Samoan Devotional

OPEN HEAVENS

MATALA LE LAGI MO LE ASO TOFI 1 ME 2025

(tusia e Pastor EA Adeboye)

Manatu Autu: Tulaga e luluina le eleeele (Earthshaking events)

Tauloto -Tusi Paia–Galuega 4:31 “Ua mavae atu la latou tatalo, ‘ona lūlūina lea o le mea ‘ua fa‘apotopoto ai i latou; ‘ua tūtūmu fo‘i i latou uma i le Agaga Pa‘ia, ‘ina ‘ua tautala atu i le afioga a le Atua ma le loto tele.

‭‭

Faitauga – Tusi Paia – Galuega 16:25-26

I le aso o le Penetekoso, sa potopoto faʻatasi le au soʻo i se potu ma le loto gatasi, na faʻafuaseʻi ona agi se matagi malosi (Galuega 2: 1-4). Na lulu e le matagi le fale, ma e o’o mai i le taimi nei, e lei toe malosi le lalolagi mai lena tulaga. Pe e te talitonu i ai pe leai, o le a lūlūina e le Atua le lalolagi atoa. Ua oo mai le faaolaolaga, ma e mafai ona e auai ai. 

I le 1979, sa ou auai i se fonotaga a Kenneth E Hagin i le setete o Tulsa, Oklahoma, ma loʻu tamā faaleagaga  ma isi o le auuso e toafa. Sa matou nonofo i le faletalimalo o Mayo, ma i se tasi o taeao po, na feau mai  matou e lo matou tamā. Ina ua matou o’o atu i lona potu, na matou vaʻai atu o tatalo i le Agaga Paia, e loloto atu i le tulaga e masani ona matou vaai iai. O le fono tonu lava lea na ia tau mai ai se tala na matuā matou ofo tele. Fai mai, ua lata ona valaau le Alii ia te ia, ma o le a avea a’u o le taitai o le Ekalesia e sui ia te ia. Ina ua ia saunoa mai faapenei, na matou tatalo faatauanau i le Alii. A’o matou tatalo, na faafuaseʻi, ona tuʻituʻi mai e le inisinia o le faletalimoa le faitotoa o le potu. Talu ai o a’u na pito i le faitotoa, sa ou tatalaina le faitotoa. Na fesili le inisinia o le faletalimalo, "O ā mea fai faili o loo tou tāina?’.Sa ou tali atu, "Matou te le o faaaogaina ni mea fai faili, o loo matou tatalo’.  E leʻi talitonu ia te aʻu, o lea na ia ulufale i le potu ma suesue vaega uma. Ina ua savali i fafo, na ia toe fesili mai, "O le a foi lau tala i mea sa outou faia?" Sa ou tali atu, "O lea sa matou tatalo." Na ou fesili i lea alii, "E i ai se mea o faaletonu?" Na ia tali mai, "O lo’o lūlūina le faletalimalo, o le mafuaaga e foliga mai e afua atu i le potu lenei." Sa suesue e inisinia le faavae o le faletalimalo i se taumafaiga e suʻe le mafuaʻaga o le lūlūina, ma  e leai se mea na maua. Ina ua matou o ese, na tapunia le faletalimalo ona sa i ai ni popolega i le lūlūina ma le saogalemu o le fale. Talu ai e lei mafai ona maua le mafuaʻaga o le lūlūina o le faletalimalo, ae lē taitai ona talitonu o ni tatalo na mafua ai, o lea na tapunia ai loa le faletalimalo mo le 30 tausaga. O lenei tulaga, o le amataga lea o le faaaolaolaga tele o loo molimauina nei i le Ekalesia RCCG i aso nei.

A tatalo faatasi tagata faatuatua ma le lotogatasi, e tele tulaga matautia e mafai ona tupu. E mafai ona tatou taitaiina le lalolagi ma manumaloina agaga e tele mo lona malo, i se taimi vave. Le au pele, afai e te manaʻo e te iai i le faaaolaolaga e luluina ai le lalolagi ma faʻaalia ai le mamalu o le Atua, e tatau ona e  faamasani e tatalo faatauanau i le loto gatasi ma le au uso faatuatua. O tatalo faatauanau i le loto gatasi ma i si tagata faatuatua e fanau mai ai tulaga e lūlūina ai le eleele faapea ma faaolaolaga matautia, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 30 APERILA 2025

(tusia e Pastor EA Adeboye)

Manatu Autu: E inoino le Atua I le fevaevaea’i (God hates disunity)

Tauloto -Tusi Paia–Mataio 12:25 “A ‘ua silafia e Iesu o latou manatu, ‘ona fetalai atu ai lea o ia ‘iā te i latou, “O mālō uma ‘ua fevaevaea‘i e fa‘aumatia ia; o ‘a‘ai uma fo‘i po o ‘āiga e fevaevaea‘i e lē tumau ia.”

‭‭

Faitauga – Tusi Paia – Salamo 133:1-3

E tele fuaitau o le Tusi Paia o loo faailoa mai ai e inoino le Atua I le fevaevaea’i, ae e fiafia o ia pe a loto gatasi lana fanau. Na ia fetalai i le Ioane 13:35, o le faaali o le alofa o le tasi i le isi e iloa ai e tagata o I latou o ona soo. E matua faataua lelei e le Atua le loto gatasi, na ia fetalai a e sau ia te ia ma se taulaga ae e manatua e iai se tulaga o loo lua vā ai ma le uso, e tatau ona e alu e faia le faaleleiga ma ia, ona faatoa e sau lea e avatu le taulaga (Mataio 5:23-24). 

E finagalo le Atua I lana fanau e loto gatasi aua o loo ia silafia e itiiti se tulaga e mafai ona tatou ausia  pe a faia taitoatasi. E na te silafia o le taimi e amata ai ona faia taitoatasi, e faigofie i le tiapolo ona ulu mai I ō tatou siomaga, ona lē mafai lea ona tatou faia se mea e taofia ai o ia. Fai mai le Failauga 4:12“‘Āfai fo‘i e fa‘amanumālō mai se tasi i so lā‘ua, e tete‘eina atu o ia e lē to‘alua; o le maea fo‘i e sautuatolu e lē vave motusia.”

‭‭

 E tele kerisiano ma faalapotopotoga a kerisiano i le lalolagi atoa. O le mea moni o le Ekalesia kerisiano o se faatuatuaga e pito tautaua i le lalolagi. Aisea la e faia ai e malo ma atunuu faiga faavae e tetee ai i kerisiano ma sauaina i latou? O le mafuaaga ona o le toatele o kerisiano o loo tutū taitoatasi. A tatou o mai faatsi ma faia se folafolaga, e taunuu lava. A tatou o mai faatasi ma filifili e liliuina le lalolagi atoa mo Keriso, e le mafai e se tagata ona taofia i tatou. 

A e vaai I taimi na fai ai ni matou faaolaolaga i tausaga ua tea, e tasi se vaega taua o le a e iloa ai,  na loto gatasi se vaega e toatele o le ekalesia. I le afeafeaupitoaluga, ina ua loto gatasi le au soo, na afio mai Agaga Paia ma è 3000 agaga na faaolaina I lea aso. Na tusia i le Galuega 2:46-47, na loto gatasi le au soo ma na faaopooopo pea tagata i le Ekalesia I aso uma. 

Silasila I lau ekalesia, e iai se loto gatasi ? Silasila i le siosiomaga o le nofoaga o le lotu, o galulue lau Ekalesia ma le loto gatasi ma Isi Ekalesia i le tou nuu? Ana mafai ona tuuese tatou feeseeseaiga ae o mai faatasi ma tutū e faasagatau i le tiapolo, o le a tatou iloa ai, e leai se mea e lē mafaia. Tatalo ia loto gatasi ekalesia uma i lou nuu faapea ma le tino o Keriso I lona aotelega, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 29 APERILA 2025

(tusia e Pastor EA Adeboye)

Manatu Autu: Puipui lou sa’olotga e tapuai (Guard your freedom to worship)

Tauloto -Tusi Paia–Salamo 124:7 “Ua sōsōla i tatou e pei o le manu nai le matāsele a ē fai manu; ‘ua motu le matāsele, i lē ‘ua sōsōla i tatou.”

‭‭

Faitauga – Tusi Paia – Salamo 100:1-5

Afai e le sa’oloto tagata e tapua’I I le Atua i le auala e tatau ai, o lona uiga ua saisatia o latou agaga. Mo se faataitaiga,ina ua auina e le Atua Mose ia Farao ia faasa’oloto tagata Isaraelu, sa ia faapea atu: “Ia tuu’ina mai o’u tagata ia mafai ona latou tapuai ia te a’u.” (Esoto 5:1). 

Ou te faafetai i le Atua mo le sa’olotoga e tapua’i ai i nisi o atunuu. I se vaaiga lautele, e mafai e tagata i ia atunuu ona ō I le Lotu i so’o se taimi ma tapua’i i le Atua, i so’o se auala latou te finagalo iai. Peitai, i totonu o isi atunuu e pulea malosi e le malo tulaga e mafai ona faatino e ekalesia, faapea ma tulaga e faasaina. O se faataitaiga, latou te faamalosia faife’au e faia faaipoipoga a itupā tutusa I totonu o le lotu. O se faifeau o le RCCG i se tasi o atunuu sa taofia e leoleo ona sa faapea atu, “Alii ma Tamaitai”, ua tuua’ia ona e lē o tagata uma na iai o ni alii ma tama’itai. O le sini autu o nei faiga, ina ia suia faamalosi le auala e tapuai ai tagata i le Atua, ma faamalosia i latou e tapua’i e tusa ma talitonuga ma aga a tagata e lē faatuatua i le Atua. 

Le ‘au pele, o loo tumau ma e le suia tapulaa a le Atua. E le tatau ona e savali I ala o ē amioleaga aemaise i totonu o le Lotu, ona o ni faatonuga a taitai. Afai e te savali ma fa’aaogaina, o le pologa le mea lena. O le avea ma pologa i lona uiga faigofie, o so’o se mea e taofia oe mai le ola i se olaga manuia faulai e auauna ai I le Atua ma lou loto atoa. So’o se taimi e te iloa atu ai ia mea i  lou si’omaga, puipui malu lou loto ma lou siosiomaga.

E tele kerisiano ua latou faia ma masani nei faiga a le lalolagi, ona o taiala e amio lē Atua, ma e tatau ona e tatalo ia vave ona motusia nei saisaitiaga. Ina ua gausia le amo o le pologa i ‘Aikupito, o le mea aupito taua na faapea mai ai Farao: ‘O atu e tapuai i le Atua I le auala tou te loto ai.”

I le tele o taimi, e iai faiga faavae e lamatia ai agaga o tagata, e foliga mai e leai sona afaina i le amataga. O le mafuaaga lena e tatau ai ona tatou mataala ma filigā o tagata faatuatua. Ia tatou faaeteete ma mata’ituina mea tatou te faataga i o tatou si’osi’omaga. E toatele le ‘au faatuatua e faapea mai: “E lē afaina…” seia oo ina mū o latou loto i le u’amea aasa o le amioleaga ma le pogisa (1 Timoteo4:2). Afai e lē o gatasi ma le finagalo a le Atua, e taua i le Atua, ma e tatau foi ona e faatauaina.

Le ‘au pele, afai ua saisaitia oe ua lē mafai ona e toe auauna i le Atua ma le loto atoa, ou te tatalo ia faasaolotoina oe e le Atua, i le asō. E sola ese lou agaga e pei o le manu mai le matasele (Salamo 124:7) ma ia e olioli i le sa’olotoga e te tapuai ai i le Atua i le Agaga ma le faamaoni, i le suafa o Iesu. Faafetai i le Atua pe afai e te tapuai sa’oloto ia te ia ma ia e tatalo mo le fa’asaolotoina o i latou ua latou lē maua lea sa’olotoga tutusa.

OPEN HEAVENS

MATALA LE LAGI MO LE ASO GAFUA 28 APERILA 2025

(tusia e Pastor EA Adeboye)

Manatu Autu: Alo ese mai misa (Avoiding strife)

Tauloto -Tusi Paia–Iakopo 3:16 “Auā o le mea e i ai le mata‘u‘a ma le misa, o i ai le fē‘avaua‘i ma mea leaga uma.”

‭‭

Faitauga – Tusi Paia – Kenese 13:1-18

E matuā lamatia misa, e faaleagaina mafutaga ma faaumatia aiga aemaise pe a faataga e faaauau pea. Ina ua ave e Aperaamo le atalii o lona uso, o Lota,  i le nuu na folafolaina e le Atua ia te ia, e lei manatu e iai ni faafitauli o le a fotuai mai i lō la va. Na fiafia Lota i faamanuiaga a le Atua ona o Aperaamo, peitai e lei poto ma faatonu ana tagata faigaluega e faaaloalo i le aufaigaluega a Aperaamo. E ui I lea tulaga, e lei to’atamai ai Aperaamo. Ae na ia fofōina le faafitauli i lo la va ma Lota. Na ia valaau ia Lota ma fai iai, ‘Faamolemole ia aua nei iai se misa i lo ta va ona o taua o le auuso’. Na faatauaina e Aperaamo le la mafutaga ma le Atua faapea lona auuso e sili atu i faafitauli o loo latou feagai. Na faamaualaloina o ia ma ole atu ia Lota e filifili poo fea e fia alu iai muamua. Na malamalama Aperaamo i se tulaga e tele ina lē malamalama ai le toatele, ua ia silafia, o le taimi e te faatagaina ai misa, ua e tuu avanoa i le tiapolo. 

Ao faagasolo le polokalame o le ola i le Ekalesia RCCG i Lonetona, sa iai se ulugalii mai Polani sa faatalitali mo se la tama, na faia se la tautinoga ina ua faamanuia le Atua iai laua ma ua maua se la tama. Ao faia le tautinoga a le tamā, ona o le gagana Peretania e lē o sana gagana faavae, na faapea mai, ‘na ou sau i le tausaga talu ai ona e iai se tagata na fai mai o so’o se tagata e pai iai le taitai aoao e tō’. Sa nofo lau avā i ou talane ua ata ma faapea mai, ‘aua e te pai mai ia te a’u. Ou te lē toe fia tō’. Na matou taliē i le tala a le tamaloa sa faia aua o loo matou malamalama ia te ia ma le atunuu e sau ai. Peitai e ono faauiga seseina e nisi ona o upu na ia faaaogaina. E moni e iai ni faafitauli e lavelave ma faigata atu ona oni feeseeseaiga i le va o ni tagata se toalua ona latou te lē o taumafai e malamalama i faamatalaga atoaatoa i le mea e sau ai lea tagata.  

Le au pele e, ia aoaoina oe e suesue lelei poo fea e o mai ia tagata ao e taumafai e fesootai ma i latou, e fesoasoani lea ia te oe e te ‘alo ese ai ma ni feeseeseaiga e lē manaomia. E iai tagata e o mai mai nofoaga, ua ou matua e pei o latou tamā poo le tamā o latou tamā, a ō mai e matou te feiloai, ou te manatu e tatau ona latou tootuli ma faaaloalo mai e pei o a matou aganuu. Ae e iai foi tagata ou te lē manatu e tootuli ma faaaloalo mai ona o atunuu ma nofoaga e o mai ai, o le mea moni ou te ofo pe a latou faia. O se ala e faafeiloai ai i Isi aganuu ma atunuu, e te ono manatu o loo faaonoono atu ia te oe, e ono faatupuina lou ita ma faamisa ai, ma tuu atu ai le avanoa i le tiapolo. ‘Alo ese mai le misa e pei o se faama’i pipisi, aua o se faitotoa i le tiapolo, i le suafa o Iesu, Amene. 

OPEN HEAVENS

MATALA LE LAGI MO LE ASO SA 27 APERILA 2025

(tusia e Pastor EA Adeboye)

Manatu Autu: Ta’utinoga Lē Talitonuina (Unbelievable Testimonies)

Tauloto -Tusi Paia–Salamo 126:1 “Na fa‘afoisia mai e le ALI‘I o Siona nai le tāfeaga, ‘ona tusa ai lea o i tatou ma tagata ‘ua fai a latou miti.”

‭‭

Faitauga – Tusi Paia – Salamo 126:1-3

Fai mai le upu tauloto o le asō, ina ua faafoisia e le Atua, Siona mai le tafeaga, sa peiseaī o se miti. A faia e le Atua mo oe ni ta’utinoga, atonu e te manatu i nisi taimi pe moni ea pe ua na o se miti. I le Salamo 23:5; fai mai Tavita, “E te laulau mai meaai i le la’oai ma a’u i luma o e ita mai ia te a’u.” Ua lava ma totoe lea ta’utinoga peita’i na ia toe faapea mai, “Ua e fa’au’uina lo’u ulu i le suāu’u, ua taumasuasua la’u ipu.” Ou te mautinoa sa fesili ni tagata na latou nonofo faatasi, “O le a lea ituaiga ta’utinoga faapenei? Uso, e te mautinoa e te le o faatele?”

O le a o’u faamatala atu ia te oe se tasi o ia ituaiga ta’utinoga. A’o o’u faiaoga i le Iunivesite o Ilorin, sa i ai le ma tipoti ma lo’u toalua, e ofi ai iputi e lima. Soose taimi ma te mananao ai e inu se ma ti e faatumu a le tipoti. A uma a ma iputi ta’i lua, o le tagata e muamua uma lana iputi lona lua e masani ona inu ina le iputi mulimuli. O le tasi aso sa faatumu le tipoti e pei ona masani ai, ma ina ua uma a mā iputi ta’i lua, sa ma maitauina ua uma le ti. A o ma vaavaai le tasi I le isi ma le lē mautonu, sa fetalai le Alii ia te a’u, “A o e tatalo, sa e faapea mai le Alii e, faamanuia i nei taumafa, afio mai tatou talisua faatasi, sa ou manatua sa e valaaulia a’u.” Sa o’u fiafia sa o matou talisua faatasi ma le Alii o Iesu, peita’i ina ua o’u faamatala lea ta’utinoga, sa vaavaai mai le ‘auuso ia te a’u pei ua leaga lo’u ulu ona ua o’u fai atu sa taumafa e Iesu le iputi. Sa avea ma mea sa ou matamuli ai. O lea na o’u tagi ai i le Atua e faaali mai se mea na tupu e tutusa ma la’u ta’utinoga mai lana Afioga Paia. Na ia faaali mai ia te a’u le tala o I le Ioane 21, ina ua uma ona toe soifua mai Iesu mai le tuugamau na Ia faaali i lona ‘auso’o, ma na latou faatasi ma Ia i le auvai ma o latou taumamafa faatasi i i’a ma falaoa. Na fetalai le Alii ina ua uma ona Toetū mai o Ia mai le oti, sa mafai ona Ia taumafa i’a ma falaoa, ma ana i ai sa latou suātī semanū e tausami ai fo’i faatasi ma i latou. 

Le a’u Pele e, e mafai e le Atua ona faia mea e faasilisili i mea uma e te mafaufau i ai (Efeso 3:20). Ou te tatalo mo oe i le asō ia foai atu e le Atua ia te oe ta’utinoga o le a faigatā i tagata ona talitonu ai pe a e faamatala ia i latou, i le suafa o Iesu, Amene.

OPEN HEAVENS

MATALA LE LAGI MO LE ASO TOONAI 26 APERILA 2025

(tusia e Pastor EA Adeboye)

Manatu Autu: Ta’utinoga i luga a’e ma tala atu (Testimonies Above and Beyond).

Tauloto -Tusi Paia–Efeso 3:20 “O lenei, ‘ia ‘iā te ia o lē na te mafaia ‘ona faia o mea uma le fa‘asilisili lava i mea tatou te ole atu ai ma mafaufau i ai, e tusa ma le mana o lo‘o matuā galue i totonu ‘iā te i tatou,”

‭‭

Faitauga – Tusi Paia – 1 Korinito 15:57-58

E lelei tele le fa’asoa o ta’utinoga faatatau I le agalelei o le Atua ia te oe, aua e faaosofia ai le faatuatua o isi ma atili faamanuia ai le Atua ia te oe. Peita’i e I ai nisi ta’utinoga, a le faigatā i tagata ona talitonu i ai, poo le manatu faapea o le Atua e alofa faapito. I le tele o tausaga ua mavae, na asiasi mai se tasi o o’u atalii fa’aleagaga ia te a’u ma amata faamatala ana ta’utinoga faatatau i faamanuiaga a le Atua ia te ia, lona aiga ma lana galuega. Na alu alu le faamatalaga taofi ma fai mai, “Tamā na o a’u a lea e tautala; e lei faia sau faamatalaga i mea o loo faia e le Atua mo oe.” Sa o’u tali atu; “Atalii, afai ou te tau atu ia te oe mea uma na faia e le Atua mo a’u, o le a e faapea mai o le Atua e faapito.” O’u te tatalo i le suafa o Iesu ia avatu e le Atua ia te oe ni ta’utinoga e faapea mai ai tagata, “na o oe o loo auauna i le Atua?”

Ina ia e maua ni ta’utinoga e i luga a’e ma tala atu, e tatau ona e gaua’i e tautua le Atua ia maualuga ae ma tala atu o le mea masani. E tatau fo’i ona e fiafia e tatalo ma anapogi e lē aunoa. I le 2 Korinito 11;27 fai mai Paulo “. . . . . O le anapogi soo, . . . “ I le 1 Tesalonia 5:17; o loo apoapoai mai, “ia tatalo e lē aunoa.” Leitioa a fai mai le Tusi Paia na faia e le Atua vavega sili i lima o Paulo (Galuega 19;11-12). Na faaaoga e le Atua Paulo mo vavega e lē masani ai le toatele aua na ia tuuina atu lona tagata e tautua ai i le Atua i auala e sili atu I faiga masani. A e luluina lau tautua i le Atua lē faatuaoia o le a tele fo’i vavega e selesele mai (2 Korinito 9:6). Peita’i afai e te ofo atu oe lava e te auauna i le finagalo o le Atua, ma e galue i lou malosi atoatoa, o le a e maua ta’utinoga e sili atu I mea e te mana’o ma manatunatu iai. 

Sa iai se tamaita’i sa taofi mau lona faamoemoe I le Atua mo sona toalua, seia o’o ina te’a tausaga e mafai ai ona maua se fanau. A o fai se tasi o matou sauniga, sa ou fai i tagata uma sa iai, e ta’u i le Atua sona manaoga. Sa fai lana Tala i le Atua “Sa o’u faatali ia te oe mo se taimi umi mo se toalua, peita’i e leai se isi na maua; ui i lea, e lē afaina, aua o le a o’u auauna ia te oe i aso uma o lo’u ola”. I nai aso mulimuli ane ae alu atu se alii talavou e fia faaipoipo ia te ia. Sa pupula to’a le tamaita’i i lenei alii ma faapea atu iai “Ua e mautinoa? E sili lou toe alu e tatalo”. Na tali le alii “Ua o’u mautinoa; ua uma na ou tatalo”. Fai mai le tamaita’i “e te lē fia fai fanau? Ua ou pasi ma le taimi e maua ai se fanau”, na tali le alii “Ua maliu lo’u toalua ma o loo ia te a’u le ma fanau”. Ina ua uma na la faaipoipo, na manuia le tamaita’i ma fanau mai se masaga. Na silasila le Atua i lona loto ma foai ia te ia se ta’utinoga e maualuga mamao atu nai loo lona mana’o. Ia e maua ni vavega e i luga a’e ma tala atu o mea uma e te manatunatu iai, i le suafa o Iesu Amene.

OPEN HEAVENS

MATALA LE LAGI MO LE ASO FARAILE 25 APERILA 2025

(tusia e Pastor EA Adeboye)

Manatu Autu: Maualuga atu i pa puipui (Above barriers).

Tauloto -Tusi Paia–Sapakuka 3:19 “ O le ATUA le Ali‘i, o lo‘u malosi ia, na te faia o‘u vae e pei o vae o ‘aila, o ia fo‘i ‘ou te savali ai i mea maualuluga. Ma le usu pese i nekina.”

‭‭

Faitauga – Tusi Paia – 1 Tupu 18:41-46

O tagata e taitaiina i tulafono o natura o mea. Mo se faataitaiga, o le mafuaaga lea e le mafai ai e tagata ona savavali i luga o le vai ona o tulafono o natura o mea. E iai taimi e taofia mo se taimi tulafono o natura o mea ina ia aua nei avea ma pa puipui i le fanau a le Atua. Fai mai le Mataio 14:22-32, na savali Peteru i luga o le vai. Ina ua amata ona goto, na ia alaga atu, ona aapa atu lea o Iesu e u’u lona lima. Ona la savavali faatasi atu  lea ma Iesu i luga o le vai agai i le vaa. Na taofia mo sina taimi le tulafono o natura o mea mo Peteru. 

A iai le Atua i se tulaga, e mafai ona taofia tulafono o natura o mea. I le Galuega 12:5-11, ina ua afio mai le agelu e faasaoloto Peteru mai le falepuipui, o filifili na saisaitia ai o ia, na pauū a i latou. Ou te tatalo mo oe, afai o iai ni faitotoa o loo tapunia ia te oe, o le a tatalalaina ona o Agaga Paia, ma o le a e ausia tulaga maualuga e lē manao le tiapolo e te oo iai, i le suafa o Iesu. Afai e te faitauina pea le Galuega 12, o le a e iloa ai, na feau mai e Herota ia Peteru ia fasiotia, peitai na ripotia mai e fitafita ua latou lē Mauaina o ia, ona faatonu lea e fasiotia fitafita e sui ai. O le a faia e le Atua i ou fili se mea e te ofo ai, i le suafa o Iesu. Fai mai le Isaia 40:31,

“A o ē fa‘atalitali i le ALI‘I, e toe fa‘afouina lo latou malosi. Latou te si‘i a‘e ‘apa‘au e pei o aeto; latou te tamomo‘e, ‘ae lē vaivai; latou te sāvavali, ‘ae lē tigāina.”

‭‭

A afio mai Agaga Paia i ou luga, e na te taitaia oe e sii ae ou apaau  e pei o aeto,  e sili atu i pa puipui i ou ala. E na te aveesea ni mea faalavelave e tuu e le tiapolo ia te oe ma soo se mea e taofia le alu i luma o lou aiga ma pisinisi. E na te liua ou vae e pei o vae o le ‘aila e faatūina oe i mea maualuluga( Salamo 18:33). O le aila o se manu fafine e faigofie ona tamoe e oo i laueleele lafulafuā. E leai ma se mea e mafai ona taofia o ia mai le tamoe i nofoaga ma laueleele e lamatia ai. O isi manu a tamomoe ai, e sulu pe paū foi, ao le aila e tamoe e aunoa ma le faigata. Ou te tatalo mo oe i le taimi nei, e siitia oe e Agaga Paia e sili atu i pa puipui i lou olaga, i le suafa o Iesu. 

Tatalo

Agaga Paia, faamolemole afio mai i luga ia te au, ia fou ma talepe ai so’o se pa puipui i lo’u siomaga, i le suafa o Iesu, Amene.  

OPEN HEAVENS

MATALA LE LAGI MO LE ASO TOFI 24 APERILA 2025

(tusia e Pastor EA Adeboye)

Manatu Autu: Avea ma sē e ofo ai 2(Becoming a wonder 2).

Tauloto -Tusi Paia–Galuega 10:38 “o Iesu o le Nasareta, o lē na fa‘au‘uina e le Atua i le Agaga Pa‘ia ma le mana, o ia sa femaliua‘i ma agalelei ma fa‘amālōlō atu i ē na fa‘ato‘ilaloina uma lava e le tiapolo; auā sa ‘iā te ia le Atua.”

‭‭

Faitauga – Tusi Paia – Luka 13:10-17

O le a faaiu atu i le asō le aoaoga na amata ananafi i le faamatalaina o vaega na ou ui ma vaai iai. I tausaga e tele ua tuanai, na taumafai le malo o Nigeria e faamaonia tagata uma o loo totogi iai penisione o loo soifua pea, ma sa faatonu tagata penisione e faapotopoto i se nofoaga. Na ou filifili ou te alu iai ona ua ou ritaea mai le galuega faafaiaoga i le Iunivesite. Ao ou iai, o se tinā sa iai e penisone foi, ua iloa mai a’u ona faataiō lea. Fai mai ua 14 tausaga o maitaga ma na talosaga mai ou te tatalo mo ia. Na faaloaloa ou lima ia te ia, faia se tatalo puupuu ona faasaolotoina lea o ia I totonu o le ofisa. Ai o tau mafaufau tagata poo ai a’u. A afio mai Agaga Paia ia te oe, e ofo tagata ia te oe. 

E faasaoloto e Agaga Paia i latou o saisaitia ina ia saoloto e faia le finagalo o le Atua. I le taimi o le galuega a Iesu Keriso i le lalolagi, na afio mai le Agaga o le Atua ia te ia, ona ia faia lea o vavega matautia. I le faitauga o le Tusi Paia o le asō, o se fafine na faano’uno’u mo le 18 tausaga ona o se agaga vaivai, ua maua lona saolotoga ma ua tū sa’o. Na taotaomia o ia i mea e mafai ona faia ma vaai iai, ae ina ua faaloaloa aao o Iesu o loo tumu i le Agaga Paia i ona luga, ua tū sa’o ma ave le viiga i le Atua. Na vivii atu ai ma tagata i tafatafa ane ona o le mea ofoofogia ua faia mo ia. I se Isi taimi, na fetaui Iesu ma se tagata na iai sona ma’i tumau mo le 38 tausaga. Na faatonu e Iesu e tu i luga i le taimi lava lea, ave lona moega ma savali (Ioane 5:1-9). I se Isi nofoaga, o se tagata ua faaletonu le mafaufau na nofo i le nofoaga o tuugamau, ua toe sagatonu lona mafaufau (Mareko 5:1-15). Na ia faatuina Lasalo ua fa aso talu ona maliu (Ioane 11:1-44). Na femaliua’i Iesu ma faia galuega lelei aua sa ia te ia Agaga Paia (Galuega 10:38). A afio mai ia te oe, e te faia foi mea lelei, faamalolo i ē mamai, ma faasaoloto i ē ua sauāina e le tiapolo. 

O Agaga Paia, e na te lē faamalosia tagata pe taumafai e faatino mea ofoofogia ini ipu e lē fia mananao iai. O oe o se ipu e naunau? O e naunau e faia lona finagalo ma usitai i ana poloaiga uma? Ou te tatalo e te oo I se tulaga siitia e le masani ai ma Agaga Paia, ma ia faaaogaina oe e faatino ai mea ofooofogia tetele ma le matautia, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 23 APERILA 2025

(tusia e Pastor EA Adeboye)

Manatu Autu: Avea ma sē e ofo ai 1(Becoming a wonder 1).

Tauloto -Tusi Paia–Salamo 71:7 “Sa fai a‘u e peiseaī se mea e ofo ai le to‘atele; a o oe o lo‘u malu malosi oe.”

‭‭

Faitauga – Tusi Paia – Galuega 3:1-11

I le faitauga o le Tusi Paia o le asō, ina ua maea ona faamaloloina e le Atua le tagata pipili, na matua ofo i latou na vaai iai aua ua latou molimauina se mea ofoofogia. O se Isi mea ofoofogia na tupu i le Galuega 5:14-16, ina ua faamaloloina tagata i le ata lafoia o Peteru. E faapena foi i le Galuega 19: 11-12, na faia e le Atua vavega faapitoa e tauala ia Paulo e o’o I ona solosolo ma ie tali eleele na malolo ai ma’i. O ai na liua i latou e faia mea ofoofogia? O le tali faigofie o Agaga Paia. 

Ao avea a’u ma faiaoga i le Iunivesite i Lagos, o le ulu o le vaega o le matematika I lea taimi o le Polofesa e suafa ia Obi, o se tagata lauiloa i le matematika. Na valaau le Atua ia te a’u I lana galuega ona ou faamavae lea mai le Iunivesite. Ina ua mavae ni tausaga ua ritaea Polofesa Obi ona ia malaga mai e asiasi ia te a’u. Na alu atu ae ou te lē o i le fale ma sa feiloai ma lo’u toalua. O leisi taimi na ma feiloai ai ua ia faapea mai, ‘Na ou sau ou te fia iloa poo le Adeboye lava e tasi lea ou te iloa, lea ua aave mai ona tala i vaega eseese o le lalolagi’. Ua ou tali atu, ‘o le Adeboye lava e tasi, ae o le tagata na e iloa muamua o le tagata matematika, ae o le tagata lea e i ou luma i le taimi nei, e afio ai Agaga Paia, ma o le eseesega lena. 

I le Salamo 71, na vivii Tavita i le Atua mo mea uma ua ia faia mo ia, ae i le fuaiupu e 7, na ia molimau ua avea o ia ma tagata e ofo ai le toatele. O tagata latou te feiloai ma Agaga Paia e avea ma ē e ofo ai i lenei lalolagi. E pei a ona ia liliuina le au so’o, tamā i le faatuatuaga kerisiano, e oo ia te a’u e avea ma se tagata e ofo ai le toatele, e mafai foi ona ia faia ia te oe. 

Ae ou te lei lotu i le RCCG, sa ou feagai ma le tele o faigata e ui i le maualuluga o o’u faailoga. Peitai Ina ua lafoai lou ola ia Iesu ma ua afio mai Agaga Paia ia te a’u, ua amata ona ou vaai i mea ofoofogia i le malo o le Atua. O mea faigata ua faigofie, ma mea e lē mafaia, ua mafaia. 

O se tasi o ou afafine ua fai iai fomai e le mafai ona ia fanauina se tamaitiiti ona e laitiiti tele lona toala fanau (tulou) e lē mafai ona ola ma tauave ai se pepe seia fanau. E tele ina fafano ana pepe, peitai ua afio atu Agaga Paia ma finagalo ia avea o ia ma sē e ofo ai le toatele. Na toe manuia, seia oo ina fanau, ma ua fanau mai se masaga fa. Ou te folafola atu ia e maua se feiloaiga ma Agaga Paia e liua ai oe e ofo ai le toatele, i le suafa o Iesu. 

Tatalo

Agaga Paia, faamolemole faatumu a’u ma ia fou, liua a’u e avea ma se tagata e ofo ai le toatele, i le suafa o Iesu, Amene.

OPEN HEAVENS

MATALA LE LAGI MO LE ASO LUA 22 APERILA 2025

(tusia e Pastor EA Adeboye)

Manatu Autu: Avea ma tagata e matuā fefe ai le tiapolo (Becoming a terror for the devil).

Tauloto -Tusi Paia–Isaia 61:1  “Ua i o‘u luga le Agaga o le Ali‘i le ATUA; Auā ‘ua fa‘au‘uina a‘u e le ALI‘I e tala‘i le tala lelei i ē ‘ua tigāina, ‘Ua ia ‘auina mai a‘u e fufusi i ē loto momomo, E tala‘i le sa‘olotoga i le tāfeaga ma le matuā tatalaina o ē ‘ua fusifusia.”

‭‭

Faitauga – Tusi Paia – Faamasino 16:1-3

Pe aisea na filifilia ai e se ‘au tau le taeao latou te  osofa’ia ai se tagata e to’atasi e pei ona  tatou faitau ai i le Tusi Paia o lenei aso? Ou te talitonu ona sa fefefe ia Samasoni, ma latou iloa lelei e manaomia le malamalama ina nei faasagatau mai Samasoni, ona sosola ese lea. O ai e mafai ona saunia oe e matuā fefefe ai malosiaga o le pouliuli ma faaaogaina oe e tatalaina faamalosi  faitototo’a o lea aai ina ia susulu atu iai le malamalama o le talalelei? O le tali – O Agaga Pa’ia.

Ou te manatua le faato’a amataina o sauniga faaevagelia tetele i vaega uma o Nigeria, i le matou naunauta’iga e faatino le galuega a le Atua. Matou te vala’auina uma faife’au matou te feiloa’i  i se nofoaga sa matou filifilia, ona fai lea o le latou taumafataga, ma fa’amatala le matou mana’oga ina ia faia ni sauniga i o latou taulaga. E masani ona o mai, tausami a matou mea’ai ma folafola mai le latou lagolagoina o le matou faamoemoe, ae a o’o i le aso o sauniga, ua latou faia foi a latou polokalame, ia mautinoa ai e lē ō mai nisi i a matou sauniga. Ua tuanai se taimi, ma ua matou fiu, ona ou faapea atu lea i le Atua, “Tama ou te fia faia lau galuega, peitai ua tele lo’u taimi alu ma mea fa’aalu ae leai ma se fua mai.” Ae tali mai faapea le Atua: “E mafuā ona o oe, o loo e taumafai e fai la’u galuega e aunoa ma Agaga Pa’ia.”

Ina ua amata ona sosolo tapua’iga fa’alilolilo i totonu o Iunivesite o Nigeria, sa musumusina a’u e le Agaga Pa’ia ou te ‘avea le sauniga o le Agaga Pa’ia i totonu o Iunivesite. Sa ou amata i le Iunivesite o Ibadan ma, ina ua matou faailoa iai o le a faia se matou sauniga o Agaga Pa’ia, na o mai uma iai le pule sili, o faia’oga, ma tamaiti a’oga. A o se mea malie, ina ua ou tago atu i le masini faaleotele leo, ae paū loa ma le timu. Ae ui o loo matou i fafo,  e leai ma seisi na tu’umuli ‘ese, e o’o lava i le pule sili!Ina ua matou faia le valaau mo i latou e naunau e lafoa’I tapuaiga fa’alilolilo, ona o le galue mai o le Agaga Pa’ia, sa tali mai le faitau afe o tagata i le valaau.

Le ‘au pele, o le mea e sili e tatau ona e fa’atauaina i mea uma, ia e faia se mafutaga vavalalata ma Agaga Pa’ia, e le gata e na te avatu le mana e faamalosi ia te oe, ae o le a ia suia lou olaga atoa! O se faataitaiga, ae ou te le’i fa’aolaina, sa ou nofo ma le fefe, ma sa le mafai ona ou alu i lo matou nuu ona sa ou fefe i malosiaga o le pogisa o loo iai. A’o aso nei, ou te faailoa mamao sa’u asiasiga aua ua faa’auupegaina a’u ona o le mafutaga vavalalata ma Agaga Pa’ia. E mafai e Agaga Pa’ia ona saunia oe e matuā fefefe ai le malo o le pogisa e pei o le ‘au soo i le amataga (Galuega 17:6) pe afai e te tuuina atu lou ola ia Iesu Keriso ma fausia se lua mafutaga vavalalata ma ia.   E fa’a’auupega e Agaga Pa’ia le au faatuatua, e fa’aumatia galuega a le ti’apolo, i le suafa o Iesu, Amene.