Samoan Devotional

OPEN HEAVENS

MATALA LE LAGI MO LE ASO TOONAI 31 ME 2025

(tusia e Pastor EA Adeboye)

Manatu Autu: Lafoai mea uma (Surrender all)

Tauloto –  Mataio 19:29 “Ai sē tasi ‘ua ia tu‘ua o fale, po o uso, po o tuafafine, po o le tamā, po o le tinā, po le avā, po o le fānau, po o fanua ‘ona o lo‘u igoa, e maua e ia e ta‘isautuaselau, e fai fo‘i mōna tofi le ola fa‘avavau”

Faitauga - Tusi Paia:  1 Tupu 19:19-21

Ina ua alu atu Elia i le faatoaga a Elisaia ma lafo lona ofu tele i luga ia te ia, e le’i fa’atuai ona tuua e Elisaia o mea uma ae talia le valaau a le Atua. O Elisaia e foliga mai o se tagata tamāoaiga aua na fetaui ma Elia o ia suatia le eleele ma povi e ta’i lua e sefulu ma le lua na muamua ia te ia. Peita’i e le’i i ai se tāua iā Elisaia o nei mea uma auā na ia toe fo’i i lona āiga ua ia ave fo’i o povi e lua, ma ia fasia ma avatu i le nuu ua latou aai ai, ona tula’i lea o ia ma mulimuli atu iā Elia, ua ia auauna fo’i ia te ia. I totonu o le aso e tasi, na avea ai le pule o se faatoaga uluola ma auauna a se perofeta.

Na auauna atu Elisaia iā Elia ma na iloa o ia o lē na liligi le vai i lima o Elia (2 Tupu 3:11). O manuia na maua e Elisaia ona o lona tuua o mea uma ae auauna i le Atua, e lē ma fuatiaina. Na ia maua se faaluaina o le fa’au’uga o Elia (2 Tupu 2:9-15), avea ma tamā o le tupu (2 Tupu 6:21), ma e o’o ina ua maliu ma tanu fo’i ia te ia, o ona ponaivi na toe ola ai se tagata na maliu (2 Tupu 13;21). A lafoa’i e le tagata me uma i lē na faia ia, o le a avea lona ola ma aafiaga lelei mo le toatele.

Mai le tala iā Elisaia, ua tatou vaaia ai o le taunuuga lelei e afua mai i le tuuina atu atoatoa. So’ose fatu o le a faitaulia ma aogā , e tatau ona alu ifo i le palapala ma mate. E tatau ona tuuina atu lona lalelei ma lona malosi ia pala i le eleele ona tupu mai ai lea o se ola fou mai iā te ia.

Na fetalai Iesu i le Tusi a Ioane 12:24-25 e faapea; E moni, e moni, ‘ou te fai atu ‘iā te ‘outou, ‘Āfai e pa‘ū le fua o le saito i le ‘ele‘ele ma pala ai, e tumau pea o le mea e tasi; ‘ae ‘āfai e pala, ‘ona fua tele mai ai lea. O lē fa‘apelepele i lona ola, e fa‘amaumau e ia i ai; a o lē ‘ino‘ino i lona ola i lenei lalolagi, e maua ai pea e ia e o‘o i le ola fa‘avavau.

Le au pele e, lafoa’i mea uma i lē na faia oe ona Ia ta’ita’ia lea o oe i le ala sa’o. A e ofoina atu lou ola i le Atua, ua e fai atu ia te Ia e fesoasoani iā te oe auā e te lē iloa le ala e silisili ona lelei mo oe. I le Ioane 15:5 na fetalai Iesu, “ A aunoa ma a’u e lē mafaia e outou ona fai o se mea e tasi.” Na iloa fo’i e Paulo le mea lilo i le ofoina atu atoa, ma o le mafuaaga lea na faapea mai ai; “Ou te mafaia mea uma lava ona o Keriso ua faamalosi mai ia te a’u,” (Filipi 4;13).

O i latou o e ofoina atu mea uma iā Iesu latou te toe maua mai mea e tele i le i’uga. A o i latou e taofia se vaega o latou olaga pei o Anania ma Safaira i le tusi o Galuega 5:1-2 e i’u i le leiloa o mea e sili atu na i loo mea ua o latou taumafai e taofi.

Tatalo

Tamā faamolemole fesoasoani mai ia ou iloa ma mafaia ona lafoa’i atu mea uma lava ia te oe ma lo’u loto atoa, I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 30 ME 2025

(tusia e Pastor EA Adeboye)

Manatu Autu: Aua e te tuulafoai iai(Don’t let go)

Tauloto –  Luka 11:9 “Ou te fai atu fo‘i a‘u ‘iā te ‘outou: ‘Ia ‘outou ole atu, ‘ona foa‘iina mai ai lea ‘iā te ‘outou; ‘ia ‘outou sā‘ili, ‘ona ‘outou maua ai lea; ‘ia ‘outou tu‘itu‘i atu, ‘ona tōina mai ai lea ‘iā te ‘outou.”

Faitauga - Tusi Paia:  Luka 11:5-10

I le Mareko 10:46-52, na alaga atu ma le leo tele Patimaio e faifaipea seia oo ina liliu atu Iesu ia te ia. Ana le alaga faifaipea Patimaio, semanu e na te lē mauaina lana vavega. I le Kenese 32:24-28 ina ua faapea atu le agelu ia Iakopo, “Tu‘u mai ia o a‘u ‘oute alu.” A ‘ua tali atu ia, “Ou te lē tu‘uina atu lava oe se‘ia e fa‘amanuia mai ‘iā te a‘u.”

Le au pele e, ia taofi mau pea I le Atua seia maua lau vavega. Na ia fetalai i le Isaia 62:6-7 ia aua ne‘i tu‘u atu ‘iā te ia ‘ia filemū, se‘ia fa‘amauina e ia, oe e fai ma vi‘iga i le lalolagi. E toatele e lē maua a latou vavega ona e fiu ma vave ona tuulafoai iai. Peitai o tagata latou te iloa ona tuitui pea I faitotoa o le lagi e maua lava a latou tali. Na faamatala e Iesu le faataoto i le fafine ua oti lana tane e lei taofia lona finau pea mo le faamasinoga tonu i le Luka 18:2-5. E na te lei tuua le avanoa i le faamasino e malolo ai seia maea ona ia silasila i lana mataupu. E ui e lē matau i le Atua poo tagata lea faamasino, o le finau pea o le fafine ua oti lana tane na faaosofia ai o ia e fesoasoani ia te ia. I le faitauga o le Tusi Paia o le asō, na faamatala foi e Iesu seisi faataoto o se tagata na alu atu i le fale o lana uo i le tulua o po ma ao e sue falaoa e talimalo ai. Na fetalai Iesu e ui e ono le manao lana uo e tulai mai i le leva o le po, e na te tali mai lava e avatu se falaoa e pei ona manaomia ona o lona finau atu pea. 

O soo se faafitauli o loo e ui ai I le olaga nei, e iai le taimi e muta ai pe afai e te le fiu. Afai e te tuitui atu pea, e oo lava ina tatala mai le faitotoa. O tagata loto vaivai ma fiu gofie, e le mafai ona latou maua se mea lelei i le olaga nei. O ia tagata latou te faamaamulu, e ui ua latou lata ina maua le manuia. O i latou e le taitai ona faamaamulu, o i latou o tagata saili, filiga ma le finafinau. O nisi o i latou e finau i le po atoa I le tatalo ma tuitui pea i faitotoa o le lagi seia latou maua le tali. Ia finafinau, aua e te musua e tatalo seia e maua le tali e pei o Tanielu (Tanielu 10:2-14), Iakopo (Kenese 32:24-28), Elia (1 Tupu 18:42-45) ma le fafine ua oti lana tane i le faataoto a Iesu (Luka 18:2-5). 

Le au pele e, e mafai ona faatupuina lou malosi i le fafagaina o lou agaga i le upu a le Atua ma faatalitali ia te ia i le nofoaga o tatalo. Aua e te faatagaina le fili e faatoilaloina oe ae ua e lata i le maua o lou manuia, ia taofi mau i folafolaga a le Atua. Aua e te talia le tali o le leai mo oe, e te maua lava lau vavega pe afai e te finau pea i le tatalo e pei o le fafine i le Mataio 15:21-28. 

E te fia maua faamanuiaga e pei o Iakopo po’o le faamasinoga tonu e pei o le fafine ua oti lana tane i le Luka 18:2-5? Aua e te tuulafoai i le finau atu. Tuitui pea ma finau atu seia e maua le tali. O i latou e tuitui pea ma ole atu, e latou te maua lava vavega i le suafa o Iesu, Amene.

OPEN HEAVENS

MATALA LE LAGI MO LE ASO TOFI 29 ME 2025

(tusia e Pastor EA Adeboye)

Manatu Autu: Faatalitali i le Atua (Waiting on  God)

Tauloto –  Salamo 27:14 “Inā fa‘alagolago atu ia i le ALI‘I, ‘inā loto tele ia, e fa‘amalosia fo‘i e ia lou loto; ‘inā fa‘alagolago ia i le ALI‘I.”

Faitauga - Tusi Paia:  Salamo 37:4-7

I le Kenese 18:2-8, ina ua maea ona laulau ane e Aperaamo taumafa mo agelu na asiasi ane i lona maota, na tu ma vaavaai lelei i latou a’o aai. E ui ina tau iloa atu e Aperaamo  e mamalu ma mamana nei tagata, e lei taumafai e faamamafa ma faalavelave iai latou, I le ta’uina lea iai o lona faafitauli, o le leai o se fanau. Sa ia na o le talimalo ma avatu mea uma na latou mana’omia ma faatalitali iai latou mo se isi fesoasoani e ono manaomia. O ituaiga tagata faapenei, e faia e le Atua mea uma e fesoasoani iai latou, – o se tagata e faatalitali i le Atua, ma naunau e faia soo se mea o manaomia e lona Alii. O lo’o sailia le Atua I tagata tapuai ma le faamaoni, e mafai ona mafuta vavalalata, e aunoa ma le faatopetope ona lau atu manaoga. (Ioane 4:23-24). Po’o faapea lou tagata tapuai?

I lenei olaga, e faʻatali tagata mo mea eseese i taimi eseese, e pei o le faʻatali i le ofisa o le fomaʻi mo faatalatalanoaga, poo le faʻatalitali i auala tele vavave mo itula. Peitai, o le toʻatele o Kerisiano, e lē afaina le faatalitali mo se taimi umi i ia vaega o le olaga,  peitai e vave ona ō ese ma le mamalu o le Atua ina ua maea ona mafuta ai na o ni nai minute.  

I le Salamo 100: 4, fai mai le Tusi Paia, e tatau ona e alu atu i le mamalu o le Atua ma le faafetai ma le viiga. I nisi faaupuga, tusa lava pe tele naua ou manaʻoga, e le tatau ona e alu atu i le Atua e faitio ona o na faafitauli, ae tau o le alu atu ia te ia e faamuamua le faʻafetai, faamanu ma viʻiga. E tatau ona e iloa, o loo e I luma o le mamalu o le tupu o tupu; ma o loo e I lalo o lona alofa mutimutivale. E tatau ona sailia mea uma e finagalo ai o ia, ma ave i ai le faamuamua. O le a se mea e finagalo i ai le Atua? E fiafia o ia i viiga (Salamo 22: 3) ma le faafetai (Salamo 100: 4). E faʻapea foʻi ona ia faamanuia i tagata e tatalo mo isi tagata (Esekielu 22:30), ma e finagalo e manumaloina agaga o tagata (Ioane 15:16). A e avatua ia te ia nei mea uma, o lea ia faafiafia ia te oe ia e ataata.

O le faatalitali i le Alii, o le mealilo lea e te maua ai tali I se taimi vave faapea ma vavega. A e alu i se faleʻaiga, o se tagata faigaluega lelei e le tuʻuina atu ia te oe taumafa e fiafia iai o ia, ae, e faʻatalitali ia te oe poo le a le mea e te manao ai, ona gaioioi lea e momoli atu i se taimi vave ma faia uma feau e te manaʻo ai. 

Le au pele, ua e taumafai ea e saili po o a ni mea e finagalo i ai lo tatou Atua? A e tatalo ia te ia, o e avatu ea meaai e fiafia iai o ia pe na o le lafoai atu o ou manaoga ia te ia? O loo saili le Atua ini auauna e naunau e faia lona finagalo, ma a ia maua ia tagata, e na te faia mea uma e faamalieina ai i latou. E siitia i le maila le mamao e afio iai le Atua e faamanuia iai latou e faatalitali ia te ia, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 28 ME 2025

(tusia e Pastor EA Adeboye)

Manatu Autu: Tatalo mo le fanau (Prayers for children)

Tauloto –  Isaia 49:25 “Auā o lo‘o fa‘apea ‘ona fetalai mai o le ALI‘I, E faoa lava le tāfeaga a lē ‘ua malosi, e lavea‘iina fo‘i le vete a lē mata‘utia; ‘Ou te finau atu fo‘i a‘u i ē ‘ua finau atu ‘iā te oe, ‘ou te fa‘aolaina fo‘i au tama.”

Faitauga - Tusi Paia:  Isaia 8:17-18

Tatalo

1. Faafetai le Atua e, mo fanau uma I lo’u siomaga. Faafetai Tamā mo le alofa tunoa ua e foai i latou matua e tausia ai i latou.  
2. Tamā ou te tuuina atu fanau uma i lo’u siomaga i lau tausiga. Faamolemole ia siomia fanau uma I lo’u siomaga e au agelu ma puipui iai latou mai soo se mea e lamatia ai.
3. Tamā, faamolemole fesoasoani i fanau uma I lo’u siomaga ia latou maua se feiloaiga faapitoa ma Lau afio ina ia osia ai ni mafutaga mafanafana ma oe e pei o Samuelu.
4. Tamā, faamolemole ia faamanuia i tamaiti uma i lo’u siomaga ia maua le agaga o le lelei atoatoa e pei ona e faia mo Tanielu, i le suafa o Iesu. 
5. Tamā, faamolemole faamanuia i tamaiti uma i lo’u siomaga ma foai iai latou le poto ma le meaalofa e iloa ma malamalama ai e sili atu io latou tupulaga ina ia latou faia faaiuga e ō gatasi ma lou finagalo. 
6. Tamā, ou te tuuina atu le soifua maloloina lelei o fanau uma I lo’u siomaga I ou aao, faamolemole avatu le malosi i le tino, mafaufau ma le agaga. Faamolemole ia faamanuia iai latou i le soifua manuia mai ia te oe, i le suafa o Iesu. 
7. Tamā, faamolemole ia siomia tamaiti uma i lo’u siomaga e uo amio lelei e faaosofia i latou e faia mea lelei ma maoae e maualuga ai le viiga o lou suafa paia. 
8. Tamā, faamolemole foai i fanau uma i lo’u siomaga le loto toa ma le malosi e manumalo ai i luitau e oo atu i o latou ala, i le suafa o Iesu. 
9. Tamā, faamolemole fesoasoani i tamaiti uma i lo’u siomaga ina ia ausia faamoemoega manuia o latou olaga i le suafa o Iesu. 
10. Tamā, faamolemole ia tauave e tamaiti uma I lo’u siomaga lou mamalu ma  ia avea i latou ma faamanuiaga i tagata uma o latalata iai latou, i le suafa o Iesu. 
11. Tamā, faamolemole foai ni fanau amio Atua ma soifua maloloina lelei i ulugalii uma i lo’u siomaga o loo faamoemoe atu ia te oe mo ni fanau. Ia aua nei iai seisi i lo’u siomaga e pā, i le suafa o Iesu. 
12. Tamā, Ia e faamanuia i fanau uma i lo’u aiga ma le Ekalesia. Ia foai le poto ma le agaga e galulue faamaoni ma le filigā e tautua ai ia te oe, aua se manuia lautele o tagata ma le atunuu, i le suafa o Iesu e tatalo atu ai nei, Amene. 

OPEN HEAVENS

MATALA LE LAGI MO LE ASO LUA 27 ME 2025

(tusia e Pastor EA Adeboye)

Manatu Autu: Vaai lelei Lau fanau (Take charge of your children)

Tauloto –  Faataoto 22:6 “A‘oa‘o ia i le tama e tusa ma lona ala; a o‘o ‘ina toeaina lava o ia, e le te‘a ‘ese ai.”

Faitauga - Tusi Paia:  Teuteronome 6:1-7

 Ina ua faapea mai Farao, “Ou te le tuua Isaraelu e ō”, sa lei talanoa mai e taofia i se nofoaga, sa talanoa mai i se isi ituaiga faapologaina (Esoto 5:2). O tagata e faapologaina i le tulaga o loo talanoa mai ai Farao, e oo  i a latou fanau e le mafai ona latou vaaia ma pulea lelei (Esoto 1:1-22).

Afai e faatonu mai e le malo o se atunuu, e lē mafai e matua ona faatonu ma aoaoina a latou fanau i ala o le Alii, e tatau ona latou silafia lelei, e iai se faufauga amioleaga o lo’o i tua atu. O se tulaga pologa ma le saisaitia ma e le tatau ona fa’atagaina e soifua ai. E le tatau i matua ona faalagolago i se malo e a’oa’oina a latou fanau. Ae tatau ona tau solomua ona a’oa’o le malo i taiala mai le Upu a le Atua. Afai e finau pea le malo ma fa’asaina ona a’oa’oina e matua a latou fanau i le Upu moni, e tatau ona o ese mai i lena nofoaga ae o atu ise isi nofoaga e lē pologa ai.

E tatau i matua ona latou sa’ilia po’o a mataupu o a’oa’oina ai a latou fanau i le a’oga, ia mautinoa e le o aafia i aoaoga e tetee i le finagalo o le Atua. E tatau foi ona suesue taaloga i masini ma ata komi o lo’o matamata ai le fanau, aua e mafai ona tauala mai ai mea leaga e a’afia ai o latou mafaufau. A fai e te vaaia ma pulea lelei tamaiti ma talavou i lou siomaga, o le a faigata ona aafia i latou e ni fuafuaga amioleaga. Afai o oe o se matua, e tatau ona e fa’atulagaina taimi e te a’oa’oina ai lau fanau i ala o le Atua, ina ia latou iloa ma vavalalata ma le Atua a’o tuputupu a’e. Tuu iai le avanoa e mafuta ai ma isi tagata fa’atuatua, ma faia mea uma e fesosoani ia tutupu ae  ma matutua o ni tagata o le Atua. 

Ina ua matou siitia e nonofo i le Redemption City ma lo’u aiga, sa mamao le mea e a’o’oga ai la’u fanau, latou te usu i le a’oga ae le’i taina le 6 ile taeao ina ia aua ne’i tuai i le a’oga. Ina ia maua se matou mafutaga ma le fanau, sa matou a’ai faatasi i totonu o le matou ta’avale, pe a foi mai i le a’oga. Ao tuputupu ae, sa ou alu ma ave i matou talaiga o le Tala Lelei. E oo i le taimi ua oo i le Iunivesite, so’o se taimi ou te asia ai, ou te faamautinoaina e maua lelei se taimi matou te mafuta ai. Sa matou savalivali ma talanoa i le Tusi Pa’ia, ma ou ta’ita’ia i latou i poloaiga a le Atua.

Matua e, ia outou  vaaia ma pulea lelei a outou fanau, ‘aua nei faatagaina le ti’apolo e manumalo ia i latou. O le a faamasinoina oe e le Atua i le fanau ua ia foa’iina atu, e pei ona ia faia ia Eli(1 Samuelu 2: 27-31).

Tulai mai, ma tau’ave le matafāioi o le tausia ma le a’oa’oina lelei o le fanau i ala o le Atua. ‘Aua ne’i tu’ulafoa’ina lau fanau i le ti’apolo i lou toilalo i ni taitaiga a le malo ma le aganuu, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 26 ME 2025

(tusia e Pastor EA Adeboye)

Manatu Autu: Malosiaga o le galue malosi ma le filigā (The power of diligence)

Tauloto –  Faataoto 10:4  “E mativa lē ‘ua galue ma le lima vaivai; a o ē lima malosi e mau‘oa i latou.”

Faitauga - Tusi Paia:  Mataio 25:14-30

Fai mai le Faataoto 22:29 “Ua e iloa le tagata ‘ua fa‘ata‘alise i ana galuega? E tu o ia i luma o tupu, ‘ae lē tu i luma o tagatanu‘u.”. O le galue malosi ma le filigā, o lona uiga o le faia o mea tonu e ausia ai se taunuuga i le lelei atoatoa, i le taimi vave ma ia faifaipea. I le Mareko 10:46-52, na ole atu Patimaio e lē faatasi, ae na tagi ma ole atu e faifaipea seia oo ina tali atu Iesu ia te ia. E faapena foi le fafine puna toto, na taumafai ma tulei atu pea seia pa’i atu ia Iesu (Luka 8:43-48). Afai e te manuia I soo se mea i le olaga nei, e tatau ona e galue malosi ma le filigā i le manumalo tusa poo ā luitau. 

E iai se vaitau na ou tuuina atu ai se galuega e faia e se tagata i le amataga o le tausaga, ma sa ou fuafua e tuuina iai seisi galuega pe a maea lea galuega. Sa tatau ona ia faataunuuina le galuega i totonu  o le tolu masina, peitai e oo atu ia Setema, o loo taumafai lava e faauma, ma e mautinoa ou te lē toe tuuina ia te ia seisi galuega. Sa tatala e le Atua le faitotoa o faamanuiaga tau tupe ia te ia, peitai sa lē galue malosi ma le filigā. 

I le faitauga o le Tusi Paia o le asō, na faamatala e Iesu le faataoto i auauna e toatolu na maua taleni mai lo latou matai. O le toalua sa galulue malosi ma le filigā, ma e faaluaina lo la taui. Ina ua taliu mai lo la matai, na ia tauleleia nei auauna e toalua ma tauia lelei. Na ia faapea atu, “Ua lelei ia, le ‘au‘auna lelei e, ma le fa‘amaoni, ‘ua e fa‘amaoni i mea itiiti, ‘ou te tofia oe e pule i mea e tele; ‘inā ulufale mai ia i le fiafia o lou ali‘i.” Mataio‬ ‭25‬:‭23‬ ‭

I le faataoto lava e tasi, o loo e vaai ai i le taui o le paie. O le auauna ma le taleni e tasi, na ia tanumia ma musu e fefaatauai. O le taui o le lē galue filigā, e le gata na aveesea le taleni ae na faanoanoa mo le olaga atoa. O le auauna galue malosi ma le filigā e le gata na amata i le lima taleni ae na faaiuina i le sefulutasi taleni, ao le auauna paie, na iu i le faanoanoaga. Na fetalai Iesu, “Auā o lē ‘ua i ai mea, e foa‘iina atu ‘iā te ia, e atili tele ai ana mea, a o sē lē i ai mea, e ‘ave‘eseina fo‘i ‘iā te ia le mea ‘ua ‘iā te ia.”Mataio‬ 13‬:‭12‬ ‭. O soo se tasi e galue malosi ma le filigā, e faaopoopoina iai mea, ao i latou e paie, e iu ina avesseina mea o loo i o latou lima. 

Le au pele e, o le galue malosi ma le filigā, e faatulagaina ai oe ia maoae ma faulai i manuia. O soo se mea e te faia e tusa ma le finagalo o le Atua, ia faia ma le filigā i lou malosi atoa. Aua le faatuai, aua le musuā ona o luitau ma faafitauli. Ia e filigā i mea uma e te faia. Ou te tatalo ia tauia e le Atua lou galue malosi ma le filigā, i le suafa o Iesu, Amene. 

OPEN HEAVENS

MATALA LE LAGI MO LE ASO SA 25 ME 2025

(tusia e Pastor EA Adeboye)

Manatu Autu: E i ai lava le auala (There is always a way)

Tauloto –  Mareko 9:23  “Ona fetalai atu lea o Iesu ‘iā te ia, “‘Ai se mea ‘e te mafaia. Auā e mafaia mea uma lava i lē fa‘atuatua.”

Faitauga - Tusi Paia:  Luka 8:43-48

Ou te lē talitonu e i ai se mea e lē mafai ona fai. O le mafuaaga lenā afai ou te fai i se isi e fai se galuega ae fai mai e faigatā tele e lē mafai ona fai, o le taimi lava lea ou te fai ai i se isi tagata e tago e fai.

A’o matou fausia le aai o le Togiola, sa faapea mai nisi e lē mafai ona fau se fale i ni aso se fitu, peita’i na mafai ona fai. Na o latou fai mai fo’i, o le a vave pa’ū ma malepe le fale, peita’i ua silia nei ma le fasefulu tausaga o fa’aaogā pea le fale. Ona fai mai lea o se fale fogāfaletasi auā o fale e tele fogāfale e ta’i fia masina o fai. Peita’i na o matou fausia se fale fogāfale lua i totonu o le sefulu valu aso. Ona fa’aauau lea ona o latou fai mai toeitiiti paū ma malepe le fale, a o lea ua silia ma le tolusefulu tausaga mulimuliane o loo tu pea le fale. I tulaga faapea, o le gaioiga na o matou faia, o le su’e o se auala e faatele ai itula faigaluega. Sa galulue le ‘au kamuta i le ao ma le po. O le auala lenā na mafai ai ona fai i le aso e tasi galuega o aso e lua. Fa’atasi ma le fesoasoani a Agaga Paia na faataunuuina ma le manuia, o le galuega lea ou te faaigoaina, o inisinia fa’alelagi. Tusa poo le a le foliga faigata o se mea, e lē mafai ona fai, afai e ‘au fa’atasi oe ma Agaga Paia ma e te talitonu ma galue punoua’i e fai, e i ai lava le auala.

I le tele o tausaga ua mavae, sa ou malaga ai i se atunuu mamao ou te lauga i se sauniga a Agaga Paia. O le nofoaga sa fa’aaogā mo le sauniga o se fale totogi, o lona uiga ina ia i ai se fale o’u te nofo ai ma tatalo a’o lei amatalia le sauniga, e tatau ona o latou aumaia se fale e fai ona uili. A o o’u tuua le fale o’u te agai atu mo la’u lauga, ma o loo taumafai fo’i le alii leoleo e fa’aavanoa le auala mo a’u, sa tamo’e atu i totonu o le fale fai uili se fafine ua tele tausaga e lē maua sana pepe(tulou) ma saofa’i i luga o le nofoa sa ou nofo ai. Na tuliloa atu e le alii leoleo le fafine ma aumai faavave I fafo mai le fale; a e le’i popole i ai le fafine aua ua talitonu lona loto ua ia maua le vavega sa ia sailia. Sa i ai lona faatuatua e avatu e le Atua ia te ia se tamaititi e ala i se vavega pe a tau lava o lona saofa’i i le nofoa o le fale o loo nofo ai lana auauna, ma na faamanuiaina le fafine i le masina lava lea.

O le fafine ma’i punatoto o loo tāua I le faitauga mai le Tusi Paia o le asō sa finau malosi e ui i faafitauli uma na faalavelave i lona pa’i atu i le pito o le ofu o Iesu. O nisi taimi, e te lua fesaga’i ma faafitauli o le soifuaga; peita’i e ao ona e iloa ma silafia, a lua ‘au faatasi ma le Atua, e leai se mea e lē mafaia. Faamoemoe ma faatuatua ia te Ia ma aua e te faavaivai, aua e Na te saunia le ala. A iai le Atua, e iai lava le auala, I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 24 ME 2025

(tusia e Pastor EA Adeboye)

Manatu Autu: Faafoeina o Avanoa (Handling Opportunities)

Tauloto – Failauga 9:11 ‘Ua ‘ou toe iloa fo‘i i lalo o le lā ‘ua lē sini i le tausinioga ē ‘ua tele vavave, ‘ua lē mālō i le tau‘a ē ‘ua malosi, ‘ua lē i ai fo‘i i ē ‘ua popoto le mea e ‘ai, ‘ua lē i ai i ē ‘ua fa‘autauta le ‘oloa tele, ‘ua lē i ai fo‘i i ē ‘ua atamamai le alofaina mai; a o le tausaga ma le mea e tupu ai e o‘o ‘iā te i latou uma.

Faitauga - Tusi Paia: Failauga 9:10-11

O le tusitala sa ou tā’ua I le lesona o ananafi, o ia fo’i lea na fai mai, “O le olaga o se avanoa; tago e pu’e mau.” Ou te ‘au ai fo’i i lea manatu. E moni lava o le olaga o se avanoa ma e tatau ona e tago e pu’e lima lua.

Sa ou a’oa’oina se solo i le tausaga 1957 e faapea;

“E i ai se tai i le olaga o le tagata, a talia i le lolo, e taunuu atu i le manuia; a lē talia, o faigamalaga uma i o latou olaga o le a noatia i le tai papa’u ma le puapuaga.”

O le uiga o le solo ua tā’ua i luga e faapea; a talia e tagata avanoa ma fa’aaogā lelei e siitia o latou tulaga; peita’i afai latou te teena e ono lē toe maua. Talitonu mai ia te a’u, o le Atua e tu’u avanoa tutusa i tagata uma. O le a ia avatu ia te oe i le taimi e finagalo ai ni avanoa e te mana’omia e faataunuuina ai lou tulaga. O laasaga o totoe o lou soifua o le a faalagolago i lou fa’aaogaina o avanoa ua Ia tuuina atu ia te oe. Fai mai le fuaiupu tauloto o le asō, o taimi ma avanoa e o’o i tagata uma. O tagata uma lava, o le a i ai o latou taimi ma avanoa, peita’i o nisi latou te lē pu’ea ma fa’aaogā avanoa.

A pologa nisi tagata aemaise i latou ua matutua soifua, e masani ona fa’apogai mai i lo latou lē fa’aaogaina lelei o latou taimi ma avanoa a o laiti. Toatele tagata e lē mafai fo’i ona o latou iloa se avanoa pe a o’o mai. O le mafuaaga lea e tatau ai ona e mataala fa’aleagaga. Silasila fa’ale mafaufau pe faapenei o fea o o’u i ai pe ana ou lē fa’aaogaina le avanoa o lo’u auai I le ekalesia RCCG, pe ou te alu ese fo’i ma le ekalesia I sina fa’aosoosoga itiiti lava. O lenā taimi ailoga ou te iloaina, ma semanū ou te alu ese mai lo’u manuia.

O tagata e feita gofie e masani ona misi o latou avanoa auā o avanoa o isi taimi e omai o loo afīfī mai i totonu o puapuaga. Mo Samuelu o lona avanoa na maua i totonu o le fale o Eli ma ona atalii faalogogatā. A na ita ma musu Samuelu auā sa na o ia o se tamaititi ma fai i lona tinā ua toe fia fo’i atu i lo latou āiga, semanū e misi lona avanoa e avea ai ma perofeta a le Alii, ua lē mafai ia te ia ona i’uvale sina ana upu (1 Samuelu 3:19). Mo Tavita l, o lona avanoa na maua ina ua usita’i i le fa’atonuga a lona tamā e alu e ave meaai a ona uso sa i le togalauapi (1 Samuelu 17:14-20). O’u te tatalo ia e lagonaina ou avanoa uma ma fa’aaogā lelei i latou, i le suafa o Iesu.

Tatalo

Tamā, fesoasoani mai ia te a’u ia ou iloa avanoa uma ua e aumaia ia te a’u ma faamolemole ia faamalosia a’u e faaaogaina lelei, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 23 ME 2025

(tusia e Pastor EA Adeboye)

Manatu Autu: O le olaga o se luitai (Life is a challenge) 

Tauloto – Faataoto 12:24 ‘E manumālō lima o ē filigā i galuega; a o lē paiē, e fai taulaga o ia.

Faitauga - Tusi Paia: Failauga 12:1-7

E iai se tusitala ua faapea mai, “O le olaga o se luitau; ia faafetauia” E mafai ona ou faaopoopo iai e faapea, “ia e sili atu I le luitau”. O nei aso, o le toatele o talavou ua saili I se olaga e filemu, e leai se olaga e filemu. A’o ou aoga i le tulagalua, na aoaoina a’u e lo’u faiaoga e faapea mai, o soo se tagata lava, na sau ma aumai sona aluga i le lalolagi nei, ma e tatau ona faaaoga ae lei tuua. Afai e le faaaogaina le aluga a’o talavou, e mautinoa e latou te faaaogaina pe a matutua. Fai mai le faiaoga, o lea aluga o luitau. 

Afai e filifili e talavou e tuuese fiafiaga ae ui i luitau e pei o le toaga e fai meaaoga, galue malosi ma fuafua lelei tagata e mafuta iai ao talavou, e fiafia i latou pe a oo ina matutua. Peitai, a filifili e na o le pati ma faaalu vale le taimi ao talavou, e oo atu ina matutua, a lē nofo toatasi, e galue faifaipea ina ia mafai ona ai. O le mea na faaigoa e lo’u faiaoga o le aluga, o loo faaigoaina e le Tusi Paia o le ’amo’ i le Failauga 3:27 e faapea 'E lelei i le tagata ‘ina ‘ia tau‘ave e ia le amo ‘ina o taule‘ale‘a. '

Ia maitau mai, e le o faapea mai le Tusi Paia ‘o se amo’, ae ‘o le amo’. I nisi faaupuga, e iai le amo a so’o se tagata, ma e lelei i le tagata ona tauave lana amo a’o talavou. O tagata e latou te le mananao e tauave latou amo I le talavou, e paie. E iai nisi tagata na fananau mai I aiga o tupu, peitai e le mafai ona latou maua avanoa e pulea ma taitaia se atunuu pe a paie. O ai la e agavaa e pule? O soo se tagata e manao e pule, e tatau ona saunia e galue malosi. O I latou e fia maua le tulaga pule e tatau ona saunia e tauave le amo i lo latou talavou. Afai e te manao e ola I se olaga filemu i lou talavou, e le o saunia lou tagata e pule. O le pule ma le taitai, o se galuega fita ma e na o latou e galue filiga e pule, ma o loo faamaonia mai I le upu tauloto mai le Tusi Paia o le aso. E leai se auala faigofie i le manuia, o le tulaga moni, e le faapea na e fanau mai i se aiga manuia, ona faamautinoa ai lea e te manuia i le olaga nei. 

Afai o oe o se talavou ma e naunau e nofo tupu i le olaga nei, alo ese ma le paie. Ia e manatua pea Le na faia oe i le taimi o le talavou ae lei oo mai aso faigata (Failauga 12:1). E te le pule I lou ola, tauave lou satauro ma mulimuli ia Iesu ina ia e manuia I aso uma o lou ola. O I latou e pule ma nofo tupu i le olaga nei o I latou e galulue ma le filiga, i le suafa o Iesu, Amene.  

OPEN HEAVENS

MATALA LE LAGI MO LE ASO TOFI 22 ME 2025

(tusia e Pastor EA Adeboye)

Manatu Autu: Mai le faalogo i le maua o vavega (From hearing to experiencing miracles)

Tauloto –  1 Ioane 1:1  “O le mea sa iai talu le amataga, na matou fa‘alogologo i ai, na matou va‘ava‘ai atu i ai o matou mata, na matou matamata ai, na tagotago fo‘i o matou lima i le ‘Upu o le ola.”

Faitauga - Tusi Paia:  Mareko 5:25-34

E leai se mea e faatusa i ai le avea ma molimau, faapea le maua o tautinoga. A e faitau i vavega tetele i le Tusi Paia, pe faʻalogo foi i molimau i mea tetele ua faia e le Atua mo ona tagata, e te ono lē malamalama atoatoa i lona matautia. Peitaʻi, e le tupu lena tulaga ia te oe, pe afai na e ui ma maua se vavega mai le Atua. 

Ae leʻi o’o atu tagata Isaraelu e asiasi faalilolilo i Ieriko e pei ona taua i le Iosua 2:1-23, fai mai na faʻalogo Raava i vavega matautia na faia e le Atua. E lei vaai i nei vavega, ae na talitonu i iai, ma o lona faʻatuatua na ia maua ai nisi o vavega a le Atua. A e faʻalogologo i molimau pe faitau i mea na faia e le Atua I le Tusi Paia, ia faaaoga e faatupuina lou faʻatuatua. O le faatuatua e tupu mai tautinoga na e faalogo iai, e fesoasoani tele ia te oe, e te maua ai  vavega, e pei o le tinā o loo taua i le faitauga o le Tusi Paia o le asō, na faalogo i faamatalaga ia Iesu (Mareko 5:27).

Na faigata ona ou talitonu i faamalologa o le tino i lo’u faatoa faaolaina. I nā aso, oo te ma’i lava i le malaria ma sa inu faifaipea fualaau. E iai se aso na ou vaai ai i se toeaina e masani ona savali faanounou, ua savali e sa’o lelei le patua i totonu o le falesa. Na ou naunau e fia iloa poo le a le mea na tupu ia te ia, a’o faasoa ma faia le tautinoga, fai mai sa alu e talai le Talalelei e pei ona masani ai, ae amata ona faifai ia te ia  se tagata mai lona pitonuu. Na fai mai lea tagata, afai e mamana lona Atua, ua leva na tatau ona ia faamaloloina o ia. Ina ua faalogo iai lenei tamā matua, fai mai na oso lona ita ma tu sa’o loa. Na ia taua e ui na ia faalogo atu i le matuā tigā o lona tua, na tū sa’o ona e lē fia faalogo o ula mai se tasi i lona Atua. Fai mai e oo atu i le fale, ua matuā lē toe iai se tigā. Ina ua ou faʻalogo i lenei molimau, na faatupuina loʻu faatuatua ma ou iloa ai, e mafai ona maua le soifua maloloina lelei mai le Atua. Na ou faatagaina Iesu e avea ma aʻu fomaʻi, ma o lona alofa tunoa, e oo mai i le taimi lenei, ou te le o toe inu fualaau o le malaria. Na ou maua se vavega ona na tupu loʻu faatuatua, ina ua ou faʻalogo i se molimau a se tagata.

Le au pele e, afai e te faalogo i se tautinoga a se tagata i se ituaiga vavega o loo e faatuatua e foai mai e le Atua, ia avea e tupu ai lou faatuatua.  E le faailoga tagata le Atua (Galuega 10:34), afai ua ia avatu se vavega i se tagata, e naunau ma mafai ona ia faia foi mo oe. O la’u tatalo, ia e maua se vavega matautia mai le Atua i le aso, i le suafa o Iesu. Ia e manatunatu i mea o loo e talitonu e faia e le Atua seia faatupu ai lou faatuatua, i le suafa o Iesu, Amene.