Samoan Devotional

OPEN HEAVENS

MATALA LE LAGI MO LE ASO GAFUA 3 MATI  2025

(tusia e Pastor EA Adeboye)

Manatu Autu: Mo Lona finagalo (For His pleasure )

Tauloto -Tusi Paia–Faaaliga 4:11 “Lo matou Ali‘i e, ma lo matou Atua e tatau lava oe ‘ina ‘ia tu‘u atu ‘iā te oe le vi‘iga, ma le fa‘ane‘ene‘ega ma le mana. Auā na e faia mea uma lava, ‘ona o lou finagalo fo‘i e i ai i latou ma ‘ua faia.”

Faitauga – Tusi Paia – Mareko 8:22-26

Na faia e le Atua le lagi ma le lalolagi I le amataga (Kenese 1:1-3). O le tauloto mai le Tusi Paia o le asō  o loo faapea mai na faia mea uma lava ona o lona finagalo. O lea e mafai ona ia pulea mea uma, ma o le tulaga lea na usitai ai ia te ia le matagi ma le sami (Mareko 4:35-41). 

Na faia oe mo le finagalo o le Atua peitai e lē mafai ona faatino le finagalo o le Atua ia te oe, pe a e ma’i. I le Mareko 3:1-5, ina ua silasila atu Iesu  i le tamaloa ma le lima gase,  masalo ma ia manatunatu ia te ia lava, ‘Lima, oe te lei faia oe e gase, ae na faia oe ia patipati’. E lei tatalo pe ole atu le tamaloa lima gase mo se faamalologa, na faamalolo e le Alii le lima gase aua e lē o lona finagalo ia gase. 

Sa iai se tamā matua sa alu atu I lana taavale Ford ae faafuaseia ona leaga i luga o le auala ona faasee lea I tafatafa o le auala. A’o ia tutū ai I autafa o le taavale ma le femēmēai, na tu se taavale a se tagata mauoloa ma fesili atu pe manaomia se fesoasoani. Na oso I fafo le tamaloa mauoa mai lana taavale, tatala le keli o le taavale lea ua leaga, omiomi ni vaega o le taavale, ona toe faaola loa lea o le taavale. Na toe ola mai le taavale. Ua ofo lenei tamā matua, ua faliu ma fesili atu i le tamaloa mauoa, ‘aisea na e tu ai e fesoasoani mai ia te a’u?’ Na tali atu le tamaloa mauoa, ‘O lo’u igoa o Henry Ford. Na ou faia le taavale lenei e ola ma alu, ae lē o le pe ma tū I tafatafa o le auala’. Le au pele e, o Lē na faia oe, o loo ui ane i le taimi nei, ma e mafai ona ia toe faaleleia mea uma I lou olaga e lē o atagia ai lona finagalo, ina ia viia ai o ia, i le suafa o Iesu. 

Afai e lē atagia le faamoemoe na faia ai e le Atua se tagata, e lē o ō gatasi ma lona finagalo. Afai o loo iai se vaega o lou olaga e lē o faaalia le faamoemoe o le Atua, ‘aua le tomumu, ae amata ona folafola iai le finagalo o le Atua. E faia e le Atua mea uma e tusa ma lona finagalo, ma ē tūlai I lona finagalo i soo se vaega, e matuā galue lena vaega i mea uma lava, e tusa ma le pule a lona finagalo (Efeso‬ ‭1‬:‭11‬). 

I le faitauga o le Tusi Paia o le asō, na aumai se tauaso ia Iesu. Na taitai e Iesu I tua o le aai, feanu i ona mata, ona pa’i lea iai o ona lima. Ina ua fesili atu i le tauaso pe ua na iloa atu se mea, na ia tali mai, ‘o loo ou vaai atu i tagata e pei o laau o loo savavali’. E ui ina maua sina sulu, e le o maua le lelei atoatoa. E lei tuua e Iesu e soifua ai faapea. Na ia toe pai atu ia te ia, ona manino ai lea o lana vaai. E finagalo le Atua e lelei atoatoa so’o se vaega o lou olaga, aua e fiafia I ai lona finagalo. 

Tatalo

Le Alii e, faamolemole ia feliuaina lo’u olaga ina ia avea soo se vaega e faafiafia ai lou finagalo, i le suafa o Iesu, Amene.  

OPEN HEAVENS

MATALA LE LAGI MO LE ASO SA 2 MATI  2025

(tusia e Pastor EA Adeboye)

Manatu Autu: Ae mo le Alii (But for the Lord)

Tauloto -Tusi Paia–Salamo 124:6 “Ia fa‘afetaia le ALI‘I, o lē na lē tu‘uina atu i tatou ‘ina ‘ia saeia i o latou nifo.”

Faitauga – Tusi Paia – Salamo 124:1-8

A o o’u faiaoga i le Iunivesite o Ilorin, a uma a’u vasega o le taeao, ona o’u tuua lea o le lotoā ma o’u alu i lo’u aiga mo le ‘aiga ma malologa o le aoauli a’o le’i toe fo’i mo vasega o le afiafi. O le taimi fo’i lea o loo avea a’u ma faifeau a le aulotu RCCG i Ilorin, ma sa tumu lo matou fale i tagata i taimi uma. O le tasi aoauli ina ua uma le tausiga, sa o’u taoto o’u te malolo i luga o le moega i totonu o le potu malōlō a’o le’i o’u fo’i atu mo a’u vasega mulimuli o le aso. Sa moeiini o’u mata ina ia faapea ai tagata sa savavali solo o la o’u te moe ma aua ai le faalavelave mai ia te a’u.

A o o’u taoto, sa u’u ese tagata o’u lima ma o’u vae ma punou mai i lalo peiseai e sogi mai ia te a’u. I le amataga sa ou manatu o lo’u toalua, peita’i ane sa ou iloa o se isi e mafaia ona taofia o’u vae ma o’u lima i le taimi e tasi, e tatau ona maualuga mamao ma malosi atu na i loo ia. Sa o’u pupula a’e i le taimi lea, ma o le (ua matua’i le mafai ona ou iloa poo le a) ua mou ese. 

Sa o’u mafaufau po’o le a lenei mea ua tupu, ae o’u faalogo atu ua sosolo pei e tafe agai atu i lalo se lagona malulu i lo’u maea alio. Sa o’u faagaioi pei e lūlū lo’u tino ma ou alu i a’u vasega. A’o ‘ou I le aoga, sa amata ona o’u faalogoina se tiga ogaoga o lo’u manava, ma faasolo atu ai i le manava tatā ma le faasuati (tulou). A o o’u toe fo’i atu i le fale, sa ou tolotolo mai i le taavale agai atu I le fale lē tā’ua ona ua lē mafai ona o’u tu pe savali. Ona ou fesili lea, “Le Alii e, aisea ua tupu ai lenei faafitauli ia te a’u?” Sa ia tali mai, “Ou te mana’o ia te oe ia e iloa tau o sina ata o le tele o taua o loo o’u tauina mo oe e te lē o malamalama i ai.” O le taimi na saunoa mai ai faapea le Atua na uma ai le manava tigā, manava tatā ma le pua’i. 

E te le o iloa pe lagonaina le telē o le puipuiga a le Atua ia te oe a’o e feagai ma ou tiute i aso uma. Atonu e te manatu o lou alu atu ma toe sau saogalemū e mafua i lou faaeteete po’o le lelei o lau ave taavale, peita’i talitonu mai ia te a’u, e lē mafai e lou mataalia poo lou poto e ave taavale ona laveaiina oe mai faalavelave na taupulepule e le tiapolo; na o le Atua e mausalī ai lou saogalemu. Afai e te manatu o loo si’omia oe e tagata leoleo, a’o le a le mea e tupu pe afai latou te fetaia’i ma osofaiga a ni tagata e toatele atu ma sili atu le malolosi o a latou auupega? O le mafuaaga lea o le fai mai o le Salamo 127:1; e mataala fua i latou e leoleo pe afai e lē leoleoina e le Alii le aai.

Le au pele e, o nisi tagata na faimalaga i le ala o loo e ui ai na ave fa’amalosia e tagata leaga pe fasiotia fo’i. E lē gata i lea o le ituaiga taumafa e tasi o loo e tausami ai na aai ai nisi ma onanā ma maliliu ai. E tatau ona e faafetai i le Atua i taimi uma mo lou saogalemū. A na lē seanoa le Alii e te lē aulia mai le asō (Auega 3:22). I le suafa o Iesu Amene.

OPEN HEAVENS

MATALA LE LAGI MO LE ASO TOONAI 1 MATI  2025

(tusia e Pastor EA Adeboye)

Manatu Autu: Fa’afiafia I Le Atua (Please God)

Tauloto -Tusi Paia–Faataoto 16:7 ”A fiafia le ALI‘I i ala o le tagata, ‘ona fa‘atupuina lea e ia o le leleiga ma ia, o ē ita ‘iā te ia.”

‭‭

Faitauga – Tusi Paia – 1 Tupu 3:3-14

So’o se taimi e te fa’afiafia ai le finagalo o le Atua, o le a ia faia ai se mea e sili ona lelei mo oe. I le 2 Nofoaiga Tupu 1:6-15, na fai mea sili Solomona mo le Atua, i se tulaga e lei faia muamua e Solomona i ni tagata, pe taumafai e faamalie i latou, leai, na mana’o Solomona e faamalie le finagalo o le Atua ofoofogia. O loo talanoa pea tagata e uiga iā Solomona i aso nei ona o mea tetele na faia e le Atua i lona soifua. Na foai e le Atua iā te ia manuia i le tino, i le soifuaga atoa o Solomona sa leai ma se taua na tupu, aua na faanofo filemūina e le Atua ona fili i ona itu uma (1 Tupu 5:4). Na faamanuia fo’i le Atua ia te ia i le mafaufau ma le ‘oa, o lona poto ma lona tamāoaiga sa tele nauā, na fetalai ai le Atua sa leai se tasi na muamua iā Solomona e tusa ma ia, e lē toe tupu mai fo’i se tasi e mulimuli iā te ia, e tusa ma ia. Afai e te faitau I le 1 Tupu 3:15-28; o le a e silasila ai i se fa’ata’ita’iga pe na faafefea ona faamanuia e le Atua Solomona.

A e fa’afiafia i le Atua i lau foai, o le a ia avatu ia te oe faamanuiaga mata’utia e tele sautualasi, afai e uma atu oe mai lenei soifuaga, ae selesele pea e lau fanau, o a latou fanau ma fanau a latou fanau le taui. Ou te tatalo ia faapupulaina e le Atua mata o lou loto ia e iloa ai o le seleselega o se tulaga e te maofa ai, pau le vaega e manaomia ona e faia o le lūlū, ma se faamoemoe ia faamalieina ai le finagalo o le Atua, ma lalafo ia te ia e fai lona finagalo. E lē pine o le a omai le lalolagi ia te oe ma fesili pe aiseā ua tulaga ese ai lou manuia.

A fiafia le Alii i ala o se tagata, na te poloaiina malosiaga o i le fogaeleele, I le lagi, ma lalo ifo o le fogaeleele e omai e fesoasoani i lea uso. E pei ona o tatou faitau i le fuaiupu tauloto o le asō, e o’o iā i latou e lē fiafia i lea uso, o le a fa’amalosia e faamanuia ia te ia.

Ina ua fai Isaako iā Esau e alu e tuli se manu mai le vao e sauni ai se meaai manogi mo ia e ‘ai ai, ina ia faamanuia atu ai ia te ia manū e lei oti, na avatu e Iakopo se meaai manogi iā Isaako ma amata liligi atu ai e Isaako faamanuiaga i ona luga auā na fiafia tele o ia i lana mea taumafa. Na faamalieina le loto o Isaako ma ia faamanuia ai iā Iakopo i le sau mai le Lagi, o le lelei o le fanua, ma saito ma uaina e tele, ma ‘ia auauna nu’u ia te ia (Kenese 27:28-29). Afai e mafai e se tamā o le olaga nei ona faamanuia i lona atalii sa fa’afiafia ia te ia, i ituaiga manuia faapea, e sili atu ona faamanuia lo tatou Tamā o I le Lagi o le e ona uma ario ma auro, ma manu uma o le vaomatua, o manu e tata’a i mauga e afe (Hakai 2:8), (Salamo 50:10)?

A fiafia le Atua i ou ala ma ia faamanuia ia te oe, e leai se isi e mafai ona ia faalavelavea ou manuia. E leai se tagata soifua, temoni, faataulaitu poo se aitu vavalo e mafai ona tete’e ia te oe pe a e usita’i i le Atua. Sa tele nauā faamanuiaga i luga o Aperaamo, e lē o’o i ai se fetu’u poo se fa’asalāvei mai so’o se malosiaga leaga. Le au Pele e, gaua’i i le Atua i ou ala uma, ona ia faa faula’i lea o ona manuia i ou luga ma luga o lou aiga i le suafa o Iesu. Faaaoga le Upu a le Atua ma ta’iala e fa’amautinoa ai ou ala poo avea ma taulaga mālie i le Atua, I le suafa o Iesu Amene.

OPEN HEAVENS

MATALA LE LAGI MO LE ASO FARAILE 28  FEPUARI  2025

(tusia e Pastor EA Adeboye)

Manatu Autu: Malamalama i seleselega (Understanding harvests).

Tauloto -Tusi Paia–Kenese 8:22 ”O aso uma o le lalolagi e lē toe utuvā ai, o tausaga e lūlū ai ma tausaga e selesele ai, o le ma‘alili fo‘i ma le vevela, o le vaito‘elau ma le vaipalolo, o le ao fo‘i ma le pō.”

‭‭

Faitauga – Tusi Paia – Mareko 4:26-29

O le tulaga muamua e tatau ona e malamalama ai I seleselega, e maua uma mai le Atua. Fai mai le 1 Korinito 3:6 “Na ‘ou totōina, na fa‘asūsūina e Apolo; ‘ae peita‘i o le Atua na fa‘atupuina.” E le gata I lea, o seleselega, e maua I vaega, e pei ona fetalai ai Iesu, e ta’itolugafulu, ta’iono sefulu ma le ta’i selau (Mareko 4:20). 

O tagata popoto o le Tusi Paia  e talitonu, o seleselega e ta’itolugafulu e maua pe a e foai I le au kerisiano (Kalatia 6:9-10). Afai e te fesoasoani I se uso I le aiga o le au faatuatua, o loo e lūlū I eleele e fua mai ai e taitolugafulu. Ao lūlū Toreka I ola o tagata I lana Ekalesia, e na te lei silafia o le a ia maua se seleselega e toe faatūina mai le oti (Galuega 9:36-42). 

E iai foi tagata popoto o le Tusi Paia e talitonu e te maua fua e taiono sefulu pe a e foai I lau faifeau (Mataio 10:41). A e faia se mea mo lau faifeau  ae faapea mai o ia, ‘Ia faamanuia lē Atua ia te oe’, o le fatu ua e toto e fua mai ai seleselega e ta’iono sefulu, e pei ona tatou vaaia I le 1 Tupu 17:10-16. O le fafine ua oti lana tane i Sarefata ma lana tama, ua leai se faamoemoe ae lei tuuina atu le lā meaai mulimuli ia Elia. Na toe feliuaina lona tulaga, ma I le vaitau o le oge atoa, e lēi uma le falaoa i le kate pe faaitiitia foi le suauu i le fagu (1 Tupu 17:16). E le gata I faamanuiaga I oloa, Ina ua maliu lana tama, na toe faatūina e lē Atua mai le oti (1 Tupu 17:17-24). 

O nisi tagata popoto o le Tusi Paia e manatu o le foai I le ositaulaga sili e maua ai seleselega e tai selau. Fai mai le Eperu 5:1-4, o le ositaulaga sili o le tagata ua filifili e le Atua e fai ma sui o tagata i luma o le Atua. O le tagata e pito I maualuga ua filifilia e le Atua e vaaia oe, o se sui o Iesu Keriso, lo tatou ositaulaga  sili (Eperu 4:14-16), ma a e foai i lea tagata, ia e iloa, e mautinoa e faamanuia lē Atua ia te oe e fua tai selau ma sili atu. 

O fea, pe faapefea foi ona e lūlū e matuā taua e fua iai le aofaiga o seleselega e te maua mai le Atua. E tatau foi ona e mautinoa, o loo e lūlū ona o lou alofa I le Atua, ae lē na o lē naunau ia maua fua o seleselega mai ia te ia. E finagalo lē Atua e te foai ma le loto malie ma le agaga fai taulaga (2 Korinito 9:7, Mareko 12:41-44), auā e faamasino o ia I o tatou loto (1 Samuelu 16:7). Ou te tatalo e te maua faamanuiaga faulai ao e ava i le Atua I lau foai, I le suafa o Iesu. 

Tatalo

Tamā, ou te talia seleselega faulai mo fatu lelei uma ua ou lūlū, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 27  FEPUARI  2025

(tusia e Pastor EA Adeboye)

Manatu Autu:  O le eleele lelei (The good ground )

Tauloto -Tusi Paia–Mareko 4:8”A ‘ua pa‘ū isi i le ‘ele‘ele lelei, ‘ua tutupu a‘e, ma tupu tele, ‘ua fua mai, e ta‘itolu sefulu i nisi, o ta‘iono sefulu i nisi, ‘ae ta‘iselau i nisi.”

‭‭

Faitauga – Tusi Paia – Mareko 4:20

Ou te fia talanoa i le asō, i le uiga o le lūlūina o fatu i ni eleele lelei. O loo faamatala e Mareko 4:20, o fatu na pauu i luga o eleele lelei, na fua mai ai seleselega. O le uiga o lenei faaupuga, e le'i pauū nei fatu i autafa o le auala, ae na faasusuina i latou e le Atua, ma e le'i faatamaia foi i latou e ni vaotuitui. A e fia lūlūina au fatu i eleele lelei ma e faamanuiaina i le tele o seleselega, e tatau ona outou faia mea nei:

1. Ia e ava I le Atua i le oa ma le tamaoaiga ua e maua, ma ia e usitai i ana poloaiga mo le manuia tautupe.

“Ia e āva i le ALI‘I i lou ‘oa ma le fa‘apolopolo o au mea uma e tutupu; ‘ona tūtūmu ai lea ou fale saito i le mau; e feosofi fo‘i au tu‘ugāuaina i le uaina fou.”Fa‘ata‘oto‬ ‭3‬:‭9‬-‭10‬ 

2. Ia e lagolagoina ma le fiafia galuega uma a le Atua i le foai tautupe. O le foai i le galuega a le Atua, e aofia ai le faatupeina o ni galuega fai, faamanuia i le ekalesia, pe lūlū i olaga o auauna a le Atua.

“Ia ta‘ito‘atasi ma foa‘i e pei ‘ona filifili i lona loto; ‘aua ma le tigā, ‘aua fo‘i ma le fa‘atauānauina; auā e alofa le Atua i lē ‘ua foa‘i ma le loto malie.” 2 Korinito‬ ‭9‬:‭7‬ ‭

3. Foai atu i e matitiva ma ē e lē tagolima. Afai e o’o atu ou aao e faamanuia I ē matitiva ma ē e lē taualoa, e tauia ma faamanuia oe e le Atua.

“O lē ‘ua alofa i le tagata mativa, na te avatua ana mea i le ALI‘I; e tauia mai fo‘i e ia ana mea na avatu ‘iā te ia.” Fa‘ata‘oto‬ ‭19‬:‭17‬ ‭

4. Ia e matamau ma loto foai. O le loto foai e tosina mai ai faamanuiaga a le Atua, o soo se mea e te foai i se tagata, e te toe maua mai ai fua e tele. 

“E fa‘atamao‘āigaina le tagata matamau; o ia fo‘i lē fa‘asūsū i nisi, e fa‘asūsūina lava o ia.”

‭‭Fa‘ata‘oto‬ ‭11‬:‭25‬ ‭

5. Faatali mo faatonuga a le Atua a o le'i faia faaiuga I tulaga tau tupe.  A e saili I ona fofoga ae lei faia se faaiuga, e na te taitaiina oe i ala tonu uma, ae o i latou e faatopetope ona faia ni feagaiga po o ni teugaoa e aunoa ma le sailia o le finagalo o le Atua, e mū o latou tamatamailima.

“‘Ia e fa‘atuatua i le ALI‘I ma lou loto ‘atoa; ‘ae ‘aua le fa‘alagolago i lou lava atamai. ‘ia e manatua o ia i ou ala uma, ‘ona fa‘atonuina ai lea e ia lava ou ala.” Fa‘ata‘oto‬ ‭3‬:‭5‬-‭6‬ ‭

Le au pele e, afai sa e luluina au fatu i le auala, i luga o le eleele papa, po o totonu o vaotuitui, o le talalelei lenei, afai e suia ou ala uma ma amata ona e ola I afioga a le Alii e pei ona taua I luga,  e te maua ni seleselega ona o le lūlū i eleele lelei. Ou te tatalo ia toefuataiina e le Alii mea uma ua leiloloa mai le luluina i eleele sese, ma o le a fua mai ni seleselega tetele i au fatu e lūlūina e amata atu nei, i le suafa o Iesu. O e lūlū ea i eleele lelei? I le suafa o Iesu, Amene.

OPEN HEAVENS

MATALA LE LAGI MO LE ASO LULU 26  FEPUARI  2025

(tusia e Pastor EA Adeboye)

Manatu Autu:  O le vao tuitui (The thorny ground )

Tauloto -Tusi Paia–Mareko 4:7 ”Ua pa‘ū fo‘i isi i le vao tuitui, ‘ua tutupu a‘e le vao tuitui, ‘ona fētina‘iina ai lea, e le‘i fua mai lava.”

‭‭

Faitauga – Tusi Paia – Mareko 4:18-19

 O le a fa’aauauina i le asō le faatalatalanoaga I ituaiga eleele eseese i le vaavaai lea i le vao tuitui. E lamatia le vao tuitui, e latou te titina I soo se mea latou te fetaiai. Afai e soifua tagata I ni olaga e matuā faaalu uma tupe ona o le faalialia vale, o loo latou lūlū I le vaotuitui. Mo se faataitaiga, e iai tagata e nonofo I fale mautotogi e tau lē mafai ona latou totogiina, faatau ofu ma teuga feilafi e latou telē gafātia, ma o’o atu ai ina nofo aitalafu ona o le taumafai e faaauau pea le olaga faafoliga. 

Afai e te soifua i se olaga taugatā e matuā faaalu tupe, o loo e tuuina au tupe i le vaotuitui. Fai mai se muagagana, ‘tipi lou ofu e fua i le telē o le ie’. Le au pele e, e tatau ona a’oa’oina lou tagata e ola e fua I au tupe maua ae lē o le fai o au teuga e fua I tupe e lē o iai, o nisi tagata e pauū I lea mailei ona o uo o loo latou feoai. Fai mai afioga a le Atua, amuia le tagata e lē savali i le filifiliga a ē amioleaga (Salamo 1:1). A iai ni au uo e fai ma masani le faatau mai o mea e aunoa ma le saili pe fia le tau, e te ono mulimuli atu ai ma o’o ai ina tele o aitalafu. 

O le vaotuitui, e mafai ona faapea o mea e pei ona fafao I taga e pūpū solo.  Ina ua foi mai le fanauga a Isaraelu mai le tafeaga i Papelonia, na latou amata ona fausia le malumalu, peitai e iai le taimi ua taofia ai ae faasaga tagata e fausia o latou fale ma pisinisi. Na tetee iai Hakai ona o lō latou manatu toatasi iai latou faapea le faatafunaina o le malumalu o le Atua, ma fai atu iai latou, e lē mafai ona faamalieina o latou loto I mea ua latou maua ona o ala ua latou uia (Hakai 1:4-6). 

E lē mafai ona faamatuu mai e le Atua lona poto e maua ai le tamaoaiga faulai iai latou e faaaogāina le tele o le tamaoaiga na te foai mai e faamalie ai manaoga. Afai e pau le mea e te manatu iai nā o lou tagata, o loo e faatupuina le vaotuitui aua o le vaotuitui na te fetina’iina faamanuiaga a lē Atua I le olaga o se tagata. E toatele tagata e tatalo ma anapogi mo faamanuiaga tau tamaoaiga, peitai, e itiiti e maua le poto e maua ma faatupuina le tamaoaiga, auā e le faatuatuaina I latou e le Atua ona o le latou faamaumauina I mea e faamalieina ai o latou loto. E faatuatuaina oe e le Atua e ave le faamuamua ia te ia pe a e ia faamanuia ia te oe I le tamaoaiga? E te manatu ea I lona malo pe a e taunuu I le tulaga o le tamaoaiga o loo e naunau iai?

Le au pele e, ole atu I le Atua e aveesea soo sau amio poo ala o loo fetina’iina faamanuiaga a le Atua I lou olaga ma folafola ia te ia e te faamuamua pea ia te ia Ina ia sasaa mai ana faamanuiaga I ou luga. 

Tatalo

Tamā, suesue mai I lo’u loto ma aveesea soo se ala vaotuitui ia te a’u o loo taofia lo’u maua o le poto e maua ai le tamaoaiga faulai, i le suafa o Iesu, Amene.

OPEN HEAVENS

MATALA LE LAGI MO LE ASO LUA 25 FEPUARI  2025

(tusia e Pastor EA Adeboye)

Manatu Autu:  O le eleele papa (The stoney ground )

Tauloto -Tusi Paia–Mareko 4:5 ”Ua pa‘ū fo‘i isi i le mea papa, e itiiti lava le ‘ele‘ele sa i ai; ‘ae lē ola lelei, auā o le ‘ele‘ele e itiiti.”

‭‭

‭‭

Faitauga – Tusi Paia – Mareko 4:16-17

 I le fa’aauauina o le talanaoaga mai ananafi, i ituaiga eleele eseeese, o le a ou su’esu’eina eleele papa I le asō.  O le faafitauli sili i eleele papa, o le lē mafai ona to’a ai se vai, e manaomia e ola ai se fatu ua totoina iai. E manaomia le vai e ola ai fatu e totoina, e ui o le Atua e pulea lona faatupuina (1 Korinito 3: 6-8).

I le Amosa 4:7-8, fetalai le Alii, afai na te taofia le timu o le a o’o le oge i le taulaga, e vave ona augani mo se meaai i tagata o le isi taulaga o loo fa’aauauina pea ona timu. Afai e tuuina tupe a tagata I faamoemoe e le o ‘auai ai le Atua, o loo latou totoina fatu i eleele papa. Ae a e silasila toto’a i ia galuega, o le a e silafia ai, e faia e fa’atosina ma taufa’avalea i tagata ua leai ni faamoemoe.

I lo’u olaga, ua ou molimauina le tele o auala faitogafiti e faafaigaluega ai tupe ua o’o mai ma toe mou atu, ma sa ou lapata’ia tagata  vavalalata ma a’u, ia latou teena. O nisi e faalogo, a o isi e leai, ona pagatia ai lea i le taimi ua gau ai a latou tupe.

O le Atua na te foaiina mea tatou te moomia, pe afai tatou te fa’aaogaina ta’iala o le Tusi Paia, ma galulue fa’amaoni i tatou lima, o le a ia faamanuia lo tatou tamaoaiga. Ae o soo se auala e faafaigaluega ai tupe e tetee i ta’iala o le Tusi Pa’ia, e aofia ai le galue malosi, filigā, faamaoni, onosai ma le loto malie, o le eleele papa lena. O ē e fa’ananati i le sailiga o le tamaoaiga, e lē faasaoina I latou, ma o ia tagata e i’u ina tūia i latou I puapuagā.  

“O le tagata fa‘amaoni, e tele mea e manuia ai o ia; a o lē ‘ua fa‘ata‘alise ‘ona mau‘oa, e lē fa‘asaoina o ia.” Fa‘ata‘oto‬ ‭28‬:‭20‬ ‭

“Auā o le mana‘o i tupe, o le pogai lea o mea leaga uma lava; ‘ua manana‘o tele i ai nisi, ‘ona sesē ai lava lea o i latou i le ‘upu o le fa‘atuatua, ‘ua tuia ai ‘ua ati i latou e i latou i puapuagā e tele.” 1 Timoteo‬ ‭6‬:‭10‬ ‭

Le ‘au pele, e tatau ona puipuia lou loto mai le matape’ape’a ma le manaonao I mea a isi. E tatau ona e malie i mea ua e mauaina mai le galue punoua’i, ina ia faamanuia le Atua ia te oe, i galuega a ou lima. O Kiasi le auauna a Elisaia, sa ia fa’atagaina le matape’ape’a e pulea o ia, ma i’u ina ma’i i le ma’i lepela. Ae semanū na te mauaina le fa’aluaina o le faau’uga a Elisaia, peitai ua ia tuuina atu o ia ma ona suli i ni olaga o le faamāina , fa’anofo’esea ma le fememēa’i (2 Tupu 5:20-27). 

Le ‘au pelē, o le matape’ape’a, o le lē onosa’i ma lou lē usitai i faatonuga a le Atua, e ono taitaiina oe e luluina fatu i eleele papa. O le lūlū i eleele papa e le mafai ona fua mai seleselega lelei; ae na o le fememēa’i. Ou te tatalo e faasino atu e lē Alii nofoaga lelei e te lūlū ai, i le suafa o Iesu.

Tatalo

Tama, fesoasoani mai ia aua lava nei ou lūlū I eleele papa. Faamolemole, taitai a’u I nofoaga ou te lūlū ai ma ia e faamanuia i galuega a o’u lima, i le suafa o Iesu, Amene.

OPEN HEAVENS

MATALA LE LAGI MO LE ASO GAFUA 24 FEPUARI  2025

(tusia e Pastor EA Adeboye)

Manatu Autu:  O le auala (The wayside)

Tauloto -Tusi Paia–Mareko 4:4 ”Ua ia lūlū saito, ‘ona pa‘ū lea o isi i le auala, ‘ona ō ane lea o manu felelei, ‘ua ‘a‘ai ai.”

‭‭

Faitauga – Tusi Paia – Mareko 4:14-15

 Na ou faamatala ananafi, o le ituaiga eleele e fua iai le maualuga o le seleselega e maua mai i ni fatu. A totō fatu  i nisi o eleele, e lē ola. I le tauloto mai le Tusi Paia o le asō, ua iloa ai na pauū nisi o fatu I eleele lē lelei, ma e lei ola, aua na aai ai manu felelei . 

O nisi o tagata popoto ua manatu o le auala, e faatatau I tupe e faaalu i patī ma tulaga faapena. A saunia ni fiafia e tagata, e o mai tagata iai, aai, feinu ma faafetai mai, peitai e gata ai lava iina. O nisi tagata e faapea mai, e valaaulia mai foi a’u e tagata I latou fiafia. E moni lea, peitai e tatou te lē ola I ni fiafia, e tatou te ola I le maua o mea e tatau ai mo aso uma. Afai e te manao i le poto mai le Atua mo le manuia i le tamaoaiga, e tatau ona e fuafua lelei le faaaluina o au tupe. 

Fai mai le Faataoto 21:20‭‭ “O le ‘oloa tāua ma le suāu‘u, o lo‘o i ai ia i le fale o le tagata poto; a o le tagata valea, na te fa‘amaumauina ia mea.”

E na o tagata valelea e faaaoga uma a latou tupe i le taimi e tasi. O nisi e soona faamaumau uma tupe latou te maua. Mo se faataitaiga, o nisi o tagata lē faatuatua e inu ava ma faatau ava malosi mo Isi tagata, e pei o lē atalii faamaumau oa, e iu ina lafoaina o ia e tagata o loo alu ai ana mea. 

O le auala, o mea e faia e tagata e aafia ai o latou tamaoaiga i osofaiga a satani. I le faataoto o le tagata lulū saito, o saito ma pauū i le auala, na aai ai manu felelei, ae pei ona faamatala e Iesu I le faitauga o le  Tusi Paia o le asō, o manu felelei o satani lea. Afai e lē totogiina e le au kerisiano a latou sefuluai, ua latou gaoi mai le Atua ma lafoai lo latou tamaoaiga i le auala e faaaoga e satani. O le totogiina o au sefuluai, e taofia ai e le Alii mo outou, o lē aina mea mai le faaumatia o au mea (Malaki 3:8-11). 

Afai e gaoia e tagata faatuatua e aofia ai faifeau a le Atua tupe a le Atua, pe faoa ni mea e lē o ni latou mea e aunoa ma se faatagaga mai ē e ona, ua latou tatala le faitotoa e osofaia ai I latou e satani. Sa iai se tagata na fai mai ia te au, ‘ua ou iloa o le tou polokalame o le ola i Peretania ua matuā faateleina’. Ona ou tali atu lea, ‘Ioe lau susuga’. Ona ia fesili mai lea, ‘e fia se tupe a le Ekalesia na maua mai lea sauniga?’ Ina ua ou fai iai ou te lē iloa, na lē talitonu. Ua ou faamatala iai, o loo pulea e  matou faifeau I Peretania ae o loo latou iloa lelei, o loo manino le Tusi Paia o soo se tagata e sesē le auala e maua ai lona tamaoaiga, e oti faafuasei (Ieremia 17:11). O I latou e gaoia tupe a lē Atua, o loo latou valaaulia satani e aina latou tamaoaiga ma o latou ola. 

Tatalo

Tamā, faamolemole faaali mai auala uma o loo ou faamaumau ai a’u mea uma, ma fesoasoani mai ia te a’u ina ia toe faaleleia, i le suafa o Iesu, Amene.  

OPEN HEAVENS

MATALA LE LAGI MO LE ASO SA 23 FEPUARI  2025

(tusia e Pastor EA Adeboye)

Manatu Autu:  Poto I tulaga tau tupe (Financial wisdom)

Tauloto -Tusi Paia–Iopu 12:13 ”O lo‘o i le Atua le poto ma le malosi, o lo‘o ‘iā te ia le mafaufau ma le fa‘autauta.”

‭‭

Faitauga – Tusi Paia – Mareko 4:1-9

 O fatu e telē le avanoa e avea ai ma seleselega, peitai e ono lē ausia uma nei faamoemoega. Fai mai le Ioane 12:24, seiloga e paū nei fatu i eleele lelei ma pe, e na o ia lava. E na o ia lava se fatu pe afai e teu I se ato pe tuu I luga o se fata, e mafai ona aina peitai e le mafai ona faateleina. Fai mai le Isaia 55:10, e tuuina e le Atua fatu po’o saito i lima o ē lulū saito ma meaai i ē aai. Le au pele e, e mafai ona e filifili, e avea ma ē lulū poo ē aai. Afai e te aia uma mea e foai atu ia te oe, o ā lā mea e te lulū ina ia e maua se seleselega e faateleina?

O tagata popoto e tuu ese fatu lelei e luluina I eleele lelei ma e latou te maua seleselega e faateleina. O tupe e tuu ese e faafaigaluega pe lulū, o fatu ia, a’o le nofoaga, tagata poo le pisinisi e tuu iai lau fatu poo tupe, o le eleele lea. O le lelei o le eleeele, o le lelei foi lena o le seleselega. E tatau ona a’oa’oina lou tagata ia e iloa eleele lelei ma faasūsū lelei au fatu ina ia mautinoa e fua mai fua e pito sili ona lelei. 

I aso o le a soso’o atu nei,  o le a ou faamatala ituaiga eleele eseese ma ituaiga e tatau ona e lūlū iai ma eleele e tatau ona e alofia. Ao le asō, o le a ou faamatala ni faavae autu o le poto I tulaga tau tupe. 

O loo faaalia iai tatou mai le Iopu 36:11, se mealilo i le maua lea o le poto o le Atua mo le manuia i le tamaoaiga: o le usitai ma auauna ia te ia. A e usitai i le Atua, e na te faaali atu ia te oe oloa o loo I le pogisa ma oloa o loo i mea nanā (Isaia 45:3). O le a lou tulaga usitai I le Atua e tusa ma au tupe? E te avatu ia te ia le mamalu i mea uma ua ia foai ia te oe? E te totogiina uma au sefuluai ma le faamaoni? E te foai i ē matitiva ma le lē tagolima?

Afai e te usitai i le Atua, e na te faaali atu manatu faa le Atua e fesoasoani e te maumea ai tusa poo iai se oge, e pei ona faia ia Isaako. Na manao Isaako e suia se nuu e nofo ai ina ua o’o mai le oge, peitai na faatonu e le Atua e nofo ai pea I lea nofoaga, ma sa ia usitai. O lona usitai na ia maua ai le poto o le Atua, ma e ui na iai le oge,  na ia selesele I fua e tai selau i lenā tausaga (Kenese 26:1-12). 

O loo talanoa mai foi Iopu i le auaunaga o se tapulaa e maua ai le poto mai le Atua i le maua o le manuia i le tamaoaiga. O le tulaga o lau auaunaga i le Atua e taua. Afai e te auauna ma le tomumu pe faatamala foi, e na te lē faatuatuaina oe I le poto e maua ai le tamaoaiga. Na faatonu I tatou e Iesu e aua le lafoina penina I pua’a(tulou)(Mataio 7:6-7). E na te lē lafoina foi I ni pua’a. 

Le au pele e, auauna lelei I le Atua I le faatuatua ma le mata’u (Eperu 12:28), ona ia faamanuia lea  ia te oe I le poto i le tulaga tau tupe ma isi. O le usitai ma le auauna I le Alii, e te maua ai lona poto e maua ai le manuia I le tamaoaiga, I le suafa o Iesu, Amene. 

OPEN HEAVENS

MATALA LE LAGI MO LE ASO TO’ONAI 22 FEPUARI  2025

(tusia e Pastor EA Adeboye)

Manatu Autu:  Ieova Fa’amālōlō Ma’i (Jehovah Rapha)

Tauloto -Tusi Paia–Esoto 23:25 ”A ‘ia ‘outou ‘au‘auna i le ALI‘I lo ‘outou Atua, ‘ona fa‘amanuia lea e ia lau mea e ‘ai ‘atoa ma lou vai; ‘ou te fa‘ate‘a ‘ese fo‘i ma‘i ‘iā te oe.”

Faitauga – Tusi Paia – Ioane 9:1-7

I tausaga ua mavae, sa faafuasei ona o’u iloaina ua faaletonu la’u faalogo. Sa ou valaau i se tasi o o’u afafine, o ia o se foma’i e sau e siaki o’u taliga. Ina ua siaki a’u e lē foma’i, sa faapea mai, “Auoi le Atua e!” ona fai mai lea o taliga uma e lua o loo i ai patu i totonu, ma sa ia fautuaina a’u ou te alu i le falema’i. Sa o’u ata ma fai i si o’u afafine e tu’u mai ni aso se fitu. A uma aso ia o i ai pea patu, o’u avatua loa le fa’atagaga ia te ia e fai ai so’ose togafitiga e mana’o e fai. Sa o’u iloaina o loo i ai lo’u Tamā o le foma’i o foma’i, ma sa o’u talanoa loa ia te ia ina ua alu lo’u afafine foma’i. Sa faapea, la’u tatalo, “Tamā faamolemole aumai ni o’u taliga fou auā e mana’omia lo’u lagonaina o le faa amene a tagata pe a ou tatalo.” Ina ua toe fo’i mai lo’u afafine i le aso lona fitu e vaai i totonu o o’u taliga, sa toe fai mai, “Auoi le Atua e!” Peita’i o le taimi lea o lana alaga o se tala fiafia auā ua faamalōlō a’u e Ieova faamalōlō ma’i.

E te iloa e mafai ona e soifua e aunoa ma lou maua i se ma’i? E te iloa o le faamalōlōga o lau meatotino pe afai o oe o se atali’i poo se afafine o le Atua? Peita’i o le avea o le Atua ma Alii e faamalōlō ia te oe e tatau ona e matuā filigā e faalogo i lona siufofoga (Esoto 15:26). E tatau ona e faia soosemea e fetalai atu le Atua ia te oe e fai, ma usitai e aunoa ma le faatuai. Ina ua iloa atu e lepela e toasefulu Iesu, sa o latou augani atu ia te ia i le fia malōlō, ona fetalai atu lea o Iesu ia te i latou ina ia ōs ma faaali atu i latou i le ositaulaga (Luka 17:11-14). O se tulaga e lē saogalemu lea faiga auā afai e o atu I le ositaulaga o lepela pea i latou e le’i fa’amamāina e ona fetogiina i latou i ma’a ma feoti ai. Na usitai lepela iā Iesu ma ui i le ala e lamatia ma faamaloloina ai i latou. E faapenā fo’i le tagata na tauaso talu ona fanau mai, na malolō o ia ina ua fetalai i ai Iesu e alu e mulumulu i le taelega i Seloa (Ioane 9:7). Na filifili le tagata tauaso e usita’i iā Iesu ma toe fo’i mai ai lana taelega ua pupula ona mata.

Le au pele e, o le finagalo o le Atua mo oe ia e ola fiafia i le manuia i vaega uma o lou soifua. O se fiafiaga I le finagalo o Tamā lou soifua maloloina, peita’i e tatau ona e filiga e faalogo i lona siufofoga. O a ni mea taumafa ma ni vaiinu o loo fetalai atu le Atua e tu’u aua ne’i e toe tausami ai? O le a se mea o fai atu le Atua e amata ona e faia? Usita’i nei loa ma fai ae aua le faatuai, ona e soifua lea ma fiafia i lana faamalologa, i le suafa o Iesu, Amene.