Samoan Devotional

OPEN HEAVENS

MATALA LE LAGI MO LE ASO LUA 10 IUNI 2025

(tusia e Pastor EA Adeboye)

Manatu Autu: ‘Faatasia e avea ma tino e tasi 2 (Cleave as one 2).

Tauloto –  Mataio 19:6 “O lea e lē toe to‘alua ai, a o le tino e tasi i lā‘ua; o lenei, o ē ‘ua fa‘atasia e le Atua, ‘aua ne‘i fa‘ate‘a‘eseina e se tagata.”

Faitauga - Tusi Paia:  Salamo 133:1-3

O le asō, ou te fa’aauauina le fa’atalanoaga i le mafua’aga e tatau ona faatasia ulugalii faaipoipo. A nonofo ese’ese ulugalii faaipoipo mo se taimi umi o le a suia i la’ua e tusa ma o la si’osi’omaga, e aunoa ma lo la iloa. A fa’asolo ina matutua tagata ma ‘ausia ni tulaga fou, e mafai ona suia ai i latou, ma afai e le’o agai faatasi se ulugalii i ia tulaga fou, o le a avea ai loa la’ua pei ni tagata ua le masani. A o’o atu i le taimi ua toe feiloai nei ulugalii, e ono faateia i la’ua i o la eseesega. 

E faigata ona faatasia e avea ma tino e tasi, pe a fai e le o nonofo faatasi. O le tulaga e latalata tele ai  uso ma tuafafine, e le gata sa fananau mai i matua e tasi, ae sa latou ola ma tutupu ane faatasi ma sa ui faatasi i tulaga faasolo o le olaga. O le mafua’aga foi lena e tasi e mafanafana ai le sootaga ma le mafutaga a e sa uo mai o laiti. Afai e te naunau ia faatasia e avea ma tino e tasi ma lou toalua,  e tatau ona lua ui faatasi i vaega eseese o le olaga nei.  E te ono faapea mai: “Ma te talanoa i mea tutupu i le aso, i afiafi uma.” ae le tutusa lena ma le faasoa fesagai.

A e suesue I le Tusi Pa’ia, e te iloa ai o ulugalii, a siitia e nonofo i se seisi nofoaga, e ō faatasi. Ina ua malaga atu Aperaamo i Aikupito, sa la o ma Sara. (Kenese 13:1).  Ina ua malaga atu Elimaleka i Moapi e saili manuia ai, sa ia malaga ma lona to’alua o Naomi (Ruta 1:1). E ui sa pagatia le la taunu’uga a’o le lesona taua, a siitia i seisi nofoaga, e tatau ona ō faatasi se ulugalii.  Ina ua faaali atu le agelu ia Iosefa,  e ave Iesu i Aikupito ona o le fuafuaga a Herota e fasiotia Iesu, sa malaga faatasi le aiga (Mataio 2:13-14). E ono iai ni tulaga le ma’alofia e tatau ai ona malaga atu muamua i seisi atunuu se tasi o se ulugalii, na o ia. Peita’i o ia tulaga e le tatau e se aiga ona nonofo eseese e silia ma le 6 masina, ona faatoa toe feiloai lea. 

E lē manuia mo se ulugalii, ona nonofo eseese i le la faaipoipoga ona o le naunau e ō atu i seisi nofoaga e manatu o loo iai manuia e sili atu. O so’o se mea afaina ai le ‘lotogatasi o se ulugalii, e le tatau ona fa’atagaina pe tuu avanoa iai. E tatau i ulugalii ona faia soo se mea e nonofo faatasi ai, aua o le finagalo lea o le Atua (Mareko 10:9). A faatasi i laua, e faigofie ona tatalo faatasi ma malilie i nisi o mataupu. Peita’i, a fai e eseese ni atunuu ua nonofo ai ma eseese taimi, e faigata atu. O le faatasia  ma lau tane poo le avā, e manaomia le fuafuaina lelei o ia taimi, ia mafuta, loto gatasi, ola ma ui faatasi i vaega uma o le olaga nei. E tāua i ulugalii fa’aipoipo ona fuafuaina lo la nonofo faatasi, ui ma ‘ausia fa’atasi tulaga uma o le olaga nei, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 9 IUNI 2025

(tusia e Pastor EA Adeboye)

Manatu Autu: ‘Faatasi ma avea ma tino e tasi 1 (Cleave as one 1).

Tauloto –  Kenese 2:24 “O le mea lea e tu‘ua ai e le tane lona tamā ma lona tinā, ‘ae fa‘atasi ma lana avā, ‘ona ‘avea ai lea o i lā‘ua ma tino e tasi.”

Faitauga - Tusi Paia:  Faataoto 5:15-21

O loo tatou ola i se lalolagi ua vavevave mea uma, ma o le toatele o tagata ua latou saili i le oa ma le tamaoaiga tusa poo le a le tau. Ma ua tele ina aafia ai ulugalii. I nisi ulugalii, e faigaluega le tamaloa i seisi setete poo seisi atunuu e ese mai le atunuu o loo nonofo ai lona aiga. Ua leva na iai mai aso ua tuanai ni faiga uo a se alii ma se tamaitai e mamao ma eseese mea e nonofo ai, ao le taimi nei, ua tele ulugalii e faapea le nonofo eseese. O le mea moni, o se ulugalii e nofo eseese, e le manuia lea tulaga mo se aiga. E mafai ese ulugalii ona faia lea tulaga mo se vaitau puupuu ona o ni mafuaaga tatau, peitai e le tatau ona umi. 

O le tele o le faitaaga ma le mulilua e mafua mai ona e le o nonofo faatasi se ulugalii. Ae e iai foi taimi e oo i ulugalii o loo nonofo faatasi, o loo mamao le tasi mai leisi aua e usu leisi i le taeao po ae foi ma i le fale i le leva o le po. O ia ulugalii o loo nonofo peiseai e eseese, ma o tagata o loo tele ina mafuta iai lea ava poo le tane, e oo ina mafana mafutaga. O nei mafutaga e iu ane lava i le mulilua.  

Afai o oe e fai lou toalua, ae amata ona e maitaua e sili atu lou fia talanoa i isi tagata i lo lou toalua, ua amata se afi i le mauga. Afai e te fiafia atu e faaalu lou taimi i fafo o lou aiga i lo totonu o lou aiga ma lou toalua, ua amata se faafitauli. Afai e te iloa ua amata ona e fiafia atu e talanoa i ni mataupu taua ma au uo o le isi itupa ae ua e le fia talanoa ai i lou toalua, e tatau ona e toe foi i tua ma vaavaai lelei auala e toe faalelei ai tulaga ua faaletonu i le lua ulugalii. Aua nei ulagia lou tagata ma faapea, ’e leai sau mea leaga o faia ma le la tagata, ua na o se uo’. O le mulilua e amata lava ini mafutaga o ni uo, ma e le umi se taimi, ae faaosooso atu le tiapolo seia oo ina faatino le agasala. Ou te tatalo ia e manumalo i ni faaosoosoga e ono faaumatia ai le lua ulugalii i le suafa o Iesu. 

Afai ua e faaipoipo, faaalu uma lou taimi  i lou toalua ma avea o ia ma tagata e te faasoa iai i mea uma o loo taua ia te oe. Faaalu le lua taimi e o faatasi ai e tafafao ia ma savavali faatasi. Ia fai ma lua o e aai ma tafafao i se isi nofoaga pe faatasi i le masina. Fuafua se taimi e te lua o ai e tafafao na o oulua i se faletalimalo ma o ese mai le tele o mea faalavelave. I lalo ane o le lua mafutaga ma le Atua, o lau mafutaga ma lou toalua e tatau ona pito sili ona faataua i lou olaga aua foi na faia oulua e le Atua e avea ma tino e tasi e pei ona faailoa mai e le tauloto mai le Tusi Paia o le aso. Ia e manatu ma fuafua lou faatasi atu i lou toalua ona faamanuia lea o le Atua i le lua ulugalii i le suafa o Iesu. E tatau i tagata faaipoipo uma ona fuafua ma manatunatu lelei i auala e mafuta lelei ai ma o latou taitoalua i le suafa o Iesu, Amene.

OPEN HEAVENS

MATALA LE LAGI MO LE ASO SA 8 IUNI 2025

(tusia e Pastor EA Adeboye)

Manatu Autu: ‘Aveese fe’ese’eseaiga mai totonu o faaipoipoga (Deflecting offences in marriage).

Tauloto –  Iakopo 1:19 “'O lenei, o‘u uso pele e, ‘ia ta‘itasi le tagata ma fa‘ata‘alise ‘ona fa‘alogologo, ‘ia fa‘agesegese ‘ona tautala atu, ‘ia fa‘agesegese ‘ona ita”

Faitauga - Tusi Paia:  Kolose 3:12-15

O le ulua’i faamatalaga faa matematika i le galuega o le ‘Matematika o le faaipoipoga’ fai mai o le ‘alofa e tauaso,’ Fai mai le Faataoto 10:22 o le alofa e ufiufi ai solitulafono uma lava; o lona uiga o tagata ua fai aiga e lē tatau ona faitio i faaletonu uma o latou ta’itoalua. Ina ia ‘aloese mai solitulafono, e tatau ona o latou fa’aa’oa’o e faafoe o latou sesē.

O nisi tagata ua iloa I le valaau faapelepele o o latou ta’itoalua o ‘agelu.’ E ui o’u te lē tete’e i lea fa’aupuga, o se isi faamatalaga faa Matematika e faapea, ‘o agelu e lē tausasami alaisa.’ O se fa’aupuga mālie lea e faapea ai, o tagata soifua e lē o ni agelu, o lea la, e sesē pea le tagata. E taua i tagata ua faaipoipo ia aua ne’i i ai ni manaoga lē talafeagai ma faigata i o latou ta’itoalua, e tupu ai pea le loto ita pe a lē ausia e lona toalua ia manaoga. Afai ua fai sou aiga po o sauni fo’i e fai, e ao ona e malamalama o le a i ai fe’ese’esea’iga I le lua va I le tele o taimi. Peita’i o lou iloa ona liliu ese I ia maseiga o le a fesoasoani tele ia te oulua.

I tausaga ua mavae, sa ou tapena ai mo se faigamalaga, ma na mana’o lo’u toalua ma te o i le malae vaalele. Sa o’u iloa lelei e tuai ai ona o’u alu ona o ia, o lea na o’u fai atu ai, “E televave le alu a le taavale pe a leai sana taavale toso.” Na tali mai lo’u toalua, “O ai le taavale toso?” Sa o’u iloa ua lē malie lou toalua i la’u tala, ma na vave ona o’u tali atu, “o a’u le taavale toso; o oe le taavale, ou te lē mana’o o’u te faalavelave ia te oe.” Na ata ma tali mai, “E te lē mo’i.” A na o’u lē iloa feliua’i la’u faamatalaga ma liliu ai le mea na tupu semanū e tupu se misa i lea aso. E taua i ulugalii ona iloa le taimi ua tatau ai ona taofi le tautala poo le faia o faamatalaga e faatupu tele ai le vevesi, pe a vaai atu o le a ita le isi. 

O le Tusi o Iakopo 1:19 o se fuaiupu fetaui lelei lea e aveese ai misa i ulugalii. Afai e faataalise ona e faalogologo o le a e iloa faalogo ma le loto onosai I lou toalua e aunoa ma le su’esu’e avanoa e finau ai poo le faaali o lou sa’o e aunoa ma se mafuaaga tatau. O le faatelegese ona tautala o le iloa lea, o isi taimi, o le tau uma mai o ou manatu o e nofo ma oe, e lē iloa ai sou poto. Mulimuli, soose uso e faagesegese ona ita e lē faamisa so’o.

Le au pele e, afai e te mana’o i se ulugalii poo se aiga e seāseā tauaimisa, e tatau ona a’oa’oina oe ia aua ne’i i ai ni ou manaoga lē talafeagai mo lou toalua. E tatau ona e iloa faapalepale ì vaivaiga o si ou toalua a o lua taufai galulue faatasi ma le loto onasai e faaleleia le lua mafutaga e ala i le fesoasoani a Agaga Paia, I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 7 IUNI 2025

(tusia e Pastor EA Adeboye)

Manatu Autu: O le mataupu e tā’ua o le toalua (The subject called spouse).

Tauloto –  Faataoto 9:6 “'‘Ia ‘outou tu‘ulafoa‘i atu i ē vālelea, tou te ola ai, ma ‘ia ‘outou ui atu i le ala e atamai ai.” '

Faitauga - Tusi Paia:  Kenese 2:21-25

O le faaipoipoga o se a’oga e te su’esu’e ai i se mataupu e tā’ua ‘O le Toalua.’ E mana’omia ona su’esu’e lelei e tagata o latou ta’ito’alua ia iloa ai poo a mea e fiafia ai a’o ā fo’i e feita ai i latou. O ta’ito’alua fo’i e manaomia ona o latou a’oa’oina pe faafefea ona felagolagoma’i ma galulue faatasi ia taunuu ai i le sini ma manuia laasaga uma o le soifuaga.

Afai ua e faaipoipo, o lou malamalama lelei i lou toalua o le a fesoasoani iā te oe e ‘alofia vevesi aemaise pe a e iloa ona vaivaiga. Fa’ata’ita’iga, o se tane na te iloa o le vaivaiga o lana avā le faiaga, e lē tatau ona fa’ali’i i se taimi e fiu ai e faatali lona toalua pe a sauni la te o i se mea. A e tatau ona ia fesoasoani i lona toalua ia faaitiitia le taimi e sauni ai, i so’ose auala na te mafai. E faapenā fo’i se fafine na te iloaina o si ona toalua e matamuli e fa’aali ona manatu, e tatau ona maua pea lona loto onosa’i, ma fa’amalosi’au I si ona toalua e talanoa atu ia te ia. I le soifuaga fa’a ulugalii, e tatau ona e saili ia e malamalama lelei i vaivaiga ma malosiaga o lou toalua ia mafai ai ona o oulua galulue faatasi ia maua le aupito lelei mo le lua aiga.

Ina ua ma faaipoipo ma lo’u toalua, sa fai la ma tautoga ‘aua ne’i o ma feita faatasi. Na o ma malilie so’ose taimi e ita ai se isi o i mā’ua, aua ne’i pisa le isi, ia fifilemū pea. I le tasi aso a’o o ma faimalaga mai Ilesha agai i Lagos, o se tasi o taulaga i Nigeria Sisifo, sa i ai se mafua’aga na lē malie ai lo’u toalua ma faaali mai ona manatu iā te a’u. Na o’u iloa e sa’o lo’u toalua peita’i sa ou ita fo’i a’u. A’o o’u aveina pea le ma taavale, sa fa’aauau pea ona faaali mai lona ita, ae lē mafai ona o’u fai atu se faamatalaga ia te ia ona o le ma tautoga sa fai. Ina ua lē mafai ona o’u toe onosa’ia le to’atāma’i o lo’u toalua, sa ou taofia loa le taavale ma ou savali ese ae tu’u ai pea lo’u toalua i totonu o le taavale. Na o’u savali mo sina taimi ona o’u malōlō lea i se nu’u ma faatau ai ni a’u fualaau taumafa mata. Na o’u toe fo’i i le taavale ma avatu ni fualaau taumafa mata i lo’u toalua. O le taimi lea ua popole o ia aua ua fai si umi o o’u alu. Na talia e si o’u toalua la’u faatoesega ma uma ai loa sinā mea. Sa mafai ona o’u faamalie lona loto i lea auala aua sa fa’aalu le taimi e su’esu’e ai e le tasi le isi ma ua ma iloa le faiga e lelei mo maua.

O isi tagata e uma loa ona feofeoa’i ma i’u ai ina faaipoipo, e fa’asesēina o latou manatu ua o latou a’oa’oina mea uma e tatau ona o latou iloa e uiga i lona toalua. Latou te lē iloa o le la faatoa amata. Afai ua fai sou aiga, o le a o oulua ‘alofia le tele o ni fe’ese’esea’iga pe a faamaulalo lua loto ma taumafai e malamalama i lou toalua faatasi ma le fesoasoani a Agaga Paia. E alagatatau iai latou ua faaipoipo le faaauau pea ona faamaualalalo ma aoaoina i latou ia malamalama i o latou taitoalua, I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 6 IUNI 2025

(tusia e Pastor EA Adeboye)

Manatu Autu: Papatisoga i le Agaga Paia (Holy Ghost Baptism)

Tauloto –  Galuega 1:8 “Ae peita‘i o le a maua e ‘outou le mana, pe ā afio ifo le Agaga Pa‘ia i luga ‘iā te ‘outou; e fai fo‘i ‘outou ma molimau ‘iā te a‘u i Ierusalema ma Iutaia uma lava, ma Samaria, e o‘o lava i le tulu‘iga o le lalolagi.”

Faitauga - Tusi Paia:  Galuega 10:34-48

I le tausaga 1979, sa masani ona ou tei ane i le leva o le pō ma tagi atu i le Atua, ‘Le Atua e, sa ou malie e auauna ia te oe o se faifeau, peitai ou te lē fia avea o se faifeau masani o le talalelei, ou te manaomia lou mana e faia ai lau galuega, faamolemole aumai ia te au lou mana’. Sa masani ona ou tagi atu i le Atua mai le 10 i le po seia oo i le 5 i le vaveao, ae leai se mea e tupu mo le fia masina. Ona oo lea i se tasi po, na fetalai le Atua ma faapea mai, “e mafai ona e filemu ma faalogo? O le a le mea ua e faia i le mana lena o loo ia te oe?” Ona ou manatu lea, afai o loo iai le mana ia te a’u I le taimi nei, aisea o loo ou ole atu ai lava? Na faaauau pea ona faapea mai le Alii, “Atalii, o le a le Upu o loo tusia i le Galuega 1:8?” Ou te taulotoina o lea na ou vave tali atu. Ona fesili mai lea pe ua papatisoina  a’u i le Agaga Paia, Ona ou tali atu lea, ‘ua leva tausaga’. Na ia fesili mai, “e moni ea La’u Upu?”. Ua ou tali atu, ‘ioe e moni’. Na toe fesili mai, “Afai ua papatisoina oe e Agaga Paia, aisea la o loo e ole mai ai mo le mana ?”. Ua ou faapea atu, ‘peitai le Alii e, ou te lē o faalogoina le mana’. Na faapea mai, “na ou fai atu ea, o ē faatuatua e ola ea i lagona?”. Na ia fai mai  e ola ē amiotonu i le faatuatua ae lē o lagona e pei ona tusia I le Tusi Paia i le Roma 1:17. Ina ua maea lea talanoaga, na ou faapea ane ia te a’u o le a faaee ou lima i luga o soo se tagata  ma’i ou te toe vaai ai, ona ou moe lea. 

Na ou tei ane i le taeao na sosoo ai ma ua ma feiloai ma se tagata o le Ekalesia ma lana tama i le matou potu malolo . O le fafine ma lana tama e ma’i ma ua faitau aso e lē moe. Na ave i le falemai ae fai mai e ave i le fale ona e leai se mea a foma’i e mafai ona fai ai. E ui na ou faalogoina le fefe, na faaee ou lima I ona luga ma ou faalogoina ua lē toe gaoioi. Ua faapea a’u ua oti le tamaitiiti, sa pupula ane ou mata, ua moe o ia. Ua faamalolo e le Atua . Na amata mai iina ou te lē toe taofia le faaee o ou lima i luga o tagata, ma ua ou vaai i vavega faapitoa o tutupu. 

Le au pele e, afai ua papatisona oe i le Agaga Paia, o lena ua ia te oe le mana o le Atua. E te lē tau lagonaina le mana, ae nao le talitonu lava i le Upu a le Atua, ona ia faia lea o vavega e tauala ia te oe. Afai ua papatisoina oe i le Agaga Paia, o lena ua ia te oe le mana e faia ai mea tetele mo le Atua, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 5 IUNI 2025

(tusia e Pastor EA Adeboye)

Manatu Autu: Auaunaga moni I le Atua (True commitment to God)

Tauloto –  Failauga 11:4 “O lē na te mānatunatu i le matagi e le lūlū saito o ia; o lē na te va‘ava‘ai fo‘i i ao e le selesele lava o ia.'

Faitauga - Tusi Paia:  Luka 21:1-4

I le tele o tausaga talu ai, na faailoa mai e le Atua ia te a’u se faaaliga, ao ou lauga, ma sa ou faailoa i le faapotopotoga. Na faapea mai, ’e iai se tagata o loo iinei, e tolu ni faamanuiaga tetele o le a e maua. A oo mai le muamua, ia ave uma le 100% i le Atua. A oo mai le lona lua, vaelua, ave le isi afa I le Atua ae tuu le isi afa ma ia. Ao le faamanuiaga lona tolu, e ave uma ma ia. I ni nai aso mulimuli ane, na sau ai se fafine ua oti lana tane, ma aumai ni tupe ma faapea mai o lana faamanuiaga muamua lea, e tusa ma le folafolaga a le Atua. Ona ou te iloa lelei e tau leai ni ana tupe, o lea na ou teena ma fai atu iai ailoga o ia lea na faatatau iai le faaaliga. Ae na finau mai ia ou talia, ma o lea na ou taliaina ai. Na ou teuina lelei le tupe ma le manatu, ia saunia lelei e toe faafoi i le tina lea pe a toe foi mai ma iloa e le o ia na faatatau iai le faaaliga. Ua maea sina taimi, ua foi mai ma faapea, ‘Tama, o le 50% lea o le faamanuiaga lona lua’. Na ou taliaina, ma tatalo mo ia. Mulimuli and ua sau ia te au ma faapea mai, ‘Tamā, fai mai faletupe sa iai se aitalafu a lo’u toalua iai latou ae lei maliu, a o lea ua toe fesootai mai ma faatoese mai. E te silafia lelei lo’u pologa e tau totogi lenei aitalafu, ao lea ua toe iloa ane, e le o iai se aitalafu a lo’u toalua , fai mai o latou o loo aitalafu ia te a’u ma o lea ua totogi uma mai se tupe ia te a’u’.  Na ia faalogo i le Upu mai le Atua, ma talitonu e aunoa ma le masalosalo, e mo ia. Sa ia usitai i lana faatonuga e ui e le tala feagai le taimi, ma na ia maua faamanuiaga e tele. 

O nisi tagata e mananao ia lelei le tamaoaiga ma ia maua taimi lelei ona faatoa auauna lea i le Atua.  E mananao e maua ni galuega lelei ona faatoa totogi ai lea o sefuluai. O le fafine ua oti lana tane i le faitauga o le tusi Paia o le asō, na faamaonia lana auaunaga moni i Le Atua I le foai atu o mea uma ua te ia e ui e lē fetaui le taimi.   O tagata e mananao e faatali sei lava ma totoe mea uma ona faatoa auauna lea i le Atua, e iu ane lava e lē auauna i le Atua. Na faatonu e Paulo ia Timoteo, e talai le Upu, le talalelei i aso o taugalemu ai ma aso e lē taugalemu ai (2 Timoteo 4:2). O taimi e le taugaluemu ai, o taimi ia e lē talafeagai, ma o taimi tonu ia e sue sue ai  i tatou e le Atua. 

Le a’u pele e, e le faamaonia i le Atua lou naunau e auauna ia te ia, pe a talafeagai ia te oe le usitai ia te ia. Ava ma usitai I le Atuai I taimi o taugalemu ai poo taimi e lē taugalemu ai, ona e maua lea o le tafe mai o ana faamanuiaga, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 4 IUNI 2025

(tusia e Pastor EA Adeboye)

Manatu Autu: Tulaga lamatia o le tautaua (The dangers of fame)

Tauloto –  1 Samuelu 15:24 “24‘Ona fai mai lea o Saulo ‘iā Samuelu, “‘Ua ‘ou agasala, auā ‘ua ‘ou tu‘umavaega i le afioga a le ALI‘I ‘atoa ma lau ‘upu; auā sa a‘u fefe i le nu‘u ma ‘ou fa‘alogo ‘iā latou ‘upu..”

Faitauga - Tusi Paia:  1 Samuelu 15:1-31

Fai mai le Faataoto 27:21 'O le ario ma le auro e tofotofoina i le afi; e tofotofoina fo‘i le lelei o le tagata i le ‘onosa‘i.'

E le tatau ona saili tagata i le tautaua ona o lona malosiaga e faaumatia. I le 1 Samuelu 9:1, sa faamatalaina le tamā o Saulo o Kiso o se tagata e le gata e tautaua ae mauoa tele. O lona uiga o Saulo o se tagata loto maualalo aua ina ua faatonu e lona tama e alu e sue mai asini ua leiloloa, na alu e aunoa ma le tomumu. E oo i le taimi o saili manu, na faalogo Saulo I fautuaga a ana auauna e saili se fesoasoani mai le tagata o le Atua i le sueina o manu (1 Samuelu 9:6-8). Ina ua avea ma tupu o Isaraelu, sa loto maualalo i tausaga e lua muamua o lana nofoaiga seia oo ina ia sailia le tauleleia i tagata. Na galo ia Saulo o le Atua na tofiaina o ia e avea ma tupu, ma ua amata ona saili ia fiafia ma talia o ia e tagata. O le taimi muamua na ia faia ai ina ua osofai mai Filisitia, ma sa faatuai ona alu atu i Kilikala. Ina ua vaai atu ua taape tagata ma o ese mai ia te ia, na ia faia se mea sa le tatau ona ia faia, o le osia lea o le taulaga mu (1 Samuelu 13:7-10). Na ia faia le mea sese ona sa naunau e fiafia ma tauleleia o ia e tagata. O se mea sese matuiā ona ua matuā le fiafia ai le Atua. Afai tatou te faataga lo tatou naunau ia talia i tatou e tagata, ma taitaiina ai i tatou e faia mea sese, ua saunia i tatou e tetee i le Atua. 

I le 1 Samuelu 15, e ui i ana mea sese muamua, na ave e le Atua ia Saulo le avanoa e salamo ai. Na ia faatonu o ia e faaumatia tagata Amaleka. Na manino le faatonuga a le Atua, ia faaumatia mea uma, aua nei faasaoina se mea (1 Samuelu 15:3). Peitai, o Saulo i lona naunau e faamalie tagata ma taua o ia o se ’tagata mo tagata’, ua ia tetee ai i faatonuga a le Atua (1 Samuelu 15:24). A tatou saili i le tautaua e sili atu i le auauna i le Atua, ua tatou pauu atu i le mailei o le fefe i tagata aua fai mai le Tusi Paia o le fefe i tagata e oo mai ai le mailei (Faataoto 29:25). 

O tagata e saili ma naunau i le tautaua latou te faamaamulu i tapulaa a le Atua e faamalie i tagata. E i’u ane lava, o nei tagata, e pei o Saulo, e le lelei le iuga aua e le faatuatuaina e le Atua se tagata e naunau ma saili ia tautaua, ma faaaoga ai mea taua a lona malo. 

Le au pele e, aua e te saili i le tauleleia e tagata. E sili atu ona e saili ia tauleleia i le Atua, ia avea lea ma sini autu e taitaia ai oe. A e matau i le Atua ma auauna ia te ia ma lou loto atoa, e na te faatulagina oe e te taitaiina mai isi tagata i le Atua. A e saili i le tautaua ma le tauoloa e sili atu i le auauna i le Atua, ua e faatulagaina lou tagata e tetee i le Atua, i le suafa o Iesu, Amene.  

OPEN HEAVENS

MATALA LE LAGI MO LE ASO LUA 3 IUNI 2025

(tusia e Pastor EA Adeboye)

Manatu Autu: Viiga, o se auupega o le taua (Praise: A weapon of war)

Tauloto –  Isaia 25:1“Le ALI‘I e, o lo‘u Atua lava oe; ‘ou te fa‘ane‘ene‘e ‘iā te oe; ‘ou te vivi‘i atu i lou suafa; auā ‘ua e faia mea e ofo ai; o mea na e pule ai talu anamua e fa‘amaoni ia, e moni lava.”

Faitauga - Tusi Paia:  2 Nofoaiga Tupu 20:1-28

O viiga o se auupega e liliuina ni tulaga ua manatu tagata ua siliga tali i seu se faamoemoe, e ‘avea ma tulaga ua olioli ai. I le tusi faitau mai le Tusi Paia o le aso, e tolu nu’u tetele na fa’asagatau mai ia Iosefatu ma le fanauga a Iuta. Sa foliga mai ua oo i se tulaga ua leai se faamoemoe, peitai sa faatonuina e le Atua ia Iosefatu e na te lafoai i tua a latou ‘au ’upega uma ae avane tagata pepese i luma o le ‘au tau ina ia vivii atu ia te ia. O le mea malie, sa fa’aumatia e le fili, a latou lava ‘autau, ae pau le mea na faia e le fanauga a Iuta, o le latou aoina, o le oloa e tele mai le autau a le tolu atunuu, na o mai  ma i latou i le taua.

Ina ua fa’afalepuipuiina Paulo ma Sila i auala lē amiotonu, sa la fa’aaogaina le ‘auupega o viiga. A o latou vivii atu i le Atua, sa to’ulu ‘ese o la filifili ma ua talaia mai faitoto’a. (Galuega 16:25-26). Ou te tatalo i le suafa e maualuga atu nai so’o se suafa, o le taimi e te fa’aaogaina ai le ‘au upega o viiga, mo so o se tulaga i lou soifua, e foliga mai ua leai se faamoemoe, o le a suia e le Atua mo lou manuia. E suia e le Atua lou faanoanoaga i le siva, ma faatumu oe i le olioli, i le suafa o Iesu.

I le Iosua 6:2-5 sa tapunia le nu’u o Ieriko ina ia puipuia ai i latou mai tagata Isara’elu, ma e pau le avanoa e tatau ona latou faia o se taua e ono faitau masina.  Peitai, sa ave e le Atua ia Iosua le ta’iala e mafai ona fa’apa’u ai le

pa a Ieriko e aunoa ma le fa’aaogaina o ni au’upega, i totonu o aso e fitu (7). Ina ua alalaga leo tele tagata ina ua maea ona ili pu e le ‘au ositaulaga, ona soloia i lalo le pa, (Iosua 6:20). A fai o loo e feagai ma se lu’itau, ae e  lei maua se tali, ma ua maea foi le tatalo ma le anapogi, e tatau loa ona e vivii I le Atua. Afai ua lē manuia ma toilalo mea uma, e lē faiaina pe toilalo le viiga. O le viiga e liliu mai ai fofoga o le Atua, aua e tietie o ia i viiga a lana fanau (Salamo 22:3). A tatou vivii i le Atua, ua tatou lafoai o tatou taua ia te ia ma o le a ia tulai mai, e tau mo i tatou. 

O viiga e faatupuina le olioli i lo tatou siomaga ma o le olioli e mafai ai ona tatou maua mai tali mo mea uma mai le vai’eli o le faaolataga (Isaia 12:3). Afai e manumalo le tiapolo e faatupu ma faatumauina se tagata i le faanoanoa, e mafai ona ia gaoia ana vavega. A’o ia Hana le loto ootia ma le oona, sa le mafai ona fanau . Peitai o le taimi na tulai ai, soloia ona fofoga ma ataata, na manatua ai lea o ia e le Atua. 

Le au pele e, o e faatalitali ea i se mea mai le Atua?O e naunau e suia lou olaga? Taofi le muimui ma le faitio ma le tau’ave o ou foliga faanoanoa. A e fa’aaogaina le ‘auupega o viiga, e manatua oe e le Atua ma fa’amanuia ia te oe, i le suafa o Iesu. A faia’ina ma toilalo mea uma, taumafai e te vivii, i le suafa o Iesu, Amene.

OPEN HEAVENS

MATALA LE LAGI MO LE ASO GAFUA 2 IUNI 2025

(tusia e Pastor EA Adeboye)

Manatu Autu: O se Pese Fou (A New Song)

Tauloto –  Salamo 40:3 “Ua tu‘uina mai e ia le pese fou i lo‘u gutu, o le vi‘iga i lo tatou Atua; e iloa ai e le to‘atele, e matata‘u fo‘i i latou ma latou fa‘atuatua i le ALI‘I.”

Faitauga - Tusi Paia:  Esoto 15:1-21

E iai se talavou ma maua sona avanoa e aoga ai i se Iunivesite i atunuu i fafo ma ua faia le fiafia a lo latou aiga. Peitai ao faia le latou fiafia, na faia se tala a se tasi o fili a lona tama e faapea, ’A alu lenei tama i fafo ma manuia, e foi mai ma faatau se taavale a lona tama. O le a ou avea iai se mea e alu ma ia e aua ai nei manuia’ ona ia faia lea o ni vai faataulaitu e sauāina ai lenei talavou. Na oo le talavou i lana aoga ma ua amata na faalogoina le tigā o lona tino. Na vaai ma suesue lelei e fomai ae ua le mafai ona iloa tonu lona ma’i. Ina ua maea le ono tausaga o le ma’i tigaina, na ia toe foi mai i Nigeria, ma ua sau i se tasi o matou polokalame na faia i se aoga. Ao ou lauga, na taia o ia i le mana o le Atua ona mou faafuasei ese lea o ona tiga. Ua amata alaga, ’Ua alu ese le tiga!’. Ua avatu ia te ia e le Atua se pese fou ma aveesea tausaga e ono o sauaga ma le tigaina, ma e mafai e le Atua ona faia foi i soo se tagata e alaga atu ia te ia i le faatuatua (Roma 10:11-13). 

I le tausaga 1994, na faia se polokalame a le Ekalesia RCCG i Lagos e taua ’O le taua o atua’. O se tasi o tama na auai mai i le polokalamane, na sau ma ni ma’i matautia se fa, o le toto maualuga, suka, fiva o le faiai ma le ma’i fatu. Na fautua e fomai e sii ma’i i fafo mo togafitiga, ma ao sauni atu e malaga, na filifili e sau muamua i se matou plokalame. Na pai ia te ia le mana o le Atua Matautia, na faamaloloina i nei ma’i uma e fa ma ua tuuina atu e le Atua ia te ia se pese fou. Fai mai le Salamo 126:1-2

1Na fa‘afoisia mai e le ALI‘I o Siona nai le tāfeaga, ‘ona tusa ai lea o i tatou ma tagata ‘ua fai a latou miti. 2‘Ona tumu ai lea o tatou gutu i le featani, ma o tatou laulaufaiva i le leo fiafia; ‘ona latou fa‘apea ane lea i nu‘u ‘ese, “‘Ua faia e le ALI‘I mea tetele mo i latou.”

O se tasi o faailoga ua suia e le Atua saisaitiaga o tagata, o latou laulaufaiva ua faatumulia i le loe fiafia. O pese fou e momoli faatasi mai ma le faasaolotoga, faaolataga ma vavega. I le faitauga o le Tusi Paia o le aso, ina ua maea ona sopoia e le fanauga a Isaraelu le sami ulaula, ma vaavaai i le maleleo o latou fili, na latou pepese i pese fou i le Atua. Na tusia e Miriama ma Mose ni pese fou, ma na pepese uma ai tagata e vivii i le Atua mo vavega matagofie. Na pese foi Tepora i se pese fou ina avatu e le Atua le manumalo iai latou mai ia Sisera ma Iapino le tupu o Kanana (Faamasino 5:1-31). O Hana leisi tagata na maua se pese fou mai le Alii ina ua maea ona fanau mai Samuelu (1 Samuelu 2:1-10). Ou te tatalo ia faatumuina e le Alii lou fofoga i pese o le olioli ma le ataata ma avatu i tagata uma o lou aiga pese fou ae lei maea lenei tausaga, i le suafa o Iesu. 

Tatalo

Le Alii e, faamolemole ia e faatumu lo’u gutu I pese fou o lou agalelei ma le alofa mutimutivale, I le suafa o Iesu, Amene.

OPEN HEAVENS

MATALA LE LAGI MO LE ASO SA 1 IUNI 2025

(tusia e Pastor EA Adeboye)

Manatu Autu: O Se Igoa Fou - A New Name. 

Tauloto –  Isaia 62:2 “E va‘ai nu‘u ‘ese i lau amiotonu, ma tupu uma latou te va‘ai i lou mamalu. E igoa fo‘i oe i le igoa fou, e ta‘ua mai e le fofoga o le ALI‘I.”

Faitauga - Tusi Paia:  Kenese 17:1-15

E toatele tagata o loo valaau i ni igoa e le’i faaigoaina ai ina ua fananau mai. E lē valaaua ai i latou pe a faatasi mai peita’i seiloga e o ese ona fa’aaogā lea e tagata o nei igoa. O nisi taimi o nei igoa e mafua mai i ni o latou uiga fa’alē lelei. Mo se fa’ata’ita’iga, I le Tusi o Mareko 10:46-52; o loo faamatala mai ai e le Tusi Paia iai tatou se tagata tauaso e igoa iā Patimaio na faapupulaina e Iesu ona mata. E o’o mai lava i aso nei o loo faaigoa pea ia e tagata o ‘Patimaio tauaso.’ O’u te lē iloa poo valaau oe e tagata i ni igoa lē manaia peita’i o’u te mautinoa e mafaia e lo’u Atua ona suia lou talaaga I le lelei ma aveese ai ia uiga faaletonu o loo faaigoa ai oe e le lalolagi, seia i’u ina o latou naunau e valaauina oe i se igoa fou. 

Soo se taimi e silasila mai ai le Atua ua faalavelave se igoa i lana polokalame i le olaga o se uso, e mafai ona Ia suia lea igoa e pei ona Ia faia iā Aperaamo. O Aperaamo sa faaigoa muamua ia Aperamo, ma e ui o lenei igoa e uiga lelei, Tamā Faaeaina, e lei atoatoa ona faamatala mai ai fuafuaga i le finagalo o le Atua mo ia. O lea na talanoa atu ai le Atua ia te ia i se tasi aso e faapea; “Ou te mana’o e fai oe ma Tamā o nuu e tele, peita’i ua faalavelave lou igoa ia te a’u i le faataunuuina o la’u polokalame, o lea o le a lē toe faaigoaina ai oe ia Aperamo ae suia iā Aperaamo aua ua o’u faia oe ma tamā o nuu e tele.” Na suia fo’i e le Atua le igoa o Sarai iā Sara aua e sili atu ona talafeagai ma le avea o ia ma tinā o nuu e tele; (Kenese 17:3-16).

A o o’u galue faiaoga i le Iunivesite o Lagos, sa i ai se alii lomitusi sa faaigoa tausua e tagata uma o ‘polofesa’ na faia se faaiuga a lenei alii na suia atoa ai lona olaga. Na fai lana tala iā te ia lava, “O a’u o se lomitusi ae faaigoa a’u e tagata uma o polofesa.” Na ia amata alu i aoga po, ma e uma ane ua ia tusia ana suega ma maua ai lona avanoa e aoga ai i le Iunivesite o Lagos. Ae o’u te le’i tuua le Iunivesite o Lagos, na o’u iloa ua amata galue le lomitusi mo lona faailoga PhD. Na fai lana faaiuga e fai le suiga moni o lona igoa ae aua ne’i toe avea o se mea ula.

Le au pele e, e mafai ona fai sau fa’aiuga e fai se amataga fou e ala i le ofoina atu o lou ola atoa mo le Atua ma ole atu ia te Ia e aveese soose igoa mataga o loo polokaina le faaalia mai o le mamalu o le Atua i lou olaga. Ou te tatalo ia liliuina e le Atua so’ose tulaga faalumaina o maitauina ai oe e tagata ma faatumu lou olaga i le olioli ma le fiafia i le suafa o Iesu.

Tatalo.

Tamā faamolemole ia e suia soo se igoa e ono ponatia le faaalia o lou mamalu i lo’u olaga I le suafa o Iesu, Amene.