Samoan Devotional

OPEN HEAVENS

MATALA LE LAGI MO LE ASO LUA 24 SETEMA 2024

(tusia e Pastor EA Adeboye)

Manatu Autu: Fesoasoani e Tatau ai 2(Helpmeet 2)

Tauloto -Tusi Paia– Faataoto 12:4“O le avā amio lelei, o le pale lea i lana tane; a o lē fa‘amā, e tusa o ia ma le mea e pala ai ona ivi.”

Faitauga – Tusi Paia – Faataoto 31:10-31

O le aso, e faai’u ai a’u aoaoga i le uiga tonu o le avea ma se fesoasaoni e tatau ma lelei moni. E tele ava e talai mai o i latou o ni “fesoasoani e tatau ai” peitai e le moni.  A faa’pea o oe o se ava e nana tupe, ma le manatu e faapea: “O la’u tupe o la’u lava tupe, ma o le tupe a lo’u to’alua o le ma tupe,” o lona uiga e le o oe o se fesoasoani tatau ai! A e fesoasoani i se tagata, e tatau ona e malie e faitaulaga i au mea ma puna’oa. E le mafai ona e fesoasoani i se tagata, pe afai e le mafai ona e fa’afetaui mana’oga e faigofie ona e faamalieina. Ioe, o le matafaioi a se tane o lona tausia lelei o le lotoifale o lona aiga, ae a fa’apea e te gafatia ona faatino, e mafai ona e faapea, ‘Aua le popole fua i le mea lena, ua uma ona ou faia’. O le fesoasoani i se tagata, o lou ave’eseina mai o ni ‘avega mai ia te ia, ae le o lou tūtū ma matamata i lona tau’aveina to’atasi o ni ‘avega.

I le ‘avea ma se fesoasoani tatau, e mana’omia lou matuā a’afia i mea e faia e lau tane, ma e tatau ona e iai i so’o se mea e manaomia ai se fesoasoani, ae fa’apitoa lava i taimi e na te talosagaina ai se fesoasoani. E le mafai ona ‘avea oe ma fesoasoani tatau ai pe a fai e te le gaua’i ia te ia. Afai e te fesoasoani atu i se tagata i se tulaga moomia, e latou te faailoa mai ni fa’atonuga i auala e fa’atino ai lau fesoasoani. Ma o taimi latou te avatua ai ia fa’atonuga, e tatau ona e tali:

“Ua lelei, la’u pele” aua afai e te tali atu “E leai” o lona uiga ua manino mai e te le o fia fesoasoani. A fai foi e te fautuaina se isi tulaga e sili atu, e tatau ona e tali ma faapea atu iai:

E a pe a faapea ona ta faatinoina i le auala lea” ae le o lou tali masau atu: “LEAI”. Aua a fai e moni lou naunau ia tula’i manuia mai lau tane, o le a e faia so’o se mea e te fesoasoani atu ai ia te ia.

I le taimi sa matou o atu e nonofo i le taulaga o Redemption City, sa le faigofie mo lo’u to’alua. Aua ua matou o ese mai le ogatotonu lemu a le taulaga, a ua matou nonofo i le ogatotonu o le vaomatua, a o le fale sa matou nonofo ai, e leai ni fa’amalama o le fale- O le fale lea ua avea ma ofisa tutotonu o le Open Heavens International Centre i le asō. Ae sa le gata i lona taliaina ma ulu atu i lea tulaga faigata, ae sa ia matua fa’asaga atu loa e tala’i le talalelei ia Iesu Keriso i nofoaga lalata ane. Sa fa’amaopoopo e lo’u to’alua sana vaega to’a laiti e fesoasoani ia te ia, sa malaga atu i isi nu’u tala ane ma faavae ai isi lotu o lo’o maopoopo lava e o’o mai lava i le asō, ua o’o atu i le nuu o Ibafo e 20 kilomita le mamao ‘ese atu. O ia o se fesoasoani atoatoa ona lelei e ‘avea ma faataitaiga o se tagata e matua tuuina atoa lona loto atoa i mea fai, ma ia faia mea uma I lona malosi ma le iloa, ina ia manuia ai lona to’alua, poo lona alii. Po o oe oe se fesoasoani e tatau ai ma faamaoni i Lau tane? I le suafa o Iesu, Amene.

OPEN HEAVENS

MATALA LE LAGI MO LE ASO GAFUA 23 SETEMA 2024

(tusia e Pastor EA Adeboye)

Manatu Autu: Fesoasoani 1(Helpmeet 1)

Tauloto -Tusi Paia– Kenese 2:18 “Ua fetalai mai fo‘i le ALI‘I le Atua, “E lē lelei ‘ina to‘atasi o le tagata; ‘ou te faia sona fesoasoani e tatau ma ia.”

Faitauga – Tusi Paia – Kenese 2:18-25

Ina ua faia e le Atua le faaipoipoga i le Kenese 2, na ia faia le fafine e fai ma fesoasoani i le tamaloa. I nisi faaupuga, na faia le ava e fesoasoani I le tane e faataunuu le valaau a le Atua ia te ia. Peitai, o nisi ava e matua le fesoasoani lava ia latou tane, ma o iina e amata ai faafitauli i le aiga. 

Muamua, e le mafai ona fesoasoani se fafine i lana tane i luga atu o lona iloa ma le silafia. Mo se faataitaiga, afai o sana tane o se faipisinisi e fai sana pisinisi e faitau miliona, e tatau ona ia siitia le ava I le tulaga e mafai ai ona maua se totogi e faitau afe. I lena tulaga, e ono siitia ai lona iloa o le pisinisi ma faigofie ai ona fesoasoani I lana tane. Peitai, a faapea e maualalo le tulaga o lona iloa, ae valaau mai le tane mo se fesoasoani, e na te ono le mafaia ona fesoasoani tele e ui o loo naunau e fesoasoani. I lou tulaga faifeau, e mafai ona e tatalo mo le ono itula, taitai ma a’oa’o lau ava ina ia mafai ona tatalo I le fa itula. Ma a o’o I le aso e manaomia ai le tatalo, e mafai ona ia tu I le va mo oe I se taimi talafeagai, afai e le mafai ona e auina atu lau ava e lauga e sui ai oe I se fonotaga ua le mafai ona e aumai atu iai, o lona uiga e te lei a’oa’o ia te ia ma e lei saunia o ia I vaega uma e avea ai o ia ma fesoasoani. 

O lou fesoasoani e tatau ona lua faatasi e faamalosi ia te oe pe a oo I le taimi e te faavaivai ai. Ma o le malosi o lou fesoasoani e fuafua iai le mafai e ono siitia ai oe I luga I taimi ua maualalo ai. O le tane, a tupu se mea faaletonu ma ua e pau, e te pau i le tulaga o loo iai lau ava. E pau le tulaga e mafai ona fesoasoani ai lau ava o le tulaga o loo iai o ia, I le itu tau tamaoaiga,  faaleagaga ma Isi.. O lona uiga, a e le taumafai e a’oa’oina o ia  e latalata i le tulaga o loo e iai, e te pau maualalo I ia vaitau, aua o le a e faalagolago i lau ava mo mea uma seiloga e amata ona e toe uluola ma toe tuputupu a’e. O oe le tane, e tatau ona e taumafai e atia’e lau ava ina ia avea o ia ma se fesoasoani moni mo oe, I le suafa o Iesu, Amene

OPEN HEAVENS

MATALA LE LAGI MO LE ASO SA 22 SETEMA 2024

(tusia e Pastor EA Adeboye)

Manatu Autu: Alofa Moni (True Love)

Tauloto -Tusi Paia– 1 Peteru 3:7 “Ia fa‘apea ‘outou tane, ‘ia fai le ‘āiga ma le poto, ‘ia fa‘autauta i le tino vaivai o le fafine ma āva ‘iā te ia ‘ona ‘ua tofia fa‘atasi i le ola e foa‘ifuaina mai, ‘ina ne‘i fa‘alavelaveina a ‘outou tatalo.”

Faitauga – Tusi Paia – 1 Korinito 13:4-8

Fai mai le Tusi Paia e tatau i tane ona alolofa ia latou ava e pei ona alofa Keriso I le Ekalesia (Efeso 5:25). O lenei poloaiga o loo atagia ai, o le alofa e le o se lagona, ae o se faaiuga e faatino ia faifaipea le alofa mo le lelei o le ava. I nisi faaupuga, o le soifua lelei ma le manuia o lau ava e tatau ona faamuamua i le tane. I le Luka 22:42, e lei lagona e Iesu se naunautaiga e maliu mo le Ekalesia. Na ia taumafai ma tatalo faatauanau I le Atua e aveesea le puapuaga ma le oti o loo ia agai atu iai. Na ia matua tatalo ma le faatauanau ua oo ina afutoto, peitai o le galuega ua fuafuaina e tatau ona faataunuuina. Na ia alu atu I le satauro, na faalumaina, sauaina ma tigaina, na oo ina maliu mo I latou na alofa iai. E faapena le tulaga e tatau ona fai e tane ia latou ava, alofa iai latou e pei ona alofa o Keriso I le Ekalesia ma tuuina atu lona ola mo ia. Tane, e mafai ona e faia lea tulaga mo lau ava?

A ou vaai i tane o ni kerisiano o loo faatau seevae ma latou ofu fou ae o loo oofu latou ava I ofu ma seevae ua matua tuai, ou te manatunatu poo faitau ea latou Tusi Paia. E sili atu la le leaga o tane e sauaina a latou ava. O oe le tane, afai e te alofa I Lau ava, e te tausi ia te ia ma faamuamua mea o loo ia manaomia i lo oe. E le lava tupe e faafiafia ia te ia. Fai mai le Efeso 5:28, “O lo‘o fa‘apea ‘ona tatau ‘ona alolofa o tane ‘iā latou lava avā, fa‘apei o latou lava tino; o lē alofa i lana lava avā, o lo‘o alofa o ia ‘iā te ia lava;”

‭‭

O loo faatonu mai I le fuaitau o loo taua I luga tane e alolofa ia latou ava e faapei o latou lava tino. E pei ona latou aai i meaai lelei, ofu ofu lelei ma le faatagaina se mea leaga e oo i o latou tino, e faapena foi ona latou faia ia latou ava. O lou tulaga o le tane, e te faaaogaina mea uma e te maua, o upu ma galuega e faia e faaali ai i lau ava lou alofa ia te ia. A e faia, o oe o se tane lelei, ma o se tasi o faamanuiaga e maua e se tane lelei, e tusa ma le tauloto o le aso, e faafofoga le Atua I ana tatalo. Afai o oe o se tane, o e tausia lelei lau ava? A vaai tagata i lau ava, e latou te iloa atu lou alofa ia te ia? I le suafa o Iesu, Amene. 

OPEN HEAVENS

MATALA LE LAGI MO LE ASO TOONAI 21 SETEMA 2024

(tusia e Pastor EA Adeboye)

Manatu Autu: Gaua’i poo le Felagolagoma’i(Submission vs Cooperation)

Tauloto -Tusi Paia– 1 Peteru 3:5 “Auā sa fa‘apea fo‘i fafine pa‘ia anamua ‘ona teuteu ‘iā i latou, o ē na fa‘amoemoe i le Atua, na usiusita‘i i latou ‘iā latou lava tane.”

Faitauga – Tusi Paia – Efeso 5:22-33

O le faaipoipoga o se meaalofa matagofie mai le Atua, na fuafuaina e ala mai ai le olioli ma le atoatoa iā i laua uma, o le tane ma le avā. E pei o isi uma meaalofa mai le Atua, na te aumaia faatasi le meaalofa ma lona ta’iala - o le Upu a le Atua. I le Tusi faitau o le asō o loo faamanino au’ili’ili mai ai le vā fealoa’i o le tane ma lana avā. O tane e tatau ona alolofa iā latou avā faapei ona alofa Keriso i le ekalesia, a’o avā e tatau ona gaua’i iā latou tane.

Toatele fafine e lē malamalama i le uiga moni o le gaua’i. Latou te fai mai o loo gaua’i ae lē iloa na o le felagolagoma’i la e fai. O le felagolagoma’i o lo oulua malilie faatasi lea ma lou toalua auā e tutusa mea o loo lua manana’o ai. A’o le gaua’i o le usitai i le mana’o o lau tane tusa pe e te lē mana’o ai. E toatele fafine e faigata ona gaua’i i a latou tane auā ua talanoa tagata uma i le aiā tutusa o tane ma fafine. Peita’i e lē o le faasinoga lea a le Tusi Paia faatatau i ulugalii.

E lē faapea a gaua’i o lona uiga o se pologa poo se auauna, a’o le faatinoga o le faaaloalo ma le usitai mai le loto fuatia ifo o le avā I lana tane o ia o le ulu o le āiga. A e usiusita’i i lou pule I le ofisa, e lē ona o oe o se pologa, ae ona e i ai le faatulagaga e tatau ona tausisia mo le sologa lelei o le ofisa. E i ai se muagagana faaperetania faapea, e lē mafai e ni kapeteni se toalua ona fa’afoe se va’a se tasi. O oe lenā le avā, o lau tane o le kapeteni o le lua aiga; o lou gaua’i ia te ia o se vailaau autu e faa mautinoa ai e manuia ma fiafia le lua ulugalii.

I tausaga ua mavae, sa i ai so’u aso tausi ou te lauga ai i se Iunivesite, ma sa masani ona sau ai se fafine ia te a’u ma faaseā e uiga i le loto ma’a’a o lona toalua ma mana’o mai ou te tatalo ia alu ese le loto ma’a’a. Ina ua uma se vaitaimi, sa tonu i lo’u loto ou te lē toe tatalo mo le manaoga o le tinā. Sa o’u faapea atu ia te ia, “a e taunuu i lou āiga, laulau le mea taumafa a lou toalua ma tu’u i luga o le laulau, valaau ia o lou alii ma fai i ai e sau e tausami. A nofo ia I le laulau ave I ai se vai fafano, ona e tootuli lea ma u’u le apa vai ae sei fafano ona aao.” Fai mai le fafine, “Oi e leai, e tutusa i maua, o a’u fo’i o le polōfesa pei o ia.” Na o’u tali I ai afai e mana’o i la’u fesoasoani, talia la’u fautuaga. Na filifili le fafine e talia la’u fautuaga, ma i le taimi muamua, na masalo lona toalua pe na fa’ao’ona e le fafine lana meaai. Na ta’u i ai e le fafine o lana faifeau na a’oa’o atu ia te ia le mea ua ia fai, ma faafuase’i ai ona liua le loto ma’a’a o lona toalua. Na mulimuli le tamaloa lenei i lona toalua i le sauniga lotu na soso’o ai ma faaolaina ai lona agaga. Na amata ai iina ona fua lauusiusi ma uluola le la ulugalii.

O le gaua’i e le o se fai ma pologa, o se faailoga o le poto, mo se ulugalii manuia ma fiafia, i le suafa o Iesu. Amene.

OPEN HEAVENS

MATALA LE LAGI MO LE ASO FARAILE 20 SETEMA  2024

(tusia e Pastor EA Adeboye)

Manatu Autu: O aga e aualofa ai e le o se amioleaga ( Romance is not ungodly )

Tauloto -Tusi Paia–Pese a Solomona 1:2 “Ia sogi mai o ia ‘iā te a‘u i sogi o lona fofoga; auā e sili ‘ona lelei o lou alofa i le uaina.”

‭‭

Faitauga – Tusi Paia –Pese a Solomona 2:1-4

O lou tulaga moni o se kerisiano, e le faapea e aveesea ai aga e aualofa ai I totonu o se ulugalii. O le faaipoipoga e pau lea o le tulaga e faatagaina ai le faaalia o lagona ma aga e aualofa ai i le va o se alii ma se tamaitai. O nisi faifeau e seasea o ma le faletua e fai se la mafutaga e o na o laua aua ua manatu e faalavelave ao ave le faamuamua i mea faaleagaga. O nisi ua le toe taaalo tausua ma le toalua. Le au pele, o le faauuga e na te le faaitiitia le manomia o aga e aualofa ma faaalia le loloto o le alofa I totonu o se faaipoipoga. 

O Isaako o se tagata faauuina a le Atua ma o se faipinisini manuia, peitai i le Kenese 26:8, fai mai le Tusi Paia na taaloalo Isaako ia Repeka: “‘Ua loa ‘ona nofo ai o ia, ‘ona va‘ai atu ai lea o Apimeleko le tupu o Filisitia i le fa‘amalama, fa‘auta fo‘i, ‘ua iloa, ‘ua ta‘a‘alo Isaako ma Repeka lana avā.”

Auale faaalia le loto maaa I le lua faaipoipoga, aua le fiafia i se Isi mea e ese mai lou toalua. Ia avea le taimi e te lua mafuta ai ma lou toalua e malie ma fiafia ai ona avea lea ma ala e faosofia ai le toe fia vave vaai o le tasi i leisi. Afai ua e faaipoipo, e te manatua taimi muamua a lua talanoa, e faitau fia itula ae lua te lei faaipoipo ma faia fanau; taumafai e toe faaolaola mai le lua mafutaga i le tulaga lena. O lou toalua lava lena na e fiafia ma naunau iai mai le amataga, ma o vaega uma o lou toalua sa e fiafia ma alofa ai ia te ia, o loo iai pea I totonu. Aua nei e faatagaina mea eseese o lenei olaga e aveesea ai lau faamuamua I uiga matagofie o lou toalua. 

Fai ma tusi se solo i lou toalua ona e faitauina lea ia te ia I se siosiomaga e faaosofia ai lagona. Saili in auala eseeese e te lua mafuta ai o se ulugalii e feofoofoai le alofa. Tusi se yusi ma tuu I totonu o le ato a lou toalua e faateia ai o ia pe a tau ai I le ofisa, e ataata ma  fiafia ai. Fai ni lua igoa valaau faapitoa na o oulua e aualofa ai. E oo mai I le taimi nei, e iai lava le igoa e valaau ai a’u e lo’u toalua pe a na o maua. E iai foi le igoa faapitoa ou te valaau ai lo’u toalua pe a na o maua ma ou te vaaia lava ona foliga ataata ma le alofa. A na o maua, o se ulugalii e taaooto ma mafuta vavalalata, ae le o se faifeau ma lona faletua. E mafai ona avea le lua ulugalii e pei o le matagofie o le lagi ua o’o mai i le lalolagi pe afai e te lua fuafua, faia, faaalia le loloto o le alofa i le lua va e pei ona iai i le taimi faatoa faaipoipo ai. Aua nei gata lagona alofa ma aga e faatinoina pea e faaalia ai le alofa ma le fiafia I le lua va. I le suafa o Iesu, Amene.

OPEN HEAVENS

MATALA LE LAGI MO LE ASO TOFI 19 SETEMA  2024

(tusia e Pastor EA Adeboye)

Manatu Autu:Faatalitali I le Alii ( Wait on the Lord)

Tauloto -Tusi Paia–Isaia 40:31 “A o ē fa‘atalitali i le ALI‘I, e toe fa‘afouina lo latou malosi. Latou te si‘i a‘e ‘apa‘au e pei o aeto; latou te tamomo‘e, ‘ae lē vaivai; latou te sāvavali, ‘ae lē tigāina.”

‭‭

Faitauga – Tusi Paia –Salamo 27:13-14

O tagata uma lava, e iai lava le vaitau e faatalitali ai mo se faaiuga, poo se galuega.  O lou vaitau e fa'atalitali ai, o le taimi lea e te faatalitali ai ia taunuu se mea o loo e naunau iai. E faatali ma naunau se tamaitiiti aoga tulagalua i le taimi e ulufale ai i se iunivesite, e faatali le tamaitiiti aoga i le iunivesite mo lona faauuga, o le tagata faauu e faatali i se galuega talafeagai, o le tagata nofo toatasi, e faatali i le taimi e faaipoipo ai, o e ua faaipoipoina, e faatali le maua o le fanau, e faatalitali for matua mo laasaga eseese o le olaga o a latou fanau. O le faʻatali mo mea eseese mo taimi eseese e faifai pea i aso uma o lenei olaga.

O le faʻatalitali, e tupu I tagata uma lava, peitaʻi o mea e te faia aʻo faʻatali e sili atu ona taua nai lo mea o loo e faatalitali i ai. A lē onosaʻi le tagata, a’o faatali se tali, ma iu ai lava ina filifili e faia mea i fafo atu o lona finagalo, e i ai le taimi e salamō ai.

I le 1 Samuelu 13:8–14, ua gasea Saulo i le faatalitali mo le taunuu mai o Samuelu e fai se taulaga, o lea na ia filifili ai, e faia e ia le taulaga, ae ua le tusa lea ma le finagalo o le Atua. O lena gaioiga, na mafua ai ona aveesea le nofoalii mai ia Saulo. I le Kenese 16:1;3 , na lelava e Sara ona faatalitali mo sana tama, o lea na ia tuuina atu ai Akara i lona toalua o Aperaamo e fai ma ana avā. Na salamō o ia, ina ua ma’i tō Akara ( Kenese 16:4 ) ma e o’o mai i aso nei, o lenā gaoioiga, ua sauāina ai ana fanau ma ona suli.  O le sailia o ni vaega e ese mai le Atua Ina ia faapuupuuina le taimi faatalitali, e i’u lava i faanoanoaga. Sa ma tatalo ma lo'u toalua mo se fafine o loo  fia maua sana tama. Na i ai le taimi, ua fiu ai e faatalitali i le Atua ma alu ai loa e vaai se taulasea. Na maua I le ma'itaga, ae o le maitaga e tatau ona fanau I le 9 masina, peitai ua tausaga e le fanau lava. O le taimi mulimuli na ou faalogo iai, e lei fanau lava. O filifiliga uma e sui ai le faatalitali i le Atua, e faatagaina ai le tiapolo e sauāina oe.

O le mafuaaga lea o le tele o tagata taufaasese i luga o le initaneti i aso nei, ona o le toatele o tupulaga talavou, ua le mananao e uia faiga saʻo e maua ai tupe. O le mea latou te le iloa, e ui lava e mafai ona maua vave ni tupe se tele, o le mea e faafesuiai mo lena tupe, o latou agaga. Ua faapea mai le Mataio 16:26 Auā se a le aoga i le tagata pe afai na te maua le lalolagi uma, a e māumau lona ola?

Aua nei avea oe ma se tagata valea, faatalitali i le Atua ma e mautinoa, e afio mai o Ia mo oe, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 18 SETEMA  2024

(tusia e Pastor EA Adeboye)

Manatu Autu:Perofetaga Moni ( True Prophecies)

Tauloto -Tusi Paia–Esekielu 13:3 ““O lo‘o fa‘apea ‘ona fetalai mai o le Ali‘i le ATUA: ‘Oi talofa i perofeta vālelea o ē usiusita‘i i o latou lava loto, ‘ae le‘i va‘aia e i latou se mea.”

‭‭

Faitauga – Tusi Paia –Esekielu 13:1-6

O perofetaga moni e tauala mai i le finagalo o le Atua. E faalogo le perofeta i le Atua ona faaali atu lea i tagata. A tuuina atu se perofetaga e fua ini lagona, e pepelo le perofetaga, ma fai mai le Tusi Paia o tagata e faia lea tulaga e vālelea(Esekielu 13:3). O se perofetaga moni e faamautu ai se mea ua fetalai mai ai le Atua. 

Ao ou laitiiti i le galuega a le Atua, ou te manatua na ou faia se perofetaga I se tasi o kamupani vaalele, ma faapea e le mafai ona gau ona ua ou matua fiafia i lo latou faamaoni i auaunaga i le Ekalesia. Na ou faia le perofetaga e fua I ou lagona e aunoa ma le faalogo poo le a le finagalo o le Atua. E lei leva, ae pau se vaalele a le kamupani lea. Sa tatau ona lava I le tatalo ma faamanuia iai latou mo le galuega faamaoni, ae le o le faia o se perofetaga ona o lagona fiafia. Na a’oa’oina a’u mai lea mea na tupu, afai e lei fetalai mai le Atua, aua le faia se perofetaga. 

Le au pele, aua le vave ona faia se faamatalaga, ‘ua fetalai mai le Atua’ ae leai se fetalaiga a le Atua o faia. ‘Aua e te faatagaina le faamaualuga e uunaia oe e faia perofetaga, ia faia perofetaga e tusa ma le finagalo o le Atua. Tulei ese le faamaualuga Ina ia e lagona manino le Atua. Ae lei faia palota a Nigeria I le 2023, na matua le nofo lelei tagata ona o le fia iloa po’o ai o le a avea ma peresitene o le a sosoo nei. Ua latou uunaia lo’u tagata ia faailoa atu iai latou po’o le a le iuga o le palota. E ui I lea naunataiga, na ou faamautu lelei, ou te le faia se faamatalaga I se mea e le’i aumaia mai le Atua, aua ou te iloa o se pepelo. Na ou fai iai latou i ni nai vaiaso ae lei faia le palota, ‘e lei faailoa mai lava e le Atua, e leai sa’u tala e faia pe afai e lei fetalai mai ai le Alii’. E tatau ona e faamasani e filemu pe afai o loo filemu le Atua. Afai o oe o le fofoga e faaaoga e le Atua, afai o loo malolo le fofoga o le Atua, e tatau foi ona faapena oe. 

E tatau foi ona o gatasi perofetaga ma le upu a le Atua. Afai e le o gatasi ma le upu a le Atua, e pepelo. E iai se tamaloa na sau ma fai mai ia te au, ‘ua ou faalogo o oe o se perofeta, ma o so’o se mea e te fai mai ai, e taunuu. E mafai ona e ta’umaia lo’u lumanai?”. Na ou tali atu, ‘e faigofie, ua e fanaufouina?’. Fai mai le tali,  ‘leai’. Ua ou tali atu, ‘o lona uiga e malaia lou lumanai’. Ua fesili mai, ‘e faapefea ona e iloa? E te lei fesili mai i lo’u igoa’. Ua ou tali iai, fai mai le Isaia 3:11, “‘Oi talofa i lē ‘ua amio leaga! e malaia o ia’. O soo se tagata e lei talia Iesu Keriso ma o latou Alii ma Faaola ua faasalaina(Ioane 3:17-18). O se perofetaga moni e auina mai le Atua e o gatasi ma ana afioga i le Tusi Paia. Aua nei e faatagaina se perofetaga e le o gatasi ma le Upu a le Atua e faaleo mai ou fofoga, I Le suafa o Iesu, Amene. 

OPEN HEAVENS

MATALA LE LAGI MO LE ASO LUA 17 SETEMA  2024

(tusia e Pastor EA Adeboye)

Manatu Autu: Faatauvaa I aao o le Atua (Frail in God’s hands)

Tauloto -Tusi Paia–Salamo 38:10 “Ua sapotuvale lo‘u fatu manava, ‘ua te‘a lo‘u malosi; o le malamalama fo‘i sa i o‘u mata, ‘ua lē ‘iā te a‘u lea.”

‭‭

Faitauga – Tusi Paia –Salamo 39:4-7

I le tatou tusi faitau o le asō, sa fesili Tavita i le Atua, ina ia manatua ma iloa lelei e Tavita lona faatauvaa. O le tagata lenei sa ia molimauina le tupu ta’uta’ua ma le vi’ia o Saulo, na faafuaseia ona pei o se vale i le tele o taimi, ma sa mo’omia le taina o le kitara e maua ai sona mapusaga. O le tagata foi lea sa fa’aaogaina se tamai ma’a taatele na te fasiotia ai se sau’ai sa fa’asoesa i lona nuu mo aso ma po e fāgafulu (1 Samuelu 17). O tatou o  tagata soifua, e tele ina tatou manatu ua tatou malolosi ma ua iai le pule, peitai o le Atua o le e taofia I tatou(Isaia 41:8-10).

I le Tanielu 4:30 sa faamaualuga le tupu o Nepukanesa i mea mata’utia sa ia faia, ae o le itula lava lena ua liua i se manu vaefa, ua ‘ai le mutia e pei o se meaola e mau i le vao (Tanielu 4:31-33). E moni o ia o se Tupu lauiloa, a ua fa’amaualaloina e le Atua i le taimi lava lena. E tusa po‘o le a le maoa’e ma le mata’utia e o’o iai se tagata, e mafai ona faamaualaloina e le Atua i le ‘emo o le mata. Sa manatu le Tupu o Herota o ia o se tagata e iai le pule aoao, ma e mafai ona ia pu’eina ma fasiotia so’o se tagata(Mareko 6:16-17), peitai i luma o ona tagata, na ‘atiolaina e ilo (Galuega 12:23). A finagalo le Atua e fa’aali lona Pule aoao, e mafai ona ia fa’aaogaina loi e fa’aumatia ai se elefane. O le mafua’aga lena e te molimauina ai lo’u faamaulalo, to’otuli e tapuai i le Atua i luma o tagata i nofoaga lautele, ma tu’uina atu lo’u tagata atoa ia te ia. Ou te iloa la’u mea lea fai, aua ou te iloa lelei, a aunoa ma ia, o a’u o le tagata noa. Ou te iloa lelei, e tusa po o lea se manatu a tagata o a’u o se e maualuga le pule o loo iai, e mafai e le Atua ona gauia a’u e pei o se fasi la’au pe a ou fa’alumaina ia.

Le ‘au pelē, ia e ola ma  silafia lelei e te faatauvaa i a’ao o le Atua; ‘aua ‘aua lava nei e manatu ua ia te oe le pule. Ia teu malu i lou mafaufau i taimi uma, o le Atua o lo o iai le pule. Sa fai so’o le tala a e pulea se tasi o polokalame i le TV i Nigeria, e faapea: O tatou ua na o ni penitala i a’ao o le Atua ma e na te fa’aaogaina oe i lona faitalia. Fa’apei o Tavita, ia e ‘ai’oi i le Atua, na te faamanatu pea ia te oe lou faatauvaa i ona a’ao.  

Tatalo

Tama e, faamolemole ‘aua nei galo ia te a’u lo’u fa’atauvaa ma lo’u vaivai i ou a’ao, le suafa o Iesu, Amene ”

OPEN HEAVENS

MATALA LE LAGI MO LE ASO GAFUA 16 SETEMA  2024

(tusia e Pastor EA Adeboye)

Manatu Autu: Aua le taumafai e tamoe muamua atu i le Atua (Don’t try to outrun God)

Tauloto -Tusi Paia–Faataoto 28:20 “O le tagata fa‘amaoni, e tele mea e manuia ai o ia; a o lē ‘ua fa‘ata‘alise ‘ona mau‘oa, e lē fa‘asaoina o ia.”

‭‭

Faitauga – Tusi Paia –Failauga 3:1-11

Na faia e le Atua mea uma e tusa ma lona taimi (Failauga 3:11). O le tulituli pea o manuia o le lalolagi ua faoa mai le tele o tagata faamanuiaga e tele ma sili atu mai le Atua. E leai se leaga o le naunau e ausia mea tetele ma le tuliloa foi o le ausia o mea lelei, peitai a e taumafai e tamoe muamua atu i lo le Atua, e ono le ausia lena faamoemoega, ae le gata I lea e ono e totogiina lona tau, e oo I se mea e pele ia te oe. E silafia e le Atua mea e te fiafia iai, o le mea moni e ono tuu ia te oe na mea e le Atua. E na te silafia taimi lelei aemaise o le auala pito sili ona lelei e faatino ai, ‘aua la e te faaalia lou poto e pei ua e sili atu I Le na faia lou mafaufau. 

I tausaga e tele talu ai, na taufaasese a’u e se tamaloa fai mai o le a ia tofia au e taitai I se faapotopotoga e pei o se auatama . E tele ana feau tusitusia na lafo mai I lau failautusi ma e iai le aso na ma fono ai loa. Na ia faamatala mai lenei faapotopotoga. E masani lava ona ou fesili muamua I le Atua ae ou te lei faia se faaiuga, ae o le taimi lea, ona o lo’u fiafia I soo se mea tau I le fitafita ao ou laitiiti, ua puaoa ai lo’u mafaufau i le mea masani e tatau ona fai ma ua ou malie e avea ma taitai o le faapotopotoga lea. Na fai mai e manaomia se tupe ma o lea na ou ave iai se tupe i lo’u tulaga taitai. Mulimuli ane ua ou iloa e pepelo lenei tagata. O lou naunau e avea ma sui o se vaega o le fitafita, ua ou tamoe ai e muamua atu i le Atua, peitai ua leva na fuafua e le Atua o le Redemption city, le aai a le Ekalesia, o le a iai se ofisa o leoleo ma Lana vaega o lepuipuiga. Na ia silafia lo’u loto ma mea ou te fiafia, ma na ia fuafuaina e tupu i Lana lava taimi. Na ou manatu ou te mafai ona ou faatinoina I la’u taimi, peitai ua ou sese. O le mea na ou leiloa o tupe, peitai o nisi, e ono muamua Lona ola poo seisi o pele ia te ia. O loo manino I le Tusi Paia e finagalo le Atua ia tatou manuia I mea uma e oo I le manuia faulai (Salamo 35:27, 3 Ioane 1:2). O lona uiga e le leaga le fiafia I le tamaoaiga. E na te avatu le manuia faulai ia te oe, peitai I Le taimi a le Atua. Le au pele e, mulimuli I le taimi a le Atua, aua le taumafai e tamo’e e muamua atu i le Atua, I le suafa o Iesu, amene. 

OPEN HEAVENS

MATALA LE LAGI MO LE ASO SA 15 SETEMA  2024

(tusia e Pastor EA Adeboye)

Manatu Autu: Tuuina atu I le Alii (Commit it to God)

Tauloto -Tusi Paia–Faataoto 16:3 “Ia e tu‘uina atu i le ALI‘I o au galuega; ‘ona fa‘amauina ai lea o ou mānatunatuga.”

‭‭

Faitauga – Tusi Paia –Faataoto 3:5-6

E leai se mea, e leai lava se mea e tuuina atu i le Atua e le i’u i se tulaga lelei. O le mafuaaga lea e tatau ai ona tuuina atu mea uma I aao o le Atua ma faataga o ia e taitai I mea uma e te faia. Ole atu ia te ia mo fautuaga ae e te lei faia se mea, ona manuia lea o mea uma. 

O lo’u tama faaleagaga o Josiah Akindayomi, e matua filiga e tuuina atu mea uma I aao o le Alii. Na ia tuuina atu le Ekalesia I aao o le Alii mai le amataga. E lei faapea e na o le tuuina atu le Ekalesia I aao o le Atua e ala I tatalo, na faia foi i mea uma na ia faatinoina. Na ia faia mea uma e tusa ma faatonuga a le Atua, ma na tauia i le faataunuuina uma e le Atua o ana folafolaga i le Ekalesia. E toatele tagata e manatu o le tulaga ua iai nei le Ekalesia Redeemed Christian Church of God ona o a’u, e le moni. Ua leva na fuafua e le Atua le tulaga e oo iai le Ekalesia ae ou te lei faaolaina. Ana ou musu e usitai ia te ia, e na te tofia seisi tagata I Le tulaga taitai aoao o le Ekalesia. O soo se mea e tuuina atu I aao o le Atua, e le i’u vale. 

Afai e te fia ola manuia, tuuina atu uma au fuafuaga I aao o le Atua. Fai mai le Faataoto 3:5 “‘Ia e fa‘atuatua i le ALI‘I ma lou loto ‘atoa; ‘ae ‘aua le fa‘alagolago i lou lava atamai.”

Aua e te faamoemoe I ou faailoga, agavaa, tagata e te masani ai poo tupe foi, faalagolago tau o le Atua. Faatuatua i le Atua ma lou loto atoa, fai mea uma e tusa ma lana upu, usitai I ana faatonuga ma poloaiga ona e vaai lea ua ia faia mea tetele mo oe. Faamanino I le Atua o ia e pule i lau galuega, pisinisi, galuega talai ma soo se vaega o lou olaga ona ia faamautinoaina lea e te manuia I mea uma. 

Ia maitau mai, afai e te ofoina atu se mea i le Atua, o loo e ioe e avea o ia ma se taitai matua ia te oe. O lona uiga, a ia  tuuina atu se faatonuga, e tatau ona e usitai. O nisi o nei faatonuga e le talafeagai i lou manatu, ma e ono matua faigata ona e faatinoina, peitai a e le toe aveesea le tulaga taitai matua mai ia te ia, ae e te mulimuli pea i lana taitaiga, e te fiafia I ou manuia,  e sili atu pe ana e taumafai lava oe e fai i lou malosi. 

Tatalo

Tama, faamolemole ou te tuuina atu mea uma ia te oe e faatatau ia te a’u e amata atu I le aso, I le suafa o Iesu, Amene.