Samoan Devotional

OPEN HEAVENS

MATALA LE LAGI MO LE ASO TOONAI 2 Novema 2024

(tusia e Pastor EA Adeboye)

Manatu Autu: Faalogo mai i le Atua (Hearing From God).

Tauloto -Tusi Paia– Isaia 30:21 “E fa‘alogo fo‘i o ‘outou taliga i le ‘upu i o ‘outou tua, pe a ‘outou afe ane i le itū taumatau pe afe ane i le itū tauagavale, e fa‘apea mai, “O le ala lava lenei,” ‘ia ‘outou sāvavali ai.”

Faitauga – Tusi Paia – Ioane 10:2-5

O le faalogo e tāua tele i tagata soifua uma. Mo se fa’ata’ita’iga o le taimi lava e te faalogo ai i le leo o le pu o se taavale i ou tua, e te iloa ai ua tatau ona e alu ese ma le auala. E le gata i le faalogo I le tino, e taua tele fo’i mo le au uso le mafai ona o latou lagonaina le siufofoga o le Atua e pei ona tatou iloa i le upu tauloto o le asō.

Ona o a’u sa a’oga faa tagata faapitoa i le Matematika, o iina na o’u a’oa’oina ai le sailiili loloto i mea e lē o manino mai pe iloa gofie. Fa’ata’ita’iga, e toatele Kerisiano e misi e i latou le mea moni o Elisaia ma Elia sa talanoa i laua a o savavali faatasi i le Tusi, 2 Tupu 2:11. Ina ua o’u su’esu’ea le fuaiupu lea, sa ou manatunatu poo le a se autū na o la talanoa ai. E lē gata i lea, a o le tusi o Tanielu 3, ina o i ai faatasi tagata Eperu e toatolu ma le agelu na toafa ai i latou i totonu o le afi, poo ā a latou tala sa fai. O le a se mataupu na talanoa ai Iesu iā Mose ma Elia i le Tusi o Mataio 17:1-9? O le a se tāua ua omai ai i laua mai le lagi e faasoa ai ma Iesu? I le 2 Korinito 12:1-4, fai mai Paulo na faalogo o ia i upu e lē tatau i se tagata ona tautala i ai. O a ia upu? I le Tusi o Faaaliga 10:4, na faalogo Ioane i ni leo ma ia mana’o e tusia i lalo, peita’i na fai atu le agelu iā te ia aua ne’i ona tusia ia mea; tau lava o lona faalogo i ai. O le a se leo na ia faalogoina? Ua matua’i o’u fia iloa lava nei fetalaiga ma le tele o isi talanoaga ua tāua.

Na faia e le Atua le lalolagi i upu. O Upu e mamana tele, aemaise pe afai e mai i le Atua. Fai mai le Tusi Paia; o le fa’aalia mai o ana Afioga Paia e faamalamalamaina ai; e faalotomatalaina ai e ua faigofie (Salamo 119:130) E lē mafai ona avea oe o se kerisiano manumalō pe afai e te lē lagonaina le siufofoga o le Atua. O loo a’oa’o mai le Tusi Paia afai e te talitonu, ona e iloa lea o le mamalu o le Atua (Ioane 11;40). Peita’i, o le faatuatua lenei e tupu i le faalogologo i le Upu a le Atua (Roma 10:17). Fai mai le Salamo 107:20; “Ua ia auina atu lana Afioga, ma fa’amalolō ia i latou, ma laveaiina ai nai lo latou malaia.” O le fesili, e faafefea ona e talia le upu a le Atua?

Ina ia e maua le Upu a le Atua, fa’amautinoa e leai se mea e faalavelave ia te oe ma ia faalogo toto’a i lana Upu. Alu ese mai mea fa’asalāvei, ina ia e lagona lelei le feau tonu o finagalo le Atua e ta’u atu ia te oe i lea taimi. Ia faapea fo’i ona e tatalo ia tatala e le Atua ou taliga fa’aleagaga ina ia e malamalama ai i le feau.

I le Faaaliga 2;29, fai mai le Tusi Paia o lē ua i ai taliga ina faalogo mai ia o ia i le mea ua fetalai mai ai le Agaga. O loo i ai ou taliga fa’aleagaga, fa’amautinoa e lē tutuli i latou i mea o fetalai mai ai le Agaga o le Atua ia te oe i so’o se taimi.

Tatalo

Tamā faamolemole tatala o’u taliga fa’aleagaga ma ia o’u lagonaina lou siufofoga e lē aunoa, I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 1 NOVEMA 2024

(tusia e Pastor EA Adeboye)

Manatu Autu: O le mealilo o le tatou faatuatua (The mystery of our faith)

Tauloto -Tusi Paia–Mataio 18:3 “ua fa‘apea atu, “E moni, ‘ou te fai atu ‘iā te ‘outou, a lē liua ‘outou ma ‘avea ‘ia pei o tamaiti, tou te lē sao lava i le mālō o le lagi.”

‭‭

Faitauga – Tusi Paia – Mataio 18:1-5

O le savaliga a le kerisiano e ese mai lava i isi. Auā foi o le kerisiano e faamoemoe lava i le mafai o le tagata ona talitonu ma faatuatua. O le mafuaaga lea e ta’ua ai o le au faatuatua. E ono faapea mai se saienisi, ‘faaali mai ia te a’u ona ou talitonu lea’, peitai I le faa kerisiano, o loo faapea mai le Atua, ‘faatuatua mai ona faaali atu lea’. O le mealilo lea o le faa kerisiano. 

I le au lē faatuatua, o le tatou faatuatuaga, o le faailoga lea o tagata kerisiano e lē popoto. Aua foi e lē mafai e le tagata ona faavasega ma malamalama I mea o le Agaga o le Atua (1 Korinito 2:14). Peitai I le 1 Korinito 1:27, fai mai ‘ua filifilia e le Atua mea vālea a le lalolagi, ‘ina ‘ia fa‘amāina ē popoto’. Mo se faataitaiga, e lē mafai e tagata lē faatuatua ona malamalama pe a tatou faapea atu na fanau mai Iesu Keriso I se taupou. O le tele o taimi e latou te faapea, ‘e faapefea ona fanau mai seisi i se taupou?’. 

Na fetalai Iesu ma faailoa mai se feau taua I la tatou tauloto mai le Tusi Paia o le asō. Fai mai e na o I latou e avea ma tamaiti e latou te sao i le malo o le lagi. I nisi faaupuga, e tatau ona e talitonu ia te ia, e pei ona talitonu e le tamaititi so’o se mea e fai atu ai ona matua tusa pe malamalama ai pe leai. E toatele tagata e faia le mea sese o le taumafai e faavasega mea a le Atua. E le mafai ona faia aua e fai mai le Tusi Paia o ala o le Atua ma manatu o le Atua e matua sili ma maualuga atu I manatu ma ala o le tagata (Isaia 55:8-9). 

E iai tagata e faafinau I le faatuatuaga kerisiano e fua i mea e talafeagai. Aua e te faafinau ma na tagata aua e le mafai ona e faamatalaina e fua I mea e talafeagai. Na faatonu e Paulo ia Timoteo e aua le faafinau ma tagata e faatatau i le Upu moni, le upu a le Atua. 

O le auala e faaalia manino ai e moni le Atua, e le faia i se faafinauga ae o le faaalia o le mana o le Atua e pei o Elia I Le 1 Tupu 18. Fai mai le Aposetolo o Paulo I le 1 Korinito 4:20 “Auā o le mālō o le Atua e lē o i le ‘upu, a o le malosi.”

‭O loo faapea mai foi le Ioane 4:48, “……..Āfai tou te lē va‘ava‘ai i fa‘ailoga ma vāvega, tou te lē talitonu lava.” Tusa po’o a le malosi e te taumafai iai, e te lē manumaloima se tagata ia Keriso e ala I se faafinauga. A maea ona e talai atu le talalelei a Iesu Keriso i se tagata lē faatuatua , tuu atu I latou I le Atua aua na o Agaga Paia e mafai ona pa’i I o latou loto ma liliuina. Aua e te finau mai I latou i lou faatuatuaga kerisiano, ae ole atu I Le Atua ia faaaogaina oe I faaaliga ma mea ofoofogia, ma afai latou te iloa atu le mana o le Atua, e lafoai o latou ola ia Keriso e aunoa ma se faafinauga. 

Le au pele, ou te tatalo ia iloa ma faaalia le mana o le Atua i Lou olaga ma ia ona faaaaogaina oe e taitaia tagata I lona malo, 

Tatalo

Tamā, faamolemole  faaaoga a’u e faailoa ai lou mana ina ia ou manumaloina la’u augatupulaga mo oe, I le suafa o Iesu, Amene. 

‭

OPEN HEAVENS

MATALA LE LAGI MO LE ASO TOFI 31 OKETOPA 2024

(tusia e Pastor EA Adeboye)

Manatu Autu: Tulai ma tumau (Stand firm)

Tauloto -Tusi Paia– Efeso 4:14 “Ina ‘ia lē toe tama nini‘i i tatou o lo‘o felafoa‘iina e pei o peau, ma fe‘avea‘iina i matagi uma lava matā‘upu, i le pepelo o tagata, i togafiti leaga ‘ua saunia e fa‘asesē ai.”

Faitauga – Tusi Paia – Tanielu 1:8-16

Fai mai le 1 Korinito 16:13 ‘Inā mataala ia ‘outou, ‘ia ‘outou tumau i le fa‘atuatua, ‘ia ‘outou fa‘atamatane, ‘ia fa‘amalolosi ‘outou.

Fai mai le Efeso 4:14“Ina ‘ia lē toe tama nini‘i i tatou o lo‘o felafoa‘iina e pei o peau, ma fe‘avea‘iina i matagi uma lava matā‘upu, i le pepelo o tagata, i togafiti leaga ‘ua saunia e fa‘asesē ai.”

O loo atagia i fuaitau o loo taua I luga, o tagata kerisiano malolosi e tulai ma tumau i lo latou faatuatua, ae o tamaiti o lo’o fe’aveaiina i matagi o a’oa’oga ma mataupu eseese. A suia talitonuga e aunoa ma le o e saili i le loloto o le Upu a le Atua ona ua faapea mai ai se tagata se toatasi, pe faapea foi na fai mai ai le latou faifeau, ia pe faalauiloa mai foi e latou faifeau ua suia ona talitonuga, ou te iloa ai iina e pepe lava le olaga kerisiano, ua leai se tuputupu a’e. 

E te maua loa le moni o le Upu a le Atua, aua nei avea faamatalaga a tagata e luluina ai lou faatuatua. Aua nei e faatagaina lau savaliga ma le Atua e taitaiina i upu e fai mai ai tagata. E tatau ona e iloa lava e oe ia le Atua ma ia faavae lau savaliga i le lua mafutaga vavalalata ma le Atua. E leai se mea e faatusalia iai lou iloa lava e oe ma malamalama i le Atua. O le taimi e amata ai ona e iloa o ia ma latalata i le lua mafutaga, e matua faigata ona faaseseina oe e se tagata aua e te iloa ma malamalama lelei i lou Atua. 

I le 1 Ioane 2:27, fai mai o le faauuga i totonu ia te oe e aoaoina oe i mea uma e tusa ma le Galuega 10:38, o le faauuga e aumai ai Agaga Paia ma lona mana. O Peteru,  sa matua fefe e tulai i lona talitonu ia Iesu o ia o le Mesia ma faailoa lona sootaga ia Iesu ae lei papatisoina i le Agaga Paia. Ina ua maea ona papatisoina e Agaga Paia, ua suia atoatoa Peteru e pei o se tagata fou. I le Galuega 11:1-18, ina ua alu atu i le fale o Konelio, ma ua faapotopoto mai tagata e fesiligia lona alu atu i le fale o se tagataese, ae na ia tulai ma tumau e pei o se papa ma faapea mai, ’na fai mai Agaga Paia ou te alu’. Ua le toe fefe e tulai ma tumau i se mea o loo talitonu iai. 

Ia faatumulia oe i le Agaga Paia ona e silafia lea o le moni o le Upu a le Atua, ma o le tele o lou iloa o le Upu a le Atua o le faigata foi lena ona faaseseina oe i a’oa’oga ma talitonuga pepelo, i le suafa o Iesu, Amene.  

OPEN HEAVENS

MATALA LE LAGI MO LE ASO LULU 30 OKETOPA 2024

(tusia e Pastor EA Adeboye)

Manatu Autu: O le taui o le tagata mitamita (The lot of the boastful)

Tauloto -Tusi Paia– Ieremia 9:23 “O lo‘o fa‘apea ‘ona fetalai mai o le ALI‘I: ‘Aua ne‘i mitamita le tagata poto i lona poto, ‘aua ne‘i mitamita le tagata malosi i lona malosi, ‘aua ne‘i mitamita fo‘i le mau‘oa i ana ‘oloa.” 

Faitauga – Tusi Paia – Mareko 14:22-31; Mareko 14:65-72

I le Mataio 26:31-35, na iloa ai o Peteru o se tagata mitamita ia te ia. Na faailoa e Iesu i lona au soo o le po lena latou te tausuai ai pe tuulafoai ia te ia, ae tali mai iai Peteru i lona mimita, “E ui lava ‘ina tausuai o tagata uma ‘ona o oe, ‘ou te lē tausuai lava a‘u.” (Mataio 26:33). 

 I nisi faaupuga o loo faapea mai, ‘o a’u o loo e fai mai iai? Tusa pe tuulafoai oe e le au vaivai ia, faatuatua mai ou te iai pea ma oe’.'Ona fetalai atu ai lea o Iesu ‘iā Petery, “E moni, ‘ou te fai atu ‘iā te oe, o lenei lava po, a o le‘i vivini moa, ‘e te fa‘afiti fa‘atolu mai ai ‘iā te a‘u.” Na faapea mai Peteru, ’e pei e te le o iloa lelei le tagata o loo e talanoa iai. Tusa pe ou te oti ma oe, ou te oti lava, e le taitai ona ou tuulafoai ia te oe’. Peitai i le Mataio 26:60-75, o ai na faafiti ma tauto e na te leiloa Iesu? O Peteru lava e tasi! O so’o se mea e mitamita ai se tagata, e iai lona malosiaga iai latou. O le mea lea o loo faapea mai ai le Tusi Paia o le tagata e mitamita ma fiafia iai, e leaga.

6A o lenei, ‘ua ‘outou mitamita ‘iā ‘outou ‘upu fa‘amaualuga; e leaga le mitamita fa‘apenā uma lava. Iakopo 4:16

O le taimi e te mitamita ai I se mea, mataala, e faaaoga e le tiapolo le mea lena e faatoilalo ai oe. O le mea lea e le tatau ai ona e mitamita I se mea. E pau le tulaga e te mitamita ai e faataga, o le mitamita i le Alii (1 Korinito 1:31). O le mea lena na faia e Tavita i le 1 Samuelu 17:41-47 o lea na mafai ai ona ia faatoilalo ia Koliata. Tusa pe e te iloa e leai seisi e sili atu ia te oe i se mea, tapuni lelei lou fofoga. O le tagata pito sili ona poto i tagata uma na faapea mai:

”Ia vi‘ia oe e le tagata ‘ese, ‘ae lē o lou lava gutu, ‘ia vi‘ia e se tasi, ‘ae lē o ou lava laugutu” (Faataoto 27:2). 

O le mitamita i se mea e faatusa i lou iai i le malae o taua ma o loo e fai atu i le tiapolo e sau e tā oe ma faatoilalo. E te ono manatu o lo’o e talanoa i ou malosiaga, peitai o so’o se tagata poto e iloa lelei o le taimi e amata ai ona faaalia lou mitamita i se mea, e vave ona avea ma ou vaivaiga. Sa muamua ona mitamita Koliata i lona malosi, ae mulimuli ane na faatoilaloina e se talavou i le na o le tamai ma’a. Na mitamita Nepukanesa i mea tetele na ia faia, na sosoo ai ma le ai i le mutia i le malae e pei o se manu (Tanielu 4:28-33). 

Le au pele, afai ua e masani I le mitamita i mea ua e faia, salamo nei. Ua na o le Alii e tatau ona e mitamita ai, ae aua nei toe mitamita i isi mea. E lē lelei le mitamita i se mea e ese mai ia Keriso, e na o le taitaia o oe i faamāina ma le toilalo. Aua lava nei e mitamita i lou tulaga, mea ua mafai ona e faia po’o le tamaoaiga ua e maua, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 29 OKETOPA 2024

(tusia e Pastor EA Adeboye)

Manatu Autu: Tagata popole po’o le tagata tau (Worrier or warrior)

Tauloto -Tusi Paia– Mataio 6:34 “O lenei, ‘aua tou te popole i le aso a taeao. Auā e popole le aso a taeao i ana lava mea. E tatau i le aso lona lava leaga” 

Faitauga – Tusi Paia – Mataio 6:25-34

I le olaga nei e iai tagata popole, e iai ma tagata tau e ala i tatalo; e tatau ona e filifili po’o le fea o ia tagata e iai oe. Fai mai le Mataio 6:27, e leai ma se kupita e fa’aopoopoina ia te oe i le atuatuvale. E leai ma se mea e tasi e te maua i lou popole, matua leai ma se mea. Peita’i i le ‘avea o oe ma se tagata tau e tatalo, a tutupu mai ni faafitauli, e te faatama’ia i le nofoaga o tatalo, aua e te manumalo, e manumalo a’ia’i. (Roma 8:37)

O nisi tagata ua matua atugalu i mea e o’o mai a taeao. Ae lei ofi atu i totonu o le Iunivesite, e popole ina nei te’i ua le taliaina. A maea ona faau’u, e popole I te’I ua le maua se galuega. A maua se galuega, e popole nei te’i ua faate’a mai le galuega. Afai e tumau i le galuega, e popole ne’i lē siitia i se tulaga sili atu. A maua foi se siitaga i se tulaga maualuga, e popole i tagata e ono faoa tulaga. E popole nei le fia faaipoipo seisi ia te ia. Ae a o’o mai se tagata e fia faaipoipo atu ia te ia, a ua popole pe o le tagata tonu lea e tatau ona faaipoipo iai. A o’o ina faaipoipo, e popole po’o ua sa’o lana filifiliga ae pe ono maua se la fanau pe leai. E latou te popole i taimi uma mo le lumanai. O le mea moni, o ia atugaluga uma e leai ma se mea e fo’ia ai se faafitauli.

Afai e te faitauina le Filipi 4:6-7 e te silasila ai i mea e tatau ona e faia, nai lo le popole. O lo’o faapea mai e tatau ona e faafetai i le Atua mo mea uma, e ala i le tatalo ma le fa’atoga. 

6‘Aua ne‘i popole ‘outou i se mea e tasi a ‘ia fa‘ailoa atu o ‘outou mana‘o i mea uma lava i le Atua, i le tatalo, ma le fa‘atoga, ‘atoa ma le fa‘afetai. 7O le manuia fo‘i mai le Atua, o lo‘o silisili lava i mea uma e manatu i ai, e leoleoina ai o ‘outou loto ‘atoa ma o ‘outou mafaufau ‘iā Keriso Iesu (Filipi 4:6-7).

Aua le faafetai i le Atua na o taimi o lo’o saogalemu ma manuia i tulaga o e iai, a ia faafetai i le Atua i mea uma i le tatalo ma le faatoga, ona e faailoa lea i le Atua ou mana’oga. Aua e te nofonofo ma le popole; alu i le Atua i le tatalo, ia e faafetai ia te ia i mea uma ua ia faia mo oe, ma e fa’ailoa atu ia te ia ou mana’oga. O lona filemu e suia so’o se mea o popole ai lou loto. O lea, tatalo i le Atua ae tu’u lou popole ona ia fa’afetauia lea o oe i mea uma o lo’o e mana’omia.

Afai ua e taliaina Iesu Keriso e avea ma ou Alii ma Faaola, ma ua lafoa’i atu ia te ia lou ola, taofi nei loa lou popole. Ua maea ona foai atu e Iesu lona filemu e sili atu nai lo le malamalama e pei ona tatou iloa i le Ioane 14:27

‘Ou te tu‘uina atu ‘iā te ‘outou le manuia; o lo‘u manuia ‘ou te avatu ai ‘iā te ‘outou; ‘ou te lē avatu ‘iā te ‘outou fa‘apei ‘ona avatu e le lalolagi. ‘Aua le atuatuvale o ‘outou loto, ‘aua fo‘i tou te matata‘u. '

Avea oe o se tagata tau e tatalo ae le o se tagata e popole ma atuatuvale, i le suafa o Iesu, Amene.

OPEN HEAVENS

MATALA LE LAGI MO LE ASO GAFUA 28 OKETOPA 2024

(tusia e Pastor EA Adeboye)

Manatu Autu: Pe a latalata mai Le Atua (When God is near)

Tauloto -Tusi Paia–Isaia 55:6 “Ia ‘outou sā‘ili i le ALI‘I manū o mafai ‘ona maua o ia; ‘ia ‘outou vala‘au ‘iā te ia manū o latalata mai o ia.”

‭‭

Faitauga – Tusi Paia – Salamo 29:2

O loo tusia I Le Tusi Paia e tatau ona tatou saili I Le Atua manū o mafai ‘ona maua o ia; ‘ia ‘tatou vala‘au ‘iā te ia manū o latalata mai o ia. A e faalogo I lena, o leisi fesili i lou mafaufau o lenei, ‘e faapefea ona ou iloa pe a maua le Alii pe o latalata mai foi o ia?. E taua lena fesili. Peitai o le tulaga moni e tatau ona e iloa, pe faapefea ona faalatalata mai o ia ia te oe. Fai mai le Ioane 4:23-24

“Ae o‘o mai ona aso, ‘ua o‘o nei fo‘i i ai o ē tapua‘i fa‘amaoni latou te tapua‘i i le Tamā i le agaga ma le fa‘amaoni; auā o lo‘o sā‘ili le Tamā i ē tapua‘i fa‘apenā ‘iā te ia. O le Atua o le agaga lava ia; o ē tapua‘i ‘iā te ia, e tatau ‘ona tapua‘i atu ai i le agaga ma le fa‘amaoni.”

O loo taua I le fuaitau o loo taua I luga, e lē tau saili I le Atua manū o mafai o na maua o ia aua e lē mafai ona iloa atu o ia, peitai afai ou te tapuai ia te ia I le agaga ma le faamaoni, e na te faalatalata mai ia te a’u. E sili atu le tulimatai e tapuai ia te ia ona ia faalatalata mai lea, i lo le valaau ia te ia e aunoa ma le iloa poo latalata mai o ia. Afai e te naunau e faalatalata mai le Atua ia te oe, e tatau ona e faamoni e tapuai ia te ia e sili atu i lo seisi tagata. E faalatalata o ia I ē tapuai ia te ia. Fai mai le Salamo 22:3 e tietie o ia I viiga a Isaraelu. O Isaraelu o loo faatatau iai latou e tapuai ia te ia I le agaga ma le faamaoni. 

E agai lava tagata I mea o loo viia ai I latou. I le vaega sisifo o Nigeria i le mea ou te sau ai, afai e te alu I se patī poo se fiafia, a amata loa e le au faili ona pepese I ou viiga, e tatau ona e tulai ma e sivasiva atu e faasaga i lē o loo pese mai. E faapena tonu lava le mea e tupu pe a tatou pepese I viiga o Le Atua. E faalatalata mai iai tatou. O le tasi lea o mealilo e iloa lelei e Tavita, e faaosofia le Atua e tali I ana tatalo. Fai mai Tavita o soo se taimi e alu atu ai I Le mamalu o Le Atua, e alu atu ma viiga ma Le faafetai (Salamo 100:4). A maea se taimi o vivii ma faafetai, ua ulufale atu i le lotoā a le Atua. O le taimi e faalatalata mai ai le Atua ia te ia, e na te valaau ai ia te ia, ma e mautinoa le maua o tali o ana tatalo. Le au pele, ia e faia le viiga ma le tapuaiga I le Atua, ona faalatalata mai ai o ia ia te oe i taimi uma. Aua e te ole atu I Le Atua I se mea seiloga ua maea ona e vivii ia te ia mo se taimi e faalatalata mai ai o ia ia te oe, I le suafa o Iesu, Amene. 

OPEN HEAVENS

MATALA LE LAGI MO LE ASO SA 27 OKETOPA 2024

(tusia e Pastor EA Adeboye)

Manatu Autu: Su’esu’e le agaga (Check the spirit)

Tauloto -Tusi Paia– 1 Ioane 4:1 “Le ‘au pele e, ‘aua tou te fa‘alogo i agaga uma lava, a ‘ia ‘outou tofotofo i agaga pe mai le Atua i latou; auā e to‘atele perofeta pepelo ‘ua ō atu i le lalolagi.”

‭

Faitauga – Tusi Paia – Mataio 16:13-23

O mea uma tatou te faia, pe o se upu ua o tatou lafo, o se aga ua faatino po o se filifiliga ua fai, e I ai le agaga I totonu ia i tatou e mafua ai. I le Mataio 16:13-23, na faapea atu ai Peteru iā Iesu Keriso, “o oe o le Keriso,” ona fetalai atu lea o Iesu iā Peteru e lē se tagata ua ia faaali atu ai ia te ia, ua na o le Agaga o le Atua e mafai ona faailoa ia te ia.

E le’i umi mulimuli ane, ae fai atu Peteru lava lea i le Alii “e lē maliu lava oe,” ona faliu atu lea o Iesu ma fetalai atu ia te ia, “Satani e, alu ese ia oe i o’u tua.” O ia fuaitau e ta’u mai ai ia i tatou, e tatau ona o tatou su’esu’e poo le a le agaga o loo ta’ita’ia a tatou mea e fai. E mafai ona avea oe ma tagata malosi i le Atua e fa’atumulia i le Agaga Paia ae faaosofia pea e le tiapolo.

A e faitau i le 1 Ioane 4;1; ia outou suesue i agaga uma lava, aua le na o le su’esu’e o agaga i amioga a isi tagata; su’esu’e foi ma agaga o e aafia ai oe ia. Siaki amio o e faia, upu ma mafaufauga; su’esu’e poo o gatusa ma le Agaga o le Atua.

E faafefea ona e su’esu’e le agaga o ia te oe? Fai mai Mataio 7:16-17;

“Tou te iloa i latou i o latou fua. Pe tau mai ‘ea e tagata se fuifui vine mai le la‘au tuitui, po o mati mai le la‘au talatala? E fa‘apea fo‘i la‘au lelei ta‘itasi ma fua mai i fua lelei; a o le la‘au leaga e fua mai i fua leaga.”

‭‭

Su’esu’e fua o lou olaga. Siaki poo talafeagai ma fua o le Agaga I le Kalatia 5:22-23.

Afai o amioga o e fai e lē o fa’aalia ai se alofa, e lē o ta’ita’iina oe e lē Agaga o le Atua. Afai o e faia ni uiga e lē maua ai se filemu, e sesē lē agaga na e ta’ita’ia oe. Afai e filifili se Kerisiano e fai se faiga e lē tusa ma le finagalo o le Atua ona e lē mana’o e tigaina mo le finagalo o le Atua, o loo mulimuli o ia i ala o le tiapolo.

Le au pele e, e ao ona e tofotofo e le aunoa po’o le a le agaga o ta’ita’iina oe i soo se taimi. O le auala lelei e iloa ai o le su’e poo tutusa au filifiliga ma amioga ma fua eseese o le Agaga o loo lisiina i le Kalatia 5:22-23. Afai e te le’i fanaufouina, ua tatau ona ofo lou ola mo Keriso ina ia ta’ita’iina ai oe e lona Agaga. Afai o oe o se Kerisiano a o au faaiuga ma amio e lē atagia ai fua o le Agaga, fefulisa’i ou ala ia ta’ita’iina oe tau lava o le Agaga o le Atua. I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 26 OKETOPA 2024

(tusia e Pastor EA Adeboye)

Manatu Autu: Aua le Femoumoua’i (Don’t Be Unstable)

Tauloto -Tusi Paia– Iakopo 1:7 ‘‘Aua lava ne‘i manatu lea tagata na te maua se mea e tasi mai le Ali‘i” 

Faitauga – Tusi Paia – Iakopo 1:6-8

A fai sau tagi i se faamasinoga o tulafono, o le a fesiligia oe e saunia se faamaoniga e fa’ailoa ai e te sa’o. O le faamoemoe o le pine faamau e faamaonia ai lau tagi ma faailoa ai i tagata uma o lo’o e mautinoa i lau faamatalaga. A i ai sau pine faamau, o le a e saunoa ma le mautinoa ma le to’a e lagolago lau mataupu. Peita’i a leai se pine o le a faigatā ona maua lea ituaiga to’afilemu. I se isi fa’aupuga, o se pine faamau e maua ai le lototele ma le mautinoa o le itu tagi.

Fai mai le Eperu 11:1 O le fa‘atuatua o le fa‘alagolago lea i mea ‘ua fa‘amoemoe i ai, o le mautinoa lea o mea e lē o va‘aia.

Fai mai le fuaitau o loo i luga o le faatuatua o le mautinoa lea o mea e lē o vaaia. Afai o lou faatuatua o se mautinoa moni, e te lototele fo’i faatatau i au folafolaga e uiga i le Upu a le Atua ma mea o loo e tatalo ai, pei o le itu tagi na faamatala i le fa’ata’ita’iga o loo tāua I luga. E te lē tatalo mo se manaoga I le asō ma tautala masalosalo i le manaoga lava lea taeao.

A e tatalo, e ao ona e talitonu ma lou loto atoa o le manaoga na e tatalo ai ua uma ona faataunuuina (Mareko 11:24). A e faia faapea ona e vaai lea i tali o au tatalo. E lē tatau ona faataga le loto masalosalo i lou loto i se taimi. O se a sina masalo itiiti i lou loto e lava lea e fa’aleagaina lou faatuatua ma punitia le tali o lau tatalo. 

Fai mai le Tusi o Mataio 21:21; A ‘ua tali atu Iesu, ‘ua fa‘apea atu ‘iā te i latou, “E moni, ‘ou te fai atu ‘iā te ‘outou, ‘Āfai ‘ua ‘iā te ‘outou le fa‘atuatua, ma ‘outou lē māsalosalo, ‘ona faia lea e ‘outou e lē na o le mea ‘ua faia i le mati, ‘ae ‘āfai tou te fai atu i le mauga lenei, ‘‘Ia si‘itia oe, ma lafoina i le sami,’ ‘ona faia lava lea.

Faaeteete, peita’i, aua o le a taumafai pea le tiapolo e avatu le fefe I lou loto. O le a ia avatu ia te oe mafuaaga uma ia aua ai ne’i taunuu le vavega mo oe, peita’i e tatau ona e osofaia le fili i le Upu a le Atua. 

Fai mai Roma 10:17; “O lenei e tupu le faatuatua I le taulogologo atu, o le taulogologo atu fo’i o le Afioga Paia a le Atua.” 

So’o se taimi e o’o mai ai mafaufauga fa’alotolotolua, tauloto le Upu a le Atua e faafetoai ai pea lava pea seia o’o ina faagoto ifo e le Upu a le Atua i le moana sausau le fa’alotolotolua. I le Iosua 1;8; fai mai le Tusi Paia, ina ia maua le manuia, aua ne’i te’a i lou gutu le Afioga Paia a le Atua. Maitau mai e lē o fai mai, mai i le loto, ae mai i lou fofoga (gutu).

Le au pele e, poo le a se mea e te faananau i ai i lou olaga, tatalo i le faatuatua ma ta’utino le Upu a le Atua e aunoa ma le loto masalosalo. Aua nei e faatagaina le māsalosalo i lou loto aua e leai se mea e lē mafai ona faia e le Atua, I le suafa o Iesu, Amene

OPEN HEAVENS

MATALA LE LAGI MO LE ASO FARAILE 25 OKETOPA 2024

(tusia e Pastor EA Adeboye)

Manatu Autu: O le mati (The Fig tree)

Tauloto -Tusi Paia– Ioane 15:2 ‘O la uma lava o ‘iā te a‘u e lē fua, e ‘ave‘eseina e ia; a o la uma e fua, e teuteu e ia, ‘ina ‘ia fua mai ai atili’. 

Faitauga – Tusi Paia – Mareko 11:12-20

I le faitauga mai le Tusi Paia o le aso, na galala Iesu I le fiaai ona alu atu lea i le laau o le mati, peitai e leai sona fua. Na fetuu e Iesu le laau ona mate lea. E ui e lei oo I le fuata e fua ai le mati o lona uiga e le tatau ona iai ni ona fua, ae na fetuu lava e Iesu. E te ono manatu e pei e le talafeagai le mea ua faia e Iesu, peitai o loo momoli mai ai se feau iai tatou. E te le tau faatali seia sagatonu mea uma ona faatoa amata lea ona fua mai ni fua mo lou matai. 

Fai mai le Failauga 11:4 ‘O lē na te mānatunatu i le matagi e le lūlū saito o ia; o lē na te va‘ava‘ai fo‘i i ao e le selesele lava o ia’.    

A foai e le Atua se galuega I se kerisiano faatuatua, e tatau i lea tagata ona galue ia ausia faamoemoega, tusa pe o tulaga lelei pe leai mea e manaomia. A faatalitali I latou seia matua lelei ma atoatoa mea uma e manaomia, e le taitai ausia faamoemoega ma taunuuga autu. Afai o lo’o e mataituina pea le tau ma matagi, e le taitai ona amata ona e lulu ma toto ni fatu, afai e na o le mataituina ma va’ava’ai i ao pe timu, e le taitai ona e selesele. E tatau ona e fuafua lelei ina ia fua mai ni fua tusa pe lē o talafeagai tulaga i le siomaga. 

Ina ua avea a’u o le Taitai Aoao o le Ekalesia RCCG, na ou maua ni folafolaga e tele mai le Atua e ese mai le feagaiga sa faia ma lo’u Tama faaleagaga e faatatau i lona tulaga siitia i le lumanai. E tele vaega i le siomaga o le Ekalesia i le na taimi e lē lelei. Sa lē lava tupe a le Ekalesia e faatupe ai se totogi o le faifeau, e leai se mea e tua iai e faatu ai Ekalesia i vaega eseese o le lalolagi, pe faia foi ni fonotaga tetele e faitau miliona tagata e auai ai. E ui e le atoatoa ona lelei le siomaga ma mea e faatino ai, na ou faia ma faatino mea na folafola e le Atua ou te faia. Ina ua matou o atu e nonofo i le Redemption City, sa leai se tupe e totogi ai le aufaigaluega na fausia le faletele mo sauniga, ma e leai foi se mea e fausia ai se taulaga tele. O le aso, ua vaai tagata uma i le taulaga na folafola e le Atua ia tei matou. 

Le au pele, afai e te faatali seia lelei ma atoatoa le siomaga ma mea e tatau ona ia ina ia e fua mai ni fua, e te ono pei o le mati, ou te manatu e matua e lē naunau e te pei o le laau o le mati, ou te iloa foi e te lē fia iu e pei o le mati aua na fetalai Iesu i le tatou tauloto o le aso, o lālā uma e leai ni fua e aveesea. E leai se alofaga o le lē fua mai o ni fua, i le suafa o Iesu, Amene.   

OPEN HEAVENS

MATALA LE LAGI MO LE ASO TOFI 24 OKETOPA 2024

(tusia e Pastor EA Adeboye)

Manatu Autu: Fai se malologa (Take a break)

Tauloto -Tusi Paia– Salamo 23:2 ‘Na te ‘ave a‘u i le mea e i ai le vao mu‘a ‘ou te ta‘oto ai; na te ta‘ita‘i ‘iā te a‘u i tafatafa o vai e tafe lemū'

Faitauga – Tusi Paia – Kenese 2:2-3

Na malolo le Atua i le aso fitu i le vaiaso o le foafoaga e fai ma faataitaiga iai tatou. Na ia faapea mai i le Esoto 23:10-11 e tatau ona totoina fanua mo le ono tausaga ona faamalolo lea i le tausaga lona fitu. E tatau lana ona fa’aavanoa se taimi e fai ai se malologa ina ia faafouina pea lo tatou malosi ina ia tatou matua lelei i le faatinoina o galuega ua ia valaau iai tatou e faatino. 

O nisi ua mama’i ona e seāseā faaavanoa taimi e malolo ai. O nisi tagata o loo galulue mo le tele o tausaga e aunoa ma le faia ni malologga po’o tafaoga i ni nofoaga ese. O le tulaga latou le o malamalama ai, o le faia o malologa mai galuega ma tafafao e fesoasoani iai latou e faamalosia le malosi ma siitia le faatinoina o galuega pe a toe taliu mai. I le 1 Tupu 19:1-8, i le faatoa maea ona valaau Elia i le lagi ona paū lea o le afi ma ua iai le faaolaolaga i le nuu, na ia faalogo ai lea o lo’o saili Iesepela e fasioti ia te ia, ona ia sola ese ai lea ma le fefe. E o’o atu i lalo o le laau, ua vaivai, ma i lona tulaga lea, na ia valaau i le Atua e fasioti ia te ia. Ua silafia e le Atua e le o moni lona fia oti, ae e manaomia e ia le malologa. Na ia faia ia moe Elia ma ia auina faalua mai lea agelu e aumai ana meaai. Ina ua maea ona malolo ma ai lelei, ua faamalosia lona tino ma faaauau ai le galuega mo le isi fasefulu aso. E iai taimi o le mafuaaga ua e fememeai ai ona e lei faia sau malologa mo se taimi umi. Tago e faataitai le na o le moe ma le ai mo se aso e tasi, ona e iloa lea o le eseesega. 

O le faia o se malologa e le taugata. A leai sau tupe e te malaga ai ma nofo i se faletalimalo, e mafai ona e alu i se fale o se tou aiga poo se nofoaga filemu e te iloa e leai seisi e faalavelave ia te oe, e te malolo lelei ai. E tatau ona e malolo i vaiaso uma ma tausaga uma aemaise pe afai e mamafa galuega, e pei o Elia i le 1 Tupu 18. Tusa po’o le a lou faau’uina, a’o e soifua i le tino nei, e tatau ona faaavanoa sou taimi e fai ai sau malologa. E pau le mafuaaga e mafai ai ona ou faia le Sauniga o Agaga Paia  i masina uma ua toeitiiti atoa nei le 40 tausaga, ona e fai ma faia au malologa pe a manaomia. A maea polokalame tetele e faasolo i le vaiaso atoa, ou te faaavanoa lelei le taimi ou te matua malolo lelei ai. Aua e te faatali i le fomai e faatonu ma faamalosia lou malolo i se ma’i taoto aua e oo atu iai ua tele lona taugata ma leai sau mea e mafai ona toe faia aua o le a umi atu le taimi e te malolo ai i lo le taimi o lo’o e manao ai. E lei faia e le Atua lou tino e galue faasoloatoa. Fai ma fai sau malologa, I le suafa o Iesu, Amene.