Samoan Devotional

OPEN HEAVENS

MATALA LE LAGI MO LE ASO TOFI 13 MATI  2025

(tusia e Pastor EA Adeboye)

Manatu Autu: O le ‘Leai’ i le ‘Ioe’ (From ‘No’ to ‘Yes’)

Tauloto -Tusi Paia–Tanielu 2:21 “O ia fo‘i na te liua tausaga ma tau; e ‘ave‘eseina e ia o tupu, e tofia fo‘i e ia o tupu; Pe foa‘iina mai e ia le poto i ē o popoto, ma le malamalama i ē o iloa mafaufau.”

Faitauga – Tusi Paia – Mataio 15:21-28

E le suia le finagalo o le Atua, ae e mafai ona Ia suia so’o se mea; O le mea lea ou te faasuafaina ai o ia ‘E lē liu o ia, ae na te liua soo se mea’. E mafai ona ia suia le 'leai' i le 'ioe'. I le faitauga o le Tusi Paia mo le aso, sa i ai se fafine na alu atu ia Iesu, ma ole atu ia faamalolo I lana tama teine. Na muai musu le Alii e tali i lenei fafine, ona ia tali lea ia te ia 'e leai'. Peitai, na finau pea le fafine, ma iu ai ina suia lana tali o le ‘leai, i le ioe’.

Ao faagasolo se polokalame a le Ekalesia, na oo mai se upu mai le Atua, e iai se tagata na talosaga sona visa mo Amerika ua faamanuiaina. Sa i ai se tamaitai talavou, e faia se faatalanoaga i le Ofisa o Amerika, i le Aso Gafua o le a sosoo ai, ma na matua fiafia o ia ma talitonu, o ia lea e faatatau i ai le faaperofetaga. Peitai, e lei faamanuiaina lana talosaga. Na ofo le tamaitai, ma faapea atu i le alii ofisa, ‘na fai mai lo’u Tama, e maua lo’u visa’. Na fesili le Alii Ofisa, po’o ai lona Tama, ae tali le tamaitai, ‘O lo’u tama o Pastor Adeboye’. Na soisoi le alii Ofisa, ma faapea ane, "sa ou manatu o le a e fai mai o lou tama o le Peresitene po o le kovana, ae ua na o se faifeau?Faamolemole ia alu loa".  A o ia liliu ese, na toe faapea atu le Alii ofisa, "Faatali. Talu ai ua e faa’ata ina a’u i le asō, o le a ou avatua lou visa".  E le o le soisoi o le Alii fai visa, na liliu ai ma maua ai le visa o lenei tamaitai; o le Atua e mafai ona ia suia le 'leai' i le 'Ioe'.

O nisi taimi, e suia e le Atua le 'leai' mai fili o lana fanau’ i le'ioe'. Na musu Farao e tali atu i manaoga a Mose, ina ia faasaoloto ona tagata. Ae na faatula’i e le Atua i lona mana silisili ese, ma suia le tali o le 'leai' i le 'ioe'. I le po e tasi, na ia faia se faaiuga i ulumatua uma a Aikupito, aua sa musu Farao e faataga lana ulumatua o Isaraelu e auauna ia te ia (Esoto 4: 22-23). Ou te tatalo o soo se tali  'leai' mai lou pule poʻo se tagata tulaga pule o loo taofia lou agai i luma i lou olaga, ia suia i le'Ioe', i le asō, i le suafa o Iesu.

Ia e faatuatua i le Atua ma talitonu pea ia te ia. Ia e pei o le fafine na ole faatauanau atu pea ia Iesu mo le faamalologa o lana tama teine, ma na ia maua, o lou filiga i le faatuatua, o le a talaia faitotoa o loo tapunia pea ia te oe.  Na alu faifaipea Mose ia Farao, seia oo ina faamalosia e le Atua Farao, e suia lana tali mai le 'leai "i le" Ioe'.

Le au pele, ao e talitonu ma faatuatua pea i le Atua, ou te folafola atu, o faitotoʻa uma o loo tapunia, ma taofia oe mai le faʻataunuʻuina o fuafuaga mo lou lumanai, ia tatalaina nei. O tali uma e 'Leai' e le ō gatasi ma le finagalo o le Atua, e liliuina i le "ioe 'mo oe, i le suafa o Iesu. O le filiga i le faatuatua i le Atua e liua le ‘leai’ i le ‘ioe’, i le suafa o Iesu, Amene.  

OPEN HEAVENS

MATALA LE LAGI MO LE ASO LULU 12 MATI  2025

(tusia e Pastor EA Adeboye)

Manatu Autu: E faaola e Iesu (Jesus delivers)

Tauloto -Tusi Paia–2 Samuelu 22:2 “Ua ia fa‘apea ane: O le ALI‘I, o lo‘u papa lea, ma lo‘u ‘olo ma lo‘u fa‘aola.”

Faitauga – Tusi Paia – 1 Tupu 17:1-16

I le Esoto 14:13-30, na tuliloa atu e le fitafita a Farao le fanauga a Isaraelu a’o iai i luma o le sami ulaula. Na iloa lelei e Isaraelu, a leai seisi e faaola iai latou, e maliliu uma pe toe faafoi uma e nofo pologa. O Mose, lo latou taitai na tagi atu i le Atua, ona ia faaola lea iai latou i lona aao malosi. I le Mareko 5:1-5, o se tamaloa na ulufia e le toatele o temoni na faasa’olotoina I se upu se tasi mai le Faaola e matautia. 

Sa iai se tamaitai sa iai sona faafitauli uiga ese, so’o se masini e alu i le eletise e faaola e latalata iai, e ulufia o ia e le eletise. Mo se faataitaiga, a ki se ili, e le taamilo le ili ae ua amata ona taamilo o ia. A ki se pusaaisa, e maluluina ai o ia, a ki se auli e amata ona ia vevela ai. Ua oo ina lē mafai ona toe ki se masini eletise i lona fale ma ua nofo i le pogisa. Na ou fai iai e aumai ia te a’u ae faapea mai e le mafai ona aumai i se taavale ona e iai le aso na ave ai I se taavale i le falemai, na faaola le taavale ae ulufia o ia e le uila mai le taavale, ma ua ato i fafo ma le taavale. Ona e le mafai ona alu i se taavale, o lea na ou alu iai e vaai, ma na ou fai iai, e pau le mea na te faia, o le tu’uina atu o lona ola ia Iesu aua e mafai ona ia faaola o ia mai le malosiaga o le pogisa. Na tuuina atu lona ola ia Iesu, tatalo se tatalo puupuu, ma sa faaolaina i le taimi lava lena. 

Na maliu Iesu ma toetu mai e faaolaina le tagata mai lima o satani (1 Ioane 3:8). E lē afaina pe tele ni malosiaga o le pogisa o loo faalavelave ia te oe, a e valaau ia te ia, e na te faasaoloto ia te oe. O Le tamaloa i le sunako e tasi se agaga leaga sa ia te ia (Mareko 1:23-26), o Maria le Makatala e fitu temoni (Mareko 16:9), ma le tamaloa i Katara na iai le toatele o temoni (Mareko 5:1-15) ma na faasaoloto ma faaola uma e Iesu. 

Ou te folafola atu ua faasaolotoina oe mai soo se malosiaga o le pogisa o loo faapologa ma faasauā ia te oe poo so’o se mea e tau ia te oe, i le suafa o Iesu. Ua maea ona totogi e Iesu le tau o lou faasaolotoga, amata savali ai ua e saoloto. 

Tatalo

Ou te savali i le faasaolotoga atoatoa i so’o se vaega o lou olaga, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 11 MATI  2025

(tusia e Pastor EA Adeboye)

Manatu Autu: E manatu mai Iesu (Jesus cares)

Tauloto -Tusi Paia–1 Peteru 5:7  “Ia tu‘uina atu ‘iā te ia mea uma tou te popole ai, auā o lo‘o manatu mai o ia ‘iā te ‘outou.”

Faitauga – Tusi Paia – 1 Tupu 17:1-16

E manatu mamafa mai le Atua I lana fanau. I le 2 Tupu 4:1-7, ua tatou faitau ai i le fafine ua oti lana tane, o se tasi o atalii o le perofeta, ma ua ia tuua se aitalafu tele. Ina ua sau le tagata sa aitalafu ai e avatu lana fanau e fai ma ana pologa pe a lē totogiina le aitalafu, na ia tagi atu ia Elisaia, o lē na faatonu o ia e alu e faanoi mai ni ipu le susua se tele ma sasaa iai sina suauu mai le fagu laitiiti na totoe I lona fale. Na afio mai le Atua e saunia mea silisili, ma ua mafai ona ia totogiina lana aitalafu ma ola manuia mo aso o totoe o lona olaga. I le Ioane 6:5-13, na fafagaina e Iesu le 5000 o tagata e lē faitaulia ai fafine ma tamaiti i se meaai a se tamaitiiti. Na ia faaalia lona manatu mai, i le faateleina lea o le meaai a le tamaitiiti ina ia fafagaina ai le motu o tagata ma na iai ni toega o meaai i ato e sefulumalelua. O nei mau ma tala e tele,  ua faaalia ai le manatu mai o Iesu. 

E manatu mamafa foi Iesu mo tatou, e le gata i o tatou mana’oga ae na te silafia lelei le vaivai o tatou tino, ma e naunau Iesu, ia tatou ‘ausia le malosi o le tino auā le galuega ua ia valaauina ai tatou. I tausaga ua tuanai, e iai le aso sa ou feagai ai ma tagata mai le 8 i le taeao e o’o atu i le 6 i le po, ma sa ou mauaina sina mea’ai utiuti, ae lei auai atu i le matou aoga Tusi Pa’ia. Ina ua ou foi mai I le ofisa, o loo fa’atali atu tagata e fia vaai ia te a’u. Na ou tatalo mo tagata e tau i le 10.30 i lena po, ae fai mai toe toa sefulu o loo faatali pea. E o’o atu i lena taimi o le po ua matua gapelu lo’u tino ma ua ou matuā lelava. Na ou fesili i le Atua po o lea sa’u mea a fai, a ua ia tali mai e faapea: ‘E te le tau tula’i e tatalo mo i latou, ae nofo  i lalo, pa’i atu i o latou ulu ona tuu lea e ō. E latou mauaina a latou vavega’.  Sa faate’ia a’u i lea tala ma ou faapea atu: “Le Atua e, o lona uiga e mafai ona ou talanoa atu i lau Afio a o ou nofo i lalo?” A ua ia tali mai sa ia savalia le fogaele’ele o se tagata ola, ma e malamalama lelei i le tulaga lēlavā. 

E silafia e Iesu le vaivai o tatou tino, ma e manatu loloto mai iai tatou (Salamo 103: 14). O ia o le tatou ositaulaga sili, ua o’otia lona finagalo i o tatou vaivaiga o le tino aua sa ia feagai ma fa’afitauli o loo tatou iai nei(Eperu 4:15). I le tatou tusi faitau o le aso, ua tatou iloa le manatu o le Atua mo lana perofeta a’o feagai ma le oge, na te lei tu’ulafoa’i ia te ia i se taimi.

Le ‘au pele, tu’u atoa lou fa’atuatua i le Atua. E manatu tele mai o ia ia te oe ma e na te lē tuulafoa’i ia te oe. 

Tatalo: 

Faafetai Iesu, mo lau tausiga alofa, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 10 MATI  2025

(tusia e Pastor EA Adeboye)

Manatu Autu: O le valaaulia maualuga  (The great invitation)

Tauloto -Tusi Paia–Isaia 55:1 “E! ‘outou uma o ē fia inu, ō mai ia i le vai, ‘atoa ma ‘outou ‘ua leai ni tupe, ō mai ia, ‘inā fa‘atau ma ‘a‘ai. ‘Ia ‘outou ō mai lava, ma fa‘atau le uaina ma le suāsusu, ‘ae leai se tupe, e leai fo‘i se tau e fa‘atau a‘i.”

‭‭

Faitauga – Tusi Paia – Ioane 7:37-39

Na tuuina mai e Iesu se valaau e faapea, ‘o le valaaulia maualuga’ i tagata uma (Mataio 11:28-30). Na ia folafola e avatu le malologa i soo se tasi e sau ia te ia ma e aofia ai ma oe. 

Na fetalai Iesu i le Mataio 6:31 e aua e te popole. E finagalo e te tu‘uina atu ‘iā te ia mea uma tou te popole ai, auā o lo‘o manatu mai o ia ‘iā te ‘outou (1 Peteru‬ ‭5‬:‭7‬). E te ia te ia ma o loo manatu mai o ia ia te oe. O le fesili lenei, e te ia Keriso ea ? E ia te ia ea manatunatuga o lou loto, i le faasinomaga ma mea e taulai iai lau vaai, ma mea e te maua? Afai e te ia te ia moni, o lona uiga e leai se mea e te popole iai. Peitai, afai e iai vaega o lou olaga e te lei  lafoai ia te ia, e tatau la ona iai lou popolega. 

Na aoaoina a’u e lo’u tamā faaleagaga, e tausia a’u e lou tamā mai mea o loo ia te ia. Afai o le Atua lou Tamā ma le e ona oe, e na te tausi ia te oe, aua o loo i ona luma le fiafia e malie ai; aua o loo I lona itū taumatau le ‘oli‘oli e fa‘avavau. Peitai afai o loo e i le tiapolo ma e auauna iai, e na te tausi ia te oe i le pepelo ma le faasauā, aua o lana matafaioi lea. Afai e pule le tiapolo I se tagata, e manaomia lava e lea tagata mea I taimi uma aua o le loto malie moni e maua na o le Atua. E leai se mea lelei e mafai e le tiapolo ona ofoina atu i ona tagata. O le tiapolo e fai na o ana pologa, ao le Atua, o atalii, o atalii o le Atua, e maua mea uma (1 Korinito 3:21). O loo tuuina mai e le Atua se valaaulia maualuga ia te oe i le asō, e pei o le valaaulia na ia avatu i le motu o tagata i le tusi faitau mai le Tusi Paia o le asō. O loo valaau ia te oe e te sau e inu , ma e sau e faatau uaina e aunoa ma se tau. O loo ia valaau ia te oe I se olaga o le amiotonu, filemu ma le olioli i le Agaga Paia (Roma 14:17). 

 “‘Ou te vala‘au i le lagi ma le lalolagi i le aso nei e fai ma molimau ‘iā te ‘outou, ‘ua ‘ou tu‘uina atu i ou luma o le ola ma le oti, o le manuia ma le malaia; o lenei, ‘ia e filifili i le ola, ‘ina ‘ia ola ai oe ‘atoa ma lau fānau;” Teuteronome‬ ‭30‬:‭19‬ ‭

Ua oo atu le valaau ia te oe. Aua e te soifua ma le fememeai, fefe ma le lē mautonu, ia e talia le valaaulia maualuga e lafoai ma le atoatoa lou ola i le Atua ina ia e fiafia i mea lelei uma ua ia saunia mo lana fanau. A e filifili i le ola, o se filifiliga tonu ma le taua, e le gata o oe, ae faapea foi augatupulaga o le a tutupu mai ia te oe. Le au pele e, talia le valaaulia maualuga mai le Atua, filifili le ola. O e filifili ea le ola i ou manatu, upu, galuega faatino ma faaiuga fai? I le suafa o Iesu, Amene. 

OPEN HEAVENS

MATALA LE LAGI MO LE ASO SA 9 MATI  2025

(tusia e Pastor EA Adeboye)

Manatu Autu: Vavega Fesuisui’ai (Creative Miracles)

Tauloto -Tusi Paia–Mataio 19:26“Ona silasila atu ai lea o Iesu, ‘ua fa‘apea atu ‘iā te i latou, “E lē mafaia e tagata lenei mea, ‘ae mafaia mea uma e le Atua.”

Faitauga – Tusi Paia – Ioane 9:1-7

O vavega o mea e tutupu, tulaga ese, latou te lē ō gatasi ma tulafono o le faalenatura ma faasaienisi. O lo tatou Atua o le Atua o vavega, ma o se fiafiaga tele i lona finagalo le fa’aofo o tagata fa’alotolotolua ma masalosalo. O le Atua na te faia ituaiga vavega eseese, peita’i o le asō o le a o’u taula’i i ana vavega fesuisuia’i.

E faia e le Atua vavega uiga ese pe a ua fai le faaiuga a le tagata o sea tulaga matuiā ua leai se fofō. E leai se mea e faigatā ia te ia. I le Tusi faitau o le asō, na maliu ane Iesu ma ona so’o ua silafia le tagata ua tauaso talu ina fanau mai, ona fesili lea o le ‘au so’o iā Iesu poo le agasala a ai ua mafua ai mafatiaga o le uso. Na tali atu Iesu ia i latou e le’i agasala lenei tagata poo ona matua, ae peita’i ina ia fa’aalia ai o galuega a le Atua iā te ia. Na feanu Iesu I le eleele, ona faia lea o le palapala ma ua nini ai mata o le tagata tauaso. Ona faapea atu lea ia te ia e alu e mulumulu ona mata, ona alu lea o ia, ua mulumulu, ua toe fo’i mai ua pupula. Ou te faaigoaina lea gaioiga o se vavega na foafoa - o se vavega e faaaoga ai le efuefu ma le palapala. Afai ua fai mai foma’i ua leai se togafiti e mafai ona toe fai i lou gasegase, o le a toe fausia e le Atua le vaega o lou tino ua afaina, i le suafa o Iesu. O le vavega lea na fai e le Atua i le  2 Tupu 5:1-14 ina ua ia faamalolōina le lepela o Naamanu ma faamamaina lona tino faapei o se pepe fou fa’ato’ā fanau.

Ua o’u vaai i le tele o vavega o fafine e lei i ai ni totoga fanau (tulou) peita’i na o latou fanauina ni fanau. O nisi o i latou na ta’i faalua faatolu ona maua a latou masaga ma sili atu. E mafaia e le Atua ona fo’ia faafitauli tau tupuaga, sui le ‘au’aīga o le toto, toe faafou vaega o le tino ua leaga, ma faatupu pe faaitiitia le mamafa ma le maualuga. O se alii sa ia te ia le faatuatua pei o se tamaititi sa nofo ma faalogo a o o’u lauga. A’o tutupu vavega I le la’o’ai, sa faigatā ona ia iloa atu mea uma sa tutupu ona sa punitia lana vaai e tagata e maualuluga atu ia te ia sa tutū i ona luma. Ona ia faapea ifo lea i lona loto, “pe ana tau lava ina ou maualuga atu.” Na faafofogaina o ia e le Atua ma ia fetalai mai ai ia te a’u, o lo o i ai se isi i le potopotoga o loo momo’o maimau pe ana maualuga atu. Na fetalai mai le Atua ia te a’u, ou te fai i lea tagata e tepa i lalo ma afai na te maitauina ua puupuu lona ofuvae, e tatau ona ia iloa e leai se faaletonu o i lona ofuvae a ua faaopoopoina e le Atua lona maualuga. Ina ua o’o i le taimi o ta’utinoga, sa tula’i lea uso ma lona toalua ma ta’utino o lana tane, e moni lava ua faaopoopoina lona maualuga. E faafefea ona e fa’amatalaina lea tulaga? O le mana faatupulaia o le Atua sa galue e faataunuu mea e lē mafaia e se isi ona fai, ua na o le Atua. Ou te tatalo ia avatu e le Atua iā te oe vavega fou fesuisuia’i i le suafa o Iesu.

Tatalo

Tamā faamolemole aapa mai ou aao mamana e faamalōlō ia te a’u ma faataunuu mea tetele ofoofogia, ma vavega fou i lou olaga ma lou aiga i le suafa o Iesu (Galuega 4:30), Amene.

OPEN HEAVENS

MATALA LE LAGI MO LE ASO TOONAI 8 MATI  2025

(tusia e Pastor EA Adeboye)

Manatu Autu: Ole atu mo le alofa mutimutivale (Ask for mercy )

Tauloto -Tusi Paia–Eperu 4:16““O le mea lea ‘ia tatou fa‘alatalata atu ai ma le loto tele i le nofoāli‘i o le alofa tunoa ‘ina ‘ia alofaina ai o i tatou e ia, maua ai fo‘i le alofa tunoa e fesoasoani mai i ona aso e tatau ai.”

Faitauga – Tusi Paia – Luka 18:10-14

Sa i ai se ta’ita’i mataalia o se aoga Tusi Paia sa masani ona a’oa’o i ulugalii faaipoipo, a o’o ina faamanuia le Atua i le tinā ma o le a fanau mai le pepe, pau le tulaga e tatau ona o la faia o le tatalo e saisaitia uma agaga e tatau ona taofia, talaia uma vaega e ono talaia, faatonu le pepe e sau I fafo, ona faigofie lea ona fanau mai le atalii poo le afafine. Ina ua faaipoipo le alii ma ua faamanuia le Atua i lo la aiga ma ua o’o I le taimi e tatau ai ona fanau lona toalua, sa ia faia uma tatalo nei na ia a’oa’oa peita’i e lei fanau mai ai le pepe. Ina ua tolu aso o fa’atigā lona toalua, na fa’apa’ū fao ma ole atu i le Atua  faapea, “Le Atua e, tau ina e alofa mutimutivale mai ia te a’u.” E toe fo’i atu e vaai lona toalua ua fanau mai ma le manuia le la pepe.

O le Atua e faula’i lona alofa mutimutivale (Efeso 2:4). O lona alofa e mai i le vavau e o’o I le faavavau i e matata’u ia te ia (Salamo 103:17). I le Mareko 1:40-42 sa sau se lepela iā Iesu ma faapea atu ia te ia, “Ou te iloa e mafai ona e faamalōlō iā te a’u pe afai ua e finagalo i ai.” Ona mutimutivale lea o le alofa o Iesu, ua aapa atu lona aao ua faapea atu, “Ou te loto i ai, inā mamā ia oe,” ona malolo ai lea o ia.

Le au pele e, a foliga ua lē maua se tali o au tatalo, ole atu i le Atua mo lona alofa mutimutivale; e faigatā i le Atua ona teena fa’atoga faapea. I la tatou Tusi faitau o le asō, na faamatala e Iesu le tala I ni alii se toalua na o i le malumalu e tatalo. O le tasi o se Faresaio, na ia fa’amalau I le Atua a na mea lelei uma na fai, o le tasi, o se telona, na ifo lona ulu ma faapea, “Le Atua e, alofa mai ia te a’u le tagata agasala.” O le tagata na tagi atu mo le alofa mutimutivale o ia lenā na fo’i i lona fale ua ta’u amiotonuina. A e ole atu mo le alofa mutimutivale, ua e faailoaina i le Atua, e leai sou fesoasoani ua na o ia, ma o le a tali mai o ia e fesoasoani iā te oe. Na faafofogaina e Iesu le tagi a Patimaio mo lona alofa mutimutivale ma ia faia ai le vavega mo ia. E lē gata ina pupula ona mata, a ua fa’aatoatoaina o ia (Mareko 10:46-52). O le fafine mai Turo ma Saitonu na alaga o ia mo le alofa mutimutivale mo lana tama teine na ulutinoina e temoni, ma na faamalōlō e Iesu lana tama teine (Mataio 15:21-28). O i latou e ole atu i le Atua mo lona alofa mutimutivale e lē mafai ona fo’i fua.

E te mana’omia le alofa mutimutivale o le Atua i aso o le sologa lelei ma aso faa lē lelei. E te manaomia le alofa mutimutivale pe a e mativa, ma taimi ua lava le faasoa. I taimi o le fia maua o se fesoasoani, o le alofa mutimutivale o le Atua o le a aumaia tali o ou faafitauli, ma taimi lelei. O lona alofa mutimutivale o le a fa’asaoina ou manuia. O le tagi ma le alaga mo le alofa mutimutivale e lē tatau ona gata na o laugutu o i latou o puapuagatia ma manaomia vave le fesoasoani, e o’o fo’i ia i latou o ola i le tamāoaiga ma manatu e leai ni o latou faafitauli e tatau lava ona ole atu mo le alofa mutimutivale ina ia aua ne’i i ai se mea e taofia ma faalavelave i o latou faamanuiaga. Ole nei loa mo le alofa mutimutivale o le Atua i so’ose vaega o lou olaga, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 7 MATI  2025

(tusia e Pastor EA Adeboye)

Manatu Autu: Tatalo mo oe  (Prayers for yourself )

Tauloto -Tusi Paia–Salamo 3:4 “Na ‘ou vala‘au i le ALI‘I i lo‘u leo; ‘ua fa‘afofoga mai fo‘i o ia ‘iā te a‘u mai lona mauga pa‘ia. Selā.”

Faitauga – Tusi Paia – Salamo 30:1-8

Tatalo

1. Ou te faafetai ia te oe le Alii e, mo lau fesoasoani ia te a’u e o’o mai I le taimi nei. Ua na o lau taitaiga ma le fesoasoani ua mafai ai ona ou aulia ma savalia lenei mamao i le olaga nei. 
2. Tamā, ou te faafetai ia te oe aua ua na o oe lava  e te tausi ia te a’u. Faamolemole faataga a’u ou te maua ma fiafia pea ia au faamanuiaga ma le faulai I soo se vaega o lo’u olaga, i le suafa o Iesu. 
3. Tamā, fesoasoani mai ina ia ou mau i luma o ou fofoga i taimi uma. Faamolemole ia siomia soo se vaega o lo’u olaga i le tumu o le olioli mai le mamalu o lou nofoalii, i le suafa o Iesu. 
4. Tamā, faamolemole ia tafiesea soo se vaega ua mate ma leai se ola i lou olaga ia faavavau. Ou te teena soo se vaega mate, ma ou te folafola atu e uluola soo se vaega e tago iai o’u lima, i le suafa o Iesu. 
5. Tamā, faamolemole ia faataga a’u ou te maua ma fiafia i le soifua maloloina lelei i lo’u olaga atoa. Ia avea lo’u tino, mafaufau ma le agaga e manuia ma maloloina lelei, i le suafa o Iesu. 
6. Tamā, ou te tuuina atu lo’u ola I ou aao, faamolemole ia faamalamalama ma susulu pea o’u ala i aso uma. Taitai a’u e tusa ma au fuafuaga mautū le Atua e, mo lo’u olaga, i le suafa o Iesu.
7. Tamā, fesoasoani mai ia te a’u ina ia ou auauna ia te oe ma lo’u loto atoa seia ou vaai i lou mamalu. 
8. Tamā, faamolemole aua nei faatagaina a’u e faia in mea sese ogaoga i la’u savaliga i lenei olaga. Fesoasoani mai ia te a’u e mulimuli i lou finagalo mo lo’u olaga , ma ia ‘ou i’u manuia, i le suafa o Iesu. 
9. Tamā, na e folafola e te lē tuua pe tuulafoaina I matou. faamolemole ia faataga lou mamalu e mafuta pea ma a’u, I le suafa o Iesu. 
10. Tamā, faamolemole fesoasoani mai ia te a’u ina ia ou faamoemoe ia te oe I aso uma o lo’u ola. Aumai le alofa tunoa ou te teena ai soo se ala lē talafeagai e tetee I lou finagalo mo lo’u olaga, i le suafa o Iesu. 
11. Tamā, faamolemole taitai ia te a’u I taimi uma. Fesoasoani mai ina ia ou lagonaina lou siufofoga pe a e faatonu a’u i ala e tatau ona ou ui ai, i le suafa o Iesu. 
12. Faaopoopo ni ou manaoga i le tatalo

I le suafa o Iesu, e tatalo atu ai, Amene. 

OPEN HEAVENS

MATALA LE LAGI MO LE ASO TOFI 6 MATI  2025

(tusia e Pastor EA Adeboye)

Manatu Autu: O loo iai le Atua ia te oe (God in you )

Tauloto -Tusi Paia–1 Korinito 11:31 “Ona latou felafolafoa‘i lea, ‘ua fa‘apea ane, “‘Āfai tatou te fai atu, ‘Mai le lagi’; ‘ona fai mai lea o ia, ‘Se a fo‘i le mea na ‘outou lē talitonu ai ‘iā te ia?’

Faitauga – Tusi Paia – 1 Korinito 11:23-34

A tatou aai ma feinu i le Faamanatuga o le Talisuaga Paia, o loo e talia ma ai i le tino o Iesu faapea ona inu i lona toto, e pei ona tatou faitau ai i le faitauga o le Tusi Paia mo le asō. E le na ona e pai atu i lona tino ma lona toto, ae o loo e ai ma taliaina o Ia, ma e mafai ona e fai atu ma le lototoa i so’o se tasi, "Auā e sili o ia ua ia te a’u, i lē ua i le lalolagi. " (1 Ioane 4:4).

A o avea au o se faaliliu upu mo le Alii, e masani ona ou naunau I sauniga o le Faamanatuga o le Talisuaga Paia. Ona matou faamanatuina lea o Talisuaga Paia, e faatasi i le tausaga, ma sa ou matua fiafia, aua ou te iloaina, e toe fafagaina ai lo’u agaga. A’o lauga lo’u Tama, ae ou faaliliuina, sa ou mafaufau ia te au lava, "Tama, faamolemole, faanatinati lau lauga ae sei o’o atu i le Talisuaga Paia." E o’o ane i le taimi na matou talia ai le uaina, e masani lava ona ou taumafai e pulea lou tagata ina nei paū le ipu, aua e gatete uma lo’u tino, mai lo’u ulu, se ia o’o tamatamaivae. E ese lo’u fiafia i le talisuaga o le faamanatuga aua ou te lagonaina le faatumulia e Agaga Paia i taimi uma ou te inu ai ma talia le uaina.

O le Faamanatuga o le Talisuaga Paia, e le o se taumafataga masani; o le taimi lava e faamanuia ai e le faifeau a le Atua le areto ma le uaina, e faaaoga ai upu a Iesu Keriso, i le 1 Korinito 11:24-26, e paia loa. O le uaina i le faamanatuga o le faailoga o le toto o Iesu Keriso ma o lea toto e faamāmā uma ai agasala. O le toto foi o Iesu, e puipuia ai i tatou mai mala e pei ona puipuia ai tagata Isaraelu i le po na faʻaumatia ai e le Alii ulumatua uma a tagata Aikupito. (Esoto 12:21-30). O lona uiga o le toto o Iesu e puipuia ai i tatou ma tatou maua ai le manumalo i o tatou fili(Faaaliga 12:11). O le mafuaaga lea e mama’i ai ma maliliu i latou o e taumamafa faalētatau e pei ona taua i le tusi a 1 Korinito 11:27-30. O i latou e inu ma le tatau, e latou te maua le mana toetu o le Alii mai totonu , e maua ai le faamalologa, faasaolotoga, ma le mafutaga vavalalata ma le Atua, ma isi faamanuiaga faapenei.

A e auai i le Faamanatuga o le Talisuaga Paia, ua e sau e te talisua i le laoai a le Tupu o Tupu, ma e taua le leai o se mea e faailogaina ai oe o se fili o le Alii, a o e latalata atu i lana la’oai. Ia mautinoa, e te suesue i lou tagata, ma lafoai so’o se mea e ono o’o mai ai le to’asa o le Tupu o Tupu. Lafoai le agasala, loto masalosalo, ma so’o se mea e lepeti ai le faaali tino mai o le mana o le tino ma le toto o Keriso i lou olaga. Lafoai so’o se mea e taofia le mana o Le Atua e ala i le Faamanatuga paia ona iloa tino i lou olaga, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 5 MATI  2025

(tusia e Pastor EA Adeboye)

Manatu Autu: Pe afai ua lēlava lou faatuatua (When your faith is not enough )

Tauloto -Tusi Paia–Mareko 9:24 “Ona ‘alaga loa lea o le tamā o le tama, ‘ua fai atu, “Le Ali‘i e, ‘ua ‘ou fa‘atuatua; ‘ia e fesoasoani i lo‘u lē fa‘atuatua.”

Faitauga – Tusi Paia – Esekielu 37:1-14

I le faitauga o le Tusi Paia o le asō, ua iai Esekielu i se vanu ua tumu i ivi mamago. Ona fesili lea o le Atua ia Esekielu “e mafai ‘ea ‘ona toe ola o ia ivi?” Ua manatunatu le perofeta ona tali atu lea, “Le Ali‘i le ATUA e, ‘ua e silafia lava oe.” I nisi faaupuga, o loo faapea atu, ‘e sili atu le mea lenei i lo’u  faatuatua’. Ona fetalai atu lea o le Atua ia vavalo ma faaperofeta  ane I nei ivi mamago, ona toe ola ai lea. 

E iloa uma e failauga a le Atua, e mafaia e le Atua mea uma. Peitai, e oo I le faatuatua o nisi o failauga matautia e mafai ona lūlūina. E iai taimi e fai mai ai le Atua ia te au ou te faia se mea, peitai e ui ina ou faatuatua ia te ia, ou te faapea atu, ‘e sili atu le mea lenā i lou faatuatua’. E fetalai mai ou te vavalo ma faia le perofetaga, ona ou usitai lea ae faitalia le Atua ma faataunuu. 

A e faalogo I se failauga a le Atua o faia se perofetaga, ae sili atu i lou faatuatua, faamolemole aua e te tautala e tetee i le perofetaga. Tusa pe e te lē talitonu I le perofetaga, pulea lou fofoga ma aua e te tautala tetee iai aua e ono lamatia le iuga. I le 2 Tupu 7:19-20, o se tagata maualuga i le malō na faapea mai e matuā le mafai ona taunuu le vavalo poo le faaperofetaga a Elisaia, na ia vaai iai, ae na oti e lei tofo iai. 

I le Mareko 9:14-27, na lē mafai e le au soo a Iesu ona faamalolo i se tamaitiiiti na ulufia e temoni, ma ua leai se faamoemoe o lona tamā. Ae ina ua o’o atu iai Iesu, o le olega a le tamā ua faatumulia i le masalosalo. Ou te iloa lelei aua na faapea mai Iesu, “Ai se mea ‘e te mafaia. Auā e mafaia mea uma lava i lē fa‘atuatua.” E lei faapea na atili masalosalo ai pea le tamā,  ae na faapea mai, “Le Ali‘i e, ‘ua ‘ou fa‘atuatua; ‘ia e fesoasoani i lo‘u lē fa‘atuatua”, ona ia maua lea o lana vavega. 

A oo mai tulaga ua sili atu i lou faatuatua, tagi atu i le Atua mo se fesoasoani ia e faatuatua. E mafai ona ia faatupuina lou faatuatua e fesoasoani e galue ma ia,  ina ia fanau mai tulaga e matua faigata ona taunuu. Aua e te taofia lau vavega ona o le lē faatuatua. E finagalo le Atua ia e naunau e te faia so’o se mea  e faatonu ai oe e pei o auauna i le faaipoipoga i Kana (Ioane 2:5-8). 

Le au pele e, a aumai e le Atua ia te oe, tulaga e sili atu i lou faatuatua, e finagalo o ia e maua ai sona viiga. I taimi ia, e le faapea o mea e mafaia i lou faatuatua, ae o le tulaga e mafai ona faia e le Atua e ala i lou usitai, ma e fua i lou faatuatua. A o’o mai se tulaga e sili atu i lou faatuatua, taulai lau vaai i le Atua ma usitai i so’o se mea e faatonu mai ai, i le suafa o Iesu, Amene. 

‭‭

‭‭

OPEN HEAVENS

MATALA LE LAGI MO LE ASO LUA 4 MATI  2025

(tusia e Pastor EA Adeboye)

Manatu Autu: Mo Lona viiga (For His glory )

Tauloto -Tusi Paia–Salamo 29:2 “Tu‘uina atu ia i le ALI‘I le vi‘iga o lona suafa; ‘inā ifo ia i le ALI‘I i le mea pa‘ia e matagofie.”

Faitauga – Tusi Paia – Isaia 48:9-11

O ananafi, sa ou talanoa atu i le auala e avea ai vaega uma o lou ola ina ia fa’afiafiaina ai le Atua. O le asō, ou te faailoa atu, na faia oe e avatu le viiga i le Atua.

I le tusi o Ioane 9:1-7 sa fesiliga e le ‘au so’o le mafua’aga ua tauaso ai le tamaloa ma pagatia lona olaga, ae sa tali Iesu, e lē mafua ona o se agasala a  seisi, a ia faaalia ai le viiga o le Atua ia te ia. Ona feanu lea o le Alii i le palapala ma nini ai mata o le tauaso ma ia faatonu e alu e fa’amama ona fofoga i le vai. Sa fo’i mai le tauaso, ua pupula o ia.

O le Atua e ona le viiga; o ia o le Tama o viiga(Efeso1:17). O ia o le Atua e fuā, i lona  viiga (Isaia 42:8) ma o mea uma e te faia e tatau ona viia ai o ia. Afai e te faia se mea e lē maua ai e le Atua se viiga, na te fa’aaogaina oe ina ia sili atu ona maua ai sona viiga, e pei ona ia faia ia Farao. E o’o mai i asō, o lo’o maua pea e le Atua le viiga mai le fa’aumatia o Farao ma lana ‘au tau, ona sa ia taumafai e taofia le fanauga a Isaraelu mai le avatu o le tapuaiga ma le viiga i le Atua. (Esoto 15:1-4). So’o se tasi e faoina le viiga o le Atua, e o’o mai iai latou le fa’amasinoga a le Atua pe a fai latou te lē salamō. Ina ua fa’afefeteina le loto o Nepukanesa ona o mea sa ia ‘ausia, sa ave e le Atua i le vao matua mo tausaga e fitu, na fealuai e pei o se manu fe’ai (Tanielu 4:28-33). Ina ua ia ‘ai i le vao e pei o se manu vaefa, ona ia toe maua lea o le malamalama; ona ia avatu lea o le viiga e onomea i le Atua (Tanielu 4:34). Na ui i se tulaga lē lelei Nepukanesa, ona faatoa ia ave lea o le viiga i le Atua, ‘aua ne’i e pei o Nepukanesa. Ia e ‘ave le viiga i le Atua i so’o se taimi e onomea, i lona suafa. Sa fa’apena foi ona a’oa’oina Herota i se ala faigata, e ave ai le viiga i le Atua. Peitai e ese mai ia Nepukanesa sa maua le isi ona avanoa, a’o Herota, sa atiolaina e ‘anufe ua oti ai. (Galuega12:20-23).

O se tulaga faigata ma le lamatia le paū atu i a’ao o le Atua, o Lē e lē faoina e seisi lona viiga. A fai e le Atua se mea mo oe, ‘aua nei e manatu na e faia to’atasi, faafetai I le Atua ma avatu le viiga ia te ia. E iai nisi tagata o le Atua ua latou maua le mana o le Atua, ua fa’aseseina o latou manatu, o i latou o ni tagata e sili ona taua. ‘Aua e te faoaina le viiga o le Atua I lana galuega , aua o oe lava o le tagata noa pe ana le seanoa le Atua. A faia e le Atua so’o se mea e ala ia te oe, e na te faia mo lona lava suafa. ‘Aua lava nei galo ia te oe, ua mafua ona e iai i le tulaga ua e ‘ausia, ona o le alofa tunoa o le Atua. E onomea ma tatau I le Atua le viiga, ma e tatau ona avatu atoa ia te ia.

Tatalo: 

Tamā, ou te faato’ese atu ona o taimi uma ua ou faoa ai lou viiga  ona o mea uma ua e faia i lo’u olaga. Ou te avatu ia te oe le viiga ma le mamalu e tatau i lou Suafa, e amata atu nei e o’o i le faavavau, i le suafa o Iesu, Amene.