Samoan Devotional

OPEN HEAVENS

MATALA LE LAGI MO LE ASO FARAILE 13 TESEMA 2024

(tusia e Pastor EA Adeboye)

Manatu Autu: O le suafa o Iesu (The name of Jesus)

Tauloto -Tusi Paia– Roma 10:13 “Auā e fa‘aolaina i latou uma o ē vala‘au i le suafa o le Ali‘i.”

‭‭

Faitauga – Tusi Paia – Filipi 2:9-11

I le faitauga mai le Tusi Paia o le asō, e tatau ona tatou malamalama, I Le suafa o Iesu, e tootuli tulivae uma. O lona uiga, e mafai ona e manumalo I se soo se mea pe a faaaoga le suafa o Iesu. I Le 1 Samuelu 17: 42-51, fai mai Tavita ia Koliata, ‘Ua e sau ‘iā te a‘u ma le pelu, ma le tao, ma le tao leoleo; a o a‘u, ‘ou te alu atu ‘iā te oe i le suafa o le ALI‘I o ‘au. E uma ane le taua, ua leai se ulu o Koliata. 

E matautia le malosi i le suafa o Iesu. A e ole atu I so’o se mea i lona suafa , e te vaai iai o tupu aua o loo faapea mai le Ioane 14:14 “‘Āfai tou te ole atu i se mea i lo‘u igoa, ‘ou te faia lava.”

‭‭

I Le tele o tausaga talu ai, na ou malaga atu mai se tasi aai agai I seisi aai o Nigeria. I le ala, sa iai se auala laupapa e vaiti lava ma e tasi le taavale e mafai ona alu ai i le taimi e tasi. Sa iai se faailoga e lapatai ai soo se avetaavale e alu lemu ma vaai poo sau se taavale mai leisi itu ona faatoa alu lea i luga o le auala laupapa. Ua matou malaga atu I luga o le auala laupapa ona matou vaai atu lea i se loli o sau ma le saosaoa mai leisi itu. Matou te lē o mautonu pe o iloa mai matou e le ave loli pe ua lē mafai ona taofi le loli. Ua lata mai ona matou fetoai ma lavevea. Ua leai se taimi e tatalo ai, ae na iai sina taimi e mafai ai ona valaau ‘Iesu’. Na ma alalaga ma la’u ave taavale, IESU! Na matou fepasiai ma le loli i le ogatotonu o le auala laupapa, ma Ina ua ma oo I le Isi itu, na taofi e la’u avetaavale le taavale ae oso I fafo ua tetemu. E o’o ia te au sa nofo I tua ua matua luluina. Ua taumafai e toe faatoatoa lelei ona fesili mai lea, ‘tamā, o le a le mea lea na tupu?’ Na ou tali atu, ‘Na faalautele e le Atua le auala laupapa’. A’o faaauau le ma malaga, ua le mapu le faapea mai, ‘Silisili Ese’. 

Le au pele e, a tau le suafa o Iesu, e tutupu mea e silisili ese ma matagofie. O lenei, a e oo i se taimi po’o se tulaga e manaomia lou pulea ma manumalo ai, na o le alaga lava o le suafa o Iesu, ona usitai uma lea iai o so’o se malosiaga. E lē toilalo le suafa o Iesu, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 12 TESEMA 2024

(tusia e Pastor EA Adeboye)

Manatu Autu: O le olioli I le Alii (The joy of the Lord)

Tauloto -Tusi Paia– Isaia 55:12 “2Auā tou te ō atu ma le fiafia, e ta‘ita‘iina fo‘i ‘outou ma le manuia. O atu mauga ma mauga e leo tetele, ma le ‘alaga fiafia i o ‘outou luma, e pati lima fo‘i la‘au uma o le vao...”

Faitauga – Tusi Paia – Ioane 15:9-11

E toatele tagata e ave seseina le fiafia o le olioli lea. O le fiafia e fua i mea o loo tutupu, ae o le olioli, e lē fua pe faalagolago i mea o loo tutupu. E pau le ala e maua ai le olioli moni, o Iesu Keriso. O le mafuaaga lea a faaolaina loa se tagata, e na te faalogoina le olioli, e ui e leai ma se mea tele o tupu i lona siomaga.

I le tele o Tausaga talu ai, o se polofesa faatoa maea lava ona tuuina atu lona ola ia Iesu Keriso, na sau ia te au ma faapea mai, ‘e mafai ona fai atu sa’u fesili?’ ua ou nofo ma taumanatu poo le a le fesili faigata a le polofesa o lo’o tau fai mai. Ona ia faapea mai lea, ‘talosia e leai se faafitauli pe a ova le olioli. Ou te leiloa pe aisea, ae ua ova tele le olioli ia te a’u ua ou tau popole ai’. Ua ou fai atu iai o le lagona o loo ia ui ai, o se tulaga masani, o soo se tagata e fesootai ma le Atua e na te maua le olioli moni. Afai e te lei tofo iai I lea olioli e sili atu i mea o loo e ui ai, tuu atu lou ola ia Keriso I le asō ma ola faapaiaina. E amata loa ona e maua le olioli e faigata ona e taumafai e faamatala.

E iai tagata ua leva ona faaolaina ae ua latou le toe maua le olioli. Ua latou lē toe maua le olioli, e lē faapea ua tau leai ni latou tupe po’o ua faaitiitia foi mea sa latou mauaina, ae ona ua amata ona latou lē toe usitai ia Iesu. Fai mai le Ioane 15:10-11 10‘Āfai tou te tausia a‘u poloa‘iga, ‘ona tumau lea o ‘outou i lo‘u alofa; pei ‘ona ‘ou tausia poloa‘iga a lo‘u Tamā, ma ‘ou tumau i lona alofa. 11‘Ua ‘ou fai atu nei mea ‘iā te ‘outou, ‘ina ‘ia tumau ai lo‘u ‘oli‘oli ‘iā te ‘outou, ‘ia ‘ato‘atoa fo‘i lo ‘outou ‘oli‘oli.

I le fuaitau o le Tusi Paia o loo taua i luga, fetalai Iesu, a e tausia ana poloaiga, ma tumau i lona alofa, e tumau foi lona olioli ia te oe, ma e fa’aatoatoaina lou olioli. Afai e te manao i le olioli e tulieseina le loto momomo, fememeai ma le faanoanoaga e faavavau, e manaomia lou usitai ia Iesu ma tumau i lona alofa. Fai mai le 1 Ioane 5:3 e lē mamafa poloaiga a le Atua.

Le au pele e, o le mea lilo I le olioli moni, o le usitai I poloaiga a Iesu Keriso. Ia e faamaoni e usitai ia te ia, ma a’o amata ona e ola mo ia, e faatumulia lou loto I lona olioli. E alofa o ia ia te oe ma e na te fia foai atu le olioli e lē mafai ona faamatalaina. Ua na o Iesu e mafai ona e maua ai le olioli moni, i le suafa o Iesu, Amene.

OPEN HEAVENS

MATALA LE LAGI MO LE ASO LULU 11 TESEMA 2024

(tusia e Pastor EA Adeboye)

Manatu Autu: Malosiaga mai le Atua (Divine strength)

Tauloto -Tusi Paia– Salamo 29:11 “E ‘aumaia e le ALI‘I le malosi i lona nu‘u; e fa‘amanuia e le ALI‘I lona nu‘u i le filemū..”

Faitauga – Tusi Paia – Sapakuka 3:17-19

E le mafai ona e iloa le malosi o le tagata i ona foliga vaaia. Mo se faataitaiga, o le tele o maso o se tagata e le faapea e malosi o ia. Afai o le malosi o le tagata e fua na o foliga vaaia, o lona uiga sa lē tatau ona faatoilaloina e Tavita ia Koliata ( 1 Samuelu 17:42-54).

Fai mai le Failauga 7:19, e malosi atu le tagata poto i ni faipule se toasefulu. I le fuaiupu e 12 o le mataupu lava e tasi, fai mai le Tusi Paia; auā ‘ua fai le poto ma mamalu, ‘ua fai fo‘i tupe ma mamalu; a o le aogā lenei o le poto ‘ua maua, e ola ai ē ‘ua i ai. O lona uiga, o le poto ma le tupe pe tuufaatasi foi le lua lea, e maua ai le malosi ma le puipuiga.

E iai lava se mea po’o se tagata e faamoemoe iai se tagata mo le malosi. Peitai o le malosi pito sili ona maoa’e e sau mai lugā. O le mafuaaga lea na fai mai ai Tavita i le Salamo 121:1-2:1E fa‘asaga a‘e o‘u mata i mauga, e o‘o mai ai lo‘u fesoasoani. 2O lo‘u fesoasoani mai i le ALI‘I lea, o lē na faia le lagi ‘atoa ma le lalolagi.

E iai le puna o le malosi o Tavita na fesoasoani ia te ia e manumalo i soo se taua, ola i le tamaoaiga ma tuua ni tulaga lelei e mulimuli ai le toatele. I le fuaitau o loo taua i luga, fai mai Tavita o lona fesoasoani e mai le Alii, I nisi faaupuga, o loo ia faapea mai o le Atua o lona malosi. O le malosi e mai le Alii e matua faatuatuaina aua e le gata e maualuga ma lē faatusaina i seisi, e maua i taimi uma. O lenei malosi e le taitai ona faaitiitia, e faavavau. Fai mai le Eperu 13:8, o Iesu Keriso e lē liu lava o ia, o ananafi, o le asō e o’o i le faavavau. Afai o le Alii o lou malosi lea, e tumau pea lou malosi tusa pe e te tagata  matua. Fai mai le Teuteronome 34:7, i le 120 tausaga o Mose, sa malosi pea o ia. Fai mai e le‘i puaoa ona mata, e le‘i mavae fo‘i lona malosi. O le malosi e mai le Atua e atoatoa. Fai mai le Filipi 4:13 ‘Ou te mafaia mea uma lava ‘ona o ia ‘ua fa‘amalosi mai ‘iā te a‘u. O mea uma i le fuaitau o lo’o taua I luga e aofia ai ma vavega, ma le faaloaloa o lima I luga o tagata mama’I ina ia malolo atoatoa. Fai mai le Mareko 16:17-18 17E mulimuli atu fo‘i nei fa‘ailoga i ē fa‘atuatua; e tutuli e i latou temoni i lo‘u igoa; e tautalatala i latou i gagana fou; 18e fetāgofi i latou i gata; ‘āfai fo‘i latou te inu i se mea e oti ai, latou te lē afaina ai lava; e fa‘ae‘e atu fo‘i o latou lima i luga o ē mama‘i, ma fa‘amālōlōina i latou.”

Le au pele e, aua e te malie i lou malosi i le tino aua foi e gata. Ia e pei o Tavita, na ia vaavaai atu i le Atua mo le malosi e manumalo ai i luitau o le olaga ma faia mea maoa’e e faigata ona ausia. E faamaoni lo tatou Atua ma e matua mafai ona tatou faalagolago ia te ia.

Tatalo,

Tama, faamolemole, avea oe o lou malosi I so’o se vaega o lou olaga, i le suafa o Iesu, Amene.

OPEN HEAVENS

MATALA LE LAGI MO LE ASO LUA 10 TESEMA 2024

(tusia e Pastor EA Adeboye)

Manatu Autu: E lē malolo o Ia (He never fails)

Tauloto -Tusi Paia– Salamo 73:26 “E vaivai lo‘u tino ma lo‘u loto, a o le Atua, o le papa ia o lo‘u loto ma lo‘u tofi e fa‘avavau.”

Faitauga – Tusi Paia – Isaia 41:9-12

A tausa’ili e tagata ni fofō o latou faafitauli i tua atu o le Atua, e i’u lava ina latou faia’ina, e tusa lava pe foliga mai i le amataga, sa maua se fofō o ia fa’afitauli. O se faamanuiaga I le ‘avea o fanau a le Atua, o lenei, e iai lo tatou Tama e lē le taitai malolo. O se faai’uga pito ogaoga e mafai ona aumai e se foma’i, o le saunoa mai faapea, “Ua leai lava se isi togafiti e mafai ona matou faia”Peita’i o le mea e gata ai le tomai o foma’I, e mafai e le Atua mata’utia ona ia o’o mai ma faatino se fofō e gata ai fofō uma, aua e leai se mea e gata ai lona mana.

I ni tausaga se tele ua tuana’i, sa faamatala mai e se tina, o lana tama teine i Amerika ua lata ina fanau. Sa maua i suesuega a foma’i, e lapo’a tele le pepe e le mafai ona fanau sa’o ma e tatau ona faia se ta’otoga faapitoa e aumai ai i fafo le pepe. Ina ua suesueina lona toto, ua iloa ai isi faafitauli, e maua i se ma’i o le toto ma e matua faigata ona faatino se taotoga, ona e tele le avanoa e maligi ai le toto ma maliu ai. Sa fa’atonu a’u e le Atua, ou te fai i le tina e aumai ni solosolo se lua ou te tatalo ai. E ui lava ou te le malamalama i le uiga o lea faatonuga, ae na ou ta’ua i le tina ma sa ia fa’ataunuuina. Sa aumai ia te a’u solosolo e lua ma ou tatalo ai loa i luga,  ma ina ua mae’a,  na ou fai loa i le tina e malaga loa e vaai lana tama teine i le falemai i Amerika ma tu’u se solosolo i ona luga. I lona  taunuu ai i lana tama teine, sa ia fofolaina se tasi o solosolo i ona luga e tusa ma la’u faatonuga. I le taeao na sosoo ai, ua leai se solosolo. Sa fai le sa’iliga mae’ae’a a ua le maua mai. Ona fa’apea lea o le tina, “Faafetai i le Atua na ou aumaia solosolo e lua.”  Ona tago lea o le tina nonoa mau le isi solosolo i le lima a lana tama teine ma sa ia augani atu i foma’i ia latou mata’ituina se mea o le a tupu.

Ua faapea mai foma’i o le a latou faatalitali ae a te’a loa le 10.00 i le taeao, ona faatino loa lea o le fuafuaga i le tina ma le pepe. Peitai e ta ane le 8 i le taeao, ae fanau sa’o loa le pepe, lea sa latou manatu muamua e le taitai ola.  Afai e te ‘ai’oi atu ia Iesu pe a e feagai ma ni fa’afitauli e foliga mai e matua leai se fofo, e afio mai le Atua mo oe.

Ua fetalai mai le Atua i le Salamo 50:15, ‘ Ia e valaau foi ia te a’u i le aso e iai le puapuaga: ou te laveaiina ai oe, ona e vivii mai ai lea ia te a’u.” Ou te fautua atu ia te oe, ae e te lei o’o i se aso o puapuagatia, ia e mautinoa ua e fa’alatalata i le Atua ina ia fa’afofoga pe a e vala’au ia te ia. Fai mai le tusi o Isaia 59:1 “e le tutuli foi ona taliga,” ae e mafai e le agasala ona punitia ona fa’afofoga mai i le valaau a se tagata. Ia ola fa’apa’iaina  aua a o’o i aso o puapuaga, o le taimi e te valaau ai i le Atua, e faafofoga mai o ia. E ono faia’ina isi mea uma, ae e lē malolo pe faiaina Iesu, I le suafa o Iesu, Amene.

OPEN HEAVENS

MATALA LE LAGI MO LE ASO GAFUA 9 TESEMA 2024

(tusia e Pastor EA Adeboye)

Manatu Autu:Poto mai le Atua poo le poto o le lalolagi (Godly wisdom vs worldly wisdom)

Tauloto -Tusi Paia– 1 Korinito 3:19 “Auā o le poto o lenei lalolagi o le valea lea i luma o le Atua; auā ‘ua tusia, “E maua e ia o ē popoto ‘iā latou lava togafitiga;”

Faitauga – Tusi Paia – 1 Korinito 1:25-29

Fai mai le Failauga 7:19 “O le poto e sili ai ‘ona malosi o lē ‘ua poto, i faipule e to‘asefulu ‘ua i le ‘a‘ai.”

‭O loo faapea mai le fuaitau lenei, e sili atu ona malosi o se tagata poto i lo ni faipule e toasefulu. O lona uiga , e mafai ona e faapea o le maua o le poto o se mea lelei. 

I le 1 Korinito 1:20, fai mai le Tusi Paia “Po o ifea le tagata poto? Po o ifea le tusi‘upu? Po o ifea le filifiliga o lenei lalolagi? E lē ‘ua ‘avea ‘ea e le Atua le poto o lenei lalolagi ma valea?”

‭‭

Mai le fuaitau I luga, ua tatou iloa ai e iai le mea e taua o le poto o le lalolagi ma e mafai e le Atua ona liliuina lea poto i le valea. Peitai, o le fesili, o le a le poto o le lalolagi?

O le poto o le lalolagi o soo se poto e lē mai le Atua. I nisi faaupuga, o soo se ituaiga poto e lē o gatasi ma le Upu a le Atua o le poto lea o le lalolagi. E ono foliga mai e lelei ma o loo vaaia foi lona aoga, peitai afai e lē mai le Atua , e i’u ane lava ua taua o se tulaga valea. I le fuaitau e pei ona taua I luga, fai mai le Tusi Paia a suia le poto o le lalolagi i le valea, ma e le toe vaaia tagata ua taua o tagata  popoto o le lalolagi. Ua lē mafai ona toe faia sa latou finauga e fua i lo latou poto. 

O nisi tagata o loo faalialia solo ma finau mai o le ituaiga poto lea e pito sili ona lelei aua o lo’o latou maua ni taunuuga lelei, a lē o tele ai a latou tupe pe siitia ai foi o latou tulaga ma isi faapena. Peitai ona o lo latou poto e le faavaea i le Upu a le Atua, o loo agai mai le taimi e latou te lalafi ai ona ua mamā aua o le a taua e vālea. 

Le au pele e, aua nei luluina lou tagata i ala ma tulaga e fautua mai ai ni tagata, e ui e foliga mai e lelei. Afai o fautuaga o tagata e lē faavaea i le upu a le Atua, e valea ma e le tatau ona e mulimuli ai. E maua le poto maualuga mo oe mai le Atua, ma na fetalai le Atua e pau le mea e te faia o le ole atu ia te ia ona ia foaiina mai lea (Iakopo 1:5). A amata ona e faaaogaina le poto mai le Atua, e ono foliga mai e te valea I tagata o loo faaaogaina le poto o le lalolagi, ae ou te ta’u atu ia te oe e fua i mea ua ou ui ai, e vave ona e vaai ua fua mai ma maua taunuuga lelei. E le gata I lea, o le a siitia pea tulaga e te ausia seia oo I le tulaga pito maualuga, e le gata I lea o mea na ausia i le poto o le lalolagi e vave ona lē toe manatuaina. 

Tatalo

Tamā, faamolemole foai mai ia te a’u le poto Ina ia ou maua se olaga e ausia faamoemoega ma taunuuga lelei, i le suafa o Iesu, Amene. 

OPEN HEAVENS

MATALA LE LAGI MO LE ASO SA 8 TESEMA 2024

(tusia e Pastor EA Adeboye)

Manatu Autu: E sili ona lelei le toalua I le To’atasi (Two are better than one)

Tauloto -Tusi Paia– Failauga 4:10 ““Auā ‘āfai e pa‘ū le tasi e fa‘atūina o ia i luga e lē la te to‘alua; ‘oi talofa fo‘i i lē ‘ua to‘atasi pe a pa‘ū, auā e leai sē la te to‘alua e fa‘atū ‘iā te ia i luga.”

Faitauga – Tusi Paia – Failauga 4:9-12

Fai mai le tatou Tusi faitau mai le Afioga Paia a le Atua o le asō, e sili ona lelei o le toalua I le to’atasi, auā afai e paū le tasi, e faatuina i luga e le isi. Fa’ata’ita’iga, afai e savali toatasi se uso na o ia i le po ma faafuasei ona osofaia e ni tagata leaga, o le a faigata i lea uso ona sola ese mai le faalavelave na i loo le i ai o se isi la te toalua. E matua’i lē lelei le to’atasi (Failauga 4:12).

E I ai taua e lē taitai e manumalō ai pe a e tau na o oe, peita’i afai e sa’o tagata tou te au, o le a tele se avanoa e te manumalō ai. E i ai le faasiliga tele o le malosi pe a i ai nisi e au ma se uso. Fai mai le tusi o Teuterenome 32: 30; “Pe fa‘apefea ‘ona tulia e le to‘atasi le to‘aafe, ma tutuli e le to‘alua o afe o sefulu, ‘ana le fa‘atauina atu i latou e lo latou Papa, ma tu‘uina atu i latou e le ALI‘I?”

‭‭

Talu ai e lelei le i ai o uo, e taua le filifili lelei o uo ia sa’o. E i ai se fuaitau lauiloa faapea; “O manatu e lua e sili atu ona lelei na i loo le manatu o lē e toatasi.” Peita’i, o lea fuaitau ua toe fetu’una’i faapea, “O manatu lelei e lua e sili atu ona lelei I le toatasi.” O le feoa’i ma e amioleaga e leaga ai amio lelei (1 Korinito 15:33). O ai au uo? O faaleleia atili oe e au uo po’o faaleaga? Afai o i ai sau uo o loo fa’aleagaina lau amio, ua tatau ona e alu ese ma lea ituaiga uo aua e mafai e lea uso ona faatupu le tele o puapuaga mo oe. E toatele tagata o loo i le falepuipui I le asō ona o ituaiga uo o latou mafuta.

Fa’amautinoa o au uo o ni tagata lelei ma popoto. Afai e te tu’u se apu leaga i totonu o se apa o loo i ai ni apu lelei, o le a pala uma apu lelei ona o le apu leaga e tasi. Afai e i ai se uso leaga e toatasi i totonu o le tou mafutaga ma au uo, e mafai e le uso lea e tasi ona faavaivaia outou uma. E sili ai lou alu ese mamao mai tagata faapea. Fai mai le Fa’ataoto 13:20; o le uo a e valelea e leaga ai lava ia. Aua ne’i e faatagaina lou tagata e fa’aumatia.

Afai e te lei faaipoipo e tatau ona sili ona e faaeteete pe a filifili sou toalua. E sili ai le nofo toatasi e lē faia se toalua na i lo’o le faaipoipo i se toalua leaga. Faatalitali sei e lagona muamua mai le Atua. Saili ni faamaoniga se tele seia e mautinoa o le uo o loo e fia faaipoipo I ai e lē o se vale. Aua ne’i e manatu e mafai ona e suia lou toalua ina ua uma ona lua faaipoipo.

Le au Pele e, o au uo ma ē tou te mafuta e mafai ona tele ai se aafiaga o lou olaga. Aua e te saga uo ma mafuta i tagata e lē tatau ma oe. Filifili ma le poto au uo. I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 7 TESEMA 2024

(tusia e Pastor EA Adeboye)

Manatu Autu: Aua Le Faamoemoe I Oa (Trust Not In Riches)

Tauloto -Tusi Paia– Failauga 10:19 “Ua latou faia tausamiga e featani ai, o le uaina fo‘i e fiafia ai tagata ola; a o tupe e aogā i mea uma.”

Faitauga – Tusi Paia – Failauga 5:9-12

Fai mai le mau tauloto o le asō, o tupe e aogā i mea uma. E moni, afai o se isi e i ai ni ana tupe, e i ai fo’i le malosiaga i lea uso aua e mafai ona ia totogia tupe e fai ai galuega e tele, e aofia ai ma mea e matua’i lē mafai ona faia e aunoa ma le tupe.

Sa o’u vaai i se tusitusiga i ni tausaga e tele ua tuana’i faapea, “A tautala loa le tagata e i ai tupe e sa’o ma tonu mea uma o loo fai mai ai.” E leai se isi e vaai poo sa’o le gagana aua ua masani a’i e gaua’i i fa’atonuga a le tagata mauoa. Tusa fo’i pe fai e le tagata mauoa se mea sesē, e tau leai ni tagata e maua le loto toa e fa’asa’o ai. O lona uiga, e mafai e le tupe ona siitia le tulaga ma le malosi o le tagata.

Mamana e pei o tupe, peita’i fai mai le tusi o Fa’ataoto 23:5 e faia lava e ia ona apaau ma lele ese ai. E le gata i lea, e ui i le malosiaga o le tupe, e I ai le tapula’a o mea e mafai ona ia fai. Mo se fa’ata’ita’iga, na faamauina i le Tusi Paia ina ua I ai se oge i Aikupito na uma fo’i tupe (Kenese 47:15-16).

I aiaiga o le taimi nei, e mafai ona faapea ua lē toe taulia tupe. Fa’ata’ita’iga o aso nei ona o aafiaga faigata o le tamāoaiga, ua matua’i pau maulalo ai le malosi o le tupe a le tele o atunuu.

Talu ai la e mafai ona toilalo le tupe, e lē tatau ona e faalagolago i ai. E toatele tagata mauoa latou te gafatia ona totogi togafitiga fa’a fomai aupito sili ona lelei I le lalolagi peita’i e lē mafaia e a latou tupe ona lavea’i e pele ia i latou. E i ai tagata o loo taooto i moega taugatā i o latou fale ae tau lē maua se moe. E i ai fo’i tagata latou te mafaia i lo latou tamāoaiga e tele ona fafaga se nu’u atoa, ae lē mafai ona aai i taumafa o loo momoo i ai ona o tulaga o le soifua maloloina. E lē tatau ona e faatuatua i au oloa aua so’o se tasi e faapea o le a tele nauā lona mafatia, e pei ona fai mai le Faataoto 11:28; . “O lē amio leaga ‘ua fai e ia le galuega pepelo; a o lē totō le amiotonu e ‘iā te ia le taui fa‘amaoni.”

Afai e maua e se uso le oa ma le tamāoaiga o lenei lalolagi ae aunoa ma Iesu, o lea uso ua faaumatia. E matuai leai se aoga e maua ai tupe uma o le lalolagi ae misi le ola e faavavau (Mareko 8:36). Ua na o Iesu e mafai ona faalagolago i ai; ua na o ia e tula’i pea e fesoasoani mo oe pe a mavae mea uma. Ua na o ia e mafai ona avatua ia te oe ma le augā tupulaga o mulimuli mai se lumanai manuia i luga o le fogaeleele ma le ola e faavavau. 

Le au Pele e, o au tupe o loo i au teugatupe i le faletupe, poo le a le tele, e te le faamoemoe i ai e tula’i mo oe i taimi faigata. Aua e te faamoemoe I oa; tu’u lou faatuatua ia Iesu. E alofa moni ma faapelepele ia te oe, na te lē tu’ulafoa’iina oe i soose taimi ma soose aso, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 6 TESEMA 2024

(tusia e Pastor EA Adeboye)

Manatu Autu: Malosi o le talavou (Youthful strength)

Tauloto -Tusi Paia– Failauga 12:1 “'O lenei, ‘ia e manatua lē na faia oe i ona po o lou taule‘ale‘a, a o le‘i o‘o mai aso leaga, a o le‘i o‘o mai fo‘i tausaga ‘e te fa‘apea ai, “E leai so‘u fiafia i ai.” '

Faitauga – Tusi Paia – Auega 3:25-27

I le Faataoto 20:29, fai mai le Tusi Paia o le matagofie o taulele‘a, o lo latou malosi lea; o le mamalu fo‘i o toeaina, o le ulusinā lea. A’o e talavou, e te malosi ma vavevave, ma e maua lou malosi e oso atu i lea mea ma galue mo se taimi umi. Peitai fai mai le Tusi Paia i le Isaia 40:30

'E vaivai ma tigāina tama matutua; o taulele‘a fo‘i, e pa‘u‘ū lava i latou. '

O le malosi e maua e talavou e le faapea e faavavau. O Tavita o se fitafita malosi ao talavou, e le gata na ia fasioti ia Koliata, na ia aoaoina isi fitafita tautaua e fasiotia sauai. Peitai, e iai le taimi i lona olaga, sa pau i lalo ma semanu e oti i le taua pe ana le iai se tagata na fesoasoani ia te ia (2 Samuelu 21:15-22). 

O le matagofie o taulelea o lo latou malosi lea, peitai e le tatau ona faaaogaina faapito e tau na o mea e te manao iai. Ia faaaogaina e auauna ai i le Atua. Afai o oe o se talavou, e le tatau ona faaaogaina lou malosi i le faitaaga pe saili malosi i tuinanau o le tino. Peitai e tatau ona faaaogaina lou malosi e galue mo le Atua, aua o le faaamoemoega autu lena na avatu ai le malosi ia te oe. E toatele tagata i aso nei ua matuā salamo i le auala na faaaluina ai lo latou taimi ao talavou. O nisi e le o mau i se faaipoipoga e tasi poo iai foi se alagatupe lelei e ola ai ona o le faatamala i mea na faia i o latou olaga a’o talavou.  Ua latou fai taulaga i se lumanai manuia ona o le naunau ia tau lava o le fiafia. 

Afai o oe o se talavou, e tatau ona e faaeteete i fatu o lo’o e luluina i le taimi nei aua e te maua le seleselega i lou lumanai. Fai mai le Failauga 11:9-10 9Le taule‘ale‘a e, ‘inā ‘oli‘oli ia i lou tamaitiiti, ‘ia fiafia fo‘i lou loto i aso o lou taule‘ale‘a ma ‘ia e savali i ala ‘ua e loto i ai, ma mea e va‘ai i ai ou mata; a ‘ia e iloa e fa‘amasinoina oe e le Atua ‘ona o na mea uma. 10O lenei, ‘inā fa‘ate‘a ‘ese atu ia le tigā i lou loto ma tu‘u ‘ese atu le leaga i lou tino; auā o le tamaitiiti ma le taule‘ale‘a e fa‘atauva‘a ia.

E tatau ona e tuu mamao ese le amioleaga ma oe aemaise pe afai o oe o se talavou o loo e faitauina lenei feau. O lou malosi o se talavou e lē o’o i le faavavau. A mou atu lou malosi o se talavou ma ua e matua, o le a e feagai ma seleselega o fatu na e totoina I lou taimi o talavou. 

Le au pele e, auauna I lou Atua ma lou malosi atoa. Ua lava se upu mo le tagata poto. O le malosi o se talavou e le tumau e faavavau, ia e faaaogaina e auauna ai i le Atua, i le suafa o Iesu, Amene.

OPEN HEAVENS

MATALA LE LAGI MO LE ASO TOFI 5 TESEMA 2024

(tusia e Pastor EA Adeboye)

Manatu Autu: Matafaioi a lou fofoga (The purpose of your mouth)

Tauloto -Tusi Paia– Salamo 145:21 “O vi‘i o le ALI‘I e ta‘u atu e lo‘u gutu; e fa‘afetaia e tagata uma o lona suafa pa‘ia, e fa‘avavau fa‘avavau lava.'

Faitauga – Tusi Paia – Mareko 7:31-37

O le mafuaaga na fai ai e le Atua lou fofoga, ina ia e faaaogaina e te pese ma vivii atu ia te Ia. O le mea lea na ia fetalai ai i le Salamo 98.4 '‘Ia ‘alalaga i le ALI‘I le lalolagi uma; ‘ia leo tele lava ma ‘ia ‘alalaga fiafia ma ‘ia fai pesega.'

I le fuaitau o loo taua i luga, na poloai le Atua i le lalolagi atoa, e le na o ni nai tagata toaitiiti, e alalaga leotele atu ia te Ia. I se isi faaupuga, o lo’o ia fetalai atu i le sami ia gogolo i ona viiga, ia patipati laau uma mo Ia, ma manu felelei ia pepese. E faapena foi oe o loo I le laueleele, e lē tatau ona misi lou leo i lenei aufaipese maoae. Fai mai Tavita i le Salamo 119:164' E ta‘i fo‘i fa‘afitu i aso ‘ona ‘ou vivi‘i atu ‘iā te oe, ‘ona o au fa‘amasinoga tonu. '

Na faia lava e le Atua lou fofoga e vivii atu ai ma pese atu ia te Ia. Atonu e lē mafai ona e pese e pei o siufofoga o le aufaipese i lau Ekalesia, ae e silafia e le Atua, e mafai ona alalaga tagata uma. O le mea lea na ia fetalai atu ai i le Salamo 98:4, ‘ia ‘alalaga fiafia ma ‘ia fai pesega.

E iai se tala i le Mataio 12:22 o loo faaalia ai le tāua o le fofoga o tagata i le Atua. Na aumaia se tagata ia Iesu Keriso ma o loo faapea mai le Tusi Paia o lenei tagata e pō le vaai ma e gūgū foi. Na faamalolo e Iesu lenei tamaloa ma na amata ai loa ona tautala ma vaai. E mātauina le faasologa na tusia ai e le Tusi Paia lenei vavega; sa tauaso ma gūgū le tagata,’ ae na tusia e le Tusi Paia na ia tautala ma vaai. Ua faaalia ai na faamālōlō muamua e Iesu le fofoga o lenei

tamā, ona faatoa faapupula ai lea o ona mata.

Afai e te lei alaga ma pese i le Atua, amata loa ona fai. A e i ai i totonu o le faletaele, usu viiga o le Alii. A e savali i le ala, ia e pese leotele. A e i ai i le lotu, a faapea mai lea o le faifeau i luga o le pulelaa ia te oe e alalaga Aleluia, faaaoga lou siufofoga e alaga leotele ai. E fiafia le Atua pe a e pese ma vivii atu ia te Ia. A e alaga ma pese fiafia ia te ia, e fiafia o ia ia te oe, ma o le a faalatalata mai foi ia, ia te oe. Fai mai le Tusi Paia i le Salamo 22:3'A o oe, e pa‘ia oe; o lo‘o e ti‘eti‘e i vi‘iga a Isaraelu. '

A tatala lou fofoga ma e vivii atu i le Atua i taimi uma, o le a Ia faalatalata mai ia te oe ma faatasi ma oe e lē aunoa. O lona uiga, o le a e fiafia e te faatasi ma ia i Lona afioaga seia oo i le faavavau ( Salamo 16:11 ) ma tofo i Lona filemu i taimi uma, e tusa lava po’o ā mea o loo tutupu i lou siʻosiʻomaga. Le ‘au pele e, ‘aua ne‘i mapu lou vivi‘i atu i le Atua ma faaaoga ai lou fofoga! Usu sau pese e te fiafia iai e vivii ai i le Atua maualuga, i le suafa o Iesu, Amene.

OPEN HEAVENS

MATALA LE LAGI MO LE ASO LULU 4 TESEMA 2024

(tusia e Pastor EA Adeboye)

Manatu Autu: Matafaioi a ou vae (The purpose of your legs)

Tauloto -Tusi Paia– Galuega 3:8 “'‘Ua oso o ia i luga ma tu, ‘ua savali fo‘i, ‘ua ulu fa‘atasi fo‘i ma i lā‘ua i le malumalu, o lo‘o savali o ia ma oso, ma vivi‘i atu i le Atua. '

Faitauga – Tusi Paia – Galuega 3:1-11

E pei ona ou ta’ua ananafi, na faia oe e le Atua mo lona lava finagalo (Faaaliga 4:11) ma na ia faia faapitoa vaega uma o le tino mo se matafaioi taua. O ananafi na ou talanoa atu ai I le matafaioi a lima, a’o le asō, o le a ou a’oa’o atu I le matafaioi a vae. 

O le tasi o vaega taua na faia ai e le Atua, o ou vae ina ia siva mo ia. Fai mai le Salamo 150:4 e faapea:

'‘Ia ‘outou vivi‘i atu ‘iā te ia i le topa ma le siva; vivi‘i atu ‘iā te ia i le menima ma le fa‘aili.'

E finagalo le Atua e faaaoga o tatou vae e sisiva ai mo ia. I le faitauga o le Tusi Paia, sa iai se tamaloa na fanau mai e pipili, ma e ui na nofo i le faitotoa o le malumalu, sa ia faalogoina pese ma viiga mai totonu, peitai sa lē mafai ona ia siva. I lena aso taua tele, na ia ole atu i le a’u so’o mo se tupe, peitai na faia e le Atua mo ona vae se gaoioiga ina ia mafai ona siva ai mo ia. Sa lei maua le tupe na ole atu ai, peitai na tago atu Peteru i lona lima ma faatu i luga ona faamalosia ai lea o ona vae ma tapuvae. Fai mai le Tusi Paia na ia ulu atu i le malumalu ua savali, osooso ma vivii i le Atua. Tau ina ia e maua e mafuaaga e te siva ai, i le suafa o Iesu.

Afai e te fia iloa le taua o le siva i le Atua, e tatau ona e faitau i le 2 Samuelu 6:14-23. I lena fuaitau, sa siva Tavita i le Atua, ae na inoino iai lona to’alua aua ua ia manatu ua ia faalumaina le tofiga o le tupu i le so’ona siva e leai se mā. Na matua lē fiafia le Atua i le toalua lea o Tavita, ma o lona taui, e leai sana tama sei o’o i le oti. Po’o le a le maualuga o le tulaga tauoloa ua e ausia i le olaga nei, ia e faamautinoaina e te faaaogaina ou vae e siva ai mo Lē na siitia oe i lena tulaga. 

I le tele o tausaga talu ai, sa matou iai i se fonotaga a faifeau. I le taimi o pese ma viiga, na ou moeiini ina ia aua nei faalavelave se mea ia te a’u a’o ou siva mo le Tupu o Tupu. E iai se mea na taumafai se tagata o le Atua e ta’u mai ia te a’u ae ua le mafai ona o loo ou moeiini. Ina ua mafai ona oo mai ma ua ou pupula atu, na ia faapea mai, ’vaai ia te oe, e te iloa o oe o le Taitai Aoao o le Ekalesia?’ Ou te lei tali iai aua sa ou siva i Lē na tofia a’u e avea ma Taitai Aoao o le Ekalesia, ma ou te siva pea mo ia seia oo i la’u manava mulimuli. 

Le au pele e, ia faamautinoa e te faaalia pea lou loto faafetai I le Atua i le vivii pea ia te ia ma siva mo ia. O le auala lea e na te siitia ai pea oe ma e lē uma lou fiafia i le matagofie o lana faaolataga (Salamo 149:3-4). Fa’aaoga se lima minute e te siva ai mo le Atua i le asō ona fai lea ma au masani, i le suafa o Iesu, Amene.