Samoan Devotional

OPEN HEAVENS

MATALA LE LAGI MO LE ASO TO’ONAI 1 FEPUARI  2025

(tusia e Pastor EA Adeboye)

Manatu Autu: E a’oa’o e le Atua 2(God teaches 2)

Tauloto -Tusi Paia–Salamo 25:4  ”Le ALI‘I e, ‘ia e fa‘ailoa mai ‘iā te a‘u ou ala; ‘ia e a‘oa‘o mai ‘iā te a‘u i ou magāala.”

‭‭

Faitauga – Tusi Paia – 1 Korinito 2:6-13

O ananafi na o’u faamatala ai le fesoasoani o le Atua iā te a’u e faauma la’u suesuega o lo’u faailoga PhD e ala i lona a’oa’o mai ia te a’u o le auala e tali ai se fuaitau fa’amatematika e ala i lana Upu. O le asō ou te fia faasoa ia te oe le isi auala e a’oa’o ai e le Atua lana fanau.

A’o o’u aoga mo lo’u faailoga lona lua i le Iunivesite o Lagos, na tuuina mai e lo’u faiaoga, o se Initia se galuega ou te faia a’o le’i alu i sana malaga. E fo’i mai lana malaga ua telē se vaega o le galuega ua uma ona fai, ma ia fesili mai ai iā te a’u faapea, “Enoka, ou te iloa o oe o se kerisiano, e te lē pepelo fo’i la. O ai na fesoasoani iā te oe e fai le galuega na tu’u atu?”

E lē talitonu i le Atua ae na te iloa e lē pepelo Kerisiano. Na o’u iloa afai ou te tali o ‘Iesu’, e ata iā te a’u, o lea na o’u fai atu ai, “o Polofesa Emanuelu,” o le tasi lea suafa o Iesu (Mataio 1:23). A o’o ina vavalalata ma mafana le lua mafutaga ma le Atua, o le a amata ona e galue i se tulaga o le poto ma le malamalama e sili atu i au uo. O le latalata o le lua mafutaga ma le Atua, o le tele lea o le poto na te saunia ma foaiina mo oe. O le a amata ona e talia fesili i se auala e iloa gofie ai e tagata o oe o se uso ua a’oa’oina e le Atua ma faaoloaina i le poto. O le a mafai ona e vaai i faafitauli ma o le ā tuuina e le Atua le fofō o nei faafitauli i lou loto. E o’o ifo i le taimi e te faatino ai le tali o le faafitauli na faasino atu e le Atua, o le a iloa e tagata o oe o se uso e tumu i le poto, auā fo’i o lē o loo a’oa’oina oe, o le faiaoga e silisili i faiaoga uma.

Fai mai le Tusi o Kalatia 3:27 “Auā o ‘outou uma lava na papatisoina ‘iā Keriso ‘ua ‘outou ‘o‘ofu ‘iā Keriso;”

‭‭

I totonu o lo’u nuu o Yorubaland, e I ai le fuaitau faapea, a umi tele ona tu’u faatasi le lau laau ma le fasimoli, e liu fasimoli ai fo’i le lau laau. O le papatisoina faatasi ma Keriso o le faailoga lea ua tasi oe ma le Atua. A’o e tupu ma ola iā Keriso e ala i le tatalo e lē aunoa, mafuta ma le au uso kerisiano, suesue lau Tusi Paia, galuega tāla’i ma isi o le a faapea ona e amata ola pei ona soifua Keriso a’o i ai i le lalolagi. O le a amata ona e soifua ma galue i se laasaga fou o le poto e maualuga atu I le tulaga o i ai i latou o tou mafuta faatasi, auā ua e ofoina atoatoa lou ola mo le Atua ma ua lē toe faia lou loto a ua pule to’atasi Keriso ia te oe.

Le au Pele e, o le Atua le faiaoga sili; o loo ia te ia le poto ma le iloa uma lava (Kolose 2,2-3). Afai e te faatuatua i le Alii ma lou loto atoa ae aua le faalagolago i lou lava atamai (Faataoto 3:5), o le a fai o ia ma ou faiaoga, I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 31 IANUARI  2025

(tusia e Pastor EA Adeboye)

Manatu Autu: E a’oa’o e le Atua 1 (God teaches 1)

Tauloto -Tusi Paia–Isaia 28:26  ”Auā ‘ua a‘oa‘o lona Atua ‘iā te ia i le tonu, ‘ua ia a‘oa‘o lava ‘iā te ia.”

‭‭

Faitauga – Tusi Paia – Salamo 25:4-12

Ao ou aoga i le sueina o le faailoga o le PhD, sa ou faafesagai ma ni fuaiupu faafuainumera e 186, ua atoa le 18 masina o taumafai e faavasega ina ia maua le tali. Ona ua foliga mai ua lē maua lava se tali, o lea ua tatau ona toe filifilia seisi vaega e mafai ona faavasega mo se tali, o lona uiga ua maimau uma galuega na faia I le 18 masina ua mavae. I se tasi o po I le ta o le 10, ua fiu lava e fai meaaoga e lē maua lava se tali, o lea na ou manatu ai loa, e faitau la’u Tusi Paia ma faia sina moe. Sa ou faitauina le Esoto 14 ina ua savalia e le fanauga a Isaraelu le sami ulaula , ma ou faalogo i le siufofoga o le Atua o faapea mai, ‘o le tali lena o lau mataupu’. Sa ou taumafai e faavasega le fesootaiga o le tala i le sopoia o le sami ulaula  ma le maua ai o le tali o le mataupu o le PhD. Peitai na faapea mai le Atua ou te alu e aumai a’u fuaiupu faafuainumera. Na ou usitai ona amata loa lea ona ia aoao ia te a’u, ua faatonu e ave nisi fuaiupu I le itu tauagavale ae ave isi I le itu taumatau. Ina ua maea, ua ou iloa o fuaiupu faafuainumera i le itu tauagavale, e iai vaega e tutusa lelei ma e faapena foi i le itu taumatau. Ona faapea mai lea o le Atua, tago loa e faavasega fuaiupu faafuainumera I le itu agavale faapea foi I le itu taumatau, ona tuu faatasi loa lea. Na aoao au e lē Atua e ala I le tala I le vaeluaina o le sami ulaula, ma ina ua maea le lima itula, ua maua le tali ma ua maea ai loa ma la’u pepa mo le faailoga. Sa matuā lelei atoa e o’o i le faiaoga e makaina le pepa, e leai sana fesili mo a’u. 

E aoao e le Atua lana fanau e ala i lana upu. Afai o oe o se tamaitiiti filiga o le Tusi Paia, e iai taimi e te suesue ai I le Tusi Paia, o le a ia aoao ia te oe, ma a e o’o I vaega faigata o le olaga, o le a matuā faigofie ia te oe. Fai mai Tavita I le Salamo 119:105, “O lau afioga o le sulu lea i o‘u vae, ma le malamalama i lo‘u ala.”

‭‭

E iai taimi, o tali o ou faafitauli e maua mai I le faitauina o lau Tusi Paia e aunoa ma le manaomia ona faaee lima a le tagata o le Atua I lou ulu. Peitai, e toatele kerisiano e lē faitauina a latou Tusi Paia. Ma o le mafuaaga lea e pologa ai lava i faafitauli mo le tele o tausaga. Na fetalai Iesu I le Ioane 8:32 “E iloa fo‘i e ‘outou le mea moni, e tu‘u sa‘oloto fo‘i ‘outou e le ‘upu moni.”

‭‭

O le maua o le iloa ma le malamalama e ala i le upu a le Atua e faamautinoa ai e te soifua ma le manumalo. E iloa e tamaiti aoga a lē toaga e suesue I Tusi ma meaaoga, e lē pasi i suega. O lau Tusi Paia o le Tusi aoga lea mo le ola nei, suesue iai, ia aua nei e lē pasi i le ola nei.  Toaga ma faaalu lou taimi e suesue ai lau Tusi Paia I aso uma, I le suafa o Iesu, Amene.  

OPEN HEAVENS

MATALA LE LAGI MO LE ASO TOFI 30 IANUARI  2025

(tusia e Pastor EA Adeboye)

Manatu Autu: E saunia e lē Atua(God provides)

Tauloto -Tusi Paia–Salamo 23:1 ”O le ALI‘I, o lo‘u leoleo mamoe o ia; e leai se mea ‘ou te mativa ai.”

‭‭

Faitauga – Tusi Paia – Kenese 22:7-14

Na avea a’u ma taitai aoao  o lē Ekalesia RCCG I le sili atu ma le 45 tausaga talu ai. I lea taimi, o le tupe maua a le Ekalesia e laitiiti atu I lo’u totogi mo le masina e tasi mai le Iunivesite sa ou faamavae mai ai. O le Ekalesia i le taimi lea, e 39 tagata faigaluega ma a maea ona faia o latou totogi, ua leai se tupe e totoe mo le taitai aoao. Ona o au o se tagata ola, o lea na ou faapea ai I le Atua, ‘Le Alii e, na ou fai atu e tuu pea a’u ou te faiaoga, aua sa fai lava ma ou lauga. A’o maua lou totogi, na o sina tupe lava na tu’u ese mo meaai ma le penisini o le taavale, ae sa ave uma tupe I lotu. Ua lē toe maua sau tupe mai le malo, ae na o le pau lea o le tupe maua a le Ekalesia. O le ā ea se faamaoniga e mafai ona ou ola ma manumalo?’.  Ona faia lea o se folafolaga a lē Atua ia te a’u e faapea, ‘Atalii, e tasi lē faamaoniga ou te tuuina atu ia te oe, o soo se mea e te alu iai, ou te iai pea ma oe’. E moni, e leai se mea e lē mafaia e le Atua, ua 45 tausaga talu ai, ae ou te lei aitalafu pe aisi I se mea. E moni, e saunia mea uma e le Atua. 

Afai e te vaai I se tagata e lē mafai ona faia se tautinoga e saunia e lē Atua mea uma, e leiloa pe ua lua feiloai ma se tagata aiū, e aiū foi I le Atua. Afai e te maitau lelei lau faamatalaga I le amataga, e te iloa ai ao ou faiaoga, toeititi lava ave uma a’u tupe i le Atua. Peitai, a ou manaomia se mea, e lē faapea e le mafai e le Atua. Fai mai le Luka 6:38, ia outou foai atu ona foaiina mai ai lea ia te outou. Na malamalama iai le fafine ua oti lana tane i Sarefata, ma ina ua auina mai e le Atua le perofeta o Elia, ma fai atu ia te ia e aumai lana meaai mulimuli, na ia foai atu. O lona taui, na ia maua meaai ua lava ma totoe i le taimi atoa o le oge.    

O loo alofa mutimutivale le Atua I le toatele o tagata e ala I le foai o le tele o le tupe peitai e lei lava e mafai ai ona latou faafetai I le Atua. E o’o ina fai atu le Atua mo sina vaega o mea ua latou maua ae faapea mai e ‘leai’. E le gata e aiū I le Atua ae aiū foi I tagata o loo i lo latou siomaga, aemaise I le au matitiva ma le lē tagolima. Fai mai le Faataoto 21:13 “O lē na te punitia ona taliga i le vala‘au a le tagata mativa, e vala‘au lava o ia, ‘ae lē talia.”

Le au pele e, afai e te naunau e saunia e le Atua mea uma mo oe, aua e te aiū I lana galuega, I fanau a le Atua, i ai latou i lou siomaga po’o le au matitiva. E faatamaoaigaina le tagata matamau (Faataoto 11:25). Faataitai ma savali I le matamau e foai ma lagolago I le galuega a le Atua, o ana faifeau ma I latou o loo manaomia le fesoasoani I lou siomaga, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 29 IANUARI  2025

(tusia e Pastor EA Adeboye)

Manatu Autu: E leai se mea e lē mafaia (nothing is impossible)

Tauloto -Tusi Paia–Luka 1:37 ”Auā e leai lava se mea e tasi e lē mafaia e le Atua.”

Faitauga – Tusi Paia – Mareko 11:22-24

“Ona fetalai atu lea o Iesu ‘iā te ia, “Ai se mea ‘e te mafaia. Auā e mafaia mea uma lava i le fa‘atuatua.” Mareko‬ ‭9‬:‭23‬ ‭

I se vaitau talu ai, na faia la matou sauniga I se po mo Agaga Paia.  Ina ua maea le polokalame na faatopetope ane ni tagata e pa’i I le nofoa  sa ou nofo ai. Peitai e iai se mafine e lei ano iai, ae sa alu atu I le nofoa sa nofo ai lo’u toalua, tootuli ai ma tatalo i le Atua. Ua fai iai fomai e leai sona toala fanau (tulou) ma e lē mafai ona maua sana fanau ma o lea, ia aua nei maimaua lona taimi e taumafai ai. Ao tatalo I ona tulivae, sa ia faapea, ‘Le Alii e, o le fafine sa nofo i le nofoa lea e iai lona toala fanau, ma e na te lē toe manaomia,  aumai lona toala fanau mo a’u’. E o’o mai I le taimi na faia ai lana tautinoga, ua maea ona ola I se fanau e toalima. O se vavega e ala I se taotoga faapitoa i le agaga ua ia maua ai le toala fanau a le fafine na nofo I le nofoa lea, ina ua pa’i atu iai.  O se tasi nei o vaega itiiti e mafai ona faia e le Atua. Na ia toe faatūina se tagata ina ua maea ona maliu mo lē fa aso I le Ioane 11; e matuā leai se mea e lē mafaia e le Atua. O se tasi o vaega e mafai ona taofia le faia o mea ofoofogia, o le lē talitonu. E ui na alu ma le mana le galuega o Iesu Keriso I lana galuega i le lalolagi, ae sa le’i mafai ona faia ni vaega se tele I lona nuu ona o le lē talitonu (Mataio 13:58). 

Ao faia le galuega a Iesu i le lalolagi, e masani ona faapea pe a o’o ina faamaloloina se tagata, “o lou faatuatua ua e malolo ai”(Mareko‬ ‭5‬:‭34‬). I nisi faaupuga, ana leai le faatuatua, semanū e tumau pea ona mama’i. 

Po’o le ā se luitau pito sili ona telē I ou luma, e faigofie ona tali iai le Atua pe afai e te talitonu iai. E lē lava lē nā o le tatalo, o le fesili moni, ‘e te faatuatua ma talitonu e mafai e le Atua ona tali iai?’ E tele tagata ua ou vaai iai o tatalo e aunoa ma le faatuatua e maua tali o latou tatalo, ma e tele ina misia a latou vavega ona o le lē talitonu ma leai se faatuatua. Fai mai le Iakopo 1:6-7

“A ‘ia ole atu ma le fa‘atuatua, ‘aua lava ne‘i māsalosalo; auā o lē māsalosalo e tusa ia ma le peau o le sami ‘ua sousou i le matagi ma felafolafoa‘iina. O le tagata fa‘alotolotolua e fa‘alētumau ia i ona ala uma.”

‭‭

E leai se mea e faigata i le Atua, e pau le mea e te faia o le ole atu ia te ia i le faatuatua. Fai mai le Filipi 4:6, a ē tatalo, ia faailoa atu o outou manaoga I le Atua ma le faafetai. I nisi faaupuga, a’o faailoa atu ou manaoga, e te faafetai I le taimi lava e tasi aua ua e iloa ua ia faia lava. Tago loa e faia ni folafolaga e tusa ma lē Upu a le Atua I tulaga faigata I lou olaga, ona e faatuatua lea ia te ia e na te foia, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 28 IANUARI  2025

(tusia e Pastor EA Adeboye)

Manatu Autu: E iai le faamoemoe (There is hope)

Tauloto -Tusi Paia–Iopu 14:7”Auā a tā le la‘au, e fa‘amoemoe e toe tupu, e lē aunoa fo‘i ma ona tātupu.”

Faitauga – Tusi Paia – Salamo 33:17-22

O le leai o se fa’amoemoe o se tulaga lamatia; tusa lava po o le ā se tulaga faigata ua e o’o iai, ia aua nei leai sou faamoemoe. I le 1 Tupu 19:1-8, ina ua lē o gatasi faamoemoega o Elia, sa ia ole atu i le Atua e fasioti o ia aua ua leai sona faamoemoe. Peitai I le 1 Tupu 21:22, o A’apo, o lē sa ia sola ese mai ai, ua faapea mai ia Elia, “Lo’u fili, po ua e mauaina ea a’u?” O lē sa tulituliloaina Elia, ua amata ona sola ‘ese mai ia Elia.

Le ‘au pelē, aua nei e taliaina tala a tagata ia te oe, e faapea atu ua leai se faamoemoe o lau mataupu; e le o sou Atua I latou. Latou te le’i aumaia oe i le tulaga ua e iai nei,  e lē mafai ona latou pulea lou lumanai. Afai latou te faapea mai ua siliga tali i seu, ia e fai iai, latou te le pulea le taimi a le Atua, aua e na o le Atua e pulea le taimi ma le vaitau, na te lei aumaia oe i le tulaga ua e iai, ina ia lafoa’i ia te oe. O lou lumanai a taeao e manuia, o lona uiga, ia tumau lou faamoemoe. O lo’o soifua lo’u fesoasoani, e lē liu e faavavau (Eperu 13:8). O ia o le Alefa ma le Omeka, o loo soifua, na soifua foi ma o le a afio mai. Afai ua ia fesoasoani mai ia te a’u e oo mai i le asō, o le a ia fesoasoani mai e oo lava i le i’uga.

Ua ia te a’u molimau e le mafaitaulia, i taimi e tele na ou manatu ai ua leai se faamoemoe, a ua afio mai le Atua ma ia faia tulaga e le mafaia e se tasi. Ou te manatua ai le taimi ua mae’a ai ta’otoga e tolu a lo’u to’alua i le fanau mai o le mā fanau, ma le fautuaga a foma’i na aumai, ia aua ne’i toe tō (tulou). Peitai, sa faamalosia ma’ua i le upu mai le tusi o Luka 1:37, ma ua ma toe taumafai foi. I le fa’asologa o lona ma’itaga lea, ma te lei toe o e va’ai se fomai. Ina ua oo i le taimi e fanau ai, sa umi ona faatigā, ma ina ua mavae aso e tolu, ua amata ona ou fefe. Sa ou fa’alogoina le leo a Satani e manino o faapea mai: “O oe o se tamaloa fa’avalevalea, e te fai mai e iai lou faailoga PhD; a o nanei e oti ai lou to’alua, ona e vaai lea i le mea o le a fai e le aiga a lou to’alua ia te oe!” Ina ua ou faalogoina ia upu, sa fa’atumulia a’u i se ita e pa’ia ma ou faapea atu “Faalogo mai oe Satani, afai e maliu lo’u toalua nanei, ou le a ou talosaga i le taitai aoao o le Ekalesia, mo se faatagaga ou te lauga ai i le Aso Sa, ma o la’u tala muamua o le a fai: “E leai se mea e le mafaia e lo’u Atua!” E le’i umi lava, ae ou faalogoina le tagi mai o le pepe mai le potu failele a le falemai. E na o lo’u toalua sa iai I le fale failele i lena po ma, sa ou iloa o la ma pepe ua fanau.

Afai e amata e le Atua se mea, e na te faataunuuina. E na te lē lafoai I lana fanau i le ogatotonu o se mea. E faamaoni le Atua ma o le a ia va’ava’aia ma fa’atautaia ina ia faataunuuina ma le manuia. Le au pelē, aua lava nei e lafoa’i lou faamoemoe, I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 27 IANUARI  2025

(tusia e Pastor EA Adeboye)

Manatu Autu: O le suafa e silisili I suafa uma (The name above all names)

Tauloto -Tusi Paia–Filipi 2:9”O le mea lava lea ‘ua matuā fa‘aeaina ai o ia e le Atua, ma foa‘iina atu ai ‘iā te ia o le suafa e silisili i suafa uma lava.”

Faitauga – Tusi Paia – Ieremia 32:17-20

I ni tausaga talu ai, na iai se alii talavou na aafia I se faalavelave tau taavale na maliliu uma ai tagata sa I le taavale ae na o ia na faasaoina. Sa ave I le falemai ma ua leiloa seisi mo ni aso. Ao moe e leiloa seisi, e fai ma tei ane ma valaau ‘Iesu’ ona toe leiloa foi lea o seisi. Na faapea lona tulaga seia o’o ina malamalama. Na toe ala ma ua maua le malosi atoatoa ma o loo soifua pea o ia e o’o mai I le asō.

Tusa poo le ā le faaletonu o le tulaga ua e o’o iai ma ua peiseai ua leai se faamoemoe, valaau i le suafa o Iesu, e liua mea uma i le lelei. O le suafa o Iesu ua lava lea e soloia ai i lalo ni mauga. Fai mai le Filipi 2:10 “‘Ina ‘ia to‘otuli o tulivae uma lava i le suafa o Iesu, o ē o i le lagi ma ē o i le lalolagi, ma ē o i lalo o le lalolagi,”

‭‭

O se talavou o se atalii o se auauna a le atua mosalemi, ua tuuina atu lona ola ia Iesu Keriso. Ua maasiasi lona tamā ona ua liliu I le faakerisiano ma ina ua maea ona faatauanau ma ni finauga ma lona atalii, ua foliga mai e lē toe suia le faaiuga a lona atalii. Ua le mautonu le  tamā o lea na ia galue ai ma isi i le lotu mosalemi e faia ni vai faataulaitu e osofai ai lona atalii. E iai le asō na ia valaau ai i lona atalii e faaaogaina ai lenei vai, ma e pei a ona masani ai le tali mai o se atalii I lona tama, na tali mai iai le tamaititi. Ao tali mai le tamaitiiti,  sa tilotilo I luga ma iloa ai se alā tele o loo pau mai ia te ia. Na valaau atu, ‘Iesu’ ona mou ese lea. O se osofaiga i le agaga ae na faaleaogaina i le suafa o Iesu. 

O le suafa o Iesu e iai le mana ma e malosi lava. O le mafuaaga lea e tatau ai ona e faaaogaina pe a e iai I se tulaga e lamatia ai lou ola. Peitai e lē mafai ona e ta’u fua le suafa o Iesu e faaletatau. Aua e te ta’u fua le suafa o Iesu ma le faalētatau, nei o’o mai ai le toasa o le Atua o lē e ona le suafa. E pei a o le tagata, e te lē manao e ta’u fua lou suafa faalētatau, e lē sili atu ea ona faapena le Atua? Fai mai le Esoto 20:7 “Aua ‘e te ta‘u fua le suafa o le ALI‘I lou Atua; auā e lē fa‘asaoina e le ALI‘I o lē ta‘u fua i lona suafa.”

‭‭

Le au pele e, e te manumalo I so’o se luitau e te lua fetaiai pe afai e te valaau I le suafa o Iesu. Fai mai le Tusi Paia i le Roma 10:13 o soo se tagata e valaau i le suafa o Iesu, e faaolaina o ia. O le suafa o Iesu e lē pei o isi suafa, aua e tumu I le mana, I le suafa o Iesu, Amene. 

OPEN HEAVENS

MATALA LE LAGI MO LE ASO SA 26 IANUARI  2025

(tusia e Pastor EA Adeboye)

Manatu Autu: O atua outou (Ye are gods)

Tauloto -Tusi Paia–Salamo 82:6”O a‘u, na ‘ou fa‘apea ane, “O atua ‘outou; o fānau fo‘i ‘outou uma a lē Silisili‘ese.”

Faitauga – Tusi Paia – Iopu 22:28-30

“E moni, ‘ou te fai atu ‘iā te ‘outou: O mea uma tou te fusifusia i le lalolagi, e fusifusi ia i le lagi; o mea uma fo‘i tou te tatala i le lalolagi, e tatalaina ia i le lagi.” Mataio‬ ‭18‬:‭18‬ ‭

Ua faaalia mai i le faitauga mai le Afioga Paia a le Atua, le silasila a le Atua ia i tatou o lana fanau ma le pule ua ia tuuina mai ia i tatou. Fai mai tatou te malolosi tele ma e mafai ona o tatou filifilia mea e tutupu I le lagi. Afai tatou te saisaia se mea I le lalolagi e faapena fo’i ona fa’ataunu’uina e le Alii o ‘au. E taua lo tatou iloa o folafolaga ma faamanuiaga uma tatou te agava’a i ai auā fai mai le Salamo 49:20 “O tagata o lo‘o i le lelei, ‘ae lē mafaufau, e tusa i latou ma manu ‘ona fano.”

‭‭

Toatele Kerisiano e fano ona latou te lē iloa agava’a ma le pule o ia i latou. O loo faaleaga e aitu vavalo ma faataulaitu fanau a le Atua o loo nonofo faatasi ma Keriso Iesu i mea o i le lagi (Efeso 2:6) peita’i e amio pei ni moa e leai ni faamoemoe auā latou te lē iloa lo latou tulaga. Fai mai Iesu I le Ioane 14:12 e faia lava e oe o galuega o’u te faia ma mea e sili atu. E mafai ona e faia galuega uma na faia e Iesu, o loo tusia i ana Afioga Paia ma sili atu fo’i. I le Mareko 11:13-14 na fetu’u e Iesu se mati na foliga o fua feti’iti’i peita’i ina ua latalata atu i ai e leai ni fua. E malama a’e lē taeao ua mago atoa le laau amata mai ona a’a, aua o le faasologa o le mala e amata mai i a’a ma faasolo atu i luga, pei fo’i o manuia faalelagi. E lē gata i lea na fetalai Iesu i le tusi o Mareko 11:23 “auā e moni, ‘ou te fai atu ‘iā te ‘outou, ‘ai sē fai atu i lenei mauga, ‘‘Ia si‘itia oe, ma ‘ia lafoina i le sami,’ ma le lē māsalosalo lona loto, ‘ae peita‘i e fa‘atuatua o ia e taunu‘u lava mea na ia fai atu ai, ‘ona faia lea mo ia o le mea na te fai atu ai.”

‭‭

O ni tausaga ua mavae i sa’u asiasiga i se setete o Nigeria, sa faamatala mai e nisi ia te a’u se laau e tu i le ogatotonu o le taulaga ua fiu e taumafai e sua ese e lē mafai. O le mea moni na fai e le mālō le auala ia faataamilo i le laau ona ua lē mafai ona aveese. Na fa’aloaloa lo’u lima i le laau ma o’u fa’atonuina i le suafa o Iesu ia malaia. O le po lava lea na agi ai se matagi ma aafia ai le aai, ma e malama ane le taeao na soso’o ai, ua lia’ina atoa i luga ma a’a lenei laau, aua foi ua poloaiina e se atalii o le Atua soifua, o lē  e malamalama i lona tulaga pule ma faatonu se poloaiga e tatau ona usitaia. E mafai fo’i ona e faia faapea ma sili atu pe afai o sa’o ma moni le lua mafutaga ma le Atua. O e usita’i I le Atua ma tonu  le lua savaliga, e mafai ai ona e faia se poloaiga e tusa ma lana upu ma taunuu? I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 25 IANUARI 2025

(tusia e Pastor EA Adeboye)

Manatu Autu: Tusa Po’o Le Afi (Even In The Fire)

Tauloto -Tusi Paia– Iopu 13:15 ‘'E ui lava ‘ina fasioti o ia ‘iā te a‘u, ‘ou te fa‘amoemoe pea ‘iā te ia; ‘ae peita‘i ‘ou te fa‘atonu atu o‘u ala i ona luma.'

Faitauga – Tusi Paia – Tanielu 3:9-25

I se vaitaimi ua tuana’i, sa i ai se tamaita’i mai se tasi o aulotu a le RCCG sa faamalolō mai lana galuega i se mafuaaga lē amiotonu. E le’i umi ae alu i sana malaga ma taofia ai o ia e tagata faomea i luga o le auala ma fao lana taavale. E lei umi nai aso, a’o taumafai e fai lana kuka, ae mu lana umukuka. Na tutupu uma nei faalavelave i totonu o le vaiaso e tasi. O le tulaga mataina, o le Aso Sa na sosoo ai o le Aso Sa o le faafetai ma na sili ona siva fiafia ma vivi’i lenei tama’ita’i na i loo tagata uma na iai i le sauniga. Na tulimata’i e tagata uma lenei tama’ita’i aua sa leai se manatu e siva faapea ona o faafitauli o loo ui ai. Peitai na faapea mai le tama’ita’i “Ua leai sa’u galuega, a’o loo mautu lo’u faaolataga. Na o latou gaoi la’u taavale, ae lē o lo’u ola. Ua mu lo’u umukuka, peita’i oute lē alu i Seoli. Poo a taumafaiga a le tiapolo, o loo o’u maua pea le ola”. O le ta’utinoga lea a se tasi e mafana le mafutaga ma le Atua a’o le’i o’o mai puapuaga ma e lē tuulafoaiina e le Atua tagata faapea (Ieremia 17:7-8).

Afai e fai atu se tasi ia te oe e lē taitai o’o ni faafitauli ia te oe aua o oe o se Kerisiano, e lē o tautala lea uso i le mea moni atoa. E o’o mai puapuaga, peita’i o le auala e te tali atu ai i nei faafitauli e fua i le tele o lou alofa I le Atua. Afai e avea se faafitauli e te alu ese ai ma le Atua o lona uiga e itiiti lou alofa. O nisi tagata e ta’uta’u lo latou alofa lē mavae I le Atua, e pepese o le a mulimuli i le Atua e lē aunoa tusa pe ui i matagi poo afi. Peita’i, e o’o mai loa puapuaga, galo la latou ta’utinoga ma liliu ese mai le Atua.

Afai e avea lou ta’u o le mea moni faatatau I se mataupu I le galuega ma ala e tuli ai oe, e te pepelo ia aua ne’i afaina lau galuega pe e te ta’u le mea moni tusa pe tuli oe? Atonu o le a e fai mai nei, o le a e ta’u le mea sa’o i taimi uma, peita’i o le mafuaaga moni e faaosofia lau tali i le faafitauli o lou alofa I le Atua i le taimi nei. O lou alofa I le Atua e tatau ona amata fausia I le asō pe afai e te mana’o e tutumau i lou Alii i le taimi o faafitauli. 

I le Tusi o Tanielu 3 na tofotofoina taulelea Sā Iutā e toatolu pe filifili e ifo i se tupua po o le lafoina e mu i le Afi. Na o latou filifilia le afi, ma o iina e fa’ailoa ai le alofa moni I le Atua. O le alofa o nei taulelea e le’i faatoā tupu i le aso na fai ai le poloaiga a le tupu ia i latou e ifo i le tupua, o le alofa, na o latou fa’ato’a ma tapena a’o le’i taitai o’o mai le afi.

Le au pele e, tapena ma atiina’ae lou alofa mo Keriso I le taimi nei. Toaga e su’esu’e lau Tusi Paia, tatalo e lē aunoa, ma aua ne’i tuua le mafutaga ma le au uso Kerisiano aua a o’o mai aso leaga, ua mausalī lou alofa i le Atua e faatumauina lou faatuatua e lē maluelue. E mafai ona e ta’utino i le taimi nei e te alofa I le Atua ma lou loto atoa.? I le suafa o Iesu. Amene!

OPEN HEAVENS

MATALA LE LAGI MO LE ASO FARAILE 24 IANUARI  2025

(tusia e Pastor EA Adeboye)

Manatu Autu: O le tala ma le manuia (The Glory and the story)

Tauloto -Tusi Paia–Salamo 126:5”O ē lūlū saito ma loimata, latou te seleseleina ma le ‘alaga fiafia.”

Faitauga – Tusi Paia – Salamo 126:5-6

E toatele tagata e lē o ni kerisiano o loo avea ma mauoa, aua e malamalama lelei I le tulafono o le lūlū ma le seleselega. Afai o I latou e le iloa le Atua ae o loo aeae ma manuia I nei tulafono faigofie, e le sili atu ea manuia e maua e le fanau a le Atua pe a malamalama?

Ao faia le togalauapiga ma le fonotaga a Kenneth Hagin I le tele o tausaga talu ai, na faia se valaau mo se taulaga faapitoa o le a aoina. Ona tulai lea o se tasi tamaloa ma faapea mai, ‘uso e, faamolemole ia foai ia faatelē I lenei afiafi, aua o le aofai atoa toe te foai iai, o le aofai lena ma te foaia ma lo’u toalua’. E tusa ma le 17,500 tagata sa auai ai. Ina ua faitau le foai, o le aofaiga e 3.5 miliona. Na ia tulai ma faapea mai, ‘le au uso e, e na o le pau lenā o le tou foai?’. Ua ou manatu ifo ia te au, ‘e iai le mea lilo o loo iloa e le tagata lea ou te lē o iloa’.  O lea na ou alu ma ma feiloai I le maea ai o le sauniga ma fesili atu iai, ‘o le a le mea lilo o loo ia te oe?’ Ua faapea mai, ‘na amata sau pisinisi I le lima tausaga talu ai i le $500, ua ou fai i le Atua, o le kamupani lenei o lau kamupani, ou te le faaoleole ia te oe I le foai atu o le 10%, ae o le a ou tuua le 10% ae foai le 90%, ae pule lava oe pe e te finagalo e manuia lenei pisinisi’. Na faaauau pea lana faamatalaga ma faapea mai, ‘Lau susuga, o la’u tupe maua I le taimi nei e 50 miliona’. 

Ua a’oa’oina au I se lesona tāua i lena aso. E ui e lē atoa le 90% o loo ou foai atu, ae o loo ou agai atu iai ma ua ia faamanuia ia te au e sili atu I ou manatunatuga uma. Afai e te iloa se tagata o loo savali I le manuia, taumafai e saili poo le a sana faamatalaga. Afai e te vaai atu I se tagata o loo manuia e sili atu ia te oe, ao oulua o fanau uma a le Atua, saili poo le a le latou mea lilo o loo ia te ia. 

Fai mai le Tusi Paia na faamanuia le Atua ia Aperaamo i mea uma (Kenese 24:1). Sa mauoa i lafumanu, mauoa I fale, eleeele e o’o I tagata faigaluega ma auauna. O le asō, e piliona kerisiano e fai mai, ‘o faamanuiaga a Aperaamo e mo a’u foi’. Peitai, o Aperaamo lava lea na malie e ave lona atalii e osi ai le taulaga ina ua faatonu e le Atua (Kenese 22:10). Na ia usitai foi I le Atua ma tuua le fale o Lona tamā ae alu I se nuu e na te leiloa (Kenese 12:4), nofo I faleie I le nuu na faaali atu e le Atua, ma musu e faamuamua se mea ua faamanuia ai o ia e le Atua (Eperu 11:9), ma sa ia totogi sefuluai i le Atua (Kenese 14:20). O I latou e naunau e ola I faamanuiaga a Aperaamo e tatau ona faia e pei ona ia faia. 

Le au pele e, e iai lava se tala matagofie I tua atu o se olaga manuia. Aua le na o le fai i le Atua e foai atu manuia o loo tauoloa ai nisi I le asō, ae taumafai e saili poo le a le mea tonu na latou faia ua mafai ai ona savavali I le manuia, I le suafa o Iesu, Amene.  

OPEN HEAVENS

MATALA LE LAGI MO LE ASO TOFI 23 IANUARI  2025

(tusia e Pastor EA Adeboye)

Manatu Autu: E lē faailogaina e le Atua ni tagata (No respecter of persons)

Tauloto -Tusi Paia–Roma 2:11”Auā e lē fa‘ailogaina e le Atua ni tagata.”

Faitauga – Tusi Paia – Isaia 3:10-11

Afai o iai Keriso I totonu ia te oe, o lou faamoemoe o le manuia (Kolose 1:27). E lē faailogaina poo ai lou tagata, afai lava ua ia te oe Keriso, e mafai ona e faamoemoe I le manuia mai le Atua. O loo faapea mai le faitauga mai le Tusi Paia o le asō, e manuia lē amiotonu ae malaia lē amioleaga. E lē afaina lou olaga I le tuanai, afai ua e talia Iesu Keriso e avea ma ou Alii ma Faaola ma o loo e soifua e tusa ma lona finagalo, ua ta’u amiotonuina oe, ma e te manuia. O I latou e lei faaolaina, e amioletonu, e silasila le Atua iai latou e amioleaga (Ioane 3:18-21), ma na ia fetalai e lē manuia I latou (Isaia 3:11). 

Ou te fai lava i lau fanau i le amataga o tausaga uma, ‘o le a manuia lenei tausaga ia te a’u’. Ou te iloa lelei lea tulaga aua o Lē o loo faapea mai e manuia le tagata amiotonu, e lē faailoga tagata. O le folafolaga ua faia mo le toatasi, e na te faia mo tagata uma (Mareko 13:37). 

E lē o se tagata le Atua e pepelo ai, a fetalai mai, e na te faia lava (Numera 23:19). Afai na te faia se folafolaga, ma e ausia tapulaa e maua ai lea folafolaga, e te maua I le taimi ua fuafuaina. O le folafolaga o le taeao matagofie mo oe, e tusa ma lē Kolose 1:27, e iai tapulaa ma aiaiga, ma o lea tapulaa e tatau ona iai Keriso ia te oe. O i latou e tetee ma lē fesootai ma Iesu, e lē mafai ona latou vaai ua ausia ana folafolaga. 

E iai se tamā na fesili mai ia te au ou te faailoa atu lona lumanai, na ou tali atu, ‘e faigofie, ua e faaolaina?’ Ua tali mai e leai ona ou tali lea iai e lē manuia lona lumanai. Ua ia tali mai, ‘e faapefea ona e iloa? E te lē iloa a’u, e te leiloa foi lo’u igoa, e te lei tatalo foi.’ Ua ou tali atu, e le manaomia uma na mea, fai mai le Isaia 3:11 “‘Oi talofa i lē ‘ua amio leaga! e malaia o ia”. Ae a la pe a ou faapea atu ua ou faaolaina? Ua ou tali atu, ‘semanū ou te fai atu e manuia lou lumanai’. Ona ia fai mai lea, ‘ae a la pe a ou faapea atu, ua ou manao e avea ma fanau a le Atua i le asō?. Ua ou tali atu,’ o le a manuia ma lelei lou lumanai’. 

E lē faailogaina e le Atua ni tagata (Roma 2:11), tusa poo lē a lē aiga poo lou tagata, e moni lana Upu mo tagata uma. Tusa lava poo le a lou ituaiga tagata, e mautinoa lou lumanai manuia pe afai e lafoai ma le atoatoa lou ola ia Keriso, I le suafa o Iesu, Amene.