Samoan Devotional

OPEN HEAVENS

MATALA LE LAGI MO LE ASO LULU 2 APERILA 2025

(tusia e Pastor EA Adeboye)

Manatu Autu: E pei o le aso Penetekoso 2(Like the day of Pentecost 2)

Tauloto -Tusi Paia–Roma 12:5 “e fa‘apea i tatou nei le to‘atele, ‘ua tino e tasi ‘iā Keriso, ‘ina ‘ua fēfa‘afeagaia‘i itū tino.”

Faitauga – Tusi Paia – 1 Korinito 12:18-27

Na amata ananafi ona suesue ma faasoa atu i le aafiaga o le aso penetekoso ma le mafuaaga e tatau ai i kerisiano ona ave le faamuamua i le vavaeeseina mai le lalolagi ina ia tatou maua le faaolaolaga. O lei si tulaga e fia faailoa atu, o le aso penetekoso, na loto gatasi le au so’o. Afai tatou te fia vaai i le mana o Agaga Paia o galue mai, e tatau ona iai le alofa ma le loto gatasi i le tino o Keriso, tusa poo le a le Ekalesia. 

Fai mai le Salamo 133:1-3, e faatonu e le Atua le oo mai o le faamanuiaga pe a iai le loto gatasi. E lē o faapea mai e ‘tuuina mai’ e le Atua se faamanuiaga, o loo faapea mai e na te faatonuina le oo mai o le faamanuiaga. I nisi faaupuga, o loo faapea mai, ‘Faamanuiaga, ia tino mai’. Afai e iai le alofa moni ma le loto gatasi i tagata o le aulotu poo se mafutaga, e leai se faailoga fesili e faamanuiaina sui uma o lena mafutaga. 

E lē mafai ona tino mai le mana o le Atua I se Ekalesia poo se aiga e fevaevaea’i. O le loto gatasi e tosina mai ai le mamalu o le Atua, e pei a ona tosina mai loi i le suka. E faapena foi i se Ekalesia e fevaevaea’i, loto leaga ma uiga faapena o le tino. E mamao le mana o le Atua mai Ekalesia faapena. Na teena e le Atua le Ekalesia i Korinito ona o le fevaevaea’i. O nisi ua au ma Paulo, o nisi e au ma Apolo (1 Korinito 3:4).  Na taua i latou e Paulo e faaletino ona o le mataua ma le misa. O le tino o Keriso e tasi, ma a e fia ola i le mana o le Atua ma lona mamalu e pei o le aso penetekoso, e tatau ona tuu ese o tatou fe’eseeseaiga ae taulai le vaai i lē e ona le suafa o loo tatou tauave, o Iesu Keriso. E le mafai ona osofai e le tasi leisi ae manatu e afio mai le Atua e mafuta ma I tatou. Fai mai le Kalatia 5:15 “‘Ae ‘āfai tou te feūta‘i ma fe‘aina‘i, ‘ia ‘outou ‘ina ne‘i fa‘aumatia ‘outou ‘iā te ‘outou.”

‭‭

 I le fuaitau o loo taua i luga, o loo tatou iloa ai a tatou fe’ainai ma feūta’i, e faaumatia i tatou e tatou lava. E toatele tagata faatuatua ua latou faamanu’a i isi uso i le tino o Keriso ia latou upu ma mea e faia. E tatau ona taofia lea faiga ae ola ma soifua i le alofa ma le loto gatasi ina ia afio mai le mamalu ma le mana o le Atua ma iloa tino iai tatou. 

O le alofa o le tasi i le isi ma maua le loto gatasi, o se auala tonu lea e faaali atu ai i le lalolagi o i tatou o so’o moni o Iesu (Ioane 13:35). E le tatau i le au kerisiano ona tataia tagata lē faatuatua e teena le talalelei ona latou te le vaaia le alofa o le Atua iai tatou. E tatau ona maua e le tino o Keriso le loto gatasi. O le faitala, taufaaleaga ma le faia o tauvaga i le va o Ekalesia, e tatau ona taofia pe afai tatou te fia maua moni le faaolaolaga a Agaga Paia. 

Tatalo

Tamā, faamolemole fesoasoani mai ia te a’u ia ou alofa I isi tagata e pei ona ou alofa ia te a’u ma ia maua le loto gatasi i le au kerisiano, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 1 APERILA 2025

(tusia e Pastor EA Adeboye)

Manatu Autu: E pei o le aso Penetekoso 1(Like the day of Pentecost 1)

Tauloto -Tusi Paia–Galuega 1:8 “Ae peita‘i o le a maua e ‘outou le mana, pe ā afio ifo le Agaga Pa‘ia i luga ‘iā te ‘outou; e fai fo‘i ‘outou ma molimau ‘iā te a‘u i Ierusalema ma Iutaia uma lava, ma Samaria, e o‘o lava i le tulu‘iga o le lalolagi.”

‭

Faitauga – Tusi Paia – Galuega 1:12-14

O le taimi muamua na afio mai ai le Agaga Pa’ia e mau i totonu o le tagata, na tupu i le aso Penetekoso e pei ona tusia i le Galuega 2: 1-12. Na fetalai Iesu i lona ‘au soo e faatali i Ierusalema mo le Agaga Pa’ia (Luka 24:49). O le aso o le Penetekoso ma mea sa tutupu mulimuli mai ai na amata faataatia mai ai alāfua o le fa’a Kerisiano e oo i le gata’aga. Pe ana mafai ona toe tupu se aso faapea i nei aso i Ekalesia uma o le lalolagi; semanu e mata’utia se toe faaolaolaga e tupu mai ai. Sa iai se tulaga faapea, sa tupu i Azusa i Amerika i le tausaga 1906, ma e o’o mai lava i nei onapo o lo’o talanoa ai pea tagata i lena toe faaolaolaga.  Mo aso o sosoo atu nei, o le a ou suesue ma faasoa atu  i  mea sa tutupu i le aso Penetekoso ma a’afiaga na tutupu mai ona o lea aso.

O se tulaga taua, e ao ona e fa’amauina, o le ‘au so’o, sa latou faatasi i le afeafe aupitoaluga,- sa vavaeeseina i latou mai le lalolagi o tagata. I le taimi o tausasami ma fiafia tagata uma i le ‘aiga o le Paseka, o lo o iai I latou i se nofoaga ese e tatalo, anapogi ma naunauta’i ia maua se fesoota’iga loloto ma le Alii. Afai tatou te fia oo i le mana na latou maua I lea aso, e tatau ona a’oa’oina i tatou o kerisiano ia ola ma soifua e vavaeeseina mai le lalolagi (1 Korinito 6:14).

E le mafai ona e fa’amuamua le tausinioga mo ‘oa a le lalolagi e pei o isi uma tagata, ma e manatu o le a afio mai Agaga Pa’ia i ou luga ma faaalia mai lona mana ia te oe e pei ona tupu i le aso Penetekoso. E le tatau ona e manatu e te tau’aveina le mana o Agage Pa’ia a o tulimata’i pea e ou mata mea e faataua e le lalolagi. O mea e te vaavaai iai o le a e foliga ai foi. (2 Korinito 3:18). E le mafai ona e alofa i le lalolagi ae folafola e te alofa I le Atua (1 Ioane 2:15). E le mafai ona e fa’alogologo i musika fa’asalamausau ae naunau e faatumuina oe e Agaga Pa’ia. O mea e te faalogologo iai e tele lona aafiaga i lou ola, ma e tupu le fa’atuatua i lou faalogologo i le ‘Upu a le Atua (Roma 10:17).

I le afeafe aupitoaluga, e le’i faalavelave I mafaufau a le ‘au aposetolo mea masani o le lalolagi. O latou fofoga e iloa ai mea o taulai iai le vaai, ua tasi na o le Atua, ma ua faatumulia i latou e le malamalama (Mataio 6:22). O lo latou naunauta’iga, o le fa’atalitali i le folafolaga a le Tama, ma sa latou faia ma le agaga atoa. O le maua ma faaali mai o le mana o Agaga Paia ia te oe, e manaomia lou saili i le Atua ma le agaga atoa. 

E na o ē saili i le Atua ma o latou loto ma agaga atoa, o le a latou mauaina o ia. (Teuterenome 4:29). E na o latou e vavaeseina mai le agasala ma mea e faalavelave mai, e latou te maua le mana o Agaga Pa’ia e fa’apei o le aso Penetekoso. Le ‘au pele e finagalo le Atua, e vava’eseina mai oe ma a’u auā o oe o lona atalii ma  lona afafine (2 Korinito 6:17) ma e tou te lē i le lalolagi outou (Ioane 15:19). Ia lafoa’i ese ni mea e faalavelave mai,  ma punitia le fa’atumuina o oe e Agaga Pa’ia, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 31 MATI  2025

(tusia e Pastor EA Adeboye)

Manatu Autu: E na te faaaogaina foi tagata lē faatuatua ’(He can use unbelievers too)

Tauloto -Tusi Paia–2 Timoteo 2:20 “Ua lē na o ipu auro ma le ario ‘ua i le fale tele, a o ipu la‘au ma ‘omea; o isi ‘ua ta‘uleleia, a o isi ‘ua ta‘uleagaina.”

Faitauga – Tusi Paia – Esera 1:1-11

O le tauloto mai le Tusi Paia o le aso e faailoa mai ai iai tatou, e iai ipu e tauleleia, e iai ipu e tauleagaina i le fale o se tagata tauoloa. E faaaogaina e le Atua so’o se tagata, e na te faaaogaina lana fanau e avea ma ipu e tauleleia, ae o i latou e musua e ola faapaiaina e faaaogaina o ipu e tauleagaina. 

E iai se aso ao ou agai atu i le lotu e faia galuega mo tagata mama’i, na matua pisi ma poloka le auala. E lei leva ae ou iloa atu se auala ui, ona ou afe loa lea iai ona e lē o pisi. Ou te le iloa, o le auala lea faatoa faataga ona ō ai taavale mai le 10 i le taeao. Na taofi la’u taavale e se alii leoleo ma faapea mai, ‘e te iloa faatoa mafai ona e ui i le auala lea pe a te’a le 10 i le taeao?’ Na ou faamalūlū iai ou te leiloa. Ua ou fai atu iai, o a’u o le faifeau o loo agai atu e faia se galuega mo tagata mama’i. Ua latou faapea mai, ‘ia o lena e te iloa le mea e tatau ona fai’. Ou te iloa o la e mananao i se tupe, ae ona o a’u o le atalii o le Atua, e le mafai ona ou faia. O lea na latou fai mai ai, ‘ia faatali iina sei ta le 10 ona faataga lea o oe e te alu’. A’o ou faatali, na agai mai ai ni tamaiti o le auala ua latou iloa mai a’u ma faapea mai, ‘o le faifeau o Adeboye le lā, e pei ā o loo taofia e leoleo, tatou ō e fesoasoani iai’. Ina ua vaai atu leoleo o agai mai tamaiti nei, ua sosola ese. I lea tulaga, na faaaoga e le Atua tamaiti o le auala e faamatau i leoleo ina ia mafai ona ou alu. 

Ina ua finagalo le Atua e faasaoloto ona tagata mai Papelonia, na ia faaaogaina Kuresa o se taitai le faatuatua. Ae lei fanau mai o ia, na perofeta ane Isaia o le a faaaogaina o ia i le faasaolotoina o tagata o le Atua (Isaia 45:28, Isaia 45:1-5). E mafai ona faaaoga e le Atua tagata lē faatuatua e faia lona finagalo, peitai o nei tagata lē faatuatua o lo latou iuga o seoli pe afai e lē lafoai o latou ola ia Keriso, aua foi o tagata agasala e iu uma i seoli. Fai mai le Ioane 3:18

 “O lē fa‘atuatua ‘iā te ia, e lē fa‘asalaina o ia; a o lē lē fa‘atuatua, ‘ua uma ‘ona fa‘amasinoina nei lava o ia, auā e le‘i fa‘atuatua lava o ia i le igoa o le Atali‘i e to‘atasi o le Atua.”

Le au pele e, lafoai lo’u ola ia Keriso pe afai e te lei faaolaina lava ona amata lea ona e ola faapaiaina ina ia mafai ona faaaoga oe e le Atua o se ipu e tauleleia ae lē o se ipu e tauleagaina. E masani lava ona faaaogaina e le Atua soo se tagata mo lona finagalo. Peitai, e faia lava e i latou le filifiliga pe avea ma ipu e tauleleia poo se ipu e tauleagaina, i le suafa o Iesu, Amene. 

OPEN HEAVENS

MATALA LE LAGI MO LE ASO SA 30 MATI  2025

(tusia e Pastor EA Adeboye)

Manatu Autu: O le faamanuiaga e ta’ua o ‘tinā’(The blessing called mother)

Tauloto -Tusi Paia–Faamasino 5:7 “Ua leai ni ta‘ita‘i ‘iā Isaraelu; ‘ua leai lava; ‘ua o‘o i ona po na tula‘i atu ai a‘u o Tepora; na tula‘i atu ai a‘u o le tinā i Isaraelu.”

‭‭

Faitauga – Tusi Paia – Faataoto 1:8-9

O le tulaga masani, e sili atu ona faaaloalo fanau i o latou tamā na i lo’o o latou tinā aua o tamaloloa e malolosi atu ma sauā. Atonu e lē ‘aumalosi le tino o tinā faapei o tamā, peita’i o le tinā e tele lona malosi i isi vaega o le soifuaga. E masani ona fai la’u tala, ua o’u i’u manuia i le asō ona o le alofa tunoa o le Atua ma tatalo a si o’u tinā. Soose taimi o’u te faia ai se mea e faagae’etia ai le loto o lo’u tinā e faapea mai ai lana upu, “O le a e valaau i le tagata e toatasi ae tali mai le to’a selau.” O le uiga o lana tala, ‘o le a avea oe ma auauna e taitaia tagata.’ O le asō ua faamanuia le Atua ia te a’u ua aiāina ai olaga o le toatele o tagata i so’ose itu o le lalolagi. A fiafia se tinā i sana tama, so’o se mea e faananau i ai lona loto, ma tatalo ia maua e lana tama, e taunuu. 

Le au pele e, o loo faatonu mai le tusi o Efeso 6:2-3 ia e ava i lou tamā ma lou tinā (e lē na o tamā) ina ia e maua ai le tele ma anoanoa’i o manuia. O aso nei, ua toatele fanau e lē talia telefoni pe a vili atu o latou matua. Afai o soifua ou matua, ua tatau ona e mafaufau e ava ma tausi ia i laua aua o le faitoto’a lea i faamanuiaga a le Atua ma le soifua tulu’i.

A o o’u laititi, sa masani ona faatonu a’u e lo’u tinā o’u te nofo i le fale e fai a’u meaaoga a o loo taaalo isi tamaiti o le matou vai aai. Faafetai i le Atua sa ou usita’i i lo’u tinā. O le su’esu’ega o a’u tusi a’oga sa fesoasoani iā te a’u o’u te ‘aloese mai ai i le tele o mea fa’asalāvei ma ou maua ai mea tetele matagofie o le olaga. I lo’u agaga faafetai sa ou tausi lelei lo’u tinā a’o soifua. Sa ou fa’amautinoa o’u te alu e vaai lo’u tinā, e le itiiti ifo ma le ta’i lua vaiaso ina ia aua ne’i ona misia tele a’u. Afai o soifua pea lou tinā poo nisi fo’i na tausia oe ma avea ma tinā i lou olaga, fa’amautinoa e te ava, faaaloalo, usitai ma agalelei ia i latou.

Afai o oe o se tinā, o lou tiute i le tapenaina o le lumana’i o lau fanau e tāua tele. Ia e fa’amautinoa e a’oa’o ma faatonu i latou ma naunau ia faataunuuina le finagalo o le Atua i o latou olaga. Aua le tu’ufaua le fanau, pe faatamala e a’oa’o i latou. Aua ne’i e faamuamua le suega o tupe poo le alu i patī na i loo le tausiga o le fanau ma mafuta ma i latou. E le gata i lea, ia e naunau e tu’u i si mea lē tāua ae faamuamua le fesoasoani ia o latou ola ma tutupu a’e i le poto, malosi ma ala o le Alii. Ou te tatalo ia faamanuia le Atua i tinā uma i le malosi ma le lototele e tausi ai ma tapena a latou fanau i le ala tonu ma le sa’o. Afai ua fai sou āiga ma o loo saili i fofoga o le Atua mo se fanau, ou te folafola e o’o atu i le taimi lenei i le tausaga o lumana’i, o le a e sapaia lau pepe I le suafa o Iesu.

OPEN HEAVENS

MATALA LE LAGI MO LE ASO TOONAI 29 MATI  2025

(tusia e Pastor EA Adeboye)

Manatu Autu: Aua E Te Vaai I O Latou Foliga (Don’t Look At Their Faces)

Tauloto -Tusi Paia–Ieremia 1:8“Aua ‘e te fefe ‘iā te i latou; auā ‘ou te ‘iā te oe e lavea‘i ‘iā te oe;” ‘ua fetalai mai ai le ALI‘I.”

‭‭

Faitauga – Tusi Paia – Ieremia 1:4-10

E toatele tagata faaolaina e lē mafai ona folafola ma tāla’i le Talalelei ona e fefefe. O le ki e manumalō ai i le fefe o le tatalo i le Atua mo le loto toa fa’aleagaga ma le poto mo avanoa lē aumaua ta’itasi.

Ou te manatua se taimi sa ou malaga ai i se vaalele ma ou nofo i le potu faapitoa mo pasese taugatā ona sa agalelei mai se uso ma totogi lo’u pasese. Sa ou nofo la i talaane o se alii sa faigofie ona o’u iloa i ona lavalava ma ona foliga vaaia o se tagata e mauoa. Sa matua’i naunau lou loto ou te talanoa i le tagata mauoa lenei faatatau iā Iesu, peita’i sa ou fefe ne’i lē fia faalogo ma faapea e maualalo tele ia mea mo ia. O lea sa ou manatu ifo ai, ia fai mea uma ma le poto. Sa ou fai atu, “Susuga e, ou te mana’o e faa feiloai lau susuga i lo’u Tamā.” Sa fesili mai le alii, “O ai lou Tamā?” “O lo’u Tamā o le Alii Silisili, o ia e ona suāu’u ma kesi, na te faia fo’i ario ma auro ma taimane. E i ai fo’i lana faatoaga tele faatasi ma le afe ma afe o povi.” Ona toe fesili mai lea, “E faafefea la ona o’u lē iloa lou Tamā? O ai lona igoa?”  Na ou iloa afai ou te fai atu o Iesu i le taimi lea, e ono misi le avanoa, na faapea loa la’u tali, “O le igoa o lo’u Tamā o Afioga Emanuela.” O la’u tala lea na fiafia mai ai loa le tagata mauoa e talanoa, ma mafai ai ona o’u faasoa le talalelei ia te ia. 

Ina ua valaau le Atua ia Ieremia e lauga i le fanauga faalogogatā a Isaraelu, na ia faatonu ia te ia aua ne’i fefe i o latou foliga. O le Atua lava lea e tasi o loo ‘au ma oe pe a e alu atu e tāla’i i tagata le alofa o Iesu. Ua tuuina atu e le Atua lona Agaga e a’oa’o oe i au tala e fai faapei ona ia faasino ma faatonutonu ‘au i luga o le vaalele. Poo le a le foliga paū poo le faigatā o tagata i lau maitau, aua e te vaai i o latou foliga; taula’i lau vaai i lē na auina atu oe e folafola lana feau ia i latou. Fai mai se muagagana faa Yorubaland, e lē tatau ona e fefe I le tagata o loo tatau ona ta’u i ai se feau, peita’i ia e mata’u i lē na auina oe e momoli le feau. Aua le faatagaina le fefe i tagata e taofia oe mai le laugaina o le talalelei. Taula’i lau vaai i le Atua, galue e pei o lana poloaiga I le au uso uma (Mataio 28:18-19), ae faitalia le Atua ma faaliliu ma faa talitonu o latou loto.

A ‘au fa’atasi le Atua ma oe, e leai se isi mea e sili atu. O le folafolaina o le talalelei e lē faatatau i le mālie o le poto o tagata e folafola ma tauloto Afioga Paia a le Atua, ae peita’i o le faasino mai e le Agaga ma le mana (1 Korinito 2:4).

Le au pele e, lafoai lou ola iā Iesu i le asō. Ua na o ia le ala i le faaolataga. Afai ua uma ona e talia Iesu e avea ma Alii ma fa’aola o lou olaga, fa’amautinoa e te tāla’i atu le talalelei i nisi; aua e te fefe i o latou foliga. Ta’u atu i se tagata i le asō le alofa o Iesu, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 28 MATI  2025

(tusia e Pastor EA Adeboye)

Manatu Autu: Tupu e faavavau (King forever )

Tauloto -Tusi Paia–Kenese 1:2-3 “Sa so‘ona nunumi le lalolagi ma ‘ua gaogao, sa ufitia fo‘i le moana i le pouliuli; na fēgaoioi a‘i fo‘i le Agaga o le Atua i le fogātai. ‘Ua fetalai mai le Atua, “‘Ia malamalama;” ‘ona malamalama ai lea.”

Faitauga – Tusi Paia – Isaia 43:15-16

Tupu e faavavau 

E Leai seisi na tofia le Atua e avea ma tupu, o lona uiga e leai seisi e mafai ona aveese o ia. Na taumafai iai le tiapolo peitai na tuli ese ma le lagi (Faaaliga 12:9). O le Atua o le tupu ma e tupu e faavavau. 

A ou fai atu o le Atua o le tupu, o lona uiga e tupu foi i tupu uma o le lalolagi. Po’o le a lava le malosi o le pule ma le maoae o mea ua ausia ese tupu, e sili ai lava le Atua. I le Tanielu 4:1-37, na manatu Nepukanesa e mafai ona ia faoa le mamalu o le Atua.  Na oo ina ai I le mutia mo le 7 tausaga , ma ina ua ua toe tonu ma lelei lona mafaufau, ua ia faapea mai, ‘o le Atua e Silisili Ese’.

Afai ua e ausia se tulaga tupu, i totonu o se faalapotopotoga, aiga, atunuu poo le a lava, o lau nofoaiga e lē tumau. E tatau ona e faamaualalo i le Tupu e faavavau pe afai e te fia maua se nofoaiga lelei e manatua e tagata. Na faamaualalo Tavita i le Atua, ma e o’o mai i le asō, o loo manatua pea e Isaraelu o ia o lo latou tupu pito i tautaua. 

I le tele o tausaga talu ai, sa valaaulia a’u e faaulufale se tasi o lala o le Ekalesia RCCG i se tasi o atunuu, ma na ou faamaonia iai se aso e faia ai. I le atunuu lea, a fai ni sauniga o faaulufalega, e manaomia le pemita mai le malo ma sa talosaga loa e le Ekalesia se pemita. Peitai na iai se tamaloa i le malō na finau malosi ia taofia le faaulufalega. Ua ia faapea mai, ‘ua ou faalogo i le lotu lea. O loo tou fuafua e liliuina le toatele o tagata ma faatu Isi tou Ekalesia, e lē talia la I le atunuu lenei’. Na valaau mai taitai o le Ekalesia i le mea ua tupu, o le mea moni, ou te lei tatalo i lea mataupu. O le aso na fuafua e auai ai lenei tamaloa i le fono e faamautu ai le teena o le pemita, ao sauni ma fai ona lavalava, na faafuseia ona tuu uma ona vae i le vae e tasi o le ofuvae, ua paū ma ave faatopetope i le falemai. Na iu ina maliu ae o loo mau ona vae e lua i le vae e tasi o le ofuvae. E leai seisi e sili atu lona malosi ma le pule i lō le Atua, a finagalo o ia e faia se mea, e sili atu le galulue ma ia auā e leai seisi e mafaia ona taofia o ia. 

O Iesu, o le tupu e faavavau, e ia te ia le mana uma lava. O agaga uma o ia e ana (Esekielu 18:4), e aofia ai ma oe, ma e finagalo e lafoai atu lou ola ia te ia. E te iai faatasi ma le tupu, ma o se faamanuiaga lou iai faatasi ma ia aua e te maua avanoa i mea uma o loo ia te ia. E toatasi lava le tupu e faavavau lana nofoaiga, e na o le tupu o Iesu, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 27 MATI  2025

(tusia e Pastor EA Adeboye)

Manatu Autu: Maua mai le leai o se mea (Something out of nothing )

Tauloto -Tusi Paia–Kenese 1:2-3“Sa so‘ona nunumi le lalolagi ma ‘ua gaogao, sa ufitia fo‘i le moana i le pouliuli; na fēgaoioi a‘i fo‘i le Agaga o le Atua i le fogātai. ‘Ua fetalai mai le Atua, “‘Ia malamalama;” ‘ona malamalama ai lea.”

Faitauga – Tusi Paia – Isaia 43:15-16

Mai la’u savaliga puupuu ma le Atua I le 51 tausaga talu ona ou faaolaina, ua ou iloa o le Atua, e matua masani i le faatino o galuega mai le leai o se mea. I taimi ua foliga mai ua leai se fofō o se faafitauli, e na te saunia se auala i se tulaga ua leai se avanoa, e pei ona ia faia i le fanauga a Isaraelu i le Esoto 14:21-22. 

I le Esoto 16:11-17, ao faimalaga atu le fanauga a Isaraelu i le nuu na folafolaina, na toulu faaua mai le lagi meaai ua maea saunia. Ona latou te lei vaai pe tofo muamua iai, na latou  faaigoaina o le ‘mana’. I le Numera 11:1-32, ina ua lelava aai i le mana ma ua fia aai i aano o manufasi, na tagi atu Mose i le Atua mo i latou, ona fetalai mai lea o le Atua o le a maua aano o manu i le aso e sosoo ai. E ui na telē le faatuatua o Mose, na faigata ia te ia ona talitonu o le a lava aano o manu e saunia mo le fanauga a Isaraelu i se aso se tasi. O le aso na sosoo ai, na saunia e le Atua le faulaiga o le manu o le salu mo i latou. Sa leai se aano o manu i le aso, ae i le aso na sosoo ai, ua faulai. E faapena lo’u Atua, e masani i le saunia o mea mai i le leai o se mea. O le mafuaaga lea e lē tatau ai ona e manatu mamā ia te ia. 

I le 2 Tupu 7:1-16, sa iai se oge tele i se taulaga, ona fetalai lea o le Atua I lana perofeta, i totonu o le 24 itula, o le a matuā faulai meaai e maua, o le a lē toe manaomia le faatau o ni meaai. Sa iai se tagata maualuga i le malo na faapea mai e faigata ona tupu, na ia vaai ua taunuu, peitai na oti e lei tofo i le vavega. E lē afaina poo e iai i se tulaga ua leai se faamoemoe, tau o le aumai i totonu o le Atua, e mafai ona ia faatino se ala mai le leai o se mea. 

Sa iai se tina na talosaga mai ou te tatalo mo lana tama, e gugū e le mafai ona tautala talu ona fanau mai. Na tuu ou lima i luga o le tamaitiiti ma faapea atu , ‘i le suafa o Iesu’, ona tali mai lea o le tamaitiiti, ‘Amene’. E lei amata ona ou tatalo ae na faatautala e le Atua le tamaitiiti e lei tautala muamua. Sa ia tuuina se leo i le tulaga e lei iai se leo, ua matuā ou ofo toeitiiti ou paū mai fafo o le faamalamala. Ou te tatalo mo oe i le asō, i vaega o lou olaga ua faia e le tiapolo lagona gaogao ma ua leai se faamoemoe, leai se fua ma leai se agai i luma, o le Atua matautia e mafaia ona faia se mea lelei ma le matagofie e fua mai ai. 

O le masani e fiafia i ai le Atua o le faia o mea matagofie ma le matalasi mai mea pouliuli ma gaogao e pei ona ia faia i le Kenese 1:1-3. O mea ua gaogao i lou olaga e liua i mea e susulu ma matagofie i le asō, i le suafa o Iesu. 

Tatalo

Le Alii e, faamolemole ia e feliuaina mea ua gaogao ma leai se faamoemoe i lo’u olaga, i se tulaga e susulu atu ma matagofie i le asō, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 26 MATI  2025

(tusia e Pastor EA Adeboye)

Manatu Autu: Le Alii, le Fitafita I le taua (Mighty in battle)

Tauloto -Tusi Paia–Salamo 24:8 “O ai ‘ea lenei Tupu mamalu? O le ALI‘I, le malosi ma le fitafita, o le ALI‘I le fitafita i le taua.”

Faitauga – Tusi Paia – 2 Nofoaiga Tupu 20:1-30

I le Salamo 24:7-10, o loo faamatalaina le Atua o le Tupu Mamalu, o le Alii e malosi ma matautia, o le Alii o le Fitafita I le taua ma o le Alii o ‘Au. I le Salamo 107:20, fai mai le Tusi Paia na auina atu lana Upu  ma laveaiina I latou mai lo latou malaia. E lē afaina poo le a le maualuga o mea o loo tetee mai ia te oe, o le Alii, le Fitafita o le taua e na te avatu le manumalo ia te oe. 

Fetalai Iesu i le Ioane 14:6, o ia o le Ala, Upu Moni ma le Ola. I le Ioane 8:32, ua fetalai mai, e iloa foi e outou le mea moni, e tuusaoloto foi outou e le Upu Moni. Afai o loo e fesagai ma se fili e foliga e malosi atu ia te oe, o la’u fautuaga ia lafoai lou ola ia Iesu i le taimi nei. A ia faasaolotoina oe, ua e saoloto ma e leai seisi e mafai ona toe faapologa ia te oe. I le Luka 11:21-22, ua fetalai e pau le auala e mafai ai ese tagata ona faoa mea a le tagata malosi, pe afai e malosi atu. Ona e leai seisi e sili atu ona malosi atu i le Atua, afai e lafoai lou ola ia te ia ma avea oe ma ona atalii poo le afafine, e le mafai e se tasi ona toe faoa oe mai ia te ia. O le mafuaaga lea na fetalai ai Iesu i le Ioane 10:29 

“O lo‘u Tamā o lē na foa‘iina mai i latou ‘iā te a‘u, e sili o ia i nisi uma lava; e lē mafai e se tasi ona faoa i latou i le lima o lo‘u Tamā.”

I le faitauga o le Tusi Paia o le asō, Ina ua osofaia Iosefatu mai itu uma e Amoni, Moapi, ma ē nonofo i le mauga o Seira, na ia valaau i le Alii, le Fitafita o taua. O Le faatonuga na ia maua, ‘tau o le vivii mai’ ona ia usitai lea. O le Tupu o Iosefatu ma tagata uma o Ierusalema ma Iuta, na ifo ma tapuai i le Alii, le Fitafita o le taua. E leai se tagata na faasaoina ina ua tulai mai le Alii, le Fitafita i le taua, ma ua toe fetaua’i autau a le fili. Na pau le mea na faia e Iosefatu ma lana autau, o le aoina o oloa faulai aua foi ua faia e le Atua ina ia latou fiafia i le faatoilaloina o latou fili. Ou te folafola atu i le asō, o so’o se vaega o tagata o faasagatau mai ia te oe, e toe faaumatia lava latou e latou, o le Alii, le Fitafita o taua, o le ia toe fefaatauai lava ou fili, i le suafa o Iesu. I le suafa e sili i suafa uma, e leai se tasi o ou fili e faasaoina mai le pelu a le Alii, le Fitafita i le taua. 

Le au pele e, lafoai lou ola ma le atoatoa ia Iesu i le asō pe afai e te lei faia. O ia o le Atua Silisili Ese, ma e le faiaina i se taua. Afai e lafoai lou ola ia te ia, ia e tuu avanoa ia te ia e tau taua mo oe, e pei ona ia tau mo Iosefatu ma avatu ia te ia le manumalo. 

Tatalo

Le Alii e, le Fitafita i le taua, e lafoai atoatoa atu lo’u ola ia te oe i le asō. Faamolemole ia e tau taua mo a’u, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 25 MATI  2025

(tusia e Pastor EA Adeboye)

Manatu Autu: O le fomai sili (The great physician)

Tauloto -Tusi Paia–Salamo 103:3 “O lē fa‘amāgaloina a‘u amio leaga uma lava; o lē fa‘amālōlōina ‘ou ma‘i ‘atoa uma.”

Faitauga – Tusi Paia – Luka 4:37-40

O le Atua o le fomai sili. Na ia fetalai mai I le Esoto 15:26, ‘O a’u o le Alii, o lē na te fa’amaloloina oe’. Fai mai le Tusi Pa’ia ua ia auina mai lana upu, ma ua fa’amaloloina ai i latou (Salamo 107:20). O ia o le Atua mo tagata uma, ma e leai se mea faigata ia te ia. (Ieremia 32:27. E iai ma’i e ta’ua o ma’i e lē toe aoga iai se togatifiti, ae i le Atua, e leai se ma’i e le mafai ona ia togafitia. E oo foi i itu tino ua faaleagaina, e mafai e le Atua ona toe suia. E masani i fomai ona saili fesoasoani i Isi fomai i le tau sueina o fofo o se ma’i, peitai o le Foma’i Sili, e na te le avea sana ma’i i se isi. O ia o le foma’i faapitoa i so’o se gasegase.

I ni tausaga ua tuanai, sa iai se matai mauoloa, ua pipili mai le sulugatiti e o’o i ona vae, ma sa feaveai i falema’i pito lelei i Lonetona. Ina ua maea taumafaiga uma a foma’i, peitai e le’i manuia lona ma’i, ma ua gata le iloa o fomai. Ina ia faamaonia ua leai sei si togafiti e mafai, sa tui e le foma’i faapitoa le sui lapalapa o lenei alii peitai, ua lē lagona lava se tigā, ona latou faapea mai lea: “Alu ia i le fale, aua le toe faamaimauina au tupe, e te lē toe savali.” Ua toe foi lenei matai mauoloa i le fale, ae iai se teineitiiti, o se sui o le Ekalesia RCCG, sa molimau i lenei alii ma faapea atu, “A mafai ona e feiloai i la matou taitai aoao, e te toe savali.” 

Ona aumai lea o le matai mauoa lea i le Redemption City, ae ona o se tagata tino tele, e toaono tagata tino lelei sa latou siia mai i totonu o lo’u potu malolo. Sa ou fai atu iai e mafai e lo’u Atua ona suia le ripoti le foma’i, pe a fai e na te tuuina atu lona ola ia Iesu, ona suia lea o lona tulaga pagatia. Sa ia tuuina atu lona ola ia Iesu, ona matou tatalo lea, e uma ane, ua mafai ona ia savali atu i lana taavale. O se ma’i ma se tulaga tugā fai mai foma’i faapitoa e lē toe aogā iai se togafitiga, e mafai ona suia ma faamalolo e le Atua i ni nai sekone!

Ua ou vaai i le Atua ua ia liliuina ni tulaga tugā ma leai se fa’amoemoe, ua suia i ni tautinoga maoa’e. Ua ou molimauina lona ulufale i potu o fetagisiga ma faanoanoaga, ona o le maliliu o ē pelē, a ua liua i ni nofoaga o le olioli ma le ataata. Ua ou molimauina lona faia o mea e le mafaia, ma e leai se eseesega ma lau mataupu, tau ina e talitonu ma fa’atuatua ia te ia, ‘aua e mafaia mea uma i le faatuatua (Mareko 9:23).

Sa ia suia i le sekone, le tulaga o le fafine sa ma’i puna toto i tausaga e 12, (Luka 8:44). O le tino maliu o Lasalo ua fa aso i le tuugamau, e le’i atoa se itula na ia faatūina mai ai le oti (Ioane 11:43-44). O le tamaloa i le vai i Petesa, ua 38 tausaga o pipili, ua maua lona faamalologa i le taimi lava lena (Ioane 5:1-9). A fai o iai sou gasegase po o se ma’i tumau, ou te tatalo ia o’o ma pa’i atu le Foma’i sili ma liua vave lou tulaga, i le suafa o Iesu. E leai se ma’i e lē mafai ona fo’ia e le Foma’i sili, i le suafa o Iesu, Amene. 

 OPEN HEAVENS

MATALA LE LAGI MO LE ASO GAFUA 24 MATI  2025

(tusia e Pastor EA Adeboye)

Manatu Autu: Tumau Fesaga’i Ma Fesuisuia’i 3 (Constant versus Variables! 3)

Tauloto -Tusi Paia–Iakopo 1:17 “o mea lelei uma e foa‘ifuaina mai, ‘atoa ma mea alofa uma e ‘ato‘atoa ‘ona lelei, mai lugā lava ia, e alu ifo mai le Tamā o malamalama, e lē o ‘iā te ia se mea fa‘alētumau po o sina liliu itiiti.”

Faitauga – Tusi Paia – Kenese 8:22

Ao faaiu atu i le asō le aoaoga i tulaga e tumau ma tulaga e fesuisuia’i, o le a ou taumafai e faamatala I tulaga faamatematika. I le faafuainumera poo le matematika, o tulaga tumau e faatatau i numera poo le aofaiga e lē suia i le taimi atoa ao tulaga fesuisuia’i, e fesuisuia’i e fua I tulaga ma mea e tutupu. Ua nā o le Atua e tumau faifaipea e oo i le faavavau, ma o mea uma ia te ia, e leai se mea fa‘alētumau po o sina liliu itiiti (Iakopo 1:17).

Na talanoa atu ananafi, o lana Upu o se tasi o vaega e tumau, o le a ou  talanoa atu i le asō i nisi vaega se tolu e tumau i le Atua e aofia ai, ana poloaiga, lona alofa ma lona alofa mutimutivale. 

O poloaiga a le Atua, o ala ia e faatino ai mea uma ma e tumau. O ana tapulaa e le mafai ona suia. O se tasi o poloaiga a le Atua mo le faaipoipoga, ia fa‘amamaluina le fa‘aipoipoga e tagata uma, o le moega fo‘i ‘ia leai sona leaga ae lei faaipoipo (Eperu 13:4). A fetalai le Atua e tatau ona faaipoipo tagata ae lei momoe o se ulugalii, o le poloaiga e tumau, e lē suia ona ua suia le lalolagi poo ua suia tulafono a le malo e faafetauia le faitaaga. A poloaiga a le Atua e tumau i le asō ma taimi uma. O le isi poloaiga o le faaipoipoga e mo le tane ma le avā, ma na amata mai i le uluai ulugalii ma faasolo mai ai i le Tusi Paia atoa, ua tatou vaai ai na faamautu e le Atua lea tapulaa. O le poloaiga a le Atua, e tatau ona tu‘ua e le tane lona tamā ma lona tinā, ‘ae fa‘atasi ma lana avā (Kenese 2:24). E faapena foi le poloaiga o le lulu ma selesele e tumau pea. O soo se tagata e galue e tusa ma lenei poloaiga e latou te maua seleselega. E iai poloaiga a le Atua mo soo se vaega o lou olaga, ma o soo se tagata e naunau na te maua le atoaga o ana faamanuiaga, e tatau ona aoaoina o ia e ola ma soifua e tusa ma ana poloaiga. O lona faavae e mautinoa, peitai e tatau ona e alu ese mai le amioleaga ina ia e maua ana faamanuiaga (2 Timoteo 2:19). 

O le alofa mutimutivale ma le alofa faifaipea o le Atua e tumau. Faataitaiga, o lona finagalo ‘ina ‘ia lē fano se tagata (1 Timoteo‬ ‭2‬:‭4‬). O le alofa o le Atua ia te oe e tumau. (1 Korinito 13:8). O le alofa o le ALI‘I ‘ua lē fa‘aumatia ai i tatou, ‘ona ‘ua lē mavae o lona alofa mutimutivale; e fou mai ia i taeao uma; o tele lou fa‘amaoni (Auega 3:22-23). Afai na e maua le faulai o lona alofa mutimutivale ananafi, e maua le fou i le asō aua e foai mai le alofa mutimutivale fou i taeao uma. E na te foai faamanuiaga i aso uma i ē pele ia te ia (Salamo 68:19). 

Le au pele e,  o le Atua e tumau ma mausalī, ma e mafai ona e faamoemoe ia te ia. Faatuatua ia te ia ma lou loto atoa, ona avea lea o ia ma taula  o lou agaga i le ogatotonu o mea lē mautonu i lenei olaga (Eperu 6:19). E mafai ona suia mea uma, ae o poloaiga ma le alofa faifaipea o le Atua e tumau ma mautinoa, i le suafa o Iesu, Amene.