Samoan Devotional

OPEN HEAVENS

MATALA LE LAGI MO LE ASO GAFUA 14 OKETOPA 2024

(tusia e Pastor EA Adeboye)

Manatu Autu: Aua le ufiufia au agasala (Cover Not Your Sins)

Tauloto -Tusi Paia– Faataoto 28:13 “O lē ‘ua ufiufi lona solitulafono, e le manuia o ia; a o lē ‘ua fa‘aali ma lafoa‘iina, e alofagia o ia.”

‭

Faitauga – Tusi Paia –1 Samuelu 15:22-29

I la matou aoga tulagalua I aso ia, na faamatala e le matou faiaoga le tala i se tamaloa na ia faia se mea ua le fiafia ai le tupu. Na matua to’atama’i le tupu ma ua aami I lenei tamaloa ma faamasino. Na tootuli lenei tamaloa ma ole atu mo lona alofa mutimutivale. Ua ia tautino le solitulafono ma faatoese. Na faamagalo e le tupu ona o lona loto salamo. Fai mai le matou faiaoga a matou sese, ia matou tautino le sese ma ole atu mo le alofa mutimutivale ona matou maua lea. Peitai, a matou taumafai e ufiufi mea sese, e mautinoa e oo i le faasalaina. Na maua’a lenei aoaoga ia te au, ma a ou faia se mea sese, ou te le taumafai e ufiufi. Afai ou te faia se mea e le fiafia ai le Atua, ou te alu atu ia te ia ma faapea, ‘le Alii e, ua ou sese ia te oe, faamolemole aumai lou alofa mutimutivale mo a’u’.

Afai e te fia maua le alofa mutimutivale mai le Atua, aua le ufiufia agasala ua e faia. O le mafuaaga e maua ai lava e Tavita le alofa mutimutivale o le Atua, ona e le taitai taumafai e ufiufi ana agasala, e na te tautino I Le Atua. I Le 1 Nofoaiga Tupu 21:1-16, Ina ua logo atu e Kato ia Tavita ua ia agasala I le Atua, e le gata na talia e Tavita lona sese, ae na ia valaau I toeaina e tatalo ma anapogi ma ia, ia faamagalo o ia e Le Atua. A e faatusatusa la ia Saulo I Le 1 Samuelu 15:20-21. Ina ua auina mai Samuelu e logo Saulo ua ia le faataunuuina e tusa ma poloaiga a le Atua, na faafinau Saulo i le mataupu e aunoa ma le taliaina o lona sese. Ina ua musu Samuelu e tapuai I Le Atua faatasi ma ia, e lei ole atu ia Samuelu e augani I Le Atua mo ia, peitai na ia mau I Le ofu o Samuelu ona e lei manao e tilotilo mai toeaina o le nuu ua savali ese Samuelu ma ia. E na te lei faia se taulaga ma ole atu mo le alofa mutimutivale, na ia faia e ufiufi lana solitulafono ae ia tumau lona tulaga lelei I Le vaaiga a tagata. I le 1 Samuelu 3:19, o loo ta’u mai ai iai tatou, na avatu e Le Atua Le mamalu ia Samuelu, ma e leai sana upu na i’u vale, peitai I Le 1 Samuelu 16:1, na fiu Samuelu e aioi I Le Atua mo Saulo, ae fai mai le Atua e aua le maimaua lona taimi ua ia teena Saulo. 

Le au pele, o le e ufiufi agasala, e oo atu ai I le faaumatia. A e faia se mea sese, aua le taumafai e faafoliga o loo lelei mea uma. O lou olaga kerisiano e le fuaina i le vaaiga a tagata, e fua i le vavalalata o le mafutaga ma le Tupu o Tupu. Tautino au agasala, ma ole atu I Le Atua mo lona alofa mutimutivale ia te oe, ae a e ufiufi au agasala, o loo lamatia lona teena o oe. Aua le ufifuia au agasala, tautino ma salamo moni, I Le suafa o Iesu, Amene. 

OPEN HEAVENS

MATALA LE LAGI MO LE ASO SA 13 OKETOPA 2024

(tusia e Pastor EA Adeboye)

Manatu Autu: Uō a le Atua (Friend Of God)

Tauloto -Tusi Paia– Kenese 14:20 “Ia fa‘afetaia fo‘i le Atua silisili ‘ese, o lē na tu‘uina mai ou fili i ou lima.” ‘Ua foa‘i atu fo‘i e Aperamo ‘iā te ia o mea e sefulua‘i o mea uma.”

‭‭

Faitauga – Tusi Paia –2 Korinito 9:1-7

E i ai sa’u uō lelei lava sa avea ma peresetene o se atunuu. I se tasi aso, sa o’u fai atu ia te ia, “Toeitiiti atoa le fitu tausaga o e peresetene, ae leai ma se mea ua e aumaia ma a’u,” Na pulato’a mai ia te a’u ma faapea mai, “E te le’i fai mai.” Na o’u tali, “E lē tau ole atu ni uo. Afai ta te uō, e lē mana’omia so’u fai atu. O le uo, e foai mo lana uō e aunoa ma le fai atu.”

O se faigauō a se alii ma se tamaita’i ae leai se taimi e fai meaalofa ai le tasi I le isi, tusa poo le a le la’ititi, e ono fesiligia le alofa I totonu o lea mafutaga auā o le tasi lea ala autū e fa’ailoa ai le alofa o le foai (Ioane 3:16).

Toatele tagata e fai mai o i latou o uō a le Atua, peita’i o o latou uiga vaaia pe a o’o i taimi o foa’i mo le Atua, e te iloa ai iinā e leai, e lē uo ma le Atua. O uo moni a le Atua e lē faatali se’i fa’asalalau mai e fai se foai mo le Atua fa’atoā foai. O uo moni a le Atua e su’esu’e auala e foai ai mo ia ona o le pele ia i latou o la latou uō.

Ou te manatua se taimi na o’u alu ai ou te lauga i se ekalesia i ni tausaga ua mavae, ma o tagata uma i le faapotopotoga sa susulu o latou foliga. A e vaai ia i latou e te iloa ai, ua matua’i faamanuia le Atua ia i latou, o loo o’u mafaufau i le faamanuiaina o i latou ae sau loa le faifeau i luma ma faapea mai, “O le taimi lenei o le foai.” E te iloa lelei le olioli i totonu o le fale a’o patipati tagata uma ma alalaga. O iina na faailoa mai ai e le Atua ia te a’u, “O le ala lea ua o’u faamanuia tele ai ia i latou; e foai mai i latou ia te a’u ma le loto fiafia.” O i latou e fiafia e foai i le Atua e lē aunoa, ma e lē tauanaua e foai, latou te maua manuia e tele. E silasila le Atua ia i latou o ni uō moni, ma e lē faatali fo’i le Atua se’i ole atu fa’atoā foai mai ia i latou.

O Tavita o se tagata sa naunau e foai i le Atua e lē aunoa. Sa ia fai mai i le 1 Nofoaiga Tupu 21:24 na te le ositaulaga i le Atua i se mea e maua fua. O le tali, na fetalai le Atua ua ia foai ia te ia mea uma e mana’o ai ma pe afai ua itiiti lea, na te faaopoopo ia te ia (2 Samuelu 12:8). E le’i tuuina e le Atua Tavita ia mativa i se mea, auā o ia o lana uō moni. E lei fai le Atua iā Aperaamo mo sana sefulua’i i le Kenese 14:20 ae na ia foaiina lava i lona loto malie, mea e sefulu a’i ai ana mea uma. O aso ne’i, e ui ua uma ona fetalai le Atua e tatau ona o tatou avatu sefulua’i i le maota o le Atua (Malaki 3:10-12), o loo finau pea nisi kerisiano pe tatau ona totogi sefulua’i pe leai. O ia ituaiga Kerisiano ua na ona fa’afoliga ae lē ni uo moni i latou. I le suafa o Iesu Amene.

OPEN HEAVENS

MATALA LE LAGI MO LE ASO TOONAI 12 OKETOPA 2024

(tusia e Pastor EA Adeboye)

Manatu Autu: Ia Lotoalofa (Be Merciful)

Tauloto -Tusi Paia– Mataio 5:7 “Amu‘ia ē alolofa atu; auā e alofaina mai i latou.”

‭‭

‭

Faitauga – Tusi Paia –Mataio 18:21-35

Toatele tagata e ole i le Atua mo lona alofa mutimutivale, peitai a silasila le Atua i o latou olaga latou te lē alolofa i tagata o loo o latou mafuta, na te taofia lona alofa mutimutivale. Ua tatou faitau i la tatou upu tauloto mai le Tusi Paia o le asō, ma tatou iloa ai, a e alofa atu i isi, e faapena fo’i ona e maua le alofa mutimutivale o le Atua. Fai mai le Salamo 130:3; pe ana maitaulia e le Atua lo tatou amioleaga, o ai se na te mafaia ona tula’i? Ua na o lona alofa mutimutivale ua tatou maua ai pea le ola, ma afai tatou te popoto, ia o tatou alolofa atu fo’i ia i latou o mafai ona o tatou fesootai atu i ai.

I la tatou Tusi faitau mai le Tusi Paia o le asō, na faamatala e Iesu Keriso le tala i se tagata na aitalafu I le tupu i taleni e sefulu afe. Na faatonuina e le tupu ia faatauina o ia ma lana avā, ma ana fanau e totogi ai lana aitalafu, peita’i na tootuli lenei auauna ma ole atu i le tupu ia faapalepale ia te ia. Na mutimutivale ai lea o le alofa o le tupu, ua tu’u atu o ia ia sa’oloto ma faamagalo atu lana aitalafu. Ona alu atu lea o lea auauna ua iloa e ia le tasi o ona uso a auauna ua aitalafu ia te ia i ana tenari e selau. Ua fa’apa’ū lona uso a auauna i ona vae, ua aioi atu ia te ia mo se taimi faaopopo e totogi atu ai lana aitalafu, peita’i ua lē mafai o ia, ma ua alu atu ma tu’u i le uso nonō mea i le fale puipui. Na faalogo le tupu i le mea ua faia e le auauna ona ita tele ai lea o ia, ma ia tuuina atu ia te ia i e faataumaoi.

Fai mai le tusi o Faataoto 11:17; “O le tagata alofa ‘ua agalelei o ia ‘iā te ia lava; a o lē ‘ua sauā, na te fa‘atigāina lona lava tino.”

‭‭

o lona uiga o lenei fuaiupu, a e loto alofa ua e agalelei oe lava ia te oe, ae a e sauā ua e fa’atigā oe lava ia te oe, auā o lou faasauā e taofia ai le alofa mutimutivale o le Atua mai ia te oe.

I le Ioane 14:23, na fetalai Iesu afai e alofa atu se tasi ia te ia, e alofa fo’i lona Tamā i lea uso, ma e omai faatasi i laua ma mafuta faatasi ma ia. E faafefea ona e faaali atu i le Atua lou alofa? Fai mai le tusi 1 Ioane 4:21 afai e te alofa i le Atua, e te alofa fo’i i lou uso. Alofa I lou tuaoi faapei o oe lava ia te oe, auā e lē mafai ona e faapea mai e te alofa I le Atua ae inoino i lou tuaoi. Afai e te filifili e inoino i lou tuaoi, ua e fai atu I le Atua e te le mana’omia lona alofa.

Fai mai Kalatia 6:7; “‘Aua ne‘i fa‘asesēina ‘outou, e lē ulagia le Atua auā o le mea e lūlūina e le tagata, o le mea lava lea e seleseleina mai ai e ia.”

‭‭

So’o se fua e te lūlū e te toe selesele. A e lulu le loto alofa i olaga o isi, e te selesele le alofa. Peita’i afai e te filifili e lūlū le loto lē faamagalo, aua e te fa’aseā pe a e selesele le loto fia taui ma sui (Iopu 4:8). Ia e alofa ma agalelei i so’ose tasi. I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 11 OKETOPA  2024

(tusia e Pastor EA Adeboye)

Manatu Autu: (Atua Faamaoni ) (Commited God)

Tauloto -Tusi Paia–Salamo 138:2 “Ou te ifo i lou malumalu pa‘ia, ‘ou te vivi‘i atu fo‘i i lou suafa ‘ona o lou alofa ma lou fa‘amaoni; auā ‘ua e fa‘asilisili lau afioga i lou suafa uma.”

‭‭

Faitauga – Tusi Paia –Isaia 40:4-8

E te iloa e mafai ona taitaia le Atua e faia mea mo oe? Fai mai le Salamo 115:3 o le Atua, o i le lagi e pule aoao ma e na te faia mea uma ‘ua ia finagalo i ai, ma a e iloa lelei o ia, e te oo atu I le tulaga e faia e Le Silisili Ese mea e te manao iai. 

E te iloa i le upu tauloto mai le Tusi Paia o le aso, a e maua se fuaitau mai le Tusi Paia i se mea e te manao iai, e faamaoni le Atua e na te faia. Mo se faataitaiga, fai mai le Salamo 75:6-7, o le siitia o le tulaga e mai le Atua. E fai mai foi le 1 Samuelu 2:7-8, e filifili e le Atua poo ai e tuu I luga ae poo ai e tuu I lalo. Afai ua e iloa lea tulaga, o Le fesili, ‘e faapefea ona e taumafai ia siitia oe e Le Atua?’. O Le tali o loo I Le 1 Peteu 5:6 “O le mea lea ‘ia fa‘amaulalo ai ‘outou i lalo o le ‘a‘ao malosi o le Atua, ‘ina i‘a fa‘amaualugaina ‘outou e ia i ona pō e tatau ai. ‘Ia tu‘uina atu ‘iā te ia mea uma tou te popole ai, auā o lo‘o manatu mai o ia ‘iā te ‘outou.

Afai ua e iloa ua umi se taimi e lei siitia oe e le Atua, faamaualalo. E te faamaualalo loa, e siitia oe e Le Atua ina ia faataunuuina lana Upu. Fai mai le Faataoto 22:29, a e faamaoni i au pisinisi, e te tu i luma o tupu. Fai mai le Faataoto 12:24, e manumālō lima o ē filigā i galuega. O lona uiga a e fia oo i le pito i luga,faaopoopo le galue filiga i lou faamaualalo, e o gatasi ai ma Le upu a Le Atua. E na te siitia maualuga oe ma e oo I Le vaega e iai tupu. E te taitaia Le Atua e faia mea e te manao ai pe a e faia mea e finagalo iai o ia. 

E iloa foi e Le tiapolo lenei a’oa’oga. O lea, afai e manao le tiapolo e aua nei faia e Le Atua se mea e te manao ai, e na te faaosooso ia te oe ia e faia se mea sese ina ia mafai ona ia tuuaia ma molia oe I luma o Le Atua Ina ia aua nei faamanuia oe e le Atua. O Le tulaga lea e fai mai ai le Faaaliga 12:10, e na te molia le au uso. E na te iloa lelei e le tetee le Atua i lana Upu, ma e faaosooso ia te oe ia e faia le agasala ma molia oe I luma o Le Atua. O Le mea lea o le valea le usitai I le o loo taumafai e faaumatia oe I le faia pea lea o le agasala. A toe faaosooso oe e le tiapolo, ta’u iai, e le o oe o se vale. 

Le au pele, aua e te tuuina se avanoa I le tiapolo e na te faaaogaina ai Le Upu e faasagatau ia te oe, ae ia faaaoga Le Upu a Le Atua e maua ai lona alofa tunoa, ma  tatalo e tusa ma lona finagalo, I Le suafa o Iesu, Amene. 

OPEN HEAVENS

MATALA LE LAGI MO LE ASO TOFI 10 OKETOPA  2024

(tusia e Pastor EA Adeboye)

Manatu Autu: (Alofa I Le Atua) ( Love for God)

Tauloto -Tusi Paia–Mataio 22:37 ‘Ona fetalai atu ai lea o Iesu ‘iā te ia, “‘‘E te alofa atu i le Ali‘i lou Atua, ma lou loto ‘atoa, ma lou agaga ‘atoa, ma lou manatu ‘atoa.’

‭‭

Faitauga – Tusi Paia –Salamo 63:1-8

E i ai taimi ou te mafaufau ai, “Pe o o’u alofa pea i le Atua, e pei ona sa ou masani ai? Pe na i ai foi se taimi na sili atu ai lo'u alofa ia te ia nai lo le taimi nei?” I aso ua mavae, o le toatele o i tatou sa naunau e faia so’o se mea lava mo ia; sa tatou naunau e faafiafia lo tatou Alii i so’o se mea lava tusa lava po o lea lona tau. Ou te manatua aso ua mavae, sa masani ona fai ai faatasiga a Taitai e suesue ai le Tusi Paia, ma matou  faia ai ni taulaga, ma e te iloa lava ua tele le tamaoaiga a le faapotopotoga, I lo latou lotomalilie e siitia a latou foaʻi. Na tuuina atu e se tasi uso lona fusipaʻu ona ua leai lava sana tupe e  foai ma faitaulaga ai.

O faapefea mai lou alofa i le Atua i le taimi nei? Pe o sili atu nai lo le mea sa i ai muamua. E i ai tagata, ina ua toe fanaufouina, e sisiva malolosi i taimi o viiga ma tapuaiga, e le popole pe o tilotilo atu se tasi ia i latou. O le taimi lenei, ua le mafai ona alalaga i luga, ma pese atu ma tauvalaau ‘Alleluia”. E tusa lava pe tino tele lenei tagata, e le silasila i ai le Atua. Afai ua le mafai ona toe saasaa se tagata ma siva mo le Alii, e mafai e le Alii ona faaitiitia lena tagata.

I se tasi aso, na ou fesili atu ai i le Atua, “Le Alii e” na faia e Tavita le tele o mea leaga, e sili atu nai lo Saulo, na e fetalai mai foi, o Tavita o se tagata e tusa ma lou loto, ae e teena Saulo. Ou te iloa e te le faailoga tagata, ae ou te fia iloa pe aisea ua e faia ai lenei filifiliga”. Na tali mai le Alii, o le a le mea na faia e Tavita i le tusi a Samuelu 6:14?. Sa ou tali atu ‘Sa siva ma lona malosi atoa.” Ona ia fesili mai lea, Pe e mafai ona e faasino mai iā te aʻu se vaega i le Tusi Paia na siva ai Saulo mo aʻu? O le taimi lenā na ou iloa ai le māfuaaga na teena ai e le Atua Saulo. E le faapea ona e le’i siva o ia mo le Alii, ae o le loto o le tagata ina ia vivii pea mo le Alii. Na faateleina le alofa o Tavita i le Atua a o siisii lona tulaga i lana galuega, ae na faaitiitia le alofa o Saulo mo le Atua a o avea o ia o se tagata ua maualuga lona tulaga. O fea o le toalua lenei e faapei o oe?

Pe afai ua faaitiitia le alofa o se tagata talitonu i le Atua, e lē o mamao ese lenā tagata mai le faatigā iā te ia, ma e ono iʻu ai i le teena e le Atua o ia. Afai e te lē talitonu mai iā te aʻu, faitau le Filipi 1:9-10 “O la‘u tatalo fo‘i lenei, ‘ia fa‘atuputeleina pea lava lo ‘outou alofa, ma le iloa lelei, ‘atoa ma le fa‘autauta uma; ‘ina ‘ia masino ‘iā te ‘outou mea uiga ‘ese‘ese. ‘Ona ‘avea ai lea ‘outou ma ē fa‘amaoni, ma le lē ta‘uleagaina pe a o‘o i le aso o Keriso.”

Ia faʻateleina lou alofa i le Atua i aso uma o totoe o lou olaga i le suafa o Iesu, Amene.

OPEN HEAVENS

MATALA LE LAGI MO LE ASO LULU 9 OKETOPA  2024

(tusia e Pastor EA Adeboye)

Manatu Autu: (O le Uiga o le Ola nei) ( The meaning of Life)

Tauloto -Tusi Paia–Ioane 6:35 “Ua fetalai atu Iesu ‘iā te i latou, “O a‘u nei le areto o le Ola; o lē sau ‘iā te a‘u, e lē fia ‘ai lava ia; o lē fa‘atuatua fo‘i ‘iā te a‘u, e lē toe fia inu lava ia.”

‭‭

Faitauga – Tusi Paia –Ioane 10:9-10

E toatele o loo saili pea le uiga moni ma le faamoemoega autu o le ola nei. Ua ou iloa e pau le tulaga e faaalia ai le uiga moni o le ola nei o le iai o se mafutaga ma Iesu Keriso. A leai Keriso, e leai se uiga moni o le ola nei. A leai Keriso, o le tagata ua pei se vaa, e fesouaina i luma ma tua i galu o le lalolagi. E mafai ona tausinio e maua taunuuga lelei, maua oa e tele, manuia I tulaga tofi ma tauoloa I so’o se vaega, maua le fiafia I manuia, peitai e vave ona latou iloa, e na o sina taimi e faamalieina ai, aua e leai se mea e faamalieina ai le tagata ua na o Keriso. Tusa poo le a le mauoa e oo iai le tagata, fai mai le Failauga 5:10, o tupe e le malie ai seisi. E te maua mea uma e te manaomia i le ola nei ma le amio Atua ia Keriso( 2 Peteru 1:3). 

I le Efeso 2:1, fai mai Paulo o I latou e leai Keriso, e oti i amio leaga ma agasala. Fai mai le fuaiupu 3 e faia foi e I latou mea e loto iai le tino ma le mafaufau, ma afai e umi ona e soifua, e te iloa ai, o le tuinanau o le tino e le faamalieina ai le tagata. O le mea e tatau ona maua e tagata, o le olioli latou te saili, o le faamalieina o le naunautaiga e fesootai ma Le na faia I latou, le Alii o Iesu Keriso. A leai, e latou te lagona le gaogao i totonu. O taavale, faailoga, tulaga tauoloa, ma le oa e tele o le lalolagi nei, e le mafai ona faatumuina vaega gaogao I o latou loto. A leai se mafutaga ma Keriso, o latou olaga e le atoatoa ma iai se uiga. O le mafuaga lea a fanaufouina le tagata, ua faafuasei ona lagona le filemu i totonu e le mafai ona faamatalaina. E sosoo mai ai ma le olioli. Ua faafuaseia ona iai le aoga ma le faamoemoega o le olaga. Le au pele e, ia ave lau faamuamua ia Keriso. Aua e te faafesuiai o ia I ni tupe po seisi lava mea aua e leai se aoga ia te oe pe afai e maua le lalolagi uma ae maumau ai lou agaga (Mataio 16:26). 

O tagata e leai Keriso e le gata e latou te ola I se olaga o faanoanoaga ma fesouaina i le lalolagi nei, e puapuaga foi e faavavau i seoli. O le mea pito sili ona leaga I seoli o le afi e mumu e  le faamalieina, ma anufe e le pepe, e latou te faatauga iai latou (Mareko 9:48), o le tuueseeseina ma le Atua e faavavau ma le matua salamo i le filifili pea e faaauau i le agasala e ui ua faafia ona faalogo i le feau a le Atua mo le faaolataga. Faasaoina mai lou tagata mai le faatauga i seoli i le tuuina atu lea o lou ola ia Keriso I le aso pe afai e lei faia lava, ma faamautinoa e te ola faapaiaina e amata atu nei. 

Afai ua e fanaufouina, tago e tusi lenei feau i se pepa e te faaaogaina e talai atu ai le talalelei ma manumalo ai agaga mo Keriso. I le suafa o Iesu, Amene. 

OPEN HEAVENS

MATALA LE LAGI MO LE ASO LUA 8 OKETOPA  2024

(tusia e Pastor EA Adeboye)

Manatu Autu: Tatalo e le mafaia 2 ( Impossible Prayers 2)

Tauloto -Tusi Paia–Mataio 19:26 “Ona silasila atu ai lea o Iesu, ‘ua fa‘apea atu ‘iā te i latou, “E lē mafaia e tagata lenei mea, ‘ae mafaia mea uma e le Atua.”

‭‭

Faitauga – Tusi Paia –Ioelu 2:25-26

O le a faaiu atu I le aso, a’u a’oa’oga I tatalo e matua faigata ma le mafaia. E iai se muagagana taatele o se avanoa ua misia e le toe maua. Mo le tagata na faia lea muagagana, e na te lei tuuina le Atua I totonu o lea faaupuga. O le Atua, e leai se mea e na te le mafaia. E na te faafoisia se mea e le mafai ona toe faafoisia. E leiloa pe ua e misia se avanoa i taimi ua sola, ma ua e manatu e le mafai ona toe maua lea avanoa. Peitai e leai se mea e le mafaia e le Atua. 

I le Esekielu 37:1-11, na toe faafoisia e le Atua le Ola I ivi ua mamago. E mafai e le Atua ona toe faafoisia le avanoa ua e manatu ua leva na le toe maua pe afai e iai lou faatuatua. O Lana matafaioi sili lea o le faia o mea e le mafaia. 

Ao ou aoga i le Iunivesite o Lagos, na ou tusi talosaga I Le Matagaluega o aoga mo se sikolasipi e faia ai se faailoga maualuga atu. Ua maea se taimi umi e le maua mai se tali. Na ou maua se tupe e totogi ai lo’u pili aoga ma faagasolo pea le olaga. Ina ua lata Ina maea lou faailoga lea, na ma fetaui ma se tagata ou te masani ai a’o ma aooga I le kolisi. Na ma fetaui I taaloga sa iai uma a ma aoga. Ao ma talanoa, na ou iloa ai e faigaluega I Le Matagaluega o aoga. Ua ou fai iai, e ese ma le faigata o le tou Matagaluega. Sa ou tusi talosaga mo se sikolasipi ae leai se tali, ae sei maua foi se avanoa e faatalatalanoa ai. Na fai mai o le a ia alu e vaai ma tilotilo I la’u mataupu. Na ou manatu e maua nei lou avanoa e faatalatalanoa ai lau tusi talosaga, peitai ua faateia au Ina ua maua lau tusi ua maua lau sikolasipi. Ona ua maea ona totogi lou pili, o lea na ou faaaogaina ai le tupe e faatau ai lou fanua ma fausia ai lou fale muamua. Na faaaoga e le Atua se ma talanoaga faasamasamanoa e toe faafoisia ai se avanoa na ou manatu ua misia ma ua mafai ai ona fausia lou fale muamua. 

E leiloa pe ua e misia se mea e sili atu ona taua. Afai ua leiloa lou uluai alofa mo Keriso, ma o lou naunau ma le alofa ia te ia ua mou atu, e toe faafoisia e le Atua lou alofa mo ia I le aso I le suafa o Iesu. E mafai ona sili atu ona e alofa i le Atua e sili atu muamua. E pau lau mea e faia, o le galulue ma ia, a’o ia taitaia oe I le mea e tatau ona faia, Ina ia toe faafoisia lena uluai alofa. E mafai e le Atua ona toe feliuaina mea e le mafaia ona toe feliuaina. I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 7 OKETOPA  2024

(tusia e Pastor EA Adeboye)

Manatu Autu: Tatalo e le mafaia ( Impossible Prayers )

Tauloto -Tusi Paia–Numera 13:30 “Ona vavao ai loa e Kalepo i le nu‘u ‘ia filemū i luma o Mose, ‘ua fa‘apea atu, “Se‘i tatou matuā ō a‘e lava i ai, ma fai ai mo i tatou; auā e mafai lava ‘ona tatou manumālō ai.”

‭‭

Faitauga – Tusi Paia –Mareko 11:12-24

I le fa’aauau ai pea o la’u a’oa’oga i vaega eseese o tatalo, o le asō, o le a taula’i la’u vaai i tatalo  matua faigata e le mafaia e tagata. Fai mai le Tusi Paia e iai lava vaega e le mafaia e le tagata, ae o le Atua, e mafaia mea uma (Mataio 19:26, Luka 1:37). Afai e iai sina masalosaloga I lea tulaga, vaai I le Redemption City a le Ekalesia Redeemed Christian Church of God (RCCG), e te iloa ai, e leai se mea e le mafaia e le Atua. E iai ni fale I totonu o le Redemption City e na o le fitu aso ma fausia ai ae o loo tutu pea ua sili ma le 40 tausaga. O le faleaoga muamua o le Kolisi Aoga Maualuga e fogafalelua, na fausia i le 18 aso. Ou te lei faaaogaina ni tagata inisinia, na ou faaaogaina inisinia mai le lagi, aua e leai se mea e le mafaia e lo’u Atua. 

O le taimi e faafofoga ai le Atua i lou fofoga faapea mai ‘e le mafaia’, e ono le mafaia. Aua foi fai mai le Numera 14:28, “‘Ia e fai atu ‘iā te i latou, “O lo‘o ola a‘u,” o lo‘o fai mai le ALI‘I, “‘Ou te faia lava ‘iā te ‘outou e pei o a ‘outou ‘upu ‘ua o‘o mai i o‘u taliga:”

E ui e le faatuatua le tagata, o le finagalo o le Atua e faia lava, ma e na te faatuina le augatupulaga fou e faataunuuina le galuega. I le Numera 13:14, e 12 tagata na o e asiasi i le nuu o Ieriko, e toasefulu na fo’i mai ma faapea mai, e le mafai ona latou avea le nuu ae toalua na foi mai ma faapea mai, e mafaia ona latou avea le nuu. Na faamautinoa e le Atua le tafieseina ma feoti i le vao tagata uma na fai mai e le mafaia, ae na o le toalua na faapea mai e mafai na o’o I le nuu na folafolaina. I le 2 Tupu 7:1-17, na folafola e Elisaia se tulaga e ono le mafaia, o le siitia o le tamaoaiga i totonu o le 24 itula. Na filemu tagata uma na faalogo iai ae tasi se tamaloa na fai mai, tusa pe fausia e le Atua ni faamalama I le lagi, e le mafaia. Na taunuu le siitia o le tamaoaiga, ae e lei tofo iai le tamaloa lea. Aua nei e faia se upu e le mafaia, o le taimi e fai ai e le tagata, e ono le mafaia ma taunuu I lea tagata. 

Ina ua fetalai Iesu i le Ioane 14:14, “‘Āfai tou te ole atu i se mea i lo‘u igoa, ‘ou te faia lava, e le faapea o fia malie. O lea, a ou ole atu I se mea, tusa poo le mea o loo ou ole atu e ono le mafaia, e na te foai mai ia te au aua e leai se pa puipui o mea ou te ole atu ai e tusa ma lona finagalo (1 Ioane 5:14-15). 

Le au pele, aua nei iai se masalosalo pe a oo I le Atua. Aua le taumafai e fia malamalama I mea e mafai ona ia faia poo le auala foi e na te faia ai. Na o le talitonu ma faatuatua. Talitonu a iai le Atua, e mafaia, ma e faia lava, I le suafa o Iesu, Amene. 

OPEN HEAVENS

MATALA LE LAGI MO LE ASO SA 6 OKETOPA  2024

(tusia e Pastor EA Adeboye)

Manatu Autu: Tatalo Matautia ( Dangerous Prayers )

Tauloto -Tusi Paia–Filipi 3:10 “Ina ‘ia ‘ou iloa o ia ma le mana o lona toetū mai ma ‘ia fa‘atasi a‘u i ‘ona tigā, ‘ona ‘ua fa‘atusaina a‘u ‘iā te ia i lona maliu,”

‭‭

Faitauga – Tusi Paia –2 Tupu 2:9-12; 2 Tupu 2:23-24

I le fa’aauau ai pea o la’u a’oa’oga i vaega eseese o tatalo, o le asō, o le a taula’i la’u vaai i tatalo mata’utia. O nisi o tatalo e mata’utia auā o le tulaga e tupu mulimuli mai ai pe a tali le Atua i nei tatalo e lamatia ai le soifua. O le mafuaaga auā o lē ua tuuina atu i ai o mea e tele, latou te fai atu fo’i ia te ia e aumai mea e sili ona tele (Luka 12:48).

O le tatalo ia fa’au’u oe e le Atua ma foai atu ia te oe meaalofa fa’aleagaga o se tatalo mata’utia. O le tele o lou fa’au’uina o le tele lea o le lamatia o oe e le fili. A e faitau i le tusi o Faamasino 15; e te iloa ai le malosi e tele na iā Samasoni. Peita’i i le Faamasino 16; o loo ta’u mai ai le mata’utia o lea malosi. O le mafuaaga lea e umi ai se taimi ou te tatalo ai mo lau fanau o loo galulue tāla’i mo le mālō o le Atua. Ou te faafetai i le Atua mo o latou olaga ma vavega o tutupu e ala iā i latou, peita’i ou te iloa fo’i o le fa’au’uga ua matilatila ai i latou i le vaai a le tiapolo, ma e mana’omia ona malu puipuia i latou.

O tagata fa’au’uina, e tulituliloa i latou e le tiapolo. I le 2 Tupu 1:7-15, na auina atu e le tupu fitafita e 153 e pu’e Elia. Peita’i i le 2 Tupu 6:8-16, ina ua mana’o le tupu e pu’e Elisaia, o le sa i ai le faaluaina o le fa’au’uga sa ia Elia, na ia auina atu le autau atoa. E i ai se laasaga o le tamāoaiga ma le amanaia a e ole ai i le Atua ma ia avatu ia te oe, e i ai ona aafiaga ogaoga. O le ala lea, o isi taimi, e taofia e le Atua nisi o mea mai isi o le au uso, aua ua ia silafia latou te lē mafaia ona fa’afoe. E pei o Elisaia, a e ole atu mo se maualuga o le fa’au’uga ma avatu e le Atua ia te oe, o le a suia lou fofoga, e mafai ona e faamanuia ai ma e fa’amālaia ai fo’i. I le 2 Tupu 2:19-24, na faatonu e lē perofeta o Elisaia ona alu ese ai lea o le malaia sa i luga o Ieriko i le tele o augātupulaga, ua lē toe vaaia e o’o mai i le asō. Na faapea fo’i ona ia folafola se fetu’u i luga o ni tamaiti na faatauemu ia te ia e to’a 42, ma fano uma ai i latou.

E lelei lou mana’o atu i mea tetele, peita’i ia e manatua le tusi o Numera 20:1-12, e 40 tausaga o ta’ita’i e Mose le fanauga a Isaraelu, ma e tasi lana mea sesē na fai ae avea ma ala na fetalai ai le Atua e lē o’o I le nu’u na folafolaina. O le mafuaaga lea e tāua ai ona e tatalo mo ou ta’ita’i e lē aunoa, aemaise i ou ta’ita’i fa’aleagaga. O le mana o ia i latou e mafai ona faa malolō ai ma fasioti. I le Galuega 5;1-11, na faatau e Anania ma Safaira se fanua, ma ave se vaega itiiti o le tupe na maua, ia Peteru, ma na feoti i laua i lo la tala pepelo.

O le fa’au’uga e mafai ona faamanuia, fasioti, fa’amālōlō ma fa’ao’o le ma’i; ia faa mautinoa e mafai ona e tauavea ma faafoe ae e te le’i ole atu ia e maua. I le 2 Tupu 5:1-27; na fa’amamāina Naamanu i lona usitai i se fa’atonuga mai ia Elisaia, o le perofeta lava lea e tasi ma lana upu na lepela ai Keasi. Faa mautinoa ua fa’amamāina oe i le toto o Keriso ae e te lei ole atu mo le fa’au’uga mai ia te ia. I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 5 OKETOPA 2024

(tusia e Pastor EA Adeboye)

Manatu Autu:Tatalo faigata (Hard Prayers)

Tauloto -Tusi Paia–Isaia 45:11 “O lo‘o fa‘apea ‘ona fetalai mai o le ALI‘I, le Pa‘ia o Isaraelu, ma lē na faia o ia, Fesili mai ia ‘iā te a‘u i mea o le a tutupu, fai mai ‘iā te a‘u i o‘u atali‘i ma le galuega a o‘u lima.”

‭

Faitauga – Tusi Paia –2 Tupu 20:1-11

I aso e tolu ua mavae, sa ou talanoa i tatalo faigofie, o le asō o le a o’u tautala e uiga i tatalo faigata.

Ua e tatalo i tatalo faigata pe a e fai i le Atua e sui le faatulagaga faanatura o mea ma fa’alēaogā tulafono faavae e pulea le lalolagi. Fa’ata’ita’iga, ina ua taofia e Iosua le oso a’e o le la, na ia tatalo mo se mea e fa’atu’iese I le fa’ata’atiaga o mea, ua uma ona foafoa poo le natura (Iosua 10:12-14). E faapea fo’i I le Tusi faitau mai le Tusi Paia o le asō, na mana’o le tupu o Esekia ia fo’i i tua le la, e fai ai ma faailoga e faamalolō o ia e le Alii. O se tatalo faigata lea tatalo peita’i na fai lava e le Atua. Afai na tali le Atua i nei tatalo ma talepe tulafono o le natura o mea ona ua ole atu se isi ia te ia, o lona uiga e leai se mea e faigata ona e ole atu ai i lou Atua e fai mo oe.

I tausaga ua mavae, na sau ai se tinā ma’itaga ia te a’u, fai mai ua i ai lana fanau teine, peita’i ua taufa’amata’u atu le aiga o lona toalua e tuliese ia mai le fale pe a lē fanau mai se tama poo le (atalii) i lona ma’itaga lea. Na o’u ta’u i le tinā, e tusa ai ma le faa saienisi, o le itupā o le pepe (alii/tamaita’i ) e maua i totonu o le 72 itula talu ona ma’itaga le tinā. Na tali le fafine e lē o a’u e suia le itupā o le pepe; pau lava lona mana’o ia o’u Ioe faatasi ma ia i le tatalo. Na fa’apenā ona o’u fai, ma ia fanaua ai loa se pepe tama. E mafai ona e fai mai atonu o se pepe tama na i ai i le amataga a’o lei faia tatalo, peita’i, na o’u faamatala lenei ta’utinoga i la’u lauga i se tasi aso, ma na sau se fafine faafeiloai a’u ina ua tuua le sauniga. Ua valu masina o lona ma’itaga ma ua uma na fai le fa’ata ma iloa ai o le tama lana pepe o loo tauave. Peita’i e mana’o i sana tamateine ona e mana’o e faaaoga e lana tama ona ofu pe a matua. Sa ou fai i le tinā, “Ua e iloa lelei ua malosi le tino o pepe i le taimi nei.” Na tali le tinā e lē o a’u e faia le vavega; pau lona mana’o ia o’u malie faatasi ma ia i tatalo. Na faapea fo’i ona o’u fai ma sa fanau mai e lenei tinā se pepe teine.

E leai se mea e faigatā i le Atua (Ieremia 32:27). Na ia faia tulafono o le foafoaga ma e mafai ona ia taofia i latou i soose taimi. E mafai e le Atua ona feliua’i mea ua tā mau, mo oe pe a e ole atu ia te ia. A’o fai se tasi o a matou polokalame, na mana’o se tamaloa e vaai i vavega sa tutupu i le la’oai ma ia musumusu ai i le Atua e mana’o ia faaopopo lona maualuga/umi. Na tupu lona maualuga i le taimi lava lea, ma na mafai ona vaai uma i ai tagata. Ioe, e leai se mea e faigata I le Atua. I le suafa o Iesu, Amene.