i loto o tagata e ala i a latou perofetaga. A faataga e nei tagata le fefe ma le mata’u e mauaa i o latou loto, ua latou faatagaina nei perofetaga le mana e taunuu ai. Aua foi o le tulaga e fefe ai le tagata e tele le avanoa e taunuu ai I lona olaga (Iopu 3:25-26). Afai o oe o se kerisiano ae faia nei perofetaga ia te oe, aua nei e faatagaina le fefe i lou loto, aua e le foaiina mai e le Atua le agaga o le mata’u, ae foaiina mai le agaga e pulea ai le loto. Aua le fefe, manatunatu i le Upu a le Atua e faaleaoga ai perofetga pepelo ma tuuina atu I le Atua I le tatalo. E tele perofeta pepelo ua faapea mai ia te au, ‘ua fetalai mai le Alii’. Peitai, e faapea mai lava le Atua ia te a’u, ‘aua le amanaia lena tagata, ou te le’i auina atu lena feau’. 

E lei leva ona tuua e se tasi o akiepikopo le lalolagi nei e faatasi ma lona Alii, na o mai nisi o faipisinisi ua faatoa maea ona tatala se latou faletupe ma mananao ou te tatalo mo le latou pisinisi ao lei tatalaina auaunaga. Ina ua maea ona ou tatalo, na talosaga mai e tatala sa’u teugatupe i le latou faletupe ina ia avea a’u ma tagata muamua ua faia se teugatupe i le latou faletupe. Na ou fai iai e leai sa’u tupe e tatala ai se teugatupe ma o lea na latou aumaia se latou lava tupe e 50,000 e tatala ai sa’u teugatupe. E lei leva ae ripoti mai I se nusipepa fai mai ua ou tatalaina se faletupe i se $50,000, ma ua salalau solo. Mulimuli ane, ua faia se fonotaga a le mafutaga o faifeau penetekoso i Aferika ma sa iai se perofeta ua taitaiseseina e nusipepa, ua faia sana perofetaga ua lata ona ou alu foi au ia e pei o le akiepikopo. Na tauanau a’u e nisi o faifeau ou te tali iai peitai na ou filemu pea e leai se tala, aua foi o lo’o ou manino I le upu a le Atua e faatatau I lo’u olaga. I le taimi nei, e le o toe soifua le tagata na faia le perofetaga ae o loo ou ola pea I le alofa tunoa o le Atua. O le mata’u e tuu avanoa ai I perofetaga pepelo e taunuu. Ia e talitonu tau o le upu a Le Atua e faatatau I lou ola, I le suafa o Iesu, Amene. 

OPEN HEAVENS

MATALA LE LAGI MO LE ASO SA 8 SETEMA  2024

(tusia e Pastor EA Adeboye)

Manatu Autu: Faaipoipoga, o se manuia po’o se fetuu ?(Wedding, a blessing or a curse ?)

Tauloto -Tusi Paia–Kenese 2:18“Ua fetalai mai fo‘i le ALI‘I le Atua, “E lē lelei ‘ina to‘atasi o le tagata; ‘ou te faia sona fesoasoani e tatau ma ia.”

Faitauga – Tusi Paia –Failauga 4:9-12

O aso nei, o le aofa’i o ulugali’i tete’a ua o’o I le tusa ma le 50% i nisi o atunuu, ma ua manatu nisi tagata ua sili atu ai pe a aua ne’i faaipoipo. Ua tupu mai ai le fesili, o se faamanuiaga le faaipoipo po’o se malaia?

Ua finau nisi tagata o le faaipoipoga o se fetu’u aua afai e le’i faia Eva, ma afai e le’i fuafuaina i le amataga le faaipoipoga, semanu e leai se agasala i le lalolagi. E foliga mai fo’i o le talitonuga lea o Atamu aua na ia tuua’ina le Atua i lona avatua o Eva ia te ia, ina ua fesiligia o ia pe aisea na ia ‘aia ai le fua o le laau fa’asāina (Kenese 3:12). Peita’i e ao ona o tatou manatua na manaomia e Atamu sona fesoasoani, ona faia ai lea e le Atua Eva mo le lelei o Atamu. Na sologa lelei mea uma a’o le’i o’o mai le agasala. O lona uiga e lē o Eva le faafitauli, o le agasala.

O le faaipoipoga, e mafai ona avea o se faamanuiaga poo se malaia, e fua i sao ta’itasi o le ulugalii e tu’u i le la āiga. Afai e o gatasi le faaipoipoga ma le Upu a le Atua, o le a Manuia. Peita’i afai e lē tausisia e se tasi o i laua le finagalo o le Atua ma faataga le agasala i lo lā āiga, o le a tutupu faafitauli. E atoa I le asō le 57 tausaga talu ona o’u faaipoipo, ma e mafai ona o’u faapea atu ia te oe ma le mautinoa, na amata avea o se faamanuiaga la’u faaipoipoga ina ua tu’u o ma ola ma lo’u toalua ia Keriso, ma amata ola e tusa ma lona finagalo. I le amataga, a ma misa e ta’i fia vaiaso o ma fe’ese’esea’i, peita’i na suia ina ua ofo o ma ola iā Keriso.

Ou te manatua le tala i se ulugalii e tauaimisa i po uma. O se tasi aso, na valaaulia ai i laua e se tasi i se aulotu RCCG i lo latou aai ma ina ua fai le valaau, na o la talia Keriso e fai ma Alii ma Fa’aola i o la olaga. E le’i toe faalogoina e o latou tuaoi se misa i le tolu vaiaso, ma fesili loa I le ulugalii i le fia iloa o le mafuaaga ua lē toe misa ai. Na tali le ulugalii, ua o la faa ulufale Keriso i lo la āiga ma o Keriso le mafuaaga ua fealofani ai lo la aiga. Afai e te mana’o e manuia le lua faaipoipoga e tatau ona fanaufouina moni oe ma lau ava/tane ma ola e tusa ma le Upu a le Atua. O oe ma lou toalua e tatau ona lua su’esu’e le Afioga Paia a le Atua ma tatalo, tāla’i faatasi Keriso. E tatau ona o oulua naunau faatasi mo le Atua. A o oulua faia faapea e lē aunoa, o le a e iloa le matagofie o le faaipoipoga. O loo o’u fiafia i la’u faaipoipoga ma ou te tatalo o le a faapea fo’i ona e fiafia fo’i i lau faaipoipoga I le suafa o Iesu. Afai ua e faaipoipo, ia mautinoa ua lafoai atoatoa le lua faaipoipoga I Le Atua, I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 7 SETEMA  2024

(tusia e Pastor EA Adeboye)

Manatu Autu:  E lē mafai ona e lafi mai le Atua (You Cannot Hide From God)

Tauloto -Tusi Paia–Eperu 4:13 “E lē lilo fo‘i se tasi mea na faia i ona luma, a ‘ua ta‘atia fua ‘ina ‘ua aliali mai o mea uma lava i lana silafaga, tatou te ta‘u atu ‘iā te ia a tatou amio.”

Faitauga – Tusi Paia –Salamo 139:1-19

Na ave e se faifeau se tamaita’i i se potu o se faletalimalō. A o le’i ulufale i la’ua i totonu, sa tilotilo solo e fa’amautinoa e lē o iloa mai i la’ua e se isi. Ina ua la i totonu sa popole le loto o le tamaita’i ma faapea atu I le faifeau a o lei tamo’e I fafo, “A’o ta lei omai i totonu sa o ta autilo i le itu tauagavale ma le itu taumatau e fa’amautinoa e leai se isi o iloa maia tā’ua, peita’i ta te le’i tilotilo i lugā. . . . . e mafai ona silasila mai le Atua ia i tāua.” Talitonu mai ia te a’u, e leai se vaipanoa e lilo i le silafaga a le Atua. Tusa po’o le a le lelei e manatu nisi tagata e mafai ona natia ai a latou agasala, e lē mafai ona o latou fa’aliloa, e o’o i le agasala aupito sili ona itiiti, mai le Atua. Afai e leai se tagata e mafaia ona nanāina ana agasala mai le silafaga a le Atua, o lona uiga e leai fo’i se isi e mafai ona ‘alo mai le taui o ana agasala. Aua e te taumafai e fa’alafi se agasala ua e faia, aisea e lē sui ai ou ala?

O le mafuaaga e tanuma’i ai e lē toatele a latou agasala, o le manana’o e foliga amiotonu i le vaaiga a tagata. O le fesili, o latou fa’afia amiotonu i tagata po’o le Atua? O tagata ea e faamasinoina i latou i aso atalī po’o le Atua? Ua lē ese i latou ma tamaiti aoga e tu’u a latou api ma tusi aoga i o latou luma pe a i ai matua ae leai ma se faitaua. A o’o mai suega, e lē pasi, ma faaigoa ai o tagata faiaina e o latou matua na faafoliga i ai. A alu le si’itiaga, o tagata lava ia sa fa’afoliga amiotonu i ai o le a vaai ma iloa ituaiga tagata moni e i ai i latou. Aua e te fa’afoliga i tagata o ē leai se leo i lou i’uga e faavavau, e sili ai le fa’alelei ma fa’amautū lou faaolataga ia o’o mai le i’uga, silasila lē e faamasinoina oe, e moni lou fanaufouina.

Afai o oe o se atalii/afafine moni o le Atua a o loo e lafi i au agasala ma faafoliga i tagata, ou te mautinoa o lo’o ta’u atu e Agaga Paia ia te oe e tu’u lou ola fa’afoliga ma taofi lou faia pea o le agasala. Aua e te te’ena le siufofoga o Agaga Paia, faalogo ma usita’i. E finagalo le Atua e i ai lona alofa mutimutivale ia te oe i le taimi nei ma o le a ia foaiina atu lona alofa tunoa e te gaua’i ai ma ola faapaiaina, peita’i e tatau ona e loto salamō moni.

Le au pele e, afai o e faia pea le agasala, filifili nei loa e salamō ma fulitua i le agasala. E mafai ona e faia lenei tatalo: “Le Alii e, Iesu, ua o’u salamō i lo’u ola i le agasala, ua o’u sauni ou te ola i le olaga faapaiaina moni. Faamolemole fesoasoani mai ia te a’u le Alii e, ma ia aua ne’i o’u toe fo’i i le lalolagi i le suafa o Iesu, e tatalo atu ai”. E matua faigata ona e olegia le Atua, e silafia lelei e ia lou tagata moni, I le suafa o Iesu, Amene. 

OPEN HEAVENS

MATALA LE LAGI MO LE ASO FARAILE 6 SETEMA  2024

(tusia e Pastor EA Adeboye)

Manatu Autu:  Tatalo mo taitai (Prayers for leaders )

Tauloto -Tusi Paia–Salamo 2:10 “O lenei, ‘outou tupu e, ‘ia ‘outou atamamai; ‘ia a‘oa‘oina fo‘i ‘outou fa‘amasino o le lalolagi.”

Faitauga – Tusi Paia – 2 Timoteo 2:1-4

Tatalo

1. Tama, faafetai mo taitai uma I lou aiga, ekalesia, atunuu, ma soo se nofoaga. Faafetai mo latou olaga, o latou aiga, ma lo latou soifua manuia. 
2. Tama, Ou te tatalo ia maua le poto e o matou taitai. Faamolemole ia aua nei o latou taitaia a’u I auala sese. Foai le poto iai latou e iloa ai le mea e tatau ona faia I taimi uma, I le suafa o Iesu. 
3. Tama, ia e faamanuia i o matou taitai. Ia e saunia mea uma latou te manaomia Ina ia latou maua le filemu e latou te taitai I matou I le ala tonu, I le suafa o Iesu. 
4. Tama, faamolemole ia saunia ma foai punaoa uma e manaomia e o matou taitai e ausia ai fuafuaga ua faataatitia i o latou lumanai, I Le suafa o Iesu. 
5. Tama, faamolemole foai I o matou taitai le malosi e manumalo ai I soo se luitau e ono tu i le ala, o lo matou lumanai manuia o loo latou taitaia I matou iai. Fesoasoani iai latou e faatoilalo soo se luitau e latou te fesagai I le suafa o Iesu. 
6. Tama, faamolemole foai le loto alofa i o matou taitai I tagata o loo latou taitaia. Ia aua nei o latou faaaogaina o latou tulaga taitai e faasaua ma faaaogaina faaletatau tagata o loo latou taitaia. 
7. Tama, faamolemole ia aua lava nei faia e o matou taitai se mea e faatiga ai ia te oe e ono o’o mai ai le faamasinoga iai latou ma tagata o loo latou taitaia. Faamolemole fesoasoani iai latou ia faia lou finagalo i taimi uma, I Le suafa o Iesu. 
8. Tama, faamolemole ia aveesea soo se taitai e tetee e faia lou finagalo. E pei ona e suia Saulo ia Tavita, suia I latou I tagata e faia lou finagalo, I le suafa o Iesu. 
9. Tama, faamolemole ia avea o matou taitai ma faataitaiga lelei iai matou. Ia avea a latou amio ma aga o ni tapulaa lelei e avea ma faataitaiga e matou te ola ai, I Le suafa o Iesu. 
10. Tama, ia iai le filemu ma le loto gatasi i o matou taitai. Foai le loto gatasi ma le poto e nonofo ma galulue fifilemu faatasi ai, I le suafa o Iesu. 
11. Tama, faatulai ni taitai amiotonu I tulaga taitai mautofi Ina ia olioli ai tagata, I le suafa o Iesu. 
12. Ia e faamanuia i o matou taitai lo matou Tama, I Le suafa o Iesu, e tatalo atu ai, Amene. 

OPEN HEAVENS

MATALA LE LAGI MO LE ASO TOFI 5 SETEMA  2024

(tusia e Pastor EA Adeboye)

Manatu Autu:  Na faia mo ia (Created for him )

Tauloto -Tusi Paia–Kolose 1:16 “auā na faia e ia o mea uma lava, o mea i le lagi ma mea i le lalolagi, o mea e va‘aia ma mea e lē o va‘aia, o nofoāli‘i, ma ali‘i ma ali‘i sili, ma faipule; na faia e ia mea uma lava, na faia fo‘i mo ia.”

Faitauga – Tusi Paia – Efeso 2:1-10

Po’o le a lava le umi e te soifua ai i lenei lalolagi, e te le vaaia se laau e na te aia ona lava fua. E totō laau e tagata e faafiafia iai latou, ae le mo le fiafiaga o laau. E fa‘apea fo‘i ‘ona faia ‘outou e le Atua mo lona lava fiafiaga. E leʻi faia oe e faamalieina lou lava tagata; na faia oe e le Alii mo lona fiafiaga. O le mea lea, a soifua le tagata i lenei olaga e faafiafiaina o ia, e le lelei lea tulaga.

O le maua o le tele o tupe, maua o taavale taugata ma le maua o fale, e le faapea ua ausia le famoemoega o le olaga o Lea tagata, aua o mea uma na ua na o le fiafiaga e maua ai. O taunuuga lelei o lenei olaga, e le fuaina i le tele o au tupe, po o le maualuga ma le tauoloa o le tulaga ua e oo i ai, e fuaina i le maualuga o loo e faatinoina o le finagalo o le Atua.  Mo se faataitaiga, atonu e vaai se tagata ia Iosefa o le Palemia o Aikupito ma faapea ai “Ua ausia manuia e lenei tagata, “Ua ia ausia faamoemoega o lona olaga ona o tulaga faaeaina ua ia ausia”, peitai ana lē faasaoina e Iosefa lona aiga mai le oge e pei ona tapena ma faia ai o ia e le Atua ( Kenese 45; 1-11 ) semanū e lē taulau lona faamoemoe. O le a toʻatele tagata mauʻoa, a maea atu i lenei lalolagi, o le a latou le faalogo i le upu, “Le auauna lelei e, ma le faamaoni,” peitai o le a latou faalogo i le siuleo, “O oe na le auauna leaga ma le paie.” Ou te tatalo e le o lou tofi lea I le suafa o Iesu.

Le au pele, e lelei le mauoa, e lelei le taʻutaʻua ma malosi, ae tusa lava pe oʻo mai na manuia, e le mafai lava ona faamalieina oe, seʻi vagana ua e faia le finagalo o le Atua. Aua e te tulituliloa ata lafoia, ae tuliloa le valaau a le Atua mo lou olaga. E foliga e faatauvaa ma le fetaui lou tuua o la’u galuega, o a’u o le faiaoga i se iunivesite, e galue o se faifeau i se aulotu toaitititi. Peitaʻi, o le finagalo o le Atua lena mo loʻu olaga, ma o le filifiliga aupito sili lea ua ou faia. I le faataunuuina o lona finagalo, na faia ai e le Atua mea silisili uma ou te ole atu ai.

O le la‘au e fua mai i fua e tausami ai lona matai, o le a tausia lelei. O le a fafaga lelei e lona matai ma tausi lelei Ina ia fua atili mai. A e tuliloaina le finagalo o le Atua mo lou olaga, o le a ia faamautinoa e te le misia se mea lelei. Ole atu ia te Ia po o le a lona faamoemoega mo lou olaga ma e tuliloa punouai loa, I le suafa o Iesu, Amene.