Samoan Devotional

OPEN HEAVENS

MATALA LE LAGI MO LE ASO LULU 22 IANUARI  2025

(tusia e Pastor EA Adeboye)

Manatu Autu: Faamoemoe mo ē ua liliu ‘ese (Hope for the backslidden)

Tauloto -Tusi Paia–Hosea 14:4”Ou te fa‘amālōlōina lo latou liliu ‘ese; ‘ou te alofa fua ‘iā te i latou, auā ‘ua liliu‘eseina lo‘u ita ‘iā te i latou.”

Faitauga – Tusi Paia – Ieremia 3:22-23

Ina ua faasatauroina Iesu, na manatu Peteru ua  maea ai iina lana galuega i le Atua i le lalolagi nei. O lea na ia faapea atu ai i le au uso, le au soo I le Ioane 21:3, ‘a lē mafai ona ou agai I luma, o le mea sili e mafai ona ou toe foi i le mea na ou sau ai. Le au uso e, o le a ou toe foi I le faifaiva’, ona latou manatu lea e mulimuli ia te ia. Peitai, ao faifaiva, na fetaiai ma le Alii ma ua ia toe faafoisia ia te ia. O Peteru lava lea e tasi lea na manatu ua maea lana galuega mo Keriso, ua faamaloloina tagata I lona ataata, e pei ona tatou iloa I le Galuega 5:15

“ua o‘o ‘ina ‘aumai e i latou i ē mama‘i i malae, ma fa‘ata‘o‘oto ai i moega ma fata, tau lava ‘ina ‘ia fa‘apaoloina ai nisi o i latou i le ata o Peteru pe a ui ane o ia.”

‭‭

Afai ua e toilalo I le galuega a le Atua I se taimi, ma ua e manatu ua le mafai e le Atua ona toe faaaogaina oe ona o agasala sa e faia, ou te fia ta’u atu ia te oe, afai e te salamo ma lafoai ou ala tuai, e mafai lava e le Atua ona faaaogaina oe I se ala maoa’e. O lana fiafiaga masani o le faaaogaina o tagata e lē tauoloa I ni auala matautia.

Le au pele e, aua e te faapei o Samasoni, na ia faia se mea e lē fiafia ai le Atua. Na alu ese ma le ala na saunia e le Atua mo ia ma ua fiafia e fai le agasala. Na o’o ina saisai e le fili, ma ua lē toe maua le fesootaiga ma le Atua. Peitai, ina ua ia tatalo I Lē e ou le alofa mutimutivale e fou I taeao uma (Auega 3:22-23) ma ua toe faaleleia lea fesootaiga. E le gata ua toe fesootai, na toe maua e Samasoni lona malosi na leiloa. I le aso e tasi, na ia fasiotia Filisitia e sili atu I Filisitia na ia fasiotia I lona olaga atoa. Ua faaalia ai na faamagalo e le Atua ma faafoisia Samasoni, peitai e lei faamagaloina e Samasoni o ia lava, ma ia ole I le Atua ia oti o ia faatasi ma ona fili (Faamasino 16:17-30).Afai ua e liliu ‘ese ma le Alii, e mafai e le Alii ona toe faafoisia oe pe afai e te faataga ia. Toe foi ia te ia I le tatalo, amata ona e suesue I lau Tusi Paia, savali I le usiusitai ma mafuta ma Isi kerisiano faatuatua. E te iloa ai a’o e laalaa atu ia te ia, e 99 ana laa e agai mai ai, ia te oe. 

Ua ou vaai I le toetele o ē ua liliu ‘ese ua toe faafoisia e le Atua. O le mea moni ua e leiloa na liliu ‘ese. Ina ua maea ona toe salamo moni, na toe taitaia I latou e le Atua ma faaaogaina I latou ma le mana. Le au pele e, afai ua e alu ese ma ala o le Atua, e mafai foi ona ia faia mo oe pe afai e te salamo moni ma toe fo’i mai ia te ia. E mafai e le Atua ona toe faafoisia ma le atoatoa soo se kerisiano faatuatua na liliu ‘ese pe afai e salamo moni, I le suafa o Iesu, Amene.  

OPEN HEAVENS

MATALA LE LAGI MO LE ASO LUA 21 IANUARI  2025

(tusia e Pastor EA Adeboye)

Manatu Autu: O le mana o tautinoga (The power of testimonies )

Tauloto -Tusi Paia–Salamo 26:7”Ina ‘ia lagona atu le leo o le vi‘iga, ma ‘ia ta‘uta‘u atu ou vāvega uma lava.”

Faitauga – Tusi Paia – Salamo 145:1-12

Fai mai le Roma 10:17, e tupu le fa‘atuatua i le taulogologo atu, o le taulogologo atu fo‘i o i le afioga a le Keriso lea. O loo faaalia mai foi I le Faaaliga 12:11, o tautinoga o auupega malolosi e mafai ona faaumatia le tiapolo. O le mafuaaga lena ou te fa’asoa ai lava a’u tautinoga. Aua ua ou maitauina, e le manatua e le tele o tagata upu mai le Tusi Pa’ia ou te lauga ai, ae manatua a’u  tautinoga. A e tepa i tua i mea ua faia e le Atua mo oe, e te maua le loto tele e te manumalo ai i so’o se faalavelave poo se luitau e o’o mai i lau savaliga.

I le 1 Samuelu 17:1-51 ina ua feagai Tavita ma Koliata, o tautinoga a Tavita sa faamausalī ai I lona loto e manumalo ia Koliata. Sa ia faapea mai, “o le Atua na fa’asaoina a’u mai le urosa ma le leona, e na te faaumatia Koliata”. O le Atua na faasaoina oe e o’o mai i le aso, e faasaoina oe seia o’o i le gata’aga, i le suafa o Iesu.”

I le tusi o Mareko 10:46-52 o Patimaio, o se tauaso sa aisi i tafatafa o le auala. Sa ia fa’alogo o loo aga’i atu Iesu, ona ia valaau lea ma le leotele ia te ia mo se fesoasoani. Pe fa’apefea ona ia iloa e mafai e Iesu ona fa’apupula ona mata? Ou te mautinoa e ala ona iloa e Patimaio, ona sa ia faalogo i molimau o vavega na faatino e Iesu. Ma ina ua fa’alogo o Iesu lea o loo maliu ane, sa ia iloa lelei o le a o’o atu se vavega ia te ia.

I ni tausaga se tele ua tuana’i sa ou molimau i la’u avā sa ola e aunoa ma se taotoga i le maea ai ona taoto I le fanauina o le ma fanau e toatolu. Sa faapea mai le foma’i: “Ua lava le lua fanau,” ma sa ma malilie iai. Ae mulimuli ane ua ma fanaufouina ma faitau le Tusi Pa’ia o loo faapea mai, ‘E leai se mea e le mafaia e le Atua”. Sa ou talitonu iai. Ona ma malilie lea ma lo’u to’alua o le a ma taumafai mo se isi pepe ae ma te le toe tapā le fesoasoani a se fomai. Sa fanau manuia le ma pepe fou i le alofa tunoa o le Atua. Sa ou molimau atu I lenei tautinoga mo le ulua’i taimi i le nuu o Kaduna, i le itu i matu o Nigeria, ao ou lauga i le ulutala “O la’asaga e 10 mo lau vavega.”

Sa faalogo se tasi o tina i le polokalame, ma ia faamauina la’asaga e 10 nei. Sa ia ta’oto fa’alua i ana pepe muamua ma ua toe ma’itaga i lena taimi. Ina ua lata i le taimi e fanau ai, sa ia tago atu i lana tusi ma mulimuli i laasaga na faamauina ai. Ma i le taimi o ia fa’asolo ma fa’atino la’asaga nei, sa fanau ai loa lana pepe.

Le ‘au pele, “O Iesu, e tumau o ia ananafi, o le asō e o’o I le faavavau”(Eperu 13:8 ). A e faalogo i se molimau a se tagata e uiga i le tulaga o lo’o e uia ma a’afia ai, ia e faatuatua o le a o’o mai lau vavega. Ia e faamauina ni vavega se 5 ua faia e le Atua mo oe, ona fa’asoa atu lau tautinoga iai latou i lou siomaga, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 20 IANUARI  2025

(tusia e Pastor EA Adeboye)

Manatu Autu: E na te mafaia ma finagalo iai (He is able and willing)

Tauloto -Tusi Paia–Efeso 3:20”O lenei, ‘ia ‘iā te ia o lē na te mafaia ‘ona faia o mea uma le fa‘asilisili lava i mea tatou te ole atu ai ma mafaufau i ai, e tusa ma le mana o lo‘o matuā galue i totonu ‘iā te i tatou,”

Faitauga – Tusi Paia – Mareko 1:40-45

E pei ona talanoa atu ananafi, o le Atua e maua mai ai fesoasoani uma, ma e na te mafaia ona fesoasoani ia te oe I so’o se tulaga o loo e iai. Fai mai i le Ieremia 32:27 “Fa‘auta, o a‘u lava o le ALI‘I, o le Atua o tagata uma; pe faigatā ‘ea ‘iā te a‘u se mea e tasi?”

Na ia faailoa ia Sara I le Kenese 18:9-14 o le a ia maua se atalii, ae ata Sarà. Na ia tali mai iai, ‘e iai ea se mea e faigatā ia te au?’ E leai ma se faigata o lau mataupu I le Atua, e mafaia e ia mea uma. 

E iai se tasi o ou afafine sa talitonu pea I le Atua mo sana tama, peitai ua fai iai fomai e lē mafai ona maua sana tama. E iai se aso, o le tausoga o lona toalua na fai I lona toalua, ‘aua le maimaua au tupe aua e lē fanau lou toalua’. Ina ua ia fesili pe aisea, ae tali ane ua maea ona aveesea e taulaitu lona toala fanau (tulou). E lei leva ae auai mai loa lo’u afafine I se tasi o matou sauniga o Agaga Paia ona o’o mai lea o le Upu a le Atua, ‘e iai se tagata o loo iinei e leai sona toala fanau, peitai ua fetalai le Atua o le a ia foai atu se masaga’. I le masina lava lea e tasi, ua manuia. Ina ua oo I le taimi e fanau ai, na talosaga lona toalua e taoto. Ina ua aumai pepe masaga I fafo, fai mai le fomai, faatoa ia fa’afanauina lea o se tinā ma maua se masaga ae leai se toala fanau. Na matou fiafia ma faafetai I le Atua ma ina ua mavae ni nai tausaga, na fai mai lo’u afafine e fia asiasi mai ma lana masaga. Sa ou manatu o le a sau ma lana masaga lea na tatalo ai, ae leai na sau ma seisi masaga fou. O loo iai le Atua e mafai ona ia faia mea matautia ma e ofo ai e sili atu I ou manatu. Ou te tatalo, ao soifua o ia, e na te faia se vavega mo oe I le asō, I le suafa o Iesu. 

E le gata e mafaia e le Atua ona fesoasoani ia te oe, e fiafia ma naunau iai. I le faitauga o le  Tusi Paia o le asō, na sau se lepela ia Iesu ma fai mai e na te iloa e mafaia e Iesu ona faamamā o ia, peitai e na te lei mautinoa pe naunau iai. Le au pele e, e leiloa pe o e manatu, ‘ou te iloa e fai vavega le Atua, ua ou vaai o galue, ma ua ou faalogo i le tele o tautinoga, peitai ou te lē o mautinoa pe o naunau e fesoasoani mai’. Ou te folafola atu I le suafa o Lē na valaau ia te au, ua o’o mai lou aso. Alu atu I le Atua ma ole atu mo se fesoasoani ma o le a e maua le fesoasoani, I le suafa o Iesu

Tatalo

Le Alii e, ou te iloa  e te mafaia ma o lo’o e naunau foi iai, faamolemole fesoasoani mai ia te au, I le suafa o Iesu, Amene. 

OPEN HEAVENS

MATALA LE LAGI MO LE ASO SA 19 IANUARI  2025

(tusia e Pastor EA Adeboye)

Manatu Autu: O le faapogai o fesoasoani uma (The source of all help)

Tauloto -Tusi Paia–Salamo 60:11“Ia e fesoasoani mai ‘iā te i matou i le puapuagā; auā e lē aogā lava le olataga mai tagata.”

‭‭

Faitauga – Tusi Paia – Salamo 54:1-7

Fai mai Afioga Paia a le Atua, o le fesoasoani e maua pea e lē aunoa mai i le Atua o lē na faia le lagi ma le lalolagi. O le fesili, e te saili fesoasoani ea i le Atua? I le Salamo 46:1 fai mai Tavita, O le Atua o lo tatou malu ia ma lo tatou malosi, e fai o ia ma fesoasoani silisili i puapuaga. O le fesoasoani a le Atua e avanoa i so’o se taimi aemaise taimi ua e puapuagatia ai. O le Atua o le fesoasoani mo ē ua tu’ulafoa’iina.

Sa i ai se tinā sa le maua sana fanau I le tele o tausaga ma na tatalo fa’aauau le faifeau mo ia, peita’i e leai lava se mea na tupu. I se tasi aso na fai atu ai le faifeau I le tinā lenei, “Tinā ua fananau uma fafine na o’u tatalo ai vagana oe, o le a se faapogai?” Na faamatala e le tinā I le faifeau aso o aoga na maua ai o ia i le maitaga ma sa ia taumafai e fa’apa’ū le pepe ma mafua ai loa ona tutupu faafitauli i lona tino ma ave ai o ia i le falema’i. O le taumafaiga o le fomai e faasao lona ola na fai ai sona taotoga e aveese ai lona toala fanau (tulou). Ina ua faalogo le faifeau I le faamatalaga a le fafine na fai mai, “Lona uiga ua leai sou toala fanau (tulou)? Aisea na e fai mai ai ou te tatalo ia e maua se fanau?” Na tali le tinā, “Lau Susuga o oe na e a’oa’o mai e leai se mea e lē mafaia e le Atua ona fai.” Na amata i le aso lea ona ‘alofia e le faifeau le tinā. Na maitauina e le tinā le suiga o le faifeau ma filifili ai i lona loto o le a faasaga a’e ona mata i mauga i le Alii o lē na faia le lagi ma le lalolagi mo se fesoasoani ae lē o le faifeau poo le ta’ita’i aoao.

O le isi po na fai ai le miti a le tinā, ua alu atu se tagata tino ese ia te ia o loo ia u’uina le pa’u o se manu (tulou). Sa fefe tele le tinā i le tagata tino ese ma lē mafai ai ona gaioi. Na sau le tagata tino ese ma taai le pa’u o le manu I le sulugatiti o le tinā. I le taimi na fai ai le ta’utinoga a lenei tinā, ua to’alima lana fanau.

Le au pele e, aua ne’i e fa’amoemoe i se faifeau, fai evagelia poo se ta’ita’i aoao mo se fesoasoani a ia e vaavaai i le tafu’e, le faapogai o fesoasoani uma. E leai se isi e mafai ona fesoasoani iā te oe e aunoa ma le fa’atagaga a le Atua. Aua ne’i e vaai i tagata, alu sa’o oe i lē o loo faamoemoe I ai tagata uma mo se fesoasoani.

Tatalo

Tamā, e faasaga a’e o’u mata ia te oe, faamolemole auina mai lau fesoasoani mo a’u I le asō, I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 18 IANUARI  2025

(tusia e Pastor EA Adeboye)

Manatu Autu: Fai ni atalii (Produce Sons)

Tauloto -Tusi Paia–1 Tesalonia 5:14 “Matou te ‘ai‘oi atu fo‘i ‘iā te ‘outou, le ‘au uso e, ‘ia ‘outou apoapoa‘i atu i ē amio fa‘atalanoa, ‘ia fa‘amafanafana i ē loto iti, ‘ia fesoasoani i ē o vaivai, ‘ia ‘outou ‘onosa‘i i tagata uma lava.”

‭‭

Faitauga – Tusi Paia – Filemoni 1:10-18

I faamatalaga o le autū o le asō, o se atali’i o se isi e foliga ia te oe ma e maua ai nisi o ou uiga. I le tusi 1 Samuelu 22, na faamaopopo e Tavita tagata sa maumausolo, ma mulimuli ane a’oa’o i latou e avea o ni tagata totoa e pei o ia. E na o le tolu ma le afa tausaga na faatasi ai Iesu Keriso ma ona so’o, peita’i e o’o ifo i le taimi ua ia tuua i latou, ua matua’i iloga suiga, ua popoto pei o nisi ua fa’ai’uina a’oa’oga (Galuega 4:13). A lua mafuta ma se isi mo se vaitaimi, e mafai ona maitauina e tagata se suiga lelei i lea uso?

Fai mai le Tusi Paia a e a’oa’oina ma le faapelepele se auauna e afua mai ina itiiti, mulimuli ane e fai o ia ma atali’i ia te oe (Fa’ataoto 29:21).

O le tama itiiti o loo tā’ua i luga o se taimi o le olaga o le tagata e lei malamalama tele I le soifuaga. Afai o i ai ni tagata o tou galulue, tausi ma fesoasoani i ai pei o sau fanau. Fa’asa’o ma a’oa’i i latou pe a sesē, a’oa’o I ai mea uma e tatau ona o latou iloa ma aua e te musu gofie a o taumafai i latou e faaleleia o latou vaivaiga. E uma ifo se taimi o le a avea i latou pei o ni atali’i ma ni afafine ia te oe.

E toatele tagata e fai mai e lē mafai ona faasaga i amioga faavalevalea a’o le tulaga moni e leai se loto onosai mo tagata. O tagata faapea ua galo ia i latou o le onosa’i o se tasi lea fua o le Agaga (Kalatia 5:17).

O le toatele o tagata o loo lagolago ia te a’u i aso nei na amata mai e tele vaivaiga, pe a tu’u i se gagana faigofie. Peita’i na o’u a’oa’o i latou e ala i le fesoasoani mai o le Alii ia te a’u. Ou te le’i lēlavā pe musu e a’oa’o ma e uma ifo, ua avea i latou pei ni fanau ia te a’u, o loo fai ni a’oa’oga tāua.

Afai e fia avea oe o se ta’ita’i manuia, ia e iloa faaalu lou taimi i tagata.

I Yorubaland, fai mai se fuaitau, o le tagata e toatele lana fanau e lē mafai ona ita gofie. O nisi taimi, o le mafuaaga o le lagona tu’ulafoa’iina o tagata ona ua o latou tuliesea fanau na avatu e le Atua ia i latou ona o le leai o so latou loto faapalepale. E toatele tagata o loo feoa’i solo ma le tele o le agava’a e mafai ona tula’i mai o ni tagata lelei pe ana i ai se tasi e a’oa’oina i latou. Peita’i, e lē o fai atu e tatau ona tumau lou tu’u avanoa i tagata o e faaauau pea ona fai mea leaga poo le aafia i soligā tulafono. Afai ua tele ni fautuaga ma ni taumafaiga e sui tagata faapea ae lē fia faalogo ma lē taumafai e sui, ua mafai loa ona e fai pei ona faia e le aposetolo o Paulo I le Tusi 1 Korinito 5:5. Peita’i afai o tagata e iloga i latou e amio lelei ae i ai nai uiga faaletonu, ma o loo naunau e aveese ma sui i le lelei, aua e te oso i lou mā’ale’ale ma le leai o se onosai e lafoa’i ai i latou i le lalolagi. Saili ia e tapenaina ni atali’i lelei mai tagata e avatu e le Atua i lou olaga, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 17 IANUARI  2025

(tusia e Pastor EA Adeboye)

Manatu Autu: Aua e te lē manatu I a’oa’iga (Don’t outgrow corrections)

Tauloto -Tusi Paia–Eperu 3:15 “Manū o fai mai, “O le aso nei ‘āfai tou te fa‘alogo ai i lona si‘ufofoga, ‘aua tou te fa‘ama‘a‘a i o ‘outou loto, pei ‘ona faia i le finauga.”

‭‭

Faitauga – Tusi Paia – Kenese 18:16-33

 Mo soo se mea e faia pe le faia foi, e iai lona taui poo le taunuuga. O le mafuaaga lea e tatau ai ona e fiafia ma faatāuaina le maua o tagata I lou siomaga e mafai ona fautua ma faasa’o oe pe a iai se mea e te faia e lē lelei ina ia aua lava nei e afāina I se taui. Peitai o le toatele o tagata e lē fiafia pe faalogo I fautuaga ma a’oa’iga. Fai mai le Tusi Paia o ia tagata o ni auauna 

“E lē mafai ‘ona a‘oa‘iina o le ‘au‘auna i ‘upu; auā ‘ua lagona e ia, ‘ae lē tali atu i ai.” Fa‘ata‘oto‬ ‭29‬:‭19‬

E mafai ona e filifili pe sili atu le a’oa’iga I upu pe sili atu le maua o taui. Afai e te poto, e te filifili i le a’oa’iga I upu ina ia e alo ese ma taui e maua i le faia o mea sese. O I latou e popoto e lē faatali I tagata e faatonu ma aoaia i latou. Ae latou te fesili i tagata i lo latou siomaga po ni ā ni o latou manatu e Iloa ai po’o lelei ma sa’o a latou mea o loo faia. I le Mataio 16:13, na fesili Iesu Keriso i lona au soo  faapea: “Pe se a le ‘upu a tagata i le Atali‘i o le tagata, po o ai?”

‭‭

I nisi faaupuga, o loo ia fesili, ‘e tusa ai ma a’u amio ma upu e fai, o le a lo’u ituaiga tagata o lo’o ou taumafai e faailoa atu I tagata?’

Le au pele e, e taua le fai ma masani lou fesili I tagata e ta’u atu ia te oe o latou manatu e faatatau ia te oe ini vaega e faaleleia aemaise pe afai o oe o se taitai. E mafai ona lē tusia ai o latou igoa ina ia tuusaunoa e faaali mai manatu moni. 

E mafai lava ona tuputupu a’e se tagata seia o’o I se tulaga ua manatu e lē mafai ona toe sesē sana mea e faia tusa pe na te iloa e iai tulaga ua sesē ai. E tāua le alo ese mai lea tulaga lē lelei ae ia faamautinoaina e iai pea tagata I lou siomaga e mafai ona o atu ma faailoa atu le mea moni ia te oe. E lē tatau ona e manatu e te lē toe manaomia le a’oa’iga. Tusa pe faitioa tagata ia te oe ae leaga o latou loto, e mafai ona aua nei e amanaiaina o latou loto leaga ae faalogo pe iai lava se mea e tatau ona e faaaogaina e faaleleia atili ai lou tagata. 

Le au pele e, e mafai ona e ‘alo ese mai le tele o tigā i le olaga nei pe afai e avea oe o se tagata e faalogo I a’oa’iga. Afai e faasa’o ma a’oa’i oe e tagata e faatasi pe faalua ae vaai atu e te ita ai, e lē toe fai atu. E matuiā lea tulaga aua e mafai ona latou iloa atu oe o loo e agai atu e te paū I se vanu, ae tuu pea oe e te paū. E o’o I le Atua e mafai ona ia tuua oe pe afai e a’oa’i faafia oe ae e te lē faalogo lava (Roma 1:28). Ia aua lava nei tuua oe e le Atua e te faaumatia lava oe, I le suafa o Iesu. O le ā se taimi mulimuli na e faia ai se suiga lelei mo lou olaga ina ua maea ai se a’oa’iga? I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 16 IANUARI  2025

(tusia e Pastor EA Adeboye)

Manatu Autu: E tatau ona faaolaina lou nuu (Your hometown must be saved)

Tauloto -Tusi Paia–Luka 9:6 “Ua latou ō atu, ‘ona fa‘ata‘amilo ai lea i lea ‘a‘ai ma lea ‘a‘ai e folafola le tala lelei, ma fa‘amālōlō i ma‘i i mea uma.”

Faitauga – Tusi Paia – Kenese 18:16-33

I le faitauga o le Tusi Paia o le asō, o loo savali atu Aperaamo I Sotoma ma tamaloloa e toatolu sa asia o ia. Ao iai I le ala, sa faaali e le Atua ia Aperaamo o le a ia faaumatia Sotoma ma Komoro ona o le tele naua o le agasala. Ou te talitonu  na faaali e le Atua ia Aperaamo lana fuafuaga aua na ia finagalo e tatalo ma tu Aperaamo i le vā mo tagata o lea nuu. 

Na tatalo ma tu Aperaamo i le vā ma na talia e le Atua mea uma na ia ole atu ai. Peitai, e lei lava tagata amiotonu I totonu o Sotoma ma Komoro ma o lea na iu ai ina faaumatia. O loo faaalia ai iina, a valaau le Atua mo le au tatalo e tutū I le va i talosaga, ina ia taofia le faaumatia o se atunuu poo se taulaga, afai e na te lē mauaina ni kerisiano se toatele, e ono iu lava lea atunuu poo le nuu e faaumatia. 

Ao tatalo ma tū I le va Aperaamo mo Sotoma ma Komoro, e leiloa pe sa ia matuā manatu I lona tei o Lota. E mautinoa sa vave ona ia faitau ma faavasega fuainumera e aofia ai Lota, o lona toalua ma ona afafine. Na ia tau manatu foi e tatau ona iai ni uo tama a afafine o Lota o loo iai ma o latou matua. Ina ua maea le faavasegaina o ana fuainumera, na ia iloa ai e tatau la ona maua ni kerisiano se toasefulu o ni fanau a le Atua I lea aai. E leiloa poo le mafuaaga lea na finau ai I le Atua ma faapea, “Le Alii e, afai e te o’o atu I Sotoma ae e maua ni tagata amiotonu se toasefulu, e te faasaoina le nuu ona o I latou?” Na talia e le Atua, peitai e lei atoa se toasefulu o tagata amiotonu I totonu o le taulaga. Ou te tatalo, a asiasi le Atua I lou nuu, e na te maua ni tagata amiotonu e sili atu I le toasefulu, ona maua ai lea o lona alofa mutimutivale i lō le faamasinoga. 

O le mafuaaga lea e tatau ai ona e faia vave se gaoioiga i lou nuu. E tatau ona e faamautinoaina e susulu pea le malamalama o le talalelei, tusa pe faia e nisi o tagata o le nuu le amioleaga e ono o’o mai ai le toasa o le Atua, o le a ia manatu i lana fanau ona faasaoina lea o le nuu po’o le atunuu. 

Ia faamautinoaina o loo e talai le talalelei i taimi uma I tagata o lou nuu ina ia e liliuina ni agaga se tele i ala o le amiotonu. Fai mai le Tusi Paia a e faia lea tulaga, o oe o se tagata poto, ma e sili le mamalu o loo i lou lumanai (Tanielu 12:3). 

Na fetalai maoti Iesu I ē na mulimuli ia te ia e amata ona talai le talalelei I o latou nuu ina ua ia faapea mai I le Galuega 1:8, o le a avea I latou o molimau ia te ia e amata mai I Ierusalema, sosoo ai ma Iutaia, o Samaria seia oo atu i tuluiga o le lalolagi. 

Le au pele e, lauga ma aoao le upu a le Atua I tagata o lou nuu. O le finagalo lea o le Atua, ma a e usitai, e matua faamanuiaina oe ma lou nuu.  Lauga, talai le Upu a le Atua ma amata se mafutaga I lou nuu e faamautinoa ai o loo susulu iina le malamalama o le Atua, I le suafa o Iesu, Amene.   

OPEN HEAVENS

MATALA LE LAGI MO LE ASO LULU 15 IANUARI  2025

(tusia e Pastor EA Adeboye)

Manatu Autu: Ia e iloa le pa I Ieriko 2 (Identifying the Jericho wall 2)

Tauloto -Tusi Paia–1 Korinito 15:33 “Aua ne‘i fa‘asesēina ‘outou, “O lē feoa‘i ma ē amio leaga e leaga ai amio lelei.”

Faitauga – Tusi Paia – 2 Samuelu 13:1-14

O le a faaauau I le asō le faatalatalanoaga na ou amataina ananafi I vaega e mafai ona taofia le agai o se tagata I luma. E iai taimi, o le pā e taofia lou agai I luma o se lua mafutaga ma se tagata. E tele tagata latou te lē iloa, peitai o tagata e te alofa ma pele ia te oe, e ono avea ma faalavelave I lou agai I luma. 

I le Kenese 12:1-5, na ave e Aperaamo Lota ina ua valaau le Atua ia te ia e tuua lona aiga  ae agai I se nuu o le ia faaali atu ia te ia. Peitai, ana lē tuueseeseina i laua ma Lota i le Kenese 13:14-17, e le fetalai le Atua ma faaali atu ia te ia le nuu folafolaina. 

O le taitai faaleagaga e te galue ai i lalo o lana taitaiga e mafai ona taofia lou agai I luma (1 Tupu 13:1-24). O le mafuaaga lea e tatau ai ona e filifili ma le faaeteete lou tamā faaleagaga poo lou taitai foi, e ala I le taitaiga a Agaga Paia. Fai mai le Ioane 15:20, e lē tatau ona sili atu le auauna I lona taitai. Poo ai lava e te filifilfi e fai ma ou taitai e fua iai le mamao e te oo iai. Ia e tatalo ma filifili se tagata o loo tuputupu pea ina ia aua nei iai se pa puipui e taofia lou agai I luma. 

O se tasi o ituaiga tagata e mafai ona avea ma pā o Ieriko o loo taofia lou agai I luma o sau uo. O I latou e te taua o au uo e fua iai le mamao e te oo iai i le olaga nei. O le mafuaaga lea na lapatai  ai Solomona I lona atalii I le Faataoto 1: 10-15 ia aua nei feoai ma mafuta ma nisi o ituaiga uō e leaga. 

Ina ua ou faaolaina, o se tasi o mea muamua na ou faia o le suia o a’u uo. Sa faigata ma tigā, peitai ana ou mafuta pea iai, semanū ou te lē o’o mai I le mamao lea ua ou iai. O Amanono, semanū e umi lona soifua ma manuia o se atalii o Tavita, peitai na iu leaga lona olaga ona sa iai sana uō e leaga. Fai mai le Tusi Paia i le 2 Samuelu 13:3, “Sa ‘iā Amanono o lana uō, o lona igoa o Ionatapa”

E iai tagata e foliga mai o ni uo peitai o I latou e pei o ni pa I Ieriko. A iai ni au uo faapea, ia e alo ese mamao ma I latou aua o ni fili I latou I lou agai I luma. A iai sau uo e na o le faia lava o tala o tagata, ae lē taitai tatalo ma talanoa I Le Tusi Paia, o le a avea lena uo ma faalavelave I lou agai I luma. Afai e iai ni au uo e fautua lava I mea e tetee I le Tusi Paia ma uunaia oe e faaitiitia lou galue mo le Atua, o na uo e pei o le pa I Ieriko, e I le va o oe ma fuafuaga sili a le Atua mo lou olaga. Le au pele e, faamolemole tamoe vave ese ma na uō. 

Tatalo

Tamā, faamolemole fesoasoani mai ia te a’u ina ia ou alo ese mamao mai a’u uo e taofia le agai I luma o lo’u olaga, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 14 IANUARI  2025

(tusia e Pastor EA Adeboye)

Manatu Autu: Ia e iloa le pa I Ieriko 1 (Identifying the Jericho wall 1)

Tauloto -Tusi Paia–Salamo 114:7-8 “Le ‘ele‘ele e, ‘inā gatete ia oe i luma o le Ali‘i, i luma o le Atua o Iakopo; o lē na te liua le papa e fai ma vailepa; o le papa alā e fai ma vaipuna.”

‭‭

Faitauga – Tusi Paia – Iosua 6:1-20

I le faitauga o le Tusi Paia o le asō, ua latalata le fanauga a Isaraelu i le nuu na folafolaina, peitai sa tulai se pa I le ala. Na silafia e Iosua e taofia lo latou agai i luma e lenei pa. Na faaali e le Atua ia Iosua le auala e talepe ai i lalo le pā ma taitai ona tagata I le nuu ua ia folafola ma saunia mo I latou. A e lagona e peiseai e iai se mea o loo taofia lou maua o faamanuiaga ma folafolaga a le Atua, e muamua lou saili po’o le a lea mea, ona e ole lea I le Atua mo se auala e te manumalo ai I lea tulaga o taofia lou agai I luma. Afai e lei mafai ona e iloa le tulaga o loo taofia lou agai I luma, e leiloa pe sese le taua o lo’o e tauina, ae o lou fili moni o loo tu’u saunoa e lē o lu’ia ma faasagatau iai. 

I le tele o tagata, o malosiaga o le pogisa o a latou pa ia o Ieriko o loo taofia lo latou agai I luma, aua foi o le galuega lava a le tiapolo o le gaoi, fasioti ma faaumatia (Ioane 10:10). Afai e te maitauina e iai se mea e malosi atu ia te oe o loo taofia oe pe a o’o ina lata o le a e maua se manuia poo se manumalo, e tatau ona e tatalo e faasagatau I lea malosiaga. O le talalelei lenei, fai mai le Isaia 54:17

“O ‘au‘upega uma e faia e tau ma oe e le manuia ia; o laulaufaiva uma e finau atu ‘iā te oe i le fa‘amasinoga ‘e te fa‘asalaina ia. O le tofi lenā o ‘au‘auna a le ALI‘I, o a latou amiotonu fo‘i mai ‘iā te a‘u lea, ‘ua fetalai mai ai le ALI‘I.”

‭‭

Le au pele e, afai o oe o se afafine  poo se atalii o le Atua ma o loo e auauna i le Atua ma le filigā, e iai lau aiā faaletulafono e te faasalaina ai soo se malosiaga e tulai ma finau mai ia te oe. O nisi o nei malosiaga e malo tiaa e le alu ese pe a faatasi ona e tulia. O lea, e tatau ona e tatalo na anapogi ia faifaipea ona faatoa ō ese lea. Na fetalai Iesu I le Mareko 9:29, o nisi o temoni e lē mafai ona faatoilaloina sei vagana le tatalo ma le anapogi. Afai ua e faia uma nei mea peitai e te lē o vaai atu I se suiga, e te ono manaomia se tagata e tatalo ma oe ina ia lua tatalo I le maliega e tasi. Fai mai le Teuteronome 32:30  “Pe fa‘apefea ‘ona tulia e le to‘atasi le to‘aafe, ma tutuli e le to‘alua o afe o sefulu, ‘ana le fa‘atauina atu i latou e lo latou Papa, ma tu‘uina atu i latou e le ALI‘I?”

‭‭

E mafai foi ona e fai i se faifeau a le Atua e sili atu lona tulaga ma le malosi faaleagaga e tatalo mo oe. A e faia uma nei laasaga, e leai se malosiaga e mafai ona tu I ou ala. 

Tatalo, 

Ou te folafola atu I soo se malosiaga o loo tu I ou ala, alu ese loa i le taimi nei, i le suafa o Iesu, Amene.  

OPEN HEAVENS

MATALA LE LAGI MO LE ASO GAFUA 13 IANUARI  2025

(tusia e Pastor EA Adeboye)

Manatu Autu: E tofotofo e le Atua (God tests)

Tauloto -Tusi Paia–1 Peteru 4:19 “O lenei, o i latou ‘ua tigāina e tusa ma le finagalo o le Atua, ‘ia latou tu‘uina atu ma le amio lelei o latou lava ola i lē na faia mea uma, o ia e fa‘amaoni.”

‭

Faitauga – Tusi Paia – Kenese 22:1-12

O le Atua o le Atua fuā (Teuteronome 4:24), e lē finagalo i se mea e suia lona tulaga i lou loto. E finagalo le Atua  e te alofa atu ia te ia ma lou loto atoa (Luka 10:25-28), ma e iai taimi na te tofotofo ai ia te oe pe moni e te alofa ia te ia e pei ona tatau na iai. O lau tali i taimi faapena e fua iai pe e te alofa moni ia te ia pe leai. O nei tofotofoga e ono tigā pe faaosofia le fiafia tele, peitai e lē tatau ona e tigā ai e te faafiti ai ia te ia, pe fiafia tele e te faagalo ai  ia te ia. E tatau ona tumau o ia e taulai iai lau vaai  i taimi uma. 

A finagalo le Atua e tofotofo ia te oe, e na te ono faataga oe e ui i se ala e tigā sei vaai pe e te faafiti ia te ia e pei ona ia faia ia Iopu (Iopu 1). E le gata i lea, e mafai ona ia faataga e te ui i se tulaga maualuga ma telē sei vaai poo le ā lau tali iai. Afai e te usiusitai pea ma lafoai lou ola ia te ia pe a maea ai, e sili atu mea na te faia mo oe. 

I ni tausaga e tele talu ai, ao faagasolo se tasi o matou sauniga, na fai mai le Atua ia te a’u e faia se perofetaga ma folafola e tolu ni faamanuiaga tetele o le a o’o atu I se tagata. O le faamanuiaga muamua e ofo atu i le Atua, o lona lua e vaelua tutusa ma lea tagata ma le Atua, ao le faamanuiaga lona tolu, e ave mo lea tagata. Ina ua maea le lua vaiaso, na sau se fafine ua oti lana tane ma fai mai ua sau e aumai le tupe o le faamanuiaga muamua. O loo ‘ou iloa, o loo taufaasoa ana tupe ona na maliu lona toalua ae tuua se nonogatupe o loo ia tau togitogiina. O lea na ou fai atu ai ia te ia ailoga e mō ia le perofetaga. Sa ia faatauanau mai, ma o lea na ou tago ai i le tupe ma tuu ese i tei ua toe foi atu mo lana tupe. E lei leva se taimi ae vili atu le faletupe e faatoese i lenei fafine, ma faapea atu e sesē i latou ma e telē se tupe e tatau ona totogi atu ele fale tupe ia te ia. Na tofotofo o ia e le Atua I se faamanuiaga laitiiti, ma ina ua pasia lenei tofotofoga, na ia avatu se faamanuiaga e sili atu. 

O lenei, e tatau ona e silafia,  e le mafai e le Atua ona tofotofoina oe i se ala e leai se malosiaga ia te oe e mafai ai, ma o soo se tofotofoga, e na te auina mai le alofa tunoa e te manumalo ai (1 Korinito 10:13). O le manumalo i se tofotofoga a le Atua, e tatau ona e silafia le alofa tunoa e na te saunia mo oe. Ia aua lava nei e toilalo pe a tofotofoina oe e le Atua, i le suafa o Iesu. 

Tatalo

Tamā, faamolemole foai mai ia te a’u le alofa tunoa ou te alofa ai ia te oe i taimi uma poo le a lava le tulaga ou te o’o iai, i le suafa o Iesu, Amene.