Samoan Devotional

OPEN HEAVENS

MATALA LE LAGI MO LE ASO LUA 11 FEPUARI  2025

(tusia e Pastor EA Adeboye)

Manatu Autu: Saolotoga moni (True freedom)

Tauloto -Tusi Paia–Ioane 8:36“O lenei pe ā tu‘u sa‘oloto ‘outou e le Atali‘i, ‘ona sa‘oloto fa‘amaoni ai lea o ‘outou.”

‭‭

Faitauga – Tusi Paia – Salamo 146:5-10

E masani lava a vaaia se i’a I totonu o se vaituloto e foliga mai o loo lelei mea uma i lona aau faataamilomilo lea. Peitai, e lē mafai ona alu ese ona o loo siomia e pa puipui. O lou iai I se faapuipui e pei o le i’a lena I totonu o le vaituloto. E fafagaina tagata I le falepuipui, peitai e masani ona fafaga I meaai e lē fia aai ai.  A o’o foi ina mama’i e vaai e fomai. Ou te iloa aua e masani ona ou alu e talai I falepuipui. E  tausia pagota I le falepuipui ma e foliga mai o loo ola I se olaga e pei lava o isi tagata, peitai o lo latou saolotoga o loo gata I totonu o puipui o le falepuipui. 

Afai o lo e iai I se faapotopotoga e lē mafai ona e alu ese mai ai, o loo ei se falepuipui. E leiloa pe o lou avea ma sui o lena faapotopotoga o loo iai ni faamanuiaga taua. Peitai a ē silasila totoa, e te silafia ai e sili atu mea o loo e foaia iai I lo mea o loo e maua mai ai. E tele taimi e fai atu ia te oe e foai, fai taulaga e ono manu’a ai lou loto, e aofia ai  le faitaulaga I ē pele ia te oe. O lē itu pito sili ona leaga e sili atu i mea o loo mananao e te faitaulaga atu ai, ua lē mafai ona e toe alu ese. E leiloa pe ua e vaai ini tagata ua taumafai muamua e o ese peitai ua maliliu ai, pe ua faaletonu o latou mafaufau poo nisi mea leaga ua o’o iai latou. O le tele o taimi, o ia faapotopotoga, e latou te uu mau I o latou sui ma e matuā faasagatau iai latou ua taumafai e o ese, o le mafuaaga lea e te manaomia ai le Atua Silisiliese I lau itu. 

Le au pele e, e pau le auala e alu ese ai ma le falepuipui pe afai e te faatagaina se malosiaga e sili atu e laveai ia te oe. Afai o loo e iai I saisaitiaga I le agaga , e te manaomia Iesu, e laveai ia te oe. E pei a ona manaomia e lē fanauga a   Isaraelu le aao matautia o le Atua e faasa’oloto I latou mai Aikupito, e manaomia foi ona e tagi atu I le Atua e laveai mai ma faasaoloto ia te oe. 

Le au pele e, afai ua e tau malemo I se faapotopotoga amioleaga, e mafai e le Atua ona faasaoina oe pe afai e te tagi atu ia te ia ma le salamo moni (Salamo 79:11). E lē mafai ona ia lē tali I se tagata e tagi  atu, pe tetee foi I sē loto momomo ma nutimomoia (Salamo 51:17). E finagalo e faaolaina oe ina ia e fiafia i le faasaolotoga moni e maua i le avea ma sui o lona malo. O le salamo moni o lona uiga o lou lafoai  o mea uma ua e maua mai lena faapotopotoga ma faailoa lou lē toe auai ai. E lē mafai ona e uumau pea I pepelo a lē tiapolo ma maua lē faasa’olotoga a lē Atua. Ua na o Iesu Keriso e maua ai lē faasaolotoga moni, I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 10 FEPUARI  2025

(tusia e Pastor EA Adeboye)

Manatu Autu: O le amiotonu o Keriso (The righteousness of Christ)

Tauloto -Tusi Paia–1 Korinito 15:34“Inā ala mai ia i le amiotonu, ‘ae ‘aua ne‘i agasala; auā ‘ua pouliuli nisi i la le Atua; ‘ou te fa‘apea atu ‘iā te ‘outou ē fa‘amā ‘iā te ‘outou.”

‭‭

Faitauga – Tusi Paia – 1 Timoteo 6:11-12

O le avea o i tatou ma amiotonu a le Atua ia Keriso (2 Korinito 5:21) o se matafaioi tele aua e tatau ona vaaia e tagata le amiotonu ia te tei tatou. E lē iai se saolotoga ia te oe e faia ai le agasala, peitai e tuuina atu ai ia te oe le matafaioi e faailoa atu ai Keriso I lenei lalolagi amiolētonu. 

Sa iai se aso na ou malaga atu mai se nuu e feiloai ma lo’u tamā faaleagaga I Lagos. Ina ua ou taunuu atu I totonu o Lagos, na ou manatua e tatau ona ou alu ma se meaalofa. Ua ou vaai atu I se tagata o faatau ana moli I tafatafa o le auala ma na ou faatauina ni moli. Ina ua ou taunuu atu, na ou tuuina atu le meaalofa. Ua ia aia le moli muamua, ma faapea mai, ‘oka, matua suamalie tele, na e faataua mai I le auala?’ Ua ou tali ai, ‘ioe lau susuga’. Ua ou malamalama i le uiga o le fesili pe na ou faatauina moli I le ala I se nuu I fafo o Lagos. Sa tatau na ou fai iai e leai na faatau I totonu o Lagos ao lea ua ou fai iai ioe. Na vave ona ou lē mautonu aua ua faailoa mai e Agaga Paia le tulaga sesē. Na vave ona ou toe faapea atu, ‘Papa, o lau fesili na fai mai, o le tali e leai, na faatau iinei I Lagos’. Na tilotilo mai le tamā matuā ia te au , ataata ma faapea mai, ‘Agaga Paia’. 

O lou avea ma amiotonu a le Atua ia Keriso, e lē tatau ona e fiafia e faia le agasala. E le mafai ona e toe pepelo pe a talafeagai pe gaoi e leai ma se salamō. E pei a ona fai mai lo’u tamā ua ia silafia o Agaga Paia na ia faailoa mai ia te a’u, e tatau ona iloa e tagata le suia o au mea e faia ma le amio pe afai e te tauaveina le amiotonu a le Atua. 

“Ia ‘outou fua mai ni fua e tatau ma le salamō;” Mataio‬ ‭3‬:‭8‬ ‭

Na faia e Ioane lē Papatiso lenei Upu i le fuaitau o loo taua I luga, I le au tusiupu ma faresaio na ō atu I ana papatisoga. O loo ia faapea atu e lē lava lē na o lē tautala I le amiotonu ae o amioga ma mea e faia e lē amiotonu ma ō gatasi ma mea e tautatala ai. E aogā foi lea mo tatou, e lē tatau ona feteenai a tatou mea e faia ma le Upu a le Atua. O le amiotonu o lona uiga ia soifua ma le tonu, ma o le ituaiga soifuaga e te soifua ma ou ola ai, e tatau ona atagia ai tapulaa a lē Atua. E tatau ona atagia ai le Upu moni a le Atua, o lona filemu ma le alofa I le lalolagi. E iai le tapulaa a le Atua o loo otooto atu I le fuaitau lenei, “Ia ō ‘ese i le amio leaga i latou uma o ē ta‘uta‘u le suafa o le Ali‘i.” 2 Timoteo‬ ‭2‬:‭19‬ ‭

Le au pele, o loo finagalo le Atua ia e faatumulia I fua o le amiotonu e taitaia e Iesu Keriso mo le viiga ma le mamalu o lona suafa (Filipi 1:11). Aua le na o lē tautau o le amiotonu a lē Atua, ae savali ma soifua ai. E tatau ona fua mai fua o le amitonu, I le suafa o Iesu, Amene. 

OPEN HEAVENS

MATALA LE LAGI MO LE ASO SA 9 FEPUARI  2025

(tusia e Pastor EA Adeboye)

Manatu Autu: Saolotoga E Ala I Mafutaga (Freedom By Association)

Tauloto -Tusi Paia–2 Korinito 3:17  ”O le Ali‘i fo‘i o le Agaga ia; o le mea o i ai le Agaga o le Ali‘i, o i ai le sa‘olotoga.”

Faitauga – Tusi Paia – Tanielu 2:13-19

Sa i ai se ulugalii na fou mai i le lotu. Ina ua mavae ni vaiaso, sa o matou maitauina ua lē toe auai mai le fafine I le lotu. Sa o matou asiasi loa I ai. Matou te o atu ae fai mai le tinā lenei ua lē toe sau ona talu ona omai i sauniga lotu, ua lē toe mafai ona lele i le tū lua o po ma ao e mafuta ma ana uo faataulaitu. Na o lona auai atu ia matou sauniga, ae fa’alēaogaina ai le agaga faataulaitu sa i totonu iā te ia. E pei ona o’u tāua ananafi, e mafai ona aafia tagata i temoni e ala i le mafuta ma tagata o loo ulutinoina e temoni ma faatasi i nofoaga o temoni, e mafai fo’i ona avea tagata ma nisi e susulu fa’aleagaga e ala i le mafuta ma tagata o le Atua ma nofo i nofoaga e fa’atumulia i le fa’aleagaga.

O le tulaga lelei o tagata e te mafuta i ai o le a fausia le ituaiga olaga e te i ai. Afai e si’osi’omia oe e tagata e inoino i ala o le Atua, e lē mafai ona e faamoemoe e te fiafia i se olaga saoloto. Fai mai 2 Korinito 6:14 aua tou te amo fa’alēgatusa ma e lē faatuatua. Soose tasi e te avea ma au uo lelei e tatau fo’i ona uo ma Iesu. Auā afai o au uo e alolofa i le Atua ma naunau i lona auai mai e lē aunoa, e lē mafai ona e tumau i le olaga fa’aleogalua.

E lē gata i lea, poo a mea e te faalogologo, matamata pe vaavaai ma faitau i ai, e tele lo latou sao i le tele o le sa’olotoga o le a faafiafiaina ai oe i vaega uma o lou olaga. E lē mafai ona e suesue ma le loto finafinau i lau Tusi Paia i aso uma ae tumau pea i saisaitiaga a satani. A’o e faitau i le Afioga Paia a le Atua, o le a faatumuina lou loto e lona malamalama ma o le a e maua le ta’ita’iga ma faasinoga e laveaiina lou olaga. A o faapenā ona e mafuta ma le Upu a le Atua, o le a faamalamalamaina oe i ona ala (Salamo 119:130). O tagata ua faamalamalamaina e lē mafai ona faigofie ona fa’asesēina e pepelo a le tiapolo. E lē valea i latou i togafiti a le tiapolo ma o lona uiga la, e lē mafaia e le tiapolo ona ‘olegia i latou (2 Korinito 2:11). E lē gata i le Upu a le Atua, a e tatau fo’i ona e mafuta ma meatotino fa’ale Atua, e pei o pese ma ata pu’e. Ia taula’i lau vaai I mea e si’itia ma fa’amalosia oe i le Atua. Faatumu lou siosiomaga i mea a le Atua e fa’aosofia oe e saili pea lava pea i ona fofoga. A e faia faapea, o le a fa’afiafiaina oe i le sa’olotoga fa’aleagaga e sili atu, ma o i latou uma fo’i na fa’amalosi’au ma fesoasoani iā te oe o le a maua le mānava fou o le lagi.

Le au Pele e, faaalu lou taimi i tagata, so’osemea ma so’ose nofoaga e faatasi mai ai le Atua, auā o i ona luma, o i ai le saolotoga, olioli ma le filemu ma le tamāoaiga. I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 8 FEPUARI  2025

(tusia e Pastor EA Adeboye)

Manatu Autu: Saisaitiaga E Mafua I Mafutaga (Bondage By Association)

Tauloto -Tusi Paia–Salamo 1:1  ”Amu‘ia le tagata e lē savali i le filifiliga a ē amio leaga, e lē tu fo‘i o ia i le ala o ē agasala, e lē nofo fo‘i i le nofoa o ē tauemu.”

Faitauga – Tusi Paia – Numera 16:1-3, Numera 28:35

O le sasala o le manogi o taumafa mai i se umukuka e mafai ona pipi’i ia te oe, e iloa ai e tagata sa e i totonu o le umukuka. E faapenā fo’i pe a e alu i se nofoaga o fai ai ni faiga fa’atemoni, e mafai ona fepi’iti ia te oe. I le mafuaaga lea o le fai mai o le Tusi o Faataoto 21:16; o le tagata ua sese nai le ala o le mafaufau, e tumau o ia i le faapotopotoga o agaga o e ua oti.

Le au Pele e, e lē tatau ona e tafao i fale kalapu o loo ta ai musika a tiapolo ma fai ai ituaiga mea leaga uma. Ne’i e tatala atu lou loto I le tiapolo.

Sa i ai se uso talavou na alu i se nofoaga sa lē tatau ona i ai, ma na fo’i mai ua fa’atumulia i temoni. Sa lē mafai ona nofo pe tu, na o le taoto pei ua leai se faamoemoe. Sa aumai o ia i le ofisa tutotonu o le RCCG, ma ina ua o’u vaai atu ia te ia, na musuia a’u e Agaga Paia ou te fai i ai, “Ou te mana’o o’u te tatalo ma oe, tootuli.” Na fai mai le taulealea, “e lē mafai ona ou tootuli.” Ona o’u fai atu lea. “Ou te faatonu ia te oe e te tootuli.” Na tali mai, “I le igoa o ai?” Sa ou tali. “I le suafa o Iesu.” Sa ia faapea mai, “E ese lenā,” a’o tootuli i lalo le uso, sa ou tatalo mo ia, tuliese temoni mai ia te ia, ma fai i ai, “tula’i i luga.” Na fai mai, “e lē mafai ona ou tu i luga.” Sa ou tali, “ou te faatonu ia te oe e te tula’i i luga.” Ona fai mai lea, “I le suafa o ai?” Sa o’u tali, “I le suafa o Iesu.” Sa toe fai mai, “e ese lenā.” ma tu i luga. Ona ou ta’u atu lea ia te ia, “e mafai ona e alu loa i lou aiga, faamalū ma alu loa i le galuega.” Na tali mai le uso. “E lē mafai ona ou savali.” Sa ou fai atu, “ou te faatonu ia te oe.” “I le suafa o ai?” Na o’u tali. “I le suafa o Iesu.” O le taimi lava lea na savali ai le uso i lona aiga ua saoloto, amata mai i lea aso e o’o mai i le taimi nei.

Toatele tagata o loo ulutinoina e temoni i aso nei, ona sa o i nofoaga sesē sa lē tatau ona o i ai, ma mafuta ma tagata sesē. A o outou savavali faatasi ma tagata o le Atua ma galue tumau i galuega a le Atua, ua e valaauina le Atua e faatasi ma oe; ae a leai, ua e valaauina le tiapolo ma ana temoni tou te mafuta. O le tiapolo e leai se agamalū e te maua i ai; e lē alu ese ma oe, tusa pe vaai mai ua e lē lavā ma e lē toe mana’o ia te ia, pe i ai fo’i se manatu ua lavā, ua uma lona taimi. O le taimi lava e te fa’aulufale ai, e amata ai lana polokalame; o le gaoi, fasioti ma fa’aumatia (Ioane 10:10).

Atalii e, ma le afafine e, o le Atua, afai e te lē mana’o e i ai se mea e saisaitia ai oe, sola ese, mamao mai mea leaga eseese uma lava (1 Tesalonia 5:22) aua fo’i ne’i tuuina atu e outou se mea e mautu ai le tiapolo (Efeso 4;27). Ia maua ai pea lou sa’olotoga iā Keriso Iesu, I le suafa Iesu, Amene.

OPEN HEAVENS

MATALA LE LAGI MO LE ASO FARAILE 7 FEPUARI  2025

(tusia e Pastor EA Adeboye)

Manatu Autu: Faatuatua e aveese ai mauga 2(Mountain moving faith 2)

Tauloto -Tusi Paia–Luka 1:45  ”E manuia fo‘i le fafine e talitonu, e taunu‘u mea ‘ua fetalai mai ai le Ali‘i ‘iā te ia.”

Faitauga – Tusi Paia – Mataio 9:20-22

O se vaega taua I le faatuatua e aveesea ai mauga, e matuā faaosofia ai le tagata faatuatua. I nisi faaupuga, a iai lou faatuatua, e amata ona e faia gaoioiga e fua I lou faatuatua. Na faatuatua Tavita I Le Atua e mafai ona ia fasiotia Koliata, o lea na alu atu ai ma le loto toa e feiloai ma le Tupu ina ia maua se faatagaga e tau ai ma le sauai. Ina ua agai ma  faasagatau mai Koliata, e lei foi I tua Tavita, na  ia tamoe atu I le sauai ma na o’o lava ina ia u’uina le ulu o Koliata I lona lima (1 Samuelu 17:51-54). A e talitonu moni, e amata loa ona e agai atu ia ausia faamoemoega o loo e manao iai. 

I tausaga e tele talu ai, sa ou ma’i I le malaria I le aso e faia ai le aoga Tusi Paia I totonu o le Ekalesia, ma o lea na ou nofo ai I le fale. Sa ou taotooto i lou moega ma ou manatu o le a ou faalogologo I se lauga. O lē autu o le lauga o le faatuatua, ae peiseaī o loo iloa mai au e lē failauga ua ia faapea mai, ‘o le a lau mea lena e fai I luga o le moega pe afai e te iloa o faalavalava o Iesu ua e malolo ai? Tu I luga!’ Na faatupuina lo’u faatuatua , ma o lea na ou nofo ai i luga ma fai la’u faaiuga, o le a ou alu i le lotu. Sa matua ou oi i le tigā o lo’u tino, peitai na ou o’o lava I le lotu ma ou nofo I tua. I le taimi o pese ma viiga, na ou faatuatuanai i tigā o lou tino ae ou siva. E lei leva lava, ae ou faalogoina loa le fia alu i le falelētaua (tulou) ma ou te alu ese mai ai, ua mou ese le ma’i. 

Sa taitai e lo’u tamā faaleagaga se sauniga faaolaola ma na faaosofia e le Atua e faapea atu, ‘afai o loo iai se tagata iinei o loo fia maua sana pepe, alu e faatau ofu pepe o le ituaiga e te manao iai’. Sa iai se fafine na faalogo iai, ma ina ua o’o i le fale, sa ia faataua se moega fou ma ofu o se pepe tama, ma ua ia faia fa’aalialia ia  iloa uma e tagata. Na taliē iai ona tuaoi ma faapea ua tau faaletonu le mafaufau o si fafine ona o le fia fai pepe. Sa ia le amanaia I latou ae tutumau I le Upu a le tagata o le Atua, ma ina ua mavae le 9 masina, ua fanau le pepe tama, ua o’o i lona taimi e ataata ai.  

Le au pele e, amata ona e faia sau gaoioiga i le faatuatua. Poo le a lava se mea o lo’o e faatuatua e faia e lē Atua, faia loa au fuafuaga e peiseai ua e maua e pei o le fafine lea sa ou faamatalaina. Ou te folafola atu, e foai atu e le Atua matautia se vavega e ofo ai I latou I lou siomaga, I le suafa o Iesu. Peitai, e tatau ona e faia se laasaga I le faatuatua. Fai sau gaoioiga I mea o loo e talitonu e faia e lē Atua mo oe, I le suafa o Iesu, Amene.   

OPEN HEAVENS

MATALA LE LAGI MO LE ASO TOFI 6 FEPUARI  2025

(tusia e Pastor EA Adeboye)

Manatu Autu: Faatuatua e aveese ai mauga 1(Mountain moving faith 1)

Tauloto -Tusi Paia–Mareko 11:22  ”Ona tali atu lea o Iesu ‘iā te i latou, “‘Ia ‘outou fa‘atuatua i le Atua;”

Faitauga – Tusi Paia – Mataio 21:21-22

Ou te talitonu o le vaega pito sili ona malosi i le lalolagi, o le faatuatua o se kerisiano. E leai se mauga e lē mafai ona aveesea e lou faatuatua. I le Mareko 9:23, na fetalai Iesu Keriso, ‘Ai se mea ‘e te mafaia. Auā e mafaia mea uma lava i lē fa‘atuatua.”

‭‭

Ina ua fetalai Iesu, ‘mea uma’, o lona finagalo o mea uma. O le mafuaaga lea o soo se mea e te ole atu ai i le Atua, e lē mafai ona e faatagaina le masalosalo e sosolo atu i lou loto. Fai mai le Iakopo 1:6-7, afai e te masalosalo, aua e te manatu e te maua se mea. Ina ua logo atu e se tagata ia Iairo ua maliu lona afafine, fai mai le Tusi Paia, “A o Iesu ‘ua fa‘afofoga i le tala ‘ua ta‘uina mai ai, ‘ona fetalai atu loa lea o ia i lē ‘ua pule i le sunako, “‘Aua ‘e te mata‘u; tau lava ‘ina e fa‘atuatua.”Mareko‬ ‭5‬:‭36‬. 

I le fuaitau o loo taua I luga, sa finagalo Iesu ia atoatoa le faatuatua o Iairo, aua sa ia tumau I le  faatuatua, ae lei maea lena aso, o lona afafine na maliu, ua toe soifua mai. 

I le Mataio 15:21-28, na sau se fafine ia Iesu ma tagi atu mo se fesoasoani, e lei ano iai Iesu pe faalogo foi ia te ia. Peitai e o’o ane I le iuga o le aso, na faliu Iesu ia te ia ma faapea atu, “Funa e, ‘ua tele lou fa‘atuatua’. I nisi faaupuga, o loo faapea atu Iesu, tusa pe lē finagalo e tali ma tuuina atu lona manaoga, e na te tuuina atu ona o le tele o lona faatuatua. 

Afai e te maua le faatuatua, e mafaia mea uma ia te oe. A e faitau i le Tusi Paia, ma suesue lelei I latou na faamalolō e Iesu o latou ma’i, e te iloa ai e masani ona ia faia se faaupuga faapea, ‘O lou faatuatua ua e malolo ai’. I le atoaga, na mafua ona malolō i latou ona o lo latou faatuatua I le mana o Iesu e faamalolo ai I latou. O I latou e leai se faatuatua, e lei maua tele ni a latou vavega (Mataio 13:58). 

Le au pele, a e sau ia Iesu mo se mea, ou te manao ia e manatua, o Lē o loo e alu atu iai, o Lē na faia le lagi ma le lalolagi atoa. E mafai ona na o le fiti o ona aao ona mou ese lea o le lalolagi. Sa ia faaalia muamua le aumaia o le vai mai se ma’a. E leai ma se mea e lē mafaia ona ia faia. O se mea o loo e manatu o se faafitauli telē, e matuā laitiiti ia te ia, tau lava ina ia e malolo i le tulaga moni lenei, ua e tuuina atu lau mataupu I le Atua matautia e mafaia mea uma (Ieremia 32:27), ma amata loa ona e vivii ma faafetai I le Atua. Tau lava o lou talitonu, ona e vaai lea I vavega matautia, I le suafa o Iesu, Amene.  

OPEN HEAVENS

MATALA LE LAGI MO LE ASO LULU 5 FEPUARI  2025

(tusia e Pastor EA Adeboye)

Manatu Autu: Amataga itiiti (Little beginnings)

Tauloto -Tusi Paia–Iopu 8:7  ”E ui lava ‘ina itiiti lou amataga, ‘ae matuā fa‘ateleina lou i‘uga.”

Faitauga – Tusi Paia – Mataio 17:15-16, Galuega 5:12-16

O so’o se failauga a le Atua, e lē taumate na iai o latou amataga itiiti, ma o le maoae o lō latou tulaga I le taimi nei, o se tautinoga lea I lo latou faamaoni i le faasolo mai o tausaga. Afai ua e tau faavaivai I le vaitau o amataga itiiti, e te ono taofia lou avanoa e te ui ma e tofo ai I mea e faia e le Atua. 

I le 1980, a’o ou malaga faasolo I totonu o Nigeria, e tapena ma fuafua mea uma e manaomia i polokalame a le Ekalesia ina ia saunia lelei, sa o’o ia te au se tulaga matautia e lē faagaloina. Sa ou lauga i le nuu o Warri ae ou maua loa se faaaliga. I le faaaliga, sa ou vaai I se tamaitiiti na fanau mai o tauaso, ua pupula ona mata.  Ona ou te lei matua lelei faaleagaga, ou te lei faatali seia maea ona faailoa mai e lē Atua vaega uma o le faaaliga ae ua ou faapea atu, ‘o loo iai se tamaitiiti iinei e tauaso, e finagalo le Atua e faapupula ou mata, sau vave’. E leai ma seisi na gaioi mai. Ua ou toe faapea atu, ‘ou te iloa lelei le faaaliga na ou vaai iai, e leiloa po’o sou atalii ae o lo’o I le fale, alu e aumai o le a ou faatali atu’. E leai lava se tagata e gaoioi. Na ou iloa lelei e lē pepelo le Atua, o lea na ou toe faapea atu ai, ‘o le a ou faatali mo le itula pe a maea le sauniga. E leiloa pe o e musu e misia se vaega o le polokalame, ma a maea le sauniga, alu e aumai lou atalii’. Na ou faatali ina ua maea le sauniga peitai e leai se tamaitiiti na aumaia. O le faanoanoaga, na maea le taimi ma ua ou tuua lea vaega ae agai atu I Akure o le isi nuu e sosoo ai I le polokalame. Ona na ou faatali mo le itula, na tuai ona ou taunuu I le nofoaga lea, ma e o’o atu ua fai le lauga e seisi failauga. E lei leva a’o faagasolo le lauga, ua tu I luga se tamā matua. Sa iai se tamaitititi ma ia ma ua amata savavali mai i le pulela’a. E tauaso le tamaitiiti, ma ina ua ou vaai totoa atu iai, ua ou iloa o le tamaitiiti lea I le faaaliga. Na manaomia e le tamā se tatalo mo lona atalii, ae ou te iloa e faasā nei e le au leoleo ma latou faapea atu, ‘ e lē mafai ona e sau i le pulelaa i le taimi o le lauga’. Na ou tamoe atu I le au leoleo ma faapea atu, ‘aua le taofia I laua, na ou vaai I le tamaitiiti lea I se faaaliga ma o le a o’o mai se vavega ia te ia’. Peitai ae ou te lei o’o atu iai,  na la faalogoina lo’u savali atu, ua faliu mai le tamaitiiti ia te a’u, ma pupula ona mata. 

Le au pele e, na faaalia mai e lē Atua lona matautia I le vaitau o lo’u amataga itiiti ma o loo tumau pea lona faamaoni e o’o mai I le taimi nei. E mafai foi ona ia faaali atu ia te oe lona matautia I soo se vaega o loo e iai I lou olaga, I le suafa o Iesu. Ia e tumau I le faamaoni I lou vaitau o amataga itiiti, ma e o’o mai le taimi, o lē a e vaai ai I le matautia o le Atua ma lona galue mai I lou olaga, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 4 FEPUARI  2025

(tusia e Pastor EA Adeboye)

Manatu Autu: E leai se avanoa mo le paiē  (No room for laziness)

Tauloto -Tusi Paia–Faataoto 19:15  ”O le paiē e tupu ai le moe gase; ma le tagata fa‘avaivai, e fia ‘ai lava ia.”

‭‭

Faitauga – Tusi Paia – Faataoto 24:30-34

E iai nisi tagata e manatu e mafai ona latou manuia e aunoa ma le galue malosi. Sa ou iai I se polokame a ni tamaiti a’oga ma ua faate’ia a’u ina ua ta’ua mai e iai tamaiti a’oga sa na o le anapogi ma tatalo e aunoa ma le fa’aaluina o latou taimi e su’esu’e ma tapena ai mo latou su’ega. Ina ua ou fesili iai, a ua latou fa’apea mai, latou te talitonu o le a fesoasoani mai Agaga Pa’ia iai latou. Ua latou fa’amanatu mai la’u faamatalaga i le fesoasoani mai o Agaga Pa’ia e a’oa’oina a’u i le auala e tali ai ma faavasega fesili faigata tau matematika e faaaoga ai le Tusi Paia . Sa ou fa’amatala iai latou, sa maea ona ou su’esu’eina ma galueina ni fuaiupu faafuainumera se 186 i totonu o le 18 masina ona fa’ato’a fa’aalia mai lea ia a’u le tali, mai se tasi o faitau o le Tusi Pa’ia.

O le matafaioi a Agaga Pa’ia o le fa’amanatu mai ia i tatou mea uma ua maea ona a’oa’oina ai tatou. O lona uiga, e mana’omia ona amata so’o se taumafaiga i le faia o sau galuega. Afai e te lē tapena ma galue malosi, e te toilalo, ma o le a faamafanafana Agaga Pa’ia ia te oe. I le Atua, e leai se avanoa e te paie ai.

O le galue malosi ma le filigā, e manaomia mo lou ‘ausia o le tumutumuga. E moni e tatau ona tatou tatalo, anapogi ma suesue i le Upu ae le mafai ona tatou lafoa’i le galue malosi. O tagata ta’uta’ua e galulue malosi; o le mafua’aga lena latou te manuia ai.

Le ‘au pele, o lou tumau i le tumutumuga, e sili ona faigata nai lo le taumafai e ‘ausia lea tulaga. E sili atu se tauiviga e te faia ina ia e tumau i le siamupini, nai lo sau taumafaiga e te ausia lea tulaga!

O le upu o se tasi tagata fai mafaufauga , “O le maualuga na ‘ausia e tagata lauiloa ma mafai ona latou tumau ai, sa lē fa’ataunu’uina i se malaga fa’afuase’i, peita’i a’o tofafā i latou o loo latou galulue faatasi,  o loo latou galulue punoua’i aga’i i le tumutumuga i le po”

Fai mai le Faata’oto 22:29 “Ua e iloa le tagata ua fa’ata’alise i ana galuega? E tu o ia i luma o le Tupu, ae le tu i luma o tagatānuu”. A fai e te lē filigā, e te lē ausia se mea. E lē mafai ona e pi’i lima ma e manatu o le a galue le Atua mo oe. O Paulo sa ia faapea mai, o ia sa totō, ae faasūsū e Apolo, a’o le Atua na faia le fa’asiliga. Afai latou te lei totō pe fa’asusū,  e le mafai ona iai se fa’asiliga mai le Atua. (1 Korinito 3:6). A fai sa galue le aposetolo ta’uta’ua o Paulo, e faifaipea ma le filigā, e leai sou alofaga e te paie ai! Fai mai le Ioane 9:4 “E tatau ‘ona ‘ou faia galuega a lē ‘ua ‘auina mai a‘u, manū o ao; a o‘o i le po, e lē mafaia e se tasi ‘ona galue ai.”

O upu ia mai le Tusi Pa’ia, o upu a lo tatou Alii o Iesu Keriso. Afai sa galue lo tatou Alii, ma ia faia le finagalo a lona Tama ma le filigā, e tatau i tagata faatuatua uma ona mulimulita’ia. E pei lava o Ia, e tatau ona tatou faia uma galuega a lē na auina mai i tatou, ma o le tatou faia ia manuia, e tatau ona tatou ‘alo ese ma le leai o se galuega e faia ma le paiē. Po’o e filigā i mea uma o lo’o e faia? I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 3 FEPUARI  2025

(tusia e Pastor EA Adeboye)

Manatu Autu: E faamaise e le Atua (God comforts)

Tauloto -Tusi Paia–Isaia 66:13  ”E pei o le tagata ‘ua fa‘amaiseina e lona tinā, e fa‘apea ‘ona ‘ou fa‘amaise ‘iā te ‘outou; e fa‘amaiseina lava ‘outou i Ierusalema.”

‭‭

Faitauga – Tusi Paia – Isaia 40:1-2

O se tasi o suafa o le Agaga Paia o ia o ‘Le Fesoasoani’. Na faia e Iesu se folafolaga I le Ioane 14:18 “Ou te lē tu‘ua ‘outou o mātuaoti, ‘ou te sau ‘iā te ‘outou.”

‭O ia o le ‘Upu Moni’( Ioane 14:6), o lona uiga a faapea mai e na te lē tuua outou o matuaoti, o lona finagalo lava lea. Peitai e tele taimi e iai lava i se tagata le faanoanoaga ma e lē fia faalogo i le Atua, e lē maua e lea tagata le faamafanafanaga ma le fesoasoani o loo tuuina mai e ia. 

O le Atua o le fesoasoani sili, ou te faia lea faamatalaga e faavae i le Upu a le Atua faapea mea ua tutupu lo’u olaga. Ua ou ui I le tele o mea faigata ma sa iai lava le Atua e fesoasoani ia te a’u. I le tele o tausaga talu ai, sa iai se tama talavou e ese ma le lelei sa ou iloa, sa ou fiafia iai ona o lona naunau I le galuega a le Atua I talaiga faapea aoga Tusi Paia. I le taimi o le sauniga mo tupulaga talavou, na maliu faafuasei ai. Na o mai sui o le autalavou ma tatalo ina ia toe ola. Ina ua maea se taimi, na toe nofo mai I luga ua ola ma faapea mai, ‘o loo fetalai mai le Atua e ta’u atu ia te outou o loo tou faalavelave ia te ia’, ona toe taoto lea ua maliu. Ina ua ou faalogo I lona maliu, sa ou faanoanoa mo ni vaiaso. E iai le aso na faapea mai ai le Atua, ‘Aisea e te  faanoanoa ai?’ Ua ou tali atu iai, ‘auā ua e aveesea le tama lea ma a’u’. Na tali le Atua, ‘leai ua e faanoanoa ona ua muamua le tama lea ia te oe I le lagi. Ta’u mai ia te a’u, e te lē fiafia pe a e alu atu I se atunuu e te lei alu muamua iai ae faafeiloai mai oe e se tagata e te masani ai?’ Na ou tali, ‘Ioe, e moni.’. Ona ia faapea mai lea, ‘o lau talavou lena ua muamua e faafeiloai oe pe a e o’o mai I le lagi’. Na vave ona faamalosia lo’u agaga I le maea ai o le ma talanoaga lea.  

Ina ua faapea mai le Atua “Ou te lē tu‘ua lava oe, ‘ou te lē tu‘ulafoa‘i lava ‘iā te oe”, I lē Eperu 13:5, o le mafuaaga o lea Upu, ia faamafanafanaina oe I lou silafia, o loo iai o ia ma oe I mea uma.  Afai o loo e iai ini faanoanoaga ona o ni mea faigata ua tutupu, ou te ta’u atu ma le faamaoni, o loo iai Iesu I ou tafatafa, o loo tuu atu ona aao I ou tauau ma faamafanafana ma faamaise ia te oe. E pau le tulaga e te manaomia, o le tatala o lou loto ia te ia ina ia faamalōlō I lou loto momomo. E alofa o ia ia te oe e sili atu I ou manatunatuga uma, ma e lē fia silasila o ia o e faanoanoa. Ia e faataga lē Atua e fesoasoani, faamaise ma faamafanafana ia te oe. 

Tatalo

Tamā, ou te tatala lo’u loto ia te oe. Faamolemole, faatumu ia te a’u I lou alofa e faamafanafana ma fesoasoani ia te a’u, i le suafa o Iesu, Amene.  

OPEN HEAVENS

MATALA LE LAGI MO LE ASO SA 2 FEPUARI  2025

(tusia e Pastor EA Adeboye)

Manatu Autu: E Puipui E Le Atua (God Protects)

Tauloto -Tusi Paia–Salamo 121:7  ”E leoleo e le ALI‘I ‘iā te oe i mea leaga uma lava; e leoleo mai o ia i lou agaga.”

‭

‭‭

Faitauga – Tusi Paia – Salamo 91:1-16

O lo’u Atua, o lona suafa o le Afi Ma’ama’ai (Eperu 12:29). Peitai na te lē faaumatia lana fanau a’o o latou fili. E fuā tele le finagalo o le Atua pe a osofaia e ‘au a le fili lana fanau. E faamautinoa e lē Atua e fa’atā’ape’apeina le fili ma sosola i ala eseese e fitu (Teuterenome 28:25). Na folafola e le Atua na te puipui ia te oe, e leai so outou lauulu e tasi e paū (Luka 21:18).

Faapenei o’u te lē o ola i le aso lenei pe ana lē o se tamā faitama lo’u Atua, ma e mafai ona o’u faamatala atu ia te oe le tele o taimi na ia laveaiina ai a’u mai puapuaga semanū e fano ai. Ina ua matou omai ma lo’u aiga matou te nonofo I le nofoaga ua avea nei ma Aai o le Togiola, sa maua solo gata i so’o se vaega o le fanua. O nisi o ia gata, oka se lapopoa e mafai ona tumu ai tua o se taavale Mercedes Benz. Ou te manatua le tasi aso na o’u alu atu ai i totonu o le potu o la’u fanau ma maua ai se gata. Ou te lē iloa tonu pe aisea na o’u alu ai i le potu; pau le mafuaaga o’u te mautinoa na ta’ita’iina a’u e le Atua o’u te alu auā e finagalo ia malu puipuia la’u fanau.

E puipui fo’i le Atua ia te oe mai malosiaga fa’aleagaga. E tele nauā taimi na taumafai ai le tiapolo e osofa’i ia te a’u, aemaise lava pōpō fou o la’u galuega ina o fa’ato’ā fa’aa’oa’o ma fa’amasani e fa’ato’ilalo le tele o osofaiga mai le mālō o le pouliuli. O le isi aso a’o fai la matou sauniga o le Agaga Paia, sa i ai ni faataulaitu se toalua i le potopotoga sa taupulepule e osofa’i ia te a’u. Sa faapea atu le tasi I le isi, “O le taimi lenei; ia ta osofa’i loa I le taimi nei.” E ui e afe ma afe tagata sa auai I le sauniga, na tatala e le Atua la’u faalogo, ma ou lagona lelei ai a la faamatalaga. Sa ou taofi I le taimi lea le sauniga ma fai atu i faataulaitu e omai I fafo pe afai e lē manana’o e o’o iā i laua le toasa o le Atua. Na fa’ateia tagata uma ina ua omai i laua ma ta’utino lo la sesē. Pe ana lē seanoa le Atua na faailoa nei mea ia te a’u, semanū e ese se taunuuga e tupu.

Afai o oe o se atali’i poo se afafine o le Atua, e tatau ona e savali i le mautinoa o lana puipuiga I ou luga. Aua e te fefe I ū fanafana a le fili, e lē mafai ona latalata mai ia te oe auā o loo puipui lou Atua ia te oe. Ua ou matua’i malamalama ma mautinoa I le puipuiga ma le fa’amalumaluga a le Atua i o’u luga, afai o’u te savali ma tu’ia lo’u vae i se ma’a, o le a o’u tepa i le Atua ma faapea, “Lē Alii e, talosia ou te le’i fa’atigā ia te oe i so’ose ala. Afai ua ou sesē faamolemole faamagalo ia te a’u.” E te faia faapea auā fai mai lana upu, E auina mai e ia ana agelu e tausi ia te oe; ne’i tu’ia lou vae i se ma’a (Salamo 91:11). I le suafa o Iesu, Amene.