Samoan Devotional

OPEN HEAVENS

MATALA LE LAGI MO LE ASO TOFI 2 IANUARI  2025

(tusia e Pastor EA Adeboye)

Manatu Autu: Tatalo mo le 2025 (Prayers for 2025)

Tauloto -Tusi Paia– Kenese 12:2 “Ou te faia oe ma nu‘u tele, ‘ou te fa‘amanuia fo‘i ‘iā te oe, ‘ou te matuā fa‘amamaluina lou igoa; e manuia fo‘i oe.”

Faitauga – Tusi Paia – Isaia 35:1-10

Tatalo

1. Faafetai le Alii e mo faamanuiaga, o lesona, ma le olaga na matou ui ai I le 2024. Faafetai mo lou faamaoni ia te a’u I le lā tausaga atoa. 
2. Tamā, I lenei tausaga fou, ou te manaomia lau taitaiga ma le poto e sili atu muamua. Faamolemole fesoasoani mai ia te au ia ou faia faaiuga tonu ma le sa’o i lenei tausaga atoa. 
3. Tamā, ou te matuā fia latalata ia te oe i lenei tausaga. Faamolemole ia faatupuina le fia ai ma le fia inu ia te oe I totonu o lo’u loto ia sili atu muamua, I le suafa o Iesu. 
4. Tamā, faamolemole ia fai a’u ma ipu e tauleleia ma fesoasoani mai ia te a’u ina ia ou galue mo oe i lenei tausaga e sili atu muamua e manumaloina agaga mo lou malō. 
5. Tamā, ou te lē fia auai I ni galuega e leai ni fua i lenei tausaga. Faamolemole ia e faamanuia I galuega a o’u lima. 
6. Tamā, faamolemole ia fesoasoani mai ina ia ou tuputupu a’e i le Agaga, i lagona, i le tamaoaiga ma so’o se vaega o lo’u olaga i lenei tausaga fou, i le suafa o Iesu. 
7. Tamā, faamolemole puipui a’u, ma lo’u aiga, ma ē pele ia te a’u i lenei tausaga atoa. Aua nei faatagaina ni mea e matou te afaina ai, I le suafa o Iesu. 
8. Tamā, faamolemole ia faaleaogāina soo se fuafuaga a le fili e faasagatau mai ia te a’u ma lo’u aiga i lenei tausaga. O au’upega uma e faia e tau mai, e lē manuia, I le suafa o Iesu. 
9. Tamā, faamolemole ia e faaumatia lē na te ‘aina mea mo a’u. Aua nei faatagaina le fili e gaoi mai ia te a’u ma ē pele ia te a’u, I le suafa o Iesu. 
10. Tamā, faamolemole fesoasoani mai ma o’u tuaoi ina ia matou nonofo i le filemu ma le tamaoaiga i lenei tausaga atoa. 
11. Tamā, faamolemole ia avea lenei tausaga ma tausaga e tali ai a’u tatalo. Ia avea uma o’u manaoga ou te ole atu ai ma tautinoga mo oe, I le suafa o Iesu. 
12. Afio mai oe Agaga Paia e taimua i mea uma ou te iai i lenei tausaga atoa. Ia e fa‘amanuia mai le ALI‘I ia te a’u, ma ‘ia e tausi ‘iā te a’u; ‘ia fa‘amalamalamaina ou fofoga le ALI‘I e i luga ‘iā te a’u, ma alofa mai ‘iā te a’u; ‘ia fa‘asaga mai ou fofoga le ALI‘I e ‘iā te a’u ma tu‘uina mai ‘iā te a’u le manuia, i le suafa o Iesu e tatalo atu ai, Amene. 

OPEN HEAVENS

MATALA LE LAGI MO LE ASO LULU 1  IANUARI 2025

(tusia e Pastor EA Adeboye)

Manatu Autu: Na fesoasoani le Atua ia te oe (God has helped you)

Tauloto -Tusi Paia– Teuteronome 33:26 “E leai lava se la te tutusa ma le Atua o Iesuruna, o lo‘o ti‘eti‘e i le lagi e fai ma ou fesoasoani, e ti‘eti‘e fo‘i i ao o le lagi i lona mamalu.”

Faitauga – Tusi Paia – Salamo 124:1-8

O le tausaga fou lenei ma e alagatatau ona sii le faafetai i le Atua. E te ono manatu e lei ō gatasi fuafuaga i le tausaga talu ai, ae talitonu mai, ana le seanoa le alofa mutimutivale o le Atua, e te lē ono saofia mai i le tausaga fou (Auega 3:22). O le tulaga lea e lē tatau ai ona e faia se mea sese o le faaseā i le Atua ma tomumu i mea ua lē taunuu e pei ona e naunau iai. E tatau ona e faafetai ia te ia I lona taitai mai o oe e oo mai i le asō. Afai e amata le tausaga i le faafetai, e mautinoa e te ofi atu i luma o Lē e mafai ona tuuina  se tausaga manuia ia te oe (Salamo 100:4). Peitai a e agai atu I le tausaga fou ma le muimui , aemaise o le muimui I Lē e mafai ona fesoasoani ia te oe, ua e lamatia. Fai mai le Numera 11:1, “‘Ua muimui le nu‘u, ‘ua leaga fo‘i lea mea i fofoga o le ALI‘I; auā ‘ua fa‘afofoga i ai le ALI‘I, ‘ona tupu ai lea o lona to‘asā; ‘ona mū ai lea o le afi mai le ALI‘I ‘iā te i latou, ‘ua fa‘aumatia ai pito toagalauapi.”

‭‭I le 1 Samuelu 7:12, fai mai le perofeta ‘ua fesoasoani mai le Alii iā i tatou’. I nisi faaupuga, o loo maua pea le fesoasoani mai ia te ia I le tatou savaliga e oo mai I le asō. O se upu a le tagata ua aulia mai ma le soifua manuia, o I latou o loo faapea mai, ‘faafetai i le Atua ua ta aulia mai lenei tausaga’. Fai mai le faitauga o le Tusi Paia o le asō, ana le se anoa le Alii sa ia I tatou, semanu tatou te lē iai I Le tulaga o loo tatou iai nei. 

Afai na e uia ni tulaga faigata I le tausaga talu ai, ma o loo e soifua pea ma faitauina ma faalogo i lenei upu, o lona uiga sa fesoasoani pea le Atua ia te oe. Afai na sologa lelei mea uma i le tausaga talu ai, e ui o loo tele faafitauli i le lalolagi, sa fesoasoani le Atua ia te oe, aua a aunoa ma ia, e lē mafai ona e ausia se mea e tasi (Ioane 15:5). Po’o le a lava le tulaga o loo e iai, e tatau ona e faafetai I le Atua mo fesoasoani uma ia te oe (1 Tesalonia 5:18). 

Le au pele e, alu atu ia ma pese ma viiga i le Alii. Faaalu lenei aso e mafaufau ai i le lelei o le Atua ia te oe, ma ia faamautinoa le amata o le tausaga i le faafetai. O le faavae lea o le maua o mea uma mai ia te ia. Ave le faafetai I Le Atua mo mea uma ua ia faia ona e sauni lea e maua mea e tele mai ia te ia, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 31 TESEMA 2024

(tusia e Pastor EA Adeboye)

Manatu Autu: Tatalo mo le 2025 (Prayers for 2025)

Tauloto -Tusi Paia– Salamo 65:11 “Ua e fa‘ae‘e i le tausaga le paleali‘i o lou agalelei; o ou ala ‘ua tautulu ai mea lololo.”

Faitauga – Tusi Paia – Isaia 45:1-3

Tatalo

1. Tama e, faafetai mo lau tausiga ia te a’u i lenei tausaga atoa 2024. Pe ana le seanoa lou alofa mutimutivale, e faaumatia a’u nei. Ou te avatu ai le faafetai mai le ta’ele o lo’u Agaga, le Alii e.

2. Tama e, faamolemole fesoasoani mai ia te au ia ou aga’i pea i luma ia ausia lou finagalo ma le faamoemoega mo lo’u ola i le tausaga ua lumanai nei. Faamolemole ia matua sili atu le manuia o le tausaga 2025 nai lo le 2024, i le suafa o Iesu.

3. Tama e, faamolemole ia e ta’imua i o’u luma i le 2025 ma ia fa’asa’osa’o ala uma sa faaletonu ma leai se tonu. Faamolemole ia e tuuina mai le manumalo ia te a’u i le fa’asologa o le tausaga fou, i le suafa o Iesu.

4. Tama e, fa’amolemole fesoasoani mai, ia atili ona ou latalata atu ia te oe i le 2025. Aumaia lou alofa tunoa ou te su’esu’e punouai i la’u Tusi Pa’ia ma tatalo faifaipea, i le suafa o Iesu.

5. Tama e, faamolemole fesoasoani mai ia ou savali e tusa ma lou finagalo e atoatoa ona ou lelei ai, i le 2025. Fesoasoani mai ia aua lava nei ou savali I fafo atu o au fuafuaga mo lo’u olaga i le tausaga fou, i le suafa o Iesu.

6. Tama e, faamolemole, i le tausaga fou, ia e fa’amanuia mai i galuega a o’u lima, ia fa’asilia nai lo le tausaga ua tuanai, i le suafa o Iesu.

7. Tama e, ‘aua nei o’o ia te a’u po’o se tasi o lo’u aiga se faanoanoaga i le 2025.  O le a matou olioli ma faaneenee ia te oe mai le amataga o le tausaga 2025 e o’o atu i le faaiuga o le tausaga atoa ma le lumanai, i le suafa o Iesu.

8. Tama e, faamolemole fesoasoani mai ia ou savali i lou mana i le tausaga atoa o le 2025. Ou te le savali i le fememeai pe ou te faia ni mea sese e telē lona aafiaga ia te a’u i le tausaga fou, i le suafa o Iesu.

9. Tama e, ou te ole atu mo se vavega faapitoa i masina taitasi o le tausaga fou. Faamolemole, ia e faia se vavega mata’utia ma faapitoa mo a’u i masina ta’itasi, ina ia molimauina ai e tagata lou agalelei i lo’u olaga.

10. Tama e, faamolemole fesoasoani mai ou te savali i se tulaga maoa’e atu o lau faau’uga ia te a’u i le 2025. Ia fa’aaogaina a’u ou te faatinoina ni vavega ma manumalo ni agaga se tele mo lou Malo, i le suafa o Iesu.

11. Tama e, faamolemole ia fa’atagaina lou filemu e pule aoao i lo’u olaga, lo’u aiga, la’u Ekalesia, lo’u atunuu ma so’o se tulaga ou te a’afia ai i le tausaga fou. Faamolemole, ia ou lagonaina ua si’os’iomia a’u i lou filemu i le 2025, i le suafa o Iesu.

12.  Tama e, aumaia le filemu ma le fealofani mo a’u ma lo’u to’alua, mo le ma fanau, mo la’u Ekalesia, mo a’u uo ma e masani.

13. Tama e, ia foa’i mai le soifua maloloina, ae maise le poto ou te tausi ai i lo’u tino, o le tino ua e ta’ua o le “malumalu e te afio ai”. Ia ou sa’ilia auala uma ou te ola malosi ma saogalemu ai, i le tausia lelei o le tino na e faia mo a’u. I le suafa o Iesu e tatalo atu ai, Amene

OPEN HEAVENS

MATALA LE LAGI MO LE ASO GAFUA 30 TESEMA 2024

(tusia e Pastor EA Adeboye)

Manatu Autu: Fa’agalogalo mea ua tuana’i (Forget the things of the past )

Tauloto -Tusi Paia– Filipi 3:13 “Le ‘au uso e, ‘ou te lē manatu ‘ua ‘ou maua, a o le mea e tasi ‘ou te faia, ‘ou te fa‘agalogalo i mea ‘ua tuana‘i, ‘ou te momo‘e punou a‘i fo‘i i mea o lumana‘i.”

Faitauga – Tusi Paia – Isaia 43:18-19

Ua tatou oo mai i le i’uga o lenei tausaga, ma ou te talitonu e toatele tagata o loo mafaufau pe faapeī mai lenei tausaga. O le toatele o loo manatu e iai lava mea sa tatau ona sili atu lona faatinoina. O se tulaga masani le iai o nei lagona, aua e fesoasoani i le tagata e faaleleia ai faaiuga e faia i le lumanai. Peitai, e leai se aogā o le soona mafaufau i mea ua tuanai. E leai se mea e maua i le soifua ma le loto faanoanoa ona o mea na tutupu i le tuanai. Le au pele e, ua oo i le taimi e faagalogalo uma ai mea ua tuanai, ae amata ona e silasila i le tausaga fou manuia o loo lumanai nei. 

Muamua, poo a mea ua e maua poo mea foi e te lei maua lava, e tatau ona e avatu le faafetai i le Atua. Fai mai le 1 Tesalonia 5:18 “Ia ‘outou fa‘afetai i mea uma lava, auā o le finagalo lea o le Atua ‘iā te ‘outou, ‘iā Keriso Iesu.”  Ioe, ua oo mai le tausaga I lona faaiuga ma o lo’o e manatu e tele mea sa tatau ona sili atu ona e faia, peitai a ē mafaufau loloto iai, e te silafia ai le tele o mafuaaga e tatau ai ona e faafetai i le Atua. Ana e maliu I lenei tausaga, semanū e te lē o iinei e toe manatunatu ai I mea na tutupu i lenei tausaga. O le tele ia o mea e te faafetai ai i le Atua. Faaali atu i le Atua lou loto faafetai aua a silasila le Atua i le loto faafetai, e asiasi lava le Atua i lea tagata ma se faamanuiaga (1 Tupu 3:3-15). 

Lona lua, maitau mai, e faia e le Atua ina ia galulue mea uma mo lou lelei (Roma 8:28). E mafai e le Atua ona liua soo se mea ua lē aogā i mea faasili mo oe. Ina ua lafoai Iosefa i le falepuipui i le Kenese 39:20, ua foliga o se mea leaga tele mo ia, ae na te lei silafia o le falepuipui o lona auala lea i le avea ai ma palemia o se atunuu pito I maualuga lona tamaoaiga i le lalolagi I lea vaitau. Aua lava nei e tusi esea oe, ia e faataga ma talia pea le Atua  i mea uma o lou olaga. A e faia, e te maua le toe liua o mea uma ma mulimuli mai ia te oe ana faamanuiaga. 

Peitai, afai o loo e ola pea I le agasala, aua e te manatu e fesoasoani le Atua ia te oe e liua mea uma. Fai mai le Isaia 3:11, “‘Oi talofa i lē ‘ua amio leaga! e malaia o ia; auā e tu‘uina atu ‘iā te ia le taui o ona lima.” O lona uiga e leai se lelei I so’o se tagata o loo ola pea I le agasala. O lo’o faapea mai foi le Tusi Paia i le Isaia 3:10 “Fai atu ia i lē ‘ua amiotonu, e manuia o ia auā o le fua o a latou galuega latou te ‘a‘ai ai.”

‭‭

Le au pele e, afai o lo’o e fia soifua I faamanuiaga a le Atua i le tausaga fou, fai sau filifiliga ia e soifua e tusa ma lona finagalo I aso uma. Ia e soifua e tusa ma le Upu a le Atua I aso uma o le tausaga 2025, ona lelei ma manuia lea o mea uma ia te oe. Manuia le tausaga fou, i le suafa o Iesu, Amene.  

OPEN HEAVENS

MATALA LE LAGI MO LE ASO SA 29 TESEMA 2024

(tusia e Pastor EA Adeboye)

Manatu Autu: Faafoeina O Faitioga (Handling Criticisms)

Tauloto -Tusi Paia– Eperu 12:11 “O a‘oa‘iga uma fo‘i a o i ai, e lē manatu i ai o se mea e ‘oli‘oli ai, a o le mea e fa‘anoanoa ai; ‘ae mulimuli ane e fua mai ai le fua o le amiotonu ē manuia ai ē ‘ua a‘oa‘oina ai.”

Faitauga – Tusi Paia – Faataoto 15:31-32

E toatele tagata e manatu o le avea ma ta’ita’i o lona uiga so’o se mea e saunoa i ai pe faatino o le faaiuga lava lea e lē tatau ona fesiligia. Afai o la’a ma agai i luma lou soifua, e mautinoa le o’o mai o faitioga. Ina o tau amata le ekalesia Redeemed Christian Church of God, ma lona ofisa tutotonu sa i se tulimanu itiiti o le nu’u, e leai se isi na faitio mai. O le taimi lenei ua so’o le lalolagi i lālā o le ekalesia, Oka ni faitioga e le iloga se itu e oso mai ai. O se faailoga lenei o le ola poo le tupu, ma ou te lē faanoanoa ai, ou te fiafia ua o matou tutupu.

O nisi tagata e faitio ia te oe ona e alolofa, auā o lou manuia o se fiafiaga ia i latou. O nisi e faitio o le mana’o e fa’atigā oe auā e lotoleaga ma manana’o ia e toilalo ma aua ne’i e manuia. Po’o le a lava le mafuaaga, o lou faafoeina o faitioga e faalagolago i ai lou manuia poo le faiaina. Fai mai le Faataoto 1:5-7; “E fa‘alogo mai le tagata poto, e tupu ai pea lona poto; o lē ‘ua mafaufau fo‘i e maua e ia le poto e pule ai; e lagona ai le fa‘ata‘oto ma lona fa‘amatalaga; o ‘upu a ē popoto ma a latou ‘upu lilo. O le mata‘u i le ALI‘I, o le amataga lea o le poto; ‘ae ‘ino‘ino tagata vālelea i le poto ma le a‘oa‘oina.”

Le au pele e, faalogo i fautuaga mai ia i latou i lalo ifo o oe poo tagata e te vaai i ai e itiiti fo’i lo latou tomai nai lō oe. Afai e fai atu i latou nei e lē o sa’o se mea o loo e faia, faalogo i ai e aunoa ma le faafinau poo le mateletele. Afai e te tomumu ma lē fiafia mo ni aso ona ua faitioina oe, e manaomia lou tautala ia te oe lava ia e malosi ai. Poo a faamatalaga a tagata e fai ia te oe, e lē tatau ona e manatu ma talitonu e te lē mana’omia se a’oa’iga. O Mose o le tagata fa’au’uina na valaauina e le Atua. Na talanoa faafesaga’i ma le Atua (Numera 12:8), peita’i o le tali o faafitauli na o la fetaia’i i le galuega a le Atua sa i le tamā o lona toalua, o se isi e lei mafuta vavalalata ma le Atua e pei o ia. Atonu o oe o le ulu o lou aiga, Ofisa Sili o Pulega po’o le faifeau, peita’i e le faapea ua e iloa ai mea uma.

Talitonu mai ia te a’u, o faitioga uma o se avanoa lea mo oe e fa’aleleia ai lou tagata. A e fa’aaogaina lelei, e fa’aleleia atili ai oe. O lau filifiliga lava. O nisi o faaiuga na o matou faia ma fesoasoani ai e fa’aleleia i matou, o tali i faitioga. Ou te iloa o nisi o faitioga e faia ia fasia ai I tatou, peita’i na fa’aaogā e le Atua e faaali mai ai ia i tatou le auala e sili atu ona lelei, ma ua tatou malolosi ai.

Ia avea pea faitioga o se avanoa e toe fa’aleleia atili ai ina ia tatou tutupu, ae lē o se mafuaaga e femisa’i ai ma le tagata faitio. I le suafa Iesu, Amene.

OPEN HEAVENS

MATALA LE LAGI MO LE ASO TOONAI  28 TESEMA 2024

(tusia e Pastor EA Adeboye)

Manatu Autu: Tofotofo Ia Te Oe Lava - Examine Yourself

Tauloto -Tusi Paia– 2 Korinito 13:5 “Inā tofotofo ia ‘outou ‘iā te ‘outou, po ‘ua ‘outou i le fa‘atuatua; ‘inā su‘esu‘e ifo ia ‘iā te ‘outou; pe tou te lē iloa ‘ea o ‘outou loto, ‘ua i totonu ‘iā te ‘outou o Iesu Keriso, pe ‘āfai ‘ua lē pepelo ‘outou?”

Faitauga – Tusi Paia – 1 Korinito 11:31-32

I le Tusi o Isaia 6:1-5, sa vaai Isaia I le mamalu ma le Paia o le Atua ona ia alaga lea ua tagi ma faapea “Aue a’u nei!” A o le’i o’o i lea taimi, sa ia fai perofetaga ma sa vaai uma tagata ia te ia e paia. Peita’i na vaai Isaia ia te ia i le malamalama o le mamalu ma le paia o le Atua ma ia iloa ai le tulaga moni sa ia i ai.

Le au pele e, e tāua le fai o le suesuega a le tagata lava ia ia te ia mai lea taimi i lea taimi. Aua e te tu’u tasi i faamatalaga a tagata e uiga ia te oe aua atonu latou te lē iloa lelei oe pei ona e iloaina o oe lava. E lē iloa e tagata mafaufauga o lou loto poo mea e te fai pe a tuua na o oe. O lea la, e te manaomia lou silasila toto’a ia te oe lava ma faatino se suesuega faamaoni o le tulaga moni o lou loto.

Aua e te faamasinoa oe lava e fua i ou lava manatu; ae fua lou tagata faatatau i tapulaa a le Atua. Fai mai le Tusi Paia I le 2 Korinito 10:18 e lē talia o lē ua vivi’i o ia ia te ia, a o lē ua viia e le Alii. Atonu na fai le faamasinoga a Isaia ia te ia lava i ana lava fua fa’atatau, peitai ina ua fetaia’i ma le mamalu o le Atua, na ia vaaia ai le tele o le faaletonu o lona tagata sa i ai. Faamasino lou tagata i le malamalama o le moni I le Upu a le Atua; o le ala lea e faailoa atu ai ia te oe poo sa’o lou ala pe leai. Aua e te faamasino ia te oe, e fua i ou lagona, upu a tagata, poo mea ua e ausia. Faaaoga le upu a le Atua pei o se fa’ata, e faasino atu ia te oe, lou ituaiga tagata moni. A uma ona e fuatia oe e fua faatatau i le upu a le Atua, ofo atoatoa loa lou ola mo ia ma fai i ai e fesoasoani mai ia te oe ia e ola tonu.

Ina ua uma le tulaga na o’o i ai Isaia i le Isaia 6:1-5, na ia iloa ai, pau le ala e mafai ai ona moni lona faapaiaina, o le fesoasoani mai o le Atua. E lē mafai ona e amiotonu i sou lava malosi; e te matua’i mana’omia le Atua e fesoasoani iā te oe. Fai mai le Salamo 20:1-2; e ao ona e tatalo ia auina mai e le Alii le fesoasoani iā te oe mai le malumalu. Sei vagana ua e iloa e te manaomia le fesoasoani, faatoa tuuina mai le fesoasoani mai le malumalu. E tatau ona e tumau i luma o le faata o le upu a le Atua seia e maua le fesoasoani e tupu ai le amiotonu. Aua e te pei o le tagata o loo faamatala I le Iakopo 1:22-24; tumau ma taofimau i le upu a le Atua.

Fai mai le 1 Korinito 11:31 auā afai ana tatou faamasino ia te i tatou, po ua lē faasalaina i tatou. O lona uiga a uma ona e su’esu’e ma tofotofo ia te oe lava, iloa ou faaletonu, ma faatino fesuiaiga tonu, o le a le faasalaina oe pe a o’o I le aso faamasino.

Le au pele e, ou te tatalo ia fai ma au masani le su’esu’e ifo ia te oe lava e tusa ma tapulaa a le Atua, e te maua ai se faamanuia mai le Tupu Silisili I le aso gataaga, I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 27 TESEMA 2024

(tusia e Pastor EA Adeboye)

Manatu Autu: Togiola (Redemption)

Tauloto -Tusi Paia– Efeso 1:7 “o ia fo‘i ‘ua tatou maua ai le togiola i lona toto, o le fa‘amāgaloina o agasala, e tusa ma le ‘oloa faula‘i o lona alofa tunoa,”

Faitauga – Tusi Paia – Mareko 16:16-20

E manaomia e tagata le togiola. Auā o le tulaga talu ona paū le tagata, o le saisaitia i le agasala. Fai mai le Roma 3:23, ua agasala tagata uma ma ua lē oo i le mamalu o le Atua. Faafetai i le Atua mo le galuega togiola ua tatou maua e ala i le taulaga na osia i le ola o Iesu Keriso, ua faasaolotoina ai I tatou mai le saisaitiaga o le agasala.  “ua ta‘uamiotonuina fua i lona alofa tunoa i le togiola e ala ia Keriso Iesu,” Roma‬ ‭3‬:‭24‬ ‭

O le faamagaloina o agasala (Efeso 1:7), tu’usaoloto mai le fetuu o le tulafono (Kalatia 3:13), saolotoga mai saisaitiaga o le agasala (Tito 2:14, 1 Peteru 1:14-18), amiotonu  (Roma 5:17), faaleleiga ma le Atua (Kolose 1:18-20), avea ma tama fai i le aiga o le Atua (Kalatia 4:5), o le afio ai o Agaga Paia (1 Korinito 6:19-20), ma le ola e faavavau (Ioane 3:16), o nisi ia o faamanuiaga o le galuega togiola. 

E ui o le toatele o tagata lē faatuatua e faapea o le olaga kerisiano e pei ni pologa ona o le tele o mea e faasāina, o le Upu moni, o kerisiano, o I latou ia o loo saoloto. O se avā e usitai i lana tane, ma e iai tapulaa e mulimulitaia, ae a e fesili i ana uo e leai ni toalua, e fai mai e sili atu pe ana latou fai toalua. O se tagata onā e leai se galuega, e ono aamu i se tagata e usu i aso uma e faigaluega ma faapea e pologa ma e leai sona fiafia. Peitai, o ai oi laua ia o loo pologa? O le tagata onā o ia lea o loo pologa i le saisaitiaga o le ava malosi. O tagata lē faatuatua o loo saisaitia i se falepuipui, peitai latou te lē o iloa. O la’u tatalo ia tatala e le Atua Matautia o latou mata e pei ona ia tatala ou mata , ma e tatau ona latou o mai I fafo o falepuipui ma laalaa atu I le saolotoga na faia e Iesu mo i latou. 

Le au pele e, aua e te mā e te talanoa I tapulaa I le soifua o le tagata ua togiolaina. Ioe, o loo e tauaveina le amo a Keriso, ae o lana amo e māmā atu i lo le tiapolo, ma o lana avega e faigofie atu (Mataio 11:28-30). 

A faaolaina se tagata, o le mea muamua na te maua o le filemu. Ua aveeseina se avega mamafa mai tauau a lea tagata, o se avega e na te leiloa o loo iai muamua. Afai e lei tuuina atu lou ola ia Keriso, o loo ei le falepuipui. Lafoai lou ola ia Iesu Keriso I le asō, ina ia faasaoloto ia te oe. Ia talai atu e tagata ua faaolaina lo latou  saolotoga i le loto tele ma le olioli aua ua saoloto moni i latou, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 26 TESEMA 2024

(tusia e Pastor EA Adeboye)

Manatu Autu: O le mafuaaga o lona fanau mai 4 (The reason for His birth 4 )

Tauloto -Tusi Paia– Roma 8:11 “Ae ‘āfai e nofo i totonu ‘iā te ‘outou le Agaga o lē na toe fa‘atū mai ‘iā Iesu nai ē ‘ua oti, e fa‘aola mai fo‘i o ‘outou tino ‘auga vale e lē na toe fa‘atū mai ‘iā Keriso nai ē ‘ua oti, e lona Agaga o lo‘o nofo i totonu ‘iā te ‘outou.”

Faitauga – Tusi Paia – Mareko 16:16-20

O le a faaiu atu I le asō la tatou a’oa’oga i le mafuaaga o le fanau mai o Iesu Keriso i le va’ava’ai lea i le aafiaga o Agaga Paia i le ola o tagata faatuatua. E pei ona taua ananafi, na saunia le ala mo Agaga Paia e afio ai I tagata faatuatua, ma o loo faaalia i le Ioane 7:38

“O sē fa‘atuatua ‘iā te a‘u, e fa‘apei ‘ona fai mai o le Tusi, ‘E tafe mai o vaitafe mai totonu ‘iā te ia, o le vai ola lava”

‭

I nisi faaupuga, o loo faaalia i le fuaitau o loo taua I luga, o soo se tagata faatuatua e feafioai ai Agaga Paia, ma maua ai le mana e faamalōlō i mai, faatū i e ua oti, ma faia soo se vavega. O lona uiga, afai o oe o se tagata faatuatua, o faailoga ma mea ofoofogia na faia e Iesu Keriso, e mulimuli foi ia te oe (Mareko 16:17) ma e sili atu galuega e te faia (Ioane 14:12). 

Ina ua maliu Iesu Keriso I luga o le satauro, na saeluaina le ie puipui o le malumalu (Mataio 27:51). O lona uiga o le iai i le mamalu o le Atua ua lē toe faatapulaaina mo nā o ositaulaga sili. So’o se afafine poo se atalii o le Atua, e maua lona avanoa I le nofoalii o le alofa tunoa ma faia mea uma sa faia nā o ositaulaga  sili I le Feagaiga Tuai. Aua nei e manatu ua nā o faifeau a le Atua e mafai ona faia vavega, e mafai foi ona e faia vavega pe a faapea o afio Agaga Paia ia te oe. 

Fai mai le Ioane 3:34, na avatu le Agaga o le Atua ia Iesu Keriso e leai sona tapulaa, e fetalai o ia I le afioga a le Atua e pei ona auina mai o ia. O lo’o atagia ai, o le fua o Agaga Paia I totonu o tagata faatuatua e eseese ma e fua I lo latou faataunuuina o le finagalo o le Atua i o latou olaga. Afai e te ola paia ma fai ma masani le mafuta lelei I le mamalu o le Atua i aso uma, o le a ia faatupulaia le fua o Agaga Paia i lou olaga e faaalia I faaaliga ma mea ofoofogia. 

Le au pele e, e lē tatau I mea o tutupu i lou siomaga ona pulea le ituaiga olaga e te soifua ai. O loo e tauaveina Agaga Paia I totonu ia te oe, e tatau ona e faatonuina mea uma e oo i lou siomaga e galulue mo lou lelei. E fefe  le tiapolo I tagata faatuatua latou te faaaogaina le mana o loo latou maua ia Keriso. Ua nā o tagata e lē faaaogaina lo latou mana ia Keriso e na te faapologaina. 

Afai ua lafoai lou ola ia Iesu Keriso, o loo iai le tulaga e sili ai oe, ona o le mana o Agaga Paia o loo e tauaveina I totonu ia te oe. Amata faaaoga loa lenā mana I le asō, ona e vaai lea I le tiapolo ua tetemū i le fefe. O le Isi taimi e maua ai se tagata ma’i, faaloaloa ai luga ou lima ma tatalo ia malōlō, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 25 TESEMA 2024

(tusia e Pastor EA Adeboye)

Manatu Autu: O le mafuaaga o lona fanau mai 3 (The reason for His birth 3)

Tauloto -Tusi Paia– 2 Korinito 6:16 “Pe fa‘apefea fo‘i ‘ona feagai le malumalu o le Atua ma tupua? Auā o matou o le malumalu o le Atua soifua, pei ‘ona fetalai mai ai le Atua, “‘Ou te nofo i totonu ‘iā te i latou, ‘ou te savali fo‘i i totonu ‘iā te i latou; e fai a‘u mo latou Atua, e fai fo‘i i latou mo‘u tagata.”

Faitauga – Tusi Paia – Kalatia 4:5-7

Sa faagasolo i aso e lua talu ai le a’oa’oga I le mafuaaga o le fanau mai o Iesu Keriso, ma o le a ou faaauau atu i le asō. Ae lei fanau mai o ia, na afio mai Agaga Paia na o ni tagata faapitoa. Peitai, ina ua fanau mai Iesu Keriso i le lalolagi ma toe afio i le lagi, na ia auina mai Agaga Paia e afio I totonu o so’o se tagata  faatuatua (Ioane 14:16-17). O le mafuaaga lea na ia faapea mai ai I le Mataio 11:11, o sē aupito itiiti I le malo o le Atua, e sili atu o ia ia Ioane le papatiso, o le perofeta sili I perofeta uma na muamua atu ia te ia. E te malamalama I le uiga o lea upu? O lona uiga e sili atu oe ia Elia, o le tagata na valaau ona auina mai lea o ua afi mai le lagi. O le fanau mai, maliu ma le toetu mai o Iesu Keriso ua saunia le ala e tuuina ai e le Atua lona lava agaga i totonu ia te oe. O lea la, e mafai ona e faapei o ia I upu ma galuega. E le o se mea matagofie tele lea?

I lou tulaga o le afafine poo le atalii o le Atua, e te tauave le Atua I totonu ia te oe, o lona uiga e lē pei oe o le toatele o tagata. O oe o le malumalu o le Atua. Fai mai le 1 Korinito 3:16 “Tou te lē o iloa ‘ea o le malumalu ‘outou o le Atua, o lo‘o nofo fo‘i le Agaga o le Atua i totonu ‘iā te ‘outou?”

I lou tulaga o le malumalu o le Atua, o lona uiga o soo se mea e lē i le Atua e lē tatau ona ia te oe. E ui na maliu Elisaia I se gasegase i lona toeaina (2 Tupu 13:14), peitai ona o loo e tauaveina le Atua I totonu ia te oe, e le tatau ona iai se ma’i I lou tino. E ui na iai le faafitauli o le loto ita ia Mose lea na lē mafai ai ona ia ulufale I le nuu na folafolaina, peitai e lē mafai ona taofia ai oe aua o loo soifua le Atua I totonu ia te oe. E te fua mai fua o Agaga Paia , ma e leai se amio leaga poo se vaivaiga e maua ia te oe. Fai mai le Tusi Paia i le 1 Ioane 4:4 “O ‘outou, le fānau e, mai le Atua lava ‘outou, ‘ua ‘outou manumālō fo‘i ‘iā te i latou, auā e sili o ia ‘ua ‘iā te ‘outou, i lē ‘ua i le lalolagi.”

‭‭

E te manumalo aua o le Atua Malosi e alofa ia te oe, ma o loo afio o ia I totonu ia te oe. Fai mai le Roma 8:37 “A ‘ua tatou manumālō a‘ia‘i i nei mea uma lava, ‘ona o ia ‘ua alofa mai ‘iā te i tatou.”

‭‭

Tusa poo le a lava e faasagatau atu e le tiapolo ia te oe, a tumau Agaga Paia I totonu ia te oe, e te manumalo lava. Aua e te toilalo I le fefe; ia manatua o le Atua Silisili Ese o loo afio I totonu ia te oe, aua foi e lē taitai faiaina I se taua, e te maua le manumalo I soo se vaega o lou olaga. 

Tatalo

Faafetai Iesu mo le auina mai o Agaga Paia e afio I totonu ia te a’u, I le suafa o Iesu, Amene.  

OPEN HEAVENS

MATALA LE LAGI MO LE ASO LUA 24 TESEMA 2024

(tusia e Pastor EA Adeboye)

Manatu Autu: O le mafuaaga o lona fanau mai 2 (The reason for His birth 2)

Tauloto -Tusi Paia– Eperu 2:17 “O le mea lea ‘ua tatau ai ‘ina ‘ia ‘avea o ia ‘ia fa‘apei o ona uso i mea uma lava ‘ina ‘ia faia o ia ma ositaulaga sili e alofa ma fa‘amaoni i mea a le Atua, ‘ina ‘ia faia e ia se togiola mo agasala a le nu‘u.”

Faitauga – Tusi Paia – 1 Ioane 2:1-6

O le aso, e fa’aauau ai le a’oa’oga sa ou amataina ananafi, o le mafua’aga o le fanau mai o Iesu Keriso. O loo fa’amalamalama mai e le Tusi Pa’ia, o le Atua na afio mai, ua liu tino tagata ma soifua ma tagata (Ioane 1:14), ma o le tulaga matagofie, sa ia lagonaina tigā e pei o le tagata. E iai le alaga’upu o lo o faapea mai: “O le tagata na te se’eina se’evae, nā o ia e silafia vaega e fufusi.” Sa se’e e Iesu Keriso o tatou se’evae ma e na te silafia lelei o tatou lagona i so’o se taimi. Fai mai le Eperu 4:15 “Auā e lē ‘iā te i tatou se ositaulaga sili e lē mafaia ‘ona tigā alofa fa‘atasi ma i tatou i o tatou vaivai, a ‘ua fa‘aosoosoina o ia i mea uma pei o i tatou, a ‘ua leai se agasala ‘iā te ia.”

‭‭

O le ta’ita’i lelei e mafai ona e mauaina, o se ta’ita’i e fai ma fa’ata’ita’iga lelei mo isi. O ituaiga ta’ita’i ia, e le gata ina fa’atonu mai, ae latou te galulue fa’atasi ma ē o lo’o latou taitaia. O Iesu Keriso na afio mai i le lalolagi ma liutino tagata, ina ia lagona tonu o tatou lagona. Sa ia uia faaosoosoga e pei ona tatou ui ai, ma ua ia aumai se fa’ataitaiga, e mafai ona tatou ola ai e aunoa ma se agasala.

I le avea o se tagata sa uia mea uma o loo tatou ui ai, e talafeagai lona avea ma sooupu mo i tatou, ma finau i le Atua le Tama, ma a tatou pauū atu i le agasala, o lo o avea o ia ma puluvaga i le Atua e toe faatutū  i tatou (1 Ioane 2:1). E maoa’e le maualuga o le alofa ua faaalia! O le mafua’aga lena i le tusi o Faaaliga 5:1-10, e nā o ia e tatau ona tatala o tusi ta’ai, ona o le galuega togiola na ia saunia ina ia faamautinoa le tusia o lou igoa i le Tusi o le Ola.

Le ‘au pele, aua e te savalia to’atasi le savaliga a le au Kerisiano. Ia e faalagolago i le Atua i taimi uma lava. I taimi ua e lagona ai faaosoosoga, ia e manatua sa ia uia foi na fa’aosoosoga. Ia e fa’alatalata i le nofoaali’i o le alofa tunoa ma le loto toa, ma ia e ta’u atu ia te ia e te manaomia le fesoasoani (Eperu 4:16). E le o ia o se taitai e fulitua ia te oe. Sa ia faapea mai e te ola fa’apa’iaina, aua sa fa’aosoosoina foi o ia, ma sa ia manumalo ai, o lona uiga, e mafai ona ia fesoasoani atu ia te oe e te manumalo ai. E faigofie i se tagata o se ‘auva’a ona fa’auli se va’a i totonu o se afā, pe a fai o fautuaina o ia e se auvaa ua iai poto masani ona sa folau muamua i taimi o afā. 

Faataga Iesu e a’oa’oina oe i le auala e te ola ai e lē faia le agasala, ma a’o ia a’oa’oina oe, ia e mautinoa o lo’o e faalogo ia te ia, ma usita’i iai. E mautinoa lelei e te manumalo ai!

Tatalo 

Le Alii Iesu e, ou te lafoai lou ola ia te oe, fa’amolemole, fesoasoani mai ia te a’u ia ou manumalo I so’o se fa’aosoosoga e o’o mai ia te a’u, I le suafa o Iesu, Amene.