Samoan Devotional

OPEN HEAVENS

MATALA LE LAGI MO LE ASO FARAILE 4 OKETOPA  2024

(tusia e Pastor EA Adeboye)

Manatu Autu: Tatalo Faigofie ( Easy Prayers )

Tauloto -Tusi Paia–2 Korinito 1:20 ““Auā o ia o le “Ioe” i mea uma ‘ua folafolaina e le Atua, o le mea lea ‘ua tatou “Amene” ai fo‘i e ala ‘iā te ia, e o‘o ai le vi‘iga o le Atua.”

‭‭

Faitauga – Tusi Paia –Numera 23:19-20

O le aso, o le a faagasolo ai pea a’u a’oa’oga I ituaiga tatalo eseese I le tilotilo lea I tatalo faigofie. E te tatalo I tatalo faigofie pe a e tatalo I le Atua mo mea ua maea ona ia folafolaina i le Tusi Paia. Mo se faataitaiga, o le ole atu I le Atua mo meaai mo aso uma o se mea ua faamautinoa ma folafolaina i le Mataio 6:9-11. O le leoleo mamoe e le ai i le vao, e mo mamoe. O lea, a e ole atu i le Atua mo meaai mo mamoe, o se tatalo faigofie ma e faigofie ona ia tali maia (Salamo 23). 

Fai mai le Salamo 35:27, e fiafia le Atua pe a e manuia. O lona uiga o le tatalo mo le tamaoaiga o se tatalo faigofie. I tausaga ua tuanai, na ou ole atu I le Atua mo sina tupe e fau ai sou tamai fale. Na ia faapea mai, ‘aua e te ole mai I se fale, ua ou filifili e foai atu ia te oe se taulaga atoa’. Ma ina ua o mai le toafitu o matou e tatalo mo se eleele e faia ai togalauapiga, na fai perofetaga a se tasi ma faapea, ‘ua ou maea saunia le eleele, o le a ou faaali atu ia te outou’. Ua maea saunia le eleele aua ua ia faamautinoaina ma folafola I Lana Upu (Salamo 2:8). 

Fai mai se tasi o lau fanau, ‘Foai mai’, o se tatalo a se tamaitiiti. A sau sou atalii ma fesili mo se meaai, o loo ia faapea mai, ‘ua ou sauni mo leisi meaai’, e le manatu poo fea e aumai ai le meaai. I le ala lava e tasi, e le tatau ona e manatu I mea ua maea folafola e le Atua mo oe i ana afioga. Ua maea saunia mo oe, e pau lau mea e faia o le ole atu, ona e maua lea I le taimi tonu a le Atua. E leai se mea e te popole ai I tupe, meaai ma Isi mea uma e te mafanafana ai, ua maea saunia e le Atua (Mataio 6:25-34). 

A e popole i mea ua faamautinoa mai ma folafola e le Atua, e iloa ai e itiiti lou faatuatua. Ae e te lei fanau mai i lenei lalolagi, ua ia saunia mea uma e te manaomia e ola ai. Na o le ole atu lava pe a oo ina manaomia. A e ole atu, ia maitau lelei poo le a faatonuga o loo manaomia ona e faia e maua ai. I le 1 Tupu 17: 4-6,  na fai le Atua ia Elia e alu I se alia ona foai atu lea o meaai mo ia I lea nofoaga. Ana faapea e le usitai Elia, semanu e oti I le galala I le fiaai ae ua maea saunia le meaai mo ia. O lou soifua manuia o le matafaioi lea a le Atua, aua e te popole iai. O le popole i mea e manaomia i aso uma o se faailoga o le leai o se faatuatua. Afai ua faamautinoa mai e le Atua i Lana Upu, ole atu ia te ia ona ia foai mai lea i le taimi lelei, i le suafa o Iesu, Amene. 

 OPEN HEAVENS

MATALA LE LAGI MO LE ASO TOFI 3 OKETOPA 2024

(tusia e Pastor EA Adeboye)

Manatu Autu:Tatalo matua faigofie 2 (Very Easy Prayers 2)

Tauloto -Tusi Paia–2 Samuelu 7:22 “O le mea lea e Sili ai oe le ALI‘I le Atua e; auā e leai sē tusa ma oe, e leai fo‘i se Atua na o oe lava, e tusa ma ‘upu uma na matou fa‘alogologo ai i o matou taliga.”

‭

Faitauga – Tusi Paia –Salamo 100:1-5

O ananafi, sa ou aoaoina atu i le pese ma viiga i le vaega lea o tatalo e matua faigofie e o’o I tamaiti e mafai ona latou faia. O le a ou talanoa atu I le finagalo o le Atua e tusa ma nei tatalo. 

O le tulaga muamua e tatau ona e silafia, o loo saili le Atua I tagata e tatalo faapea. E saili e tamaiti aoga le poto, saili e faipule le pule, saili e faipisinisi tupe faasili ae o loo saili e le Atua tagata tapuai. O loo ia saili faifaipea tagata e tapuai ia te ia i le agaga ma le faamaoni (Ioane 4:24). Afai e na te maua tagata faapea, e fiafia ma foai iai latou faamanuiaga ma vavega e latou te lei ole atu ai. Fai mai le Salamo 67: 5-6

“Le Atua e, ‘ia vi‘ia oe e le nu‘u; ‘ia vi‘ia lava oe e le nu‘u, o i latou uma lava. ‘Ua fua mai e le lau‘ele‘ele ona lava fua; o le Atua, o lo matou Atua lava na te fa‘amanuia mai i matou.”

‭‭

Ina ua amata ona faia sauniga o le Agaga Paia i le Redemption City, sa ou tatalo ma anapogi mo nei polokalame, ae faapea mai le Atua, ‘aua le tatalo mai, tau o le vivii mai’. Na ou faia ma o lana tali mai na ou maofa ai. I le po muamua o le sauniga o Agaga Paia, na ia faamaloloina le 14,000 o tagata. Sa toalaiti na auai I na vaitaimi ma toeitiiti aofia uma ai tagata I lena fuainumera. Ina ua maea le polokalame, ua ou alu i lou potu ma faafetai i le Atua aua ou te lei vaai muamua I lea tulaga. Ona fai mai lea ou te vivii ma vivii pea ia te ia ma e sili atu mea o le a ia faia I le aso e sosoo ai. O le tulaga ou te lei iloa, o tagata na faamaloloina ua o atu ma tau atu ia latou uo ma ua toatele atu tagata na o mai I le aso na sosoo ai. I lea aso, e 16,000 tagata na faamaloloina. Ua oo mai le fefe ia te a’u. E te manatu I lau aulotu e 15,000 ae oo atu I le aso e sosoo ai, ua siitia i le 30,000. O le pese, viiga ma le tapuaiga e faia ai e le Atua vavega matautia e te fefe ai. 

I ni tausaga talu ai, I se faaipoipoga i le Ekalesia Redeemed Christian Church of God, na pa’u faafuasei le tama faaipoipo ao sainia pepa faaipoipo, ma ua maliu. Na o mai uma faifeau na iai ma tatalo I tatalo uma na latou iloa, peitai ua amata ona maluluina le tino maliu o le tama. Ona faapea mai lea o seisi e taofi uma tatalo ae fai viiga i le Atua. E lei leva ae toe tu mai i luga le tama faaipoipo na maliu. 

Le au pele, o le auala faigofie e liliu mai ai fofoga o le Atua ia te oe, o pese, viiga ma le tapuaiga. Ia faia pea. E pei o ananafi, vivii I le Atua I lenei aso. Aua e te ole atu I se mea, ae na o le vivii lava ia te ia, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 2 OKETOPA 2024

(tusia e Pastor EA Adeboye)

Manatu Autu:Tatalo matua faigofie 1 (Very Easy Prayers 1)

Tauloto -Tusi Paia–Eperu 13:15 “O lenei, o ‘iā tatou te avatu so‘o ai le taulaga o le vi‘iga i le Atua, o le fua lea o tatou laugutu, o lo‘o fa‘afetai atu i lona suafa.”

‭

Faitauga – Tusi Paia –Salamo 34:1-4

E lima vaega o tatalo, o tatalo matua faigofie, tatalo faigofie, tatalo faigata, tatalo e lamatia ai, ma tatalo o mea matua faigata ona taunuu. O le a ou a’oa’o i nei tatalo eseese i aso o sosoo atu nei e fesoasoani ia te oe ia siitia lou olaga tatalo. 

O le vaega muamua o tatalo, o tatalo matua faigofie. O pese ma viiga. O pese ma viiga e matua faigofie aua e le tau avea oe o se faiaoga o le Tusi Paia e mafai ai ona e pese ma vivii i le Atua, e oo i tamaiti e mafai ona vivii ia te ia (Mataio 21:15-16). 

Fai mai Tavita, Lo‘u agaga e, ‘ia e fa‘amanū atu i le ALI‘I, ‘aua fo‘i ne‘i galo se mea e tasi o ana mea alofa.(Salāmo‬ ‭103‬:‭2‬ ). Fai mai se tasi o tusi pese, a e faitauina taitasi au faamanuiaga, e faigofie ona e vivii i le Atua. Fai mai Tavita, “Ou te fa‘afetai i le ALI‘I i aso uma lava; e lē aunoa ona vi‘iga i lo‘u gutu.”(Salāmo‬ ‭34‬:‭1‬). E mafai ona e vivii i le Atua e le aunoa aua e faigofie le pese ma vivii ia te ia pe afai e te faitauina au faamanuiaga. E matua faigofie ona faia, ma e ese le matautia. Peitai ane, e tele kerisiano e seasea ona viviii i le Atua. 

Ao matou sauni atu e tatala le aulotu muamua a le Redeemed Christian Church of God (RCCG) I Abuja I Aferika, sa ou iai I le faletalimalo ma tatalo, ma tuuina atu le matou polokalame i lena afiafi i le Atua ina ia tele vavega, faamalolo ma’i ma faaolaina agaga. Ao tatalo, na faapea mai Le Atua, tapuni, o a’u ea o sau tavini, ua e faafetai mai ea mo mea e tele na ou faia mo oe I taimi ua tuanai?. Ua ou faapea atu, Le Alii e, faafetai mo mea uma ua e faia mo a’u i taimi ua tuanai, o nanei, faamolemole ia e faamalolo I e mama’i’. Na toe fai mai, tapuni ae ia ou vivii atu ia te ia mo le tolu aso e aunoa ma le ole atu I se mea. Sa matua faigata ae na ou faia lava. Ina ua maea le tolu o aso, na ia faapea mai, ‘Filifili toeaina e o atu e faia aoaoaga faavae a le Ekalesia ina ia faamalosia atili le faavae, aua e pau le tulaga o le a e vaai atu iai o le faaopoopo, sauni mo le faateleina’. O le taui o le vivii i le Atua i lena taimi, e atagia i le Ekalesia RCCG I le aso, ua matua faateleina. 

E te faia le tatalo e matua faigofie o le pese ma viiga? E faafia ona e vivii I Le Atua? Tilotilo I lou siomaga, e matua tele mea e te faafetai ma vivii ai i le Atua, ia vivii ia te ia e faifaipea ona o mea na. Ou te iloa e iai mea o loo e naunau e faia e le Atua mo oe, ae faapefea mea ua maea ona ia faia mo oe?A faapea e faigata ona e vivii I le Atua mo mea ua ia faia mo oe, e faapefea ona e manatu e na te faia nisi mea fou mo oe? Aua le leai se loto faafetai, vivii I Le Atua ma lou malosi atoa. Ia faaaoga lenei aso e te vivii ai I le Atua. Aua e te ole atu I se mea, na o le vivii i le Atua I le aso atoa, I le suafa o Iesu, Amene.

OPEN HEAVENS

MATALA LE LAGI MO LE ASO LUA 1 OKETOPA 2024

(tusia e Pastor EA Adeboye)

Manatu Autu:Tatalo mo lou atunuu (Prayers for your nation)

Tauloto -Tusi Paia–2 Nofoaiga Tupu 7:14“āfai e fa‘amaulalo lo‘u nu‘u ē ‘ua ta‘ua i lo‘u igoa ma latou tatalo ma sā‘ili‘ili ‘iā te a‘u ma liliu ‘ese i o latou ala leaga, ‘ona ‘ou fa‘alogo ai lea mai le lagi ma fa‘amāgalo ‘iā latou agasala ma fa‘aolaina lo latou nu‘u.”

Faitauga – Tusi Paia –Salamo 22:27-28

1. Tama, ou te matua loto fa’afetai mo au fa’amanuiaga i luga o lo’u atunuu. O lo o matou tutumau pea aua o lo o e sisila mai iai matou.

2. Tama, faamolemole ia fa’a’auupegaina ta’ita’i a lo’u atunuu ma foa’iina ia i latou le tofā, le poto ma le malosi latou te ta’ita’ia matou i le ala tonu ma sa’o i taimi uma lava.

3. Le Ali’i e, ia e fa’aalia ma ia lia’i eseina ta’ita’i amio leaga mai o latou tofiga, i le suafa o Iesu. ‘Aua lava ne’i fa’atagaina tagata amio leaga latou te toe ta’ita’ia so’o se vaega o lo’u atunuu.

4. Tama, fa’amolemole ia tu’uina atu i tagata amiotonu i lo’u atunuu le loto toa e tulai mai o ni tai’ta’i. Ia tapu’e tagata amiotonu ina ia maua le loto toa e finau mo tulaga  ta’ita’I, I le suafa o Iesu.

5. Le Alii e, fa’amolemole ia fa’ataga ona pulea lo matou atunu’u e lou alofa mutimutivale. “Aua ne’i sao mai ni faalavelave faalenatura pe faia foi e tagata po’o ni faama’i pipisi, i le suafa o Iesu.

6. Tama, fa’amolemole fa’ataga ona matuā fa’atuputeleina le tamaoaiga o lo’u atunu’u. Ia fua feti’iti’i mai o matou fanua, ma ia fua tetele mai lona tala i le tamaoaiga. Ia talai mai faitoto’a o avanoa ma tulaga tauoloa ia i matou; ia fa’amutaina le oge ma le lima vaivai i so’o se vaega o le atunuu, i le suafa o Iesu.

7. Tama, fa’amolemole ia pulea le filemu i o matou va ma isi ae maise i le va ma atunu’u tua’oi. ‘Aua ne’i ta’ua so’o se ituaiga taua ma ni vevesi i lo matou atunuu, ile suafa o Iesu.

8. Tama, fa’amolemole ia fa’ataunu’uina au fuafuaga mo le matou atunu’u. Ia vave ona fa’ataunuuina, i le suafa o Iesu.

9. Le Alii e, ia oo mai lou alofa mutimutivale , ia maua ai le loto salamo moni mai soo se ituaiga faasausili ma le valea e ono mafai ona fa’aumatia ai lo matou atunu’u ma i’u ina fa’atama’ia ai I matou i totonu o le matou atunuu, i le suafa o Iesu.  

10 Le Alii e faamolemole ia fa’atagaina lo’u nuu e tula’i faatasi ma atunuu tetele o lenei lalolagi. Ia fa’alumaina e o lo o taumafai e fa’aumatia ma ave’esea le mamalu mai si o matou atunuu, i le suafa o Iesu.

11. Le Alii e, ia e faatagaina le toe fuata’ina o lo’u atunuu. Ia matou sa’iliili ia te oe ma le loto atoa, i le suafa o Iesu.

12. Le Atua e, ia e faamanuia I le taligamalo a si o matou atunuu I Le fonotaga a malo o le taupulega I lenei masina. Ia faamamalu mai ou aao ma foai mai mea Uma e manaomia, ae foi ai pea le viiga ia te oe lo matou Atua, le Atua le Tama, le Alo ma le Agaga Paia, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 30 SETEMA 2024

(tusia e Pastor EA Adeboye)

Manatu Autu:Punavai o le talavou (The Fountain of Youth)

Tauloto -Tusi Paia–Salamo 103:5“O lē e malie ai lo‘u mana‘o i mea lelei; o lē fa‘afouina lo‘u taule‘ale‘a fa‘apei o le aeto.”

Faitauga – Tusi Paia –Iosua 14:6-15

O nisi tagata e naunau e fia talavou pea, e pei o loo latou saili I le ‘punavai o le talavou’ e mafai ai ona tumau I le tulaga talavou e faavavau. E ui e le mafai ona tumau se tagata o se talavou e faavavau, e mafai lava ona tumau lou malosi ma le soifua maloloina lelei e pei o se talavou tusa poo le a lou matua. 

Na ou fai i nisi o au uo i ni tausaga talu ai, ona o loo faapea mai le Ioelu 2:28 e iloa fa‘aaliga e o ‘outou taulele‘a, afai o loo e iloa pea faaaliga ma mulimulitai, o loo e talavou pea. E avatu e le Atua ia te oe faaaliga pe afai e te faatali ia te ia I ona luma (Sapakuka 2:1-2). O I latou e mafuta masani ma vavalalata I le Atua e latou te maua faaaliga, e latou te o ese mai le mamalu o le Atua ma faaaliga e taumafai e ausia. Ae ou te lei fanaufouina, o la’u faaaliga pito sili ona tele o le avea ma Pule sili pito I laitiiti o se Iuvivesite I Aferika, ae ina ua ou faaaolaina ma mafuta I le tele o taimi I le mamalu o le Atua, ua amata ona sili atu faaaliga ma faamoemoega. 

E iai lava se mea e tuu atu e le Atua ia te oe pe afai e te mafuta ma ia . I le Esoto 34:30-35, ina ua toe foi mai Mose I le maea ai o le mafutaga ma le Atua, na le mafai e tagata Iutaia ona tilotilo ia te ia ona ua pupula mai pa’u o ona foliga ona o le mamalu o le Atua. Na umi se taimi o mafuta Mose ma le Atua, e iai le taimi na alu ae I le mauga ma mafuta ma le Atua mo le 40 aso (Esoto 24:18). Leitioa Ina ua atoa lona 120 tausaga, e lei tuuititia lona malosi, ma malosi lava vaai (Teuteronome 34:7). E sili atu ma le 80 tausaga o Aperaamo i le taimi o le taua e faasaoina lona tei o Lota (Kenese 14:13-16). Ua mafaia, ona o ia o se tagata e masani e osi taulaga, ma mafuta i le Atua. O le tele o taimi e mafuta ai i le Atua e tumau ai pea lou malosi ma le talavou. E ui e laitiiti se taimi ou te moe ai ona o le tele o galuega o lau polokalame, sa tatau ona ou foliga matua e sili atu I ou tausaga, peitai i le alofa tunoa o le Atua, o loo ou malosi pea i le 82 o tausaga ou te alu e savali ma o loo malosi ma manino le vaai. E le faapea ona e faapitoa lou tagata, ae ona o loo ou mafuta faifaipea ma pa’i I le mamalu o le Atua I ona luma. 

Le au pele, e mafai ona tumau pea lou tulaga talavou tusa pe ua matua I tausaga i lou fai lea ma masani lou mafuta I Lona mamalu. Peitai, e le faapea e te le tausi lou soifua maloloina ae te manatu e tumau pea lou talavou ona o loo umi se taimi e te mafuta ai I le mamalu o le Atua. O so’o se tagata e le tausi I lona soifua maloloina e fetaiai ma le taui. O le faaalu o lou taimi e mafuta ai ma le Atua, o lona mamalu e pupula ma atagia mai ia te oe, ma o le a faafouina lou talavou ma lou malosi e pei o se aeto. 

O le mafuta faifaipea ma le Atua e fesoasoani ia te oe e faatumauina le malosi ma le soifua manuia lelei e pei o se talavou. I le suafa o Iesu, Amene. 

OPEN HEAVENS

MATALA LE LAGI MO LE ASO SA 29 SETEMA 2024

(tusia e Pastor EA Adeboye)

Manatu Autu: Faaleaga Taunuuga 4 (Destiny Destroyer 4)

Tauloto -Tusi Paia–Filipi 3:19“O le malaia, o lo latou i‘uga lea; o le manava, o lo latou atua lea; o le mea latou te vivi‘i ai, o le mea e māsiasi ai lea; e loto i latou i mea a le lalolagi.”

Faitauga – Tusi Paia – Faataoto 23:19-21

I le faaiuga o la’u a’oa’oga o le mataupu ua taua i luga, o le tasi faaleaga taunuuga autū e toatele tagata e lē iloa, o le na’oai. O le na’oai o le amio ‘a’i e ‘ai ma inu tele. O tagata ‘ai tetele e lē mafai ona taofiofi le fia aai i taimi uma, ua fai le meaai ma a latou faamuamua - pei so latou atua, ma o tagata faapea e lē soifua umi.

O le faafoe lelei o lau tausami e taua tele ma o le ala lea o le fai mai o le Tusi Paia I le Fa’ataoto 23:1-2 “‘Āfai lua te nonofo ma se ali‘i e taumafa se ‘ava, se‘ia e matuā mafaufau i mea ‘ua i ou luma; ma e tu‘u atu se polo i lou ua, pe ‘āfai ‘e te se tagata ‘ai tele;”

‭‭

E le o fai mai le fuaiupu ua taua i luga, o tagata fanaufouina e tatau ona fetagofi e tu’u moni lavā se naifi i o latou ua, leai, fai mai afai e lē mafai ona o latou pulea le ai tetele, tusa pe latou te nonofo I le laulau ma alii sili, ua o latou faia lava e i latou lo latou faasalaga. O loo faamatala mai i le Tusi Paia ia i tatou e ui lava o Tanielu ma ana uo o nisi na filifilia e aai i lea aso ma lea aso I mea taumafa a le tupu, na pulea lo latou fiaaai ma filifili ia aua ne’i fa’aleagaina i latou i meaai. Na o latou filifili e ava i le Atua e ala i le sui o a latou meaai, ma na faamamaluina i latou e le Atua e taui ai i latou (Tanielu 1:1-21).

O le tofi o Esau na fa’aleagaina e se ipu meaai; na o le tasi le ipu meaai na mafua ai ona aveesea lona igoa mai le lisi e masani ona o tatou talanoa i ai - o le Atua o Aperaamo, Isaako ma Iakopo. Semanū e lē i ai le igoa o Iakopo a’o Esau, peita’i ua lē mafai ona taofi lona na’omeaai, ma maimau ai lona tofi o le ulumatua (Kenese 25:29-34).

O nisi tagata matutua e tausasami i ‘aiga uma e tolu o le asō, ti o le taeao, aiga o le aoauli ma le afiafi, va-i-‘aiga, ma toe aai a o le’i momoe. E faafefea ona maua lou malosi e ala ai i le vaeluaga o le po mo taua fa’aleagaga pe afai e tumu lou manava i meaai ua tau lē mafai ona e tu? E toatele tagata e maliliu laiti ma fa’apu’upu’u ai o latou olaga aua ua soona aai tetele. Ua aai e faaleaga ai o latou soifua maloloina, ma i’u ina maliliu ai. Aua ne’i faapea oe.

Le au pele e, e tatau ona e tausami tau lava o le taimi e manaomia, ma ai tau o le tele e manaomia e lou tino e ola ai. A tele tele lau tausami, o le a e maua I le tino vaivai, ma lē lava sou malosi e fai ai feau e atia’e ai oe ma lou aiga. O i latou e atua i o latou manava - lona uiga e pulea e le ‘ai - e i’u I le faaleagaina, pule i lau tausami.

Tatalo.

Tamā faamolemole aua ne’i e fa’atagaina lo’u fiafia i mea tausami e fa’aleagaina a’u, i le suafa o Iesu, Amene.

OPEN HEAVENS

MATALA LE LAGI MO LE ASO TOONAI 28 SETEMA 2024

(tusia e Pastor EA Adeboye)

Manatu Autu: Faaleaga Taunuuga 3 (Destiny Destroyer 3)

Tauloto -Tusi Paia–Faataoto 18:9“O lē ‘ua paiē fo‘i i lana galuega, la te uso ma lē na te fa‘amaumau mea.”

Faitauga – Tusi Paia – Faataoto 6:6-11

O le asō, o le a fa’aauau pea la’u a’oa’oga i amio leaga eseese latou te mafai ona faaleaga o tatou taunuuga. Ina ua faatoa amata fausia le aai o le ola (Redemption City), sa o’u iloa nisi o tagata fai piliki semanū faapenei ua tele ni a latou tupe pe ana lē pāiē. Na tu’u i latou e le Atua i se tulaga e mafai ona tele ai lo latou manuia, peita’i o lo latou paie ua faoa lo latou avanoa.

Le au pele e, aua le pāiē. A matou fetaui ma nisi o faifeau na o matou amata galulue faatasi, e masani ona fai mai, “Ua agalelei le Atua ia te oe,” e moni, ua agalelei le Atua ia te a’u, peita’i, e leai se isi e mafai ona tu’uaia a’u faapea ou te pāiē. E mafai ona avatu e le Atua le alofa tunoa e te manaomia e te taunuu ai i le manuia, peitai afai e te pāiē e maimau le alofa tunoa o le Atua auā o le a lē fa’aaogaina. Toatele na tatalo mo ni avanoa matala, peita’i ina ua o latou maua faitotoa matalatala a ua lē savavali ai ona e pāiē.

I le tusi faitau o le asō mai le Tusi Paia, o loo ta’u mai ai ia i tatou ia o tatou fa’aa’oa’o i le loi, e saunia e ia ana meaai ma faaputu lana seleselega i le taimi tatau. O aso nei, o nisi tagata ua o latou faia ni igoa eseese e nanā ai lo latou pāiē e pei o le vāivāi, fa’atuatuai, ma isi lava. Afai e fa’aauau pea e se uso ona lē faia mea e tatau ona fai i le taimi e tatau ai, e faigofie lava le igoa, o le pāiē. Fa’ata’ita’iga, afai o se isi e tatau ona amata i le itula e valu (8) a ua filifili o ia e taoto pea i le moega, ma musu e tu i luga e sauni pe auli ona lavalava i le afa o le fitu (7:30), o le pāiē lenā.

Afai e te faitau I le Faataoto 24:30;34, o le a e iloa ai le tugā o le leaga o le pāiē. O le pāiē na te lē fa’aleagaina faafuasei lou lumana’i, e ini ini mālie. Afai e te pāiē, o le a e toe autilo i tua i lou olaga i se taimi, ma o le a e iloa ai e mamao lava oe ma mea sa e fuafua e te ausia.

Le au pele e, faamolemole fa’aumatia so’ose vaega o le paie i lou olaga. Fai mai le Tusi Paia I le Tusi o Failauga 9:11 o taimi ma avanoa e tupu i tagata uma. Afai e te pāiē, pe a o’o mai lou taimi ma lou avanoa, atonu o loo e tofā i lou moega. Aua ne’i faatagaina sina moe itiiti e fa’aleagaina lou taunuuga. E aogā tele le moe mo lou soifua maloloina ma lou soifua laulelei peita’i, aua le moe umi pe moe i le taimi e tatau ai ona e galue.

Tu i luga ma galue. O lou taunuuga ma isi uma mea lelei e tele e faamoemoe i au galuega. Maitau ataata o le pāiē e foliga ua o’o i lou olaga, ma fa’aumatia i latou i le asō, I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 27 SETEMA 2024

(tusia e Pastor EA Adeboye)

Manatu Autu: Aafiaga e faaumatia faamoemoega 2 (Destiny Destroyer 2)

Tauloto -Tusi Paia–Luka 12:15“Ua fetalai atu fo‘i o ia ‘iā te i latou, “Ia leoleo ‘outou ‘iā te ‘outou ‘ona o le matape‘ape‘a; auā e lē ola se tasi i le tele o ana mea ‘ua ‘iā te ia.”

Faitauga – Tusi Paia – Ioane 12:3-6; Mataio 26:14-16

O ananafi na ou talanoa atu ai I le faaaogaina e le tiapolo o le faitaaga ma le mulilua e faaumatia ai faamoemoega manuia o tagata. O le Isi auala e faaumatia ai e le tiapolo faamoemoega o olaga o tagata o le naunau I le tupe. Fai mai le 1 Timoteo 6:10 “Auā o le mana‘o i tupe, o le pogai lea o mea leaga uma lava; ‘ua manana‘o tele i ai nisi, ‘ona sesē ai lava lea o i latou i le ‘upu o le fa‘atuatua, ‘ua tuia ai ‘ua ati i latou e i latou i puapuagā e tele.”

E mafai loa e le tiapolo ona faaosofia le tagata e manao i le tupe, e amata loa ona tutupu ane i si mea leaga uma lava. E le tatau ona pule le tupe ia te oe, ‘aua e te faia faaiuga e te iloa e le fiafia ai le Atua ona o tupe. O soo se mea e tetee I le finagalo o le Atua, tusa pe faitau piliona e maua mai ai, e tatau ona matua faasaina mai ia te oe. E toatele tagata ua gaoi tupe e faatau ai taavale, ona avea lea o lena taavale ma auala e oti ai. 

E maualuga le faamoemoega o le olaga o Keasi, sa tatau ona ia maua le faalua toe faalua o le faauuga sa ia Elisaia, semanu e tuuina atu ia te ia se mana tele. Peitai, ua avea le manao I le tupe ua aveesea ai lona lumanai manuia. Tusa poo le a le tele o se tupe o loo naunau se kerisiano e gaoi, o fuafuaga a Le Atua mo lena tagata e matua sili atu lona tau. Ua ou vaai i ni tagata ma faamoemoega manuia ua faaumatia, ona o nei tagata ua naunau e vave ona milionea ma faapena, ua latou ave ma faoa mea e le o ni a latou mea. Fai mai le Faataoto 28:20 “O le tagata fa‘amaoni, e tele mea e manuia ai o ia; a o lē ‘ua fa‘ata‘alise ‘ona mau‘oa, e lē fa‘asaoina o ia.”

Aua e te topetope ma faataalise ia e milionea. A vavevave se tagata ia mauoa, e le faasaoina o ia ma e faaaoga e le tiapolo e faaumatia ai lena tagata. Ia e faamaoni ona e maua lea o faamanuiaga. Aua e te faaamuia I tagata o loo faia soo se auala tusa pe faaalatua e maua ai tupe, o I latou o mamoe ua taitaia e fasia. Fai mai le Faataoto 15:27 “O lē ‘ua matape‘ape‘a i le ‘oloa, e fa‘atigāina e ia lona lava ‘āiga; a o lē ‘ino‘ino i mea alofa, e ola o ia.”

O I latou e matape’ape’a I Le oloa o loo latou faatigaina I latou lava ma o latou aiga, e vave ae amata ona tigaina I faafitauli ua latou aumaia  io latou luga. Aua e te faatasi atu iai. 

Tatalo

Tama, faamolemole faaumatia uma soo se ituaiga matape’ape’a ia te au, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI  26 SETEMA 2024

(tusia e Pastor EA Adeboye)

Manatu Autu: Aafiaga e faaumatia faamoemoega 1 (Destiny Destroyer 1 )

Tauloto -Tusi Paia– Faataoto 6:32“O lē mulilua i le fafine ‘ua leai sona mafaufau; o lē na te faia lea mea, na te fa‘aumatia e ia lona lava ola;”

Faitauga – Tusi Paia – Faamasino 16:5-18

O loo sailia pea e le tiapolo ni faailoga, e iloa ai tagata e maoae taunuuga e oo i ai o latou olaga. Atonu o e maitauina I aso ua mavae, e te lei soifua mai i lenei lalolagi ia pei o le toatele, ae e iai le taunuuga maoae ua tapenaina e le Atua mo oe. Atonu e iloa e le tiapolo nei faamoemoega, ma e ui e na te lei malamalama tele iai, ae amata loa ona ia auina atu ni tagata e faaumatia ai ina ia mautinoa e le faataunuuina lea faamoemoega manuia. O se tasi o auala e faaumatia ai e faaaoga e le tiapolo, o le faitaaga ma le mulilua.

I le Kenese 37:5–9, na faalogo ai le tiapolo o talanoa Iosefa e uiga i lona faamoemoega manuia i le lumanai, ma na tapena ai loa le tiapolo e faʻaumatia o ia. Na taumafai le tiapolo e faaoso ona uso e fasioti Iosefa, ae na faatau e ona uso e fai ma pologa. Na manatu le tiapolo o le a le taunuu miti a Iosefa I lona tulaga pologa, ae ina ua ia vaai atu i le manuia o ia i le fale o Potifara, e iu o se pologa, na ia iloa, e pau le auala e mafai ai ona taofia Iosefa, o le faaosoosoina i le faitaaga, ma o lea na ia auina atu le avā a Potifara, e faaosooso ia te ia. (Kenese 39:11-12 ). E faafetai, e le’i toilalo Iosefa i faaosoosoga aua semanu o le iuga lena o ana miti tetele ma ona taunuuga. O taimi uma lava e fa'aosoosoina ai oe e faia le faitaaga poo le mulilua, o le tiapolo lena o lo'o taumafai e fa'aumatia ou faamoemoega manuia. O lau tali e fua iai pe faataunuuina faamoemoega manuia o lou olaga pe leai.

E tusa lava po o le a le tele o faamoemoega manuia o se tagata, o lou tuu avanoa I le faitaaga ma le mulilua, e faaumatia ai le tagata, aua o loo faapea mai le Tusi Paia i le 1 Korinito 3:16-17 o o tatou tino o le malumalu o le Atua ma afai e faaleagaina e se tasi le malumalu o le Atua, e faʻaumatia o ia. O Samasoni o se tagata matautia ma le malosi tele, sa mafai ona ia faatoilaloina na o ia lava se autau atoa. Ae ui i lea, e pei lava o le malosi o ia, na ia fetaiai ma lona toilalo i se fafine na la mafuta, e leʻi faaipoipo i ai. E leʻi umi, ae olo saito mo ona fili ( Faamasino 16:21 ).

Afai e te iloa o loʻo iai ni tuʻinanau o le tino ia te oe, ma ua e moomoo i se tasi o le isi itupa, e tatau ona e tamoe i le Atua, alu e anapogi ma tatalo mo na manaʻoga e faʻaumatia. O le auala lena, e faʻamalosia ai oe, ma aloese mai le paʻu atu i  faʻaosoosoga ma faaumatia ai foi ma lagona o le tuʻinanau o le tino. Le au pele e, puipui oe mai faaosoosoga a le tiapolo i tuinanau o le tino. Aua e te faatagaina o ia e taitaina ma faʻaumatia e ou lava lima faamoemoega manuia o lou olaga. Ia tete’e atu ma sola ese mai nei mala uma ( Iakopo 4:7). Sola ese mai tuinanau o le tino, e faaumatia ai faamoemoega manuia o lou olaga, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 25 SETEMA 2024

(tusia e Pastor EA Adeboye)

Manatu Autu: Siaki tupe tatala mai le Atua (Gods blank cheque )

Tauloto -Tusi Paia– Kolose 4:2“Ia ‘outou finafinau i le tatalo, ‘ia mataala i lea mea ma le fa‘afetai.”

Faitauga – Tusi Paia – Tanielu 9:3-19

O le tatalo o se tasi lea o auupega malosi na aumai e le Atua I le tagata, o le malosiaga e valaau ai i le Atua I so’o se taimi ma ia tali mai. O se siaki tupe tatala mo lana fanau. O le fesili, aisea e le faaaogaina ai e le tele o kerisiano a latou siaki tupe ua tatala? O le tali o lo’o maua I le Salamo 10:4

“O le fa‘asiasia o mata o lē ‘ua amio leaga e lē sā‘ili ai o ia; o ona mafaufau uma, “E leai se Atua.”

O kerisiano e le tatalo e faamaualuga, o lona uiga e le o iai le Atua i o latou mafaufauga ona ua manatu ua popoto tele e mafai lava ona latou fofoina o latou faafitauli. Fai mai le 1 Korinito 1:25 “Auā o le valea o le Atua e sili lona poto i tagata; o le vaivai fo‘i o le Atua e sili lona malosi i tagata.” O le valea pe a le tatalo. 

E iai se aso ao ou laitiiti, sa ou taaalo soka ai i fafo o lo matou fale. E iai se taimi, sa ou kikiina le polo ma ua mau i le taualuga o le fale . Sa ou laitiiti lava ma ou te leiloa atu le polo. Na ou taumafai e faaaoga se laau e ta mai ai Ialo le polo, peitai ua le mafai. Sa nofonofo i tafatafa ane lo’u tama , ae ou te lei valaau iai mo se fesoasoani. Ina ua ou lelava lava, na ou fesili atu iai mo se fesoasoani au ua faapea mai, ‘na e vaai mai iai te au I lenei taimi atoa ae ete lei manatu e fesili mai ia te au mo se fesoasoani’. Na ia tu I l’uga ma e tasi lava le salo o lona lima ae pau mai I lalo. Sa ou manatu e mafai ona ou aumaia le polo i lalo, a ua alu  le taimi o atuatuvale a’o taumafai, ae semanu e na o le fesili lava I lo’u tama. E toatele tagata e atuatuvale gofie lava, e tamoe mai lea pou I lea pou,  e saili tali o faafitauli, e faigofie ona maua I le tulivae I le tatalo I le Atua. Na Foai atu e le Atua le siaki tupe ua tatala mo oe I le Ieremiah 33:3 “‘Ia e vala‘au mai ‘iā te a‘u, ‘ona ‘ou tali atu ai lea ‘iā te oe, ma ‘ou fa‘aali atu ‘iā te oe o mea tetele ma le faigatā, o mea ‘ua e lē iloa.”

‭

O lo’o ou faaaogaina lau siaki tupe ua tatalaina i so’o se avanoa ma o lo’o tali pea le Atua ma faaali mai ia te au mea tetele ma le faigata ou te lei iloa. E amata loa ona faaaoga lau siaki tupe tatala ua saunia? O le valea pe a le tatalo, i le suafa o Iesu, Amene.