Samoan Devotional

OPEN HEAVENS

MATALA LE LAGI MO LE ASO TOONAI 12 APERILA 2025

(tusia e Pastor EA Adeboye)

Manatu Autu: Filifili Ma Le Poto Au Paaga (Choose Your Partners Wisely).

Tauloto -Tusi Paia–Salamo 1:1 “Amu‘ia le tagata e lē savali i le filifiliga a ē amio leaga, e lē tu fo‘i o ia i le ala o ē agasala, e lē nofo fo‘i i le nofoa o ē tauemu.”

‭‭

Faitauga – Tusi Paia – 2 Nofoaiga Tupu 20:35-37 

O le fanua e te lūlū i ai o le a fuafuaina fua e te selesele. I le faataoto i le tagata lūlū saito, e fa (4) ituaiga fanua na faaaoga, peita’i na o le tasi na fua mai; o isi fanua e tolu (3) e leai se fua na maua ai (Mareko 4:3-8). O’u te tatalo mo oe i le asō ia aua ne’i e lūlū i se eleele naumati, i le suafa o Iesu.

O se fanua naumati e mafai ona faapea o se tagata, se faalapotopotoga poo se fale fo’i. O nisi tagata e o e nonofo i se fale fou o sologa lelei mea uma i o latou olaga ma o latou aiga, peita’i e faafuasei lava ona faaletonu. O nisi, e fai se mafutaga fou pe amata se pisinisi fou ma se isi, ma iu ina malepelepe ai mea uma na o latou fausia mai le tele o tausaga. O Iosefatu o se fa’ata’ita’iga o se uso na osi feagaiga ma ni tagata, o ni eleele naumati. E ui o ia o se tagata amiotonu ae na ia fai paaga ma ni tagata lē amio Atua. Muamua na fa’auō ma Aapo, o se tupu agasala ma le amioleaga ma toeitiiti a uma ai lona ola i le taua pe ana lē laveaiina e le Atua (1 Tupu 22:1-33). O lea e pei ona o tatou faitau I le tusi faitau mai le Tusi Paia o le asō, na ia tuuina atu ia lava i le atalii o Aapo o Aasaia, o le isi tupu amioleaga, ma o la fai faatasia ai vaa e o ai i Tasesa. Na fa’aleagaina uma vaa ma lē taunuu ai le malaga sa fuafuaina aua o le tagata sa fai paaga ma Iosefatu o se eleele naumati.

E taua tele le tagata e te fai paaga i ai i le olaga ma le taunuuga. Afai e te lua toalua ma se tagata amioleaga, o le a maimau lou tautigā aua e oo atu toasa o le Atua i aso uma lava i lē ua amioleaga (Salamo 8:11). O’u te tatalo mo oe; ia aua ne’i lua fai paaga ma se tasi ua faamau faailogaina mo le fa’afanoga I le lagi. Ia aua ne’i fa’aleagaina au galuega ona o le fa’apa’aga ua e faia, i le suafa o Iesu.

O se uso e lē usiusita’i o le isi lea tagata matuiā le faaletonu e avea ma sau paaga. Afai e te lua paaga ma se ituaiga tagata faapea, o loo e lūlū i luga o le eleele papa aua o le lē usitai e punitia le lagi I luga a’e o se tagata. O Iona o se fa’ata’ita’iga o ituaiga uso faapea; na ia faatupuina faafitauli ma puapuaga mo tagata na o latou faimalaga faatasi i Tasesa ona o lona lē usitai. E ui e lei maliliu ae na leiloloa a latou mea totino ona o se pasese lē usitai se toatasi (Iona 1:1-5). Afai e te faapipiia oe lava I se tagata lē usiusita’i o le a e mafatia i mea leiloloa. I le suafa e sili i suafa uma lava, ou te tatalo ia motusia uma ou sootaga ma tagata lē usitaitai uma e ono faapologaina oe i se mafuaaga e matua’i e lē malamalama ai.

Tatalo.

Tamā faamolemole fesoasoani mai ia te a’u ia aua ne’i o’u mafuta ma fa’auō i ni paaga e leai ni fua e maua mai ai, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 11 APERILA 2025

(tusia e Pastor EA Adeboye)

Manatu Autu: Matala le lagi(Open heavens)

Tauloto -Tusi Paia–Teuteronome 28:12 “E tatala mai e le ALI‘I lana tu‘ugā‘oloa lelei ma oe, o le lagi lea, e foa‘iina mai ai o le timu i lou nu‘u i ona po e tatau ai, a fa‘amanuia ai fo‘i mea uma ‘e te faia i ou lima; ‘e te avatu mea i nu‘u e tele, a ‘e te lē nonō atu.”

‭

‭‭

Faitauga – Tusi Paia – Mataio 3:16-17 

E iai le eseesega o le galue i lalo o le lagi e matala ma le lagi e tapunia. O le tauloto mai le Tusi Paia o le asō o loo faapea mai, a tatala le lagi mo oe, e na te foai mai le timu I ona po e tatau ai, e te maua le seleselega mai au galuega ma o lona taui, e te nonō atu tupe i atunuu ma nuu. A tapunia le lagi ia te oe, fai mai le Teuteronome 28:23-24, o le timu o le a paū e pei o se efuefu ninii ma è iu lē aoga lou galue.  

O le ala e maua ai le lagi e matala o loo faamatala mai i le Teuteronome 28:1-2, o le faalogo ma usiusitai i le Upu a le Atua, ia maitau ma faia uma ana poloaiga. O se tasi o ana poloaiga o loo i le  Malaki 3:10 

“‘Inā ‘aumaia mea e sefulua‘i a ‘outou mea uma lava i le fale e tu‘u ai mea; ‘ina ‘ia i ai mea e ‘ai i lo‘u fale; ma ‘ia ‘outou tofotofo mai ai ‘iā te a‘u i lenei mea, ‘ua fetalai mai ai le ALI‘I o ‘au; pe ‘ou te lē tōina pupuni o le lagi mo ‘outou ma sasa‘a atu le manuia mo ‘outou, ‘ina se‘ia silisili ‘ona tele.”

‭

A tatala le lagi i se tagata, o so’o se mea e tago iai o ia, e amata ona manuia. A e soifua faapaiaina ma faia le finagalo o le Atua, e na te tatalaina le lagi mo oe. Ina ua faataga e Peteru lona vaa e faaaoga  e Iesu, ona ia usitaia lea o le faatonuga e tuu I lalo i le sami lana upega, o lona usitai na oo mai ai se vavega, o se faiva tele. Peitai ona sa galue o ia I lalo o se lagi sa tapunia mo se taimi umi, e na o le tasi le upega na ia tuua I  lalo. E ui I lena tasi, na maua lava se faiva tele (Luka 5:1-7), e te manatu i le mea e tupu pe ana tele ni upega e tu’u i le sami e pei ona faatonu mai ai Iesu. I le suafa e sili i suafa uma lava, ou te tatalo ia e faalogo I le siufofoga o le Atua e faatatau i le isi laasaga I luma ma usitai i ana faatonuga. 

O le tatalo le isi tulaga e mafai ai e se tagata faatuatua ona savali i lalo o le lagi ua matala. Ina ua afio atu Iesu i le vai i Ioritana e papatisoina e Ioane, na ia faia se mea e lei faia e isi tagata sa papatisoina, sa ia tatalo, 

“‘ Ua papatisoina le nu‘u uma ‘ona papatisoina ai lea o Iesu, ‘ua tatalo ia, ‘ona fa‘aavanoaina ai lea o le lagi,” Luka‬ ‭3‬:‭21‬ ‭

O isi tagata na latou tofu i le vai ma toe ea a’e i luga o loo tapunia le lagi, ao Iesu na tatalo ona tofu lea I le vai ma ea a’e i luga ua matala le lagi. O le toaga e tatalo faatauanau e maua mai ai tali e lē o maua e isi aua e aogā tatalo faatauanau a le tagata amiotonu e iai le mana ma e maua tali lelei. 

Tatalo

Tamā, ou te tatalo mo le alofa tunoa ou te tatalo ai faatauanau i le asō ma usitai ma le filigā ia te oe ina ia ou ola i lalo o le lagi e matala pea, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 10 APERILA 2025

(tusia e Pastor EA Adeboye)

Manatu Autu: Le toe galue tigaina 2 (No more labour 2)

Tauloto -Tusi Paia–Esoto 33:14 “Ona fetalai mai lea o le ALI‘I, “Tā te ō atu lava ma a‘u; ‘ou te avatua fo‘i le mapusaga mo oe.”

‭‭

Faitauga – Tusi Paia – Teuteronome 15:5-6

Na ou talanoa atu ananafi o le galue tigaina e faatatau i le galue mamafa ae itiiti i le leai le fua e maua mai ai. E faigofie le galue pe a maua le taui poo le fua mai. A ou iai I le ofisa tutotonuo le Ekalesia RCCG, e pa’i o’u lima i le faitau afe o tagata, o se galuega tele, ae e le afaina ia te a’u ona o tautinoga e mulimuli mai ai. 

Afai e anapogi le faifeau, tatalo, lauga, aoao ma fesoasoani i kerisiano fou, peitai e lē tupu le Ekalesia, o se tulaga lē manuia. Ou te iloa lelei aua na ou oo iai. I uluai aso o le galuega a le Atua, na folafola e le Atua o le a ou taitaia se autau malosi i aso mulimuli, peitai ou te lei iloa atu ma vaaia se autau. E faaopoopo tagata se toalua i le vaiaso e tasi ae le toe lolotu le toafa i le vaiaso e sosoo ai. Sa ou faia ni semina i masina uma ma è toatele tagata e auai mai. Peitai a maea nei semina e tumau lava le toaitiiti o le aulotu. E iai se aso na fesili mai ai le Atua poo le a se meaalofa ou te manao ai mo lo’u aso fanau. Ua ou tali atu ou te manao ia maua e tagata uma o la’u aulotu se vavega. Na ia faatonu au e faia se polokalame e mafai ai ona ia faia vavega. Ua matou faia ma taua o le sauniga o Agaga Paia ma o le auala lea na suia ai e le Atua mea uma mo a’u. 

A fetalai le Atua i se mataupu, o tali e le mafai e tagata ona faia o le a maua. Mo se faataitaiga, na manaomia se 17,000 tala e faia ai le taualuga o le fale Tele a le Ekalesia i le taulaga o le Ekalesia, ae na o le 1,000 sa ia te a’u. I le taimi lea, sa fausia e se tasi faifeau se fale e nonofo ai nisi o lana aulotu ma sa ia manaomia le 1,000 e faia ai le taualuga o lea fale. Ua sau ma ole mai ia te a’u mo le tupe lea, ua ou ita ma faapea atu, ‘ o loo ou manaomia le 17,000 ae na o le 1,000 lea e iai, ao lea e te manao I le tupe lea? Faamolemole alu ese ma lo’u ofisa’ . Ua tulai o ia o le a alu, ae faapea mai le Atua e ave iai le tupe e 1000. Na ou toe valaau e sau ma ua ou avatu ia te ia le tupe. Ua ia alu ese ae faapea mai le Atua, ‘atalii, aisea ua e tomumu ai? E lua ni faafitauli, o lea ua maea ona fofō le isi ae toe tasi’. Ae lei maea le aso lea, na sau se tagata mai se tasi setete i fafo ma faapea mai, ‘faatoa uma nei ona aoina mai tupe mai tagata e nofo mautotogi ia te a’u ae fai mai le Atua ou te sau e aumai uma ia te oe’. E 17,000 lelei le aofaiga o le tupe. 

A e faalogo loa I le siufofoga o le Atua, usitai ia te ia, ona taatia lea ia te ia o mea uma aua o lou mapusaga mai le galue tigaina o loo taatia i lou usitai. O le siufofoga o le Atua e auina mai ai le mapusaga, peitai e te le maua sei vagana ua e usitai ia te ia, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 9 APERILA 2025

(tusia e Pastor EA Adeboye)

Manatu Autu: Le toe galue tigaina 1 (No more labour 1)

Tauloto -Tusi Paia–Mataio 11:28 “Ia ‘outou ō mai ‘iā te a‘u, o ‘outou uma o ē tigāina ma mafatia i avega, o a‘u fo‘i e mālōlō ai ‘outou.”

‭‭

Faitauga – Tusi Paia – Luka 5:1-7

I le tausaga 1963, ao ou faiaoga i se aoga tulagalua a tama i le itu i sisifo o Nigeria, e 35 lesona ou te faia i le vaiaso. O seisi faiaoga e sinia atu ma tele tausaga o faiaoga, e 21 ana lesona e faia i le vaiaso. E faafāina lona totogi i lo’u totogi ae e tomumu lava i le tele o galuega e faia. Na ou alu ma fai iai i se tasi aso, ‘lau susuga, e na o le 21 au lesona e tapena ao a’u e 35, ae faafaina lou totogi i lo’u totogi ae o lena e te faitio lava’. Ua faalatalata mai ma musumusu mai, ‘tama, e te lē o malamalama, o loo totogi au mo galuega ua maea faataunuuina faapea ma lo’u mafaufau’. Ao ou galue tigaina mo sina totogi laitiiti, e laitiiti galuega a lei si faiaoga ae sili atu lona totogi. 

E iai le eseesega o le galue punouai ma le galue tigaina i galuega. O se tagata galue tigaina, e tatau ona galue malosi mo se totogi laitiiti. E le mafai ona e faaigoa se pule i le galuega o se tagata galue tigaina (labourer), e o uma I laua I le galuega e tasi, ae alu le tagata pule e faigaluega ao le isi e galue tigaina. E ui e usu atu i le taeao po le tagata pule ma galue malosi, e lelei lona totogi e maua I ana galuega.  I le Kenese 2:15, na ave e le Atua se faatoaga ia Atamu e galue ai. Fai mai nisi o tagata popoto o le Tusi Paia, e pei Etena o le telē o le taulaga o Lagos atoa. E matua tele le galuega e manaomia e faia i se faatoaga e tele faapea e se tagata e toatasi. Peitai, o Atamu, sa galue, e lei tigaina. Ina ua paū i le agasala, na amata loa ona galue tigaina (Kenese 3:17-19) ua sisina lona afu, ae lei faapea i le amataga. E le gata ina tigaina ma afu sisina, ua ola mai i le eleele le vaomatua ma le vaotuitui. 

I le Luka 5:5, na galue Peteru i le ao atoa ma le po, o le tulaga lea e taua o le galue tigaina. E ui sa galue punouai i le po atoa, ae e leai se mea na maua. Peitai, na faamutaina aso o le galue tigaina ai Peteru Ina ua afio mai Iesu i lona olaga. Afai o loo e galue tigaina ma ua e naunau e faamutaina, toe faaolaola lau fesootaiga ma le Atua, ona ia faamutaina lea o galuega e leai ni taui poo ni fua mai I lou olaga e faavavau, i le suafa o Iesu. 

Le au pele e, poo le a lava se mafuaaga o loo e maua ai pea le galue e leai se fua, e ui ua maea ona lafoai lou ola ia Iesu Keriso ma o loo e ola e tusa ma lona finagalo, ou te folafola atu, o le a afio atu le Alii i le tulaga i loo e iai i le asō, ma faamuta loa le galue tigaina i lou olaga i le suafa o Iesu. O le fesootaiga faifaipea ma le Atua e mautinoa ai e leai se galue e lē maua se taui, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 8 APERILA 2025

(tusia e Pastor EA Adeboye)

Manatu Autu: Tatalo mo le Ekalesia (Prayers for the church)

Tauloto -Tusi Paia–Galuega 19:20 “O lea ‘ua matuā tupu tele ai ma ‘ua manumālō le afioga a le Ali‘i.”

‭‭

Faitauga – Tusi Paia – Galuega 4:23-33

Tatalo

1. Tama faafetai mo lau Ekalesia. E ui i faufauga leaga a le fili, o lo o savali pea i luma lau Ekalesia.

2. Tama, faamolemole ia fou le paū faaua ifo o lou Agaga i luga o lau Ekalesia. E pei ona e faia i le Aso Penetekoso, ia liligi ifo lou Agaga I luga o lau Ekalesia, ma ia iai se faaolaolaga i lau Ekalesia i le suafa o Iesu.

3. Tama, faamolemole ia iai le loto gatasi ma se mafutaga mafana ma vavalalata i tagata o lau Ekalesia. Ia iai le alofa ma le loto gatasitasi i le va o Ekalesia Kerisiano eseese, ma ia faia lou fingalo i le lalolagi e ala i le Ekalesia, i le suafa o Iesu.

4. Tama, ou te tatalo mo taitai uma o le Ekalesia i le lalolagi atoa. Foai ia i latou le poto, le loto toa ma ia taitaia i latou e Agaga Pa’ia ia manuia ai lo latou auaunaga ia te oe, i le suafa o Iesu.

5.Tama faamolemole foai le malosi, ia faamalosi’au i faifeau ma taitai o Ekalesia i le lalolagi atoa.

Aua nei fa’atagaina le ti’apolo na te faatama’ia au leoleo mamoe ma fa’ataapeapeina ai lau lafu mamoe, i le suafa o Iesu. 

6. Tama ou te tatalo mo Kerisiano uma i so’o se itu o le lalolagi o loo sauaina ai tagata Kerisiano. Faamolemole ia susulu lou malamalama ia i latou, ia tumau ma puipuia ai i latou, i le suafa o Iesu.

7 Tama, faamolemole ia e fa’amalumalu, puipui ma faamalosi’au I au misionare kerisiano uma i le lalolagi atoa.  Ia faatagaina lou Agaga e mafuta ma i latou ma ia vave ona maua tali o latou tatalo, i le suafa o Iesu.

8. Tama, ou te tatalo mo Ekalesia uma o lo’o faavaeina i totonu o nofoaga e le masani ai e pei o falepuipui, faapea ma togalauapiga a le fitafita ma isi. Ia fa’atumuina ia nofoaga i lou mamalu, ma ia faia ni vavega ma maua seleselega o agaga, i le suafa o Iesu.

9. Tama, ia faatagaina le tala’iga o le tala lelei ma ia maua’a i tulimanu uma o le lalolagi. So’o se faiga fa’avae sese o fa’alavelave i le tala’iina o le tala lelei, ma le fa’atuina o Ekalesia i le lalolagi, ia fulisia, I le suafa o Iesu.

10. Tama, faamolemole foai i lau Ekalesia i lenei lalolagi, le faulai o mea uma e manaomia e faataunuuina ai le manulauti o le malò o le Atua, ia fai nuu uma lava ma so’o i le suafa o Iesu.

11. Tama, fa’amolemole fa’amanuia le matou aulotu ma ia e fesoasoani ia i matou e fa’ataunuu ai lou finagalo mo le lalolagi. Ia vave fa’atuanuuina au folafolaga mo i matou, i le suafa o Iesu.

12. Tama ia maualuga pea lou viiga ma le faaneetaga seia oo i le faavavau. Faafetai Tamā ua e faafofoga ia matou talosaga ma o le a vave ona maua tali o a matou tatalo, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 7 APERILA 2025

(tusia e Pastor EA Adeboye)

Manatu Autu: E pei o le aso Penetekoso 7 (Like the day of Pentecost 7)

Tauloto -Tusi Paia–Galuega 5:15 “ua o‘o ‘ina ‘aumai e i latou i ē mama‘i i malae, ma fa‘ata‘o‘oto ai i moega ma fata, tau lava ‘ina ‘ia fa‘apaoloina ai nisi o i latou i le ata o Peteru pe a ui ane o ia.”

‭‭

Faitauga – Tusi Paia – Galuega 1:1-8

O le a faaiu atu i le asō le suesuega ma le faatalanoaina o le taua o mea na tutupu i le aso Penetekoso i le faasoa atu i se feiloaiga na ou maua ma le Atua na matuā suia ai la’u savaliga faapea ma le galuega a le Atua. 

Ao lata i lo’u aso fanau ini tausaga ua tuanai atu, na fesili mai le Alii poo le a se meaalofa ou te mana’o iai, na ou faia iai ou te manao e maua e tagata uma o le Ekalesia se vavega. Sa mafai i lea taimi ona ou ole atu mo soo se mea ma e mautinoa e na te foai mai, peitai na ou ole atu mo le mana o Agaga Paia e galue i totonu o la’u aulotu. Na fai mai ia ou faia se sauniga e taua o le ‘sauniga o Agaga Paia’, ma na amata mai iina, ona ou vaaia i vavega tetele e lei vaaia muamua iai i le Ekalesia RCCG. Na amata ona tutupu vavega faapitoa ia te a’u Ina ua faataga e le Atua e faaaogaina lo’u tagata e saunia se siomaga e galue mai ai Agaga Paia i le ogatotonu o ona tagata. 

E agavaa soo se tagata faatuatua e faia vavega (Mareko 16:17-18) ae o lē e taitai ma saunia le siomaga e galue mai ai Agaga Paia, e na te faia ni vavega faapitoa ma faatupuina se faaolaolaga e pei ona tupu i le aso Penetekoso. 

I le aso Penetekoso, na faamanuiaina tagata uma na iai i le afeafe aupitoaluga, peitai e iai le tagata e toatasi na uiga ese lona tulai mai, o Peteru. Na tofia Peteru mo se tulaga e sili atu i le tulaga masani ai.  Na folafola e le Alii ia te ia i le Luka 5:11, o le a ia avea ma faifaiva i tagata ae lē o i’a, ma o lea folafolaga na matuā faamautuina ma iloa tino Ina ua maea le mea na tupu i le afeafe aupitoaluga, e tasi le lauga ae manumaloina agaga e 3000 (Galuega 2:14-41). Ao faia e nisi tagata vavega, na uiga ese o ia, ua malolo tagata na lafoia I lona ataata (Galuega 5:15). O le mea lea e tupu pe a faaavanoa lou tagata e saunia le ituaiga siomaga e afio ai Agaga Paia. 

Ou te iloa mai lou faitauina o lenei faasologa o aoaoga, ua faamalosia oe e faia se faaolaolaga. E iai le talalelei mo faifeau uma e saunia le siomaga e faaalia ma iloa tino ai le mana ma galuega a Agaga Paia i latou Ekalesia ma mafutaga, o le a matua tupu ma ola sautualasi le galuega a le Atua o loo latou taitaia. Ou te tatalo ia galue atu Agaga Paia ia siitia le tulaga o lona mana ina ia tino mai vavega faapitoa e tauala ia te oe, i le suafa o Iesu. 

Tatalo

Tamā, faamolemole fesoasoani mai ia te au ina ia ou saunia le siomaga e te fiafia Agaga Paia e afio ai, i le suafa o Iesu, Amene.  

OPEN HEAVENS

MATALA LE LAGI MO LE ASO SA 6 APERILA 2025

(tusia e Pastor EA Adeboye)

Manatu Autu: E pei o le aso Penetekoso 6 (Like the day of Pentecost 6)

Tauloto -Tusi Paia–2 Nofoaiga Tupu 7:1 “Ua fa‘ai‘u e Solomona lana tatalo, ‘ona pa‘ū ifo ai lea o le afi mai le lagi, ‘ua fa‘aumatia ai le taulaga mū ma taulaga; ‘ua tumu fo‘i le fale i le pupula o le ALI‘I.”

‭‭

Faitauga – Tusi Paia – 1 Tupu 18:30-39

O le asō a o faaauau pea la’u talanoaga faatatau i mea na tutupu I le aso Penetekoso o loo molimau mai i le Galuega 2. O’u te mana’o e suesue le uiga o le afi na vaaia ma sa nofo i o latou luga ta’ito’atasi. Ua tatou faitau I le Tusi faitau mai le Tusi Paia o le asō o le tatalo a Elia na mafua ai ona paū mai le afi mai le lagi, sa tele lava i le viiga. I totonu o se nofoaga o fai ai viiga, e tali le Atua i tatalo e ala i le afi. A paū le afi a le Alii e lē toe i ai se ifo i tupua i le nuu. O le mafuaaga o le tupu lauolaola o polokalame a le tiapolo i nisi o nofoaga ona e lē o ausia tulaga e tatau ona fai. 

O le isi vaega na faia e Elia a o lei paū lē afi e pei o le tatou Tusi faitau o le asō, o le toe faafou ma faaleleia o le fata faitaulaga sa malepe. Afai tatou te toe fausia o tatou fata faitaulaga o le tatalo ua malepelepe, fai viiga, ma ifoga, o le a paū le afi a le Alii. E lē mafai ona o tatou ola fa’aleogalua ae manatu e auina mai e le Atua le afi. Sa faatalitali le au so’o I le afeafe aupito i luga a o le’i paū le afi a le Atua - sa o latou galulue tinoū e tatalo ma tapena le fata mo le Afi a le Alii (Galuega 2:1-2). Ina ua uma ona toe teu e Elia o le fata faitaulaga o le Alii sa soloia I lalo, ona ia fa’ae’e lea o fafie i luga ma tapena le taulaga (1 Tupu 18:33). E lē mafai ona o tatou faaletonu, ma lē maopopo ae manatu e paū le afi a le Alii. 

Na fai fo’i Elia i tagata e sasa’a Kate o vai e fa i luga o le taulaga mu. Maitau mai e lei timu le nuu mo le 3 ma le afa tausaga; o lona uiga o le sasa’a faa maimau o le tele o le vai o le isi fo’i lea taulaga mu. Na sasa’a e tagata se oloa ua utiuti i tapenaga mo timuga. Leitioa a faavave vave le Atua e auina mai lona afi. So’o se mea e silasila atu ai le Atua i se taulaga mu e lē masani ona faia e auina mai e ia lona afi. I le 2 Nofoaiga Tupu 5, ina ua maea na fausia le malumalu o le Atua na faapotopoto e Solomona Sa Levī uma, ma ositaulaga ma Isaraelu uma ma o latou faitaulaga ai i le Atua i mamoe ma povi e lē mafaitaulia e lē masino lava ina ua tele nauā. Ina ua maea lenei taulaga tele, na fa’atumulia le malumalu I le mamalu o le Atua ma ua lē mafai ai e le ‘au faitaulaga ona tutū e auauna aua ua tumu le fale o le Atua i le pupula o le Alii. O lea ina ua fa’ai’u e Solomona lana tatalo, ona pau ifo ai lea o le afi mai le lagi ua faaumatia ai le taulaga mu ma taulaga (2 Nofoaiga Tupu 7:1). O le afi mai le lagi o le fa’asaoina, faatupulaia ma vavega e lē masani ai, e pau i nofoaga o faatino ai talosaga ma o loo faia ai foai faataulaga.

Le au pele e, e te loto ea I le Afi a le Atua? Aua le taofia pe faatuai le avatu ia te ia o lou loto, taimi, ma au oloa. Foai faataulaga e lē faatuaoia ma tatalo e lē aunoa; o le a o’o mai ia te oe le afi o le mana o le Atua, lana foai ma lona mamalu.

Tatalo 

Tamā o le a ou le taofia soo se mea mai ia te oe. Faamolemole fesoasoani mai ia te a’u ia ou foai atu ia te oe ma le loto atoa, ia o’o mai ai lou afi, i le suafa o Iesu, Amene.

OPEN HEAVENS

MATALA LE LAGI MO LE ASO TOONAI 5 APERILA 2025

(tusia e Pastor EA Adeboye)

Manatu Autu: E pei o le aso Penetekoso 5 (Like the day of Pentecost 5)

Tauloto -Tusi Paia–Iopu 33:4  “Na faia a‘u e le Agaga o le Atua; o le mānava fo‘i a Lē e ona le malosi uma lava ‘ua ola ai a‘u.”

‭‭

Faitauga – Tusi Paia – Kenese 1:1-3

A o fa’aauau pea ona ou faamatala le tāua o mea na tutupu I le aso Penetekoso, ou te mana’o ia e manatunatu faapea, i lea aso, sa i ai se leo o se matagi malosi ua agi tele (Galuega 2:1-2). I le Esoto 14:21-28 ina ua agi le matagi ona taatia mai lea o se auala sa lei i ai muamua. A tupu se faaolaolaga pei o le aso Penetekoso, o malosiaga uma o lo’o faalavelave i le ekalesia o le a tafiesea e le matagi, ma o le a tutū mai ni auala e le’i vaaia muamua.

I ni tausaga ua mavae, sa valaaulia ai a’u ou te lauga i se ekalesia e lē talitonu i le Agaga Paia, ma sa ou lauga faatatau i laasaga amata e tolu o le fa’a kerisiano; faaolataga, faamamāina ma le papatisoga a le Agaga Paia. Ina ua uma ona o’u talanoa faatatau I le Agaga Paia, sa o’u manatu o le a i ai ni manatu tete’e, peita’i na sau se faifeau o le ekalesia ma faapea mai ia te a’u, “Faafetai i lau Susuga mo le faamalamalamaina mai ia I matou o le Agaga Paia e pei o le matagi. Afai e mana’o le matagi e agi e pāsia se itu a o loo poloka e se isi le ala, o le a le mea e tupu?” Sa ou tali atu, “O so’u iloa itiiti e faapea; o lea tagata o le a suatia i luga”.

So’o se mea o faalavelave i lou agai I luma ma polokalame a le Atua mo lou olaga o le a lia’ina ma fa’aleaogāina pe a afio ifo le Agaga Paia. Ou te tatalo so’ose malosi o le pouliuli e ono taofia oe mai le faataunuuina o le finagalo o le Atua, ma lou maua o ana faamanuiaga o le a lia’ina e le matagi o le Agaga Paia I le suafa o Iesu. 

O le isi tulaga e tupu pe a agi le matagi o le foai Paia a le Atua. Ina o le a tuuina atu e le Atua aano manu fasi i lona nu’u mo a latou meaai, na ia auina mai se matagi na aumaia salu mai le sami ma ua tu’u ai i le toagalauapi ua tele nauā ua si’osi’omia ai lava le toagalauapi: ma ua faapotopotoina e tagata mai i lea aso seia o’o i le aso na soso’o ai (Numera 11:31-32). E lava pea ma totoe le foai a le Atua e lē aunoa i le mea e agi ai le matagi o le Agaga.

Fai mai Iopu o le Agaga o le Atua na faia ia ma o le mānava fo’i a Le e ona le malosi uma lava ua ola ai o ia (Iopu 33:4). O le matagi a le Atua e aumaia le ola, ma o le mea e i ai le ola e lē mafai ona i ai le oti. Ina ua mānava le Atua i poga’iisu o le tagata, o le mānava ola (Kenese 2:7), ona avea ai lea o le tagata ma tagata ola; ua suia mai le efuefu ma le palapala i se tagata e savali ma tautala. O le a e iloa fesuiaiga pe a agi le matagi o le Agaga o le Atua e pei ona ia suia le soona nunumi o le lalolagi sa i ai i le amataga i se nofoaga matagofie (Kenese 1:1-3).

Ou te folafola o le a e maua se pa’i fou mai pe matagi a le Atua i le vaitau lenei I le suafa o Iesu.

Tatalo

Tamā faamolemole ia faataga le matagi o lou Agaga e agi i luga o lo’u olaga ma lau galuega ua o’u galue ai i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 4 APERILA 2025

(tusia e Pastor EA Adeboye)

Manatu Autu: E pei o le aso Penetekoso 4(Like the day of Pentecost 4)

Tauloto -Tusi Paia–Salamo 149:6 “Ia i ai i o latou gutu o fa‘ane‘ene‘ega i le Atua; ‘ia i ai fo‘i i o latou lima le pelu e fa‘atau ma‘ai itū;”

Faitauga – Tusi Paia – Ieremia 30:18-22

O le a faasolo atu pea le talanoaga i le taua o mea na tutupu i le aso penetekoso, ou te fia faailoa atu, o i latou na faalogo i le au soo ina ua maea ona faatumulia i le Agaga Paia ua faapea mai, “ua matou faalogo atu o loo latou vivii ona o galuega matagofie a le Atua i gagana eseese mai matou nu’u” (Galuega 2:1-12). O lona uiga e tatau ona faia pea le faafetai ma le viiga i le Atua pe afai tatou te fia maua le galue malosi mai o Agaga Paia i le tino o Keriso i le asō. 

A tatou mafuta e tatalo mo tatou manaoga,  e afio mai o ia. Peitai a tatou mafuta faatasi na o le faafetai ia te ia ma faailoa lona mana matautia, e afio ma faaali mai o ia ma lona mana, ma o le a iai faaolaolaga, o vavega o le a avea ma masani i ia mafutaga ma o le a tele tautinoga. 

I le tele o tausaga talu ai, na ou folafola o le a ou asiasi i se tasi o toeaina a le Ekalesia RCCG ma ou faia iai e ma te mafuta tau o le 5 minute. Ae ou te lei taunuu atu, ua ta pese ma viiga matagofie i lona fale ona e faalogo e masani ona ou pese pese lemū i viiga o le Atua. Ua ou le iloa, ua atoa le itula o ma mafuta ma ia ona sa ou fiafia i pese ma viiga. Afai o oe o se afafine poo se atalii o le Atua, e faafofoga le Atua i ona viiga ma pese mai ia te oe, e mautinoa e mafuta pea o ia ma oe. E afio ma tietie o ia i viiga a ona tagata (Salamo 22:3); e afio mai pe a viia ma faaneeneeina o ia. 

O tagata e faitio ma tomumumu e le mafai ona latou saunia se siomaga e afio ai le mamalu o le Atua. Ina ua tomumumu le fanauga a Isaraelu, na lē fiafia iai le Atua, ma è iai taimi na oo mai le afi e faaumatia. E ese mai le afi o Agaga Paia i le aso penetekoso, o le afi lea na mū ma faaumatia ai i latou (Numera 11:1). Ao iai Paulo ma Sila i le falepuipui, e lei tomumumu ma faitio, ae sa fai viiga ma pese i le Atua. Na afio mai le Atua I le falepuipui, ua oo mai se mafuie, ua luluina le eleele ma faavae o le falepuipui (Galuega 16:25-26). A e vivii i le Atua i le taimi o faafitauli, e na te aumaia tali e te manaomia e le mafai ona teena e tagata, ma foai atu faamanuiaga ia te oe, e o’o ma pa’i atu ia’i latou o loo i lou siomaga. Ina ua luluina le falepuipui, na matala uma faitotoa ma ua matalatala uma noanoataga o tagata. 

Le au pele e, lafoai lou ola ia Iesu Keriso pe afai e te lei faia lava ona e filifili lea e ola ma soifua i se olaga o pese ma viiga i le Atua. O le a afio Agaga Paia ma oe ma iloa tino mai i lou olaga. E na te faasaoloto ia te oe mai soo se noataga ma saisaitiaga ma faamanuia ia te oe ina ia faulai faamanuiaga i lou olaga faapea olaga o ē e tau ia te oe ma iai i lou siomaga, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 3 APERILA 2025

(tusia e Pastor EA Adeboye)

Manatu Autu: E pei o le aso Penetekoso 3(Like the day of Pentecost 3)

Tauloto -Tusi Paia–Efeso 5:21 “Ia usiusita‘i le tasi i le tasi ma le mata‘u ‘iā Keriso.”

Faitauga – Tusi Paia – Efeso 5:21

I aso e lua ua mavae, sa ou talanoa atu i le taua o mea na tutupu i le aso Penetekoso. I lena aso, na maua ai e tagata uma sa i le afeafe aupitoaluga le pa'i mai o aao alofa o le Atua. Ua liliuina o latou loto i le Atua, ma sa faatumulia foi i latou uma i le Agaga Paia.

Afai e moni lo tatou naunau ia iai se toe fa'aolaolaga i lenei augatupulaga, e le tatau ona tatou tuulafoa’i tagata vaivai e tumau ai i le tulaga vaivai. E tatau ona tatou fa'amalosi ma faama’ai le tasi i le isi (Faataoto 27:17) seia oo ina faia e tagata 'vaivai' ni vavega. Afai e moni lo tatou lotogatasi, o le a tatou le tilotilo ese pe a va'ai atu i se  uso o loo tautulimoe a’o faia talosaga; e tatau ona tatou uuina lona lima, ma fa'amalosia ia te ia e tatalo. E le tatau ona tatou tilotilo atu i se tuafafine o ofu la'ei le talafeagai ma fa'aalia fa'ailoga o le liliu ese e aunoa ma le taumafai e fa'amalosi I lona fa'atuatua. Afai e foliga mai ua mate le afi i totonu o se tagata, ia tatou tatalo mo ia, ae lē o le fa'aaogaina o lena tagata o se fa'ata'ita'iga leaga i isi, e fa'afoliga ai, o oe e amiotonu.

O tagata uma na i le afeafe aupitoaluga  i lena aso faapitoa, na latou maua le pa’i mai o le Atua, aua sa latou gauai atu ia te Ia, ma faapena le tasi i le isi – e leai se tasi na lagona le sili atu i le isi ona uso a tagata. I le vaitaimi o le 1970, sa i ai se alii talavou e faaigoa ia uso Samuelu. E le o ia o se sui o le RCCG, ae sa lauiloa o ia ona na faauuina o ia i le agaga o le Atua. E le iloa tautala i le gagana Peretania, ae e faauuina ma tele ana valaaulia e maua e lauga. Na valaaulia o ia, e lauga i se tasi kolisi. Ina ua ia tulai atu e tau atu i le faalapotopotoga, e leiloa tautala faaperetania ma e na te mana'omia se faaliliu upu, ae tei ua amata ona tautala mai i le gagana faaperetania maoi. E na te lē malamalama i ana tala o loo faia, ae o loo faasolo lava le lauga. Ina ua mavae le itula e tasi, ua amata ona lolofi atu tagata i ona luma, ua fetagisi ma augani mo le faaolataga. O le taimi lava na ia tuua ai le malae o le kolisi, na lē toe mafai ona tautala faaperetania. Sa iai tautinoga o tagata maliliu e to'atolu na faatūina mai le oti e le Atua e auala ia te ia I lea sauniga. So’o se taimi lava e tatalo ai o ia mo gasegase, e mafai ona ia faamatalaina  auala na ō ese ai ma'i mai o latou tino seia o’o ina faamaloloina atoatoa i latou.

Ae peitai, ua tupu le loto faamaualuga i lona loto ina ua mavae sina taimi. So’o se taimi lava e valaauina ai o ia e auai atu i fono tatalo, sa ia faapea mai, "O ai o loo lauga? E toafia tagata ua maliliu na ia toe faatuina mai?" O le faanoanoaga, na iu lenei alii i se nofoaga e sulufa'i ai tagata pagatia. 

Le au pele e, afai tatou te mananao i le mana o le Atua e tumau ia te i tatou, e tatau ona tatou aloese mai le loto faamaualuga ae gauai atu le tasi i le isi i le mata'u i le Atua (Efeso 5:21). E tatau foi ona tatou lagolago i e vaivai ma taumafai e siitia i latou i luga, i le suafa o Iesu, Amene.