Samoan Devotional

 OPEN HEAVENS

MATALA LE LAGI MO LE ASO SA 23 MATI  2025

(tusia e Pastor EA Adeboye)

Manatu Autu: Tumau Fesaga’i Ma Fesuisuia’i 2 (Constant versus Variables! 2)

Tauloto -Tusi Paia–Isaia 55:11 “E fa‘apea fo‘i la‘u ‘upu e alu atu a‘i lo‘u gutu, e lē fo‘i mai fua ‘iā te a‘u. ‘Ae peita‘i e faia le mea ‘ou te loto i ai, e manuia fo‘i i le mea ‘ou te ‘auina atu ai.”

Faitauga – Tusi Paia – Eperu 4:12-13

I se lalolagi e lē aunoa suiga o tulafono ma faiga faavae; e mafai ona faamoemoe I le Atua, e tumau o ia e lē liliu, e pei ona faamatala ananafi. O ana fetalaiga, manatu faavae, ma faiga e tumau ma e lē mafai ona suia. A tauvā faipule mo se nofoa i tulaga faaupufai, latou te faia le mau folafolaga, o nisi o nei folafolaga, e masani ona lē gafatia ona faataunuu. O le Atua, e lē mafai ona faapea; o ana folafolaga e tumau ma ana galuega e lē suia.

E tele tulaga e tumau e faatatau I le Atua; o le a o’u talanoa i se mafuaaga se tasi i le asō.  O le Upu a le Atua na i ai a o le’i foafoaina le lalolagi, ma e tumau pea pe a mavae atu le fogaeleele (Ioane 1:1). Afai e faia e le Atua se folafolaga mo oe, ma e faatino pea lau pitolaau e pei o lona finagalo, poo le a le umi e faatali ai, e mautinoa na te faataunuuina.

I se tasi aso, sa ou tatalo, ae fetalai mai le Atua, “Atali’i, o le a omai peresitene i le aai e tapua’i.” I lea taimi sa foliga e lē mafai ona tupu lea tulaga, peita’i o Tamā na fetalai, ma e tusa ai ma lo’u iloa, ua mae’a ona faataunuuina. O lea la, I le faatuatua sa o matou fausia ai loa se apitaga e fetaui mo peresitene I le taimi lava lea, ma o le fale aupito telē lea I le aai (ua avea nei ma aai o le Togiola) i lea taimi. Na mavae le tolu tausaga, ma ina ua siliga ona omai ni peresitene i lea taimi, sa faapea mai nisi o faifeau sinia ia te a’u, “Tamā, o oe o la matou peresitene, aisea e te lē alu ai loa e te nofo i le apitaga faa peresitene?” E lei atoatoa lo latou malamalama i le mafuaaga na o matou fausia ai le apitaga faa peresitene, ma sa i ai o latou manatu, sa ou fia nofo i se fale telē ma manaia ae lē iloa pe faafefea ona tau atu ia i latou. Sa o’u faapea atu ia i latou, “Leai, e lē o so’u fale le la, o le fale mo peresitene o le a omai.” Ioe sa omai peresitene ma o loo gasolo mai pea. E lē afaina poo le a le umi o faatali Afioga a le Atua ma ana folafolaga, e faataunuuina lava.

E tusa ma le fuaiupu tauloto o le asō, o le malosi o le Upu a le Atua e tumau; e leai se fetalaiga e sau i lona fofoga e fo’i fua atu ia te ia. O lona uiga e mafai ona e talia mo oe  soose upu e te vaai iai i ana Afioga, ma e te maua ma avea ma au meatotino pe a e talitonu. Fa’ata’ita’iga, Teuterenome 28:13 fai mai e tatau ona fai oe ma ulu, ae lē fai ma i’u. Afai e te talitonu i ai, o le a avea oe ma ulu. Fai mai 1 Peteru 2:24; o ona faalavalava ua e malolō ai. A e talitonu i ai, o le a leai se nofoaga o le ma’i i lou tino.

E mafai ona eseese mea tutupu, peita’i o le Upu a le Atua e tumau. Tusa poo le a le tugā o le leaga o se faafitauli, e mafai e le Atua ona feliua’i mo le lelei aua o ana Afioga e ola ma mamana ma e lē mafai ona suia. E ono fesuisuiai lou tulaga, peitai o le Upu a le Atua e tumau. O lana Upu e taunuu lava, I le suafa o Iesu, Amene.

 OPEN HEAVENS

MATALA LE LAGI MO LE ASO TOONAI 22 MATI  2025

(tusia e Pastor EA Adeboye)

Manatu Autu: Tumau Fesaga’i Ma Fesuisuia’i (Constant versus Variables!)

Tauloto -Tusi Paia–Malaki 3:6 “Auā o a‘u o le ALI‘I, ‘ou te lē liliu; o le mea lea ‘ua lē fa‘aumatia ai ‘outou le fānauga a Iakopo.”

Faitauga – Tusi Paia – Failauga 3:22-26

O loo tatou ola i se lalolagi o mea e tumau ma mea fesuisuia’i. Fa’ata’ita’iga, o le maualuluga ma le mamafa o tagata o tulaga e fesuisuia’i aua e eseese tagata ta’ito’atasi. O le oa fo’i o se tulaga e mafai ona fesuisuia’i aua o isi tagata e mauoa a’o nisi e matitiva. E o’o fo’i ia i latou o e maumea, o le tamāoaiga o se tulaga e fesuisuia’i auā e mafai e se uso ona mauoa nei, ae leiloa uma taeao (Faataoto 23:5). O le eseesega, o tulaga e tumau e fai ma sui o mea e le mafai na suia. Fa’ata’ita’iga, o tane, e lē mafai ona ma’itaga ma fananau.

I le soifuaga fo’i tatou te maua ai tulaga tumau fesuisuia’i; o mea nei e tatau ona tumau peita’i e mafai ona tutupu suiga. Fa’ata’ita’iga, o tagata matutua e tatau ona ta’i 32 oloa/nifo, peita’i a e tago e siaki, e mafai ona e maua nisi o tagata matutua e lē atoa se tai 32 o oloa. Fai mai le Failauga 12:3, e faaitiitia ē ua olo pe a matutua, o le auala ofoofogia e faaupu ai e le Tusi Paia, e mafai ona toulu nisi o ou oloa pe a o’o ina e matua. E le gata i lea e I ai fo’i tulaga e mausalī. Fa’ata’ita’iga o le aso e sosoo ma le po o se tulaga tumau. Na tupu mai lava talu ona amata le lalolagi ma o le a faaauau pea ona tupu vagana ua fetalai le Atua e sui. Fai mai le Salamo 30:5; e afe ane le tagi i le afiafi, peita’i e o’o mai le alaga fiafia i le taeao. E mautinoa a le aso e soso’o ma le po; o lona uiga a o lei oso le la taeao, o le a mou ese uma ou fa’anoanoaga, i le suafa o Iesu. 

O lo tatou Atua e tumau e lē liliu. I la tatou upu tauloto o le asō, na ia fetalai, “Aua o a’u o le Alii, ou te lē liliu.” O Iesu Keriso e lē liu lava ia o ananafi ma le asō, e o’o fo’i i le faavavau (Eperu 13:8). O le Atua sa i le amataga, o ia lava lea i le asō- e lē suia. O le mafuaaga lea na ia faailoa ai ia lava iā Mose, “O a’u” e le’i faapea “Sa ou,” poo “O le a ou,” afai na faia e le Atua se vavega i se isi ananafi, e mafai ona e nofo ma le mautinoa e mafai ona ia faia faapea mo oe i le asō. O le Atua na faamalolō i e mama’i ma faa savavali i e pipili, o loo tumau pea e lē liliu. O i ai sou faafitauli e foliga ua leai se fofō? O lo tatou Atua e Silisiliese ma e leai se mea e lē mafaia e ia ona fai (Luka 1:37). Tatalo ma su’esu’e lau Tusi Paia ma saili le Upu a le Atua e faatatau i lou faafitauli aua o upu uma na tusia i le Afioga Paia a le Atua anamua, na tusia ia a’oa’oina ai oe, ina ia maua ai lou faamoemoe e tupu mai i le onosa’i ma le fa’amafanafana mai o ana Afioga (Roma15:4).

Le au Pele e, o le Atua e tumau e lē liliu. O lana upu e tumau e faavavau (Isaia 40:8). Ia faatuatua lou loto i le faamoemoe aua o lana upu e lē mafai ona fo’i fua. Taofimau lana Upu ma o le a lē pine ona liua lou faamoemoe I ni ta’utinoga, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 21  MATI  2025

(tusia e Pastor EA Adeboye)

Manatu Autu: O le fatu a le Atua (The seed of God)

Tauloto -Tusi Paia–1 Peteru 1:23. “Ua fānaufouina ‘outou e lē o le fua e pala, a o le fua e lē pala lava, o le afioga a le Atua lea ‘ua ola ma ‘ua tumau e o‘o i le fa‘avavau.”

‭‭

Faitauga – Tusi Paia – 1 Ioane 3:7-9

A iai le fatu a le Atua I totonu ia te oe, e te inoino ai i le agasala. Tusa poo le a le fiaai o se pusi, e le mafai ona ai i sana puaiga. O loo faasino mai i le faitauga o le Tusi Paia o le asō, afai e te faanaufouina, e le mafai ona e faia le agasala aua o le fatu a le Atua o loo i totonu ia te oe. Afai o oe o se afafine poo se atalii o le Atua, tusa poo le a le faaosooosoga e feagai ma oe, o le fatu a le Atua I totonu ia te oe e fesoasoani e te manumalo ai. O tagata e fai mai ua faaolaina ae o loo fiafia pea i le agasala, e le o moni le faaolaina. O le agasala e tuueseina ai le tagata mai le Atua ma avea i latou ma tagata ua pulea faaletulafono e satani (2Timoteo 2:26). Afai o loo e soifua pea i le agasala, e tatau ona e tagi atu i le Atua mo lana faaolataga e aveesea le fatu o le agasala ae suia i le fatu a le Atua. 

E suia e le Atua tagata faatuatua mai le malò o le pogisa i le malo o le malamalama (Kolose 1:13) ma ia faafouina i latou i vaega uma. E pei a ona lē mafai ona fua mai se apu I se fatu moli, e faapena foi ona lē mafai e ni kerisiano ona fua mai le agasala aua o le fatu a le Atua o loo I totonu o i latou. Peitai, afai e musuā lea kerisiano e faasūsū ma ia tupu lea fatu, e oo Ina manumalo ai le agasala ia te ia. O le tumau i le upu a le Atua o se auala lea e faataga ai le fatu a le Atua I totonu ia te oe e tupu ma fua ma fua o le amiotonu.

Fai mai le upu tauloto mo le asō, ua fanaufouina outou e le fua e lē pala, o le upu a le Atua, e mausalī ma tumau e oo i le faavavau. O lana upu e sili ona maai i lō le pelu e faatau maai ona itu ma e mafai ona faamasino I manatu ma filifiliga a le loto o le tagata ae lei avea ma galuega faatino (Eperu 4:12). O kerisiano latou te faataga le upu a le Atua e nofo i totonu o I latou (Kolose 3:16) e mafai ona manumalo e tetee I faaosoosoga ma le agasala. O le agasala o gaoioiga a le pogisa, ae o le Upu a le Atua e aumai ai le malamalama ma le iloa (Salamo 119:130). O le iloa o le Upu a le Atua e faapoto ai oe ma mataala, e mafai ai ona e iloa tulaga lamatia e te ‘alo ma lafi mai ai (Faataoto 22:3). Na iloa e Iosefa le amioleaga i le manaoga o le toalua a Potifara ma sa ia tamoe ese (Kenese 39:12). Ao Samasoni, e na te lei iloa le amioleaga i le manaoga a Talila seia oo ina ua tuai (Faamasino 16:1-21). Afai e fia avea oe ma auupega I aao o le Atua, e tatau ona e filiga e suesue le upu a le Atua. O soo se mea e aveesea oe mai le upu a le Atua, o loo taumafai e faaumatia lou agaga. O le fatu a le Atua I totonu ia te oe e faasaoina oe mai le faaleagaina e le agasala pe afai e ave lau faamuamua I lana Upu. Aua nei e faatagaina oe e avea ma se tasi e pule faatulafonoina ai Satani. O è naunau ma mafaufau ea i le Upu a le Atua I le aso atoa? (Salamo 119:97), I le suafa o Iesu, Amene

OPEN HEAVENS

MATALA LE LAGI MO LE ASO TOFI 20 MATI  2025

(tusia e Pastor EA Adeboye)

Manatu Autu: E mai le ulī i le tamaitiiti 2(From dog to child 2)

Tauloto -Tusi Paia–Mataio 9:13 “Inā ō ia, ‘inā a‘oa‘o po o le a le uiga o lea ‘upu, ‘‘Ou te loto i le alofa, ‘ae lē o le taulaga.’ Auā ‘ou te le‘i sau e vala‘au i ē ‘ua amiotonu, a o ē ‘ua agasala ‘ina ‘ia latou salamō.”

‭‭

Faitauga – Tusi Paia – 1 Timoteo 1:11-17

O ananafi, na ou talanoa ai i le finagalo o le Atua, o tagata uma e agasala ma liliu ese, o ni ulī poo taifau. (Mataio 15:21, 2 Peteru 2:22), o le aso, o le a faaiuina le talanoaga, i le naunau o le Alii e suia i latou e avea ma fanau.

Ae ou te leʻi fanaufouina, i le taimi e le’i faia so’u aiga, sa tele aʻu uo teine. I tausaga mulimuli ane, sa ou faaipoipo ma tuuina lo’u ola ia Keriso, ma ua avea aʻu o se faiaʻoga i le iunivesite o Ilorina. Ua maea se taimi, o se tasi o aʻu uo teine muamua, ua maea ona faaipoipo, ma ua o ane ma lona toalua e nonofo i Ilorina.

Sa i ai lana tama na fanau mai e pipili, ma na ta’u iai e seisi, e i ai se faifeau, e mafai ona tatalo mo lana tama ona mafai lea ona toe savali. Ina ua sau i le falesa, sa ia fesili e fia vaai i le faifeau. Ua auina mai o ia i totonu o lo’u ofisa, ma ina ua tatala le faitotoa ma ia iloa mai a’u, na ma feiloai e pei o uo masani lelei. Ona ia faapea mai lea, ‘ou te fia vaai i le faifeau’. Ua ou tali atu, ‘ioe, o le a se mea ou te faia mo oe?’ Ua ia toe tali mai, ‘na ou fai atu ou te fia vaai i le faifeau’. Ua ou tali atu, ‘o a’u o le faifeau’. Ua ia tali mai, ‘o oe? E te tatalo ona tali mai lea o le Atua?’ Ua ma tatalo ona amata savali lea o le tamaitiiti. 

Fai mai le Tusi Paia, afai o ia Keriso se tasi, o le tagata fou ia; (2 Korinito 5:17). O le vavega pito sili ona maualuga o le faaolataga o le agaga. Afai e te leʻi fanaufouina, po o le a lava le matuia o au agasala, e mafai e le Atua ona faaolaina oe, aua o ia na faaolaina aʻu. A o le'i fetaiai Saulo ma Iesu, sa ia faasauā i Kerisiano. Peitai, ina ua mavae ona fetaiai ma Iesu, sa avea o ia ma se aseta sili i le Malo o le Lagi(1 Timoteo 1:12-14). Na liua e le Atua loto o tagata i aai e ala ia te ia, ma sa faalogo tagata uma o le konetineta atoa ia Iesu e ala i lana galuega (Galuega 19:26). E leai se tapulaa o mea e mafai ona faia e le Atua ia te oe, ma mea e ala ia te oe, aua afai na te feliuaina se tagata, e na te faia ma le atoatoa. I le avea ai o oe o se atalii, o le a e maua avanoa faapitoa mai le Atua. O le a e maua le aia tatau e ta'ua ai le Atua, o lou Tama, ma maua ai tofi ma faamanuiaga mai ia te ia.

Sa malamalama lelei Paulo i le uiga o le avea ma se tagata fou, le avea ma atalii o le Atua, sa ia faaaogaina ana aia tatau ma le pule faale Atua. Mai le tulaga o se ulī, na tutupu vavega faapitoa, ma na toatele tagata na feliuaina. Afai e te le'i fanaufouina, e finagalo le Atua e tuuina atu ia te oe se faasinomaga fou ma avea oe o ona atalii pele. Lafoai lou ola ia te ia, ona e vaai lea ua ia fausia lou olaga o se mea ofoofogia i le toatele (Salamo 71:7), i le suafa o Iesu, Amene. 

OPEN HEAVENS

MATALA LE LAGI MO LE ASO LULU 19 MATI  2025

(tusia e Pastor EA Adeboye)

Manatu Autu: E mai le ulī i le tamaitiiti 1(From dog to child 1)

Tauloto -Tusi Paia–Ieremia 3:22“Inā toe fo‘i mai ia ‘outou, le fānau liliu ‘ese e, ‘ou te fa‘amālōlōina o ‘outou liliu ‘ese. “Silasila mai ‘iā te i matou, matou te ō atu ‘iā te oe. Auā o oe le ALI‘I lo matou Atua.”

‭‭

Faitauga – Tusi Paia – Luka 15:11-32

O lo’u tamā, o le Atua e mafaia so’o se mea. E mafai ona ia suia e oo i se ulī e avea ma tamaitiiti e pele. O le finagalo o le Atua, o i latou e lei fanaufouina, e taua o ulī (Mataio 15:21-28). O fanau liliu ese e taua foi o ulī. Ina ua talanoa mai Peteru I ē liliu ese, na ia faapea mai, ‘“A ‘ua taunu‘u ‘iā te i latou le ‘upu fa‘ata‘oto moni, “‘Ua toe fo‘i le ulī i lona lava pua‘iga;” i le ma lea, “O le pua‘a na fa‘atā‘eleina ‘ua toe fo‘i ia e ta‘afili i le palapala.”(2 Peteru 2:22). 

E alofa mutimutivale le Atua, ma o lona alofa mutimutivale e mafai ona suia tagata pito sili ona agasala e avea ma ana fanau peleina. I le 1 Timoteo 1:15, fai mai le aposetolo o Paulo ua sili musa o ia i tagata agasala, peitai na suia o ia e le Atua ma avea ai loa o ia e sili musa i le au aposetolo (2 Korinito 11:5). E leai se mea e lē mafaia e le Atua. 

E iai se faievagelia talavou na manumaloina le tele o agaga mo le Atua na paū atu i le faitaaga. Ua iu Ina faaseseina o ia e Satani e lē mafai ona ia toe maua le faamagaloga a le Atua. Ua ia talitonu i lenei pepelo ma ua faaauau ai pea ona ola I le agasala seia oo i se aso, ua ma’i ma ua sii ma’i i le falemai. Ua iai faatasi i le falemai ma se faifeau, o lē toaga ma filigā e suesue i le Tusi Paia. Na vaai maualuga lenei alii talavou i le faifeau ma è iai se aso na fesili iai le faifeau poo ia o se kerisiano. Ua faapea mai sa kerisiano muamua ma na fesili le faifeau pe aisea na taofia ai lona mulimuli i le Atua, ona ia faasoa mai lea o le tala o lona olaga. Na vave ona faaali iai e le faifeau le Tusi Paia ma mau e faamaonia ai e mafai ona faamagaloina o ia ma toe faafoisia mea uma. Ona ia tatalo lea mo le alii talavou ma ua toe faafoisia lona faaolataga, ua tumu lona loto i le olioli. I le taeao na sosoo ai, ua le vaai le faifeau i le alii talavou. Ina ua ia fesiligia le au tausima’i, na latou faapea ane ua maliu o ia ma le olioli. Na faataga e le Atua I lona alofa mutimutivale lenei alii talavou e toe foi mai lana pua’iga ae lei malaga atu I le lagi. 

E naunau le Atua e toe faafoisia i latou ua liliuese pe afai latou te foi mai ia te ia ma le moni, e lē auai lona finagalo ia latou oti pe faaumatia. I le Ieremia 3:13-14, na augani atu le Atua I fanau liliu ese ia latou iloa a latou agasala ma foi mai ia te ia. E talia lava e le Atua ma faafoisia tagata e agamalū ma loto nutimomoia. O le atalii faamaumau oa na liliu ese, ae na ia maua le alofa mutimutivale a lona tamā ma na toe faafoisia atoatoa. E ui I mea na ia faia, ina ua salamō ma savali e toe foi I lona tamā, na talia o ia ma le olioli. E fiafia le Atua e toe faafeiloai atu i le aiga atalii na leiloa. Afai ua e liliu ese, aua e te faatagaina pepelo a Satani e lē mafai ona toe faamagaloina oe e le Atua. O loo faatali mai o ia ma fofola mai ona aao ia te oe, toe foi ia te ia i le asō. E naunau ma mafai ona toe faafoisia e le Atua ia te ia, ē na liliuese. E pau le tulaga e tatau ona latou faia o le toe foi ia te ia ma le salamo moni, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 18 MATI  2025

(tusia e Pastor EA Adeboye)

Manatu Autu: O le Alii o ‘Au (The Lord of Hosts)

Tauloto -Tusi Paia–Isaia 47:4 “O lē nā fa‘atauina i tatou, o le ALI‘I o ‘au lona suafa, o le Pa‘ia o Isaraelu.”

‭‭

Faitauga – Tusi Paia – Isaia 51:15-16

E pei ona ta’ua i le tusi o Salamo 24:7-19, O le Atua o le Alii o ‘Au; o le Ta’ita’i o le ‘au o le Lagi faapea le Lalolagi ma lalo o le lalolagi. E oo ia Satani e gaoioi I totonu o le li’o e fa’atagaina e le Atua, e pei ona tatou molimauina i le tusi o Iopu. 

E mafai e le Atua ona ia pulea temoni, I soo se aofai, pe to’atasi e pei ona ta’ua ile Mareko 1:23-27, pe to’a fitu (7) i le tusi o Luka 8:1-3 po’o le toa’tele i le tusi o Mareko 5:2-20. Afai o iai ni malosiaga fa’atemoni o faalavelave i lou olaga, o le a fa’amaasiasi uma i le suafa o Iesu. Sa masani ona ou faia le tala, e le malolo le Alii o ‘Au i se taua. Peita’i e le’i leva tele atu, talu ona faasa’oina a’u e le Atua, ua faapea mai: “Lo’u atalii, e mafai ona ou filifili ou te faia’ina i se tama’i taua ina ia ou manumalo i se taua tele! E lē mafai ona ou faiaina i se taua tele”. E iai taimi e mafai ai e le Alii o ’au ona filifili i lona poto, e malolo i se tama’i taua ona o lo’o iai se taua telē e tatau ona ia manumalo ai. O se fa’ataitaiga, sa ia fa’atagaina Satani na te pa’i atu i mea totina faapea ma le soifua maloloina o Iopu, aua sa naunau le Atua ia fa’aali le lelei atoatoa o lona mana. O se isi fa’ataitaiga, sa mafai e tagata taulāitu ona latou faia mea sa faia e Arona ma Mose i le faato’a feiloa’i ai ma Farao. Peitai sa latou o’o i se tulaga o le matuā fefefe  ma latou faapea ane: ‘O le a’ao o le Atua’(Esoto 8:19). Sa fa’atagaina e le Atua Farao e faama’a’a lona loto ina ia fa’aalia le mata’utia o lona a’ao (Roma 9:17).

A’o tau’ai Setefano i ma’a, sa matamata iai Saulo ma ua olioli ai Satani. Atonu sa fa’apea Satani ua ia manumalo ina ua ia fa’aumatia Setefano, ma lona le iloa o lona sui sa ia tofia e fa’atautaia lea gaioiga, o le a avea ma se ta’ita’i ‘au o le ‘au tau a le Atua. Sa i le Atua se ata lautele atu. Sa iai le fuafuaga a le Atua, na te fa’aaogaina Saulo ina ia matuā tele se vesiga i le malo o Seoli, ma sa ia manumalo ai. E mālo le Alii o ‘au i taua uma lava. Po’o le a se pagatia e o’o iai, e taunuu mai loa o ia i le mea ua tupu, ona fa’asagatonu lea o tulaga uma mo le manuia o lana fanau pele. E leitio fai mai Paulo i le Roma 8:28: “Ua tatou iloa fo‘i e galue le Atua i mea uma lava mo le lelei fa‘atasi ma i latou o ē ‘ua alolofa atu ‘iā te ia, o ē ‘ua vala‘auina i lona finagalo.”

Le ‘au pelē, o le Alii o ‘Au e le na o se Alii mata’utia i taimi o taua; ua na o ia le Atua poto, (1 Timoteo 1:17). E mafai ona ia toe fetu’una’i so’o se mea ina ia talafeagai ma ana fuafuaga- e o’o lava

i tulaga e sili ona ogaoga. Fa’atuatua ia te ia, e na te fa’aaogaina se tulaga lē manuia o lo’o tupu i lou olaga, mo lou lelei ma lou manuia ia maualuga ai lona viiga. E le taitai faia’ina le Alii o ‘Au i se taua; na te saunia mea uma ina ia talafeagai ma ana fuafuaga, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 17 MATI  2025

(tusia e Pastor EA Adeboye)

Manatu Autu: Le toe iai se pā (No more barrenness)

Tauloto -Tusi Paia–2 Tupu 2:21 “Ona alu atu lea o ia i le puna o le vai, ‘ua lafo i ai le masima ma fai atu, “O lo‘o fa‘apea ‘ona fetalai mai o le ALI‘I, ‘Ua ‘ou fa‘amāgaloina lenei vai; e lē toe tupu mai ai le oti po o le lafuā.”

‭‭

Faitauga – Tusi Paia – Kenese 21:1-2

I le Kenese 1:28, ma faatonu e le Atua le tagata ia fanafanau ma uluola. O se tagata lē fanau e lē faafiafiaina ai le Atua, o le mafuaaga lea i le Kenese 18:9-14, ina ua ia fai ia Sara o le a maua sana pepe ae ataata o ia, ona ia faapea mai lea, ‘e i ai ea se mea e faigata ai te a’u?’ Afai o loo e ui i se tulaga ua lē uluola i lou olaga, o le a avea o se mea ua tuanai i le suafa o Iesu. 

Sa ou asiasi i Amerika, ma i ai sa’u uo talavou na naunau mai lava ou te asiasi atu i lona fale. Na ma malilie e matou te aai i le afiafi ma lona aiga, peitai ina ua ou oo atu, e toafa Isi fafine na i ai ma lona toalua. Na ou faapea atu, ‘faapea au na o lou aiga’. Ua tali mai, ‘o loo ō mai e fesoasoani i lo’u toalua e kuka meaai’. Ua ou manatu poo a nei meaai e manaomia ni fafine se toalima e kuka, ae ou te leiloa o loo iai se latou fuafuaga. Ua maea ona ou ai ona ou alu lea, ao fafine e toafa nei ua faasolo mai e nonofo i le nofoa na ou nofo ai, aua na latou faatuatua i le Atua ia fananau. I le tausaga na sosoo ai na ou toe malaga i Amerika, o le toatolu o fafine nei o loo sii mai a latou pepe ae o le fafine lona fa, e ono masina o lona maitaga. Afai o loo e faitau pe faalogo foi i lenei upu ae o loo e faatali i le Atua mo se tamaitiiti, ou te ofoina atu le faauuga lava lea e tasi mo oe I soo se mea o loo e iai, afai e te talitonu, i le Isi iva masina, o le a e maua lau vavega. 

 I seisi taimi, sa ou alu i le falelētaua ao pepese le aufaipese i le sauniga o Agaga Paia i Kaduna Nigeria. O se tasi tagata e faasino nofoa na ia faafeiloai a’u ma ua ma lulūlima. Ina ua ou ulu atu i le falelētaua ae ou faalogo atu ua vivii i le Atua ma ua alu ta’u i Isi au faasino nofoa ma faapea, ‘na ia lulu i lo’u lima’. Ina ua ou sau i fafo, e toaono le au faasino nofoa o loo laina atu, ma ua ou lulu lima ma i latou uma, ma ua faalua ona ma lulu lima ma le alii muamua. Ina ua taunuu lenei alii i lona le fale, na ia fai i lona toalua, o lē e pā mo le tele o tausaga, ‘sau, aumai lou manava, e faalua ona lulu e le tamā ia Adeboye lo’u lima’. I le iva masina mulimuli ane, ua taunuu mai le la pepe. 

O le pā ma le lē lafuā, e lē o le finagalo lea o le Atua, ma sa ia fai mai I lana Upu, e leai se Isi e pā i le laueleele (Esoto 23:26). Ou te folafola atu, ia faagataina loa soo se vaega o pā I lou olaga i le suafa o Iesu. 

Tatalo

Tamā, fai mai lau Upu e leai se tasi e pā i le laueleele, o lea, ou te folafola atu, ou te maua le fanafanau ma le uluola i so’o se vaega o lo’u olaga, i le suafa o Iesu, Amene. 

 OPEN HEAVENS

MATALA LE LAGI MO LE ASO SA 16 MATI  2025

(tusia e Pastor EA Adeboye)

Manatu Autu: Faaipoipoga, aua le faatali mo le tulaga atoatoa (Marriage: don’t wait for perfect conditions)

Tauloto -Tusi Paia–Failauga 11:4 “O lē na te mānatunatu i le matagi e le lūlū saito o ia; o lē na te va‘ava‘ai fo‘i i ao e le selesele lava o ia.”

Faitauga – Tusi Paia – Kenese 2:18-25

I le tatou tusi faitau mai le Tusi Paia o le asō, na fetalai le Atua e lē lelei ina nofo toatasi le tagata, ma na ia faatuina le faaipoipoga. O le mafuaaga lea e lē tatau ai i le au uso ona faatuai le faiga o se aiga i le taimi ua talafeagai le matua, mautu se alagatupe, ma ua faasino atu e le Atua ia I latou o latou ta’itoalua sa’o.

Peita’i o le faaipoipoga e lē o se tulaga e ausia e le tagata lava ia, na o ia; o le tane ma lana avā e tatau ona galulue faatasi, fesoasoani le tasi I le isi ia ausia lo la faamoemoe mai le Atua. E lē tatau i le au uso ona taumafai e ausia mea uma a o lei faaipoipo; o ai lava la te faaipoipo o ia lea e tatau ona fesoasoani e faataunuu faatasi o la faamoemoega ma manaoga. O nisi o mea o loo pologa tagata e tau saili o le a faigofie ona maua pe a i ai nisi e fesoasoani ia i latou (Teuterenome 32:30).

O le vave faaipoipo o tagata ma amata fai fanau, o le vave fo’i lea ona uma o le tausiga o fanau ae punoua’i i le galuega a le Atua. Peita’i e ese mai ai i latou na fetalai faapitoa i ai le Atua, aua le faia se toalua. Ou te faafetai i le Atua na fai vave lo’u toalua ma la’u fanau. A na faapea na fanau la’u ulumatua ua 40 o’u tausaga, e ono lē mafai ona o’u punoua’i i le galuega a le Atua e pei ona tatau ona o’u fai, ma atonu fo’i e lē avanoa lo’u toalua e fesoasoani iā te a’u. Atonu e uma ifo ona tausi la’u fanau, ua matutua ua lē toe maua lo’u malosi lea na i ai i le amataga o la’u galuega mo le Atua.

E toatele tagata e fa’atuai ma faiaga ona fai ni aiga, sei vagana ua vaai atu o le a misi le taimi. O le tulaga e i’u i ai o le sue faatopetope o se isi e faaipoipo i ai. O le faaipoipoga e lē o se feagaiga e nativale ona fai; e manaomia lou tatalo ma fa’amautinoa o le finagalo tonu lea o le Atua. A faanatinati tagata ua fia fai toalua, o mea uma o le a foliga o se faamaoniga o le finagalo lea o le Atua, ma e ono i’u ina faaipoipo atu ai i le tagata e lē o sona tofi. O le faaipoipo atu i le tagata sesē e pei o le ave taavale faatasi ma se isi e ese le itu o loo faimalaga i ai. O le a tula’i mai pea fe’ese’esea’iga e lē aunoa, fenumia’i ma le atuatuvale aua o i laua uma o loo eseese itulagi e agai i ai. 

Fai mai Auega 3:27; E lelei i le tagata ona ia tauave e ia le amo ina o taulealea. I le talaaga o le faaipoipoga o le amo e lē o se mea leaga aua o le faaipoipoga o lona uiga o le amo faatasi ma le tagata ua fa’au’uina e le Atua e fai ma ou fesoasoani. I le taimi talavou, o loo lava le malosi o le tagata e fa’ato’ilalo ai mauga ma faafitauli ae ausia faatasi mea matagofie ma o latou ta’itoalua. E lē o se poto le faatali sei lelei atoatoa le tulaga faatoa faaipoipo aua e lē taitai tupu lea tulaga (Failauga 11:4). O i latou e fa’atalitali pea sei maua mea uma fa’ato’ā faaipoipo e ono i’u i le maimau o taimi taua e tulituli ai mea sese. Vaganā na fetalai faapitoa atu le Atua ia te oe e te faatali, e lē poto le faatuai ona faaipoipo. I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 15 MATI  2025

(tusia e Pastor EA Adeboye)

Manatu Autu: O Ia E Ona Mea Uma (He owns it all)

Tauloto -Tusi Paia–Galuega 17:24“O le Atua na faia le lalolagi ma mea uma lava o i ai, ‘ona o le Ali‘i o ia o le lagi ma le lalolagi, e lē afio o ia i malumalu o faia e lima;”

Faitauga – Tusi Paia – Salamo 24:1-2

O le faitauga mai le Tusi Paia o le asō fai mai o mea uma o i le lalolagi o ā le Atua ia, e aofia ai ma ario, auro, ma manu uma e tata’a i luga o mauga e afe. E leai se tasi e mafai ona tele atu ni ana ‘oa nai loo le e ona le lalolagi uma. Poo le a lava tamāoaiga o umia e soose tasi, ua na o sina vaega itiiti ma le faatauvaa pe a fua i le tamāoaiga o le Atua. O punaoa moni o loo i aao o le Atua ma e lē faigata ona ia foai mai mea uma e te manaomia.

I le 2 Tupu 4:1-7, o le fafine ua oti lana tane, o se tasi o atali’i o le perofeta, sa lē mafai ona ia totogia ana aitalafu, ma ua mana’o le tagata sa nofo aitalafu ai e pu’e lana fanau tama e totogi ai le aitalafu. Peita’i na lavea’i e le Atua, ma i totonu o se taimi puupuu na ia saunia mo lenei fafine ua oti lana tane se vaega tupe tele, na totogi atoa ai lana aitalafu ma tausi ai i latou ma lana fanau i le olaga atoa. I le Ioane 6:5-13; na fafagaina e Iesu tagata e 5000 i le meaai a se tamaititi na avatu. Ina ua uma ona aai sa totoe ato tutumu e 12. Na fafaga e le Atua le motu o tagata, ma na sili atu le tele o meaai na totoe nai loo meaai na amata ai le tausamiga. I le suafa o Iesu, o le a faataunuu e le Atua ou manaoga uma.

Sa i ai se taimi sa ou malaga ai i Lonetona, ma a’o o’u i ai pea i le atunuu, na uma la’u tupe. Sa ou manaomia se 50 pauni e faatau ai ni a’u tusi, ma, ae o’u te lei moe i se tasi po sa fai la’u tatalo, “Le Atua e, maimau pe ana i ai sa’u 50 pauni.” O le taimi lava na uma ai la’u tatalo, na tatagi ai le telefoni. E tali atu ae fai mai, “Biyi?” sa ou tali, “e leai se Biyi o iinei.” Ina ua fesili mai poo ai lea, sa ou tali, “o lo’u igoa o Adeboye.” “O ai Adeboye?” Sa o’u toe tali, “o le faifeau o Adeboye mai le Ekalesia RCCG.” Na alaga leotele le uso sa ma talanoa i luga o le telefoni, ma na mulimuli ane, na omai ma lona uso i lo’u potu. Na o matou faamavae ae o la tuuina mai ia te a’u se tupe 50 pauni. Ina ua o, sa ou fai i le Atua, a na ou iloaina o le a faigofie faapea ona ia aumaia ia te a’u se 50 pauni semanū ou te ole atu mo se tupe 100 pauni. Pe a ma le 10 minute talu ona fai la’u tala lenā, ae tatagi le logo o le faitotoa. O’u te o’o atu I le faitotoa ua alu ese le tagata a o loo tu’u mai se teutusi o loo i ai se 50 pauni mai se alii mauoa ua leva ona ma masani. E pei ona tupu muamua, sa o’u ole mo se isi 50 pauni, ma e lei umi, ae o’u maua fo’i e ala i se vavega. Sa o’o mai lo’u fefe ma faapea atu, “Le Alii e, o la’u tala mālie, ua leva ona faamalieina lo’u loto i le 50 pauni muamua na o’u maua.” Na faaofo a’u e le Atua i mea e sili atu na i loo lo’u mana’o aua o ia e ana mea uma.

Le au pele e, e leai se tapula’a o mea e mafaia ona fai e le Atua mo lana fanau. O ia na faia le lalolagi atoa, o ia e ana mea uma, I le suafa o Iesu Amene.

OPEN HEAVENS

MATALA LE LAGI MO LE ASO FARAILE 14 MATI  2025

(tusia e Pastor EA Adeboye)

Manatu Autu: Mai le tulaga ‘E lei oo I le taimi’ i le ‘oo i le taimi nei’ (From ‘not yet’ to ‘now’)

Tauloto -Tusi Paia–Salamo 102:13 “E te tula‘i mai oe, e mutimutivale lou alofa i Siona; auā ‘ua o‘o mai ona po e alofaina ai o ia, ‘ua o‘o lava i ona aso na tu‘upoina.”

‭‭

Faitauga – Tusi Paia – Ioane 2:1-11

O le asō, o le a suesue pe faapefea ona suia e le Atua le tulaga ‘e lei o’o I le taimi’ i le ‘o’o i le taimi nei’. I le faitauga mai le Tusi Paia o le asō, sa afio atu Iesu i le faaipoipoga i Kana, sa logo atu iai e lona tinā ‘atalii, ua maea le uaina’ e peiseai o loo faatonu e fai sana fuafuaga i le faafitauli. Na muai faapea mai, ‘e lei oo mai lo’u taimi’, peitai e lei leva ae suia I le ‘oo i le taimi nei’. 

 Sa ou iai i Amerika i polokalame ou te lauga ai, ma e iai se uso na ofo mai e feaveai a’u I lana taavale. Na ou matua maofa i lona loto maualalo ma le agalelei, ma ina ua oo i le taimi o le a ou malaga ese ai, na ou tuuina iai se meaalofa mo lana fanau. E na te lei tauina mai ia te a’u ua 19 tausaga talu ona faaipoipo ae lei maua se la tama. E lei leva se taimi ae o mai ma lona toalua ma le pepe i se polokalame tele a le Ekalesia, e fai le tautinoga i le liua e le Atua o le tulaga ‘e lei oo mai’ mo le 19 tausaga i le ‘ioe ua oo mai’. Fai mai ina ua ou tuuina atu le meaalofa, na ia faamaufaailogaina i le faatuatua ma fai i lona toalua, ‘o le meaalofa na aumai ia tamā mo le tā fanau, o le a teuina mo I latou’. O loo iai pea le Atua I le pisinisi o le liua o le tulaga ‘e lei oo mai’ i le ‘oo mai i le taimi nei’, ma e ese lau mataupu i le suafa o Iesu. 

I ni tausaga talu ai, e iai se alii talavou faatoa i’u mai se iunivesite sa tau sue sana galuega. E tele ana tusi talosaga sa faia ae le maua lava sana galuega. Ona tonu lea I lona manatu e faapea, ‘o le a ou alu i le sauniga o Agaga Paia ma o le a ou finau ma le Atua seiloga ou te maua le tali i le taimi nei’. Ona e leai sana tupe o lea na savali mai ai i le 46 kilomita mai le taulaga i le vaega o loo faia ai le sauniga. E taunuu mai loa ae o le a amata ona ou lauga. E lei leva ae ou vaaia se vevesi i leisi itu o le faapotopotoga, o le alii talavou lea ua matapogia i le lelavā ma o loo taumafai tagata e faate’i. Ua ou faapea atu, ‘o le a le mea ua tupu, aumai iinei’. Ina ua te’i mai, na ia faamatala lana tala, ma Ina ua faalogo le faapotopotoga na savali mai i le 46 kilomita ina ia maua se tali i le taimi nei, e ono ana avanoa faigaluega na maua i lea po. 

Aua e te fai mea tuu i mea e mafai ona faia e le Atua I le taimi nei, sei faia taeao ona o le leai o se faatuatua poo le lē usitai foi. Ina ua faapea mai Iesu e lei oo i lona taimi, na faatonu e Maria auauna ‘ia fai so’o se mea e faatonu mai e ia e faia’ ma ua liua ai le iuga o lenei tala i le taimi nei. E pei a ona mafai e le faatuatua i le Atua ona liua le leai i le ioe, o le usitai ma le atoatoa I ana faatonuga e mafai ona suia le tulaga ‘e lei oo i le taimi’ i le ‘oo mai i le taimi nei’. Ia la’a i luma e ala i le faatuatua i le Atua ona e vaai lea i mea e lei oo i le taimi, ua taunuu ma oo mai i le taimi nei. O le usitai atoatoa i le upu a le Atua ma ana poloaiga e mafai ona suia mea ‘e lei oo mai’ i le ‘oo mai i le taimi nei’, i le suafa o Iesu, Amene.