Samoan Devotional

OPEN HEAVENS

MATALA LE LAGI MO LE ASO LUA 12  NOVEMA 2024

(tusia e Pastor EA Adeboye)

Manatu Autu: O le sogi o le afi (A kiss of fire)

Tauloto -Tusi Paia–Esoto 19:18“O le mauga o Sinai fo‘i ‘ua pusa ‘atoa uma auā na afio ifo ai le ALI‘I i le afi, ‘ua alu a‘e fo‘i ona asu pei o le asu o se umu; ‘ua lūlūteleina lava le mauga ‘atoa uma.”

Faitauga – Tusi Paia –Esoto 3:2-6

O laugutu, o se vaega o le tino o le tagata e faaeteete iai. I le Isaia 6:6-7 ina ua mana’o le agelu e fesoasoani ia Isaia, sa ia faapa’i se malala ola i ona laugutu. E le taumate sa matuā tiga ai, pe a fua e tatau ona faaeteete i laugutu, a ua avea lea tulaga ua suia ai Isaia.

E leai se mea e tumau pe a pa’i iai le afi. I le tusi o Galuega 2:1-4; sa tula’i Peteru ma le lototele ma lauga atu i le motu o tagata ina ua afio ifo Agaga Pa’ia e pei o se afi ua vaevaeina, i tagata uma sa mafuta i le afeafe aupitoaluga. O Peteru tonu lava lea sa faafiti fa’atolu Iesu, ona o lona fefe. Mai le aso na pa’i ai le sogi o le afi i se tagata fa’atuatua; e matua suia mea uma ia te ia, ma o le a’afiaga o le afi e tumau ia te ia e faavavau.

A e vaai i se tagata e nofo sauni i soo se taimi na te faia le finagalo o Keriso, e o’o i le mea e gata ai, o lona uiga ua pa’i lena tagata i le sogi a le afi. O le mafua’aga lena ina ua uma ona pa’i ia Isaia le sogi a le afi, e pau le mea sa fa’alogoina e Isaia o le fetalai mai o le Atua:

“O ai ea ou te auina atu? O ai e fia alu atu mo i matou? Ma o lona tali sa fai: “Le Alii e, auina atu a’u”( Isaia 6:1-8). A e pa’i I le sogi a le afi, e te faalogoina le agaga ma le fatu o le Atua mo nuu uma o le lalolagi, ma o Lau tali atu o lenei, ‘Le Alli e, auina atu a’u I soo se mea e faia lau galuega, ou te alu’.

Sa faatino le galuega a Paulo i le faamaufaailogaina. O lenei faamaufaailoga na oo mai ia te ia I le Galuega 9:3-6 ina ua fetaiai ma Iesu e ala i lona malamalama i le auala i Tamaseko. O lenā malamalama e le faapogai mai i se moli uila; o le afi mai le Atua ma o le taimi tonu na pa’i ai i le tino o  Paulo, ua ia maua le sogi a le afi ma suia ai e faavavau. Mai i lena lava taimi, sa ia faia le finagalo o le Atua i le mea e gata ai. O le mafuaaga e faigata ai i Kerisiano ona latou fa’atinoina galuega tetele mo le Atua, ona latou te lei maua le sogi o le afi. O nisi o latou, e naunau e auauna i le Atua i ni tulaga tetele, ae latou te le o faamaufaailogaina, ona latou te lei maua le sogi a le afi. Afai o oe o se faife’au, a ua e fia maua se ‘au tau e ‘au fa’atasi ma oe tou te faatino ni galuega maoa’e mo le Malo o le Atua, ia e tatalo ia latou maua le sogi o le afi. O le taimi latou te maua ai le sogi o le afi, o le a ufitia o latou loto e le faamaufaailoga a le Alii, ma o le a fa’apito lo latou naunau e faia lona finagalo i taimi uma.  

 Tatalo

Tama e faamolemole foai mai mo a’u i le asō le sogi a le afi, i le suafa o Iesu, Amene

OPEN HEAVENS

MATALA LE LAGI MO LE ASO GAFUA 11  NOVEMA 2024

(tusia e Pastor EA Adeboye)

Manatu Autu: Taofi Mau Lau Fa’aaliga 3 (Hold Fast To Your Vision 3)

Tauloto -Tusi Paia–Eperu 12:2“Ma ‘ia va‘ava‘ai atu ‘iā Iesu o lē na te ta‘ita‘iina ma lē na te fa‘a‘ato‘atoaina le fa‘atuatua; o lē na ‘onosa‘i i le satauro, na fa‘atauva‘a ‘iā te ia le mā, ‘ona o le ‘oli‘oli sa tu‘u i ona luma, ‘ua nofo fo‘i o ia i le itū taumatau o le nofoāli‘i o le Atua.”

Faitauga – Tusi Paia –Mataio 6: 19-22

O nei, o le a faaiu atu le tatou a’oa’oga i lau faaaliga, i le faamamafaina lea o lenei, e mafai ona e ausia tulaga o lo’o taulai iai lau vaai. I le faitauga o le Tusi Paia o le asō, na malie Lapana e ave uma e Iakopo mamoe e ilaila solo ma pulepule o lana lafu mamoe e fai ma ona totogi. Peitai na taumafai Lapana e pelogia Iakopo o lea na ia ave faananā ese ai mamoe ilaila solo ma pulepule mai lana lafu ae tuu ai na o mamoe lanu masani. E ui I lea na saeina e Iakopo pa’u o ni laau ma tuu I le vaega e feinu ai manu, ina ia latou vaavaai atu iai i taimi e feinu ai ma feusuai ai. E lei leva ae fananau mai I mamoe e lanu masani, mamoe e ilaila solo ma pulepule seia faatumulia le lafu ma sili atu le aofaiga o mamoe ilaila solo ma pulepule I lo mamoe e lanu masani. Na suia e Iakopo le ituaiga o mamoe na fananau mai e fua I mea e vaavaai iai. 

Fai mai le 2 Korinito 3:18 e tatou te va‘ava‘ai i le pupula o le Ali‘i ma o tatou mata, e liua ai i tatou  e pei o ia. E tatau ona e faamamafaina mea o loo e vaavaai iai I le taimi nei aua o le tulaga lena e ausia I Le lumanai. Ia taulai lau vaai i mea ma tagata e mafai ona fesoasoani ia ausia ou faamoemoega ma taunuuga mo lou lumanai. 

O le taimi muamua na ou alu ai I Korea I Saute e auai I le Ekalesia a Dr Yonggi Cho, na ou vaai ai e fitu a latou sauniga i le Aso Sa e tasi I se nofoaga e 50,000 e ofi ai. Na latou augani I tagata e aua le omai I le Aso Sa na sosoo ai ae sei tuu le avanoa I isi tagata. Na ou vaai ai I se tulaga na fausia ai se faaaliga, o se mea na ou naunau e ausia, ma na ou tuuina atu I le Atua, na ou tagi atu ia te ia. Ini tausaga mulimuli ane, na ou toe alu ai I Korea I Saute ma ua maua lou avanoa ma Dr Yonggi Cho ae na ia faapea mai, ‘Ua ou faalogo ia te oe, e mafai ona e tatalo mo a’u faamolemole?’ Na ou maua le faaaliga i le taimi muamua ona amata lea ona fetuunai e le Atua mea uma Ina ia ou ausia mea na ou vaai iai. I le taimi na ou toe foi ai I lea nofoaga, ua suia lo’u tagata. Afai e te maua se faaaliga ma taulai pea iai lau vaai, e te ausia ma tulai mai I le tagata na e vaai iai i lau faaaliga. 

O le mea mulimuli, o le tulaga e faaalu ai lou taimi e fuafuaina lou taunuuga. I le Faamasino 16, na faaalu le taimi i Samasoni i mea e lē aogā. Na ia asiasi i fale o fafine talitane ma auai i le tele o mea leaga ma lē talafeagai, o le mafuaaga lea na oti laitiiti ai. O Keasi na semanū e avea ma perofeta e sili atu ia Elisaia, peitai o lona naunau I le auro ma le ario na i’u ai o se lepela (2 Tupu 5:25-27). Le au pele e, o le a le faaaliga o loo e u’umauina? O le mea o loo e vaai atu iai e fuafuaina lou taunuuga, I le suafa o Iesu, Amene. 

OPEN HEAVENS

MATALA LE LAGI MO LE ASO SA 10  NOVEMA 2024

(tusia e Pastor EA Adeboye)

Manatu Autu: Taofi Mau Lau Fa’aaliga 2 (Hold Fast To Your Vision 2)

Tauloto -Tusi Paia–Kolose 3:2“Ia ‘outou loto lava i mea i lugā, ‘ae lē o mea i le lalolagi.”

Faitauga – Tusi Paia –Mataio 6: 19-22

O nei, o le a fa’aauau ai la tatou mataupu na amatalia ananafi faatatau i fa’aaliga. Le au Pele e, ou te mana’o ia e silafia o lou lumana’i e faalagolago i mea o loo mafai ona e vaai atu i ai i le asō. Afai o e vaaia se lumanai manuia, e mafai fo’i ona e maua (Kenese 13.15). Ina ua o matou maua le Redemption Camp (Nofoaga o le Togiola) i Texas i Amerika, na fetalai mai le Atua ia te a’u, “O le mamao e mafai ona e vaai atu i ai, o a’u lenā.” Sa o’u savali i le mamao na mafai ona o’u o’o i ai i lea aso, ma o le asō, o mea uma na o’u vaai i ai ua avea nei ma a matou - maimau pe ana mamao atili atu la’u savali !. Ua tu’u e le Atua se malosiaga tele i lau faaaliga na te tosoa’ina mai ai mea uma o loo e mana’o i ai. O lea la, ia iloga lou nofouta faatatau i mea o loo taula’i i ai lau vaai. Fai mai le Tusi Paia I le Kolose 3:2 “Ia ‘outou loto lava i mea i lugā, ‘ae lē o mea i le lalolagi”.

O lau silasila e tatau ona loto i mea o i lugā ae lē o mea o le lalolagi. Tusa pe o si’osi’omia oe e mea mananaia ma fe’ilafi, ia atili mausalī ai lou loto i mea o i lugā. Na ma asiasi ma lo’u toalua i se tagata mauoa, ma sa ia fa’amatamata i ma’ua i se fale o loo ia fausia. O le taimi muamua lea na o’u vaai ai i se paipa e fai i le auro i se faletaele. O iina tonu na faalogo ai lo’u toalua i le siufofoga o le Atua faapea, “Afafine, e sili mamao le matagofie o le lagi.” I le 2 Timoteo 4:6-8, o le Aposetolo o Paulo sa olioli o ia i le pale o le amiotonu sa teuina mo ia. A o vaai i si tagata i le oti, na vaai le Aposetolo i le faapaleina. O le mafuaaga lea na fai mai ai le Aposetolo i le 2 Korinito 11:22-33 na ia lavātia le sasa, fia ai, ma puapuaga uma lava; ona o le fa’aaliga na ia vaai i ai.

Le au pele e, aua le avea lau faamuamua i le tamāoaiga o le lalolagi ma mamalu. Afai ua na o le pau lea o lau vaai o mea e lē tumau, pau mea e te maua o mea e pala. O le pogai lea o le fai mai o le Tusi Paia i le Mataio 6:19-20 e tatau ona o tatou tolo’a’i oa mo tatou i le lagi e leai se mea e faaleagaina ai. I le isi itu, afai e te tulimata’i i tala atu o mea e pala, e te maua uma mea e o le tino faatasi ma mea e tumau e lē faaumatia. O le fetalaiga lea mai le Tusi Paia i le Mataio 6:33:

“A ‘ia ‘outou mua‘i sā‘ili le mālō o le Atua ma lana amiotonu; ‘ona fa‘aopoopoina atu lea o ia mea uma ‘iā te ‘outou.”

Ua na o le pau le tapula’a o mea e mafai ona e maua i le lumanai, o lau faamuamua o e vaai i ai i le taimi nei. O mea o loo au i ai lau vaai o le a faafoea ou ala uma e tatau ona e savali ai e maua ai lau fa’aaliga. Le au Pele e, e leai se mea sili nai lo’o le taula’i o lau vaai I le Atua auā a e maua le Alii, ua e maua le atoatoaga o mea uma lava. O a mea o taula’i iai lau vaai? I le suafa o Iesu. Amene

OPEN HEAVENS

MATALA LE LAGI MO LE ASO TOONAI 9  NOVEMA 2024

(tusia e Pastor EA Adeboye)

Manatu Autu: Taofi Mau Lau Fa’aaliga 1 (Hold Fast To Your Vision 1)

Tauloto -Tusi Paia–Sapakuka 2:2 “Ua tali mai fo‘i le ALI‘I, ‘iā te a‘u, ‘ua fa‘apea mai: ‘Ia e tusi le fa‘aaliga, ‘ia e togitogi i papa, ‘ina ‘ia momo‘e o ia lē na te faitauina.”

Faitauga – Tusi Paia –1 Korinito 9:24-27

Ua tusia I le Faataoto 29:18 e fano tagata pe a leai se faaaliga. Afai o se uso e leai se faaaliga e fai ma ona ta’iala o le lumana’i e ola so’ona fai o ia ma e ono i’u I le malaia. I le tatou Tusi faitau o le asō, fai mai Paulo sa i ai lana tini sa tuli, ma o le pogai lea na ia fai ai ma pologa lona tino. A ou vaai I le soifuaga o aso uma o se uso, e mafai ona o’u iloa ai pe i ai sana miti pe leai.

Ou te manatua se taimi o le 1980 ina ua lata ina uma sa’u anapogi mo le 40 aso, ma sa asiasi atu se faifeau i lo’u ofisa. E alu atu le faifeau o o’u taoto i luga o se fala ona ua vaivai le tino i le lē ‘ai i le silia ma le masina. O le taimi lea ua i ai se fale tele o le RCCG e tusa ma le 100 mita le umi 50 mita le lautele. Ina ua vaai mai la le faifeau ia te a’u i le tulaga sa o’u i ai, sa fai mai, “Aisea ua e soona anapogi ai o lenā ua ia te oe le fale aupito sili ona telē i totonu o AferIka? O le a se isi mea o e saili?” Ou te le’i tali i le uso faifeau auā e lē o mafai ona ia iloa la’u miti. Ia te ia ua o’u taunuu i le tumutumuga o manuia, peita’i o a’u o loo o’u miti i se fale e pei o le tele o se aai ma sa o’u manaomia ona faapologa lo’u tino ia maua ai la’u faaaliga.

O Iosefa sa ia iloa le lumanai, ma o le mafuaaga lea o le fai mai o le tusi o Kenese 39:1-12; ina ua fai atu le avā a lona matai ia Iosefa la te momoe na fai i ai, “e lē mafai ona o’u faia se mea leaga ma o’u agasala ai i le Atua o lē na aumai ia te a’u miti faatatau i lo’u lumana’i. Ou te iloa o loo i ai polokalame a le Atua mo a’u ma e tatau ona ou ola usita’i ma pulea.” Fai mai le Eperu 12;2; na onosaia e Iesu le satauro ona o le olioli sa tu’u i ona luma, o le olioli o le vaai i agaga e tele ua toe faalelei ma le Atua.

O le toatele o o’u aiga ma uo sa manatu ua leaga lo’u ulu ina ua o’u ave lo’u aiga i ni tausaga ua mavae ma matou nonofo i le nuu ua tāua nei o le Aai o le Togiola. Sa o latou fai mai, “E faafefea e oe o se faiaoga sinia i se Iunivesite, ma sa nofo i se fale tele ma matagofie ona e ave lou aiga i lenei togavao e leai se eletise?” Pau le vaaiga na o latou iloa o se vaomatua, peita’i na o’u iloa atu se aai. I le Eperu 11:8-10; fai mai o Aperaamo sa nofo i faleie aua sa ia faatalitali atu i se aai ua faavae ina, o lona mataisau ma le tufuga o le Atua lea.

O le a se vaaiga o loo e faatalitali i ai mo lou lumana’i? O faafefea ona e soifua I le asō ina ia taunuu ai lau miti? Afai o i ai moni sau faaaliga mo lou olaga, o le faaaliga lenā e tatau ona ta’ita’ia oe e te ala pea a’o momoe uma isi ma faamalosi pea ina ua faavaivai ma musuā isi. Aua ne’i leiloa I lau vaai lau miti o lou lumana’i; taula’i lau vaai I le Atua, o le na te amataina ma fa’aatoatoaina lou faatuatua (Eperu 12:2). O atagia i lou soifuaga o aso uma o i ai se faaaliga tele o e tulimata’i ma fa’atalitali i ai mo lou olaga? I le suafa o Iesu. Amene.

OPEN HEAVENS
MATALA LE LAGI MO LE ASO FARAILE 8 NOVEMA 2024
(tusia e Pastor EA Adeboye)
 
Manatu Autu: Tatalo Faafetai (Prayers of thanksgiving)
 
Tauloto -Tusi Paia–1 Nofoaiga Tupu 16:34“Vivi‘i atu ‘outou i le ALI‘I; auā e lelei lava o ia; auā e fa‘avavau lava lona alofa.”
‭‭
Faitauga – Tusi Paia –Salamo 95:1-5

Tatalo
1. Le Alii e, faafetai mo lo’u ola. E lē o lo’u malosi ma le mana o lo’o ou maua ai pea le ola I le asō. Ou te matua maua le loto faafetai i lau afio, le Alii e. 
2. Tamā faafetai mo lou alofa mutimutivale ma le alofa tunoa ia te a’u. Faafetai mo lou tausia o a’u ma le faaalia ia te a’u o lou alofa mutimutivale mai le amataga o lenei tausaga seia o’o mai I le asō. 
3. Faafetai Tamā ona ua ou faaolaina. Faafetai mo le faasaoina o lo’u agaga ma le toe faaolaina mai o a’u mai le faaumatia I lima o le tiapolo. Ou te matua faafetai ona o le a ou nofotupu ma oe e faavavau. 
4. Tamā, faafetai mo tali o tatalo uma. Ou te matuā faafetai auā e mafai ona ou valaau ia te oe I so’o se taimi. Faafetai foi mo tatalo uma e te lei talia aua ou te mautinoa o loo e manatu mo lo’u lelei. 
5. Tamā , ou te faafetai i lau afio mo le puipui ia te a’u i taimi uma mai mea leaga uma. E te taitaiina a’u e mau I lalo o le paolo o ou apaau, e tumu a’u i le loto faafetai le Alii e. 
6. Tamā, ou te faafetai ia te oe mo lau tausiga ia te a’u I aso uma. Ou te matua faafetai mo mea uma ua e foai ia te a’u. Ou te faafetai I mea uma ua e foai mai ia te a’u, ma ou te iloa e fa’aauau pea lau tausiga ia te a’u I aso uma o lo’u ola. 
7. Tamā, faafetai mo tagata uma o lo’u aiga aemaise o ē pele ia te a’u. Faafetai mo avanoa taua ua ou maua ai tagata o lou aiga ma uō. 
8. Faafetai Tamā mo le Ekalesia o lo’o ou tapuai ai. Faafetai mo faifeau, aufaigaluega ma tagata lotu. Faafetai mo mea uma ua e faia aemaise o fuafuaga mo I matou uma. 
9. Faafetai le Alii e,  mo taua uma o loo e tauina mo a’u. Faafetai mo le manumalo ua ou maua ma lo’u maua o le manumalo a’ia’i ona o oe. Ou te matua faafetai le Alii e. 
10. Faafetai Tamā mo lou avea o lo’u Alii. Ua mafai ona ou fesagai ma a taeao ona o lou faamalosi mai. E matua pele lau afio ia te a’u, a aunoa ma lau afio, e leai se uiga moni o lo’u ola. 
11. Faafetai le Alii e, mo faitoto’a o avanoa ma faamanuiaga ua e tatala mo a’u. Faafetai foi mo faitotoa uma ua e tapunia aua ou te iloa o lo’o galulue mea uma mo lo’u lelei. 
12. Faafetai le Alii i Lou alofa ma lou agalelei e lē mavae. Ia viia ma faamanūina lou suafa e o’o I le faavavau. I le suafa o Iesu e tatalo atu ai, Amene.

OPEN HEAVENS

MATALA LE LAGI MO LE ASO TOFI 7 NOVEMA 2024

(tusia e Pastor EA Adeboye)

Manatu Autu: Vaavaai i tua atu o Tamā (Seeing beyond Fathers)

Tauloto -Tusi Paia–Ioane 14:12 “E moni, e moni, ‘ou te fai atu ‘iā te ‘outou, o lē talitonu mai ‘iā te a‘u, e faia lava e ia o galuega ‘ou te faia; e fai fo‘i e ia mea e sili i ia mea, auā ‘ou te alu i lo‘u Tamā.”

‭‭

Faitauga – Tusi Paia –1 Korinito 4:14-16

E masani I tamaiti ona vaavaai atu I o latou matua ma e leai ma se eseesega ma le malo o le Atua. E tatau i se atalii ona taumafai e na te iloa mea uma mai lona tamā faaleagaga ma tatalo ina ia ona tauaveina lona agaga. Peitai, o le a le mea a le tamā e maua mai lana fanau i le agaga? A e manatu i le tulaga lenei, sa iai le aoga o perofeta i Isaraelu, lea sa maua mai ai e Elia tagata e fesoasoani ia te ia, e te iloa ai iina, e na te lei manaomia tele Elisaia. 

O le mafuaaga moni e taumafai ai le tamā e latalata i lana fanau faaleagaga ona e naunau e faasolo atu i ai latou lona iloa faapea ma le faauuga. E lē manao e oti ma ia mea uma ua ia maua mai le Atua, e manao e faasolo atu I tagata ona ia latou faaauau ai pea lea o le galuega pe a mavae atu o ia. O le mafuaaga lea, o le naunau o le tamā e a’oa’o faatasi ma le naunau o lana fanau faaleagaga e a’oa’oina, e mafai ona fausia ai se mafutaga vavalalata i lo la va. E pei o Elia ma Elisaia i le 2 Tupu 2:11, e iai le aso e tuua ai e tamā le lalolagi nei ona feagai loa lea o fanau faaleagaga ma le faaauauina o le galuega ia siitia i le Isi tulaga e aunoa ma tamā. O le a le tulaga o lau sauniuniga o loo iai e faaauau ai le galuega mai lou tamā faaleagaga?

O lau vaai mamao i lau savaliga ma le Atua e tatau ona I tua atu o lou tamā faaleagaga , aua a lē saunia, a mavae atu o ia ae aafia ai oe. O lo’u tamā faaleagaga o se tagata maoae o le Atua. Sa ia anapogi ma tatalo e sili atu i lo seisi tagata ou te iloa. Na ia maua faaaliga mo le lumanai ma sa a’oa’oina a’u I le tele o mea mai ia te ia. Peitai na fai mai ia te a’u e na te lei anapogi lava mo aso sosoo e 21. Ina ua mavae ni nai aso talu ona alu atu o ia e faatasi ma le Alii, ua ou faia loa se anapogi e sili atu ma le tulaga masani, e faia mo aso sosoo e 40, e faatasi I le tausaga. Na ia maua faaaliga o le Ekalesia o le a faalautele atu i le lalolagi, ma ua taunuu lea tulaga, peitai ua faalautele atili atu e le Atua le faaaliga i Isi vaega e pei o le faatuina o se Iunivesite e a’oa’oina ai talavou ma maua faailoga maualuluga ao a’oa’oina I mea faaleagaga. 

Afai e te manao e fiafia lou tamā faaleagaga ia te oe, ao a’oa’oina oe mai ia te ia ae lei tuua le lalolagi nei, e tatau foi ona e vaavaai i tua atu o lou tamā i lau savaliga ma le Atua. E lautele atu lau vaai mamao I le Atua e sili atu i lau mafutaga vavalalata ma lou tamā faaleagaga? I le suafa o Iesu, Amene. 

OPEN HEAVENS

MATALA LE LAGI MO LE ASO LULU 6 NOVEMA 2024

(tusia e Pastor EA Adeboye)

Manatu Autu: Aua nei fa’ama’aa o outou loto 2 (Harden not your heart 2)

Tauloto -Tusi Paia–Ieremia 31:18 “Ua ‘ou fa‘alogo lava ‘iā Efaraima ‘ua fa‘anoanoa o ia, ‘ua fa‘apea, “‘Ua e a‘oa‘i mai ‘iā te a‘u, ‘ua a‘oa‘iina fo‘i a‘u, e pei o le povi ‘ua lē a‘oa‘oina; ‘ia e fa‘aliliuina a‘u, ‘ona liliu ai lea o a‘u; auā o oe, le ALI‘I e, o lo‘u Atua oe.”

‭‭

Faitauga – Tusi Paia –Eperu 12:5-11

E iai taimi e te faalogo ai i le Atua, o se a’oa’iga e faatonu ai. Peitai, e tatau ona tatala pea lou loto ia te ia tusa po’o le a le a’oa’iga. E sili atu ia te a’u le a’oa’i mai o a’u e le Atua i lo’o le lē lagona o lona siufofoga. Afai e manao le kerisiano e lagona na o upu mālie mai le Atua ae lē fia faalogo i lana a’oa’iga, e o’o lava ina lē toe faalogo lea tagata i lona siufofoga. E tatau ona e fiafia pe a a’oa’i ma faatonu oe e le Atua aua fai mai le Eperu 12:6 o le atalii e alofa iai le tamā e na te a’oa’i ma faatonu. Ina ua a’oa’i Tavita i le 2 Samuelu 12:1-14, e le’i fa’ama’a’a lona loto, na ia salamō ona fa’aauau ai pea lea ona savavali ma le Atua. 

O le ā lau tali mai pe a a’oa’i oe e lau faifeau? E fa’ama’a’a pe vave ona faia le auala e toe faalelei ai? Tusa poo le a le maualuga ma le tauoloa o le tulaga o le tagata I le galuega a le Atua, pe tele foi meaalofa a le Agaga Paia o lo’o ia te ia, a fa’ama’a’a le loto o lea tagata ma tetee i le a’oa’iga a le Atua, e teena e le Atua lea tagata (1 Samuelu 16:1). Fai mai le Salamo 51:17

“O taulaga i le Atua, o le loto momomo lea; le Atua e, ‘e te lē ‘inosia le loto momomo ma le nutimomoia.”

‭‭

Afai e te manao i le Atua e savavali pea ma oe ma talanoa ia te oe, e tatau ona e maua le loto momomo ma le nutimomoia. E lē manatu le Atua i le na o le faia o galuega masani i le lotu, o loo naunau o ia i se mafutaga ma oe. Peitai, e pei lava ona faigata ona lua mafuta ma se tagata e loto ita pe a faatonu ma aoai, e le afio le Atua ma tagata loto ma’a’a. Fai mai i le Isaia 57:15

“Auā o lo‘o fa‘apea ‘ona fetalai mai o lē ‘ua Maualuga ma ‘ua Silisili, o lē afio e fa‘avavau, e pa‘ia lona suafa: ‘Ou te nofo i le mea maualuga ma le pa‘ia, ma te nonofo fo‘i ma lē ‘ua momomo ma ‘ua maulalo lona loto. E fa‘amafanafana i ē ‘ua loto maulalo ma fa‘amafanafanaina loto o ē ‘ua loto momomo.”

‭‭

Le au pele, a a’oa’i oe e le Atua, a lē ala mai lana Upu, o seisi kerisiano, pe tuusao mai foi ia te ia, aua nei fa’ama’a’a lou loto. O le fa’ama’a’a o le loto i lana a’oa’iga e oo atu ai i le faaumatia e pei ona tatou iloa I le Faataoto 29:1 “O le tagata ‘ua a‘oa‘iina so‘o, ‘ae fa‘ama‘a‘a lona ua, e fa‘afuase‘i ‘ona nutimomoia o ia, ‘ae leai se fofō.”

‭‭

Aua e te inoino I le a’oa’iga a le Atua, ae  naunau e opogi lana a’oa’i ma faatonu mai auā o le faailoga lea e alofa ia te oe. 

Tatalo

Faamolemole le Alii e, fesoasoani mai ina ia ou usitai i au a’oa’iga I taimi uma, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 5 NOVEMA 2024

(tusia e Pastor EA Adeboye)

Manatu Autu: Aua nei fa’ama’aa o outou loto 1(Harden not your heart 1)

Tauloto -Tusi Paia–Salamo 95:8 “Aua ne‘i fa‘ama‘a‘a o ‘outou loto e pei ‘ona faia i Meripa, e pei ‘ona faia i le aso na i Mase i le vao.”

Faitauga – Tusi Paia –Eperu 3:7-11

E talanoa le Atua i ona tagata, ae pau le fa’afitauli, e le fa’alogo le to’atele ia te ia. Fai mai le Salamo 95:6-8 ‘aua nei fa’amaaa outou loto pe a fai tou te fia faalogo i lona siufofoga. Afai sa talanoa le Atua ia te oe, a ua e le usita’ia, o le a fifilemu loa ia, ma e te le toe fa’alogoina lona siufofoga.

E manaomia ona e fa’alogo I le Atua, ina ia ona taitaia oe. O le auala amata ai ona e fa’alogo ma taitaiina e le Atua o lou suesueina lea o le Tusi Pa’ia. Peita’i o le ā lau mea e fai pe a fai ua tupu se tulaga e manaomia ai le taitaiga ae e le o manino se tali mai le Tusi Pa’ia? O so’o se taimi, e te manaomia ona fai faa’iuga i ia ituaiga mataupu, e manaomia ona e faalogo tu’usa’o mai i le Atua.

E iai taimi e te iloa manino le finagalo o le Atua mo oe, mai ana afioga pa’ia. Peita’i e te manaomia pea ona e fa’alogo ia te ia pe fa’apefea ona faa’tinoina tulaga uma e tusa ma lona finagalo. O se fa’ataitaiga, ina ua fia malaga Paulo i Asia, i le Galuega 16:6-7, sa taofia e le Agaga o le Atua. Atonu e mafai ona e fesili: E faapefea ona taofia e le Agaga o le Atua ia Paulo i le malaga atu e talai le talalelei, ae o lo’o tusia i le Mataio 28:19 e tatau ona tatou o atu i le lalolagi ma a’oa’oina ia atunuu uma?

I ni tausaga ua tuanai, sa ou fia faia se crusade i Benin, o se taulaga i le itu Saute o Nigeria. Ua uma ona tapena vaega uma mo lea crusade, a ua faate’ia a’u ina ua ou fesili i le Atua e uiga i lea fuafuaga, ae fetalai mai, e faia Le crusade i Ede, o se taulaga i  le itu Saute Sisifo o Nigeria. Sa ou fa’amatala i le Atua, ua mae’a le crusade i Ilesha, o se isi taulaga i le sitete lea e iai Ede ma atonu ua uma ona auai ai tagata o Ede. Peitai ane, ona o le Atua o lo’u Pule Sili, sa ou usita’I ia te ia.

A o faasolo le crusade i Ede, sa auai ai le Tupu ma ina ua ia saunoa mai i le pulela’a, sa ia faailoa mai o le a ia foa’ia fa’ameaalofa mai se fanua mo le lotu ae pule matou po’o lea le telē. Sa matou mua’i manatu e talosaga se 50 eka, ae ina ua ou toe fo’i i le Atua mo sona finagalo, sa ia fa’atonuina a’u e talosaga se 1200 eka ma sa ou usita’ia lona finagalo. I aso nei, o le nofoaga lena o le Iunivesite o le Redeemer’s faapea ma le Redeemed Christain School of Missions. Ana fa’amaa’a lo’u loto, se manū ou te le malaga i Ede ma semanu ou te lē mauaina lea faamanuiaga.

Le au pele, i au fesootaiga ma le Atua, aua nei fa’amaaa lou loto. Ia e fa’alogo ia te ia ma le mafaufau sa’oloto, ma ia e faamaoni e usita’ia o lona finagalo, ona ia fetalai mai lea ia te oe. Afai e faama’a’a lou loto, e le talanoa le Atua ia te oe, I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 3 NOVEMA 2024

(tusia e Pastor EA Adeboye)

Manatu Autu: A’oa’oina mai Toeaina ma tagata matutua (Learn from elders)

Tauloto -Tusi Paia–Iopu 12:12 “O lo‘o i ai le poto i ē ‘ua toeaina; o le fa‘alevaleva fo‘i o aso e i ai le fa‘autauta.”

Faitauga – Tusi Paia –1 Tupu 12:1-19

E tauave e toeaina ma tagata matutua le oa o le poto. Tusa po’o le a le lelei o lau aoga, e iai lesona e lē mafai ona a’oa’oina I totonu o potu aoga, e a’oa’oina I le potu aoga o le ola nei, e a’oa’oina mai mea e tutupu i le olaga. E ui e iai lo’u faailoga maualuga i a’oa’oga o le PhD, ua fai la’u faaiuga ou te faalogo i le poto o toeaina mai lea taimi I lea taimi. O le mafua’aga lea e te faalogo ai o fai so’o la’u tala lea, ‘e iai upu a toeaina’, auā e tāua tele nisi o a’oa’oga ua ou maua mai i tagata matutua ou te lei maua mai Kolisi ma Iunivesite’. 

Na maua lo’u avanoa taua ou te nofo ai I vae o lou tamā faaleagaga o Pa Josiah Akindayiomi mo a’oa’oga. Ou te asiasi ia te ia I vaiaso uma, fai iai ni fesili ma e tali ma a’oa’o ia te a’u. Na maua foi lo’u avanoa e aoaoina mai isi faifeau. I le tai lua vaiaso, ou te asiasi ai ia te ia. Na ia a’oa’oina a’u I le tele o mea, e ui ou te le auai i nisi o ana a’oa’oga I lea taimi aua na ou manatu e lē sa’o. Peitai, a’o ou tuputupu a’e, ua ou iloa e sa’o lelei o ia. O se tasi o mea na ia a’oa’oina ia ou manatua i taimi uma ,e lē o a’u o Le Atua, e le afaina le maualuaga o le faauuga o lo’o ia te a’u. Na ia a’oa’oina foi a’u e faia lava e Le Atua so’o se mea e finagalo ai, ma e pau le mea ou te faia o le tuuina atu a’u avega mamafa ia te ia ona ou alu lea e moe. O le mafuaaga lena a ē fesili i so’o se tagata e latalata ia te au, e mafai ona latou faamautinoa ia te oe, e leai ni faafiftauli i le moe ia te a’u. Tusa po’o le a le telē o le faafitauli, e uma loa ona ou tatalo ai, o’u moe loa. 

Le au pele e, tusa pe lē a’oa’oina matua ma tagata matutua e pei o oe, faalogo i a’i latou. Tusa pe iai mea e te lē auai i latou manatu pe faigata foi ona e malamalama ai, ia e manatua pea. E iai le aso e siitia ai lou poto, ona e faia lea. Aua e te faata’alo i taimi ma tagata matutua, pe aiga ia te oe pe leai. Talosaga iai e a’oa’o oe I ni mea latou te iloa ma faia. E iai nisi o vai faa le natura e tafieesea ai ma’i, ua maliliu a tagata matutua na faia ma leiloa atu ai lava ona e lei tinoū augatupulaga fou e a’oa’oina ma ai a’o maua le avanoa. E tele ni a’oa’oga taua o le ola nei ua leiloa i le auala lea. 

Ia a’oa’oina oe mai tagata matutua, aemaise lava tagata matutua kerisiano o loo iai i lou siomaga ae lei o atu e faatasi ma le Alii. Faaalu lou taimi taua ma tagata matutua i lou siomaga. E tele le poto ma le atamai e te maua mai ai, i le suafa o Iesu, Amene.

OPEN HEAVENS

MATALA LE LAGI MO LE ASO SA 3 NOVEMA 2024

(tusia e Pastor EA Adeboye)

Manatu Autu: O saunoaga mulimuli a Iesu (Jesus’ last words)

Tauloto -Tusi Paia–Ioane 17:11 “Ou te lē i ai pea i le lalolagi, a o i latou, e i le lalolagi lava i latou; ‘ou te alu atu fo‘i ‘iā te oe. Le Tamā pa‘ia e, ‘ia e tausi ‘iā i latou i lou suafa o ē na e foa‘i mai ‘iā te a‘u, ‘ina ‘ia tasi o i latou, fa‘apei o i tā‘ua.”

‭‭

Faitauga – Tusi Paia – Ioane 17:9-26

O upu mulimuli a se tagata e maliu e tāua tele ma e tatau ona manatua ma amanaia. Ae sili atu ona tāua, e tatau ona o tatou matuā amanaia toe upu a Iesu ae na te le’i tuua le lalolagi auā e silisili ona tāua. Ina o le a tuua e lo’u tamā fa’aleagaga le lalolagi, na ia feau mai a’u o’u te alu atu, ae pagā lea ua o’u alu lenā aso ou te lauga i Akure, o le laumua o se aai i Nigeria Sisifo. E o’o mai i le asō ou te momo’o pea maimau pe ana o’u i ai ma faalogo poo le a se upu na mana’o e fai mai ia te a’u i lea taimi tāua o lona soifua.

I le Ioane 3:16; na fetalai Iesu, e alofa le Atua i le lalolagi atoa ma ia auina mai ai o

Ia e maliu mo tagata uma, peita’i ina o fai lana tatalo mulimuli i le Tusi o Ioane 17:9; na faapea lana fetalaiga, “ou te lē o tatalo mo le lalolagi, o loo o’u tatalo mo ne’i tagata ua e aumaia ia te a’u.” O lona uiga afai o se uso e le’i fanaufouina e lē mafai ona ia iloa uma faamanuiaga o le alofa o le Atua. O le mea moni, fai mai Iesu Keriso na te faafitia lea uso i luma o lona Tamā i le aso faamasino (Mataio 10:32-33).

O i latou ua moni le fanaufouina, e tatau fo’i ona o tatou maitauina toto’a toe upu a Iesu a’o le i fa’asatauroina o ia ma maliu. I lana tatalo mulimuli a’o lei fa’asatauroina ia na fai mai, “E lē fa‘apito la‘u tatalo mo i latou nei, a o i latou fo‘i e fa‘atuatua mai ‘iā te a‘u ‘ona o la latou ‘upu; ‘ina ‘ia tasi i latou uma, fa‘apei o oe le Tamā o i totonu ‘iā te a‘u, o a‘u fo‘i o i totonu ‘iā te oe, ‘ina ‘ia tasi i latou i totonu ‘iā te i tā‘ua; ‘ina ‘ia talitonu le lalolagi ‘ua e ‘auina mai a‘u.”

‭‭Ioane‬ ‭17‬:‭20‬-‭21‬ ‭

E tāua tele iā Iesu Keriso, le ao o le ekalesia, pe a loto gatasi lana fanau. O le mamalu o le Atua, fa’ato’ā vaaia ma lagonaina i luga o le ekalesia pe a lotogatasi ma fealofani le au kerisiano. I le Salamo 133, fai mai le Tusi Paia, o le fa’au’uga ma manuia o le Atua o le a tafe ifo i luga o lana ekalesia pe a nonofo faatasi lava o uso. E lē tatau ona i ai se mea e tigā ai pe taofia se loto leaga I le va ma lou uso ma lou tuafafine iā Keriso. Tusa poo se kerisiano mai se isi tovine, ae i ai se lua fe’ese’esea’iga, manatua o oulua uma e tasi ia Keriso, ma o Kerisiano uma o fanau uma i latou a le Atua.

Le au pele e, fa’amautinoa e faaali lou alofa i taimi uma i le au kerisiano o tou mafuta tusa pe eseese tou manatu. Filifili lou mafaufau e fa’ataua ma tausisia toe fetalaiga a lou Alii ma lou Fa’aola e ala i lou taumafai e tausi le fealofani ma le nofo lelei ma isi ou uso kerisiano (Efeso 4:1-3).

Tatalo

Tamā faamolemole fesoasoani mai ia te a’u e manatua ma tausi au toe saunoaga i lo’u alofa lea i kerisiano uma i le lalolagi atoa tusa lava poo a ni mea e lē tutusa ai i matou, i le suafa o Iesu, Amene.