Samoan Devotional

OPEN HEAVENS

MATALA LE LAGI MO LE ASO TOFI 24 OKETOPA 2024

(tusia e Pastor EA Adeboye)

Manatu Autu: Fai se malologa (Take a break)

Tauloto -Tusi Paia– Salamo 23:2 ‘Na te ‘ave a‘u i le mea e i ai le vao mu‘a ‘ou te ta‘oto ai; na te ta‘ita‘i ‘iā te a‘u i tafatafa o vai e tafe lemū'

Faitauga – Tusi Paia – Kenese 2:2-3

Na malolo le Atua i le aso fitu i le vaiaso o le foafoaga e fai ma faataitaiga iai tatou. Na ia faapea mai i le Esoto 23:10-11 e tatau ona totoina fanua mo le ono tausaga ona faamalolo lea i le tausaga lona fitu. E tatau lana ona fa’aavanoa se taimi e fai ai se malologa ina ia faafouina pea lo tatou malosi ina ia tatou matua lelei i le faatinoina o galuega ua ia valaau iai tatou e faatino. 

O nisi ua mama’i ona e seāseā faaavanoa taimi e malolo ai. O nisi tagata o loo galulue mo le tele o tausaga e aunoa ma le faia ni malologga po’o tafaoga i ni nofoaga ese. O le tulaga latou le o malamalama ai, o le faia o malologa mai galuega ma tafafao e fesoasoani iai latou e faamalosia le malosi ma siitia le faatinoina o galuega pe a toe taliu mai. I le 1 Tupu 19:1-8, i le faatoa maea ona valaau Elia i le lagi ona paū lea o le afi ma ua iai le faaolaolaga i le nuu, na ia faalogo ai lea o lo’o saili Iesepela e fasioti ia te ia, ona ia sola ese ai lea ma le fefe. E o’o atu i lalo o le laau, ua vaivai, ma i lona tulaga lea, na ia valaau i le Atua e fasioti ia te ia. Ua silafia e le Atua e le o moni lona fia oti, ae e manaomia e ia le malologa. Na ia faia ia moe Elia ma ia auina faalua mai lea agelu e aumai ana meaai. Ina ua maea ona malolo ma ai lelei, ua faamalosia lona tino ma faaauau ai le galuega mo le isi fasefulu aso. E iai taimi o le mafuaaga ua e fememeai ai ona e lei faia sau malologa mo se taimi umi. Tago e faataitai le na o le moe ma le ai mo se aso e tasi, ona e iloa lea o le eseesega. 

O le faia o se malologa e le taugata. A leai sau tupe e te malaga ai ma nofo i se faletalimalo, e mafai ona e alu i se fale o se tou aiga poo se nofoaga filemu e te iloa e leai seisi e faalavelave ia te oe, e te malolo lelei ai. E tatau ona e malolo i vaiaso uma ma tausaga uma aemaise pe afai e mamafa galuega, e pei o Elia i le 1 Tupu 18. Tusa po’o le a lou faau’uina, a’o e soifua i le tino nei, e tatau ona faaavanoa sou taimi e fai ai sau malologa. E pau le mafuaaga e mafai ai ona ou faia le Sauniga o Agaga Paia  i masina uma ua toeitiiti atoa nei le 40 tausaga, ona e fai ma faia au malologa pe a manaomia. A maea polokalame tetele e faasolo i le vaiaso atoa, ou te faaavanoa lelei le taimi ou te matua malolo lelei ai. Aua e te faatali i le fomai e faatonu ma faamalosia lou malolo i se ma’i taoto aua e oo atu iai ua tele lona taugata ma leai sau mea e mafai ona toe faia aua o le a umi atu le taimi e te malolo ai i lo le taimi o lo’o e manao ai. E lei faia e le Atua lou tino e galue faasoloatoa. Fai ma fai sau malologa, I le suafa o Iesu, Amene.    

OPEN HEAVENS

MATALA LE LAGI MO LE ASO LULU 23 OKETOPA 2024

(tusia e Pastor EA Adeboye)

Manatu Autu: Va’aiva’ai manino  (Focus)

Tauloto -Tusi Paia– Faataoto 4:25 “Ia va‘ai sa‘o ou mata i ou luma ma ou laumata, ‘ia fa‘asagatonu ia i ou luma.”

‭

‭‭

Faitauga – Tusi Paia –Kolose 3:1-3, Eperu 12:1-2

I le 2 Tupu 2:10, e pei o loo faapea atu Elia ia Elisaia, ‘Atalii, ua e ole mai I se mea faigata e lē mafai ona ou avatua, peitai e mafai e le Atua. Pau a o lea, aua nei taitaiseseina oe, ae ia vaai manino’. Fai mai le Eperu 12:1-2 ia tatou tuuese o mea m’amafa uma ae ia vaavaai ia Iesu. Ia vaavaai manino. 

E taumafai le tiapolo e tuu mea mamafa I ou luga e faalavelave ia te oe, peitai e tatau ona e vaavaai manino. E ono faitioina oe e tagata, pelogia oe ma faia tala e tetee ai ia te oe, peitai e tatau ona manino lau vaai. I ni tausaga ua leva, sa faitioina a’u e tagata I soo se vaega. Na ou le amanaiaina I latou ae na ou vaavaai manino I le Atua ma le galuega na ia valaau ia te a’u ou te faia. I le alofa tunoa  o le Atua, o loo ou laalaa pea I luma ae ou te leiloa po’o fea o iai le toatele lea na faitio. 

O mea mamafa uma e taumafai le tiapolo e faalavelave ai ia te oe e le gata e faaaoga ai tagata e inoino ia te oe, ae faaaoga ai foi tagata e alolofa ia te oe. Mo se faataitaiga, o le latou viia o oe, o se mea mamafa e tatau ona e tuuesea Ina ia aua nei avea ma faalavelave. 

Sa iai se tamaloa na ia faaita I le tupu ma sa tatau ona faasalaina i le oti. Peitai na manatu le tupu e tago e fai sana suega. Na fai iai le tupu e na te la’uina vai i se sipuni ma savali mo ni mita. A masa’a sina mataua o le vai, o le a fasiotia o ia. Na faatonu lea e le tupu tagata i lona itu tauagavale e faitio ma lafo upu fai fai ia te ia. Na ia faatonu tagata I le itu taumatau e alalaga e viia o ia seia oo I le tini. Na amata ona savali lenei tamaloa ae faia e tagata mea na faatonu ai e le tupu i lo latou malosi atoa. Na oo lenei tamaloa I le tini e aunoa ma le masaa o se mataua o le vai. Na fesili le tupu, ‘ o ai o le vaega lea e lua na fesoasoani ia te oe Ina ia e manumalo? Na ia tali, e leai ma seisi’, sa ou tauaveina lo’u ola  I o’u lima, o le mafuaaga lea ou te lei faalogo ai iai latou’.

Le au pele, o loo e tauaveina lou ola I ou lima, aua nei e faatagaina seisi e faalavelave i le manino o lau vaai. Tuu ese avega mamafa uma o loo faaaoga e le tiapolo e faalavelave ai ia te oe, taulai ma le manino lau vaai ia ausia faamoemoega manuia a Le Atua mo lou ola, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 22 OKETOPA 2024

(tusia e Pastor EA Adeboye)

Manatu Autu: E tatau ona e tau ma finau  (You have to Wrestle)

Tauloto -Tusi Paia– Kenese 32:28 “Ona fa‘apea mai lea o ia, “E lē toe ta‘ua lou igoa o Iakopo, a o Isaraelu, auā e pei o se ali‘i ‘ua e finau i le Atua ‘atoa ma tagata, ma ‘ua e manumālō.”

‭‭

Faitauga – Tusi Paia –Kenese 32:24-29

E iai se lesona e mamana mai le 2 Tupu 2:1-15 ou te manao e te mataitū lelei. Na avatu e Elia se tapulaa ia Elisaia ia faatino ona maua lea o le faalua o le mana o Elia e ui na tele tausaga o auauna ai ia Elia. Ana le usitaia  e Elisaia le tapulaa lea, semanu e leai ma se mea na te maua I le taimi na tuua ai e lona tamā o Elia o ia. E toatele tagata e manatu a faamanuiaina e se tagata o le Atua e mamana, ua lava lea e avea ai I latou ma tagata maoae. Ioe, e mamana le faamanuiaga, ae a le tau ma finau le tagata ina ia ona maua lona tulaga maoae, e tulaga tutusa lea tagata ma isi. E ono faia e lou tamā nisi mea mo oe, peitai e iai lava mea e tatau ona e tau ma finau ai lava oe ma faia pe a e manao e te maua ia vaega. 

I le Kenese 27:26-30, na faamanuia Isaako ia Iakopo i faamanuiaga e le mafai ona toe suia e seisi. E mautinoa o le a avea o ia ma tagata maoa’e, peitai na ia tau ma suia lona igoa ua saunia ai o ia e maua le manuia o faamanuiaga na ia maua( Kenese 32:1-30). E toatele fanau a tagata mauoa e manatu, ona e mauoa o latou matua, e le taitai ona oo I le mativa. A e lē tau ma finau ia maua lou tulaga maoae, e te ono faamaimauina tofi ma oloa ua tuuina atu ia te oe. O nisi o fanau a faifeau e manatu ona o latou matua e faauuina, o le a le mafai ona pa’i iai le tiapolo ma e mautinoa latou te maua le lagi. Peitai, fai mai le Esekielu 18:20, o le agaga e agasala e oti lea. Afai o e ola i le agasala, e le mafai e le amiotonu poo le faauuga a lou tamā ona puipui ai oe. E tatau ona lua fetaiai ma le Atua mo oe lava ma atinae le lua mafutaga ma ia, pe afai e te fia maua le fiafiaga o manuia o tauave e lou tamā. 

Ana leai Pa Josiah Akindayomi, semanu e te le iloa poo ai Adeboye I le asō. Ou te faafetai lava I le Atua ona na ou faaolaina ao ou iai I totonu o le Ekalesia Redeemed Christian Church of God. Na aumai a’u e le Atua I se Ekalesia na fai feagaiga ma le Atua ma na ou savali i lena feagaiga, ua afua ai lou tagata i le asō. Peitai, e ui na iai le fegaiga, ana ou le tau ma finau , semanu ou te lē manumalo. Sa ou anapogi, tatalo, faia mafutaga masani ma le Atua ma galue malosi. Na ou faia taulaga ma o loo faia pea I le asō ona ou te lē manao e maumau le feagaiga pe afai ou te lē tau ma finau. Le au pele, afai e te fia tofo I faamanuiaga ua faia e le Atua e fesoasoani ia e manuia, sauni e te tau ma finau ia e maua. Aua  ete malolo pe afai ua e maua sina manuia, tau ma finau Ina ia e faaaogaina lelei mo lou manuia faulai, I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 21 OKETOPA 2024

(tusia e Pastor EA Adeboye)

Manatu Autu: Luitau o taunuuga manuia 3 (The challenges of success 3)

Tauloto -Tusi Paia– Luka 6:26 “Oi talofa ‘iā te ‘outou pe a tautala lelei tagata uma ‘iā te ‘outou! auā sa fa‘apea lava ‘ona fai e o latou tamā i perofeta pepelo.”

‭‭

Faitauga – Tusi Paia –Galuega 12:1-3, Galuega 12:21-24

O le a faaiu atu I le asō le tatou aoaoga i luitau pe a ausia taunuuga manuia i le vaavaai lea i le faaosoosoga o le fiafia i viiga a tagata ma lē faafoia le viiga i le Atua. A e ausia taunuuga manuia, o le a faateleina ou viiga e tagata ma e ono latou viia oe i galuega e te le’i faia. Mo se faataitaiga, Ina ua maea ona fasiotia e Tavita ia Koliata, na pepese fafine o le nuu faapea, ‘na fasioti e Saulo le toaafe, a’o Tavita e sefulu afe’, e ui o loo manino o le Atua na avatu le manumalo ia Tavita e faatoilalo Koliata. Na oo ai faigata ia Tavita i lo la va ma Saulo ma ua saili Saulo e fasioti ia te ia ( 1 Samuelu 18:6-9). 

Mataala i viiga a tagata. E iai taimi ua le mafai ai ona e taofia, ae pau o lea, aua nei e amanaiaina aua o le taimi e te amata ai, e te ono faalogoina ua pei ua e nofo i le vaega pito i luga o le lalolagi, ma e le umi ae e faoa le viiga e tatau ona ave i le Atua. O viiga a tagata na oo atu ai Herota i faafitauli ma ua ‘ati olaina o ia e anufe ‘ua oti ai i luma o tagata o loo vivii ia te ia (Galuega 12:22-23). 

O viiga a tagata e ono matua e fiafia ma avea o se masani ua e naunau e faalogo iai i taimi uma. Na naunau le tupu o Saulo e faamalieina tagata ona ia latou viia ai pea o ia, ua oo lava i le tulaga e lē usitai ai i le Atua (1 Samuelu 15:24). A e ausia tulaga manuia, o le a viia oe e tagata e pei ua e tulaga sili i le lalolagi atoa. Ia e mataala ma malamalama, o le taimi e avea ai ma masani ia te oe le faalogo i viiga a tagata, ma taitaia oe e faia mea I fafo o le finagalo o le Atua, e vave ona e iloa, o oe ua na o le palapala poo le efuefu. 

Sa iai se tagata e maualuga lona tulaga e pei o lo’u tamā faaleagaga o Pa Josiah Akindayomi i nā aso. Peitai ua ia faatagaina viiga a tagata e oo I lona ulu ma ua ia alu ese ma le Ekalesia ma avatu faatasi ma se vaega tele o le Ekalesia. E oo atu i le taimi na maliu ai, e le atoa se toa limasefulu a lana aulotu. Fai mai le 1 Korinitino 10:11, e iai mea e tutupu i tagata e a’oa’oina ai i tatou. Aua e te faalogo i viiga a tagata, e ono taitaiina ai oe e faia mea e te ono salamō ai pe afai e te lē faaeteete. Ia manatua, o i latou o lo’o alalalaga ‘osana’ i le asō, e ono liliu mai ma faapea mai a taeao, ‘faasatauro’. O viiga a tagata e le tatau ona e faatuatuaina aua ua latou faaumatia nisi i taimi ua tuanai, aua nei faaumatia ai oe, I le suafa o Iesu, Amene. 

OPEN HEAVENS

MATALA LE LAGI MO LE ASO SA 20 OKETOPA 2024

(tusia e Pastor EA Adeboye)

Manatu Autu: Luitau o taunuuga manuia 2 (The challenges of success 2)

Tauloto -Tusi Paia– Faataoto 14:20 “Ua ‘inosia lē ‘ua mativa i lē la te tuā‘oi; ‘ae to‘atele o ē alolofa i le mau‘oa.”

‭

Faitauga – Tusi Paia –Faataoto 19:4-7

O ananafi na amata ou talanoa atu ai I luitau o taunuuga manuia ma na amata atu i le faamaualuga. O le asō o le a ou talanoa atu i leisi luitau o taunuuga manuia, o le tulaga moni i le fia uo uma o tagata i ē ua mauoa ma manuia. A e ausia tulaga manuia, o le a toatele tagata i lou siomaga, ma o le a faigata ona e iloa tagata e lelei le mafuaaga e fia uō ai ia te oe mai tagata e faalēlelei. 

O le taimi e te ausia ai tulaga maualuga, o le a toatele tagata e fia uo ia te oe. O le mafuaaga tonu lea  e tatau ai ona tu’u lou faatuatua I le Atua ae lē o tagata. E faia e nisi tagata mea uma ia pa’i i lou loto ona o mea e mananao e maua mai ia te oe. E te manaomia le meaalofa e te iloa ai agaga eseese, tagata o ni uo moni ma I latou e lē o ni uo moni. 

I le 2 Samuelu 13:4-5, na fautua e Ionatapa le perenise o Amanono e peiseai e alofa ia te ia. Na faatino e Amanono le fautuaga a lana uo. Ina ua oo mai puapuaga ona o le fautuaga leaga, e lei tulai mai Ionatapa e tu ma puipui i lana uo, ae na iai o ia I le vaega o tagata na logoina Tavita i le oti o Amanono (2 Samuelu 13:32-33). Na ia faapea atu I le tupu o Tavita, ‘Aua ne‘i manatu lo‘u ali‘i, ‘ua tāma‘ia taulele‘a uma o alo o le tupu, auā ‘ua na o Amanono ‘ua maliu’. Ana poto Amanono, e na te iloa mai le amataga o Ionatapa e lē o se uo moni. O uo moni e lē ioe i taimi uma i mea o naunau iai lou loto. E iai taimi e fai atu ai ‘leai’ ona e alolofa moni ia te oe. Afai e iai tagata e lē taitai ona ta’u atu ia te oe le mea moni, e lagolago ia te oe I mea uma, tusa pe ua e agai atu I le mea sesē, tamo’e ese mai na tagata. 

O le maualuga e te oo iai, o le tele lena o lou faaeteete I ituaiga tagata e te faatagaina i lou olaga. Afai e te lē manao e nofo toatasi ao siitia pea lou tulaga, ma manaomia le tele o uō, e te i’u ane I le toatele o tagata ma tulaga e lē lelei. E tatau ona to’alaiti au uo a’o siitia pea lou tulaga, e lē faapea e le o oe o se tagata e fiafia I tagata, ae ona o lenei, o le tele o tagata e manatu i mea e latou te maua mai ia te oe i lo mea e foai ia te oe. O lona uiga, e i’u I le toalaiti au uo ao faagasolo ma siitia lou olaga. Mo se faataitaiga, e toatele atu a’u uō ae lei avea a’u ma taitai aoao o le Ekalesia. 

Le au pele, ou te tatalo ia tuuina atu e le Atua le alofa tunoa e te iloa ai uo moni mai luko feai o loo oofu I ofu mamoe. 

Tatalo

Tamā, faamolemole foai mai le agaga e iloa ai agaga eseese ina ia ou iloa ai a’u uō moni mai i ē e lē o ni uō moni, I le suafa o Iesu, Amene. 

OPEN HEAVENS

MATALA LE LAGI MO LE ASO TOONAI 19 OKETOPA 2024

(tusia e Pastor EA Adeboye)

Manatu Autu: Luitau o taunuuga manuia 1 (the challenges of success 1)

Tauloto -Tusi Paia– Hosea 13:6 ““E pei ‘ona fagaina o i latou, sa fa‘apea ‘ona mā‘o‘ona o i latou; sa mā‘o‘ona i latou, ona fa‘amaualulugaina lea o latou loto; o le mea lea na latou fa‘agalogalo ai ‘iā te a‘u.”

‭

Faitauga – Tusi Paia –Tanielu 4:25-35

E toatele tagata e galulue ia ausia taunuuga manuia ma e lelei lea tulaga. E toatele tagata ua faaumatia ina ua maua taunuuga manuia ona e lei saunia I latou I luitau e aumai faatasi ai. O le a faasolo atu I aso o sosoo atu nei, la’u faasoa I luitau e oo mai faatasi ma taunuuga manuia. E ono lē mafai ona ou faasoa atu uma luitau I lenei aoaoga faasolo, ae tauia ina maua se vaega o aoaoga e saunia ai oe mo taunuuga manuia, auā e te maua taunuuga manuia I le i’uga I le suafa o Iesu. 

O le luitau muamua o taunuuga manuia o le faamaualuga. I le Kenese 48:1-20, o faamanuiaga o le ulumatua na avatu ia Efaraima e lona tama, ma o le iuga, ua sili atu manuia o Efaraima i lo Manase. Ona oo atu le o le faamaualuga ia te ia, ma na aioi le Atua ia te ia ae le faalogo. I le Hosea 4:16-19, na fetalai le Atua ia aua nei toe faalavelave seisi isi ia Efaraima. E oo atu I le Hosea 5:9, na fetalai le Atua o Efaraima o le a faatafunaina. I le Faaaliga 7:5-8, ina ua faamaufaailogaina ituaiga o Isaraelu, ua le o toe taua ai Efaraima. O le faamaualuga na maua ina ua ausia taunuuga manuia e Efaraima, ma na iu ina faaumatia ai o ia. 

Fai mai le Faataoto 16:18 “E muamua le fa‘amaualuga i le malaia; e muamua fo‘i le loto fa‘asiasia i le pa‘ū.”

O I latou e maualalo tulaga e le fefefe i nei pauū. O le maualuga e te a’eina, o le tele foi lena o lou faaeteete ina nei e paū, o le faaeteete lena e taitaiina oe e faamaualalo pea, a’o siitia lou tulaga. 

Fai mai le Iakopo 4:6 “A ‘ua foa‘i mai e ia le alofa tunoa e sili; o lea ‘ua fa‘apea mai ai, “E tete‘e atu le Atua i ē fa‘amaualuga, ‘ae foa‘i mai le alofa tunoa i ē fa‘amaulalo.”

‭

Na pau le auala na mafai ai ona e ausia taunuuga manuia ona o le alofa tunoa o le Atua. A e faamaualuga, e aveesea e le Atua lona alofa tunoa ma o le taunnuga o le faamāina. Aua e te faia se mea e teena ai oe e le Atua, aua nei e faatagaina le faamaualuga i lou loto. Ia e faia mea uma ina ia faamautinoaina e te lē manatu e te taua atu I Isi tagata. Aua e te vaai maualalo I isi tagata, ma aua e te manatu ua e maualuga tele i lo se mea e fia faia. Ia faamanatu pea ia te oe le Mataio 20:26-28 o le tagata e fia sili ‘iā te ‘outou, ‘ia fai o ia ma a ‘outou ‘au‘auna.

‭‭

Na faaalia e Iesu Keriso le faataitaiga mo i tatou o le auauna loto maualalo i le Ioane 23:1-17. Na ia faaalia manino mai foi, o le auala lea e maua ai le tulaga sili i le malo o le Atua (Luka 22:24-27). Le au pele, ia saili e auauna atu I isi i lo le naunau e auauna mai tagata, ina ia siitia ai pea oe e le Atua. Tusa poo le a le maualuga e siitia oe iai e le Atua, aua nei faatagaina le faamaualuga i lou loto, i le suafa o Iesu, Amene. 

OPEN HEAVENS

MATALA LE LAGI MO LE ASO FARAILE 18 OKETOPA 2024

(tusia e Pastor EA Adeboye)

Manatu Autu: Folafola le lelei I luga o lau fanau (Decree good over your children)

Tauloto -Tusi Paia– Mareko 10:16 “Ona si‘itia lea e ia o i latou i ona lima, ‘ua fa‘ae‘e fo‘i ona ‘a‘ao i luga ‘iā te i latou, ma fa‘amanuia ‘iā te i latou.”

‭

Faitauga – Tusi Paia –Kenese 27:18-33

Fai mai le Iopu 22:28 “O le mea fo‘i ‘e te filifili e fai, e fa‘atumauina lea mo oe; e pupula fo‘i le malamalama i ou ala.”

Fai mai le fuaitau i luga, so’o se mea e te filifili ma folafola e fai, e faatumauina lea mo oe. O lona uiga ia e faaeteete I mea e te folafolaina aua e taunuu. O le mea lea ou te popole ai lava i mātua e so’ona lafo upu lē lelei i luga o latou fanau. Fai mai le Faataoto 22:15, ‘Ua fusifusia le valea i le loto o le tama’, Ou te iloa e iai tamaiti e ulavavale, peitai o le auala e te faia ai nei tamaiti e fua iai le taunuuga o latou lumanai pe lelei pe ua atili ai le leaga. 

I lou tulaga o le matua, o a mea e te faia pe a vaai atu I amioga o lau fanau? E te faia ni folafolaga lē lelei e pei o le ‘matua leai ma sou aoga, ailoga e te i’u I se lelei’ pe e te faia se folafolaga lelei e faapea, ‘o le a  avea oe ma faailoga ma le ofoofogia, e le afaina poo a mea a le tiapolo e faia, e te manuia ma manumalo’. Poo le a lava lau folafolaga e faia, e taunuu. E iai le mana i lou laulaufaiva ma e malosi tele lona mana I luga o lau fanau ona na fananau mai I lenei lalolagi mai ia te oe. I lou tulaga o le matua, ua tuuina atu e le Atua le mana ia te oe mo le lumanai o lau fanau, e le faapea e te faaumatia ai I latou, ae ia e faafaileleina I latou I le tulaga o loo naunau le Atua ia latou maua. 

I le faitauga o le Tusi Paia o le asō, na sau Iakopo is Isaako ona ia maua lea o lona faamanuiaga. Ina ua alu ese, na sau ai Esau, ma na ta’u iai e Isaako ua maea ona ia faamanuia ia Iakopo ma e manuia o ia. O soo se mea e te folafola I luga o lau fanau, aemaise le taimi o loo e ita ai, e taunuu lava. Ina ua maua e Iakopo le faamanuiaga ma ua solasola solo, na la fetaiai ma le Atua i le Kenese 28:12-22 ae leai ma se faapea mai o le Atua na faitogafiti Iakopo. E lei faapea mai, ‘Ona na e faia le togafiti i lou uso, ma o le a maua le taui’. Na ou faapea e otegia nei Iakopo, peitai na faatumauina e le Atua le faamanuiaga na maua mai lona tamā. 

Le au pele, faamolemole folafola mea lelei i luga o lau fanau. Pe faatigā ia te oe pe leai, ia e manatua o mea uma e te folafola mo latou, e taunuu. Aua e te faia se upu e lē lelei mo latou aua e te ono salamō ai I se aso. E te tali mo soo se upu na e folafola I lau fanau ma o le taunuuga o latou olaga e atagia ai foi oe. Tautala ma folafola faamanuiaga I luga o lau fanau I taimi uma ma ia e faaeteete I folafolaga e te faia I luga o lau fanau, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 17 OKETOPA 2024

(tusia e Pastor EA Adeboye)

Manatu Autu: O lou Tamā Fa’aleagaga(Your Spiritual Father )

Tauloto -Tusi Paia– 1 Korinito 4:15 “Auā e ui ‘ina to‘amānō o ta‘ita‘i tamā ‘iā te ‘outou ‘iā Keriso ‘ae peita‘i e lē to‘atele o ‘outou tamā; auā na ‘ou fānaua ‘outou i le tala lelei ‘iā Keriso Iesu.”

‭

Faitauga – Tusi Paia –1 Tupu 19:19-21

E toʻatele tagata e lē faamamafaina i o latou mafaufau po’o ai lo latou tamā faaleagaga. Fai mai nisi tagata e toatele o latou tama; o nei tagata e leai ni o latou tamā, aua e leai se tagata e mafai ona sili atu i le tasi sona tama. E tāua tele le matafaioi a lou tamā faaleagaga i lou olaga. E ui lava ina sa faapea atu Elia, ia Elisaia, lona atalii faaleagaga, e faigata le mea ua ole mai ai, ae sa ia talosaga atu i le Alii ia maua e Elisaia le faalua o lona agaga ( 2 Tupu 2:9-15 ). O se faaaʻoaʻoga lelei lenā o le matafaioi a se tamā faaleagaga e faia i le olaga o se tagata.

Afai e te faapea mai o loo i ai lou tamā faaleagaga, e tatau ona e aumaia ni faamaoniga o lenei mau. Afai e te lē usiusitai i lou tamā faaleagaga, e lē o oe o sona atalii moni, ma e lē mafai ona e mauaina ni faamanuiaga sa e faamoemoe e maua mai iā te ia. E tausia e le fanau o latou mātua. Afai e te le’i luluina se mea e pei o auaunaga ma ni oloa I le olaga o lou tamā faaleagaga , e le amanaiaina e le Atua lena mafutaga. Fai mai le 2 Tupu 3:11, o Elisaia na ia liligi le vai i lima o Elia. O le faamaoniga lena o le mafutaga a le tamā ma le atalii, ma agavaa ai Elisaia e maua le  faalua o le agaga o lona tamā.

I se tasi po, a o o’u savali ma tatalo, na matou feiloai ma nisi tagata ua talosaga mai matou te tatalo faatasi. Ina ia aua nei faalavelave i taimi o a’u talosaga, sa na ona ou fai atu ia i latou, “Ia faamanuia outou e le Atua.” A’o faaauau la’u savaliga, sa iai se tagata avepasi na iloa mai a’u, ona ia faatuina lea o lana pasi. Sa ia tago i le tupe sa ia te ia i le pasi, tamo’e mai ma tu’u mai ia te au. Ina ua ou fai atu ‘ia faamanuia lava le Atua ia te oe’; I lena taimi, ua sau mai le ta’ele o lo’u loto. E lē telē se tupe na ia aumaia, ae na ia faaalia o aʻu moni lava o lona tamā, ma ia maua se mea mai ia te a’u. Ina ua fai atu Isaako iā Esau e sauni se meaʻai mo ia, e lē ona o lona fia ʻtausami, pe ua lē gafatia ona ia fafagaina o ia lava, ae na ia fai atu i le tauleʻaleʻa, “Ia e faia se galuega lelei mo a’u, ina ia ou faamanuia atu iā te oe mai le taele o lo’u loto.” E iai faamanuiaga e sau mai le loto o lou tamā, e lē mafai ona toe suia, e pei ona tatou vaaia i ai i le Kenese 27:33-37 .

Ia e matuā naunau e faia mea uma e fiafia ai lou tatou tamā faaleagaga, e faamanuia ai ia te oe, tusa pe o le mea e te ole atu ai  e sili atu I lana pule, e na te tatalo i le Atua e foaʻi atu ia te oe. Ia e faia se meaalofa faapitoa mo lou tamā poo lou tinā faaleagaga i le asō, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 16 OKETOPA 2024

(tusia e Pastor EA Adeboye)

Manatu Autu: O oe I le Lumanai (The Future You)

Tauloto -Tusi Paia– Teuteronome 4:9 “Tau ‘ina fa‘aeteete oe ‘iā te oe, ma ‘ia e matuā fa‘aeteete lava ‘iā te oe, ne‘i galo ‘iā te oe nei mea na iloa ai e ou mata, ne‘i te‘a ‘ese ai lou loto i aso uma o lou olaga, a ‘ia e fa‘ailoa atu i lau fānau, ma le fānau a lau fānau;”

‭

Faitauga – Tusi Paia –Teuteronome 6:6-7

Tusa poo le a lou taumafai malosi, e le mafai ona e ola e faavavau. E pau le ala e te ola ai I leisi augatupulaga o lau fanau. O le mafuaaga lea e tatau ai ona e fa’afailele ma a’oa’o lelei lau fanau. 

E tele ni vaega ua aoaoina ai mai lenei olaga, o nisi vaega o mea sese na faia I aso ua tuanai. E tatau ona e faamautinoaina, o lau fanau e tuua pe a valaau le Atua ia te oe, ua aoaoina lelei ina ia aua nei o latou faia mea sese na e faia. A faia e lau fanau mea sese na e faia, o lona uiga, e lei lelei le faia o lau galuega e aoaoina I latou. A faapea na latou amata mai i le tulaga na gata ai au mea sese, e le tatau ona latou fai au mea sese. Afai o oe o se tamā e te lē manao e sili atu mea e ausia e lau fanau i lo oe, o lona uiga e te oti faatasi ma lou tulaga maoa’e. O Aperaamo o se tagata maoae ma mamalu, ae na sili atu le maoae o Isaako lona atalii, ae na silisili atu la le maoae o Iakopo le atalii o le atalii, o le faasologa tonu lena e tatau ona iai. 

I le tele o tausaga talu ai, ae lei foai mai e le Atua sa’u vaalele, na faatau e se tasi o la’u fanau sana vaalele, na faitioina a’u e nisi ona sa ou faapaiaina I luma o le toatele, peitai e oo I se Mercedes ou te le maua. Na ou tali iai, ‘o le vaalelel a lo’u atalii, faaali mai se mea ua maua e sou atalii?’

E masani ona ou fai i la’u fanau e tatalo Ina ia aua nei vave ona aveese atu a’u, aua o le tulaga ou te gata ai e amata ai latou. O nisi o la’u fanau o lo’o faifeau nei i ni aulotu e tetele atu i le aulotu na ou vaaia I le taimi na avea ai a’u ma taitai aoao o le Ekalesia. 

O le toatele o tagata a faitau le Faataoto 13:22, e manatu o tofi e maua e na o tupe. Afai o oe o se tagata lelei, e te tofia mea mo fanau a lau fanau e sili atu i tupe, o le tofi maualuga e te tuua i lau fanau o le poto, e te tuua foi iai le pule, o le igoa tauoloa, o fanua ma fale ma isi faapena. O lona uiga e tatau ona e aoaoina lelei I latou o le a faaauaua atua I Le tulaga e te gata ai oe. E iai taimi e tatau ai ona e tuua mea o loo e faia ae a’oa’o lelei I latou aua e tatau ona e faaalu lou malosi i lou lumanai. 

E iai taimi ou te alu ai e ave lau fanau ma fanau a lau fanau I le nuu na ou ola ane ai, ina ia maua se taimi na o I matou. I taimi faapena, ou te faamatala ai ni tala, tali a latou fesili ma fiafia faatasi. O lo’o ou sauni e tuua se tofi lelei i lo’u lumanai. Talosia o lo’o e faia foi, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 15 OKETOPA 2024

(tusia e Pastor EA Adeboye)

Manatu Autu: Poto (Wisdom)

Tauloto -Tusi Paia– Faataoto 4:7 “O le poto o le mea sili lea, ‘ia maua le poto; o mea uma ‘e te maua ia maua mai ai le atamai.”

‭

Faitauga – Tusi Paia –Faataoto 1:20-33

O le tauloto mai le Tusi Paia o le asō o loo faapea mai, e tatau ona e saili I le poto. I nisi faaupuga, o le poto o le mea pito sili ona lelei e te maua. E iloa foi i le faitauga o le Tusi Paia o le asō o loo faapea mai “O lo‘o ‘alaga le poto i fafo; ‘ua leo tele i malae.”(Faataoto 1:20). 

Peitai, e toatele tagata o loo tutuli I latou i le alaga a le poto ona e le mananao ai. O tagata e le faalogo i le alaga a le poto, e puapuaga i le valea, ma e ono latou te iloa ane mulimuli, ae ua tuai. Ae o tagata latou te faataga le poto e liligi ane lona agaga I luga o I latou ma a’oa’o I upu, e tatala le faalogo ma e faamanuiaina lava. 

Ou te iloa lelei o loo e fesili ia te oe lava, ‘e faapefea ona ou maua le poto?’ Fai mai le Salamo 111:10 o le matau i Le Alii o le amataga lea o le poto. Afai e te fia maua le poto, o le tulaga e te amata mai ai o le matau i Le Atua, ona faatino ma ia faamaonia o lo’o e matau ia te ia. Fai mai le Faataoto 16:6 o le matau i le Atua o le alu ese mai le amioleaga. O taimi uma e faia ai e tagata le amioleaga, o lo’o latou faaalia le valea. Fai mai le Tanielu 2:20-22, o le Atua na te foai atu le poto i e popoto. Afai e leai se mafutaga vavalalata a le tagata ma le Atua, e le mafai ona ia maua Le poto.

Fai mai le Iakopo 1:5 “‘Ae ‘āfai ‘ua leai se poto i so ‘outou, ‘inā ole atu ia i le Atua, o lē foa‘i tele mai i tagata uma ma le lē toe ta‘uta‘ua, ‘ona foa‘iina mai ai lea ‘iā te ia.”

‭‭

O le auala muamua e maua ai Le poto o le Matau I le Atua ona ole atu lea mo Le poto. E faigofie faapena. O lenei, ona o Le poto o le faatinoina o le atamai, o le tapulaa o lou poto e gata i le mea o loo gata ai lou atamai. A’o e ole atu I Le Atua mo le poto, e tatau foi ona faaopoopo lou atamai ina ia faatupulaia ai pea lou poto. O le mafuaaga lea ou te toaga ai e faitautusi. Ou te fia iloa se mea fou I aso uma, tusa pe ou te fesili I se tagata e aoao mai. 

Le au pele, o le poto o le mea pito sili lea. O Iesu Keriso o le poto o le Atua( 1 Korinito 1:24) ma e tatau ona e talia o ia e avea ma ou Alii ma Faaola pe afai e te fia maua le poto. 

Tatalo

Tama, faamolemole foai mai le poto ia te a’u, I le suafa o Iesu, Amene. 

‭‭