OPEN HEAVENS

MATALA LE LAGI MO LE ASO TOONAI 16 NOVEMA 2024

(tusia e Pastor EA Adeboye)

Manatu Autu: Tusi Paia, Itupa ma feusuaiga 3.  (The Bible, gender and sexuality 3)

Tauloto -Tusi Paia–Efeso 4:25 “O lenei, ‘ia ‘outou tu‘u ‘ese le pepelo, ‘ia tautalatala fa‘amaoni ta‘itasi ma lē la te tuā‘oi; auā o itū tino lava tatou o le tasi i le tasi.”

‭‭

Faitauga – Tusi Paia –Roma 1:20-32

I le taualuga o le lesona na o’u amata i aso e lua ua mavae fa’atatau i itupa ma feusuaiga, o le a o’u faasoa atu ma oe se a’oa’oga na o’u maua. I ni tausaga ua mavae, sa o’u I se atunuu i Sisifo ou te lauga ai, ma na faatalanoa a’u e se tusitala faatatau i so’u manatu e uiga i ulugalii a le tama ma le tama, ma le teine ma le teine poo itupa tutusa. Na o’u tali i le uso na faatalanoaina a’u, na faia e le Atua tane ma fafine ia fanafanau. Ona o’u fesili lea, “E mafai ea e tagata itupa tutusa ona fanau ni fanau?” Na fa’ai’u la’u faamatalaga i lo’u fai atu, afai o tagata uma o le a faaipoipo i se isi la te itupa tutusa, o le a uma ai i le lalolagi i le augātupulaga lenei.

Faapei o se atali’i/afafine o le Atua, so’o se taimi e te maua ai le avanoa e te talanoa ai faatatau i feusuaiga faa Sotoma ma Komoro aua e te ‘alo ma taamilomilo solo lau talanoa. O le mafuaaga o le sasao fa’aafi o le amioleaga ona o le fefefe o tagata lelei e ta’u le mea moni. Aua e te gūgū pe a fai atu tagata o latou e tosina o latou loto i feusuaiga ma tagata o la latou lava itupa. Aua e te faamasino pe fa’asala ia i latou, a ia ta’u ia i latou le mea moni ma le alofa. O le fa’asala o i latou e na o le faatupu ai o le misa, ma o lo tatou Atua e lē o se Atua o fa’asalaga, a o le Atua o le alofa. Talanoa i ai i le alofa, a ia faasino pea ia i latou upu o le Tusi Paia, o mea o o latou faia e lē mai le Atua auā o loo manino i lana upu e inosia e ia amioga faapea. Ta’u ia i latou e te augofie e tatalo ma i latou ma fesoasoani ia fa’asa’oloto i latou mai nei lagona.

O le faitauga mai le Tusi Paia o le asō ua ta’u mai ai ia i tatou le mea e tupu i tagata pe a tu’u pea i o latou mafaufau leaga; o ia tagata e lē mafai ona i’u lelei vagana ua salamō. Tumau e tete’e i feusuaiga I le va o tagata itupa tutusa, ma fai mea uma e te mafaia e faaali atu ai i tagata faapea le ala sa’o e tatau ona soifua ai o loo tusia i le Tusi Paia. Na tu mau Lota e tete’e atu i feusuaiga fa’afātama ma fa’afafine i le Tusi o Kenese 19:1-7, e ui na matua’i iloga lona popole. Na te le’i fa’atagaina tagata Sotoma e ulufale i lona fale e fai le amio leaga ma agelu na ia valaaulia e malōlō i totonu o lona fale, tiga ona faatauanau le nuu ia te ia ma toetoe a osofa’i lona āiga.

Le au Pele e, ou te iloa i nisi atunuu, o se solitulafono le tau o le upu moni fa’atatau i feusuaiga fa’a Sotoma, peita’i e sili atu lo tatou mālō iā Keriso, ma e tatau ona o tatou faailoa o ia i mea uma tatou te i ai. Aua e te tūtū ma matamata a’o agai atu tagata i le fa’afanoga; e I ai lou tiute e tatau ona fai e lavea’i ai ni agaga se toatele, (Iuta 1:17-23). Ta’u atu le Upu moni I le Afioga Paia a le Atua fa’atatau i le faa Sotoma i soose taimi ma se aso e te maua ai le avanoa. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 15 NOVEMA 2024

(tusia e Pastor EA Adeboye)

Manatu Autu: Tusi Paia, Itupa ma feusuaiga 2.  (The Bible, gender and sexuality 2)

Tauloto -Tusi Paia–Levitiko 18:22 “Aua lua te momoe ma se tane, e pei ‘ona momoe ma se fafine; o le mea e ‘inosia lava lea.”

‭‭

Faitauga – Tusi Paia –Levitiko 18:22-30

O le asō, o le a faaauau atu le a’oa’oga po’o le ā le faasinomaga a le Tusi Paia i itupa ma feusuaiga. O loo manino mai le Tusi Paia i le tauloto o le asō, e inosia I le Atua le momoe o se tane ma le tane e pei ona momoe ma le fafine. O le momoe o le tane ma le tane ua valivali mai o se masani i le tele o atunuu, peitai o so’o se tasi o faia, o loo faatino se mea e inosia. I le faitauga mai le Tusi Paia o le asō, fai mai o i latou e momoe ma seisi i le itupa e tasi, a lē salamō, e faate’aina mai ona tagata. O lo’o faapea mai foi o atunuu ma nuu o loo solomua ona talia ma faaosofia lona faia, e faasalaina ma e latou te lē maua se filemu. Aua nei e faatagaina nei ituaiga a’oa’oga mai ia atunuu e ofi mai i lou atunuu ma le nuu, o le Upu a le Atua o le ‘ioe’ ma le ‘Amene’. Fai mai le Upu a le Atua o ia tagata ma latou nuu e faasalaina, e tatau la ona tatou o ese mamao mai i ia a’oa’oga ae siitia ma faamalosia tatalo mo i latou. 

A e faitau ia Sotoma ma Komoro, o nuu na faaumatia e le Atua i le afi ma le teiō, e te vaai i nuu ua faaleagaina ona o feusuaiga a le itupa e tasi (Kenese 19:1-25). E ui o nei nuu e siitia le tamaoaiga ma foliga mai o ni nofoaga lauolaola ma matagofie e nofo ai (Kenese 13:8-12), na i’u Ina faaumatia ona o le amioleaga ma amioga inosia a tagata o loo nonofo ai. E ui lava na tuliloaina e latou fili ma sa taumafai Aperaamo e laveai I latou i le Kenese 14:1-16,  ae na latou faaauau pea ma le loto faamaualuga le faia o mea e inosia i le Atua, ma na i’u ai ina faaumatia ma ua latou fano ai. Fai mai le Tusi Paia i le Isaia 3:9

“‘Ua iloa i latou i le amio a o latou mata, ‘ua latou fa‘aali mai a latou agasala pei o Sotoma, ‘ua latou le natia lava. ‘Oi talofa ‘iā te i latou! auā o i latou lava ‘ua o‘o ai le leaga ‘iā te i latou.”

‭‭

Le au pele e, aua e te auai I nei taui o le amioleaga. Aua e te talitonu i le pepelo e iai tagata e fananau mai lava e fiafia I tagata o le itupa e tasi. O feusuaiga ma tagata o le itupa e tasi, o se mea e inosia i le Atua aua foi e lē aofia i mea na faia e le Atua. O se gaioiga faa tiapolo le taumafai e faaumatia ola o tagata ae fesuiai galuega mamana na faia e le Atua. Afai o loo e faia feusuaiga ma seisi I le itupa e tasi, tatalo I Le Atua Ina ia faasaoloto oe mai mailei ma galuega a le tiapolo, vaai se faifeau po’o se tagata o le Atua e tatalo  mo oe. 

Le au pele e, e alofa le Atua ia te oe ma ua ia auina mai lenei feau mo oe Ina ia faasaolotoina ai oe pe faaaoga foi oe, e faasaoloto ai nisi tagata. 

Tatalo, 

Tamā, faamolemole faasaoloto I le asō, soo se tagata o loo faia ma auai I feusuaiga ma le itupa e tasi I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 14 NOVEMA 2024

(tusia e Pastor EA Adeboye)

Manatu Autu: Tusi Paia, Itupa ma feusuaiga 1  (The Bible, gender and sexuality 1) 

Tauloto -Tusi Paia–Kenese 1:27 “Ona faia lea e le Atua o le tagata i lona fa‘atusa, o le fa‘atusa o le Atua na ia faia ai o ia, na faia e ia o i lā‘ua o le tane ma le fafine.”

‭‭

Faitauga – Tusi Paia –Kenese 7:1-3

O loo tatou ola i le asō i se lalolagi e toatele tagata ua matua nunumi i lo latou ituaiga tagata (gender) ma ē e tosina iai(sexuality). O nisi kerisiano e nunumi ma lē mautonu I lenei mataupu. I nai aso o lumanai nei, o le a tatou matua suesue i le Tusi Paia e faamatala le upu moni e faatatau i ituaiga tagata ma tagata e tosina iai. 

Muamua ou te matua faamanino atu, na faia e Le Atua le tagata i lona faatusa ma na faia I laua o le tane ma le fafine (Kenese 1:27), ma o soo se mea i fafo o le uluai foafoaga a le Atua, e I fafo foi o lona finagalo. A maea ona faia ese Tusiata po’o se tufuga se galuega matagofie, na te tusia ai lana faailoga o ia na faia. O le tagata, o le galuega pito i matagofie ma maualuga na faia e Le Atua, e matua faapitoa lava e leai ma se tagata e toalua na faia e tutusa, e eseese e iloa I tamaimai lima. A ave e se tagata se galuega matagofie, ma manatu e faia iai ni suiga, e aveesea ai  lona taua. O tagata o loo taumafai e faia suiga I o latou ituaiga tagata, o loo latou faaleagaina le matagofie o le uluai foafoaga. O loo latou faapea atu I le Atua, o lē na faia I latou, e sili atu lo latou iloa pe ana latou faia le tagata. 

E tasi le mea ia maitau mai, e le faia ni mea sese e le Atua. O lona uiga, o soo se tagata e faapea mai, o lona lagona o ia  o se tane o loo saisaitia I totonu o le tino o se teine, e vave ā ona ou iloa o le tiapolo loo galue mai ma faaosofia lea tagata e faaleaga lona tino, o le galuega pito i matagofie a le Atua. O le suia o le uluai foafoaga o le tagata, le suia o itu tino, e matautia aua o loo lapatai mai le Tusi Paia o tatou tino o le malumalu o Agaga Paia ma e faaumatia e Le Atua so’o se tasi na te faaleaga lona malumalu (1 Korinito 3:16-17). O loo iai faamaumauga o tagata ua suia o latou ituaiga tagata ma itu tino ua tautino, o loo latou feagai ma tulaga faaletonu I Le soifua maloloina e oo I le mafaufau ona o a latou faaiuga. E le mafai e le tagata ona suia foafoaga a Le Atua e aunoa ma le lē maua o le taui pe afai e lē salamō.

E iai se tasi o matou faifeau na saisai e leoleo ona ua ia lauga atu i se potopotoga o tagata ma faapea atu, ‘Alii ma tamaitai’. Na fai i le faifeau e le na o alii ma tamaitai na auai. Ina ua ou faalogo iai,  na ou manatu, ‘e fia ituaiga tagata na faia e le Atua?’. O lou tino o le malumalu o le Atua, ma o soo se fautuaga e faaleaga ai, e mai le tiapolo. Afai ua e lē mautonu i lou ituaiga tagata, faalatalata i le Atua, suesue lau Tusi Paia, ma tatalo e sili atu muamua. Talanoa i se kerisiano e matua le olaga, ma tumau i manatu o le Atua e faatatau I lea mataupu. E faaali atu e le Atua po’o ai lou tagata I le Atua ma lona faamoemoega mo lou olaga. E iai lana fuafuaga ma le faamoemoega mo oe, mai I le amataga ae lei fuafuaina oe I Le manava o lou tina (Ieremia 1:5). Na faia oe e le Atua I ala mata‘utia e ofo tele ai, ma o soo se tagata e ese mai ai sana tala e fai atu ia te oe, e lē sa’o, I Le suafa o Iesu, Amene. 

OPEN HEAVENS

MATALA LE LAGI MO LE ASO LULU 13  NOVEMA 2024

(tusia e Pastor EA Adeboye)

Manatu Autu: Tagata oti o loo savali (Dead man walking)

Tauloto -Tusi Paia–Filipi 3:19“O le malaia, o lo latou i‘uga lea; o le manava, o lo latou atua lea; o le mea latou te vivi‘i ai, o le mea e māsiasi ai lea; e loto i latou i mea a le lalolagi.”

Faitauga – Tusi Paia –2 Timoteo 3:1-4

E ui o loo ola ma soifua pea tagata e naunau I mea faafiafia ma foliga mai o loo sologa lelei mea uma, peitai o le tulaga moni, ua oti i latou. O ituaiga tagata ia e saili I mea faafiafia ma e le pulea o latou tagata. O le mea moni e faatusa I latou I ni tagata oti o loo savavali pea. Afai o loo tosina pea lau vaai I mea faafiafia, o lona uiga o loo pulea lou agaga e le tino. O loo atagia ai le oti faaleagaga. E tatau ona e pulea atoatoa lou tagata. Aua le faatagaina le naunau i le moe e sili atu i le manaomia ona e galue. Aua le faatagaina le naunau e ai e sili atu i le manaomia ona e anapogi. O le ki i le pulea lelei o lou olaga e fua i le pulea lelei o lou loto. O le tau o le pulea lelei o lou loto e taugata atu i le tau pe a leai se pulea o lou tagata. O se tagata e paū lava ona o mea faafiafia, e oti mativa. O le tulaga lea o loo fai mai ai lē Tusi Paia i le Faataoto 21:17

“O le tagata mativa ‘ua mana‘o i mea fa‘afiafia, o lē ‘ua mana‘o i le uaina ma le suāu‘u, e le mau‘oa ia.”

‭‭

E leai ma se tagata e ausia ni mea tetele pe a paū I mea faafiafia I taimi uma. O soo se tagata e faia lea mea e ulufale mai i le lalolagi nei ma tuua ae leiloa e tagata. 

O le naunau I mea faafiafia e matua lamatia ai le tagata, ma fai mai le 2 Timoteo 3:1-5, e le tatau ona e mafuta ma tagata  ua na o le saili I mea faafiafia. Fai mai e tatau ona e alu ese ma tagata e alolofa ma naunau atu i mea faafiafia ma alolofa iai latou e sili atu i le Atua. E le ‘aia ese laau ona lava fua. E tu aua le manaoga o Isi tagata. I le auala lava e tasi, na faia le tagata e faamalosiau I isi tagata ma lagolago I o latou atunuu. E le’i faia I latou e auauna iai latou lava. 

A talanoa le tagata I le alofa ia te ia lava, o loo manatu faapito. Afai e te fia soifua, e tatau ona e faaosofia ma faatino galuega mo le lelei o tagata i lou siomaga. O soo se tagata o loo ola ma soifua mo ia lava, ua amata ona oti. O le auala e pito sili ona lelei e faaosofia ai I latou i lou siomaga ,o le taitai mai o i latou mai le pogisa ae agai I totonu o le malamalama o Keriso. O le mafuaaga moni  lea o le ola o se kerisiano, na filifilia oe e fua mai ni fua(Ioane 15:16). 

Le au pele e, ia faamautinoa o loo e soifua pea e le gata o le saili o lou lelei ae faapea foi le lelei o isi tagata. E le atoatoa lou soifua pe afai e te lei faia se galuega e faaleleia ai tagata i lou siomaga, i Le suafa o Iesu, Amene. 

OPEN HEAVENS

MATALA LE LAGI MO LE ASO LUA 12  NOVEMA 2024

(tusia e Pastor EA Adeboye)

Manatu Autu: O le sogi o le afi (A kiss of fire)

Tauloto -Tusi Paia–Esoto 19:18“O le mauga o Sinai fo‘i ‘ua pusa ‘atoa uma auā na afio ifo ai le ALI‘I i le afi, ‘ua alu a‘e fo‘i ona asu pei o le asu o se umu; ‘ua lūlūteleina lava le mauga ‘atoa uma.”

Faitauga – Tusi Paia –Esoto 3:2-6

O laugutu, o se vaega o le tino o le tagata e faaeteete iai. I le Isaia 6:6-7 ina ua mana’o le agelu e fesoasoani ia Isaia, sa ia faapa’i se malala ola i ona laugutu. E le taumate sa matuā tiga ai, pe a fua e tatau ona faaeteete i laugutu, a ua avea lea tulaga ua suia ai Isaia.

E leai se mea e tumau pe a pa’i iai le afi. I le tusi o Galuega 2:1-4; sa tula’i Peteru ma le lototele ma lauga atu i le motu o tagata ina ua afio ifo Agaga Pa’ia e pei o se afi ua vaevaeina, i tagata uma sa mafuta i le afeafe aupitoaluga. O Peteru tonu lava lea sa faafiti fa’atolu Iesu, ona o lona fefe. Mai le aso na pa’i ai le sogi o le afi i se tagata fa’atuatua; e matua suia mea uma ia te ia, ma o le a’afiaga o le afi e tumau ia te ia e faavavau.

A e vaai i se tagata e nofo sauni i soo se taimi na te faia le finagalo o Keriso, e o’o i le mea e gata ai, o lona uiga ua pa’i lena tagata i le sogi a le afi. O le mafua’aga lena ina ua uma ona pa’i ia Isaia le sogi a le afi, e pau le mea sa fa’alogoina e Isaia o le fetalai mai o le Atua:

“O ai ea ou te auina atu? O ai e fia alu atu mo i matou? Ma o lona tali sa fai: “Le Alii e, auina atu a’u”( Isaia 6:1-8). A e pa’i I le sogi a le afi, e te faalogoina le agaga ma le fatu o le Atua mo nuu uma o le lalolagi, ma o Lau tali atu o lenei, ‘Le Alli e, auina atu a’u I soo se mea e faia lau galuega, ou te alu’.

Sa faatino le galuega a Paulo i le faamaufaailogaina. O lenei faamaufaailoga na oo mai ia te ia I le Galuega 9:3-6 ina ua fetaiai ma Iesu e ala i lona malamalama i le auala i Tamaseko. O lenā malamalama e le faapogai mai i se moli uila; o le afi mai le Atua ma o le taimi tonu na pa’i ai i le tino o  Paulo, ua ia maua le sogi a le afi ma suia ai e faavavau. Mai i lena lava taimi, sa ia faia le finagalo o le Atua i le mea e gata ai. O le mafuaaga e faigata ai i Kerisiano ona latou fa’atinoina galuega tetele mo le Atua, ona latou te lei maua le sogi o le afi. O nisi o latou, e naunau e auauna i le Atua i ni tulaga tetele, ae latou te le o faamaufaailogaina, ona latou te lei maua le sogi a le afi. Afai o oe o se faife’au, a ua e fia maua se ‘au tau e ‘au fa’atasi ma oe tou te faatino ni galuega maoa’e mo le Malo o le Atua, ia e tatalo ia latou maua le sogi o le afi. O le taimi latou te maua ai le sogi o le afi, o le a ufitia o latou loto e le faamaufaailoga a le Alii, ma o le a fa’apito lo latou naunau e faia lona finagalo i taimi uma.  

 Tatalo

Tama e faamolemole foai mai mo a’u i le asō le sogi a le afi, i le suafa o Iesu, Amene

OPEN HEAVENS

MATALA LE LAGI MO LE ASO GAFUA 11  NOVEMA 2024

(tusia e Pastor EA Adeboye)

Manatu Autu: Taofi Mau Lau Fa’aaliga 3 (Hold Fast To Your Vision 3)

Tauloto -Tusi Paia–Eperu 12:2“Ma ‘ia va‘ava‘ai atu ‘iā Iesu o lē na te ta‘ita‘iina ma lē na te fa‘a‘ato‘atoaina le fa‘atuatua; o lē na ‘onosa‘i i le satauro, na fa‘atauva‘a ‘iā te ia le mā, ‘ona o le ‘oli‘oli sa tu‘u i ona luma, ‘ua nofo fo‘i o ia i le itū taumatau o le nofoāli‘i o le Atua.”

Faitauga – Tusi Paia –Mataio 6: 19-22

O nei, o le a faaiu atu le tatou a’oa’oga i lau faaaliga, i le faamamafaina lea o lenei, e mafai ona e ausia tulaga o lo’o taulai iai lau vaai. I le faitauga o le Tusi Paia o le asō, na malie Lapana e ave uma e Iakopo mamoe e ilaila solo ma pulepule o lana lafu mamoe e fai ma ona totogi. Peitai na taumafai Lapana e pelogia Iakopo o lea na ia ave faananā ese ai mamoe ilaila solo ma pulepule mai lana lafu ae tuu ai na o mamoe lanu masani. E ui I lea na saeina e Iakopo pa’u o ni laau ma tuu I le vaega e feinu ai manu, ina ia latou vaavaai atu iai i taimi e feinu ai ma feusuai ai. E lei leva ae fananau mai I mamoe e lanu masani, mamoe e ilaila solo ma pulepule seia faatumulia le lafu ma sili atu le aofaiga o mamoe ilaila solo ma pulepule I lo mamoe e lanu masani. Na suia e Iakopo le ituaiga o mamoe na fananau mai e fua I mea e vaavaai iai. 

Fai mai le 2 Korinito 3:18 e tatou te va‘ava‘ai i le pupula o le Ali‘i ma o tatou mata, e liua ai i tatou  e pei o ia. E tatau ona e faamamafaina mea o loo e vaavaai iai I le taimi nei aua o le tulaga lena e ausia I Le lumanai. Ia taulai lau vaai i mea ma tagata e mafai ona fesoasoani ia ausia ou faamoemoega ma taunuuga mo lou lumanai. 

O le taimi muamua na ou alu ai I Korea I Saute e auai I le Ekalesia a Dr Yonggi Cho, na ou vaai ai e fitu a latou sauniga i le Aso Sa e tasi I se nofoaga e 50,000 e ofi ai. Na latou augani I tagata e aua le omai I le Aso Sa na sosoo ai ae sei tuu le avanoa I isi tagata. Na ou vaai ai I se tulaga na fausia ai se faaaliga, o se mea na ou naunau e ausia, ma na ou tuuina atu I le Atua, na ou tagi atu ia te ia. Ini tausaga mulimuli ane, na ou toe alu ai I Korea I Saute ma ua maua lou avanoa ma Dr Yonggi Cho ae na ia faapea mai, ‘Ua ou faalogo ia te oe, e mafai ona e tatalo mo a’u faamolemole?’ Na ou maua le faaaliga i le taimi muamua ona amata lea ona fetuunai e le Atua mea uma Ina ia ou ausia mea na ou vaai iai. I le taimi na ou toe foi ai I lea nofoaga, ua suia lo’u tagata. Afai e te maua se faaaliga ma taulai pea iai lau vaai, e te ausia ma tulai mai I le tagata na e vaai iai i lau faaaliga. 

O le mea mulimuli, o le tulaga e faaalu ai lou taimi e fuafuaina lou taunuuga. I le Faamasino 16, na faaalu le taimi i Samasoni i mea e lē aogā. Na ia asiasi i fale o fafine talitane ma auai i le tele o mea leaga ma lē talafeagai, o le mafuaaga lea na oti laitiiti ai. O Keasi na semanū e avea ma perofeta e sili atu ia Elisaia, peitai o lona naunau I le auro ma le ario na i’u ai o se lepela (2 Tupu 5:25-27). Le au pele e, o le a le faaaliga o loo e u’umauina? O le mea o loo e vaai atu iai e fuafuaina lou taunuuga, I le suafa o Iesu, Amene. 

OPEN HEAVENS

MATALA LE LAGI MO LE ASO SA 10  NOVEMA 2024

(tusia e Pastor EA Adeboye)

Manatu Autu: Taofi Mau Lau Fa’aaliga 2 (Hold Fast To Your Vision 2)

Tauloto -Tusi Paia–Kolose 3:2“Ia ‘outou loto lava i mea i lugā, ‘ae lē o mea i le lalolagi.”

Faitauga – Tusi Paia –Mataio 6: 19-22

O nei, o le a fa’aauau ai la tatou mataupu na amatalia ananafi faatatau i fa’aaliga. Le au Pele e, ou te mana’o ia e silafia o lou lumana’i e faalagolago i mea o loo mafai ona e vaai atu i ai i le asō. Afai o e vaaia se lumanai manuia, e mafai fo’i ona e maua (Kenese 13.15). Ina ua o matou maua le Redemption Camp (Nofoaga o le Togiola) i Texas i Amerika, na fetalai mai le Atua ia te a’u, “O le mamao e mafai ona e vaai atu i ai, o a’u lenā.” Sa o’u savali i le mamao na mafai ona o’u o’o i ai i lea aso, ma o le asō, o mea uma na o’u vaai i ai ua avea nei ma a matou - maimau pe ana mamao atili atu la’u savali !. Ua tu’u e le Atua se malosiaga tele i lau faaaliga na te tosoa’ina mai ai mea uma o loo e mana’o i ai. O lea la, ia iloga lou nofouta faatatau i mea o loo taula’i i ai lau vaai. Fai mai le Tusi Paia I le Kolose 3:2 “Ia ‘outou loto lava i mea i lugā, ‘ae lē o mea i le lalolagi”.

O lau silasila e tatau ona loto i mea o i lugā ae lē o mea o le lalolagi. Tusa pe o si’osi’omia oe e mea mananaia ma fe’ilafi, ia atili mausalī ai lou loto i mea o i lugā. Na ma asiasi ma lo’u toalua i se tagata mauoa, ma sa ia fa’amatamata i ma’ua i se fale o loo ia fausia. O le taimi muamua lea na o’u vaai ai i se paipa e fai i le auro i se faletaele. O iina tonu na faalogo ai lo’u toalua i le siufofoga o le Atua faapea, “Afafine, e sili mamao le matagofie o le lagi.” I le 2 Timoteo 4:6-8, o le Aposetolo o Paulo sa olioli o ia i le pale o le amiotonu sa teuina mo ia. A o vaai i si tagata i le oti, na vaai le Aposetolo i le faapaleina. O le mafuaaga lea na fai mai ai le Aposetolo i le 2 Korinito 11:22-33 na ia lavātia le sasa, fia ai, ma puapuaga uma lava; ona o le fa’aaliga na ia vaai i ai.

Le au pele e, aua le avea lau faamuamua i le tamāoaiga o le lalolagi ma mamalu. Afai ua na o le pau lea o lau vaai o mea e lē tumau, pau mea e te maua o mea e pala. O le pogai lea o le fai mai o le Tusi Paia i le Mataio 6:19-20 e tatau ona o tatou tolo’a’i oa mo tatou i le lagi e leai se mea e faaleagaina ai. I le isi itu, afai e te tulimata’i i tala atu o mea e pala, e te maua uma mea e o le tino faatasi ma mea e tumau e lē faaumatia. O le fetalaiga lea mai le Tusi Paia i le Mataio 6:33:

“A ‘ia ‘outou mua‘i sā‘ili le mālō o le Atua ma lana amiotonu; ‘ona fa‘aopoopoina atu lea o ia mea uma ‘iā te ‘outou.”

Ua na o le pau le tapula’a o mea e mafai ona e maua i le lumanai, o lau faamuamua o e vaai i ai i le taimi nei. O mea o loo au i ai lau vaai o le a faafoea ou ala uma e tatau ona e savali ai e maua ai lau fa’aaliga. Le au Pele e, e leai se mea sili nai lo’o le taula’i o lau vaai I le Atua auā a e maua le Alii, ua e maua le atoatoaga o mea uma lava. O a mea o taula’i iai lau vaai? I le suafa o Iesu. Amene

OPEN HEAVENS

MATALA LE LAGI MO LE ASO TOONAI 9  NOVEMA 2024

(tusia e Pastor EA Adeboye)

Manatu Autu: Taofi Mau Lau Fa’aaliga 1 (Hold Fast To Your Vision 1)

Tauloto -Tusi Paia–Sapakuka 2:2 “Ua tali mai fo‘i le ALI‘I, ‘iā te a‘u, ‘ua fa‘apea mai: ‘Ia e tusi le fa‘aaliga, ‘ia e togitogi i papa, ‘ina ‘ia momo‘e o ia lē na te faitauina.”

Faitauga – Tusi Paia –1 Korinito 9:24-27

Ua tusia I le Faataoto 29:18 e fano tagata pe a leai se faaaliga. Afai o se uso e leai se faaaliga e fai ma ona ta’iala o le lumana’i e ola so’ona fai o ia ma e ono i’u I le malaia. I le tatou Tusi faitau o le asō, fai mai Paulo sa i ai lana tini sa tuli, ma o le pogai lea na ia fai ai ma pologa lona tino. A ou vaai I le soifuaga o aso uma o se uso, e mafai ona o’u iloa ai pe i ai sana miti pe leai.

Ou te manatua se taimi o le 1980 ina ua lata ina uma sa’u anapogi mo le 40 aso, ma sa asiasi atu se faifeau i lo’u ofisa. E alu atu le faifeau o o’u taoto i luga o se fala ona ua vaivai le tino i le lē ‘ai i le silia ma le masina. O le taimi lea ua i ai se fale tele o le RCCG e tusa ma le 100 mita le umi 50 mita le lautele. Ina ua vaai mai la le faifeau ia te a’u i le tulaga sa o’u i ai, sa fai mai, “Aisea ua e soona anapogi ai o lenā ua ia te oe le fale aupito sili ona telē i totonu o AferIka? O le a se isi mea o e saili?” Ou te le’i tali i le uso faifeau auā e lē o mafai ona ia iloa la’u miti. Ia te ia ua o’u taunuu i le tumutumuga o manuia, peita’i o a’u o loo o’u miti i se fale e pei o le tele o se aai ma sa o’u manaomia ona faapologa lo’u tino ia maua ai la’u faaaliga.

O Iosefa sa ia iloa le lumanai, ma o le mafuaaga lea o le fai mai o le tusi o Kenese 39:1-12; ina ua fai atu le avā a lona matai ia Iosefa la te momoe na fai i ai, “e lē mafai ona o’u faia se mea leaga ma o’u agasala ai i le Atua o lē na aumai ia te a’u miti faatatau i lo’u lumana’i. Ou te iloa o loo i ai polokalame a le Atua mo a’u ma e tatau ona ou ola usita’i ma pulea.” Fai mai le Eperu 12;2; na onosaia e Iesu le satauro ona o le olioli sa tu’u i ona luma, o le olioli o le vaai i agaga e tele ua toe faalelei ma le Atua.

O le toatele o o’u aiga ma uo sa manatu ua leaga lo’u ulu ina ua o’u ave lo’u aiga i ni tausaga ua mavae ma matou nonofo i le nuu ua tāua nei o le Aai o le Togiola. Sa o latou fai mai, “E faafefea e oe o se faiaoga sinia i se Iunivesite, ma sa nofo i se fale tele ma matagofie ona e ave lou aiga i lenei togavao e leai se eletise?” Pau le vaaiga na o latou iloa o se vaomatua, peita’i na o’u iloa atu se aai. I le Eperu 11:8-10; fai mai o Aperaamo sa nofo i faleie aua sa ia faatalitali atu i se aai ua faavae ina, o lona mataisau ma le tufuga o le Atua lea.

O le a se vaaiga o loo e faatalitali i ai mo lou lumana’i? O faafefea ona e soifua I le asō ina ia taunuu ai lau miti? Afai o i ai moni sau faaaliga mo lou olaga, o le faaaliga lenā e tatau ona ta’ita’ia oe e te ala pea a’o momoe uma isi ma faamalosi pea ina ua faavaivai ma musuā isi. Aua ne’i leiloa I lau vaai lau miti o lou lumana’i; taula’i lau vaai I le Atua, o le na te amataina ma fa’aatoatoaina lou faatuatua (Eperu 12:2). O atagia i lou soifuaga o aso uma o i ai se faaaliga tele o e tulimata’i ma fa’atalitali i ai mo lou olaga? I le suafa o Iesu. Amene.

OPEN HEAVENS
MATALA LE LAGI MO LE ASO FARAILE 8 NOVEMA 2024
(tusia e Pastor EA Adeboye)
 
Manatu Autu: Tatalo Faafetai (Prayers of thanksgiving)
 
Tauloto -Tusi Paia–1 Nofoaiga Tupu 16:34“Vivi‘i atu ‘outou i le ALI‘I; auā e lelei lava o ia; auā e fa‘avavau lava lona alofa.”
‭‭
Faitauga – Tusi Paia –Salamo 95:1-5

Tatalo
1. Le Alii e, faafetai mo lo’u ola. E lē o lo’u malosi ma le mana o lo’o ou maua ai pea le ola I le asō. Ou te matua maua le loto faafetai i lau afio, le Alii e. 
2. Tamā faafetai mo lou alofa mutimutivale ma le alofa tunoa ia te a’u. Faafetai mo lou tausia o a’u ma le faaalia ia te a’u o lou alofa mutimutivale mai le amataga o lenei tausaga seia o’o mai I le asō. 
3. Faafetai Tamā ona ua ou faaolaina. Faafetai mo le faasaoina o lo’u agaga ma le toe faaolaina mai o a’u mai le faaumatia I lima o le tiapolo. Ou te matua faafetai ona o le a ou nofotupu ma oe e faavavau. 
4. Tamā, faafetai mo tali o tatalo uma. Ou te matuā faafetai auā e mafai ona ou valaau ia te oe I so’o se taimi. Faafetai foi mo tatalo uma e te lei talia aua ou te mautinoa o loo e manatu mo lo’u lelei. 
5. Tamā , ou te faafetai i lau afio mo le puipui ia te a’u i taimi uma mai mea leaga uma. E te taitaiina a’u e mau I lalo o le paolo o ou apaau, e tumu a’u i le loto faafetai le Alii e. 
6. Tamā, ou te faafetai ia te oe mo lau tausiga ia te a’u I aso uma. Ou te matua faafetai mo mea uma ua e foai ia te a’u. Ou te faafetai I mea uma ua e foai mai ia te a’u, ma ou te iloa e fa’aauau pea lau tausiga ia te a’u I aso uma o lo’u ola. 
7. Tamā, faafetai mo tagata uma o lo’u aiga aemaise o ē pele ia te a’u. Faafetai mo avanoa taua ua ou maua ai tagata o lou aiga ma uō. 
8. Faafetai Tamā mo le Ekalesia o lo’o ou tapuai ai. Faafetai mo faifeau, aufaigaluega ma tagata lotu. Faafetai mo mea uma ua e faia aemaise o fuafuaga mo I matou uma. 
9. Faafetai le Alii e,  mo taua uma o loo e tauina mo a’u. Faafetai mo le manumalo ua ou maua ma lo’u maua o le manumalo a’ia’i ona o oe. Ou te matua faafetai le Alii e. 
10. Faafetai Tamā mo lou avea o lo’u Alii. Ua mafai ona ou fesagai ma a taeao ona o lou faamalosi mai. E matua pele lau afio ia te a’u, a aunoa ma lau afio, e leai se uiga moni o lo’u ola. 
11. Faafetai le Alii e, mo faitoto’a o avanoa ma faamanuiaga ua e tatala mo a’u. Faafetai foi mo faitotoa uma ua e tapunia aua ou te iloa o lo’o galulue mea uma mo lo’u lelei. 
12. Faafetai le Alii i Lou alofa ma lou agalelei e lē mavae. Ia viia ma faamanūina lou suafa e o’o I le faavavau. I le suafa o Iesu e tatalo atu ai, Amene.

OPEN HEAVENS

MATALA LE LAGI MO LE ASO TOFI 7 NOVEMA 2024

(tusia e Pastor EA Adeboye)

Manatu Autu: Vaavaai i tua atu o Tamā (Seeing beyond Fathers)

Tauloto -Tusi Paia–Ioane 14:12 “E moni, e moni, ‘ou te fai atu ‘iā te ‘outou, o lē talitonu mai ‘iā te a‘u, e faia lava e ia o galuega ‘ou te faia; e fai fo‘i e ia mea e sili i ia mea, auā ‘ou te alu i lo‘u Tamā.”

‭‭

Faitauga – Tusi Paia –1 Korinito 4:14-16

E masani I tamaiti ona vaavaai atu I o latou matua ma e leai ma se eseesega ma le malo o le Atua. E tatau i se atalii ona taumafai e na te iloa mea uma mai lona tamā faaleagaga ma tatalo ina ia ona tauaveina lona agaga. Peitai, o le a le mea a le tamā e maua mai lana fanau i le agaga? A e manatu i le tulaga lenei, sa iai le aoga o perofeta i Isaraelu, lea sa maua mai ai e Elia tagata e fesoasoani ia te ia, e te iloa ai iina, e na te lei manaomia tele Elisaia. 

O le mafuaaga moni e taumafai ai le tamā e latalata i lana fanau faaleagaga ona e naunau e faasolo atu i ai latou lona iloa faapea ma le faauuga. E lē manao e oti ma ia mea uma ua ia maua mai le Atua, e manao e faasolo atu I tagata ona ia latou faaauau ai pea lea o le galuega pe a mavae atu o ia. O le mafuaaga lea, o le naunau o le tamā e a’oa’o faatasi ma le naunau o lana fanau faaleagaga e a’oa’oina, e mafai ona fausia ai se mafutaga vavalalata i lo la va. E pei o Elia ma Elisaia i le 2 Tupu 2:11, e iai le aso e tuua ai e tamā le lalolagi nei ona feagai loa lea o fanau faaleagaga ma le faaauauina o le galuega ia siitia i le Isi tulaga e aunoa ma tamā. O le a le tulaga o lau sauniuniga o loo iai e faaauau ai le galuega mai lou tamā faaleagaga?

O lau vaai mamao i lau savaliga ma le Atua e tatau ona I tua atu o lou tamā faaleagaga , aua a lē saunia, a mavae atu o ia ae aafia ai oe. O lo’u tamā faaleagaga o se tagata maoae o le Atua. Sa ia anapogi ma tatalo e sili atu i lo seisi tagata ou te iloa. Na ia maua faaaliga mo le lumanai ma sa a’oa’oina a’u I le tele o mea mai ia te ia. Peitai na fai mai ia te a’u e na te lei anapogi lava mo aso sosoo e 21. Ina ua mavae ni nai aso talu ona alu atu o ia e faatasi ma le Alii, ua ou faia loa se anapogi e sili atu ma le tulaga masani, e faia mo aso sosoo e 40, e faatasi I le tausaga. Na ia maua faaaliga o le Ekalesia o le a faalautele atu i le lalolagi, ma ua taunuu lea tulaga, peitai ua faalautele atili atu e le Atua le faaaliga i Isi vaega e pei o le faatuina o se Iunivesite e a’oa’oina ai talavou ma maua faailoga maualuluga ao a’oa’oina I mea faaleagaga. 

Afai e te manao e fiafia lou tamā faaleagaga ia te oe, ao a’oa’oina oe mai ia te ia ae lei tuua le lalolagi nei, e tatau foi ona e vaavaai i tua atu o lou tamā i lau savaliga ma le Atua. E lautele atu lau vaai mamao I le Atua e sili atu i lau mafutaga vavalalata ma lou tamā faaleagaga? I le suafa o Iesu, Amene.