Samoan Devotional

OPEN HEAVENS

MATALA LE LAGI MO LE ASO LUA 22 APERILA 2025

(tusia e Pastor EA Adeboye)

Manatu Autu: Avea ma tagata e matuā fefe ai le tiapolo (Becoming a terror for the devil).

Tauloto -Tusi Paia–Isaia 61:1  “Ua i o‘u luga le Agaga o le Ali‘i le ATUA; Auā ‘ua fa‘au‘uina a‘u e le ALI‘I e tala‘i le tala lelei i ē ‘ua tigāina, ‘Ua ia ‘auina mai a‘u e fufusi i ē loto momomo, E tala‘i le sa‘olotoga i le tāfeaga ma le matuā tatalaina o ē ‘ua fusifusia.”

‭‭

Faitauga – Tusi Paia – Faamasino 16:1-3

Pe aisea na filifilia ai e se ‘au tau le taeao latou te  osofa’ia ai se tagata e to’atasi e pei ona  tatou faitau ai i le Tusi Paia o lenei aso? Ou te talitonu ona sa fefefe ia Samasoni, ma latou iloa lelei e manaomia le malamalama ina nei faasagatau mai Samasoni, ona sosola ese lea. O ai e mafai ona saunia oe e matuā fefefe ai malosiaga o le pouliuli ma faaaogaina oe e tatalaina faamalosi  faitototo’a o lea aai ina ia susulu atu iai le malamalama o le talalelei? O le tali – O Agaga Pa’ia.

Ou te manatua le faato’a amataina o sauniga faaevagelia tetele i vaega uma o Nigeria, i le matou naunauta’iga e faatino le galuega a le Atua. Matou te vala’auina uma faife’au matou te feiloa’i  i se nofoaga sa matou filifilia, ona fai lea o le latou taumafataga, ma fa’amatala le matou mana’oga ina ia faia ni sauniga i o latou taulaga. E masani ona o mai, tausami a matou mea’ai ma folafola mai le latou lagolagoina o le matou faamoemoe, ae a o’o i le aso o sauniga, ua latou faia foi a latou polokalame, ia mautinoa ai e lē ō mai nisi i a matou sauniga. Ua tuanai se taimi, ma ua matou fiu, ona ou faapea atu lea i le Atua, “Tama ou te fia faia lau galuega, peitai ua tele lo’u taimi alu ma mea fa’aalu ae leai ma se fua mai.” Ae tali mai faapea le Atua: “E mafuā ona o oe, o loo e taumafai e fai la’u galuega e aunoa ma Agaga Pa’ia.”

Ina ua amata ona sosolo tapua’iga fa’alilolilo i totonu o Iunivesite o Nigeria, sa musumusina a’u e le Agaga Pa’ia ou te ‘avea le sauniga o le Agaga Pa’ia i totonu o Iunivesite. Sa ou amata i le Iunivesite o Ibadan ma, ina ua matou faailoa iai o le a faia se matou sauniga o Agaga Pa’ia, na o mai uma iai le pule sili, o faia’oga, ma tamaiti a’oga. A o se mea malie, ina ua ou tago atu i le masini faaleotele leo, ae paū loa ma le timu. Ae ui o loo matou i fafo,  e leai ma seisi na tu’umuli ‘ese, e o’o lava i le pule sili!Ina ua matou faia le valaau mo i latou e naunau e lafoa’I tapuaiga fa’alilolilo, ona o le galue mai o le Agaga Pa’ia, sa tali mai le faitau afe o tagata i le valaau.

Le ‘au pele, o le mea e sili e tatau ona e fa’atauaina i mea uma, ia e faia se mafutaga vavalalata ma Agaga Pa’ia, e le gata e na te avatu le mana e faamalosi ia te oe, ae o le a ia suia lou olaga atoa! O se faataitaiga, ae ou te le’i fa’aolaina, sa ou nofo ma le fefe, ma sa le mafai ona ou alu i lo matou nuu ona sa ou fefe i malosiaga o le pogisa o loo iai. A’o aso nei, ou te faailoa mamao sa’u asiasiga aua ua faa’auupegaina a’u ona o le mafutaga vavalalata ma Agaga Pa’ia. E mafai e Agaga Pa’ia ona saunia oe e matuā fefefe ai le malo o le pogisa e pei o le ‘au soo i le amataga (Galuega 17:6) pe afai e te tuuina atu lou ola ia Iesu Keriso ma fausia se lua mafutaga vavalalata ma ia.   E fa’a’auupega e Agaga Pa’ia le au faatuatua, e fa’aumatia galuega a le ti’apolo, i le suafa o Iesu, Amene.

OPEN HEAVENS

MATALA LE LAGI MO LE ASO GAFUA 21 APERILA 2025

(tusia e Pastor EA Adeboye)

Manatu Autu: Mafaia o mea e lē mafaia (Achieving the impossible).

Tauloto -Tusi Paia–Luka 1:35  “Ua tali mai le agelu, ‘iā te ia, “E afio ifo le Agaga Pa‘ia i luga ‘iā te oe, e fa‘amalumalu ifo fo‘i ‘iā te oe le mana o lē Silisili‘ese; o le mea lea e ta‘ua ai le tama pa‘ia e fānau mai, o le Alo o le Atua.”

‭‭

Faitauga – Tusi Paia – Faamasino 14:5-19

I le faitauga o le Tusi Paia o le asō, na afio mai le Agaga o le Atua ia Samasoni, ona ia sasaeina lea o se leona I ona lima. Afai na e vaai I se leona mo’i, e te iloa ai e lē o se mea masani na faia e Samasoni, ua na o le Agaga Paia e mafai ai. I le Faamasino 15:11-15, na saisaitia o ia ma tuuina atu i ona fili, na afio ane Agaga Paia i ona luga, ona motusia lea o maea na saisaia o ia e pei sa susunuina I se afi. Ona ia tago lea i le auvae o se asini ma faaaoga e fasiotia ai le 1000 o tagata. Ua na o Agaga Paia e mafai ona faia ai. 

Na mafaia foi e Tavita se mea e lē mafaia i le fesoasoani a Agaga Paia. Ina ua maea ona liligi le suauu I lona ulu, na afio mai Agaga Paia ia te ia, ma na amata mai i lea aso (1 Samuelu 16:13) ona matautia mea na ia faia. Ua na o se leoleo mamoe talavou ae na ia fasiotia se leona, urosa ma se sauai sa faifai i ona tagata ma lona Atua (1 Samuelu 17:34-50). E ui na matautia ia mea, ua na o se amataga o mea ofoofogia na faia e le Atua I le ola o Tavita. E iai se taimi na manao ai Saulo e fasiotia Tavita, na fai lea iai e totogi le tau e faaipoipo ai i lona afafine i le 100 muāpa’u o Filisitia. O se ala e fasiotia ai o ia, peitai ona sa ia te ia le Agaga o le Atua, na ia fo’i mai ma le 200 o muāpa’u e aunoa ma le afaina (1 Samuelu 18:25-27). Ua mafaia ona faia e sili atu i le tulaga manaomia ona o le Agaga o le Atua sa i ona luga. 

A e manatu i le mamao ua aumaia ai e le Atua le Ekalesia RCCG mai se tulimanu o se vaega pito mativa o se atunuu e maualalo le tamoaiga, i le faatūina o Ekalesia i le 190 atunuu o le lalolagi atoa, ma le maua o fanua e faitau afe eka i le lalolagi, e te iloa ai o nei tulaga e lē mafaia, na mafai ona ausia i le fesoasoani a Agaga Paia. E pei a ona fesoasoani Agaga Paia ia Samasoni, Tavita ma le Ekalesia RCCG, e mafai foi ona ia fesoasoani ia te oe. Afai ua maea faailoa e le Atua mea matautia ma ofoofogia e fia ausia e tauala ia te oe, pe o ē feagai foi ma se tulaga e matuā lē mafaia ona ausia, aua e te tilotilo i mea e lē mafai ona e faia, tau o le ole atu ia Agaga Paia  e faamalumalu ifo ia te oe e pei ona ia faia ia Maria (Luka 1:35). E na te avatu le malosi ma le poto e te manaomia e ausia ai mea e lē mafaia, aua e mafaia mea uma i le Atua (Mataio 19:26). 

Tatalo

Agaga Paia, faamolemole afio mai i luga ia te a’u ma fesoasoani mai ia te a’u ia ausia mea uma e foliga e faigata ma lē mafaia mo lou malō, i le suafa o Iesu, Amene. 

OPEN HEAVENS

MATALA LE LAGI MO LE ASO SA 20 APERILA 2025

(tusia e Pastor EA Adeboye)

Manatu Autu: Ua Saeluaina Le Ie Puipui (The Veil Is Torn).

Tauloto -Tusi Paia–Luka 23:45  “Ua fa‘apouliuliina fo‘i le lā; o le ‘ie puipui fo‘i o le malumalu ‘ua saeluagalemuina.”

Faitauga – Tusi Paia – Mareko 15:25-39

Ina ua maliu Iesu i luga o le satauro, na saeluaina le ie puipui na va ai i tatou ma le Atua. Fai mai le Tusi o Mataio 27:51; Ina ua maliu le Fa’aola o le ie puipui o le malumalu na pupunia le nofoaga o le Paia o Paia mai tagata uma vagana le ositaulaga sili, na saeluaina amata mai i luga ua o’o ifo i lalo. O le Atua lava Ia na avea le ie pupuni na va ai i tatou ma Ia, ma saeluaina.

Fai mai le tusi o Efeso, 2:12-16; o le pa vaeloto sa vaeluaina i tatou ma le Atua sa soloia e le toto o Iesu. O le taulaga na Ia faia ua mafai ai nei ona o tatou omai faatasi ma le Atua: o lona maliu ua matala ai se faamoemoe fou mo le tagata. O lenei ua agava’a tagata uma e ulufale atu i le mamalu o le Atua e ala iā Iesu Keriso. E ala iā Iesu ua mafai ai ona ou valaau i le Atua “Tamā.” Ona o Ia ua agava’a ai so’ose tasi, i soose nofoaga, poo le a le lanu poo le ituaiga tulaga, e faatasi i le mamalu o le Atua. Na maliu Iesu ina ia e maua se mafutaga vavalalata ma le Tamā. O mafanafana pe vavamamao le lua mafutaga ma le Atua? Na maliu Iesu ona e finagalo ia e fesootai ma le Tamā na o oe lava ma Ia. O le a le moni o le ofo atu o lou loto i le Atua? 

O le ie puipui masae, o le faailoga lea ua faafanoina mea uma e ono taofia i tatou mai lo tatou ola fiafia i le atoatoaga o le Atua. O e gasegase i lou tino? O saisaitia oe i tuinanau o le tino? O fa’ataugāina oe e temoni? Ua uma ona saeluaina e Iesu le ie puipui ia e maua ai le ola maloloina, fa’amamāina, filemu ma le saolotoga. E lē tatau la ona faaauau pea lou olaga pologa ina ua mafai ona e ola fiafia i mea uma ua maea saunia e le maliu o Iesu mo oe. Ou te tatalo, o mea uma o faalavelave ia te oe mai lou maua o le soifua malolōina, ma le filemu, o le a saeia e pei ona saeluaina le ie puipui o le malumalu, I le suafa o Iesu. O le ie puipui saeluaina fo’i o le faailoga o se amataga fou. O lona uiga, ua aveesea mea tuai, ma ua mafai nei ona e fiafia i le fou ma le atoatoa o le olaga. A o i ai pea le ie puipui i le malumalu, sa ola tagata i lalo o le feagaiga tuai peita’i o le taimi na sasaeina ai na ulufale atu ai tagata soifua uma i le feagaiga fou. Fai mai le Eperu 12:24 o Iesu le puluvaga o le feagaiga fou ma o lona toto o loo tala mai i mea e sili atu ona lelei i lo le toto o Apelu. A’o o tatou faamanatuina le maliu ma le Toetū o Iesu Keriso, ia faapea ona tala mai e lona Toto Paia mea e sili atu i lou olaga ma ia e iloa ma lagonaina amataga fou i soose vaega o lou soifua o e mana’omia ona faafou, i le suafa o Iesu.

Ma le mulimuli o le ie puipui o le faailoga lea o le tino o Iesu (Eperu 10:19-20). O lona tino na faalavalava ina ia faa atoatoaina oe. Ou te tatalo ia amata i le asō ona e lagona ua faaatoatoaina vaega uma o lou soifua i le suafa o Iesu. Ia manuia le Eseta. Faaavanoa Spsou taimi e Faafetai ai ia Iesu mo le togiola i luga o le satauro ma le aveeseina o le veli poo le ie puipui, i le suafa o Iesu, Amene.

OPEN HEAVENS

MATALA LE LAGI MO LE ASO TOONAI 19 APERILA 2025

(tusia e Pastor EA Adeboye)

Manatu Autu: Faalauiloa Iesu (Advertise Jesus).

Tauloto -Tusi Paia–Luka 14:23  “Ua fai atu le ali‘i i le ‘au‘auna, ‘‘Inā alu atu ia, i ala tele ma magāala ma ia pulunaunau atu latou te ō mai, ‘ina ‘ia tumu lo‘u nei fale.”

Faitauga – Tusi Paia – Ioane 4:1-39

I I tausaga ua mavae, sa masani ona o matou faalauiloa ma tusi fu’a e faasalalau ai ni sauniga o le a fai. Afai e lē lava a matou tupe mo ni fu’a ona fa’aaogā lea tau o o matou gutu (tulou) e tāla’i ai. I nisi aso matou te fa’aaogā fao, atigi fagu ma atigi apa ma ta faatasi ma matou pepese ma sisiva i luga o magaala e tāla’i i tagata se sauniga o le a fai. O isi taimi matou te tusia faamatalaga o se sauniga o tapena i luga o ni laupapa a’oga ma fa’atutū solo i magaala eseese. Afai matou te vāai i se loli ua tia’i ua leaga ma ua elea, matou te tusia faamatalaga i luga o le tino o lea loli e faailoa ai i tagata feoa’i le sauniga o le a fai. O aso nei, ua aumaia e le Atua ia i tatou auala faigofie ma vave e tāla’i ai le talalelei i tagata ma ua molimau mai Luka 12:48;o lē ua foaiina atu i ai o mea e tele, e sueina atu fo’i iā te ia o mea e tele, o ia fo’i ua tuuina atu i ai o mea e tele latou te fai atu ia te ia e aumai mea e sili ona tele.

E masani ona o’u fai atu faapea; fa’aaogā uma auala o iā te oe e aumai uma ai au uo, āiga, e o’o fo’i i ou fili, iā Keriso. E masani ona o’u fai atu, “telefoni ia i latou, text i ai, ave I ai se imeli,” ona ou fa’aopoopo talasua atu lea, “ IPhone ia i latou, IPad i ai, Facebook ia i latou, YouTube i ai, blog ia i latou, tweet i ai, uplink i ai, ma download fo’i i ai.” A e vaai i se mea i luga o upega tafailagi e te mana’o e teu i lau computer, e te tago faailoga ma teu lelei, o lona uiga a o’u fai atu e download i latou a o loo e iloa le mea e teu ai ma e iloa poo fea e te mana’o e tu’u i ai, ave i latou i le tino o Keriso. 

Le au Pele e, ia silafia e le Atua o le a e fa’aaogaina mea uma ua Ia avatu ia te oe e faalauiloa ai o Ia; o lau telefoni (smartphone) fesootaiga i tomai faapitoa, silafia o fesootaiga fa’aagafeso’ota’i, ma isi. Afai e moni lou fa’aaogaina o mea uma ua ia te oe mo le Alii, o le a Ia avatu ia te oe mea e sili atu. O lea la, ia e fa’amautinoa e te ta’ita’iina i latou uma e mafai ona e maua, i totonu o le tino o Keriso. Afai e te lē iloa se tala e fai ia i latou, amata i lou valaaulia o i latou i sauniga e te iloa latou te maua ai le papatisoga a Agaga Paia. Fa’aaogā soose auala e te mafaia e aumai ai i latou iā Iesu.

I le faitauga mai le Tusi Paia o le asō o loo molimau mai na aumai e le fafine Samaria tagata o lona nuu iā Iesu. Na te lei fa’aaogaina ni upu faigata e tauanau ai tagata; sa na ona ia faapea atu i le nuu; “Omai e vāai i se tagata ua na taua mai ia te a’u o mea uma lava ua o’u faia, e lē o ia ea o le Keriso?” Sa ia fa’aaogā lana ta’utinoga e ta’ita’iina ai lona nuu iā Keriso. E mafai fo’i ona e fa’aaogā au ta’utinoga o mea na faia e le Atua ia te oe e manumaloina ai tagata mo Keriso Iesu. So’ose taimi e faia ai e le Atua se vavega mo oe, fa’aaogā lau ta’utinoga o se auupega e ta’ita’i ai tagata iā Iesu. Ia avea lou olaga ma laupapa faailoa e faasino ai tagata I le Atua i taimi uma, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 18 APERILA 2025

(tusia e Pastor EA Adeboye)

Manatu Autu: O oe o se molimau moni? (Are you a true witness).

Tauloto -Tusi Paia–Galuega 5:32  “O ana molimau fo‘i i ia mea o i matou, ‘atoa fo‘i ma le Agaga Pa‘ia, lē ‘ua foa‘iina atu e le Atua i ē ‘ana‘ana ‘iā te ia.”

Faitauga – Tusi Paia – Galuega 1:6-8

I le Galuega 1:8, na fetalai Iesu o le a maua le mana pe a afio mai Agaga Paia i luga ia te oe, ona avea lea o oe ma molimau. O se molimau e tatau ona iai vaega e faamaonia ai. A afio mai Agaga Paia ia te oe, e avea oe ma se tagata e mafai ona faamaonia o Iesu o le Faaola, o Le faamalolo I ma’i, e maua ai le saolotoga aua o le a ia faaalia tino mai nei amio faale Atua ia te oe. 

E tatau ona atagia I lou olaga o loo iai Iesu ia te oe aua na ia fetalai, e iloa i latou i o latou fua (Mataio 7:16). O le molimau o lona uiga o le faaali atu poo le a tonu le uiga o le avea ma atalii poo le afafine moni o le Atua. O soo se itu i se faamasinoga, e tatau ona aumai a latou molimau e faia faamatalaga e lagolago ai la latou mau. O faamatalaga a molimau e tatau ona faamalosia ai finauga a le itu na aumaia i latou. O lou olaga e tatau ona faamalosia ai le faatuatua o isi kerisiano ae le o le faavaivai ai. E tatau i lou olaga ona taitaiina mai tagata lē faatuatua ia Iesu, ae le o le tulei ese mamao o I latou mai ia te ia. O lau matafaioi faavae o se molimau a le Alii, o lou mulimuli moni ia te ia ma faaaoga mea uma ua ia foai atu ia te oe e taitaiina ai tagata ia te ia. Aua nei avea oe ma se mafuaaga e fai ai folafolaga a tagata e lē mulimuli lava ia Iesu aua o lou olaga o loo avea o se molimau pepelo i le natura ma amio a le Atua. O soo se taimi e avea ai au upu ma amio e atagia ai pepelo e faatatau ia Iesu, ua avea oe ma molimau pepelo. 

O molimau pepelo e faamatala pepelo i mea ua vaai iai, o Isi ituaiga tagata ua faaigoa e  Paulo o le auuso pepelo, ua fai mai ua latou vaai i mea latou te lei vaai iai. E avea ma molimau i mea latou te lei vaai iai. 

Na talanoa mai Paulo i le tulaga lamatia na feagai ma ia I lima o auuso pepelo (2 Korinito 11:26). O nisi o i latou na o mai i le Ekalesia i Kalatia ma mananao e faapologa ai tagata faatuatua moni (Kalatia 2:4), na o mai ma manatu faasausili e tetee i le finagalo o le Atua. E tatau ona e mataala i le auuso pepelo aua latou te feaveai le agaga tetee. Latou te feliuaina le talalelei ia Keriso ma liliu le alofa tunoa o le Atua e avea ma laisene e faia ai le tuinanau (Iuta 1:4). O nei tagata e faapea mai a e talia loa Iesu, e pule lava oe i lou olaga ona e ufiufi lava oe e le alofa tunoa o le Atua. E faafoliga foi le amio Atua e maua ai le oloa. Na lapatai Paulo ia faamamao ese ma nei tagata (1 Timoteo 6:5). 

Le au pele e, i lou olaga o ni molimau ia Keriso, e tatau ona e faaeteetete ia aua nei atagia ni pepelo e faatatau ia Iesu, ma ia mataala e aua nei e maua i le mailei o ē folafola o i latou o molimau a Keriso peitai latou te lei feiloai muamua ma ia. O oe o se molimau moni a Keriso? I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 17 APERILA 2025

(tusia e Pastor EA Adeboye)

Manatu Autu: Aua le fesoasoani I le Atua (Don’t help God).

Tauloto -Tusi Paia–Faataoto 3:5  “Ia e fa‘atuatua i le ALI‘I ma lou loto ‘atoa; ‘ae ‘aua le fa‘alagolago i lou lava atamai.”

Faitauga – Tusi Paia – 1 Samuelu 13:1-14

I le Tusi a Luka 1: 26-38, na asiasi se agelu ia Maria ma fai atu ia te ia o le a tō ma fanau mai se tama faapitoa o le a avea ma tagata e matautia. Na fai mai Maria, "Matua Lelei tele, ae ai ua galo ia te oe, ou te le’i faaipoipo? Ou te lei iloa se alii, e faapefea i se teine muli ona tō?" Na tali le agelu, "E faia e le Agaga Paia le tulaga lena, aua e leai se mea e faigata i le Atua." E te mafaufau i se mea semanu e tupu pe ana taumafai Maria e fesoasoani i le Alii, ma su’e se tama la te momoe, e pei o Sara ma lana tauanau ia Aperaamo e momoe ma Akara, ina ia maua ai se tamaititi (Kenese 16: 1-3).

I tausaga ua mavae, sa ma tatalo ma loʻu toalua mo se tasi tina, o lo’o fia maua sana tama. Ina ua mavae sina vaitaimi, ua iu ina leai se faamoemoe o lenei tina, ma ua alu i se fomai faataulaitu, ma ua manuia, ua maitaga . Ua sili ma le luasefulu tausaga talu ai, e oo mai lava i lenei taimi e lei maua lava sana pepe. A e taumafai e fesoasoani i le Atua, ua e taalo atu i lima o le tiapolo. 

O le Tupu o Saulo le isi tagata na taumafai e fesoasoani i le Atua. E leʻi leva ona avea o ia ma tupu, ae potopoto loa Filisitia e tau ma Isaraelu. O se tulaga faigata tele, ma na amata ona faatautee tagata ia Saulo ina ia tau loa. E le’i faatali Saulo seia oo mai Samuelu e osi le taulaga mu, na manatu Saulo e tatau ona fesoasoani i le Atua, ua ia sosopo i le ofisa o le ositaulagasili ma osi le taulaga i le Atua. Ina ua fesili Samuelu ia Saulo pe aisea na ia taumafai ai e fesoasoani i le Atua, na alo solo faamatalaga a Saulo. O i latou e taumafai e fesoasoani i le Atua, e tele 'alofaga ma mafuaʻaga o le faia o nei mea, ae e lei taofia ai taunuuga leaga o le lē usiusitaʻi. Na leiloa le nofoalii a Saulo ona o le valea o le mea na ia faia. 

Le au pele e, aua e te taumafai e fesoasoani i le Atua; tau o le faatino o lau tautua i lana galuega e tusa ma lana Upu, ae taatia mea uma ia te ia. Afai e te taumafai e fesoasoani ia te ia, ua e tatala lou tagata e pulea e le tiapolo ma faia faaiuga sese. Ua ou iloaina mai laʻu savaliga ma le Atua, so’o se taimi lava e saunoa mai ai ou te faʻatali mo ia, o lona uiga o lo’o agai mai faamanuiaga. Aua neʻi faʻaseseina oe i le tele o mea feilafi a le fili, o loo taumafai e faalavelave ia te oe pe tuleia oe e 'fesoasoani ile Atua'. O lou taumafai e fesoasoani ia te ia,  e te ono faʻaumatia ai mea uma o loo e naunau e feosaosani mai ai ia te oe ia fausia. Aua e te taumafai e fesoasoani i le Atua. A e faia, e te ono faaumatia mea uma o loo e naunau e fesoasoani mai ai le Atua e fausia mo oe, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 16 APERILA 2025

(tusia e Pastor EA Adeboye)

Manatu Autu: Avea ma ipu a tauleleia(Becoming a vessel of honour).

Tauloto -Tusi Paia–Mataio 3:11  “O a‘u nei, ‘ou te papatiso atu ‘iā te ‘outou i le vai ‘ina ‘ia salamō; ‘ae peita‘i o lē mulimuli mai e silisili o ia ‘iā te a‘u, e lē aogā a‘u ‘ona tau‘ave i ona se‘evae; o ia lea na te papatisoina atu ‘iā te ‘outou i le Agaga Pa‘ia ma le afi.”

Faitauga – Tusi Paia – Luka 1:26-38

A e faitauina le ulutala o le asō, e te ono fesili, e faapefea ona ou avea ma ipu e tauleleia? O le tali faigofie, e te moomia Agaga Paia. 

I le 1 Samuelu 16:11-13, na faatonu e le Atua Samuelu e faapea, ‘o le a ou auina atu oe i le fale o Iese ona ua ou iloa se tasi mai lona aiga o le a avea ma tupu’. E lei aumaia i le amataga e Iese Tavita aua e lei manatu le aiga atoa o ia o se tagata e ono avea ma tupu. Peitai o le taimi lava na oo mai ai Tavita, na faapea mai le Atua, “O ia lena”.  Ina ua liligi e Samuelu le suauu i luga o le ulu o Tavita, fai mai le Tusi Paia, na oo mai lea o le Agaga o le Atua i luga ia te ia. Ina ua afio mai Agaga Paia i luga o le leoleo mamoe, na avea o ia ma le tagata na tofia iai o ia e le Atua, o se tupu. E iai le fuafuaga taua a le Atua mo lou olaga, ae e te manaomia le mana o Agaga Paia i lou olaga ina ia taunuu ai. 

I le 1 Samuelu 10:6, na fai Samuelu ia Saulo o le a afio mai le Agaga o le Atua i luga ia te ia ona ia faia lea o perofetaga, na liua e le Agaga o le Atua se tama i se perofeta. I le Faamasino 13:1-25, na fai le agelu i se fafine o le a fanau mai ia te ia se atalii e avea ma faamasino ia Isaraelu. Ina ua fanau mai lea atalii, fai mai le Tusi Paia na amata ona galue mai le Agaga o le Atua ia te ia. A afio mai le Agaga o le Atua i se tagata, e avea lea tagata ma tagata o loo finagalo iai le Atua. I le faitauga o le Tusi  Paia o le asō, Ina ua faapea atu le agelu ia Maria, ‘O le a fanau mai ia te oe le tama, o le alo o le Silisili Ese’, ae na ia tali, ‘e faapefea ona tupu ae ou te lei iloa se tane?’ Na avatu e le agelu le tali mautū I se tulaga e faigata ona tupu: o Agaga Paia. Ina ua afio mai Agaga Paia i te ia, na ia faia mea e matua faigata, na fanau mai ia te ia le Atua. Na avea o ia ma ipu e tauleleia aua na afio mai ia te ia Agaga Paia. 

O e faavaivai lava ona o le agasala? O faigata ona faaavanoa lou taimi e mafuta ai ma le Atua? Ua tau leai ea se afi ma le faamaufaailoga e ola ai faapaiaina? O fai ea ma e toe foi I puaiga o tuinanau o le tino? Tagi ma ole atu mo le mana o Agaga Paia. O Agaga Paia o le faailoga o le afi, ma a oo mai le afi i se nofoaga, o le a suia mea uma. Ina ua afio mai Agaga Paia ia Saulo, lē sa sauaina tagata i le tulafono, na liua o ia ia Paulo, le aposetolo. 

Le au pele e, e faamamaina e Agaga Paia ipu mo le faaaogaina e le Atua mo tulaga maualuga, ma e te manaomia le Atua e saunia oe o se ipu e tauleleia. 

Tatalo, 

Agaga o le Atua Soifua, afio mai, faafouina au ma faaaogaina au mo lou viiga, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 15 APERILA 2025

(tusia e Pastor EA Adeboye)

Manatu Autu: O le tulafono o le seleselega (The law of harvest).

Tauloto -Tusi Paia–Kalatia 6:7  “Aua ne‘i fa‘asesēina ‘outou, e lē ulagia le Atua auā o le mea e lūlūina e le tagata, o le mea lava lea e seleseleina mai ai e ia.”

Faitauga – Tusi Paia – 2 Korinito 9:6-11

Sa iai se tasi o ou atalii sa auai i se sauniga, ma sa fetalai iai le Alii e foai se taulaga e $1000, o se tupe tele I lena vaitaimi. Ua ia tali atu, ‘alu i ou tua satani’, a ua tali mai le Atua, ‘e lē o satani, o Au lea, ma ou te lē alu ese’. Na ia taumafai e natia le siufofoga o loo ia faalogoina, ae na malosi pea le leo. Na iu ina faia lana faaiuga e foai le $500, I nei mea ane o le Atua. O le vaiaso na sosoo ai, na sau ai se fafine  I lona ofisa ma tuuina ia te ia le $50,000. Na matua fiafia ona o se tupe tele. Ao alu ese le fafine, na toe faliu mai ma faapea mai, ‘Lau susuga, faamalūlū atu, sa tatau ona avatu le $100,000 ae e iai se mea na tupu na toe faaalu ai le $50,000’. Ina ua faalogo atu i lea tala, na vave ona mou lona fiafia. Ua ia iloa, na finagalo le Atua e foai atu ia te ia se seleselega e $100,000, peitai e na o le afa o le fatu na manaomia na lūlū. 

A itiiti la tatou e lūlū, e itiiti foi seleselega tatou te maua (2 Korinito 9:6, Luka 6:38). O le seleselega a le faifaatoaga na lūlū i le faitau afe o eka o se fanua, e lē faatusaina I se faifaatoaga na lūlū I sina vaega o le fanua i tuāfale. O faifaatoaga popoto, e latou te faasao fatu pito lelei e toe totō ma lūlū aua latou te iloa o le lelei o le fatu e fua iai le lelei o le seleselega fou. E na o ē valelea latou te aai i fatu pito lelei. A faamanuia le Atua ia te oe, e na te tuuina atu ai le falaoa mo le seleselega i le taimi nei faapea fatu mo le seleselega fou I lena faamanuiaga. Ia e iloa fatu mai se faamanuiaga e tatau ona lūlūina. 

O fatu e mafai ona faavasegaina o mea e faia, auaunaga poo upu. I le 2 Tupu 4:8-10, o le fafine lelei i Sunema na ia lūlūina le fatu o le loto alofa ia Elisaia ona ia maua lea o se seleselega e faateleina. O lana faaiuga e faaavanoa se vaega o lona fale e malolo ai le tagata o le Atua pe a ui ane I lona taulaga, o se fatu na lūlū, ae matuā faateleina seleselega. Muamua, na selesele le fua o le maua o se fanau i le mavae o tausaga e tele o pā. Ona ia maua lea o le seleselega o le toetu, ina ua oti faafuasei lana tama ma toe faatuina mai le oti. Mulimuli, na ia maua le seleselega o se vavega, ina ua toe maua uma ona fanua ma fale na leiloa I le taimi o le oge (2 Tupu 4:8-8:1-6). Ou te folafola atu o au galuega lelei uma o le a maua seleselega e faateleina i le suafa o Iesu. Ia e tōtō se fatu e agalelei ai I se tagata i le asō, i le suafa o Iesu, Amene.  

OPEN HEAVENS

MATALA LE LAGI MO LE ASO GAFUA 14 APERILA 2025

(tusia e Pastor EA Adeboye)

Manatu Autu: Ola I le Upu a le Atua (Live by God’s Word).

Tauloto -Tusi Paia–Mataio 4:4  “Ona tali atu ai lea o Iesu, ‘ua fa‘apea atu, “‘Ua tusia, ‘E lē na o mea e ‘ai e ola ai le tagata, a o afioga uma e tulei mai i le fofoga o le Atua”

Faitauga – Tusi Paia – Mataio 4:1-11 

Ina ua faatoa ou lotu i le Ekalesia RCCG, sa lei totogiina ni a matou taulaga, ae na faatonu matou e na o le sefuluai. Ina ua ou fesili pe aisea ae faapea mai ona o le Ekalesia o loo iai kerisiano ma tagata agasala ma è lē mananao i ni tupe a tagata agasala. Ua ou taumanatu, ‘ae faapefea matou o kerisiano? Fai mai le Tusi Paia, e foai ona foaina mai ai lea(Luka 6:38)’. Leitioa a matou ola matitiva I lea vaitau. E ui matou te lei foai ni taulaga I le lotu, sa ou avea lava tupe i le faifeau. E le gata I lea, I nā aso, a pepese, e lē patipati matou lima. Na ou fesili, ae fai mai o le patipati o le mea a le lalolagi. E le mafai foi ona e talanoa atu iai latou i le faaaoga o ni mea faili. E leai ni kitara, pu ma isi mea faili ae na o le okeni. E faamamalu mea uma. Peitai na ou faapea, ‘fai mai le Tusi Paia ia patipati o outou lima, o nuu uma lava (Salamo 47:1)’. O le taimi muamua na amata ai ona patipati o matou lima i le lotu, na talo se fono a toeaina o le Ekalesia e talanoa le mataupu. E te manatu i le mea na tupu ina ua ou avatua atigipalau ma kitara. 

E iai taimi e tatou te faatagaina ai tū ma aga a tagata e faatonutonuina o tatou ola i lō le Upu a le Atua. O le Upu a le Atua o le tapulaa maualuga lea ua faataatia mo so’o se vaega o le ola nei, a e mulimuli I lana Upu, e te fiafia i se olaga manuia lelei. O i latou e lē ola ma soifua i le Upu a le Atua, e latou te lē maua le matautia o lona mana e tuuina atu i ē faatuatua (Efeso 1:19). 

E lei tali atu Iesu i faaosooosoga a le tiapolo e tusa ma tū ma aganuu a tagata. Na ia manumalo aua sa tumau i afioga uma o loo tusia i le Upu a le Atua (Mataio 4:1-11). Na ia silafia le Upu a le Atua ma e lei ola I se tulaga i lalo ifo. O e silafia afioga uma o loo tusia i le Upu a le Atua? O e iloa le finagalo o le Atua e tusa ma lau mataupu? O e tu i luga o le Upu a le Atua poo se ripoti a se tagata? O le ripoti a ai e te talitonu iai?

Ina ua auina atu tagata e asiasi i le nuu o Kanana, e toasefulu na tutū i luga o mea na vaai iai o latou mata, ae na o Iosua ma Kalepo na tutū I luga o le Upu a le Atua (Numera 13:26-Numera 14:9). E moni  sa iai sauai i le nuu, ae malosi atu le Atua i sauai. E moni o loo iloa atu e foma’i ma’i, peitai ua maea ona totogi e Iesu le tau o lou soifua maloloina lelei i luga o le satauro.  

Le au pele e, fai sau faaiuga mautū e te ola ma soifua tau o le Upu a le Atua, ona e maua lea o le mana e sili atu i so’o se vaega o lou olaga. Faataga le Upu a le Atua e taitaia oe i soo se mea, i le suafa o Iesu, Amene. 

OPEN HEAVENS

MATALA LE LAGI MO LE ASO SA 13 APERILA 2025

(tusia e Pastor EA Adeboye)

Manatu Autu: Fa’aa’oa’o Mai Ia Te A’u (Learn Of Me).

Tauloto -Tusi Paia–Mataio 11:29  “Ia ‘outou amoina la‘u amo ma ‘ia ‘outou fa‘aa‘oa‘o ‘iā te a‘u, auā o a‘u lē agamalū ma le loto maulalo; ‘ona maua lea e ‘outou o le mālōlōga mo ‘outou agaga.”

‭‭

Faitauga – Tusi Paia – Salamo 25:9-10

I le Mataio 11:28-30 o loo valaaulia ai e Iesu i latou uma o tigaina e omai ia te Ia ina ia malolo ai i latou. Peita’i na Ia fetalai a’o latou omai, ia o latou amoina lana amo ma fa’aa’oa’o atu ia te Ia. E mafai e le Atua ona avatu ia te oe le malologa ma faamanuia tele ia te oe, seia e faapea mai, “Le Alii e ua tele nauā.” Peita’i e ao ona e gaua’i atoatoa ma fa’aa’oa’o ia te Ia. Ua molimau mai le tusi o Iosua 1:8; afai e lē te’a i lou gutu le tusi o le tulafono, ona manuia ai lea o oe. Suesue lau Tusi Paia ma le filiga ina ia e a’oa’oina moni ala o le Atua. E te iloa loa ona ala ma mulimuli ia te Ia, amata loa ona vaaia fua taufuifui i vaega uma o lou olaga.

Fai mai le Tusi Paia i le tusi o Teuterenome 28:1-2; afai fo’i e te matua’i faalogo i le Upu a le Atua ma ana’ana e fai ana poloaiga uma, e tuliloaina oe e manuia, e maua fo’i e oe o nei mea uma e manuia ai, e o’o lava ia te oe. Avea ma mea suamalie ia te oe le Upu a le Atua, a o’o ina lua fetaia’i ma faafitauli o le a muamua lava e manatua, “Fai mai e a le Tusi Paia faatatau i lenei ituaiga faafitauli?” O le Upu a le Atua e faaali maia ia i tatou lona finagalo faatatau i so’ose faafitauli ma e tatau ona avea lea ma faavae o lau filifiliga.

Na fetalai Iesu a o outou fa’aa’oa’o ia te Ia, ia outou iloa o Ia o le agamalu ma le loto maulalo. O i latou e fa’aa’oa’o I le Alii e tatau fo’i ona agamalu ma loto maulalo; ma fiafia ia a’oa’oina. O le faamaualuga e tupu ai le faafefeteina o le tagata ma fa’atumulia ai i avega ma saisaitiaga lē tatau. O le fa’aa’oa’o i ala o le Atua ma fiafia i manuia lelei, e tatau ona e naunau e faagalo le tele o mea, ma usitai i ana fa’atonuga tusa pe foliga mai e valea. O ala o le Atua e ese mai ala o le tagata (Isaia 55:8-9). Ina ua fetalai le Atua iā Mose e faaloaloa lona to’oto’o i luga o le Sami Ulaula ina ua latalata atu le ‘autau a Aikupito i le fanauga a Isaraelu, sa foliga o se gaioiga valea, peita’i na usitai Mose aua o ia o se tagata loto maulalo (Esoto 14:16, Numera 12:3). E lē mafai ona fai lou lava loto ae faamoemoe i le Atua e ta’ita’i oe i le manuia lelei. I le Salamo 32:8; na folafola e le Atua na te ta’ita’i ma faasino lona nu’u, peita’i i le fuaiupu e soso’o ai na Ia lapataia i latou ia aua ne’i faapei o le solofanua po o le miula e leai se mafaufau seiloga e ta’ita’i i le faagutu ma le maea faatoa usitai.

Le au Pele e, e lē mafaia e le Atua ona ta’ita’ia oe i le manuia lelei pe afai e pei oe o se solofanua tutu’u e lē faatali mo fa’atonuga, po o se miula faalogogatā e lē gaioi seiloga ua sasa. 

E finagalo le Atua e foai atu ia te oe manuia lelei ae tatau ona e muamua gaua’i ia te Ia, fa’aa’oa’o i le Atua ma usita’i ia te Ia i taimi ma aso uma. I le suafa o Iesu, Amene.