Samoan Devotional

OPEN HEAVENS

MATALA LE LAGI MO LE ASO SA 12 IANUARI  2025

(tusia e Pastor EA Adeboye)

Manatu Autu: Tosina mai o faamanuiaga a le Atua (Attract Gods blessings)

Tauloto -Tusi Paia–Roma 4:7 “Amu‘ia e ‘ua fa‘amāgaloina o latou solitulafono, ma ‘ua ufitia a latou agasala.”

‭‭

Faitauga – Tusi Paia – Salamo 112:1-10

O le aso ananafi na ou faamatala le matuiā o se fetuu mai le Atua ma auala e te alo ese mamao mai ai. E pei a ona malosi o se fetuu e faapena foi le matua malosi o se faamanuiaga mai le Atua. O se mea pito sili ona  lelei I se tagata o le faamanuia iai o le Atua. A faamanuia le Atua ia te oe, o malosiaga uma I le lagi, luga o le lalolagi ma lalo ifo o le fogaeleele e galulue mo lou lelei. E le gata I lea, e lē faaopoopoina iai se tigā (Faataoto 10:22). 

E tele fuaitau i le Tusi Paia e talanoa mai I faamanuiaga a le Atua ma auala e tosina mai ai ia te oe. Peitai, o le tele o kerisiano e nā o le faitau lava iai ma folafola mo I latou e aunoa ma le vaavaai lelei poo a mea e tatau ona faatino e tosina mai ai nei faamanuiaga. Ona o lo’u aoaoina I le matematika, a ou vaai i se faamanuiaga I le Tusi Paia, ou te uluai naunau lava e fia iloa poo a tapulaa e  manaomia e maua ai ia faamanuiaga. Ou te iloa lelei, a lē faamalieina tapulaa, tusa poo le a lou galue malosi, e lē mafai ona maua le taunuuga o loo manao iai. O lea la, e ave la’u faamuamua I tapulaa e manaomia ona faamalieina mo faamanuiaga a le Atua e sili atu I lo’u fia iloa o faamanuiaga. 

I le Teuteronome 28:1-14, e tumu I faamanuiaga a le Atua ua folafolaina mo I tatou. Peitai, a e suesue lelei I nei fuaitau, e te iloa ai o tapulaa e maua ai ia faamanuiaga a le Atua, o le matuā faalogo i le siufofoga o le Upu a le Atua. A silasila le Atua ia te oe ma e leai se agasala, ua e manuia. 

“Amu‘ia le tagata e lē ta‘usalaina o ia e le Ali‘i.” Roma‬ ‭4‬:‭8‬ 

A fia tosina mai faamanuiaga a le Atua, e tatau ona e ola faapaiaina. E lē mafai ona e soifua e tetee i le upu a le Atua ae ete manatu e faamanuia pea o ia ia te oe. A amata ona e ola faapaiaina, e faapena loa ona e tofo i le uiga moni o faamanuiaga a le Atua. Sa ou manatu o loo ou ola i se olaga manuia ae ou te lei feiloai ma Keriso. Sa ou galue o se faiaoga i se Iunivesite ma sa sologa lelei a’u taumafaiga i la’u galuega. Peitai, tusa poo le a le telē o lo’u totogi, e afa ane le masina e sosoo ai ua maea, ma ua amata ona aitalafu se tupe mai la’u avetaavale sei utu ai la’u taavale. Mulimuli ane ua ma feiloai ma Keriso ma amata loa ona ou ola faapaiaina. Ua ia faamanuia ia te a’u, ma ua suia vave, o lo’u totogi lea sa masani ona lē lava ai la’u faasoa, ua lava ma totoe mo a’u. 

Le au pele e, amata ona e ola faapaiaina i le asō, ona e vaai lea i le uiga moni o le olaga e manuia. A fia tosina mai faamanuiaga a le Atua, ola faapaiaina, i le suafa o Iesu, Amene.    

OPEN HEAVENS

MATALA LE LAGI MO LE ASO TOONAI 11 IANUARI  2025

(tusia e Pastor EA Adeboye)

Manatu Autu: E tatau ona e alo ese ma fetuu 2 (You must avoid curses 2)

Tauloto -Tusi Paia–Numera 23:8 “Pe fa‘apefea ‘ona ‘ou fetu‘u i lē ‘ua lē fetu‘uina e le Atua? pe fa‘apefea fo‘i ‘ona ‘ou fa‘afano i lē ‘ua lē fa‘afanoa e le ALI‘I?”

‭‭

Faitauga – Tusi Paia – Kenese 3:6-19

Afai e te suesue i le Tusi Paia, e te iloa ai aafiaga o fetuu a le Atua I luga o se tagata po’o se vaega o tagata. Afai e te poto, e te faia mea uma ia faamautinoa e leai se mea e toatamai ai le Atua ia te oe. O le malosi o le fetuu e fua I le pule ma le malosiaga I le agaga a le tagata o loo faia le fetuu poo le faamanuiaga. Ona o le Atua e Silisili ese I lō seisi lava tagata, o se fetuu mai ia te ia e matuā malosi e leai se mea e mafai ona toe soloia, sei vagana o ia lava. Ona e leai se fofo o se fetuu e faia e le Atua, o soo se tagata poto e na te faia mea uma e  ‘alo ese ai ma se fetuu a le Atua. 

Ina ua maea ona fetuu e le Atua le fogaeleele i le paū ai o Atamu (Kenese 3:17), na amata ai ona matuā galue le tagata I lona atinaeina ae itiiti le taui e maua. Ou te tatalo ia e maua le nofo tupu a  Keriso mo le afe tausaga, aua e oo atu I lea taimi, e maua fua o fuata i masina taitasi ae lē toe iai ni fua o loo tatou maua I le taimi nei (Faaaliga 22:2-3). 

A e faitau I le tala ia Kaino I le Kenese 4:9-15, e te iloa ai o le taimi lava na fetuu ai e le Atua ia Kaino, na taumafai tagata uma na la fetaiai e faaoolima ia te ia, e lē tau faaosoosoina. Afai e te faitau I le Tusi Paia ae e tau atu I se mea  e faasā e le Atua poo se mea foi e o’o mai ai se fetuu, e tatau ona e alo ese mamao mai lea mea. Mo se faataitaiga, na ia fetalai I le Malaki 3:8-10, o I latou e le totogiina sefuluai o lo’o latou gaoi I le Atua, ma latou maua se fetuu mai le Atua. Tusa pe leai se folafolaga o faamanuiaga e maua I le totogiina o sefuluai, o le fetuu e mafai ona taitaiina le tagata e totogi sefuluai. E le gata I lea, I le Teuteronome 28:15-20, na fetalai le Atua afai e lē faalogo le fanauga a Isaraelu I Lona siufofoga, ma usisuitai I ana poloaiga, e iai fetuu o le a o’o mai iai latou ma e o’o ina manumalo iai latou. O le mafuaaga lea e tatau ai ona e faamautinoaina o loo e ola  ma soifua  I se olaga e usiusitai i tulafono a le Atua ma ana poloaiga. 

O le vaega mulimuli, a e feiloai ma se kerisiano moni, o se suli o Aperaamo e ala i le faatuatua, aua e te taumafai e tuu se fetuu I luga o lea tagata aua o le taui o le a fetuu oe e le Atua (Kenese 12:3). Le au pele e, o fetuu a le Atua e matuā matuiā ma leaga, ma e lē mafai e se tagata ona toe suia seia vagana ua faaalia le alofa mutimutivale o le Atua ia te oe. Ia e faia mea uma e alo ese mamao ai ma fetuu a le Atua, I le suafa o Iesu, Amene. 

OPEN HEAVENS

MATALA LE LAGI MO LE ASO FARAILE 10 IANUARI  2025

(tusia e Pastor EA Adeboye)

Manatu Autu: E tatau ona e alo ese ma fetuu 1 (You must avoid curses 1)

Tauloto -Tusi Paia–1 Tesalonia 5:22 “Ia mamao ‘outou ma mea leaga ‘ese‘ese uma lava.”

Faitauga – Tusi Paia – Kenese 4:3-16

O le fetu’u o se valaau i agaga ma malosiaga i le agaga e galulue e tetee i se tagata poo se vaega o tagata, ae o se fetu’u mai le lagi o se valaau I malosiaga uma I le lagi, lalolagi ma lalo o le lalolagi. Tusa po’o le a lou malosi, e mautinoa e te lē manao I ni malosiaga i le agaga e galulue e faasagatau ia te oe, o le tulaga lea e tatau ai ona e ‘alo ese ma fetu’u. 

I le Faamasino 9:5-57, ua tatou vaai ai  I se fetu’u na aafia uma ai se nuu atoa. Na faasaoina Iotama mai le fasiotia e lona uso o Apimeleko, o lē na fasiotia ona uso e 70. Na tali mai Iotama I le faia o se fetuu ia Apimeleko ma tagata uma o Sekema na fesoasoani ia te ia. I le tolu tausaga mulimuli ane, na faataga e le Atua se agaga leaga e faataunuu le fetuu ma ua matuā vevesi ma faaumatia le nuu, ma oo ai le oti ia Apimeleko .

Na ou faalogo I se tala ao ou laiititi na fesoasoani i le fesuiaiga malie o lau amio ao ou tuputupu a’e. Na ripotia mai se alii talavou na alu I  se faigamalaga ma na ia pasia se toeaina ma tei a lea ua ata aamu I si toeaina e leai se mafuaaga. Na tali mai le toeaina ma faapea mai, ‘ou te ono vaivai e lē mafaia se mea, ae o le ato e le malie I le vai’. Ina ua maea ona fai lana tala, na ia savali ese. Ua tei lenei alii talavou ua lagona lona matuā fia inu, o lea na faatopetope atu I se fale lata ane sei inu ona toe faaauau lea o le malaga.  E lei leva ae toe fiainu foi ma toe alu foi I seisi fale sei inu. E lei leva ae toe fia inu foi ma ina ua maea le tele o taimi na taofi ai le malaga sei inu, na manatu nisi e iai se mea ua tupu. Ua fesiligia le alii talavou ona ia ta’u atu lea le upu a le toeaina na fai, na vave ona feei mai, ‘auoi, o le fetuu’. Ua latou sue ma maua le toeaina ma faatoese iai ma latou ole atu e faamagalo le alii talavou. Na malie iai le toeaina, ma faasaoloto o ia mai le fetuu, ma na tea ai lona fiainu I le taimi lava lena.

Lē au pele e, ‘alo ese mai amioga e oo mai ai fetuu. Ia faaaloalo I tagata matutua ma aua le gaoi pe faatigā i Isi tagata. A faapea e leai se mea sese na e faia ae fetuu oe ese tagata, e lē o’o aua o se fetuu e leai sona mafuaaga e lē taunuu (Faataoto 26:2). 

Afai e te suesue lelei I lau Tusi Paia, e te iloa ai, e iai lava amioga ma mea e faia e o’o mai ai fetuu mai le Atua, alo ese mamao mai ai e pei o se faama’i. Afai o se fetuu a se tagata e tele lona mana ma le aafiaga e pei I le tala na ou faamatalaina, e lē sili atu ea le leaga pe a fetuu e le Atua? O le a faaauau ona ou talanoa atu I le ‘alo ese mai fetuu taeao. 

Afai o iai se fetuu o loo galue I lou olaga I le taimi nei, ou te folafola atu, e faaleaogāina i le asō i le suafa o Iesu. Ia e poto ma ‘alo ese mai so’o se mea e o’o mai ai fetuu, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 9 IANUARI  2025

(tusia e Pastor EA Adeboye)

Manatu Autu: Taumafai ma tulei pea (Keep pushing)

Tauloto -Tusi Paia–2 Tesalonia 3:13 “A o ‘outou le ‘au uso e, ‘aua ne‘i ‘outou fa‘avaivai i le amio lelei.”

‭‭

Faitauga – Tusi Paia – Luka 9:57-62

Ao faatiga se fafine e faatali ai le taimi e ola ai, e manaomia lona taumafai ma tulei mai o le pepe i fafo. Poo le a le umi e taumafai ai ona tulei mai le pepe, e faia pea seia sau le pepe i fafo. O le taimi mulimuli lava e tulei ai ma sau i fafo le pepe, e suia o ia I se tagata fou, ua avea ma se tinā.  

I lou tulaga o se kerisiano, e faaauau ona tulei pea seia e maua le tino fou ia Keriso. Tusa poo le a le maualuga o mea ua e ausia i taimi ua tuanai, e tatau ona e tulei pea seia e vaai i le mamalu o le Alii (Filipi 3:13-14). E toatele tagata e amata lelei ma manuia, e tele mea ua latou ausia mo le Atua, peitai, ao faagasolo pea le olaga, ua taofia le tulei pea. Ua taofia le toe anapogi ma tatalo e pei ona  masani ai, ma ua latou misia le mamalu semanū latou te maua. 

I se vaitau sa matuā sauaina ai kerisiano I Rusia, na iai ni tama se toalima na saisai mai e fitafita ma ua tuu I le vai e aisā I le ogatotonu o le vaitau malulū. Na faia se taigaafi a fitafita e faamafanafana ai ma fai I nei tama, o le tagata e na te faafitia Iesu, e mafai ona sau I le afi e faamafanafana ai. Ua amata ona malō nei tama I le aisa ma iai se tasi o latou ua faapea atu ua ia sauni e faafiti ia Iesu. Ao tu atu le fitafita e aumai o ia, na faapupula e le Atua ona mata ma ia vaaia ni agelu se toalima o loo latou uuina ni pale I luga o nei tama taitoatasi. Peitai o le agelu I luga o le tama ua faafitia Iesu ua faliu e toe foi ma le pale. Sa tigaina lenei tama mo Iesu I se taimi umi, peitai I le iuga, ua ia faavaivai ma ua misia lona pale. 

Le au pele e, e le taua poo le a le tele o mea ua e faia mo le Atua, afai e te faavaivai i le taimi nei, o le a e misia lou pale.  Aua e te faatagaina tuinanau o lenei olaga e faalavelave ia te oe, aua e te faiaina I le faaosoosoga a le agasala e aveesea oe mai le amiotonu. Tulei ia faifaipea e ala I le tatalo, suesue I lau Tusi Paia, anapogi, auai I mafutaga ma ola paia. Aua e te faavaivai I le amiolelei. 

I le Filipi 3:13, fai mai le Aposetolo o Paulo,   “Le ‘au uso e, ‘ou te lē manatu ‘ua ‘ou maua, a o le mea e tasi ‘ou te faia, ‘ou te fa‘agalogalo i mea ‘ua tuana‘i, ‘ou te momo‘e punou a‘i fo‘i i mea o lumana‘i.”

‭‭Faagalogalo mea ua e ausia I taimi ua tuanai, e lē taua tele pe a fua i mea e tatau ona e faia mo le Atua i le lumanai. Ou te tatalo, ia e siitia pea I luga seia o’o I le iuga, I Le suafa o Iesu. 

Tatalo, 

Tamā, fesoasoani mai ina ia tumau ona ou tulai pea seia ou feiloai ma oe I lou mamalu, I le suafa o Iesu, Amene.  

OPEN HEAVENS

MATALA LE LAGI MO LE ASO LULU 08 IANUARI  2025

(tusia e Pastor EA Adeboye)

Manatu Autu: Tupu I le poto (Growing in wisdom)

Tauloto -Tusi Paia–Luka 2:52 “Ua tupu le poto ma le tino o Iesu, ‘ua alofagia o ia e le Atua ‘atoa ma tagata.”

‭‭

Faitauga – Tusi Paia – Iopu 32:4-9

O le umi na e soifua I le lalolagi nei, e tatau foi la ona tupu lou poto. O le mafuaaga lea e lē taitai fesili se tagata poo le a lou laitiiti, ae fesili lava poo le a lou matua. O le mea moni, o loo latou fesili poo le a telē o lou poto ma le iloa ua maua I tausaga ua e maua. E o gatasi lelei lea tulaga ma le Iopu 12:12 o loo faapea mai: “O lo‘o i ai le poto i ē ‘ua toeaina; o le fa‘alevaleva fo‘i o aso e i ai le fa‘autauta.”

‭‭

I le matou nuu o Yoruba I Aferika, afai o amio a tagata e lē atagia ai o latou tausaga, e ta’ua i latou o tagata ua  ‘matutua ae leai se faautauta, leai se a’oa’oga e maua mai ai’. Afai e matutua ane lava tagata ae o loo faatamaitiiti pea mafaufau ma faataaalo e aunoa ma se faamoemoega autu, e taua i latou o tagata matutua e leai se a’oa’oga e maua mai ai. Ia aua lava nei avea oe o se tagata matua e leai se a’oa’oga e maua mai ai, I le suafa o Iesu. 

Fai mai le Faataoto 22:15 ua fusifusia le valea i le loto o le tama. O lona uiga e amata uma tagata i le valea. O se tulaga taua lenei i le olaga o loo tatou ola ai nei, o le atalii o se auauna ma le atalii o se palemia e amata tutusa o la olaga o ni pepe fou. Peitai, o faaiuga la te faia a’o faagasolo le olaga nei e fua iai le i’uga e taunuu iai o la olaga. 

Mo le uluai 18 tausaga o lo’u olaga, sa ou savali e leai ni seevae. A’o le asō, I le alofa tunoa o le Atua, e mafai ona suia a’u pea seevae I aso taitasi o le tausaga atoa pe a ou manao iai. O le mafuaaga, o loo ma savavali ma le Atua mai le vavau ma o lona Agaga Paia e galue ma foai mai le poto ia te au ua ou faaaogaina i aso uma ina ia siitia pea lo’u olaga. Tusa poo le a lou matua, e mafai ona e savali ma le poto pe afai e te usitai I faatonuga ma taitaiga a Agaga Paia, o ia o le puna o le poto atoa ma le malamalama (Kolose 2:1-3). 

A’o ou laitiiti, sa iai so’u uso matua e umī ma malosi. E iai le aso na iai lana mea sese na faia ma ua sasa e lo’u tamā, ua tagi pei se pepe. Ina ua ou vaai atu i le tagi a lo’u uso e ese ma le malosi, na fai la’u faaiuga ou te lē faia se mea e tasi e ono sasa ai a’u e lo’u tamā. Afai e te poto, e te lē faia se mea sēsē i le ola nei, o le a e iloa tulaga e te ono lamatia ai ma alu ese mamao mai ai. 

Afai e te iloa le taui o se mea ae e faia lava, o oe o se tagata matua e leai se faautauta. O le faia o le agasala ma musu e salamō e oo atu ai i le tulaga ua tuueseeseina ma le Atua e faavavau. Afai e te poto, e te filifili e ola faapaiaina aua e pau lea o le ala e te iloa atu ai le Atua (Eperu 12:14). 

Le au pele e, afai e te lei poto i le faia o au faaiuga i lou olaga e oo mai i le taimi nei, ua oo i le taimi e te gauai ai ia Agaga Paia ma e usitai I lana taitaiga. O e tupu ea I le poto i le fesoasoani mai o Agaga Paia? I le suafa o Iesu, Amene. 

OPEN HEAVENS

MATALA LE LAGI MO LE ASO LUA 7 IANUARI  2025

(tusia e Pastor EA Adeboye)

Manatu Autu: Pe a siitia e le Atua (When God promotes)

Tauloto -Tusi Paia–1 Timoteo 3:1 “O le ‘upu moni lenei, ‘āfai e naunau se tasi i le faiva o le epikopō, e mana‘o o ia i le galuega lelei.”

‭

‭‭

Faitauga – Tusi Paia – 1 Tesalonia 2: 1-10

A ou vaai I kerisiano o fiafia ona ua siitia i latou I tulaga maualuluga i le malo o le Atua, ou te manatu poo latou iloa ma malamalama i le uiga moni o le auauna i le Atua. A siitia se tagata mai le taitaia o ni tagata e 10 i le taitaia o tagata e 100 i le malo o le Atua, e tatau ona faautauta. Auā foi o temoni o le a fuafuaina e le fili mo latou o le a siitia i le aofai faapea le tulaga. E le gata I lea, o le a tali o ia I le Atua mo nei tagata. E faigata lou tali i le Atua mo le tagata e toatasi ae sili atu le faigata i le toatele atu o tagata. 

Ina ua siitia Iosua e avea ma taitai o le fanauga a  Isaraelu, na faatonu faafia e le Atua ia aua nei mata’u ma ia lototele. O le a la le mafuaaga e fiafia ai tagata pe a siitia tulaga ma galuega latou te faia I le malo o le Atua? E tupu ea lea tulaga ona e lē o taulai la latou vaai i le galuega  ae o loo faamuamua le tulaga tauoloa ma faamanuiaga e maua mai i tulaga siitia?

A tuuina e le Atua oe e taitai ma vaaia ni agaga o tagata, e tatau ona e iloa a maea le ola nei i le lalolagi, o le a e avatu i le Atua faamatalaga ma tali i agaga uma na tuuina atu I lalo o lau vaavaaiga. I le Ioane 17:12, na fetalai Iesu “‘Ua ‘ou tausia i latou i lou suafa, ‘ina ‘ua ‘ou ‘iā te i latou i le lalolagi; ‘ua ‘ou leoleo i ē na e foa‘i mai ‘iā te a‘u, e leai fo‘i se isi o latou ‘ua fano, na o le tagata o le malaia, ‘ia taunu‘u ai le Tusi.”

‭‭

Afai e tausia ma tali Iesu i le Atua i tagata uma na ia vaaia a’o iai i le lalolagi, e lē tatau ea ona faapea ona so’o? O le tulaga lea na faapea mai ai Iakopo, o le faamasinoga o taitai I malō o le Atua e sili atu I isi uma tagata. O lona uiga, o le toatele o tagata e te a’oa’oina i le upu a le Atua ma e faatonuina, o le toatele foi lena o tagata e manaomia lou tausia ma tali ai I le Atua. O lona uiga moni, a siitia oe e le Atua I lana galuega, e tatau ona e galue, anapogi ma siitia le tulaga tatalo. 

Ao ou faifeau I Nigeria i ni nai tagata toalaiti, sa masani ona ou moe i le po atoa. I lea vaitau, e iai se aso na ou vaai ai I lo’u tamā faaleagaga o tatalo I le po atoa ma ua ou popole. I le taeao na sosoo ai, na ou fesili iai poo lelei mea uma. Ua ata ma fai mai ia te au e iai lava le taimi i le lumanai ou te malamalama ai. O lea la ua ou malamalama auā foi ua avea le tatalo i le po atoa ma a’u masani. 

A e auauna i le Atua, e na te siitia oe, peitai, e tatau ona e faaaogaina le avanoa lea e siitia ai le galue malosi. O le uiga o le siitia o tulaga i le malo o le Atua, e manaomia le siitia o galuega ma mea e faitaulaga ai lou olaga, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 6 IANUARI  2025

(tusia e Pastor EA Adeboye)

Manatu Autu: Pe a valaau le Atua (When God calls)

Tauloto -Tusi Paia– Luka 9:23 “Ua fetalai atu Iesu i tagata uma, “A fia mulimuli mai se tasi ‘iā te a‘u, ‘ia fa‘afiti o ia ‘iā te ia, a ‘ia ‘ave e ia lona satauro i aso fai so‘o, i le mulimuli mai ai ‘iā te a‘u.”

‭‭

Faitauga – Tusi Paia – Mataio 8:19-23

O aso nei, e toatele e manatu a valaau le Atua iai latou o se avanoa e siitia ai le tulaga i le nuu ma le atunuu. E ui e tauia e le Atua i latou e galulue malosi e fiafia iai le Atua e ala I le pule ma le tamaoaiga, o lana valaau mo le galuega o se valaau ia avatu le faamuamua ia te ia I mea uma. I le Mataio 19:16-24, na sau se tagata mauoa o lē sa faaeteete ma faamaoni i le tausia o tulafono a le Atua ma faapea atu ia Iesu, ‘ Le Alii e, ua ou usitaia uma au poloaiga, sa ou tausi i au tulafono, peitai ou te manatu ma iloa e iai lava le mea o loo misi. O le a le vaega o loo misi?’ Na tali atu Iesu e faapea, “Āfai ‘e te mana‘o ‘ina ‘ia ‘ato‘atoa ‘ona lelei o lau amio, ‘ia e alu ma e fa‘atau atu au mea, i le e avatu ai i ē matitiva; ‘ona ‘iā te oe lea o le faulaiga‘oloa i le lagi, i le e sau ma mulimuli mai ‘iā te a‘u.” Mataio‬ ‭19‬:‭21‬ . Ina ua faalogo iai, ua faanoanoa ona e tele le oa ma le tamaoaiga ia te ia, o mea o loo ave iai lana faamuamua i lō Iesu. Le au pele e, a valaau le Atua ia te oe, o le mulimuli ia te ia e tatau ona e tulimataia, ma e tatau ona saunia lou tagata e lafoai soo se mea e fai atu ai ia te oe, e aofia ai lou ola (Luka 14:26). 

O I latou e faalogo i le valaau a le Atua e tatau ona faamoemoe tasi  i le Atua mo mea uma. O le mafuaaga lea i le Numera 18:20,  na fetalai le Atua ia Arona e leai sona tofi i le fanauga a Isaraelu aua o le a avea le Atua ma ona tofi. I le Esekielu 44:28, na fetalai le Atua e avea o ia ma tofi o ana ositaulaga sili. 

E lē tetee le Atua i lou faigaluega i galuega i le lalolagi (e le aofia ai galuega na faatonu oe e aua le faia), peitai e finagalo o ia ia e faamoemoe tau o ia mo mea uma. A valaau le Atua ia te oe, tusa poo le a le mauoa, tulaga pule ma le tauoloa o loo e iai, e na te ave muamua lava oe i le vao e faamautinoa ai, pe moni lou fia auauna ia te ia ae lē faapea o e auauna ona o mea e maua mai ia te ia. Afai e leai sou onosai I Le vaitau e te ui ai I le vao, ma ua amata ona e faamuamua le tamaoaiga, e lē talafeagai oe mo le valaau a le Atua. O le tulaga lea e tele ai tatou faifeau a le Atua e pei e afa afa, ao saunia i latou e le Atua i le vao, ua latou tetee atu i le Atua ma ua sailia Isi ituaiga galuega. 

O I latou e naunau e faaaogaina e le Atua, e tatau ona gauai ma faatuatua ia te ia ma o latou loto atoa. Fai mai le Eperu 11:6 , a leai se faatuatua, e faigata ona fiafia mai le Atua. O le faatuatua e fausia pe afai e te lafoai mea uma o loo e faalagolago iai ae taulai lau silasila i le Atua, ia na o ia lava. O le talalelei lenei, a silasila mai le Atua ua mautu lou faatuatua na o ia lava, e amata loa ona ia siitia oe I luga, ma a siitia oe e le Atua, e leai se mea e gata ai. O I latou e faaaogaina e le Atua I galuega tetele,  e tatau ona latou matuā gauai e faatuatua I le Atua ma o latou loto atoa, I le suafa o Iesu, Amene. 

OPEN HEAVENS

MATALA LE LAGI MO LE ASO SA 5 IANUARI  2025

(tusia e Pastor EA Adeboye)

Manatu Autu: O ē valaau e le Atua (Whom God calls)

Tauloto -Tusi Paia– Roma 12:11 “Aua le fa‘avaivai i le filigā, ‘ia malosi le loto, ‘ia ‘au‘auna i le Ali‘i.”

Faitauga – Tusi Paia – Faataoto 6:6-11

E iai lava tagata ua faapea mai na valaau le Atua iai latou, peitai a ē vaavaai lelei iai latou, e te iloa ai, e pau le ala u ō ai I le galuega a le Atua, ona ua lē manuia i mea uma sa iai. O le asō, o le a ou faasoa atu i mea e silasila iai le Atua I tagata e na te valaau iai i lana galuega. 

O soo se tagata e valaau iai le Atua e lē paiē. E lē valaau le Atua i ni tagata paiē. Afai e paiē se tagata, e lē aogā o ia ia te ia lava. A e silasila I tagata uma na valaau iai le Atua i le Tusi Paia, o tagata sa tele galuega na latou faia. Na valaau le Atua ia Peteru ina ua maea ona fagota i le po atoa, e lē galulue ni tagata paiē i le po. Ina ua maua e Elisaia le valaau a le Atua na tauala atu ia Elia, na maua o loo galue I le faatoaga e suatia le eleele  ma povi ta’i lua e sefulu male lua i ona luma (1 Tupu 19:19).     

E galue le Atua I tapulaa na ia fetalai ai I le Luka 16:10 “O lē fa‘amaoni i le mea itiiti, e fa‘amaoni fo‘i o ia i mea e tele; o lē amioletonu i le mea itiiti, e amioletonu fo‘i o ia i mea e tele.”

‭‭

Afai e te lē o faamaoni I galuega a le lalolagi o loo e faia i le taimi nei, e lē tuuina atu e le Atua ni agaga i ou lima. Na fesili Iesu i le Mareko 8:36, “Auā se a le aogā i le tagata, pe ‘āfai na te maua le lalolagi uma, ‘ae māumau lona ola?”

I nisi faaupuga, o loo faapea mai o le agaga e tasi e matuā taua e sili atu i le lalolagi atoa. O lona uiga, e taua tele agaga, ma e lē mafai ona ia tuuina atu i lima o tagata paiē. 

E lē paiē le Atua. Na fetalai Iesu i le Ioane 5:17, e galue lona Tamā ma e galue foi o ia. Auā o loo faapea mai le Amosa 3:3, e lē mafai ona savavali tagata e toalua seia ‘au faatasi, e lē mafai foi la ona e galue ma le Atua pe afai e te paiē. 

O tagata paiē e naunau e auauna I le Atua I lana galuega, o tagata ia e mananao e aai e aunoa ma se galuega, e matua tetee lea vaega I le finagalo o le Atua. Fai mai le Tesalonia 3:10, o i latou e leai se galuega e faia, e lē tatau ona aai. Ina ua maea ona faia e le Atua le tagata, o le mea muamua na ia tuuina atu iai, o galuega e faatino.     

“Ua ‘ave fo‘i le tagata e le ALI‘I le Atua ma ‘ua tu‘u ‘iā te ia i le fa‘ato‘aga i Etena e galue ai ma leoleo ai.” Kenese 2:15

O le fuaitau o loo taua I luga e faaalia ai le taua o le galue i le Atua. Le au pele e, o leisi taimi e te vaai ai i tagata paiē o faapea mai na valaau le Atua iai latou e galulue i lana galuega, ia e alu ese mamao ma i latou aua e lē  valaau le Atua ini tagata paiē, I le suafa o Iesu, Amene. 

OPEN HEAVENS

MATALA LE LAGI MO LE ASO TOONAI 4 IANUARI  2025

(tusia e Pastor EA Adeboye)

Manatu Autu: E fou mea uma 2 (All things new 2)

Tauloto -Tusi Paia– Salamo 40:3 “Ua tu‘uina mai e ia le pese fou i lo‘u gutu, o le vi‘iga i lo tatou Atua; e iloa ai e le to‘atele, e matata‘u fo‘i i latou ma latou fa‘atuatua i le ALI‘I.”

Faitauga – Tusi Paia – Isaia 43:18-19

O le asō, e faaiu atu ai le mataupu i le lafoai ma aveesea lea o mea tuai e taofia le Atua mai le faia o mea fou i lou olaga. Ou te tatalo ia taofia soo se mea e faalavelave i mea fou ua fuafuaina e le Atua mo oe i lenei tausaga, I le suafa o Iesu. 

Mo le 430 tausaga, na nofo pologa le fanauga a Isaraelu i Aikupito (Esoto 12:40). Sa pologa I lalo o pulega a Farao ma le au Aikupito seia oo i le po e tasi, na finagalo le Atua e faasaoloto I latou. Na faia e le Atua se mea fou, ma ua fanau mai se atunuu i le aso e tasi. E lē saisaitia le Atua i se taimi po’o seisi lava mea i lo tatou siomaga. Fai mai le Ieremia 32:27, e leai se mea e faigata ia te ia. 

E mafai e le Atua ona faia ni mea e uiga ese e maofa ai tagata i lona ofoofogia. O le siomaga o tagata e mafai ona e faapea e leai se mea fou I lalo o le la, e afio le Atua I le lagi ma e faia soo se mea e finagalo iai o ia (Salamo 115:3).  

O lenei, a fetalai mai le Atua o le a ia faia ia fou mea uma, e iai lava tulaga e tatau ona faatino e le tagata o loo sauni e ulu atu i lenei faafouina. E pei ona ou taua ananafi, e lē tuuina e le Atua uaina tuai i fagupa’u fou (Luka 5:37-39). O lona uiga afai o le a e ulu atu I mea ua faafouina e le Atua mo oe i lenei tausaga, e tatau ona e sauni e toe faatulaga lelei lou tagata. 

O le fesili, e faapefea ona e toe faatulaga lou tagata mo mea fou o loo finagalo le Atua e faia I lou olaga? E mafai ona toe faatulaga I le tatalo faifaipea. Na faamatala e Iesu le tala I le fafine ua oti lana tane sa saili mo se suiga atoatoa o lona olaga. Mo se taimi umi, sa faatigaina o ia e ona fili ma sa faifaipea ona alu atu i le  faamasino mo se fesoasoani.  O lona faataunanau faifaipea na tulai ai lē faamasino e fesoasoani ia te ia. Na faamatala e Iesu lenei tala e faataua ai le tatalo faifaipea e suia ai mea uma (Luka 18:1-5). O tatalo e fanau mai ai mea fou poo tulaga, e faapei o se ulo o loo kukaina ai mea fou ae lei laulau ina atu.   

Le au pele e, aua e te faatagaina le fili e saisaitia pea oe I lou tagata tuai. Tagi atu i le Atua e pei o le fanauga a Isaraelu, ma e mautinoa e na te faia se mea fou mo oe I lou olaga (Esoto 3:7-8). Faaauau i le mana o le tatalo e te ulufale ai I mea fou ua saunia e le Atua mo oe ma lou aiga I lenei tausaga fou. 

Tatalo

Tamā, faamolemole foai mai le alofa tunoa e tatalo ai faifaipea seia ou maua mea fou uma ua e saunia mo a’u ma lo’u aiga, I le suafa o Iesu, Amene. 

OPEN HEAVENS

MATALA LE LAGI MO LE ASO FARAILE 3 IANUARI  2025

(tusia e Pastor EA Adeboye)

Manatu Autu: E fou mea uma 1 (All things new 1)

Tauloto -Tusi Paia– Faaaliga 21:5 “Ua fetalai mai fo‘i lē ti‘eti‘e i le nofoāli‘i, “Fa‘auta, ‘ou te faia ‘ia fou mea uma lava.” ‘Ua fetalai mai fo‘i o ia ‘iā te a‘u, “‘Ia e tusi; auā o ‘upu nei e moni ma le fa‘amaoni ia.”

Faitauga – Tusi Paia – Isaia 43:18-19

O Iesu e faapitoa lona silafia e faafouina mea uma. Mo se faataitaiga, ina ua uma le uaina i le faaipoipoga i Kana I Kalilaia, e lē gata na ia liua le vai i le uaina, o le uaina fou e sili atu i le uaina sa iai muamua. Ina ua afio atu Iesu i lea faafitauli, na ia avatu se vavega latou te le’i iloa muamua, ma sa faamaonia e le taitai o le tausamaaga (Ioane 2:1-10). E faia foi e Iesu mo oe I lenei tausaga fou, i le suafa o Iesu. 

E mafai e Iesu ona avatu sou amataga fou. Fai mai le 2 Korinito 5:17, o soo se tagata e ia Keriso, o se tagata fou ia, ua mavae le ola tuai, faauta ua o’o mai le ola fou. Pau le tulaga e manaomia e le Atua e te faia e faafouina ai mea uma, o le lafoai o lou ola ia te ia. Auā foi ae lei oo mai le ola fou, e tatau ona faatuatuanai le ola tuai. 

Ina ua fesagai ma le fefe Iakopo i le lā feiloaiga ma Esau ina ua mavae le tele o tausaga, sa ia maua muamua se feiloaiga ma le Atua, ma na suia ai lona igoa ia Isaraelu. O le suia o lona igoa na maua ai le vavega o le faaleleiga na ia faananau iai, auā foi afai lava o loo iai le igoa tuai, e lē mafai ona ola ini vavega fou. Na suia foi e le Atua igoa o Aperaamo ma Sarai ina ia faataunuuina folafolaga a le Atua mo la olaga (Kenese 17:5-15). 

E lē tuuina e le Atua uaina fou i fagu uaina tuai o le agasala (Luka 5:37-38). E tatau ona saunia lou tagata e lafoai lou ola tuai pe afai e te naunau e faafouina mea uma I lou olaga. E tatau ona lafoai lou mafaufau tuai ina e maua taitaiga ma mulimuli I faatonuga mai le Atua mo lou olaga. E tatau ona lafoai alāfua ma aganuu na sau ai lou olaga ae faataga alāfua ma agānuu a le Atua e taitaia oe. Ina ua oo I le taimi a le Atua e faalatalata atu ai le au nuu ese ia te ia, na faia e le Atua ina ia suia le mafaufau o Simona Peteru. Na ia faaalia ia Peteru se ie e tumu I manu vaefa ma manu felelei ua taua e lē mamā I le aganuu a le au Iutaia ma faatonu e fasi ma ai ai. Na finagalo le Atua e suia lona mafaufau ina ia talia tagata o nuu ese I totonu o le Ekalesia (Galuega 10:9-16). 

E leai se pa puipui e gata ai le Atua. E mafai ona ia faia mea uma ia fou, peitai, e iai taimi , o tatou fagu uaina tuai poo tatou tagata tuai, e lē mafai ai ona ia sasa’a mai lona faafouina I totonu io tatou olaga. Le au pele e, ao tatou faafeiloai atu i lenei tausaga fou , ole atu I le Alii e faaali atu ou ala tuai ma le mafaufau tuai e taofia ma avea ma pa pupuni I ana fuafuaga fou mai le faaalia ma vaaia I lou olaga.

Tatalo

Tamā, faamolemole fesoasoani mai ia te a’u ia aveesea mea tuai uma i lo’u olaga o loo tapunia ma pupuniina lo’u maua o le fou o mea uma , I le suafa o Iesu, Amene.