Samoan Devotional

OPEN HEAVENS

MATALA LE LAGI MO LE ASO LULU 3 TESEMA 2024

(tusia e Pastor EA Adeboye)

Manatu Autu: Matafaioi a ou lima (The purpose of your hands)

Tauloto -Tusi Paia– Faaaliga 4:11 “Lo matou Ali‘i e, ma lo matou Atua e tatau lava oe ‘ina ‘ia tu‘u atu ‘iā te oe le vi‘iga, ma le fa‘ane‘ene‘ega ma le mana. Auā na e faia mea uma lava, ‘ona o lou finagalo fo‘i e i ai i latou ma ‘ua faia.”'

Faitauga – Tusi Paia – Mataio 12:9-13

O le Atua silisili ese na te lē faia se mea e aunoa ma se uiga ma se mafuaaga, aua, o mea uma na ia fofoaina, e iai le uiga, ma e fa’apena foi ona iai le matafaioi a so’o se vaega o lou tino. O lo’o faapea mai le tatou tauloto mai le Tusi Paia, sa faia I tatou e le Atua mo lona finagalo. Na auina mai oe e le Atua i le lalolagi mo lona finagalo. O le mea moni o vaega uma o tatou tino ua faia fa’apitoa mo le faamalieina o le finagalo o le Atua. O le asō, o le a amata ona ou a’oa’o atu i le mafuaaga na faia ai e le Atua vaega uma o le tino o le tagata ma o le a ou amata atu i lima.

O lo’o faapea mai le Salamo 47:1 '‘Inā patipati ia o ‘outou lima, o ‘outou nu‘u uma lava; ‘inā ‘alalaga atu ia i le Atua ma le leo fiafia.'

O se tasi o vaega na faia ai ou lima ia patipati mo le Atua. I le Mareko 3:1-5, sa fa’amalolo e Iesu le tamaloa lima gase e ui ina tetee taitai o le sunako i ni fa’amalologa e faia i le aso Sapati. E lei faia e le Atua o tatou lima ia gagase, o lima na faia ia patipati mo le Alii. O le mafuaaga lena, e ui e lei talosaga le tamaloa lima gase e faamalolo o ia, ae matuā taua ia Iesu le malolo atoatoa o ona lima.

E iai tagata i le vaaiga i le tino e lē gagase lima, peitai afai o lima o ia tagata ua le mafai ona ausia le maualuga o le tulaga e tatau ona ausia, e mafai ona faaupuina ua gagase lima . Ae le gata i lea, afai ua le mafai e ni tagata ona ‘ausia ni tulaga sa mafaia muamua, o lona uiga ua gagase foi o latou lima. Afai e gagase lima o se tagata, e le mafai ona ia maua le fiafia, e le mafai foi ona patipati. Ou te folafolaina atu a fai ua gagase ou lima I le aso, o le a toe malolosi atoatoa, I le suafa o Iesu.

Afai ua faamautinoa e le Atua e lē gagase ou lima, o lona uiga afai e te lē patipati mo ia pe a e tapuai, e te le o maua se loto faafetai i le Atua. Afai e leai se loto faafetai o se tagata I le Atua mo lona agalelei ma faamanuiaga, ua lamatia ona lima e o’o ina gagase. O se tagata loto lē faafetai, e peiseai o lo’o ia ole atu mo ona lima ia gagase.

Le ‘au pele, ou te ‘ai’oi atu e te manatu i faamanuiaga tetele ma tulaga mata’utia ua faia e le Atua mo oe, e o’o I lona mata’utia ma le mana. Ia amata atu I lenei taimi ona e manatunatu I lona lelei ma patipati ia te ia e ofoofo atu ai le viiga ma le faaneetaga, ma lou malosi atoa. Ia e mafaufau i le lelei o le Atua i aso ta’itasi ma patipati ia te ia, ma lou malosi atoa, I le suafa o Iesu, Amene.

OPEN HEAVENS

MATALA LE LAGI MO LE ASO GAFUA 2 TESEMA 2024

(tusia e Pastor EA Adeboye)

Manatu Autu: O le mana I totonu (The power within)

Tauloto -Tusi Paia– Galuega 1:8 “Ae peita‘i o le a maua e ‘outou le mana, pe ā afio ifo le Agaga Pa‘ia i luga ‘iā te ‘outou; e fai fo‘i ‘outou ma molimau ‘iā te a‘u i Ierusalema ma Iutaia uma lava, ma Samaria, e o‘o lava i le tulu‘iga o le lalolagi.”

Faitauga – Tusi Paia – Iuta 1:17-21

O le mana e mafai ona faauigaina o le mafai e faatino ai galuega. E iai taimi e te manatu ai e tele le mana i se tagata ona o foliga vaaia. Peitai e iai se ituaiga mana e lē mafai ona e faamasinoina e fua I foliga vaaia. Mo se faataitaiga, i le Faamasino 15: 14-15 , ina ua tago Samasoni i le auvae o le asini ma fasiotia le afe o Filisitia, e ese mai ai Isi mea matautia na ia faia, na iloa ai e Filisitia e iai lona malosi uigaese. O le mafuaaga lea na latou faaosoina Talila e suesue poo le ā le faapogai o lona malosi uiga ese (Faamasino 16:4-5). O le tulaga latou te lei iloa, o Agaga Paia a afio mai i ona luga e na te avatu le mana ia te ia e faatino ai mea sa ia faia. Peitai ane, ua aveeseina lenei mana mai ia te ia ona o le agasala (Faamasino 16:20). 

E lei leva ona ou faaolaina, na ou maua se tusi valaaulia I se polokalame I Lo matou nuu. Ina ua logoina lo’u tinā ou te alu e talia le valaaulia, sa fefe o ia ona na ou alu ese ma le nuu ona o ni tagata sa taupulepule e fasioti ia te a’u. Sa latou taumafai e fasitoti e faaaoga ai vai faataulaitu. Na ou fai i lo’u tinā ua ou faaolaina ma e leai se auupega e faasagatau mai e taunuu. Ua ia tali mai e lē o iai se suiga o lana vaai mai ia te au ma fesili mai pe faapefea ona ou iloa ua iai se mana ia te a’u. Ua ou fai iai, a e vaai i se uaea eletise ola ma se uaea eletise pe, e leai ma se eseesega ae e te iloa le uaea eletise ola pe a e tago iai. Afai e te faaolaina, ua ‘outou manumālō fo‘i ‘iā te i latou, auā e sili o ia ‘ua ‘iā te ‘outou, i lē ‘ua i le lalolagi (1 Ioane‬ ‭4‬:‭4‬). 

E iai lava vaega e tatau ona iai Ina ia tumau le malosi o se tagata e pei o le tagata faatuputino e faaeteete i meaai ia paleni ma faamalositino i taimi uma, e faapena foi ona tatou faaeteete I mea tatou te faataga i o tatou agaga. E tatau foi ona faia faamalositino I le agaga. A faataga e se kerisiano mea faaletonu i lona agaga, e faaleagaina ai o ia. A e faalogo I musika faalelalolagi, matamata I ata leaga I luga o upega tafailagi ma isi, ua e faaitiitia lou mana. 

Le au pele e, tatalo ma anapogi faifaipea Ina ia siitia le mana o le Atua I totonu ia te oe. A’o e faia ia tulaga ma ola faapaiaina, o le a faatupulaia le mana o Agaga Paia I totonu ia te oe, ona atili faaaogaina lea o oe e faia mea matautia i lona malo. Faatupu le mana o le Atua I totonu ia te oe I le faia o faamalositino i le agaga i aso uma, I le suafa o Iesu, Amene. 

OPEN HEAVENS

MATALA LE LAGI MO LE ASO SA 1 TESEMA 2024

(tusia e Pastor EA Adeboye)

Manatu Autu: E Tatau Ona Faaolaina Lou Nu’u (Your Hometown Must Be Saved)

Tauloto -Tusi Paia– Luka 9:6 'Ua latou ō atu, ‘ona fa‘ata‘amilo ai lea i lea ‘a‘ai ma lea ‘a‘ai e folafola le tala lelei, ma fa‘amālōlō i ma‘i i mea uma.”

Faitauga – Tusi Paia – Kenese 18:16-33

I le Faitauga mai le Tusi Paia o le asō, o loo ta’u mai ai, a’o savavali Aperaamo agai i Sotoma faatasi ma tagata e toatolu na asiasi atu ia te ia, na faailoa atu e le Alii ia te ia lana fuafuaga e faaumatia Sotoma ma Komoro aua ua tele nauā a latou agasala. Ou te talitonu na ta’u e le Atua lona finagalo iā Aperaamo, o le mana’o ia tatalo fa’atoga Aperaamo mo tagata o nonofo i nei nu’u.

Na tatalo fa’atoga Aperaamo, ma na talia e le Atua mea uma na ole atu ai. Peita’i, e le’i lava ni tagata amiotonu i Sotoma ma Komoro ma na i’u lava ina fa’aumatia ia aai. Ua faaali mai ai tusa lava pe mana’o mai le Atua i tagata tatalo ia tutu i le va, ia aua ne’i o’o se fa’afanoga i se atunuu poo se nu’u, afai e lē lava ni kerisiano o nonofo ai, e ono faaumatia lava lea nu’u.

A o tatalo fa’atoga Aperaamo mo Sotoma, atonu na ia manatua Lota le atalii o lona uso. O’u te mautinoa na vave ona fai lana faaopoopo ma faitau uma Lota, o lona toalua ma ona afafine. Atonu fo’i na faapea Aperaamo e tatau ona i ai ni uo tama a afafine o Lota ma ni o latou matua e nonofo uma i le nuu. Ina ua uma lana faitau faanatinati, na i ai lana faaiuga e tatau ona maua se toasefulu o fanau a le Atua i totonu o le aai. Masalo o le mafuaaga lea na fai ai I le Atua, “Le Alii e, pe afai o i le aai tagata e toasefulu o e amiotonu, e te fa’asaoina ea le aai ona o i latou?” Na talia e le Atua le fa’atoga a Aperaamo, paga lea e lei atoa se toasefulu o tagata o e amiotonu, i le aai. Ou te tatalo so’ose taimi e asia ai e le Atua lou nu’u, o le a ia maua pea le silia ma le sefulu tagata amiotonu o nonofo ai, ma i ai pea lona alofa mutimutivale ae lē o le faamasinoga.

O le mafuaaga lea ua tatau ai ona faavave ona e faia se galuega mo lou nu’u. Ia e fa’amautinoa o susulu le malamalama o le Talalelei i lou nu’u, afai e fai pea e nisi le agasala e ono o’o mai ai le toasa o le Atua, e silasila pea o ia i lana fanau ma fa’asaoina le nu’u. Fa’amautinoa e te laugaina pea le finagalo o le Atua i tagata o lou nu’u e lē aunoa, ina ia mafai ona e ta’ita’iina ni agaga se tele I le ala o le amiotonu. Fai mai le Tusi Paia a e faia faapea, o oe o le tagata poto, ma o le pupula e tele o loo faatali mai mo oe (Tanielu 12:3).

Na ta’u faapitoa e Iesu i e na mulimuli ia te ia, ia o latou amata lauga le Talalelei mai o latou nu’u ina ua ia fetalai I le Tusi o Galuega 1:6 ia fai i latou ma molimau ia te ia e amata i Ierusalema a o le’i faaauau i Iutaia, Samaria ma tuluiga uma o le lalolagi.

Le au Pele e, lauga ma a’oa’o le Upu a le Atua i tagata uma o lou nu’u. O le finagalo lea o le Atua, ma afai e te usita’i, o oe ma lou nu’u o le a faamanuiaina sautualasi. I le suafa o Iesu Amene.

OPEN HEAVENS

MATALA LE LAGI MO LE ASO TOONAI 30 NOVEMA 2024

(tusia e Pastor EA Adeboye)

Manatu Autu: Le Alii e, Ia e Tula’i Mai (Oh Lord Arise).

Tauloto -Tusi Paia– Salamo 7:6 'Le ALI‘I e, ‘ia e tula‘i mai i lou to‘asā, ‘ia fa‘asilisili oe ‘ona o le ita o ē sauā mai ‘iā te a‘u; ma ‘ia e maleifua mai ‘ona o a‘u i le fa‘amasinoga ‘ua e fetalai mai ai. '

Faitauga – Tusi Paia – 2 Samuelu 22:7-10

I la tatou Faitauga mai le Tusi Paia o le asō, ua tatou iloa ai, a fa’afofoga le Atua i le tagi a se tasi o lana fanau ma tula’i mo lea uso, o le a gatete le lalolagi atoa, ma o faavae o le lagi o le a luluina. O lona uiga a auai loa le Atua i se mea, o lona mamalu o le a lagona ma iloa e tagata uma i le taimi lava lea.

E te iloa e mafai fo’i ona e faatula’i le Atua mo oe lava? Fai mai le Salamo 145:5-6:Le ALI‘I e, ‘inā lolo‘u ifo ia lou lagi ma ‘ia e afio ifo; ‘ia papa‘i ifo i mauga, ‘ona pupusa ai lea. 6‘Ia e matuā fa‘a‘emo mai le uila, ma fa‘ata‘ape‘ape ai ‘iā te i latou; ‘ia e fanafana atu au ū, ma tuli ai ‘iā te i latou.

A o’o ina faigata tele mo oe le taua o loo lua feagai, ma ua e manaomia vave se fesoasoani mai le Atua, e mafai ona e ole faapitoa i le Atua e tula’i ma afio mai i le lalolagi mo oe, ma o le a ia faia lava. E afio le Atua i le lagi ma faafoe mea uma lava e tutupu i luga o le fogaeleele aua o le fogaeleele o le mea lea e tu ai ona aao. Peita’i o lea taimi ma lea taimi, a fetaia’i lana fanau ma mea faigata, E finagalo o ia e tula’i ma afio mai lava ia e tau mo i latou. Fai mai Salamo 68:1-2; 1‘Ia tula‘i mai le Atua, ‘ia fa‘ata‘ape‘apeina ē ‘ua ita ‘iā te ia; ‘ia sōsōla ‘ese fo‘i i ona luma o ē ‘ua ‘ino‘ino ‘iā te ia. 2E pei ‘ona lelea o le asu, ‘ia fa‘apea ‘ona e fa‘aleleaina i latou; e pei ‘ona liu suāvai o le pulu i le afi, ‘ia fa‘apea ‘ona fano i luma o le Atua o ē amio leaga.

A o’o ina lofituina oe ma ua pau lou mana’o ia faataapeapeina ou fili, tagi atu I le Atua ma faapea, “Le Alii e, tula’i!” Na fetalai le Atua i le Salamo 50:15; ia e valaau atu ia te ia i aso o lou puapuaga, ona laveaiina lea o oe. Ua o’u iloa mai le Upu atoa ma mea na tutupu ia te a’u, soose taimi e fesaga’i ai se atalii/afafine moni o le Atua ma ni faigata ma ni puapuaga ma ia valaau atu i le Atua ia tula’i ma tau le taua, e faia lava e le Atua.

I le 2 Tupu 19:14-19: na tatalo le tupu o Esekia i le Alii, ina o le a osofaia e se autau malosi le nuu o Iuta. Na silafia e le tupu e leai se malosi o Iuta e faafetaiai ai le autau malosi a Asuria; o lea na ia ta’u ai i le Atua. Na tula’i le Atua mo Iuta, ma o le po lava lea, na alu atu ai le agelu a le Atua i le togalauapi a le autau a Asuria ma fasiotia fitafita e 185,000. E lei manaomia e Esekia ona tapena se autau e tau ma le au Asuria; na puipui lava i latou e le Atua.

Le au pele e, aua e te popole pe a e fetaia’i ma faafitauli e foliga e leai se alofaga mo oe, tagi i le Atua, ma e mautinoa e tula’i o ia e lavea’i ia te oe. I le suafa o Iesu. Amene.

OPEN HEAVENS

MATALA LE LAGI MO LE ASO TOFI 28 NOVEMA 2024

(tusia e Pastor EA Adeboye)

Manatu Autu: Faataga o Ia e tau mo oe (Let Him fight for you)

Tauloto -Tusi Paia– Roma 12:19 'Le ‘au pele e, ‘aua le taui atu ma sui, a ‘ia ‘outou tu‘u atu i le to‘asā, auā ‘ua tusia, ‘Ua fa‘apea mai i le Ali‘i, “O ‘iā te a‘u le taui ma sui, ‘ou te taui atu.” '

Faitauga – Tusi Paia – Esoto 14:10-18

E leai ma se vaega o le Tusi Paia o faapea mai e te finau lava oe mo oe. Peitai o loo faapea mai le Tusi Paia, 'O le a tau le ALI‘I mo ‘outou, ‘ae fa‘alologo ‘outou.” ' Esoto 14:14

O loo faapea mai foi le faitauga o le Tusi Paia o le asō,  e te lē taui ma sui mo oe lava aua o le Alii e taui ma sui mo oe. 

O le mafuaaga e fai atu ai le Alii ia te oe e ‘aua nei e tau mo oe lava pe taui ma sui atu foi, auā foi e te faamoemoe I le Alii, o ia e tausia ma vaaia oe. O lona uiga a sau seisi e faasagatau mai ia te oe, o le Alii o le tulai e tau mo oe. O le tulaga lea afai e te tau mo oe lava, o loo e faapea atu I le Atua, o oe e te pule ia te oe lava, ma e mafai ona e vaai ma tausia lava oe. O le tulaga moni, o loo e faatonuina o ia e ‘aua le aiāina lau mataupu. Talitonu mai, a afio ese le Atua mai le mataupu a se tagata, ua uma lea tagata (Auega 3:22). 

O nisi tagata e manatu e latou te malolosi, ma o lea e vave tele ona tulai e tau atu i so’o se tasi. A’o a’u, ou te iloa e le o a’u o se tagata malosi. Afai e te vaai mai i sina malosi o ia te a’u, o Keriso e faamalosi mai ia te a’u (Filipi 4:13). A aunoa ma Keriso, o a’u o se tagata au vaivai. O le mafuaaga lea a ou feagai ma nisi e tetee mai, ou te fai atu lava I so’o se tasi o loo faasagatau mai, ’Afai o a’u o loo e faasagatau mai iai, ua e manumalo tusa pe lei amataina le taua. Peitai afai o le Atua o loo e faasagatau mai iai, ou te alofa la ia te oe’. O lo’u tulaga lava lea ou te tu ai aua ua maea ona faamautinoa mai le Atua ou te malolo ma saogalemu ia te ia. Ou te iloa o le filemu ma le faamoemoega mautu ou te maua ai le malosi (Isaia 30:15), aua ou te malo a’ia’i e ala ia Keriso o Lē e alofa mai ia te a’u (Roma 8:37). O le taimi lava na fai ai la’u faaiuga e tuu uma lo’u faatuatua ma le faamoemoega ia te ia, e na te lei tuua a’u ma e na te lē tuulafoai lava ia te a’u (Teuteronome 31:6). 

Le au pele e, e te malosi pe a e filemu ma faamoemoe i le malosi o le Alii e tau mo oe. O tagata e faasagatau mai ia te oe, ua manatu e malolosi atu ia te oe, o lona uiga afai e te leotele  ma taumafai e tau atu mo oe, a atili ai ona latou manatu e malolosi. Peitai afai e te filemu ma alu i lalo, e latou te iloa o Lē pito sili ona malosi I lō tagata malolosi uma, o lo’o tū i ou tua, ona latou tuua lea o oe ma ō ese. Afai latou te filifili e faaauau pea ona faasagatau mai ia te oe, e faaumatia i latou e le Alii o ’Au o Lē o lo’o tu’u iai ou faamoemoega uma. Tu’u uma lou faatuatua i le Atua ma e tau o ia mo oe, i le suafa o Iesu, Amene.

OPEN HEAVENS

MATALA LE LAGI MO LE ASO LULU 27 NOVEMA 2024

(tusia e Pastor EA Adeboye)

Manatu Autu: Tapuaiga moni (True worship)

Tauloto -Tusi Paia– Ioane 4:23 “'‘Ae o‘o mai ona aso, ‘ua o‘o nei fo‘i i ai o ē tapua‘i fa‘amaoni latou te tapua‘i i le Tamā i le agaga ma le fa‘amaoni; auā o lo‘o sā‘ili le Tamā i ē tapua‘i fa‘apenā ‘iā te ia. '

Faitauga – Tusi Paia – 1 Samuelu 15:20-31

A pepese ma sisiva tagata, e o’o i le fetagisi a’o tapuai i le Atua, e foliga mai o lo’o latou tapuai i le Atua i le agaga ma le faamaoni. Peitai, ua na o i le Atua o lo’o silafia i latou o lo’o tapuai moni ma I latou o loo faafoliga.

I le faitauga o le Tusi Paia o le aso, ua tatou iloa ai se faataitaiga o tapuaiga e faafoliga ma lē moni. Sa tapuai Saulo i le Atua ina ia tauleleia i luma o toeaina ma tagata uma o Isaraeli, ia tilotilo atu o ia tapuai i le Atua. Afai e te tapuai i le Atua i totonu o le lotu ina ia vaai atu tagata o e tapuai, e le o se tapuaiga moni le mea lena. A tapuai tagata tapuai moni o le Atua i nofoaiga faitele o iai tagata, o se vaaiga lea i mea e masani ona latou faia pe a na o i latou. E fiafia atu e tapuai i le Atua pe a nā o i latou e maua ai le saolotoga e tapuai i le Atua i so’o se auala, e aunoa ma le manatu i tagata o lo’o i lo latou siomaga.

O seisi vaaiga o ni tapuaiga e lē moni, pe afai o lau tapuaiga e na o le patipati, pese ma siva e aunoa ma le saili ia iloa ma usitai i le Atua. Afai e te lē saili e faia lona finagalo i taimi uma, ae ua tau o le pese o pese e tapuai ai, o lo’o e pese ma fiafia nā o le musika ae e leai se tapuaiga o faia. O le tapuaiga moni o le faafiafia i le Atua, ae le na o le pese, fiafia i le musika ma lelei lau faalogona i lou tagata. O ē tapuai moni ma le faamaoni, e saili ia latou iloa le Atua ma usitai i ana poloaiga uma. E ofoina atu o latou loto ma le atoatoa i le Atua ma saili e viia o ia i mea uma i o latou olaga. Auā foi o lo’o faapea mai le 1 Korinito 10:31, 'O lenei, pe tou te ‘a‘ai, pe tou te inu, po o se tasi mea tou te faia, ‘ia ‘outou faia mea uma lava ‘ia vi‘ia ai le Atua. '

O le tapuaiga moni ma le faamaoni e sau mai le loto, e lē o se faafiafiaga i tagata . O ē tapuai moni ua matua faaosofia i le alofa i le Atua e tapuai e ala i le auaunaga, ma foai i lana galuega e ala e sefuluai ma taulaga. E tapuai foi i le Atua i le ave lea o le faamuamua ia te ia i mea uma latou te faia. E matuā masani ma fiafia e faaalu le tele o latou taimi e mafuta ai i lona mamalu ma lē fia o ese ma ia. E pei o Tavita, o se tagata e tapuai moni ma le faamaoni e faapea mai:

1Le Atua e, e fa‘apei ‘ona naunau o le ‘aila i vaitafe, o lo‘o fa‘apea ‘ona naunau o lo‘u agaga ‘iā te oe. 2‘Ua fia inu lo‘u agaga i le Atua, o le Atua soifua; o afea ‘ea ‘ou te alu atu ai ‘ia iloa ai a‘u i luma o le Atua?(Salamo 42:1-2)

O le itu pito sili ona taua I le tapuaiga moni, o le usitai, avatu le viiga ma le faamanu i le Atua i o tatou olaga, ae lē na o le avatu o taulaga ia te ia i o tatou gutu. O e tapuai moni i le Atua? O le tapuaiga e sau mai le loto, ma e faaalia i so’o se vaega o lou olaga, ae lē na o laugutu, i le suafa o Iesu, Amene.

OPEN HEAVENS

MATALA LE LAGI MO LE ASO LUA 26 NOVEMA 2024

(tusia e Pastor EA Adeboye)

Manatu Autu: E ala I le nā o le alofa tunoa (Only by grace)

Tauloto -Tusi Paia– Sakaria 4:6 “Ua tali mai o ia, ‘ua fai mai ‘iā te a‘u, o lo‘o fa‘apea mai: “O le afioga lenei a le ALI‘I ‘iā Serupapelu, o lo‘o fa‘apea mai: E lē o le fitafita, e lē o le malosi, a o lo‘u Agaga, ‘ua fetalai mai ai le ALI‘I o ‘au.”.

Faitauga – Tusi Paia – Efeso 2:8-10

O fesili e pei: O e iloa o ai a’u? Po’o e iloa le tagata lea e te tautala mai iai? E fa’apefea ona e talanoa mai faapena ia te

a’u? O nei fesili, e afua mai i le faamaualuga. O le mea moni,o tagata ola uma na faia mai le palapala o le laueleele ma e toe fo’i lava iai. (Kenese 3:19). Ua na o le alofa tunoa ma le agalelei o le Atua ua aumaia ai i tatou i le mamao ua iai nei (1 Korinito 15:10). Afai ua e manatu ua e manuia, ona o lou poto ma le maoa’e o lou atamai, o la’u fesili la te oe, na e faia lou fai’ai? Ae e mafai ona e faia to’atasi le tatalaina o avanoa e pei ona e mauaina e siitia ai pea lou tulaga i le manuia? 

Fai mai le tusi o Kolose1:16-17 o mea uma lava o lo‘o fa‘atumauina i le Atua, ma na faia e ia ma na faia fo‘i mo ia.  O mea uma ua tatou maua ma iloa ai tatou, e afua mai I le foai a le Atua ma lona alofa tunoa. O le mafuaaga lena o loo a’oa’o mai tatou i le faitauga o le Tusi Paia o le aso, e leai se tasi e mafai ona mitamita I luma o le Atua. 

E ui ina manatu tagata o a’u e maoa’e lo’u poto ona ua maua lo’u faailoga PhD (Matua o Faiva) i le matematika, peitai, semanu ou te i’u ane o se faifaato’aga i lo’u nuu o Ifewara, pe ana le aumaia e le Atua le ituaiga tinā sa ou mauaina. O lona lagolago malosi e faatino la’u miti ou te a’oga ai i aso uma, i so’o se auala, ma ana le tupu lena tulaga, se manu ou te le taunuu I le tulaga ua ou iai nei. O le mafuaaga lea e lē mafai ai ona ou fa’amaualuga ai, aua ou te manino lelei i le tulaga mativa sa ou amata mai ai, ma ou te lei ausia le tulaga ua ou iai I le aso ona o lo’u lava malosi. Sa tausia a’u e le Atua i lona alofa tunoa ma lona alofa mutimutivale ma e mafai fo’I ona ia toe tosoina a’u i lalo. I le Tusi Pa’ia, e ui ina sa iloa lelei e le Tupu o Saulo lona tupu’aga maualalo ae le’i faau’uina e avea ma tupu, (1 Samuelu 15:17) ae sa amata ona tupu a’e le fa’amaualuga I lona loto, a’o faasolo pea aso . Ma ua o’o mai i le tulaga ua manatu e manaomia le siitia o le fa’aaloalo a tagata ia te ia. Sa I’u ina aveesea lona tulaga maualuga ma ave’esea le malo mai ia te ia. (1 Samuelu 15:22-31). Ma e o’o atu le tatou faitau I le tusi o 1 Samuelu 16:1 ua fa’atonu e le Atua ia Samuelu e aua le toe ma’imau sona taimi e tatalo ai mo Saulo aua ua ia teena o ia. 

Le ‘au pele, aua nei e faataga le faamaualuga i lou loto. O le taimi lava e faamaualuga ai se tagata, o lo’o faatali lona toilalo I le faitoto’a (Faata’oto 16:18). ‘Aua nei galo le alofa tunoa faifai pea o le Atua, ma ia e faaeteete ia aua lava nei e manatu e sili atu oe i lo isi tagata. O le Atua o Lē o lo’o tausia oe ma e tatau ona faafoi le mamalu ma le viiga ia te ia.  

Tatalo

Tama, faafetai tele mo lou alofa tunoa. Fa’amolemole ia e fesoasoani mai ‘ aua nei ou mitamita ia te a’u lava, a ia na o lau afio e to’atasi, i le suafa o Iesu, Amene.

OPEN HEAVENS

MATALA LE LAGI MO LE ASO GAFUA 25 NOVEMA 2024

(tusia e Pastor EA Adeboye)

Manatu Autu: Perofeta ane ma le Poto 2 (Prophesy With Wisdom 2)

Tauloto -Tusi Paia–Faataoto 10:11 “O le gutu o le amiotonu, o le puna o le ola lea; a o gutu o ē amio leaga, ‘ua ufitia ia i le fa‘asauā.”

Faitauga – Tusi Paia –2 Samuelu 12:1-15

O le a faai’u atu i le asō le a’oa’oga na amata ananafi i le perofeta atu ma le poto. I le faitauga mai le Tusi Paia o le asō, na auina atu e le Atua Natano e folafola le faasalaga i le tupu o Tavita. Ona o Natano o se perofeta poto, na ia silafia o le auala e na te momoli atu ai le feau a le Atua e fua iai pe alu ese ma le maota o le tupu I lea aso o soifua pea pe leai. O lea na ia amata i le faaaogaina o se faataoto. Ina ua folafola e le tupu le faamasinoga o le tagata o loo ta’ua i lana faataoto, na faapea atu ai lea, ‘o lau afioga le tagata lena’. O se lesona mamana lenei mo oe e a’oa’oina mai ai. Afai e auina mai e Le Atua se feau ia te oe mo se tagata, e tatau ona e faaeteete I le auala e te momoli atu ai le feau i lena tagata. 

Afai e faaali atu e le Atua se feau e faatatau i se tagata, aua e te faatopetope e ta’u iai. Ole atu i le Atua mo le poto i le auala tonu e logoina ai ina ia aua nei iai se tulaga faaletonu e tupu ona o le perofetaga. Ua ou a’oa’oina i lenei auala i le faasolo mai o tausaga. O le mafuaaga lea ou te faia ai le tele o perofetaga e faaaoga ai faataoto. A faaali mai e le Atua ia te au se feau e faailoa faalauaitele, afai ou te iloa o le feau e ono faigata I tagata ona talia, ou te faamatalaina I se faataoto. I lea faiga, ou te faaali atu ai se feau mai le Atua ma le poto.

Ua ou vaai I tagata ma le meaalofa o perofetaga ua faaumatia ai aiga. A ta’u atu e le Atua ia te oe se mea e tatau ona e faailoa I se tagata, a maea ona e ole atu i le Atua mo le poto e faia ai, e tatau foi ona e fautua i Lea tagata pe faapefea ona ia faaaogaina le feau ua ia maua. Auā foi e ono lē maua e lea tagata le poto ma le malamalama e pei o oe. Afai e le’i matua lelei lena tagata po’o lava le iloa e faaaogaina lelei ai le feau, e mafai e le tiapolo ona faaaoga le avanoa e uunaia lea tagata e faia faaiuga e iu ane, ua tele atu le afaina i lo le maua ai o le lelei. Afai e te iloa e ono le faaaoga lelei e lea tagata le perofetaga, ma e lē o faamalosia oe e le Atua e faaalia le feau, e mafai ona na o le fautua ma taitai ia te ia e tusa ma lea mataupu. I lea faiga, e mafai ai ona e fesoasoani ia te ia e aunoa ma ni faafitauli. 

Le au pele e, o le meaalofa o perofetaga e faaatoatoaina le au faaolaina, e lē o le faaatuatuvaleina pe afaina ai i latou (Efeso 4:11-12), faaaoga ma le poto le meaalofa o perofetaga, i le suafa o Iesu, Amene. 

OPEN HEAVENS

MATALA LE LAGI MO LE ASO SA 24 NOVEMA 2024

(tusia e Pastor EA Adeboye)

Manatu Autu: Perofeta ane ma le Poto 1 (Prophesy With Wisdom 1)

Tauloto -Tusi Paia–Faataoto 13:3 “O lē na te leoleo i lona gutu, e tausia e ia lona agaga; a o lē fa‘amaga ona laugutu, e ‘iā te ia le malaia.”

Faitauga – Tusi Paia –Faataoto 17:27-28

O le meaalofa o le perofetaga e faapitoa le tāua. O se fiafiaga tele I le finagalo o le Atua lona filifilia o se tasi e fai ma ipu e mafai ona ia fetalai i ai ma faailoa i ai lona finagalo e faatatau i ni mea e tutupu. Peita’i, e ao ona i ai le poto pe a faaaoga le meaalofa o le perofetaga.

Muamua, e lē o mea uma e faailoa atu e le Atua ia te oe e tatau ona e taua i isi. E i ai lava mea e faailoa atu e le Atua, e mo na o oe lava. Ae afai e fa’atumulia oe i le mimita vale ma i’u ai ina amata ona e faamatala i tagata e lei faatagaina oe ona ta’u i ai, e ono e faatupu atili ai le leaga na i loo le lelei. E fiafia le Atua e faailoa mea lilo ia i latou e latalata atu ia te ia. Afai na te faailoa ia te oe se mea lilo, e tatau ona e fesili i ai pe tatau ona tau i se isi. O le taimi e faailoa ai e le Atua ia te oe se mea lilo ma e talanoa ai i se isi e lē o finagalo e te faailoa i ai, e ono gata ai iina ona toe talanoa atu ia te oe.

E tatau ona e iloa o le meaalofa o le perofetaga e lē tatau ona faaaoga e te faalialia solo ai, e te lua vavalalata ma le Atua. O perofetaga e tatau ona tausisia ma le faaeteete aua o isi tagata atonu e lē mafai ona o latou maua, malamalama ma faauiga sa’o fetalaiga a le Atua.

A tau atu e le Atua se mea ia te oe faatatau i se uso, e lē tatau ona e tautala ai faalauaitele vagana ua fetalai atu le Atua ia te oe e fai. Afai o lea uso o se tagata lauiloa, sue se auala e te talanoa ai i ai tau lava o ia faatatau i le feau na aumai i le Atua mo ia. Ina ua fai le Atua ia Samuelu ua tiga lona finagalo I le tupu o Saulo, e lei alu Samuelu ma faasalalau solo i le mālō atoa. O lo tatou Atua e lē faitatala (tulou). Afai e avatu e le Atua ni faamatalaga e uiga i se isi uso, e lē o sou tiute le faasalalau I lē lalolagi atoa. Ia e manatua ma fa’ataua le mea lenei, aemaise pe afai o le perofetaga e lē manaia. Tusa pe o se uso, e faigofie ona ia talia lelei lau perofetaga, o lou faailoa i ai a’o tumu tagata eseese e ono tete’e ai lona loto ma le aogā ai le perofetaga. Ma le isi, e mafai ona sui le finagalo o le Atua faatatau i lea uso pe afai e liliu ese mai le sesē ae fai le sa’o e pei ona tatou faitau i le Isaia 38:1-5. Afai e te lē taua faalilolilo i le uso le perofetaga ae e faailoa i le lalolagi atoa, afai e sui le finagalo o le Atua faatatau I le uso, o le a tuua ia te oe e puipui lau perofetaga.

Le au Pele e, ia faatelegese ona tautala (Iakopo 1;19). Tatalo I le Atua e foai mai le poto e fa’afoe ai lona finagalo pe a ia faailoa ia te oe. E le o feau uma e avatu e le Atua ia te oe e tatau ona iloa e tagata uma. I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 23 NOVEMA 2024

(tusia e Pastor EA Adeboye)

Manatu Autu: Tuaoi Mai Le Vavau (The Ancient Landmarks)

Tauloto -Tusi Paia– Faataoto 22:28 “Aua ne‘i si‘i le tuā‘oi mai le vavau, na faia e ou mātua”.

Faitauga – Tusi Paia – Ieremia 6:16-17

O aso nei, ua toatele tagata ua taumafai e faaonaponei le faa kerisiano. Peita’i, o le Afioga Paia a le Atua i le Eperu 13:8; fai mai o Iesu Keriso e lē liliu lava ia o ananafi, ma le asō e o’o I le faavavau. O le Atua e lē suia lava o ia, o lona uiga o tagata faapea ua na ona o latou faafoliga i lo latou faatuatua.

E lē afaina le faaaoga o le tekonolosi I le galuega a le Atua. E lelei fo’i le fa’aaogā o metotia fou e fa’asoa ai le Upu a le Atua. Peita’i, o tuaoi mai le vavau e tatau ona tausisia atoatoa. O le taimi e amata ese ai le fa’amatalaina e se uso o ni ta’iala faavae o le faa kerisiano o loo i totonu o le Tusi Paia, ua savalia e lea uso le ala sesē. Fa’ata’ita’iga, o loo manino le 2 Korinito 6:14; e lē tatau i le au kerisiano ona amo fa’alēgatusa ma e lē faatuatua. O nisi talavou, ona o le taumafai e fai mea fou, fai mai e lēleaga le faaipoipo ma se isi e lē o se kerisiano. Fai mai o lo’o o latou fa’atinoa se faa kerisiano e māmā atu na i loo le faa kerisiano na tā mau tele ai o latou matua. O lea talitonuga e mafai ona mata’utia lona aafiaga aua o le tagata e lē faaolaina, e lē malamalama fo’i i mea a le Agaga (1 Korinito 2:14) ma e ono tete’e i ai i mea a le Agaga, poo le sauaina o le uso faatuatua ona o i latou.

Fai mai nisi tagata o a’u o’u te amio ma manatu fa’a aso ua leva, ma e sa’o, a’o le mea sili o loo o’u auauna i le Atua mai anamuā. Peita’i, ua silia ma le 40 tausaga o o’u tula’i pea i le faatuatua, a’o le toatele o kerisiano faaneionapo ua lē iloa poo fea o i ai nei. A leai tuaoi fa’a aso lā, e lē mafai ona e tumau maua’a i le faatuatua. Fai mai nisi talavou o ō latou matua ua mamapo tele le faiga o la latou tautua I le Atua. Atonu e te manatu o nisi o tautua o lo’o o latou faia e lē se mea tatau, peita’i talitonu mai ia te a’u, ailoga latou te o’o i manuia o latou maua I le taimi nei pe ana lē auauna i le Atua faapea. O le faafitia o lou tagata mo le Atua ma lana Talalelei e faaalia ai le maualuga o le ofoina atu o le ola o le tagata faatuatua, ma e tauia e le Atua auaunaga ma ta’utinoga (Eperu 11:6).

Afai o e tausia tuaoi mai le vavau, ou te mana’o e faamalosi ia te oe e fa’aauau pea. O nisi tagata atonu e aamu ma faifai ia te oe o se tagata mapolotu, peita’i e tatau ona e tumau i lau ta’utinoga I le Atua ae lē o le femoumoua’i i ta’iala faavae a le Atua. I aso ua tuana’i, sa taliē fo’i tagata iā te a’u, ae silasila i le mamao ua aumai ai nei a’u e le Atua.

Le au Pele e, ofo atoatoa lou tagata i le Atua, ae aua e te fealoalofa’i i ana faiga faavae; e lē o toe mamao ae vaai le lalolagi atoa I le pupula o lou si’itiaga ia Keriso, I le suafa o Iesu, Amene.