Samoan Devotional

OPEN HEAVENS

MATALA LE LAGI MO LE ASO LULU 4 SETEMA  2024

(tusia e Pastor EA Adeboye)

Manatu Autu:  Faaeteete i le agaleagaina atu(Be wary of offence )

Tauloto -Tusi Paia– Faataoto 18:19 ““O le tagata ‘ua agaleagaina e lona uso, e sili o ia ‘ona faigatā i le ‘olo; o misa fo‘i o uso e tusa ia ma fa‘amaufa‘alava o le ‘olo.”

Faitauga – Tusi Paia – Kenese 27:38-41

E toatele kerisiano e le manatu mamafa I Le alofa ma le faamaoni o tagata iai latou. Afai e alofa atu se uso Kerisiano ia te oe, ia e faaeteete e aua e te faia se mea e ono le fiafia ai, aua a e faia ma ua agaleagaina o ia, e te ono le toe maua le alofa na iai muamua. Afai ua naunau se tagata e fai taulaga ona o oe, ia fai ma luitau ia te oe Ina iai se taimi e te faitaulaga ai mo ia. Afai e faamaoni mai ia te oe, ia e faamaoni foi iai latou. O le tele o le latalata mai o se tagata ia te oe, o le tele foi lena o lou faaaeteete e te le faia se mea e le fiafia ai ma agaleaga ai iai tei latou. 

E tele faifeau ua manatu ona o i latou e ulu iai le Ekalesia, e mafai ona latou faia so’o se mea e aunoa ma le manatu alofa I tagata o loo alolofa iai latou. Mo nisi, a o’o ina tautaua, ua le manatu iai latou na latou tau amata maia le galuega. O le tele o tagata ua tau’a o fili o nisi sa taua o uo mamae i tausaga ua tuanai. E iai se muagagana faaperetania, ‘fai ni au uo fou, tumau pea uo tuai, o le tasi e siliva ao leisi o le auro’. O uo tuai o le auro, sa latou iloa oe ma alolofa ia te oe ae lei iloa oe e seisi. Ao faasolo pea tausaga, o au uo fou o le a faasolo atu foi Ina auro. E mafai ona fai ni au uo fou ae ia tumau pea uo tuai. 

O se tasi o vaega e fesoasoani tele iai matou i le Ekalesia RCCG, o lenei, o soo se tagata e galue ma matou mai le amataga ao itiiti, e fa’aeaina ma faafetaia. A faia lea tulaga, e vaai atu iai talavou ma faamalosia, a latou galulue punouai foi, e le tuuesea I latou. 

O le fili matautia o soo se tagata o loo I totonu o lona aiga. O se fili e feofeoai ma se tagata I taimi uma e lamatia. E tatau I tagata kerisiano ona faaeteete I le agaleaga I se uso, ma liua I latou o ni fili, aua o le a latou mafatia pea ona o I latou. A iai se mea e te ono lua feeseeseai ai ma sou uso, valaau iai e te lua talanoa ma faalelei. Fai mai le Mataio 5:23-24, a e alu i le Atua ma le taulaga, ae e manatua o loo iai se mea o lua feeseeseai ai ma lou uso, fai mai e tuu lau taulaga ae alu e fai le faaleleiga ma lou uso, ona faatoa e sau lea e ave lau taulaga. Ia maitau mai, e lei fai mai le Tusi Paia ‘pe a fai e iai se mea o e ita ai I lou uso’, ae o loo fai mai , ‘pe afai o iai se mea o ita ai lou uso’. Aua e te faatagaina se maa e pupunia le lua va ma le Atua. Fai mai le Roma 12:18 “‘Āfai e mafaia ‘iā te ‘outou, ‘ia ‘outou nofo lelei ma tagata uma 

OPEN HEAVENS

MATALA LE LAGI MO LE ASO LUA 3 SETEMA  2024

(tusia e Pastor EA Adeboye)

Manatu Autu:  Ia amanaia a’oa’oga (Take heed to doctrine)

Tauloto -Tusi Paia– 1 Timoteo 4:16 “Ia oe lava ‘iā te oe, ‘atoa ma lau e a‘oa‘o atu, ‘ia e tumau pea i ai; auā a ē fai lenā mea, e fa‘aolaina ai oe e oe ‘atoa ma ē ‘ua fa‘alogologo ‘iā te oe.”

Faitauga – Tusi Paia – 2 Timoteo 4:2-5

I nei aso, e tele Kerisiano e sailiili i auala e le fa’amalosia ai nisi o a’oa’oga, e fa’amaonia ai ua le toe aogā. Mo se fa’ataitaiga, a ta’u atu e latou Ekalesia e talitonu I le Tusi Pa’ia, a’oa’oga e fa’atonuina ai itua’iga lavalava e le tatau ona o‘ofu ai, ua fetagofi sa’iliili tusitusiga fa’a ‘Eperu ma fa’a Eleni ina ia fa’amaonia mai ai ua le o toe aogā nei a’oa’oga– e matuā le sa’o ia faiga.

O a’oa’oga o ni vaega pito sili ona fa’atauaina i le savaliga a le au Kerisiano. E ui ina foliga e faigata ona tatou ola ai, a o ni ta’iala ia e limata’ita’ina ai oe e te ola fa’apa’iaina. E iai taimi ua foliga mai o ia a’oa’oga ua matua faigata ona e ola ai, peitai a e to’aga e fa’atino, e iai le taimi o le a e manino ma malamalama ai, e fesoasoani tele ia te oe e malosi ma maua’a ai pea I le faatuatua.

O loo iai pea le Atua I tua o nei a’oa’oga. O le mea moni i le 2 Timoteo 3:16 o lo o faapea mai, o se tasi o mafua’aga na aumai ai e le Atua ana afioga pa’ia, ia tatou maua ai ni a’oa’oga:

“O tusi pa‘ia uma lava e mai le Agaga o le Atua ia, e aogā fo‘i ‘ia e a‘oa‘o ai, e a‘oa‘i ai, e fa‘atonu ai, e fa‘apoto ai fo‘i i le amiotonu”

‭‭

Peita’i, ia e fa’amauina, o a’oa’oga e aumai i afioga pa’ia a le Atua, e tauala mai i ona sui o lo’o ta’ita’i i le lotu poo se Ekalesia.  E mafai e se taitai o se isi lotu ona ia le mauaina se a’oa’oga mai ni fuaitau o le Tusi Paia, ae afai lava ua iai se a’oa’oga ua mauaina e lou tamā fa’aleagaga mai afioga pa’ia a le Atua, e tatau ona e ola ai. O le uluai Ekalesia, sa matua malosi ona o Kerisiano e filiga e tutumau ma mauaa i a’oa’oga a o latou taitai, le au Aposetolo e pei ona tatou iloa i le Galuega 2:42:

“Ua tumau pea i latou i le a‘oa‘oga a le ‘au ‘aposetolo ma le mafuta fa‘atasi, ma le tofitofiga o le areto, ma talotaloga.”

‭‭

Ia maitau mai,  aua ne’i filifili a’oa’oga e te mulimuli iai e fua i le faigofie ma le talafeagai ma oe, e tatau ona fua I lona fa’avae,  o nei a’oa’oga sa fausia mai i afioga pa’ia a le Atua. Ma ia e  talitonu o le tagata lea o se taitai fa’aleagaga ua finagalo le Atua e te auauna iai. 

O a’oa’oga ua fausia mai i afioga pa’ia a le Atua e faasili esea ai oe mai le lalolagi. O le a fa’atupula’ia lou ola faaleagaga faapea ma lou soifua manuia. O a’oa’oga e le’i aumaia e taotaomia ai oe, a ia fa’amalosia lou vavaeseina mo le Atua, I le suafa o Iesu, amene. 

OPEN HEAVENS

MATALA LE LAGI MO LE ASO GAFUA 2 SETEMA  2024

(tusia e Pastor EA Adeboye)

Manatu Autu:  Onosa’i  (Persevere)

Tauloto -Tusi Paia– Faaaliga 2:7 “O lē ‘ua i ai taliga, ‘inā fa‘alogo mai ia o ia i le mea ‘ua fetalai mai ai le Agaga i ekalesia. O le manumālō, ‘ou te avatua ‘iā te ia e ‘ai i le la‘au o le ola o i totonu o le parataiso o le Atua.”

Faitauga – Tusi Paia – Faataoto 4:25-26

O le tulaga numera tasi e tatau ona aoaoina ai tagata ua fanaufouina ia Keriso, o le savaliga a le au kerisiano e le o se tuuga puupuu ae o se tuuga e umi. Sa ou fanaufouina mai talu le tausaga 1974 ma o loo faasolo pea la’u savaliga. Sa ta’u ma faamamafa iai matou I lea taimi ‘ua lata ona toe afio mai Iesu’. O le lata mai ua savalia nei le 51 tausaga ae o loo tatou faatalitali pea i Lona toe afio mai. E ta’u mai ai ia te oe, a leai le onosai, e le mafai ona e manumalo I le savaliga a le au kerisiano. E lelei pe afai na e teena faaosoosoga ananafi ma ua e manumalo, ae e le gata ai iina lau taumafaiga ina ia tulai pea seia oo I le iuga. E tatau ona e teena faaosoosoga a taeao. Afai e malolo le kerisiano ona o mea ua ia manumalo ai i taimi ua tuanai, e ono lamatia lea tagata I faaosoosoga I le lumanai ma pau ai. 

O le onosa’i o le vaega lea e tele ina le maua e le au kerisiano. E iloa lelei e le tiapolo, a ia muai aumaia le faaosoosoga ia te oe, e te manumalo e teena. Peitai e iloa foi e le tiapolo a ia aumaia le faaosoosoga e faifaipea ae eseese auala e faaaogaina, e iai le aso e te malolo ai I le itu faaleagaga, e te ono pau ai. O le mafuaaga lea e lelei le maua o le suauu i le aso, peitai e tatau ona iai pea le suauu mo a taeao. O taupou e to’asefulu I le Mataio 25:1-13 o taupou uma, o lona uiga e mama. Sa iai uma a latou suauu , o le faailoga o Agaga Paia, a’o latou faatali mo le toe afio mai o le faato’afaiava, na latou momoe uma aua na faatuai ona taunuu mai le faato’afaiava. Peitai na o I latou na iai suauu faasili na mafai ona latou feiloai ma le faato’afaiava. Fai mai le Faataoto 24:10

“Āfai ‘e te fa‘avaivai i le aso vale, ‘ua itiiti lava lou malosi.”

E tatau ona saunia lou tagata mo aso vale. Talitonu mai, a aunoa ma le malosi faasili, e le mafai ona e onosai seia oo I le iuga. O le mea lea, faitau Lau Tusi Paia e faasili atu i mea o loo e manaomia mo le aso. A e faia, e fausia ma faatupu lou malosi e te manaomia ina ia e maua pea le onosai. E toatele tagata ua pauu i mea faaalatua i le ofisa ona ua uma a latou suauu, ma ua leai ni a latou suauu faasili ina ia mumu ai pea a latou afi. O nisi ua pauu i le faitaaga ma le mulilua ona ua faavaivai ma ua leai se malosi e teena ai. Aua e te toe faia lea tulaga sese, toe aumai ma saili se suauu faasili i taimi uma. E manaomia le mumu pea o le afi ia aulia ma maua le siitiaga poo le oo mai foi o le valaau i lou ola. I le suafa o Iesu, Amene. 

OPEN HEAVENS

MATALA LE LAGI MO LE ASO 1 SETEMA  2024

(tusia e Pastor EA Adeboye)

Manatu Autu:  O Ai E Ona Oe? - (Who Owns You?)

Tauloto -Tusi Paia– 1 Ioane 4:6 “O i matou mai le Atua lava i matou, o lē ‘ua iloa le Atua e fa‘alogo mai o ia ‘iā te i matou; o lē lē mai le Atua e lē fa‘alogo mai o ia ‘iā te i matou; o le mea lea ‘ua tatou iloa ai le agaga moni ma le agaga sesē.”

Faitauga – Tusi Paia – 1 Ioane 4:1-7

A e faitau I Upu o le Afioga Paia a le Atua e pei o le 1 Korinito 6:20, o loo faapea mai ua faatauina oe i se tau, atonu e amata ai ona e manatu, “Faatau mai iā ai? O anafea na o’u malie ai e ave a’u mā se isi tagata ua fa’amalosia ai le toe faatau ese o a’u mai lea tagata?” O lenei manatu ua ta’u mai ai ia i tatou, o tagata soifua uma lava, pe latou te silafia pe leai, ma e tusa fo’i pe manana’o ai pe leai, e pulea e se agaga. O tagata uma na i ai i le manava o lona tinā ma le agasala (Salamo 51:5), ma, a lē fanaufouina i latou, e tumau pea i latou o meatotino a le tiapolo.

E leai se tasi e tutoatasi na o ia; o tagata uma ta’ito’atasi o se meatotino a se agaga. O le fesili I le taimi nei, o ai e ona oe? E te iloa le pule o se meatotino i le auala e fa’aaogaina ai; e fa’aalia i le meatotino uiga ma le ituaiga tagata e i ai lona matai. O le mafuaaga lea o le fai mai o le tusi a Mataio 7;18-20: “E lē mafai i le la‘au lelei ona fua mai i fua leaga, e lē mafai fo‘i i le la‘au leaga ona fua mai i fua lelei. O la‘au uma e lē fua mai i fua lelei, e taia ia ma lafoina i le afi. O lea fo‘i tou te iloa ai i latou i o latou fua.”

‭‭

Afai o Keriso lou matai, o le a vaaia e tagata uiga o Keriso, poo fua o le Agaga iā te oe. E atagia i au amio le Alofa, Olioli, Filemu, Onosa’i, Mataalofa, Agalelei, Faatuatua, Agamalū ma le Amio mamā? (Kalatia 5:22-23). Afai e lē o iā te oe uiga nei, o lona uiga e lē o oe o se atalii poo se afafine o le Atua.

Talu ai e na o le lua vaega i le itulagi o Agaga, o le mālō o le pouliuli ma le mālō o le Atua, o so’osetasi e lē auai i le mālō o le Atua, o le auauna o ia a le tiapolo. O lea tagata e faigofie ona masani o ia i galuega a le tino e pei ona tolaulau mai i le Kalatia 5:19-21. A e faitau I le mataupu lenei e te iloa ai o le toatele o tagata o loo faia nei amioga latou te lē iloa o loo latou amio faatasi ma lo latou matai, le e ona i latou, o le tiapolo lea. Fa’ata’ita’iga, o le toatele o tagata e lotoleaga, faapea a latou ona pau lava o uiga fa’a le tagata o le lotovale; latou te lē iloa faatoa mafai ona nofo le lotoleaga i o latou loto auā o i latou o fanau a le tiapolo, e lē o i latou o ni tagata o le mālō o Keriso, o lē o le alofa lava ia. Fai mai le Tusi Paia I le tusi o Roma 6:16; “Tou te le‘i iloa ‘ea, o lē tou te tu‘uina atu i ai ‘outou e fai ma ‘au‘auna e ‘ana‘ana i ai, o ana ‘au‘auna ‘outou tou te ‘ana‘ana i ai, po o le agasala e o‘o ai le oti, po o le ‘ana‘ana e o‘o ai le amiotonu?”

‭‭

Afai e avea Keriso ma ou matai, e te lē toe amio faatasi ma le tiapolo. Lafoai lou ola iā Keriso i le asō pe afai e lei faia o ia ma ou Alii ma ou Faaola. A fua i amioga o loo atagia i lou tagata, o ai e ona oe? I le suafa o Iesu. Amene.

OPEN HEAVENS

MATALA LE LAGI MO LE ASO TO’ONAI 31  AOKUSO 2024

(tusia e Pastor EA Adeboye)

Manatu Autu:  A’o sē fia sili ‘iā te ‘outou, auauna (To Be The Greatest, Serve.)

Tauloto -Tusi Paia– Mareko 10:43 “ae lē fa‘apea ‘outou; a o sē fia sili ‘iā te ‘outou, ‘ia fai o ia mā a ‘outou ‘au‘auna;”

Faitauga – Tusi Paia – Mataio 20:20-28

I le mālō o le Atua, a fia avea ma le e sili i so’ose faalapotopotoga o tagata, ia avea oe ma le e aupito faatauvaa o i latou uma. E lē talafeagai i le faalogo a le tagata lea fuaitau peita’i o le finagalo lenā o le Atua. O le maualuga e te manaomia e te ‘ausia o le maulalo lea e tatau ona e mua’i o’o i ai. Fai mai le 1 Korinito 1:27-28 “‘Ae peita‘i ‘ua filifilia e le Atua mea vālea a le lalolagi, ‘ina ‘ia fa‘amāina ē popoto, ma mea vaivai a le lalolagi ‘ua filifilia ia e le Atua e fa‘amāina ai mea malolosi. ‘Ua filifilia e le Atua mea maulalo ma le fa‘atauva‘a i le lalolagi e o‘o i mea e leai, ‘ina ‘ia lafotūina mea o i ai.”

O loo ta’u mai e le fuaiupu lenei, o le Atua na te lē filifilia tagata e manatu o i latou lava e sili ona agava’a e ta’ita’i, na te filifilia i latou e loto maulalo e auauna i tagata.

Sa o’u su’esu’ea le aveina a’e o Iesu i le lagi ma o’u iloa ai, na siitia a’e o ia e le Atua i laasaga e fitu i luga atu, ina ua uma ona faamaulaloina e ia ia lava i sitepu e fitu agai i lalo (Filipi 2:9-11). E ui sa valaau o ia e lona ‘au so’o o le ‘Alii’ a o lona loto maualalo na ia fufulu ai o latou vae palapalā. E mafai ona e fufuluina aao o i latou o loo e ta’ita’ia? A o’o ina pisi le galuega ma tele galuega e tatau ona fai, e mafai ona e faia le galuega aupito sili ona maulalo?

E i ai tagata e taunuu i le tumutumu ae le’i auauna, peita’i e lē umi, e i’u lava ina toe leiloloa o latou tulaga pe a mumusu e auauna. I ni tausaga ua mavae, sa fai ai se matou mafutaga i se aoga maualuga i le taimi o le tuuaga a tamaititi aoga. Na matou taunuu i le aoga, ma o’u alu loa e siaki fale lētā’ua. Sa manaomia se galuega tele e fai i fale lētā’ua o le aoga, (tulou). Sa o’u faailoa i la’u vaega lea faaletonu, ma e tatau ona o matou galulue e fa’amamā mo i latou o le a omai i le fono. Na o’u mana’o ia o’u fufuluina le fale lētā’ua aupito sili ona leaga. Ina ua vaai mai isi o le matou vaega o loo o’u fufuluina fale lētā’ua sa faaosofia i latou matou te galulue faatasi. Ina ua o matou fausia le faletele muamua I le aai o le Togiola, o nisi o le ekalesia, sa omai sa’o mai o latou ofisa ina ua manava e fesoasoani i le galuega aua sa le lava se tupe e totogi ai nisi e faia le galuega. Sa ou galue faatasi ma i latou i afiafi uma, e la’u simā ma fai soose galuega sa manaomia ona fai, e ui o a’u o le Ta’ita’i Aoao o le Ekalesia. O le ala lea o lo’u tumau i le ulu, e ala i le tautua. Ia e faia se galuega I Le aso e te auauna ai I tagata o loo tou galulue faatasi, I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 30  AOKUSO 2024

(tusia e Pastor EA Adeboye)

Manatu Autu:  Galue (Work)

Tauloto -Tusi Paia– Ieremia 17:10 “O a‘u o le ALI‘I o lē su‘esu‘e i le loto, o lē tofotofo i manatu, ‘ina ‘ia tu‘uina atu i tagata ta‘itasi e tusa ma ona ala, e tusa fo‘i ma le fua o ana amioga.”

Faitauga – Tusi Paia – Faataoto 22:28-29

O loo faamanino mai e le Atua I le Tusi Paia,  e faataua e le Atua le galue. Pe o oe o se matua, ave pasi, tusiata, poo le inisinia, e manatu le Atua i Lau galuega e fai, pau lava le tulaga e manaomia, o lau galuega e fai e faatulafonoina. O le galue o se vaega tele e manaomia i fuafuaga a le Atua mo le tagata. I le faatoaga i Etena, ina ua maea ona faia e le Atua le tagata, na ia faatonuina o ia e galue ma leoleo I le faatoaga (Kenese 2:15). O lona uiga o soo se tagata e le galue, ua le atoatoa aua na faia le tagata ia galue. 

O le taua o le ola galue o loo aofia ai I totonu. O le galue e faafiafiaina ai le tagata, ma o le mafuaaga lea o loo galulue ai pea nisi tagata e ui ua tatau ona malolo ritaea. E matua leai se fiafiaga e maua I le na o le nofonofo i Le aso atoa seia oo I le po e aunoa ma se galuega e faia. E toatele tagata mauoloa e oo I le tulaga faanoanoa ma le atuatuvale ona ua tele tupe ua latou maua, ae ua leiloa poo le a seisi galuega e fai. E leai ma se fiafiaga e maua i le le ausia o se mea. Mo se faataitaiga, a e galue I se togalaau, e maua lou fiafiaga tele pe a amata ona fua mai laau na e totoina. 

O le tauloto mai le Tusi Paia o le aso o loo faapea mai, e foai e le Atua i le tagata le fua e tusa ma ana amioga, o lona uiga a, a leai se mea e faia e se tagata, e leai se mea e na te maua. O le mafuaaga lea e fai mai ai le 2 Tesalonia 3:10 “Auā sa tatou i ai ma ‘outou, ‘ua matou fai atu lenei mea ‘iā te ‘outou, pe ‘āfai e lē fia galue se tasi, ‘aua ne‘i ‘ai fo‘i o ia.”

 O le mafuaaga na avatu ai e le Atua taleni ia te oe, ia e galueaina. Afai e le faaaogaina e se tagata faatuatua taleni, e tali o ia I le Atua I le aso mulimuli (Mataio 25:14-30). E le fiafia le Atua i le paie. Fai mai le Ioane 5:17, “Ona tali atu lea o Iesu ‘iā te i latou, “O lo‘o galue lo‘u tamā, e o‘o mai lava i le aso nei; o lo‘o galue fo‘i a‘u.”

Afai o loo galue pea le Atua, e na te le faatagaina oe e paie. O lo’u Atua e le o se Atua o tagata paie. Afai e paie se tagata faatuatua ae o loo tatalo ma ole I le Atua mo faamanuiaga, e le amanaia e le Atua o ia. O le galue malosi o se uiga faale Atua ae o le paie, o le amioleaga. E le mafai ona e fai mai o oe o le kerisiano ae paie. Tusa pe lei maua sau galuega, tatalo i le Atua ia maua se galuega aoga e te togi maa ai mo le manuia lautele o le atunuu, tusa pe laitiiti. E amata mai iina ona tatala e le Atua faitotoa mo mea e sili atu mo oe. E le aoga lou nofonofo e leai se mea o faia, e tetee lea tulaga i fuafuaga a le Atua mo oe. E leai se tagata paie na te maua se mea lelei mai le Atua, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 29  AOKUSO 2024

(tusia e Pastor EA Adeboye)

Manatu Autu:  Alofa atu I e ita mai ia te oe ( Love those who hate you)

Tauloto -Tusi Paia– Mataio 5:44 ““‘Ae ‘ou te fai atu ‘iā te ‘outou, ‘ia ‘outou alolofa atu i ē ‘ua ita mai ‘iā te ‘outou, ‘ia ‘outou fa‘amanuia atu i ē ‘ua fetu‘u mai ‘iā te ‘outou, ‘ia ‘outou agalelei atu i ē ‘ua ‘ino‘ino mai ‘iā te ‘outou, ‘ia ‘outou tatalo fo‘i mo ē ‘ua tu‘ua‘i fua mai ma fa‘asauā mai ‘iā te ‘outou;”

Faitauga – Tusi Paia – Mataio 5:38-48

O le toʻatele o Kerisiano, a fe’eseeseaʻi ma se tasi, e masani ona galo iā i latou, o latou ua fanaufouina, ona e foliga mai, e i ai le taimi e le fiafia ai i se tagata, po o le tagata foi ua le fiafia ia i latou, ma ua latou le faia ai se galuega lelei mo lenei tagata. Na fetalai Iesu Keriso i le Luka 6:35 e le gata e tatau ona e alofa atu i e ua ita mai ia te oe, ae tatau foi ona e agalelei atu ia i latou. Afai e te iloa le mea saʻo e tatau ona fai mo soo se tagata, tusa lava pe ete le o fiafia i ai, fai pea. Ua faapea mai le Tusi Paia, o se agasala pe a e iloa se mea lelei e tatau ona e faia, ae ua e lē faia. Fai mai le tusi a Iakopo 4:17;“O lenei, o le ua iloa e fai le mea lelei, a e le faia, o le agasala lea ia te ia.”

Aua e te tuumaualaloina se tasi tagata ona o lou tulaga maualuga i au galuega, ona e le o ia o sau uo, ma e le afaina pe ete saʻo pe leai, o le taimi lava e te filifili ai e faʻaleagaina i latou nei, o oe le tagata ua sese.

I le faitauga o le Tusi Paia mo le aso lenei, o loo fetalai manino ai Iesu Keriso e le tatau ona e taui atu le leaga i le leaga, ae ia e taui atu le leaga i le lelei. O le mafuaaga, e le finagalo o Ia e  taofi I lou loto soo se ituaiga manatu faapi’opi’o ma le amioleaga. Fai mai le aposetolo o Paulo, a e filifili e taui ma sui pe taui atu le leaga i le leaga, ua e faataga le amioleaga e manumalo iā te oe. Fai mai le Roma 12:20-21 “O lenei, ā matelaina lē ‘ua ita mai ‘iā te oe, fafaga ‘iā te ia, a fia inu o ia, avatu ‘iā te ia e inu ai; auā o le amio fa‘apea e fa‘afaupu‘e ai malala ola i luga i lona ulu.” ‘Aua le fa‘ato‘ilaloina oe i le leaga, a ‘ia e fa‘ato‘ilaloina le leaga i le lelei.”

Ua faapea mai le mau o loo i luga, e tatau ona e alofa, ma tausi i ē e ʻinoʻino iā te oe. E le tatau ona e feso'ota'i ma tagata ona o lo latou alolofa ia te oe pe leai, po'o le auala latou te faia ai oe; e tatau ona e fesootai ma i latou e faavae i auala e finagalo ai le Atua ia te oe. Aua le faatagaina le amioleaga e manumalo ia te oe, ma e taupulepule e faaali atu ia i latou o oe ua malosi. Afai e manumalo le leaga ia te oe, o lona uiga ua e i ai nei i le itu a le tiapolo, ma ua e faasagatau i le itu a le Atua. O le a ou faaiuina lenei aoaoga i upu a le Aposetolo o Paulo i le Roma 12:18 “‘Āfai e mafaia ‘iā te ‘outou, ‘ia ‘outou nofo lelei ma tagata uma lava.”

Pe o lua lelei ma se tagata pe leai, agalelei iai, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 28 AOKUSO 2024

(tusia e Pastor EA Adeboye)

Manatu Autu:  Taimi na o oe ma le Atua (Personal devotion)

Tauloto -Tusi Paia– Salamo 42:1 “Le Atua e, e fa‘apei ‘ona naunau o le ‘aila i vaitafe, o lo‘o fa‘apea ‘ona naunau o lo‘u agaga ‘iā te oe.”

Faitauga – Tusi Paia – Salamo 63:1-8

E le mafai ona e latalata I se tagata pe afai o loo tou faatasi ma isi tagata. Afai e te fia latalata I se tagata, e manaomia lou taimi e mafuta ai na o oe ma lena tagata. E matua manaomia le taimi e mafuta ai le tou aiga , e o mai faatasi uma ai tagata e tatalo ma suesue le Tusi Paia, ma e matua tatau ona auai atu I mafutaga Tusi Paia ma mafutaga tatalo ma le au uso. 

Peitai, e le mafai ona e latalata I le Atua pe afai e le mafai ona e nofo toatasi na o oe e suesue lau Tusi Paia ma mafuta I le Atua I le tatalo, o lou taimi lea na o oe ma le Atua. 

E mafuta mai le Atua I tagata taitoatasi, a e le o se faapotopotoga. Tusa foi poo tou iai faatasi o se faapotopotoga, a fia talanoa mai le Atua, e feso’otai mai tu’usa’o I tagata taitoatasi. Mo se faataitaiga, sa ia talanoa atu I tagata o le Ekalesia ina ua ia fetalai mai faapenei: “Fa‘auta, ‘ou te tu atu i le puipui ma tu‘itu‘i atu; ‘ai se tasi e fa‘alogo mai i lo‘u leo, ma tatala mai le puipui, ‘ou te ulufale atu ‘iā te ia, ma te talisua fo‘i ma ia, o ia fo‘i ma a‘u.”Fa‘aaliga‬ ‭3‬:‭20‬. E ui sa talanoa atu le Atua i le Ekalesia atoa, na ia faaaogaina le gagana tuusao i le tagata toatasi. O le mafuaaga lea o le tele o taimi ao ou taitaia sauniga, ae finagalo le Atua e faia se vavega mo se tagata, e faapea mai e tauala ia te a’u, “e iai le tagata iinei…”. E lua i le tolu tagata e maua vavega mai lea folafolaga, peitai na tuuina mai le Upu mo le tagata taitoatasi. O loo finagalo le Atua e maua se mafutaga ma oe. O le mafutaga a le faifeau, ou matua poo le taitai o le mafutaga Tusi Paia ma le Atua, e le aofia ai oe. E fia mafuta le Atua ma oe, ma seiloga e iai se mafutaga vavalalata a ia ma oe, e le mafai ona e iloa moni le Atua. 

O le fausia o lenei mafutaga ma le Atua, e tatau ona iai sau fata faitaulaga. O se nofoaga lea e te mafuta ai ma le Atua i aso uma. E tatau ona faaavanoa lou taimi i aso uma e suesue ai Lau Tusi Paia ma tatalo. O le a e iloa pe a masani ona e mafuta ma le Atua, o le a iai lava se mataupu e te lua talanoa ai i so’o se taimi e te alu atu ai ia te ia, a le o se mea o lo’o ia a’oa’oina ai oe, po’o se mea foi o lo’o e fia malamalama ai. O lau fata faitaulaga e le o se nofoaga e na o lou sau iai e faalaulau ai ou manaoga i le Atua, o se nofoaga e te sau iai e fausia ai se lua mafutaga vavalalata ma ia. O a foliga o lau mafutaga ma le Atua? I le suafa o Iesu, Amene. 

OPEN HEAVENS

MATALA LE LAGI MO LE ASO LUA 27 AOKUSO 2024

(tusia e Pastor EA Adeboye)

Manatu Autu:  Galue mo le Atua  (Working for God)

Tauloto -Tusi Paia– Ioane 6:28 “Ona fa‘apea mai lea o i latou ‘iā te ia, “Se a se mea matou te faia, ‘ina ‘ia matou galulue i galuega a le Atua?”

Faitauga – Tusi Paia – Eperu 6:9-14

Ina ua ou fanaufouina i totonu o le Ekalesia Redeemed Christian Church of God, sa fa’aigoaina tagata galulue mo le Ekalesia , o “Fanau a le Atua” ae le o ni tagata galulue. E iai le mafua’aga o lea tulaga. A taunu’u fanau a le Atua i le maota a lona tamā, e va’aia loa ini mea o faaletonu, e gaoioi loa e fa’atulaga sa’o mea uma. Peita’i afai e o mai tagata asiasi i le maota lava lea, e pau le mea e fai, o le sa’ili o sona nofoa ma nofo lelei ai. Afai e te manatu o le Atua o lou tamā, o le taimi lava e te ulufale ai i lona maota, e te faia mea uma ina ia sologa lelei ma matagaofie mea uma. E le mafai ona e ulufale i le maota a lou tamā ae e te le manatu ia lelei atoatoa ma faamatagofieina lea nofoaga.

E matua tele fa’amanuiaga i le ‘avea ma se tagata galue i le maota o le Atua. O se tasi o ia mea o loo ta’ua i le 2 Timoteo 2:6 e faapea: “O lē galue i fanua e tatau ‘ona mua‘i maua e ia le fua.”

O le ‘avea o oe o se tagata e galue’ina fanua, e te fa’ato’a ma totō le fanua ina ia maua fua o le ‘ele’ele mo tagata uma, o oe foi o le a mua’i mauaina ma tofoina fua o le ‘ele’ele. I se isi fa’aupuga, afai e te galue ina ia sologa lelei ma atoatoa sauniga uma a le Ekalesia, o oe foi o le a mua’i maua fa’amanuiaga ma vavega e tutupu mai i ia sauniga. E leai se tagata e galue mo le Atua e lē maua sona taui.

Fai mai le Eperu 6:10 - “Auā e lē amioletonu le Atua, na te lē fa‘agalogaloina la ‘outou galuega ma le alofa ‘ua ‘outou fa‘aali mai ai i lona suafa, auā na ‘outou ‘au‘auna i le ‘au pa‘ia, i le o lo‘o ‘outou ‘au‘auna i ai.”

E le  fa’agalogalo e le Atua so’o se galuega e te fa’atinoina ona o lou alofa ia te ia.  Sa folafolaina e le Atua i le tusi o Levitiko 19:13, e le tatau ona e taofia le taui a se tasi ua faia sau galuega. E te manatu ea e le tauia e le Atua au galuega ua fa’atinoina faapitoa mo ia? O taui e te mauaina, o le puipuiga o lou saogalemu, o le foai o mea e te manaomia, o le mafaufau lelei ma le poto, o le faasaolotoina, o le vave maua tali o au tatalo, ma isi tulaga e anoanoa’i. E lelei le totogiina o tagata e fa’atino galuega faapitoa mo le lotu, ae ou te ta’ua pea i sui o le Ekalesia, ae maise latou e naunau e totogi a latou ‘auaunaga, ae mumusu e  ‘avea ma tagata faigaluega, ou te fa’amanatu pea ia i latou,  ‘aua ne’i tou manatu e toe mauaina se isi taui mai le Atua, auā e le totogiina fa’alua se tagata e le Atua mo le galuega e tasi.

Afai o oe o se tagata faigaluega I le Ekalesia ma o loo e finau mai e tatau ona totogi au galuega, o lona uiga ua e manao e taua oe o le auauna ae le o se tasi o lana fanau! Po’o oe moni o se fanau o le Atua po ua na o se tagata asiasi i lona maota? I le suafa o Iesu, Amene.

OPEN HEAVENS

MATALA LE LAGI MO LE ASO GAFUA 26 AOKUSO 2024

(tusia e Pastor EA Adeboye)

Manatu Autu: E faaumatia le matau’a  (Envy destroys)

Tauloto -Tusi Paia– Faataoto 14:30 “O le loto lelei, o le ola lea o le tino; a o le matau‘a, o le mea lea e pala ai ivi.”

Faitauga – Tusi Paia – Kalatia 5:19-21

O le tulaga pito lamatia o le matau’a, e tatala ai le loto i le tele o mea leaga. O so’o se tagata e faataga le matau’a i lona loto, ua toe o ni nai laasaga oo atu I le faatinoina o le amioleaga. E lei mafaufau Kaino e fasioti i lona uso, peitai na faia ina ua oo mai le matau’a i lona loto. E leiloa pe sa mafana le la mafutaga, ae o le aso na o’o mai ai le matau’a i lona loto, na tatala ai le faitotoa e oo mai ai manatu e fasioti i lona uso. I le Numera 16: 1-33, na tulai ma faasagatau mai le fanau a Kora ia Mose ona o le matau’a i lona tulaga taitai ae na tanumia I latou I le eleele. A e vaai atu i se tagata o loo ia maua se mea o loo e mana’ona’o iai, aua e te matau’a ae ia e fiafia ma olioli ma latou. Fai mai le Roma 12:15, “Ia ‘outou ‘oli‘oli fa‘atasi ma ē ‘ua ‘oli‘oli, ‘ia ‘outou tagi fo‘i fa‘atasi ma ē ‘ua fētāgisi.”

Afai o loo lelei atu taumafaiga a seisi tagata ia te oe i pisinisi, Ekalesia, poo so’o se mea lava, aua e te matau’a ona o i latou, ae olioli ma i latou. Ioe, e te ono lagona le matau’a i le amataga, ae e oo mai le tulaga lamatia pe afai e te faatagaina e nofo ma tuputupu pea i lou loto. Fai mai le Iakopo 3:16

“Auā o le mea e i ai le mata‘u‘a ma le misa, o i ai le fē‘avaua‘i ma mea leaga uma.”

E tusa ma le fuaitau o loo taua i luga, e uo lelei le matau’a ma le misa, a tuufaatasi, e tupu ai le amioleaga. O le mea lea, e le tatau ona e faatagaina le matau’a e nofo ma maua’a i lou loto. O le taimi  lava e te manatu ma lagona le matau’a i se uso, galue i lou mafaufau ina ia tineia le matau’a ae suia i le olioli. Ao e galue mo lou mafaufau, ole atu I le Atua e fesoasoani mai ia te oe ina ia aua nei e maua lagona matau’a. Amata loa ona e tatalo mo lena tagata aua foi o le a le fiafia ai le tiapolo ona o loo taumafai e avatu mea ia te oe e faatupu ai le matau’a. Peitai ua e le matau’a, ae ua e tatalo mo lena tagata. O iina e amata ai ona taofia taumafaiga a le tiapolo e faatupu le matau’a ia te oe. 

Afai e te faataga le matau’a i totonu o lou loto, ua e tatala le faitotoa e faaumatia ai lou tagata. Fai mai le Faataoto 14:30 “O le loto lelei, o le ola lea o le tino; a o le matau‘a, o le mea lea e pala ai ivi.”

Puipui lou loto mai le oona o le matau’a, aua e taitaia lou tagata e faaumatia. 

Tatalo

Tama, faamolemole ia tineia ma faaumatia soo se manatu po’o se lagona matau’a mai lo’u olaga I Le suafa o Iesu, Amene.