Samoan Devotional

OPEN HEAVENS

MATALA LE LAGI MO LE ASO FARAILE 21 FEPUARI  2025

(tusia e Pastor EA Adeboye)

Manatu Autu: Ieova Sikenu (Jehovah Tsidkenu )

Tauloto -Tusi Paia–Roma 10:4 ”Auā o le i‘uga o le tulafono o Keriso lea, e o‘o mai ai le amiotonu i ē fa‘atuatua uma lava.”

Faitauga – Tusi Paia – Roma 8:1-11

“O lana nofoa‘iga e fa‘aolaina ai Iuta, e nofo fo‘i Isaraelu ma le filemū; o le suafa fo‘i lenei e ta‘ua ai o ia, “O LE ALI‘I LA TATOU AMIOTONU.”” Ieremia‬ ‭23‬:‭6‬ ‭

O Ieova Sikenū o lona uiga, ‘O le Alii o lo’u amiotonu’. O la tatou amiotonu e mai le Atua. O ia o le puna ma le tapulaa o le amiotonu. Afai e te amiolētonu I ona luma, e te lē amiotonu. O le lalolagi e lē o se tatou tapulaa lea, ae o le Alii. 

O le taimi e avea ai oe ma afafine poo se atalii o le Atua, e na te tuuina lona Agaga I totonu ia te oe, ma e amata ona ia galue ia te oe ina ia faia lona finagalo (Filipi 2:13). E amata ona ia taitai ma faaali atu ia te oe , ala tonu e faia ai mea uma. 

Ae lei tuuina atu lo’u ola ia Keriso, ma faamamāina ai, na matuā maaa lo’u loto ou te lē iloa tagi. Mo se faataitaiga, o au o le atalii e pito I pele I lo’u tamā aua o a’u o lona atalii e uii I ai tama, ma ou te alofa tele ia te ia, peitai ina ua maliu, ou te lei tagi. Ae ina ua afio mai Agaga Paia ia te a’u, na ia famalūlūina  lo’u loto. Na ia aoaoina a’u I le tulaga e tatau ona iai lo’u loto, ma le auala tonu ou te faia ai faaiuga i lo’u olaga. O le taimi la lenei, a ou vaai I tagata o fetagisi, e amata foi ona ou tagi atu ai. Ou te lē toe loto maaa, aua o loo faaali pea e Agaga Paia ia te a’u ala a lo’u Tamā I le lagi, o le amiotonu, loto alofa, ma le agalelei. 

O lē iloa o le Atua o lou amiotonu lea, e faasaolotoina ai oe I lou taumafai e faafiafia I le Atua e ala I lou malosi. Fai mai le Tusi Paia e lē o le fitafita poo le malosi ae o lē Agaga o le Alii (Sakaria 4:6). O lo tatou Tamā o se tamā lelei. E na te faaalia mai ona ala ma foai mai Agaga Paia e fesoasoani iai tatou e mulimuli ia te ia. E lē fuaina I le tele o tulafono a le Atua o loo e usitaia,  ae o lou usiusitai I le taitaiga a Agaga Paia. 

Le au pele e, o loo manino i le Tusi Paia o Keriso tatou te maua ai le poto, amiotonu, faamamāina ma le faaolaina ( 1 Korinito 1:30). Ona o Keriso ua avea ma o tatou amiotonu, tatou te lē o toe ola mo I tatou. Afai tatou te ofuina le Alii o Iesu Keriso, o lō tatou amiotonu, e tatou te maua lē mana faamalosiau a lona Agaga Paia e taofia ai le faia pea e le tino o le agasala (Roma 13:14). A lafoai lou ola ia Iesu Keriso, e avea o ia o lau amiotonu, e na te foai atu Agaga Paia e taitai ia te oe, I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 20 FEPUARI  2025

(tusia e Pastor EA Adeboye)

Manatu Autu: Ieova Saloma (Jehovah Shalom)

Tauloto -Tusi Paia–Ioane 14:27 ”Ou te tu‘uina atu ‘iā te ‘outou le manuia; o lo‘u manuia ‘ou te avatu ai ‘iā te ‘outou; ‘ou te lē avatu ‘iā te ‘outou fa‘apei ‘ona avatu e le lalolagi. ‘Aua le atuatuvale o ‘outou loto, ‘aua fo‘i tou te matata‘u.”

Faitauga – Tusi Paia – Mareko 4:35-41

Sa iai sa’u uo e mauoloa lava e nofo I Ausetalia. E o’o atu i le taimi ua lata ona maliu, e faitau piliona ana tupe I faletupe. Na auina atu a’u e le Alii e lauga ia te ia, ae fai mai ia te a’u, o soo se taimi e moeiini ai ona mata o le a moe, e vaai atu ua latou faatasi ma tagata oti. O lea, e fefe e moe. E ui e mauoloa, ae leai sona filemu. O soo se tagata e lei tuuina atu lona ola ia Iesu, e lē mafai ona ia maua le filemu. 

A lafoai ola o tagata ia Iesu Keriso, e latou te maua le filemu I totonu o i latou. O se tulaga lea e ta’atele I tagata ua ia Keriso. Afai e lafoai lou ola i le Atua, e te silafia ai, sa e tauaveina se avega mamafa i lou loto mo se taimi umi.  E aveesea e Ieova Saloma lena avega mamafa ae suia I lona filemu. O loo faamatalaina e Iesu I le Mataio 11:28 e faapea:

“Ia ‘outou ō mai ‘iā te a‘u, o ‘outou uma o ē tigāina ma mafatia i avega, o a‘u fo‘i e mālōlō ai ‘outou.”

‭‭

O le a se mea o e atuatuvale ai? Na o lou lafoai lava ia Ieova Saloma, ona e maua lea o le filemu e pei o se vaitafe. E finagalo le Atua e foai atu ia te oe le filemu mai soo se vaega o e tigaina ai, peitai e tatau ona e lafoai au avega uma ia te ia, e lē mafai ona e tauaveina toatasi. Poo lē a lava mea o loo tutupu ia te oe i lou siomaga,  afai e ia te oe Ieova Saloma, e lē luluina lou tagata. O le filemu o le Atua e fai vaega. O le tele o lou silafia o ia, o le tele foi lea o le filemu e te maua. 

Fai mai le Salamo 119:165, “Ua tele le filemū o ē naunau i lau tulafono; e leai fo‘i se mea e tausuai ai i latou.”

‭‭ O se folafolaga lenei e faapea, afai e te mulimuli I le Atua, e te maua le filemu e tele. 

I le Isaia 54:13, fai mai le Atua Matautia e na te a’oa’o I lana fanau, ona latou maua ma fiafia lea i le filemu tele. Ina ua fetalai le Atua e faatatau ia Aperaamo i le Kenese 18:19, na ia faapea mai, “Auā ‘ua ‘ou iloa o ia na te poloa‘i atu i ana fānau ma lona ‘āiga pe a mavae atu o ia; latou te tausia le ala o le ALI‘I”. Leitioa maua e Isaako le filemu tele. I le Kenese 22:1-18, ina ua saisai e lona tamā, Isaako ma tuu I luga o le fata faitaulaga e osi ai le taulaga, sa filemu lelei o ia. Na ia maua le filemu tele, aua na faafaileleina ma a’oa’o o ia I ala o le Alii. 

Le au pele e, e finagalo Ieova Saloma e faateleina le filemu i lou olaga faapea olaga o lau fanau, peitai e faatoa mafai ona ia faia pe afai e te fiafia ma naunau I ona ala ma ana tulafono. O le faateleina o lou naunau ma fiafia I ana poloaiga ma ona ala, o le faateleina foi lena o lou filemu, I le suafa o Iesu, Amene.  

OPEN HEAVENS

MATALA LE LAGI MO LE ASO LULU 19 FEPUARI  2025

(tusia e Pastor EA Adeboye)

Manatu Autu: Ieova Nisi (Jehovah Nissi)

Tauloto -Tusi Paia–Esoto 14:14 ”O le a tau le ALI‘I mo ‘outou, ‘ae fa‘alologo ‘outou.”

Faitauga – Tusi Paia – Esoto 14:21-31

“ Ona fa‘atū ai lea e Mose le fatafaitaulaga, ma fa‘aigoa ai. O le ALI‘I o lo‘u tagāvai o ia.”

‭‭ ‭‭Esoto 17:15

E tau le Atua mo lana fanau pe a o’o ina faasagatau mai iai nisi. I le Faaaliga 12, ina ua amataina e satani se vevesi i le lagi, e lei gaioioi se tamaimai lima o le Atua, na ia faatagaina Mikaele le agelu sili e fofōina le mataupu. Peitai a o’o loa I lana fanau, e tulai le Atua e puipui iai latou. 

“E tu‘uina mai e le ALI‘I o ē ita ‘iā te oe o ē laga mai ‘iā te oe ‘ia fasia i ou luma; o le ala e tasi e ō mai ai i latou ‘iā te oe, a o ala e fitu e sōsōla atu ai i latou i ou luma.” Teuteronome 28:7 

‭‭

Fai mai le fuaitau lea, e fasia e le Atua o ē ita ma laga mai ia te oe ma faasosola ese I ala e fitu.  O so’o se taimi e taulamalama ma faafefe ai e le fili fanau a le Atua, e tulai mai o ia e puipui iai latou. 

I le tele o tausaga talu ai, sa iai se taitai fitafita i Nigeria ua fia avea ma peresitene o le atunuu. Na ia talanoa I tagata fai vai faataulaitu, ua fai iai, e iai se tamaloa i le Redemption Camp, e tatalo nei e aua nei taunuu lena fuafuaga. Na faatonu loa e lenei taitai fitafita ni ana fitafita e o mai e saisai atu a’u. I na aso, a saisai ma ave se tagata e lē fitafita, e tele le avanoa e lē toe foi mai ai lea tagata. O le tulaga lelei mo a’u, ua ou faalogo I lenei fuafuaga, ma o le mea moni, na o’o mai lo’u fefe. Na ou alu I lena po ma tatalo ma ina ua uma le viiga I le Atua mo ni nai minute, na ou faapea atu, ‘Le Alii e, i la’u mataupu’, ae faapea mai le Atua, ‘Aua e te popole I lena mataupu, ua maea ona ou faia. A o’o I le asō Faraile I le taimi o le sauniga o Agaga Paia, faatonu tagata e faamanuia le tausaga fou I tagata uma’. E ui lava o Iuni le vaitau lea, na ou faia le faatonuga a le Atua, ae o’o atu i le aso Gafua, na faalogo uma le atunuu atoa i le tala I le maliu o lenei taitai tautaua o le fitafita. Na tulai le Atua e tau mo a’u ae o’o I lou tamaimailima e lei gaoioi. Ou te folafola atu I le suafa o Iesu, o so’o se tagata o loo fuafua lou paū I lalo, e lē taunuu ma e paū ia I lalo. E leai se fuafuaga a lē fili e faasagatau ia te oe e manuia, i le suafa  o Iesu. 

Le au pele e, e leai se auupega e faasagatau ia te oe e manuia (Isaia 54:17). O le mafuaaga ona o le Atua o lou tagāvai, o ia o Ieova Nisi. A faamaopoopo tagata e faasagatau ia te oe , aua ete fefe. Tau ina ia e malolo I le Alii, o ia e Puipui ia te oe, e tau mo oe, o lou maluapapa. E pei ona ia tau mo Isaraelu ma faaumatia le au Amaleka I le Esoto 17, e tau o ia mo oe. E na te faasaoina lau fanau mai lima o le fili ma ia faaolaola I au mea uma. 

Tatalo

Tamā, ou te faafetai ia te oe ona o oe o lo’u tagāvai e te tauina so’o se taua mo a’u, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 18 FEPUARI  2025

(tusia e Pastor EA Adeboye)

Manatu Autu: Ieova Rohi (Jehovah Rohi)

Tauloto -Tusi Paia–Isaia 40:11 ”Na te leoleoina lona lafu e pei o le leoleo mamoe; na te sapaia tama‘i mamoe i ona lima, ma tau‘ave i latou i lona fatafata; na te ta‘ita‘i filemū i mamoe ‘ua fānanau.”

Faitauga – Tusi Paia – Ioane 10:1-14

“O le ALI‘I, o lo‘u leoleo mamoe o ia; e leai se mea ‘ou te mativa ai.” ‭‭Salāmo‬ ‭23‬:‭1‬ ‭

Ae e lei faafetauia e Tavita Koliata I le 1 Samuelu 17, o ia o se taule’ale’a sa leoleoina le lafu mamoe a lona tama. I se tasi aso, na sau se urosa, e osofa’i I ana mamoe, ae ia fasiotia. I se isi foi aso, na sau se leona ma ave’esea se tasi o tamai mamoe, ae sa tuliloa e Tavita, ua ia fasiotia le leona ae fa’asao mai le tamai mamoe. E le’i fa’atagaina e Tavita ni manufeai e aveesea se tasi o ana mamoe, sa ia puipuia malosi iai latou, e tusa pe lamatia ai lona ola. A faapea o Tavita o se tagata sa naunau malosi e puipui I ana mamoe,  e lē sili atu ea le leoleo mamoe lelei, o Iesu Keriso? Afai lava e avea le Alii ma ou leoleo mamoe, e mautinoa lona saunia o mea uma, o lou puipuiga mai le Atua , o lou toe fuataina, faamalologa, tamaoaiga faulai ma le anoanoai o Isi faamanuiaga faalelagi. 

Le ‘au pele, o le Alii o lou leoleo mamoe; o oe o lana matafaioi tausi. O le mafua’aga lena ua ia faapea mai ai i le Mataio 6:25-33, ia aua nei e popole i mea taumafa, poo ‘ofu e te ofuina, ae ia e muai sa’ili muamua ia te ia ona fa’aopoopoina mai lea o isi mea uma o e manaomia ma naunau iai.

A ia e maitau lelei, e na o mamoe e mafai ona avea le Alii ma o latou leoleo mamoe. Fai mai le Mataio 25:32 o le a vavae ese e le Atua ana mamoe mai ‘oti. I lena fuaitau o afioga  pa’ia a le Atua, o ‘oti, e lē mo le Atua; ua na o mamoe e mo lē Atua. O le fesili la: “Po’o oe o se mamoe?”

I le Ioane 10: 27, o lo’o faapea mai Iesu, e fa’alogoina e ana mamoe, lona siufofoga. O fea se taimi sa gata ai ona e mafuta ma le Atua ina ia e fa’alogoina lona siufofoga? Ae po’o e silafia lona siufofoga? Fai mai le  Salamo 100: 3, o mamoe e lē mo i latou lava, o i latou o ‘ele i lima o le fai ipu ‘omea. E tusa ai ma le Mataio 25:33-40, o mamoe e iai le alofa I o latou loto, e latou te fafaga i ē fia a’ai, fa’aofu i e lē lavalavā, ma asiasi i e ua tu’ulafoaiina. Ae le gata i lea, e maua le puipuiga mai le leoleo mamoe pe a osofa’ia mai manu feai. Po o avea ‘oe o se mamoe i totonu o le lafu mamoe a le Atua?

A o le tumutumuga o le alofa o le leoleo mamoe, o lona tu’uina atu lea o lona ola mo ana mamoe, ma sa faia e Iesu i lona maliu i luga o le satauro (Ioane 10:11; Ioane 15:13). Le ‘au pele, po ua e taliaina le foa’i a le leoleo mamoe  lelei e tumau e faavavau mo lou fa’aolataga? Afai e te lei taliaina, e tatau ona e  taliaina i le taimi nei lava. Afai e ‘avea le Alii ma ou leoleo mamoe, e te maua  mea uma e te mo’omia. O lou ‘avea ma mamoe i le lafu mamoe a le Atua, o se tulaga e pito sili ona lelei e tupu ia te oe.  

Tatalo: 

Leoleo mamoe o lo’u agaga, ou te tuuina atu ia te oe le pule atoa i le asō, e o’o i le faavavau, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 17 FEPUARI  2025

(tusia e Pastor EA Adeboye)

Manatu Autu: Ieova Sama (Jehovah Shamma)

Tauloto -Tusi Paia–Salamo 16:8 ”Ou te tu‘u le ALI‘I i o‘u luma e lē aunoa; auā o i lo‘u itū taumatau o ia, e le fa‘agae‘etia ai lava a‘u.”

Faitauga – Tusi Paia – Kenese 28:10-22

“O lona fa‘ata‘amilosaga, e sefulu afe ma afe e valu o lona fua lea; o le igoa fo‘i o le ‘a‘ai, e āfua mai i lea aso, O LO‘O AFIO AI LE ALI‘I.” Esekielu‬ ‭48‬:‭35‬ 

Pe ete talitonu iai pe leai, pe ete faalogoina o ia pe leai, o loo iai le Alii ma oe i taimi uma. Na foliga mai I tama Eperu e toatolu, ua nā o I latou ao iai I luma o le tupu, peitai ina ua lafoai I latou i le ogaumu aasa, ua manino I le toatele o tagata, sa iai lava Iesu ma i latou (Tanielu 3:8-30). 

A iai le Atua ma oe, e leai se mea e tu faalavelave I ou ala. E iai lava se tala ou te fiafia e faamatala i ni tamai i’a e tolu, na faafefe e se malie ma lana tama I totonu o le sami loloto. E iai se aso na faia se latou fono tatalo ma valaaulia le Alii iai. Ina ua afio mai le Alii , na fesili poo lē a lē faalavelave ae poo lē a se mea e mananao ai.  Ae fai mai le i’a muamua, ‘ou te manao I ni mata I vaega uma o lou tino ina ia mafai ona ou iloa atu le malie pe a  sau mai soo se vaega’. Fai mai le i’a lona lua, ‘le Alii e, aumai ni ou apaau malolosi, ina ia mafai ona ou lele ese mai le sami loloto pe a osofai mai a’u e malie’. Na faia e le Alii manaoga o i’a e lua ma ina ua faliu atu i le i’a lona tolu,  ae faapea mai, ‘pau le mea ou te manao ai ia e faatasi ma a’u I soo se mea ou te alu iai’. 

Ina ua alu ese le Alii, na o mai malie, ma na ō muamua I le i’a ma mata e tele  aua e matagofie i le vaai ona ua soo uma lona tino I mata. Na vaai atu le i’a i malie ua o mai ona ia aau loa lea I lē matafaga . Na vaai atu I se vaivai ona oso lea iai. Peitai ina ua oso ae le lā, ua mago le vaivai ona pē ai lea o le i’a. Ina tuli e malie le i’a e fai apaau, na lele ese ma le vai, peitai o se aeto o loo feleleai I lea vaega na vave ona ia pueina ma ai. O lē i’a lona tolu na saogalemu pea aua o soo se taimi e agai mai iai le malie ma lana tama, e latou te vaai atu lava i se ataata o se tamaloa o loo mulimuli ia te ia, ona fefefe ai lea. O lē i’a na ole atu ia iai le Atua ma ia, na ola pea ma manumalo I le ogatotonu o tulaga lamatia. 

Le au pele e, o lē iai ma le afio o le Atua ma oe i taimi uma, e pau lea o le puipuiga mautu I mea faigata e fefefe ai i lenei olaga. O Ieova Sama o lona uiga, ‘O loo afio ai le Alii’, ma a afio atu le Atua ma oe I lou ofisa, la’u pisinisi, lo’u aiga, ma soo se vaega o lo’u olaga, e leai se amioleaga poo se mea leaga e faasagatau ia te oe e manumalo. 

Tatalo

Faafetai le Alii e mo lou afio e faifaipea I lo’u olaga, I le suafa o Iesu, Amene. 

OPEN HEAVENS

MATALA LE LAGI MO LE ASO SA 16 FEPUARI  2025

(tusia e Pastor EA Adeboye)

Manatu Autu: Ieova Irae (Jehovah Jireh)

Tauloto -Tusi Paia–Filipi 4:19  ”A o lo‘u Atua e fa‘a‘atoa e ia ‘iā te ‘outou mea uma e matitiva ai ‘outou, e tusa ma le faula‘i o lona vi‘iga, ‘iā Keriso Iesu.”

Faitauga – Tusi Paia – Kenese 22:1-14

O le suafa Ieova Irae na fai e Aperaamo ina ua uma ona fa’aalia e le Atua lona faamaoni i luga o le mauga o Moria. Na alu Aperaamo I le mauga e ave Isaako e osi ai le taulaga, peita’i ua uma ona saunia e le Atua le mamoe mo le taulaga e sui iā Isaako. Na faaigoa e Aperaamo le nofoaga o Ieova Irae aua ua ia faapea mai, “E aumaia e le Atua le tali o manaoga a o le’i tupu.” I le tusi faitau lea, e matua’i lē malamalama Aperaamo pe na faafefea ona o’o mai le mamoe. E faapea fo’i ia i tatou, e lē manaomia fua ona e iloa pe faafefea ona faataunuu e le Atua tali o ou manaoga. Pau lau pitolaau e tatau ona fai, o lou faamoemoe i le Atua ma talitonu na te foai mai le tali.

E mafaia e le Atua ona auina atu le fesoasoani mo oe mai so’osemea, e o’o i nofoaga e te le’i iloa muamua. Ina ua avea a’u ma ta’ita’i aoao, sa o’u asiasi i lo’u nuu, ma sa fai mai se tagata fai pisinisi ia te a’u, “o oe o le ta’ita’i aoao ae leai se fale iinei i lou nu’u e nonofo ai au mālō pe a asiasi mai, o le a o’u avatua piliki e fau ai le fale, se’i maua sau tupe totogi mai.” Sa o’u faapea ifo i lo’u loto, “Oka, o se vavega mai le Atua.” Ona ou fausia ai lea o se fale laititi e lē telē. Peita’i o le aso na ato ai le fale, na lafo mai ai e le tagata fai pisinisi se poloaiga ia te a’u e totogi atu i le aso lava lea le tau o piliki. E leai sa’u tupe na i ai i lea taimi, o lea na o’u tagi ai i le Atua. “Tamā ou te le’i sauni e fau se fale, o le tamaloa lenei na aumaia le manatu ia te a’u, a’o lenei ua o’o mai ai puapuaga. Faamolemole fesoasoani mai ia te a’u.” Sa o’u tatalo i le po atoa ma i’u ai ina o’u moe. Ina ua malama le taeao, sa sau se tagata ia te a’u ma fai mai, na fai atu le Atua ia te ia, ia malaga mamao mai i le itu I Matū agai mai i le aai o le Togiola e momoli mai se teutusi ia te a’u. Ina ua vaai mai le tamaita’i iā te a’u, sa faapea mai, “o loo o’u sailia le ta’ita’i o le ekalesia lenei.” Sa ou tali, “o le Atua.” Ona fai mai lea, “ou te iloa o le Atua peita’i o loo o’u suea lona sui.” “Ia o a’u lenei,” o la’u tali atu lea. Ona faapea mai loa lea o le ave feau. “Na fai mai le Atua ia te a’u ananafi o’u te sau e avatu le teutusi lea ia te oe.” O le taimi muamua ma le mulimuli lea na ou vaai ai i lenei tamaita’i. Sa o’u tatalaina le teutusi, ma o le aofaiga tonu o le tupe o la’u aitalafu I le fai pisinisi sa i totonu o le teutusi. 

O lo tatou Atua, o Ieova Irae moni ma faamaoni- o lē foai sili. Atonu e te lē o iloa poo fea, a o afea, pe faafefea ona faataunuuina e le Atua ou manaoga, peita’i ia e nofo ma lou mautinoa o lou Atua na te foai ma aumaia i taimi ma aso uma e lē aunoa.

Tatalo

Tamā faamolemole auina mai lau fesoasoani mo a’u I le asō, I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 15 FEPUARI  2025

(tusia e Pastor EA Adeboye)

Manatu Autu: Epenesa (Ebenezer)

Tauloto -Tusi Paia–Salamo 46:1  ”O le Atua, o lo tatou malu ia ma lo tatou malosi; e fai o ia ma fesoasoani silisili i puapuagā.”

Faitauga – Tusi Paia – Salamo 60:11-12

I le 1 Samuelu 7:12, ina ua faapea mai Samuelu, ‘Epenesa’ o lona uiga ‘ua fesoasoani le Alii iai tatou e o’o mai i lenei mamao’, ua ia silafia le uiga o ana faamatalaga. Ua ia silafia na fesoasoani le Atua ia Isaraelu i le Esoto 12:1-51, ina ua ia faamaualalolina Farao o ē na faapologa iai latou, ma faasaoloto ai I lana fanau. I le suafa e sili I suafa uma, o soo se malosiaga o loo taotaomia oe I lalo, o le a latou faasaoloto ia te oe. Afai latou te lē fia faamaamulu ia te oe lemū, o le a faamalosia latou e faamaamulu ia te oe, i le suafa o Iesu. 

Na silafia e Samuelu na fesoasoani le Atua ia Isaraelu e sopoia le sami ulaula i le Esoto 14. Na ia silafia na fetalai le Atua e ala ia Mose ma faapea atu ia te ia e latou te lē toe vaai I ō latou fili na vaai iai I lenā po. Na ia silafia na fesoasoani le Atua iai latou i le Esoto 15:22-26 ao latou iai i Mara ina ua le mafai ona feinu i le vai māi. Na muai saunia le fesoasoani mo I latou ae latou te lē I o’o atu iai, ma ua liua le vai mai i le vaiinu lelei. O so’o se mea e faatupuina oe e te tagi, o le a faamuta I le asō, I le suafa o Iesu. 

Na silafia foi e Samuelu na fesoasoani le Atua ia Isaraelu i le Esoto 17:1-6 ina ua fia feinu, na auina mai e le Atua matautia le vai mai le papa. Na ia aumaia se mea lelei mai se tulaga e leai se mea. E foliga e matuā faigata mea uma I nisi o le toatele o tagata, peitai ou te fia faailoa le talalelei mo oe, o le tausaga lenei, o le a e tofo I le fesoasoani a le Atua e sili atu muamua I le suafa o Iesu. 

O Epenesa o le faailoga o le faamoemoe. Ou te lē iloa poo le a le mamao o lau malaga, peitai o le a solo lelei ma manuia mea uma. Afai lava o loo e fesootai pea i le Atua na taitaina mai oe e o’o mai I lenei mamao, e fesoasoani pea o ia ia te oe. Fai mai le Failauga e 9:4, afai lava o loo e manava, e iai le faamoemoe mo oe. E lei auina mai oe e le Atua I lenei mamao e lafoai ia te oe. E faamaoni tele o ia  ma e na te lē tuulafoai ia te oe. 

Ua e faavaivai, faanoanoa po’o fememeai ona o le naunau ia maua se tali? Tuu ese le fefe, fememeai ma faanoanoaga, ae fai ou laei o le faamoemoe aua ua iinei Epenesa, ua afio mai e fesoasoani ia te oe. Fai mai le Eperu 13:5-6

“……‘Ou te lē tu‘ua lava oe, ‘ou te lē tu‘ulafoa‘i lava ‘iā te oe.” O le mea lea tatou te mafai ai ‘ona fai atu ma le fa‘amalosi, “O le Ali‘i o lo‘u fesoasoani ia, ‘ou te lē fefe lava, i se mea e faia e tagata ‘iā te a‘u.”

O soo se tagata e faamoemoe ia Epenesa, o le a ataata loa aua e o’o mai lava lana fesoasoani. Amata loa ona e ataata ma fiafia aua ua o’o mai lou fesoasoani. 

Tatalo

Epenesa, ou te faamoemoe ia te oe, faamolemole tulai ma fesoasoani mai ia te au, i le asō, I le suafa o Iesu, Amene. 

 HEAVENS

MATALA LE LAGI MO LE ASO FARAILE  14 FEPUARI  2025

(tusia e Pastor EA Adeboye)

Manatu Autu: Tatalo mo faaipoipoga (Prayers for marriages)

Tauloto -Tusi Paia–Efeso 4:2“Ia ‘outou loto maulalo lava ma le agamalū, ma le ‘onosa‘i, ‘ia ‘outou fa‘apalepale le tasi i le tasi ma le alofa,”

‭

Faitauga – Tusi Paia – Failauga 4:9-12

Tatalo

1. Faafetai le Alii e, mo lē meaalofa ma faamanuiaga o le ulugalii ua faatasia i le faaipoipoga paia. 
2. Tamā, ia avea lenei tausaga o se tausaga o tautinoga o le fiafia e malie ai i ulugalii faaipoipo uma I lo’u aiga, Ekalesia ma le nuu, I le suafa o Iesu. 
3. Tamā, faamolemole ia faaumatia soo se fuafuaga a le tiapolo e faatamaia le tofi o le faaipoipoga. Ia tumau lona faapaiaina e pei ona e faia ai I le va o le tane ma le avā, I le suafa o Iesu. 
4. Tamā, faamolemole ia e foai I ulugalii faaipoipo uma le poto ma le malamalama e osia ai se mafutaga vavalalata e tusa ma lou finagalo, I le suafa o Iesu. 
5. Tamā ia e faamanuia  I tagata uma ua ausia tausaga e tatau ona faaipoipo ai, i lo’u aiga , Ekalesia ma le nuu, ia maua ni o latou toalua lelei, i le suafa o Iesu. 
6. Tamā, ia iai lou filemu I faaipoipoga a ulugalii uma o loo luluina ma lutia I faigata ma osofaiga a le fili, I le suafa o Iesu. 
7. Tamā, faamolemole ia e faamanuia I ulugalii faaipoipo uma i lo’u aiga, Ekalesia, ma le nuu o loo faamoemoe atu ia te oe mo se fanau, foai ni tamaiti e ola faapaiaina. Ia aua nei iai seisi e pa, I le suafa o Iesu. 
8. E leai se auupega e faasagatau mai i lo’u toalua (poo le toalua I le lumanai) e manumalo, i le suafa o Iesu. 
9. Tamā, faamolemole ia e faamanuia I lou fale ma le aiga, ma ia avea lou fale ma le aiga e matagofie e pei o le lagi I le lalolagi nei, I le suafa o Iesu. 
10. Tamā, faamolemole ia maua le mamalu ma le faaneetaga i lou suafa e ala i la’u faaipoipoga, I le suafa o Iesu. 
11. Tamā, faamolemole ia aua lava nei misia e lou aiga le faaipoipoga a le faatoanofotane, le tamai mamoe,  I le suafa o Iesu. 
12. Tamā ia e faamanuia I ulugalii faaipoipo uma ina ia tumau pea le faavae ia te oe, ia avea pea lau Upu e taitaia ai faaiuga uma I le taimi o le solo lelei ma taimi o le faigata. Ia la iloa ona tamomoe atu ia te oe I soo se mea aua e te alofa mutimutivale I lau fanau, I le suafa o Iesu e tatalo atu ai nei, Amene.   

OPEN HEAVENS

MATALA LE LAGI MO LE ASO TOFI 13 FEPUARI  2025

(tusia e Pastor EA Adeboye)

Manatu Autu: O le olioli o le faamoemoe (The joy of hope)

Tauloto -Tusi Paia–Roma 5:5“O le fa‘amoemoe fo‘i e lē mā ai, auā ‘ua fa‘amaligi mai le alofa o le Atua i o tatou loto e le Agaga Pa‘ia ‘ua foa‘iina mai ‘iā te i tatou.”

‭‭

Faitauga – Tusi Paia – Salamo 130:5-7

O loo soifua loʻu fesoasoani, ma e leʻi suia lava o ia (Eperu 13: 8). O ia o le Alefa ma le Omeka, o le amataga ma le gataaga, o lo‘o soifua, na soifua fo‘i, o le a afio mai,(Faaaliga 1: 8). Na ia fesoasoani mai ia te aʻu, ma o le a ia fesoasoani mai ia te aʻu seia oʻo i le iuga. O lo’u faamoemoega lea, ma ou te talitonuina.

E lamatia oe, pe a leai sou faamoemoe; ‘aua lava ne’i leai sou faamoemoe. I le 1 Tupu 19: 1-8 ina ua lē taunuu ma ō gatasi mea ua tutupu ma le manatu o Elia, na ia ole i le Atua e faaumatia lona ola. Peitaʻi, i le 1 Tupu 21: 1-24, e te iloa I le fuaiupu 20, o Aapo lea na sola ese mai ai Elia, ua ia sola ese ma Elia ma faapea mai, ‘ua e maua a’u, lo’u fili’. O le tagata sa tuliloaina Elia o lea ua sola ese ma ia. I le suafa o le Alii o ‘Au, o I latou uma o loo tuliloaina oe, o le a sosola ese pe a vaai ia te oe. Aua neʻi e faatagaina se tasi e fai atu, ua leai se faamoemoe o lau mataupu, e lē o i latou o sou Atua, e lē o I latou foi na taitai maia oe e o’o mai I le asō. A faapea atu ia oe seisi, ua e tuai, fai i ai, e latou te lē pulea le taimi. O le Atua e pulea le taimi ma vaitau uma o lenei olaga, ma e nate le’i aumaia oe i lenei mamao e tuulafoai ia te oe.

O le Afioga a le Atua o se pusa teu oloa o faamoemoega. So’o se taimi lava e te faalogo atu ai, ua leai se faamoemoe, tatalo ma folafola lana Upu. O loo faapea mai “E ui lava ina itiiti lou amataga, a e matuā faateleina lou iuga. (Iopu 8: 7). Auā e leai lava se mea e tasi e le mafaia e le Atua. (Luka 1:37). O le i ai o le Alii i lou olaga, so’o se mea e matuā faigata ona faataunuuina, ou te molimau atu, e mafai ona ia faataunuuina, i le suafa o Iesu. Ua ia folafola na te faʻamanuiaina ma faaopopoina manuia mo oe ma lau fanau (Salamo 115: 14). Na ia faapea foi, ina mafaufau ia i le ua sa’o lana amio, ma vaavaai i le ua amiotonu; auā o le iuga o lea tagata o le manuia lava lea (Salamo 37:37). 

“O le Atua fo‘i e tupu mai ai le fa‘amoemoe, ‘ia fa‘atūtūmuina ‘outou e ia i le ‘oli‘oli uma ‘atoa ma le filemū, ‘ina ‘ua fa‘atuatua; ‘ina ‘ia tele lava lo ‘outou fa‘amoemoe ‘ona o le mana o le Agaga Pa‘ia.” Roma‬ ‭15‬:‭13‬ ‭

O le Atua, o ia o le Atua o faamoemoega uma. Afai na te tuuina lē faamoemoega I se tagata, e na te faaopoopo i le faamoemoe, le olioli ma le filemu. E I ona luma le fiafia e malie ai; ma le ‘oli‘oli e fa‘avavau(Salāmo‬ ‭16‬:‭11‬). Le au pele e, o soo se mea e o’o mai ai ni lagona ua leai sou faamoemoe, aua e te faatagaina. Tumau i le Upu a le Atua ma fai ou ofu e fai ai viiga. Ou te tatalo ina ia e mauaina ni tala lelei ma le fiafia I le asō e faatumuina ai oe i faamoemoega ma le olioli, i le suafa o Iesu.

OPEN HEAVENS

MATALA LE LAGI MO LE ASO LULU 12 FEPUARI  2025

(tusia e Pastor EA Adeboye)

Manatu Autu: Oloa moni (True riches)

Tauloto -Tusi Paia–Mataio 16:26;“Auā se a le aogā i le tagata pe ‘āfai na te maua le lalolagi uma, ‘ae māumau ai lona ola? Se a fo‘i se mea e avatu e le tagata e togiola ai lona ola?”

‭‭

Faitauga – Tusi Paia – Mareko 8:34-37

O le tele o faalapotopotoga faalilolilo e latou te folafola I tagata le oloa ma le pule, ma isi faamanuiaga matagofie o le ola nei. Afai ua valaaulia oe  e te auai I se faapotopotoga faapea, ou te fautua ia te oe ia e tamoe ese, aua e pepelo uma a latou folafolaga, ‘aua e te auai ai, aua e te iloa ai o se mailei a le fili ua matuā faigata ona e toe alu ese. E te iloa ai o lē a tauanau e lē tiapolo lou agaga e fesuiai ma mea feilafi na faatosina atu ai oe I totonu. O nei mea uma e lē taulia ma faatusa I lou agaga e pei ona faaalia I le tauloto mai le Tusi Paia I le asō. 

Ioe, e leiloa pe ua tele naua tupe a au uo I lo lou manatu. E latou te fai atu ia te oe I le manaia ma le matagofie o latou olaga, latou te ono lauina lou valea, I lou le auai I ai latou ao faia mea e lē fiafia iai le Atua. Le au pele e, ou te ta’u atu ia te oe le mea moni, o le toatele o I latou, o lo’o ola faafoliga ma o lo’o salamo I le auai ai, ma e tele atu le tau o loo latou totogia I lō faamanuiaga o maua mai ai. Aisea e faataua ai lou agaga i mea e leai ni aogā i le faavavau? E na o faamanuiaga a le Atua e lē faaopoopoina iai se faanoanoaga, loto tigā ma faafitauli e tele. 

Fai mai le Faataoto 10:22 “O le fa‘amanuia a le ALI‘I, o lea e fa‘atamao‘āiga ai; na te lē fa‘aopoopo i ai se tigā.”

‭‭

E lē foaia e lē tiapolo ni mea fua. A ia foai atu oloa, e na te faoa mea e lē faataua e tupe e aofia ai lau fanau, soifua maloloina, filemu o le mafaufau ma manuia o augatupulaga o le lumanai. E pei o Esau, na ia faataua lona tofi o le ulumatua I se ipu meaai ma ia lē maua foi ana faamanuiaga moni, o I latou e saili i le oloa mai auala o le amioleaga, ma faigauo ma tagata amioleaga, e lē i’u lelei. E latou te maua lē tigā. 

O lē faanaunataiga o lō tatou Tamā I le lagi o le foai I lana fanau o mea uma ia faulai latou te fiafia ai (1 Timoteo 6:17). E na te foai I lana fanau le malosi e maua ai le oloa ma le tamaoaiga, ae o le tapulaa, ia latou manatua ma ta’uta’u le Atua I o latou ala uma. 

 “A ‘ia e manatu i le ALI‘I lou Atua, auā o ia na te avatua ‘iā te oe le malosi e maua mai ai ‘oloa, ‘ina ‘ia fa‘atumauina ai e ia lana feagaiga na ia tautō ai i ou tamā, pei ‘ona fai i le aso nei.”

‭‭Teuteronome‬ ‭8‬:‭18‬ ‭

Le au pele e, a e muai saili le Atua, e na te faaopoopo mea uma e te manaomia e te ola manuia ai (Mataio 6:33). O ala o le Atua e faatamaoaigaina ai tagata e ono lē televave e pei ona naunau iai le toatele, peitai o ona ala, e mautinoa, ua faia muamua I le toatele o tagata ma e faavavau, I le suafa o Iesu, Amene.