Samoan Devotional

OPEN HEAVENS

MATALA LE LAGI MO LE ASO GAFUA 23 TESEMA 2024

(tusia e Pastor EA Adeboye)

Manatu Autu: O le mafuaaga o lona fanau mai 1 (The reason for His birth 1)

Tauloto -Tusi Paia– Isaia 7:14 “O le mea lea e tu‘uina mai ai e le Ali‘i lava le fa‘ailoga ‘iā te ‘outou; fa‘auta, e tō le taupou ma fānau mai se tama tane; na te fa‘aigoa fo‘i ‘iā te ia o Emanuelu.”

Faitauga – Tusi Paia – Mataio 1:18-23

O le fanau mai o Iesu Keriso, o se vaega faapitoa ma le taua o le talafaasolopito o le tagata. O loo faaalia ai le alofa o le Atua i le lalolagi (Ioane 3:16), ma lona mana ua faataunuuina ai folafolaga uma , tusa lava pe na taumafai le tiapolo e faasagatau atu ina ia aua nei taunuu. I le Mataio 2:16, na taitaiina e le tiapolo  Herota e faia ni gaioioiga uma ina ia fasiotia Iesu.  Ua oo ai ina fasiotia tamaiti uma e lua tausaga ma lalo ifo i totonu o Ierusalema i le vaitau lea na fanau ai Iesu. Peitai, e lei manumalo le tiapolo aua na fetalai le Atua e tuimomoina e Iesu lona ulu. 

“Ou te fa‘atupuina le feitaga‘i ‘iā te ‘oulua ma le fafine, o lau fānau fo‘i ma lana fānau; na te tu‘imomomoina lou ulu, a o oe ‘e te tu‘imomomoina lona mulivae.”‭‭Kenese‬ ‭3‬:‭15‬ ‭

I le Ioane 14:30, na fetalai Iesu, 

“Ou te lē toe tautala atu ‘iā te ‘outou i ni ‘upu e tele; auā o le a sau le ali‘i o lenei lalolagi, ‘ae lē maua e ia se mea ‘iā te a‘u.” Ioane‬ ‭14‬:‭30‬ ‭

Na ia soifua e aunoa ma se agasala, na ia manumalo a’ia’i i le lalolagi (Ioane 16:33). E ala I lona amiotonu, ua mafai ai ona tatou ola i le amiotonu ma manumalo i le lalolagi. Fai mai le 1 Ioane 5:4-5

“Auā o i latou uma o ē fānau mai i le Atua, e manumālō i latou i le lalolagi; o lenei fo‘i le manumālō e manumālō ai i le lalolagi, o lo tatou fa‘atuatua lava. O ai sē na te manumālō i le lalolagi, pe ‘āfai e lē talitonu, o Iesu o le Alo lava ia o le Atua?”

‭‭

E tatau I kerisiano uma ona talitonu moni o Iesu Keriso o le alo o le Atua soifua ma e mafai ona maua le mana e ola ai e aunoa ma le agasala. Fai mai le Filipi 2:13, o le Atua o lo‘o galue i totonu ‘iā tei tatou ‘ina ‘ia ‘tatou loto i mea e finagalo malie ai o ia ma ‘ia ‘tatou galulue ai ma taofia ai le agasala. 

‭‭

A tatou fiafia ma faamanatuina le fanau mai o Iesu Keriso, o loo tatou faamanatuina le galuega togiola mai le agasala. O loo tatou faamanatuina e le gata o lona fanau mai, ae o le galuega na mafai ai ona tatou faaolaina ma taua I tatou o fanau a le Atua. O le fesili, ua e fanaufouina ea? O le ala e te iloa ai pe ua e fanaufouina moni, pe afai o loo e soifua e aunoa ma le agasala. Fai mai le Tusi Paia i le 1 Ioane 3:9 “O i latou uma o ē ‘ua fānau mai i le Atua, latou te lē faia le agasala; auā o lo‘o tumau i totonu ‘iā te i latou lona uiga; e lē mafai fo‘i ‘ona agasala, auā ‘ua fānau mai i latou i le Atua.”

‭‭

Le au pele e, e lē na o le ai ma fiafia i le vaitau lenei, ia e malamalama o le fanau mai o Iesu Keriso ua tuuina atu ai ia te oe le malosiaga e ola ai e lē faia le agasala. Savali i le faatuatua I aso uma ma soifua ai. O le fanau mai o Iesu ua tuuina atu ai le mana ia te oe e soifua ai e aunoa ma le agasala ma manumalo i le lalolagi, I le suafa o Iesu, Amene. 

OPEN HEAVENS

MATALA LE LAGI MO LE ASO SA 22 TESEMA 2024

(tusia e Pastor EA Adeboye)

Manatu Autu: Ia faapaiaina (Be holy)

Tauloto -Tusi Paia– Levitiko 20:26 “A ‘ia pa‘ia lava ‘outou mo a‘u; auā o a‘u o le ALI‘I, o lo‘o pa‘ia lava a‘u, ‘ua ‘ou vavae‘eseina fo‘i ‘outou i nu‘u uma, ‘ina ‘ia fai lava ‘outou mo a‘u.”

Faitauga – Tusi Paia – 1 Peteru 1:15-16

A fetalai le Atua ia paia outou aua e paia o ia, e lē mo le lelei o le Atua. O le Atua e matautia ma e maua mea uma ia te ia, o lou faapaiaina e lē faaopoopoina pe toesea ai se mea mai ia te ia. A fai sau filifiliga e ola paia pe leai, e tumau lava le Atua. 

O le taui o le agasala o le oti (Roma 6:23). O le agasala e oo mai ai faigata, faanoanoaga, fememeai ma se olaga maualalo I tagata agasala. O se avega mamafa i le loto o le tagata agasala. O le tulaga lea e mafai ai e masini (lie detectors) ona iloa le tagata o loo pepelo aua e fememeai le loto o le tagata pe a pepelo. E toatele tagata e lē umi ona soifua pea, ona o le tele o le fememeai o latou loto i amioleaga latou te faia. O le poto le soifua  faapaiaina, e maua ai le filemu o le mafaufau, mauoa, alofagia e le Atua ma le soifua faafualoa. O le toatele o tagata agasala e manatu o loo popoto, peitai o le ola i le agasala e lamatia ai o latou ola ma e ono faaumatia ai i latou. E sili atu lo’u valea mo le Atua Ina ia ou ola filemu ma fiafia I ana faamanuiaga uma. 

O nisi tagata e faapea mai o le ola paia e faigata aua foi o loo taumafai e ola paia e faia i lo latou malosi. Ae o loo faapea mai le Tusi Paia ia ola paia e pei o lou Tamā I le lagi e paia, o lona uiga o loo faapea mai, ‘ia faapei o le Atua’. Fai mai toeaina o le matou nuu, a faapipii se laulaau ma se fasimoli, e i’u ane lana ua fasimoli. A e faalatalata I le Atua, e i’u lava ina e pei o ia. O le ala e ola paia ai le tagata, o le faalatalata i le Atua. O le tele ona e vaavaai i le pupula o le Alii ma lona mamalu, o le vave foi lena ona e liua ma foliga e pei o ia (2 Korinito 3:18). 

Afai e lei tuuina atu lou ola ia Keriso, e tatau ona e faia loa nei, o le laasaga muammua lea i le ola paia. Afai o oe o se kerisiano, e tatau ona e suesue i Lau Tusi Paia I aso uma. Fai mai Tavita i le Salamo 119:11  “‘Ua ‘ou teu i lo‘u loto lau afioga, ‘ina ne‘i ‘ou agasala ‘iā te oe.”

‭‭a e faatumuina lou loto i le Upu a le Atua, o le a lē iai se avanoa e iai se agasala. E tatau foi ona e tatalo e lē aunoa (1 Tesalonia 5:17). A e tatalo, e te faamalosia lou agaga e sili ma malosi atu i lou tino, ma o faaosoosoga e faia le agasala o le a faaitiitia lona aafiaga ia te oe (Mataio 26:41). 

Le au pele e, faaavanoa lou taimi mo le Atua e ala I le suesueina o lana Upu ma tatalo I aso uma. E taitaiina ai oe e soifua I ala e fiafia ma talia e le Alii. Ia paia lava outou e pei ona paia o le Atua, i le suafa o Iesu, Amene. 

OPEN HEAVENS

MATALA LE LAGI MO LE ASO TOONAI 21 TESEMA 2024

(tusia e Pastor EA Adeboye)

Manatu Autu: O Le Alii O Lē Ufiufi Ia Te Oe (The Lord Who Covers You)

Tauloto -Tusi Paia– Teuteronome 31:8 “O le ALI‘I fo‘i, o ia na te savali i ou luma; lua te fa‘atasi ma ia, na te lē tu‘una oe, na te lē lafoa‘i ‘iā te oe; ‘aua ‘e te fefe, ‘aua fo‘i ‘e te mata‘u.”

Faitauga – Tusi Paia – Isaia 41:10-13

O le Alii o lou leoleo ia; o le Alii o lou paolo lea, i lou itu taumatau. Salamo 121:5

O le paolo o loo tāua I le fuaiupu o i luga, o loo fa’atatau i se ufiufi, malu, poo se paolo i ou luga. O le avea o le Alii ma ou paolo i lou itu taumatau o lona uiga, o lona ata lafoia e i ou luga e lē aunoa, ma e lē mafai ona tuua na o oe. E lē mafai ona e tu’ueseeseina le tagata ma lona ata lafoia, poo fea lava e te alu i ai e lafoia lava lou ata i ou autafa. O lona uiga, soose taimi e te manatu ai ua e nofo toatasi na o oe, manatua lou Atua o loo afio faatasi ma oe; o le tasi o ona suafa, “O le Alii o lou paolo ia” (Salamo 121:5). O’u te tatalo ia tumau le faamalumaluga a le Alii i ou luga ma luga o mea uma e te manatu i ai, i taimi uma i le suafa o Iesu.

Atonu o nisi taimi e te fetaia’i ma ni faafitauli, ona e tilotilo solo lea, ma ua foliga ua tuua na o oe ua leai sou lavea’i. I taimi faapea, manatua, o loo i ou talane le Atua, faapei ona lua tutū faatasi ma lou ata lafoia. Fai mai le Tusi Paia I le Eperu 13:5 “Ia aunoa a ‘outou amio ma le matape‘ape‘a; ‘ia gata ‘iā o ‘outou mana‘o i mea ‘ua ‘iā te ‘outou; auā ‘ua fetalai mai o ia, “‘Ou te lē tu‘ua lava oe, ‘ou te lē tu‘ulafoa‘i lava ‘iā te oe.”

‭‭

O lo tatou Atua e lē o se tagata e pepelo ai (Numera 23:19). Afai na fetalai le Atua na te lē tuua oe, o lona uiga e i ai pea ma oe i ou autafa i taimi uma, e puipui ia te oe i so’o se taimi e te mana’omia ai se lavea’i. O le ala lea I le fai mai o le Tusi Paia I le tusi o Isaia 54:17: “O ‘au‘upega uma e faia e tau ma oe e le manuia ia; o laulaufaiva uma e finau atu ‘iā te oe i le fa‘amasinoga ‘e te fa‘asalaina ia. O le tofi lenā o ‘au‘auna a le ALI‘I, o a latou amiotonu fo‘i mai ‘iā te a‘u lea, ‘ua fetalai mai ai le ALI‘I.”

O le Paolo o le Alii o loo ‘au ma oe, e faufautua ia te oe pe a e lē mautonu i le faaiuga e fai. O le mafuaaga lea na ia fetalai ai, e faalogo fo’i oe i le siufofoga i ou tua e faapea mai, o le ala lava lenei ia e savali ai (Isaia 30:21). E fa’amalosi’au lou Atua ia te oe pe a e mafatia i lu’itau o le olaga. O le uiga lea I lana fetalaiga I le Isaia 41;10: “‘Aua ‘e te fefe, auā ‘ou te ‘iā te oe; ‘aua le fētepatepa‘i, auā o a‘u o lou Atua; ‘ou te fa‘amalosia oe. E moni, ‘ou te fesoasoani ‘iā te oe; e moni, ‘ou te tāofia oe i lo‘u lima taumatau e i ai le amiotonu.”

‭‭

Le au pele e, aua e te fefe; o le Alii o Alii o loo i ai faatasi ma oe i taimi uma. E tu lalata ia te oe pei o lou ata lafoia. Faamoemoe ia te ia, I mea uma o lou olaga. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 20 TESEMA 2024

(tusia e Pastor EA Adeboye)

Manatu Autu: O le Alii e saunia mea uma (The Lord who provides)

Tauloto -Tusi Paia– Filipi 4:19 “A o lo‘u Atua e fa‘a‘atoa e ia ‘iā te ‘outou mea uma e matitiva ai ‘outou, e tusa ma le faula‘i o lona vi‘iga, ‘iā Keriso Iesu.”

Faitauga – Tusi Paia – 2 Korinito 9:8-11

Ua saunia e le Atua mea uma e te manaomia ae e te lei ole atu ia te ia. Mo se faataitaiga, na afio muamua atu le Atua ia Aperaamo ma saunia le tamai mamoe e osi ai le taulaga e sui tulaga ia Isaako. O le vaega tonu lea na iloa ai e Aperaamo le Atua, o le Atua e Foai mai (Kenese 22:14). Ou te tatalo ia lua feiloai pea ma le Alii I soo se vaega e te manaomia ai se mea i le suafa o Iesu. 

I ni tausaga talu ai, na ou maua ai sa’u tupe mai le malo, ma ua ou fiafia aua o se tupe tele. O le taimi faigata lea a’o faatoa avea a’u ma taitai aoao o le Ekalesia, ae sa tau lē mafai e le lotu ona totogi au, ma o taimi faigata ia. Ao ou fiafia ma vivii I le Atua, ua ou manatua ua ese le pulega ua ou iai ma o lea na ou valaau atu I le Atua ma faapea, ‘Tamā, o le a le mea e te manao ou te faia i le tupe lenei?’ Na ou manatu o le a faapea mai e totogi lau sefulua’i, fai sa’u taulaga ona pule lea o a’u i le mea o totoe. Peitai na ia faapea mai e vaetolu ma tuuina atu I vaega eseese o le galuega a le Atua. Ona ia fai mai lea o se folafolaga ia te au e faapea, ‘atalii, o le a avea a’u ma punaoa mo soo se mea e te manaomia’. Ua avea lava o ia ma punaoa mo a’u e amata mai i lena taimi. E oo i taimi ua ou manatu ua leai lava se mea, na afio mai lava le Atua ma foai mai mea na manaomia mo le nā taimi. I le Kenese 17:1, na faaalia mai ai le Atua o ia e ou le malosi uma lava, ma e lava ma totoe mea mai ia te ia. Ou te tatalo o le Atua e ou le malosi uma lava e avea ma ou punaoa mo soo se mea, I le suafa o Iesu. 

E iai se taimi talu ai na ou malaga atu ai I Amerika e lauga ai. Ina ua maea ona ou lauga i se tasi o nofoaga, sa fuafuaina ou te lele i seisi taulaga e lauga ai foi. Peitai, a’o sauni le vaalele e lele, ua amata sau le asu I totonu o le vaalele ma ua matou toe o uma I fafo ma le vaalele. Ua amata tumu I tagata le nofoaga lea e tatau ona ou lauga ai peitai ua leai ma se vaalele avanoa I lea taimi. Peitai, ua ma fetaui iina ma le pailate mai le vaalele a se tagata ou te masani ai, ma ua ou fesili atu iai poo fea lona pule. Ua ia faalogo i le mea ua tupu i la matou vaalele, ua ia logo lona pule, o lē na faatonuina le pailate, e ave a’u I soo se mea ou te manao iai. O le Atua, o le punaoa o mea uma mo a’u, ua ia saunia se vaalele faaleoleo mo a’u , aua ua ia silafia o le a ou manaomia. 

Le au pele e, aua e te popole i mea e te manaomia. Tuu lou faatuatuaga atoa i le Atua, ona ia faaali mai lea o Ieova Irae ma Ieova e ou le malosi uma lava i lou olaga. 

Tatalo

Ieova Irae, faamolemole ia aua lava nei iai se mea ou te mativa ai, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 19 TESEMA 2024

(tusia e Pastor EA Adeboye)

Manatu Autu: E tu’u saoloto oe e le upu moni (The truth that makes you free)

Tauloto -Tusi Paia– Ioane 8:32 “E iloa fo‘i e ‘outou le mea moni, e tu‘u sa‘oloto fo‘i ‘outou e le ‘upu moni.”

Faitauga – Tusi Paia – Ioane 16:13, Ioane 8:36, Ioane 17:17

Na fetalai Iesu o ia o le Upu moni i le Ioane 14:6. Ona o loo taua I le upu tauloto mai le Tusi Paia o le asō o lenei, e tu’u saoloto oe e le upu moni, o lona uiga a e maua Iesu, e tu’u saoloto oe mai saisaitiaga. Fai mai le Ioane 8:36, “O lenei pe ā tu‘u sa‘oloto ‘outou e le Atali‘i, ‘ona sa‘oloto fa‘amaoni ai lea o ‘outou.”  A e maua le Atalii o le Atua, o lona uiga e te lē toe maua so’o se ituaiga saisaitiaga. 

E faaumatia e le tiapolo le toatele o tagata e ala i saisaitiaga. A vaai atu foi e lē mafai ona ia taofia tagata kerisiano faatuatua mai le auauna I le Atua, o le a ia suesuea se avanoa itiiti I o latou olaga e mafai ai ona ia saisaitia i latou. E lē aoga le malosi o se tagata pe afai e saisaitia I se mea. O le mafuaaga lea e saisai ai e leoleo tagata e ala i le lokaina o latou lima. E faia Ina ia lē mafai ona sola ese,tusa pe malosi atu I le leoleo. 

E fai si toatele o tagata o loo saisaitia e malosiaga o le pogisā. Afai e fai e nei tagata ni pisinisi o loo mauoa ai isi, e gau lava latou pisinisi. Peitai, e iai le Atua o lona suafa o le Upu Moni, o lē finagalo e faasaoloto iai latou. Ou te folafola atu I le asō, afai o saisaitia oe I soo se vaega o lou olaga, o malosiaga uma o loo latou faapologa ia te oe, e faataapeapeina I soo se itu, I le suafa o Iesu. 

E toatele kerisiano o loo pologa ma saisaitia I le mativa aua latou te lē iloa le upu moni i lo latou tofi o le faatamaoaigaina ia Keriso. O le saisaitiaga sili e ono pologa ai se tagata o le saisaitiaga o le mafaufau. O le tele ia o faamanuiaga ua saunia mo fanau a le Atua, peitai ane, e lē o maua e le toatele o kerisiano aua latou te lē o iloa le Upu moni. O le upu moni, o le Upu a le Atua e tusa ma le Ioane 17:17. O le tele lava o lou suesue i le Upu a le Atua ma le fesoasoani a Agaga Paia, o le tele foi lena o lou malamalama I au aiā tatau ia Keriso, faapea ma faamanuiaga ua ia saunia mo oe. E faia lea tulaga ina ia aua lava nei tuua oe I lalo o saisaitiaga a le tiapolo. 

Le au pele e, afai e foliga mai o loo e saisaitia I se vaega o lou olaga , suesue ma saili I le Upu a le Atua poo le a lana faasinomaga I lena vaega o lou olaga. Faalogo I lauga  ma faitau tusi na tusia e tagata kerisiano moni I vaega na o lou olaga. Ao e suesue iai, o le a ulufale le upu a le Atua, ma aumai ai le malamalama ia te oe, ona tuu saoloto lea o oe e faavavau. 

Tatalo 

Tamā, faamolemole tatala o’u mata i lau upu moni ina ia ou savali I lau faasaolotoga mamana, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 18 TESEMA 2024

(tusia e Pastor EA Adeboye)

Manatu Autu: O le Alii e faamalolō ia te oe(The Lord that heals you)

Tauloto -Tusi Paia– Ieremia 33:6 “Fa‘auta, ‘ou te faia se fusi o lona ma‘i ma se togafiti e mālōlō a‘i; ‘ou te fa‘amālōlō lava ‘iā te i latou ma ‘ou fa‘aali atu ‘iā te i latou le silisili o le manuia ma le fa‘amaoni.”

Faitauga – Tusi Paia – Mareko 1:29-45

O suafa o le Atua e faamautinoa mai ai i ai tatou mea uma e mafai ona maua mai ia te ia. O se tasi o ona suafa e maua I Le Esoto 15:26, o loo faapea mai, ‘o a’u o le Alii o lē na te faamalolo ia te oe’. O lenei mau e faamausalī ai I tagata faatuatua, poo le ā lava ituaiga gasegase tugā, e mafai e Ieova Rafa ona faamalōlō ia tei latou. 

O fomai, e eseese uma vaega faapitoa e galulue ai, ma o le faiga masani i fomai, ona faasolo atu se ma’i I se fomai e sili atu lona poto faapitoa i se ituaiga gasegase. E faapena le mea nā tupu i le fafine puna toto i le Mareko 5:25-34. Na tuuina atu ma faasolo o ia mai lea fomai I lea fomai seia oo ina ia faaaluina uma ana tupe I togafitiga. E iai se aso na ia fetaiai ai ma le fomai o fomai, o sē e lē tuuina atu o ia I seisi, ma I lenā aso, na ia maua lona faamalologa. 

Na saunia e Iesu Keriso, lou faamalologa Ina ua sauaina o ia ma faasatauroina (Isaia 53:5). Na ia talia faalavalava i sasa a fitafita Roma ina ia e faamautinoaina o le ma’i ma le tigā, e lē toe iai i lou tino. Na ia tauave o tatou tigā I le tuugamau, o lona uiga, ua lē toe iai e faavavau. 

Ou te manao foi ete iloa le Atua o Lē na te faamalolo ia te oe. A e faitau I fuaitau I le Mataio 8:16 poo le Luka 6:19, e te silafia ai na faamalolo uma e Iesu tagata m’amai na o atu ia te ia. E lei iai se mai na faigata tele ia te ia, e leai foi se tagata ua tele ma tugā tele ona ma’i ua ia lē mafai ona faamalolo. Afai o lo’o e feagai ma ni ma’i i lou tino, alu atu i le Fomai o fomai, e na te faamalōlō ia te oe ma le atoatoa. 

E tatau ona maitau mai, o le faamalologa, o meaai a fanau a Le Atua (Mareko 7:24-29). Afai e lē o oe o se fanau a Le Atua, pe o ē faapea foi o se kerisiano ae o lo’o e ola pea I le agasala, aua e te manatu e maua sou faamalologa mai ia te ia. Afai e faamalolo e Iesu se tagata agasala pe o se tagata foi e lei faaolaina, o loo finagalo ia lafoai e lea tagata le agasala i lona olaga. Afai e le salamō lea tagata ma lafoai le agasala , e ono o’o atu ia te ia se gasegase e tugā atu. O le lapataiga lea na tuuina atu e Iesu I le tamaloa na ia faamaloloina I le vai i Petesa i le Ioane 5:14. 

Le au pele e, ua maea saunia e Iesu lou faamalologa. Lafoai ma le atoatoa lou ola ia te ia ma e savali ai, o ia lē na faamalolo ia te oe. 

Tatalo

Tamā, faafetai aua o oe o Lē e maua ai le faamalologa. Faamolemole aveese ia te a’u so’o se ma’i po’o se tigā mai lo’u tino, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 17 TESEMA 2024

(tusia e Pastor EA Adeboye)

Manatu Autu: O folafolaga a le Atua (God’s promises)

Tauloto -Tusi Paia– Iosua 21:45 “E le‘i i‘uvale se ‘upu i ‘upu lelei uma na fetalai mai ai le ALI‘I i le ‘āiga o Isaraelu; ‘ua taunu‘u uma lava.”

Faitauga – Tusi Paia – Eperu 6:10-15

 E ono e maua se malosi’aga tele mai folafolaga a le Atua. I le tusi o Numera 23:19 o lo o faapea mai, o le Atua e le pei o tagata e faia a latou folafolaga ae le tausisi iai.  A fai e le Atua se folafolafolaga ia te oe, e na te faataunuuina.

E ono umi se taimi e faatali ai, a‘o le mea moni, so’o se folafolaga ua e maua mai le Atua o le a fa’ataunuuina aua o lo’o faapea mai le 2 Korinito 1:20 :.. o ana folafolaga o le “ioe” ma le “amene”.

O se tasi o ana folafolaga o lenei, e te manumalo lava I soo se osofaiga a ē amioleaga aua o loo manino le Isaia 54:17, o so’o se au’upega e faasaga tau ia te oe, e lē taunuu. O le folafolaga lea a le Atua silisili ese ma e le mafai ona le fa’ataunuuina.

O lo’o faapea mai le Teuterenome 28:7, a agai mai ni fili e faasaga tau ia te oe, o le a fasia e le Atua i ou luma. I se isi faaupuga,  e te lē tauina le taua ae o le a e matamata ae fasia i ou luma. A fai latou te agai mai ia te oe i se tasi itu, e fa’ataape i ala e fitu e sosola atu ai i latou i ou luma.

O le isi folafolaga i le Teuterenome 28:13:

“ E fai foi oe e Ieova ma ulu,a e le fai ma i’u e aupitoaluga lava a e te le laualalo; pe a fai e te faalogo I poloaiga a Ieova lou Atua, ou te fai atu ai ia te oe i le aso nei e tausi ia, ma faia;

Mai i le fuaitau o loo taua i luga, e manino mai o le a e manumalo i taimi uma e tusa lava po’o le a se mea e tupu ia te oe. I taimi o lo’u talavou sa ou faata’alo matou pusi tausi i le fale. Sa masani ona ou u’uina vae e fa a le pusi ma tu’utu’u atu aga’i i le fola o le fale ona sei ‘ese lea o o’u lima. O le taimi lava e fa’ama’amulu ai o’u lima, e pei o le ‘emo o le mata le toe tu o le pusi i ona vae! O ia tulaga e fetaui lelei ma le alaga’upu a toea’iina Aferika. ‘O le tua a le pusi e le pa’i i lalo’. O se tasi ia o auala e fa’apea ai, po o lea se mea e tupu ia te oe, e te le toilalo.

O le folafolaga a le Atua ia te oe e faapea, po’o le a lava se mea e tupu ia te oe, o oe lava o le ulu ae le o le i’u; e te aupitoaluga ae e te lē laualalo . Peitai e tatau ona e fa’amauina, e iai lou tofiga e faia mo folafolaga a le Atua e fa’ataunuuina ai i lou olaga.

Le ‘au pele, a iai se folafolaga o e taumafai e faataunuu i lou olaga, ia e sa’ili ni aiaiga i totonu o afioga paia a le Atua,  faatino lau galuega e tatau ona fai, ona e vaai lea ua taunuu nei folafolaga i se taimi talafeagai lelei. O folafolaga a le Atua o le “ioe” ma le “amene”, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 16 TESEMA 2024

(tusia e Pastor EA Adeboye)

Manatu Autu: Alofa o le Atua (Divine Love)

Tauloto -Tusi Paia– Isaia 54:10 “Auā e mavae atu o atu mauga e lūlūina fo‘i mauga; a o lo‘u alofa e lē mavae atu lea nai ‘iā te oe, ma la‘u feagaiga e manuia ai e le lūlūina lea. ‘Ua fetalai mai ai le ALI‘I o lē alofa ‘iā te oe.”

Faitauga – Tusi Paia – Ieremia 31:3-6

 O le alofa o Keriso o loo tatou maua ai le tele o faamanuiaga. Mo se faataitaiga, fai mai le Roma 8:37 “A ‘ua tatou manumālō a‘ia‘i i nei mea uma lava, ‘ona o ia ‘ua alofa mai ‘iā te i tatou.”

O le manumālō a‘ia‘i, o lona uiga faigofie o le manumalo e aunoa ma ni taua. E alofa Le Atua ia te oe ma e finau o ia ma tau mo oe. Fai mai le Roma 8:31 a faatasi le Atua ma I tatou o ai sē e faasagatau mai? O lona uiga e leai se tasi e faasagatau ia te oe e manumalo. 

O se tasi o vaega e faia e le alofa o le Atua mo oe, o le tuuina atu o le manumalo i taua e te lē o silafia. I le tele o tausaga talu ai a’o avea a’u o se faiaoga i le Iunivesite, sa ou malolo i le potu malolo o lou fale e faatali lou alu i la’u vasega . Na moeiini ou mata ona ou te lē manao e faalavelave mai seisi ia te a’u, ae ua faateia au i lo’u faalogoina ni lima ua u’uina ou lima ma vae. Na ou faapea o lo’u toalua aua e pei o se tagata o loo taumafai e fusi a’u ma sogi mai. Peitai, ua ou manatu e tatau ona umi ma malosi tele lenei tagata ona o loo ia tatao uma ou vae ma lima I le taimi e tasi. Na vave ona pupula ou mata ma ou vaaia se temoni umī lava ona mou ese lea. Ua ou faalogoina le malūlūina o lou tino peitai nā vave ou tū I luga ona ua oo I le taimi o la’u vasega.  

Ina ua maea lau vasega, ua amata ona ou pua’i ma tigā le manava. Ua faalogoina le tigaina a’o ou taumafai e malaga i le fale. Na ou tau tolotolo atu I le fale ona o le tigaina. Sa ou iai I le falelētaua ae ou tagi atu I le Atua, ‘Tamā, o le a lenei? E faapefea ona tupu le mea lenei i lou atalii?’. Ua ia tali mai, ‘atalii , sa ou fia faatepa oe I taua o lo’o ou tauina mo oe e te lē o iloa’. Ina ua maea, ua tafieseina atu le ma’i. 

Le au pele e, o lo’o e soifua I le asō aua e alofa le Atua ia te oe. Fai mai le Isaia 54:15, o I latou e faasagatau mai, e pauū ona o oe. E faatamaitiiti se manatu e faapea e alolofa tagata uma ia te oe. E iai taimi e o’o I tagata o lou aiga e inoino pe feitai ia te oe (Mataio 10:36). I lou tulaga o se afafine poo se atalii o Le Atua, e tatau ona e fiafia i lou silafia lelei, e alofa le Atua ia te oe, auā a taupulepule agaga leaga e faasagatau mai ia te oe, e na te faataapeapeina i latou. 

Le au pele e, aua e te fefe I se mea, o oe e te malō a’ia’i ona o le alofa o Keriso. 

Tatalo

Faafetai Iesu i lou alofa ia te a’u, I le suafa o Iesu, Amene. 

OPEN HEAVENS

MATALA LE LAGI MO LE ASO SA 15 TESEMA 2024

(tusia e Pastor EA Adeboye)

Manatu Autu: O Le Upu A Le Atua (The Word Of God)

Tauloto -Tusi Paia– Salamo 119:130 “O le fa‘aalia mai o au afioga e fa‘amalamalamaina ai; e fa‘alotomatalaina ai ē ‘ua faigofie.”

Faitauga – Tusi Paia – 2 Timoteo 3:14-17

Ina ua fa’aosoosoina le Alii e le tiapolo i le Mataio 4:1-11, o le auupega na fa’aaogā e lo tatou Alii o le, “Ua tusia.” E lē mafai e le tiapolo ona finau i lea auupega; pau lana na fai, o le tauloto mai fo’i o le Upu a le Atua ma taumafai e liliu faasesē le uiga. Fai mai le Salamo 119:89; “Le ALI‘I e, ‘ua mausalī lau afioga i le lagi e fa‘avavau lava.”

‭

O le Upu a le Atua e pule aoao, o lona uiga, so’o se tagata faaolaina e malamalama I le Upu, e manumalō pea i togafiti a le tiapolo ma ana au, o le mafuaaga, o le Upu a le Atua e faia le faaiuga ma e lē mafaia e le tiapolo ona sui.

E fa’afia ona e suesue lau Tusi Paia? O le toatele o tagata fanaufouina faatoa susu’e latou Tusi Paia pe a o I le lotu ma faapea mai le faifeau I le aulotu e faitau le mataupu mo le lauga. O le mafuaaga lea o le toatele o kerisiano faiaina i aso nei. Afai e te lē su’esu’e I le Upu a le Atua, o le a faafefea ona e iloa le Atua o loo e auauna i ai ma faamanuiaga ua uma ona ia saunia mo oe?

O le Upu a le Atua e tatau ona pei o le mea tausami ia te oe. Fai mai le tusi o Ieremia 15:16 “Na maua au afioga, ‘ona ‘ou ‘ai ai lea; sa ‘iā te a‘u lau afioga e fai ma mea e ‘oli‘oli ai ma fiafia ai lo‘u loto; auā ‘ua ta‘ua a‘u i lou suafa, le ALI‘I e, le Atua o ‘au.”

‭‭

Afai e te faasilisili Afioga Paia a le Atua faapei o taumafa o loo fa’amoemoe i ai lou soifua lelei, o le a maua ai lou olioli e tele aua ua faafuasei ona e iloa o oe o le tagata ua valaauina i le suafa o le Alii o au. O igoa poo suafa e talaia faitoto’a. Afai o oe o le atali’i o le tupu, so’o se taimi e te taua ai le suafa o lou tamā i so’ose vaipanoa o le mālō, e faaaloalogia oe ma o le a talaia faitoto’a ia te oe, aua o loo ta’ua oe i le suafa o le tupu.

O lo tatou Atua o le tupu o tupu ma le Alii o ‘au. I se isi fa’aupuga, o tupu uma, o ‘au i le lagi, i le lalolagi ma lalo ifo o le lalolagi e ifo uma ia te ia. Afai e te talisua I lana upu, ua fai oe ma sui vaaia o lona suafa. O lona uiga, o ‘au i le lagi, ma le lalolagi ma lalo ifo o le lalolagi o le a galulue faatasi e faatino lou mana’o. Su’esu’e ma a’oa’o le Upu a le Atua ma mafaufau loloto i ai i aso uma. Le au Pele e, o le ala lea e savali ai i faamanuiaga a le Atua mo oe ma maua le manuia e tele (Iosua 1:8). O e ave le faatāua ma le faasilisili I le Upu a Le Atua? I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 14 TESEMA 2024

(tusia e Pastor EA Adeboye)

Manatu Autu: O Le Toto O Iesu (The Blood Of Jesus)

Tauloto -Tusi Paia– Kolose 1:20 “'‘ina ‘ia fa‘aleleia o ia o mea uma lava mā ia, ‘ina ‘ia lelei i le toto o lona satauro, o mea i le lalolagi ‘atoa ma mea o i le lagi. '

Faitauga – Tusi Paia – 1 Peteru 1:18-19

O le toto o Iesu e sili atu le mamana na i loo le malosi o loo manatu i ai le toatele o tagata. O se auupega malosi e mafai ona faaaoga e faigofie ai ona fa’ato’ilalo o tatou fili, le tiapolo ma ana au e pei ona o tatou faitau i le tusi o Faaaliga 12:10-11:10Na ‘ou fa‘alogo fo‘i i le leo tele i le lagi, ‘ua fa‘apea, “O ona pō nei ‘ua o‘o mai ai le fa‘aolataga, ma le mana, ma le mālō o lo tatou Atua, ma le pule a lona Keriso; auā ‘ua lafo i lalo lē na molia o tatou uso, o lē na molia i latou i luma o lo tatou Atua i le ao ma le pō. 11A ‘ua latou manumālō ‘iā te ia ‘ona o le toto o le Tama‘i Mamoe, ma le ‘upu a la latou mau, ‘ua latou lē fa‘apelepeleina fo‘i lo latou ola ‘ua o‘o i le oti.

E tele osofaiga ma te fetaia’i mai le fili leaga mata’utia ma e i’u ifo lava ou te manumalō aua ua a’oa’oina a’u ia faailoa ma folafola le toto o Iesu i taimi uma. I Amerika, e i ai le suiga lona lima i le faavae, o loo i ai le aia a le tagata na te le tali ai i soo se fesili e fesili atu ai i latou e fa’amalosia ma puipuia le tulafono ina ia aua ai ne’i faasalaina e le uso ia lava. O lea la, a e faalogo i se tagata Amerika o faapea, “ou te tautala i le lona lima,” o loo fa’aaogaina e lea tagata le aia tatau e faamauina i le suiga lona lima o le Tulafono faavae a Amerika. I le tulaga lava lea e tasi, a tautala loa se atalii poo se afafine o le Atua i le toto o Iesu, o loo ua faaaoga e ia lana aia tatau e faamauina i le toto o Iesu na maligi i luga o le satauro I Kalevaria, o nisi o ia aia tatau o loo faamauina i le Isaia 53:5: A ‘ua manu‘a o ia ‘ona o a tatou solitulafono, ‘ua momomo o ia ‘ona o a tatou amio leaga. O le a‘oa‘iga e filemū ai tatou sa i ona luga lea, o ona fa‘alavalava fo‘i ‘ua mālōlō ai tatou.

E le mafai ona faia e le tiapolo se mea leaga ia te oe aua ua maea ona manua Iesu Keriso ma faalavalava mo au solitulafono. O le faamalumaluga lea i ou luga mai so’ose malosi o le pouliuli. E le gata i lea, e lē mafaia e le tiapolo ona pa’i i soo se tasi o au uo, o lou aiga, poo meatotino aua e lē tatau ona ia faia se mea e aafia ai lou filemu, aua ua uma ona tauave e Iesu le a’oa’iga o lou filemu i ona lava luga. E faapea fo’i lou soifua maloloina, ua mautu aua o faalavalava o Iesu Keriso ua e malolo ai.

Le au pele e, e mafai ona e fa’ato’ilaloina le tiapolo ma ana au, e ala i le toto o Iesu Keriso aua o le taimi e te ta’utino ai le toto o le Fa’aola, o puapuaga uma lava na uia e Iesu Keriso mo oe e tula’i ai i le va o oe ma le tiapolo I le taimi lea ma saisaitia ai le tiapolo ma tulieseina ma oe. Fai ma au masani e lē aunoa lou ta’u ta’u o le toto o Iesu i ou luga ma luga o lau fanau ma lou aiga, ona e iloa lea o le manumalō iā Keriso, i le suafa o Iesu, Amene.